အခန်း (၁၂၅-၁၂၆)

အခန်း (၁၂၅) နယ်မြေအားလုံး ထိတ်လန့်တုန်လှုပ်သွားကြတယ်.. တူညီတဲ့ ခေတ်ကာလတစ်ခုမှာ နေထိုင်ရတာက ကံဆိုးမှုတစ်ခုပဲ

တစ်ချိန်တည်းမှာပင် ထျန်းယန်တာအိုနယ်မြေတွင်.....

ထျန်းယန်တာအိုနယ်မြေသည် အလွန်ထူးခြားပေ၏။ ထိုနယ်မြေ၏ ကောင်းကင်နှင့်မြေကြီးသည် သဘာဝအတိုင်း ရွှေကျီးကန်းမီးတောက် စိတ်ဝိညာဉ်ချီများဖြင့် ပြည့်နှက်နေသည်။

ဤနေရာတွင် အခြေချထားသော တာအိုအမွေအနှစ်မြေများအားလုံး မီးမဟာတာအိုကို ထိန်းချုပ်ရာတွင် ကျွမ်းကျင်ကြသည်။

ဤတာအိုနယ်မြေတွင် အဓိကအင်အားစုကြီး သုံးခုရှိပြီး ရွှေကျီးကန်းနတ်ဘုရားတောင်သည် ထိုအင်အားစုများထဲမှ တစ်ခုပင်။

ရွှေကျီးကန်းနတ်ဘုရားတောင်၏ နယ်မြေအတွင်း၌....

မီးဥပဒေသများက ကောင်းကင်ယံကို ဖုံးလွှမ်းထားပြီး စီးဆင်းနေသော မီးမြစ်များက မြေပြင်ကို လွှမ်းခြုံထားသည်။

အထူးသဖြင့် အလယ်ဗဟိုရှိ ဧရာမမီးနတ်ဘုရားတောင်ကြီးသည် ဒဏ္ဍာရီလာ ရွှေကျီးကန်း၏ နေထိုင်ရာ နေရာတစ်ခုကဲ့သို့ ထူးကဲစွာ တောက်ပပြီး လင်းထိန်နေပေ၏။

ဝုန်း...

ရုတ်တရက်....

မီးနတ်ဘုရားတောင်သည် ပြင်းထန်စွာ တုန်ခါသွားပြီး ကောင်းကင်ကို ဖုံးကွယ်သွားစေမည့် မီးတိမ်တိုက် မုန်တိုင်းတစ်ခု ဖြာထွက်လာသည်။

ရုတ်ချည်းဆိုသလိုပင် ရွှေကျီးကန်းနတ်ဘုရားတောင်မှ မရေမတွက်နိုင်သော ကျွမ်းကျင်သူများအားလုံး ကောင်းကင်ယံသို့ တစ်ပြိုင်နက်တည်း မော့ကြည့်လိုက်ကြပြီး ထိတ်လန့်တုန်လှုပ်စွာဖြင့် ငေးမောကြည့်နေကြ၏။

"ဒီအရှိန်အဝါက... သခင်ယန် နိုးလာပြီ..."

သူတို့ ပြောဆိုသော သခင်ယန် ဆိုသည်မှာ ခြေလှမ်းတစ်ဝက် ဧကရာဇ်နယ်ပယ် ကျင့်ကြံသူ တစ်ဦးဖြစ်ပြီး လက်ရှိရွှေကျီးကန်းနတ်ဘုရားတောင်၏ အရှင်သခင်ပင်။

သူသည် နတ်ဘုရားသားတော် ယန်ရန် ကျင်းအောက်ထျန်း၏ဖခင်လည်း ဖြစ်သည်။

ကောင်းကင်ယံ၏အထွတ်အထိပ်တွင် စုစည်းနေသော အရှိန်အဝါသည် ပို၍ပို၍ ကြောက်မက်ဖွယ်ကောင်းလာပြီး ဤနေရာရှိ ကောင်းကင်နှင့်မြေကြီးကိုပင် အနည်းငယ် တုန်ခါသွားစေခဲ့သည်။

ကြည်လင်ပြတ်သားမှုမရှိသော အခြေအနေတွင် ရွှေကျီးကန်းနတ်ဘုရားတောင်မှ မရေမတွက်နိုင်သော ကျွမ်းကျင်သူများအားလုံးသည် ဤကြောက်မက်ဖွယ် ဖိအားအတွင်းမှ အလွန်အမင်း ပြင်းထန်သော ဒေါသကို ခံစားနိုင်ကြသည်။

ဤအရာက ရွှေကျီးကန်းနတ်ဘုရားတောင်မှ မရေမတွက်နိုင်သော ကျင့်ကြံသူများကို ကြောက်ရွံ့သွားစေသည့်အပြင် အနည်းငယ် ရှုပ်ထွေးသွားစေခဲ့သည်။

မည်သည့်အရာ ဖြစ်ပျက်သွားသနည်း....

သူတို့၏ သခင်ယန်ကို ဤမျှထိ ဒေါသထွက်အောင် လုပ်လိုက်သူမှာ မည်သူနည်း....

"ဘယ်သူလဲ..."

"ဘယ်သူလဲ... ငါ့သားကို သတ်ရဲတာ..."

ဤအသံတွင် အဆုံးမဲ့ ဝမ်းနည်းပူဆွေးမှုနှင့် နာကြည်းမှုများ ပါဝင်နေပုံရသည်။

ထိုအသံက ရွှေကျီးကန်းနတ်ဘုရားတောင် နယ်မြေတစ်ခုလုံးကို တုန်ခါသွားစေခဲ့ပြီး ထျန်းယန်တာအိုနယ်မြေရှိ မရေမတွက်နိုင်သော သက်ရှိများ၏ နားထဲတွင် ပဲ့တင်ထပ်သွားသည်။

အချိန်တခဏကြာ တိတ်ဆိတ်သွားပြီးနောက်....

ထျန်းယန်တာအိုနယ်မြေ တစ်ခုလုံးသည် ချက်ချင်းပင် ဆူညံပွက်လောရိုက်သွားတော့သည်။

"ဒီအသံက... ရွှေကျီးကန်းနတ်ဘုရားတောင်က သခင်ယန်ရဲ့ အသံ ဖြစ်ပုံရတယ်..."

"ဘာ... ဘာပြောတယ်... ရွှေကျီးကန်းနတ်ဘုရားတောင်က သခင်ယန်ရဲ့သား သေသွားပြီလား..."

"သခင်ယန်ရဲ့ ဆက်ခံသူက... နတ်ဘုရားသားတော် ယန်ရန် တစ်ယောက်တည်း ရှိတာ မဟုတ်ဘူးလား..."

"နတ်ဘုရားသားတော် ယန်ရန် သေသွားပြီလား... ဒါက ဘယ်လိုလုပ်ပြီး ဖြစ်နိုင်မှာလဲ... သူက လွန်ခဲ့တဲ့ အချိန်တိုလေးကမှ ကောင်းကင်ဘုံ တာအိုနယ်မြေကို သွားတယ်လို့ ငါ ကြားတယ်လေ... အချိန်ဘယ်လောက် ကြာသေးလို့လဲ... ပြီးတော့ သူက သေဆုံးသွားပြီပေါ့..."

"ဟူး... နတ်ဘုရားသားတော် ယန်ရန်ရဲ့ ပါရမီက ငါတို့ ထျန်းယန်တာအိုနယ်မြေ တစ်ခုလုံးကို ကြည့်မယ်ဆိုရင် သေချာပေါက် ထိပ်တန်းအဆင့်ပဲ... သူ့ကို သတ်လိုက်တဲ့ အထွတ်အထိပ် ပုဂ္ဂိုလ်က ဘယ်သူများလဲ..."

"နတ်ဘုရားသားတော် ယန်ရန်က သခင်ယန်ရဲ့တစ်ဦးတည်းသော ဆက်ခံသူ ဖြစ်ရုံတင်မကဘူး ရွှေကျီးကန်းနတ်ဘုရားတောင် တစ်ခုလုံးက မျှော်လင့်ချက် ကြီးကြီးမားမား ထားရှိတဲ့သူပဲ... အခု သူက ကောင်းကင်ဘုံ တာအိုနယ်မြေမှာ သေသွားပြီဆိုတော့ ရွှေကျီးကန်းနတ်ဘုရားတောင် တစ်ခုလုံးက ရူးသွပ်သွားတော့မှာပဲ..."

"..............."

နတ်ဘုရားသားတော် ယန်ရန် သေဆုံးသွားကြောင်း သတင်းကို လက်ခံရရှိပြီးနောက်....

ရွှေကျီးကန်းနတ်ဘုရားတောင် တစ်ခုလုံး တုန်လှုပ်ချောက်ချားသွားရုံသာမက...

ထိုသတင်းသည် ပတ်ဝန်းကျင်ရှိ တာအိုနယ်မြေ တချို့သို့ပင် ပျံ့နှံ့သွားပေ၏။

ထို့ပြင် နတ်ဘုရားသားတော်ယန်ရန် သေဆုံးသွားသည့် ကိစ္စသည် အလွန်လျှင်မြန်သော အရှိန်အဟုန်ဖြင့် အပြင်ဘက်သို့ ဆက်လက်၍ ပျံ့နှံ့နေဆဲပင်။

ကောင်းကင်ဘုံများအားလုံးရှိ ဤစကားများကို ကြားလိုက်ရသော မရေမတွက်နိုင်သည့် သက်ရှိများသည် သူတို့၏စိတ်ထဲတွင် တုန်ခါသွားသလို ခံစားလိုက်ရပြီး အဆုံးမရှိ သက်ပြင်းချလိုက်ကြ၏။

နတ်ဘုရားသားတော် ယန်ရန်ကို လူအများက နာမည်ကျော်ကြားသော လူငယ် အထွတ်အထိပ်ပုဂ္ဂိုလ်တစ်ဦးအဖြစ် သတ်မှတ်ထားကြသည်။

နတ်ဘုရားသားတော် ယန်ရန်ကို တိုက်ရိုက်ဖိနှိပ်ပြီး သတ်ဖြတ်နိုင်သူမှာ အတိအကျ မည်သူ ဖြစ်နိုင်မည်နည်း....

သို့သော် မရေမတွက်နိုင်သော တာအိုနယ်မြေမှ သက်ရှိများ ပြင်းထန်စွာ ဆွေးနွေးနေကြစဉ်မှာပင်...

မကြာမီမှာပင် တခြားသတင်းတစ်ပုဒ်သည် အင်အားအလွန်ပြင်းထန်သော ငလျှင်တစ်ခုအလား မရေမတွက်နိုင်သည့် တာအိုနယ်မြေများသို့ ပျံ့နှံ့သွားသည်။

"နောက်ဆုံးရ သတင်း..."

"ကောင်းကင်ဘုံ တာအိုနယ်မြေကို ဆင်းသက်လာတဲ့ ရွှေကျီးကန်းနတ်ဘုရားတောင်က လူတွေအားလုံး... တာအိုအစောင့်အရှောက် ဆယ်ယောက် အပါအဝင် သူတို့အားလုံး သေဆုံးသွားပြီလို့ ငါ ကြားတယ်..."

"ကောင်းကင်ဘုံ တာအိုနယ်မြေကို သွားတဲ့ ခရီးစဉ်မှာ ရွှေကျီးကန်းနတ်ဘုရားတောင်က ရှေးဟောင်းမဟာတာအို အမှတ်အသားရဲ့ အရိပ်ကိုတောင် မမြင်လိုက်ရဘူး... သူတို့က ပထမဆုံး ဖယ်ရှားခံရတဲ့ အင်အားစု ဖြစ်သွားရုံတင်မကဘူး တစ်ယောက်မှတောင် အသက်ရှင် မကျန်ရစ်ခဲ့ဘူး..."

"တရားဝင် မဟုတ်တဲ့ သတင်းရင်းမြစ်တွေ အရ... ဒီကိစ္စကို အချိန်လေဟာနယ် တားမြစ်နယ်မြေက လုပ်ခဲ့တာလို့ ငါ ကြားတယ်..."

"နတ်ဘုရားသားတော် ယန်ရန်ကလည်း ခုံးဝူတောက်ရဲ့ သတ်ဖြတ်တာကို ခံလိုက်ရပုံပေါ်တယ်..."

"ခုံးဝူတောက်လား... နှစ်သန်းပေါင်းများစွာကြာအောင် အိပ်စက်နေခဲ့တဲ့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော်လား..."

တစ်စုံတစ်ယောက်က မယုံနိုင်စွာဖြင့် အံ့အားတသင့် ရေရွတ်လိုက်၏။

"ဒါပေမယ့် ပျက်စီးခြင်းခေတ်မှာ စိတ်ဝိညာဉ်ချီတွေ ပါးလွှာခဲ့တာကြောင့် ခုံးဝူတောက်ရဲ့စွမ်းအားက မကြီးမားဘူးလို့ ငါ ကြားထားတယ်လေ..."

"အချိန်လေဟာနယ် တားမြစ်နယ်မြေက ခုံးဝူတောက်ရဲ့ စွမ်းအားကို တမင်တကာ ချဲ့ကားပြောဖို့ ဒီသတင်းကို ထုတ်ပြန်လိုက်တာများ ဖြစ်နိုင်မလား..."

လူများစွာသည် ဤကိစ္စနှင့် ပတ်သက်၍ သံသယ ဝင်နေကြဆဲပင်။

သို့သော် တရားဝင် မဟုတ်သော သတင်းများ ပိုမို ထွက်ပေါ်လာသည်နှင့်အမျှ...

ကောင်းကင်ဘုံများနှင့်အသင်္ချေနယ်မြေများရှိ မရေမတွက်နိုင်သော ကျင့်ကြံသူများသည် ထုံကျင်သွားသည်အထိ ထိတ်လန့်တုန်လှုပ်သွားကြ၏။

"အချိန်လေဟာနယ် တားမြစ်နယ်မြေရဲ့ နတ်ဘုရားသားတော် ခုံးဝူတောက်က ကောင်းကင်ဘုံ တာအိုနယ်မြေမှာ ဟင်းလင်းပြင်နတ်ဘုရားနယ်ပယ် အဆင့်နှစ်ကို ရောက်နေတဲ့ ရွှေကျီးကန်းနတ်ဘုရားတောင်ရဲ့ ဧကရာဇ်သားတော် ကျင်းယန်ကို လက်တစ်ချောင်းတည်းနဲ့ တောက်ပြီး သတ်ပစ်လိုက်တာတဲ့..."

"နောက်ပိုင်းမှာ နတ်ဘုရားသားတော် ယန်ရန်နဲ့ လူပုံအလယ်မှာ ထိပ်တိုက်တွေ့တဲ့အချိန်မှာ သူက ယန်ရန်ရဲ့ ရွှေကျီးကန်း မီးတောက်ကို လက်တစ်ဖက်တည်းနဲ့ စုပ်ယူခဲ့ရုံတင်မကဘူး... ခြင်တစ်ကောင်ကို ရိုက်ချသလိုပဲ နတ်ဘုရားသားတော် ယန်ရန်ကို ပါးရိုက်ပြီး လွင့်ထွက်သွားစေခဲ့တယ်..."

"ခုံးဝူတောက်က ရွှေကျီးကန်းနတ်ဘုရားတောင်က လူတွေအားလုံးကို သတ်ပစ်ခဲ့ရုံတင်မကဘူး သူတို့ကို အစားအစာ ပါဝင်ပစ္စည်းများအဖြစ်တောင် အသုံးပြုခဲ့တယ်လို့ ငါ ကြားတယ်..."

"အရမ်း ရက်စက်လွန်းတယ်... ခုံးဝူတောက်ရဲ့ လုပ်ရပ်တွေက ငှက်ကို သတ်ပြီး နှလုံးသားကို တိုက်ခိုက်ခဲ့ရုံတင်မကဘူး ရွှေကျီးကန်းနတ်ဘုရားတောင်ရဲ့ ဂုဏ်ယူဝင့်ကြွားမှုကိုပါ ခြေအောက်မှာ နင်းချေလိုက်တာပဲ..."

"ရွှေကျီးကန်းနတ်ဘုရားတောင်က ဘိုးဘေးတွေက ဒီကိစ္စကြောင့် ပြန်လည်နိုးထလာကြပြီးတော့ အရမ်းဒေါသထွက်နေကြတယ်လို့ ငါ ကြားတယ်... ဒီလောက် နက်ရှိုင်းတဲ့ အမုန်းတရားကို လျစ်လျူရှုဖို့ဆိုတာ ခက်ခဲလိမ့်မယ်..."

"..............."

မရေမတွက်နိုင်သော ကျင့်ကြံသူများ ထိတ်လန့်တုန်လှုပ်နေကြစဉ်မှာပင်..

ခုံးဝူတောက်ထံ၌ စွမ်းအားမရှိခြင်းနှင့် ပတ်သက်သော ကောလာဟလများသည်လည်း အလိုအလျောက် ပြိုလဲပျက်စီးသွားတော့သည်။

ဤသည်က မည်သို့လျှင် စွမ်းအားမရှိခြင်း ဖြစ်နိုင်မည်နည်း။

မဟာတာအိုနယ်မြေအသီးသီးမှ ပါရမီရှင်များသည် ကောင်းကင်ဘုံ တာအိုနယ်မြေသို့ ယခုမှသာ ရောက်ရှိလာကြခြင်းဖြစ်သည်။

ခုံးဝူတောက်က အချိန်လေဟာနယ် တားမြစ်နယ်မြေ၏ ပါရမီရှင်များကို တိုက်ရိုက် ဦးဆောင်ကာ ထိပ်တန်းအင်အားစုတစ်ခုဖြစ်သော ရွှေကျီးကန်းနတ်ဘုရားတောင်မှ လူအားလုံးကို လုံးလုံးလျားလျား အမြစ်ပြတ် သတ်ဖြတ်လိုက်သည် မဟုတ်လော.....

ဤအရာက လူအမြောက်အများကို ထိတ်လန့်သွားစေခဲ့ပြီး ခုံးဝူတောက်ကို တိတ်တဆိတ် ထပ်မံ စုံစမ်းစစ်ဆေးခဲ့ကြ၏။

ဖြစ်နိုင်သည်မှာ နှစ်သန်းပေါင်းများစွာ အိပ်စက်နေခဲ့သော ဤ တားမြစ်နယ်မြေ နတ်ဘုရားသားတော်၏ စွမ်းအားသည် ထိပ်တန်းအဆင့်ဟု သတ်မှတ်ခံထားရပြီး ဖြစ်ပေလိမ့်မည်။

............

တစ်ချိန်တည်းမှာပင် ကောင်းကင်ဘုံများနှင့်အသင်္ချေနယ်မြေများ၏ ကြယ်တာရာကောင်းကင်ယံ တစ်နေရာတွင်....

ကြယ်ရောင်များ စီးဆင်းနေပြီး ဥပဒေသများ ရောယှက်နေသည်။

ပန်းချီကားတစ်ချပ်ကဲ့သို့ ဖြူစင်သန့်ရှင်းကာ ခြေဗလာနှင့် လှပသော ပုံရိပ်တစ်ခုသည် ကြယ်ကောင်းကင်ယံကို ဖြတ်သန်း၍ ဖြည်းညင်းစွာ လျှောက်လှမ်းနေသည်။

ထိုအမျိုးသမီး ခြေလှမ်းတစ်လှမ်း လှမ်းလိုက်တိုင်း တောက်ပသော တာအိုပန်းပွင့်များ သူမ၏ ခြေဖဝါးအောက်တွင် ပွင့်လန်းလာခဲ့သည်။

အထူးနတ်ဘုရားစိတ်အာရုံတစ်ခုက ဟင်းလင်းပြင်ကို ရုတ်တရက် ထိုးဖောက်ဝင်ရောက်လာပြီး သူမ၏ အသိစိတ်ပင်လယ်ထဲသို့ ဆင်းသက်လာသည်နှင့်အမျှ...

အမျိုးသမီး၏ ပုံရိပ်သည် အနည်းငယ် ရပ်တန့်သွားပြီး သူမ၏နှုတ်ခမ်းများပေါ်တွင် အပြုံးတစ်ခု ဖြစ်ပေါ်လာခဲ့သည်။

"ခုံးဝူတောက်... နင်က တကယ်ပဲ စောစော နိုးလာတာကိုး..."

ရွှေကျီးကန်းနတ်ဘုရားတောင်မှ နတ်ဘုရားသားတော် ယန်ရန်သည် ခုံးဝူတောက်၏ ဖိနှိပ်သတ်ဖြတ်ခြင်းကိုခံလိုက်ရသည်ဆိုသည့် အချက်ကို သူမ အနည်းငယ်မျှပင် အံ့အားမသင့်ခဲ့ချေ။

သူမ ထိုအရာကို ဂရုပင် မစိုက်ခဲ့ပေ။

မည်သို့ပင်ဆိုစေကာမူ ပျက်စီးခြင်းခေတ်တွင် ခုံးဝူတောက်နှင့် တိုက်ခိုက်ခဲ့ဖူးသော သူမသည် သူ မည်မျှ အားကောင်းကြောင်းကို သဘာဝကျကျ သိရှိထားသည်။

ဤရွှေကျီးကန်းနတ်ဘုရားတောင် ဆိုသည်မှာ တက်သစ်စ အင်အားစုတစ်ခုမျှသာ ဖြစ်ပေ၏။

သူမ၏အမြင်တွင် ထိုအရာသည် ကံကောင်းသွားသော အမှိုက်အင်အားစုတစ်ခုပင်။

ထိုအင်အားစု၏ဆက်ခံသူဖြစ်သော နတ်ဘုရားသားတော် ယန်ရန်သည် ပါရမီ သို့မဟုတ် စွမ်းအား အရဖြစ်စေ ခုံးဝူတောက်၏ ဖိနပ်များကို သယ်ဆောင်ပေးရန်ပင် မထိုက်တန်ချေ။

"ဒါပေမယ့် ခုံးဝူတောက်ရဲ့ စရိုက်က တကယ့်ကို မပြောင်းလဲသေးဘူးပဲ... သူက အရင်ကလိုပဲ အကြံအစည် ကြီးတုန်းပဲ... ပြီးတော့ လူတွေကို သတ်ရတာနဲ့ သူတို့ရဲ့ နှလုံးသားကို တိုက်ခိုက်ရတာကို ကြိုက်တုန်းပဲ..."

"သူတို့ရဲ့ ဆက်ခံသူကို ခုံးဝူတောက်က အစားအစာ ပါဝင်ပစ္စည်းများအဖြစ် အသုံးပြုခဲ့တယ် ဆိုတာကို သိပြီးတဲ့နောက်မှာ ရွှေကျီးကန်းနတ်ဘုရားတောင်က အဲ့ဒီငှက်ကြီးတွေက ဒေါသထွက်ပြီး ရူးသွားလောက်ပြီ မဟုတ်လား..."

သူမက တီးတိုးရေရွတ်လိုက်ရင်း အဖြူရောင်ဝတ်စုံဝတ် အမျိုးသမီးသည် သူမ၏ခေါင်းကို ယမ်းကာ နောက်တစ်ကြိမ် ခပ်ဟဟရယ်မောလိုက်၏။

သူမသည် ကြယ်တာရာကောင်းကင်ယံထဲသို့ ဆက်လက်၍ နက်ရှိုင်းစွာ လျှောက်လှမ်းသွားတော့သည်။

"ဒီကောင်တွေက တကယ့်ကို ကံဆိုးတာပဲ... သူတို့က ဒီပြန်လည်နိုးထလာသောခေတ်မှာ ရှင်းရှင်းလင်းလင်း ရှိနေခဲ့တယ်..."

"ဒါပေမယ့် သူတို့ရဲ့ကံက အရမ်းဆိုးလွန်းတော့ ခုံးဝူတောက်လို မကောင်းဆိုးဝါးတစ်ကောင်နဲ့ တူညီတဲ့ ခေတ်ကာလတစ်ခုတည်းမှာ ဖြစ်နေတာပဲ..."

............

အခန်း (၁၂၆) ရွှေကျီးကန်းနတ်ဘုရားတောင်၏ ကြောက်ရွံ့မှု....ရှောင်ယောင် မဟာမိတ်အဖွဲ့ ခေါင်းဆောင်၏ ဆက်ခံသူ

တစ်ချိန်တည်းမှာပင် ကောင်းကင်ဘုံ တာအိုနယ်မြေတွင်....

ခုံးဝူတောက်သည် အစားအစာ ပါဝင်ပစ္စည်းများကို အလဟဿ မဖြစ်စေရ ဆိုသည့် မူဝါဒကို သဘာဝကျကျပင် လိုက်နာခဲ့၏။

သူ စီစဉ်ထားသည့်အတိုင်း ရွှေကျီးကန်းနတ်ဘုရားတောင်မှ ငှက်ကတုံးကောင်များအားလုံးကို အကင်စင်ပေါ်သို့ သူ တင်လိုက်သည်။

မည်သို့ပင်ဆိုစေ တစ်ဖက်လူ၏ မျိုးနွယ်စုမှာ ယောင်မျိုးနွယ်ပင်။

လူသားမျိုးနွယ်စု အတွက် သူတို့ကို စားရန် မည်သည့် ဝန်ထုပ်ဝန်ပိုးမှ မရှိချေ။

"ဟင်..."

သို့သော် ထိုအချိန်မှာပင်။

ခုံးဝူတောက်က မျက်မှောင်အနည်းငယ် ကြုတ်လိုက်သည်။ ထူးဆန်းသော ခံစားချက်တစ်ခုက သူ၏ နှလုံးသားထဲတွင် ရုတ်တရက် ပေါ်ပေါက်လာခဲ့သည်။

ဤသည်မှာ တစ်စုံတစ်ယောက်က သူ၏ကွယ်ရာတွင် သူ့အကြောင်း မကောင်းပြောနေသည့်အလားပင်။

"နတ်ဘုရားသားတော် ခုံးဝူတောက်..."

ပတ်ဝန်းကျင်ရှိ တခြားပါရမီရှင်များက သူ့ကို လှမ်းကြည့်လိုက်ကြ၏။

ခုံးဝူတောက်က သူတို့ ချက်ပြုတ်ထားသည်ကို မကောင်းဟု ထင်သွားမည်ကို သူတို့ ကြောက်ရွံ့နေသည့်အလားပင်။

"ငါ့ကို ဘာလို့ ကြည့်နေကြတာလဲ..."

"စားလေ... အစားအစာတချို့ ယူစားကြ..."

ဤစကားကို ကြားလိုက်ရသောအခါ အကျိုးအမြတ်များ ရရှိနေကြသော ကောင်းကင်ဘုံ တာအိုနယ်မြေမှ လူအများသည် အပြစ်ရှိသကဲ့သို့ ရုတ်တရက် ခံစားလိုက်ကြရသည်။

ခုံးဝူတောက်သည် အမှန်တကယ်ကို ရက်စက်လွန်းလှသည်။

ရွှေကျီးကန်းနတ်ဘုရားတောင်မှ လူအားလုံးကို သူ သတ်ပစ်ခဲ့ရုံသာမက သူတို့အတွက် ခမ်းနားသော စားသောက်ပွဲကြီး တစ်ခုကိုလည်း ကျင်းပပေးခဲ့သေးသည် မဟုတ်လော...

သို့ရာတွင် ခုံးဝူတောက်ထံမှ ဤမျှထိ ကြီးမားသော ကျေးဇူးတရားကို ရရှိထားပြီးဖြစ်ရာ....

သူ့အတွက် ရှေးဟောင်းမဟာတာအို အမှတ်အသား အကြောင်း သဲလွန်စများ ရှာဖွေရန် နောက်ပိုင်းတွင် သူတို့ ပိုမိုကြိုးစားအားထုတ်ရပေမည်။

အကယ်၍ နတ်ဘုရားသားတော် ယန်ရန်သာ ငရဲကိုးထပ်ရှိ အဝါရောင်စမ်းရေအောက်မှ ဤမြင်ကွင်းကို မြင်နိုင်မည်ဆိုပါက...

သူသည် ဒေါသထွက်လွန်းသဖြင့် သေရာမှပင် ပြန်လည်ထမြောက်လာနိုင်ခြေရှိသည်။

သေဆုံးသွားသူများမှာ သူတို့ဖြစ်ကာ တခြားသူများက စားသောက်ပွဲ ကျင်းပနေကြပြီး နာမည်ဂုဏ်သတင်းနှင့် အကျိုးအမြတ်များ အားလုံးကမူ ခုံးဝူတောက်ထံသို့ ရောက်ရှိသွားသည်။

သူတို့၏ တန်ဖိုးအားလုံးသည် ခုံးဝူတောက်၏ လုံးလုံးလျားလျား ခေါင်းပုံဖြတ်ခြင်းကို ခံလိုက်ရသည်ဟု ဆိုနိုင်သည်။

.........

တခြားတစ်ဖက်တွင်...

ရွှေကျီးကန်းနတ်ဘုရားတောင်သည် ဒေါသများဆူပွက်နေသော အထွတ်အထိပ် အခြေအနေသို့ လုံးလုံးလျားလျား ကျရောက်နေလေပြီ။

"သေသင့်တဲ့ ခုံးဝူတောက်... သူ ဘယ်လိုလုပ် ရဲတင်းရတာလဲ..."

ရွှေကျီးကန်း သခင်ယန်က ဒေါသတကြီး ဟိန်းဟောက်လိုက်ရာ ဧရာမနတ်ဘုရားခန်းမကြီးကို တုန်ခါသွားစေခဲ့သည်။

သူ၏ အောက်ဘက်တွင် မရေမတွက်နိုင်သော မဟာယောင်မျိုးနွယ်များသည် ထူထပ်သိပ်သည်းစွာ ရှိနေပြီး ဒူးထောက်နေကြ၏။

သူ၏သား ကျင်းအောက်ထျန်သည် ငယ်စဉ်ကတည်းက ထူးကဲသော ပါရမီကို ပိုင်ဆိုင်ထားခဲ့သည်။

သူ မွေးဖွားလာသည့် အချိန်မှစ၍ သူသည် ရွှေကျီးကန်းနတ်ဘုရားတောင် အတွက် အဓိက ပြုစုပျိုးထောင်ရမည့် မျိုးစေ့ကောင်းတစ်ခု ဖြစ်ခဲ့သည်။

မျိုးဆက်တစ်ခု၏ ကံကြမ္မာကို ရရှိရန် မဆိုထားနှင့် သူ လောကီဧကရာဇ် ဖြစ်လာရန်မှာ လုံးလုံးလျားလျား သေချာနေခဲ့သည်။

သို့သော် ယခုအချိန်၌ သူသည် သူတော်စင်နယ်ပယ်သို့ပင် မရောက်ရှိမီ ကောင်းကင်ဘုံ တာအိုနယ်မြေတွင် သေဆုံးသွားခဲ့လေပြီ။

"ဒီကိစ္စကို ဒီလောက် ရိုးရိုးရှင်းရှင်းနဲ့ ပြီးသွားလို့ မရဘူး..."

အဆုံးမဲ့ နတ်ဘုရားမီးတောက် ရေတံခွန်များ အလယ်ရှိ ရွှေကျီးကန်းနတ်ဘုရားတောင်၏ အနက်ရှိုင်းဆုံး နေရာတွင်...

ရွှေရောင် နတ်ဘုရားအလင်းတန်း ဆယ်ခုကျော်သည် ရုတ်တရက် ပျံ့လွင့်လာပြီး ပုံရိပ်တချို့အဖြစ် တဖြည်းဖြည်း အသွင်ပြောင်းသွားကြသည်။

ဤလူများအားလုံးသည် ကြောက်မက်ဖွယ်ကောင်းသော အရှိန်အဝါများကို ထုတ်လွှတ်နေပြီး အနိမ့်ဆုံးကျင့်ကြံခြင်းမှာ ခြေလှမ်းတစ်ဝက် ဧကရာဇ်နယ်ပယ် အဆင့်ငါးတွင် ရှိနေသည်။

သူတို့သည် ရွှေကျီးကန်းနတ်ဘုရားတောင်၏ ဘိုးဘေးများ ဖြစ်သလို အဓိက အဆင့်မြင့် အကြီးအကဲများလည်း ဖြစ်ကြ၏။

"အောက်ထျန်က ငါတို့ ရွှေကျီးကန်းနတ်ဘုရားတောင်ရဲ့ မျက်နှာပဲ... အခု ဒီလို ဖြစ်သွားတော့ လူဘယ်နှစ်ယောက်ကများ ငါတို့ကို လှောင်ရယ်နေကြမလဲ..."

"ဒီကိစ္စကို ဒီအတိုင်း ဖြေရှင်းမပေးဘဲ ထားလို့ လုံးဝ မရဘူး..."

ပုံရိပ်တစ်ခုက အော်ငေါက်လိုက်သည်။

"ဒါဆို မင်း ဘာလုပ်ချင်လို့လဲ..."

တခြားပုံရိပ်တစ်ခုက သူ၏ဒေါသကို ဖိနှိပ်ထားပြီး သူ၏အသံ အေးစက်တင်းမာနေသည်။

"ဒီကိစ္စရဲ့ အမှားအမှန်ကို ဂရုမစိုက်ရင်....အားနည်းသူတွေကို အားကြီးသူတွေက အမဲလိုက်တဲ့ ဒီလောကမှာ အားကြီးသူတွေကပဲ အကြွင်းမဲ့ အဆုံးအဖြတ်ပေးခွင့် ရှိတာပဲ..."

"တကယ်လို့ အောက်ထျန်သာ ခုံးဝူတောက်ထက် ပိုပြီးအားကောင်းခဲ့ရင် သူက ကောင်းကင်ဘုံ တာအိုနယ်မြေမှာ ဘယ်လိုလုပ်ပြီး သေသွားမှာလဲ..."

"ပြီးတော့... ခုံးဝူတောက်ကို ဘယ်အင်အားစုက ကျောထောက်နောက်ခံ ပေးထားလဲ ဆိုတာ မမေ့နဲ့အုံး... အချိန်လေဟာနယ် တားမြစ်နယ်မြေက ကျဆင်းနေတာ ကြာပြီလို့ လောကကြီးက အမြဲတမ်း ပြောနေကြပေမယ့် သူတို့က တစ်ချိန်တုန်းက ကောင်းကင်ဘုံအားလုံးကို ထိန်းချုပ်ခဲ့ဖူးတယ်..."

"ငါတို့ရဲ့ ရွှေကျီးကန်းနတ်ဘုရားတောင်ရဲ့ အနာဂတ်ကို လောင်းကြေးထပ်ပြီး သူတို့နဲ့ အင်မော်တယ်စစ်ပွဲတစ်ခု ဆင်နွှဲရဲလို့လား..."

ဤစကားများကို ပြောလိုက်သည်နှင့် တခြားပုံရိပ်များ၏ဒေါသသည် ချက်ချင်းဆိုသလိုပင် ထက်ဝက်ကျော် လျော့ကျသွားပေ၏။

တစ်ခုခုကို စဉ်းစားမိ၍ ဖြစ်နိုင်ပြီး သူတို့၏ အသက်ရှူသံများပင် အနည်းငယ် ပြင်းထန်လာခဲ့သည်။

"ဒီကိစ္စကို ဒီလောက်နဲ့ပဲ ထားလိုက်တော့မလို့လား..."

ဘိုးဘေးတစ်ဦးက မကျေမချမ်းဖြင့် ပြောနေဆဲပင်။

"ငါတို့ရွှေကျီးကန်းနတ်ဘုရားတောင်ရဲ့ ပထမဆုံး ပါရမီရှင် အနေနဲ့ အောက်ထျန်က အသန့်စင်ဆုံး ရွှေကျီးကန်းသွေးမျိုးဆက်ကို ပိုင်ဆိုင်ထားတာ..."

"ခုံးဝူတောက်ရဲ့ လုပ်ရပ်တွေက ငါတို့ရဲ့ ရွှေကျီးကန်းနတ်ဘုရားတောင် တိုးတက်ဖို့ အခွင့်အရေး တစ်ခုကို သေချာပေါက် ငြိမ်းသတ်လိုက်တာပဲ..."

ဦးဆောင်နေသော ဘိုးဘေးက အေးစက်တင်းမာစွာ ထပ်မံ၍ ပြောဆိုလိုက်၏။

"ဒီကိစ္စကို ငါတို့ သည်းခံလို့ မရပေမယ့်... ငါတို့ သည်းခံရမယ်... သေသွားတဲ့ ပါရမီရှင် တစ်ယောက်က သေသွားတဲ့ လူတစ်ယောက်ပဲ..."

"ကျင်းအောက်ထျန်က တခြားသူတွေလောက် အစွမ်းမထက်လို့ ကောင်းကင်ဘုံ တာအိုနယ်မြေမှာ သေသွားခဲ့တယ်... အဲ့ဒါက သူ့ရဲ့ ကံကြမ္မာပဲ..."

"တကယ်လို့ ဒီကိစ္စကြောင့် ငါတို့က အချိန်လေဟာနယ် တားမြစ်နယ်မြေနဲ့ ရန်သူတွေ ဖြစ်သွားမယ်ဆိုရင် ငါတို့ရဲ့ ရွှေကျီးကန်းနတ်ဘုရားတောင်က အမြစ်ပြတ်သတ်ဖြတ်ခံရဖို့ အရမ်းများတယ်..."

"ပြီးတော့ အရေးကြီးတာက ကျင်းအောက်ထျန် ကိုယ်တိုင် မဟုတ်ဘူး... သူ့ရဲ့ခန္ဓာကိုယ်ထဲက သွေးမျိုးဆက်ပဲ..."

"ငါတို့က ခုံးဝူတောက်ကို ကျင်းအောက်ထျန်ရဲ့ အလောင်း ပြန်ပေးလာအောင် နည်းလမ်းရှာဖို့ပဲ လိုတယ်..."

တခြားလူတစ်ယောက်က ရုတ်တရက် မျက်မှောင်ကြုတ်လိုက်၏။

"ခုံးဝူတောက်က ငါတို့ရဲ့ ရွှေကျီးကန်းနတ်ဘုရားတောင်က ပါရမီရှင်တွေကို အစားအစာ ပါဝင်ပစ္စည်းတွေအဖြစ် ကင်လိုက်တယ်လို့ ငါ ကြားထားတယ်..."

"ကျင်းအောက်ထျန်ကို မလုပ်လိုက်ဘူးဆိုတာ မင်း သေချာရဲ့လား..."

မကြာမီမှာပင် ဒေါသများ ပြည့်နှက်နေသော တခြားအသံတစ်သံ ပဲ့တင်ထပ်လာခဲ့သည်။

"မဖြစ်နိုင်တာ... ခုံးဝူတောက်က ကျင်းအောက်ထျန်ရဲ့ အဆင့်အတန်းကို သိတယ်... သူ့မှာ သတ္တိရှိရင်တောင် သူ မလုပ်ရဲပါဘူး..."

သို့သော် သူ၏စကား မဆုံးမီမှာပင်...

သတင်းတစ်ပုဒ်က ထိုနေရာရှိ လူတိုင်း၏ စိတ်ထဲသို့ အလျင်အမြန် ရောက်ရှိလာသည်။

ထို့ပြင် ဤသတင်းကို ကြားလိုက်ရသော အဆင့်မြင့် ဘိုးဘေးများအားလုံး၏မျက်လုံးသူငယ်အိမ်များက အပ်တစ်ချောင်းအလား ကျဉ်းမြောင်းသွားပြီး သူတို့၏မျက်နှာများ စက္ကူကဲ့သို့ ဖြူရော်သွားကြတော့သည်။

နတ်ဘုရားသားတော် ယန်ရန်ကို ခုံးဝူတောက်က တိုက်ရိုက်ကင်ပြီးသွားလေပြီ....

ဟင်းလင်းပြင်ထဲတွင် မည်မျှထိကြာအောင် တိတ်ဆိတ်သွားသည်မှန်း မသိရပြီးနောက်...

နားကွဲမတတ် ဒေါသတကြီး ဟိန်းဟောက်သံကြီးတစ်သံ ရုတ်တရက် ပဲ့တင်ထပ်လာခဲ့သည်။

"ခုံးဝူတောက်... မင်းက ယောင်မျိုးနွယ်တွေကို အရမ်း အနိုင်ကျင့်လွန်းတယ်..."

ဘိုးဘေးများနှင့် အဆင့်မြင့်အကြီးအကဲများသည် ဒေါသများဖြင့် လုံးလုံးလျားလျား လွှမ်းခြုံခံလိုက်ရပြီး သူတို့၏ နောက်ဆုံးကျန်ရှိနေသော အသိဉာဏ်သည် အလွန်အမင်း ဒေါသထွက်ခြင်းကြောင့် စားသုံးခံလိုက်ရလေပြီ။

ဒီ ခုံးဝူတောက်က တကယ့်ကို အစွန်းရောက်အောင် မောက်မာလွန်းတယ်...

..........

တစ်ဖက်တွင်...

အသင်္ချေသူတော်စင်မြို့...နာလန်မိသားစု...

နတ်ဘုရားသားတော် ယန်ရန်ကို ကိုင်တွယ်ပြီးနောက် ခုံးဝူတောက်၏ဂုဏ်သတင်းသည်လည်း အကြီးအကျယ် တိုးတက်လာပေ၏။

ကောင်းကင်ဘုံ တာအိုနယ်မြေမှ ကျင့်ကြံသူများသည် ခုံးဝူတောက်၏ မျက်နှာသာပေးမှုကို ရရှိရန်နှင့် သူနှင့် အဆက်အသွယ်တစ်ခု တည်ဆောက်နိုင်ရန်....

ဤကာလအတွင်း ရှေးဟောင်းမဟာတာအို အမှတ်အသား အကြောင်း သဲလွန်စများကို ကျယ်ကျယ်ပြန့်ပြန့် ရှာဖွေခဲ့ကြသည်။

"နတ်ဘုရားသားတော်... ကျွန်မတို့ စာရင်းပြုစုပြီးတဲ့နောက် ဒီလူတွေ ပေးထားတဲ့ သဲလွန်စဆိုတာ အများစုက ကောင်းကင်ဘုံ တာအိုနယ်မြေထဲက လျှို့ဝှက်နယ်မြေတွေ ဒါမှမဟုတ် အပျက်အစီးတွေ အကြောင်းပါပဲ..."

အောက်ဘက်တွင်ရှိနေသော ခုံးကျန်ယွဲ့က ခုံးဝူတောက်ကို ရိုသေလေးစားစွာ သတင်းပို့လိုက်၏။

"ရှေးဟောင်းမဟာတာအို အမှတ်အသားကို အဲ့ဒီမှာ ဖုံးကွယ်ထားနိုင်ခြေက သိပ်မများပါဘူး..."

"ရတယ်... သူတို့ကို သဲလွန်စတွေ ဆက်ရှာခိုင်းထားလိုက်..."

ခုံးဝူတောက်က အေးစက်တင်းမာစွာ ပြောဆိုသည်။

"ပြီးတော့... ကောင်းကင်ဘုံ တာအိုနယ်မြေမှာရှိတဲ့ တခြားတာအိုနယ်မြေတွေက ပါရမီရှင်တွေရဲ့ မကြာသေးခင်က အခြေအနေတွေကို စုံစမ်းလိုက်အုံး..."

"ဟုတ်ကဲ့ပါ..."

ခုံးကျန်ယွဲ့ ထွက်သွားပြီးနောက် နန်းတော်ထဲတွင် ခုံးဝူတောက် တစ်ယောက်တည်းသာ ကျန်ရစ်ခဲ့သည်။

"မကြာသေးခင်က တုန်လှုပ်ချောက်ချား အင်မော်တယ် ဘယ်လောက်တောင် ဝလာပြီလဲဆိုတာ ငါ ကြည့်လိုက်အုံးမယ်..."

ခုံးဝူတောက်၏ မျက်လုံးများတွင် အလင်းရောင်များ တလက်လက် တောက်ပနေသည်။

အဆုံးမဲ့ တာအိုအက္ခရာများကို သူ့မျက်လုံးသူငယ်အိမ်များ၏ အနက်ရှိုင်းဆုံး နေရာတွင် တည်ဆောက်နေလေ၏။

သူ၏အကြည့်များကို မိုင်ထောင်နှင့်ချီသော တောင်တန်းများနှင့် မြစ်များကို ချက်ချင်းထိုးဖောက်ဝင်ရောက်ခွင့်ပြုကာ တုန်လှုပ်ချောက်ချား အင်မော်တယ်၏ လက်ရှိ တည်နေရာကို တိုက်ရိုက်ချိတ်ပိတ်လိုက်တော့သည်။

..........

ပေယန်မြို့စားအိမ်တော်အတွင်း၌...

တုန်လှုပ်ချောက်ချား အင်မော်တယ်က အမြင့်ဆုံးနေရာတွင် ထိုင်နေသည်။

သူ အသစ်ရရှိထားသော လက်အောက်ခံလေး လီချိုးလွမ်သည် အစေခံတစ်ဦးကဲ့သို့ ရိုသေလေးစားစွာဖြင့် သူ၏နံဘေးတွင် ရှိနေသည်။

တုန်လှုပ်ချောက်ချား အင်မော်တယ်၏ အရှိန်အဝါသည် နက်ရှိုင်းနေပြီး သူ၏ မျက်ခုံးများတွင် သာလွန်ထူးကဲမှုများ ပြည့်နှက်နေပေ၏။

အောက်ဘက်တွင် ခမ်းနားထည်ဝါစွာ ဝတ်ဆင်ထားသော ကျင့်ကြံသူတစ်စုနှင့် ဟင်းလင်းပြင်နတ်ဘုရားနယ်ပယ် ကျင့်ကြံသူ အများအပြားပင်လျှင် သူ၏ရှေ့တွင် အလွန်ရိုသေလေးစားစွာဖြင့် ဒူးထောက်နေကြသည်။

"အရင်က ဒီအဘိုးကြီးက အသိဉာဏ် မရှိခဲ့ပါဘူး... အရှင်က ရှောင်ယောင် မဟာမိတ်အဖွဲ့ ခေါင်းဆောင်ရဲ့ ဆက်ခံသူမှန်း ကျွန်တော် မသိခဲ့ပါဘူး..."

"အရှင့်ကို ကျွန်တော် လျစ်လျူရှုခဲ့မိပါတယ်... ကျေးဇူးပြုပြီး အပြစ်မယူပါနဲ့..."

ပေယန် မြို့စားသည် မြေပြင်ပေါ်တွင် ရိုသေလေးစားစွာ ဒူးထောက်နေပြီး အထက်ရှိ တုန်လှုပ်ချောက်ချား အင်မော်တယ်ကို အဆက်မပြတ် ဦးညွှတ်နေသည်။

လီချိုးလွမ်ကမူ အံ့အားသင့်နေကာ တုန်လှုပ်ချောက်ချား အင်မော်တယ်အပေါ် သူမ၏ အကြည့်များက ပို၍ပင် လေးစားအားကျလာခဲ့သည်။

ယခင်က တုန်လှုပ်ချောက်ချား အင်မော်တယ်သည် သူမကို မြို့စားအိမ်တော်ထဲသို့ တိုက်ရိုက် ခေါ်ဆောင်သွားခဲ့ပေ၏။

သူက ရှောင်ယောင် မဟာမိတ်အဖွဲ့ ခေါင်းဆောင်၏ ဆက်ခံသူ ဖြစ်ကြောင်း ဖော်ပြကာ သူ၏အဆင့်အတန်းကို တိုက်ရိုက် ထုတ်ဖော်ခဲ့ပြီး ပေယန် မြို့စားကို သူ့ထံ အညံ့ခံရန်ပင် တိုက်ရိုက်အမိန့်ပေးခဲ့သည်။

ထိုအချိန်က တုန်လှုပ်ချောက်ချား အင်မော်တယ်၏ခေါင်းကို မြည်းကန်ထားရသဖြင့် လက်တွေ့မဆန်သော အဓိပ္ပာယ်မရှိသည့် စကားများကို ပြောနေသည်ဟု လီချိုးလွမ် တစ်ကြိမ်က တွေးထင်ခဲ့ဖူးသည်။

သို့သော် မထင်မှတ်ဘဲ တုန်လှုပ်ချောက်ချား အင်မော်တယ်က လူတိုင်း၏ရှေ့တွင်....

ရှေးဟောင်းနှင့် လျှို့ဝှက်ဆန်းကြယ်သော ပုံစံတစ်ခုကို တိုက်ရိုက်ရေးဆွဲပြလိုက်ပြီးနောက်...

ပေယန် မြို့စား၏သဘောထားသည် ချက်ချင်းပြောင်းလဲသွားပြီး သူက ဒူးထောက်ကာ ဝပ်တွားလိုက်၏။

ဤသည်မှာ တုန်လှုပ်ချောက်ချား အင်မော်တယ်၏ အဆင့်အတန်းကို ရှောင်ယောင် မဟာမိတ်အဖွဲ့၏ ဆက်ခံသူအဖြစ် အသိအမှတ်ပြုလိုက်ခြင်းပင်။

လီချိုးလွမ်သည် ရှောင်ယောင် မဟာမိတ်အဖွဲ့နှင့် ပတ်သက်သော ဒဏ္ဍာရီများကို သဘာဝကျကျ ကြားဖူးခဲ့သည်။

ထိုအင်အားစုကို ကောင်းကင်ဘုံ တာအိုနယ်မြေ၏ ထာဝရဒဏ္ဍာရီတစ်ခုက တည်ထောင်ခဲ့သည်ဟု ဆိုကြ၏။

မရေမတွက်နိုင်သော နှစ်များ ကုန်ဆုံးသွားပြီးနောက် ရှောင်ယောင်မဟာမိတ်အဖွဲ့သည် လူထု အမြင်မှ တဖြည်းဖြည်း ပျောက်ကွယ်သွားခဲ့သည်။

သို့သော် ထိုသို့ဖြစ်သည့်တိုင် ရှောင်ယောင် မဟာမိတ်အဖွဲ့သည် ကောင်းကင်ဘုံ တာအိုနယ်မြေအပေါ် ကြီးမားသော ဩဇာလွှမ်းမိုးမှု ရှိနေဆဲပင်။

တုန်လှုပ်ချောက်ချား အင်မော်တယ်က ထိုကဲ့သို့သော ရှေးဟောင်း အင်အားစု တစ်ခု၏ ဆက်ခံသူ ဖြစ်လာနိုင်ခြင်းမှာ သူမ၏မျှော်လင့်ချက်ထက် အမှန်တကယ်ကို သာလွန်နေခဲ့သည်။