အခန်း (၁၅-၁၆)

အခန်း (၁၅) မင်းအစ်ကိုရဲ့ အထွတ်အထိပ်အရိုးက ဒီမှာလား

သို့သော် ယဲ့ချန် ဆက်လက် မတွေးတောနိုင်မီမှာပင် ထူးဆန်းသော အကြည့်တစ်ခုကို ရုတ်တရက် ခံစားလိုက်ရသည်။

သူ မော့ကြည့်လိုက်သောအခါ သူ၏ မျက်လုံးများနှင့် ခုံးဝူတောက်၏မျက်လုံးများ ဆုံသွားလေသည်။

ခုံးဝူတောက်၏ နက်ရှိုင်းသော မျက်လုံးနက်ကြီးများသည် နှစ်သောင်းချီ သက်တမ်းရှိသော ရေခဲများကဲ့သို့ဖြစ်ပြီး ရှင်းပြ၍မရနိုင်သော အေးစက်မှုကို ထုတ်လွှတ်နေသည်။

ထိုသို့သော စူးစမ်းလေ့လာမှုအောက်တွင် ယဲ့ချန်နှင့် စုချင်းကဲတို့ နှစ်ဦးစလုံးသည် သူတို့၏ခန္ဓာကိုယ်များကို အကြွင်းမဲ့ ဖောက်ထွင်းမြင်ခံလိုက်ရသကဲ့သို့ ထူးဆန်းသော ခံစားချက်တစ်ခုကို ရရှိသွားကြသည်။

အမည်: ယဲ့ချန်

ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသား ဟင်းလင်းပြင်မဟာဧကရာဇ်၏ တပည့်ရင်း...

နယ်ပယ်: တာအိုနန်းတော်နယ်ပယ် အဆင့်ကိုး

ရုပ်ခန္ဓာကိုယ်: အကြိမ်ကိုးဆယ်လှည့်ပတ်ခြင်း နတ်ဘုရားဖီးနစ် ရုပ်ခန္ဓာကိုယ် ကဏဦးအဆင့်

ကျင့်စဉ်: ဟင်းလင်းပြင်တာအို ဆင်းသက်ခြင်း ကျင့်စဉ် အကြိမ်ကိုးဆယ်လှည့်ပတ်ခြင်း နတ်ဘုရားဖီးနစ် ကျမ်းစာ ကောင်းကင်လွတ်မြောက်ခြင်း လှုပ်ရှားမှုကိုးရပ်ကျင့်စဉ်...

မှော်ရတနာ: ဟင်းလင်းပြင်ရတနာ စည်းတံဆိပ်ကောင်းကင်ခွဲ သူတော်စင်လှံ ကောင်းကင်မီးတောက် စိတ်ဝိညာဉ်မီး...

ကောင်းကင်အမိန့်တော် အမှတ်များ: ၆၀၀၀

ရနိုင်ခြေရှိသော မဟာတာအို အပိုင်းအစများ: ခွန်အား မဟာတာအို၊ ဟင်းလင်းပြင် မဟာတာအို၊ လှံ မဟာတာအို...

ခုံးဝူတောက်က မျက်ခုံးတစ်ချက် ပင့်လိုက်ပြီး စနစ်ကို မေးလိုက်သည်။

"ဒီ ကောင်းကင်အမိန့်တော် အမှတ်တွေက ဘာအတွက် သုံးတာလဲ..."

"သခင်ကို ပြန်လည်ဖြေကြားရရင်... ကောင်းကင်အမိန့်တော်အမှတ်တွေက ဒီကောင်းကင်ကံကြမ္မာပိုင်ရှင်တွေရဲ့ မဟာတာအို ကံကြမ္မာနဲ့ ဆက်စပ်နေပါတယ်..."

"သခင်က ကောင်းကင်အမိန့်တော်အမှတ်များကို ရရှိပြီးတဲ့နောက် မဟာတာအို သုံးထောင်ကို အမဲလိုက်ခြင်း တိုးတက်မှုကို မြှင့်တင်နိုင်တဲ့အပြင် အဲ့ဒါတွေကို မဟာတာအို အပိုင်းအစတွေအဖြစ်လည်း ပြောင်းလဲနိုင်တယ်..."

"မင်း အရင်က ပြောခဲ့သလိုဆိုရင် ငါက ကောင်းကင်ဘုံတွေရဲ့ မုဆိုးမို့လို့ ကံကြမ္မာ ရိုက်ခတ်မှု ဆိုတာတွေကို စိတ်ပူစရာ မလိုဘူးပေါ့..."

ခုံးဝူတောက်က အပြုံးနှင့် ပြောဆိုလိုက်သည်။

"ဒါဆို အဓိပ္ပာယ်က သူ့ကို တိုက်ရိုက်အမဲလိုက်ပြီး သူ့ရဲ့ ကောင်းကင်အမိန့်တော်အမှတ်တွေအားလုံးကို လုယူလို့ရတယ်ဆိုတဲ့ သဘောလား..."

"ဟုတ်ပါတယ်... အမဲလိုက်ဖို့ ဒါမှမဟုတ် မလိုက်ဖို့နဲ့ အမဲလိုက်တဲ့ လုပ်ငန်းစဉ်က သခင်ရဲ့ ဆန္ဒအပေါ်မှာ လုံးဝမူတည်ပါတယ်... ကောင်းကင်ကံကြမ္မာပိုင်ရှင်ကို သခင်ရဲ့ အစေခံဖြစ်လာအောင်အတွက် သခင်က သူ့ကို ယဉ်ပါးအောင်လည်း လုပ်နိုင်ပါတယ်..."

"တကယ်လို့ သခင်က အမဲလိုက်တာ ဒါမှမဟုတ် ယဉ်ပါးအောင်လုပ်တဲ့ လုပ်ငန်းစဉ်အတွင်းမှာ တစ်ဖက်လူရဲ့ တာအို နှလုံးသားကို ထိုးနှက်ဖို့ ရွေးချယ်မယ်ဆိုရင် ရိတ်သိမ်းရရှိမယ့် ကောင်းကင်အမိန့်တော်အမှတ်တွေက နှစ်ဆရပြီးတော့ ပြင်းထန်တဲ့ ထိုးနှက်ချက် ဒါမှမဟုတ် အဲဒီထက်ပိုတဲ့ ပြင်းထန်တဲ့ ထိုးနှက်ချက်တွေကို ဖြစ်ပေါ်စေဖို့ အလွန်မြင့်မားတဲ့ ဖြစ်နိုင်ခြေ ရှိပါတယ်..."

"မင်းက အရင်ကတည်းက ယိုယွင်းဖောက်ထွင်းပြီးတော့ အဆင့်မြှင့်တင်ထားပြီးသား မဟုတ်ဘူးလား..."

"တကယ်လို့ ငါက သူ့ကို တိုက်ရိုက်အမဲလိုက်မယ်ဆိုရင် ဘာလို့ ပြင်းထန်တဲ့ ထိုးနှက်ချက်က မဖြစ်ပေါ်လာနိုင်ရတာလဲ..."

"သခင်... အရင်စနစ်ဗားရှင်းအရဆိုရင်... တကယ်လို့ သခင်က ကောင်းကင်ကံကြမ္မာပိုင်ရှင်ကို တိုက်ရိုက်အမဲလိုက်မယ်ဆိုရင် ကောင်းကင်တာအိုရဲ့ နတ်ဘုရားပြစ်ဒဏ်ကို ခံရရုံတင်မကဘူး... ကောင်းကင်အမိန့်တော်အမှတ်တွေရဲ့ တစ်ဝက် ဒါမှမဟုတ် အဲ့ဒီထက်နည်းတဲ့ ပမာဏကိုပဲ အများဆုံး ရရှိနိုင်မှာပါ..."

"အခု တကယ်လို့ သခင်က သူ့ကို အမဲလိုက်မယ်ဆိုရင် အမှတ်အားလုံးကို ရရှိနိုင်ရုံမကဘူး ကောင်းကင်တာအိုရဲ့ ရိုက်ခတ်မှုကိုလည်း ခံရမှာ မဟုတ်ပါဘူး... တကယ်လို့ သခင်က အမဲလိုက်တဲ့ လုပ်ငန်းစဉ်ကို ခံစားမယ်ဆိုရင်... အနည်းဆုံး နှစ်ဆ ပြင်းထန်တဲ့ ထိုးနှက်ချက်တွေကိုလည်း ရရှိနိုင်သေးတယ်..."

"ဒါ့ပြင်... စနစ်လေးက နတ်ဘုရားအဆင့် စာရင်းသွင်းခြင်း ပုံစံခွက်ကိုလည်း နိုးထစေခဲ့တယ်လေ..."

"ဝူးဝူးဝူး... စနစ်လေးက စနစ်နတ်ဘုရားဆီမှာ အကြွေးတွေ အများကြီး တင်နေသေးတယ်... စနစ် အဆင့်မြှင့်တင်မှုတွေ လုပ်ဖို့ ပိုက်ဆံလေး နည်းနည်းတောင် တကယ်ကို မရှိတော့ဘူး..."

စနစ်က နောက်တစ်ကြိမ် ငိုတော့မည်ကို မြင်သောအခါ ခုံးဝူတောက် ဆက်မပြောတော့ပေ။

မည်သို့ပင်ဆိုစေ စနစ်သည် သူ့အတွက် ကိတ်မုန့်ပေါ်က ချယ်ရီသီးလေးသာ ဖြစ်ပေ၏။

သူ၏ ငြီးငွေ့ဖွယ်ကောင်းသော မဟာတာအို ဘဝကို အနည်းငယ် ပို၍ စိတ်ဝင်စားစရာ ကောင်းအောင် ပြုလုပ်ပေးနိုင်သရွေ့ အရေးမကြီးပေ။

သူသည် ကောင်းကင်ဘုံများ၏ မုဆိုးဖြစ်လာရန် ရွေးချယ်ခဲ့ပြီဖြစ်ရာ သဘာဝကျကျပင် အရည်အချင်းပြည့်မီသော မုဆိုးတစ်ယောက် ဖြစ်လာရပေမည်။

အရည်အချင်းပြည့်မီသော မုဆိုးတစ်ယောက်အတွက် အမဲလိုက်သည့် လုပ်ငန်းစဉ်သည် အမဲလိုက်ခြင်း၏ ရလဒ်ထက် မကြာခဏဆိုသလို ပို၍ပျော်ရွှင်စရာ ကောင်းတတ်သည်။

သူ၏ မျက်လုံးများတွင် နောက်ပြောင်လိုသည့် အရိပ်အယောင်များ ပြည့်နှက်နေပြီး ယဲ့ချန်နှင့် စုချင်းကဲတို့ဆီသို့ ကြည့်လိုက်သည်။

"မင်းတို့နှစ်ယောက်က ငါ့ရဲ့ အချိန်လေဟာနယ် တားမြစ်နယ်မြေက ဧကရာဇ်သားတော် အစဉ်အဆက်တွေကို စိန်ခေါ်ချင်တဲ့သူတွေလား..."

ခုံးဝူတောက်၏ အသံက တိုးညှင်းသော်လည်း ကြယ်တာရာနယ်မြေ တစ်ခုလုံးနီးပါး ပဲ့တင်ထပ်သွားသည်။

ယဲ့ချန်နှင့် စုချင်းကဲတို့၏ မျက်လုံးများထဲတွင် ခုံးဝူတောက်၏ အကြည့်သည် အကြွင်းမဲ့ သာလွန်မှုအသိကို သယ်ဆောင်ထားပြီး ပို၍ကျီစယ်နောက်ပြောင်လိုဟန် ရှိလာပေ၏။

သူသည် အကြွင်းမဲ့ အားသာချက်ရှိသော မုဆိုးတစ်ယောက်နှင့် တူညီနေသည်။

ထို့ပြင် သူတို့နှစ်ယောက်က အမဲလိုက်ခံရမည့် သားကောင်များဖြစ်ပြီး ထိုမုဆိုး၏ စိတ်ကြိုက် ကစားစရာများ ဖြစ်လာမည့်အလားပင်။

ဤအကြည့်က ယဲ့ချန်ကို အနည်းငယ် ဒေါသထွက်သွားစေခဲ့သည်။

အနောက်ဘက်ရွှမ် တာအိုနယ်မြေ၏ ထိပ်တန်း ပါရမီရှင် တစ်ယောက်အနေဖြင့် သူသည် ပြိုင်ဘက်အားလုံးကို ဖယ်ရှားရှင်းလင်းကာ အမြဲတမ်း အဆင်ပြေချောမွေ့သော ခရီးစဉ်ကို ပိုင်ဆိုင်ခဲ့ပြီး မည်သူကမျှ သူ့ကို ဤကဲ့သို့ မျက်လုံးများဖြင့် မကြည့်ရဲခဲ့ပေ။

သို့သော် သူ စကားမပြောနိုင်မီမှာပင် စုချင်းကဲက အရင်ဆုံး စကားပြောလိုက်သည်။

"အမှန်ပဲ... ဒီနေ့ ငါ စုချင်းကဲက နင်တို့ရဲ့ အချိန်လေဟာနယ် တားမြစ်နယ်မြေနဲ့ ရန်ကြွေးရှင်းဖို့ လာတာပဲ..."

ထိုစကားများ ထွက်ပေါ်လာသည်နှင့် တပြိုင်နက်...

ခုံးဝူတောက်နှင့် အချိန်လေဟာနယ် တားမြစ်နယ်မြေ၏ ကြီးမြတ်သော ဧကရာဇ်သားတော် အစဉ်အဆက် ကိုးဦးလုံးသည် သူတို့၏ အကြည့်များကို စုချင်းကဲဆီသို့ ပြန်လှည့်သွားကြသည်။

ခုံးဝူတောက်၏ မြင်ကွင်းထဲတွင် စနစ်ဇယားတစ်ခုက စုချင်းကဲ၏ခေါင်းအထက်၌ ထွက်ပေါ်လာသည်။

အမည်: စုချင်းကဲ

ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသမီး

နယ်ပယ်: တာအိုနန်းတော်နယ်ပယ် အဆင့်ကိုး

ရုပ်ခန္ဓာကိုယ်: မွေးရာပါ အထွတ်အထိပ်အရိုး • ကဏဦးအဆင့် (အထွတ်အထိပ်အရိုး၏ ပုံမှန်မဟုတ်သော အကိုင်းအခက်)

ကျင့်စဉ်: ဖန်ဆင်းခြင်း ရတနာကျင့်စဉ် ပေါင်းစည်းခြင်း တာအိုကျင့်စဉ်...

မှော်ရတနာ: နက်နဲသိမ်မွေ့ကိုးသွယ် အပြစ်အနာအဆာမဲ့ဓား နှလုံးသားကာကွယ်ခြင်းကျောက်စိမ်း...

ကောင်းကင်အမိန့်တော်အမှတ်များ: ၄၀၀၀

ရနိုင်ခြေရှိသော မဟာတာအို အပိုင်းအစများ: ဓားတာအို မီးတောက်မဟာတာအို ရေခဲမဟာတာအို...

မမျှော်လင့်ဘဲ သူတို့သည် ကောင်းကင်ကံကြမ္မာ ဇာတ်လိုက်မင်းသားနှင့် ကောင်းကင်ကံကြမ္မာ ဇာတ်လိုက်မင်းသမီးဆိုသည့် လိုက်ဖက်ညီသော စုံတွဲတစ်တွဲ ဖြစ်နေသည်။

သားကောင်နှစ်ကောင်ကို တစ်ပြိုင်နက်တည်း အမဲလိုက်ရခြင်းက သူ၏ပျော်ရွှင်မှုကို နှစ်ဆ တိုးစေမည် မဟုတ်လော...

သို့သော် သူ၏ တစ်ခုတည်းသော နောင်တရမှုမှာ တစ်ဖက်လူ၏ ရုပ်ခန္ဓာကိုယ်သည် ယခုမှ စတင်ကျင့်ကြံရုံသာ ရှိသေးပြီး အသေးစား အောင်မြင်မှုသို့ပင် မရောက်သေးသည့်အတွက် စိန်ခေါ်မှု နည်းပါးသွားခြင်းပင်။

ဤကမ္ဘာတွင် ရုပ်ခန္ဓာကိုယ်များကို အောက်မှ အထက်သို့ အကြမ်းဖျင်းအားဖြင့် နယ်ပယ်ခြောက်ခု ခွဲခြားထားသည်။ ဤသည်မှာ ကဏဦးအဆင့်၊ အသေးစား အောင်မြင်မှု၊ ကြီးမားသော အောင်မြင်မှု၊ အထွတ်အထိပ်၊ ပြီးပြည့်စုံမှု၊ ကျော်လွန်မှုတို့ဖြစ်သည်။

...

"ခုံးဝူတောက်... အချိန်လေဟာနယ် တားမြစ်နယ်မြေရဲ့ နတ်ဘုရားသားတော်လား..."

အစောပိုင်းက ယဲ့ချန်သည် ဟင်းလင်းပြင် မဟာဧကရာဇ်ထံမှ သူရရှိခဲ့သော ခုံးဝူတောက်နှင့်ပတ်သက်သည့် အချက်အလက်များကို စုချင်းကဲအား ပြောပြခဲ့ပြီးဖြစ်သည်။

ခုံးဝူတောက်၏ ရုတ်တရက် ပေါ်ထွက်လာမှုက သူမကို အလွန်စိုးရိမ်ထိတ်လန့်စေခဲ့သော်လည်း ယခုအခြေအနေက ဤအထိ ရောက်နေလေပြီ။ ထိုကြောင့် စိုးရိမ်ထိတ်လန့်မှုရှိသည့်တိုင် ယနေ့ လက်စားချေမည့် အစီအစဉ်ကို သူမ စွန့်လွှတ်လိုက်၍ မဖြစ်နိုင်ပေ။

"စုယွမ်ကို နင် မှတ်မိသေးလား..."

"လွန်ခဲ့တဲ့ ဆယ်စုနှစ်တွေတုန်းက ငါ့ရဲ့ အစ်ကိုကြီး စုယွမ်က နင်တို့ရဲ့ အချိန်လေဟာနယ် တားမြစ်နယ်မြေကို စိန်ခေါ်ဖို့ လာခဲ့တယ်... ဒါပေမယ့် အဲဒီအချိန်ကစပြီး သူ လုံးဝ ပျောက်ကွယ်သွားခဲ့တယ်..."

စုချင်းကဲ၏ လှပသော မျက်လုံးများတွက် လှိုင်းထနေသော သတ်ဖြတ်လိုစိတ်များဖြင့် ပြည့်နှက်နေပြီး သူမက ဒေါသတကြီးဖြင့် ပြောဆိုလိုက်သည်။

"ငါ့ရဲ့ အစ်ကိုကြီးကို သတ်ပြီး သူ့ရဲ့ အထွတ်အထိပ်အရိုးကို ထုတ်ယူသွားတာက နင်တို့ အချိန်လေဟာနယ် တားမြစ်နယ်မြေက လူတွေပဲ..."

ထိုစကားကို ကြားသောအခါ ဧကရာဇ်သားတော်အနည်းငယ်သည် နားမလည်နိုင်သည့် အမူအရာများ ဖြစ်သွားကြ၏။

"စုယွမ်လား... အဲ့ဒါ ဘယ်သူလဲ... မင်းတို့ ကြားဖူးလား..."

"ဘယ်သူသိမှာလဲ... ဒီနှစ်တွေအတွင်းမှာ ကောင်းကင်ဘုံတွေနှင့်အင်္သချေနယ်ပယ်တွေက ပါရမီရှင်တွေ အများကြီးက ငါတို့ရဲ့ အချိန်လေဟာနယ် တားမြစ်နယ်မြေကို လာပြီး ခုန်ပေါက်ပြကြတယ်လေ... ပြီးတော့ သူတို့အားလုံး သေကုန်ကြတာပဲ မဟုတ်ဘူးလား..."

"ဒီ စုယွမ်ဆိုတာလည်း အဲ့ဒီလိုပဲ ဖြစ်ရမယ်... သူ့ရဲ့နာမည်ကိုတောင် ငါ မမှတ်မိဘူးဆိုတော့ သူက သာမန်ကောင်လေးတစ်ကောင်ကလွဲလို့ ဘာဖြစ်နိုင်ဦးမှာလဲ..."

"..."

အထွတ်အထိပ်အရိုးသည် မဟာတာအို ရုပ်ခန္ဓာကိုယ်သုံးထောင်တွင် ထိပ်တန်းရုပ်ခန္ဓာကိုယ် တစ်ခု ဖြစ်သော်လည်း..

ဤလက်ရှိခေတ် ဧကရာဇ်သားတော် အစဉ်အဆက်များ ဖြစ်စေ ယခင် ဧကရာဇ်သားတော်အစဉ်အဆက်များဖြစ်စေ သူတို့အားလုံးသည် အနည်းဆုံး ထိပ်တန်းအဆင့်ရှိ မဟာတာအို ရုပ်ခန္ဓာကိုယ်ကို ပိုင်ဆိုင်ထားကြသည်။

ထိုကဲ့သို့ သာမန် အထွတ်အထိပ်အရိုးက သူတို့၏မျက်လုံးထဲတွင် အမှန်တကယ်ပင် ထိုမျှလောက် အထင်ကြီးစရာ မကောင်းချေ။

"နင်တို့..."

ကြီးမြတ်သော ဧကရာဇ်သားတော် အစဉ်အဆက်ကိုးဦးက လုံးဝဂရုမစိုက်သည့်ပုံစံ ပြုမူနေသည်ကို မြင်သည့်အပြင် သူမ၏ သေဆုံးသွားသော အစ်ကိုကြီးကိုပင် လှောင်ပြောင်နေကြသဖြင့် စုချင်းကဲကို ပို၍ပင် ဒေါသထွက်စေခဲ့သည်။

သို့သော် သူမ စကားမပြောနိုင်မီမှာပင် ခုံးဝူတောက်က သူ၏ဖခင် စောစောက ပေးထားသော မဟာထောင်ပေါင်းများစွာ ရတနာသေတ္တာကို သူ၏ရင်ဘတ်ကြားမှ ထုတ်ယူလိုက်သည်။

သူ၏လက်ကို တစ်ချက်ဝှေ့ယမ်းလိုက်သည်နှင့် မဟာထောင်ပေါင်းများစွာ ရတနာသေတ္တာသည် တောက်ပသော အလင်းတန်းများနှင့်အတူ ရုတ်တရက် ပေါက်ကွဲထွက်လာသည်။

"မင်းအစ်ကိုကြီးရဲ့ အထွတ်အထိပ်အရိုးကို ငါတို့ရဲ့ အချိန်လေဟာနယ် တားမြစ်နယ်မြေက ထုတ်ယူသွားတယ်လို့ မင်းပြောမှတော့..."

ခုံးဝူတောက်က ပြုံးလိုက်သည်။

"မင်းရဲ့ အစ်ကိုကြီးဟာက ဒီအရိုးတွေထဲမှာ ပါမပါ ဘာလို့ မကြည့်တာလဲ..."

ဝီ...

ချက်ချင်းပင် တောက်ပသော ရွှေရောင်အလင်းတန်းများ ထုတ်လွှတ်နေသည့် သလင်းကျောက်ကဲ့သို့ ကြည်လင်သော အရိုးလေးဆယ့်ကိုးချောင်းသည် မဟာထောင်ပေါင်းများစွာ ရတနာသေတ္တာထဲမှ ထွက်ပေါ်လာသည်။

"ဒါက..."

ဤမြင်ကွင်းကို မြင်လိုက်ရသောအခါ ယဲ့ချန်နှင့် စုချင်းကဲတို့သည် မိုးကြိုးပစ်ခံလိုက်ရသကဲ့သို့ ခံစားလိုက်ရပြီး သူတို့၏ခန္ဓာကိုယ်များသည် ရွှံ့ရုပ်တုများအလား နေရာတွင်ပင် အေးခဲတောင့်တင်းသွားသည်။ အလွန်အမင်း အံ့သြတုန်လှုပ်မှုကြောင့် သူတို့၏ မျက်နှာသွင်ပြင်များပင် အနည်းငယ် ပုံပျက်သွားပုံရသည်။

ခုံးဝူတောက်၏ နောက်တွင် ရပ်နေသော ဧကရာဇ်သားတော် အစဉ်အဆက် ကိုးဦးကမူ ပို၍ပင် အံ့သြမှင်သက်သွားကြပြီး ပါးစပ်အဟောင်းသား ဖြစ်သွားကာ သူတို့၏အောက်မေးရိုးများ မြေကြီးပေါ် ပြုတ်ကျမတတ် ဖြစ်သွားကြ၏။

လေးဆယ့်ကိုးခု... အထွတ်အထိပ်အရိုး လေးဆယ့်ကိုးခု...

...

အခန်း (၁၆) သာမန် ပုရွက်ဆိတ်တစ်ကောင်က နတ်ဘုရားသားတော်ကို တိုက်ခိုက်ဖို့ ဘယ်လိုလုပ်ရဲရတာလဲ

အထွတ်အထိပ်အရိုး လေးဆယ့်ကိုးခုသည် ဟင်းလင်းပြင်အတွင်းသို့ ထွက်ပေါ်လာသည်နှင့်အမျှ ကျယ်ပြန့်သော နေရာတစ်ဝိုက်သည် စိတ်ကူးယဉ်ဆန်ပြီး ခမ်းနားထည်ဝါသော တာအိုအလင်းတန်းများဖြင့် လွှမ်းခြုံသွားသည်။

တောက်ပသော အလင်းတန်းများအတွင်း၌ တာအိုအသံများ ပဲ့တင်ထပ်နေပြီး အရာအားလုံးကိုရွှေနီရောင်အဖြစ် ဆေးဆိုးလိုက်သကဲ့သို့ ရှိကာ ဤနေရာရှိ ဥပဒေသများပင်လျှင် ထိုအရာနှင့်အတူ ပဲ့တင်ထပ်နေသည်။

အထွတ်အထိပ်အရိုးသည် မဟာတာအိုရုပ်ခန္ဓာကိုယ်သုံးထောင်တွင် ထိပ်တန်းရုပ်ခန္ဓာကိုယ်ပင်။

တစ်ခု သို့မဟုတ် နှစ်ခု ပေါ်လာခြင်းကို သူတို့ လက်ခံနိုင်ကြသည်။

သို့သော် ယခု၌မူ အထွတ်အထိပ်အရိုး လေးဆယ့်ကိုးခုပင် ရှိနေသည်။

ဤကဲ့သို့ မြင်ကွင်းက အမြင်အာရုံအတွက် အလွန်အမင်း ရိုက်ခတ်မှုရှိပြီး အလွန်အမင်း တုန်လှုပ်စရာ ကောင်းလှသည်။

ဤကဲ့သို့သော မြင်ကွင်းမျိုးကို သူတို့ အိပ်မက်ထဲတွင်တောင် စိတ်ကူးယဉ်နိုင်မည် မဟုတ်ပေ။

"အဲ့ဒါ... အဲ့ဒါက အစ်ကိုကြီးရဲ့ အထွတ်အထိပ်အရိုးလား..."

ဤအချိန်အခိုက်အတန့်တွင် ထိုအထွတ်အထိပ်အရိုး လေးဆယ့်ကိုးခုအနက်မှ စုချင်းကဲသည် ရင်းနှီးသော အရှိန်အဝါတစ်ခုကို ရုတ်တရက် အာရုံခံမိလိုက်သည်။

သူမ၏အကြည့်က လှည့်လည်ရှာဖွေနေပြီး နောက်ဆုံးတွင် ထိုအထဲမှ တစ်ခုကို အာရုံစိုက်လိုက်သည်။

သေချာစွာ အာရုံခံကြည့်ပြီးနောက် သူမသည် နေရာတွင်ပင် တွေဝေမိန်းမောသွားလေသည်။

အမှားအယွင်း မရှိနိုင်ချေ။ ထိုအရာက သူမအစ်ကိုကြီး၏ အထွတ်အထိပ်အရိုးပင်။

အစပထမတွင် သူမ၏နှလုံးသားထဲတွင် မျှော်လင့်ချက် စိတ်ကူးယဉ်မှုလေးတစ်ခု ရှိနေသေးသည်။ သို့သော် ယခု၌မူ သူမ၏အစ်ကိုကြီး ချန်ရစ်ခဲ့သော အထွတ်အထိပ်အရိုးကို မြင်တွေ့ပြီးနောက် နောက်ဆုံးမျှော်လင့်ချက်လေးသည် လုံးလုံးလျားလျား အမှုန်အမွှားဖြစ်သွားခဲ့လေပြီ။

"မင်း ရှာတွေ့သွားပြီ ထင်တယ်..."

ခုံးဝူတောက်သည်လည်း စုချင်းကဲ၏မျက်နှာအမူအရာ ပြောင်းလဲသွားသည်ကို သတိထားမိလိုက်ပြီး သူ၏ နှုတ်ခမ်းထောင့်တွင် အပြုံးဖျော့ဖျော့တစ်ခု ကွေးတက်သွားကာ ပေါ့ပေါ့ပါးပါး ပြောဆိုလိုက်သည်။

"ဒါပေမယ့် ငါ အရမ်းစိတ်မကောင်းပါဘူး..."

"ဒါက ငါ့ရဲ့အဖေက ငါ့ကိုပေးထားတဲ့ လက်ဆောင်ဆိုတော့... မင်းကို ငါ ပေးလို့မရဘူး..."

သူ စကားပြောနေစဉ် ခုံးဝူတောက်၏ အကြည့်က နောက်ပြောင်လိုဟန်ရှိပြီး စုချင်းကဲ၏ ရင်ဘတ်နေရာကို ဖြတ်ပြေးသွားသည်။

"သေချာတာပေါ့... တကယ်လို့ မင်း အရမ်း လိုချင်တယ်ဆိုရင်... မင်းရဲ့အထွတ်အထိပ်အရိုးကို တူးထုတ်လိုက်လို့ ရတယ်လေ..."

"မင်းရဲ့ အစ်ကိုကြီးဟာနဲ့ လဲလှယ်မယ်ဆိုရင်... ဒီ နတ်ဘုရားသားတော်က စဉ်းစားပေးကောင်း စဉ်းစားပေးနိုင်တယ်..."

[ဒင်... စုချင်းကဲရဲ့ တာအို နှလုံးသား ထိုးနှက်ခံလိုက်ရတာကို ထောက်လှမ်းတွေ့ရှိရပါတယ်... တစ်ဖက်လူရဲ့ ကောင်းကင်အမိန့်တော်အမှတ်တွေက ၃၅၀၀ အထိ ကျဆင်းသွားပြီး သခင်က ကောင်းကင်အမိန့်တော်အမှတ်၅၀၀ကို ရရှိပါတယ်...]

[ဒင်... သခင်ကို ဂုဏ်ယူပါတယ်... နှစ်ဆ ပြင်းထန်တဲ့ ထိုးနှက်ချက်ကို အောင်မြင်စွာ ရရှိပြီး ကောင်းကင်အမိန့်တော်အမှတ် တစ်ထောင်ကို အောင်မြင်စွာ ရရှိပါတယ်...]

[ဒင်... ယဲ့ချန်လည်း စိတ်လှုပ်ရှားမှု အတက်အကျတွေ ပြင်းပြင်းထန်ထန် ဖြစ်ပေါ်နေတာကို ထောက်လှမ်းတွေ့ရှိရပါတယ်... တစ်ဖက်လူရဲ့ ကောင်းကင်အမိန့်တော် အမှတ်တွေက ၅၅၅၀ အထိ ကျဆင်းသွားပြီး သခင်က ကောင်းကင်အမိန့်တော်အမှတ် ၅၀ကို အောင်မြင်စွာ ရရှိပါတယ်...]

[သခင်ကို ဂုဏ်ယူပါတယ်... သုံးဆ ပြင်းထန်တဲ့ ထိုးနှက်ချက်ကို ဖြစ်ပေါ်စေပြီး ကောင်းကင်အမိန့်တော်အမှတ် ၁၅၀ကို အောင်မြင်စွာ ရရှိပါတယ်...]

စနစ်၏စကားများကို ကြားသောအခါ ခုံးဝူတောက်၏ နှုတ်ခမ်းထောင့်ရှိ နောက်ပြောင်လိုမှုက ပို၍နက်ရှိုင်းလာသည်။

ပြန်လည်နိုးထလာသောခေတ်၏ ကောင်းကင်ကံကြမ္မာပိုင်ရှင်များသည် ဤမျှသာ စွမ်းဆောင်နိုင်သလော။

သူက စကားလုံး အနည်းငယ်ဖြင့် သူတို့ကို ရန်စလိုက်ရုံသာ ရှိသေးသည်။ သူတို့၏ စိတ်ခံစားချက်များက ဤမျှလောက် အတက်အကျ ကြီးမားနေလေပြီ။

ထို့ပြင် ဤ ယဲ့ချန်... သူသည် အမှန်တကယ်ကို မျက်နှာလိုမျက်နှာရ လုပ်တတ်သူပင်...

ဤကိစ္စကြောင့်ဖြင့် သူသည်လည်း ဤမျှ ကြီးမားသော စိတ်ခံစားမှု အတက်အကျ ဖြစ်နေခဲ့သလော...

ထိုသို့သောသူက ဤခေတ်၏ ကောင်းကင်ကံကြမ္မာပိုင်ရှင် ဖြစ်နေခြင်းက တကယ့်ကို စိတ်ပျက်စရာပင်။

...

"နင်..."

ထိုစကားများကို ကြားချိန်၌ စုချင်းကဲ၏ခန္ဓာကိုယ်တစ်ခုလုံး တုန်ယင်သွားသည်။

အနောက်ဘက်ရွှမ် တာအိုနယ်မြေ၏ ထိပ်တန်း ပါရမီရှင် တစ်ယောက်အနေဖြင့် သူမ ဘယ်တုန်းကများ ဒီလို အရှက်ခွဲခံခဲ့ရဖူးလို့လဲ...

ခုံးဝူတောက်က သူမရဲ့အထွတ်အထိပ်အရိုးကို လိုချင်တယ်လို့ ပြောတာက သူမကိုယ်တိုင် တူးထုတ်ခိုင်းနေတာပဲ မဟုတ်ဘူးလား...

စုချင်းကဲက ရုတ်တရက် ခေါင်းမော့လိုက်ပြီး ပြင်းထန်သော သတ်ဖြတ်လိုစိတ်များ ပြည့်နှက်နေသည့် ဟိန်းဟောက်သံတစ်သံကို ထုတ်လွှတ်လိုက်သည်။

"နင့်ကို သေစေချင်တယ်..."

ဝုန်း...

သူမ၏ သေဆုံးသွားသော အစ်ကိုကြီးကို တစ်ဖက်လူက ဤကဲ့သို့ စော်ကားလိုက်ရာ စုချင်းကဲက တစ်ဖက်လူ၏ အဆင့်အတန်းကို မည်သို့ ဂရုစိုက်နိုင်တော့မည်နည်း။

သူမ၏ သေဆုံးသွားသော အစ်ကိုကြီးအတွက် လက်စားချေချင်ရုံသာ ကျန်ရှိတော့ပေ၏။

စုချင်းကဲ၏ရင်ဘတ်မှ တောက်ပသော တာအိုအလင်းတန်းတစ်တန်း ပွင့်အံ့ထွက်လာသည်ကိုသာ မြင်တွေ့လိုက်ရသည်။

မွေးရာပါ အထွတ်အထိပ်အရိုး၏ စွမ်းအားများ ရူးသွပ်စွာ ပေါက်ကွဲထွက်လာပြီး ကြောက်မက်ဖွယ်ကောင်းသော စွမ်းအားကြောင့် ဟင်းလင်းပြင်တစ်ခုလုံး အနည်းငယ် တုန်ခါသွားသည်။

ခုံးဝူတောက်က ဤအရာနှင့်ပတ်သက်၍ လုံးဝ ဂရုမစိုက်ဘဲ လှုပ်ရှားရန် ဟန်ပြင်လိုက်သည်။

"ရိုင်းစိုင်းလိုက်တာ... သာမန် ပုရွက်ဆိတ်တစ်ကောင်က နတ်ဘုရားသားတော် ခုံးဝူတောက်ကို တိုက်ခိုက်ဖို့ ဘယ်လိုလုပ်ရဲရတာလဲ..."

သို့သော် ရုတ်တရက် သူ၏နံဘေးရှိ ပုံရိပ်တစ်ခုက အရင်လှုပ်ရှားလိုက်ပြီး စုချင်းကဲဆီသို့ ကြောက်မက်ဖွယ်ကောင်းသော လက်ဝါးရိုက်ချက်တစ်ခုကို တိုက်ရိုက်ရိုက်နှက်လိုက်သည်။

ဝုန်း...

တဝုန်းဝုန်းထနေသော မဟာတာအို ဥပဒေသများက ပြောင်းပြန်လှိုင်းထသွားပြီး ကောင်းကင်နှင့် နေကို ဖုံးကွယ်ထားသော ဥပဒေသ လက်ဝါးပုံရိပ်ယောင်ကြီးတစ်ခုအဖြစ် ပြောင်းလဲသွားကာ ရှေးဟောင်းနတ်ဘုရား အလား စုချင်းကဲဆီသို့ ပြိုကျလာသည်။

"နက်နဲသိမ်မွေ့ ကောင်းကင်ဖြိုခွဲလက်ဝါး..."

စုချင်းကဲသည် ရှောင်တိမ်းခြင်း မရှိဘဲ သူမ၏ စွမ်းအားများကို ချက်ချင်း ထုတ်လွှတ်လိုက်ကာ သူမကို ဖိနှိပ်လာနေသော နတ်ဘုရားလက်ဝါးဆီသို့ လက်ဝါးရိုက်ချက်တစ်ခု ပြန်လည်ရိုက်နှက်လိုက်၏။

သို့သော် သူမသည် ထိုနတ်ဘုရားလက်ဝါး၏ စွမ်းအားကို အလွန်အမင်း အထင်သေးမိသွားသည်။

"ဘုန်း" ဟူသော အသံကျယ်ကြီး တစ်ချက်သာ ကြားလိုက်ရသည်။

စုချင်းကဲ၏ တိုက်ခိုက်မှုသည် စက္ကူစများကဲ့သို့ ကျိုးပဲ့ကာ ချက်ချင်းပင် ကြေမွှသွားလေသည်။

"လောကဖျက်ဆီး ကပ်ဘေးအလင်းတန်း..."

ချက်ချင်းပင် စုချင်းကဲသည် အော်ဟစ်သံကျယ်ကြီးတစ်သံ ထုတ်လွှတ်လိုက်ပြီး သူမ၏ မွေးရာပါ အထွတ်အထိပ်အရိုးမှ အစွမ်းထက်ဆုံး နတ်ဘုရားစွမ်းရည်ကို နောက်တစ်ကြိမ် ထုတ်လွှတ်လိုက်သည်။

မရေမတွက်နိုင်သော မဟာတာအိုစာလုံးများက လေထဲတွင် အဆက်မပြတ် စုစည်းကာ ထင်ဟပ်လာပြီး ပြိုကျလာသော လက်ဝါးဆီသို့ တိုက်ရိုက်ပစ်လွှတ်လိုက်သည့် ကမ္ဘာဖျက် နတ်ဘုရားအလင်းတန်းတစ်ခုအဖြစ် ပြောင်းလဲသွားသည်။

ဝုန်း...

တစ်ချိန်တည်းမှာပင် ပြိုကျလာသော လက်ဝါး၏ နောက်ဆက်တွဲ ရိုက်ခတ်မှုသည် လျော့ကျမသွားဘဲ ကမ္ဘာဖျက်စွမ်းအားများကို သယ်ဆောင်လာကာ စုချင်းကဲကို ဆက်လက် ဖိနှိပ်နေဆဲပင်။

"ချင်းကဲ..."

ဤအခိုက်အတန့်ရောက်မှသာ ယဲ့ချန်က နောက်ဆုံးတွင် တုံ့ပြန်နိုင်ခဲ့ပြီး အံ့အားတသင့်ရေရွတ်ကာ စုချင်းကဲ၏ ရှေ့သို့ ချက်ချင်း ပြေးထွက်သွားသည်။

သူက ပြိုကျလာသော နတ်ဘုရားလက်ဝါးဆီသို့ လက်သီးတစ်ချက် ထိုးနှက်လိုက်သည်။

ဝုန်း... ဝုန်း...

ကြောက်မက်ဖွယ်ကောင်းသော စွမ်းအားနှစ်ခုသည် ကြယ်များအလား တိုက်မိသွားကြသည်။

ကြောက်မက်ဖွယ်ကောင်းသော စွမ်းအင် မုန်တိုင်းတစ်ခုက အရပ်မျက်နှာအားလုံးသို့ ပျံ့နှံ့သွားပြီး သူတို့၏ပတ်လည်ရှိ မရေမတွက်နိုင်သော ကြယ်အကြွင်းအကျန်များကို တုန်လှုပ်သွားစေသည်။

ဥပဒေသမြူခိုးများ ထကြွလာပြီး စုချင်းကဲနှင့် ယဲ့ချန်တို့၏ပုံရိပ်များကို လုံးဝဖုံးလွှမ်းကာ ပိတ်ဖုံးသွားစေသည်။

"ဟင်..."

ဤအချိန်အခိုက်အတန့်တွင် ခုံးဝူတောက်သည် သူ၏ရှေ့ရှိ ပုံရိပ်ကို နောက်ဆုံးတွင် မြင်လိုက်ရသည်။

ဤသည်မှာ ကြီးမြတ်သော ဧကရာဇ်သားတော် အစဉ်အဆက်ကိုးဦးထဲမှ တစ်ဦးဖြစ်သော ဧကရာဇ်သမီးတော် ခုံးကျန်ယွဲ့ပင်။

ထိုအမျိုးသမီးသည် အမှန်တကယ်ပင် သိမ်မွေ့သော မျက်နှာသွင်ပြင်များရှိကာ အလွန်ချောမောလှပသည်။

သူမ၏အနက်ရောင်ဆံပင်များက ချောမွေ့နေပြီး ဤအချိန်အခိုက်အတန့်တွင် ဥပဒေသ မုန်တိုင်း၏ရိုက်ခတ်မှုအောက်၌ ကြယ်တာရာ ရေတံခွန်အလား လေထဲတွင် လူးလွန့်နေသည်။

အစွန်းအထင်းကင်းစင်သော ဝတ်ရုံဖြူက သူမ၏ လောကီနှင့် ကင်းကွာကာ သာလွန်သည့် အရှိန်အဝါကို ပို၍ပေါ်လွင်စေသည်။

သို့သော် ခုံးဝူတောက်က သူမ၏နာမည်ကို မမေးနိုင်မီမှာပင် ယဲ့ချန်၏ ဒေါသတကြီး အော်ဟစ်သံ ရုတ်တရက် ထပ်မံထွက်ပေါ်လာသည်။

"ဟမ့်.. အချိန်လေဟာနယ် တားမြစ်နယ်မြေရဲ့ သာမန် နတ်ဘုရားသားတော်တစ်ပါးက အမျိုးသမီးတွေ နောက်မှာပဲ ပုန်းနေတတ်တာလား..."

"သူ့ရှေ့က အမျိုးသမီးကို လှုပ်ရှားခိုင်းရတယ်လို့..."

ဥပဒေသ မြူခိုးများကြားတွင် လေပြင်းတစ်ချက် တိုက်ခတ်သွားသည်နှင့်အမျှ ယဲ့ချန်နှင့် စုချင်းကဲတို့၏ ပုံရိပ်များ ထွက်ပေါ်လာသည်။

ယဲ့ချန်၏ညာလက်က စုချင်းကဲ၏ သွယ်လျသောခါးကို ဖက်ထားသည်အား မြင်လိုက်ရသည်။

စုချင်းကဲသည် သူ၏ရင်ခွင်ထဲတွင် ဖိကပ်ထားခြင်း ခံရပြီး သူတို့နှစ်ယောက်သည် နတ်ဘုရားစုံတွဲတစ်တွဲကဲ့သို့ ခံစားချက်မျိုး ပေးစွမ်းနေသည်။

"ယဲ့ချန်... နင်..."

စုချင်းကဲ၏နားရွက်များ နီရဲသွားပြီး သူမ စကားပြောရန် ပြင်လိုက်သော်လည်း ယဲ့ချန်က နောက်တစ်ကြိမ် ကြားဖြတ်ပြောလိုက်သည်။

"ချင်းကဲ... စိတ်မပူပါနဲ့... ငါ ဒီမှာ ရှိနေသရွေ့ ဘယ်သူမှ မင်းကို အနိုင်ကျင့်လို့ မရဘူး..."

[ဒင်... ကောင်းကင်ကံကြမ္မာ ဇာတ်လိုက်မင်းသမီး စုချင်းကဲနဲ့ ကောင်းကင်ကံကြမ္မာ ဇာတ်လိုက်မင်းသား ယဲ့ချန်တို့ရဲ့ ကောင်းကင်အမိန့်တော်နှောင်ကြိုးက ပိုပြီးခိုင်မာလာတာကို ထောက်လှမ်းတွေ့ရှိရပါတယ်... ယဲ့ချန်ရဲ့ ကောင်းကင်အမိန့်တော်အမှတ်တွေက အမှတ်၁၀၀ တိုးလာပါတယ်... ကျန်ရှိနေတဲ့ ကောင်းကင်အမိန့်တော်အမှတ်များ ၆၀၅၀...]

"ကောင်းကင်အမိန့်တော်အမှတ်တွေ တိုးလာတာလား..."

ဤသို့ဆိုလျှင် ကောင်းကင်ကံကြမ္မာ ဇာတ်လိုက်မင်းသားသည် ကောင်းကင်ကံကြမ္မာ ဇာတ်လိုက်မင်းသမီး ရှေ့တွင် အောင်မြင်စွာ အစွမ်းပြလိုက်သည်နှင့် သူ၏ကောင်းကင်အမိန့်တော်အမှတ်များ တိုးလာစေနိုင်သည် မဟုတ်လော။

"ဟမ့်... သာမန်အမှိုက်လေးနှစ်ကောင်ကများ... ငါတို့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော်ကို ရန်စရဲတယ်ပေါ့..."

ဤအခိုက်အတန့်တွင် ခုံးကျန်ယွဲ့၏ မျက်နှာအမူအရာက အေးစက်နေပြီး ပို၍ ကြောက်မက်ဖွယ်ကောင်းသော အရှိန်အဝါက သူမ၏ ခန္ဓာကိုယ်မှ ထွက်ပေါ်လာကာ ပတ်ဝန်းကျင်ရှိ ဟင်းလင်းပြင်ကို အနည်းငယ် လိမ်ကောက်ကာ တုန်ယင်သွားစေသည်။

"နင်တို့က ထိုက်တန်လို့လား..."

ထိုလူနှစ်ယောက်က သူမကို အမှန်တကယ်ပင် အလွန်အမင်း မပျော်မရွှင် ဖြစ်စေခဲ့သည်။

အစက သူမသည် သူမ၏ နတ်ဘုရားသားတော် နှင့် ယှဉ်ပြိုင်ချင်ခဲ့ခြင်း ဖြစ်သည်။ သူတို့၏ ဆက်ဆံရေးကို ပို၍နက်ရှိုင်းစေရန်အတွက် ဖြစ်သော်လည်း ထိုကျိန်ဆဲခံရမည့် အမှိုက်နှစ်ကောင်က ကြားဖြတ်နှောင့်ယှက်လိမ့်မည်ဟု သူမ မမျှော်လင့်ထားခဲ့ပေ။

သူမကို ပို၍ဒေါသထွက်စေသည်မှာ ဤသို့ အားနည်းပြီး နိမ့်ကျသူများက နတ်ဘုရားသားတော်ကို တိုက်ခိုက်ရန် အတင့်ရဲနေခြင်းပင်။

ဤအခိုက်အတန့်တွင် တခြားသော ကြီးမြတ်သည့် ဧကရာဇ်သားတော် အစဉ်အဆက်များလည်း တုံ့ပြန်လာကြပြီး သူတို့၏မျက်နှာအမူအယာများ တင်းမာခက်ထန်သွားကာ ယဲ့ချန်နှင့် စုချင်းကဲတို့ဆီသို့ ကြောက်မက်ဖွယ်ကောင်းသော ဖိအားများကို ထုတ်လွှတ်လိုက်ကြသည်။

"သေချင်နေတာပဲ... မင်းတို့နှစ်ယောက်က ဘာတွေမို့လို့ ငါတို့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော်ကို ဒီလိုမျိုး တိုက်ခိုက်ဖို့ အတင့်ရဲရတာလဲ..."

"ဒီအမှိုက်နှစ်ကောင်နဲ့ ဘာလို့ စကားပြောပြီး အချိန်ဖြုန်းနေမှာလဲ... နတ်ဘုရားသားတော် သခင်အပေါ် ဒီလောက်တောင် ရိုင်းစိုင်းရဲမှတော့... သူတို့ကို သတ်ပစ်လိုက်ရုံပဲ..."

သူတို့အားလုံး ခုံးဝူတောက်၏ စွမ်းအားကို မြင်တွေ့ခဲ့ရပြီး အတိုင်းအတာတစ်ခုအထိ သူက သူတို့ကို လက်အောက်ခံဖြစ်သွားစေခဲ့လေပြီ။

ယခု သူ၏ မျက်နှာသာပေးမှုကို ရရှိရန် အခွင့်အရေးမျိုး ရှိနေပြီဖြစ်ရာ သူတို့က လုံးဝ လက်လွတ်မခံနိုင်ပေ။