အခန်း (၃၇၆-၃၇၈)

အခန်း (၃၇၆) - မိစ္ဆာကျင့်ကြံသူ အုပ်စု၊ ရိတ်သိမ်းခြင်း

~တာအိုဆရာမ ချင်းချွမ်က မထီမဲ့မြင် ပြုလိုက်သည့်ပုံစံဖြင့် နှာခေါင်းတစ်ချက် ရှုံ့လိုက်သည်။

“သူက သူ့ကိုယ်သူ အကောင်းမှတ်ပြီး အပျင်းထူလွန်းနေတာ... သူ့ဘဝမှန်သူ သိအောင် ကျွန်မ ကောင်းကောင်း ဆုံးမပေးရဦးမယ်... ဒါပေမဲ့ သူ တွက်ချက်တာ လွဲသွားပြီ... သူက ပါရမီရှိပြီး တံခါးပိတ် ကျင့်ကြံနေတယ် ဆိုပေမယ့် လက်ရှိအချိန်မှာ ကျွန်မကို ဘယ်ယှဉ်နိုင်ပါ့မလဲ...”

“သူ တံခါးပိတ်ကျင့်ကြံရာကနေ ထွက်လာတာနဲ့ ကျွန်မ..သူ့ကို ကောင်းကောင်းကြီး ပညာပေးပြီး တစ်ခဏလေးတောင် အနားပေးမှာ မဟုတ်ဘူး...”

လမင်းဧကရီ နတ်သမီးက စကားလမ်းကြောင်း လွှဲလိုက်သည်။

“ရှုဟိုင် ဘက်က အခြေအနေ ဘယ်လိုရှိလဲ... သွေးရောင် ဖီးနစ် အင်မော်တယ် ဂိုဏ်းနဲ့ အဆက်အသွယ် ရပြီလား... သူတို့ဘက်က သဘောထား ဘယ်လိုရှိသလဲ...”

တာအိုဆရာမ ချင်းချွမ်က မျက်မှောင်အနည်းငယ် ကြုတ်လိုက်သည်။

“သူ ဖုန်းလော့ စံအိမ်တော်ကို သွားခဲ့ပေမယ့် သွေးရောင် ဖီးနစ် အင်မော်တယ် ဂိုဏ်းက လူတွေနဲ့ တွေ့ခွင့်မရခဲ့ဘူး... သူတို့က ရွှေအမြုတေ အဆင့် (၁) ရှိတဲ့ အကြီးအကဲ တစ်ယောက်ကိုပဲ လွှတ်ပြီး ဧည့်ခံခိုင်းတယ်...”

“သူတို့ ပြောစကားအရ ဆိုရင်တော့ နတ်မိမယ် ဖုန်းလင်ကို သွေးရောင် ဖီးနစ် အင်မော်တယ် ဂိုဏ်းဆီ အပ်နှံစေချင်တဲ့ ပုံပဲ...”

လမင်းဧကရီ နတ်သမီး၏ မျက်နှာထား တင်းမာခက်ထန်သွားပြီး သူမ၏ မျက်ဝန်းများက ရေခဲတမျှ အေးစက်သွားလေသည်။

“ဟွန့်... ဖုန်းလင်ကို သွေးရောင် ဖီးနစ် အင်မော်တယ် ဂိုဏ်းဆီ အပ်လိုက်ရမယ် ဟုတ်လား... သူတို့က တယ်လည်း ဘဝင်မြင့်ပါလား... ငါတို့ တာ့ယွဲ့ နန်းတော်ကို အနိုင်ကျင့်လို့ လွယ်မယ်လို့ ထင်နေကြတာလား...”

တာအိုဆရာမ ချင်းချွမ်ကမူ တည်ငြိမ်အေးဆေးစွာဖြင့် သုံးသပ်ပြလိုက်သည်။

“လွန်ခဲ့တဲ့ တိုက်ပွဲတုန်းက နတ်မိမယ် ဖုန်းလင် ထုတ်သုံးလိုက်တဲ့ စွမ်းရည်တွေက ရှေးဟောင်း ကောင်းကင်ဖီးနစ် ဂိုဏ်းရဲ့ အမွေအနှစ် အစစ်အမှန်တွေ ဖြစ်နေတာကိုး... သူ ကောင်းကင်ဖီးနစ် ဂိုဏ်းဆီကနေ ရတနာ တစ်ခုခု ရထားမယ်လို့ ကျွန်မ သံသယရှိပါတယ်...”

“ပြီးတော့ အဲဒီနေ့က သူ ထုတ်သုံးလိုက်တဲ့ မှော်လက်နက်ကလည်း သွေးရောင် ဖီးနစ် အင်မော်တယ် ဂိုဏ်းရဲ့ မျက်စိကျစရာ ဖြစ်သွားတာပေါ့...”

“သွေးရောင် ဖီးနစ် အင်မော်တယ် ဂိုဏ်းက နတ်မိမယ် ဖုန်းလင်ကို လိုချင်တပ်မက်တာ မဆန်းပါဘူး...”

လမင်းဧကရီ နတ်သမီးက ခေါင်းကို ဖြည်းညှင်းစွာ ယမ်းလိုက်၏။

“ဒါဆိုရင်တော့ ဆွေးနွေးစရာ အကြောင်း မရှိတော့ဘူး... ငါတို့ တာ့ယွဲ့ နန်းတော် ဆိုတာ သွေးရောင် ဖီးနစ် အင်မော်တယ် ဂိုဏ်းလောက်နဲ့တော့ ခြိမ်းခြောက်ခံမယ့် အဖွဲ့အစည်း မဟုတ်ဘူး... သနားညှာတာဖို့အတွက် ငါတို့ဘက်က ခေါင်းငုံ့ခံမှာ မဟုတ်ဘူး...”

“သူတို့က တိုက်ချင်တယ် ဆိုရင်လည်း တိုက်ပေးရုံပေါ့...”

“ကျင့်ကြံခြင်း လောကဆိုတာ ရက်စက်ကြမ်းကြုတ်တယ်... တိုက်ပွဲတွေကို အမြဲတမ်း ရှောင်တိမ်းနေရုံနဲ့ အသက်ဆက်ရှင်နိုင်မှာ မဟုတ်ဘူး...”

“အမှောင်တောအုပ်ကြီးထဲမှာ သိုးသူငယ်လေး တစ်ကောင်က ဘယ်တော့မှ အသက်ရှည်ရှည် မနေရဘူး...”

“တည်ငြိမ်နေတဲ့အချိန်မှာ တိတ်တဆိတ် ကြီးထွားပြီး၊ ဒေါသထွက်လာတဲ့အချိန်မှာ တောအုပ်တစ်ခုလုံးကို ကိုင်လှုပ်ပစ်နိုင်တဲ့ ကျားရိုင်းတစ်ကောင်ကသာ အသက်ရှင်သန်ခွင့် ရှိတာ...”

“ငါ့အစွမ်းကို မထုတ်ပြတာက ငါ အားနည်းတယ်လို့ ဆိုလိုတာ မဟုတ်ဘူး...”

“ငါသာ ဒေါသထွက်လာရင် မင်းတို့အတွက် သေလမ်းပဲ...”

“တာ့ယွဲ့ နန်းတော်က စစ်ပွဲကို မလိုလားဘူး... ဒါပေမဲ့ စစ်ပွဲကိုလည်း မကြောက်ဘူး...”

*

တာ့ယွဲ့ မှောင်ခိုဈေးကွက်၊ ကောင်းကင်အပျက်အစီး ခန်းမဆောင်။

တာအိုဆရာ ရှုယွီသည် လက်ထဲရှိ ဇီကွမ်း နယ်မြေနှင့် ပတ်သက်သော သတင်းအချက်အလက်များကို ကြည့်ရှုရင်း မျက်နှာထား ပျက်ယွင်းသွားကာ ထိတ်လန့်တုန်လှုပ် သွားလေ၏။

‘တာအို ဆရာမ ယွီနဲ့ သူ့တပည့်မလေး စုချီတို့ ကယ်တင်ခံလိုက်ရပြီလား...’

‘ထိုက်ရွှီ အင်မော်တယ် မဟာမိတ်အဖွဲ့ရဲ့ ချီမြစ် ဂိုဏ်းခွဲ တိုက်ခိုက်ခံလိုက်ရတယ်... ရွှေအမြုတေ အဆင့် (၅) ရှိတဲ့ တာအိုဆရာ ရီကျန်၊ ရွှေအမြုတေ အဆင့် (၃) ရှိတဲ့ တတိယအဆင့် အခင်းအကျင်းဆရာ တာအိုဆရာ ချန်ယွီနဲ့ သူတို့ရဲ့ တပည့် ဆယ်ယောက်ကျော်လောက် သေဆုံးကုန်ကြပြီ...’

‘ချီမြစ် ဂိုဏ်းခွဲရဲ့ အသက်သွေးကြောဖြစ်တဲ့ ချီမြစ် အင်မော်တယ် မြို့တော် ဝိုင်းရံပိတ်ဆို့ ခံရတယ်... ဟင်းလင်းပြင် လျှို့ဝှက်စခန်း ဖောက်ထွင်း လုယက်ခံရပြီး စောင့်ကြပ်နေတဲ့ သားရဲထိန်းကျောင်းသူတွေ အသတ်ခံလိုက်ရတယ် ဟုတ်လား...’

‘လောလောဆယ် ချီမြစ် ဂိုဏ်းခွဲမှာ အရင်းအမြစ် ပြတ်လပ်တဲ့ လက္ခဏာတွေ ပြနေပြီ... ထိုက်ရွှီ အင်မော်တယ် မဟာမိတ်အဖွဲ့ ခေါင်းဆောင်ကြီးက တခြား ဂိုဏ်းခွဲ (၁၇) ခုကို ချီမြစ် ဂိုဏ်းခွဲဆီ အကူအညီပေးဖို့ အမိန့်ထုတ်လိုက်ပြီ...’

‘ဒါဆိုရင် ချီမြစ် ဂိုဏ်းခွဲရဲ့ ဘဏ္ဍာတိုက်တောင်မှ ပြောင်သလင်းခါသွားပြီလို့ ဆိုလိုတာလား...’

ကောင်းကင်အပျက်အစီးခန်းမဆောင်မှ စုဆောင်းရရှိသော သတင်းအချက်အလက်များက အလွန် အသေးစိတ်ကျလှသည်။

သဲလွန်စ အသေးအဖွဲလေးကနေတောင် သတင်းအချက်အလက် အများကြီးကို ကောက်ချက်ချနိုင်၏။

ထိုအကြောင်းပြချက်များအပြင် တာအိုဆရာ ရှုယွီကို ပို၍ ထိတ်လန့်သွားစေသည့် အချက်တစ်ချက် ရှိနေသေးသည်။

ကောင်းကင်အပျက်အစီးခန်းမဆောင်၏ သတင်းထောက်လှမ်းနိုင်စွမ်းနှင့်ပင် ချီမြစ် အင်မော်တယ် မြို့တော်ကို တိုက်ခိုက်ခဲ့သည့် လျှို့ဝှက်လူသား၏ မည်သူမည်ဝါ ဖြစ်ကြောင်းကို အတိအကျ ဖော်ထုတ်နိုင်ခြင်း မရှိသေးပေ။

ရွှေအမြုတေ အဆင့် (၉) ရှိသော ဝါရင့် အရှင်သခင်ကြီး ချီမြစ် ဂိုဏ်းခွဲ ခေါင်းဆောင်ကြီး၏ မျက်စိအောက်မှနေ၍ ရွှေအမြုတေ အဆင့် ကျင့်ကြံသူ နှစ်ယောက်ကို သတ်ဖြတ်သွားနိုင်ခဲ့သည် တဲ့လား။

မြွေကို တွင်းအပြင်သို့ မျှားခေါ်ပြီးနောက်၊ ချီမြစ် အင်မော်တယ် မြို့တော်ကိုပါ တန်ပြန် စီးနင်း တိုက်ခိုက်သွားခဲ့သည်။

ဒါက ရွှေအမြုတေ အဆင့် ကျင့်ကြံသူ တစ်ယောက် လုပ်နိုင်တဲ့ ကိစ္စ ဟုတ်ရဲ့လား။

ခန်းမဆောင် အတွင်းရှိ ရှေးဟောင်း ပညာရှင်ကြီးများ ချန်ထားခဲ့သော သုံးသပ်ချက် သီအိုရီများကို ကြည့်ရှုရင်း တာအိုဆရာ ရှုယွီသည် ကောက်ချက် သုံးခုကို တွေ့ရှိလိုက်သည်။

‘(၁) ဒါက မူလဝိညာဉ် အဆင့် အရှင်သခင်ကြီး တစ်ပါးရဲ့ လက်ချက် ဖြစ်ရမယ်။

(၂) အဲဒီ လျှို့ဝှက်လူသားက ထိုက်ရွှီ အင်မော်တယ် မဟာမိတ်အဖွဲ့ရဲ့ အတွင်းလူ ဖြစ်နိုင်တယ်။

(၃) အဲဒီ လျှို့ဝှက်လူသားမှာ ချီမြစ် ဂိုဏ်းခွဲ ခေါင်းဆောင်ကြီးရဲ့ လက်တုံ့ပြန်မှုကို ရှောင်တိမ်းနိုင်ပြီး၊ ချီမြစ် အင်မော်တယ် မြို့တော်ရဲ့ ပင်မ အခင်းအကျင်းနဲ့ ဟင်းလင်းပြင် လျှို့ဝှက်စခန်းရဲ့ အတားအဆီးတွေကို လျစ်လျူရှု ဖြတ်ကျော်နိုင်တဲ့ အထူးနတ်ဘုရား စွမ်းရည် တစ်ခု ရှိနေတယ်’

သံသယရှိသူများ စာရင်း - တာ့ယွဲ့ နန်းတော် ဘိုးဘေး (ဖြစ်နိုင်ချေ နည်းပါး)၊ ကောင်းကင် သိုင်းကျမ်း မျှော်စင် (ဖြစ်နိုင်ချေ နည်းပါး)၊ ထိုက်ရွှီ အင်မော်တယ် မဟာမိတ်အဖွဲ့... တာအိုဆရာ ရှုဟိုင် (ဖြစ်နိုင်ချေ အနည်းငယ် ရှိ၊ သူက တချိန်တုန်းက ထိုက်ရွှီ အင်မော်တယ် မဟာမိတ်အဖွဲ့ ဌာနချုပ်ကနေ လျှို့ဝှက်ဆန်းကြယ်သော အရာတစ်ခု သယ်ဆောင်ပြီး ဒဏ်ရာမရဘဲ ထွက်ပြေး လွတ်မြောက်ဖူးသူ ဖြစ်သည်)၊ စုယွီ (ဖြစ်နိုင်ချေ နည်းပါး၊ အားနည်းလွန်းသည်၊ သို့သော် သူက ရှေးဟောင်း ကြေးမုံလမင်း အဆောင်လက်ဖွဲ့ ပြုလုပ်နည်းကို ပိုင်ဆိုင်ထားသဖြင့် ဟင်းလင်းပြင် စွမ်းအားကို ထိန်းချုပ်နိုင်စွမ်း ရှိကောင်း ရှိနိုင်သည်)။

တာအိုဆရာ ရှုယွီ ဖတ်ရှုရင်း မျက်လုံးများ ကျဉ်းမြောင်းသွားရ၏။

သူ့အကြည့်က နောက်ဆုံး သံသယရှိသူ နှစ်ဦးအပေါ်တွင် ရပ်တန့်နေပြီး နောက်ဆုံး၌ တာအိုဆရာ ရှုဟိုင်ကို စဉ်းစားခန်း ဝင်လိုက်သည်။

‘တာအိုဆရာ ရှုဟိုင်... ဖြစ်နိုင်ချေတော့ ရှိတယ်... ဒါပေမဲ့ သူက ဘာကိစ္စကြောင့် ချီမြစ် ဂိုဏ်းခွဲကို တိုက်ခိုက်ရမှာလဲ... သူနဲ့ တာအို ဆရာမ ယွီတို့ ဆရာတပည့်ကြားမှာ ရင်းနှီးတဲ့ ဆက်ဆံရေးမျိုး မရှိဘူး... သူ လှုပ်ရှားရမယ့် အကြောင်းပြချက် မရှိသလို လတ်တလောမှာ သူက ဖုန်းလော့ စံအိမ်တော် ဘက်မှာ ရှိနေတာ...’

‘ဒါဆို တာအိုဆရာ စု...’

ရှုယွီသည် မျက်မှောင်ကြီးကြီး ကြုတ်လျက် နောက်ဆုံး သံသယရှိသူကို စိုက်ကြည့်လိုက်သည်။

ရှေးဟောင်း ကြေးမုံလမင်း အဆောင်လက်ဖွဲ့။

ရှေးဟောင်း စာအုပ်များ၏ မှတ်တမ်းအရ ရှေးခေတ်ကာလက ကြေးမုံလမင်း အဆောင်လက်ဖွဲ့ကို ဖန်တီးခဲ့သော အရှင်သခင်ကြီးသည် ဟင်းလင်းပြင် စွမ်းအား အနည်းငယ်ကို ထိန်းချုပ်နိုင်ခဲ့ပြီး အလွန် လျှို့ဝှက်ဆန်းကြယ်ခဲ့သည် ဟု ဆို၏။

ထို့ကြောင့် စုယွီသာ ဟင်းလင်းပြင် စွမ်းအားကို သဘောပေါက် နားလည်ထားမည် ဆိုလျှင် သူ အံ့သြမိမည် မဟုတ်ပေ။

နောက်ထပ် အချက်တစ်ချက်ကတော့ စွမ်းအား ကွာခြားမှု ပြဿနာ။

ဖြစ်နိုင်တာက စုယွီ တစ်ယောက်တည်း လှုပ်ရှားခဲ့တာ မဟုတ်ဘဲ သူ့အနားမှာ နောက်ထပ် အစွမ်းထက် ကျင့်ကြံသူ တစ်ယောက် ပါလာတာများလား။

ဒီလို တွေးကြည့်လိုက်မယ် ဆိုရင်တော့ အဓိပ္ပာယ် ရှိသွားပြီ။

ဒါပေမဲ့ ပြဿနာက တကယ်လို့များ နောက်ထပ် အစွမ်းထက် ကျင့်ကြံသူ တစ်ယောက် ရှိနေတယ် ဆိုရင် အဲဒီလူက ဘယ်သူလဲ။ တိုတောင်းလှတဲ့ အချိန်ကာလလေး အတွင်းမှာ ချီမြစ် ဂိုဏ်းခွဲက တာအိုဆရာ ရီကျန်နဲ့ ဟင်းလင်းပြင် လျှို့ဝှက်စခန်းက သားရဲထိန်းကျောင်းသူကို သတ်ဖြတ်နိုင်ဖို့ ဆိုရင် အဲဒီလူရဲ့ စွမ်းအားက အနည်းဆုံး ရွှေအမြုတေ အဆင့် (၆)၊ ဒါမှမဟုတ် ရွှေအမြုတေ အဆင့် နှောင်းပိုင်း၊ အထွတ်အထိပ် အဆင့်လောက်တောင် ရှိနေနိုင်တယ်။

တာအိုဆရာ စုက အဲဒီလောက် စွမ်းအားကြီးတဲ့လူကို သိလို့လား။

တာအိုဆရာ ရှုယွီ၏ ခေါင်းထဲတွင် အတွေးပေါင်းစုံ ရှုပ်ထွေးနေသော်လည်း တရားခံ အစစ်အမှန်က ဘယ်သူလဲ ဆိုတာကိုတော့ ဖော်ထုတ်နိုင်ခြင်း မရှိသေးပေ။

သို့သော် ဤသံသယရှိသူများထဲတွင် စုယွီ တစ်ယောက်တည်း၌သာ လှုပ်ရှားရန် ရည်ရွယ်ချက် ရှိနေပြီး၊ စုယွီက ဟင်းလင်းပြင် စွမ်းအားကို ထိန်းချုပ်နိုင်ခြေ ရှိနေသည်ဟု သူ ခံစားလိုက်ရသည်။

ဒီလို လှုပ်ရှားရမယ့် အကြောင်းရင်း ရှိနေတာကြောင့် စုယွီကို ဖယ်ထုတ်လိုက်၍ မရပေ။

ထို့ကြောင့် တာအိုဆရာ ရှုယွီသည် သံသယရှိသူ စာရင်းကို အနည်းငယ် ပြုပြင်လိုက်ပြီး စုယွီကို နံပါတ်တစ် နေရာ၌ ထားလိုက်လေ၏။

သို့သော် သူ မသေချာသေးပေ။ ဒါက သံသယ သက်သက်သာ ရှိသေးသည်။

အခန်း (၃၇၇) - မိစ္ဆာကျင့်ကြံသူ အုပ်စု၊ ရိတ်သိမ်းခြင်း (အပိုင်း ၃)

~ဘာပဲပြောပြော ထိုက်ရွှီ အင်မော်တယ် မဟာမိတ်အဖွဲ့၏ ချီမြစ် ဂိုဏ်းခွဲမှာ ဖြစ်ပျက်ခဲ့သည့် ကိစ္စတွေက တကယ့်ကို ထူးဆန်းအံ့သြဖွယ် ကောင်းလွန်းလှသည်။

တာအိုဆရာ ရှုယွီ တစ်ယောက် အချိန်ကြာမြင့်စွာ စဉ်းစားခန်း ဝင်ပြီးနောက် စိတ်မကောင်းစွာဖြင့် တွေးလိုက်မိလေ၏။

'နှမြောစရာ ကောင်းလိုက်တာ... တာအိုဆရာ စု ဘယ်ရောက်နေမှန်း မသိရသလို၊ ကိုးသွယ် အလင်း တံဆိပ်ပြားကနေလည်း ဘာတုံ့ပြန်မှုမှ မရဘူး... မဟုတ်ရင် သူ့ဆီက တုံ့ပြန်မှုကို အကဲခတ်ကြည့်လို့ ရနိုင်သားနဲ့... ဒါမှမဟုတ် တခြား သဲလွန်စတွေများ ရနိုင်မလားလို့ပါ...'

'ခဏလောက် ထပ်စောင့်ကြည့်ရမှာပေါ့... တာအို ဆရာမ ယွီများ ပြန်ပေါ်လာမလားလို့... ပေါ်လာရင်တော့ သူ့ဆီ သွားလည်ပြီး စုံစမ်းရမယ်...'

ရှုယွီသည် သံသယစိတ်ကို ဘေးဖယ်လိုက်ပြီး အခြား စုဆောင်းရရှိထားသော သတင်းအချက်အလက်များကို ဆက်လက် လေ့လာလိုက်သည်။

‘ထိုက်ရွှီ အင်မော်တယ် မဟာမိတ်အဖွဲ့ရဲ့ နဂါးမြေ ဂိုဏ်းခွဲမှာ ကျင့်ကြံသူ (၂၀၀၀) လောက် စုစည်းနေပြီ... စစ်ပွဲအတွက် လိုအပ်တဲ့ ပစ္စည်းတွေကို ပြင်ဆင်နေကြတယ်... ကျင့်ကြံသူ (၁၀၀၀) လောက်ရှိတဲ့ လမင်းနီ ဂိုဏ်းခွဲကလည်း လူရွေးပွဲတွေ လုပ်နေပြီး ဝိညာဉ်ဆေးလုံးတွေ၊ ဝိညာဉ်အဆောင်တွေကို အသည်းအသန် သွန်းလုပ် ဖန်တီးနေကြတယ်...’

‘ချီမြစ် ဂိုဏ်းခွဲမှာတော့ ပြဿနာ တက်ထားလို့ အနည်းနဲ့အများတော့ ထိခိုက်မှု ရှိနိုင်တယ်... ဒါပေမဲ့ ချီမြစ် ဂိုဏ်းခွဲက လူအင်အား အများဆုံးပဲ... ကျင့်ကြံသူ (၃၀၀၀) အပြည့် ရှိတယ်...’

‘စုစုပေါင်းလိုက်ရင် ထိုက်ရွှီ အင်မော်တယ် မဟာမိတ်အဖွဲ့ဘက်မှာ တာ့ယွဲ့ နယ်မြေကို တိုက်ခိုက်ဖို့ အသင့်ပြင်ထားတဲ့ ကျင့်ကြံသူ အင်အားက (၃၀၀၀၀) ကျော်နေပြီ...’

အခြား အင်အားစုကြီး နှစ်ခုဘက်မှ သတင်းများကို သူ ဆက်ကြည့်လိုက်သည်။

ကိုးဝိညာဉ် မိစ္ဆာ နန်းတော်၏ လက်အောက်တွင် မိစ္ဆာလမ်းစဉ် ကျင့်ကြံသူ အမြောက်အမြား စုစည်းနေပြီး သူတို့၏ အရေအတွက်ကလည်း သောင်းဂဏန်း ရှိနေ၏။

သွေးရောင် ဖီးနစ် အင်မော်တယ် ဂိုဏ်းကတော့ ဖီးနစ်ကျ နယ်မြေ တစ်ခုလုံးမှ ကျင့်ကြံသူများကို စုစည်းနေဆဲ ဖြစ်သည်။ သို့သော် သူတို့၏ လုပ်ငန်းစဉ်က နှေးကွေးနေသဖြင့် အသင့်ဖြစ်ရန် (၁) နှစ်၊ (၂) နှစ်ခန့် ကြာမြင့်အုံးမည် ဖြစ်သည်။

‘ဒါဆိုရင်…’

တာအိုဆရာ ရှုယွီ တွက်ချက်လိုက်မိ၏။

'တာ့ယွဲ့ နယ်မြေ အနေနဲ့ ပြင်ဆင်ချိန် (၁) နှစ်၊ (၂) နှစ်လောက်တော့ ရသေးတယ်...'

ထိုအချိန်ရောက်လျှင် သူတို့သည် ကျင့်ကြံသူ တစ်သိန်းကျော်နှင့် မိစ္ဆာလမ်းစဉ် ကျင့်ကြံသူများကို ရင်ဆိုင်ရဖွယ် ရှိနေသည်။

ထိုအခြေအနေမျိုးတွင် မည်သို့ ခုခံကာကွယ်မည်၊ မည်သို့ တုံ့ပြန်မည် ဆိုသည်က အသက်သွေးကြောပမာ အရေးကြီးလာပေတော့မည်။

'တာ့ယွဲ့ နန်းတော်ကပဲ အားလုံးကို ဦးဆောင်မလားတော့ မသိဘူး... အနည်းဆုံးတော့ ငါတို့တွေ တကွဲတပြားစီ တိုက်ခိုက်လို့ မဖြစ်ဘူး...'

တာအိုဆရာ ရှုယွီ စဉ်းစားနေစဉ်မှာပင် ကောင်းကင်အပျက်အစီးခန်းမဆောင်ထံမှ အမိန့်တစ်ခု ရောက်ရှိလာခဲ့၏။ တာ့ယွဲ့ နန်းတော်သည် အင်အားစု အသီးသီးမှ ခေါင်းဆောင်များ အပါအဝင် ပုန်းအောင်းနေသော ကျင့်ကြံသူ မိသားစုများကိုပါ အရေးကြီးကိစ္စ ဆွေးနွေးရန် တာ့ယွဲ့ နန်းတော်သို့ လာရောက်ကြရန် ဆင့်ခေါ်လိုက်ခြင်းပင်။

တာ့ယွဲ့ နန်းတော်သည် ကောင်းကင်အပျက်အစီးခန်းမဆောင်၏ ဖောက်သည်ကြီး ဖြစ်လေရာ ဤအမိန့်သည် ငြင်းပယ်၍ မရသော အမိန့်ဖြစ်၏။ ထို့ကြောင့် တာအိုဆရာ ရှုယွီ တစ်ယောက် စတင် အလုပ်ရှုပ်လေတော့၏။

ထိုအချိန်၌ သူတို့ မသိလိုက်သည်မှာ တာ့ယွဲ့ မှောင်ခိုဈေးကွက်ရှိ ယွီမိသားစု၏ ဂူစံအိမ်ထဲတွင် ဖြစ်ပျက်နေသော အရာများကိုပင်။

ရုပ်သေးတစ်ရုပ် တိတ်တဆိတ် ပေါ်လာ၏။ ယွီမိသားစု၏ အမည်ကို အသုံးပြု၍ ဂူစံအိမ်တွင် စာတစ်စောင် ချန်ထားရစ်ခဲ့သည်။ ထို့နောက် ရေခဲ ရေကန်ထဲရှိ ရေခဲကြေးခွံ ငါးဘုရင်နှင့် ငါးအုပ်စုကို သိမ်းယူလိုက်ရုံသာမက၊ ဂူစံအိမ်ထဲရှိ ရေခဲရေကန်ကြီး တစ်ခုလုံးကိုပါ မြေလှန် တူးထုတ်ယူလိုက်လေ၏။

ရေခဲ ခြင်ဆီ ပုလဲကို အသုံးပြု၍ ပတ်ဝန်းကျင် အပူချိန် မပျက်ပြယ်အောင် ထိန်းသိမ်းလိုက်ပြီးနောက်၊ သူသည် ဂူစံအိမ်မှ လူမသိသူမသိ ထွက်ခွာသွားပြီး တာ့ယွဲ့ တောင်တန်းဆီသို့ ဦးတည် ပြေးလွှား သွားလေတော့သည်။

အချိန်များ တိတ်တဆိတ် ကုန်ဆုံးသွားခဲ့၏။

ဆယ်ရက်ကြာပြီးနောက်၊ တာအိုရုပ်သေးသည် တာ့ယွဲ့ တောင်တန်းထဲသို့ ဝင်ရောက်လာပြီး မြေအောက် အက်ကွဲကြောင်း ကမ္ဘာဆီသို့ တစ်ဖန် ပြန်လည် ရောက်ရှိလာခဲ့သည်။

မြွေလိပ်အိုကြီး၊ ကျားနက်ကြီးနှင့် နွားနက်ကြီး ဆိုသော မိစ္ဆာဘုရင် သုံးကောင်မှာမူ အရိပ်အယောင်မျှပင် ရှာမတွေ့တော့ပေ။

တာအိုရုပ်သေးသည် ဤနေရာသို့ ပြန်ရောက်လာပြီးနောက် သူ့ရှေ့မှ ကမ္ဘာလောကကို တစ်ချက် ကြည့်လိုက်၏။ ခဏမျှ စဉ်းစားပြီးနောက် သူ လက်ကို ဝှေ့ယမ်းလိုက်ရာ နန်းတော်ထဲမှ ကောင်းကင်မိုးကြိုး ကြွက်ဘုရင် ထွက်ပေါ်လာသည်။

“မင်းရဲ့ မိုးကြိုး သွေးမျိုးဆက် ကြွက်တွေ ဘယ်လောက် ကျန်သေးလဲ...”

ကောင်းကင်မိုးကြိုး ကြွက်ဘုရင် ကြောင်အမ်းသွားပြီးနောက် သတိထားကာ ပြန်ဖြေလိုက်၏။

“သိပ်မကျန်တော့ပါဘူး... (၂၀၀၀) အောက် လောက်ပဲ ရှိပါတော့တယ်... ပြီးတော့ ကျွန်တော့်ရဲ့ မူလသွေးမျိုးဆက် ကြွက်တွေက မဆိုးပေမယ့်၊ သူတို့ကနေ တဆင့် ဆင်းသက်လာတဲ့ မျိုးဆက်တွေကျတော့ သွေးမျိုးဆက်ရော ပါရမီပါ တဖြည်းဖြည်း ညံ့ဖျင်းလာကြတယ်...”

“နောက်ဆုံးတော့ တချို့က သာမန် မြေကြွက် သွေးမျိုးဆက် ဘဝကို ပြန်ရောက်သွားကြတယ်... အဲဒီကောင်တွေကိုတော့ ကျွန်တော် မောင်းထုတ်လိုက်ပါပြီ...”

တာအိုရုပ်သေး စဉ်းစားလိုက်ပြီး ပြောလိုက်၏။

“ဒါဆိုရင် မင်းရဲ့ သွေးမျိုးဆက် ကျန်နေသေးတဲ့ ကောင်းကင်မိုးကြိုး ကြွက်တွေ အကုန်လုံးကို ခေါ်လိုက်... ငါ သူတို့အားလုံးကို လျှို့ဝှက်နယ်မြေထဲ ခေါ်သွားပြီး ကျင့်ကြံခိုင်းမယ်...”

ထိုစကားကို ကြားလိုက်ရသောအခါ ကောင်းကင်မိုးကြိုး ကြွက်ဘုရင်၏ ကိုယ်လုံးလေး တုန်ခါသွားသည်။ ဖော်ပြမတတ်နိုင်သော စိတ်လှုပ်ရှားမှုနှင့် ပျော်ရွှင်မှုတို့ ရင်ထဲတွင် ပြည့်လျှံသွားပြီး တာအိုရုပ်သေးကို မယုံနိုင်စွာ မော့ကြည့်လိုက်မိ၏။

“သခင်ကြီး... သခင်ကြီးက ကျွန်တော့်ရဲ့ ကောင်းကင်မိုးကြိုး ကြွက် မျိုးနွယ်စုကို မြှင့်တင်ပေးမလို့လား...”

တာအိုရုပ်သေးက ခေါင်းကို ဖြည်းညှင်းစွာ ယမ်းလိုက်ပြီး ကြွက်ဘုရင်၏ စိတ်လှုပ်ရှားမှုကို အရှိန်သတ်လိုက်သည်။

“ငါက သူတို့ကို ကျင့်ကြံဖို့ အခွင့်အရေး ပေးရုံ သက်သက်ပါ... သူတို့ရဲ့ သွေးမျိုးဆက်ကို ကြည့်ရတာ အောင်မြင်မှုက အကန့်အသတ် ရှိနေပုံပဲ...”

“ဖွံ့ဖြိုးတိုးတက်အောင် လုပ်မယ် ဆိုရင်တော့ ငါ့မှာ အဲဒီအစီအစဉ် ရှိပါတယ်... ဒါပေမဲ့ အဓိက အကြောင်းရင်းကိုတော့ မင်း ရိပ်မိမှာပါ... မကြာခင် တာ့ယွဲ့ နယ်မြေမှာ စစ်ပွဲ ဖြစ်လာနိုင်တယ်...”

“မင်းရဲ့ မျိုးဆက်တွေသာ ခွန်အား နည်းနည်းလောက် ပိုကြီးလာမယ် ဆိုရင် ငါ့အတွက် အသုံးဝင်လာနိုင်တယ်...”

ထိုစကားကို ကြားလိုက်ရသောအခါ ကောင်းကင်မိုးကြိုး ကြွက်ဘုရင်၏ အမွှေးများ ထောင်ထသွားပြီး အနည်းငယ် ကြောက်လန့်သွားလေ၏။

သူ အရင်လောက် စိတ်မလှုပ်ရှားတော့ပေ။

သို့သော် သေချာ စဉ်းစားကြည့်လိုက်တော့ ကောင်းကင်မိုးကြိုး ကြွက်ဘုရင်၌ ရွေးချယ်စရာ လမ်း မရှိပေ။

အနည်းဆုံးတော့ သူ့မျိုးဆက်တွေသာ ပိုသန်မာလာမည် ဆိုလျှင် သခင်ကြီးကို ပိုပြီး အကူအညီ ပေးနိုင်မှာ ဖြစ်သလို၊ သခင်ကြီးဆီက အကျိုးအမြတ်တွေလည်း ပိုရနိုင်သေးသည်။

‘သူ့ရဲ့ ကိုယ်ပိုင် စွမ်းအားတွေ တိုးတက်လာမယ်... သူ့ရဲ့ သွေးမျိုးဆက်တွေ ပိုသန့်စင်လာမယ်...

အဲဒီအချိန်ကျရင် မျိုးဆက် ပြတ်သွားမှာကို သူ ကြောက်နေစရာ လိုသေးလို့လား’

မျိုးဆက် ပြတ်မှာကိုတော့ သူ လုံးဝ မကြောက်ပေ။

“သခင်ကြီး... စိတ်ချပါ... သခင်ကြီး သူတို့ကို ခေါ်မသွားရင်တောင်မှ သခင်ကြီး ခိုင်းစေလာမယ့် ကိစ္စ မှန်သမျှကို သူတို့ အသက်ပေးပြီး ပြီးမြောက်အောင် လုပ်ဆောင်ကြမှာပါ...”

ကောင်းကင်မိုးကြိုး ကြွက်ဘုရင်က သူ့သစ္စာရှိမှုကို ကပျာကယာ ပြသလိုက်သည်။

“ကျန်နေတဲ့ သွေးမျိုးဆက် အကုန်လုံးကို အခုချက်ချင်း ဆင့်ခေါ်လိုက်ပါ့မယ်...”

“ကျွီ... ကျွီ... ကျွီ...”

ကောင်းကင်မိုးကြိုး ကြွက်ဘုရင်က စူးရှသော အသံဖြင့် အော်ဟစ်လိုက်၏။ နာရီဝက်ခန့် ကြာပြီးနောက် မြေအောက် အက်ကွဲကြောင်း ကမ္ဘာထဲတွင် နောက်ထပ် ကောင်းကင်မိုးကြိုး ကြွက်အုပ်စု တစ်စု ထွက်ပေါ်လာသည်။

အရေအတွက်က (၇၀၀) ကျော်ခန့် ရှိသည်။

အစိမ်းရောင် သစ်သား နန်းတော်ထဲတွင် ရှိနှင့်ပြီးသော ကောင်းကင်မိုးကြိုး ကြွက် (၁၀၀၀) နှင့် ပေါင်းလိုက်လျှင် စုစုပေါင်း (၁၇၀၀) ကျော် သွားပြီ ဖြစ်၏။

သည်အထဲမှာ ဒုတိယအဆင့် ကောင်းကင်မိုးကြိုး ကြွက် (၆၀) ကျော် ပါဝင်သည်။

ကျန်တာတွေ အကုန်လုံးက ပထမအဆင့်တွေ ဖြစ်ကြ၏။

ဒီအရေအတွက်ကို ကြည့်ခြင်းအားဖြင့် မြေကြွက် သွေးမျိုးဆက်တွေရဲ့ မျိုးပွားနှုန်းက ဘယ်လောက် မြန်ဆန်သလဲ ဆိုတာ သိသာလှသည်။ မျိုးနွယ်စုရဲ့ အတိုင်းအတာက သာမန် မဟုတ်ပေ။

ကောင်းကင်မိုးကြိုး ကြွက် အားလုံးကို အစိမ်းရောင် သစ်သား နန်းတော်ထဲသို့ သိမ်းဆည်းလိုက်ပြီးနောက်၊ တာအိုရုပ်သေးသည် လှည့်ထွက်လိုက်ပြီး လျှို့ဝှက်နယ်မြေ အတားအဆီး၏ အပြင်ဘက်သို့ ရောက်ရှိသွား၏။

သူ့ခန္ဓာကိုယ်မှ စွမ်းအင်များ ပေါက်ကွဲထွက်ပေါ်လာပြီး ဟင်းလင်းပြင် စွမ်းအားကို အသုံးပြု၍ နေရာလပ်ကို ထိန်းချုပ်လိုက်ရာ သူ့ပတ်ဝန်းကျင်ရှိ လေထုထဲတွင် ပြင်းထန်သော အားလှိုင်းများ ထွက်ပေါ်လာလေသည်။

သူ့ရှေ့ရှိ ဖိနှိပ်ထားသော ဟင်းလင်းပြင် စွမ်းအားကို ဖိအားပေး ခုခံရင်း၊ တာအိုရုပ်သေးသည် လော့ယွဲ့ မဟာမိတ်အဖွဲ့၏ လျှို့ဝှက်နယ်မြေ အပျက်အစီးထဲသို့ ခြေလှမ်း ဝင်ရောက်လိုက်၏။

"အုန်း"

မျက်စိတစ်မှိတ် အတွင်းမှာပင် မြင်ကွင်းများ ပြောင်းလဲသွားသည်။

ဒီရေလှိုင်းလုံးကြီး ပမာ ထူထဲသိပ်သည်းလှသော ကမ္ဘာ့ဝိညာဉ်စွမ်းအင်များ သူ့ထံသို့ အရှိန်အဟုန်ဖြင့် တိုးဝင်လာ၏။

ကောင်းကင်ထက်မှ ရွှေရောင် နေမင်း၏ အလင်းတန်းများက သူ့ကိုယ်ပေါ်သို့ ဖြာကျလာသည်။ ရှေ့ခပ်လှမ်းလှမ်းတွင် တိမ်တိုက်များ ရစ်သိုင်းနေသော လော့ယွဲ့ မဟာမိတ်အဖွဲ့၏ ပင်မ တောင်တန်းကြီးကို ဝါးတားတား လှမ်းမြင်နေရပြီး၊ ရှေးဟောင်း ကြိုးကြာငှက်များ၏ ပျံသန်းကာ အော်မြည်နေသံများက ရင်းနှီးကျွမ်းဝင်စွာ ဆီးကြိုနေကြလေ၏။

အခန်း (၃၇၈) - မိစ္ဆာကျင့်ကြံသူ အုပ်စု၊ ရိတ်သိမ်းခြင်း (အပိုင်း ၄)

~ထိုအချိန်ကျမှသာ တာအိုရုပ်သေးသည် စိတ်အနည်းငယ် လျှော့ချလိုက်နိုင်လေ၏။

“ဟူး...”

‘ငါ ဒီနေရာကို ပြန်ရောက်လာခဲ့ပြီပဲ...’

ယွီချန်ချင်းနှင့် စုချီတို့ကို ကယ်တင်နိုင်ခဲ့ခြင်းက သူ၏ တာဝန် တစ်ဝက် ပြီးမြောက်သွားခြင်းပင်။ ယခု သူ ဆက်လက်လုပ်ဆောင်ရန် ကျန်ရှိနေသည်မှာ မိစ္ဆာလမ်းစဉ် ကျင့်ကြံသူများ ဖမ်းဆီးသွားသော သာမန် ပြည်သူများကို ရှာဖွေ ကယ်တင်ရန်ပင်။

အကယ်၍ သူ ကယ်တင်နိုင်ခဲ့လျှင်တော့ အကောင်းဆုံးပင်။

ကယ်တင်လို့ မရတော့ဘူး ဆိုလျှင်တော့...

နောင်တစ်ချိန်ကျမှ သူတို့အတွက် လက်စားချေပေးရုံသာ ရှိတော့၏။

ချင်းယွဲ့ တောင်ထွတ်။

တာအိုရုပ်သေးသည် တောင်ပေါ်သို့ ခြေလျင်ခရီး စတင်လိုက်သည်။ တောင်ကုန်း တောင်တန်းများကို ဖြတ်ကျော်ပြီးနောက် ကျောက်လှေကားထစ်များ ရှိရာသို့ ရောက်ရှိလာပြီး အပေါ်သို့ ဆက်တက်ခဲ့၏။ တောင်ခါးပန်းသို့ ရောက်သောအခါ သူသည် အစိမ်းရောင် သစ်သား နန်းတော်ကို ထုတ်ယူလိုက်ပြီး ယွီချန်ချင်းနှင့် စုချီတို့ကို အရင်ဆုံး လွှတ်ပေးလိုက်သည်။

ထို့နောက် ကောင်းကင်မိုးကြိုး ကြွက်အုပ်စုကြီး ထွက်ပေါ်လာ၏။

တာအိုရုပ်သေးသည် ကောင်းကင်မိုးကြိုး ကြွက်ဘုရင်ကို ကြည့်ကာ အမိန့်ပေးလိုက်သည်။

“ငါ တောင်ခြေမှာ အခင်းအကျင်းတစ်ခု ခင်းကျင်းထားတယ်... အဲဒီနေရာကို မင်းဆီ ငါ အသိပေးလိုက်မယ်... မင်းရဲ့ မျိုးဆက်တွေ အဲဒီနေရာကို မှားပြီး ဝင်မသွားစေနဲ့...”

“ပြီးတော့ ဒီပတ်ဝန်းကျင်မှာ အရင်းအမြစ်တွေ ရှာဖွေလို့ ရတယ်... အရမ်းကြီး ဝေးဝေးလံလံ လျှောက်မသွားနဲ့...”

ကောင်းကင်မိုးကြိုး ကြွက်ဘုရင်က ရိုသေလေးစားစွာ ပြန်ဖြေလိုက်၏။

“ဟုတ်ကဲ့ပါ သခင်ကြီး...”

ထို့နောက် ကြွက်ဘုရင်သည် ကောင်းကင်မိုးကြိုး ကြွက်အုပ်စုကြီးကို ဦးဆောင်ကာ မြေကြီးထဲသို့ တူးဆွဝင်ရောက်သွားပြီး သူတို့အတွက် အကျိုးရှိမည့် အရင်းအမြစ်များကို စတင် ရှာဖွေကြလေတော့သည်။

ဤနေရာ၏ မြေအောက်တွင် အမှန်တကယ်ပင် အရင်းအမြစ်များစွာ ကိန်းအောင်းနေ၏။

သာမန် ကျောက်တုံး တစ်တုံးဖြစ်လျှင်တောင်မှ အဆင့် (၄) ဝိညာဉ်သွေးကြောပေါ်တွင် နှစ်ပေါင်းများစွာ တည်ရှိနေခဲ့ခြင်း ဖြစ်ရာ၊ ပထမအဆင့်နှင့် ဒုတိယအဆင့် ကောင်းကင်မိုးကြိုး ကြွက်များအတွက် ထိပ်တန်း ကျင့်ကြံခြင်း အရင်းအမြစ်များ ဖြစ်နေလေသည်။

ထိုကျောက်တုံးများကို ဝါးမျိုလိုက်ခြင်းကပင် သူတို့၏ ကျင့်ကြံခြင်းကို များစွာ အထောက်အကူ ဖြစ်စေ၏။

အဆင့် (၄) ဝိညာဉ်သွေးကြော ရှိသော နေရာတွင် ကျင့်ကြံခွင့် ရခြင်းသည် ကောင်းကင်မိုးကြိုး ကြွက်မျိုးနွယ်စု အတွက်တော့ ကုန်ဆုံး၍ မကုန်နိုင်သော ရတနာသိုက်ကြီးကို တွေ့ရှိလိုက်ရသည့်နှယ်။

ထိုအချိန်တွင် တစ်နေရာတည်း၌ ရပ်နေသော ယွီချန်ချင်းနှင့် စုချီတို့ နှစ်ဦးမှာမူ သူတို့၏ ပတ်ဝန်းကျင် အသစ်နှင့် အသားမကျသေးသဖြင့် ကြောင်အမ်းအမ်း ဖြစ်နေကြသည်။

လေထုထဲတွင် သိပ်သည်းလွန်းလှသော သဘာဝ ဝိညာဉ်စွမ်းအင်များကြောင့် အမျိုးသမီး နှစ်ဦးမှာ ပါးစပ်အဟောင်းသား ဖြစ်နေရ၏။

ဒါ ဘယ်နေရာလဲ။

“သွားကြစို့... ခယ်အာနဲ့ တခြားသူတွေ အပေါ်မှာ ရှိတယ်...”

တာအိုရုပ်သေးက ပြောဆိုရင်း တောင်ပေါ်သို့ ဆက်တက်သွားသည်။

“ဒါက တာ့ယွဲ့ တောင်တန်းရဲ့ ဗဟိုချက်ပဲ... ရှေးဟောင်းကာလက ကောင်းကင်ဘုံ အင်အားစု တစ်ခုဖြစ်တဲ့ လော့ယွဲ့ မဟာမိတ်အဖွဲ့ ချန်ထားရစ်ခဲ့တဲ့ လျှို့ဝှက်နယ်မြေ တစ်ခုပေါ့...”

“ငါ.. ဒီမှာပဲ ကျင့်ကြံနေတာ... ဒီတစ်ခေါက် မင်းတို့ နှစ်ယောက်ကို ပြန်ခေါ်လာတာက ချန်ချင်း နဲ့ ချီလေး... မင်းတို့ ဒီမှာပဲ ဆက်ပြီး ကျင့်ကြံကြဖို့လေ...”

“မျိုးနွယ်စုဆီ ပြန်စရာ မလိုတော့ဘူး...”

တာအိုရုပ်သေး၏ နောက်မှ လိုက်ပါလာရင်း စုချီသည် ဆံပင်ဖြူဖြူနှင့် အဘိုးအို ပုံစံကို ကြည့်ကာ ဇဝေဇဝါ ဖြစ်သွားပြီး မေးလိုက်သည်။

“ဦးလေးယွီ... ဘာလို့ ဒီလို ပုံစံပြောင်းထားတာလဲဟင်...”

တာအိုရုပ်သေးက ပြန်ဖြေလိုက်၏။

“ဒါက ရုပ်သေးလေ... ငါ့ရဲ့ ခန္ဓာကိုယ် အစစ် မဟုတ်ဘူး...”

“ဪ... ဒါကြောင့်ကိုး... ကျွန်မက အံ့သြနေတာ...”

စုချီ သဘောပေါက်သွားပြီး စပ်စုချင်စိတ်ဖြင့် ထပ်မေးလိုက်သည်။

“ဦးလေးယွီ... ဒီနေရာက ဝိညာဉ်စွမ်းအင်တွေက ဘာလို့ ဒီလောက်တောင် သိပ်သည်းနေရတာလဲ... ဒီနေရာမှာ ဘယ်လို ဝိညာဉ်သွေးကြောမျိုး ရှိနေလို့လဲဟင်...”

တာအိုရုပ်သေးက ဖြေလိုက်၏။

“အဆင့် (၄) ဝိညာဉ်သွေးကြော...”

“ရှင်...”

စုချီ၏ မျက်လုံးများ ပြူးကျယ်သွားသည်။

ယွီချန်ချင်းကမူ တာအိုရုပ်သေး၏ နောက်မှ တိတ်ဆိတ်စွာ လိုက်ပါလာခဲ့၏။ ခဏကြာသောအခါ သူမ၏ မျက်နှာပေါ်တွင် အေးချမ်းသော အပြုံးတစ်ခု ဖြစ်ပေါ်လာပြီး၊ ပတ်ဝန်းကျင်၏ ငြိမ်းချမ်းမှုနှင့် တစ်သားတည်း ကျသွားလေသည်။

မကြာမီအချိန်တွင်...

ရေတံခွန်အနီးရှိ ချိုင့်ဝှမ်းတစ်ခုထဲမှ နေအိမ်တွင် ယွီချန်ချင်းနှင့် စုချီတို့သည် စုယွီ၏ ခန္ဓာကိုယ် အစစ်၊ ယွီခယ်အာ၊ အဒေါ် လော့ချင်းယာ၊ လန်ရှီးနှင့် လန်ကုန်း ညီအစ်မ နှစ်ဖော်တို့ကို တွေ့လိုက်၏။

ယွီချန်ချင်းနှင့် စုချီတို့အတွက် ကြိုဆိုပွဲ လုပ်ပေးပြီးနောက်၊ စုယွီက သူမတို့ နှစ်ဦးကို မိမိတို့ စိတ်ကြိုက် သစ်သားအိမ်များ ဆောက်လုပ် နေထိုင်စေသည်။

ထို့နောက် သူသည် နောက်ဖေးရှိ ကြာကန်ဆီသို့ ထွက်လာခဲ့လိုက်၏။

တာအိုရုပ်သေးက သူ့ကို အစိမ်းရောင် သစ်သား လက်စွပ် ပေးအပ်ပြီးနောက်၊ လျှို့ဝှက်အခန်းထဲသို့ ဝင်ရောက်ကာ ခေတ္တခဏ တံခါးပိတ် ကျင့်ကြံလိုက်သည်။ စုယွီက လက်စွပ်ထဲမှ ပစ္စည်းများကို ရှင်းလင်းချိန်တွင် ရုပ်သေးကို ခေတ္တ အနားပေးလိုက်ခြင်း ဖြစ်၏။

စုယွီသည် သူ့ရှေ့ရှိ ကြာကန်ကို စိုက်ကြည့်လိုက်သည်။ ရေကန်အောက်ခြေတွင် သူသည် ရေခဲ အခင်းအကျင်းများစွာ ခင်းကျင်းထားပြီး ယွီမိသားစု ဂူစံအိမ်ရှိ ရေခဲရေကန်နှင့် တူညီသော ပတ်ဝန်းကျင်မျိုး ဖြစ်အောင် ဖန်တီးထား၏။

ဒီနေရာက ရေခဲကြေးခွံ ငါးမျိုးနွယ်စု နေထိုင်ဖို့ သင့်တော်လောက်တယ် မဟုတ်လား။

သူ လက်ကို ဝှေ့ယမ်းလိုက်ပြီး အစိမ်းရောင် သစ်သား နန်းတော်ကို ထုတ်ယူကာ၊ နန်းတော်ထဲရှိ ရေခဲရေကန်နှင့် သူ့ရှေ့ရှိ ကြာကန်ကို ပေါင်းစပ်လိုက်သည်။ ရေခဲကြေးခွံ ငါးဘုရင်နှင့် ငါးမျိုးနွယ်စု အားလုံးကို အောက်ခြေ မမြင်နိုင်လောက်အောင် နက်ရှိုင်းသော ရေကန်ထဲသို့ ထည့်လိုက်လေ၏။

“ဗွမ်း…”

ရေခဲကြေးခွံ ငါးဘုရင်သည် ရေကန်ထဲသို့ ကျသွားသည်နှင့် တပြိုင်နက် အလွန်အမင်း ပျော်ရွှင်သွားပြီး ရေပေါ်သို့ ပြန်လည် ခုန်တက်လာကာ စုယွီကို ကြည့်လိုက်သည်။

သုံးကိုက်ခန့် ရှည်လျားသော ဧရာမ ခန္ဓာကိုယ်ကြီးဖြင့် ငါးဘုရင်သည် စုယွီ၏ ပတ်ဝန်းကျင်တွင် လှည့်ပတ် ကူးခပ်နေပြီးနောက်၊ နောက်ဆုံးတွင် ရေကန်ထဲသို့ ပြန်ဝင်ကာ စုယွီကို မော်ကြည့်နေလေ၏။

ရေခဲကြေးခွံ ငါးမျိုးနွယ်စုသည် အတော်အတန် ကြီးမားသော အုပ်စုဖြစ်ပြီး အကောင်ရေ တစ်ထောင်ကျော် ရှိသည်။

သို့သော် ငါးဘုရင်မှလွဲ၍ ကျန်သော ရေခဲကြေးခွံ ငါးများမှာ ဉာဏ်ရည် မရှိကြသလို၊ စွမ်းအားလည်း နည်းပါးကြ၏။ သာမန် ဝိညာဉ်သတ္တဝါများသာ ဖြစ်ကြသည်။

အံ့သြစရာ ကောင်းသည်မှာ ယွီမိသားစု၏ ဂူစံအိမ်တွင် နှစ်ပေါင်းများစွာ နေထိုင်ခဲ့သော ရေခဲကြေးခွံ ငါးဘုရင်သည် ဒုတိယအဆင့် အဆင့်မြင့် မိစ္ဆာသားရဲ နယ်ပယ်သို့ တက်လှမ်းနိုင်ခဲ့ခြင်းပင်။

စုယွီက ပြုံးလိုက်ပြီး သူ့လက်စွပ်ထဲမှ တတိယအဆင့် အဆင့်မြင့် ဝိညာဉ်အရည် တစ်စက်ကို ထုတ်ယူလိုက်၏။ လက်ကို ဖြည်းညှင်းစွာ ဝှေ့ယမ်းလိုက်ရာ ဝိညာဉ်အရည်သည် ငါးဘုရင်ဆီသို့ ပျံသန်းသွားပြီး၊ ငါးဘုရင်က တမုဟုတ်ချင်း မျိုချလိုက်လေသည်။

ဧရာမ သဘာဝ ဝိညာဉ်စွမ်းအင်များ သူ့ခန္ဓာကိုယ်ထဲတွင် ပေါက်ကွဲထွက်ပေါ်လာပြီးနောက် ငါးဘုရင်၏ မျက်လုံးများ တောက်ပသွား၏။ စုယွီ ရှိရာဘက်သို့ သုံးကြိမ်တိုင်တိုင် ဦးညွှတ် အရိုအသေ ပေးပြီးနောက်၊ ဝိညာဉ်အရည်ကို သန့်စင်ရန် ရေကန်အောက်ခြေသို့ ငုပ်လျှိုး သွားလေတော့သည်။

စုယွီကမူ ရေခဲကြေးခွံ ငါးမျိုးနွယ်စုကို ကြည့်ရင်း အတွေးနက်နေ၏။ သူ၏ စိတ်ထဲတွင် "ဝိညာဉ်သန့်စင်အိုး" ၏ လုပ်ဆောင်ချက်ကို တွက်ချက်နေခြင်းပင်။

ဝိညာဉ်သန့်စင်အိုး ရှိနေသမျှ သူသည် ဝိညာဉ်အရည် အမြောက်အမြားကို သန့်စင် ထုတ်လုပ်နိုင်၏။

သူ့ကိုယ်ပိုင် လိုအပ်ချက်အပြင် ဝိညာဉ်သန့်စင်အိုးက ပိုလျှံသော ပမာဏကို စုဆောင်းထားနိုင်သည်။

အရည်အသွေး အမြင့်ဆုံး ဖြစ်သည့် တတိယအဆင့် အဆင့်မြင့် ဝိညာဉ်အရည်ကိုတောင် ဒီလောက်များများ ထုတ်လုပ်နိုင်သည် ဆိုလျှင်၊ အဆင့်နိမ့် ဝိညာဉ်အရည်တွေကိုသာ ထုတ်မည် ဆိုလျှင် ပမာဏက ကြောက်ခမန်းလိလိ များပြားနေမည်ပင်။

သို့ဆိုလျှင် ဝိညာဉ်သန့်စင်အိုး၏ အကူအညီနှင့်.. သူ တစ်ခုခု လုပ်၍ ရမနေဘူးလား။

ဥပမာအားဖြင့်... ကောင်းကင်မိုးကြိုး ကြွက်မျိုးနွယ်စုကို ပျိုးထောင်ပေးတာမျိုး၊ ပြီးတော့ သူ့ရှေ့က ရေခဲကြေးခွံ ငါးမျိုးနွယ်စုကို မွေးမြူတာမျိုးပေါ့။

‘ထိုက်ရွှီ အင်မော်တယ် မဟာမိတ်အဖွဲ့က မကြာခင် တာ့ယွဲ့ စံအိမ်တော်ကို တိုက်ခိုက်တော့မယ်... ကြည့်ရတာ သူတို့က ဖုန်းလော့ စံအိမ်တော် နဲ့ ကိုးဝိညာဉ် မိစ္ဆာ နန်းတော်က မိစ္ဆာအင်အားစုတွေနဲ့ပါ ပူးပေါင်းထားပုံ ရတယ်...’

စုယွီ သူ့ဘာသာ တွေးလိုက်သည်။

‘သူတို့သာ ပူးပေါင်းလိုက်ရင် ကျင့်ကြံသူ အရေအတွက်က ရေတွက်လို့ မရနိုင်အောင် များပြားသွားလိမ့်မယ်…’