အခန်း (၈၄၆-၈၄၇)

Chapter 846

လွှတ်တင်ခြင်း ၄

လင်းရှန် မော့ကြည့်လိုက်သောအခါ ချီနို၏ အဖွဲ့က နောက်ဆုံးတွင် စစ်ကူရောက်ရှိလာသည်ကို တွေ့လိုက်ရသည်။

“နောက်ကျသွားတဲ့အတွက် တောင်းပန်ပါတယ်”

ချီနိုသည် ကြမ်းပြင်ပေါ်မှ ခုန်ဆင်းလာပြီး တုန်ခါလှိုင်းလက်သီးဖြင့် မီးတောက်နေသော ထူးဆန်းသောလူသားတစ်ဦးကို ထိုးထုတ်ပစ်လိုက်သည်။ ထို့နောက် လင်းရှန်ကို ကြည့်ကာ မေးလိုက်သည်၊၊

“အခြေအနေ ဘယ်လိုရှိလဲ”

“ရှင်းပြဖို့ အချိန်မရှိဘူး။ ဒီထူးဆန်းသောလူသားတွေကို တားပေးထား… ကျုပ်ကေဘယ်လ်တွေကို သွားချိတ်လိုက်မယ်။ သတိထားနော်၊ သူတို့ထဲမှာ အိန်ဂျယ်အဆင့် စွမ်းအားရှင် နှစ်ယောက်ပါတယ်”

စကားအပိုမပြောတော့ဘဲ လင်းရှန်သည် စွမ်းအားဝတ်စုံ၏ တွန်းကန်အားစနစ်ကို ချက်ချင်းအသက်သွင်းကာ ရှီဇီကို ခေါ်၍ တစ်ဖက်ရှိ မြူမီးခိုးမွန်းစတားထံ ပျံသန်းသွားလိုက်သည်။

ထိုခဏတွင် ကျည်ဆန်များကဲ့သို့ ထက်ရှသော အမည်းရောင်မိုးစက်များမှာ လင်းရှန်ထံသို့ ဦးတည်လာသည်။ သို့သော် သူ့ကို မထိမှန်မီမှာပင် ပြင်းထန်သော တုန်ခါလှိုင်းတစ်ခုက ၎င်းတို့ကို ဝါးမျိုပစ်လိုက်သည်။ လေထဲတွင် လွင့်မျောနေသော ကီကီက လင်းရှန်ကို လှမ်းပြောလိုက်သည်။

“မြန်မြန်သွားတော့၊ ဒါတွေကို ကျွန်မတို့တာဝန်ထားလိုက်”

အပေါ်ထပ် စင်္ကြံများမှတစ်ဆင့် ယခင်က အနီရောင်သတ္တဝါများသည် အောက်ဘက်သို့ တရစပ်ပြေးဆင်းလာကြသည်။ ကျိုးကျင်း၏ အဖွဲ့သည်လည်း ထိန်းချုပ်ခန်းစင်္ကြံတွင် သွေးချောင်းစီး တိုက်ပွဲဝင်နေရသည်။ အပြင်ဘက် မြေအောက်မြို့တော် လမ်းမများပေါ်တွင်မူ ကီကီ၊ ဂရေ့စ်၊ ဒရုန်းတပ်ဖွဲ့နှင့် ချီနိုနှင့် ညလမ်းလျှောက်သူအဖွဲ့တို့သည် ထိုစွမ်းအားရှင်နှစ်ဦးနှင့် အဆင့်မြင့်သံချပ်ကာဝတ် ထူးဆန်းသောလူသားများစွာကို အပြင်းအထန် ရင်ဆိုင်နေကြရသည်။

လင်းရှန်သည် မြူမီးခိုးမွန်းစတား၏ လွှတ်တင်ရေးစင်ပေါ်သို့ ရောက်ရှိသွားသည်။ ယန္တရားစကင်ဖတ်မှုဖြင့် သတင်းအချက်အလက် ချိတ်ဆက်ရေးဂိတ်ကို အမြန်စစ်ဆေးလိုက်ပြီးနောက် သူသည် ထပ်ဆင့်လွှင့်စက်တစ်ခုကို ထုတ်လုပ်ကာ ထိန်းချုပ်ခန်းမှ ကေဘယ်လ်များကို ပြန်လည်ချိတ်ဆက်ရန် စတင်လိုက်သည်။

ထိုဧရာမ S-Class အဆင့် အရာနှင့် နီးကပ်လေလေ၊ သူ၏ စိတ်ပိုင်းဆိုင်ရာကို ဖိနှိမ်ထားသော အမှောင်ထု၏ ကျူးကျော်စွမ်းအားမှာ ပိုမိုပြင်းထန်လာလေဖြစ်သည်။ ရှီဇီ၏ မျက်နှာမှာ ထိတ်လန့်နေပြီး လင်းရှန်ကို ကူညီရန်အတွက် သူမ၏ စွမ်းအားကို အစွမ်းကုန် အသုံးပြုကာ ကာကွယ်ပေးထားသည်။

ဝီ ဝီ ဝီ။

ထိုအချိန်တွင် လင်းရှန်သည် သူ၏ အမြင့်ဆုံးယန္တရားစွမ်းအားကို မြှင့်တင်ရန်အတွက် စူပါစထရင်း နူဓာတ်ပြုအဆင့် သက်တန့်ကွင်းကို တိုက်ရိုက်အသက်သွင်းလိုက်ရာ ယန္တရားနှလုံးသားသည် ရူးသွပ်စွာ လည်ပတ်လာသည်။

ဘန်း ဘန်း~

ထိုစဉ် လင်းရှန်သည် မြေအောက်မြို့တော်၏ အောက်ဘက်မှ ထူးဆန်းသော အသံများကို ရုတ်တရက် ကြားလိုက်ရသည်။ ရေတွက်မရနိုင်သော အမှောင်သတ္တဝါများ လှုပ်ရှားနေသကဲ့သို့ပင်။ ၎င်းမှာ အမှောင်ထုလား သို့မဟုတ် S-Class အဆင့် မြူမီးခိုးမွန်းစတားကြောင့် ဖြစ်ပေါ်လာသော တုန်ခါမှုလားဆိုသည်ကို မသေချာပေ။

“အောက်မှာ ဘာမှန်းမသိတဲ့ သတ္တဝါတွေ အများကြီးရှိနေပုံပဲ၊၊ တစ်ခုခုက ပိတ်ထားလို့ မတက်လာနိုင်တာဖြစ်မယ်”

“အဲဒါ အဆို့ရှင်ပဲ”

သူတို့ မြို့ထဲကို စတင်ဝင်ရောက်လာစဉ်က မြေအောက်မြို့တော်၏ ပိတ်ဆို့ထားသော လမ်းပန်းဆက်သွယ်ရေးစနစ်များမှတစ်ဆင့် ကီဇိုင်းက သူတို့ကို လမ်းပြခဲ့သည်ကို လင်းရှန် သတိရသွားသည်။ ထိုနေရာအားလုံးကို ပိတ်ဆို့ထားသော်လည်း အောက်ဘက်တွင် တစ်နေရာရာနှင့် ချိတ်ဆက်နေပုံရသည်။

သူသည် ကျိုးကျင်း ပေးထားသော မြေအောက်မြေပုံကို ချက်ချင်းဖွင့်ကြည့်လိုက်ရာ အမှတ် (၁) မြို့ရိုး၏ အပြင်ဘက်တွင် ဂိတ်ပေါက်များစွာ ရှိနေသည်ကို တွေ့လိုက်ရသည်။ အကယ်၍ ထိုဂိတ်များ ပွင့်သွားပါက ဘီလီယံနှင့်ချီသော သန္ဓေပြောင်းမွန်းစတားများသည် မြေအောက်လုပ်ငန်းလမ်းကြောင်းများအတွင်းသို့ တိုးဝင်လာမည်ဖြစ်ပြီး မြို့တွင်းသည် ငရဲခန်းအဖြစ် ပြောင်းလဲသွားပေလိမ့်မည်။

ရှီဇီလည်း ရိပ်မိသွားပြီး ထိတ်လန့်တကြားဖြင့် ပြောလိုက်သည်။

“အဲဒီသတ္တဝါတွေ ဒီကနေတစ်ဆင့် မြို့ထဲကို ဝင်လာရင် ဘယ်ကို ရောက်သွားမှာလဲ”

“အမှတ် (၁) မြေအောက်မြို့တော်”

လင်းရှန်၏ မျက်နှာက ခက်ထန်နေသည်၊၊

“အာရုဏ်ဦးမြို့တော်ရဲ့ အလယ်ဗဟိုတည့်တည့်ပဲ။ အနီရောင်ကမ္ဘာရဲ့ ရည်ရွယ်ချက်က အမှတ် (၁) မြေအောက်မြို့တော်ကို သတ္တဝါတွေ ထွက်လာမယ့် စမ်းရေတွင်းအဖြစ် ပြောင်းပစ်ဖို့ပဲ။ ညရောက်လာတဲ့အခါမှာတော့ တစ်မြို့လုံး ထိတ်လန့်တုန်လှုပ်ကုန်ကြလိမ့်မယ်။ အတွင်းရော အပြင်ပါ တိုက်ခိုက်ခံရပြီး အာရုဏ်ဦးမြို့တော်ကြီးဟာ သူတို့ရဲ့ ဧရာမစမ်းသပ်ကွင်းကြီး ဖြစ်သွားလိမ့်မယ်။ လူသန်းပေါင်းများစွာဟာ သူတို့ရဲ့ စမ်းသပ်ခံသတ္တဝါတွေ ဖြစ်သွားကြမှာပဲ...”

“ဒါ... ဒါက တကယ် ကြောက်စရာကောင်းလိုက်တာ” ရှီဇီက တစ်ကိုယ်လုံံးတုန်ယင်ကာ ပြောလိုက်သည်။

အခြားတစ်ဖက်တွင်မူ ချူယန်နှင့် အဖွဲ့ဝင်များသည် ဂျူးလိယပ်စ်နောက်သို့ လိုက်လံဖမ်းဆီးနေရင်း အနီရောင်သတ္တဝါများဖြင့် ပြင်းပြင်းထန်ထန် တိုက်ခိုက်နေရသည်။ တိုက်ပွဲမှာ အလွန်ပင် ကစဉ်ကလျားဖြစ်နေသည်၊၊

ဧရာမနတ်ဘုရားတောင်ထိပ် လွှတ်တင်ရေးစခန်း၏ တွင်းလမ်းကြောင်းမှာ သတ်ဖြတ်ခံထားရသော အနီရောင်သတ္တဝါများသည် သွေးလမ်းကြောင်းကြီး ဖြစ်နေသည်။ လမ်းတစ်လျှောက်တွင် ချူယန်၏ အဖွဲ့မှ ငယ်ရွယ်သောအသက်ပေါင်းများစွာကို စတေးခဲ့ရသည်။ လွှတ်တင်ရေးစခန်း၏ အစွန်းဘက်ရှိ ပလက်ဖောင်းတစ်ခုပေါ်တွင် သယ်ယူပို့ဆောင်ရေးယာဉ်ငယ်တစ်စီး ဆိုက်ကပ်ထားသည်။

ကျန်ရှိနေသော အဖွဲ့ဝင်များမှာ ထူးဆန်းသောလူသားနှစ်ဦးကို ဆက်လက်တိုက်ခိုက်နေဆဲဖြစ်ပြီး ချူယန်သည် သယ်ယူပို့ဆောင်ရေးယာဉ်၏ ပလက်ဖောင်းပေါ်သို့ လိုက်ပါသွားခဲ့သည်။

ဂျူးလိယပ်စ်မှာ ယာဉ်ပေါ်တက်မည့် တံခါးဝတွင် ရပ်နေသည်။ မမျှော်လင့်ဘဲ အနောက်တိုင်းဝတ်စုံ ဝတ်ဆင်ထားသော နောက်ထပ် ဂျူးလိယပ်စ်တစ်ဦးက ယာဉ်ပေါ်မှ ဆင်းလာခဲ့သည်။

ထိုမြင်ကွင်းကို မြင်လိုက်ရချိန်တွင် ချူယန်၏ မျက်နှာအမူအယာ အနည်းငယ် ပြောင်းလဲသွားသည်။

“အံ့ဩသွားတာလား” ထိုဂျူးလိယပ်စ်သည် လမ်းတစ်လျှောက်ရှိ အလောင်းများကို တည်ငြိမ်စွာ ကြည့်လိုက်သည်။

“မင်းကို ကျေးဇူးတင်ရမယ်…. မင်းကြောင့်ပဲ ငါက မင်းရဲ့ ဝိညာဉ်စွမ်းအားအဖွဲ့အတွက် ပိုပြီးတော့ ထည့်သွင်းစဉ်းစားပေးခဲ့ရတာပါ”

ဂျူးလိယပ်စ် နှစ်ဦးမှာ ဘယ်နှင့်ညာမှနေ၍ ချူယန်ကို ကြည့်ကာ ပြုံးလိုက်ကြသည်။

ဆွစ်။

ရုတ်တရက် အနီရောင်အလင်းတန်းတစ်ခု တိုက်ခိုက်လာသည်။ ချူယန်သည် ဝိညာဉ်စွမ်းအားလှိုင်းကို အသုံးပြုကာ သူမ၏ ယန္တရားကိုယ်ကို လှည့်ပတ်လျက် ထိုတိုက်ခိုက်မှုကို ကပ်၍ ရှောင်တိမ်းလိုက်ရသည်။

“မင်းတို့ကို ငါ ဘာလို့ ဒီမှာ စောင့်နေတာလဲ သိလား”

ဂျူးလိယပ်စ် တစ်ဦးက လှောင်ပြောင်သော အမူအရာဖြင့် မေးလိုက်သည်။ သူ၏ မျက်နှာထက်တွင် အထက်စီးဆန်သော အပြုံးတစ်ခု ရှိနေသည်။

“ဖီးနစ်က စိတ်ပျက်အားငယ်မှုဆိုတာ တကယ်တမ်း ဘာလဲဆိုတာကို သိရဲ့လားဆိုတာ ငါ သိချင်နေလို့ပဲ”

ချူယန်၏ နုနယ်သော မျက်နှာထက်တွင် သွေးများ ဖုံးလွှမ်းနေသော်လည်း သူမ၏ အကြည့်များကတော့ တည်ငြိမ်နေဆဲ ဖြစ်သည်။ သူမသည် ရှေ့ရှိ ဂျူးလိယပ်စ် နှစ်ဦးကို သတိကြီးစွာ စူးစမ်းနေသလို၊ တစ်ချိန်တည်းမှာပင် အနီရောင်အလင်းတန်းဖြင့် လျင်မြန်စွာ လှုပ်ရှားနေသော စွမ်းအားရှင်ကိုလည်း မျက်စိရှင်ရှင်ဖြင့် စောင့်ကြည့်နေရသည်။ ရန်သူ၏ အရှိန်မှာ အလွန်ပင် မြန်ဆန်လှသဖြင့် သူမ၏ ဝိညာဉ်စွမ်းအား နယ်ပယ်အတွင်းသို့ ရောက်ရန် ခက်ခဲနေသကဲ့သို့၊ သူမဘက်မှလည်း ထိုသူတစ်ယောက်ထဲကို အာရုံစူးစိုက်ကာ အနိုင်ယူရန် ခဲယဉ်းနေသည်။

ဂျူးလိယပ်စ်က အေးစက်စွာ ရယ်မောလိုက်ပြီး “ဝိညာဉ်စွမ်းအား... စိတ်ကူးတစ်ခုတည်းနဲ့ လူသတ်နိုင်တဲ့ စွမ်းရည်၊ နတ်ဘုရားတစ်ပါးလောက် နီးစပ်တဲ့ ပြည့်စုံလုနီးပါး စွမ်းရည်ပေါ့။ဟမ့်... မြောက်အမေရိက ပူးပေါင်းတပ်ဦးရဲ့ ထိပ်သီးအဆင့်ပဲ။ အခု ဘာက မင်းကို တွန့်ဆုတ်နေစေတာလဲ”

“အော်... မင်းက ငါ့ကို မသတ်နိုင်လို့လား။ ငါ့ဆီကနေ အမှောင်ကမ္ဘာရဲ့ သတင်းအချက်အလက်တွေကို အကုန်အစင် ထုတ်ယူချင်နေတာကိုး။ ယဲ့လန်က ပြောပြထားမှာပေါ့၊၊ ဒါဟာ လူသားတွေအတွက် နောက်ဆုံးသော ကြိုတင်ပြင်ဆင်နိုင်တဲ့ အခွင့်အရေးဖြစ်ကောင်းဖြစ်နိုင်တယ်ဆိုတာလေ”

ဂျုးလိယပ်စ်က လှောင်ပြောင်ပြောဆိုနေသော်လည်း ချူယန်ကတော့ တုံ့ပြန်ခြင်း မရှိပေ။ သူမသည် အခြေအနေကို သတိအပြည့်နှင့် ထိန်းချုပ်ထားရင်း လင်းရှန်ကို ဆက်သွယ်လိုက်သည်။

“လင်းရှန်... နင့်ဘက်မှာ အခြေအနေ ဘယ်လိုလဲ။ ဂလက်ဆီနှလုံးသားကို ရဖို့ သေချာလား”

“အဲဒါက ထင်သလောက် မလွယ်ဘူး...”

လင်းရှန်၏ အသံမှာ အမောတကော ဖြစ်နေပြီး သူ၏ ကိုယ်ပေါ်တွင်လည်း ချွေးများ တသွင်သွင်ထွက်နေသည်။ ကြယ်နက်ပန်းပဲဖို၏ ထုတ်လုပ်မှု အစီအစဉ်အားလုံးမှာ ကေဘယ်လ်များနှင့် အတွင်းပိုင်း ကွန်ရက်ဂိတ် ကိရိယာများကို အဆက်မပြတ် ထုတ်လုပ်နေရသည်။ လင်းရှန်သည် ဤအတွင်းပိုင်း ကေဘယ်လ်ကို ထပ်ဆင့်လွှင့်စက်နှင့် ချိတ်ဆက်လိုက်သောအခါ ကီကီ ခန့်မှန်းခဲ့သကဲ့သို့ပင် ဧရာမနတ်ဘုရားတောင်ထိပ် လွှတ်တင်ရေးစခန်းတစ်ခုလုံးကို တင်းကျပ်သော အတည်ပြုချက် လျှို့ဝှက်ကုဒ်ဖြင့် ပိတ်ထားသည်ကို တွေ့လိုက်ရသည်။

သူချက်ချင်းပင် မျက်နှာပျက်သွားပြီး ချူယန်ကို လှမ်းပြောလိုက်သည်။

“အခု ပြဿနာတစ်ခု ရှိနေပြီ။ ဗဟိုထိန်းချုပ်မှုနဲ့ ဆက်တိုက်ချိတ်ဆက်ဖို့အတွက် ဂျူးလိယပ်စ်ရဲ့ မျက်ဝန်းအတည်ပြုချက် လိုအပ်တယ်”

Chapter 847

လွှတ်တင်ခြင်း ၅

ချူယန်က မျက်မှောင်ကြုတ်လိုက်သည်။

“အတင်းဖောက်ထွင်းလို့ မရဘူးလား”

“ပင်မဆာဗာရဲ့ မျက်ဝန်းသော့က ကုဒ်နှစ်ထပ်စနစ် သုံးထားတယ်၊၊ အချိန်မလောက်ဘူး။ သူကိုယ်တိုင် လိုအပ်တယ်”

လင်းရှန်က ရှင်းပြလိုက်သည်။

ချူယန်ကလည်း ရှေ့ရှိ ဂျူးလိယပ်စ် နှစ်ဦးကို တစ်ချက်ကြည့်ကာ “ငါ့ဘက်မှာလည်း အခြေအနေတချို့ရှိနေတယ်”

သူမ ကြုံတွေ့နေရသော အခက်အခဲကို လင်းရှန်နှင့် ညှိနှိုင်းလိုက်သည်။

“ဘယ်သူက အစစ်လဲဆိုတာ မင်း သိလား”

“သူတို့ကြားက ဝိညာဉ်စွမ်းအားအတက်အကျ ကွာခြားချက်ကို ငါ စကင်ဖတ်လို့ရတယ်။ ကိုယ်ပွားတွေက လေ့ကျင့်မှုနဲ့ အချိန်ကာလအရ ကွာဟချက်ရှိတတ်ပေမယ့် ဒီနှစ်ယောက်ကတော့ တစ်ပုံစံတည်း လေ့ကျင့်ထားပုံရတယ်၊၊ ဒါမှမဟုတ် နှစ်ယောက်လုံးက ဂျူးလိယပ်စ် အစစ်မဟုတ်တာလည်း ဖြစ်နိုင်တယ်”

ချူယန်က ကောက်ချက်ချသည်။

“အတော်ပါးနပ်တာပဲ…ဒါဆို ငါတို့ ဘာလုပ်ကြမလဲ”

လင်းရှန်က စိုးရိမ်တကြီး မေးလိုက်သည်။ အကယ်၍ နှစ်ယောက်လုံးမှာ ဂျူးလိယပ်စ် အစစ်မဟုတ်ပါက အမှောင်ကမ္ဘာနှင့် အမှန်တကယ် ချိတ်ဆက်ထားသူမှာ မည်သူနည်းဆိုသည်ကို ဆုံးဖြတ်ရန် ခက်ခဲသွားမည် ဖြစ်သည်။

ဘန်း ဘန်း

ချူယန်ရှိရာဘက်တွင် ပြင်းထန်သော ပေါက်ကွဲသံများနှင့်အတူ တိုက်ပွဲမှာ ပြန်လည်စတင်လာသည်။ သူမ၏ အနောက်မှ အဖွဲ့ဝင်များမှာ အနီရောင်သတ္တဝါတစ်ကောင်ကို သတ်ဖြတ်ပြီးနောက် စစ်ကူရောက်လာသော်လည်း၊ အနီရောင်အလင်းတန်းစွမ်းအားရှင်ကို ရင်ဆိုင်ရာတွင်တော့ အလွန်ပင် ရုန်းကန်နေရသည်။ ချူယန်၏ ကျန်ရှိသောအဖွဲ့ဝင် နှစ်ဦးမှာလည်း ဒဏ်ရာများ ရရှိသွားကြပြီ ဖြစ်သည်။ ချူယန်သည် ဆုတ်ခွာရန် အခွင့်အရေးကို အရယူလိုက်ပြီး လင်းရှန်ကို လှမ်းပြောလိုက်သည်။

“လောလောဆယ်တော့ ဂလက်ဆီနှလုံးသား ပြဿနာကို ငါတို့ အရင်ဖြေရှင်းရမယ်။ ကောင်းကင်ငြိမ်သက်ခြင်းသင်္ဘောနဲ့ သံမဏိအစောင့်တပ်ရင်း ၈၃ တို့က စစ်ကူလာနေပြီ၊၊ ဒါပေမဲ့ မိုးလင်းဖို့ ဘယ်လောက်လိုသေးလဲ ဘယ်သူမှ မသိဘူး။ အကယ်၍ လက်နက်စနစ်ကိုသာ သူတို့ သိမ်းပိုက်သွားရင် မြို့ထဲရော မြို့ပြင်ပါ ပျက်စီးသွားလိမ့်မယ်”

လင်းရှန်က ချွေးများကို သုတ်လိုက်သည်၊၊ သူသည် ပြုပြင်ရေးအလုပ်ကို အပြင်းအထန် လုပ်နေရင်း “ပြီးတော့ အနီရောင်ကမ္ဘာက မြေအောက်ကွန်ရက်ကိုလည်း နှောက်ယှက်ထားတယ်။ အဲဒီ သန္ဓေပြောင်းမွန်းစတားတွေက လွှတ်တင်ရေးစခန်း ဒါမှမဟုတ် တခြားလမ်းကြောင်းတွေကနေ မြို့ထဲကို တိုက်ရိုက်ဝင်နိုင်တယ်။ သူတို့က လူတိုင်းရဲ့ ထိတ်လန့်မှုအောက်မှာ တစ်မြို့လုံးအတိုင်းအတာနဲ့ စမ်းသပ်လေ့လာမှုတွေ လုပ်ဖို့ ကြံစည်နေတာပဲ”

ချူယန်က ထိုအချက်ကို ကြားလိုက်ရချိန်တွင် သူမ၏ မျက်လုံးများ ဝင်းလက်သွားသည်၊၊

“ဒီနှစ်ယောက်ထဲက ဘယ်သူက ဂျူးလိယပ်စ် အစစ်ဖြစ်ဖြစ်၊ ငါ တစ်ခုတော့ အတည်ပြုနိုင်တယ်”

“အဲ့ဒါက ဘာလဲ”

“အကယ်၍ အတည်ပြုချက် လိုအပ်တယ်ဆိုရင် မြူမီးခိုးမွန်းစတားကို အသက်သွင်းတာလည်း အပါအဝင်ပဲ။ ဒါကြောင့် မျက်ဝန်းအတည်ပြုချက် လုပ်နိုင်တဲ့သူဟာ သူတို့ထဲမှာ မဖြစ်မနေ ပါရမယ်”

လင်းရှန် သဘောပေါက်သွားသည်၊၊

“အမှန်ပဲ၊၊ ဂျူးလိယပ်စ်ရဲ့ သတိကြီးမှုနဲ့ဆိုရင် တစ်မြို့လုံးရဲ့ ဗဟိုထိန်းချုပ်မှုကို အနီရောင်ကမ္ဘာ အမှတ် ၃ က ရယူနိုင်ဖို့ သူ သေချာပေါက်လုပ်မှာပဲ။ မဟုတ်ရင် သူတို့ သေချာပြင်ဆင်ထားတဲ့ အစီအစဉ်တွေ အကုန် အလဟဿဖြစ်ကုန်မှာပေါ့”

သူသည် ခဏမျှ စဉ်းစားလိုက်ပြီးနောက် “ချူယန်... ဂျူးလိယပ်စ်ကို အလွတ်မပေးနဲ့။ ငါ အခုချက်ချင်း မင်းဆီကို လာခဲ့မယ်။ ဒီပြဿနာကို အဝေးကနေ ဖြေရှင်းနိုင်မယ့် နည်းလမ်း ငါ့မှာ ရှိတယ်”

“ကောင်းပြီ”

ချူယန်က သူမ၏ မျက်နှာပေါ်ရှိ သွေးများကို သုတ်လိုက်ပြီး တိုးညှင်းစွာ ပြန်ဖြေလိုက်သည်။

ထိုခဏတွင်ပင် ဧရာမနတ်ဘုရားတောင်ထိပ် လွှတ်တင်ရေးစခန်းအတွင်း၌ ကျယ်လောင်စူးရှသော သတိပေးသံကြီး ထွက်ပေါ်လာသည်။ လွှတ်တင်ရေး အစီအစဉ် စတင်တော့မည်ဖြစ်ကြောင်းနှင့် လွှတ်တင်ရေးတွင်းဝ ပွင့်နေပြီဖြစ်ကြောင်း အလိုအလျောက် သတိပေးချက်များ ထွက်ပေါ်လာချိန်တွင်၊ အာရုဏ်ဦးမြို့တော် ပြင်ပရှိ ဆင်ခြေဖုံးရပ်ကွက်များ၌ မြေပြင်မှာ ကွဲအက်ကာ ဧရာမ တံခါးကြီးမှာ ဖြည်းညှင်းစွာ ပွင့်လာသည်။ ချက်ချင်းပင် ရေတွက်မရနိုင်သော သန္ဓေပြောင်းမွန်းစတားများသည် အမှောင်ထုအတွင်းမှ တိုးဝှေ့ထွက်ပေါ်လာကြသည်။

မြေအောက် လွှတ်တင်ရေးစခန်းတစ်ခုလုံးတွင် ပေါက်ကွဲသံများ ဟိန်းထွက်နေပြီး သည်းထန်စွာ ရွာကျလာသော မိုးရေများက မြူမီးခိုးမွန်းစတားနှင့် အဆောက်အအုံများပေါ်သို့ စင်ထွက်နေသည်။ ဤမြင်ကွင်းကို ကြည့်ရင်း လင်းရှန်သည် ထပ်ဆင့်လွှင့်စက်ကို တပ်ဆင်ပြီးနောက် ဖိုတွန်သိုလှောင်မှုကိရိယာကို ရှီဇီထံ ကမ်းပေးလိုက်သည်။

“ရှီဇီ... ငါ ဒီမှာ အပြီးသတ်တော့မယ်။ ခဏနေရင် မင်းက ထိန်းချုပ်ရေးလျှို့ဝှက်ကုဒ်ကို ထိုးထည့်တဲ့ အလုပ်ကို တာဝန်ယူရမယ်”

“ကျွန်… ကျွန်မ..”

ရှီဇီ၏ မျက်နှာက ဖြူဖတ်ဖြူလျော်ဖြစ်သွားသည်။

လင်းရှန်သည် သူမ၏ ပုခုံးကို ခိုင်မာစွာ ဆုပ်ကိုင်လိုက်ပြီး ပြတ်သားစွာ ပြောလိုက်သည်။

“ငါပြောတာ နားထောင်..”

“အချိန်က ၃ မိနစ်ပဲ ကျန်တော့တယ်။ ၁၀ နာရီမှာ ချိတ်ဆက်မိတာနဲ့ အကာကွယ်ချိုးဖျက်ကိရိယာအသက်ဝင်မှုကြောင့် ဂလက်ဆီနှလုံးသားရဲ့ ဂိတ်တွေ ပွင့်လာလိမ့်မယ်။ အနီရောင်ကမ္ဘာဟာ ဒီအခွင့်အရေးကို သုံးပြီး ဂလက်ဆီနှလုံးသားကို ထိန်းချုပ်ဖို့ အသင့်ဖြစ်နေလိမ့်မယ်။ ဂျူးလိယပ်စ်က ဒီဒေသတွင်းဆာဗာမှာ လျှို့ဝှက်ကုဒ် သတ်မှတ်ထားပေမယ့် ချူကျောက်နန်က ၁၀ စက္ကန့်ကြာ offline ဖြစ်မယ့် အခြေအနေတစ်ခုကို တမင်ချန်ထားခဲ့တာကို သူ မသိဘူး။ ဘာလို့လဲဆိုတော့ အနီရောင်ကမ္ဘာ အမှတ် ၃ က တစ်မြို့လုံးကို ထိန်းချုပ်ဖို့အတွက် ၁၀ စက္ကန့်လောက် တွက်ချက်ရမှာမို့လို့ပဲ။ ဒါကြောင့် ဗဟိုထိန်းချုပ်မှုကို ငါတို့ ပြန်ရယူနိုင်ဖို့ ၁၀ စက္ကန့် အချိန်ရလိမ့်မယ်”

“ဒါပေမယ့်…”

ရှီဇီက သိသိသာသာ တုန်လှုပ်နေသည်၊၊ လင်းရှန်က သူမကို ယခုလို အရေးကြီးသောတာဝန်မျိုး ပေးလိမ့်မည်ဟု မမျှော်လင့်ထားပေ။

လင်းရှန်က သက်ပြင်းတစ်ချက်ရှိုက်လိုက်ပြီး ရှီဇီ၏ နားနားကပ်၍ အသံတိုးတိုးဖြင့် ပြောလိုက်သည်။

“မကြောက်ပါနဲ့။ မင်း ဒါကို လုပ်နိုင်မယ်လို့ ငါ ယုံကြည်တယ်”

“ကျွန်မ... ကျွန်မ...”

လင်းရှန်၏ ပြတ်သားသော မျက်လုံးများကို ကြည့်ရင်း ရှီဇီ၏ မျက်နှာမှာ နီမြန်းသွားပြီးနောက် အလေးအနက် ပြန်လည်ခေါင်းညိတ်ပြလိုက်သည်။

“နားလည်ပါပြီ”

လင်းရှန်သည် ထိန်းချုပ်ရေး လျှို့ဝှက်ကုဒ်သော့ကို ရှီဇီထံ အပ်နှံခဲ့ခြင်းမှာ သူမသည် ချူယန်မှလွဲ၍ ဤနေရာတွင် အမှောင်ထု၏ ကျူးကျော်မှုကို သက်ရောက်ခံရနှုန်း အနည်းဆုံးဖြစ်သောကြောင့်ပင်။

မူလက ဂရေ့စ်ကို ဤတာဝန်ပေးရန် စဉ်းစားခဲ့သော်လည်း ယခုအခါ ဂရေ့စ်မှာ အနီရောင်သတ္တဝါများကို ရင်ဆိုင်နေရသလို ဒရုန်းများကို အသုံးပြု၍ ဂိတ်ကို ပြုပြင်နေရသဖြင့် ရှီဇီတစ်ယောက်သာလျှင် ဤတာဝန်ကို ထမ်းဆောင်ရန် ကျန်ရှိတော့သည်။

ထို့နောက် လင်းရှန်သည် ကေဘယ်လ်ချိတ်ဆက်မှုကို အပြီးသတ်လိုက်ပြီး စွမ်းအားဝတ်စုံမှ တွန်းကန်အားဂျက်ဖြင့် ရှီဇီကို ခေါ်ကာ အဓိကထိန်းချုပ်ခန်းရှိရာ အထပ်သို့ ပြန်လည်ပျံသန်းလာခဲ့သည်။ ဤနေရာရှိ ကျယ်ပြန့်သော လမ်းမအဆင့်များမှာ ပြိုကျနေပြီဖြစ်ပြီး တစ်ခုလုံးမှာလည်း တုန်ခါယိမ်းထိုးနေသည်။

“ခေါင်းဆောင်ကျိုး၊ ခေါင်းဆောင်ချီ... အဓိကထိန်းချုပ်ခန်းနဲ့ ရှီဇီကို ကာကွယ်ပေးပါ”

“နားလည်ပြီ”

ဝုန်း။

အခြားတစ်ဖက်တွင်မူ ကီကီသည် အနိုင်ယူရန် မဖြစ်နိုင်သလောက်ရှိသော အမည်းရောင်ရေထု၏ ဖိနှိပ်မှုကို ခံနေရပြီး အသက်ရှူပင် ကျပ်နေပြီဖြစ်သည်။ သူမ၏ စိတ်စွမ်းအားမှာ သမုဒ္ဒရာနှင့် လေထုကို ရိုက်ခတ်နေရသကဲ့သို့ ဖြစ်နေသဖြင့် အလွန်ပင် ပင်ပန်းနွမ်းနယ်နေချေပြီ။

ထိုအမည်းရောင်ရေထုမှာ တစ်ခါတစ်ရံ မြူမိုးစက်များအဖြစ် ပြောင်းလဲသွားပြီး တစ်ခါတစ်ရံ လေထဲတွင် စီးဆင်းသွားကာ အလွန်ပင် လျင်မြန်ဖြတ်လတ်လှသည်။

လင်းရှန် ဤမြင်ကွင်းကို ကြည့်ကာ ချက်ချင်း ရိပ်မိသွားသည်။

“သူ့မှာ ခန္ဓာကိုယ်အစစ် ရှိတယ်၊၊ ဒီရေတွေက သူမ ထိန်းချုပ်ထားတဲ့ ဒြပ်ပြောင်းလဲမှုတွေပဲ”

“ဂရေ့စ်... အဲ့ဒီစွမ်းအားရှင်ရဲ့ ခန္ဓာကိုယ်အစစ်ကို ရှာစမ်း”

“ဂရေ့စ်”

[ဂရေ့စ် နားလည်ပါပြီ]

ဝီ။

ရာနှင့်ချီသောဒရုန်းများမှာ မုန်တိုင်းတစ်ခုကဲ့သို့ လည်ပတ်ကာ စကင်ဖတ်လိုက်သည်၊၊ အထပ်တစ်ခုတွင် အမည်းရောင်အရိပ်တစ်ခုကို အမှန်တကယ်ပင် ရှာတွေ့သွားသည်။ ခဏချင်းမှာပင် ဒရုန်းအမြောက်အမြားက ထိုခန္ဓာကိုယ်အစစ်ကို ပစ်ခတ်လိုက်ရာ အမည်းရောင်ရေထုသည် ကာကွယ်ရန် အမြန်ပင် ပြေးလွှားသွားသည်။

ကီကီက ထိုအခွင့်အရေးကို အရယူကာ ဖိနှိပ်လိုက်ရာ နှစ်ဖက်စလုံး၏ စွမ်းအားချင်းထိတွေ့မှ ပေါက်ကွဲသံများ ထွက်ပေါ်လာသည်။

လင်းရှန်သည် အဓိကထိန်းချုပ်ခန်းထဲသို့ အခွင့်ကောင်းယူကာ ဝင်ရောက်လိုက်ပြီး သံမဏိအကာအကွယ်ဒရုန်းများနှင့် တည်ဆောက်ရေးဒရုန်းများကို အသုံးပြု၍ ထိန်းချုပ်ခန်းတစ်ခုလုံးကို ဝန်းရံကာကွယ်လိုက်သည်။

“ကပ္ပတိန်လင်း” ကျိုးကျင်းသည် တစ်ကိုယ်လုံး သံမဏိအဖြစ်ပြောင်းလဲထားသောပုံစံဖြင့် ချဉ်းကပ်လာသည်။

“အဲဒီ ထူးဆန်းသောလူသားတွေ ပိုများလာပြီ”

“ဒီထိန်းချုပ်ခန်းကိုပဲ အခိုင်အမာကာကွယ်ထားပေးပါ”

“ကောင်းပြီ”