မဟာတာအိုကံကြမ္မာသားတော်တွေကို အမဲလိုက်မဲ့ ဗီလိန်နတ်ဘုရားသားတော်

အချိန်လေဟာနယ် တားမြစ်နယ်မြေ...။ တားမြစ်နယ်မြေမှ နတ်ဘုရားသားတော် ခုံးဝူတောက်သည် ပျက်စီးခြင်းခေတ်ကာလရှိ ပါရမီရှင်များကြားတွင် ပြိုင်ဘက်ကင်းလွန်းသဖြင့် ဘဝကို ငြီးငွေ့လာကာ အချိန်နှင့်လေဟာနယ် နတ်ဘုရားတောင်၌ သူ့ကိုယ်သူ ဆန္ဒအလျောက် ချိတ်ပိတ်ထားလေ၏။ နှစ်ပေါင်းများစွာ ကြာမြင့်ပြီးနောက် မဟာတာအိုများ ပြင်းထန်စွာ ပြောင်းလဲသွားကာ လောကကြီးသည် နိုးထခြင်းခေတ်သို့ ရောက်ရှိလာခဲ့ပြီး ကောင်းကင်ဘုံကို အာခံမည့်သူများ တသီတတန်းကြီး ပေါ်ထွက်လာခဲ့သည်။ ခုံးဝူတောက် တစ်ဖန်ပြန်လည်နိုးထလာချိန်တွင် စနစ်ဟု ဆိုသော အသံတစ်သံက ရုတ်တရက် ထွက်ပေါ်လာသည်။ [ဒင်....ကောင်းကင်ဘုံ အမဲလိုက်စနစ် နိုးထလာပါပြီ...လက်ခံသူအား ကောင်းကင်ဘုံများ၏ မုဆိုးအဖြစ် ပြိုင်ဘက်ကင်းလာစေရန် ကူညီပေးပါမည်] "လောကမှာ ပြိုင်ဘက်ကင်းဖြစ်အောင်လို့လား... ငါ့ရဲ့ ကိုယ်ပိုင်ပါရမီနဲ့ စွမ်းရည်တွေကတင် လုံလောက်အောင်ကို ပြိုင်ဘက်ကင်းနေပြီ...ဒါ့ပြင် တားမြစ်နယ်မြေနဲ့ မရေမတွက်နိုင်တဲ့ ဘိုးဘေးတွေရဲ့ ကျောထောက်နောက်ခံက ရှိနေသေးတယ်..." "ငါ့ရဲ့အဘိုးနဲ့ ဘိုးဘေးတော်တော်များများက ဒီလောကကြီးကို ကျော်လွန်ပြီး တက်လှမ်းသွားကြပြီ... စနစ်တဲ့လား... ဒီလို အသုံးမကျတဲ့ ပစ္စည်းလေးက ဘာလုပ်လို့ ရမှာလဲ" စနစ် : ..... [စနစ်သည် ကိုယ့်ကိုယ်ကို အမှောင်ဘက်ခြမ်းသို့ စတင်အဆင့်မြှင့်တင်နေပါပြီ...နတ်ဘုရားအဆင့် အမဲလိုက်စနစ် အဆင့်မြှင့်တင်ခြင်း ပြီးမြောက်ပါပြီ] [သာမန် ကံကြမ္မာပိုင်ရှင်များသည် သခင်၏ သားကောင်ဖြစ်ရန် မထိုက်တန်ကြောင်း စစ်ဆေးတွေ့ရှိရသည်။ ထို့ကြောင့် မဟာတာအိုသုံးထောင်ကို အမဲလိုက်မည့် နယ်ပယ်ထဲသို့ ထည့်သွင်းလိုက်ပါပြီ] [မူလဘူတတာအိုအရိုး ၃၀၆ ခု ရရှိသွားသည့်အတွက် သခင့်အား ဂုဏ်ပြုပါသည်] [ကောင်းကင်ဝါးမြို နတ်ဘုရားသွေးမျိုးဆက်...မွေးရာပါ ဝိညာဉ်ရတနာ... မှော်လက်နက်မျိုးစုံ....] [သခင်က ကောင်းကင်ဘုံအားလုံးရဲ့ မုဆိုးဖြစ်တဲ့အတွက် ကံကြမ္မာရဲ့တန်ပြန်သက်ရောက်မှုကို စိုးရိမ်စရာ မလိုတော့ပါဘူး....] ......... ခေတ်တစ်ခေတ်၏ ကံကြမ္မာဧကရာဇ် : နောက်ဆုံးတော့ ပြန်လည်မွေးဖွားလာနိုင်ခဲ့ပြီမို့ သူ အထွတ်အထိပ်ကို ပြန်ရောက်နိုင်ပြီဟု ထင်မှတ်ထားခဲ့သော်လည်း... သို့ရာတွင် ခုံးဝူတောက်၏ သားကောင်အဖြစ်သာ သတ်မှတ်ခံလိုက်ရရှာ၏။ ဂိမ်းကမ္ဘာမှ အစွမ်းထက်သူ : တောက်...မင်းဆီမှာ ကောင်းကင်ဘုံရဲ့ တားမြစ်ပစ္စည်းတွေ ရှိနေတာတောင် ဘာလို့ ဒီလောက်ထိ ပြိုင်ဘက်ကင်းနေရသေးတာလဲ။