အခန်း (၁၃၁-၁၃၂)

အခန်း (၁၃၁) မွေးရာပါသစ်ပင်စိတ်ဝိညာဉ်.... ပြိုင်ဘက်ကင်း အားဖြည့်ဆေး

"သေချာတာပေါ့..."

ကောင်းကင်ဆေးဂိုဏ်းဆီသို့ သူလည်း သွားရောက်ရန် လိုအပ်သည်။

တုန်လှုပ်ချောက်ချား အင်မော်တယ်၏ ယခင် စကားများအရ ဤနေရာသည် သူ့အတွက် ကြီးမားသော အခွင့်အရေး တစ်ခု သေချာပေါက်ဖြစ်ကြောင်း ခန့်မှန်းနိုင်ပေ၏။

သူ သွားရောက်ပြီး ထိုအခွင့်အရေးကို သေချာပေါက် ကြားဖြတ်လုယူရပေမည်။

..........

ကောင်းကင်ဘုံ တာအိုနယ်မြေ၏ အလယ်ပိုင်းဒေသတွင်...

တောင်တန်းများ ကွေ့ကောက်နေပြီး မြို့ကြီးများက ထိုတောင်တန်းများအကြားတွင် တည်ရှိနေကြသည်။

ဤဧရိယာသည် ကောင်းကင်ဘုံတာအိုနယ်မြေ တွင် စည်ကားသော နေရာတစ်ခု ဖြစ်သည်ဟု ဆိုနိုင်ပေ၏။

သူတော်စင်နန်းတော် အမြောက်အများ ရှိရုံသာမက ထိပ်သီးမိသားစုများလည်း အများအပြား ရှိနေသည်။

အရေးအကြီးဆုံး အကြောင်းအရင်းမှာ ထိုနေရာတွင် ကောင်းကင်ဆေးဂိုဏ်း တည်ရှိနေခြင်းပင်။

ကောင်းကင်ဆေးဂိုဏ်းသည် သူတော်စင်နန်းတော်များနှင့် ထိပ်သီးမိသားစုများကဲ့သို့ သိုင်းတာအိုကို လိုက်စားခြင်းမရှိကြချေ။

ဤဂိုဏ်းသည် ကောင်းကင်ဘုံ တာအိုနယ်မြေ ရှိ ဆေးပညာ တာအိုဗဟုသုတအားလုံးကို စုဆောင်းထားပြီး မရေမတွက်နိုင်သော နှစ်များတလျှောက် အမွေအနှစ်တစ်ခု ရှိနေသည်။

ထိုဂိုဏ်းသည် ကောင်းကင်ဘုံ တာအိုနယ်မြေ တွင် အကျော်ကြားဆုံး ဆေးပညာ သူတော်စင်နန်းတော် ဖြစ်ရုံသာမက ကောင်းကင်ဘုံ တာအိုနယ်မြေ တစ်ခုလုံး၏ ဆေးဆိုင်အဖြစ်လည်း လူသိများကျော်ကြားပေ၏။

ကောင်းကင်ဘုံ တာအိုနယ်မြေ တစ်ခုလုံးရှိ ဆေးဖက်ဝင် ပါဝင်ပစ္စည်းများအားလုံး၏ ထက်ဝက်သည် ကောင်းကင်ဆေးဂိုဏ်း မှ လာခြင်းဖြစ်သည်။

ကောင်းကင်ဘုံ တာအိုနယ်မြေရှိ မရေမတွက်နိုင်သော လူများ၏လေးစားမှုကို ခံရစဉ်မှာပင်....

ထိုအချက်ကြောင့် တခြားတာအိုနယ်မြေ များမှ ထိပ်တန်းပါရမီရှင် အများအပြားကိုလည်း စိတ်ဝင်စားစေခဲ့ပြီး ထိုဂိုဏ်းကို လုံးလုံးလျားလျား ထိန်းချုပ်လိုခဲ့ကြ၏။

သို့ရာတွင် ယနေ့၌ လူများဖြင့် စည်ကားနေသင့်သော ကောင်းကင်ဆေးဂိုဏ်းသည် ပုံမှန်မဟုတ်ဘဲ ခြောက်ကပ်နေသည်။

တခြားတာအိုနယ်မြေများမှ ပါရမီရှင် အများအပြားပင်လျှင် ယနေ့တွင် ကောင်းကင်ဆေးဂိုဏ်းကို ကပ်ရောဂါတစ်ခုကဲ့သို့ ရှောင်ကြဉ်ကြပြီး ထိုဂိုဏ်းအတွင်းသို့ လက်မဝက်မျှပင် မဝင်ရဲကြချေ။

ဤအချိန်အခိုက်အတန့်တွင် ကောင်းကင်ဆေးဂိုဏ်းနှင့် အနီးဆုံးမြို့ဖြစ်သော သစ်သားတစ်ထောင်မြို့တော် ၌ မရေမတွက်နိုင်သည့် ကျင့်ကြံသူများသည် ဤကိစ္စနှင့် ပတ်သက်၍ ပြင်းထန်စွာ ဆွေးနွေးနေကြသည်။

"မင်းတို့ ကြားပြီးပြီလား... ဒီမနက် ကောင်းကင်ဆေးဂိုဏ်းဆီကို အရေးကြီးတဲ့ ပုဂ္ဂိုလ်ကြီး တစ်ယောက် ရောက်လာပုံရတယ်..."

"ကောင်းကင်ဆေးဂိုဏ်းတစ်ခုလုံးက ပြင်ပ လုပ်ငန်းတွေကို ရပ်နားမယ်လို့ ကြေညာခဲ့ရုံတင်မကဘူး.... အစက စီစဉ်ထားတဲ့ ကောင်းကင်ဆေးပညာ ပွဲတော်ကြီးကိုလည်း ရွှေ့ဆိုင်းလိုက်တယ်တဲ့..."

"အရေးကြီးတဲ့ ပုဂ္ဂိုလ်ကြီး... အပူအပင်မဲ့ ဓားသခင် ရောက်လာတာများ ဖြစ်နိုင်မလား... လွန်ခဲ့တဲ့ အချိန်တိုလေးက ဓားတစ်သောင်း သူတော်စင်နန်းတော်ရဲ့ နန်းတော်သခင်ကို သူ အနိုင်ယူပြီးတဲ့နောက် ဒီနေရာကို ဦးတည်လာနေတယ်လို့ ငါ ကြားတယ်လေ..."

"မကြာသေးခင်ကမှ နာမည်ကြီးလာတဲ့ ခုံးဝူတောက် နတ်ဘုရားသားတော်လည်း ဖြစ်နိုင်တာပဲ... မကြာသေးခင်ကပဲ သူက အသင်္ချေသူတော်စင်မြို့ကနေ ထွက်လာပြီး ငါတို့ရဲ့ အလယ်ပိုင်းဒေသကို လာနေတယ်လို့ ငါ ကြားတယ်..."

.........

"ဟမ့်... ချဲ့ကားပြောဖို့ပဲ သိတဲ့ အမှိုက်ကောင်တစ်စုပဲ..."

ပတ်ဝန်းကျင်ရှိ ကျင့်ကြံသူများ၏ ဆွေးနွေးသံများကို ကြားလိုက်ရသောအခါ အသွင်ပြောင်းထားသော တုန်လှုပ်ချောက်ချား အင်မော်တယ် က မထီမဲ့မြင်ပြုသည့် လေသံဖြင့် ပြောဆိုလိုက်၏။

"အရေးကြီးတဲ့ ပုဂ္ဂိုလ်ကြီးက ဘာလဲ... သူတို့က တခြားတာအိုနယ်မြေတွေက ကောင်တွေပဲ..."

သူနှင့်အတူ လိုက်ပါလာသော ဟင်းလင်းပြင်နတ်ဘုရားနယ်ပယ် နောက်လိုက်အနည်းငယ်က ချက်ချင်းပင် ဝင်ပြောလိုက်ကြသည်။

"ဟုတ်တာပေါ့... ဒီကောင်တွေက တကယ့်ကို အမြော်အမြင် မရှိတာပဲ..."

"အင်မော်တယ်သခင်...အရှင်က ငါတို့ ကောင်းကင်ဘုံ တာအိုနယ်မြေရဲ့ ဒဏ္ဍာရီနဲ့ မျှော်လင့်ချက် ဖြစ်တာ ရှင်းနေတာကို ဒီမျက်ကန်းကောင်တွေက အပြင်လူတစ်စုကို တကယ်ကြီး အထင်ကြီးနေကြတယ်..."

"ငါ့ရဲ့အမြင်အရဆိုရင် ဒီလူတွေက အင်မော်တယ်သခင်ရဲ့ သူရဲကောင်းဆန်တဲ့ ဟန်ပန်နဲ့ နည်းလမ်းတွေကို မမြင်ဖူးကြလို့ သူတို့ရဲ့ အပေါ်ယံ အမြင်တွေကြောင့် မျက်ကန်းဖြစ်နေကြတာပဲ..."

လမ်းတစ်လျှောက်တွင် တုန်လှုပ်ချောက်ချား အင်မော်တယ်သည် အားလပ်မနေခဲ့ချေ။

သူသည် သူ၏နောက်လိုက်အုပ်စုရှေ့တွင် ကြီးမားစွာ ကြွားဝါခဲ့သည်ဟု ဆိုနိုင်သည်။

သူ၏ ပေါ့ပေါ့ပါးပါး လမ်းညွှန်မှုများက ဤလူအနည်းငယ်ကို နားလည်သဘောပေါက်မှုများ၊ အကျိုးအမြတ်များ ရရှိစေခဲ့ပြီး သူတို့၏ နယ်ပယ်ပင်လျှင် အနည်းငယ် မတည်မငြိမ် ဖြစ်လာခဲ့ပေ၏။

တုန်လှုပ်ချောက်ချား အင်မော်တယ်နောက်မှ နောက်လိုက်အနည်းငယ်၏အမြင်တွင်....

လူတိုင်း ဆွေးနွေးနေကြသော အရေးကြီးသည့် ပုဂ္ဂိုလ်ကြီးများဆိုသည်မှာ အများဆုံးအားဖြင့် ပြင်ပတာအိုနယ်မြေများမှ ထိပ်တန်း ပါရမီရှင်များသာ ဖြစ်ပေမည်။

သူတို့၏ အင်မော်တယ်သခင်နှင့် နှိုင်းယှဉ်ပါက ထိုပါရမီရှင်များသည် အနည်းငယ် လိုအပ်နေဆဲပင်။

တုန်လှုပ်ချောက်ချား အင်မော်တယ်သည် တခြားသူများ၏ မော့ကြည့်ခြင်းနှင့် ကိုးကွယ်ခြင်း ခံရသည့် ဤခံစားချက်ကို ရှင်းလင်းစွာ နှစ်သက်နေပြီး သူ၏လက်များကို နောက်သို့ပစ်ကာ သူ၏ခေါင်းကို အနည်းငယ် မော့ထားလိုက်သည်။

"သွားကြစို့... ဒီကောင်တွေကို လျစ်လျူရှုလိုက်... ငါတို့ ကောင်းကင်ဆေးဂိုဏ်းဆီကို တိုက်ရိုက် သွားကြမယ်..."

ထိုသို့ပြောဆိုပြီးနောက် သူသည် ကောင်းကင်ဆေးဂိုဏ်းဆီသို့ ဦးဆောင်သွားလိုက်၏။

မည်သို့ပင်ဆိုစေကာမူ ကောင်းကင်ဆေးဂိုဏ်း သည် ကောင်းကင်ဘုံ တာအိုနယ်မြေ တစ်ခုလုံးတွင် ဆေးပညာတာအို သူတော်စင်နန်းတော် တစ်ခုအဖြစ် လူသိများလာနိုင်ခြင်းမှာ သူ၏ ယခင်ဘဝက အကူအညီကြောင့် ဖြစ်သည်။

သူသည် သူ၏ အဆင့်အတန်းကို ထုတ်ဖော်လိုက်သရွေ့....

ကောင်းကင်ဆေးဂိုဏ်းသည် သူ့ကို ရိုသေလေးစားစွာ ဝပ်တွားသွားမည် မဟုတ်လော....

သူ၏စိတ်နှလုံးသားထဲတွင် ဝိုးတဝါး မျှော်လင့်ချက်တစ်ခုကိုပင် သူ ခံစားလိုက်ရ၏။

သူတို့ လေးစားရသော ဆေးပညာတာအို သူတော်စင်နန်းတော် ဖြစ်သည့် ကောင်းကင်ဆေးဂိုဏ်းက သူ့ထံသို့ လုံးလုံးလျားလျား အညံ့ခံလိုက်သည်ကို ဤလောကရှိ လူများ မြင်တွေ့ရသောအခါ သူတို့ မည်သို့ တွေးထင်ကြမည်နည်း။

.........

ကောင်းကင်ဆေးဂိုဏ်းဆီသို့ ဦးတည်သွားနေစဉ်.....

တုန်လှုပ်ချောက်ချား အင်မော်တယ်နှင့် သူ၏ အုပ်စုသည် ဈေးတစ်ခုကို တိုက်ဆိုင်စွာ ဖြတ်သန်းသွားခဲ့သည်။

ဈေးသည် လူများဖြင့် စည်ကားနေပြီး ဈေးသည်အများအပြားက ကျယ်လောင်စွာ အော်ဟစ်ရောင်းချနေကြသည်။

"ဟင်..."

လူအုပ်စု စုဝေးနေသော နေရာတစ်ခုကို ဖြတ်သန်းသွားသောအခါ တုန်လှုပ်ချောက်ချား အင်မော်တယ် ရုတ်တရက် မျက်မှောင်အနည်းငယ် ကြုတ်လိုက်၏။

သေချာစွာ အာရုံခံကြည့်ပြီးနောက် သူက တီးတိုးရေရွတ်လိုက်သည်။

"ဒါက သစ်ပင်စိတ်ဝိညာဉ်ချီလား..."

တုန်လှုပ်ချောက်ချား အင်မော်တယ် ၏ မျက်လုံးများ အနည်းငယ် တောက်ပသွားသည်။

သစ်ပင်စိတ်ဝိညာဉ်ချီ ကို ဒဏ္ဍာရီလာ မွေးရာပါသစ်ပင်စိတ်ဝိညာဉ်များသာလျှင် ပိုင်ဆိုင်ကြသည်။

မွေးရာပါသစ်ပင်စိတ်ဝိညာဉ်များသည် ထိပ်တန်း ကောင်းကင်နှင့်မြေကြီး ရတနာများက မရေမတွက်နိုင်သော နှစ်များတလျှောက် ကောင်းကင်နှင့်မြေကြီး စိတ်ဝိညာဉ်ချီ နှင့် နေနှင့်လ၏ အနှစ်သာရကို စုပ်ယူပြီးနောက်မှသာ သန္ဓေတည်လာခြင်း ဖြစ်ပေ၏။

ရိုးရိုးရှင်းရှင်း ပြောရလျှင် အင်မော်တယ် သစ်ပင်တစ်ပင်သည် မရေမတွက်နိုင်သော နှစ်များတလျှောက် အသက်ရှင်နေထိုင်ခဲ့ပြီး နောက်ဆုံးတွင် စိတ်ဝိညာဉ် တစ်ခုအဖြစ်သို့ ကျင့်ကြံနိုင်ခဲ့ခြင်း ဖြစ်သည်ဟု ဆိုလိုခြင်းပင်။

တုန်လှုပ်ချောက်ချား အင်မော်တယ်၏မျက်လုံးများသည် ပတ်ဝန်းကျင်ကို ဝေ့ဝိုက်၍ကြည့်လိုက်ပြီး လူအုပ်စု စုဝေးနေသော နေရာကို တိုက်ရိုက်ချိတ်ပိတ်လိုက်၏။

မရေမတွက်နိုင်သော ကျင့်ကြံသူများ၏ အလယ်ဗဟိုတည့်တည့်တွင် အဆောင်လက်ဖွဲ့များ ဖုံးအုပ်ထားသည့် သံလှောင်အိမ်တစ်ခုအတွင်း၌...

အစိမ်းရောင် ပိုးသား ဝတ်စုံကို ဝတ်ဆင်ထားပြီး နူးညံ့သိမ်မွေ့သော မျက်နှာအသွင်အပြင်များ ရှိသည့် သေးသွယ်သော လိုလီကောင်မလေး တစ်ယောက်ကို အကျဉ်းချထားသည်။

ထို့ပြင် ထိုကြွယ်ဝသော သစ်ပင်စိတ်ဝိညာဉ်ချီ သည် ဤလိုလီကောင်မလေး၏ ခန္ဓာကိုယ်အတွင်းမှ ထွက်ပေါ်နေခြင်းပင်။

"ငါ ထင်တဲ့အတိုင်းပဲ... ဒီလိုလီကောင်မလေးက မွေးရာပါသစ်ပင်စိတ်ဝိညာဉ် တစ်ခုပဲ... သူ့ရဲ့ ပင်ကိုယ်အသွင်အပြင်က နေလအပြစ်အနာအဆာမဲ့ အင်မော်တယ်သစ်ပင်တစ်ပင် ဖြစ်ပုံရတယ်..."

"နေလ အပြစ်အနာအဆာမဲ့ အင်မော်တယ်သစ်ပင်က ကောင်းကင်ဘုံတွေနှင့်အသင်္ချေနယ်မြေတွေမှာရှိတဲ့ ဆေးပင်တစ်ရာစာရင်းမှာ အဆင့်ဆယ့်သုံးချိတ်တယ်... အဲ့ဒီအပင်ကို ဆေးဥယျာဉ်တစ်ခုမှာ စိုက်ပျိုးထားတာက ဥယျာဉ်ထဲက စိတ်ဝိညာဉ်သစ်ပင်တွေအားလုံးကို အဆပေါင်းများစွာ ပိုပြီးမြန်မြန် ကြီးထွားလာစေနိုင်တယ်..."

"ဒီကောင်မလေးက နေနဲ့လရဲ့ အနှစ်သာရကို မရေမတွက်နိုင်တဲ့ နှစ်တွေချအောင် စုပ်ယူခဲ့ပြီးတော့ လူသားပုံစံအဖြစ် တိုက်ရိုက်ကျင့်ကြံနိုင်ခဲ့တာပဲ... သူ့ရဲ့ အထူး စွမ်းအားနဲ့ဆိုရင် သူက စိတ်ဝိညာဉ်သစ်ပင်တွေ စိုက်ပျိုးဖို့အတွက် ထိပ်တန်းအားဖြည့်ဆေး တစ်ခုပဲ..."

"တကယ်လို့ သူ့ကို ဆေးလုံးတစ်ခုအဖြစ် တိုက်ရိုက်ဖော်စပ်လိုက်ရင်တောင် အဲ့ဒါက ရှားပါးပြီး ပြိုင်ဘက်ကင်းတဲ့ မဟာအားဖြည့်ဆေးတစ်ခု ဖြစ်လာမှာပဲ..."

တုန်လှုပ်ချောက်ချား အင်မော်တယ်သည် အလွန် ဝမ်းသာသွားပြီး ဤနေရာတွင် ဤမျှထိ မထင်မှတ်ထားသော အကျိုးအမြတ်တစ်ခု ရရှိလိမ့်မည်ဟု သူ မျှော်လင့်မထားခဲ့ချေ။

သူ၏ကံကောင်းမှုသည် အမှန်တကယ်ကို မိုးထိလုမတတ် မြင့်မားနေပေ၏။

ဤရှားပါးသော နေလအပြစ်အနာအဆာမဲ့ အင်မော်တယ်သစ်ပင်ကို သူ သေချာပေါက် ရယူရပေမည်။

သို့ရာတွင် စောင့်ကြည့်နေသော တခြားကျင့်ကြံသူ အများအပြားလည်း ရှိနေသည်။

သူတို့သည် တုန်လှုပ်ချောက်ချား အင်မော်တယ် ကဲ့သို့ လိုလီ ကောင်မလေး၏ အဆင့်အတန်းကို တစ်ချက်ကြည့်ရုံဖြင့် ထိုးဖောက်မမြင်နိုင်ကြသော်လည်း....

ဤကောင်မလေးသည် ထူးကဲသော အရှိန်အဝါရှိပြီး သူမ၏အသွင်အပြင်မှာ ရင်သပ်ရှုမောဖွယ်ကောင်းအောင် လှပသည်ဟု သတ်မှတ်နိုင်သည်။

သူမကို အစေခံတစ်ဦးအဖြစ် ပြန်ဝယ်ခြင်းကလည်း သူတို့အတွက် ကောင်းမွန်သော ရွေးချယ်မှု တစ်ခု ဖြစ်လာလိမ့်မည်။

ဤအချိန်အခိုက်အတန့်တွင် အသံတစ်သံက ရုတ်တရက် ပဲ့တင်ထပ်လာခဲ့သည်။

"လူတိုင်း... ငါ့ရှေ့ကနေ ဖယ်ကြစမ်း..."

"ငါက ထိပ်တန်းအဆင့် စိတ်ဝိညာဉ် ကျောက်တုံး သုံးထောင် ပေးမယ်... ဒီကောင်မလေးကို ဒီသခင်လေးက လိုချင်တယ်..."

ထိုအသံနှင့်အတူ ခမ်းနားထည်ဝါသော အဝတ်အစားများ ဝတ်ဆင်ထားသည့် အမျိုးသားတစ်ဦးသည် အစောင့်အချို့နှင့်အတူ သံလှောင်အိမ်၏ရှေ့သို့ ရောက်လာခဲ့သည်။

သူက လှောင်အိမ်အတွင်းရှိ အစိမ်းရောင် ဝတ်စုံနှင့် ကောင်မလေးကို လောဘတကြီး မျက်လုံးများဖြင့် ကြည့်လိုက်၏။

"မဆိုးပါဘူး... ဒီလောက် ငယ်ငယ်ရွယ်ရွယ်နဲ့ ဒီလောက် လှနေတာ... ဒီသခင်လေးက အရသာ ပြောင်းရတာကို စိတ်မကွက်ပါဘူး..."

ဤလူ၏ ကျင့်ကြံခြင်းမှာလည်း တာအိုနန်းတော်နယ်ပယ်သို့ ရောက်ရှိနေလေပြီ။

သူ၏အလွန်ထူးကဲသော စိတ်နေသဘောထားနှင့် ပေါင်းစပ်လိုက်သောအခါ သူသည် ထိပ်သီးမိသားစုတစ်စုမှ အသုံးမကျသော သခင်လေး တစ်ဦးဖြစ်ကြောင်း သိသာထင်ရှားနေသည်။

ဤအခိုက်အတန့်တွင် သူ့ထံ၌ ရမ္မက်များဖြင့် ပြည့်နှက်နေပြီး ညစ်ညမ်းစွာ ပြုံးနေသည်။

အစိမ်းရောင်ဝတ်စုံဝတ် ကောင်မလေး ၏ လှပသော မျက်နှာလေး အနည်းငယ် ပြောင်းလဲသွားပြီး သူမက အလွန် စိုးရိမ်ထိတ်လန့်နေပုံဖြင့် ကွေးကွေးလေး နေလိုက်၏။

"ထိပ်တန်းအဆင့် စိတ်ဝိညာဉ် ကျောက်တုံး သုံးထောင်လား..."

ရောင်းချသူဟု ထင်ရသော ကျင့်ကြံသူသည် အနည်းငယ် မှင်သက်သွားပြီး သူ၏မျက်လုံးများတွင် လောဘကြီးသော အလင်းရောင်တစ်ခု ဖြတ်ပြေးသွားသည်။

ထိပ်တန်းအဆင့် စိတ်ဝိညာဉ်ကျောက်တုံး သုံးထောင်...

ဤကြီးမားသော ဓနဥစ္စာသည် နောက်ဆုံးတွင် သူ့ထံသို့ ကျရောက်လာခဲ့သည်။

သူ သဘောတူရန် ဟန်ပြင်လိုက်စဉ်မှာပင်....

အသံတစ်သံက ရုတ်တရက် ထွက်ပေါ်လာခဲ့သည်။

"ဟမ့်... နေ့ခင်းကြောင်တောင် လူတိုင်းရဲ့ရှေ့မှာ အခုလို အကာအကွယ်မဲ့တဲ့ ကောင်မလေး တစ်ယောက်ကို လေလံတင်ရောင်းချရဲတာလား..."

"မင်းတို့က တကယ်ကို အရှက်မရှိတာပဲ..."

ထိုစကားသံ ကျရောက်သွားသည်နှင့်အမျှ....

လူတိုင်းက အသံလာရာအရပ်ဆီသို့ ကြည့်လိုက်ကြ၏။

တုန်လှုပ်ချောက်ချား အင်မော်တယ်သည် သူ၏ လက်များကို နောက်ပစ်ပြီး လူအုပ်ထဲမှ လျှောက်လှမ်းထွက်လာသည်ကို သူတို့ မြင်တွေ့လိုက်ရပေသည်။

နဂါးဘုရင်တစ်ပါး ပြန်လည်ရောက်ရှိလာသည့်အလား မကောင်းဆိုးဝါးအပြုံးတစ်ခုက သူ၏ နှုတ်ခမ်းများတွင် ထင်ဟပ်နေသည်။

အခန်း (၁၃၂) တရားမျှတပြီး ကြောက်ရွံ့ရိုသေဖွယ် ကောင်းတာလား... အလကား ရချင်ရုံ သက်သက် ဟန်ဆောင်နေတာ မဟုတ်လား

အရောင်းအဝယ်ကို ရုတ်တရက် အနှောင့်အယှက် ခံလိုက်ရသော အမျိုးသားနှင့် ရောင်းချသူတို့သည် အနည်းငယ် ဒေါသထွက်သွားကြ၏။

သို့သော် တုန်လှုပ်ချောက်ချား အင်မော်တယ်နှင့် သူ၏နံဘေးတွင် မတ်တတ်ရပ်နေသော ဟင်းလင်းပြင်နတ်ဘုရားနယ်ပယ် အစောင့်တချို့ကို မြင်လိုက်ရသောအခါ သူတို့၏ မျက်နှာများ ရုတ်တရက် ဖြူရော်သွားပြီး သာမန်မျက်စိဖြင့် မြင်နိုင်သော အရှိန်ဖြင့် နောက်ဆုတ်သွားကြတော့သည်။

ဟင်းလင်းပြင်နတ်ဘုရားနယ်ပယ် အစောင့် တချို့ကို ခေါ်ဆောင်လာနိုင်သော မည်သူမဆို ထူးကဲသော နောက်ခံတစ်ခု သေချာပေါက် ရှိနေရပေမည်။

သို့ရာတွင် အဆင့်အတန်းနှင့် နောက်ခံအရဆိုလျှင် ထိုအမျိုးသားသည် သူ့ကိုယ်သူ ယုံကြည်မှု ရှိနေကြောင်း သိသာရှင်းလင်းသည်။

သူ၏မျက်နှာအမူအရာက အနည်းငယ် စိုးရိမ်နေသော်လည်း သူသည် အံ့ကြိတ်ကာ မကျေမချမ်း ပြောဆိုလိုက်၏။

"တာအိုရောင်းရင်း... အဲ့ဒါက ဘာအဓိပ္ပာယ်လဲ..."

"ကျင့်ကြံခြင်းလောကမှာ ကျေးကျွန်တွေကို အရောင်းအဝယ် မလုပ်ရဘူးဆိုတဲ့ တိကျတဲ့ စည်းကမ်းချက် မရှိဘူး..."

"ဒါ့ပြင် ငါက သင့်တော်တဲ့ ဈေးနှုန်းတစ်ခု ပေးခဲ့ပြီး ရောင်းတဲ့သူကလည်း ရောင်းဖို့ ဆန္ဒရှိနေတာကို ငါက ဘယ်လိုလုပ်ပြီး မတရားတဲ့လူ ဖြစ်သွားတာလဲ..."

"ဟုတ်တယ်... တကယ်လို့ တာအိုရောင်းရင်းကလည်း ဒီမိန်းကလေးကို လိုချင်တယ်ဆိုရင် ငါတို့ တရားမျှတတဲ့ လေလံပွဲတစ်ခု လုပ်လို့ ရတယ်လေ..."

ရောင်းချသူကလည်း တစ်ချိန်တည်းမှာပင် ဝင်ပြောလိုက်၏။

ဤအရာကို ကြားလိုက်ရသောအခါ တုန်လှုပ်ချောက်ချား အင်မော်တယ်၏ နှုတ်ခမ်းများပေါ်ရှိ သရော်တော်တော်အပြုံးက ပိုမိုနက်ရှိုင်းလာပြီး သူတို့၏စကားများကို လုံးလုံးလျားလျား မထီမဲ့မြင်ပြုလိုက်သည်။

သူက တရားမျှတသော ချီစွမ်းအင်များ ပြည့်နှက်နေသည့် အသံဖြင့် ပြောဆိုသည်။

"ဟမ့်... အသိစိတ်ရှိတဲ့ ဘယ်သူမဆို ဒီလိုကိစ္စမျိုးကို လုပ်မှာ မဟုတ်ဘူး..."

"ဒီနေ့ ကောင်းကင်တာအိုကိုယ်စား ငါ လှုပ်ရှားပြီး ဒီကောင်မလေးအတွက် တရားမျှတမှုကို ရှာဖွေပေးမယ်... သူ့ကို ငါ သေချာပေါက် ခေါ်သွားမယ်..."

ဤစကားများ ထွက်ပေါ်လာသည်နှင့် ပြပွဲကောင်းကို စောင့်ကြည့်နေကြသော မရေမတွက်နိုင်သည့် ကျင့်ကြံသူများ လုံးလုံးလျားလျား ဆွံ့အသွားကြ၏။

ဤသည်မှာ အံ့အားသင့်ဖွယ်ကောင်းသော ကိစ္စတစ်ရပ်ပင်။

တုန်လှုပ်ချောက်ချား အင်မော်တယ်သည် ဖြူစင်သော နှလုံးသားရှိသည့် တရားမျှတသော သူရဲကောင်း တစ်ဦးဖြစ်သည်ဟု ယခင်က သူတို့ တွေးထင်ခဲ့ကြသည်။

သူ၏ ကြီးကျယ်ခမ်းနားပြီး တရားမျှတသော ကြေညာချက်က သူတို့ကိုပင် အနည်းငယ် ရှက်ရွံ့သွားစေခဲ့သည်။

သို့သော် ယခုကြည့်ရသည်မှာ ဤကောင်စုတ်သည် တရားမျှတမှု အလံကို ဝှေ့ယမ်းနေသော အရှက်မရှိသည့် အလကားရယူချင်သူ တစ်ဦးသာ ဖြစ်ပုံရသည်။

သူက စိတ်ဝိညာဉ်ကျောက်တုံးများကို အသုံးမပြုဘဲ ကောင်မလေးကို တိုက်ရိုက်ခေါ်ဆောင်သွားလိုသည်။

ဤသည်မှာနေ့ခင်းကြောင်တောင် ဓားပြတိုက်ခြင်းနှင့် မည်သို့ ကွာခြားမည်နည်း။

"မင်း... မင်းက ပြဿနာလာရှာဖို့ တမင်တကာ ရောက်လာတာ မဟုတ်လား..."

ရောင်းချသူက ဒေါသတကြီး ဟိန်းဟောက်လိုက်ရာ ကြောက်မက်ဖွယ်ကောင်းသော ချီစွမ်းအင်တစ်ခုက သူ၏နံဘေးပတ်လည်တွင် ဆူပွက်လာခဲ့သည်။

တုန်လှုပ်ချောက်ချား အင်မော်တယ်၏ စကားများကြောင့် သူ လုံးလုံးလျားလျား ဒေါသထွက်သွားကြောင်း ရှင်းလင်းနေသည်။

သို့သော် ဤကောင်မလေးကို ဤနေရာတွင် လေလံတင်ရောင်းချရဲသည်ဆိုသည့် အချက်က သစ်သားတစ်ထောင်မြို့တွင် သူ့အတွက် ကျောထောက်နောက်ခံတချို့ ရှိနေသည်ဟု ဆိုလိုခြင်းပင်။

ခရက်...

ရောင်းချသူက သူ၏ရင်ဘတ်ကြားမှ ကျောက်စိမ်းပြားတစ်ခုကို ထုတ်ယူကာ တိုက်ရိုက်ခြေမွှလိုက်၏။

ဝုန်း...

စွမ်းအားကြီးမားသော ချီစွမ်းအင်တချို့သည် အရပ်မျက်နှာအဘက်ဘက်မှ ဤနေရာသို့ ချက်ချင်းဆိုသလိုပင် အလျင်အမြန် ချဉ်းကပ်လာခဲ့ကြသည်။

မျက်စိတစ်မှိတ်အတွင်း ဟင်းလင်းပြင်နတ်ဘုရားနယ်ပယ် ကျင့်ကြံသူလေးဦးသည် ဟင်းလင်းပြင်ကို ဖြတ်သန်း၍ ရောက်ရှိလာသည်။

သူတို့၏မျက်နှာအမူအရာများသည် ရန်လိုနေကြပြီး တုန်လှုပ်ချောက်ချား အင်မော်တယ်တို့အုပ်စုကို ဝိုင်းရံထားလိုက်ကြတော့သည်။

ဤမြင်ကွင်းကို မျက်မြင်တွေ့ရှိရသောအခါ စောင့်ကြည့်နေကြသည့် ကျင့်ကြံသူအများအပြားသည် အသက်ပြင်းပြင်းရှူသွင်းလိုက်ကြ၏။

ရောင်းချသူ အပါအဝင် ဟင်းလင်းပြင်နတ်ဘုရားနယ်ပယ် ကျင့်ကြံသူ စုစုပေါင်းငါးဦး ရှိနေသည်။

တုန်လှုပ်ချောက်ချား အင်မော်တယ်တွင်လည်း သူ၏နောက်၌ ဟင်းလင်းပြင်နတ်ဘုရားနယ်ပယ်အစောင့်ခြောက်ဦး ရှိသော်လည်း တိုက်ပွဲ အမှန်တကယ် ဖြစ်ပွားခဲ့မည်ဆိုပါက သူတို့ဘက်မှ သေချာပေါက် အသာစီးရမည် မဟုတ်ချေ။

ဤအချိန်အခိုက်အတန့်တွင် အစိမ်းရောင် ဝတ်စုံဝတ် ကောင်မလေးကို လေလံဆွဲချင်ခဲ့သော အမျိုးသားကလည်း မကျေမနပ်ဖြင့် ပြောဆိုသည်။

"ဟမ့်... သူက အရေးကြီးတဲ့ လူတစ်ယောက်လို့ ငါ ထင်ခဲ့တာ..."

"တရားမျှတမှုဆိုတဲ့ အနှစ်သာရမရှိတဲ့ ကြွေးကြော်သံတွေကို အော်ဟစ်နေတဲ့ ဟန်ဆောင်ကောင်းတဲ့ လူယုတ်မာတစ်ယောက် ဖြစ်နေတာပဲ..."

"သွား... ဒီကောင့်ကို သင်ခန်းစာပေးလိုက်စမ်း..."

သူ၏နောက်ရှိ ဟင်းလင်းပြင်နတ်ဘုရားနယ်ပယ်ကျွမ်းကျင်သူနှစ်ဦးနှင့် တာအိုနန်းတော်နယ်ပယ် အဆင့်ကိုး ကျင့်ကြံသူနှစ်ဦးတို့က ရှေ့သို့ လှမ်းထွက်လာကြပြီး တုန်လှုပ်ချောက်ချား အင်မော်တယ်ကို တိုက်ခိုက်ရန် ဟန်ပြင်လိုက်သည်။

"ကောင်လေး... မင်းကို နောက်ဆုံးအခွင့်အရေး တစ်ခု ပေးမယ်..."

"မင်းက ဆက်ပြီးစွက်ဖက်နေမယ်ဆိုရင် ငါတို့ ရိုင်းစိုင်းတယ်လို့ မပြောနဲ့..."

ရောင်းချသူက တုန်လှုပ်ချောက်ချား အင်မော်တယ်ကိုကြည့်ပြီး ရက်စက်ကြမ်းကြုတ်သောလေသံဖြင့် ထပ်ပြောလိုက်၏။

သို့သော် တုန်လှုပ်ချောက်ချား အင်မော်တယ်က ဤအရာကို လုံးလုံးလျားလျား မထီမဲ့မြင်ပြုလိုက်သည်။

သူ၏ မျက်နှာအမူအရာသည် အနည်းငယ်မျှ ကြောက်ရွံ့မှုကို မပြရုံသာမက သူက လှောင်ပြောင်လိုက်သည်။

"ဟမ့်... အရေးမပါတဲ့ကောင် တစ်စုက ငါ့ရဲ့ရှေ့မှာ ဒီလောက်တောင် ရဲတင်းရဲတယ်ပေါ့..."

သူ၏ လက်ရှိကျင့်ကြံခြင်းမှာ တာအိုနန်းတော်နယ်ပယ် အဆင့်ခုနစ်တွင်သာ ရှိနေသော်လည်း သူသည် ကောင်းကင်တာအို ကောင်းချီးတချို့ကို ရရှိထားခဲ့သည်။

သူ၏ ယခင်ဘဝမှ နတ်ဘုရားစွမ်းရည် မှတ်ဉာဏ်များနှင့် ပေါင်းစပ်လိုက်သောအခါ ဤလူအနည်းငယ်ကို ကိုင်တွယ်ရန်မှာ သူ့အတွက် မခက်ခဲလှချေ။

"မင်းက သေလမ်းရှာနေတာပဲ..."

တစ်ဖက်လူက ဤမျှထိ မောက်မာနေဆဲဖြစ်သည်ကို မြင်လိုက်ရသောအခါ တစ်ဖက်ရှိ ဟင်းလင်းပြင်နတ်ဘုရားနယ်ပယ် ကျင့်ကြံသူ တချို့သည် ဒေါသထွက်သွားကြ၏။

သူတို့သည် သူတို့၏နတ်ဘုရားစွမ်းရည်များကို ချက်ချင်းထုတ်လွှတ်လိုက်ပြီး တုန်လှုပ်ချောက်ချား အင်မော်တယ်ထံသို့ အစွမ်းကုန် ပြေးဝင်သွားကြတော့သည်။

"မင်းတို့ လှုပ်ရှားစရာ မလိုဘူး..."

သူ၏ အစောင့်များကို ဝင်မစွက်ဖက်ရန် အချက်ပြပြီးနောက် တုန်လှုပ်ချောက်ချား အင်မော်တယ်သည် ရှောင်တိမ်းခြင်း မပြုခဲ့ချေ။

သူက သူ၏ချီစွမ်းအင်ကို ထုတ်လွှတ်ပြီး သူတို့ကို ထိပ်တိုက်ရင်ဆိုင်လိုက်၏။

ဝုန်း...

လက်သီးများနှင့် လက်ဝါးများ ဆုံတွေ့သွားကြပြီး ကြီးမားသော တိုက်ပွဲကြီး ချက်ချင်းဖြစ်ပေါ်လာတော့သည်။

မှော်အက္ခရာများ ပျံ့လွင့်နေပြီး ဥပဒေသများ တဝုန်းဝုန်းထနေသည်။

ကြောက်မက်ဖွယ်ကောင်းသော စွမ်းအင် မုန်တိုင်းက ဟင်းလင်းပြင်ကို အနည်းငယ် တွန့်လိမ်သွားစေခဲ့သည်။

"ကောင်းကင် တုန်လှုပ်ချောက်ချားခြင်း လက်ဝါး..."

တုန်လှုပ်ချောက်ချား အင်မော်တယ်က လက်ဝါးတစ်ချက် ရိုက်ချလိုက်ရာ မရေမတွက်နိုင်သော မှော်အက္ခရာမုန်တိုင်းတစ်ခုကို သယ်ဆောင်လာခဲ့သည်။

ဝုန်း...

သူနှင့် အနီးဆုံး ဟင်းလင်းပြင်နတ်ဘုရားနယ်ပယ် ကျင့်ကြံသူသည် မည်သည့် ခုခံနိုင်စွမ်းမျှ မရှိဘဲ ချက်ချင်းလွင့်စင်သွားတော့သည်။

"ပုရွက်ဆိတ် တစ်အုပ်ကများ..."

တုန်လှုပ်ချောက်ချား အင်မော်တယ်က သူ၏ စွမ်းအားကို နောက်တစ်ကြိမ် ထုတ်လွှတ်လိုက်သည်နှင့် သူ၏ခန္ဓာကိုယ်တစ်ခုလုံး တောက်ပသော အလင်းရောင်များဖြင့် လင်းထိန်သွားပြီး ကြယ်တစ်စင်းအလား ရှေ့သို့ပြေးဝင်သွားပေ၏။

.........

မျက်စိတစ်မှိတ်အတွင်း စွမ်းအင်အတက်အကျများ လုံးလုံးလျားလျား ငြိမ်သက်သွားသောအခါ ထိုဟင်းလင်းပြင်နတ်ဘုရားနယ်ပယ် ကျင့်ကြံသူများအားလုံးမြေပြင်ပေါ်သို့ ရိုက်ချခံလိုက်ရလေပြီ။

တုန်လှုပ်ချောက်ချား အင်မော်တယ်က သူ၏ အဝတ်အစားများကို သပ်ရပ်အောင် ပြုလုပ်လိုက်သည်။

သူက မြေပြင်ပေါ်တွင် ဖရိုဖရဲ လဲကျနေသော ကျင့်ကြံသူများကို မထီမဲ့မြင်ပြုသည့်အကြည့်ဖြင့် ကြည့်လိုက်၏။

"မင်းတို့က သေလမ်းလာရှာတာကိုး..."

သူတို့သည် ဟင်းလင်းပြင်နတ်ဘုရားနယ်ပယ် ကျင့်ကြံသူများ ဖြစ်နေလျှင်ပင် မည်သို့ ထူးခြားမည်နည်း။

ယခုအချိန်၌ သူ၏ရှေ့တွင် သူတို့၏စွမ်းအားသည် များစွာလိုအပ်နေဆဲပင်။

"ဒါက..."

ဤမြင်ကွင်းကို မျက်မြင်တွေ့ရှိခဲ့ကြသော မရေမတွက်နိုင်သည့် ကျင့်ကြံသူများမှာ ချက်ချင်းပင် သူတို့၏မျက်နှာအမူအရာများ ပြင်းထန်စွာ ပြောင်းလဲသွားကြပြီး လုံးလုံးလျားလျား မှင်သက်ကာ ရွှံ့ရုပ်များကဲ့သို့ ကြက်သေသေသွားကြသည်။

တာအိုနန်းတော်နယ်ပယ် အဆင့်ခုနစ် ကျင့်ကြံသူတစ်ဦးသည် နယ်ပယ်များကို တိုက်ရိုက် ဖြတ်ကျော်၍ တိုက်ခိုက်ခဲ့ပြီး ဟင်းလင်းပြင်နတ်ဘုရားနယ်ပယ် ကျွမ်းကျင်သူ ခုနစ်ဦးနှင့် တာအိုနန်းတော်နယ်ပယ် အဆင့်ကိုး ကျင့်ကြံသူနှစ်ဦးတို့ကို အနိုင်ယူခဲ့သလော....

ထိုလူ၏စွမ်းအားသည် အမှန်တကယ်ကို မယုံနိုင်လောက်အောင် သန်မာအားကောင်းလွန်းပေ၏။

"အင်မော်တယ်သခင်က တကယ့်ကို အရမ်းသန်မာအားကောင်းတာပဲ..."

တုန်လှုပ်ချောက်ချား အင်မော်တယ်၏နောက်သို့ လိုက်ပါလာသော မြှောက်ပင့်ဖားယားသူများထံတွင် တုန်လှုပ်မှုများ လေးစားအားကျမှုများဖြင့် ပြည့်နှက်နေပြီး သူတို့အားလုံးက တုန်လှုပ်ချောက်ချား အင်မော်တယ်ကို မြှောက်ပင့်နေကြပေသည်။

"အစ်ကိုကြီး... ကျွန်မကို ကယ်တင်ပေးတဲ့အတွက် ကျေးဇူးတင်ပါတယ်..."

ကယ်တင်ခံခဲ့ရသော အစိမ်းရောင်ဝတ်စုံဝတိ ကောင်မလေး သည် တုန်လှုပ်ချောက်ချား အင်မော်တယ်ကို ကျေးဇူးတင်မှုများ အပြည့်အဝရှိသော မျက်နှာဖြင့် ကြည့်လိုက်၏။

တုန်လှုပ်ချောက်ချား အင်မော်တယ်သည် လူအများ၏ ရိုသေလေးစားသော အကြည့်များကို အလွန်နှစ်သက်နေသည်။

"ဘာမှ မဟုတ်ပါဘူး... ငါ့အတွက်တော့ ဒါက အားစိုက်ထုတ်မှု နည်းနည်းလေးပါပဲ..."

တုန်လှုပ်ချောက်ချား အင်မော်တယ်က ကောင်မလေး ၏ မျက်လုံးများကို ကြည့်လိုက်ပြီး ဤဖြစ်ရပ်အပြီးတွင် သူမ၏ နှလုံးသားထဲ၌ သူ၏ အရေးပါမှုသည် အလွန်မြင့်မားနေပြီဖြစ်ကြောင်း သူ သိလိုက်သည်။

အကယ်၍ သူသာ သူမကို စိတ်ဝိညာဉ် ကျောက်တုံးများဖြင့် တိုက်ရိုက် ဝယ်ယူခဲ့မည်ဆိုပါက နောက်ပိုင်းတွင် သူမနှင့် ဆက်ဆံရေးကောင်း တစ်ခု တည်ဆောက်ရန် ကြီးမားသော အားထုတ်မှုတစ်ခု ပြုလုပ်ရန် လိုအပ်ကောင်း လိုအပ်ပေလိမ့်မည်။

သို့သော် သူသာ သူမကို တိုက်ရိုက် ကယ်တင်ခဲ့မည်ဆိုပါက သူသည် စိတ်ဝိညာဉ် ကျောက်တုံး တစ်တုံးမျှ အသုံးပြုရန် မလိုအပ်ရုံသာမက သူသည် သူမ၏နှလုံးသားထဲတွင် သူမ၏ ကယ်တင်ရှင်လည်း ဖြစ်လာပြီး သူမ၏ အထူးချစ်ခင်လေးစားမှုကို ရရှိပေမည်။

အရေးအကြီးဆုံးမှာ သူသည် သူ၏အစေခံများရှေ့တွင် သူ၏ခွန်အားကို ပြသရန်နှင့် သူ၏ ဂုဏ်သိက္ခာကို ပိုမိုမြှင့်တင်ရန် ဤအခွင့်အရေးကို ရယူနိုင်ခြင်းပင်။

စိတ်ဝိညာဉ်ကျောက်တုံး တစ်တုံးမျှ မသုံးဘဲ ဤမျှထိများစွာ ရရှိလိုက်ခြင်းကြောင့် သူသည် အမှန်တကယ်ကို ကြီးမားသော အကျိုးအမြတ်အား ရရှိသွားခဲ့သည်။

ကျင့်ကြံသူတစ်ဦးက သူ့ကို သတိပေးရန် ရုတ်တရက် ပြောဆိုလိုက်၏။

"တာအိုရောင်းရင်း... မင်း ရန်စစော်ကားလိုက်တဲ့ အမျိုးသားက ငါတို့သစ်သားတစ်ထောင် မြို့တော်မှာ ထိပ်တန်း မိသားစု တစ်ခုဖြစ်တဲ့ သစ်သားတစ်ထောင် မိသားစုရဲ့ တရားဝင်သားကြီးပဲ..."

"သူက ထွက်ပြေးသွားပြီ... ပြီးတော့ စစ်ကူတွေ ခေါ်ဖို့ သူ ပြန်သွားပြီလို့ ငါ ထင်တယ်... ဒါကြောင့် မင်း ဒီနေရာကနေ မြန်မြန်ထွက်သွားတာ ပိုကောင်းမယ်... ပိုဝေးလေ ပိုကောင်းလေပဲ..."

သစ်သားတစ်ထောင် မြို့တော်လော...

တုန်လှုပ်ချောက်ချား အင်မော်တယ်က နှာခေါင်းရှုံ့လိုက်၏။

"အမှိုက် အင်အားစုတစ်ခုပါပဲ... ငါ့ရဲ့မျက်လုံး ထဲဝင်ဖို့ အဝေးကြီး လိုပါသေးတယ်..."

ဤအရာကို ကြားလိုက်ရသောအခါ တုန်လှုပ်ချောက်ချား အင်မော်တယ်အပေါ် လူတိုင်း၏ အကြည့်များက ပို၍ပင် ထိတ်လန့်ကာ ရှုပ်ထွေးလာခဲ့သည်။

တုန်လှုပ်ချောက်ချား အင်မော်တယ်ကို ကြည့်ရသည်မှာ သူသည် မြို့ပြင်မှ လာပုံရပြီး သစ်သားတစ်ထောင် မိသားစု၏ ကြောက်မက်ဖွယ်ကောင်းပုံကို သိရှိပုံမရချေ။

"ဒါနဲ့... မင်းရဲ့နာမည်က ဘယ်လိုခေါ်လဲ..." တုန်လှုပ်ချောက်ချား အင်မော်တယ် က သူ၏ရှေ့ရှိ ကောင်မလေးကို မေးမြန်းလိုက်၏။

"အစ်ကိုကြီး က ကျွန်မကို လင်းလုံလို့ပဲ ခေါ်လို့ ရပါတယ်..."

အစိမ်းရောင်ဖန်သားနှင့် တူညီသော လင်းလုံ၏မျက်လုံးဝိုင်းကြီးများက အလင်းရောင်များဖြင့် တလက်လက် တောက်ပနေသည်။

သူမသည် လူသားပုံစံအဖြစ် အပြည့်အဝ မကျင့်ကြံနိုင်မီက လူသားမျိုးနွယ်၏ လောဘကြီးမှု အကြောင်းကို သူမ၏ သူငယ်ချင်းတချို့ထံမှ သူမ ကြားဖူးခဲ့သည်။

ယခင်က ထိုအရာများကို ပုံပြင်များအဖြစ်သာ သူမ အမြဲတစေ နားထောင်ခဲ့သော်လည်း အမှားတစ်ခုကြောင့် ထိုလူသားမျိုးနွယ် ကျင့်ကြံသူ ၏ ဖမ်းဆီးခြင်းကို ခံလိုက်ရသည်။ ထို့နောက် သူမအား လေလံတင်ရောင်းချရန် ဈေးသို့ တိုက်ရိုက် ခေါ်ဆောင်ခံလိုက်ရသည့် အချိန်မှသာ လင်းလုံ ၏စိတ်နှလုံးသား အမှန်တကယ် ထိတ်လန့်သွားခဲ့သည်။

သူမ၏တစ်ခုတည်းသော ရလဒ်မှာ သေဆုံးခြင်းသာ ဖြစ်မည်ဟု မူလက သူမ တွေးထင်ခဲ့သော်လည်း တုန်လှုပ်ချောက်ချား အင်မော်တယ်က အံ့အားသင့်ဖွယ်နည်းလမ်းဖြင့် ထွက်ပေါ်လာပြီး ဆိုးရွားသော အခြေအနေမှ သူမကို ကယ်တင်ပေးလိမ့်မည်ဟု သူမ လုံးဝမျှော်လင့်မထားခဲ့ချေ။

လူသားမျိုးနွယ်အကြားတွင် တုန်လှုပ်ချောက်ချား အင်မော်တယ်ကဲ့သို့ တရားမျှတသည့် ကျင့်ကြံသူများလည်း ရှိနေသည် မဟုတ်လော...

လူသားပုံစံအဖြစ် အသွင်ပြောင်းပြီးနောက် ဤကဲ့သို့သော ပြိုင်ဘက်ကင်း ပုဂ္ဂိုလ်နှင့် တွေ့ဆုံခဲ့ရသဖြင့် သူမ အမှန်တကယ် ကံကောင်းခဲ့သည်။