အခန်း (၂၄၇၇-၂၄၇၈)

အခန်း(၂၄၇၇)

အခန်းထဲမှ ထွက်လာပြီးနောက်တွင် ကျန်းချန်သည် ကြယ်တာရာစစ်သင်္ဘော၏ ပဲ့ခန်းဆီသို့ တိုက်ရိုက်ပင် သွားရောက်ကာ ကြယ်စကြဝဠာမှ ခေါင်းဆောင်ဖြစ်သည့် လူလတ်ပိုင်းအရွယ် အမျိုးသားကို ရှာဖွေလိုက်သည်။

“ယီယွင်.. ငါတို့ အခု အင်မော်တယ်ကျင့်ကြံခြင်းစကြဝဠာနဲ့ ဘယ်လောက်ဝေးသေးလဲ”

ယီယွင်က ရိုသေလေးစားသော အမူအရာဖြင့် ပြန်ဖြေလိုက်သည်။

“သခင်ကြီးကျန်းချန်...ဘာအနှောင့်အယှက်မှ မရှိဘူးဆိုရင် အင်မော်တယ် ကျင့်ကြံခြင်း စကြဝဠာကို ရောက်ဖို့ သုံးလလောက်ပဲ လိုပါတော့တယ်”

ထိုစကားကိုကြားလျှင် ကျန်းချန်၏ မျက်ဝန်းများသည် တောက်ပသွားခဲ့ပြီး အင်မော်တယ် ကျင့်ကြံခြင်း စကြဝဠာနှင့် မဝေးတော့မှန်း သိလိုက်ရသည်။

သူက အနည်းငယ် စဥ်းစားပြီးမှ ပြောလိုက်သည်။

“မင်းတို့ ကြယ်စကြဝဠာနဲ့ကော ဘယ်လောက်ဝေးသေးလဲ.. မင်းတို့ဆီကို တိုက်ရိုက် သွားလို့ရောရလား”

ဤကြယ်တာရာစစ်သင်္ဘောသည် အင်မော်တယ် ကျင့်ကြံခြင်းစကြဝဠာ၏ စစ်တပ်ထံမှ ရရှိထားခြင်း ဖြစ်သည်။

သို့ဖြစ်ရာ ဤစစ်သင်္ဘောဖြင့်သာ အင်မော်တယ် ကျင့်ကြံခြင်း စကြဝဠာသို့ သွားရောက်ခဲ့မည်ဆိုလျှင် သူ၏ အထောက်အထားသည် ပေါ်ပေါက်သွားလိမ့်မည် မဟုတ်ပါလော။

ထို့ကြောင့် ကျန်းချန်သည် ကြယ်စကြဝဠာသို့ အရင်သွားရန် ရည်ရွယ်ခဲ့ခြင်းပင်။

အင်မော်တယ် ကျင့်ကြံခြင်းစကြဝဠာနှင့် ကြယ်စကြဝဠာတို့သည် အမြဲတစေ ရန်ဘက်များ ဖြစ်ခဲ့ကြသည်။

ကြယ်စကြဝဠာတွင် ကျင့်ကြံခြင်း ယဥ်ကျေးမှု မရှိသော်လည်း အလွန်တရာ အဆင့်မြင့်သည့် နည်းပညာယဥ်ကျေးမှု ရှိ၏။

ကြယ်စကြဝဠာသည် အင်အားကြီးမားသော အင်မော်တယ် ကျင့်ကြံခြင်း စကြဝဠာကိုပင် နည်းပညာဖြင့် ခုခံနေကြသူများ ဖြစ်ရာ ၎င်းတို့၏ ခွန်အားသည် သေချာ‌ပေါက် အားနည်းလိမ့်မည် မဟုတ်‌ပေ။

အကယ်၍ သူသာ ကြယ်စကြဝဠာနှင့် ပူးပေါင်းနိုင်မည်ဆိုလျှင် အင်မော်တယ် ကျင့်ကြံခြင်းစကြဝဠာကို ပြဿနာပေးရန် သေချာပေါက် ပိုမို လွယ်ကူသွားပေလိမ့်မည်။

“မရဘူး သခင်ကြီးကျန်းချန်.. ဘာလို့လဲဆိုတော့ ကြယ်စကြဝဠာကို သွားချင်ရင် အင်မော်တယ်ကျင့်ကြံခြင်းစကြဝဠာကနေ မဖြစ်မနေ ဖြတ်သွားရမှာမို့လို့ပဲ.. တကယ်လို့ အင်မော်တယ် ကျင့်ကြံခြင်း စကြဝဠာကို ပတ်ပြီးတော့သွားမယ် ဆိုရင် အချိန်အများကြီးကုန်မဲ့ အပြင် အင်မော်တယ်ကျင့်ကြံခြင်း စကြဝဠာကလည်း ရိပ်မိသွားနိုင်တယ်”

ယီယွင်က ခါးသီးစွာပြုံးရင်း ပြောလိုက်သည်။

ထိုစကားကိုကြားလျှင် ကျန်းချန်သည် မျက်မှောင် ခပ်တင်းတင်း ကြုတ်သွားခဲ့သည်။

ကြယ်စကြဝဠာသို့ အရင်သွားရောက်ပြီး ပူးပေါင်းဆောင်ရွက်မည့်အစီအစဥ်သည် ယာယီအားဖြင့် အချည်းအနှီးဖြစ်သွားပုံရသည်။

ယခုအခါတွင် သူက ခြေတစ်လှမ်းချင်းစီကို သတိထားရလိမ့်မည်ဖြစ်ပြီး အင်မော်တယ် ကျင့်ကြံခြင်း စကြဝဠာသို့ ရောက်ရှိသွားမှသာ ကျန်ကိစ္စများကို စဥ်းစားရပေတော့မည်။

“ဝုန်း..”

ကျန်းချန်က ယီယွင်ထံကနေ အင်မော်တယ်ကျင့်ကြံခြင်းစကြဝဠာ အကြောင်းကို ပိုမိုနားလည်ရန် မေးမြန်းနေစဥ်မှာပင် သူ့ရှေ့ရှိ ကြယ်တာရာကောင်းကင်ယံကနေ ကျယ်‌လောင်သောအသံတစ်သံ ထွက်ပေါ်လာခဲ့ပြီး ကျန်းချန်တို့ စီးလာသော ကြယ်တာရာ စစ်သင်္ဘောသည်ပင် တုန်ခါသွားခဲ့သည်။

“ဘာဖြစ်တာလဲ”

ကျန်းချန်က ရုတ်တရက် မှင်တက်သွားခဲ့သည်။

ကြယ်တာရာစစ်သင်္ဘောကို ထိန်းချုပ်နေသော ကြယ်စကြဝဠာမှ လူတစ်ဦးမှ ထိတ်လန့် တုန်လှုပ်စွာဖြင့် အော်ဟစ်လိုက်၏။

“သခင်ကြီးကျန်းချန် အခြေအနေမကောင်းတော့ဘူး.. ကျွန်တော်တို့တွေ ကြယ်တာရာဓားပြတွေနဲ့ ထိပ်တိုက်တိုးမိပြီထင်တယ်”

ကျန်းချန်က တစ်ခဏမျှ မှင်တက်သွားခဲ့သည်။

“ကြယ်တာရာဓားပြအဖွဲ့ ဟုတ်လား”

“ကြယ်တာရာဓားပြတွေ ဆိုတာက သူတို့ရဲ့ နာမည်အတိုင်းပဲ ကြယ်တာရာကောင်းကင်ယံထဲမှာ လုယက်သတ်ဖြတ်နေတဲ့ ဓားပြတွေပါ သခင်ကြီးကျန်းချန်”

ယီယွင်က လေးနက်သော အမူအရာဖြင့် ကျန်းချန်ကို အလျင်အမြန် ရှင်းပြလိုက်သည်။

အဆုံးမဲ့ကြယ်တာရာကောင်းကင်ယံ ထဲတွင် စကြဝဠာပေါင်းများစွာ ရှိ၏။

စကြဝဠာတိုင်းတွင် အကြောင်း အမျိုးမျိုးကြောင့် မိမိ၏ စကြဝဠာတွင် ရှင်သန်ရန်ခက်ခဲသော လူတချို့ ရှိသည်။

ထိုလူများသည် ကြယ်တာရာကောင်းကင်ယံ ထဲသို့ ထွက်ပြေးခဲ့ကြပြီး တချို့ကမူ တူညီသော ယဥ်ကျေးမှုရှိသည့် အခြားစကြဝဠာများသို့ သွားရောက်ကြ၏။

ကျန်ရှိသော သူများကမူ ကြယ်တာရာ ကောင်းကင်ယံထဲမှာပင် နေထိုင်ကြသည်။

ထိုလူများသည် ကြယ်တာရာ ကောင်းကင်ယံထဲတွင် အရင်းအမြစ်များကို လုယက်ခြင်းဖြင့် ရှင်သန်နေကြသောကြောင့် ၎င်းတို့ကို ကြယ်တာရာ ဓားပြများဟု ခေါ်ဆိုကြခြင်း ဖြစ်သည်။

ကြယ်တာရာ ကောင်းကင်ယံထဲသို့ ထွက်ပြေးခဲ့သူများသည် အနည်းဆုံး နတ်ဘုရင်အဆင့် သို့မဟုတ် ကပ်ဘေးအဆင့် ကျင့်ကြံသူများနှင့် နှိုင်းယှဥ်နိုင်သည့် အစွမ်းထက် ပုဂ္ဂိုလ်များ ဖြစ်ကြ၍ ကြယ်တာရာဓားပြများသည် အလွန်တရာပင် အစွမ်းထက်ကြသည်။

အထူးသဖြင့် ကြယ်တာရာ ဓားပြများသည် ကြယ်တာရာကောင်းကင်ယံတွင် စုစည်း၍ နေထိုင်ကြပြီး အင်အားစုများ ဖွဲ့စည်းထားတတ်ကြသည်။

စကြဝဠာများရှိ အချို့သော ထိပ်တန်း အင်အားစုများ ပင်လျှင် ကြယ်တာရာဓားပြများကို မယှဥ်နိုင်သည့် အခြေအနေမျိုး ရှိနေတတ်၏။

ယခုတစ်ကြိမ်တွင် သူတို့သည် ကံဆိုးစွာဖြင့် ကြယ်တာရာဓားပြများနှင့် ထိပ်တိုက် တိုးလိမ့်မည်ဟု ယီယွင်တို့ မထင်မှတ်ထားခဲ့ကြပေ။

ယီယွင်၏ ရှင်းပြချက်ကို နားထောင်ပြီးနောက်တွင် ကျန်းချန်သည် ကြယ်တာရာ ဓားပြများနှင့် ပတ်သက်၍ အကြမ်းဖျင်း နားလည်သွားခဲ့သည်။

ဤ ကြယ်တာရာဓားပြများ ဆိုသည်မှာ နတ်ဘုရားနယ်မြေ၏ ဟင်းလင်းပြင် ဓားပြများနှင့် အတူတူပင် ဖြစ်သည်။

တစ်ခုတည်းသော ကွာခြားချက်မှာ ကြယ်တာရာကောင်းကင်ယံရှိ ကြယ်တာရာဓားပြများ၏ ခွန်အားသည် ဟင်းလင်းပြင်ဓားပြများထက် များစွာ သာလွန်နေခြင်းပင်။

“အပြင်ထွက်ပြီး ကြည့်ကြရ‌အောင်”

ကျန်းချန်က တွေဝေမနေဘဲ ချက်ချင်းဆိုသလိုပင် ကြယ်တာရာ စစ်သင်္ဘော၏ ဦးပိုင်းဆီသို့ ဖျတ်ခနဲ ရောက်ရှိသွားခဲ့သည်။

ထိုအခါ မိုင်ပေါင်းထောင်ချီ အကွာအဝေးရှိ ကြယ်တာရာစစ်သင်္ဘောတစ်စီးသည် သူတို့ဆီသို့ ဦးတည်၍ မောင်းနှင်လာသည်ကို မြင်လိုက်ရ၏။

ထို ကြယ်တာရာစစ်သင်္ဘောသည် သွေးရောင်လွှမ်းနေပြီး အလျားမီတာတစ်ရာခန့် ရှိကာ ကျန်းချန်တို့ စစ်သင်္ဘောထက် များစွာ ‌‌သေးငယ်သော်လည်း အရှိန်ကမူ အဆပေါင်းများစွာ ပို၍ မြန်ဆန်နေခဲ့သည်၊။

တစ်ခဏအတွင်းမှာပင် ထိုကြယ်တာရာ စစ်သင်္ဘောသည် ကျန်းချန်တို့နှင့် ပေတစ်ထောင်ခန့် အကွာအဝေးသို့ ရောက်ရှိလာခဲ့၏။

“‌ရှေ့က စစ်သင်္ဘောကလူတွေ...သွေးဓားပြအဖွဲ့ ရောက်လာပြီ.. မင်းတို့ လိမ်လိမ်မာမာ လက်နက်မချဘူး ဆိုရင် နောင်တကြီးကြီး ရသွားလိမ့်မယ်”

ကျန်းချန်က သူ့ရှေ့မှ သွေးရောင်ကြယ်တာရာ စစ်သင်္ဘောကို ကြည့်နေစဥ်မှာပင် အထက်စီးဆန်သော အေးစက်စက် စကားသံတစ်သံသည် ကြယ်တာရာကောင်းကင်ယံတွင် တိုက်ရိုက်ပဲ့တင်ထပ်သွားခဲ့၏။

ထိုအသံနှင့်အတူ ကပ်ဘေး အထွတ်အထိပ်အဆင့်ကို ရောက်ရှိနေသည့် အစွမ်းထက် အရှိန်အဝါတစ်ခုသည် သွေးရောင်စစ်သင်္ဘောထံကနေ ပျံ့နှံ့လာခဲ့သည်။

ကြောက်မက်ဖွယ် အရှိန်အဝါကို ရင်ဆိုင်ရသော်လည်း ကျန်းချန်သည် အနည်းငယ်မျှပင် ထိခိုက်မှုမရှိဘဲ ကြယ်တာရာစစ်သင်္ဘော၏ ဦးပိုင်းတွင် ဝင့်ကြွားစွာ ရပ်နေခဲ့သည်။

ဆန့်ကျင်ဘက်အနေဖြင့် သူက သွေးရောင်စစ်သင်္ဘောကို ထူးဆန်းသော အကြည့်ဖြင့် ကြည့်လိုက်သည်။

အကြောင်းရင်းမှာ သွေးရောင်စစ်သင်္ဘော၏ အတွင်းဘက်ရှိ ကပ်ဘေး အထွတ်အထိပ်အဆင့် ကျင့်ကြံသူ၏ အရှိန်အဝါသည် သွေးနတ်ဆိုးဂိုဏ်းမှ လူများနှင့် အလွန်တရာ ဆင်တူနေသောကြောင့်ပင်။

သွေးနတ်ဆိုးဂိုဏ်းမှ ကပ်ဘေး အထွတ်အထိပ်အဆင့် ကျင့်ကြံသူ တစ်ဦးသည် ကြယ်တာရာဓားပြ တစ်ဦး မည်ကဲ့သို့ ဖြစ်လာရပါသနည်း။

“သခင်ကြီးကျန်းချန်.. ကျွန်တော် ဒီသွေးဓားပြအဖွဲ့နဲ့ ပတ်သက်ပြီး နည်းနည်းပါးပါး ကြားဖူးတယ်...သူတို့ရဲ့ ခေါင်းဆောင် ရွှယ်ချန်ကျဲက အင်မော်တယ်ကျင့်ကြံခြင်းစကြဝဠာက သွေးနတ်ဆိုးဂိုဏ်းရဲ့ သစ္စာဖောက် တစ်ယောက်ပဲ.. သူက သွေးနတ်ဆိုးဂိုဏ်းရဲ့လက်ကနေ လွတ်မြောက်အောင် ကြယ်တာရာကောင်းကင်ယံထဲကို ထွက်ပြေးလာခဲ့ပြီး ကြယ်တာရာဓားပြ ဖြစ်လာခဲ့တာပဲ.. ကျွန်တော် သိသလောက်တော့ ရွှယ်ချန်ကျဲက အင်‌မော်တယ်ကျင့်ကြံခြင်း စကြဝဠာမှာရှိစဥ်က နာမည်ကျော်ကြားတဲ့ ကပ်ဘေးအဆင့် ပါရမီရှင် တစ်ယောက်ဖြစ်ခဲ့တယ်.. သူ့ရဲ့ခွန်အားကလည်း အရမ်းကို ကြောက်စရာ ကောင်းတယ်”

ထိုအချိန်တွင် ကျန်းချန်၏ အနောက်ဘက်တွင် ရပ်နေသော ယီယွင်က အလျင်အမြန်ပင် ရှင်းပြလိုက်သည်။

“ဒီလူက သွေးနတ်ဆိုးဂိုဏ်းက လူတစ်ယောက် ဖြစ်နေတာကိုး”

တစ်ဖက်မှ သွေးရောင်စစ်သင်္ဘောကို ကြည့်ရင်း ကျန်းချန် ခပ်ယဲ့ယဲ့ ပြုံးမိလိုက်သည်။

ကြည့်ရသည်မှာ သူနှင့် အင်မော်တယ် ကျင့်ကြံခြင်း စကြဝဠာမှ သွေးနတ်ဆိုးဂိုဏ်းသည် အတော်လေး ရေစက်ပါပုံရ၏။

တစ်ချိန်တည်းမှာပင် သွေးရောင်စစ်သင်္ဘော အတွင်းရှိ သွေးရောင်ဆံပင်နှင့် ပိန်ပါးပါး အမျိုးသားတစ်ဦး၏အကြည့်သည် ကြယ်တာရာကောင်းကင်ယံကို ဖောက်ထွင်းသွားခဲ့ပြီး ကြယ်တာရာ စစ်သင်္ဘော၏ ဦးပိုင်းတွင် ဝင့်ကြွားစွာ ရပ်နေသော ကျန်းချန် ဆီသို့ တိုက်ရိုက်ပင် ကျရောက်သွားခဲ့သည်။

သူ၏ မျက်ဝန်းထဲတွင် အံ့အားသင့်သော အရိပ်အယောင်များ ဖြစ်ပေါ်လာခဲ့၏။

ဤပိန်ပါးပါး အမျိုးသားသည် သွေးဓားပြအဖွဲ့၏ ခေါင်းဆောင် ဖြစ်သည့် ရွှယ်ချန်ကျဲပင် ဖြစ်သည်။

“ခေါင်းဆောင် ဘာဖြစ်လို့လဲ”

ရွှယ်ချန်ကျဲ၏ နံဘေးရှိ ကပ်ဘေး အစောပိုင်းအဆင့် ကျင့်ကြံသူက မေးလိုက်သည်။

ရွှယ်ချန်ကျဲက သူ၏ မျက်လုံးများကို အနည်းငယ် မှေးကျဥ်းလိုက်ပြီး လေးနက်စွာ ပြောလိုက်၏။

“ဒီကြယ်တာရာစစ်သင်္ဘောက သာမန်တော့ ဟုတ်ပုံမရဘူး”

သွေးနတ်ဆိုးဂိုဏ်း၏ အထွတ်အထိပ် ဂိုဏ်းသားတစ်ဦး ဖြစ်ခဲ့ဖူးသည့် အလျောက် ရွှယ်ချန်ကျဲ၏ ပါရမီနှင့် ခွန်အားသည် အလွန်တရာပင် ကြီးမားလှ၏။

ဤနှစ်များအတွင်း သူက ကြယ်တာရာ ကောင်းကင်ယံတွင် သွားလာနေသော စစ်သင်္ဘောများကို လုယက်၍ အရင်းအမြစ်များ လုယူကာ အားသွန်ခွန်စိုက် ကျင့်ကြံခဲ့သည်။

ယခုအခါတွင် သူ၏ ခွန်အားသည် ကပ်ဘေး အထွတ်အထိပ် အဆင့်သို့ ရောက်ရှိနေပြီး မဟာယာနအဆင့်ကို ရောက်ရှိရန် ခြေတစ်လှမ်းမျှသာ လိုအပ်တော့၏။

သို့သော်လည်း တစ်ဖက်ရှိ ကြယ်တာရာ စစ်သင်္ဘောပေါ်မှ လျှို့ဝှက်ဆန်းကြယ်သော အနက်ရောင်ဝတ်စုံဝတ် လူငယ်သည် သူ၏ အရှိန်အဝါဖိအားကို အလွယ်တကူ ဟန့်တားနိုင်သည် ဖြစ်ရာ သေချာပေါက် သာမန်လူတစ်ဦး မဟုတ်သည်မှာ ထင်ရှားနေခဲ့သည် မဟုတ်ပါလော။

အခန်း(၂၄၇၇)ပြီး၏။

အခန်း(၂၄၇၈)

“ခေါင်းဆောင်ကလည်း ကြယ်တာရာစစ်သင်္ဘောကို ကြယ်တာရာကောင်းကင်ယံမှာ မောင်းနှင်နိုင်မှတော့ သာမန်လူတော့ ဘယ်ဟုတ်ပါ့မလဲ”

ကပ်ဘေးနှောင်းပိုင်းအဆင့် ကျင့်ကြံသူတစ်ဦးက ရွှယ်ချန်ကျဲကို ပြောလိုက်သည်။

သူ၏ မျက်ဝန်းထဲတွင် အေးစက်စက် အလင်းတန်းတစ်ခု ဖျတ်ခနဲ လက်သွားခဲ့သည်။

“ပြီးခဲ့တဲ့တစ်ခေါက်က သွေးနတ်ဆိုးဂိုဏ်းက အမဲလိုက်တာကို ခံရပြီးကတည်းက ကြယ်တာရာကောင်းကင်ယံမှာ အချိန်အတော်ကြာ ပုန်းနေခဲ့ရတယ်.. ကျွန်တော်တို့တွေ ဓားပြမတိုက်တာတောင် အတော်ကြာသွားခဲ့ပြီ.. ဒီတစ်ကြိမ်တော့ ရှေ့က စစ်သင်္ဘောကနေ အရင်းအမြစ်တွေ ကျွန်တော်တို့ လုယူကြတာပေါ့”

ရွှယ်ချန်ကျဲ၏ မျက်ဝန်းများတွင် စိတ်လှုပ်ရှားသော အရိပ်အယောင်များ ဖြစ်ပေါ်လာခဲ့သည်။

သူတို့ သွေးဓားပြ အဖွဲ့တွင် စုစုပေါင်း လူတစ်ဆယ့်တစ်ယောက်ရှိ၏။

ထိုတစ်ဆယ့်တစ်ယောက်အနက် ကပ်ဘေးနှောင်းပိုင်းအဆင့်နှစ်ဦး၊ ကပ်ဘေး အလယ်အလတ်အဆင့် သုံးဦးနှင့် ကပ်ဘေး အစောပိုင်းအဆင့် ငါးဦးတို့ ပါဝင်ကြသည်။

ကပ်ဘေး အထွတ်အထိပ်အဆင့် ကျင့်ကြံသူ ဖြစ်သည့် သူနှင့် ပေါင်းစပ်လိုက်လျှင် ခြေလှမ်းတစ်ဝက် မဟာယာနအဆင့် ကျင့်ကြံသူ အချို့နှင့် ရင်ဆိုင်ရလျှင်ပင် ပြန်လည်ရင်ဆိုင်နိုင်စွမ်း ရှိနေခဲ့သည်။

ဆိုရလျှင် မဟာယာနအဆင့် ကျင့်ကြံသူနှင့် မတွေ့သရွေ့ သာမန် ကျင့်ကြံသူများသည် သူတို့ကို ခြိမ်းခြောက်နိုင်လိမ့်မည် မဟုတ်ပေ။

ယခုအခါတွင် သူ၏ ကျင့်ကြံခြင်းအဆင့်သည် ကပ်ဘေး အထွတ်အထိပ်အဆင့်သို့ ရောက်ရှိနေပြီး မဟာယာနအဆင့်ကို ရောက်ရှိရန် ခြေတစ်လှမ်းမျှသာ လိုအပ်တော့၏။

အကယ်၍ မဟာယာနအဆင့်သို့ ထိုးဖောက်လိုလျှင် ကျင့်ကြံခြင်း အရင်းအမြစ် အများအပြားကို မဖြစ်မနေ လိုအပ်ပေလိမ့်မည်။

ဤကြယ်တာရာ ကောင်းကင်ယံတွင် အရင်းအမြစ်များ ရရှိရန် သူတို့အတွက် တစ်ခုတည်းသော နည်းလမ်းမှာ ဓားပြတိုက်ခြင်းပင် ဖြစ်၏။

ထို့ကြောင့် သူ့ရှေ့မှ ကြယ်တာရာ စစ်သင်္ဘောက အနည်းငယ်လျှို့ဝှက်ဆန်းကြယ်နေသော်လည်း ရွှယ်ချန်ကျဲသည် အလွယ်တကူ လက်လျှော့ရန် တွေးမထားခဲ့ပေ။

မည်သို့ပင် ဖြစ်စေကာမူ သူက အရင်းအမြစ်များကို လုယက်ပြီး မဟာယာန အဆင့်သို့ အမြန်ဆုံး ထိုးဖောက်နိုင်ရန် ကြိုးစားရပေမည်။

မဟာယာနအဆင့်ကို ထိုးဖောက်နိုင်မှသာလျှင် သူ့အနေဖြင့် သွေးနတ်ဆိုးဂိုဏ်းကို ကြောက်နေစရာ မလိုတော့ဘဲ ကြယ်တာရာကောင်းကင်ယံကို ကြွက်တစ်ကောင်လို ပုန်းအောင်းနေစရာ မလိုတော့မည် ဖြစ်၏။

ထိုအချိန်သို့ရောက်လျှင် သူ ဆုံးရှုံးခဲ့သမျှ အရာများကို ရယူရန် အင်မော်တယ် ကျင့်ကြံခြင်း စကြဝဠာရှိ သွေးနတ်ဆိုးဂိုဏ်းသို့ ပြန်သွားရန်မှာ မဖြစ်နိုင်သည်တော့ မဟုတ်ပေ။

ဤသို့ဖြင့် ရွှယ်ချန်ကျဲသည် ကပ်ဘေး အစောပိုင်းအဆင့် ကျင့်ကြံသူ တစ်ဦးကို ကြယ်တာရာ စစ်သင်္ဘောတွင် အစောင့်အဖြစ် ထားရစ်ခဲ့ပြီး ကျန်ကိုးဦးကို ဦးဆောင်ကာ ကျန်းချန်တို့ သင်္ဘောနားသို့ ရောက်လာခဲ့သည်။

“ကောင်လေး လိမ်လိမ်မာမာ လက်နက်ချလိုက်စမ်း.. ပြီးရင် အဲဒီ ကြယ်တာရာစစ်သင်္ဘောကို ငါ့ဆီ လွှဲပေးလိုက်.. ဒီလိုဆိုရင်တော့ မင်းရဲ့အသက်ကို ချမ်းသာပေးဖို့ ငါစဥ်းစားပေးမယ်”

ကျန်းချန်တို့ ကြယ်တာရာစစ်သင်္ဘော အနားသို့ ရောက်ရှိလာပြီးနောက်တွင် ရွှယ်ချန်ကျဲ၏ အေးစက်စက် စကားသံသည် ကြယ်တာရာကောင်းကင်ယံ ထက်တွင် ပဲ့တင်ထပ်သွားခဲ့သည်။

ကျန်းချန်က လက်နှစ်ဖက်ကို နောက်ပစ်ကာ ဟန်ပါပါရပ်နေရင်း ရွှယ်ချန်ကျဲကို အေးစက်စက် ကြည့်လိုက်၏။

“ရွှယ်ချန်ကျဲ.. မင်းလို သွေးနတ်ဆိုးဂိုဏ်းရဲ့ သစ္စာဖောက် တစ်ယောက်က ငါ့ရဲ့ ကြယ်တာရာစစ်သင်္ဘောကို လုယက်ဖို့ အရည်အချင်း မပြည့်မီသေးဘူး”

“မင်း.. မင်းက အင်မော်တယ် ကျင့်ကြံခြင်း စကြဝဠာက လူလား”

ရွှယ်ချန်ကျဲက ရုတ်တရက် မျက်မှောင်ကြုတ်သွားခဲ့ပြီး ပြင်းထန်သော လူသတ်ငွေ့များသည် သူ၏ ခန္ဓာကိုယ်ကနေ တစ်ခဏအတွင်း ပျံ့နှံ့လာခဲ့သည်။

ထိုကောင်လေးသည် သူ၏ အထောက်အထားကို တစ်ချက်ကြည့်ရုံဖြင့် သိနေပုံထောက်လျှင် ထိုကောင်လေးသည်လည်း အင်မော်တယ် ကျင့်ကြံခြင်းစကြဝဠာမှ လူဖြစ်ရန် အလွန်များသည်။

အကယ်၍ ထိုကောင်လေးသာ အင်မော်တယ် ကျင့်ကြံခြင်းစကြဝဠာမှ အမှန်တကယ် ဖြစ်နေလျှင် သူ့အနေဖြင့် အသက်ရှင်လျက် ထွက်သွားခွင့် ပေး၍ မဖြစ်နိုင်ပေ။

သို့မဟုတ်လျှင် ထို‌ကောင်လေးသာ အင်မော်တယ်ကျင့်ကြံခြင်း စကြဝဠာသို့ ပြန်လည် ရောက်ရှိသွားပြီး သူတို့ရှိနေသည့် နေရာကို သွေးနတ်ဆိုးဂိုဏ်းဆီ ဖောက်သည် ချလိုက်လျှင် သူ့အနေဖြင့် ကြယ်တာရာကောင်းကင်ယံတွင် ထပ်မံ ထွက်ပြေး၍ ပုန်းအောင်းနေရဦးမည် မဟုတ်ပါလော။

“မလောက်လေး မလောက်စားလေးကများ.. ငါတို့ သွေးဓားပြအဖွဲ့ရှေ့မှာ ဟန်ရေးလာပြနေတယ်.. သေဖို့သာ ပြင်ထားလိုက်တော့”

ကပ်ဘေးအစောပိုင်းအဆင့် ကျင့်ကြံသူတစ်ဦးက ဒေါသတကြီး အော်ဟစ်လိုက်ပြီး ရွှယ်ချန်ကျဲ၏ အနောက်ကနေ ရှေ့သို့လှမ်းထွက်လာခဲ့သည်။

သူက ကျန်းချန်ကို သတ်ဖြတ်ရန်အတွက် လျင်မြန်စွာ ပြေးဝင်လာခဲ့၏။

ကျန်းချန်က ခံစားချက်ကင်းမဲ့သော အမူအရာဖြင့်ပင် လက်တစ်ဖက်ကို အသာအယာ မြှောက်လိုက်ပြီး လက်ညှိုးဖြင့် ချိန်ရွယ်လိုက်သည်။

“သတိထား”

ရွှယ်ချန်ကျဲ၏ မျက်နှာအမူအရာ ပြောင်းလဲသွားခဲ့ပြီး အလျင်အမြန်ပင် သတိပေးလိုက်သည်။

သို့သော်လည်း အရာအားလုံးက နောက်ကျသွားခဲ့ချေပြီ။

ကျန်းချန်က သူ၏ လက်ညှိုးဖြင့် ချိန်ရွယ်လိုက်သည်နှင့် တစ်ပြိုင်နက် ကပ်ဘေးအစောပိုင်းအဆင့် ကျင့်ကြံသူ၏ ခန္ဓာကိုယ်သည် ကြယ်တာရာကောင်းကင်ယံတွင် ရုတ်တရက် ရပ်တန့်သွားခဲ့ပြီး ဝုန်းခနဲမြည်သံနှင့် အတူ ပေါက်ကွဲသွားခဲ့ကာ သွေးမြူများ အဖြစ်သို့ ပြောင်းလဲသွားခဲ့သည်။

သူတို့ရှေ့မှ ရုတ်တရက် ဖြစ်ပျက်သွားသော မြင်ကွင်းကို မြင်လျှင် ရွှယ်ချန်ကျဲနှင့် အခြားသူများသည် မှင်တက်ရာကနေ ပြန်လည် သတိဝင်လာရန် အချိန်အတော်ကြာ ယူလိုက်ရ၏။

သူတို့ရှေ့မှ လူသည် ကပ်ဘေးအဆင့် ကျင့်ကြံသူကို လက်ညှိုးတစ်ချောင်းတည်းဖြင့်ပင် အသာအယာ သတ်ဖြတ်လိုက်သည် မဟုတ်ပါလား။

ဆိုရလျှင် သူ့ရှေ့မှ ကောင်လေးသည် အင်မော်တယ် ကျင့်ကြံခြင်း စကြဝဠာ၏ အထွတ်အထိပ်ဂိုဏ်းကြီးများမှ ပါရမီရှင်တပည့် တစ်ဦး ဖြစ်နိုင်လောက်၏။

“ငါ အင်မော်တယ် ကျင့်ကြံခြင်း စကြဝဠာကို မပြန်ဖြစ်တာ အတော်ကြာပြီဆိုတော့ အင်မော်တယ် ကျင့်ကြံခြင်း စကြဝဠာမှာ မင်းလို ပြိုင်ဘက်ကင်းပါရမီရှင် တစ်ယောက် ပေါ်ထွက်လာလိမ့်မယ်လို့ မထင်ထားခဲ့ဘူး.. မင်းက ဘယ်ဂိုဏ်းက ပါရမီရှင်လဲ”

ရွှယ်ချန်ကျဲက သတိပြန်ဝင်လာပြီးနောက်တွင် ကျန်းချန်ကို စိုက်ကြည့်ကာ မေးခွန်းထုတ်လိုက်သည်။

“ငါက အင်မော်တယ် ကျင့်ကြံခြင်း စကြဝဠာကလူ မဟုတ်ဘူး”

ကျန်းချန်က ခေါင်းခါရမ်းလိုက်ပြီး အေးစက်စက် ပြောလိုက်သည်။

“မင်းကို ငါ အခွင့်အ‌ရေးတစ်ခုပေးမယ်.. ငါ့ဆီမှာ အညံ့ခံလိုက်ပါ.. ဒါဆို မင်းအသက်ကို ချမ်းသာပေးမယ်”

ရွှယ်ချန်ကျဲသည် အင်မော်တယ် ကျင့်ကြံခြင်း စကြဝဠာ၏ အထွတ်အထိပ်ဂိုဏ်းကြီး ဆယ်ဂိုဏ်းထဲက သွေးနတ်ဆိုးဂိုဏ်း၏ ပါရမီရှင်တစ်ယောက် ဖြစ်သည်။

ထို့ကြောင့် အင်မော်တယ် ကျင့်ကြံခြင်း စကြဝဠာ၏ အခြေအနေကို အလွန်ကောင်းမွန်စွာ နားလည်ထားမည်မှာ ထင်ရှားနေခဲ့၏။

အကယ်၍ ရွှယ်ချန်ကျဲကိုသာ သူ၏ လက်အောက်တွင် ခေါ်ထားနိုင်ခဲ့လျှင် အင်မော်တယ် ကျင့်ကြံခြင်း စကြဝဠာထဲသို့ ရောနှောဝင်ရောက်ရန် အတွက် ကြီးမားသော အထောက်အကူဖြစ်လာပေလိမ့်မည် မဟုတ်ပါလော။

ထို့အပြင် ရွှယ်ချန်ကျဲသည် သွေးနတ်ဆိုးဂိုဏ်း၏ သစ္စာဖောက်တစ်ဦး ဖြစ်ရာ ရွှယ်ချန်ကျဲနှင့် သွေးနတ်ဆိုးဂိုဏ်းတို့ကြားတွင် မပြေလည်နိုင်သော ရန်ငြိုးများ ရှိနေမည်မှာ သေချာသလောက်ပင်။

ထို့ကြောင့် သူ့အနေဖြင့် သွေးနတ်ဆိုးဂိုဏ်းကို ထိန်းချုပ်ရန်အတွက် ရွှယ်ချန်ကျဲကို အသုံးချနိုင်၏။

ပြီးခဲ့သည့် တစ်ခေါက်က နတ်ဘုရားနယ်မြေသို့ စစ်ချီလာသော စစ်တပ်ကို သွေးနတ်ဆိုးဂိုဏ်းက ဦးဆောင်လာပုံရသည်။

အကယ်၍ သွေးနတ်ဆိုးဂိုဏ်းကိုသာ ထိန်းထားနိုင်မည် ဆိုလျှင် အင်မော်တယ် ကျင့်ကြံခြင်း စကြဝဠာ၏ နတ်ဘုရားနယ်မြေအပေါ် တိုက်ခိုက်လာမှုကို ဟန့်တားနိုင်ပေလိမ့်မည်ဖြစ်၏။

“ဟမ့်.. မင်းလို မလောက်လေးမလောက်စားကောင်ကများ.. ငါ့ကို အညံ့ခံခိုင်းချင်နေသေးတယ်.. အိပ်မက်သာ မက်နေလိုက်”

ရွှယ်ချန်ကျဲက ဒေါသတကြီး ကြုံးဝါးလိုက်ပြီး ကျန်းချန်ကို သတ်ဖြတ်ရန် အတွက် ပျံသန်းလာခဲ့သည်။

“သွေးသတ်ဖြတ်ခြင်း လက်ဝါးသိုင်း”

ရွှယ်ချန်ကျဲ၏ သွေးရောင်ဆံပင်များက လေထဲတွင် လွင့်ပျံနေခဲ့သည်။

သူက ကပ်‌ဘေး အထွတ်အထိပ်အဆင့်၏ ကြောက်မက်ဖွယ်စွမ်းအားများကို ထုတ်ဖော်လိုက်ရာ ထိုစွမ်းအားများသည် ဧရာမ လက်ဝါးကြီးတစ်ခု အဖြစ်သို့ ပြောင်းလဲသွားခဲ့ပြီး ကျန်းချန် တို့ကို လွှမ်းခြုံသွားခဲ့သည်။

ထိုခဏဝယ် ကောင်းကင်ယံ တစ်ခုလုံးတွင် သွေးရောင်အလင်းများဖြင့် ပြည့်နှက်သွားခဲ့ပြီး သွေးအရှိန်အဝါများဖြင့် ဖုံးလွှမ်းသွားခဲ့သည်။

ကြောက်မက်ဖွယ်ရာကောင်းသော သွေးအလင်းများ၏ အောက်တွင် ကျန်းချန်နှင့် ၎င်း၏ကြယ်တာရာစစ်သင်္ဘောသည် လွှမ်းခြုံခံလိုက်ရ၏။

“ကောင်းကင်ဖွင့်လှစ်စည်းတံဆိပ်”

ကျန်းချန်က တည်ငြိမ်သော အမူအရာဖြင့် လက်ဟန်များကို လျင်မြန်စွာ ပြုလုပ်လိုက်ရာ ရွှေရောင်တောက်ပသော ကောင်းကင်ဖွင့်လှစ် စည်းတံဆိပ်သည် လေထုထဲတွင် ထွက်ပေါ်လာခဲ့သည်။

ရွှေရောင်စည်းတံဆိပ်က ကြယ်တာရာ ကောင်းကင်ယံတွင် လျင်မြန်စွာ ကြီးထွားလာခဲ့ပြီး အဆုံးသတ်တွင် ရွှေရောင်နတ်တောင်ကြီး တစ်တောင် အလား ဖြစ်သွားခဲ့သည်။

ထိုရွှေရောင်နတ်တောင်ကြီးသည် ကျန်းချန် တို့ကို လွှမ်းခြုံထားသော သွေးရောင်အလင်းများကို ထိပ်တိုက် ရင်ဆိုင်လိုက်၏။

“ဝုန်း..”

အလွန်တရာ အစွမ်းထက်သော စွမ်းအားနှစ်ခုသည် ကြယ်တာရာကောင်းကင်ယံတွင် ထိပ်တိုက် ဆုံတွေ့သွားခဲ့သည်။

ကျန်းချန်က ကြယ်တာရာစစ်သင်္ဘော ပေါ်တွင် လက်နှစ်ဖက်ကိုနောက်ပစ်ကာ ဝင့်ကြွားစွာ ရပ်နေဆဲ ဖြစ်သော်လည်း တစ်ဖက်မှ ရွှယ်ချန်ကျဲကမူ ခန္ဓာကိုယ် တစ်ခုလုံး တုန်ယင်သွားခဲ့ပြီး ကြယ်တာရာကောင်းကင်ယံတွင် ခြေလှမ်းပေါင်း ရာချီ နောက်သို့ ဆုတ်သွားခဲ့ရသည်။

ဆန့်ကျင်ဘက်ရှိ ကျန်းချန်ကိုကြည့်ကာ ရွှယ်ချန်ကျဲ၏ မျက်နှာထက်တွင် ထိတ်လန့်သော အမူအရာများ ဖုံးဖိမရစွာ ဖြစ်ပေါ်လာခဲ့၏။

“မင်း မင်းဘယ်သူလဲ”

တိုက်ကွက် တစ်ကွက်တည်းဖြင့်ပင် ကပ်ဘေးအထွတ်အထိပ်အဆင့်ကို ရောက်ရှိနေသည့် သူ့ကို ဤမျှ အထိ ဖိအားပေးနိုင်သည်မှာ အနည်းဆုံး မဟာယာနတစ်ပိုင်းအဆင့် ကျင့်ကြံသူ သာလျှင် လုပ်ဆောင်နိုင်လိမ့်မည် ဖြစ်သည်။

သူ့ရှေ့မှ အလွန် ငယ်ရွယ်ပုံရသော အနက်ရောင်ဝတ်စုံဝတ်လူငယ်သည် မဟာယာနတစ်ပိုင်းအဆင့် ကျင့်ကြံသူနှင့် ညီမျှသော တိုက်ခိုက်ရေးစွမ်းရည်ကို ပိုင်ဆိုင်ထားပါသလော။

“ဒါ ဒါ ဘယ်လိုလုပ်ဖြစ်နိုင်မှာလဲ”

အင်မော်တယ် ကျင့်ကြံခြင်း စကြဝဠာတစ်ခုလုံးကို ကြည့်လျှင်ပင် မဟာယာနတစ်ပိုင်း အဆင့်ကို ရောက်ရှိနေသည့် လူငယ်ပါရမီရှင် ဆိုသည်မှာ လက်ချိုးရေတွက်၍ပင် ရသည်။

ကျန်းချန်က ရွှယ်ချန်ကျဲ၏ မေးခွန်းကို ပြန်မဖြေဘဲ စူးရှစွာ စိုက်ကြည့်လိုက်သည်။

သူ၏ အေးစက်စက် စကားသံသည် ကြယ်တာရာကောင်းကင်ယံထက်တွင် ပဲ့တင်ထပ်သွားခဲ့၏။

“နောက်ဆုံးအနေနဲ့ မင်းကို အခွင့်အရေးတစ်ခု ထပ်ပေးမယ် အညံ့ခံမလား ဒါမှမဟုတ် အသေခံမလား”

သူ့‌ရှေ့မှ ရွှယ်ချန်ကျဲ၏ ခွန်အားသည် လုံးဝအားမနည်းသော်လည်း လွန်ခဲ့‌သော နှစ်အနည်းငယ်က သူရင်ဆိုင်ခဲ့ရသည့် မဟာယာနတစ်ပိုင်းအဆင့် ကျင့်ကြံသူနှင့် ယှဥ်လျှင်မူ အားနည်းနေခဲ့သည်။

ထိုစဥ်က နတ်ဘုရင် အစောပိုင်းအဆင့်တွင်သာ ရှိသေး၍ မဟာယာနတစ်ပိုင်းအဆင့် ကျင့်ကြံသူကို မနည်းပင် ရင်ဆိုင်တိုက်ခိုက်ခဲ့ရသည်။

ယခုအခါတွင် သူ၏ ကျင့်ကြံခြင်းအဆင့်သည် နတ်ဘုရင်နဝမအဆင့် အထွတ်အထိပ်ကို ရောက်ရှိနေပြီဖြစ်ရာ သူ၏ခွန်အားသည်လွန်ခဲ့‌သော နှစ်အနည်းငယ်ကထက် များစွာ သာလွန်နေခဲ့ပြီ ဖြစ်သည်။

သို့ဖြစ်ရာ ရွှယ်ချန်ကျဲသည် သူ၏ ပြိုင်ဘက် မည်ကဲ့သို့ ဖြစ်နိုင်ပါမည်နည်း။

“ကောင်လေး.. မင်းက အရမ်းအစွမ်းထက်တယ် ဆိုပြီး သိပ်အနိုင်မကျင့်စမ်းပါနဲ့”

ရွှယ်ချန်ကျဲက သုန်မှုန်သော အမူအရာဖြင့် ပြောလိုက်သည်။

“ဒီကိစ္စကို ဒီမှာပဲ အဆုံးသတ်လိုက်ရအောင် ဘယ်လိုသဘောရလဲ.. ငါတို့ သွေးဓားပြအဖွဲ့က မင်းအနိုင်ကျင့်ချင်တိုင်း ကျင့်လို့ရတဲ့ အဖွဲ့ မဟုတ်ဘူး.. မင်းသာ င့ါကို အတင်းအကျပ် ဖိအားပေးနေမယ်ဆိုရင် အဲဒီအတွက် မင်းကိုယ်တိုင် ကြီးမားတဲ့ အဖိုးအခတစ်ခုကို ပေးဆပ်ရလိမ့်မယ်လို့ ငါကတိပေးတယ်”

အခန်း(၂၄၇၈)ပြီး၏။