အခန်း (၁၃၉၅-၁၃၉၆)

အခန်း (၁၃၉၅) - ပဋိညာဉ် အောင်မြင်ခြင်း

ထိုအမာခံတပည့်၏ ကျင့်ကြံမှုအဆင့်မှာ သိပ်မမြင့်လှဘဲ အဆင့် ၁ မသေမျိုး မျှသာ ဖြစ်သည်။

ထို့ကြောင့် သူ ဖန့်ချန်အား ချည်နှောင်ထားသည့် မသေမျိုးစွမ်းအင်ကို ဖန့်ချန်အနေဖြင့် စက္ကန့်ပိုင်းအတွင်း ဖြတ်တောက်ပြီး ဓားဖြင့် သတ်ဖြတ်ပစ်နိုင်စွမ်း ရှိသည်။

သို့သော် ဖန့်ချန် ထိုသို့ မလုပ်ခဲ့ပေ။

ကြာနီနတ်မိမယ်ငယ်၏ နောက်ဆက်တွဲ အခြေအနေများကို သူ စောင့်ကြည့်လိုသေးသည်။

ထိုအမာခံတပည့်များကတော့ ကြာနီနတ်မိမယ်ငယ်နှင့် အစီရင်ဗဟိုချက် တို့ ပေါင်းစပ်မှုသည် အောင်မြင်လိမ့်မည်ဟု မထင်ကြပေ။

သို့သော် ဖန့်ချန်ကတော့ ထိုသို့ မယူဆပါ။

အကယ်၍ ထိုအရာအားလုံးမှာ ကြာနီနတ်မိမယ်ငယ် ကြိုတင်စီစဉ်ထားသည့်အတိုင်း ဖြစ်နေလျှင် ဤအဆင့်သည် လွဲချော်ရန် အခွင့်အရေး အလွန်နည်းပါးသည်။

ကြာနီနတ်မိမယ်ငယ်သည် အစီရင်ဗဟိုချက်ကို ရရှိမည်၊ ကျွယ်မင်နန်းတော်၏ အမာခံတပည့် ဖြစ်လာမည်၊ ထို့နောက် သူတို့၏ နယ်မြေကိုးခု ကို ရေနွေးပူဖြင့် ဖားပြုတ်သလို ဖြည်းဖြည်းချင်း ဝါးမြိုမည့် စီမံကိန်း ကို ဆက်လက် အကောင်အထည်ဖော်ပေလိမ့်မည်။

ဖန့်ချန် အသေအချာ သိနေသည့် အချက်တစ်ချက်မှာ ထိုစီမံကိန်းသည် တစ်ရက်၊ နှစ်ရက်အတွင်း ပြီးမြောက်နိုင်သည့် အရာမဟုတ်ခြင်းပင်။

ကြာနီနတ်မိမယ်ငယ်သည် ကျွယ်မင်နန်းတော်၏ အမာခံတပည့် ဖြစ်လာလျှင်တောင်မှ စီမံကိန်းကို အကြီးအကျယ် ရှေ့သို့ တွန်းပို့နိုင်မည်မဟုတ်ပေ။

အကြောင်းမှာ လူသားလောက ကိုးနယ်မြေတွင်လည်း ခုခံမည့်သူ မရှိသည်မဟုတ်။

အဖိုးအိုကဲ့သို့သော ယန်နတ်ဘုရား များ တည်ရှိနေသရွေ့ သူတို့၏ စီမံကိန်းသည် ရေဆန်တက်နေသည့် လှေပမာ ချောမွေ့ရန် ခက်ခဲနေဦးမည် ဖြစ်သည်။

အချိန်များ တစ်ရက်ပြီးတစ်ရက် ကုန်ဆုံးသွားသည်။

သတင်းကြား၍ ရောက်ရှိလာကြသည့် အမာခံတပည့်များမှာ ပို၍ များပြားလာသည်။

နောက်ဆုံးတွင် ဖန့်ချန်သည် လီရှမ်းဇီ၊ နန်မင်ရုယွဲ့ နှင့် ထိုစီနီယာအစ်မကြီး တို့ကိုပါ မြင်လိုက်ရသည်။

"လူကို ဒီဘက် ခေါ်လာခဲ့ "

စီနီယာအစ်မကြီးက အေးဆေးစွာ အမိန့်ပေးလိုက်သည်။

ဖန့်ချန်အား လူအုပ်ကြီး၏ ရှေ့သို့ ခေါ်ဆောင်သွားကြသည်။

လီရှမ်းဇီနှင့် နန်မင်ရုယွဲ့ တို့မှာ အနည်းငယ် အံ့အားသင့်သွားကြပြီး၊ နန်မင်ရုယွဲ့၏ ဘေးတွင်ပါလာသော နန်မင်ရှောက်ကျဲ မှာမူ ဖန့်ချန်ကို မြင်သည်နှင့် မျက်နှာပျက်သွားတော့သည်။

"မင်းတို့ သိကြတာလား "

စီနီယာအစ်မကြီးက ဖန့်ချန်ကို တစ်ချက်ကြည့်ပြီးနောက် လီရှမ်းဇီနှင့် နန်မင်ရုယွဲ့ တို့ကို လှမ်းမေးလိုက်သည်။

နန်မင်ရုယွဲ့က ပြုံးလိုက်ပြီး ဖန့်ချန်နှင့် နန်မင်ရှောက်ကျဲ တို့ကြားမှ တိုက်ပွဲအကြောင်းကို ရှင်းပြလိုက်သည်။

လူတိုင်း အနည်းငယ် အံ့သြသွားကြသော်လည်း အလွန်အမင်း တုန်လှုပ်သွားခြင်းမျိုးတော့ မရှိပေ။

ဤနေရာရှိ အမာခံတပည့်များထဲတွင် မည်သူ၏ ပါရမီက နန်မင်ရှောက်ကျဲ ထက် နိမ့်ပါးနေပါသနည်း

သူတို့၏ ထိုအရွယ်တုန်းကဆိုလျှင် လူတိုင်းမှာ သူ့ကို အနိုင်ယူနိုင်စွမ်း ရှိကြသူများချည်း ဖြစ်သည်။

သို့မဟုတ်ပါက သူတို့သည် အမာခံတပည့်များ ဖြစ်လာကြမည်မဟုတ်သလို၊ နန်မင်ရှောက်ကျဲ မှာလည်း အခုထက်ထိ ထူးထူးခြားခြား ရာထူးတိုးမြှင့်ခြင်း မခံရဘဲ ရှိနေမည်မဟုတ်ပေ။

စီနီယာအစ်မကြီးသည် ဖန့်ချန်၏ ကိုယ်ပေါ်မှ မသေမျိုးစွမ်းအင် ချည်နှောင်မှုကို ဖယ်ရှားပေးလိုက်ပြီး မေးလိုက်သည်

"မင်းတို့ နှစ်ယောက်က ဒီအစီရင်ဗဟိုချက်ကို အတူတူ ရှာတွေ့ခဲ့တာလား "

"ဟုတ်ပါတယ် "

"မင်းတို့ရဲ့ အဆင့်အတန်းနဲ့ အစီရင်ဗဟိုချက်ကို သဘောအလျောက် ကိုင်တွယ်ခွင့် မရှိဘူးဆိုတာ သိရဲ့လား အကယ်၍ သူမ ပဋိညာဉ်ဖွဲ့တာ ကျရှုံးသွားရင် ဘယ်လို အကျိုးဆက်မျိုး ရမလဲဆိုတာရော သိလား "

စီနီယာအစ်မကြီးက အေးစက်စက် ဆိုသည်။

ဖန့်ချန်က ခဏစဉ်းစားလိုက်ပြီး

"အပေါ့စားဆိုရင် ကျွယ်မင်နန်းတော်ကနေ နှင်ထုတ်ခံရမှာဖြစ်ပြီး၊ အပြင်းစားဆိုရင်တော့ အသက်ပျောက်ပြီး ကျင့်စဉ်တွေပါ ပျက်စီးသွားလိမ့်မယ်လို့ ဟိုတစ်ယောက်က ပြောထားပါတယ်ဗျ "

သူက သူ့ကို အစောပိုင်းက ဖမ်းဆီးထားသည့် အမာခံတပည့်ကို ညွှန်ပြလိုက်သည်။

ထိုသူက နှာခေါင်းတစ်ချက် ရှုံ့လိုက်သော်လည်း ဘာမှ ထပ်မပြောပေ။

"အင်း... အဲဒါက တကယ်ရှိတဲ့ စည်းကမ်းပဲ။ ဒါကြောင့် သူမ ပဋိညာဉ် အောင်မြင်ဖို့ပဲ မင်း ဆုတောင်းထားသင့်တယ်။ မဟုတ်ရင်တော့ သူမဟာ အစီရင်ဗဟိုချက် တစ်ခုကို ဖျက်ဆီးလိုက်သလို ဖြစ်သွားမှာမို့၊ အဲဒီပြစ်ဒဏ်က မင်းတို့ ခေါင်းပေါ် ကျလာရင်တော့ အသက်ပျောက်ရဖို့ ရာခိုင်နှုန်း များလိမ့်မယ် "

စီနီယာအစ်မကြီးက အေးစက်စက် ဆိုသည်။

မနီးမဝေးတွင် ရုတ်တရက် ဆူညံသံအချို့ ထွက်ပေါ်လာရာ စီနီယာအစ်မကြီးက မျက်မှောင်ကြုတ်ကာ မေးလိုက်သည်

"ဘာဖြစ်တာလဲ "

"ကိုးနယ်မြေ ရှာဖွေရေးအဖွဲ့ က လူတွေ ရောက်လာတာပါတဲ့။ အခု အစီရင်ဗဟိုချက်နဲ့ ပဋိညာဉ်ဖွဲ့နေတဲ့သူက သူတို့အဖွဲ့ဝင်ဖြစ်ပြီး၊ ဒီလူကတော့ သူတို့ရဲ့ အဖွဲ့ခေါင်းဆောင်ပါတဲ့ "

"ကိုးနယ်မြေ ရှာဖွေရေးအဖွဲ့ "

စီနီယာအစ်မကြီးက ဖန့်ချန်ကို တစ်ချက်ကြည့်ပြီး ရုတ်တရက် ပြုံးလိုက်သည်

"နာမည်လေးက မဆိုးပါဘူး "

ထို့နောက် သူမက အေးဆေးစွာ ဆိုလိုက်သည်

"သူတို့ကို လွှတ်ပေးလိုက်ပါ။ တကယ်လို့ ဒီမိန်းကလေး ပဋိညာဉ် အောင်မြင်သွားရင် သူတို့လည်း လူတစ်ယောက် တန်ခိုးရရင် ကြက်နဲ့ခွေးပါ နတ်ပြည်တက် သလိုမျိုး အကျိုးရှိသွားမှာပေါ့ "

ယွီဝူးရှီး ၊ လင်းယွမ် နှင့် မုံချင့်လင် သုံးဦးစလုံး စီနီယာအစ်မကြီး၏ အစီရင်လှေပေါ်သို့ တစ်ဦးပြီးတစ်ဦး တက်လာကြပြီး ဖန့်ချန်၏ ဘေးသို့ အထိတ်တလန့်ဖြင့် ချဉ်းကပ်လာကြသည်။

"အဖွဲ့ခေါင်းဆောင်... ဟိုမှာရှိနေတာ ကြာနီမိတ်ဆွေ မဟုတ်လား ကျုပ်တို့ အကြည့်မမှားဘူးမလား "

လင်းယွမ်က တိုးတိုးလေး မေးလိုက်သည်။

"အင်း... သူမပဲ "

ဖန့်ချန်က အသာအယာ ခေါင်းညိတ်ပြလိုက်သည်။

"ကျုပ် ခုနက လင်းစီနီယာတို့ဆီမှာ ရှိနေတုန်း ကြားခဲ့တာကတော့ ကြာနီမိတ်ဆွေက အစီရင်ဗဟိုချက်နဲ့ ပဋိညာဉ်ဖွဲ့ဖို့ ကြိုးစားနေတာတဲ့။ တကယ်လို့ အောင်မြင်ရင် အမာခံတပည့်အဆင့်ကို တိုက်ရိုက် တက်လှမ်းသွားမှာလား "

လင်းယွမ်၏ လေသံထဲတွင် မနာလိုအားကျမှုများ ပြည့်နှက်နေသည်။

မုံ့ချင်လင်မှာမူ အားကျခြင်းရော၊ မနာလိုခြင်းပါ ရောယှက်နေပြီး ကြာနီနတ်မိမယ်ငယ်ထံသို့ ခဏခဏ လှမ်းကြည့်နေတော့သည်။

အစောပိုင်းက ကြာနီနတ်မိမယ်ငယ်သည် အမာခံတပည့် ဖြစ်လာလိုသည့် ရည်မှန်းချက်ကို ထုတ်ဖော်ခဲ့ဖူးသော်လည်း၊ သူတို့၏ ပထမဆုံး နယ်မြေသစ်ရှာဖွေရေးခရီးစဉ်မှာတင် ထိုကဲ့သို့ ကြုံတွေ့ရလိမ့်မည်ဟု သူတို့ တကယ် မထင်ထားခဲ့ကြပေ။

အကယ်၍ ကြာနီနတ်မိမယ်ငယ်သာ အမှန်တကယ် အမာခံတပည့် ဖြစ်သွားလျှင်တော့ နံပါတ် ၄၃၂ အဝေးရောက်ကြယ်စင်စု၏ ဒဏ္ဍာရီတစ်ခု ဖြစ်လာပေလိမ့်မည်။

"ဒါနဲ့... မင်းတို့ထဲမှာ ချန်ရှင်းဟဲ ကို မြင်တဲ့သူ ရှိလား "

စီနီယာအစ်မကြီးက အနီးအနားရှိ အမာခံတပည့်များကို ရုတ်တရက် ကြည့်ကာ နန်မင်ရုယွဲ့ တို့၏ မျက်နှာများကိုပါ တစ်လှည့်စီ ဝေ့ကြည့်လိုက်သည်။

"ချန်ရှင်းဟဲ ခုနလေးတင် မြင်လိုက်သလိုပဲ။ သူ တခြားနေရာကို သွားရှာနေတာ ဖြစ်မှာပါ။ ဝူရှန့်ငရဲက ဒီလောက်ကျယ်တာ၊ သတင်းကြားရင်တောင် ချက်ချင်း ရောက်လာနိုင်ချင်မှ ရောက်လာမှာပေါ့ "

တစ်စုံတစ်ယောက်က ဆိုသည်။

စီနီယာအစ်မကြီးက ခေါင်းကို အသာအယာ ယမ်းလိုက်ပြီး

"ရောက်မလာနိုင်တာ မဟုတ်ဘူး။ ငါ အကြီးအကဲတွေဆီက သတင်းရထားတာကတော့ ချန်ရှင်းဟဲရဲ့ အသက်ဝိညာဉ်မီးအိမ် ငြိမ်းသွားပြီတဲ့ "

"သေသွားပြီ "

လူတိုင်း ထိတ်လန့်သွားကြသည်။

"သတ်တဲ့သူက ငါတို့လူ မဟုတ်ဖို့ များတယ်။ ဒါကြောင့် ဝူရှန့်ငရဲထဲမှာ တခြားအင်အားစုက ကျင့်ကြံသူတွေ ပုန်းအောင်းနေတာ ရှိနိုင်တယ်၊ မင်းတို့အားလုံး သတိထားကြဦး "

စီနီယာအစ်မကြီးက ဆိုသည်။

လူတိုင်း ဒေါသထွက်သွားကြသည်

"သူတို့က စည်းကမ်းဖောက်ဖျက်ရဲတယ်ပေါ့ "

စည်းကမ်းမရှိလျှင် ဘောင်မဝင်ပေ။

အကယ်၍ နယ်မြေသစ်လုပွဲက အဆုံးသတ်သွားပြီ ဖြစ်ပါလျက်နှင့် တစ်ဖက်လူက ထိုနေရာတွင် ပုန်းအောင်းနေသေးသည်ဆိုလျှင် ကျွယ်မင်နန်းတော်ကလည်း အဆင့် ၇ ရှေးဟောင်းမသေမျိုး များကို သူတို့၏ နယ်မြေများထဲသို့ စေလွှတ်ကာ အမာခံတပည့်များကို လိုက်လံသတ်ဖြတ်ခိုင်း၍ ရသည် မဟုတ်ပါလား။

ထိုသို့ဆိုလျှင် စနစ်တကျ ရှိတော့မည်လော ဒါက စစ်ကြေညာခြင်းနှင့် မတူပေဘူးလား

"မလောနဲ့ဦး၊ ဖြစ်နိုင်တာက အထင်မှားတာလည်း ဖြစ်နိုင်ပါတယ်။ အကြီးအကဲတွေက အင်အားစုအသီးသီးနဲ့ ဆွေးနွေးနေကြပြီဆိုတော့ မကြာခင်မှာ ရလဒ် ထွက်လာမှာပါ "

စီနီယာအစ်မကြီးက အေးဆေးစွာ ဆိုသည်။

"စီနီယာအစ်မကြီး... တကယ်လို့ ကျုပ်တို့ ခန့်မှန်းထားသလိုသာ ဖြစ်နေမယ်ဆိုရင်တော့ အချို့အင်အားစုတွေက ဒီနှစ်တွေမှာ အရမ်း အေးအေးဆေးဆေး နေနေရလို့ ကျုပ်တို့ ကျွယ်မင်နန်းတော်ကို စစ်ကြေညာချင်နေတာပဲ "

"တကယ်လို့ တိုက်ချင်တယ်ဆိုရင်လည်း တိုက်လိုက်တာပေါ့ဗျာ၊ သုံ့ပန်းမယူတဲ့ တိုက်ပွဲမျိုးပေါ့၊ ဘယ်သူက ဘယ်သူ့ကို ကြောက်နေမှာလဲ "

"မင်းတို့တွေ စိတ်မလောကြစမ်းပါနဲ့။ သုံ့ပန်းမယူဘူး ဟုတ်လား အစီရင်ဗဟိုချက် တစ်ခု ပျက်စီးသွားရင် တစ်ခု လျော့သွားတာပဲ။ အဆုံးအထိ တိုက်ကြမယ်ဆိုရင် ဘယ်ဘက်က အကျိုးရှိမှာမို့လို့လဲ "

ဖန့်ချန်သည် ထိုလူများ၏ ငြင်းခုံသံများကို နားထောင်ရင်း အလွန်ပင် ရင်းနှီးနေသည့် ခံစားချက်တစ်ခု ရရှိလာကာ မျက်နှာထားမှာ ထူးဆန်းသွားသည်။

ဒါဟာ ဝိညာဥ်နတ်ဘုရားဂိုဏ်း ရဲ့ လက်ချက်နဲ့ အလွန်တူလှသည်။

သေးငယ်သော နည်းလမ်းလေးအချို့ဖြင့် စည်းကမ်းကို အနည်းငယ် ဖောက်ဖျက်ပြရုံဖြင့် ကြောက်မက်ဖွယ်ကောင်းသော ဟာရီကိန်းမုန်တိုင်းကြီးတစ်ခုကို ဖန်တီးနိုင်ပြီး ဖျက်ဆီးအားပြင်းသော ရလဒ်များကို ဖြစ်ပေါ်စေနိုင်သည်။

အကယ်၍ အထက်သုံးနယ်မြေရှိ အင်အားစုများသာ တကယ် တိုက်ခိုက်ကြပြီး သုံ့ပန်းမယူကြေးဆိုလျှင် ဘယ်လို အကျိုးဆက်တွေ ဖြစ်လာမလဲဆိုတာ စဉ်းစားကြည့်ရုံနဲ့ သိနိုင်သည်။

အနည်းဆုံးတော့ ထိုနေရာရှိ အမာခံတပည့်များ၏ သုံးပုံတစ်ပုံ သို့မဟုတ် ထိုထက်မက သေဆုံးကုန်ပေလိမ့်မည်။

သို့သော်လည်း ထိုအဆင့်အထိ ရောက်နေသည့်သူများကို ဝိညာဥ်နတ်ဘုရားဂိုဏ်းက သွေးဝိညာဉ်နတ်ဆေးလုံး အဖြစ် ဖော်စပ်ရန် အသုံးချနိုင်မည် မဟုတ်ပေ။

အကယ်၍ ထိုသို့သာ လုပ်ခဲ့လျှင် အင်အားစုအသီးသီး၏ ပူးပေါင်းနှိမ်နင်းခြင်းကို ချက်ချင်း ခံရပေလိမ့်မည်။

ဤနေရာသည် မြေဝက်ဝံဂြိုဟ် ကဲ့သို့ သေးငယ်သော နေရာမဟုတ်သလို၊ ကျုံးကျိုး ကဲ့သို့ နေရာငယ်လေးလည်း မဟုတ်ပေ။

အကယ်၍ သွေးဝိညာဉ်နတ်ဆေးလုံးအတွက် မဟုတ်ဘူးဆိုလျှင်... ဒီလူသားအရေခွံခြုံထားတဲ့ မိစ္ဆာတွေ ကို များများသေစေချင်ရုံ သက်သက်ပဲလား။

ဒါက ဝိညာဥ်နတ်ဘုရားဂိုဏ်းရဲ့ ရည်ရွယ်ချက်လား

"ခုနကလူက ဝိညာဥ်နတ်ဘုရားဂိုဏ်းက ကျင့်ကြံသူ ဖြစ်နေပြီး၊ ကြာနီနတ်မိမယ်ငယ်နဲ့ တစ်နေရာတည်းက လာတာဆိုရင်... သူ ချန်ရှင်းဟဲကို သတ်လိုက်ရင် ဘယ်လို အကျိုးဆက်တွေ ဖြစ်လာမလဲဆိုတာ မသိစရာ အကြောင်းမရှိဘူး"

"ဒါပေမဲ့ သူက တမင်တကာ လုပ်ခဲ့တယ်။ သူနဲ့ ကြာနီနတ်မိမယ်ငယ်ရဲ့ ဆက်ဆံရေးက ငါ ထင်ထားသလို မဟုတ်ဘူးလား သူတို့နှစ်ယောက်ကြားမှာ အဆက်အသွယ် မရှိဘူးလား "

ဖန့်ချန် စဉ်းစားနေစဉ်မှာပင် ကြာနီနတ်မိမယ်ငယ်၏ ကိုယ်ပေါ်မှ အလွန်တောက်ပသော စိမ်းရောင် နတ်အလင်းတန်းများ ဗြုန်းခနဲ ပွင့်ထွက်လာတော့သည်။

ထို့နောက်တွင် ထိုစိမ်းမြမြ အစီရင်ဗဟိုချက်သည် ကြာနီနတ်မိမယ်ငယ်၏ နဖူးအလယ်သို့ တည့်တည့် တိုးဝင်သွားပြီး ပျောက်ကွယ်သွားတော့သည်။

သူမသည် မျက်လုံးများကို ဖွင့်လိုက်သည်။

ကျင့်ကြံမှု အရှိန်အဝါမှာ ထုံးစံအတိုင်းပင် ဖြစ်သော်လည်း၊ သူမသည် ယခင်နှင့် မတူတော့ဘဲ ပြောင်းလဲသွားသည်ကို သိသိသာသာ မြင်တွေ့နေရသည်။

"ပဋိညာဉ် အောင်မြင်သွားပြီလား "

အမာခံတပည့် အတော်များများမှာ အံ့အားသင့်သော မျက်နှာထားများ ဖြစ်ပေါ်သွားကြတော့သည်။

အခန်း (၁၃၉၆) - ယွမ်သံလိုက် ဓာတ်ငါးပါးတောင်

အနီးနားရှိ အမာခံတပည့်များ၏ မျက်နှာပေါ်မှ အံ့အားသင့်မှုများမှာ ဟန်ဆောင်နေခြင်းမဟုတ်ကြောင်း ဖန့်ချန် သတိပြုမိလိုက်သည်။

ထိုအံ့အားသင့်မှုများ၏ နောက်ကွယ်တွင်ပင် သတိထားမိရန် ခက်ခဲသော တုန်လှုပ်ချောက်ချားမှု အစအနလေးများ ကပ်ပါနေသည်။

သူတို့အားလုံးသည် ကြာနီနတ်မိမယ်ငယ် တကယ်ကြီး ပဋိညာဉ် အောင်မြင်သွားလိမ့်မည်ဟု တစ်ထပ်မှ မထင်ထားခဲ့ကြပုံရပေ။

"စီနီယာအစ်မကြီး... ကြည့်ရတာ ဒီတစ်ယောက်နဲ့ အစီရင်ဗဟိုချက် ကြားက ဆက်နွယ်မှုက သာမန်တော့ မဟုတ်ဘူးပဲ "

နန်မင်ရုယွဲ့က လေးနက်သော အမူအရာဖြင့်

"ကျွယ်မင်နန်းတော်မှာ အစီရင်ဗဟိုချက်နဲ့ လူနဲ့အစီရင် တစ်သားတည်းကျခြင်း အဆင့်ထိ ရောက်နိုင်တဲ့ အမာခံတပည့်သစ်တစ်ယောက် ထပ်တိုးလာတော့မယ် ထင်တယ် "

"အဆင့် ၁ မသေမျိုး မဖြစ်ခင်မှာတင် တစ်လတောင် မပြည့်တဲ့ အချိန်အတွင်းမှာ အစီရင်ဗဟိုချက်နဲ့ ပဋိညာဉ် အပြည့်အဝ ဖွဲ့နိုင်တယ်ဆိုတာ တကယ်ကို မရိုးရှင်းပါဘူး "

စီနီယာအစ်မကြီးက အသာအယာ ခေါင်းညိတ်ရင်း

"တစ်သားတည်းကျနိုင်မလား ဆိုတာကတော့ နောင်ရေးကိုပဲ ကြည့်ရမှာပေါ့။ အခုတော့... ဘယ်သူသွားပြီး သူမကို ဖိတ်ခေါ်မလဲ "

"ကျုပ် သွားလိုက်မယ် "

လီရှမ်းဇီက ကိုယ်တိုင်ကိုယ်ကျ စေတနာ့ဝန်ထမ်းလုပ်ကာ ကိုယ်ယောင်ဖျောက်ပြီး ကြာနီနတ်မိမယ်ငယ်၏ ရှေ့သို့ ချက်ချင်း ရောက်ရှိသွားသည်။

"မိန်းကလေး... ငါနဲ့အတူ စီနီယာအစ်မကြီးကို သွားတွေ့ရအောင် "

"ဖန့်မိတ်ဆွေရော "

ကြာနီနတ်မိမယ်ငယ်သည် လီရှမ်းဇီကို ဂရုမစိုက်ဘဲ ဖန့်ချန်၏ အရိပ်အယောင်ကို ရှာဖွေသည့်အလား မျက်လုံးများကို ဟိုဟိုဒီဒီ ဝေ့ကြည့်နေသည်။

ယွီဝူးရှီး နှင့် လင်းယွမ် တို့မှာ စိတ်ထဲမှနေ၍ တိတ်တဆိတ် သက်ပြင်းချမိကြပြီး ဖန့်ချန်ကို ကြည့်သည့် အကြည့်များလည်း ပြောင်းလဲသွားတော့သည်။

ဖန့်ချန်၏ ပါရမီမှာ အလွန်တောင့်တင်းသဖြင့် သူတို့ကိုယ်တိုင်လည်း အလွန်လေးစားမိကြသော်လည်း၊ အနာဂတ် အမာခံတပည့်တစ်ဦး၏ မျက်နှာသာပေးမှုကို ရရှိထားခြင်းမှာလည်း သေးငယ်သော အခွင့်အရေး မဟုတ်ပေ။

"ဖန့်ချန်ကို ပြောတာလား သူ စီနီယာအစ်မကြီး ဘေးမှာ ရှိပါတယ် "

လီရှမ်းဇီ၏ မျက်နှာထားမှာ တစ်မျိုး ပြောင်းလဲသွားသည်။

ကြာနီနတ်မိမယ်ငယ်သည် သူနှင့်အတူ အစီရင်လှေ ပေါ်သို့ လိုက်ပါလာပြီး ဖန့်ချန်ကို မြင်လိုက်ရသည့်အခါမှ ဘာမှမဖြစ်သည်ကို သိသွားပြီး သိသိသာသာ သက်ပြင်းချနိုင်တော့သည်။

"မင်းရဲ့ နာမည်ရင်းက ဟုန်ကျီ၊ လင်းကွေ့ ကြယ်စု ကြာနီနတ်ဘုရားဂိုဏ်းက ဆင်းသက်လာတာလား "

စီနီယာအစ်မကြီးက ပြုံးလျက် မေးလိုက်သည်။

"ဟုတ်ပါတယ် "

ကြာနီနတ်မိမယ်ငယ်က အသာအယာ ခေါင်းညိတ်ပြသည်။

"အင်း... အချိန်တန်ရင် လင်းကွေ့ ကြယ်တာရာဘက်ကို မင်း အမာခံတပည့် ဖြစ်သွားတဲ့ သတင်း ရောက်သွားလိမ့်မယ်။ မင်းရဲ့ ဂိုဏ်းဟာလည်း အချိန်တိုအတွင်းမှာ အင်အားကြီးလာပြီး မင်းတစ်ယောက်တည်းကြောင့် ကြာနီနတ်ဘုရားဂိုဏ်းဟာ ထွန်းတောက်လာမယ့် အလားအလာ ရှိသွားပြီ "

စီနီယာအစ်မကြီးက ပြုံးရင်း ဆက်ပြောသည်

"မင်းမှာ အခုလောလောဆယ် အစီရင်လှေ မရှိသေးတော့ နောက်ထပ် နှစ်ပေါင်း ၃၀ ကုန်တဲ့အထိ ငါ့ဘေးမှာပဲ နေပါ။ အချိန်စေ့ရင် မင်းကို ကျွယ်မင်နန်းတော်ဆီ ငါကိုယ်တိုင် ခေါ်သွားပေးမယ် "

"ဒါဆိုရင် နောက်ပိုင်း ကျမမှာလည်း အစီရင်လှေ တစ်စင်း ရှိလာမှာပေါ့။ သူတို့တွေ ကျမရဲ့ အဖွဲ့ဝင်တွေ ဖြစ်လို့ရမလား "

ကြာနီနတ်မိမယ်ငယ်က ဖန့်ချန်တို့ကို လက်ညှိုးညွှန်ပြကာ မေးလိုက်သည်။

"ရတာပေါ့။ ဒါပေမဲ့ အကြီးအကဲတွေက မင်းအတွက် အဆင့် ၁ နဲ့ အဆင့် ၂ မသေမျိုး အချို့ကိုလည်း စီစဉ်ပေးပါလိမ့်မယ် "

စီနီယာအစ်မကြီးက ရှင်းပြသည်

"ဒါက အမာခံတပည့်တွေ ရရှိတဲ့ ခံစားခွင့်ဖြစ်သလို၊ မင်းတို့ကို ကာကွယ်ပေးဖို့အတွက်လည်း ဖြစ်ပါတယ် "

ကြာနီနတ်မိမယ်ငယ်သည် မိမိကို ပူလောင်သော အကြည့်ဖြင့် စိုက်ကြည့်နေသည့် ကျိထျန်းကျွင်း ကို သတိထားမိလိုက်သည်။

သူမ ခဏစဉ်းစားပြီးနောက် ဖန့်ချန်ကို လှမ်းကြည့်ကာ

"ဖန့်မိတ်ဆွေ... ရှင် ကျမရဲ့ ရှာဖွေရေးအဖွဲ့ဝင် ဖြစ်ဖို့ ဆန္ဒရှိလား "

"ရှိတာပေါ့ "

ဖန့်ချန်က ပြုံးလျက် ခေါင်းညိတ်လိုက်သည်။

သူ၏ ရည်မှန်းချက်မှာ ဝမ်ချုံစန်းကို ရှာရန် ဖြစ်သော်လည်း၊ ဝမ်ချုံစန်းနှင့် နှိုင်းယှဉ်လျှင် ကြာနီနတ်မိမယ်ငယ်၏ အထောက်အထားက ပို၍ အရေးကြီးပုံရသည်။

ယခု သူမ အမာခံတပည့် ဖြစ်သွားပြီး မိမိက သူမ၏ အဖွဲ့ဝင် ဖြစ်လာခြင်းက နောင်တွင် အခွင့်အလမ်းများစွာ ရရှိစေပေလိမ့်မည်။

"ကျုပ်တို့လည်း ဆန္ဒရှိပါတယ်ဗျ "

လင်းယွမ်က ချက်ချင်း ထောက်ခံလိုက်သည်။

"ဟုန်မိတ်ဆွေ... အရင်က ကျမ ရှင့်ကို ခဏခဏ စကားနိုင်လုခဲ့တာတွေအတွက် စိတ်ထဲမှာ အငြိုးမထားပါဘူးနော် "

မုံ့ချင်လင်က ခဏမျှ တိတ်ဆိတ်သွားပြီးနောက် မေးလိုက်သည်။

"အကယ်၍ ငါက အငြိုးထားတယ်ဆိုရင်ရော "

ကြာနီနတ်မိမယ်ငယ်က ရှားရှားပါးပါး ပြုံးလိုက်သည်။

"အငြိုးထားတယ်ဆိုရင်တော့ ရှင် ကျမကို နေ့တိုင်း အော်ဟစ်နေမှာ စိုးလို့ ရှင့်အဖွဲ့ထဲ မဝင်တော့ဘူး "

မုံ့ချင်လင်က ပွင့်ပွင့်လင်းလင်းပင် ဆိုသည်။

"အငြိုးမထားပါဘူး၊ နင် ငါ့ကို ဘာမှလည်း ဆိုးဆိုးဝါးဝါး လုပ်ခဲ့တာမှ မရှိတာ "

ကြာနီနတ်မိမယ်ငယ်က ရယ်မောလိုက်သည်။

"ဒါဆိုရင် တော်သေးတာပေါ့ "

မုံ့ချင်လင်၏ စိတ်ထဲတွင် သက်ပြင်းချနိုင်သွားသည်။

သူမလည်း အမာခံတပည့်တစ်ဦး၏ လက်အောက်ခံ ရှာဖွေရေးအဖွဲ့ဝင် ဖြစ်လိုသည်။

သူမ၏ လက်ရှိ အဆင့်အတန်းအရဆိုလျှင် ဒါဟာ ကောင်းကင်ဘုံသို့ ခြေလှမ်းတစ်လှမ်းတည်းနှင့် တက်လှမ်းလိုက်ရသလိုပင်။

"ဒါနဲ့... ဒီမှာ အရည်အချင်းပြည့်မီတဲ့ အဆင့် ၁ နဲ့ အဆင့် ၂ မသေမျိုးတွေ အများကြီး ရှိနေတာပဲ။ မင်း နောက်ထပ် အနည်းငယ်လောက် ထပ်မရွေးချင်ဘူးလား "

စီနီယာအစ်မကြီးက အကြံပေးလိုက်သည်။

နန်မင်ရုယွဲ့က ဒါကို မြင်သည်နှင့် လှမ်းအော်ပြောလိုက်သည်

"အမာခံတပည့်တွေရဲ့ ရှာဖွေရေးအဖွဲ့ထဲ မပါရသေးတဲ့ မသေမျိုးတွေ အားလုံး ရှေ့ထွက်ခဲ့ကြ "

ချက်ချင်းပင် မသေမျိုး အတော်များများ ပျံဝဲရောက်ရှိလာကြသော်လည်း အချို့မှာတော့ လှုပ်ရှားခြင်း မရှိကြပေ။

ထိုသူများမှာ အဆင့် ၄ နှင့် အဆင့် ၅ မသေမျိုးများဖြစ်ကြပြီး သူတို့သည် အမာခံတပည့်များ၏ အဖွဲ့ဝင်များ ဖြစ်နေကြပြီဖြစ်ရာ အရှင်သခင်ကို အလွယ်တကူ ပြောင်းလဲ၍ မရနိုင်ပေ။

"ဟုန်ညီမလေး... ဒီထဲကနေ ကြိုက်တာ ရွေးလိုက်။ အားလုံးက ကျွယ်မင်နန်းတော်ရဲ့ အပြင်စည်း ကျင့်ကြံသူတွေဆိုတော့ ယုံကြည်လို့ ရပါတယ် "

စီနီယာအစ်မကြီးက ဆိုသည်။

ကြာနီနတ်မိမယ်ငယ်က တစ်ချက် ဝေ့ကြည့်လိုက်ရာ၊ ကျိထျန်းကျွင်းနှင့် အကြည့်ချင်း ဆုံသွားသော်လည်း သူမက တခြားသူများဆီသို့ အကြည့်လွှဲပြောင်းလိုက်သည်။

ကျိထျန်းကျွင်းမှာ ခေတ္တမျှ မှင်သက်သွားပြီးနောက် မျက်ဝန်းအိမ်ထဲတွင် ဇဝေဇဝါ ဖြစ်သွားသည့် အရိပ်အယောင်များ ဖြတ်ပြေးသွားသည်။

"စီနီယာအစ်မကြီး... ဒီကိစ္စကို ကျွယ်မင်နန်းတော် ပြန်ရောက်မှပဲ ဆွေးနွေးကြတာပေါ့ "

ကြာနီနတ်မိမယ်ငယ်က ပြောလိုက်သည်။

"ရတာပေါ့။ ဒါပေမဲ့ နောက်ပိုင်းတော့ မင်း လျှောက်မသွားနဲ့တော့နော်။ မင်းအတွက် ကိုယ်ပိုင်အစီရင်လှေ မရမချင်း ကိုယ့်သဘောနဲ့ကိုယ် လှုပ်ရှားလို့ မရဘူး "

ဖန့်ချန်တို့သည် ဆက်လက်၍ ရှာဖွေရန် ရွေးချယ်ခဲ့ကြပြီး၊ အချိန်စေ့လျှင် ဆင်းသက်သည့်နေရာတွင် ပြန်ဆုံကြရန် ကြာနီနတ်မိမယ်ငယ်နှင့် ချိန်းဆိုခဲ့ကြသည်။

လင်းယွမ်တို့က ဖန့်ချန်နှင့်အတူ လိုက်လိုကြသော်လည်း ဖန့်ချန်က ယဉ်ကျေးစွာ ငြင်းပယ်လိုက်သည်။

"မှန်လေး.. ဒီအနားမှာ ကောင်းတာလေးတွေ ရှိလား "

"ရှိတော့ ရှိတယ်၊ ဒါပေမဲ့... မသေမျိုးကျောက်တုံး ၂၀၀ လောက်တော့ လိုလိမ့်မယ် "

"ဒီ ဘိုးကြီး လိမ်နေတာ "

"သောက် ကောင်လေး... ဒီပစ္စည်းက မင်းအတွက် အသုံးဝင်လို့ ပြောနေတာကို၊ ကျေးဇူးမသိတတ်လိုက်တာ "

"ဓားငယ်လေး အတွက် အသုံးဝင်တာလား "

ဖန့်ချန်၏ စိတ်ထဲတွင် လှုပ်ခတ်သွားသည်။

ကြာနီနတ်မိမယ်ငယ်က ရှေးဟောင်းလမ်းစဉ် သုံးခုအကြောင်း ပြောပြပြီးနောက်၊ ဓားမသေမျိုးလမ်းစဉ် လည်း ပါဝင်နေသဖြင့် သူသည် တက်လှမ်းခြင်းအဆင့် ရောက်သည့်အခါ ဓားမသေမျိုးလမ်းစဉ်ကို ရွေးချယ်ရန် စိတ်ကူးထားသည်။

တစ်ဖက်တွင် ယင်လောက ၏ လမ်းစဉ်ဖြစ်ပြီး၊ တစ်ဖက်တွင် ဓားမသေမျိုးလမ်းစဉ် ဖြစ်သဖြင့် တစ်ခုနှင့်တစ်ခု ပဋိပက္ခ ဖြစ်စရာ မရှိပေ။

ဖန့်ချန်သည် မသေမျိုးကျောက်တုံး ၂၀၀ ကို ထုတ်ယူကာ မှန်လေး ဆီသို့ တိုက်ရိုက် ပစ်ပေးလိုက်ပြီး ဝါးမြိုခိုင်းလိုက်သည်။

မှန်လေးက ဝါးမြိုပြီးနောက် ဖန့်ချန်အား စာမျက်နှာ ၂၄၃ ကို လှန်ခိုင်းလိုက်သည်။

ထိုနေရာတွင် အလွန်ထူးဆန်းသော ငါးရောင်ခြယ်တောင်ကြီး တစ်လုံး ပေါ်လာတော့သည်။

ယွမ်သံလိုက် ဓာတ်ငါးပါးတောင် အစွမ်းထက်ဆုံးသော ဓာတ်ကြီးငါးပါး စွမ်းအားများ စုစည်းမှုဖြင့် လောကအလယ်တွင် နှစ်ပေါင်း တစ်သိန်းတိုင်တိုင် အနည်ထိုင် ဖြစ်ပေါ်လာသည့် တောင်ဖြစ်သည်။

"ဒါက ဘာကြီးလဲ ဓားငယ်လေးအတွက် အသုံးဝင်လို့လား "

ဖန့်ချန်က မျက်မှောင်ကြုတ်ကာ မေးလိုက်သည်။

"ဒါက အစစ်အမှန်ဆုံး ဓာတ်ငါးပါး စွမ်းအားတွေ စုစည်းထားတဲ့ နတ်တောင်ပဲ။ လူသားတွေ ပြုပြင်ထားတာ မရှိလို့ အသန့်ရှင်းဆုံးပဲ။ တကယ်လို့ လက်နက်လုပ်တဲ့သူ သာ ဒီပစ္စည်းကို တွေ့ရင် အနည်းငယ် ပြုပြင်လိုက်ရုံနဲ့ ဝိညာဉ်အရှိန်အဝါတွေ ပေါ်ထွက်လာပြီး ဝိညာဉ်ရတနာ ဖြစ်လာနိုင်တယ် "

မှန်လေး က အေးအေးဆေးဆေးပင် ဆက်ပြောသည်

"မင်းသာ ဝူရှန့်ငရဲထဲမှာ ရှိမနေရင်၊ ဒီတောင်ကလည်း မင်းနဲ့ မဝေးတဲ့နေရာမှာ ရှိမနေရင်၊ ဘယ်သူ့လက်ထဲမှ မရောက်ဖူးသလို ကံကြမ္မာအနှောင်အဖွဲ့ တွေ မရှိနေရင် မသေမျိုး ကျောက်တုံး ၂၀၀ နဲ့ ဒီသတင်းကို ဝယ်လို့ မရဘူး "

"ဒီပစ္စည်းက တကယ်ပဲ ငါ့အတွက် အသုံးဝင်တာလား "

ဓားငယ်လေးသည် မှန်လေး၏ အပေါ်တွင် မနေနိုင်မထိုင်နိုင် ဝဲပျံနေတော့သည်။

"အသုံးဝင်ရုံတင် ဘယ်ကမလဲ။ မင်းသာ ဒါကို ဝါးမြိုနိုင်ရင် မင်းရဲ့ ဝိညာဉ်အရှိန်အဝါ တိုးတက်လာမယ့်အပြင် အဆင့် ၁၀ ထိ တိုက်ရိုက်တက်ဖို့တောင် ပြဿနာမရှိဘူး "

"အဆင့် ၁၀ ထိ တက်မှာလား ဒါဆိုရင် ဝိညာဉ်ရတနာအဖြစ် အမှန်တကယ် ပြောင်းလဲဖို့ တစ်လှမ်းပဲ လိုတော့တာပေါ့ "

ဖန့်ချန်၏ မျက်လုံးများ လင်းလက်သွားသည်။

"နောက်ထပ် အကျိုးကျေးဇူးတွေ အများကြီး ရှိသေးတယ်၊ အခုတော့ အကုန်ပြောမနေတော့ဘူး။ မြန်မြန်သွားစမ်းပါ၊ တခြားသူတွေ တွေ့သွားဦးမယ်။ အခု ဝူရှန့်ငရဲထဲမှာ လူတွေက အရမ်း စည်ကားနေတာ "

မှန်လေး က အရိပ်အမြွက် ပြောလိုက်သည်။

"ဖန့်ချန်... ငါတို့ မြန်မြန်သွားရအောင် "

ဓားငယ်လေးကလည်း စကားအရှည်မဆက်တော့ဘဲ ဖန့်ချန်၏ ခန္ဓာကိုယ်ထဲသို့ တိုက်ရိုက် ပေါင်းစပ်ဝင်ရောက်သွားသည်။

နောက်တစ်ခဏတွင် ဖန့်ချန်သည် ဓားနှင့်လူ တစ်သားတည်းကျကာ အလွန်လျင်မြန်သော အရှိန်ဖြင့် မိုးကုပ်စက်ဝိုင်းဆီသို့ ပျောက်ကွယ်သွားတော့သည်။

ခြောက်လ ကြာပြီးနောက်...

ငါးရောင်ခြယ် တောက်ပနေသော နတ်တောင်ကြီးတစ်ခုသည် ဖန့်ချန်၏ ရှေ့မှောက်တွင် ပေါ်လာတော့သည်။

ထိုနတ်တောင်နှင့် အနည်းဆုံး မိုင်တစ်ထောင်ခန့် အကွာအဝေးသို့ ရောက်သောအခါ သူ၏ ခန္ဓာကိုယ်သည် ထိန်းချုပ်မရဘဲ အထက်အောက် ယိမ်းထိုးလာပြီး ရှေ့ဆက်တိုးရန် ခက်ခဲလာသည်ကို တွေ့လိုက်ရသည်။

"ဒါဟာ ယွမ်သံလိုက် ဓာတ်ငါးပါးတောင်ပဲ။ ဘယ်လို မှော်ဝင်ရတနာ မှ ဒီအနားကို ချဉ်းကပ်လို့ မရဘူး၊ လောကမှာရှိတဲ့ အရာရာတိုင်းကို ချုပ်ကိုင်ထားသလိုပဲ "

မှန်လေး က မှတ်ချက်ချလိုက်လေသည်။