အခန်း (၈၃၈-၈၃၉)

Chapter 838

Restart 1

လင်းရှန်က သူ၏ Black Hwak တိုက်ပွဲဝင်ဝတ်စုံကို ဝတ်ဆင်လိုက်သည်။ အဖွဲ့သားအားလုံး လက်နက်အပြည့်အစုံ တပ်ဆင်ကာ မြေအောက်ကွန်ရက်သို့ ဆင်းရန် ပြင်ဆင်ကြသည်။ ဓာတ်လှေကားနှင့် အမြန်ဆင်းသွားစဉ် လင်းရှန်က ပြတင်းပေါက်မှ အပြင်သို့ လှမ်းကြည့်လိုက်မိသည်။ မိုးရွာနေသော ညဉ့်နက်ပိုင်းတွင် အာရုဏ်ဦးမြို့တော်၏ အမှတ် ၁ မြို့ရိုးမှာ မီးပင်လယ်ဝေနေသကဲ့သို့ ရှိနေ၏။ လေထုထဲတွင် မီးခိုးနံ့နှင့် သွေးညှီနံ့များက ထူထပ်စွာ ပျံ့နှံ့နေသည်။

သန္ဓေပြောင်းမွန်းစတားများ၏ တိုက်ခိုက်မှုမှာ တစ်ညလုံး အဆက်မပြတ် ဖြစ်ပွားနေခဲ့သည်။ မြို့ရိုးအောက်ရှိ မြို့ပြင်ရပ်ကွက်မှာ ပျက်စီးယိုယွင်းနေပြီး သန္ဓေပြောင်းမွန်းစတားများ၏ အလောင်းများမှာ တောင်ပုံရာပုံဖြစ်နေသည်။ မီးလောင်ဗုံးများမှာ အပျက်အစီးများနှင့် အလောင်းများပေါ်တွင် တစ်ညလုံး လောင်ကျွမ်းနေပြီး ပျက်စီးနေသော စက်ရုပ်များနှင့် စွမ်းအားဝတ်စုံအတွင်း သေဆုံးနေသည့် စစ်သားများလည်း အမြောက်အမြား ရှိနေသည်။ အသက်ရှင်ကျန်ရစ်သူအချို့မှာ ထိုနေရာများတွင် ပြန့်ကျဲနေကြလေ၏။ ယခုအချိန်တွင် မြို့တံခါးအားလုံးကို ပိတ်ထားပြီး မြို့ရိုးပေါ်နှင့် မြို့ရိုးအတွင်းရှိ လက်နက်အားလုံးကို အပြင်ဘက်သို့သာ ဦးတည်ကာ ပစ်ခတ်နေကြသည်။

တစ်ညလုံး အနားယူချိန်မရှိပဲ တိုက်ပွဲဝင်နေကြခြင်းပင်။

ထိုပျက်စီးခြင်း မြင်ကွင်းကို ကြည့်ရင်း လင်းရှန်၏ အကြည့်များ တုန်လှုပ်သွားသည်။ ဤအခြေအနေတွင် ယန်ကျန်းလွင်ပြင်မှ အခြားလွတ်မြောက်လာသူများသည် အာရုဏ်ဦးမြို့တော်သို့ ရောက်နိုင်ပါဦးမလားဟု သူ တွေးနေမိသည်။ ထို့ပြင် ကျင်းဟိုင်တွင်ရှိသော နန်ကျင်းနှင့် ချီလီတို့ရော ဘေးကင်းစွာ ပြန်ရောက်ကြပြီလား သူ မသိရသေးပေ။

အခြား ရွေးချယ်စရာ မရှိတော့ပေ။ ရှေ့တန်းစီမံကိန်း မစတင်မီ အနီရောင်ကမ္ဘာနှင့် S-Class မွန်းစတားကြားက ဆက်သွယ်ချက်များကို ရှာဖွေရမည်။ သတင်းအချက်အလက် ညီမျှမှသာ လူသားများဘက်မှ ကျန်ရှိသောအချိန်တွင် အခွင့်အရေးရနိုင်မည်ဖြစ်သည်။ တစ်ဖက်တွင်လည်း ရှေ့တန်းစီမံကိန်း စတင်ပြီးနောက် ဂလက်ဆီနှလုံးသားကို သူက ထိန်းချုပ်နိုင်ရန် လိုအပ်သည်။

ချူကျောက်နန်က သူ့အတွက် ၁၀ စက္ကန့်သာ အချိန်ပေးထားသည်။ ထိုအချိန်အတွင်း ဖမ်းဆုပ်နိုင်ရမည်။ မဟုတ်လျှင် မြို့ပြလက်နက်များ အားလုံး အလုပ်မလုပ်တော့ဘဲ ရှေ့တန်းစစ်မျက်နှာစာများ ရပ်တန့်သွားကာ မြို့ရိုးကာကွယ်ရေးများ ကျဆုံးပြီး မတွေးဝံ့စရာ အကျိုးဆက်များ ဖြစ်ပေါ်လာနိုင်ပေသည်။

“အခုတော့ ယာဉ်တန်းကြီးက လူအတော်များများက မြို့ရိုးရှေ့တန်းကို စစ်ကူသွားနေကြပြီ။ မြို့ထဲမှာလည်း သန္ဓေပြောင်းမှုတွေကြောင့် တစ်ညလုံး ရုန်းရင်းဆန်ခတ်တွေ ခဏခဏဖြစ်နေတယ်။ ပြဿနာက မနေ့ညက တိုက်ပွဲမှာ ယာဉ်တန်းက ကားအတော်များများ ပျက်စီးသွားတာပဲ။ အထူးသဖြင့် ယာဉ်တန်းအသေးတွေဆိုရင် ကားတွေကို ထားပစ်ခဲ့ပြီး မြို့ထဲကို ဝင်ခဲ့ကြရတယ်”

မြေအောက်ခံတပ်သို့ ရောက်ရှိသောအခါ အဖွဲ့ဝင်အချို့မှာ သံလိုက်ယာဉ်ပေါ်သို့ တက်လိုက်ကြပြီး မြို့ပြင်သို့ စတင်ထွက်ခွာလိုက်ကြသည်။

ယာဉ်ပေါ်တွင် ကီကီက လင်းရှန်ကို အခြေအနေများ ရှင်းပြနေသည်။ ထိုအချိန်တွင် ယန္တရားစကင်ဖတ်မှုအား အလွန်အကျွံ သုံးစွဲခဲ့သည့် နောက်ဆက်တွဲဝေဒနာများ စတင်လာသည်။ ပြင်းထန်သော ခေါင်းကိုက်မှုကြောင့် အမြင်အာရုံကို စုစည်းရန်ပင် လင်းရှန် ခက်ခဲနေသည်။

“ဘာလို့ လူတွေ နည်းသွားတာလဲ” လင်းရှန် မေးလိုက်သည်။

“ခေါင်းဆောင်ကျိုးရဲ့ အဖွဲ့က စက်သေနတ်ကိုင် တုံစီ၊ ခေါင်းဆောင်ချီနိုအဖွဲ့က ပျံသန်းနိုင်တဲ့ စွမ်းအားရှင်နှစ်ယောက်နဲ့ တခြားသူအချို့ မနေ့ညက တိုက်ပွဲမှာ ကျဆုံးသွားကြပြီ”

ချူယန်က ပြောပြသည်။

ထိုစကားကြောင့် လင်းရှန် မျက်နှာပျက်သွားသည်။ ပြင်းထန်သော တိုက်ပွဲများကြောင့် ပင်ပန်းနေကြသည့် ကျိုးကျင်း၊ လီစူး၊ ချီနိုနှင့် အခြားသူများကို သူ လှမ်းကြည့်လိုက်မိသည်။ လင်းရှန်အတွက်မူ မြို့တစ်မြို့လုံးကို စကင်ဖတ်ခြင်းမှာ မိနစ်ပိုင်းသာ ကြာသည်ဟု ထင်ရသော်လည်း တကယ်တမ်းတွင်မူ အချိန်များစွာ ကုန်ဆုံးသွားခဲ့သည်။ အဖွဲ့ဝင်များ သေဆုံးမှုကြောင့် လင်းရှန် စိတ်မကောင်းဖြစ်နေသည်၊၊

“ငါစဉ်းစားနေတာက မြူမီးခိုးမွန်းစတားနဲ့ ဆက်သွယ်နေတဲ့သူက ဘယ်သူလဲဆိုတာ သေချာမသိသေးဘူး။ အရေးကြီးတဲ့သူကို မှားသတ်မိရင် ဘယ်လိုလုပ်မလဲ”

ချူယန်က တည်ငြိမ်စွာဖြင့် ပြန်ပြောသည်။

“နင်က အနီရောင်ကမ္ဘာဆိုတဲ့အဖွဲ့အကြောင်းကို သေချာနားမလည်သေးလို့ပါ။ ငါတို့ သူတို့ကို စောင့်ကြည့် စုံစမ်းနေတာ ကြာပြီ။ အဆင့်မြင့် အဖွဲ့ဝင်အတော်များများကိုလည်း ဖမ်းဆီးခဲ့ဖူးတယ်။ ဒီအဖွဲ့က လူသားမျိုးနွယ်ကို ဆန့်ကျင်တာ ဒါမှမဟုတ် အခွင့်အရေးသမားသက်သက်ပဲ မဟုတ်ဘူး။ တစ်နည်းအားဖြင့် ပြောရရင် သူတို့ရဲ့ အခြေခံအတွေးအခေါ်က ချူကျောက်နန်တို့ ဖက်ဒရေးရှင်းအဖွဲ့နဲ့ အတူတူပဲ။ အဲဒါက ‘လူသားတွေ ရှုံးနိမ့်ဖို့ သေချာနေပြီ’ ဆိုတဲ့ အတွေးပဲ။ ဒစ်ဂျစ်တယ်သက်ရှိနည်းပညာနဲ့ ပေါင်းစပ်လိုက်တဲ့အခါ သူတို့ရဲ့ ရှင်သန်မှု အယူအဆက အခြေခံကစပြီး ပြောင်းလဲသွားတယ်။ အရှင်းဆုံး ပြောရရင် သူတို့က လူသားမျိုးနွယ် မျိုးတုံးသွားတာကို မလိုလားဘူး။ အဲဒီအစား လူသားတွေအနေနဲ့ အမှောင်သတ္တဝါတွေနဲ့ ဆက်သွယ်တာ၊ ကူညီတာ၊ နောက်ဆုံးမှာတော့ အဲဒီစွမ်းအားတွေနဲ့ တစ်သားတည်းဖြစ်သွားပြီး အတူယှဉ်တွဲ ရှင်သန်သွားနိုင်မယ်လို့ ယုံကြည်နေကြတာပဲ”

“အနီရောင်ကမ္ဘာရဲ့ အမြင်မှာတော့ တွင်းနက်ကနေ ရောက်လာတဲ့ အမှောင်ယဉ်ကျေးမှုဆိုတာ နောက်ထပ် အုပ်စိုးသူသက်ရှိပုံစံတစ်ခုပဲ။ ဒါကြောင့် သူတို့က အဲဒါကို ကိုးကွယ်ကြတယ်၊ အစွန်းရောက် ယုံကြည်သက်ဝင်ကြတယ်၊ နောက်ဆုံးမှာတော့ အဲဒါနဲ့ တစ်သားတည်းဖြစ်သွားအောင် သူတို့ကိုယ်သူတို့ ပြောင်းလဲဖို့တောင် ကြိုးစားကြတယ်။ ဒါကို သူတို့က ‘အဆင့်မြင့် သက်ရှိပုံစံ’ လို့ ခေါ်ကြတယ်။ စွမ်းအားရှင်တွေဆိုတာကတော့ ဒီအမှောင်ထုရဲ့ လွှမ်းမိုးမှုကို ခံထားရတဲ့ အစောပိုင်းကာလ ‘ဖောက်ပြန်သူတွေ’ ပေါ့”

“ဖောက်ပြန်သူတွေ ဟုတ်လား”

လင်းရှန် မျက်မှောင်ကြုတ်လိုက်မိသည်။

“ဘာလို့လဲ”

“ဘာလို့လဲဆိုတော့ သူတို့က ပြည့်စုံမှု မရှိသေးလို့ပဲ။ စွမ်းအားရှင်တွေဟာ အမှောင်ကျူးကျော်ထားတဲ့ နေရာတွေမှာ အမြဲတမ်း ရှင်သန်မနေနိုင်ဘူး၊ အသက်အန္တရာယ်ကလည်း စိုးရိမ်ရသေးတယ်”

သံလိုက်ယာဉ်က မြေအောက်ကွန်ရက်အတွင်း အရှိန်ပြင်းစွာ မောင်းနှင်နေသဖြင့် လေဖိအားကြောင့် နားထဲတွင် အောင့်လာသည်။ ချူယန်က ဆက်ပြောသည်။

“ဒါကြောင့် ငါတို့ အမြင်မှာ S-Class အဆင့် မွန်းစတားလို့ မြင်နေရတာတွေဟာ အနီရောင်ကမ္ဘာအတွက်တော့ နတ်ဘုရားတွေလိုပဲ။ အဲဒီလို နတ်ဘုရားတွေနဲ့ ဆက်သွယ်ပြီး မတူညီတဲ့ သက်ရှိပုံစံနဲ့ ယဉ်ကျေးမှုကို သိချင်တယ်ဆိုရင်တော့ သာမန်လူတွေ ဒါမှမဟုတ် စမ်းသပ်ခံသတ္တဝါတွေကို သုံးလို့ မရဘူး”

ထိုစကားကို ကြားသောအခါ ကီကီက ခေါင်းငြိမ့်လိုက်သည်။

“ကျွန်မ နားလည်ပြီ။ အနီရောင်ထိတ်လန့်ဖွယ်သတ္တဝါတွေလိုပေါ့၊ သူတို့က S-Class အဆင့်နဲ့ ဆက်သွယ်ရုံတင် မဟုတ်ဘဲ အဲဒီနည်းလမ်းကို သုံးပြီး သူတို့ကိုယ်တိုင်ပါ S-Class သက်ရှိပုံစံဖြစ်ချင်နေကြတာလား”

ချူယန်က ခေါင်းငြိမ့်ပြသည်။ “အတိအကျပဲ”

“ရူးနေတဲ့လူတစ်စုပဲ” လင်းရှန်က ရေရွတ်လိုက်သည်၊၊

တစ်ဖက်တွင် ထိုင်နေသော ချီနိုက စီးကရက်တစ်လိပ်ကို မီးညှိရန် ကြိုးစားသော်လည်း မအောင်မြင်ပေ။ သူက ဝင်ပြောသည်။

“Freud ရဲ့‘သေခြင်းတရား တွန်းအား’ အယူအဆအရဆိုရင် လူသားတွေရဲ့ အတွင်းစိတ်အနက်ရှိုင်းဆုံးမှာ ဖျက်ဆီးလိုတဲ့ ဗီဇ (ကိုယ့်ကိုယ်ကိုယ် ဖျက်ဆီးတာအပါအဝင်) ရှိတတ်ကြတယ်။ ကြောက်ရွံ့မှုက သည်းခံနိုင်စွမ်းထက် ကျော်လွန်သွားတဲ့အခါ အဲဒီကြောက်ရွံ့မှုဟာ ဖျက်ဆီးနိုင်စွမ်းရှိတဲ့ စွမ်းအားအပေါ် စွဲလန်းတဲ့ စိတ်ရောဂါတစ်ခုလို ဖြစ်သွားနိုင်တယ်”

“အဲဒီအပြင် လူသားတွေဟာ အမှောင်ထုထဲကနေ ဆင့်ကဲပြောင်းလဲမှုအနေနဲ့ စွမ်းအားတွေကို ရရှိလာကြတာဆိုတော့ သူတို့ရဲ့ အယူအဆက ပိုခိုင်မာသွားတာပေါ့”

“အတိအကျပဲ”

လင်းရှန် ခေါင်းငြိမ့်လိုက်သည်။

“ဒါဆိုရင် S-Class နဲ့ ဆက်သွယ်နေတဲ့သူက ဂျူးလိယပ်စ်ဖြစ်ဖို့ များတယ်။ ဒါပေမဲ့ ဒီလူမှာ ပွားယူထားတဲ့ ခန္ဓာကိုယ်တွေ ဘယ်လောက်တောင် ရှိနေမလဲ မသိဘူး။ ခင်ဗျားတို့ ပိုင်လုယွမ် နက္ခတာယာလေ့လာရေးစခန်းမှာ တစ်ယောက်ကို ရှင်းထုတ်ခဲ့တာ မှတ်မိသေးတယ်”

ချူယန်က ရှင်းပြသည်။

“သူ့မှာ လျှို့ဝှက်ဓာတ်ခွဲခန်း အမျိုးမျိုးကို စီမံခန့်ခွဲဖို့ ပွားထားတဲ့ ခန္ဓာကိုယ်တွေ အများကြီးရှိတယ်။ အဲဒီအပြင် အနီရောင်ကမ္ဘာမှာ သူ့လိုမျိုး အကျိုးတူဖန်တီးသူတွေလည်း ရှိသေးတယ်၊၊ သူတို့က ဘယ်သူတွေလဲဆိုတာ အခုထိ မသိရသေးဘူး”

ထိုစကားကြောင့် လင်းရှန် မျက်မှောင်ကြုတ်သွားသည်။

“ဒါဆိုရင် S-Class နဲ့ ဆက်သွယ်နေတာက သူ့ရဲ့ မူလခန္ဓာကိုယ် ဖြစ်နိုင်မလား။ ဒါက သိပ်ကို ဆွဲဆောင်မှုရှိတဲ့ ကိစ္စဆိုတော့...”

“ဖြစ်နိုင်တယ်”

ချူယန်က ဆက်ပြောသည်။

“ဒါပေမဲ့ သူနဲ့ အကြိမ်ကြိမ် ထိပ်တိုက်တွေ့ဖူးသလောက်တော့ သူက အရမ်းသတိကြီးပြီး ဉာဏ်ကောင်းတဲ့သူပဲ”

လင်းရှန် အချိန်ကို စစ်ဆေးလိုက်သည်။

“အချိန် တစ်နာရီကျော်ပဲ ကျန်တော့တယ်။ အကာအကွယ်ဖျက်ဆီးရေး ကိရိယာက ဒုတိယအကြိမ် စတင်တော့မှာပဲ။ အဲဒီအချိန်ကျမှ သူ့ကို ဖမ်းရုံပဲ”

ချူယန်က လင်းရှန်ကို စိုက်ကြည့်လိုက်သည်။

“လင်းရှန်... နင်က အခု အခြေအနေသိပ်မကောင်းဘူး။ ခဏနေ အနီရောင်ကမ္ဘာက လူတွေနဲ့ တိုက်ပွဲဖြစ်ရင် ရှေ့ကို သိပ်မတက်နဲ့။ သတင်းအချက်အလက်တွေကို ကြားဖြတ်ဖမ်းယူဖို့က ငါ့ရဲ့ အဓိကတာဝန်ပဲ၊၊ နင်ကတော့ ဂလက်ဆီနှလုံးသား ကျူးကျော်မခံရအောင် သေချာဂရုစိုက်ပေးရမယ်”

“ဟုတ်တယ်” ကျိုးကျင်းကလည်း ဝင်ပြောသည်။

“ကျုပ်အဖွဲ့ရဲ့ တာဝန်က ကပ္ပတိန်လင်းကို ကာကွယ်ဖို့ပဲ။ မြို့တစ်ခုလုံးရဲ့ လက်နက်တွေ အကြာကြီး အလုပ်မလုပ်တော့ဘူးဆိုရင် ဒါမှမဟုတ် အနီရောင်ကမ္ဘာက ထိန်းချုပ်သွားမယ်ဆိုရင်တော့ ကျုပ်တို့အားလုံး အဆုံးသတ်သွားပြီပဲ”

“၁၀ နာရီဆိုရင် မိုးလင်းတော့မယ်”

လင်းရှန် မျက်လုံးအနည်းငယ် မှိတ်လိုက်သည်။

“အားလုံး အဆင်ပြေပါစေလို့ပဲ ဆုတောင်းရမှာပဲ။ မိုးလင်းတဲ့အထိ အသက်ရှင်နိုင်ရင် သန္ဓေပြောင်းမွန်းစတားတွေ ဆုတ်ခွာသွားလိမ့်မယ်”

Chapter 839

Restart 2

၉ နာရီအချိန်တွင် သံလိုက်ယာဉ်သည် မြေအောက်ကွန်ရက်မှ ပိတ်ထားသော လမ်းကြောင်းတစ်ခုအတွင်းသို့ ဝင်ရောက်သွားသည်။ ကားရပ်သွားသောအခါ လမ်းကြောင်း၏ အဆုံးတွင် ကြီးမားသော ပေါက်ကွဲမှုဒဏ်ခံ တံခါးချပ်ကြီးတစ်ခု ပေါ်လာသည်။

[အန္တရာယ်] [သီးသန့်ဇုန်] အစရှိသည့် သတိပေးချက် အမျိုးမျိုးမှာ လက်နှိပ်ဓာတ်မီးရောင်အောက်တွင် ထင်ရှားစွာ မြင်နေရသည်။

ကျိုးယန်က ကားပေါ်မှ အရင်ဆုံးဆင်းကာ ကြမ်းပြင်ကို စစ်ဆေးပြီးနောက် ပြောလိုက်သည်။

“လမ်းကြောင်းက ပွင့်နေတယ်။ ဒါပေမဲ့ စနစ်နှစ်ခုကွဲနေပြီး လုံးဝ သီးသန့်ဖြစ်နေတာကိုး။ ဒါကြောင့်လည်း ရှာရခက်နေတာ”

“ပစ္စည်းတွေနဲ့ စက်ကိရိယာတွေအားလုံးကို ဒီလမ်းကြောင်းကနေပဲ သယ်ရမှာ။ ဒီနေရာကို သေချာ စောင့်ကြပ်ထားမှာပဲ”

ဝီး...။

ထိုစဉ် လင်းရှန်က ကြယ်နက်ပန်းပဲဖို ဟင်းလင်းပြင်နေရာလွတ်ထဲမှ ထွက်လာသော သံချပ်ကာယာဉ် လေးစီးကို ထုတ်ယူလိုက်သည်။ ထို့နောက် တံခါးကို ဖွင့်ရန် ရှေ့သို့ တိုးသွားသည်။

မမျှော်လင့်ထားစွာပင် ရှီဇီက သူ့ကို ချက်ချင်း တားလိုက်သည်။

“သတိထား... ဒီတံခါးနောက်မှာ မွန်းစတားတွေ ရှိနေတယ်”

ထိုစကားကြောင့် အဖွဲ့သားအားလုံး ချက်ချင်းပင် လက်နက်များကို အသင့်ပြင်ကာ သတိထားလိုက်ကြသည်။

ချီနိုက လက်ဟန်ဖြင့် အချက်ပြလိုက်ရာ စွမ်းအားရှင် အဖွဲ့လေးဖွဲ့မှာ ချက်ချင်းပင် ဖြန့်ကာ လူစုခွဲလိုက်သည်။

“ကျိုးကျင်း၊ ချူယန်... မင်းတို့က ကပ္ပတိန်လင်းကို ကားပေါ်တင်ပြီး ခေါ်သွားကြ။ ငါတို့က မင်းတို့ကို ကာကွယ်ပေးမယ်၊၊ ပြီးရင် နောက်တန်းကနေ ပံ့ပိုးပေးမယ်”

“ကောင်းပြီ”

အချိန်က အလွန်တန်ဖိုးရှိနေသဖြင့် မည်သူမျှ စကားအပို မပြောကြပေ။ ကျိုးကျင်းက သူ့အဖွဲ့ကို ဦးဆောင်ကာ ပထမဆုံးယာဉ်ပေါ်သို့ တက်လိုက်ပြီး ထိုးဖောက်ရန် ပြင်ဆင်သည်။ လင်းရှန်နှင့် ချူယန်တို့အဖွဲ့က အလယ်ယာဉ်ပေါ်သို့ တက်ကြပြီး နောက်ဆုံးယာဉ်နှစ်စီးကိုမူ ချီနိုနှင့် လူ ၃၀ ကျော်ပါသော အဖွဲ့အတွက် ချန်ထားခဲ့သည်။

ပတ်ဝန်းကျင်လေထုသည် ရုတ်တရက် တင်းမာသွားသည်။ ညလမ်းလျှောက်သူအဖွဲ့ အသင့်ဖြစ်သည်နှင့် လင်းရှန်က ယန္တရားစွမ်းအားကို သုံး၍ ပေါက်ကွဲမှုဒဏ်ခံ တံခါးကြီးကို အတင်းအကျပ် တွန်းဖွင့်လိုက်သည်။

ဝူး...။

ကြီးမားလှသော တံခါးကြီးမှာ အလယ်မှ ပွင့်ထွက်သွားပြီး အေးစက်သော လေထုနှင့်အတူ မှောင်အတိကျနေသော လမ်းကြောင်းကြီးမှာ အားလုံး၏ ရှေ့မှောက်တွင် ပေါ်လာသည်။

အတွင်းဘက်ရှိ လမ်းကြောင်းမှာ အပြင်ဘက်ကထက် များစွာ ကြီးမားပြီး အဆပေါင်းများစွာ ပိုကျယ်သည်။ ချူယန်က ကားမောင်းပြီး ကီကီက ဘေးမှနေ၍ လမ်းကြောင်းအတွင်းသို့ လှမ်းကြည့်လိုက်ရာ အတွင်းဘက်သို့ တန်းစီနေသော အစိမ်းရောင် အရေးပေါ်မီးလုံးများကိုသာ မြင်ရသည်။ ရှေ့ဆုံးမှ ကျိုးကျင်းအဖွဲ့က သေနတ်များကို အသင့်ပြင်ကာ ကားမီးကြီးများကို ဖွင့်လိုက်ရာ ခြောက်ကပ်နေသော ဧရိယာတစ်ခုကို မြင်တွေ့လိုက်ရသည်။

ဟူး... ဟူး...။

အောက်ဆီဂျင်မျက်နှာဖုံး တပ်ထားပြီး အသက်ရှူနေသလိုမျိုး လည်ချောင်းသံတစ်ခုက အမှောင်ထုအတွင်းမှ ထွက်ပေါ်လာသည်။ ထိုအသံမှာ ကြောက်မက်ဖွယ်ကောင်းပြီး ကြက်သီးထစရာပင်။

ထိုစဉ် အမှောင်ထုထဲမှ အရပ် ၂ မီတာကျော်ခန့်ရှိသော လူရိပ်တစ်ခု ဖြည်းဖြည်းချင်း ထွက်ပေါ်လာသည်။ ထိုလူရိပ်၏ နောက်တွင်မူ အနက်ရောင် တောက်ပြောင်နေသော ဂတ်တလင်း စက်သေနတ်ကြီး နှစ်လက်ကိုလည်း မြင်တွေ့လိုက်ရသည်၊၊

အနီရောင်သတ္တဝါ…

ထိုအနီရောင်သတ္တဝါကို မြင်လိုက်ရသည်နှင့် လင်းရှန်၏ မျက်လုံးသူငယ်အိမ်များ ကျုံ့သွားသည်။ အဖြူရောင်မြို့တော်တွင် တွေ့ခဲ့ရသည့် တစ်ယောက်နှင့် နှိုင်းယှဉ်လျှင် ဤတစ်ယောက်မှာ တစ်ကိုယ်လုံးကို ကြီးမားသော စွမ်းအားဝတ်စုံများဖြင့် ဖုံးအုပ်ထားသည်။ ခေါင်းနှင့် လည်ပင်းတို့တွင် ကြောက်မက်ဖွယ်ကောင်းသော သားသတ်သမားတစ်ယောက်ကဲ့သို့ ချုပ်ရိုးကြောင်းကြီးများ ရှိနေပြီး မျက်နှာတွင်မူ ပြောင်းနှစ်ခုပါသော အသက်ရှူမျက်နှာဖုံးကို တပ်ထားသည်။ မျက်လုံးတစ်ဖက်မှာ အနီရောင်တောက်နေပြီး လူသားနှင့် စက်ရုပ်တို့ ကြောက်မက်ဖွယ်ပေါင်းစပ်ထားသည့် ပုံစံမျိုးပင်။

“သတိထားကြ”

ဝူး

ဂတ်တလင် စက်သေနတ်နှစ်လက်၏ မော်တာများမှာ တစ်ခဏချင်းအတွင်း အရှိန်ပြင်းပြင်း လည်ပတ်သွားပြီး သံမဏိကျည်ဆန် မုန်တိုင်းတစ်ခု ထွက်ပေါ်လာသည်။ ထိုအချိန်မှာပင် ညလမ်းလျှောက်သူအဖွဲ့မှ အမျိုးသမီး စွမ်းအားရှင်တစ်ဦးက သူမ၏ ပါးစပ်မှ အနီရောင် မီးခိုးငွေ့အမြောက်အမြားကို ရုတ်တရက် မှုတ်ထုတ်လိုက်ရာ လမ်းကြောင်း အဝင်ဝတစ်ခုလုံးကို ဖုံးလွှမ်းသွားသည် ။ လူအုပ်ဆီသို့ ဦးတည်ပစ်ခတ်နေသည့် စက်သေနတ်ကျည်ဆန်အားလုံးမှာ ထိုမီးခိုးငွေ့များကြားတွင် တန့်သွားကြရာ ယင်းက လင်းရှန်ကို တွင်းနက်ထဲရှိ ထူးဆန်းသောအစိမ်းရောင်မြွေကြီး၏ စွမ်းရည်ကို သတိရသွားစေသည်၊၊

ထို့နောက် ထိုအမျိုးသမီး စွမ်းအားရှင်က အနီရောင် မီးခိုးငွေ့များကို ရှေ့သို့ တွန်းထုတ်လိုက်ရာ ပြင်းထန်သော ပေါက်ကွဲမှုကြီးတစ်ခု ဖြစ်ပွားသွားသည် ။ လင်းရှန်က သူ၏ ယန္တရားစွမ်းအားကို ချက်ချင်း အသုံးချပြီး ဂတ်တလင်စက်သေနတ်နှစ်လက်ကို တိုက်ရိုက် ပြိုကွဲပျက်စီးစေလိုက်ရာ ပစ်ခတ်သံများ ရပ်တန့်သွားသည်။ သို့သော် နောက်ဆက်တွဲအနေဖြင့် တုန်ခါမှုလှိုင်းများစွာ ထွက်ပေါ်လာသည်၊၊

ဘုန်း ဘုန်း

ကီကီက တုန်ခါမှုကို ခုခံရန် စိတ်စွမ်းအင်ဒိုင်းကာကို ချက်ချင်း အသုံးပြုလိုက်သည် ။ ပြင်းထန်သော ပေါက်ကွဲမှုအပြီးတွင် တစ်ကိုယ်လုံး သံချပ်ကာများ ဖုံးလွှမ်းထားသည့် အနီရောင်သတ္တဝါသည် နားကွဲမတတ် ဆူညံသံများနှင့်အတူ အမှောင်ထုထဲမှ လူအုပ်ဆီသို့ လျင်မြန်စွာ ပြေးဝင်လာသည်၊၊

ကားရှေ့မီးရောင်အောက်တွင် အလွန်လျင်မြန်သည့် ထူးဆန်းသော လူသားအချို့လည်း ထွက်ပေါ်လာသည် ။ အမျိုးသားရော၊ အမျိုးသမီးရော ပါဝင်ပြီး သူတို့တွင် ယန္တရားဖိနှိမ်ကိရိယာများနှင့် ပေါ့ပါးသော သံချပ်ကာများ တပ်ဆင်ထားသည်၊၊ ဟိန်းဟောက်သံများနှင့်အတူ စွမ်းအားအမျိုးမျိုးက လေထုကို ဖြတ်သန်းသွားပြီး လက်နက်များမှာလည်း ပေါက်ကွဲသံများနှင့်အတူ ပွင့်ထွက်လာသည်၊၊

ကီကီ၏ စိတ်စွမ်းအားက သူတို့ထဲမှ အချို့ကို တိုက်ရိုက်ဖမ်းဆုပ်လိုက်သည် ။ ထိုအတောအတွင်း လင်းရှန်က သူတို့ ကိုယ်ပေါ်ရှိ သံချပ်ကာများကို ပြိုကွဲစေရန် ယန္တရားစွမ်းအားကို အမြန် အသုံးပြုလိုက်သည် ။ ထူးဆန်းသည်မှာ ထိုလူသားများတွင် ထိန်းချုပ်ကိရိယာမရှိကြဘဲ နှိမ်နင်းရေး ကိရိယာများဖြင့် ယဉ်ပါးအောင် လုပ်ထားသည့် သတ္တဝါများနှင့် တူနေသည် ။ နှိမ်နင်းရေးကိရိယာများ ပျက်စီးသွားသည့်တိုင် သူတို့ သေဆုံးမသွားဘဲ ပို၍ပင် ရူးသွပ်လာကြသည်၊၊

“ဒါတွေက အနီရောင်သတ္တဝါတွေ မဟုတ်ဘူး” လင်းရှန်က ပြောလိုက်သည် ။

အုန်း

ပြင်းထန်သော သံလိုက်မုန်တိုင်းဗုံးတစ်လုံးက အလယ်တည့်တည့်တွင် ပေါက်ကွဲသွားသည်။ ချီနိုက သူ့အဖွဲ့ကို ဦးဆောင်ပြီး တန်ပြန်တိုက်စစ်ဆင်လိုက်ရာ လမ်းကြောင်းတစ်ခု အမြန်ပွင့်သွားသည်၊၊

“မြန်မြန်လေး… အချိန် မရှိတော့ဘူး၊ ငါတို့ ထိုးဖောက်သွားမှ ဖြစ်မယ်”

ထိုအချိန်တွင် ကျိုးကျင်းက လီဗာကို အဆုံးထိ နင်းလိုက်ရာ သံချပ်ကာကား၏ အင်ဂျင်သံမှာ ပြင်းထန်စွာ ဟိန်းထွက်လာသည်။ ကားခေါင်မိုးပေါ်ရှိ အဖွဲ့ဝင်များကလည်း စက်သေနတ်များဖြင့် အစွမ်းကုန်ပစ်ခတ်ကြပြီး ချူယန်၏ ကားကလည်း နောက်မှ ကပ်လျက် လိုက်ပါလာသည်၊၊

ညလမ်းလျှောက်သူအဖွဲ့နှင့် ကျိုးကျင်း၏ အဖွဲ့တို့သည် ရှိသမျှ စွမ်းအားအားလုံးကို ထုတ်သုံးလိုက်ကြသည် ။ စွမ်းအားအမျိုးမျိုးနှင့် လက်နက်ကြီးများက လမ်းရှင်းပေးလိုက်ရာ ကားနှစ်စီးမှာ မြို့ပြင်သို့ ဦးတည်သည့် ဥမင်လိုဏ်ခေါင်းအတွင်းသို့ အရှိန်အဟုန်ဖြင့် ပြေးထွက်သွားသည်၊၊

ဂယား

ဥမင်လိုဏ်ခေါင်းထဲသို့ ရောက်သည်နှင့် လူတိုင်းမှာ ပိုမိုပြင်းထန်သော အေးစက်မှောင်မိုက်သည့် အငွေ့အသက်များ ဖုံးလွှမ်းလာသည်ကို ခံစားလိုက်ရသည်။ တစ်ချိန်တည်းမှာပင် နှိမ်နင်းရေး ကိရိယာများ တပ်ဆင်ထားသည့် ထူးဆန်းသော လူသားအမြောက်အမြားသည် အမှောင်ထဲမှ ဆက်တိုက်ထွက်ပေါ်လာပြီး နံရံများပေါ်မှ တွားသွားကာ ယာဉ်တန်းဆီသို့ ဝိုင်းအုံလာကြသည် ။

ချီနို၏ အဖွဲ့ခွဲကလည်း သူတို့၏ ကားများပေါ်သို့ တက်ကာ လင်းရှန်တို့အဖွဲ့ နောက်မှ အကာအကွယ်ပေးရင်း လိုက်ပါလာသည်၊၊ ထိုအချိန်တွင် အနီရောင်သတ္တဝါသည် ပေါက်ကွဲမှု အပျက်အစီးများကြားမှ ပြန်ထလာသည်၊၊ သူ၏ သံချပ်ကာ တစ်ဝက်ခန့်မှာ ပျက်စီးသွားသော်လည်း သွေးသားတစ်ရှူးများမှာ ရူးသွပ်ဖွယ်ကောင်းလောက်သော အမြန်နှုန်းဖြင့် ပြန်လည်ဖြစ်ပေါ်လာသည် ။ သူက ဟိန်းဟောက်လိုက်ပြီး ယာဉ်တန်းဆီသို့ ပြင်းထန်သော တုန်ခါမှုလှိုင်းကြီးတစ်ခု လွှတ်ထုတ်လိုက်သည်၊၊

ကျယ်လောင်သော ပေါက်ကွဲသံနှင့်အတူ ဥမင်လိုဏ်ခေါင်းတစ်ခုလုံးမှာ သံစည်ပိုင်းတစ်ခုကို ထုနှက်လိုက်သလို ခံစားလိုက်ရပြီး လေထုမှာ ပြင်းထန်စွာ တုန်ခါသွားရာ လမ်းရှိ အရေးပေါ် မီးလုံးအားလုံး ကွဲအက်ကုန်သည်၊၊

“ညလမ်းလျှောက်သူအဖွဲ့က စုပေါင်းပစ်အားနဲ့ တိုက်ခိုက်ခံရတာတောင် ဒီအဆင့်မြှင့်ထားတဲ့ အနီရောင်သတ္တဝါရဲ့ စွမ်းအားနဲ့ အသက်ဓာတ်က ပိုပိုပြီး သန်မာလာနေတယ်”

ချူယန်က ကားမောင်းရင်း ပြောလိုက်သည်၊၊

“သူတို့တွေက အဆင့်မြင့်စွမ်းအားရှင်တွေကို စမ်းသပ်ခံအဖြစ် သုံးထားတာ ဖြစ်ရမယ်”

ကီကီက သူမဆီ ပြေးဝင်လာသည့် လူသားများကို ရှင်းထုတ်ရန် စိတ်စွမ်းအင်ကို အပြည့်အဝ အသုံးချရင်း ပြောလိုက်သည်၊၊

ယခုအချိန်တွင် သူတို့အတွက် အဓိကပန်းတိုင်မှာ ထိုလမ်းပိတ်ထားသူများကို သတ်ရန် မဟုတ်ဘဲ ရှေ့တန်းစီမံကိန်း မစတင်မီ နတ်ဘုရားတောင်ထိပ်လွှတ်တင်ရေးစခန်းသို့ ရောက်ရှိရန် ဖြစ်သည်၊၊