အခန်း (၁၃၇၉-၁၃၈၀)

အခန်း (၁၃၇၉) - တည်ရှိနေနိုင်သော ရန်သူ

လင်းတုန်း စီးနင်းလိုက်ပါလာသော မသေမျိုးလှေသည် နဂါးနက်လှေ မဟုတ်သော်လည်း အပြင်စည်းကျင့်ကြံသူများအတွက် သီးသန့်ထုတ်လုပ်ထားသော မသေမျိုးလှေစီးရီးများထဲတွင် အဆင့်မြင့်အမျိုးအစား ဖြစ်ဟန်တူသည်။

ထိုအတောအတွင်း ဖန့်ချန်သည် ယွီထျန်းကော်တို့နှင့်လည်း အဆက်အသွယ်ရှိခဲ့ရာ သူတို့ထံမှ အသုံးဝင်သော သတင်းအချက်အလက် အတော်များများကို သိရှိခဲ့ရသည်။

ဥပမာအားဖြင့် ကျွယ်မင်နန်းတော်၏ မသေမျိုးလှေများကို စီးရီးနှစ်ခု ခွဲခြားထားသည်။

ပထမတစ်ခုမှာ ယွမ်လုံလှေ ကို အခြေခံအဆင့်အဖြစ် သတ်မှတ်ထားသော မြေနဂါး စီးရီး ဖြစ်သည်။

ဒုတိယတစ်ခုမှာ နဂါးနက်လှေ ကို အခြေခံအဆင့်အဖြစ် သတ်မှတ်ထားသော မိုးနဂါး စီးရီး ဖြစ်သည်။

ရိုးရှင်းသော ခွဲခြားမှုမှာ ရှေ့တစ်ခုသည် အပြင်စည်းပုဂ္ဂိုလ်များ အသုံးပြုရန်ဖြစ်ပြီး နောက်တစ်ခုမှာမူ အမာခံတပည့်များသာ အသုံးပြုခွင့်ရှိသည်။

မြေနဂါးစီးရီး တည်ရှိရခြင်း၏ ကိုးဆယ့်ကိုးရာခိုင်နှုန်းသော အကြောင်းရင်းမှာ မိုးနဂါးစီးရီးကို အထောက်အပံ့ပေးရန်အတွက်သာ ဖြစ်သည်။

ဥပမာအားဖြင့် ဖန့်ချန် ပိုင်ဆိုင်သော ယွမ်လုံလှေသည် မူလက ကောင်းကင်အဆင့်အနိမ့် မှော်လက်နက်ဖြစ်ပြီး တာအိုပေါင်းစပ်ခြင်းအဆင့်နှင့် ဘေးဒုက္ခဖြတ်ကျော်ခြင်းအဆင့် ကျင့်ကြံသူများပင် ပေါင်းစပ်နားလည်ရန် ခဲယဉ်းသော အရာဖြစ်သည်။

သို့သော် အချို့သော အထူးအကြောင်းရင်းများကြောင့် သူသည် အလွန်လွယ်ကူစွာ ပေါင်းစပ်နိုင်ခဲ့ပြီး ယွမ်လုံလှေ၏ တစ်စိတ်တစ်ပိုင်း ထိန်းချုပ်ခွင့်ကို ရရှိခဲ့သည်။

မှန်ပါသည်၊ တစ်စိတ်တစ်ပိုင်းသာ ဖြစ်သည်။

သူသည် ယွမ်လုံလှေကို စစ်မှန်စွာ ပေါင်းစပ်နိုင်ခဲ့ခြင်း မရှိချေ။

အဓိကအချက်မှာ ယွမ်လုံလှေ၏ နက်ရှိုင်းသောနေရာတွင် မြှုပ်နှံထားသည့် ဗဟိုချက် ပင် ဖြစ်သည်။

၎င်းသည် ဖန့်ချန်နှင့် မသက်ဆိုင်သေးပေ။

ပေါင်းစပ်နားလည်ရန် ကြိုးစားစဉ်ကပင် ဝိညာဉ်စွမ်းအားများသည် ထိုဗဟိုချက်အပေါ် မည်သည့်သက်ရောက်မှုမျှ မရှိသည်ကို ဖန့်ချန် သတိပြုမိခဲ့သည်။

၎င်း၏ တည်ရှိမှုမှာ အလွန်ပင် ထူးခြားလှသည်။

ယခုအခါ ဖန့်ချန်သည် ထိုအရာက အဘယ်ကြောင့် ထူးခြားနေရသနည်းဆိုသည်ကို နားလည်သွားပြီဖြစ်သည်။

သူ၏ ယွမ်လုံလှေ ဖြစ်စေ၊ ရွှင်ဝမ်နယ်မြေချဲ့ထွင်ရေးအဖွဲ့၏ တိုက်ပွဲနဂါးလှေ ဖြစ်စေ၊ ဤအရာအားလုံးမှာ နဂါးနက်လှေကို အလုပ်အကျွေးပြုရန်သာ ဖြစ်သည်။

၎င်းတို့သည် နဂါးနက်လှေ၏ အစိတ်အပိုင်းများသာ ဖြစ်ကြပြီး နဂါးနက်လှေ ပေါ်ထွက်မလာသေးသည့် အချိန်တွင်မှသာ ဖန့်ချန်တို့က အသုံးပြုခွင့်ရကြခြင်း ဖြစ်သည်။

“ဆရာ... ဆရာ့ရဲ့ ဒီမသေမျိုးလှေက ဘယ်အဆင့်လဲဟင် ”

ဖန့်ချန်သည် လင်းတုန်း၏ ရှေ့တွင် ရပ်နေရင်း အနည်းငယ် အံ့ဩနေမိသည်။

လင်းတုန်း၏ မသေမျိုးလှေမှာ ယွမ်လုံလှေထက် များစွာ သာလွန်လှပြီး သူ၏ အဖွဲ့ဝင်များမှာလည်း အနည်းဆုံး အဆင့် ၁ မသေမျိုးများချည်း ဖြစ်ကြသည်။

“မင်း ငါ့ဆီကို ပြေးလာတာ ဒီမေးခွန်း မေးဖို့ပဲလား”

လင်းတုန်းက ပြုံးလိုက်ပြီး

“ငါ့လှေနာမည်က ပျံသန်းနဂါးလှေ လို့ ခေါ်တယ်၊ တိုက်ပွဲနဂါးလှေထက် တစ်ဆင့် ပိုမြင့်တယ်။ မြေနဂါးစီးရီးထဲမှာ တတိယအဆင့်ရှိတဲ့ လှေပေါ့၊ သူ့အပေါ်မှာ နောက်ထပ် နှစ်ဆင့် ကျန်သေးတယ်လေ ”

ဖန့်ချန်က နားလည်သလိုလိုဖြင့် ခေါင်းညိတ်ပြလိုက်ပြီး အနီးနားရှိ အတူတူ ချီတက်နေသော မသေမျိုးလှေ အစီရင်များဆီသို့ အကြည့်ပို့ကာ

“တပည့် ခုနက သတိထားမိတာက... ဒီဟင်းလင်းပြင်ကြီးထဲမှာ တစ်ဦးချင်းစီရဲ့ ကျင့်ကြံမှုအဆင့်က သိပ်ပြီး အရေးမပါတော့သလိုပဲနော်...”

“မင်း ဘာကြောင့် ရောက်လာသလဲဆိုတာ ငါသိပြီ။ ဒီလို သံသယရှိတာကလည်း သဘာဝကျပါတယ်၊ ငါလည်း အစောပိုင်းက မသေမျိုးလှေ အစီရင်ရဲ့ စွမ်းပကားကို ပထမဆုံး မြင်လိုက်ရတုန်းက မင်းလိုပဲ ခံစားခဲ့ရတာ။ အခု လမ်းခရီးမှာ အချိန်ရတုန်းဆိုတော့ ငါ မင်းကို ဒီအကြောင်းတွေ ပြောပြပါ့မယ်။ ဒါပေမဲ့ မင်းအတွက်ကတော့ လောလောဆယ်မှာ ဒါတွေကို သုံးဖို့ အခွင့်အရေး မရှိသေးဘူးပေါ့ ”

လင်းတုန်းက ထို နဂါးနက်လှေ များကို ညွှန်ပြရင်း

“တွေ့လား... ငါတို့လို မြေနဂါးစီးရီး မသေမျိုးလှေတွေဟာ မိုးနဂါးစီးရီး မသေမျိုးလှေတွေကို ဗဟိုချက်အဖြစ် ထားပြီး မသေမျိုးလှေ အစီရင်ကို ဖွဲ့စည်းကြရတာ။ ဒီဟင်းလင်းပြင်ထဲမှာ မသေမျိုးလှေ အစီရင်ရဲ့ စွမ်းပကားဟာ တစ်ဦးချင်းစီရဲ့ အင်အားထက် အများကြီး ပိုပြီး သာလွန်တယ်။ ဥပမာအားဖြင့် လီအမာခံတပည့်ကို ကြည့်၊ ငါတို့လို မြေနဂါးစီးရီး အဖွဲ့တွေကို စုစည်းလိုက်ပြီးတဲ့နောက် သူ တည်ဆောက်လိုက်တဲ့ အစီရင်ရဲ့ စွမ်းအားဟာ ရှေးဟောင်းမသေမျိုးတစ်ပိုင်း တစ်ယောက်ရဲ့ အင်အားထက် မလျော့တော့ဘူး ”

“ရှေးဟောင်းမသေမျိုးတစ်ပိုင်းထက် မလျော့ဘူးလား ဒီအဖွဲ့ထဲမှာ အဆင့် ၅ မသေမျိုးတောင် အများကြီး မရှိဘူး မဟုတ်လား ”

ဖန့်ချန်က သင့်တော်သလို အံ့ဩဟန် ပြလိုက်သည်။

“မှန်တယ်၊ ပုံမှန်ဆိုရင် အဆင့် ၆ မသေမျိုး ငါးယောက်၊ ခြောက်ယောက်လောက် ပူးပေါင်းရင်တောင် ရှေးဟောင်းမသေမျိုးတစ်ပိုင်းရဲ့ ရှေ့မှာ အကျိုးအမြတ် ရဖို့ မသေချာဘူး။ ဒါပေမဲ့ မသေမျိုးလှေ အစီရင်သာ ရှိရင် ငါတို့လို အပြင်စည်း ကျင့်ကြံသူတွေ၊ ငါ့လို အဆင့် ၃ မသေမျိုးတွေနဲ့ မင်းလို ဘေးဒုက္ခဖြတ်ကျော်ခြင်းအဆင့်တွေ အားလုံးကို စုစည်းလိုက်ရင် ရှေးဟောင်းမသေမျိုးတစ်ပိုင်းထက် မနိမ့်တဲ့ အင်အားမျိုးကို ဖန်တီးနိုင်တယ်"

"ဒါဟာ မသေမျိုးလှေ အစီရင်ရဲ့ အခြေခံအကျဆုံး စွမ်းအားပဲ ရှိသေးတာ။ အခု ငါတို့အဖွဲ့ထဲမှာ အမာခံတပည့်တွေ အများကြီး ထပ်တိုးလာပြီဆိုတော့ သူတို့သာ ပူးပေါင်းလိုက်ရင် အစီရင်ရဲ့ စွမ်းအားက ပိုပြီး ကြောက်စရာကောင်းလာလိမ့်မယ် ”

လင်းတုန်းက မာန်ပါပါဖြင့် ပြုံးကာ

“အခုအချိန်မှာ ငါတို့အဖွဲ့ဟာ ရှေးဟောင်းမသေမျိုး တစ်ယောက်နဲ့ ထိပ်တိုက်ရင်ဆိုင်ရင်တောင် အရှုံးပေးစရာ မလိုတော့ဘူး ”

“ဒါဆို... အမာခံတပည့် ရာနဲ့ချီပြီး ပူးပေါင်းလိုက်ရင် နဝမအဆင့် မသေမျိုးကိုတောင်...”

“မင်း အရမ်းတွေးလွန်းသွားပြီ၊ မသေမျိုးလှေ အစီရင်တွေက အဲဒီလောက် လွယ်လွယ်ကူကူ ပူးပေါင်းလို့ ရတာ မဟုတ်ဘူး။ အဲဒီထဲမှာ ပိုပြီး နက်နဲတဲ့ အခြေခံသဘောတရားတွေ ရှိသေးတယ်၊ ငါလည်း ထိတွေ့ခွင့် မရဖူးသေးဘူး။ ဒါပေမဲ့ ငါ အရင်က အမာခံတပည့် လေးယောက် ပူးပေါင်းတာကိုတော့ ကြုံဖူးတယ်။ အဲဒီ လေးယောက်က ညီအစ်ကိုအရင်းတွေဖြစ်လို့ ငယ်ကတည်းက စိတ်ချင်း ဆက်သွယ်နေကြတာ"

"သူတို့ရဲ့ မသေမျိုးလှေ အစီရင်ဟာ အဆင့် ၇ ရှေးဟောင်းမသေမျိုး တစ်ယောက်ကို အေးအေးဆေးဆေး သတ်ဖြတ်နိုင်ခဲ့ရုံတင်မကဘဲ အင်အားတွေတောင် ပိုနေသေးတယ်။ အဲဒီ အမာခံတပည့် လေးယောက်ရဲ့ ကျင့်ကြံမှုအဆင့်က ဘယ်လောက်လဲ သိလား မင်းဆရာ ငါ့လိုပဲ အဆင့် ၃ မသေမျိုးတွေပဲ ရှိသေးတာ ”

လင်းတုန်းက အေးဆေးစွာ ပြုံးလျက်

“ဒါဟာ ငါတို့ ကျွယ်မင်နန်းတော်ရဲ့ အခြေခံအင်အားပဲ၊ ဒါကြောင့်လည်း လူတွေအများကြီးက ကျွယ်မင်နန်းတော်ကို ဝင်ချင်ကြပြီး အမာခံတပည့် ဖြစ်ချင်ကြတာပေါ့။ အမာခံတပည့်တွေပဲ မသေမျိုးလှေ အစီရင်အတတ် ကို တတ်မြောက်နိုင်တာ ”

“လှေတွေပေါ်က အစီရင်တွေ ပေါင်းစည်းလိုက်ရုံနဲ့ ဒီလောက် ကြောက်စရာကောင်းတဲ့ စွမ်းအားတွေ ထွက်လာနိုင်တာလား တကယ်ကို စိတ်ကူးကြည့်ဖို့ ခက်တယ်နော် ”

ဖန့်ချန်က တိုးတိုးလေး ရေရွတ်လိုက်သည်။

“အစီရင်တွေ ပေါင်းစည်းရုံတင် မကဘူး။ မင်း ခုနက သူတို့ အစီရင်မသေမျိုးအတတ် သုံးတာကို မမြင်ခဲ့ရတာက ကျွယ်မင်နန်းတော်ထဲမှာ မသေမျိုးလှေ အစီရင်ကိုလည်း ကွပ်ကဲနိုင်၊ အစီရင်မသေမျိုးအတတ်ကိုလည်း သုံးနိုင်တဲ့သူက လက်ချိုးရေလို့ ရတယ်။ အားလုံးပေါင်း ၁၀ ယောက်ကျော်လောက်ပဲ ရှိတာ။ အစီရင်တွေအပေါ်မှာပဲ မှီခိုရင် စွမ်းအားက ကြီးမားတယ်ဆိုပေမဲ့ အစီရင်မသေမျိုးအတတ်လောက်တော့ အဝေးကြီး လိုသေးတယ် ”

လင်းတုန်းက ဆက်ပြောပြသည်

“တကယ်လို့ အစီရင်ဗဟိုချက် နဲ့ လူနှင့်အစီရင် တစ်သားတည်း ဖြစ်သွားတဲ့ အခြေအနေကို ရောက်မှသာ မင်းဟာ အစီရင် ဖြစ်သွားမယ်၊ အစီရင်ကလည်း မင်း ဖြစ်သွားမယ်။ အဲဒီအချိန်ကျရင် မင်းဟာ ဖော်ပြလို့မရတဲ့ တည်ရှိမှုတစ်ခု ဖြစ်သွားပြီး မင်း တစ်သက်လုံး သင်ယူခဲ့သမျှ အတတ်ပညာတွေကို အစီရင်ကတစ်ဆင့် အစွမ်းကုန် ထုတ်သုံးနိုင်လိမ့်မယ်။ အဲဒီ အရှိန်အဝါနဲ့ စွမ်းအားကတော့ မင်း ထင်ထားတာထက် အများကြီး ပိုလိမ့်မယ် ”

ဖန့်ချန်သည် လင်းတုန်း ပြောလိုသည့် အဓိပ္ပာယ်ကို နားလည်သွားသကဲ့သို့ ခံစားလိုက်ရပြီး စိတ်ထဲမှ အခြားသော သံသယတစ်ခုလည်း ပြေပျောက်သွားသည်။

“ဆရာ... ဒါကြောင့်ပဲ မသေမျိုးလှေ အစီရင်ရဲ့ စွမ်းအားက အရမ်းကြောက်စရာကောင်းလွန်းလို့ အခုလို အမာခံတပည့်တွေက ကျနော်တို့ကို စစ်မှုထမ်းဖို့ လိုအပ်တဲ့ အချိန်မျိုးမှာမှ အစီရင်ကို ဖွဲ့စည်းခွင့် ရှိတာလားဟင် ”

“မှန်တယ်၊ ဒါဟာ အင်အားကို ထိန်းညှိတဲ့ စနစ်တစ်ခုပဲ။ တချို့ အမာခံတပည့်တွေက အဆင့် ၁ မသေမျိုးတွေပဲ ရှိသေးတာဆိုတော့ သူတို့ရဲ့ စိတ်ဓာတ်က လွှမ်းမိုးခံရလွယ်တယ်။ တကယ်လို့ သူတို့က ဒီလို ကြောက်စရာကောင်းတဲ့ စွမ်းအားမျိုးကို အမြဲတမ်း ပိုင်ဆိုင်ထားမယ်ဆိုရင် အထက်နယ်မြေသုံးခုအတွက် ဘေးအန္တရာယ် ဖြစ်နိုင်တယ်"

"ဒါကြောင့် တားမြစ်နယ်မြေ လုပွဲလိုမျိုး အထူးအခြေအနေတွေမှာမှ ကျွယ်မင်နန်းတော်က သူတို့ကို ငါတို့ကို စုစည်းခွင့် ပြုတာ။ ပုံမှန်အချိန်မှာတော့ သူတို့က ငါတို့ကို အကြောင်းမဲ့ စုစည်းဖို့ မလုပ်ရဲကြဘူး၊ အဲဒါဆိုရင် အကြီးအကဲတွေရဲ့ အပြစ်ပေးမှုကို ခံရမှာပဲ ”

လင်းတုန်းက ခေါင်းကို အသာအယာ ညိတ်ရင်း

“တခြား အင်အားစုတွေလည်း ငါတို့နဲ့ အတူတူပါပဲ။ မသေမျိုးလှေ အစီရင်တွေ ရှိနေရတာက အချင်းချင်း တိုက်ခိုက်ဖို့တင် မကဘူး၊ တကယ်တမ်းကတော့ တည်ရှိနေနိုင်တဲ့ အချို့သော ရန်သူတွေ အတွက် ပြင်ဆင်ထားတာ ”

ဖန့်ချန်၏ မျက်လုံးများက လှုပ်ရှားသွားပြီး သံသယ ဖြစ်ဟန်ဖြင့် မေးလိုက်သည်

“တည်ရှိနေနိုင်တဲ့ ရန်သူ ထိုက်ယီမသေမျိုးဂိုဏ်းတို့၊ ကြယ်တစ်သောင်းနန်းတော်တို့လို အဖွဲ့တွေကို ပြောတာလား ”

“မဟုတ်ဘူး။ မင်းလည်း မြင်တဲ့အတိုင်းပဲ၊ ဟင်းလင်းပြင်ကြီးက ဘယ်လောက် ကျယ်သလဲ။ လူ့လောကကိုးခုပဲ ရှိတယ်လို့ မင်း အာမခံနိုင်မလား ဖြစ်နိုင်တာကတော့ ဒီအဆုံးမဲ့တဲ့ ဟင်းလင်းပြင်ကြီးထဲမှာ ငါတို့ လူ့လောကကိုးခုကို ဝါးမြိုဖို့ ချောင်းမြောင်းနေတဲ့ အမည်မသိ ရန်သူတွေ ရှိနေနိုင်တယ်။ မသေမျိုးလှေ အစီရင်ဆိုတာ သူတို့အတွက် ပြင်ဆင်ထားတာပဲ ”

လင်းတုန်း၏ မျက်ဝန်းများက နက်ရှိုင်းသွားပြီး ဟင်းလင်းပြင်ကြီးဆီသို့ ငေးကြည့်နေမိသည်။

ခဏအကြာတွင် သူက အကြည့်ကို ပြန်ရုပ်သိမ်းလိုက်ပြီး ရယ်မောကာ

“ဒါတွေက ခန့်မှန်းချက်တွေပါပဲ၊ ငါတို့ စိုးရိမ်နေရမယ့် အရာတွေ မဟုတ်ပါဘူး။ မင်း လုပ်စရာ ရှိတာကိုပဲ အာရုံစိုက်လုပ်စမ်းပါ၊ အရင်ဆုံး လွတ်လပ်သောမသေမျိုး ဖြစ်အောင် ကြိုးစားဦး ”

ဖန့်ချန်က ခေါင်းညိတ်ပြလိုက်သည်။

သူသည် အစီရင်ဗဟိုချက် ကို ရရှိအောင် ကြိုးစားပြီး မသေမျိုးလှေ အစီရင်၏ စွမ်းအားကို ပိုင်ဆိုင်ရမည်။

ဖြစ်နိုင်လျှင် သူကိုယ်တိုင် စိတ်ကြိုက် ကွပ်ကဲနိုင်မည့် ကိုယ်ပိုင် အဖွဲ့အစည်းကြီးတစ်ခုကို တည်ထောင်ရမည်ဟု သူ စိတ်ပိုင်းဖြတ်လိုက်တော့သည်။

အခန်း (၁၃၈၀) - အစီရင်မသေမျိုးအတတ်

“ဒီရက်ပိုင်း ခေါင်းဆောင်က ဘာလို့ စိတ်မကြည်မလင် ဖြစ်နေတာလဲ မသိဘူးနော်”

“လင်းစီနီယာဆီက ပြန်လာကတည်းက ဒီပုံစံဖြစ်နေတာ။ အဆူခံလိုက်ရလို့လား ဒါပေမဲ့ ပြီးခဲ့တဲ့ ပြိုင်ပွဲတုန်းက ခေါင်းဆောင်က ယွီထျန်းကော်လို ငွေဖြူကျောက်စိမ်းပြား ပိုင်ရှင်ကိုတောင် အနိုင်ယူခဲ့တာပဲကို...”

လင်းယွမ်နှင့် မုံချင့်လင်တို့သည် အသံလွှင့်ကာ တိုးတိုးတိတ်တိတ် ဆွေးနွေးနေကြသည်။

ကြာနီနတ်မိမယ်ငယ်နှင့် ယွီဝူရှီးတို့ကမူ ဘေးပတ်ဝန်းကျင် အခြေအနေကို သတိကြီးစွာဖြင့် စောင့်ကြည့်နေကြသည်။

သို့သော် သူတို့၏ သတိထားမှုမှာ တကယ်တမ်းတွင် အရာမရောက်လှပေ။

တိုက်ပွဲတစ်ခုခု အမှန်တကယ် ဖြစ်ပွားလာပါက သူတို့လုပ်ဆောင်ရမည့် တစ်ခုတည်းသော အလုပ်မှာ ဝိညာဉ်စွမ်းအားများကို အတင်းအကျပ် ထည့်သွင်းပေးရန်သာ ဖြစ်သည်။

“တည်ရှိနေနိုင်တဲ့ ရန်သူ... မသေမျိုးလှေ အစီရင်ဆိုတာ သူတို့အတွက် ပြင်ဆင်ထားတာ...”

ဖန့်ချန်သည် စိတ်ထဲမှ သက်ပြင်းတစ်ချက် ချလိုက်မိသည်။

လင်းတုန်း၏ စကားများက သူ၏ နားထဲတွင် ဝဲလည်နေဆဲပင်။

အထက်နယ်မြေသုံးခု၏ ကျင့်ကြံခြင်းလမ်းစဉ်သည် အမှန်တကယ်ပင် တိုးတက်ပြောင်းလဲနေသည်။

အထက်နယ်မြေ၏ အဆင့်မြင့်ပုဂ္ဂိုလ်များသည်လည်း သူတို့၏ အမြင်ကို ကျယ်ကျယ်ပြန့်ပြန့် ဖွင့်လှစ်ထားကြပြီး နောက်ဆုံးတွင် မသေမျိုးလှေ အစီရင် ဟုခေါ်သော လူသတ်လက်နက်ကြီးကို ဖန်တီးနိုင်ခဲ့ကြသည်။

သူတို့၏ အတွေးအခေါ်မှာလည်း မှားယွင်းမည်မဟုတ်ပေ။

ကျယ်ပြောလှသော စကြဝဠာကြီးထဲတွင် အမည်မသိရန်သူများ အမှန်တကယ် ရှိနေနိုင်သည်မှာ သေချာသလောက်ပင်။

ထိုအရာများအတွက် ကြိုတင်ပြင်ဆင်ထားခြင်းမှာ သူတို့၏ စီမံကိန်းအမြင် အလွန်ဝေးကွာလှသည်ဟု ဆိုရမည်ဖြစ်ရာ လေးစားထိုက်ပေသည်။

သို့သော် သူတို့ကိုယ်တိုင်ကလည်း ထိုအမည်မသိ တည်ရှိမှုများအတွက် ရန်သူ ဖြစ်နေနိုင်သည်ကိုမူ သူတို့ သိချင်မှ သိပေလိမ့်မည်။

အကယ်၍ တစ်နေ့တွင် လူတိုင်းသည် ယခင်ဘဝမှ မှတ်ဉာဏ်များကို ပြန်လည်ရရှိလာပြီး မိမိတို့ကိုယ်မိမိ မိစ္ဆာ များဖြစ်ကြောင်း၊ လုယက်တိုက်ခိုက်လိုစိတ်ကြောင့် လူ့လောကကိုးခုသို့ တမင်တကာ လူဝင်စားလာခဲ့ခြင်းဖြစ်ကြောင်း သိသွားခဲ့လျှင်... ထိုမသေမျိုးလှေ အစီရင်၏ တည်ရှိမှုသည် အဘိုးကြီးတို့ ကို ဖိနှိပ်မည့် နောက်ဆုံးသော ကောက်ရိုးတစ်မျှင် ဖြစ်လာပေလိမ့်မည်။

ထိုအကြောင်းကြောင့်ပင် ဖန့်ချန်သည် အစီရင်ဗဟိုချက် ကို ရယူရန်နှင့် မသေမျိုးလှေ အစီရင် ကို ပိုင်ဆိုင်ရန် ကြိုးစားရပေဦးမည်။

ယခင်က သူသည် အထက်နယ်မြေသုံးခု၏ အခြေအနေကို မသိရှိခဲ့သော်လည်း ယခု သိရှိသွားပြီဖြစ်ရာ အနာဂတ်အတွက် စီမံကိန်းများ စတင်ဆွဲရတော့မည်။

မိမိကိုမိမိ သိသလို ရန်သူကိုလည်း သိမှသာ တိုက်ပွဲတိုင်းတွင် အောင်နိုင်မည်ဖြစ်သည်။

အကယ်၍ သူသာ တိတ်တဆိတ် ကျင့်ကြံနေပြီး တစ်နေ့တွင် အဆင့် ၈ သို့မဟုတ် အဆင့် ၉ သို့ ရောက်ရှိသွားသည့်တိုင်... အဆင့် ၉ မသေမျိုးများ ပူးပေါင်းဖွဲ့စည်းထားသည့် မသေမျိုးလှေ အစီရင်နှင့် ရင်ဆိုင်ရလျှင် မည်သို့ဖြစ်လာမည်နည်း

တစ်ချက်တည်းနှင့် အသတ်ခံရနိုင်ခြေ အလွန်များလှသည်။

“ဒုတိယလမ်းစဉ်လည်း ရှိသေးတယ်... တကယ်လို့ ကျွယ်မင်နန်းတော်က အမာခံတပည့်တွေ ဒါမှမဟုတ် တခြားအင်အားစုက အမာခံတပည့်တွေကို အောက်နယ်မြေခြောက်ခုကို သွားခိုင်းလို့ ရရင်... ပြီးတော့ သူတို့ကို ယင်လောက ထဲကို ခေါ်သွားပြီး ယင်လောကရဲ့ နတ်ဘုရားတွေအဖြစ် တရားဝင် ဘွဲ့နှင်း ပေးနိုင်ခဲ့ရင်... မသေမျိုးလှေ အစီရင်ကို သွယ်ဝိုက်ပြီး ထိန်းချုပ်နိုင်သွားလိမ့်မယ်"

"ဒါပေမဲ့ ဒီလမ်းစဉ်က ကြည့်ရတာ လွယ်သလိုနဲ့ တကယ်လုပ်ဖို့က အရမ်းခက်တယ်။ သူတို့က အမာခံတပည့်တွေ ဖြစ်နေတော့ သူတို့ရဲ့ လှုပ်ရှားမှုတိုင်းက စောင့်ကြည့်ခံနေရနိုင်တယ်။ သူတို့ကို အထက်နယ်မြေကနေ ထွက်ခွာခိုင်းဖို့ဆိုတာ မလွယ်ကူတဲ့ ကိစ္စပဲ။ ဒါပေမဲ့လည်း... ကြိုးစားကြည့်ရမှာပဲ”

“ခေါင်းဆောင် တိုက်ပွဲစပြီ ”

လင်းယွမ်တို့ သတိပေးစရာပင် မလိုတော့ချေ။

ဖန့်ချန်သည် ရင်းနှီးနေသော တုန်ခါမှုတစ်ခုကို ခံစားလိုက်ရပြီဖြစ်သည်။

လီရှမ်းဇီက မသေမျိုးလှေ အစီရင်ကို ဖွဲ့စည်းရန် ပြင်ဆင်တိုင်း ထိုကဲ့သို့သော တုန်ခါမှု ပေါ်ပေါက်လေ့ရှိသည်။

လူတိုင်းသည် စကားတစ်ခွန်းမျှ မပြောဘဲ ယွမ်လုံလှေ ထဲသို့ ဝိညာဉ်စွမ်းအားများ စတင်ထည့်သွင်းကြတော့သည်။

ထိုစွမ်းအားများသည် ယွမ်လုံလှေ၏ ဗဟိုချက်မှတစ်ဆင့် လီရှမ်းဇီရှိရာ နဂါးနက်လှေ ဆီသို့ စီးဝင်သွားကြသည်။

မသိမသာပင် ဘေးပတ်ဝန်းကျင်ရှိ ကြယ်တာရာဟင်းလင်းပြင်ထဲတွင် မသေမျိုးလှေ အစီရင် ဆယ်ခုကျော် ပေါ်ထွက်လာသည်။

ရှေ့ဆုံးမှ အစီရင်မှာမူ ကိုယ်ဟန်အနေအထားမှာ အလွန်ပင် ကြောက်မက်ဖွယ်ကောင်းပြီး သာမန်အစီရင်ထက် နှစ်ဆခန့် ပိုကြီးသည်။

ထိုအစီရင်အားလုံး၏ တူညီသော အချက်တစ်ခုမှာ အားလုံးသည် ကရုဏာရှင် လက်တစ်ထောင်ဘုရားပုံသဏ္ဌာန်များ ဖြစ်နေကြခြင်းပင်။

နှစ်ဖက်စလုံး ရင်ဆိုင်မိချိန်တွင် ချက်ချင်း တိုက်ခိုက်ခြင်း မပြုသေးဘဲ စကားစမြည် အရင်ပြောကြသည်။

ထို့နောက် လီရှမ်းဇီတို့သည် ဖမ်းဆီးရမိထားသော နဂါးမင်းကျောင်းတော်မှ ရဟန်းပျို ယွမ်ကွမ်း ကို တစ်ဖက်နှင့် လဲလှယ်လိုက်သည်ကို မြင်တွေ့ရသည်။ မျ

က်နှာဖြူဖျော့ကာ ဘဲဥပုံမျက်နှာရှိသော အဆင့် ၂ ကျင့်ကြံသူ အမျိုးသမီးတစ်ဦးနှင့် လဲလှယ်လိုက်ခြင်း ဖြစ်သည်။

ထိုအမျိုးသမီး ကျင့်ကြံသူသည် ကျွယ်မင်နန်းတော် ဘက်အခြမ်းသို့ ရောက်ရှိလာသည်နှင့် အမာခံတပည့်တစ်ဦး၏ ရင်ခွင်ထဲသို့ တိုးဝင်သွားတော့သည်။

ထိုအမာခံတပည့်မှာမူ ဒေါသအလွန်အမင်း ထွက်နေပြီး တစ်ဖက်မှ အကြီးဆုံးသော လက်တစ်ထောင်ဘုရား အစီရင်ကို စိုက်ကြည့်နေသည်။

“သုံ့ပန်းလဲရုံတင်လား၊ တိုက်စရာ မလိုတော့ဘူးလား ဒါဆိုရင်တော့ တော်သေးတာပေါ့”

လင်းယွမ်က မသိစိတ်ဖြင့် ရေရွတ်လိုက်သည်။

“ဘယ်သူက တိုက်စရာ မလိုဘူးလို့ ပြောလဲ၊ သုံ့ပန်းလဲပြီးတာနဲ့ တိုက်ပွဲစမယ့် အချိန်ပဲ”

ဖန့်ချန်က ပေါ့ပေါ့ပါးပါးပင် ဆိုလိုက်သည်

“အားလုံး ဝိညာဉ်ကျောက်တုံးတွေ ပြင်ထားကြ၊ ဝိညာဉ်စွမ်းအားကို အချိန်မရွေး ဖြည့်နိုင်အောင်လို့ ဆေးလုံးတွေကိုလည်း မမေ့နဲ့။ ဒီတစ်ခေါက်က အချိန်အကြာကြီး တိုက်ရမယ့် တိုက်ပွဲပဲ”

သူတို့ဘက်တွင် နဂါးနက်လှေ ခုနစ်စင်းသာ ရှိသဖြင့် နဂါးနက်အစီရင် ခုနစ်ခုသာ ရှိသည်။

နဂါးမင်းကျောင်းတော် ဘက်တွင်မူ အစီရင် ဆယ်ခုကျော် ရှိနေသဖြင့် အရေအတွက်ချင်း မမျှတပေ။

သို့သော် ဖန့်ချန်သည် ထိုပဉ္စမစီနီယာအစ်ကို နန်မင်ရုယွဲ့ ၌ လီရှမ်းဇီပင် အားကိုးရသည့် အတတ်ပညာ တစ်ခုခု ရှိနေလိမ့်မည်ဟု ထင်မှတ်ထားသည်။

သူသည် လင်းတုန်းပြောခဲ့သော အစီရင်မသေမျိုးအတတ် ကို သုံးနိုင်သည့်၊ အစီရင်ဗဟိုချက်နှင့် တစ်သားတည်း ဖြစ်နေသည့် ပါရမီရှင်တစ်ဦး ဖြစ်နိုင်မလား

အမှန်ပင်... ဖန့်ချန်၏ သတိပေးစကား အဆုံးသတ်သွားသည်နှင့် နှစ်ဖက်စလုံးသည် သုံ့ပန်းလဲလှယ်ပြီးနောက် တိုက်ပွဲကို တိုက်ရိုက် စတင်လိုက်ကြတော့သည်။

ဤတစ်ကြိမ်တွင် လီရှမ်းဇီသည် ကျိရှန့်နှင့် ပူးပေါင်းခြင်း မပြုတော့ဘဲ တစ်ဦးစီ ခွဲ၍ တိုက်ခိုက်ကြသည်။

နဂါးနက်အစီရင် ခုနစ်ခုသည် နန်မင်ရုယွဲ့ကို ဗဟိုပြုကာ ဟင်းလင်းပြင်ထဲတွင် လက်တစ်ထောင်ဘုရား အစီရင် ဆယ်ခုကျော်နှင့် စတင် တိုက်ခိုက်ကြတော့သည်။

ကြောက်မက်ဖွယ်ကောင်းသော တုန်ခါမှုများကြောင့် လင်းယွမ်တို့ကဲ့သို့သော လွတ်လပ်သောမသေမျိုး မဟုတ်သည့် ကျင့်ကြံသူများမှာ အချိန်မရွေး သေဆုံးသွားနိုင်သည်ဟု ထင်ရလောက်အောင် ထိတ်လန့်နေကြသည်။

အကယ်၍ သူတို့ကိုယ်တိုင် ထွက်၍ တိုက်ခိုက်ရမည်ဆိုပါက ဤမျှ ကြောက်စရာကောင်းမည် မဟုတ်ပေ။

ယခုမူ သူတို့သည် နဂါးနက်အစီရင်ပေါ်ရှိ နဂါးအကြေးခွံ တစ်ခုမျှသာ ဖြစ်နေကြသည်။

ဖန့်ချန်သည် ဝိညာဉ်စွမ်းအားများ ထည့်သွင်းပေးနေရင်း တစ်ဖက်တွင်လည်း နှစ်ဖက်အစီရင်များ၏ တိုက်ခိုက်မှုကို စောင့်ကြည့်နေသည်။

လီရှမ်းဇီ ကွပ်ကဲနေသော နဂါးနက်အစီရင်မှာ အတော်လေး ရဲရင့်သော်လည်း ယခုအချိန်အထိ မသေမျိုးလှေ အစီရင်၏ ကိုယ်ပိုင်စွမ်းအားကိုသာ သုံးနေရဆဲ ဖြစ်ပြီး လင်းတုန်းပြောခဲ့သော အစီရင်မသေမျိုးအတတ် ကို မသုံးနိုင်သေးပေ။

“ဒီအတိုင်းဆိုရင်တောင် ရှေးဟောင်းမသေမျိုးတစ်ပိုင်းရဲ့ စွမ်းအား ရှိနေတာပဲ။ ဒါပေမဲ့ ဒီစွမ်းအားကို လီရှမ်းဇီက အမြဲတမ်း မသုံးနိုင်ဘူး၊ အထူးအခြေအနေမျိုးမှာပဲ သုံးနိုင်တာ”

“ဒီလိုဆိုရင်တော့ ရှေးဟောင်းမသေမျိုးတစ်ပိုင်း အစစ်အမှန်တစ်ယောက်လောက် စိတ်ချရမှု မရှိသေးဘူး။ ဒါပေမဲ့ လူ့လောကကိုးခုထဲမှာ... ရှေးဟောင်းမသေမျိုးတစ်ပိုင်း အရေအတွက်ဟာ အင်အားစုအသီးသီးက မသေမျိုးလှေ အစီရင်တွေလောက်တောင် များမှာ မဟုတ်ဘူး...”

နဂါးနက်လှေပေါ်တွင် လီရှမ်းဇီ၏ မျက်နှာမှာ ဖြူဖျော့နေသည်။

သူ၏ ကိုယ်ပေါ်မှ ထူးခြားသော စွမ်းအားတစ်ခု ထွက်ပေါ်လာပြီး နဂါးနက်လှေ၏ ဗဟိုချက်နှင့် ဆက်သွယ်လိုက်သည်။

သူသည် လက်တစ်ထောင်ဘုရား အစီရင် နှစ်ခု၏ ဝိုင်းဝန်းတိုက်ခိုက်မှုကို ခံနေရသဖြင့် အခြေအနေမှာ အားနည်းနေသည်။

တိုတောင်းလှသော အချိန်အတွင်းမှာပင် မသေမျိုးလှေ ရာပေါင်းများစွာသည် ဟင်းလင်းပြင်ထဲတွင် ပြာကျသွားခဲ့ရပြီ။

၎င်းမှာ သူ၏ နဂါးနက်အစီရင် စွမ်းအားကို သွယ်ဝိုက်သောနည်းဖြင့် လျှော့ချလိုက်ခြင်းပင် ဖြစ်သည်။

“ငါဟာ မသေမျိုးလှေ လေးထောင်ကိုတောင် ကွပ်ကဲနိုင်နေပြီပဲ၊ အစီရင်မသေမျိုးအတတ်ကို သုံးနိုင်တဲ့ အစွမ်းရှိသင့်နေပြီ မဟုတ်လား... ဘာလို့... ဘာလို့ ငါ အခုထိ မသုံးနိုင်သေးတာလဲ...”

လီရှမ်းဇီ၏ အကြည့်မှာ သူ၏ အဖွဲ့သားများဆီသို့ မသိစိတ်ဖြင့် ဝေ့ကြည့်လိုက်မိသည်။

ဤအဆင့် ၁၊ အဆင့် ၂ မှသည် အဆင့် ၅ မသေမျိုးများအထိ အားလုံးမှာ သူ့ကို ယုံကြည်ပြီး တစ်ဆင့်ချင်း လိုက်ပါလာခဲ့ကြသော လူယုံတော်များ ဖြစ်ကြသည်။

အစီရင်နှစ်ခု၏ ဝိုင်းဝန်းတိုက်ခိုက်မှုကို ခံနေရပြီး သေဆုံးနိုင်သည့် အန္တရာယ် ရှိနေသော်လည်း မည်သူကမျှ ညည်းညူခြင်း မရှိဘဲ မိမိတို့၏ မသေမျိုးစွမ်းအင်များကို အဆက်မပြတ် လောင်မြိုက်ကာ ထည့်သွင်းပေးနေကြသည်။

စက္ကန့်တိုင်းတွင် ကုန်ဆုံးသွားသော မသေမျိုးကျောက်တုံး အရေအတွက်မှာ ကြောက်ခမန်းလိမ္မော်ပင်။

လွတ်လပ်သောမသေမျိုးများအတွက် မသေမျိုးစွမ်းအင် ဆိုသည်မှာ သက်တမ်းနှင့် အတူတူပင် ဖြစ်သည်။

သာမန်အားဖြင့် မည်သည့်မသေမျိုးကမျှ မိမိ၏ စွမ်းအင်များကို ဤကဲ့သို့ မကုန်ဆုံးလိုကြချေ။

ထိုအချိန်တွင် လက်တစ်ထောင်ဘုရား အစီရင်တစ်ခုမှ တောက်ပသော နတ်ဘုရားအလင်းတန်းတစ်ခု ရုတ်တရက် ပေါက်ကွဲထွက်လာပြီး ထက်ရှလှသော လက်ဝါး သည် နဂါးနက်အစီရင်၏ ဝမ်းဗိုက် ကို တည့်တည့် ထိုးဖောက်သွားတော့သည်။

ထိုတိုက်ခိုက်မှု တစ်ချက်တည်းဖြင့်ပင် ဗဟိုချက် မသေမျိုးလှေ ရာပေါင်းများစွာ ပျက်စီးသွားခဲ့ရသည်။

ဖန့်ချန်တို့သည်လည်း ဤမြင်ကွင်းကို မြင်တွေ့လိုက်ရသည်။

အဘယ်ကြောင့်ဆိုသော် သူတို့သည် ထို ဝမ်းဗိုက် နေရာနှင့် မဝေးသောကြောင့်ပင်။

“သောက်ကျိုးနည်း ငါ မသေချင်သေးဘူး ဟို လီအမာခံတပည့်က တောင့်ခံနိုင်ပါ့မလား ”

လင်းယွမ်က ဆဲဆိုရင်း ရူးသွပ်နေသကဲ့သို့ ဝိညာဉ်စွမ်းအားများကို ဆက်တိုက် ထည့်သွင်းနေတော့သည်။

ထိုစဉ်မှာပင် အသံတစ်ခုသည် လူတိုင်း၏ နားထဲတွင် ဟိန်းထွက်လာသည်။

“ပျက်စီးခြင်းဓား ”

နန်မင်ရုယွဲ့ ရှိရာ နဂါးနက်အစီရင်မှ ဓားရိပ်တစ်ခု ချက်ချင်း ပေါက်ကွဲထွက်လာသည်ကို လူတိုင်း မြင်တွေ့လိုက်ရသည်။

“အစီရင်မသေမျိုးအတတ်... ပျက်စီးခြင်းဓား မင်းက နန်မင်ရုယွဲ့လား ”

လက်တစ်ထောင်ဘုရား အစီရင်ဘက်မှ ထိတ်လန့်တကြား အော်ဟစ်သံတစ်ခု ထွက်ပေါ်လာသည်။

ထို့နောက်တွင် တိုက်ပွဲမှာ ပြီးဆုံးသွားတော့သည်။

လက်တစ်ထောင်ဘုရား အစီရင် ဆယ်ခုကျော်သည် တစ်ပြိုင်နက်တည်းတွင် လှုပ်ရှားမှုအားလုံးကို ရပ်တန့်လိုက်ကြသည်။

“ကျုပ်တို့ လက်နက်ချပါတယ်”

နှမြောစရာကောင်းသည်မှာ နောက်ကျသွားခဲ့ပြီ ဖြစ်သည်။

အကြီးမားဆုံးသော လက်တစ်ထောင်ဘုရား အစီရင်သည် ထိုဓားချက်အောက်တွင် ပြာအဖြစ်သို့ ပြောင်းလဲသွားခဲ့ရပြီ။

မသေမျိုးလှေ ထောင်ပေါင်းများစွာနှင့် ၎င်းပေါ်ရှိ အဆင့် ၄၊ အဆင့် ၅ မသေမျိုးများ အားလုံးမှာလည်း ထိုဓားချက်တစ်ချက်တည်းဖြင့် အသတ်ခံလိုက်ရလေသည်။

“ဒီစွမ်းအားကတော့... လင်းတုန်း ကြွားတာ မဟုတ်ဘူးပဲ”

ဖန့်ချန်က မျက်တောင်ခတ်ရင်း အံ့ဩနေမိတော့သည်။