အခန်း (၂၄၇၅-၂၄၇၆)

အခန်း(၂၄၇၅)

“ညီနောင်ဝူ ဘာဖြစ်လို့လဲ”

ဝူရှင်း၏ အမူအရာကို သတိပြုမိလျှင် ကျန်းချန်၏ မျက်ဝန်းများတွင် ချက်ချင်းဆိုသလို သံသယ အရိပ်အယောင်များ ဖြစ်ပေါ်လာခဲ့သည်။

“နန်းတော်သခင်မ မင်ယွဲ့.အစောပိုင်းက ထုတ်ဖော်လိုက်တာက လနတ်အရှင်သခင် တီထွင်ထားတဲ့ စွမ်းအားပဲ.. အဲဒီစွမ်းအားကို အသုံးပြုလိုက်တိုင်းမှာ ကြီးမားတဲ့ ပေးဆပ်မှုတွေ ရှိပုံရတယ်.. နန်းတော်သခင်မရဲ့ နယ်ပယ်အဆင့်က ကျဆင်းသွားတယ်လို့ ငါခပ်ရေးရေး ခံစားမိတယ် အချိန်တိုအတွင်းတော့ အုပ်စိုးသူအဆင့်ဆီ ပြန်ရောက်ဖို့ ခက်ခဲလိမ့်မယ် ထင်တယ်”

ဝူရှင်းက လေးနက်စွာ ပြောလိုက်သည်။

ထိုစကားကိုကြားလျှင် ကျန်းချန်သည် စိတ်မကောင်း ဖြစ်သွားခဲ့၏။

ယခုအခါတွင် မင်ယွဲ့ရှင်းသည် နတ်ဘုရားနယ်မြေ၏ တစ်ဦးတည်းသော အုပ်စိုးသူအဆင့် ကျင့်ကြံသူ ဖြစ်သည်။

ထို့ကြောင့် သူမ၏ ကျင့်ကြံခြင်းအဆင့် ကျဆင်းသွားခြင်းသည် နတ်ဘုရားနယ်မြေအတွက် သတင်းကောင်း မဟုတ်ပေ။

ကံကောင်းထောက်မစွာဖြင့် ဤစစ်ပွဲကြီးအပြီးတွင် နတ်ဘုရားနယ်မြေသည် အချိန်တိုအတွင်း မည်သည့် အန္တရာယ်မှရှိမည်မဟုတ်၍ အချိန်အတန်ကြာ အေးအေးဆေးဆေး အနားယူနိုင်မည်ဖြစ်သည်။

သို့သော်လည်း ဤကဲ့သို့ တည်ငြိမ်မှုသည် သေချာပေါက် ရေရှည်တော့ မဟုတ်ပေ။

အင်မော်တယ် ကျင့်ကြံခြင်း စကြဝဠာဖြစ်စေ၊ ထာဝရရှင်သန်ခြင်း အင်မော်တယ်ဘုရင် အတွက် လာရောက်ကြသူများ ဖြစ်စေ ၎င်းတို့သည် တစ်ကျော့ ပြန်လာကြဦးမည်သာ ဖြစ်သည်။

ဤသို့ တွေးမိလျှင် အင်မော်တယ် ကျင့်ကြံခြင်း စကြဝဠာသို့သွားမည့် ကျန်းချန်၏ ဆုံးဖြတ်ချက်သည် ပိုမို၍ ခိုင်မာလာခဲ့သည်။

နတ်ဘုရားနယ်မြေ အတွက် အချိန်ပိုမို ရရှိစေရန် အင်မော်တယ် ကျင့်ကြံခြင်း စကြဝဠာ ဆီသို့ သူ့အနေဖြင့် သေချာပေါက် သွားရပေလိမ့်မည်။

အင်မော်တယ် ကျင့်ကြံခြင်းစကြဝဠာတွင် ပြဿနာတချို့ဖန်တီးပြီး ၎င်းတို့ကို နတ်ဘုရားနယ်မြေသို့ ကျူး‌ကျော်ရန် အခွင့်အရေး မရရှိအောင် လုပ်နိုင်လျှင် အကောင်းဆုံး ဖြစ်ပေလိမ့်မည် မဟုတ်ပါလား။

-------------------

နတ်ဘုရားနယ်မြေ စကြဝဠာနှင့် မိုင်ပေါင်းများစွာ ဝေးကွာသော နေရာရှိ ကြယ်တာရာ ကောင်းကင်ယံတွင် ကျယ်ပြောသော စကြဝဠာတစ်ခု ရှိသည်။

ထိုစကြဝဠာသည် ကြယ်တာရာ ကောင်းကင်ယံရှိ စကြဝဠာများစွာထဲတွင် တစ်ခု အပါအဝင် ဖြစ်သည့် အင်မော်တယ်ကျင့်ကြံခြင်း စကြဝဠာပင် ဖြစ်၏။

အင်မော်တယ် ကျင့်ကြံခြင်း စကြဝဠာတွင် သွေးအငွေ့အသက်များဖြင့် ပြည့်နှက်နေသော ရှေးဟောင်းတောင်တန်း တစ်ခု ရှိသည်။

ထိုနေရာသည် အင်မော်တယ် ကျင့်ကြံခြင်း စကြဝဠာတွင် နာမည်ကျော်ကြားသော သွေးနတ်ဆိုးဂိုဏ်း တည်ရှိသော နေရာလည်း ဖြစ်၏။

သွေးနတ်ဆိုးဂိုဏ်း၏ ဗဟိုချက်ရှိ နတ်ဆိုး အငွေ့အသက်များ ပြည့်နှက်နေသော ခန်းမဆောင်ကြီး တစ်ခု အတွင်းဝယ် သွေးရောင်ဝတ်စုံနှင့် သွေးရောင်သရဖူကို ဆောင်းထားသော ပုံရိပ်တစ်ခုသည် ပလ္လင်ထက်တွင် ထိုင်နေခဲ့သည်။

ထိုသွေးရောင်ဝတ်စုံဝတ် ပုံရိပ်ထံကနေ မည်သည့် အရှိန်အဝါမျှ ထွက်ပေါ် မနေသော်လည်း သွေးရောင်ဖျော့ဖျော့ လင်းလက်နေသော ထိုလူ၏ မျက်ဝန်းသည် အလွန်တရာပင် ထူးဆန်းနေခဲ့သည်။

ကပ်ဘေးအဆင့် ကျင့်ကြံသူ တစ်ဦးပင်လျှင် တစ်ချက်အကြည့်ခံလိုက်ရုံဖြင့် စိတ်နှလုံး တုန်ယင်သွားနိုင်လောက်၏။

ဤသွေးရောင်ဝတ်စုံနှင့် ပုဂ္ဂိုလ်မှာ သွေးနတ်ဆိုးဂိုဏ်း၏ လက်ရှိခေါင်းဆောင် ဖြစ်သည့် သွေးနတ်ဘုရား ဖြစ်သည်။

ခန်းမထဲတွင် သွေးနတ်ဘုရား အပြင် သွေးရောင်ဝတ်စုံဝတ် အဘိုးအို သုံးဦးလည်း ရှိနေခဲ့သည်။

ထိုသွေး‌ရောင်ဝတ်စုံဝတ် အဘိုးအိုသုံးဦး၏ အရှိန်အဝါသည် အလွန်တရာပင် နက်ရှိုင်းပြီး တစ်ဦးချင်းစီသည် မဟာယာနအဆင့်ကျင့်ကြံသူ ဖြစ်သည့် သွေးနတ်ဆိုးထက် အနည်းငယ်မျှပင် မနိမ့်ကျပေ။

“ဂိုဏ်းချုပ် ဘယ်လို အရေးကြီးကိစ္စများ ရှိလို့ ကျွန်တော်တို့ကို အရေးတကြီး ခေါ်လိုက်လဲဆိုတာ သိပါရစေ”

ဘယ်ဘက်တွင် ထိုင်နေသော သွေးရောင်ဝတ်စုံဝတ် အဘိုးအိုသည် ပလ္လင်ပေါ်ရှိ သွေးနတ်ဘုရားကို သံသယမျက်ဝန်းများဖြင့် ကြည့်ကာ ခန်းမထဲရှိ တိတ်ဆိတ်မှုကို ဖြိုခွင်းလိုက်သည်။

သွေးနတ်ဘုရားက ခဏမျှ တိတ်ဆိတ်နေပြီးမှ လေးနက်စွာ ပြောလိုက်၏။

“သိပ်မကြာခင်ကပဲ သွေးနတ်ဆိုး ရုတ်တရက် ကျဆုံးသွားခဲ့ပြီ.. နတ်ဘုရားနယ်မြေကို စစ်ချီသွားတဲ့ ငါတို့ သွေးနတ်ဆိုးဂိုဏ်းရဲ့စစ်တပ်က တစ်ခုခု ဖြစ်သွားပြီထင်တယ်”

သွေးနတ်ဘုရား၏ စကားကိုကြားလျှင် သွေးရောင်ဝတ်စုံဝတ် အဘိုးအို သုံးဦး၏ မျက်နှာအမူအရာသည် သိသိသာသာပင် ပြောင်းလဲသွားခဲ့သည်။

လွန်ခဲ့သော နှစ်အနည်းငယ်ခန့်က သွေးနတ်ဆိုးဂိုဏ်း၏ အစွမ်းထက် ပုဂ္ဂိုလ်တစ်ပါး ဖြစ်သည့် သွေးနေမင်းဘိုးဘေးသည် လျှို့ဝှက်နည်းစနစ်ဖြင့် သတင်းတစ်ခု ပေးပို့လာခဲ့သည်။

ယင်းမှာ ဒဏ္ဍာရီလာ နတ်ဘုရားကျောက်တိုင်သည် နတ်ဘုရားနယ်မြေတွင် ပြန်လည် ထွက်ပေါ်လာပြီ ဟူသော သတင်းပင် ဖြစ်၏။

ထိုနှစ်က စစ်ပွဲပြီးကတည်းကပင် နတ်ဘုရားနယ်မြေသည် ပြိုကွဲသွားသော အခြေအနေတွင် ရှိနေခဲ့ပြီး အင်အားနည်းပါးကာ အုပ်စိုးသူအဆင့် ကျင့်ကြံသူ တစ်ဦးပင် မရှိတော့ပေ။

ထို့အကြောင်းကြောင့်ပင် သွေးနတ်ဆိုးဂိုဏ်းသည် အင်မော်တယ်ကျင့်ကြံခြင်း စကြဝဠာတွင် သွေးနေမင်းဘိုးဘေး ပေးပို့လိုက်သော သတင်းကို ထုတ်ပြန်ခြင်းမပြုဘဲ သွေးနတ်ဆိုးဂိုဏ်း၏ လက်အောက်ရှိ အင်အားစုကိုသာ နတ်ဘုရားနယ်မြေသို့ စေလွှတ်ခဲ့သည်။

အင်မော်တယ် ကျင့်ကြံခြင်းစကြဝဠာတွင် အင်မော်တယ်လမ်းစဥ် ပြတ်တောက်သွားကတည်းကပင် အင်မော်တယ် ကျင့်ကြံခြင်း စကြဝဠာ၏ ထိပ်တန်းဂိုဏ်းကြီးများသည် ထာဝရရှင်သန်နိုင်မည့် အင်မော်တယ် လမ်းစဥ်ကို ရှာဖွေနေခဲ့ကြသည်။

ထိုအချိန်က ပေါ်ထွက်ခဲ့သော အင်မော်တယ် ကျောက်တိုင်ထဲတွင် အင်မော်တယ် ဖြစ်လာနိုင်မည့် လျှို့ဝှက်ချက်များ ဖုံးကွယ်ထားနေနိုင်ခြေ အလွန်များသည်။

ထို့ကြောင့် အင်မော်တယ် ကျင့်ကြံခြင်း စကြဝဠာမှ ထိပ်တန်းဂိုဏ်းကြီး အားလုံးနီးပါးထဲတွင် အင်မော်တယ် ကျောက်တိုင်ကို မသိမ်းပိုက်ချင်သူ မရှိသလောက်ပင်။

အကယ်၍ သူတို့သာ အငြင်းပွားမှုများ မရှိခဲ့လျှင် အင်မော်တယ် ကျောက်တိုင်သည် နတ်ဘုရားနယ်မြေထဲသို့ မတော်တဆ ကျရောက်သွားလိမ့်မည် မဟုတ်ပေ။

ယခုအခါတွင် နတ်ဘုရားနယ်မြေတွင် အင်မော်တယ်ကျောက်တိုင် ထွက်ပေါ်လာသည့် သတင်းကို သူတို့သွေးနတ်ဆိုးဂိုဏ်း တစ်ဂိုဏ်းတည်းကသာ သိရှိထားခဲ့၏။

ထို့အပြင် နတ်ဘုရားနယ်မြေ၏ ခွန်အားသည် ရှေးခေတ်ကာလကလို မဟုတ်တော့ဘဲ အလွန်တရာ အားနည်းနေသဖြင့် နတ်ဘုရားနယ်မြေကို အလွယ်တကူ နှိမ်နင်းပြီး အင်မော်တယ် ကျောက်တိုင်၏ လျှို့ဝှက်ချက်များကို သူတို့ တစ်ဂိုဏ်းတည်းသာ သိမ်းပိုက်ရန် အတွက် မဟာယာနအဆင့် ကျင့်ကြံသူ တစ်ဦးကို စေလွှတ်လိုက်ရုံဖြင့်ပင် လုံလောက်သည်။

သို့သော် မျှော်လင့်ချက်က ကြီးမားသော်လည်း လက်တွေ့အရှိတရားကမူ အလွန်တရာပင် ခါးသီးလှ၏။

နတ်ဘုရားနယ်မြေသို့ စေလွှတ်လိုက်သော စစ်တပ်တွင် ခေါင်းဆောင်ဖြစ်သည့် မဟာယာနအဆင့် ကျင့်ကြံသူ သွေးနတ်ဆိုးသည် ရုတ်တရက် ကျဆုံးသွားလိမ့်မည်ဟု သူတို့ လုံးဝ ထင်မှတ်မထားခဲ့ကြပေ။

“ဒါ ဒါ ဘယ်လိုလုပ်ဖြစ်နိုင်မှာလဲ”

မဟာယာနအဆင့် ကျင့်ကြံသူတစ်ဦးက မယုံကြည်နိုင်စွာ ပြောလိုက်သည်။

“ဂိုဏ်းချုပ်.. သွေးနေမင်းဘိုးဘေးဆီကရတဲ့ အချက်အလက်ထဲမှာ နတ်ဘုရားနယ်မြေက ပြိုကွဲနေတဲ့ အခြေအနေမှာ ရှိနေပြီး အုပ်စိုးသူအဆင့် ကျင့်ကြံသူတောင် မွေးဖွားနိုင်ခြင်းမရှိဘူးလို့ ဆိုထားတယ်.. ဒါဆို သွေးနတ်ဆိုးလို မဟာယာနအဆင့် ကျင့်ကြံသူက နတ်ဘုရားနယ်မြေထဲမှာ ဘယ်လိုလုပ်ပြီး ကျဆုံးသွားရတာလဲ”

“သွေးနေမင်းဘိုးဘေး ပေးပို့လိုက်တဲ့ အချက်အလက်က လှည့်စားမှုများ ဖြစ်နေမလား”

အခြား မဟာယာနအဆင့် ကျင့်ကြံသူတစ်ဦးက မျက်မှောင်ကြုတ်ကာ ပြောလိုက်သည်။

သွေးနေမင်းဘိုးဘေးသည် စကြဝဠာအဆင့် တိုက်ပွဲဖြစ်ပွားစဥ်က သွေးနတ်ဆိုးဂိုဏ်း၏ အစွမ်းထက်ပုဂ္ဂိုလ် တစ်ပါးဖြစ်သည်။

ထိုစစ်ပွဲပြီးကတည်းက ယခုအချိန်အထိ ဆိုလျှင် နှစ်ပေါင်းမရေမတွက်နိုင်အောင် ကြာမြင့်သွားခဲ့ပြီ ဖြစ်၏။

သွေးနေမင်းဘိုးဘေးသည် မဟာယာန အထွတ်အထိပ်အဆင့် ကျင့်ကြံသူ ဖြစ်ပြီး ထိုတိုက်ပွဲတွင် ကံကောင်းထောက်မစွာဖြင့် အသက်ရှင် ကျန်ရစ်ခဲ့သည် ဆိုလျှင်ပင် ယခုအချိန်အထိ အသက်ရှင်နေရန်မှာ မဖြစ်နိုင်ပေ။

“အဲဒါကတော့ မဖြစ်နိုင်ဘူးထင်တယ်”

သွေးနတ်ဘုရားက လေးနက်သော လေသံဖြင့် ပြောလိုက်သည်။

“သွေးနေမင်းဘိုးဘေးက ဒီအချိန်အထိ ဘယ်လိုအသက်ရှင်နေသလဲဆိုတာ ငါမသိပေမဲ့ သူအသုံးပြုခဲ့တဲ့ လျှို့ဝှက်နည်းစနစ်က ငါတို့ သွေးနတ်ဆိုးဂိုဏ်းရဲ့ အထွတ်အထိပ်လျှို့ဝှက်နည်းစနစ်ပဲ.. သွေးနတ်ဆိုးဂိုဏ်းရဲ့ အရင်ဂိုဏ်းချုပ်တွေကလွဲရင် ဒီနည်းစနစ်ကို အသုံးပြုနိုင်တဲ့သူ မရှိဘူး”

“ဒါဆို သွေးနတ်ဆိုးက ကြယ်တာရာ စကြဝဠာထဲမှာ ပြဿနာတက်ခဲ့တာများလား.. ဒါမှမဟုတ် သွေးနေမင်းဘိုးဘေးက သတင်းအမှား ပေးပို့လိုက်တာလား”

ယခုအချိန်အထိ စကားတစ်ခွန်းမှ ဝင်မပြောရသေးသည့် မဟာယာနအဆင့် ကျင့်ကြံသူက ဝင်ပြောလိုက်သည်။

"ကြယ်စကြဝဠာက လူတွေ တည်ဆောက်ထားတဲ့ ကြယ်တာရာစစ်သင်္ဘောက အရမ်းကို ထူးခြားတယ်.. စကြဝဠာထဲမှာ ကြီးမားတဲ့ သဘာဝ ဘေးအန္တရာယ်မျိုးနဲ့ မကြုံတွေ့သရွေ့ ဘာပြဿနာမှ ရှိမှာမဟုတ်ဘူး.. ဒါ့အပြင် အင်မော်တယ် ကျင့်ကြံခြင်း စကြဝဠာနဲ့ နတ်ဘုရားနယ်မြေတို့ရဲ့ကြားမှာလည်း သွေးနတ်ဆိုးကို ခြိမ်းခြောက်နိုင်လောက်တဲ့ တခြား စကြဝဠာမရှိဘူး.. ငါ့ရဲ့ ခန့်မှန်းချက်သာ မမှားဘူးဆိုရင် သွေးနေမင်းဘိုးဘေး ပေးတဲ့သတင်းက အမှားအယွင်းတစ်ခုခု ရှိနေတာ ဖြစ်ဖို့များတယ်”

သွေးနတ်ဘုရားက လေးနက်စွာ ပြောလိုက်သည်။

“ဂိုဏ်းချုပ်.. ကျွန်တော်တို့ အခု ဘာဆက်လုပ်ကြမလဲ.. နတ်ဘုရားနယ်မြေမှာ အင်မော်တယ် ကျောက်တိုင် ထွက်ပေါ်လာပြီဆိုတဲ့ သတင်းကို လူသိရှင်ကြား ထုတ်ပြန်လိုက်ရမလား”

သွေးနတ်ဆိုးဂိုဏ်း၏ မဟာယာနအဆင့် ကျင့်ကြံသူသုံးဦးက သွေးနတ်ဘုရားကို ကြည့်လိုက်ကြသည်။

သွေးနတ်ဆိုးဂိုဏ်းသည် အင်မော်တယ် ကျင့်ကြံခြင်း စကြဝဠာတွင် နာမည်ကျော်ကြားသော ထိပ်တန်းဂိုဏ်းကြီး ဆယ်ဂိုဏ်း ထဲတွင် တစ်ဂိုဏ်း အပါအဝင် ဖြစ်သော်လည်း ထိုဆယ်ဂိုဏ်းထဲတွင် အလယ်အလတ် အဆင့်တွင်သာ ရှိသည်။

အကယ်၍ အင်မော်တယ် ကျောက်တိုင်သတင်းကို လူသိရှင်ကြား ထုတ်ပြန်လိုက်လျှင် သူတို့ သွေးနတ်ဆိုးဂိုဏ်းသည် အင်မော်တယ်ကျောက်တိုင်ကို ရယူရန် လွယ်ကူတော့မည် မဟုတ်ပေ။

“စောင့်ကြည့်ကြတာပေါ့”

သွေးနတ်ဘုရားက တစ်ခဏမျှ တိတ်ဆိတ်နေပြီးမှ ပြောလိုက်သည်။

“ငါလျှို့ဝှက်နည်းစနစ်ကို အသုံးပြုပြီး သွေးနေမင်းဘိုးဘေး ဆီကနေ နတ်ဘုရားနယ်မြေနဲ့ ပတ်သက်တဲ့ သတင်းအချက်အလက်တွေ ထပ်ရမလား ဆိုတာ နောက်တစ်ကြိမ်ဆက်သွယ်ကြည့်မယ်”

ဒဏ္ဍာရီလာ အင်မော်တယ်ကျောက်တိုင်သည် အင်မော်တယ်ကျင့်ကြံခြင်း စကြဝဠာတွင် အင်မော်တယ်လမ်းစဥ် ပြတ်တောက်သွားသည့် အချိန်ကစ၍ သူတို့တွေ့ရှိခဲ့သည့် အင်မော်တယ် ဖြစ်လာနိုင်မည့် တစ်ခုတည်းသော အခွင့်အရေးဖြစ်သည်။

ထိုအကြောင်းကြောင့်ပင် အင်မော်တယ်ကျင့်ကြံခြင်း စကြဝဠာသည် အင်မော်တယ်ကျောက်တိုင် အတွက် စကြဝဠာအဆင့် တိုက်ပွဲတစ်ခုကို စတင်ခဲ့ခြင်း ဖြစ်သည်။

ယခုအခါ အင်မော်တယ် ကျင့်ကြံခြင်း စကြဝဠာတွင် အင်မော်တယ်ကျောက်တိုင် သတင်းကို သူတို့ သွေးနတ်ဆိုးဂိုဏ်းကသာ ရရှိထားခဲ့သည်။

ထို့ကြောင့် သွေးနတ်ဘုရားသည် အင်မော်တယ်ကျောက်တိုင်ကို သဘာဝကျစွာပင် သူတစ်ဦးတည်း သိမ်းပိုက်ချင်ခဲ့၏။

အင်မော်တယ် ကျောက်တိုင်ကို ရရှိပြီး အင်မော်တယ်ကျောက်တိုင်ထဲမှ လျှို့ဝှက်ချက်များကိုသာ ဖော်ထုတ်နိုင်မည်ဆိုလျှင် သူ့အနေဖြင့် ကန့်သတ်ချက်များကို ချိုးဖျက်ကာ အင်မော်တယ် ဖြစ်လာနိုင်ပြီး ထာဝရရှင်သန်နိုင်မည် ဖြစ်သည်။

ထို့ကြောင့် သွေးနတ်ဆိုးဂိုဏ်း၏ အင်အားကို တော်ရုံတန်ရုံ ထိခိုက်ရုံလောက်ဖြင့် သွေးနတ်ဘုရားသည် အင်မော်တယ်ကျောက်တိုင်ကို အင်မော်တယ် ကျင့်ကြံခြင်း စကြဝဠာတွင် လူသိရှင်ကြား ထုတ်ပြန်ရန် အစီအစဥ်မရှိပေ။

အခန်း(၂၄၇၅)ပြီး၏။

အခန်း(၂၄၇၆)

အင်မော်တယ်ကျင့်ကြံခြင်းစကြဝဠာ၏ စစ်တပ်ကို ချေမှုန်းပြီးနောက်တွင် ကျန်းချန်သည် နတ်ဘုရားနယ်မြေမှ ကျင့်ကြံသူအများစုကို အင်အားပြန်လည် ဖြည့်ဆည်းရန် အတွက် နတ်ဘုရားနယ်မြေသို့ ပြန်ခွင့်ပြုခဲ့ပြီး လူအနည်းစုကိုသာ ကြယ်ကောင်းကင်မြို့တော်ကို စောင့်ကြပ်ရန် ချန်ထားရစ်ခဲ့သည်။

သူကိုယ်တိုင်ကမူ ကြယ်ကောင်းကင်မြို့တော်တွင် နေထိုင်ကာ လူသားဧကရာဇ် နန်းတော်မှ လူများက ကြယ်တာရာစစ်သင်္ဘောအား ထိန်းချုပ်နိုင်မည့် အချိန်ကို စောင့်ဆိုင်းနေခဲ့သည်။

ကြယ်စကြဝဠာမှ လူများ ရှိနေသဖြင့် ကြယ်တာရာ စစ်သင်္ဘောကို အချိန်မရွေး ခရီးနှင်နိုင်သော်လည်း လူကိုယုံလျှင် ပုံပြင် ဖြစ်တတ်သည် ဟူသော စကားအတိုင်း ကျန်းချန်သည် ကြယ်စကြဝဠာမှ လူများကို တစ်ရာ ရာခိုင်နှုန်း ယုံကြည်ခြင်း မရှိခဲ့ပေ။

ကြယ်တာရာ စစ်သင်္ဘော၏ ထိန်းချုပ်မှုကို သူ၏ လက်ထဲတွင် ထားရှိခြင်းကသာ ပိုမို စိတ်ချရလိမ့်မည် မဟုတ်ပါလား။

တစ်လ ကြာပြီးနောက်တွင် ကြယ်စကြဝဠာမှလူများ၏ အကူအညီဖြင့် ကျန်းချန်နှင့် အခြားသူများသည် အဆုံးသတ်၌ ကြယ်တာရာ စစ်သင်္ဘော၏ ထိန်းချုပ်မှုကို အပြည့်အဝ ရရှိခဲ့ကြသည်။

ကျန်းချန်သည် တုံ့ဆိုင်းမနေတော့ဘဲ အင်မော်တယ် ကျင့်ကြံခြင်း စကြဝဠာသို့ သွားမည့် ခရီးစဥ်ကို စတင်ရန် ဆုံးဖြတ်လိုက်၏။

“ချန်အာ.. မင်းတကယ်ပဲ အင်မော်တယ် ကျင့်ကြံခြင်း စကြဝဠာကို သွားတော့မှာလား”

ကြယ်ကောင်းကင်မြို့တော်၏ အပြင်ဘက်တွင် ကျန်းဝူရသည် သူ၏အရှေ့ရှိ ကျန်းချန်ကို ကြည့်ကာ မေးလိုက်သည်။

သူ၏ မျက်နှာထက်တွင် စိုးရိမ်သော အမူအရာများ ဖြစ်ပေါ်နေခဲ့သည်။

“အင်မော်တယ် ကျင့်ကြံခြင်း စကြဝဠာက နတ်ဘုရားနယ်မြေထက် အများကြီး ပိုသန်မာတယ်.. အကယ်၍ သူတို့သာ တစ်ကျော့ ပြန်လာဦးမယ်ဆိုရင် နတ်ဘုရားနယ်မြေက လုံးဝခုခံနိုင်မှာမဟုတ်ဘူး.. ဒါကြောင့် ကျွန်တော့်အနေနဲ့ အင်မော်တယ်ကျင့်ကြံခြင်း စကြဝဠာက ကျွန်တော်တို့ဆီ လာတိုက်မှာကို ထိုင်စောင့်မနေနိုင်ဘူး အဖေ...ဒ့ါအပြင် နတ်ဘုရားနယ်မြေရဲ့ အပြင်ဘက်က ကမ္ဘာကြီးကို ကျွန်တော် မြင်ဖူးချင်သေးတယ်”

ကျန်းချန်က ခပ်ယဲ့ယဲ့ပြုံးကာ ပြောလိုက်သည်။

ထိုစကားကိုကြားလျှင် ကျန်းဝူရက မျက်မှောင်ကြုတ်သွားခဲ့၏။

“မင်းသွားမယ် ဆိုရင်လည်း နတ်ဘုရားနယ်မြေက အစွမ်းထက် ကျင့်ကြံသူတချို့ကို အဖော်ခေါ်သွားပါလား.. အချင်းချင်း စောင့်ရှောက်လို့ရတာပေါ့”

“မလိုပါဘူးအဖေ”

ကျန်းချန်က လက်ကာပြလိုက်ပြီး တိုက်ရိုက်ပင် ငြင်းပယ်လိုက်သည်။

သူ၏ လက်ရှိခွန်အားဖြင့် ဆိုလျှင် မဟာယာနအဆင့် ပုဂ္ဂိုလ်များသာ သူ့အတွက် ခြိမ်းခြောက်မှု ဖြစ်နိုင်၏။

အကယ်၍ သူသာ မဟာယာနအဆင့် ကျင့်ကြံသူနှင့် တွေခဲ့လျှင် လူမည်မျှပင် ခေါ်သွားပါစေ၊ ဘာမှ အဓိပ္ပါယ်ရှိမည် မဟုတ်ပေ။

ထို့အပြင် သူက အပြာရောင်ဧကရာဇ် သက်ရှည်ကျင့်စဥ်ကို ကျင့်ကြံထားပြီး အရှိန်အဝါ ဖုံးကွယ်သည့် နည်းစနစ်ကိုလည်း တတ်မြောက်ထားသည်။

သူကိုယ်တိုင် မထုတ်ဖော်သရွေ့ အင်မော်တယ် ကျင့်ကြံခြင်းစကြဝဠာမှ မဟာယာနအဆင့် ကျင့်ကြံသူပင်လျှင် သူ၏ မူလလက္ခဏာကို မြင်နိုင်မည် မဟုတ်ပေ။

ရှင်းလင်းစွာဆိုရလျှင် နတ်ဘုရားနယ်မြေမှ ကျင့်ကြံသူများကို အဖော် ခေါ်သွားလျှင် ပို၍ပင် အလုပ်ရှုပ်သွားနိုင်ပေသည်။

“ကျန်းချန်.. ငါမင်းနဲ့အတူ အင်မော်တယ် ကျင့်ကြံခြင်းစကြဝဠာကို လိုက်ခဲ့မယ်”

ထိုအချိန်တွင် ကျန်းချန်၏ နံဘေးရှိ ဝူရှင်းက ရုတ်တရက် ဝင်ပြောလိုက်သည်။

သူက အုပ်စိုးသူအဆင့် ကျင့်ကြံသူ၏ ပြန်လည်ဝင်စားလာသူ ဖြစ်သော်လည်း ယခင်ဘဝတွင် နတ်ဘုရားနယ်မြေမှ စွန့်ခွာပြီး ပြင်ပ စကြဝဠာသို့ တစ်ခါမှ မသွားဖူးခဲ့ပေ။

ယခု ကျန်းချန်က နတ်ဘုရားနယ်မြေကို ကျူးကျော်လာသည့် အင်မော်တယ် ကျင့်ကြံခြင်း စကြဝဠာကို သွားမည် ဖြစ်ရာ ဝူရှင်းသည်လည်း ကျန်းချန်နှင့်အတူ လိုက်သွားချင်နေခဲ့၏။

“မဖြစ်ဘူး ညီနောင်ဝူရှင်း”

ကျန်းချန်က အလျင်အမြန်ပင် ခေါင်းခါရမ်းလိုက်ပြီး လေးနက်သော လေသံဖြင့် ပြောလိုက်သည်။

“ညီနောင်ဝူရှင်း ဒီမှာနေခဲ့မှ ဖြစ်မယ်...အခု နတ်ဘုရားနယ်မြေ ရင်ဆိုင်နေရတဲ့ ခြိမ်းခြောက်မှုက အင်မော်တယ် ကျင့်ကြံခြင်း စကြဝဠာ တစ်ခုတည်းမဟုတ်ဘူး”

ကျန်းချန်၏ စကားကိုကြားလျှင် ဝူရှင်းနှင့် ကျန်းဝူရ တို့၏ အကြည့်သည် ကျန်းချန်၏ ကိုယ်ပေါ်သို့ ကျရောက်သွားခဲ့သည်။

“ဒီကိစ္စကို ငါ ရှင်းရှင်းလင်း ပြောပြဖို့ အဆင်မပြေသေးပေမဲ့ တစ်ခုတော့ ပြောပြနိုင်ပါတယ်.. နတ်ဘုရားနယ်မြေက တခြားခြိမ်းခြောက်မှုတွေနဲ့လည်း ရင်ဆိုင်ရနိုင်တယ်.. အဲဒါက အင်မော်တယ် ကျင့်ကြံခြင်း စကြဝဠာထက်တောင် ပိုပြီးတော့ ကြောက်ဖို့ကောင်းတယ်”

ကျန်းချန်က ဝူရှင်းကို လေးနက်စွာ ကြည့်ရင်း ပြောလိုက်သည်။

“ငါ ထွက်သွားပြီးရင် နတ်ဘုရားနယ်မြေကို ညီနောင်ဝူရှင်း လက်ထဲ အပ်ခဲ့မယ်”

ယခုအခါ မင်ယွဲ့ရှင်းသည် ကျင့်ကြံခြင်းအဆင့် ကျဆင်းသွားသဖြင့် တံခါးပိတ် ကျင့်ကြံနေခဲ့ပြီး မည်သည့်အချိန်မှ ပြန်ကောင်းလာမည်ကို မသိရပေ။

နတ်ဘုရားနယ်မြေသည် အုပ်စိုးသူအဆင့် ကျင့်ကြံသူ မရှိသည့် နေ့ရက်များသို့ တစ်ကျော့ပြန် ရောက်ရှိသွားခဲ့ပြီ ဖြစ်၏။

ဝူရှင်းသည် ရှေးခေတ်ကာလက အုပ်စိုးသူအဆင့် ကျင့်ကြံသူကနေ ပြန်လည်ဝင်စားလာသူ ဖြစ်သည်။

ယနေ့ခေတ် နတ်ဘုရားနယ်မြေတွင် ဝူရှင်းသည် အုပ်စိုးသူအဆင့်ကို ထိုးဖောက်ဝင်ရောက်ရန် အရည်အချင်း အရှိဆုံးလူ ဖြစ်သည်မှာ သံသယဖြစ်ဖွယ်ရာ မရှိပေ။

ခြေလှမ်းတစ်ဝက် အုပ်စိုးသူအဆင့် ဖြစ်သည့် စီနီယာစန်းမင်နှင့် ဝူကျန့်ထျန်းတို့ ပင်လျှင် ဝူရှင်းထက် အရင် အုပ်စိုးသူ အဆင့် ကျင့်ကြံသူ ဖြစ်လာရန် မလွယ်ကူပေ။

ထို့အပြင် ဝူရှင်းသည် ပြန်လည် ဝင်စားထားသည့် အုပ်စိုးသူအဆင့် ကျင့်ကြံသူ ဖြစ်၏။

အုပ်စိုးသူအဆင့်ကို ထပ်မံ ရောက်ရှိသွားသည်နှင့် ဝူရှင်း၏ တိုက်ခိုက်ရေးစွမ်းရည်သည် သာမန် အုပ်စိုးသူ အဆင့်ထက် အဆပေါင်းများစွာ သာလွန်သွားပေလိမ့်မည်။

ထို့ကြောင့် သူ နတ်ဘုရားနယ်မြေသို့ စွန့်ခွာပြီးနောက်တွင် ဝူရှင်းသည် နတ်ဘုရားနယ်မြေကို စောင့်ရှောက်ရန် အသင့်တော်ဆုံးလူပင် မဟုတ်ပါလော။

“ကောင်းပြီ.. ငါနေခဲ့ပြီး နတ်ဘုရားနယ်မြေကို စောင့်ရှောက်ပေးထားမယ်”

ဝူရှင်းက ခဏမျှ တိတ်ဆိတ်သွားပြီးနောက်တွင် ကျန်းချန်ကို တည်ငြိမ်စွာ ကြည့်၍ ပြောလိုက်သည်။

“မင်း အသက်ရှင်လျက် ပြန်လာဖို့ မမေ့နဲ့.. ငါမင်းရဲ့ အလောင်းကို ကောက်ဖို့ အင်မော်တယ် ကျင့်ကြံခြင်း စကြဝဠာအထိ မသွားချင်ဘူး”

“စိတ်မပူပါနဲ့ ညီနောင်ဝူ.. ငါ့ရဲ့ သတင်းကောင်းကို စောင့်နေပါ.. အင်မော်တယ် ကျင့်ကြံခြင်း စကြဝဠာကို သွားပြီး နတ်ဘုရားနယ်မြေ အတွက် ဒီဘေးအန္တရာယ်ကို သေချာပေါက် ဖြေရှင်းပေးခဲ့ပါ့မယ်”

စကားဆုံးသည်နှင့် ကျန်းချန်၏ ပုံရိပ်သည် ဖျတ်ခနဲ ပျောက်ကွယ်သွားခဲ့ပြီး ထွက်ခွာရန် အသင့်ပြင်ထားပြီ ဖြစ်သော ကြယ်တာရာစစ်သင်္ဘော ဆီသို့ ရောက်ရှိသွားခဲ့သည်။

သူက ကြယ်တာရာ ကောင်းကင်ယံကို ကြည့်ရင်း ခပ်တိုးတိုးပြောလိုက်သည်။

“အင်မော်တယ် ကျင့်ကြံခြင်း စကြဝဠာကို သွားကြစို့”

ကျန်းချန်၏ အမိန့်ကိုရသည်နှင့် ကြယ်တာရာ စစ်သင်္ဘောသည် လေးညှို့မှ ပစ်လွှတ်လိုက်သော မြားတစ်စင်း ကဲ့သို့ပင် ကြယ်တာရာကောင်းကင်ယံ၏ အနက်ရှိုင်းဆုံးနေရာ ဆီသို့ လျင်မြန်စွာ ပျံသန်းသွားခဲ့သည်။

---------------------

ကျယ်ပြောလှသော ကြယ်တာရာကောင်းကင်ယံတွင် ဧရာမကြယ်တာရာ စစ်သင်္ဘောကြီးတစ်စီးသည် ကြယ်တာရာကောင်းကင်ယံကို ဖြတ်ကျော်ကာ လျင်မြန်စွာ ခရီးနှင်နေခဲ့သည်။

ကြယ်တာရာ စစ်သင်္ဘောအတွင်းရှိ ဆန်းကြယ်သော အခန်းတစ်ခန်းထဲတွင် အနက်ရောင်ဝတ်စုံဝတ် လူငယ်တစ်ဦးသည် မျက်လုံးများကို မှိတ်ကာ ကျင့်ကြံနေခဲ့၏။

ထိုအနက်ရောင်ဝတ်စုံဝတ် လူမှာ နတ်ဘုရားနယ်မြေကို စွန့်ခွာပြီး အင်မော်တယ် ကျင့်ကြံခြင်း စကြဝဠာကြီးသို့ ဦးတည်၍ သွားနေသော ကျန်းချန်ပင်ဖြစ်သည်။

အချိန်မည်မျှ ကြာသွားမှန်းပင်မသိရပေ။

ကျန်းချန်သည် မျက်လုံးမှိတ်ထားရာကနေ အဆုံးသတ်တွင် ဖြည်းဖြည်းချင်း ဖွင့်လိုက်ပြီး ပါးစပ်ကနေ ခပ်တိုးတိုး ရေရွတ်လိုက်သည်။

“ဘာလိုလိုနဲ့ နတ်ဘုရားနယ်မြေကနေ ထွက်လာခဲ့တာ နှစ်နှစ်တောင် ကျော်သွားပြီပဲ”

ဤနှစ်နှစ်အတွင်း ကျန်းချန်နှင့် အခြားသူများသည် ကျယ်ပြောလှသော ကြယ်တာရာ ကောင်းကင်ယံတွင် ခရီးနှင်ခဲ့ကြသည်။

စကြဝဠာကောင်းကင်ယံ အကြောင်းကို အလွန် နှံ့စပ်သော ကြယ်စကြဝဠာမှ လူများရှိနေဖြင့် ကျန်းချန်တို့သည် အလွန်အမင်း ချောမွေ့စွာ ခရီးနှင်နိုင်ခဲ့ကြပြီး ဤနှစ်နှစ်ကျော်အတွင်း ပြဿနာ ကြီးကြီးမားမားနှင့် မကြုံတွေ့ခဲ့ရပေ။

ဤနှစ်နှစ်ကျော် အတွင်း ကျန်းချန်သည် ကြယ်တာရာစစ်သင်္ဘောပေါ်တွင် အနားယူရင်း အေး‌အေးဆေးဆေး ကျင့်ကြံနေခဲ့သည်။

သူ၏ ကျင့်ကြံခြင်းအဆင့်သည် နတ်ဘုရားနယ်မြေမှ ထွက်ခွာလာစဥ်က နတ်ဘုရင် အစောပိုင်းအဆင့်သာ ရှိသော်လည်း ယခုအခါတွင် အထွတ်အထိပ် အဆင့်သို့ ရောက်ရှိနေပြီ ဖြစ်ကာ အုပ်စိုးသူအဆင့်သို့ ထိုးဖောက်ရန် ခြေတစ်လှမ်းမျှသာ လိုအပ်တော့၏။

“ငါ့ရဲ့ ကျင့်ကြံခြင်းအဆင့်က နတ်ဘုရင်နဝမအဆင့်အထွတ်အထိပ်ကိုတောင် ရောက်နေပြီ.. ဒါပေမဲ့ ဘယ်လောက်ပဲ ထပ်ကျင့်ကျင့် အတွေ့အကြုံရမှတ်တွေ မရတော့သလို အုပ်စိုးသူအဆင့်ကိုလည်း ထိုးဖောက်နိုင်စွမ်း မရှိတော့ဘူး”

သူ၏ ခန္ဓာကိုယ်အတွင်းမှ အခြေအနေကို ခံစားမိလျှင် ကျန်းချန်သည် မျက်မှောင်ကြုတ်သွားခဲ့သည်။

သူ့တွင် အဆ ၁၀၀ စနစ် ရှိ၍ သူ၏ အဆင့်ထိုးဖောက်မှုများသည် အမြဲတစေ အဟန့်အတား မရှိခဲ့ပေ။

ယခင်က ဆိုလျှင် နယ်ပယ်အဆင့် တစ်ဆင့်တွင် အထွတ်အထိပ် အဆင့်သို့‌ ရောက်ရှိသည်နှင့် မည်သည့် အတားအဆီးမှ မရှိဘဲ နောက်ထပ် အဆင့်တစ်ဆင့်သို့ တက်လှမ်းနိုင်ခဲ့သည်။

သို့သော်လည်း ယခုတစ်ကြိမ်တွင်မူ နတ်ဘုရင် နဝမအဆင့် အထွတ်အထိပ်ကို ရောက်ရှိပြီးသည့်တိုင် အဆ ၁၀၀ စနစ်သည် တိတ်ဆိတ်နေခဲ့၏။

ထို့ကြောင့် နတ်ဘုရင် အဆင့်ကနေ အုပ်စိုးသူအဆင့်ကို ထိုးဖောက်ရန်မှာ မလွယ်ကူသော ကိစ္စမှန်း သိသာနေခဲ့သည်။

အမြဲတစေ သူ့အတွက် အဆင်ပြေစေခဲ့သော အဆ ၁၀၀ စနစ်ပင်လျှင် ယခုတစ်ကြိမ်တွင် သူ့ကို အဆင့်တက်ပေးရန် ခက်ခဲနေပုံ ရ၏။

သို့သော်လည်း ကျန်းချန်သည် အနည်းငယ်မျှပင် စိတ်မပျက်ခဲ့ပေ။

အဆ ၁၀၀ စနစ် ရှိနေ၍သာ သူက နှစ်ပေါင်းတစ်ရာတွင် သူက နတ်ဘုရင်အဆင့် အထိ တိုးတက်လာခဲ့ခြင်း ဖြစ်သည်။

ယခုအခါတွင် သူသည် ပါရမီ သွေးမျိုးဆက်နှင့် မည်သည့်အရာတွင် မဆို နတ်ဘုရားနယ်မြေမှ ထိပ်တန်း ကျင့်ကြံသူများနှင့် တန်းတူ ယှဥ်ပြိုင်နိုင်နေပြီ ဖြစ်၏။

အဆ ၁၀၀ စနစ် မရှိလျှင်ပင် သူက အချိန် အနည်းငယ်ရသည်နှင့် သူက အုပ်စိုးသူအဆင့်ကို နားလည်သဘောပေါက်ပြီး အုပ်စိုးသူ အဆင့်သို့ အောင်မြင်စွာ တက်လှမ်းနိုင်မည်ဟု သူ့ကိုယ်သူ ယုံကြည်မှု ရှိနေခဲ့သည်။

ကျန်းချန်က ခေါင်းကို ခါရမ်းလိုက်ကာ ထိုအကြောင်းများကို ဆက်လက် မတွေးတော့ဘဲ ကြယ်တာရာစစ်သင်္ဘော အပြင်ဘက်ရှိ အဆုံးမဲ့ ကြယ်တာရာ ကောင်းကင်ယံကို ကြည့်လိုက်သည်။

“နှစ်နှစ်တောင် ကျော်သွားပြီ.. အင်မော်တယ်ကျင့်ကြံခြင်းစကြဝဠာကို ရောက်ဖို့ ဘယ်လောက်လိုသေးလဲ မသိဘူး”

အင်မော်တယ် ကျင့်ကြံခြင်းစကြဝဠာ ရောက်ရှိခဲ့သည့်အချိန်နှင့် တွက်ချက်ကြည့်လျှင် နတ်ဘုရားနယ်မြေနှင့် အင်မော်တယ် ကျင့်ကြံခြင်းလစကြဝဠာ၏ အကွာအဝေးသည် ကြယ်တာရာစစ်သင်္ဘောဖြင့် သွားမည်ဆိုလျှင် သုံးနှစ်ခန့်ကြာမြင့်မည် ဖြစ်သည်။

သူ နတ်ဘုရားနယ်မြေမှ ထွက်လာသည်မှာ နှစ်နှစ်ကျော်ပြီဖြစ်၍ အင်မော်တယ် ကျင့်ကြံခြင်းစကြဝဠာနှင့် သိပ်မဝေးတော့သည်မှာ သေချာသလောက်ပင်။

ထိုသို့တွေးမိလျှင် ကျန်းချန်သည် မတ်တတ် ထရပ်လိုက်ပြီး အခန်းအပြင်ဘက်သို့ ခြေလှမ်းကျဲကြီးများဖြင့် လျှောက်ထွက်လာခဲ့သည်။

အခန်း(၂၄၇၆)ပြီး၏။