အခန်း (၇-၈)

အခန်း (၇) အနာဂတ်၏ အမှောင်ခေတ်... ကောင်းကင်ဘုံများနှင့် ကမ္ဘာလောကခပ်သိမ်း၏ အမြင့်မြတ်ဆုံး အုပ်စိုးသူ...

နှစ်များတလျှောက် နေလနတ်ဘုရား အင်ပါယာသည် အချိန်လေဟာနယ် တားမြစ်နယ်မြေ၏ လှုပ်ရှားမှုများကို အမြဲတမ်း အနီးကပ်စောင့်ကြည့်လေ့လာနေခဲ့သည်။

ယနေ့တွင် အချိန်လေဟာနယ် တားမြစ်နယ်မြေမှ လော​ကကြီးကို တုန်ခါစေသော ထူးခြားသည့် သဘာဝလွန်ဖြစ်စဉ်များ ဆက်တိုက်ပေါက်ကွဲထွက်လာသဖြင့် နေလနတ်ဘုရား အင်ပါယာတစ်ခုလုံး စိုးရိမ်ပူပန်မှုများဖြင့် ပြည့်နှက်နေသည်။

အကယ်၍ ပြင်ပကမ္ဘာက ပြောနေသကဲ့သို့ အချိန်လေဟာနယ် တားမြစ်နယ်မြေသည် ကောင်းကင်ဘုံများနှင့်အင်္သချေနယ်ပယ်များကို အမှန်တကယ် ပြန်လည်စိုးမိုးရန် ရည်ရွယ်ထားမည်ဆိုလျှင် သူတို့၏ နေလနတ်ဘုရား အင်ပါယာသည် ပထမဆုံး ထိခိုက်မှုခံရမည့်သူ ဖြစ်လာမည်ဖြစ်ပြီး ဖျက်ဆီးခံရနိုင်ခြေပင် ရှိနေသည်။

"အမတ်ကြီးတို့... ဒီကိစ္စနဲ့ပတ်သက်ပြီး ဘယ်လိုထင်ကြလဲ..."

ရှားရွှမ်ယွမ်က တခဏတာ စဉ်းစားပြီးနောက် အောက်တွင် စုရုံးနေကြသော အရာရှိများကို မေးလိုက်၏။

"မရေမတွက်နိုင်တဲ့ ခေတ်ကာလတွေအထိ ငြိမ်သက်နေခဲ့တဲ့ အချိန်လေဟာနယ် တားမြစ်နယ်မြေက ပြန်လည်နိုးထလာပြီး ကောင်းကင်ဘုံတွေကို အရောင်ပြောင်းသွားစေတယ်..."

"တကယ်လို့ အချိန်လေဟာနယ် တားမြစ်နယ်မြေကသာ ကြီးမားတဲ့ လှုပ်ရှားမှုတစ်ခုကို တကယ် လုပ်လာမယ်ဆိုရင် ငါတို့ နေလ နတ်ဘုရား အင်ပါယာက မခံစားထိုက်တဲ့ ဘေးဒုက္ခတစ်ခုကို တကယ်ပဲ ခံစားရနိုင်တယ်..."

...

"အရှင်မင်းကြီး... ငါတို့ နေလနတ်ဘုရား အင်ပါယာက အစွမ်းထက်တယ် ဆိုပေမယ့်လည်း ရှေးဟောင်းခေတ်တွေကတည်းက ပေါ်ပေါက်လာခဲ့တဲ့ အချိန်လေဟာနယ် တားမြစ်နယ်မြေနဲ့ ယှဉ်လိုက်ရင် ငါတို့ရဲ့ အခြေခံအုတ်မြစ်က သိသိသာသာကို ကွာဟနေဆဲပါ..."

"ငါ့ရဲ့ နှိမ့်ချတဲ့ အမြင်အရဆိုရင် သဘောထားကောင်းကို ပြသဖို့ အချိန်လေဟာနယ် တားမြစ်နယ်မြေဆီ ကိုယ်စားလှယ်တွေ ကြိုတင်စေလွှတ်တာက ပိုကောင်းလိမ့်မယ်..."

"ဒီလုပ်ရပ်က ပထမအချက်အနေနဲ့ ပြည်သူတွေရဲ့ စိတ်နှလုံးကို တည်ငြိမ်စေနိုင်ပြီး ဒုတိယအချက်အနေနဲ့ အချိန်လေဟာနယ် တားမြစ်နယ်မြေနဲ့ ဖြစ်လာနိုင်တဲ့ ပဋိပက္ခတွေကို အမြှစ်ကနေ ဖြေရှင်းနိုင်ပါတယ်..."

ထိုစကားများ ထွက်ပေါ်လာသည်နှင့် တစ်ပြိုင်နက် နေလနတ်ဘုရား အင်ပါယာမှ အခြားအမတ်ကြီးများ၏ မျက်နှာအမူအရာများမှာ အနည်းငယ် ပြောင်းလဲသွားကြသည်။

သူတို့၏ အထွတ်အထိပ်အချိန်မှစ၍ နေလနတ်ဘုရား အင်ပါယာသည် တခြားသော အင်အားစုများ၏ လေးစားဂါရဝပြုမှုကို အမြဲတမ်း ခံစားခဲ့ရသည်။

ယခုအချိန်၌ အချိန်လေဟာနယ် တားမြစ်နယ်မြေတွင် ပေါက်ကွဲထွက်လာသော ထူးခြားသည့် သဘာဝလွန်ဖြစ်စဉ်အချို့ကြောင့် သဘောထားကောင်းကို ပြသရန် ကိုယ်စားလှယ်များကို ကြိုတင်စေလွှတ်ရမည် ဆိုလျှင် ဂုဏ်သိက္ခာ အလွန်အမင်း ကျဆင်းသွားမည် မဟုတ်လော...

သို့သော် သူတို့သည် ထုတ်မပြောရဲကြပေ။

မည်သို့ပင်ဆိုစေကာမူ မရေမတွက်နိုင်သော ခေတ်ကာလများ ကုန်ဆုံးသွားခဲ့ပြီးဖြစ်ရာ အချိန်လေဟာနယ် တားမြစ်နယ်မြေ၏ စစ်မှန်သော အခြေခံအုတ်မြစ်ကို မည်သူမျှ မသိကြချေ။

ကောင်းကင်ဘုံများနှင့်အင်္သချေနယ်ပယ်များတွင် ကိုယ့်ကိုယ်ကိုယ် ပြိုင်ဘက်ကင်းဟု ယူဆထားသူများပင်လျှင် အချိန်လေဟာနယ် တားမြစ်နယ်မြေထဲသို့ ဝင်ရောက်ပြီးနောက် အရိပ်အယောင်မျှပင် မကျန်တော့ဘဲ ပျောက်ကွယ်သွားကြပြီး မည်သည့်အခါမှ ပြန်ထွက်မလာတော့ပေ။

ဤအချက်တစ်ချက်တည်းဖြင့်ပင် အချိန်လေဟာနယ် တားမြစ်နယ်မြေ၏ စွမ်းအားကို မြင်တွေ့နိုင်သည်။

ထိုကဲ့သို့ ကြောက်မက်ဖွယ်ကောင်းသည့် တားမြစ်နယ်မြေနှင့် အလွန်နီးကပ်စွာ ရှိနေသဖြင့် အကယ်၍ တစ်ဖက်လူက နှာချေလိုက်ရုံမျှဖြင့် သူတို့၏ နေလ နတ်ဘုရား အင်ပါယာသည် သုံးကြိမ်တိုင်တိုင် တုန်ခါသွားပေမည်။

ထိုအကြံပြုချက်ကို ကြားသောအခါ ရှားရွှမ်ယွမ်သည် သူ မည်သည့်အရာကို တွေးတောနေသည်ကို မသိရသော်လည်း မျက်မှောင်အနည်းငယ် ကြုတ်လိုက်သည်။

"ခမည်းတော်... သမီးတော်က ကိုယ်စားလှယ်အဖြစ် အချိန်လေဟာနယ် တားမြစ်နယ်မြေဆီ လူတွေကို ဦးဆောင်သွားဖို့ ဆန္ဒရှိပါတယ်..."

ထိုအချိန်မှာပင် ကြည်လင်ပြတ်သားပြီး သာယာသော အသံတစ်သံ ရုတ်တရက် ထွက်ပေါ်လာသည်။

အသံလာရာသို့ ကြည့်လိုက်သောအခါ ဖီးနစ်ဝတ်ရုံနှင့်ရောင်စုံအဝတ်အစားများကို ဝတ်ဆင်ထားပြီး ကျက်သရေရှိသော ကိုယ်ဟန်အချိုးအစားနှင့် အေးစက်စက် အရှိန်အဝါရှိသော လှပသည့် အမျိုးသမီးတစ်ဦး ဖြစ်နေပေ၏။

သူမ ညင်သာစွာ ခြေလှမ်းလှမ်းလိုက်စဉ် သူမ၏ ရင်ဘတ်ပေါ်တွင် ချယ်မှုန်းထားသော ဖီးနစ်ပုံစံသည် သိမ်မွေ့စွာ တုန်ခါသွားပြီး အသက်ဝင်နေသကဲ့သို့ ပို၍ထင်ရှားလာသည်။

ရှားချူလီ...

ရှားရွှမ်ယွမ်၏သမီးတော်ဖြစ်ပြီး နေလ နတ်ဘုရားအင်ပါယာ၏ နန်းမွေခံမင်းသမီး...

သူမ၏ ပါရမီနှင့် စွမ်းအားတို့က သူမကို မရေမတွက်နိုင်သော ခေတ်ကာလများတလျှောက် နေလနတ်ဘုရား အင်ပါယာတွင် အထူးချွန်ဆုံး အမျိုးသမီးပါရမီရှင် ဖြစ်လာစေခဲ့သည်။

သူမ၏ ပြိုင်ဘက်ကင်း ပါရမီနှင့် စွဲမက်ဖွယ်ကောင်းသော အလှတရားတို့ကြောင့် သူမသည် နေလ နတ်ဘုရား အင်ပါယာရှိ မရေမတွက်နိုင်သော ပြည်သူများ၏ နှလုံးသားထဲတွင် 'လရောင်ဖြူလေး' တစ်ဦး ဖြစ်ခဲ့သည်။

"ချူလီ... သမီးက သီးသန့်တံခါးပိတ်ကျင့်ကြံနေတာ မဟုတ်ဘူးလား..."

"သမီးတော်က သီးသန့်တံခါးပိတ်ကျင့်ကြံရာကနေ ထွက်လာတာ မကြာသေးပါဘူး..."

ရှားချူလီက ညင်သာစွာ ပြုံးလိုက်ပြီး သူမ၏ ဧကရာဇ်ခမည်းတော်ရှေ့သို့ ရောက်လာကာ ပြောဆိုလိုက်၏။

"ခမည်းတော် အခုလေးတင် ပြောလိုက်တဲ့ အကြံပြုချက်ကိုလည်း သမီးတော် ကြားခဲ့ပါတယ်..."

"သမီးတော်တို့ နေလ နတ်ဘုရား အင်ပါယာက ဒီကိစ္စကြောင့် ဒုက္ခရောက်နေတာ အချိန်အတော်ကြာပြီမို့ မြန်မြန်ဖြေရှင်းလိုက်တာက ပိုကောင်းတယ်..."

"တကယ်လို့ တခြားလူတွေကို လွှတ်လိုက်မယ်ဆိုရင် အချိန်လေဟာနယ် တားမြစ်နယ်မြေအပေါ် ကျွန်မတို့ နေလနတ်ဘုရား အင်ပါယာရဲ့ ရိုသေလေးစားမှုကို ပြသဖို့ လုံလောက်ချင်မှ လုံလောက်မှာပါ..."

"ဒါကြောင့် ဒီကိစ္စအတွက် သမီးတော်က အသင့်တော်ဆုံးပါပဲ..."

"ချူလီ... သမီး..."

သူ၏ ဂုဏ်ယူရဆုံး သမီးတော်၏ စကားများကို နားထောင်ရင်း ရှားရွှမ်ယွမ်သည် ဘယ်လိုတုံ့ပြန်ရမှန်းမသိဘဲ ခဏတာ ဆွံ့အသွားသည်။

သူ၏သမီးတော် ပြောသည်က အကြောင်းပြချက် မရှိသည်တော့ မဟုတ်ပေ။ အချိန်လေဟာနယ် တားမြစ်နယ်မြေသည် ထူးခြားသော အဆင့်အတန်းတစ်ခုကို ပိုင်ဆိုင်ထားပေ၏။

အကယ်၍ အဆင့်အတန်းနှင့် အရေးပါမှု မလုံလောက်သူတစ်ဦးကို စေလွှတ်လိုက်မည်ဆိုလျှင် တားမြစ်နယ်မြေကို မလေးစားခြင်း သို့မဟုတ် တမင်သက်သက် ရန်စခြင်းဟု အလွယ်တကူ အထင်လွဲခံရနိုင်သည်။

နေလနတ်ဘုရား အင်ပါယာ၏ နန်းမွေခံမင်းသမီးနှင့် သူ၏ သမီးတော်အနေဖြင့် ရှားချူလီသည် သေချာပေါက် အကောင်းဆုံး ရွေးချယ်မှုပင်။

"ဟူး..."

ရှားရွှမ်ယွမ်က သက်ပြင်းရှည်ကြီးချလိုက်ပြီး အနည်းငယ် ကူကယ်ရာမဲ့သကဲ့သို့ ခံစားလိုက်ရသည်။

ယနေ့ အချိန်လေဟာနယ် တားမြစ်နယ်မြေတွင် ဤကဲ့သို့ ထူးခြားသည့် သဘာဝလွန်ဖြစ်စဉ်များ ဖြစ်ပေါ်လာသဖြင့် အချိန်လေဟာနယ် တားမြစ်နယ်မြေ အနီးရှိ တခြားသော အင်မော်တယ် တာအိုအမွေအနှစ်မြေများသည်လည်း သူတို့၏ နေလနတ်ဘုရား အင်ပါယာကဲ့သို့ပင် ဂဏာမငြိမ် ဖြစ်နေကြမည်လားဟု သူ တွေးလိုက်မိသည်။

...

ပြန်လည်ဝင်စားခြင်း တာအိုနယ်မြေ..

ပြန်လည်ဝင်စားခြင်း တာအိုဂိုဏ်း...

ကျယ်ပြန့်လှသော ပိုင်နက်နယ်မြေအတွင်းတွင် မရေမတွက်နိုင်သော နတ်ဘုရားခန်းမများ တည်ရှိနေပြီး မြင့်မြတ်သော အလင်းတန်းများ ကျဆင်းလာကာ ထူးခြားသည့် သဘာဝလွန်ဖြစ်စဉ်များ အဆက်မပြတ် ပေါ်ထွက်နေသည်။

ရှေးဟောင်း နတ်ဘုရားနန်းတော်၏ အနက်ရှိုင်းဆုံး နေရာရှိ ခမ်းနားထည်ဝါသော ပင်မခန်းမ၏အထက်တွင် တာအိုနတ်ဘုရားရွှေဖြင့် ပြုလုပ်ထားသော ဖီးနစ်ပလ္လင်ပေါ်၌ စိတ်ကူးယဉ်ဆန်သော ပုံရိပ်တစ်ခု လဲလျောင်းနေသည်။

သူမ၏ ငွေဖြူရောင် ဆံပင်များက ခါးအထိ ကျဆင်းနေပြီး သူမ၏ကိုယ်ဟန်အမူအရာက ပေါ့ပေါ့ပါးပါးနှင့် အနည်းငယ် ပျင်းရိနေဟန်ရှိကာ သူမ၏ ဖိနပ်မပါသော ကျောက်စိမ်းခြေဖဝါးများက သေသပ်လှပပြီး တောက်ပနေသည်။

သူမ၏နူးညံချောမွေ့သောလက်က မေးစေ့ကို ပေါ့ပေါ့ပါးပါး ထောက်ထားပြီး မျက်လုံးမှိတ်ကာ အနားယူနေသည့်အလားပင်။

နှင်းကဲ့သို့ ဖြူဖွေးသော ခါးစည်းကြိုးကို သူမ၏ သွယ်လျသော ခါးတွင် စည်းနှောင်ထားပြီး သူမ၏ရင်ဘတ်ပေါ်ရှိ နှင်းရောင်အဝတ်အစားသည် အထက်သို့ ပင့်တင်ခံထားရသည်။

သူမ၏ သွယ်လျသော ခါးအောက်တွင် သူမ၏ တင်ပါးများက ပို၍ လုံးဝန်းကာ ပုံပန်းကျနေပုံပေါ်ပြီး ထိုင်နေသည့် အနေအထားတွင်ပင် သူမ၏ လှပသော အကွေးအကောက်များသည် အပြည့်အဝ ပေါ်လွင်နေသည်။ သူမ၏ခန္ဓာကိုယ်သည် မိစ္ဆာတစ်ကောင်၏ကောက်ကြောင်းကဲ့သို့ သွေးကြွစေလောက်အောင် ဆွဲဆောင်မှုရှိပေ၏။

ဤအမျိုးသမီးသည် ပြန်လည်ဝင်စားခြင်း တာအိုဂိုဏ်း၏ အမြင့်မြတ်ဆုံး ဘိုးဘေးကြီး ဖြစ်ပြီး မူလတည်ထောင်သူလည်း ဖြစ်သည့်...

ပြန်လည်ဝင်စားခြင်း မဟာဧကရီ ချူယွင်ရှီးပင်။

ဤအချိန်အခိုက်အတန့်တွင် မျက်လုံးမှိတ်ကာ အနားယူနေသော ချူယွင်ရှီးသည် သူမ၏ နူးညံ့သော မျက်ခုံးများ သိမ်မွေ့စွာ တုန်ခါသွားသည်ကို ခံစားလိုက်ရသည်။

ထို့နောက် သူမ၏မျက်လုံးများကို ဖြည်းညှင်းစွာ ဖွင့်လိုက်ရာ ရောင်စုံကျောက်မျက်ရတနာကဲ့သို့ တောက်ပသော မျက်လုံးများတွင် စိတ်ရှုပ်ထွေးမှုများ ဖြတ်ပြေးသွားသည်ကို ရှင်းလင်းစွာ မြင်တွေ့နိုင်သည်။

ချူယွင်ရှီးက မသိမသာ သူမ၏ပတ်ဝန်းကျင်ကို ဝေ့ကြည့်လိုက်ပြီး သူမ၏ မျက်နှာအမူအရာက ပို၍ယုံကြည်နိုင်စရာ မရှိဖြစ်လာသည်။

"ဒီ မဟာဧကရီက အခုလေးတင် အိပ်မက်တစ်ခု မက်ခဲ့တာလား..."

"မဟုတ်ဘူး... ဒါက အိပ်မက်တစ်ခု မဖြစ်နိုင်ဘူး... အရာအားလုံးက တကယ့်အစစ်အတိုင်းပဲ..."

ချူယွင်ရှီး၏ခန္ဓာကိုယ် အနည်းငယ် တုန်ခါသွားပြီး သူမ၏ စိတ်ထဲတွင် မြင်ကွင်းများ ဆက်တိုက်ဆိုသလို အလိုအလျောက် ထွက်ပေါ်လာသည်။

တားမြစ်တည်ရှိမှုတစ်ခုသည် အချိန်လေဟာနယ် တားမြစ်နယ်မြေမှ ပေါ်ထွက်လာပြီး ကောင်းကင်ဘုံများကို တိုက်ခိုက်ကာ သက်ရှိအားလုံးကို အမဲလိုက်ပြီး ခေတ်အဆက်ဆက်၏ မဟာဧကရာဇ် အဆင့်အတန်းကို ရရှိခဲ့သည်။

သူ တာအိုကို သက်သေပြပြီး ဧကရာဇ် ဖြစ်လာပြီးနောက် ယခင်က သူ့ကို ဆန့်ကျင်ပြီး သူ၏ တိုးတက်မှုကို အဟန့်အတားဖြစ်စေခဲ့သော မရေမတွက်နိုင်သည့် တာအိုအမွေအနှစ်မြေများအားလုံးသည် လက်စားချေခြင်းကို ခံခဲ့ရလေ၏။

သူကိုယ်တိုင် ဧရာမ စစ်တပ်ကြီးတစ်ခုကို ဦးဆောင်ကာ မရေမတွက်နိုင်သော တာအိုအမွေအနှစ်မြေများကို အမှန်တကယ် သိမ်းပိုက်ခဲ့ပြီး တခဏအတွင်းမှာပင် ရှေးဟောင်း မင်းဆက်များ အင်မော်တယ် မိသားစုကြီးများနှင့် အင်မော်တယ် တာအိုအမွေအနှစ်​မြေများ အားလုံး လုံးဝဖျက်ဆီးခံခဲ့ရသည်။

ကောင်းကင်ဘုံကိုးလွှာ၏အထက်တွင် တားမြစ်နယ်မြေ နတ်ဘုရားသားတော်၏ အမှောင်ပလ္လင် ရှိပြီး ကောင်းကင်ဘုံကိုးလွှာ၏အောက်တွင် သက်ရှိအားလုံး၏ အသွေးအသားများနှင့် ခြောက်သွေ့နေသော အရိုးစုများ ရှိနေသည်။

ထိုခေတ်ကို ကောင်းကင်ဘုံများနှင့်အင်္သချေနယ်ပယ်များက အမှောင်ခေတ်ဟုလည်း ခေါ်ဆိုခဲ့ကြ၏။

ထိုအမှောင်ခေတ်တွင် ကောင်းကင်ဘုံများနှင့်အင်္သချေနယ်ပယ်များသည် စကြဝဠာတစ်ခုလုံးက ရိုသေလေးစားရသော ပုဂ္ဂိုလ်တစ်ဦးကို ကြိုဆိုခဲ့ရသည်။

ထိုလူသည် အချိန်လေဟာနယ် တားမြစ်နယ်မြေ နတ်ဘုရားသားတော် ခုံးဝူတောက်ပင်။

...

အခန်း (၈) ကံကြမ္မာပိုင်ရှင်များ တစ်ယောက်ပြီးတစ်ယောက် ပေါ်ထွက်လာခြင်း... အနောက်ဘက်ရွှမ် တာအိုနယ်မြေ၏ အမြွှာကြယ်နှစ်ပွင့်

သူမ၏ စိတ်ထဲရှိ မရေမတွက်နိုင်သော ကြောက်မက်ဖွယ် မြင်ကွင်းများကို တွေးတောရင်း ပြိုင်ဘက်ကင်း မဟာဧကရီဖြစ်သော်လည်း သူမ၏ခန္ဓာကိုယ် ထိန်းချုပ်မရအောင် တုန်ယင်နေသည်။

အချိန်အတော်ကြာပြီးမှသာ အချက်အလက်အားလုံးကို သူမ နောက်ဆုံးတွင် လက်ခံနိုင်ခဲ့သည်။

အမှန်အားဖြင့် သူမသည် ပြန်လည်မွေးဖွား လာခဲ့ခြင်းပင်။

အစောပိုင်းက သူမ၏စိတ်ထဲရှိ မြင်ကွင်းများသည် သူမ၏ ယခင်ဘဝမှ မှတ်ဉာဏ်များဖြစ်ပေ၏။

သူမ၏ ယခင်ဘဝတွင် ခုံးဝူတောက်သည် ထင်ရှားကျော်ကြားလာပြီး နောက်ဆုံးတွင် သူ၏တာအိုကို သက်သေပြကာ ဧကရာဇ် တစ်ပါး ဖြစ်လာခဲ့ပြီး ဒဏ္ဍာရီလာ ကောင်းကင်ကံကြမ္မာ မဟာဧကရာဇ် ဖြစ်လာကာ ခေတ်အဆက်ဆက် ပြိုင်ဘက်ကင်းသော ကြီးမြတ်မှုကို ရရှိခဲ့သည်။

သူသည် အချိန်လေဟာနယ် တားမြစ်နယ်မြေ၏ ဂုဏ်ကျက်သရေကို ပြန်လည်ရယူပေးခဲ့ရုံသာမက ကောင်းကင်ဘုံများနှင့်အင်္သချေနယ်ပယ်များ တစ်ခုလုံးကိုလည်း အမှောင်ခေတ်အတွင်းသို့ ကျရောက်စေခဲ့သည်။

မရေမတွက်နိုင်သော တာအိုများ အပြိုင်အဆိုင်ဖြစ်ပြီး ကောင်းကင်ဘုံများ ပြန်လည်နိုးထလာသင့်သော ခေတ်တစ်ခုသည် အချိန်လေဟာနယ် တားမြစ်နယ်မြေမှ လွှမ်းမိုးထားသော ခေတ်တစ်ခေတ် ဖြစ်လာခဲ့သည်။

ကောင်းကင်ဘုံများနှင့်အင်္သချေနယ်ပယ်များ တစ်ခုလုံးသည် ခုံးဝူတောက်၏တာအိုဖြစ်သည့် အမြင့်မြတ်ဆုံး အမှောင်ခေတ်တစ်ခေတ်သို့ ဝင်ရောက်သွားခဲ့သည်။

ကံမကောင်းစွာဖြင့် နောက်ဆုံးတွင် သူမတို့၏ ပြန်လည်ဝင်စားခြင်း တာအိုဂိုဏ်းသည် ခုံးဝူတောက်၏ရှင်းလင်းမှုကို ခံခဲ့ရပြီး သူမလည်း ထိုရှင်းလင်းမှုတွင် အဖြစ်ဆိုးနှင့် သေဆုံးခဲ့ရသည်။

ထို့နောက်ပိုင်း ခုံးဝူတောက်၏ အောင်မြင်မှုများကို သူမ မသိခဲ့ပေ။

သို့သော် သေချာသည်မှာ ထိုကဲ့သို့ တည်ရှိမှုသည် ဤလောကကြီး၏ ချည်နှောင်မှုများကို ချိုးဖျက်ခဲ့သော ပုံမှန်မဟုတ်သည့် ဖြစ်စဉ်တစ်ခုကို သေချာပေါက် ပြုလုပ်နိုင်ပေလိမ့်မည်။

...

အချိန်အတော်ကြာ တိတ်ဆိတ်နေပြီးနောက် ချူယွင်ရှီးက ရေရွတ်လိုက်သည်။

"ဒါပေမယ့် ဒီမဟာဧကရီက ပြန်လည်မွေးဖွား လာမှတော့ ငါ့ရဲ့ ပြန်လည်ဝင်စားခြင်း တာအိုဂိုဏ်းကို ဖျက်ဆီးခံရတဲ့ အမှားမျိုး ထပ်ဖြစ်ခွင့် ပေးမှာ မဟုတ်ဘူး..."

သူမ၏ ယခင်ဘဝတွင် ခုံးဝူတောက်၏ လက်ချက်ဖြင့် အဖြစ်ဆိုးနှင့် သေဆုံးခဲ့ရသော်လည်း..

အဆုံးတွင် သူမသည် တုံးအမိုက်မဲပြီး တခြားသူများ၏ လွှမ်းမိုးမှုကို ခံခဲ့ရခြင်းကြောင့်လည်း ဖြစ်ပေ​၏။

ဧကရာဇ်လမ်းစဉ်တွင် ခုံးဝူတောက်ကို ကြားဖြတ်တိုက်ခိုက်ရန်အတွက် လူများကို စေလွှတ်ရန် သူမ ခေါင်းမာမာဖြင့် ကြိုးစားခဲ့သည်။

သို့သော် ရလဒ်မှာ ထိုအစီအစဉ်သည် လုံးဝကျရှုံးသွားရုံသာမက ခုံးဝူတောက်သည် ထာဝရ ကောင်းကင်ဘုံ ဧကရာဇ် အဆင့်အတန်းကိုပင် ရရှိသွားခဲ့သည်။

နောက်ဆုံးတွင် သူမနှင့် ထိုလူများသည် အချိန်လေဟာနယ် တားမြစ်နယ်မြေနှင့် ခုံးဝူတောက်၏ သုတ်သင်ရှင်းလင်းမှုကို ခံခဲ့ရသည်။

မရေမတွက်နိုင်သော တာအိုအမွေအနှစ်များသည်လည်း သူတို့နှင့်အတူ လုံးဝဖျက်ဆီးခံခဲ့ရသည်။

"အခု ဒီမဟာဧကရီက နောက်ထပ် ဘဝတစ်ခုကို နေထိုင်ခွင့်ရတဲ့အထိ ကံကောင်းနေမှတော့... နောင်လာမယ့် မျိုးဆက်တွေကို အမှောင်ခေတ်ထဲ ဆွဲချမယ့် ခုံးဝူတောက်ကို ဘယ်လို ကိုင်တွယ်ရမလဲ..."

"အမှောင်ခေတ်ကို ရှောင်လွှဲဖို့... ဘာတန်ဖိုးပေးရပေးရ သူ့ကို သတ်ပစ်သင့်သလား..."

"ဒါမှမဟုတ် တခြားနည်းလမ်းတစ်ခု သုံးပြီး ဒီကောင်လေးကို ငါ့ရဲ့လက်ထဲမှာ လုံးဝထိန်းချုပ်ထားရမလား..."

သို့သော် ဒီအတွေးကို ချူယွင်ရှီးက လျှင်မြန်စွာ ပယ်ဖျက်လိုက်သည်။

သူမ၏ ပြန်လည်ဝင်စားခြင်း တာအိုဂိုဏ်းကို မရေမတွက်နိုင်သော နှစ်များတစ်လျှောက် လက်ဆင့်ကမ်းလာခဲ့ပြီး ဂိုဏ်းအခြေခံအုတ်မြစ်က အတော်လေး ခိုင်မာသော်လည်း...

အချိန်လေဟာနယ် တားမြစ်နယ်မြေ၏ ရှေ့တွင်မူ အမှန်တကယ်ပင် နှိုင်းယှဉ်၍မရနိုင်ပေ။

သူမ၏ ယခင်ဘဝတွင် သေဆုံးသွားသည့်တိုင်အောင် အချိန်လေဟာနယ် တားမြစ်နယ်မြေ၏ အခြေခံအုတ်မြစ်သည် မည်မျှထိ နက်ရှိုင်းသည်ကို သူမ မသိခဲ့ပေ။

ခုံးဝူတောက်ကို သတ်ရန် ကြိုးစားခြင်း သို့မဟုတ် သူ့ကို ထိန်းချုပ်ရန် ကြိုးစားခြင်းသည် မဖြစ်နိုင်ပေ။

"မဟုတ်သေးဘူး... တကယ်လို့ အနာဂတ်ရဲ့ အမှောင်ခေတ်ကို ရှောင်လွှဲလို့မရဘူးဆိုရင်... ဘာလို့ ငါက အဲဒီအထဲ တိုက်ရိုက်ဝင်ပါဖို့ နည်းလမ်းတစ်ခု မရှာရမှာလဲ..."

သူမသည် မဟာဧကရာဇ် တစ်ပါး ဖြစ်သော်လည်း သာမန်အကျဆုံး အဆင့်ကိုး မဟာဧကရာဇ်သာ ဖြစ်ပေ၏။

သို့သော် သူမ ကျွမ်းကျင်သော ပြန်လည်ဝင်စားခြင်း မဟာတာအိုသည် ကောင်းကင်ဘုံများနှင့်အင်္သချေနယ်ပယ်များတွင် ထိပ်တန်းမဟာတာအိုများအနက်မှ တစ်ခုပင်။

သူမ၏ လက်ရှိ ကျင့်ကြံခြင်းဖြင့် အဆင့်ခုနစ် မဟာဧကရာဇ်နှစ်ပါးကို အနိုင်ယူရန်မှာ လွယ်ကူပေလိမ့်မည်။

ထို့ပြင် သူမသည် ကောင်းကင်ဘုံများရှိ သက်ရှိအားလုံးကို ကယ်တင်မည့် ကယ်တင်ရှင် အခန်းကဏ္ဍကို မယူချင်ပေ။

မည်သို့ပင်ဆိုစေကာမူ ခုံးဝူတောက်၏ နည်းလမ်းများက အလွန်ရက်စက်ကြမ်းကြုတ်ပြီး သူမ၏ယခင်ဘဝတွင် အင်မော်တယ် တာအိုအမွေအနှစ်မြေ ဆယ်ပေါင်းများစွာကို ဖျက်ဆီးပြီး မရေမတွက်နိုင်သော ကျင့်ကြံသူများကို သတ်ဖြတ်ခဲ့သည်။

အကယ်၍ သူမသာ သူ၏ရန်သူ ဖြစ်လာမည်ဆိုလျှင် သူမသည် ထိုအမှားများကို သေချာပေါက် ထပ်လုပ်မိမည်ဖြစ်ပြီး ပို၍ပင် ဆိုးရွားသွားနိုင်သည်။

ထို့ပြင် ခုံးဝူတောက်က ထိုတည်ရှိမှုများကို သတ်ဖြတ်ခဲ့ခြင်းမှာလည်း နားလည်နိုင်စရာပင် ဖြစ်ပေ၏။

အကြောင်းအရင်းမှာ သူတို့က ခုံးဝူတောက်၏ တိုးတက်မှုကို အဟန့်အတားဖြစ်စေရန် နှောက်ယှက်ခဲ့ခြင်းကြောင့် ရက်စက်စွာ ဖျက်ဆီးခံခဲ့ရခြင်းဖြစ်သည်။

အကယ်၍ သူမသာ ခုံးဝူတောက်၏ ကြောက်မက်ဖွယ် ပါရမီနှင့် စွမ်းအားအပြင် သူ၏ ကောင်းကင်ကို အာခံနိုင်ပြီး ပြိုင်ဘက်ကင်းသော နောက်ခံကို ပိုင်ဆိုင်ထားမည်ဆိုလျှင် သူမလည်း ဤကဲ့သို့ နည်းလမ်းများကို အသုံးပြုပေမည်။

မည်သို့ပင်ဆိုစေကာမူ ဤလောကြီးတွင် စွမ်းအားသည်သာ အကြွင်းမဲ့ဘုရင်ပင်။

အနာဂတ်ခေတ်သည် ကောင်းကင်ဘုံများနှင့်အင်္သချေနယ်ပယ်များ၏ အမှောင်မိုက်ဆုံး အချိန်ဖြစ်သော်လည်း အချိန်လေဟာနယ် တားမြစ်နယ်မြေ၏ ဂုဏ်ကျက်သရေရှိသော အချိန်လည်းဖြစ်သည်။

ထို့ပြင် သူမ၏ ယခင်ဘဝတွင် ကိုယ့်ကိုယ်ကိုယ် ကယ်တင်ရှင်များဟု စိတ်ကူးယဉ်နေသော လူများစွာ ရှိခဲ့သည်။

ကျားမမရွေး သူတို့အားလုံး ခုံးဝူတောက်၏ သတ်ဖြတ်ခြင်းကို ခံခဲ့ရပြီး သူ၏ခြေအောက်ရှိ ခြောက်သွေ့နေသော အရိုးစုများ ဖြစ်သွားခဲ့ကြသည်။

သူမ ပြန်လည်မွေးဖွားလာသဖြင့် သူ့ကို အနိုင်ယူနိုင်မယူနိုင်ကို စိုးရိမ်နေမည့်အစား သူ့ဘက်သို့ ဝင်ပါရန် တိုက်ရိုက်ရွေးချယ်လိုက်သည်က သူမ၏ စိုးရိမ်ပူပန်မှုများကို အမြှစ်ကနေ လုံးဝ ဖယ်ရှားပစ်နိုင်လောက်သည်။

ဤအတွက် သူမသည် သတ္တိမရှိ သို့မဟုတ် တာဝန်မယူတတ်ဟု အပြစ်တင်၍မရပေ။

သူမ၏ ယခင်ဘဝတွင် ခုံးဝူတောက်၏ ကြောက်မက်ဖွယ်ကောင်းမှုကို မျက်မြင်တွေ့ရှိပြီးနောက်...

ခုံးဝူတောက်၏ တိုးတက်လာမှုကို တားဆီး၍မရကြောင်း သူမ သိထားသည်။

ထိုကဲ့သို့ ကောင်းကင်ကို အာခံနိုင်သော တည်ရှိမှုကို ရင်ဆိုင်ရာတွင် လိုက်လျောသူများသာ ထာဝရအသက်ကို ရရှိနိုင်ပြီး ဆန့်ကျင်သူများကတော့ မြေမြှုပ်သင်္ဂြိုဟ်စရာ နေရာမရှိဘဲ သေဆုံးရပေမည်။

"ဒါပေမယ့်... ဒီ မဟာဧကရီက အခု အသက်အတော်ကြီးနေပြီမို့ ခုံးဝူတောက်ကို သိကျွမ်းဖို့ ကြိုးစားတာက လက်တွေ့မကျတော့ဘူး..."

သူမ၏ စိတ်ထဲတွင် အတွေးများ လှိုင်းထနေပြီးနောက် ရုတ်တရက် နတ်ဘုရားအလင်းတန်း တစ်ခု သူမ၏ စိတ်ထဲတွင် ဖြတ်ပြေးသွားကာ သူမ၏ မျက်လုံးများတွင် ရှင်းလင်းသော အကြည့်တစ်ခု ပေါ်လာသည်။

"ဒီမဟာဧကရီအနေနဲ့ ခုံးဝူတောက်နား ကပ်ဖို့ ခက်ခဲပေမယ့်... ယွင်အာက အခု ငယ်ရွယ်သေးပြီးတော့ သူရဲ့ ကျင့်ကြံခြင်းကလည်း ငါ့ရဲ့ ပြန်လည်ဝင်စားခြင်း တာအိုဂိုဏ်းမှာ အထူးချွန်ဆုံး ပါရမီရှင် ဖြစ်နေတာပဲ..."

"ဒီ မဟာဧကရီက သူတို့နှစ်ယောက် နီးစပ်ဖို့ နည်းလမ်းတစ်ခု ရှာတွေ့သရွေ့ သေချာပေါက် အများကြီး အသုံးဝင်မှာပဲ..."

လင်းမြောင်ယန်...

ပြန်လည်ဝင်စားခြင်း တာအိုဂိုဏ်း၏ ပထမ သူတော်စင်မိန်းမပျို ဖြစ်ပြီး သူမ၏တပည့်ရင်း လည်း ဖြစ်ပေ၏။

သူမသည် မဟာတာအို ရုပ်ခန္ဓာကိုယ်သုံးထောင်၏ ထိပ်တန်းစာရင်းတွင် ပါဝင်သော ယင်ယန်သူတော်စင်ခန္ဓာကိုယ်ကို ပိုင်ဆိုင်ထားသည်။

လင်းမြောင်ဟန်သည် ယင်နှင့်ယန် စွမ်းအားများနှင့် နီးစပ်ပြီး အလွန်ကောင်းမွန်သော မီးပြင်းဖိုရုပ်ခန္ဓာကိုယ်လည်း ဖြစ်ပေ၏။

အကယ်၍ သူမသာ မကျဆုံးခဲ့လျှင် အနာဂတ်တွင် ပြိုင်ဘက်ကင်း မဟာဧကရီတစ်ပါး သေချာပေါက် ဖြစ်လာပေလိမ့်မည်။

သို့သော် လင်းမြောင်ယန်သည် သူမကိုယ်သူမ အလှပဆုံးဟု ယူဆကာ ကျင့်ကြံသူ အမျိုးသားများကို ရန်စရန် သူမ၏ ပြင်ပအသွင်အပြင်ကို အသုံးပြုရသည်အား အမြဲတမ်း နှစ်သက်သည်။

အကယ်၍ တစ်ဖက်လူက ခုံးဝူတောက်နှင့် ဆက်ဆံရာတွင် ထိုကဲ့သို့ မသင့်လျော်သည့် နည်းလမ်းများကို အသုံးပြုမည်ဆိုလျှင် ဤကိစ္စက အလွယ်တကူ ပျက်စီးသွားနိုင်သည်။

သို့သော် သူမတွင် ဤတပည့်ရင်းတစ်ယောက်သာ ရှိသည်။ လင်းမြောင်ဟန်သည် စရိုက်သဘာဝအရ အနည်းငယ် လွတ်လပ်သော်လည်း သူမ၏ ပါရမီနှင့် စရိုက်လက္ခဏာက မဆိုးပေ။

"ကြည့်ရတာ... ကြီးမားတဲ့ ဘေးဒုက္ခ မဖြစ်ဖို့ သေချာအောင်... ယွင်အာကို ဒီကိစ္စရဲ့ အရေးကြီးပုံနဲ့ လေးနက်ပုံကို ငါ သေချာအလေးအနက်ထားပြီး ပြောပြဖို့ လိုတယ်..."

ချူယွင်ရှီးက ခန်းမအပြင်ဘက်သို့ကြည့်ကာ ပြောဆိုလိုက်သည်။

"သူတော်စင်မိန်းမပျိုမြောင်ယန်ကို ခန်းမထဲ ဝင်လာဖို့ ဆင့်ခေါ်လိုက်... ဒီ မဟာဧကရီက သူနဲ့ ဆွေးနွေးစရာ အရေးကြီးကိစ္စရှိတယ်..."

...

အနောက်ဘက်ရွှမ် တာအိုနယ်မြေ...

တိမ်တိုက်များကို ထိုးဖောက်နေသော ကောင်းကင်ထိုးမတတ် နတ်ဘုရားတောင်ကြီးတစ်လုံး၏ထိပ်တွင်...

စိမ်းဖျော့ဖျော့ပိုးဝတ်စုံကို ဝတ်ဆင်ထားပြီး သိမ်မွေ့ကာ အေးစက်စက်အရှိန်အဝါရှိသော အလွန်လှပသည့် အမျိုးသမီးတစ်ဦး လေထုကို မျက်နှာမူ၍ မတ်တတ်ရပ်နေသည်။

သူမ၏ မည်းနက်သော ဆံကေသာများက လေထဲတွင် လူးလွန့်နေပြီး သူမ၏ကိုယ်ဟန်အမူအရာကို ပို၍ထူးခြားကာ သာလွန်ထူးကဲသွားစေသည်။

စုချင်းကဲ...

အနောက်ဘက်ရွှမ် တာအိုနယ်ပယ်၏ ပြိုင်ဘက်ကင်း ပါရမီရှင် ဖြစ်ပြီး ထိပ်တန်းတာအိုရုပ်ခန္ဓာကိုယ်ဖြစ်သော အထွတ်အထိပ်အရိုး၏ ပုံမှန်မဟုတ်သော အကိုင်းအခက်တစ်ခုဖြစ်သည့် မွေးရာပါအထွတ်အထိပ်အရိုးကို ပိုင်ဆိုင်ထားသည်။

သူမသည် အထွတ်အထိပ်အရိုး၏ အမျိုးမျိုးသော စွမ်းရည်များကို ပိုင်ဆိုင်ရုံသာမက မွေးရာပါ စွမ်းအားများကိုပင် စုစည်းနိုင်ပြီး ကြောက်မက်ဖွယ်ကောင်းသော တိုက်ခိုက်ရေးစွမ်းအားကို ပိုင်ဆိုင်ထားသည်။

သူမ၏ ကျင့်ကြံခြင်းသည် အလွန်အစွမ်းထက်ပြီး တာအိုနန်းတော်နယ်ပယ် အဆင့်ကိုးသို့ ရောက်ရှိနေပြီဖြစ်ကာ ဟင်းလင်းပြင်နတ်ဘုရားနယ်ပယ်နှင့် ခြေတစ်လှမ်းသာ ကွာဝေးတော့သည်။

သူမသည် အနောက်ဘက်ရွှမ် တာအိုနယ်ပယ်၏ နံပါတ်တစ် ပါရမီရှင်ဖြစ်သည်မှာ သေချာပေါက်ပင်။

သို့သော် စုချင်းကဲ၏ လှပသောမျက်လုံးများက အချိန်လေဟာနယ် တားမြစ်နယ်မြေဆီသို့ ကြည့်နေပြီး သူမ၏မျက်လုံး အနက်ရှိုင်းဆုံး နေရာတွင် နက်ရှိုင်းသော ဒေါသနှင့် မုန်းတီးမှုများ ရှိနေသည်။

"အချိန်လေဟာနယ် တားမြစ်နယ်မြေ..."

"ငါ့ရဲ့အစ်ကိုအတွက် လက်စားချေဖို့ နင်တို့ ပေးဆပ်ရမယ့် အချိန်ရောက်ပြီ..."

သူမအစ်ကို၏နာမည်မှာ စုယွမ် ဖြစ်ပြီး သူသည်လည်း ထိပ်တန်းရုပ်ခန္ဓာကိုယ်ဖြစ်သော အထွတ်အထိပ်အရိုးကို ပိုင်ဆိုင်ထားကာ တစ်ချိန်က အနောက်ဘက်ရွှမ် တာအိုနယ်မြေတွင် နာမည်ကြီးသော ပြိုင်ဘက်ကင်းပါရမီရှင်တစ်ယောက် ဖြစ်ခဲ့သည်။

သို့သော် လွန်ခဲ့သော အချိန်အတော်ကြာက သူမ၏အစ်ကိုသည် အချိန်လေဟာနယ် တားမြစ်နယ်မြေထဲရှိ ထိပ်တန်းကျင့်ကြံသူများကို စိန်ခေါ်ရန်နှင့် ပို၍အစွမ်းထက်သော တာအိုတစ်ခုကို တည်ဆောက်ရန် အချိန်လေဟာနယ် တားမြစ်နယ်မြေသို့ တစ်ယောက်တည်း သွားခဲ့သည်။

သို့သော် သူမ၏အစ်ကို အချိန်လေဟာနယ် တားမြစ်နယ်မြေထဲသို့ ဝင်သွားပြီးကတည်းက လုံးဝပျောက်ကွယ်သွားသကဲ့သို့ မည်သည့်အခါမှ ပြန်ထွက်မလာတော့ပေ။

လောကကြီးက စုယွမ်သည် ဘေးဒုက္ခနှင့် ကြုံတွေ့ခဲ့ရပြီး အချိန်လေဟာနယ် တားမြစ်နယ်မြေတွင် အဖြစ်ဆိုးနှင့် သေဆုံးသွားလောက်ပြီဟု ခန့်မှန်းခဲ့ကြ၏။

သူမ၏အစ်ကို မထွက်ခွာမီက သူမကို ပေးခဲ့သော ကတိကို တွေးမိတိုင်း စုချင်းကဲ၏ နှလုံးသားသည် ဓားဖြင့် လှီးဖြတ်ခံရသကဲ့သို့ နာကျင်ရသည်။

စုယွမ်၏ကိစ္စပြီးနောက် သူမ၏အစ်ကို သေဆုံးသွားပြီဖြစ်ကြောင်း သူမ သိနေခဲ့လေပြီ။

သူမ၏သွေးမျိုးဆက်နှင့် ဆက်သွယ်ထားသော သူ၏အထွတ်အထိပ်အရိုးပင်လျှင် သူမနှင့် အဆက်အသွယ် လုံးဝပြတ်တောက်သွားခဲ့သည်။

စုယွမ်သည် သူမ၏ တစ်ဦးတည်းသော ဆွေမျိုးဖြစ်ပြီး သူ အချိန်လေဟာနယ် တားမြစ်နယ်မြေတွင် အဖြစ်ဆိုးနှင့် သေဆုံးသွားခြင်းက စုချင်းကဲကို အချိန်လေဟာနယ် တားမြစ်နယ်မြေအပေါ် ကြီးမားသော မုန်းတီးမှုများကို ဖြစ်ပေါ်စေပေ၏။

ထိုကဲ့သို့ ကြီးမားသည့် မုန်းတီးမှုက သူမကို တိုးတက်အောင် ကြိုးစားရန် လှုံ့ဆော်ပေးခဲ့သည်။

ဤနှစ်တစ်ရာအတွင်း တစ်နေ့တွင် သူမ၏အစ်ကိုအတွက် လက်စားချေနိုင်ရန်အတွက် သူမသည် သူမအစ်ကို၏ယခင် အောင်မြင်မှုများကို ရရှိခဲ့ပြီး ထိုအရာများကိုပင် ကျော်လွန်ကာ အနောက်ဘက်ရွှမ် တာအိုနယ်ပယ်၏ နံပါတ်တစ် အမျိုးသမီး ပါရမီရှင် ဖြစ်လာခဲ့သည်။

ယခု အချိန်လေဟာနယ် တားမြစ်နယ်မြေတွင် ထူးဆန်းသော သဘာဝလွန်ဖြစ်စဉ်တစ်ခု ရုတ်တရက် ဖြစ်ပေါ်လာရာ ကြီးမားသော အရာတစ်ခု ဖြစ်တော့မည်ဟု ပြသနေသည်။

အကယ်၍ သူမသည် ယနေ့တွင် သူတို့ကို စိန်ခေါ်ရန် ရွေးချယ်ကာ သူမ ကျရှုံးပြီး သေဆုံးသွားမည် ဆိုလျှင်တောင် တစ်ဖက်လူကို ရွံရှာသွားအောင် အောင်မြင်စွာ လုပ်ဆောင်နိုင်ပေမည်။

"ချင်းကဲ... မင်း အချိန်လေဟာနယ် တားမြစ်နယ်မြေကို သွားမလို့လား..."

ထိုအချိန်မှာပင် ကြည်လင်ပြတ်သားသော အမျိုးသားအသံတစ်သံက သူမ၏နောက်မှ ရုတ်တရက် ထွက်ပေါ်လာသည်။

"ကိုယ် မင်းနဲ့ အတူလိုက်ခဲ့မယ်..."

အစိမ်းရောင် ဝတ်ရုံကို ဝတ်ဆင်ထားသော အရပ်မြင့်ကာ ချောမောသည့် အမျိုးသားတစ်ယောက်သည် မင်္ဂလာတိမ်တိုက်များကို နင်းကာ စုချင်းကဲ၏ရှေ့သို့ တဖြည်းဖြည်း ဆင်းသက်လာသည်။

ယဲ့ချန်....

အနောက်ဘက်ရွှမ် တာအိုနယ်မြေ၏ ထိပ်တန်း ပါရမီရှင်တစ်ယောက်ဖြစ်ပြီး တာအိုနန်းတော်နယ်ပယ်အဆင့်ကိုး ကျင့်ကြံခြင်း ရှိကာ အကြိမ်ကိုးဆယ်လှည့်ပတ်ခြင်း နတ်ဘုရားဖီးနစ် ရုပ်ခန္ဓာကိုယ်ကို ပိုင်ဆိုင်ထားသည်။

သူသည် တာအိုနှင့်ပတ်သက်၍ အလွန်မြင့်မားသော နားလည်သဘောပေါက်နိုင်စွမ်းကို ပိုင်ဆိုင်ရုံသာမက ဖီးနစ်ငှက်တစ်ကောင်ကဲ့သို့ မီးထဲမှနေ၍ ပြန်လည်မွေးဖွားခြင်း တစ်ကြိမ် ရရှိနိုင်သည်ဟုလည်း ကောလာဟလများ ရှိပေ၏။

ထိုကဲ့သို့ ထူးချွန်သော စွမ်းရည်များ၏ ကောင်းချီးအောက်တွင် သူသည် စုချင်းကဲနှင့်အတူ အနောက်ဘက်ရွှမ် တာအိုနယ်ပယ်၏ အမြွှာကြယ်နှစ်ပွင့်ထဲမှ တစ်ဦးအဖြစ်ပင် လူသိများသည်။

ယခင်က သူတို့နှစ်ယောက်သည် အနောက်ဘက်ရွှမ် တာအိုနယ်ပယ်၏ ထိပ်တန်းပါရမီရှင်ဘွဲ့အတွက် အကြိမ်ပေါင်း မရေမတွက်နိုင်အောင် ယှဉ်ပြိုင်ခဲ့ကြသည်။

မရေမတွက်နိုင်သော ပြိုင်ပွဲများတွင် သူတို့သည် တစ်နည်းနည်းဖြင့် တစ်ယောက်ကိုတစ်ယောက် ခံစားချက်များ ပေါက်ဖွားလာခဲ့ပြီး လိပ်တစ်ကောင်က ပဲစိမ်းစေ့ကို မြင်လိုက်ရသလို သူတို့လ​ည်း အချိတ်အဆက် မိသွားခဲ့သည်။

ယခုချိန်၌ သူတို့သည် ပြိုင်ဘက်များ ဖြစ်သည့်အပြင် တစ်ယောက်ကိုတစ်ယောက် ယုံကြည်ရသော ရင်းနှီးသည့် သူငယ်ချင်းများလည်း ဖြစ်ကြ၏။