အခန်း (၈၄၈-၈၄၉)

Chapter 848

လွှတ်တင်ခြင်း ၆

ခဏချင်းမှာပင် အဖွဲ့ဝင်အားလုံးမှာ တိုက်ခိုက်ရင်း ဆုတ်ခွာလာကြပြီး အဓိကထိန်းချုပ်ရေးဗဟိုကို ဝန်းရံလိုက်ကြသည်။ လင်းရှန်မှာမူ စွမ်းအားဝတ်စုံ၏ တွန်းကန်အားစနစ်ကို သုံးကာ ဒရုန်းအချို့နှင့်အတူ အပေါ်ဘက်ရှိ လွှတ်တင်ရေးစခန်းဆီသို့ ပျံတက်သွားသည်။

ရန်သူများသည် လင်းရှန်၏ ရည်ရွယ်ချက်ကို ရိပ်မိသွားပုံရပြီး အဆောက်အဦးကိုယ်ထည်အတွင်းမှ သိပ်သည်းလှသော အမည်းရောင်ရေမြားများမှာ သည်းထန်စွာ ရွာကျလာသော မိုးကဲ့သို့ ထွက်ပေါ်လာကာ လင်းရှန်ကို တားဆီးရန် ကြိုးစားလာသည်။

ဝုန်း။

စိတ်စွမ်းအားလှိုင်းတစ်ခု ရိုက်ခတ်လာပြီး ကီကီက အမြန်ရောက်ရှိလာသည်။ သူမသည် အံကြိတ်၍ စိတ်စွမ်းအားဖြင့် အကာအကွယ်ဒိုင်းတစ်ခု ပြုလုပ်ကာ လင်းရှန်ကို ကာကွယ်ပေးလိုက်သည်။ သူမ၏ နှာခေါင်းမှ သွေးများ တရစပ် စီးကျလာသည်။

လင်းရှန်က သူမကို ကူညီရန် ပြင်လိုက်သော်လည်း ကီကီက လက်မခံဘဲ စိတ်စွမ်းအားဖြင့် သူ့ကို အပေါ်သို့ ပို၍ မြှင့်တင်ပေးလိုက်သည်။

“ကျွန်မကို ဂရုမစိုက်နဲ့၊ မြန်မြန်သွားတော့”

အချိန် ၂ မိနစ်သာ ကျန်တော့သည်။

လင်းရှန်လည်း အချိန်ထပ်မဖြုန်းနိုင်တော့ပေ။ ကီကီ၏ စိတ်စွမ်းအားအရှိန်ကို တွန်းကန်အားစနစ်နှင့် ပေါင်းစပ်ကာ သည်းထန်လှသော မိုးရေများကြားမှ အပေါ်သို့ တိုးထွက်လိုက်ရာ နောက်ဆုံးတွင် မြေပြင်ပေါ်သို့ ရောက်ရှိသွားတော့သည်။

ဤခဏတွင် ကောင်းကင်နှင့် မြေကြီးကြား၌ ည၏ အမှောင်ထုကိုပင် ခွဲခြား၍ မရနိုင်တော့ပေ။ အာရုဏ်ဦးမြို့တော်၏ မြင့်မားသော အမှတ် (၁) မြို့ရိုးကြီး၏ အပြင်ဘက်တွင် ပြင်းထန်လှသော ဗုံးကြဲသံနှင့် အမြောက်သံများမှာ မိုးကြိုးမုန်တိုင်းများတိုက်ခတ်နေသကဲ့သို့ ရှိနေသည်။ သန္ဓေပြောင်းမွန်းစတားလှိုင်းလုံးကြီးများမှာ အဆုံးမရှိသကဲ့သို့ပင်။ မြင့်မားသောသတ္တဝါကြီးများမှာ မြို့ရိုးပေါ်သို့ တွားတက်ကာ တိုက်ခိုက်နေကြသည်၊၊ ကွန်ကရစ်နှင့် သံချပ်ကာပေါင်းစပ်မြို့ရိုးကြီးမှာလည်း နေရာအနှံ့ ပျက်စီးနေချေပြီ။

မြို့အတွင်း၌လည်း အသက်ရှင်ကျန်ရစ်သူများမှာ ကောင်းကင်မှ ကျဆင်းလာသော သတ္တဝါများနှင့် တိုက်ခိုက်နေကြရသည်။ စစ်ပွဲ၏ မီးခိုးငွေ့များမှာ အမည်းရောင် တိမ်တိုက်များကဲ့သို့ ထွက်ပေါ်နေပြီး ကီလိုမီတာ တစ်ဒါဇင်ခန့် အကွာအဝေးမှပင် သွေးညှီနံ့နှင့် မီးလောင်နံ့များကို လင်းရှန် ရရှိနေသည်။

အဓိကထိန်းချုပ်ခန်းဘက်တွင်မူ...

ကျိုးကျင်းသည် ရှီဇီ၏ လက်ထဲရှိ လျှို့ဝှက်ကုဒ်ကို မြင်လိုက်ရချိန်တွင် သူတို့၏ တာဝန်ကို ချက်ချင်း နားလည်သွားသည်။ သံချပ်ကာဝတ် ထူးဆန်းသောလူသားက ကြောက်မက်ဖွယ်ကောင်းအောင် ပြေးဝင်လာချိန်တွင် သူသည် အံကြိတ်ကာ တိုက်ရိုက်ရင်ဆိုင်လိုက်သည်။

“လီစူး၊ ရှောင်ယန်... ဒီနေရာကို အသေခံကာကွယ်ကြ”

“နားလည်ပါပြီ”

“အဘိုးကြီးချီ၊ ထိန်းချုပ်ခန်းကို ပြိုကျအောင် မလုပ်နဲ့ဦး၊ စစ်မြေပြင်ကို ခွဲထုတ်လိုက်”

“ငါ သိပါတယ်”

ချီနိုသည် တစ်ကိုယ်လုံး သွေးများဖြင့် စွန်းထင်းနေပြီး လက်နှစ်ဖက်စလုံး တုန်ခါနေသည်။ သူ၏ အဖွဲ့ငယ်လေးခုမှာ မနေ့ညကတည်းက မြေအောက်ခံတပ်လမ်းကြောင်းအထိ တိုက်ပွဲဝင်ခဲ့ကြရာ ယခုအခါ လူ ၄၀ ကျော်တွင် ၂၀ ပင် မပြည့်တော့ပေ။

မီးတောက်နေသော အနီရောင်သတ္တဝါများက စင်္ကြံလမ်းမှ ပြေးဝင်လာရာ ချီနိုသည် အဖွဲ့ဝင်နှစ်ဦးနှင့်အတူ ရှေ့သို့ ပြေးထွက်သွားသည်။

“ဝေချန်း၊ ကျန်းရွှီဖေး... ငါ့အတွက် အဲဒီကောင်ရဲ့ ပါးစပ်ကို ပိတ်ပေးထားစမ်း”

“ကောင်းပြီ”

ဝုန်း။

အဓိကထိန်းချုပ်ခန်းအတွင်း ဒရုန်းအမြောက်အမြားက ပျက်စီးနေသောကိရိယာများကို အမြန်ဆုံး ပြုပြင်နေကြသည်။ ထိန်းချုပ်ခန်း၏ ထိပ်နှစ်ဖက်စလုံးတွင်လည်း ပြင်းထန်သော တိုက်ပွဲများ ဖြစ်ပွားနေသည်။ စင်္ကြံလမ်းတွင် လီစူး၊ ရှောင်ယန်နှင့် ညလမ်းလျှောက်သူအဖွဲ့ဝင်များမှာ ပြင်းထန်စွာ တိုက်ခိုက်နေကြရသလို ထိန်းချုပ်ခန်း အပြင်ဘက်တွင်လည်း တိုက်ပွဲများမှာ ပိုမိုပြင်းထန်လာသည်။

ရှီဇီသည် လျှို့ဝှက်ကုဒ်ကို ကိုင်ထားရင်း အချိန်ကိုသာ စိုက်ကြည့်နေသည်။ ပြတင်းပေါက်မှတစ်ဆင့် သူမ၏ မျက်လုံးများထဲတွင် ဧရာမ S-Class အဆင့် သတ္တဝါကြီးဆီမှ ကြောက်မက်ဖွယ်ကောင်းသော အမည်းရောင် အဖျက်စွမ်းအင်ဓာတ်ငွေ့များ ထွက်ပေါ်နေသည်ကို မြင်နေရသည်။

အချိန် ၁ မိနစ်သာ ကျန်တော့သည်။

အလိုအလျောက် စက်ကိရိယာများအောက်တွင် လောင်စာဆီမျှော်စင် ကေဘယ်လ်များမှာ စတင်ကွာကျလာပြီး ဟိုက်ဒရောလစ်အထောက်အပံ့မျှော်စင်များမှာလည်း တဖြည်းဖြည်းချင်း ခွဲထွက်လာသည်။

တီ။ တီ။

အဝါရောင် သတိပေးသံများမှာ ဧရာမနတ်ဘုရားတောင်ထိပ် လွှတ်တင်ရေးမျှော်စင်တစ်ခုလုံးတွင် ပဲ့တင်ထပ်နေပြီး ထိုအသံတစ်ခုချင်းစီမှာ တူကြီးနှင့် ထုရိုက်နေသကဲ့သို့ပင်။

စင်္ကြံလမ်းတွင် ရင်ဘတ်ကို လက်သည်းများဖြင့် အထိုးခံထားရသော ရှောင်ယန်က နောက်ဆုံးထွက်သက်မတိုင်မီ ဒေါသတကြီး အော်ဟစ်ကာ လျှပ်စစ်ဓားနှစ်လက်ကို အနီရောင်သတ္တဝါ၏ မေးရိုးထဲသို့ ထိုးစိုက်လိုက်ရာ ဦးခေါင်းခွံကိုပါ ဖောက်ထွက်သွားသည်။

လက်တစ်ဖက်သာ ကျန်တော့သော လီစူးသည်လည်း စင်္ကြံလမ်းတွင် တပ်ဆင်ထားသော ဖောက်ခွဲရေးပစ္စည်းများကို ဖောက်ခွဲပစ်လိုက်ရာ တိုးဝင်လာသော ထူးဆန်းသောလူသားများသည် သူနှင့်အတူ အရှင်လတ်လတ် မြေမြုပ်ခံလိုက်ရပြီး ခန်းမလမ်းကြောင်းမှာ လုံးဝ ပိတ်ဆို့သွားတော့သည်။

ထိန်းချုပ်ခန်းဘက်တွင်မူ ညလမ်းလျှောက်သူအဖွဲ့ဝင်များမှာ ထူးဆန်းသောလူသားများစွာ၏ ဖိနှိပ်မှုကြောင့် ထိန်းချုပ်ခန်း အပြင်ဘက်အထိ ထွက်၍ တိုက်ခိုက်နေရပြီး ယခုအခါ ၁၀ ယောက်ပင် မပြည့်တော့ပေ။ တစ်ကိုယ်လုံး သံမဏိရောင်ပြောင်းနေသော ကျိုးကျင်းသည် ထိုသံချပ်ကာလူမည်းကြီးကို ကွန်ကရစ်နံရံများထဲသို့ ဆွဲသွင်းလိုက်သည်၊၊ ထိုသံချပ်ကာလူမည်းကြီး၏ ခွန်အားမှာ ကြောက်စရာကောင်းလှပြီး ကျိုးယန်၏ မာကျောသော လက်ကောက်ဝတ်အရိုးများကိုပင် ချိုးပစ်လိုက်နိုင်သည်။ ကျိုးကျင်း၏ သွေးစွမ်းအင်များ ပေါက်ကွဲထွက်လာကာ လူမည်းကြီး၏ လည်ပင်းကို ကိုက်ခဲ၍ အသက်ရှူပိုက်နှင့် မေးရိုးတစ်စိတ်တစ်ပိုင်းကိုပါ ဆွဲဖြုတ်ပစ်လိုက်သည်။

သွေးချောင်းစီး တိုက်ပွဲကြီးပင်။

လင်းရှန်သည် လွှတ်တင်ရေးတွင်းထဲမှ လျှပ်စီးလက်သလို ပျံထွက်လာပြီးနောက် ပလက်ဖောင်းအစွန်းမှာ ရှိနေသည့် သယ်ယူပို့ဆောင်ရေးယာဉ်ဆီကို ဦးတည်လိုက်သည်။ ထိုနေရာတွင် ချူယန်သည် ဂျူးလိယပ်စ် နှစ်ယောက်ကြားမှာ ပိတ်မိနေပြီး အနီရောင်အလင်းတန်းရှင် စွမ်းအားရှင်ရဲ့ နှောက်ယှက်မှုကိုပါ ခံနေရတာကို မြင်လိုက်ရ၏။

“သတိထား”

လင်းရှန် ဘာမှမပြောရသေးမီမှာပင် ဆက်သွယ်ရေးစက်မှတစ်ဆင့် ချူယန်၏ သတိပေးသံက အရင်ဆုံး ထွက်ပေါ်လာသည်။

ဝှစ်။

လေခွင်းသံနှင့်အတူ အနီရောင်အလင်းတန်းတစ်ခုက လျင်မြန်စွာ ဖြတ်သန်းသွားသည်။ လင်းရှန်သည် လေထဲ၌ ရှိနေစဉ်မှာပင် မသိစိတ်ဖြင့် AT Field ဒိုင်းကို ထုတ်၍ ခုခံလိုက်သော်လည်း၊ ပြင်းထန်လှသော ရိုက်ခတ်မှုကြောင့် အမြောက်ဆန်တစ်ခုကဲ့သို့ မြေပြင်ပေါ်သို့ လွင့်စင်ကျသွားတော့သည်။ သူ ပြန်ထရန် ကြိုးစားစဉ်မှာပင် အခြားသော သန္ဓေပြောင်းသတ္တဝါတစ်ကောင်က လက်သီးကို မြှောက်ကာ သူ့ထံသို့ ဦးတည်လာပြန်သည်။

ဝုန်း။

အရေးကြီးသော အချိန်တွင် ချူယန်၏ အဖွဲ့ဝင်အမျိုးသမီးတစ်ဦး အမြန်ရောက်ရှိလာပြီး လေဓားကို အသုံးပြုကာ ထိုသတ္တဝါ၏ လက်တစ်ဖက်ကို ဖြတ်တောက်ပစ်လိုက်သည်။ ထို့နောက် သူမသည် လင်းရှန်ကို ဘေးသို့ တွန်းထုတ်လိုက်သော်လည်း၊ သူမကိုယ်တိုင်မှာမူ နောက်ကျောကို လက်သီးဖြင့် အထိုးခံလိုက်ရသဖြင့် သွေးများ အန်ထွက်သွားရသည်။ ဘေးလွတ်ရာသို့ ရောက်သွားသော လင်းရှန်သည် ထိုအမျိုးသမီးကို ဆွဲထုတ်လိုက်ပြီး ဖျက်ဆီးရေးဒရုန်းတစ်ခုကို ရန်သူထံသို့ ပစ်လွှတ်လိုက်သည်။ ချက်ချင်းပင် သူသည် Black Hawk တိုက်ပွဲဝင်ဝတ်စုံ၏ နောက်ကျောရှိ တွန်းကန်အားစနစ်ကို အသက်သွင်းကာ အမျိုးသမီးအဖွဲ့ဝင်ကို လေထဲသို့ ပစ်တင်ပြီးနောက်၊ လျှပ်စစ်တူဖြင့် သန္ဓေပြောင်းသတ္တဝါ၏ ဦးခေါင်းကို ပြင်းထန်စွာ ရိုက်ချလိုက်သည်။ ထိုသတ္တဝါသည် ဖျက်ဆီးရေးဒရုန်းပေါ်သို့ မှောက်လျက်သား ပြုတ်ကျသွားသည်။

အုန်း။

ပြင်းထန်လှသော ပေါက်ကွဲမှုကြီး ဖြစ်ပွားသွားပြီး လင်းရှန်သည် စူပါစတင်းဓာတ်ပေါင်းဖိုမှတစ်ဆင့် AT AT Field ဒိုင်းကို ဖြန့်ကျက်ကာ ကာကွယ်လိုက်သည်။ ပြင်းထန်သော ရိုက်ခတ်မှုလှိုင်းကြောင့် သူတို့နှစ်ဦးစလုံး မီတာဒါဇင်နှင့်ချီ၍ လွင့်စင်သွားကြသည်။ မီးခိုးများနှင့် အပျက်အစီးများကြားတွင် လင်းရှန်မှာ သူ၏ မျက်နှာဖုံးအတွင်းမှ ကိုယ်ပိုင်အသက်ရှူသံကိုသာ ကြားနေရပြီး၊ ပြင်းထန်သော ပေါက်ကွဲမှုကြောင့် သူ၏ အရိုးအဆစ်များ ပြုတ်ထွက်သွားသကဲ့သို့ ခံစားနေရသည်။ စွမ်းအားဝတ်စုံ၏ ဟိုလိုဂရပ်ဖစ်မျက်နှာပြင်မှာလည်း တဖျပ်ဖျပ်တုန်ခါနေပြီး အချိန်များမှာ တစ်စက္ကန့်ပြီး တစ်စက္ကန့် ကုန်ဆုံးနေသည်။

သူသည် မျက်နှာဖုံးပေါ်ရှိ မီးခိုးများကို သုတ်လိုက်ပြီး ဘေးနားရှိ အဖွဲ့ဝင်အမျိုးသမီးကို ကြည့်လိုက်ရာ သူမမှာ အသက်ရှိသေးသလား၊ သေသွားပြီလားဆိုသည်ကို မသေချာပေ။ သူ ဒယိမ်းဒယိုင်ထရပ်ကာ ချူယန်ရှိရာသို့ သွားရန် ပြင်လိုက်စဉ် အနီရောင်အလင်းတန်းစွမ်းအားရှင်သည် ပျောက်ကွယ်သွားပြီဖြစ်ကြောင်း တွေ့လိုက်ရ၏။ လင်းရှန်သည် ချက်ချင်းပင် အသင့်ပြင်လိုက်သည်၊၊ ထိုခဏ၌ပင် ဆက်သွယ်ရေးစက်မှတစ်ဆင့် ချူယန်၏ အသံကို ကြားလိုက်ရသည်။

“လင်းရှန်... လင်းရှန်၊ ငါပြောတာ ကြားရလား”

“ကြားရတယ်”

“လွှတ်တင်တော့မယ်။ အတွင်းပိုင်း ကွန်ရက်ကိရိယာတွေ ပြုပြင်ပြီးပြီလား”

လင်းရှန်သည် ဟိုလိုဂရပ်ဖစ်မျက်နှာပြင်ပေါ်ရှိ ဂရေ့စ် ပေးပို့ထားသော အချက်အလက်များကို ကြည့်လိုက်ရာ ၉၈ ရာခိုင်နှုန်းသို့ ရောက်ရှိနေပြီ ဖြစ်သည်။

Chapter 849

လွှတ်တင်ခြင်း ၇

“ရခါနီးပြီ”

“ဒီမှာ မျက်ဝန်းစကင်ဖတ်ပြီး လော့ခ်ဖွင့်ပေးနိုင်တဲ့သူ ရှိနေတယ်။ ဖြစ်နိုင်တာက ဒီလူဟာ အမှောင်ကမ္ဘာအကြောင်း သတင်းအချက်အလက်တွေကိုလည်း သိနေလိမ့်မယ်...”

ဂျူးလိယပ်စ်သည် အပျက်အစီးများကြားမှ ခဲယဉ်းစွာ ရုန်းထွက်လာသော လင်းရှန်ကို ကြည့်ကာ မထီမဲ့မြင် ပြုံးလိုက်သည်။

“ချူကျောက်နန်က အခြေခံမူတွေကို ဖောက်ဖျက်ပြီး ‘လူသားတွေ ရှုံးနိမ့်ခြင်း’ ဆိုတဲ့ သီအိုရီကို လက်တွေ့သက်သေပြသွားတယ်။ ဒါတင်မကသေးဘူး၊ မင်းတို့ ဖီးနစ်ကိုလည်း သင်ခန်းစာတစ်ခု ပေးသွားခဲ့တာပဲ”

ဂျူးလိယပ်စ်က အချိန်ကို ကြည့်လိုက်ပြီးနောက် သူ၏ လက်ပတ်နာရီကို သူတို့နှစ်ဦးထံ မြှောက်ပြလိုက်သည်။

“အော်... မင်းတို့မှာ အချိန်မရှိတော့ဘူးထင်တယ်”

လင်းရှန်နှင့် ချူယန်တို့ လှမ်းကြည့်လိုက်သောအခါ အချိန်မှာ ၉:၅၉ မှ ၁၀:၀၀ သို့ ကူးပြောင်းသွားချေပြီ။

[လွှတ်တင်ရေး အစီအစဉ် စတင်ပါပြီ၊၊ စက်နှိုးရန် နောက်ပြန်ရေတွက်ခြင်း စတင်ပြီ]

ဝုန်း။

ဧရာမနတ်ဘုရားတောင်ထိပ် လွှတ်တင်ရေးစခန်းတစ်ခုလုံး တုန်ခါသွားပြီး ယန္တရားအသံများနှင့်အတူ သတိပေးသံများ အားလုံး ရပ်တန့်သွားသည်။ တစ်ချိန်တည်းမှာပင် အဝေးမှ အမှတ် (၁) မြို့ရိုးပေါ်ရှိ လက်နက်မျိုးစုံနှင့် အလိုအလျောက် အမြောက်သံများမှာလည်း ရုတ်တရက် ငြိမ်ကျသွားသည်။ ထိုခဏ၌ ကောင်းကင်မှာ လင်းထိန်ခြင်း မရှိသေးဘဲ၊ မှောင်မည်းနေသော မိုးရေကန့်လန့်ကာအောက်တွင် သန္ဓေပြောင်းမွန်းစတားများသည် လှိုင်းလုံးကြီးများကဲ့သို့ ရှေ့သို့ တိုးဝင်လာကြသည်။ မြို့ရိုးပေါ်တွင် အသေခံတိုက်ခိုက်နေကြသော တပ်ဖွဲ့ဝင်များနှင့် သန်းနှင့်ချီသော အသက်ရှင်ကျန်ရစ်သူများမှာ ကမ္ဘာကြီးတစ်ခုလုံး ရုတ်တရက် တိတ်ဆိတ်သွားသကဲ့သို့ ခံစားလိုက်ရပြီး ချက်ချင်းပင် ပြင်းထန်သော ကြောက်ရွံ့မှုများက လူတိုင်း၏ နှလုံးသားထဲတွင် အမြစ်တွယ်လာတော့သည်။

“လက်နက်တွေ ရပ်သွားပြီ”

“ခဲယမ်းတွေ ကုန်သွားတာလား”

မြို့ရိုးပေါ်ရှိ တပ်သားများက အော်ဟစ်နေကြပြီး တပ်မှူးသည် ချွေးအေးများ ထွက်နေသည်။

“လူကိုယ်တိုင်သုံး လက်နက်တွေနဲ့ ပြန်တိုက်ကြ။ ယန္တရားတပ်ရင်းတွေ အားလုံး မြို့ရိုးပေါ် တက်ကြစမ်း”

အလိုအလျောက် လက်နက်စနစ်များ အားလုံး ရပ်တန့်သွားချိန်တွင် အာရုဏ်ဦးမြို့တော်၏ ခုခံစစ်စွမ်းအားမှာ ချက်ချင်းပင် သုံးပုံနှစ်ပုံခန့် လျော့နည်းသွားသည်။ သန္ဓေပြောင်းမွန်းစတားများစွာသည် မြို့ရိုးပေါ်သို့ တိုးဝှေ့တက်လာကြပြီး ဧရာမသတ္တဝါကြီးများကလည်း ပျက်စီးနေသော မြို့ရိုးအစိတ်အပိုင်းများကို တိုက်ခိုက်နေကြသည်။ ကောင်းကင်ယံ၌လည်း ပျံသန်းနိုင်သော သတ္တဝါအုပ်ကြီး ထွက်ပေါ်လာရာ အာရုဏ်ဦးမြို့တော်အတွင်း၌ အကူအညီတောင်းအော်ဟစ်သံများသာ ဖုံးလွှမ်းသွားတော့သည်။ လွှတ်တင်ရေးတွင်းဝအနီး၌ စက်ရုပ်အသံဖြင့် နောက်ပြန်ရေတွက်သံများ ထွက်ပေါ်လာသည်။

[လွှတ်တင်ရေး အစီအစဉ် နောက်ပြန်ရေတွက်ခြင်း စတင်ပါပြီ]

[၁၀]

[၉]

“လင်းရှန်”

ချူယန်၏ မျက်နှာမှာ ပြတ်သားမှုများဖြင့် ပြည့်နှက်နေပြီး လင်းရှန်ကို တည်ငြိမ်စွာ အော်ပြောလိုက်သည်။

“ငါပြောတာ နားထောင်၊ ခဏနေရင် ငါ ဂျူးလိယပ်စ်ကို ထိန်းချုပ်ထားမယ်။ နင်က သူ့ရဲ့ မျက်ဝန်းကို စကင်ဖတ်၊ ပြီးရင်တော့...”

[၈]

လက်နက်များ အားလုံး ရပ်တန့်သွားသည်ကို မြင်လိုက်ရသောအခါ ဂျူးလိယပ်စ်၏ တင်းမာနေသော မျက်နှာမှာ အပြုံးတစ်ခုအဖြစ် ပြောင်းလဲသွားသည်။

“ဒီခမ်းနားတဲ့ မြင်ကွင်းကို ကြည့်လိုက်စမ်းပါ။ မင်းတို့ကို ငါ မသတ်ပါဘူး၊၊ ဘာပဲဖြစ်ဖြစ် မင်းတို့နှစ်ယောက်လုံးက ငါ့အတွက် တန်ဖိုးအရှိဆုံး စမ်းသပ်ခံသက်ရှိတွေပဲ”

“အခုတော့ ဒီအရှုပ်အထွေးတွေကို ဖီးနစ်ကိုပဲ ရှင်းခိုင်းလိုက်တော့မယ်။ ငါ့ရဲ့ စမ်းသပ်ကွင်းထဲကနေ အမြန်ဆုံး ထွက်ပြေးကြစမ်းပါ။ ဖြစ်နိုင်ရင် မင်းတို့ရဲ့ အမှိုက်သရိုက်တွေထဲက တစ်သန်း၊ နှစ်သန်းလောက်ကို ခေါ်သွားနိုင်လိမ့်ဦးမှာပါ။ ဟားဟား... ဒါပေမဲ့ တကယ်တမ်းတော့ အဲဒါက အရေးမကြီးပါဘူး။ မင်းတို့အတွက်တော့ အဲဒီ အိုမင်းမစွမ်းတဲ့သူတွေ၊ အမျိုးသမီးတွေ၊ ကလေးတွေနဲ့ အားနည်းတဲ့သူတွေက ဘာမှတန်ဖိုးရှိတာ မဟုတ်ဘူး။ အဲဒီယာဉ်တန်းကြီးတွေနဲ့ အဆင့်မြင့် ပြောင်းလဲထားတဲ့ အားကောင်းတဲ့သူတွေဆိုရင် ဒီဝန်ထုတ်ဝန်ပိုးတွေ မရှိတော့တာကို ပိုတောင် ဝမ်းသာကြဦးမယ်။ တကယ်တမ်းတော့ ငါတို့ အနီရောင်ကမ္ဘာက မင်းတို့ရဲ့ ပြဿနာကို ကူညီဖြေရှင်းပေးလိုက်တာပဲ မဟုတ်လား”

ဂျူးလိယပ်စ်က လှောင်ပြောင်လိုက်သည်။

“ငါက မင်းအမေကို အရင်ဖြေရှင်းပေးလိုက်မယ်”

လင်းရှန်က အံကြိတ်ကာ တုံ့ပြန်လိုက်သည်။ သူက ချူယန်ကို ကြည့်ကာ မေးလိုက်သည်၊၊

“အကယ်၍ သူ သေသွားရင်တောင် မင်းရဲ့ ဝိညာဉ်စွမ်းအားနဲ့ သူ့စိတ်ကို ဖောက်ဝင်လို့ ရသေးလား”

“ဦးနှောက် သေသွားရင်တောင် ဦးနှောက်ဆဲလ်တွေက ချက်ချင်းကြီး ရပ်ဆိုင်းသွားတာ မဟုတ်ဘူး။ နျူရွန်တွေရဲ့ လျှပ်စစ်စီးဆင်းမှုတွေ ရှိနေဦးမှာပဲ။ အတွေးတွေ၊ မှတ်ဉာဏ်တွေ၊ ဆုံးဖြတ်ချက်တွေနဲ့ အာရုံခံစားမှုတွေက မိနစ်အနည်းငယ်လောက်တော့ ဆက်ရှိနေဦးမှာပါ”

ချူယန်က ပြန်ဖြေလိုက်သည်၊၊

လင်းရှန်သည် အတွင်းပိုင်း ကွန်ရက်ဂိတ်၏ ပြုပြင်မှုအခြေအနေကို လှမ်းကြည့်လိုက်ရာ ၉၈ ရာခိုင်နှုန်းသို့ ရောက်ရှိနေပြီ ဖြစ်သည်။

“ဒါဆိုလည်း သူ့ကို သတ်ကြတာပေါ့”

သူက ဆုံးဖြတ်ချက်ချလိုက်သည်။

[၇]

ဂျူးလိယပ်စ်သည် ထိုစကားကို ကြားသော်လည်း တည်ငြိမ်နေဆဲ ဖြစ်သည်။

“အရမ်း နုံအတာပဲ။ ငါ့ရဲ့ ဒီခန္ဓာကိုယ်ထဲမှာ အမှောင်ကမ္ဘာရဲ့ သတင်းအချက်အလက်တွေ ရှိနေမယ်၊၊ ပြီးတော့ အဲဒါကို မင်းတို့ ဝိညာဉ်စွမ်းအားရှင်တွေ လာလုဖို့ ဒီအတိုင်း ထားပေးထားမယ်လို့ တကယ်ပဲ ထင်နေတာလား”

“ငါက တူညီတဲ့အမှားမျိုးကို နှစ်ခါ မလုပ်ဘူး”

သူက လှောင်သံနှောကာ ဆက်ပြောလိုက်သည်။ ထိုသို့ ပြောပြီးနောက် ဂျူးလိယပ်စ် နှစ်ဦးသည် သယ်ယူပို့ဆောင်ရေးယာဉ်ပေါ်သို့ တက်ရန် အသင့်ပြင်လိုက်ကြသည်။ သူတို့၏ လှုပ်ရှားမှုများမှာ တည်ငြိမ်လွန်းနေပြီး အောင်နိုင်သူတစ်ယောက်၏ အမူအရာမျိုးရှိနေကြသည်၊၊

[၆]

ထိုခဏတွင် ချူယန်က အားကုန်သုံး၍ အော်ဟစ်လိုက်သည်။

“လင်းရှန်... သူ့ကို ဖမ်းထားလိုက်တော့”

“မင်းတို့ထဲက တစ်ယောက်မှ လွတ်မှာမဟုတ်ဘူး”

လင်းရှန်က ကျယ်လောင်စွာ ကြုံးဝါးလိုက်ရင်း သူ၏ ယန္တရားစွမ်းအားကို အသက်သွင်းလိုက်ရာ သယ်ယူပို့ဆောင်ရေးယာဉ်၏ လှေကားထစ်များမှာ ချက်ချင်းပင် သံမဏိကြိုးများအဖြစ် ပြောင်းလဲသွားပြီး ဂျူးလိယပ်စ် နှစ်ဦးစလုံးကို တစ်ပြိုင်တည်း တုပ်နှောင်လိုက်သည်။

[၅]

ဂျူးလိယပ်စ်၏ မျက်မှောင်များ ချက်ချင်းပင် ကြုတ်သွားသည်။ ချူယန်၏ မျက်လုံးများထဲတွင် ဝိညာဉ်စွမ်းအားများ ပေါက်ကွဲထွက်ပေါ်လာသည်ကို သူ မြင်လိုက်ရသောကြောင့်ပင်။ ခဏချင်းမှာပင် ဂျူးလိယပ်စ် နှစ်ဦးစလုံး၏ မျက်လုံးများမှ သွေးများ စီးကျလာပြီး သူတို့၏ စိတ်အာရုံများမှာ ဗလာဖြစ်သွားကြသည်။ ဝိညာဉ်စွမ်းအားဖြင့် အတင်းအဓမ္မ ထိန်းချုပ်ခြင်းကို ခံလိုက်ရခြင်း ဖြစ်သည်။

[၄]

ထိုအချိန်တွင် အနီရောင်အလင်းတန်းစွမ်းအားရှင်က ရုတ်တရက် ပြန်လည်ပေါ်လာသည်။ သို့သော် သူသည် လင်းရှန်နှင့် ချူယန်ကို တိုက်ခိုက်ခြင်း မပြုဘဲ၊ ညာဘက်ရှိ ဂျူးလိယပ်စ်၏ နားထင်သို့ ဓားမြှောင်ဖြင့် တိုက်ရိုက်ထိုးစိုက်လိုက်သည်။

“စိတ်မကောင်းပါဘူး၊၊ မင်းတို့ ဒီလိုလုပ်မယ်ဆိုတာ ငါ ကြိုတွေးထားပြီးသားပဲ။ အကယ်၍ ပစ်မှတ်ရဲ့ စိတ်ဝိညာဉ်က သေဆုံးမှုဖြစ်သွားရင် အဲဒီစွမ်းအားကို သုံးတဲ့သူပါ လိုက်သေရလိမ့်မယ်”

အနီရောင်အလင်းတန်းစွမ်းအားရှင်က ကြောက်မက်ဖွယ်ကောင်းအောင် ပြုံးလိုက်သည်။ သို့သော် လင်းရှန်၏ မျက်နှာထက်တွင် ထိတ်လန့်တုန်လှုပ်မှုအစား သူ့ထံသို့ လက်ညှိုးတစ်ချောင်းသာ ဆန့်တန်းထားသည်ကိုသာ သူ တွေ့လိုက်ရသည်။

[၃]

ထိုသူ၏ မျက်နှာမှာ ချက်ချင်းပင် ပျက်သွားပြီး နောက်ဆုတ်ရန် ပြင်လိုက်သော်လည်း သူ၏အနောက်ရှိ ဟင်းလင်းပြင်မှာ ရုတ်တရက် လိမ်ရှုံ့သွားပြီး တွင်းနက်တစ်ခု ပေါ်လာကာ ထိုသူ၏ အသားစများနှင့်အတူ အနီရောင်အလင်းတန်းကိုပါ စုပ်ယူလိုက်သည်။ သူ၏ ထူးခြားသော အမြန်နှုန်းဖြင့်ပင် ထိုဆွဲအားမှ မလွတ်မြောက်နိုင်သည်ကို သိလိုက်ရချိန်တွင် သူသည် အလွန်အမင်း ထိတ်လန့်သွားတော့သည်။

“မဖြစ်နိုင်တာ”

လင်းရှန်သည် အံကို တင်းတင်းကြိတ်ထားရင်း ဒေါသတကြီးမာန်သွင်းလိုက်သည်။ သူ၏ ညာဘက်လက်တွင် ဆွဲငင်အားမှန်ဘီလူးကို ထုတ်သုံးထားပြီး ဘယ်ဘက်လက်ဖြင့် ကြယ်နက်ပန်းပဲဖိုကို တိုက်ရိုက် ဆင့်ခေါ်လိုက်သည်။

[၂]

ဝီ။ ဝီ။

လေထုထဲရှိ မိုးတိမ်တိုက်ကြီးများကြားတွင် ကြောက်မက်ဖွယ်ကောင်းသော ယန္တရားတံခါးကြီးတစ်ခု ဖြည်းညှင်းစွာ ပွင့်လာသည်။ ထိုတံခါးအတွင်းမှ ကေဘယ်လ်ကြိုးများဖြင့် ချိတ်ဆက်ထားသော ဆာဗာကွန်ရက်နှင့် အချက်အလက် ကိရိယာအစုံအလင်မှာ အမည်းရောင်မြွေတစ်ကောင်ကဲ့သို့ တိုးထွက်လာပြီး၊ ထိပ်ဆုံးရှိ မျက်ဝန်းအတည်ပြုစက်မှာ ဓားဖြင့် အထိုးခံထားရသော ဂျူးလိယပ်စ်၏ ခေါင်းဆီသို့ ပြေးဝင်သွားသည်၊၊

ဤမြင်ကွင်းမှာ ထူးခြားဆန်းကြယ်သော ယန္တရားပြကွက်တစ်ခုကဲ့သို့ပင်။ တစ်ချိန်တည်းမှာပင် လင်းရှန်၏ ဟိုလိုဂရပ်ဖစ်မျက်နှာပြင်ပေါ်၌ အတွင်းပိုင်းကွန်ရက် ပြုပြင်မှုမှာ ၁၀၀ ရာခိုင်နှုန်းသို့ ရောက်ရှိသွားချေပြီ။ ကွန်ရက်အချက်အလက်များမှာ တဖျတ်ဖျတ် လင်းလက်သွားပြီး ကေဘယ်လ်ကြိုးများမှာ သက်ရှိမြွေများကဲ့သို့ လှုပ်ရှားကာ၊ အတည်ပြုအလင်းတန်းမှာ ဂျူးလိယပ်စ်၏ မျက်နှာပေါ်သို့ ဖြတ်သန်းသွားပြီးနောက် “တီ” ဟူသော အသံနှင့်အတူ အစိမ်းရောင်အလင်းစက်လေး လင်းလာသည်။ ထိုအသံမှာ အလွန်တိုးညှင်းသော်လည်း၊ ဘယ်ဘက်ရှိ ဂျူးလိယပ်စ်ကို ဝိညာဉ်ထိန်းချုပ်မှုအောက်မှ နိုးထလာစေသည့် ခေါင်းလောင်းသံကြီးတစ်ခုကဲ့သို့ ဖြစ်နေသည်။