အခန်း (၁၅၁-၁၅၃)

အခန်း (၁၅၁) - မိစ္ဆာများ သောင်းကျန်းနေသော ပွဲတော်.. ဒီနေရာမှာ မွန်းစတားတွေ အများကြီးပါလား

~သုံးရက် ကြာပြီးနောက် ၊ ချန်ဝူတောင်တန်း၏ အနက်ရှိုင်းဆုံး နေရာ။ အရိုးသင်္ချိုင်း ချောက်ကမ်းပါး၌ ဖြစ်၏။

ဤနေရာသည် တစ်နှစ်ပတ်လုံး အနက်ရောင် မိစ္ဆာစွမ်းအင်များဖြင့် ဖုံးလွှမ်းနေသော ဧရာမ ချောက်ကမ်းပါးကြီး တစ်ခု ဖြစ်၏။ ချောက်ကမ်းပါး အတွင်း၌ ကျောက်ဆောင်များ ပြည့်နှက်နေပြီး၊ သစ်ပင် ပန်းမန်ဟူ၍ မရှိဘဲ၊ နေရာအနှံ့တွင် ဖြူဖွေးနေသော အရိုးစုများသာ ပြန့်ကျဲနေတော့သည်။

သို့သော်လည်း ယနေ့တွင်မူ ဤနေရာ၌ အလံများ တဝေဝေ လွင့်ပျံနေပြီး၊ မိစ္ဆာ အရှိန်အဝါများမှာလည်း ကောင်းကင်သို့တိုင် ထိုးတက်နေ၏။

မိုင်ပေါင်း ထောင်ချီ ကျယ်ဝန်းသော မိစ္ဆာလမ်းစဉ်၏ အကြီးစား ပွဲတော်ကြီး ဖြစ်သည့် ‘မိစ္ဆာပေါင်း တစ်သောင်း တွေ့ဆုံပွဲ’ ကို ကျင်းပနေခြင်း ဖြစ်ရာ... မိစ္ဆာဂိုဏ်း (၃၆) ဂိုဏ်း၊ မိစ္ဆာဘုရင် (၇၂) ပါးနှင့် မရေမတွက်နိုင်သော ရက်စက်လှသည့် တစ်ကိုယ်တော် မိစ္ဆာကျင့်ကြံသူများ စုဝေးရောက်ရှိနေကြခြင်းပင် ဖြစ်တော့သည်။

ကောင်းကင်ယံထက်ဝယ် သွေးနီရောင် အလင်းတန်းများ၊ တိမ်မည်းကြီးများနှင့်... ကြောက်မက်ဖွယ် မိစ္ဆာသားရဲများကို စီးနင်းလာသော အစွမ်းထက် ပညာရှင်များ... တစ်ယောက်ပြီး တစ်ယောက် ရောက်ရှိလာတိုင်း လူအုပ်ကြီးကြားတွင် အုတ်အော်သောင်းနင်း ဖြစ်သွားစေ၏။

“ဟိုမှာ ကြည့်စမ်း။ ‘အရိုးဂိုဏ်း’ က ဘိုးဘေးကြီးဗျို့။ သူက အခြေခံအုတ်မြစ် တည်ဆောက်ခြင်း အဆင့် ပြီးပြည့်စုံတဲ့ ကြေးဝါ အလောင်းကောင် တစ်ကောင်ကို ဖန်တီးထားတယ်လို့ ကြားတယ်နော်"

“ဟိုဘက်က ‘ဟယ်ဟွမ် (ကာမဂုဏ်) ဂိုဏ်း’ က မိစ္ဆာမလေးတွေပဲ။ ကျွတ်... ကျွတ်... ဝေးဝေးက ရှောင်နေမှ... မဟုတ်ရင် မင်းရဲ့ ယန် (အသက်) စွမ်းအင်တွေ အကုန် စုပ်ခံရလိမ့်မယ်”

မိစ္ဆာကျင့်ကြံသူများ အချင်းချင်း ချီးမွမ်းကာ မိမိတို့၏ ကြောက်မက်ဖွယ် ဂုဏ်သတင်းများကို ကြွားဝါနေကြစဉ်မှာပင်...

“ဝုန်း... ရွှမ်း...”

အဝေးရှိ ကောင်းကင်ယံဆီမှ မိုးခြိမ်းသံပမာ ကျယ်လောင်လှသော ဟိန်းဟောက်သံ တစ်ခု ရုတ်တရက် ထွက်ပေါ်လာသည်။

အားလုံး မော့ကြည့်လိုက်သောအခါ... ဖုန်လုံးကြီးများ အလယ်မှနေ၍ (အမှန်တော့ မြန်လွန်းသဖြင့် ထွက်လာသော ဖုန်များ ဖြစ်ပါသည်)... အလွန်တရာ ထူးဆန်းသော ပုံစံများ ရှိသည့် လူအုပ်ကြီး တစ်ခုသည် တောင်ကြားလမ်းဆီမှနေ၍ တည့်တည့်မတ်မတ် ချီတက်လာသည်ကို တွေ့လိုက်ကြရ၏။

ထိုအဖွဲ့သည် မှော်ရတနာများ၊ သို့မဟုတ် မိစ္ဆာသားရဲများကို စီးနင်းလာခြင်း မဟုတ်ဘဲ... အားရပါးရ ပြေးလာကြခြင်း ဖြစ်သည်။

သို့သော်လည်း သူတို့၏ အရှိန်အဝါမှာ... စစ်တပ်ကြီး တစ်ခုထက်ပင် ပိုမို ကြောက်စရာ ကောင်းနေတော့၏။

ရှေ့ဆုံးမှ ဦးဆောင်လာသူမှာ ခရမ်းရွှေရောင် ဝတ်ရုံကို ဆင်မြန်းထားပြီး၊ ချောမောခန့်ညားကာ သီးသန့်ဆန်ဟန် ရှိသော လူငယ်လေး တစ်ဦး (ကျန်းချန်) ဖြစ်၏။ သူသည် လက်နှစ်ဖက်ကို နောက်ပစ်ကာ လေဟာနယ်ကို နင်းလျှောက်လာပြီး... ရွှေအမြုတေအဆင့် ပြီးပြည့်စုံခြင်း၏ ကျောချမ်းဖွယ် ကောင်းလှသော အရှိန်အဝါကြီးကို ထုတ်လွှတ်နေတော့သည်။

သူ၏ အနောက်တွင်မူ... လှပလွန်းလှသော်လည်း မျက်နှာထား ရှုပ်ထွေးနေပုံ ရသည့် အဖြူရောင် ဝတ်စုံလေးနှင့် အမျိုးသမီး တစ်ဦး (ဆုချင်းကော) လိုက်ပါလာ၏။

သူမ၏ အနောက်တွင်မှ... ထူးဆန်းသော အဝတ်အစားများ ဝတ်ဆင်ထားပြီး၊ ဆာလောင်နေသော ဝံပုလွေများပမာ ရူးသွပ် မျက်လုံးများ ရှိသော... ထူးဆန်းသည့် လူအုပ်ကြီး (အမှန်တော့ လက်ရွေးစင် သုံးရာခန့်သာ ခေါ်လာခဲ့သော်လည်း သုံးထောင်ခန့် ရှိမည်ဟု ထင်မှတ်ရလေသည်) လိုက်ပါလာကြခြင်းပင်။

“ဟို... ဟိုဟာက ဘယ်ဂိုဏ်းလဲ"

“မိစ္ဆာ အရှိန်အဝါက တကယ့်ကို ပြင်းထန်လွန်းတယ်။ ဖွဲ့စည်းပုံကလည်း လုံးဝ ဖရိုဖရဲပဲ။ ပြီးတော့ သူတို့ရဲ့ အကြည့်တွေက... တကယ့်ကို ထူးဆန်းလွန်းတယ်

ပွဲတော်သို့ ရောက်ရှိနေကြသော မိစ္ဆာကျင့်ကြံသူများမှာ ဤလူအုပ်ကြီးကို ကြည့်ကာ လုံးဝ အူကြောင်ကြောင် ဖြစ်သွားကြ၏။

အကြောင်းမူကား ထိုထူးဆန်းသော လူများက သူတို့ကို ကြည့်နေသည့် အကြည့်များမှာ... ကျင့်ကြံသူ အချင်းချင်း ကြည့်သည့် အကြည့်မျိုး မဟုတ်ဘဲ... လမ်းလျှောက်နေသည့် ‘ဝက်သားနှပ်’ ပန်းကန်များကို ကြည့်နေသည့်အလား ဖြစ်နေသောကြောင့်ပင်။

---

ကွေ့ယွမ်ဂိုဏ်း အဖွဲ့ အတွင်း၌မူ၊

“ဘုရားရေ..ဒါက မြေပုံအသစ် ဖြစ်တဲ့ ‘အရိုးသင်္ချိုင်း’ လား၊ အငွေ့အသက်က တကယ့်ကို အမိုက်စားပဲဟေ့"

ဝမ်သဲ့ဖာ (ဒီဖရဲသီး မှည့်ပြီလား) သည် သူ၏ အဆင့် (၂) တောဝက်ကြီး ပက်ပါ ကို စီးလျက် အဖွဲ့၏ ရှေ့ဆုံးသို့ တိုးထွက်လာပြီး... ပတ်ဝန်းကျင်ရှိ အသည်းထိတ်ဖွယ် မိစ္ဆာကျင့်ကြံသူများကို ကြည့်ကာ မျက်လုံးများ အရောင်တောက်လျက် လက်ညှိုးထိုးပြလိုက်၏။

“ညီအစ်ကိုတို့ ကြည့်စမ်း... အကုန်လုံးက နာမည်နီတွေချည်းပဲဟေ့။ မျက်နှာပြင် တစ်ခုလုံး နာမည်နီ မွန်းစတားတွေ ပြည့်နေတာပဲဗျို့"

“ဟိုဘက်က အရိုးစုနဲ့ ကစားနေတဲ့ အဘိုးကြီးက ပစ္စည်းကောင်းတွေ ပါတဲ့ ပုံပဲ။ သူ့လက်ထဲက အရိုးတောင်ဝှေးက သေချာပေါက် အဆင့်မြင့် မှော်ရတနာပဲ ဖြစ်ရမယ်"

“ညာဘက်က အဝတ်အစား ခပ်ဟော့ဟော့လေးနဲ့ ကောင်မလေးကိုကော... ဟဲဟဲ... အိမ်ပြန်ခေါ်သွားပြီး ဇနီးလေး လုပ်လို့ ရမလား မသိဘူးနော် (အဲ့ဒီ လုပ်ဆောင်ချက် မပါပါ)"

ကောင်းကင်ခွင်း ဓားတစ်လက် မှာလည်း ဓားရိုးကို ကိုင်ထားရင်း စိတ်လှုပ်ရှားလွန်းသဖြင့် လက်ချောင်းများပင် တုန်ယင်နေသည်။

“ဒီ နေရာမှာ မွန်းစတားတွေ အများကြီးပါလား။ ပြီးတော့ အကုန်လုံးက အဆင့်မြင့်တွေချည်းပဲ။ ဒီမှာသာ အားရပါးရ ကြိတ်ခွင့် ရမယ်ဆိုရင်... ငါ့ရဲ့ အတွေ့အကြုံ အမှတ်တွေတော့ အကြီးအကျယ် တက်သွားမှာ သေချာတယ်"

“စိတ်မလောကြနဲ့လေ"

ထိုသို့ ၊ ဆောက်လုပ်ရေးခွင်မှ ဦးလေးကျန်း က ဆေးတံကို တစ်ချက်ဖွာလိုက်ရင်း သတိပေးလိုက်သည်။

“ဂိုဏ်းချုပ်ကြီးက ဒါကို ‘ဇာတ်လမ်း မုဒ်’ လို့ ပြောထားတယ်လေ။ တိုက်ခိုက်လို့ မရသေးဘူး။ အရင်ဆုံး တာဝန်လေး ဘာလေး ယူလို့ ရမလား ကြည့်ကြသေးတာပေါ့"

ကစားသမားများ၏ လှုပ်ရှားမှုများကို ကန့်သတ်ထားသော်လည်း... သူတို့၏ လောဘဇောများ၊ စပ်စုချင်စိတ်များနှင့် လုံးဝ (လုံးဝ) ရိုသေမှု မရှိသော အကြည့်များကြောင့်... ပတ်ဝန်းကျင်ရှိ မိစ္ဆာကျင့်ကြံသူများမှာ ကျောချမ်းသွားရရှာ၏။

ယုန်ငယ်လေး တစ်အုပ်က ဝံပုလွေအုပ်ကြားထဲ ဝင်လာပြီး... ဝံပုလွေသားကို ဘယ်လို ချက်စားမလဲ ဆိုတာကို သွားရည်ကျလျက် ဆွေးနွေးနေကြသည့် ခံစားချက်မျိုးပင် ဖြစ်တော့သည်။

လူအုပ်ကြီးမှာ ပွဲတော် အဝင်ဝ၌ ရပ်တန့်သွားသည်။

ဧည့်ခံကြိုဆိုရေး တာဝန်ယူထားသူမှာ အခြားသူ မဟုတ်... သွေးမိစ္ဆာဂိုဏ်း၏ အိမ်တော်ထိန်း လီသွေးညဉ့် ပင် ဖြစ်၏။

ကျန်းချန် ကိုယ်တိုင် ရောက်လာသည်ကို မြင်လိုက်ရသည့်အခါ သူမှာ စိတ်လှုပ်ရှားလွန်းသဖြင့် မျက်နှာကြီးပင် နီမြန်းသွားရသည်။ သူသည် အမြန် ပြေးထွက်လာပြီး အလွန်တရာ ရိုသေစွာဖြင့် ခါးညွတ် ဂါရဝပြုလိုက်တော့၏။

“ကျွန်တော် လီသွေးညဉ့်... ဂိုဏ်းချုပ်ကြီး ကျန်းချန်ကို ကြိုဆိုပါတယ် ခင်ဗျာ။ ကွေ့ယွမ်ဂိုဏ်းက စီနီယာကြီးတွေကိုလည်း ကြိုဆိုပါတယ် ခင်ဗျာ"

“စီနီယာကြီးတို့ ရောက်လာတာဟာ...ကျွန်တော်တို့ မိစ္ဆာဂိုဏ်းတော်ကြီး အတွက်တော့ တကယ့်ကို ဂုဏ်ယူစရာပါပဲ ခင်ဗျာ။ အတွင်းကို ကြွပါ"

ကျန်းချန်က သူ၏ အထီးကျန် ဆရာကြီး ဟန်ပန်ကို ထိန်းသိမ်းလျက် အနည်းငယ် ခေါင်းညိတ်လိုက်ပြီး... “အင်း” ဟု တစ်လုံးတည်းသာ ပြန်ပြောလိုက်သည်။

ထို့နောက် သူသည် ဆုချင်းကောနှင့် တပည့်များကို ဦးဆောင်ကာ... လူအများ၏ အကြည့်များ အောက်တွင် ပွဲတော်၏ အလယ်ဗဟိုဆီသို့ ခန့်ညားစွာ ဝင်ရောက်သွားလေတော့သည်။

လမ်းတစ်လျှောက်တွင် ကစားသမားများမှာ သူတို့၏ လက်များနှင့် ပါးစပ်များကို လုံးဝ (လုံးဝ) မထိန်းချုပ်နိုင်ကြတော့ချေ။

“ဟေး... သူငယ်ချင်း၊ မင်းရဲ့ အနက်ရောင် ဝတ်ရုံကြီးက တော်တော် မိုက်တာပဲ။ ဘယ်က ဝယ်တာလဲဗျ။ ငါ့ကို ရောင်းမလား"

ကစားသမား တစ်ဦးသည် ဖြတ်သွားသော မိစ္ဆာကျင့်ကြံသူ တစ်ဦးကို တားကာ ဈေးမေးလိုက်ခြင်းပါ။

ထို မိစ္ဆာကျင့်ကြံသူမှာ ဒေါသတကြီးဖြင့် ဟိန်းဟောက်လိုက်၏။ “သွားစမ်း။ ဒါ ငါ့ရဲ့ ကိုယ်ပိုင် ဝိညာဉ် ဝတ်ရုံကွ"

“မရောင်းရင်လည်း ပြီးတာပဲလေ။ ဘာလို့ ဒီလောက်တောင် ရိုင်းစိုင်းနေရတာလဲ”

ထိုကစားသမားက နှုတ်ခမ်းကို စူလိုက်ပြီး တိုးတိုးလေး ကျိန်ဆဲလိုက်သည်။

“တိုက်ပွဲ စတာနဲ့... မင်းက ပထမဆုံး အသတ်ခံရမယ့် ကောင်ပဲဟေ့"

အခြား ကစားသမား တစ်ဦးမှာလည်း လမ်းဘေး၌ အလှပြထားသော ဦးခေါင်းခွံ တစ်ခုကို တွေ့လိုက်ရသဖြင့်... သူ၏ ဝိညာဉ်သိုလှောင်အိတ်ထဲသို့ အတင်း ထိုးထည့်ရန် ကြိုးစားနေ၏။

“ဒါက အများသုံး ပစ္စည်းလေဗျာ... ယူလို့ မရဘူး"

လီသွေးညဉ့်မှာ ချွေးအေးများ ထွက်လာပြီး ချက်ချင်း သွားရောက် တားဆီးရရှာတော့သည်။

“ဟွန်း... ကပ်စေးနှဲလိုက်တာ။ ငါက ကောက်လို့ရတဲ့ ပစ္စည်းများ မှတ်လို့

ကျန်းချန်၏ အနောက်မှ လိုက်ပါလာသော ဆုချင်းကောသည်... ဤ မိစ္ဆာလမ်းစဉ်၏ ပွဲတော်ကြီးကို ဈေးဝယ်ထွက်လာသည့်အလား ပေါ့ပေါ့ပါးပါး လျှောက်သွားနေကြပြီး၊ နာမည်ကြီး မိစ္ဆာခေါင်းဆောင်များကိုပင် ဝေဖန်နေကြသော ထို ‘စီနီယာ အစ်ကိုကြီး’ များကို ကြည့်ကာ... သူမ၏ နှလုံးသားမှာ အပြင်သို့ပင် ခုန်ထွက်လာတော့မည့်အလား ခံစားနေရ၏။

“ဂိုဏ်းချုပ်ကြီး...”

ဆုချင်းကောက အသံကို နှိမ့်ကာ စိုးရိမ်တကြီး မေးလိုက်၏။

“ဒီနေရာမှာ မိစ္ဆာကျင့်ကြံသူတွေ အများကြီးပဲနော်။ အချို့ဆိုရင် အခြေခံအုတ်မြစ် တည်ဆောက်ခြင်း အဆင့် နှောင်းပိုင်းတွေ၊ ပြီးပြည့်စုံတဲ့ အဆင့်တွေတောင် ရှိနေတာ။ ကျွန်မတို့ အရမ်းကို မာနထောင်လွှားလွန်းနေပြီ မဟုတ်လားရှင်"

ကျန်းချန်က သူမကို တစ်ချက် ကြည့်လိုက်ပြီး... နှုတ်ခမ်းထောင့်တွင် အပြုံး တစ်ခု ပေါ်လာကာ အသံဖြင့် ဆက်သွယ် ပြောဆိုလိုက်၏။

“မာနထောင်လွှားတယ် ဟုတ်လား"

“ချင်းကော... မှတ်ထားလိုက်။ မိစ္ဆာလမ်းစဉ်မှာက... ဘယ်သူက ပိုပြီး ရက်စက်လဲ၊ ဘယ်သူက ပိုပြီး ရူးသွပ်လဲ ဆိုတာက အဓိကပဲလေ"

“ပတ်ဝန်းကျင်က မိစ္ဆာကျင့်ကြံသူတွေကို သေချာ ကြည့်လိုက်စမ်း... အခု သူတို့ရဲ့ မျက်လုံးတွေ ဘယ်လို ဖြစ်နေပြီလဲ ဆိုတာကို"

ဆုချင်းကောသည် ခေတ္တမျှ ရပ်တန့်သွားပြီးနောက်... ပတ်ဝန်းကျင်ကို တိတ်တဆိတ် ဝေ့ကြည့်လိုက်၏။

အံ့သြစရာ ကောင်းလောက်အောင်ပင်... မူလက ရက်စက်ပြီး ရိုင်းစိုင်းလှသော မိစ္ဆာကျင့်ကြံသူ တစ်ယောက်မှ... ဆူညံပွက်လောရိုက်ပြီး စည်းကမ်းမဲ့နေသော ကွေ့ယွမ်ဂိုဏ်းသားများကို သွားရောက် ပြဿနာ မရှာရဲကြသည်ကို တွေ့လိုက်ရသည်။

ထိုအစား... သူတို့၏ မျက်လုံးများထဲတွင် စိုးရိမ်မှုများ၊ သံသယများနှင့်... ‘ကြောက်လန့်မှု’ အရိပ်အယောင် အချို့ပင် ပြည့်နှက်နေကြတော့၏။

အဘယ်ကြောင့်ဆိုသော် သူတို့ ခန့်မှန်း၍ မရသောကြောင့် ဖြစ်သည်။

ဤလူအုပ်ကြီးက ဘာကြောင့်များ မိစ္ဆာပေါင်း တစ်သောင်း တွေ့ဆုံပွဲကြီးမှာ ဒီလောက်အထိ ရမ်းကားရဲသလဲ ဆိုတာကို သူတို့ နားမလည်နိုင်ကြပေ။

“သူတို့ရဲ့ ကျင့်စဉ်အဆင့်တွေက သိပ်မမြင့်ပေမယ့်... အချိန်မရွေး ကိုယ်နဲ့အတူ အသေခံတော့မယ့် ပုံစံမျိုးတွေ ရှိနေတယ်” ဆိုသည့် ဤလူအုပ်ကြီး၏ ရူးသွပ်သော သဘာဝကို သူတို့ လုံးဝ (လုံးဝ) ခန့်မှန်း၍ မရနိုင်ကြသောကြောင့် ဖြစ်၏။

ကျန်းချန် ပြောသလိုပင်... မိစ္ဆာလမ်းစဉ်တွင် ‘အစွမ်းထက်သူ’ ထက် ‘အရူး’ များကို ပိုပြီး ကြောက်ကြရသည် မဟုတ်ပါလော။

ကွေ့ယွမ်ဂိုဏ်း ဆိုသည်မှာလည်း ထိပ်တန်း အရူးအုပ်စုကြီး တစ်ခုသာ ဖြစ်သည်။

“နေရာယူကြစမ်း"

ကျန်းချန်သည် သွေးမိစ္ဆာဂိုဏ်း၏ အဓိက နေရာပြီးလျှင် ဒုတိယ အကောင်းဆုံး ဖြစ်သော... ကွေ့ယွမ်ဂိုဏ်းအတွက် သတ်မှတ်ထားသည့် နေရာသို့ လျှောက်သွားလိုက်၏။

သူသည် ခမ်းနားကြီးကျယ်စွာ ထိုင်ချလိုက်ပြီး... သူ၏ ကိုယ်ခန္ဓာမှ ရွှေအမြုတေအဆင့် ပြီးပြည့်စုံခြင်း၏ ကြီးမားလှသော ဖိအားကြီးကို မည်သည့် ထိန်းချုပ်မှုမှ မရှိဘဲ အစွမ်းကုန် ထုတ်လွှတ်လိုက်ရာ... အကဲစမ်းရန် လာရောက်သည့် ဂိုဏ်းငယ်လေးအချို့မှ လူများကို ချက်ချင်းပင် ဖိနှိပ်လိုက်တော့၏။

“တပည့်တို့...”

ကျန်းချန်က လက်ကို ဝှေ့ယမ်းလိုက်၏။

“လွတ်လွတ်လပ်လပ် နားလို့ ရပြီ။ ဒါပေမဲ့ မှတ်ထား... ငါ့ကို အရှက်တော့ မခွဲနဲ့နော်"

“ဟုတ်ကဲ့ပါဗျို့"

ကစားသမား ရာပေါင်းများစွာမှာ ချက်ချင်းပင် လူစုကွဲသွားကြတော့၏။

အချို့က အခြား ဂိုဏ်းများ၏ နေရာများသို့ သွားရောက်ကာ အလကား စားသောက်နေကြ၏။ အချို့ကမူ အဝတ်စုတ် တစ်ခုကို မြေပြင်ပေါ် ခင်းကာ ‘ကွေ့ယွမ်ဂိုဏ်း အထူးထုတ်’ (အဆိပ်ဆေးလုံးများနှင့် ကြွက်သားရေများ) ဟု ဆိုကာ ဈေးရောင်းနေကြတော့သည်။

အခြား သူများကလည်း မိစ္ဆာကျင့်ကြံသူ အချို့ကို အတင်း ဆွဲခေါ်ကာ... ယောကျ်ားစစ် မစစ် ‘လက်မောင်းလှဲ’ ပြီး ဆုံးဖြတ်ရမည်ဟု ဇွတ်အတင်း ပြုလုပ်နေကြလေ၏။

အလွန် တည်ကြည်လေးနက်ပြီး မှိုင်းညို့နေသော မိစ္ဆာပေါင်း တစ်သောင်း တွေ့ဆုံပွဲကြီးမှာ... ဤလူများ ရောက်လာပြီးနောက်တွင် ရုတ်တရက် အနည်းငယ် ‘ပျက်ရယ်စရာ’ ကောင်းသော ပွဲတော်ကြီး အဖြစ်သို့ ပြောင်းလဲသွားတော့သည်။

အဓိက နေရာတွင် ထိုင်နေသော သွေးမိစ္ဆာဂိုဏ်း၏ ဂိုဏ်းချုပ်ဖြစ်သူ... ပိန်လှီခြောက်ကပ်နေသည့် ရွှေအမြုတေ အစောပိုင်းအဆင့် အဘိုးကြီးသည် အောက်ဘက်ရှိ ဖရိုဖရဲ မြင်ကွင်းကို ကြည့်ကာ မျက်ခုံးများ တုန်ယင်လာပြီး... ဘေးနားရှိ လီသွေးညဉ့်ကို လှည့်မေးလိုက်၏။

“ဒါက မင်းပြောတဲ့... ပုန်းကွယ်နေတဲ့ မိစ္ဆာဂိုဏ်းကြီး ဆိုတာလား"

လီသွေးညဉ့်က အလွန်တရာ အထင်ကြီး လေးစားနေသည့် မျက်နှာပေးဖြင့် ခေါင်းညိတ်ပြလိုက်၏။

“ဂိုဏ်းချုပ်ကြီး... သူတို့ရဲ့ မာနထောင်လွှားတဲ့ ဟန်ပန်တွေကို ကြည့်လိုက်ပါ။ စည်းကမ်းတွေကို အမှိုက်လို သဘောထားတဲ့ သူတို့ရဲ့ အပြုအမူတွေကို ကြည့်လိုက်စမ်းပါ။ ဒါဟာ စစ်မှန်တဲ့ မိစ္ဆာကြီးတွေရဲ့ ဟန်ပန်ပဲ မဟုတ်လားခင်ဗျ"

သွေးမိစ္ဆာဂိုဏ်း၏ ဂိုဏ်းချုပ်ကြီးမှာ ခေတ္တမျှ တိတ်ဆိတ်သွားပြီးနောက်... နောက်ဆုံးတွင် သူသည်လည်း အလွန် သဘောတူသည့်အလား ခေါင်းညိတ်လိုက်လေတော့သည်။

“တကယ်ပါပဲ... သူတို့ရဲ့ မိစ္ဆာစိတ်တွေက တကယ့်ကို နက်ရှိုင်းပြီး ထူးခြားလွန်းလှပါတယ်"

---

[t.n-* ရွှေအမြုတေအဆင့်: ကျင့်ကြံသူ တစ်ဦး၏ အစွမ်း အထွတ်အထိပ်သို့ ရောက်ရှိနေသော အဆင့်။

* အခြေခံအုတ်မြစ် တည်ဆောက်ခြင်း အဆင့် ကျင့်ကြံခြင်း၏ ဒုတိယအဆင့်။

* တစ်ကိုယ်တော် ကျင့်ကြံသူ: မည်သည့် ဂိုဏ်းနှင့်မှ မသက်ဆိုင်သော ကျင့်ကြံသူ။

* နာမည်နီ: ရန်သူ သို့မဟုတ် တိုက်ခိုက်ရမည့် မွန်းစတားများကို ပြသသည့် အမှတ်အသား။

* ဇာတ်လမ်း မုဒ်: တိုက်ခိုက်ခြင်းထက် ဇာတ်လမ်းကို အဓိကထားသော ကစားနည်း စနစ်။

* လက်မောင်းလှဲခြင်း: လက်မောင်း အင်အား ယှဉ်ပြိုင်သည့် ကစားနည်း။]

အခန်း (၁၅၂) - မိစ္ဆာလမ်းစဉ်၏ နှိုင်းယှဉ်ချက်.. ဒါကို ရက်စက်တယ်လို့ ခေါ်တာလား

~မွန်းတည့်ချိန်။ အရိုးသင်္ချိုင်း ချောက်ကမ်းပါး။ မိစ္ဆာပေါင်း တစ်သောင်း တွေ့ဆုံပွဲ၏ ဗဟိုကွင်းပြင်ကျယ်၌ ဖြစ်၏။

ခြောက်ခြားဖွယ်ရာ ဥချိုမှုတ်သံနှင့်အတူ... အရပ်မျက်နှာ အသီးသီးမှ မိစ္ဆာလမ်းစဉ်၏ လက်ရွေးစင်များ စုဝေးရာ ဤပွဲတော်ကြီးမှာ တရားဝင် စတင်သွားခဲ့ပြီ ဖြစ်သည်။

ကွင်းပြင်အလယ်ရှိ မရေမတွက်နိုင်သော အရိုးဖြူများဖြင့် တည်ဆောက်ထားသည့် စင်မြင့်ကြီးထက်ဝယ်... အရှေ့ဘက် အရပ်ကို စိုးမိုးထားသော သွေးမိစ္ဆာဂိုဏ်း၏ ဂိုဏ်းချုပ် သွေးခြောက်သွေ့ အရှင်သည် ဖြည်းညှင်းစွာ မတ်တတ်ရပ်လိုက်၏။ သူ၏ ကိုယ်ခန္ဓာမှာ ပိန်လှီခြောက်ကပ်နေပြီး သိပ်သည်းလှသော သွေးညှီနံ့များက သူ့ကို ဝန်းရံထားကာ၊ သူ၏ အသံမှာလည်း အက်ကွဲပြီး နားငြီးစရာ ကောင်းလှသည်။

“တာအိုရောင်းရင်းတို့... ယနေ့ ကျင်းပတဲ့ ဒီပွဲတော်ကြီးဟာ မဟာမိတ်ဖွဲ့ဖို့ အတွက်ရော၊ အာဏာကို ပြသဖို့ အတွက်ပါ ဖြစ်ပါတယ်"

“ရှေးခေတ် ကတည်းက မိစ္ဆာလမ်းစဉ်မှာ အစွမ်းထက်တဲ့ သူကိုသာ လေးစားကြတာလေ။ ဒီနေ့ အရပ်မျက်နှာ အသီးသီးက သူရဲကောင်းတွေ စုဝေးနေကြပြီဆိုတော့... ကိုယ့်ရဲ့ နည်းလမ်းလေးတွေကို ထုတ်ပြပြီး အားလုံးရဲ့ အမြင်အာရုံကို ကျယ်လောင်စေရအောင်။ ဒီ ချန်ဝူ ဒေသမှာ ဘယ်သူက မိစ္ဆာတွေထဲက မိစ္ဆာအစစ်လဲ ဆိုတာကို ကြည့်ကြသေးတာပေါ့ဗျာ"

ဤစကားအဆုံးတွင် ပရိသတ်များထံမှ သြဘာပေးသံများ ထွက်ပေါ်လာ၏။ ဒါက မိစ္ဆာပေါင်း တစ်သောင်း တွေ့ဆုံပွဲ၏ ရိုးရာ အစီအစဉ် တစ်ခုဖြစ်သော ‘ရက်စက်မှု ပြိုင်ပွဲ’ ပင် ဖြစ်သည်။ ဘယ်သူ့ရဲ့ ဇာတ်လမ်းက ပိုပြီး ရက်စက်သလဲ၊ ဘယ်သူ့ရဲ့ နည်းလမ်းတွေက ပိုပြီး ယုတ်မာသလဲ ဆိုတဲ့ အပေါ် မူတည်ပြီး... ထိုသူသည် ပိုမို လေးစားခံရမည် ဖြစ်ကာ စကားပြောခွင့် အာဏာကိုလည်း ပိုမို ရရှိမည် ဖြစ်သည်။

ပထမဆုံး စင်ပေါ်သို့ ခုန်တက်သွားသူမှာ... တစ်ကိုယ်လုံးတွင် ဦးခေါင်းခွံ တက်တူးများ အပြည့် ထိုးထားသော လူသန်ကြီး တစ်ဦး ဖြစ်၏။ သူကား ‘အရိုးချေမွ ဂိုဏ်း’ ၏ ဂိုဏ်းချုပ်ပင် ဖြစ်တော့သည်။

“ဟက်... ရက်စက်မှု အကြောင်း ပြောရမယ် ဆိုရင်တော့... ငါတို့ အရိုးချေမွ ဂိုဏ်းကို ဘယ်သူမှ ယှဉ်နိုင်မှာ မဟုတ်ဘူးဟေ့"

လူသန်ကြီးသည် သူ၏ ရင်ဘတ်ကို ဒုန်းခနဲ မြည်အောင် ထုလိုက်ပြီး... ရက်စက်ကြမ်းကြုတ်သော မျက်နှာထားဖြင့် ဟိန်းဟောက်လိုက်၏။

“ဒီ ‘ဝိညာဉ်ချေမွ အရိုးတူ’ ကို ဖန်တီးနိုင်ဖို့ အတွက်... ငါဟာ သေမျိုးလောကက မြို့သုံးမြို့ကို သတ်ဖြတ် ရှင်းလင်းခဲ့တာကွ။ လူသောင်းချီရဲ့ ဝိညာဉ်တွေကို ဆွဲထုတ်ခဲ့တယ်။ မွေးကင်းစ ကလေးလေးကိုတောင် ငါ ချမ်းသာ မပေးခဲ့ဘူး။ နားထောင်ကြည့်စမ်း... ဒီ တူကြီးဆီက ထွက်ပေါ်နေတဲ့ ငိုကြွေးသံတွေကို။ အဲ့ဒါ ငါ့ရဲ့ ရွှေတံဆိပ်ဆုတွေပဲဟေ့"

စကားအဆုံးတွင် သူသည် လက်ထဲမှ အရိုးတူကြီးကို ဝှေ့ယမ်းပြလိုက်ရာ... တစ္ဆေများ၏ ငိုကြွေးသံများကို သဲ့သဲ့မျှ ကြားလိုက်ကြရ၏။

ပရိသတ်များထံမှ ချီးကျူးသံများ ချက်ချင်း ထွက်ပေါ်လာတော့၏။ “အရိုးချေမွ ဂိုဏ်းချုပ်ပီပီ တကယ့်ကို ရက်စက်တာပဲဗျာ"

ချက်ချင်းဆိုသလိုပင်... ပတ်တီးများဖြင့် တစ်ကိုယ်လုံးကို ပတ်ထားပြီး မှုန်ဝါးနေသော မျက်လုံးနှစ်လုံးသာ ဖော်ထားသည့် အဘွားအို တစ်ဦး လွင့်မျောလာ၏။ သူမကား ‘အဆိပ်သောင်းချီ လိုဏ်ဂူ’ ၏ အဘွားကြီးပင် ဖြစ်သည်။

“မြို့ကို သတ်ဖြတ် ရှင်းလင်းတာလောက်က ဘာများ အစွမ်းအစ ရှိလို့လဲ။ အဲ့ဒါက အောက်ခြေ အလုပ်ကြမ်းသမားတွေရဲ့ အလုပ်တွေလေ"

အဘွားအိုက ယုတ်မာစွာ နှစ်ချက်မျှ ရယ်မောလိုက်ပြီး... သွေးများ တစက်စက် ကျနေဆဲ ဖြစ်သော ခရမ်းရောင် နှလုံး တစ်ခုကို သူမ၏ လက်ထဲမှ ဆွဲထုတ်လိုက်၏။

“‘အဆိပ်သောင်းချီ နှလုံးစား လက်ဝါး’ ကို ကျင့်ကြံနိုင်ဖို့ အတွက်... ငါ ကိုယ်တိုင် ငါ့တပည့် (၉၉) ယောက်ရဲ့ နှလုံးတွေကို ဖောက်ထုတ်ခဲ့တယ်။ ပြီးတော့ အဆိပ်ငါးမျိုးရဲ့ သွေးတွေထဲမှာ ရက်ပေါင်း (၄၉) ရက်တိုင်တိုင် စိမ်ပြီးမှ ဒီအဆိပ်ကိုယ်ခန္ဓာကို ဖန်တီးနိုင်ခဲ့တာပဲ။ အခုဆိုရင် ငါ့ရဲ့ သွေးတစ်စက်က... အဆင့် (၂) မိစ္ဆာသားရဲကိုတောင် ချက်ချင်း သေစေနိုင်တယ်။ ငါ့ကို လာထိရဲတဲ့သူ ဘယ်သူမဆို... ချက်ချင်းကို ပြည်တွေ ဖြစ်သွားစေရမယ်”

“ရှူး...”

စင်အောက်ရှိ မိစ္ဆာကျင့်ကြံသူများမှာ အံ့သြတုန်လှုပ်စွာဖြင့် ပင့်သက် ရှိုက်မိလိုက်ကြ၏။

ဒီ အဘွားအိုကတော့ တကယ့်ကို ရက်စက်လွန်းလှသည်။ ကိုယ့်တပည့်ကိုယ်တောင် သတ်ရက်တယ် တဲ့လား။

ထို့နောက် နောက်ထပ် မိစ္ဆာခေါင်းဆောင် အချို့ စင်ပေါ်သို့ တက်လာကြပြန်၏။ အချို့က ကိုယ့်ညီအစ်ကိုအရင်းကို ဖုတ်ကောင်အဖြစ် ပြောင်းလဲပစ်ခဲ့ကြောင်း ကြွားလုံးထုတ်ကြပြီး... အချို့ကမူ ဖြောင့်မတ်သော လမ်းစဉ်မှ အမျိုးသမီး ကျင့်ကြံသူ ဘယ်နှစ်ယောက်ကို အသုံးချပြီး ကျင့်ကြံခဲ့ကြောင်း ပြောဆိုကြသည်။

တစ်ခဏအတွင်းမှာပင်... စင်မြင့်ကြီးပေါ်၌ ကျောချမ်းဖွယ် ကောင်းလှသော လေအေးများ တိုက်ခတ်နေတော့၏။ လေထုထဲတွင်လည်း သွေးညှီနံ့များ ပြည့်နှက်နေကာ... လူမဆန်သော လုပ်ရပ် အမျိုးမျိုးကြောင့် လူတိုင်း၏ ကျောရိုး တစ်လျှောက် ချမ်းစိမ့်သွားကြရ၏။

သို့သော်လည်း...

ဂုဏ်ထူးဆောင် နေရာတွင် ထိုင်နေကြသော ကွေ့ယွမ်ဂိုဏ်းသားများ၏ တုံ့ပြန်မှုများမှာမူ... လုံးဝ (လုံးဝ) ဂရုမစိုက်သည့် ပုံစံများ ဖြစ်နေသည်။

ပျင်းစရာ ကောင်းတယ်လို့တောင် ပြော၍ ရ၏။

ဒါပဲလား။

ဝမ်သဲ့ဖာ က သန်းဝေလိုက်ပြီး ခြေချောင်းများကိုပင် ကလော်နေသေး၏။ ထို့နောက် ဘေးနားရှိ ကောင်းကင်ခွင်း ဓားတစ်လက် ကို လှည့်ကာ ဆိုလိုက်သည််။

“ဒီ ဇာတ်ကွက်ကြီးက အရမ်း ရိုးအီနေပြီ။ မြို့ကို သတ်ဖြတ် ရှင်းလင်းတာလား။ တပည့်တွေကို သတ်တာလား။ ဒါတွေက လွန်ခဲ့တဲ့ ဆယ်စုနှစ်တွေ ကတည်းက အွန်လိုင်း ဝတ္ထုတွေထဲမှာ သုံးခဲ့တဲ့ ဗီလိန်တွေရဲ့ ဇာတ်ကွက်တွေပဲလေ။ ဘာမှ အသစ်အဆန်း မပါဘူး"

“ဟုတ်တယ်"

ကောင်းကင်ခွင်း ဓားတစ်လက် က စိတ်ပျက်လက်ပျက် ခေါင်းယမ်းလိုက်၏။

“ငါက နည်းပညာမြင့် ရာဇဝတ်မှုတွေ၊ ဒါမှမဟုတ် ရှုပ်ထွေးလှတဲ့ လှည့်ကွက်တွေကိုများ မြင်ရမလားလို့ ထင်နေတာ။ အကုန်လုံးက အောက်တန်းကျတဲ့ အကြမ်းဖက်မှုတွေချည်းပဲ။ ပျင်းစရာကြီး"

ဇီဝခွေးလေး ကလည်း မျက်မှန်ကို ပင့်တင်လိုက်ရင်း အထင်သေးစွာ ဆိုလိုက်သည်။

“ဟို အဘွားကြီးက အဆိပ်အကြောင်း ကြွားနေသေးတယ်"

“သူ့ရဲ့ အဆိပ်က... မနေ့က ငါ့ရဲ့ ဖိုထဲက ထွက်လာတဲ့ စွန့်ပစ်ဓာတ်ငွေ့လောက်တောင် အဆိပ် မပြင်းဘူးလေ။ မနေ့က အဲ့ဒါကို တစ်ချက် ရှူမိလိုက်တာ... ငါ့သွေး (၈၀) ရာခိုင်နှုန်းလောက် ချက်ချင်း ကျသွားပြီး... အခုထိ အဆုတ်တွေ ယားနေတုန်းပဲ"

ကစားသမားများ၏ တိုးတိုးလေး ပြောဆိုနေမှုများမှာ အသံမကျယ်လောင်သော်လည်း... လူတိုင်း ဇာတ်လမ်းကို နားထောင်နေကြသည့် တိတ်ဆိတ်နေသော ဤနေရာ၌မူ... အလွန်တရာ ရှင်းလင်းစွာ ထွက်ပေါ်နေတော့၏။

စင်ပေါ်ရှိ အဘွားအို၏ နားများမှာ အလွန် လျင်လှသဖြင့် ‘ပျင်းစရာကြီး’ ဆိုသည့် စကားလုံးကို ချက်ချင်းပင် ကြားလိုက်ရ၏။ သူမသည် ခေါင်းကို ဆတ်ခနဲ လှည့်လိုက်ပြီး... မှုန်ဝါးနေသော မျက်လုံးများဖြင့် ကွေ့ယွမ်ဂိုဏ်း၏ နေရာဆီသို့ စိုက်ကြည့်ကာ စူးရှစွာ အော်ဟစ်လိုက်တော့သည်။

“ဘယ်ကောင်တွေလဲဟေ့။ ငါ့ကို ဒီလောက်တောင် အထင်သေးရဲတဲ့ အသိဉာဏ်မဲ့ ကောင်တွေက ဘယ်က ရောက်လာတာလဲ”

“မင်းတို့ ကွေ့ယွမ်ဂိုဏ်းက... ဂုဏ်ထူးဆောင် နေရာမှာ ထိုင်နေရတယ် ဆိုတော့... သေချာပေါက် ငါတို့ထက် ပိုပြီး အံ့မခန်း ဖြစ်စေမယ့် နည်းလမ်းတွေ ရှိနေလို့ပဲ ဖြစ်ရမယ်။ ဘာလို့ စင်ပေါ် တက်လာပြီး... စစ်မှန်တဲ့ ‘စွမ်းအား’ ဆိုတာ ဘာလဲဆိုတာကို ငါတို့ကို မပြသတာလဲ"

“ဝှစ်...”

ထောင်ချီသော ပရိသတ်များ၏ အကြည့်များ အားလုံးမှာ ကွေ့ယွမ်ဂိုဏ်းဆီသို့ ချက်ချင်း ရောက်ရှိလာကြတော့၏။ အချို့က စပ်စုချင်စိတ်ဖြင့်၊ အချို့က အထင်သေးမှုများဖြင့်... အများစုကတော့ သူတို့ အရှက်ကွဲသည်ကို ကြည့်ရန် စောင့်ဆိုင်းနေကြသည်။

အဓိက နေရာတွင် ထိုင်နေသော ကျန်းချန်မှာမူ မျက်တောင် တစ်ချက်ပင် မခတ်ဘဲ... လက်ဖက်ရည်ကို တည်ငြိမ်စွာ သောက်နေ၏။ ဤအခြေအနေမျိုးတွင် ‘မိစ္ဆာခေါင်းဆောင်’ တစ်ဦးအနေဖြင့် သူ ကိုယ်တိုင် ဝင်ရောက် ဖြေရှင်းရန် မသင့်တော်ပေ။

သူသည် လက်ဖက်ရည် ပန်းကန်လုံးကို ညင်သာစွာ ချလိုက်ရာ... “ဒေါင်” ခနဲ ကြည်လင်သော အသံလေး ထွက်ပေါ်လာ၏။

အချက်ပြမှုကို ရရှိလိုက်သည်နှင့် ဝမ်သဲ့ဖာက ရယ်မောလိုက်ပြီး ဖြည်းညှင်းစွာ မတ်တတ်ရပ်လိုက်၏။

သူသည် မည်သည့် လက်နက်ကိုမှ မကိုင်ဆောင်ထားသလို၊ သံမဏိ ဒိုင်းကာကြီးကိုလည်း ဝတ်ဆင်ထားခြင်း မရှိပေ။ ထိုအစား စုတ်ပြတ်နေသော သားရေ ချပ်ဝတ်ကိုသာ ဝတ်ဆင်ထားပြီး... သူ၏ ဝဖြိုးလှသော ဗိုက်ကြီးကို ထုတ်ပြလျက် စင်မြင့်ပေါ်သို့ ခန့်ညားစွာ လျှောက်သွားလေတော့သည်။

ဝိညာဉ်စွမ်းအင် လုံးဝ မရှိဘဲ မျက်နှာတွင် အမာရွတ်များ ပြည့်နှက်နေသည့် ဤလူဝကြီးကို မြင်လိုက်ရသည့်အခါ... စင်အောက်ရှိ မိစ္ဆာကျင့်ကြံသူများမှာ တဟားဟား ရယ်မောကုန်ကြတော့၏။

“ဒါပဲလား။ သူက မိစ္ဆာကျင့်ကြံသူတဲ့လား"

“စားဖိုမှူးနဲ့ ပိုတူနေတယ် မဟုတ်လား"

လှောင်ပြောင်မှုများကို ရင်ဆိုင်ရသော်လည်း ဝမ်သဲ့ဖာသည် လုံးဝ (လုံးဝ) ဂရုမစိုက်ပေ။ သူသည် စင်မြင့်၏ အလယ်ဗဟိုသို့ လျှောက်သွားကာ၊ ချောင်းတစ်ချက် ဟန့်လိုက်ပြီး... တောသားများကို ကြည့်သည့် အကြည့်မျိုးဖြင့် ပရိသတ်များကို ဝေ့ကြည့်လိုက်သည်။

“အားလုံးပဲ... ကျွန်တော်က ဘယ်သူ့ကိုမှ ရည်ရွယ်ပြီး ပြောတာ မဟုတ်ပါဘူး။ ကျွန်တော် ပြောချင်တာက... ဒီမှာ ရှိနေတဲ့ လူတွေ အားလုံးက ‘ရက်စက်တယ်’ ဆိုတဲ့ စကားလုံးရဲ့ အဓိပ္ပာယ်ကို... အရမ်းကို အပေါ်ယံလောက်ပဲ နားလည်ထားကြတာကိုပါ"

“ခင်ဗျားတို့ ပြောတဲ့ ရက်စက်တယ် ဆိုတာ... လူသတ်တာနဲ့ မီးရှို့တာလောက်ပဲ မဟုတ်လား။ အဲ့ဒါက... ခွန်အား နည်းနည်း ရှိတဲ့ ဘယ် တိရစ္ဆာန်မဆို လုပ်နိုင်တဲ့ ကိစ္စလေဗျာ"

“စစ်မှန်တဲ့ ရက်စက်မှု ဆိုတာ... ကိုယ့်ကိုယ်ကိုယ် ရက်စက်တာကို ခေါ်တာဗျ။ ကိုယ့်အသက်ရဲ့ အကန့်အသတ်တွေကို... မနားမနေ ရှာဖွေပြီး ညှဉ်းပန်းနှိပ်စက်ရဲတာကို ပြောတာပေါ့"

ဝမ်သဲ့ဖာသည် ရုတ်တရက် အသံကို မြှင့်လိုက်ပြီး ကျယ်လောင်စွာ ဟိန်းဟောက်လိုက်၏။

“ခင်ဗျားတို့ထဲမှာ... အဆိပ်ရဲ့ ပြင်းအားကို စမ်းသပ်ဖို့ အတွက်... ပါးစပ်ကနေ အမြှုပ်တွေ ထွက်ပြီး သေလုမျောပါး ဖြစ်နေတဲ့ အချိန်မှာတောင် အချက်အလက်တွေကို မှတ်တမ်းတင်နိုင်ဖို့... အသက်အန္တရာယ် ရှိတဲ့ အဆိပ်တွေကို တန်းစီပြီး မျိုချရဲတဲ့သူ ဘယ်နှစ်ယောက် ရှိလဲ"

နေရာ တစ်ခုလုံး တိတ်ဆိတ်သွားခဲ့ပြီ ဖြစ်၏။ မိစ္ဆာကျင့်ကြံသူများမှာ တစ်ယောက်မျက်နှာ တစ်ယောက် ဇဝေဇဝါ ကြည့်လိုက်ကြ၏။ သူတို့ အရူးတွေများလား။ ဒါက ကိုယ့်ကိုယ်ကိုယ် သတ်သေနေတာပဲလေ။

“ကျွန်တော်တို့ ရဲတယ်ဗျို့"

ဝမ်သဲ့ဖာက စင်အောက်ရှိ ဇီဝခွေးလေး နှင့် အခြားသူများကို လက်ညှိုးထိုးပြလိုက်၏။

“ကျွန်တော်တို့ ကွေ့ယွမ်ဂိုဏ်းမှာတော့... ဒါဟာ အချိုပွဲ စားနေသလိုပဲ"

“ခင်ဗျားတို့ထဲမှာ... ကာကွယ်ရေး စွမ်းအားတွေကို ကျင့်ကြံဖို့အတွက်... ကိုယ့်ရဲ့ ဂိုဏ်းတူ ညီအစ်ကိုတွေကို ပေါင်ရာချီ လေးတဲ့ တူကြီးတွေနဲ့... ခေါင်းတွေ၊ ရင်ဘတ်တွေကို အရိုးတွေ ကျိုး၊ အကြောတွေ ပြတ်သွားတဲ့အထိ ထပ်ခါတလဲလဲ ထုနှက်ခိုင်းပြီး... နာကျင်တဲ့ အသံ တစ်ခွန်းမှ မထွက်ဘဲ နေရဲတဲ့သူ ဘယ်နှစ်ယောက် ရှိလဲ"

“ကျွန်တော်တို့ လုပ်ရဲတယ်.. ဒါကို ‘ရုပ်ပိုင်းဆိုင်ရာ ကာကွယ်ရေး လေ့ကျင့်မှု’ လို့ ခေါ်တယ်"

ဝမ်သဲ့ဖာသည် စကားပြောလေလေ၊ ပို၍ စိတ်လှုပ်ရှားလာလေလေ ဖြစ်ပြီး... တံတွေးများပင် လွင့်စင်လာတော့၏။

“နောက်တစ်ခု ရှိသေးတယ်။ ခင်ဗျားတို့ထဲမှာ... ရန်သူတွေကို ဖျက်ဆီးပစ်ဖို့ အတွက်... ကိုယ့်ကိုယ်ကိုယ် အမြောက်ဆန် အဖြစ် အသုံးချပြီး၊ လောက်လေးခွကြီးနဲ့ ပစ်လွှတ်ခံကာ... မီတာ ရာချီ မြင့်တဲ့ လေထဲကနေ ရန်သူ့ စစ်ကြောင်းထဲကို မျက်နှာနဲ့ တည့်တည့် ဝင်တိုက်ရဲတဲ့သူ ဘယ်နှယောက် ရှိလဲ"

“ကျွန်တော်တို့ လုပ်ရဲတယ်။ ဒါကို ‘တိကျစွာ ပစ်မှတ်ထားတဲ့ လူသား တိုက်ခိုက်မှု’ လို့ ခေါ်တယ်"

စင်အောက်ရှိ မိစ္ဆာကျင့်ကြံသူများ၏ မျက်နှာထားများ စတင် ပြောင်းလဲလာခဲ့ပြီ ဖြစ်၏။ အစပိုင်းက အထင်သေးမှုများမှသည် တုန်လှုပ်မှုများသို့၊ ထိုမှတစ်ဆင့် ကြောက်ရွံ့မှုများ အဖြစ်သို့ ပြောင်းလဲသွားကြတော့သည်။

ဒါဟာ... ပုံမှန် လူတစ်ယောက် လုပ်မယ့် လုပ်ရပ်တွေလား။

ကျင့်စဉ်အတွက် အဆိပ်စားတယ် ဟုတ်လား။ ကာကွယ်ရေးအတွက် အရိုက်ခံတယ် တဲ့လား။ ရန်သူကို သတ်ဖို့အတွက် ကိုယ့်ကိုယ်ကိုယ် အမြောက်ဆန် လုပ်ပြီး ဝင်တိုက်တယ် ဆိုပါလား။

ဒါဟာ ရန်သူအပေါ် ရက်စက်တာ မဟုတ်တော့ဘူးလေ... ကိုယ့်အသက်ကို လုံးဝ (လုံးဝ) ပမာမထားတာပဲ မဟုတ်လား။

“ဒါတင် မကသေးဘူးနော်"

ဝမ်သဲ့ဖာသည် တုန်လှုပ်မှု အတိုင်းအတာကို အားမရသေးသဖြင့် သူ၏ အကောင်းဆုံး အကွက်ကို ထုတ်သုံးလိုက်၏။ သူသည် သူ၏ ခါးပတ်ကို လက်ညှိုးထိုးပြလိုက်၏။

“လွန်ခဲ့တဲ့ လဝက်လောက်ကတင်... ချင်းယန်ဂိုဏ်းက အခြေခံအုတ်မြစ် တည်ဆောက်ခြင်း အဆင့် နှောင်းပိုင်း ရှိတဲ့ ပြစ်ဒဏ်ခတ်ရေး အကြီးအကဲက... လက်ရွေးစင် တပ်ဖွဲ့ အယောက် ငါးဆယ်ကို ခေါ်ပြီး ကျွန်တော်တို့ကို လာဝိုင်းတယ်လေ"

“ပြီးတော့ ဘာဖြစ်သွားလဲ သိလား"

ဝမ်သဲ့ဖာ၏ မျက်နှာပေါ်တွင် အလွန်တရာ ယုတ်မာလှသော အပြုံးတစ်ခု ပေါ်လာပြီး... ထိုအပြုံးက နေရာရှိ မိစ္ဆာကျင့်ကြံသူ အားလုံး၏ ကျောရိုး တစ်လျှောက် ချမ်းစိမ့်သွားစေတော့၏။

“သူ့ရဲ့ သတ်ဖြတ်မှုကြောင့် ကျွန်တော်တို့တွေ မရေမတွက်နိုင်အောင် သေဆုံးခဲ့ရပြီး၊ သွေးမြစ်တွေ စီးကျခဲ့ရပေမယ့်...ကျွန်တော်တို့ထဲက တစ်ယောက်မှ ခြေတစ်လှမ်းတောင် နောက်မဆုတ်ခဲ့ဘူးဗျို့"

“ကျွန်တော်တို့ သွားတွေကို သုံးတယ်၊ လက်တွေကို သုံးတယ်၊ ကိုယ်ခန္ဓာတွေကို သုံးပြီး သူ့ကို တားဆီးခဲ့တယ်။ သူ့ရဲ့ အားအင်တွေ အကုန်လုံး ကုန်ခမ်းသွားတဲ့အထိ ကျွန်တော်တို့ သူ့ကို လိုက်နှောင့်ယှက်ခဲ့တာပဲ"

“နောက်ဆုံးတော့... ကျွန်တော်တို့.. သူ့ကို အတွင်းခံ ဘောင်းဘီလေး တစ်ထည်ပဲ ကျန်တဲ့အထိ အဝတ်အစားတွေ အကုန် ချွတ်ပစ်လိုက်တယ်။ ပြီးတော့ တောင်တံခါးမှာ ချိတ်ဆွဲပြီး အခြောက်ခံထားလိုက်တာဗျို့။ အခြေခံအုတ်မြစ် တည်ဆောက်ခြင်း အဆင့် ပညာရှင် တစ်ယောက်ရဲ့ အသားက ဘယ်လို အရသာ ရှိမလဲ ဆိုတာကိုတောင် မြည်းစမ်းကြည့်ချင်တဲ့ ညီလေး တစ်ယောက် ရှိသေးတယ်"

“ခွင့်ပြုပါ... စီနီယာကြီးတို့။ ခင်ဗျားတို့ကော ဒီလိုမျိုး လုပ်ရက်ပါ့မလား။ လုပ်ကော လုပ်ရဲပါ့မလားဗျာ"

“ဝုန်း...”

ပရိသတ် တစ်ခုလုံး ဆူညံပွက်လောရိုက်သွားခဲ့ပြီ ဖြစ်၏။

အဓိက နေရာတွင် ထိုင်နေသော သွေးမိစ္ဆာဂိုဏ်း၏ ဂိုဏ်းချုပ်ကြီးပင်လျှင်... သူ၏ လက်ထဲရှိ သေရည်ခွက်ကို “ခွပ်” ခနဲ ညှစ်ခွဲလိုက်မိတော့၏။

အခြေခံအုတ်မြစ် တည်ဆောက်ခြင်း အဆင့် နှောင်းပိုင်း အကြီးအကဲကို အဝတ်ချွတ်တယ် ဟုတ်လား။ အရသာကိုတောင် မြည်းစမ်းကြည့်ချင်သေးတယ် တဲ့လား။

ဒီကောင်တွေက မိစ္ဆာကျင့်ကြံသူတွေ မဟုတ်ဘူး။ သူတို့က လူ့အရေခွံ ဆောင်းထားတဲ့ တကယ့် မိစ္ဆာစစ်စစ်တွေပဲလေ။ အသိဉာဏ် မရှိတဲ့၊ စည်းမျဉ်း မရှိတဲ့၊ နာကျင်မှုကိုတောင် မခံစားနိုင်တဲ့ အရူးအုပ်စုကြီးပါလား။

စင်ပေါ်၌ ဂုဏ်ယူဝင့်ကြွားစွာဖြင့်... ကြီးကျယ်လှသော လုပ်ရပ်တစ်ခုကို ပြောပြနေသည့်အလား ပြုံးဖြီးဖြီး ဖြစ်နေသော လူဝကြီးကို ကြည့်ရင်း... ထို့နောက် စင်အောက်၌ ရှက်ရွံ့ခြင်း အလျဉ်းမရှိဘဲ “ဟုတ်တယ်... ဟုတ်တယ်။ ငါလည်း တစ်ကိုက် ကိုက်ကြည့်သေးတယ်” ဟု အားတက်သရော ဝင်ပြောနေကြသော ကွေ့ယွမ်ဂိုဏ်းသားများကို ကြည့်ရင်း...

ပွဲတော်သို့ ရောက်ရှိနေကြသော မိစ္ဆာလမ်းစဉ်၏ ဆရာကြီးများမှာ သူတို့၏ ဝိညာဉ် အနက်ရှိုင်းဆုံး နေရာမှနေ၍ ကြောက်ရွံ့မှုများကို ပထမဆုံး အကြိမ်အဖြစ် ခံစားလိုက်ကြရလေတော့သည်။

အောင်ပွဲ အတွက်ဆိုလျှင် ကိုယ့်အသက်ကိုရော၊ ဂုဏ်သိက္ခာကိုပါ လုံးဝ (လုံးဝ) စွန့်လွှတ်ရဲသော ဤအရူးများနှင့် ယှဉ်လိုက်ပါက... မျက်နှာပန်းလှမှုနှင့် အကျိုးအမြတ်ကို အဓိကထားသော သူတို့လို ရိုးရာ မိစ္ဆာကျင့်ကြံသူများမှာ... ဖန်လုံအိမ်ထဲက ပန်းလေးများပမာ ဖြူစင်လွန်းနေလေပြီ မဟုတ်ပါလော။

“ဒီ ဂိုဏ်းကို... လုံးဝ (လုံးဝ) သွားမစနဲ့ဟေ့"

ဒါက ထိုအခိုက်အတန့်တွင် မိစ္ဆာကျင့်ကြံသူ အားလုံး၏ ခေါင်းထဲ၌ ရှိနေသော တစ်ခုတည်းသော အတွေးပင် ဖြစ်တော့သည်။

ဘေးနားတွင် ရပ်နေသော ဆုချင်းကောသည် ဝမ်သဲ့ဖာ၏ ‘ဟောပြောချက်’ ကို နားထောင်ရင်း... ကြောက်လန့်လွန်းသဖြင့် မျက်နှာများ ဖြူဖျော့နေကြသော ပတ်ဝန်းကျင်ရှိ မိစ္ဆာခေါင်းဆောင်များကို ကြည့်ကာ သူမ၏ နှုတ်ခမ်းများမှာ ထိန်းမရအောင် တုန်ယင်လာ၏။

သူ ပြောနေတာတွေ အကုန်လုံးက အမှန်တွေဆိုတာ သူမ သိနေပေမယ့် (နည်းနည်းတော့ ပိုပြောထားသည်)၊ ဒီလို ရှုထောင့်ကနေ ကြားရတာကတော့ နည်းနည်းလေး စိတ်ဝင်စားစရာ ကောင်းနေတယ်...

ဒါပေမဲ့ ဘာလို့များ... စိတ်ရောဂါကု ဆေးရုံက လူနာတွေ သူတို့အကြောင်းကို ဖွင့်ပြောပြနေတဲ့ ပုံစံမျိုး ပေါက်နေရတာလဲ။

သို့သော်လည်း ဝန်ခံရပါမည်။

ရလဒ်ကတော့ အလွန်တရာ အံ့မခန်း ဖြစ်သွားခဲ့ပြီ ဖြစ်၏။

ထိုအခိုက်အတန့်တွင် ကွေ့ယွမ်ဂိုဏ်း၏ ‘ကြောက်မက်ဖွယ် နာမည်ဆိုးကြီး’ မှာ အပြည့်အဝ အတည်ပြုချက် ရရှိသွားခဲ့လေပြီ ။

အခန်း (၁၅၃) - လမ်းဘေးဈေးသည် ယဉ်ကျေးမှုကို တင်ပို့ခြင်း.. မိစ္ဆာလမ်းစဉ် သီးသန့် အထူးထုတ်

~အရိုးသင်္ချိုင်း ချောက်ကမ်းပါး။ မိစ္ဆာပေါင်း တစ်သောင်း တွေ့ဆုံပွဲ၏ ပြင်ပ ကွင်းပြင်ကျယ်၌ ဖြစ်၏။

ဝမ်သဲ့ဖာ၏ ဟိန်းဟောက်သံနှင့်အတူ ဟောပြောချက် ပြီးဆုံးသွားသည့် အခါတွင်မူ... ကွေ့ယွမ်ဂိုဏ်း၏ နေရာမှာ လူတိုင်း၏ အာရုံစိုက်ရာ ဗဟိုချက် ချက်ချင်း ဖြစ်သွားတော့၏။ ယခင်က ရက်စက်ကြမ်းကြုတ်ပြီး သတ်ဖြတ်လိုစိတ်များ ပြည့်နှက်နေခဲ့သော မိစ္ဆာကျင့်ကြံသူများသည် ယခုအခါ ကစားသမားများကို အနည်းငယ် ကြောက်ရွံ့လေးစားမှုများ၊ စပ်စုချင်စိတ်များဖြင့် ကြည့်ရှုနေကြ၏။

ဤလေထု အခြေအနေသည် ကစားသမားများအတွက်မူ အကောင်းဆုံးသော စီးပွားရေး အခွင့်အလမ်းကြီးပင် ဖြစ်တော့သည်။

“ညီအစ်ကိုတို့... အခြေအနေကတော့ အတော်ပဲဗျို့"

ကောင်းကင်ခွင်း ဓားတစ်လက် က အဖွဲ့တွင်း ဆက်သွယ်ရေးမှတစ်ဆင့် အော်ဟစ်လိုက်၏။

“ဒီ အန်ပီစီတွေက ငါတို့ကို ဆရာကြီးတွေလို ကြည့်နေကြပြီလေ။ သံပူတုန်း ရိုက်ပြီး ငါတို့ဆီက ပစ္စည်းဟောင်းတွေကို အကုန် ထုတ်ရောင်းကြစမ်း။ မှတ်ထားနော်... ငါတို့က အမှိုက်တွေ ရောင်းနေတာ မဟုတ်ဘူး၊ မိစ္ဆာလမ်းစဉ်ရဲ့ လျှို့ဝှက် ရတနာ တွေကို ရောင်းနေတာလို့ ပြောရမယ်ဗျို့"

“သဘောပေါက်ပြီ။ ကြည့်သာ နေလိုက်တော့ဗျာ"

မျက်စိတစ်မှိတ် အတွင်းမှာပင်၊

ကစားသမား အယောက် တစ်ရာကျော်မှာ လျင်မြန်စွာ လှုပ်ရှားလိုက်ကြ၏။

လျိုယွင် ဈေးကွက်တုန်းကလို ဈေးဆိုင်ခင်းကြီးတွေ အကြီးကြီး ခင်းမည့်အစား (ဒါက အဆင့်အတန်း နိမ့်လွန်းသည်ဟု ယူဆကာ)... သူတို့သည် ပြောက်ကျား ဈေးရောင်းခြင်း နှင့် ပစ်မှတ်ထား ဈေးရောင်းခြင်း ဆိုသည့် ပိုမို ဆန်းပြားသော နည်းဗျူဟာများကို အသုံးပြုလိုက်ကြတော့၏။

[ရောင်းဝယ်ရေး မြင်ကွင်း ၁ - ကျိန်စာသင့် မိစ္ဆာလက်နက်]

တကယ့် လုံအော့ထျန် သည် ကြွက်ဘုရင်ထံမှ သူ ရယူထားခဲ့သော ဆူညံလှသည့် ငိုကြွေးနေသော မိစ္ဆာအရိုး ကို ကိုင်ဆောင်ကာ... အရိုးချေမွ ဂိုဏ်း ၏ နေရာဆီသို့ ယိမ်းထိုးလျက် လျှောက်သွား၏။

အရိုးချေမွ ဂိုဏ်းချုပ်ကြီးမှာ သူ၏ ဝိညာဉ်ချေမွ အရိုးတူကြီးကို မြတ်နိုးစွာ ပွတ်သပ်နေ၏။

“အဟမ်း... စီနီယာကြီး၊ ခင်ဗျားမှာ ထူးခြားတဲ့ ပါရမီတွေ ရှိတာကို ကျွန်တော် မြင်နေရတယ်။ ဒီလက်နက်က ခင်ဗျားနဲ့ ရေစက် ပါလာတဲ့ပုံပဲဗျ"

လုံအော်တျန်က အသံကို နှိမ့်လိုက်ပြီး... မိစ္ဆာအရိုးကို လျှို့ဝှက်ဆန်းကြယ်စွာ ကမ်းပေးလိုက်၏။

အရိုးချေမွ ဂိုဏ်းချုပ်က ထို မည်းနက်ပြီး ဆူးများ ထွက်နေသော အရိုးတုတ်ကြီးကို တစ်ချက် ကြည့်လိုက်ပြီး လှောင်ပြုံး ပြုံးလိုက်၏။

“ကျိုးနေတဲ့ အရိုးစုတ်ကြီး တစ်ခုကများ... လက်နက်လို့ ခေါ်ဖို့ ထိုက်တန်လို့လားကွ"

“ကျိုးနေတဲ့ အရိုးစုတ် ဟုတ်လား"

လုံအော်တျန်က ပြန်လည် လှောင်ပြုံး ပြုံးလိုက်၏။

“စီနီယာကြီး... ခင်ဗျား အမြင်မှားနေပြီဗျ။ ဒါဟာ ကျွန်တော်တို့ ဂိုဏ်းရဲ့ လျှို့ဝှက် နယ်မြေထဲမှာ နှစ်ပေါင်း သောင်းချီ စုဆောင်းနေခဲ့တဲ့ မကျေချမ်းမှုတွေနဲ့ ဖွဲ့စည်းထားတဲ့ ငိုကြွေးနေတဲ့ မိစ္ဆာအရိုး ဗျို့။ သူ့မှာ ဝိဉာဉ်ကို ညစ်ညမ်းစေတဲ့ တိုက်ခိုက်မှုတွေ အလိုအလျောက် ပါဝင်ပြီးသားပဲ။ မယုံဘူးလား... နားထောင်ကြည့်"

သူသည် စကားပြောရင်း အရိုးတုတ်ကြီးကို ရုတ်တရက် ဝှေ့ယမ်းလိုက်၏။

“အူး... ကျွိ... ကျွိ...”

ကျောက်သင်ပုန်းကို လက်သည်းဖြင့် ကုတ်ခြစ်လိုက်သကဲ့သို့... စူးရှပြီး နားကွဲမတတ် အော်ဟစ်သံ တစ်ခု ရုတ်တရက် ထွက်ပေါ်လာတော့၏။

အရိုးချေမွ ဂိုဏ်းချုပ်ကြီးမှာ ခေါင်းထဲတွင် စူးခနဲ နာကျင်သွားပြီး၊ သူ၏ နတ်ဘုရား ဝိညာဉ်ပင်လျှင် တုန်ခါသွားရ၏။ သို့သော် သူ၏ မျက်လုံးများမှာ ကြောက်လန့်သွားမည့်အစား ချက်ချင်းပင် အရောင်တောက်သွားတော့၏။

“ကောင်းတယ်။ တကယ့်ကို နားငြီးစရာ ကောင်းတဲ့ အသံပဲ။ တကယ့်ကို ယုတ်မာတဲ့ ဝိဉာဉ် တိုက်ခိုက်မှုကြီးပါလား။ ငါ့ရဲ့ မိစ္ဆာ ကာကွယ်ရေး အရှိန်အဝါတောင် မခံနိုင်ပါလား"

မိစ္ဆာကျင့်ကြံသူများ အတွက်မူ... ပိုပြီး အောက်တန်းကျလေလေ၊ ပိုပြီး ရွံစရာ ကောင်းလေလေ... ပိုပြီး တန်ဖိုးရှိလေလေ ဖြစ်သည် မဟုတ်ပါလော။

“ဒါကို ငါ ယူမယ်။ ဝိညာဉ်ကျောက်တုံး ဘယ်လောက်လဲ"

“တာအိုရောင်းရင်းတွေ ဖြစ်နေလို့... ဝိညာဉ်ကျောက်တုံး ငါးရာပဲ ပေးဗျာ။ ဒါ မိတ်ဆွေ ဈေးနော်" လုံအော်တျန်က မတန်တဆ ဈေးခေါ်လိုက်၏။

“သဘောတူတယ်”

အရိုးချေမွ ဂိုဏ်းချုပ်က ဘာမှ ထပ်မပြောတော့ဘဲ ပိုက်ဆံကို ချက်ချင်း ထုတ်ပေးလိုက်တော့၏။

[ရောင်းဝယ်ရေး မြင်ကွင်း ၂ - ငရဲပြည် မိတ်ကပ်]

အခြား တစ်ဖက်တွင်မူ... အမျိုးသမီး ကစားသမား အချို့သည် ဟယ်ဟွမ် (ကာမဂုဏ်) ဂိုဏ်းမှ မိစ္ဆာမလေး တစ်ဦးကို ဝိုင်းရံထားကြ၏။

ဤ မိစ္ဆာမလေးမှာ ပုံမှန်အားဖြင့် ဆွဲဆောင်မှုရှိသော ပုံစံမျိုးကိုသာ ပြင်ဆင်လေ့ ရှိသော်လည်း... မိစ္ဆာပေါင်း တစ်သောင်း တွေ့ဆုံပွဲ ကဲ့သို့သော နေရာမျိုးတွင်မူ... သူမသည် ရက်စက်မှု သို့မဟုတ် ကြမ်းကြုတ်မှု မလုံလောက်ဟု အမြဲတမ်း ခံစားနေရရှာ၏။

“အစ်မ... အစ်မရဲ့ မိတ်ကပ်က အရမ်း ရိုးရှင်းလွန်းနေတယ်။ အရှိန်အဝါ သိပ်မရှိဘူး ဖြစ်နေတယ်နော်"

အလှပြုပြင်ခြင်း အဆင့် တစ်ဆယ်က ခရမ်းရင့်ရောင် အနှစ်များ (အမှန်တော့ ဆေးဖော်စပ်ရာမှ ထွက်လာသော အမှိုက်များနှင့် ပြည်ကြီးငါးမှင်ရည်များကို ရောစပ်ထားခြင်း ဖြစ်သည်) ပါဝင်သော ဖန်ပုလင်းငယ်လေး တစ်လုံးကို ထုတ်ယူလိုက်၏။

“ကျွန်မတို့ ကွေ့ယွမ်ဂိုဏ်းရဲ့ အထူးထုတ် ဖြစ်တဲ့ လူသေ အရောင် နှုတ်ခမ်းနီကို စမ်းကြည့်ပါလားရှင်။ ဒါကို ဆိုးလိုက်တာနဲ့... အစ်မရဲ့ နှုတ်ခမ်းတွေက ကလေးသေ တစ်ယောက်ကို စားထားသလိုမျိုး ခရမ်းရင့်ရောင် အမည်းရောင်ကြီး ဖြစ်သွားမှာနော်။ အဲ့ဒါဆိုရင် အစ်မကို အရမ်း ဆွဲဆောင်မှု ရှိသွားစေပြီး... ဆွဲဆောင်မှု အမှတ် တစ်ရာ တောင် တက်သွားမှာ။ မိုင်ဆယ်ဂဏန်း ပတ်လည်က ယောကျ်ား ကျင့်ကြံသူတွေ အကုန်လုံး အစ်မကို မြင်တာနဲ့ ဒူးတွေ ပျော့ခွေသွားစေရမယ်ရှင်"

မိစ္ဆာမလေးမှာ အနည်းငယ် သံသယ ဝင်နေသော်လည်း စမ်းသပ် ကြည့်လိုက်၏။

မှန်ထဲတွင်... မူလက တောက်ပသော သူမ၏ နှုတ်ခမ်းနီနီလေးများမှာ ချက်ချင်းပင် အဆိပ်မိနေသည့် ခရမ်းပုပ်ရောင်ကြီး အဖြစ်သို့ ပြောင်းလဲသွားပြီး၊ သူမ၏ ဖြူဖျော့သော မိတ်ကပ် အောက်ခံနှင့် ပေါင်းစပ်လိုက်သည့် အခါတွင်မူ... တကယ့်ကို ကျောချမ်းဖွယ် ကောင်းလှသော အလောင်းကောင် မင်းသမီးလေး အသွင်သို့ ပြောင်းလဲသွားတော့၏။

“အံ့မခန်းပဲ"

မိစ္ဆာမလေးက မှန်ထဲမှ သူမကိုယ်သူမ ကြည့်ရင်း အလွန်တရာ ကျေနပ်သွား၏။

“ဒါမှ မိစ္ဆာဂိုဏ်းက မိစ္ဆာမလေး တစ်ယောက်နဲ့ တကယ့်ကို လိုက်ဖက်တဲ့ အသွင်အပြင်ပဲ။ ဒီ နှုတ်ခမ်းနီတွေ အကုန်လုံး ငါ ယူမယ်။ ပြီးတော့... အဲ့ဒါနဲ့ လိုက်မယ့် မျက်လုံးဆိုးဆေးကော ရှိသေးလား။ တစ်ယောက်ယောက်က မျက်လုံးကို နှစ်ချက်လောက် ထိုးကြိတ်ထားသလိုမျိုး... အညိုအမည်းစွဲနေတဲ့ အရောင်မျိုး လိုချင်လို့ပါ"

“ရှိတာပေါ့ရှင်... ရှိပါတယ်။ အကုန် ရှိတယ်" အမျိုးသမီး ကစားသမားများမှာ ပျော်လွန်းသဖြင့် မြူးတူးသွားကြတော့၏။

[ရောင်းဝယ်ရေး မြင်ကွင်း ၃ - ထူးဆန်းသော အစားအသောက်များ]

လူကြိုက်အများဆုံး နေရာမှာမူ ကျောက်ကပ်ကြော် ၏ ဆိုင်လေးပင် ဖြစ်သည်။

သူသည် သူ၏ ဧရာမ အိုးမည်းကြီးကို သင်္ချိုင်းကျောက်တိုင် တစ်ခုပေါ်တွင် တင်ထားပြီး... အထဲတွင်မူ အသည်းထိတ်ဖွယ် ပူဖောင်းများ ထွက်ပေါ်ကာ ဆူပွက်နေသည့် နီရဲသော ဟင်းရည်များ ရှိနေ၏။

“လာကြစမ်း... ရှေးရိုးရာ ငရဲ ဟင်းချို (ခရမ်းချဉ်သီး၊ ငရုတ်သီးတို့နှင့် ကလီစာများကို ရောပြုတ်ထားခြင်း ပါ) ရပြီဗျို့။ တစ်ငုံ သောက်လိုက်တာနဲ့ သွေးတွေ ဆူပွက်သွားမယ်။ နှစ်ငုံ သောက်လိုက်တာနဲ့ အစပ်တွေ ဟပ်သွားစေရမယ်ဗျိုး"

ပတ်ဝန်းကျင်ရှိ မိစ္ဆာကျင့်ကြံသူများမှာ ယခင်က တစ်ခါမှ မရဖူးခဲ့သော ထို စူးရှပြီး လှုံ့ဆော်မှု ပြင်းထန်လှသည့် အနံ့ကြီးကို ရှူရှိုက်မိလိုက်သည့်အခါ... အားလုံးပင် သွားရည်များ မြိုချလိုက်ကြတော့၏။

“ဒီ ဟင်းချိုက... ကြည့်ရတာ အရမ်း ကြောက်စရာ ကောင်းတာပဲ။ သွေးတွေလိုပဲ နီရဲနေတာပဲဗျာ"

“သောက်လိုက်တာနဲ့ လည်ချောင်းတွေ မီးလောင်သွားသလိုပဲဗျို့။ တကယ့်ကို အစွမ်းထက်တဲ့ ဆေးအာနိသင်ပဲ။ မီးစွမ်းအင်ပါတဲ့ မိစ္ဆာကျင့်စဉ်တွေကို ကျင့်ကြံဖို့အတွက် သေချာပေါက် အထောက်အကူ ဖြစ်စေမှာပဲ"

မိစ္ဆာကျင့်ကြံသူ တစ်အုပ်ကြီးမှာ တန်းစီနေကြပြီး... မျက်ရည်များ၊ နှာရည်များ ယိုကျနေရင်း (အစပ်လွန်သောကြောင့် ဖြစ်သည်)၊ ပျော်ရွှင်စွာ အော်ဟစ်ကာ ဝိညာဉ်ကျောက်တုံးများကို ကျောက်ကပ်ကြော် ထံသို့ အလုအယက် ပေးနေကြတော့သည်။

နာရီဝက်ခန့် အတွင်းမှာပင်၊

မူလက တည်ကြည်လေးနက်ပြီး မှိုင်းညို့နေသော မိစ္ဆာပေါင်း တစ်သောင်း တွေ့ဆုံပွဲကြီးမှာ... အကြီးစား ဈေးရောင်းပွဲတော်ကြီး တစ်ခုအဖြစ်သို့ လုံးဝ (လုံးဝ) ပြောင်းလဲသွားခဲ့ပြီ ဖြစ်၏။

ကွေ့ယွမ်ဂိုဏ်း၏ တပည့်များမှာ မိစ္ဆာဂိုဏ်း အသီးသီးကြားတွင် ကူးလူးသွားလာနေကြပြီး... သူတို့၏ ပါးစပ်များ၊ ထူးဆန်းလှသော မိစ္ဆာလမ်းစဉ် ထုတ်ကုန် များဖြင့် ငွေပုံကြီးကို ဖန်တီးနေကြတော့သည်။

ဖြောင့်မတ်သော လမ်းစဉ်၏ ဈေးကွက်များတွင် အမှိုက်အဖြစ် စွန့်ပစ်ခံရမည့် အရာများမှာ ဤနေရာတွင်မူ လူကြိုက်အများဆုံး ရတနာများ ဖြစ်နေကြ၏။

“ဝါး... ဒီ ဝက်ဝံဖမ်း ထောင်ချောက်က တကယ့်ကို မိုက်တာပဲ။ အပေါ်မှာ အစိမ်းရောင် အဆိပ်တွေ (ဆိုးဆေးများ) တောင် သုတ်ထားသေးတယ်။ လူတွေကို ချောင်းမြောင်း ဖမ်းဆီးဖို့ အတွက် မရှိမဖြစ် ပစ္စည်းပဲဗျို့"

“ဒီအင်္ကျီက ဘာလို့ အပေါက်ကြီး ဖြစ်နေတာလဲ။ ဘာ... စစ်မြေပြင်မှာ ပျက်စီးသွားတဲ့ ဗားရှင်း ဟုတ်လား။ တိုက်ပွဲ အတွေ့အကြုံကို ပြသတဲ့ ဂုဏ်သိက္ခာ တစ်ခု တဲ့လား။ ဝယ်မယ်ဗျာ"

ဆုချင်းကောသည် ဘေးတွင် ရပ်လျက်... စီနီယာ အစ်ကိုကြီးများနှင့် အစ်မကြီးများက ရက်စက်လှသော မိစ္ဆာခေါင်းဆောင်များကို လှည့်စားနေကြသည်ကို ကြည့်နေမိ၏။ ထို မိစ္ဆာခေါင်းဆောင်များပင်လျှင် ကစားသမားများကို အတုခိုးကာ

“အမေးဇင်း”၊ “အမိုက်စားပဲ” စသည့် ထူးဆန်းသော စကားလုံးများကိုပင် စတင် သုံးစွဲနေကြပြီ ဖြစ်သည်။

သူမသည် သူမ၏ လောကအမြင်ကြီး နောက်တစ်ကြိမ် တုန်လှုပ်သွားရပြန်ပြီဟု ခံစားလိုက်ရတော့၏။

‘ဒါက... ကွေ့ယွမ်ဂိုဏ်း ရှင်သန်ရပ်တည်တဲ့ ဉာဏ်ပညာတွေများလား’

‘အင်အားကို မသုံးဘဲ... ပါးစပ်လေး တစ်ပေါက်နဲ့ အမှိုက်ပုံကြီးကို သုံးပြီး... မိစ္ဆာလမ်းစဉ် ပွဲတော်ကြီးမှာ ဒီလောက်အထိ အောင်မြင်နေတာ တဲ့လား’

‘ပြီးတော့... ဘာလို့ ဒီ မိစ္ဆာကျင့်ကြံသူတွေက သိပ်ပြီး ကြောက်စရာ မကောင်းတော့ဘူးလို့ ခံစားလာရတာလဲ။ သူတို့က နည်းနည်းတော့... တုံးအသလိုပဲ’

စင်မြင့်ထက်တွင်မူ...

စနစ်၏ နောက်ခံ မျက်နှာပြင်ပေါ်တွင် တစ်ဟုန်ထိုး တက်လာနေသော ဝိညာဉ်ကျောက်တုံး အရေအတွက်များနှင့်အတူ... “မိစ္ဆာလမ်းစဉ် ဂုဏ်သတင်း မြင့်တက်လာပါပြီ” ဆိုသည့် ဆက်တိုက် အသိပေးချက်များကို ကြည့်ရင်း... ကျန်းချန်သည် လက်ဖက်ရည် တစ်ငုံကို ဖြည်းညှင်းစွာ သောက်လိုက်သည်။ သူ၏ အောင်မြင်မှုများနှင့် ဂုဏ်သတင်းများကို တိတ်ဆိတ်စွာ ဖုံးကွယ်ထားလိုက်၏။

'ထင်တဲ့အတိုင်းပဲ... မိစ္ဆာကျင့်ကြံသူတွေရဲ့ အလှအပ ခံစားမှုတွေကို မိစ္ဆာကျင့်ကြံသူတွေ (ကစားသမားတွေ) ကပဲ နားလည်တာကိုး’

‘ဒီတစ်ခါ ယဉ်ကျေးမှု တင်ပို့တာကတော့ သေချာပေါက် အောင်မြင်သွားတာပဲလေ’

ထိုစဉ်မှာပင် နက်ရှိုင်းလှသော ဗုံတီးသံ တစ်ခုက ဆူညံသံများကို ဖြိုခွင်းလိုက်၏။

သွေးမိစ္ဆာဂိုဏ်း၏ ဂိုဏ်းချုပ်ကြီးက မတ်တတ်ရပ်လိုက်ပြီး... ပရိသတ် တစ်ခုလုံးကို အကြည့် ဖြန့်ကျက်လိုက်သည်။

“အရောင်းအဝယ် ကိစ္စတွေ ပြီးပြီ"

“နောက်တစ်ဆင့်ကတော့... ဒီတွေ့ဆုံပွဲရဲ့ အဓိက အစီအစဉ် ဖြစ်တဲ့ မိစ္ဆာလမ်းစဉ် တိုက်ပွဲ ပဲ"

“ဂိုဏ်း အသီးသီးက အထူးချွန်ဆုံး တပည့်တွေကို စင်ပေါ် လွှတ်ပြီး ယှဉ်ပြိုင်ကြမယ်။ အနိုင်ရတဲ့သူကို... ငါကိုယ်တိုင် ဖော်စပ်ထားတဲ့ အခြေခံအုတ်မြစ် တည်ဆောက်ခြင်း ဆေးလုံး တစ်လုံး ဆုချမယ်"

ထိုစကားကို ကြားလိုက်ရသည့်အခါ နေရာတစ်ခုလုံး ချက်ချင်း တိတ်ဆိတ်သွားပြီး... လူသတ်လိုသော အရှိန်အဝါများ ပြန်လည် ဖုံးလွှမ်းလာတော့၏။

ကစားသမားများ၏ မျက်လုံးများမှာမူ အရောင်တောက်သွားခဲ့ပြီ ဖြစ်သည်။

“တိုက်ပွဲ ဟုတ်လား။ ပြိုင်ပွဲ တဲ့လား"

“အခြေခံအုတ်မြစ် တည်ဆောက်ခြင်း ဆေးလုံး ဗျို့"

ဝမ်သဲ့ဖာသည် ယခုလေးတင် သူရှာထားသော ဝိညာဉ်ကျောက်တုံး အိတ်ကို အိတ်ကပ်ထဲသို့ ထိုးထည့်လိုက်ပြီး... (ကြွားရန်အတွက် ဝယ်ထားသော) အသစ်စက်စက်၊ အသွားမသွေးရသေးသည့် ဧရာမ မိစ္ဆာခေါင်း ဓားမကြီးကို ကောက်ကိုင်လိုက်ကာ... ကျန်းချန်ကို စိတ်လှုပ်ရှားစွာဖြင့် လှမ်းကြည့်လိုက်၏။

“ဂိုဏ်းချုပ်ကြီး... ဒီတာဝန်ကို ကျွန်တော် ယူမယ်ဗျို့"

“ကျွန်တော့်ကို သွားခွင့်ပြုပါ။ စစ်မှန်တဲ့ မိစ္ဆာလမ်းစဉ် ဆိုတာ ဘာလဲဆိုတာကို... သူတို့ကို ပြသလိုက်မယ်ဟေ့။