အခန်း (၃၃-၃၄)

အခန်း (၃၃) ကောင်းကင်ဘုံများနှင့် လောကအသီးသီးကို ကြေညာခြင်း...နတ်ဘုရားသားတော် ထွက်ပေါ်လာပြီ

ရှေးဟောင်းဘိုးဘေးကြီးများသည်လည်း စိတ်သက်သာရာရသည့် အပြုံးများကို ပြသခဲ့ကြပြီး သူတို့၏မျက်လုံးများတွင် အံ့အားသင့်လေးစားမှုများ ပြည့်နှက်နေသည်။

"အခု ခုံးဝူတောက်ရဲ့ရုပ်ခန္ဓာကိုယ်က တားမြစ်နယ်ပယ်ထဲကို လုံးဝ ဝင်ရောက်သွားပြီ... ပြီးတော့ သူက တခြားမူလရုပ်ခန္ဓာကိုယ်နှစ်ခုကိုလည်း နိုးထစေခဲ့ပြီဆိုတော့ သူ ဒီလို စွမ်းဆောင်နိုင်တာက နားလည်ပေးနိုင်တယ်..."

"အချိန်တန်ရင် ခုံးဝူတောက်ရဲ့ အောင်မြင်မှုတွေက ဒီလောကကြီးကို သေချာပေါက် ကျော်လွန်သွားလိမ့်မယ်..."

ရှေးဟောင်းဘိုးဘေးကြီးတချို့ ဆွေးနွေးနေကြစဉ်တွင်...

ခုံးဝူတောက်သည် မိုးကောင်းကင်ယံမှ ဖြည်းညှင်းစွာ ဆင်းသက်လာပြီး ရှေးဟောင်းဘိုးဘေးကြီးများနှင့်အကြီးအကဲများဆီသို့ ဦးတည်၍ ရိုသေလေးစားစွာဖြင့် သူ၏လက်နှစ်ဖက်ကို ပူးဆုပ်ကာ အရိုအသေပေးလိုက်သည်။

"ရှေးဟောင်းဘိုးဘေးကြီးတွေနဲ့ အကြီးအကဲတွေကို ဂါရဝပြုပါတယ်..."

မူလရုပ်ခန္ဓာကိုယ်နှစ်ခုကို အောင်မြင်စွာ ပေါင်းစပ်ပြီးနောက် ခုံးဝူတောက်၏အရှိန်အဝါသည် ယခုအချိန်၌ ပို၍မြင့်မြတ်ပြီး ထူးခြားလာခဲ့သည်။

သူ၏ လှုပ်ရှားမှုတိုင်းက ရင်တလှပ်လှပ်ဖြစ်စေလောက်သည့် မဟာတာအို၏ဖိအားကို ထုတ်လွှတ်ထားသည်။ သို့သော် ထိုသို့ဖြစ်နေသည့်တိုင် သူ ပေးစွမ်းသော အထင်အမြင်မှာ ယဉ်ကျေးသိမ်မွေ့သော လူကြီးလူကောင်းတစ်ယောက်၏ အသွင်အပြင်သာ ဖြစ်နေဆဲပင်။

"နတ်ဘုရားသားတော် ခုံးဝူတောက်... သူက ပြန်နိုးထလာတာ မကြာသေးဘူး... ဒါပေမယ့် သူက ဒီလို ကြောက်စရာကောင်းတဲ့ ရုပ်ခန္ဓာကိုယ်ကို ထပ်ပြီးနိုးထစေခဲ့ပြီ..."

အကြီးအကဲတစ်စုက ရှေ့သို့ ထွက်လာပြီး အပြုံးနှင့် ပြောဆိုလိုက်၏။

"ဒီကိစ္စက ငါတို့အတွက် တကယ်ကို မျက်စိပွင့်သွားစေတာပဲ..."

"ခုံးဝူတောက်... အခု မင်းက မူလရုပ်ခန္ဓာကိုယ် နှစ်ခုကို နိုးထစေခဲ့ရုံသာမကဘဲ ဟင်းလင်းပြင်နတ်ဘုရားနယ်ပယ်ကိုပါ ချိုးဖျက်ဝင်ရောက်နိုင်ခဲ့ပြီဆိုတော့ မင်းမှာ ကျင့်ကြံခြင်း အရင်းအမြစ်တွေ ပိုလိုလာမှာ သေချာတယ်..."

ခုံးဝူကျီက အပြုံးနှင့် ပြောဆိုသည်။

"ဒီကျင့်ကြံခြင်း အရင်းအမြစ်တွေကို လက်ခံလိုက်ပါ..."

ခုံးဝူတောက်ကို ငြင်းဆန်ခွင့် မပေးဘဲ ခုံးဝူကျီသည် သူ၏သိုလှောင်လက်စွပ်အတွင်းမှ တာအိုပိုးအိတ်အနည်းငယ်ကို ထုတ်ယူကာ ခုံးဝူတောက်၏လက်ထဲသို့ ထည့်ပေးလိုက်သည်။

တာအိုပိုးအိတ်များမှ ထွက်ပေါ်လာသော နတ်ဘုရားပစ္စည်းများ၏ အရှိန်အဝါကို အာရုံခံမိပြီး ခုံးဝူတောက်က ညင်သာစွာ ရယ်မောလိုက်ကာ ခေါင်းခါယမ်းလိုက်၏။

သူ နိုးထလာခါစက သူ၏ဖခင်က သူ့ကို ကျင့်ကြံခြင်းအရင်းအမြစ်များစွာ ပေးခဲ့ပြီးဖြစ်သည်။

နောက်ပိုင်းတွင် စနစ်က သူ့ကို များစွာပေးခဲ့သည်ကိုမူ ထည့်ပြောနေရန်ပင် မလိုတော့ပေ။ ထိုအရာများအားလုံးကို သူ အသုံးမပြုနိုင်ပေ။

သို့သော် သူ့ဖခင်၏ အလျှော့မပေးသော သဘောထားကို မြင်သောအခါ ခုံးဝူတောက်သည် မတတ်သာဘဲ ထိုအရာများကို လက်ခံလိုက်ရသည်။

"ခုံးဝူတောက်... အခု မင်းက အပြည့်အဝ ပေါ်ထွက်လာပြီဆိုတော့ အနာဂတ်မှာ ကောင်းကင်ဘုံတွေနှင့်အင်္သချေနယ်ပယ်တွေကို သေချာပေါက် ခရီးသွားရလိမ့်မယ်..."

ဤအချိန်အခိုက်အတန့်တွင် ဘိုးဘေးဆယ့်ကိုးက ရုတ်တရက် ပြောဆိုသည်။

"ငါတို့ ဆွေးနွေးပြီးတဲ့နောက်မှာ... မင်း ပေါ်ထွက်လာတဲ့အကြောင်းကို ကောင်းကင်ဘုံတွေနှင့်အင်္သချေနယ်ပယ်တွေဆီ ထုတ်ပြန်ကြေညာဖို့အတွက် ဒီနေ့ အခွင့်အရေးကို ယူဖို့ စီစဉ်ထားတယ်... မင်း ဘယ်လိုထင်လဲ..."

ထိုစကားကို ကြားသောအခါ ခုံးဝူတောက် ခဏတာမှင်သက်သွားသော်လည်း ရှေးဟောင်းဘိုးဘေးကြီးများ မည်သည့်အရာ တွေးတောနေသည်ကို သူ သိထားသည်။

"ဒီကိစ္စက ရှေးဟောင်းဘိုးဘေးကြီးတွေရဲ့ ဆုံးဖြတ်ချက်အပေါ်မှာပဲ လုံးဝ မူတည်ပါတယ်..."

မည်သို့ပင်ဆိုစေကာမူ ကောင်းကင်ဘုံများနှင့်အင်္သချေနယ်ပယ်များသို့ ထုတ်ပြန်ကြေညာခြင်းက အနာဂတ်တွင် လောကတခွင် ခရီးသွားသည့်အချိန်များ၌ ပြဿနာများကို အတိုင်းအတာတစ်ခုအထိ သက်သာစေပေလိမ့်မည်။

အလွန်အမင်း ပြိုင်ဘက်ကင်းနေခြင်းက သူ့ကို ငြီးငွေ့စေသော်လည်း ပုရွက်ဆိတ်တိုင်းက သူ့ကို ပြဿနာလာရှာရဲလျှင် ထိုအရာက အနှောင့်အယှက် ဖြစ်စေပေလိမ့်မည်။

သူတို့၏ အချိန်လေဟာနယ် တားမြစ်နယ်မြေက ယနေ့ ကောင်းကင်ဘုံများနှင့်အင်္သချေနယ်ပယ်များသို့ ကြေညာခြင်းသည် အမြင်ကျဉ်းမြောင်းသော ပုရွက်ဆိတ်အမြောက်အများကို ကြီးမားသော အတိုင်းအတာအထိ ဟန့်တားနိုင်ပေလိမ့်မည်။

ရှေးဟောင်းဘိုးဘေးကြီးသုံးပါးသည် အချင်းချင်း အကြည့်ချင်း ဖလှယ်လိုက်ကြပြီး အခမ်းအနားကို စတင်ရန် ပြင်ဆင်လိုက်ကြ၏။

"ကောင်းပြီ... ဒီလိုဆိုမှတော့ ရှေးဟောင်းဘိုးဘေးကြီးတွေနဲ့ ရှေးဦးဘိုးဘေးကြီးတွေရဲ့ အမိန့်အရ... ငါတို့ အချိန်လေဟာနယ် တားမြစ်နယ်မြေရဲ့ နာမည်နဲ့ ကောင်းကင်ဘုံတွေနှင့်အင်္သချေနယ်မြေတွေဆီ ကြေညာမယ်..."

"ငါတို့ရဲ့ အချိန်လေဟာနယ် တားမြစ်နယ်မြေ နတ်ဘုရားသားတော်... ပေါ်ထွက်လာပြီ..."

ဘိုးဘေးဆယ့်ခုနစ်၏ စကားသံ အဆုံးသတ်သွားသည်နှင့်အမျှ အချိန်လေဟာနယ် တားမြစ်နယ်မြေ၏ ရာထူးမြင့်အကြီးအကဲများစွာကလည်း တညီတညွတ်တည်း သဘောတူလိုက်ကြသည်။

"အမှန်ပဲ... ခုံးဝူတောက်က အစကတည်းက ငါတို့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော်ပဲ... အခု သူက အိပ်မောကျရာကနေ နိုးထလာပြီဆိုတော့ ကောင်းကင်ဘုံတွေနဲ့အင်္သချေနယ်ပယ်တွေအားလုံးက ငါတို့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော်ရဲ့နာမည်ကို သိသင့်တယ်..."

"ငါတို့က ကောင်းကင်ဘုံတွေနှင့်အင်္သချေနယ်ပယ်တွေက နှစ်ပေါင်းများစွာကြာအောင် တိတ်ဆိတ်နေခဲ့တယ်... မရေမတွက်နိုင်တဲ့ လူတွေက ငါတို့ တားမြစ်နယ်မြေရဲ့ ဂုဏ်ကျက်သရေကို မေ့သွားကြပြီ... ဒီခေတ်မှာ နတ်ဘုရားသားတော် ပေါ်ထွက်လာတာနဲ့အတူ ဒီလောကကြီးရဲ့ လေနဲ့ တိမ်တွေကို လှုပ်ခတ်ဖို့ အချိန်တန်ပြီ..."

"..."

မည်သို့ပင်ဆိုစေကာမူ ယနေ့ ဖြစ်ပျက်ခဲ့သည့်အရာများက အလွန်မယုံနိုင်စရာ ကောင်းပြီး အာရုံစိုက်မှု အလွန်ရရှိသွားခဲ့သည်။ ကောင်းကင်ဘုံများနှင့်အင်္သချေနယ်မြေများသည် ကျယ်ဝန်းပြီး အဆုံးအစမရှိကာ အိပ်မောကျနေသော မွန်းစတားအိုကြီးများ မရေမတွက်နိုင်အောင် ရှိနေသည်။ ယနေ့ အချိန်လေဟာနယ် တားမြစ်နယ်မြေတွင် ဖြစ်ပျက်ခဲ့သည်များကို သိရှိရန် နည်းလမ်းများ သူတို့ထံတွင် သဘာဝကျကျ ရှိနေကြသည်။

ဤကိစ္စကို တမင်သက်သက် ဖုံးကွယ်ထားခြင်းက ထိုမွန်းစတားအိုကြီးများကို အခွင့်အရေး ယူစေပြီး အနာဂတ်တွင် ခုံးဝူတောက်အတွက် မလိုလားအပ်သော ပြဿနာများကို ဖြစ်ပေါ်စေရုံသာ ရှိပေမည်။

ထိုသို့ဆိုလျှင် ခုံးဝူတောက်၏အထောက်အထားကို ပွင့်ပွင့်လင်းလင်း အသိအမှတ်ပြုပြီး ဤအခွင့်အရေးကို ယူကာ ကောင်းကင်ဘုံများအားလုံးဆီ ကြေညာပြီး နယ်မြေများအားလုံးကို အံ့အားသင့်သွားအောင် လုပ်လိုက်ခြင်းက ပိုကောင်းပေမည်။

ဤသည်က သူတို့ အချိန်လေဟာနယ် တားမြစ်နယ်မြေ၏ ခုံးဝူတောက်အတွက် သီးသန့်ဂုဏ်သိက္ခာဖြစ်ပြီး သူ အနာဂတ် ကောင်းကင်ဘုံများတခွင် ခရီးသွားခြင်းအတွက် အာမခံချက် တစ်ခုလည်းဖြစ်သည်။

..........

ဘိုးဘေးဆယ့်ခုနစ်က ဦးဆောင်ကာ သူ၏လက်ကို ဝှေ့ယမ်းပြီး အေးစက်တင်းမာစွာ အော်ဟစ်လိုက်သည်။

"အချိန်လေဟာနယ် အမိန့်တော်ကို ထုတ်ပြန်လိုက်... ကောင်းကင်ဘုံတွေနှင့်အင်္သချေနယ်မြေတွေဆီ ထုတ်ပြန်ကြေညာလိုက်စမ်း..."

ဝုန်း...

ရုတ်တရက် သလင်းကျောက်ကဲ့သို့ ကြည်လင်ပြီး တောက်ပသော ဥပဒေသအလင်းမှုန်များသည် ဟင်းလင်းပြင်မှ ထွက်ပေါ်လာပြီး မိုးကောင်းကင်ယံသို့ ထိုးတက်သွားသော ကြယ်စင်မြစ်တစ်ခုအလား မရေမတွက်နိုင်သော ဖရိုဖရဲ အလင်းတန်းများကို ရောင်ပြန်ဟပ်နေသည်။

အချိန်လေဟာနယ် တားမြစ်နယ်မြေ တစ်ခုလုံးသည် တညီတညွတ်တည်း တုန်ခါသွားပြီး အဆုံးမဲ့ အချိန်လေဟာနယ် နတ်ဘုရားအလင်းတန်းများကို ထုတ်လွှတ်လိုက်၏။

ဘိုးဘေးနယ်မြေ အနက်ရှိုင်းဆုံးနေရာတွင် ဖြည်းညှင်းစွာ နိုးထလာသော ရှေးဟောင်းနတ်ဘုရားဆန်မှု အရိပ်အယောင်များပင် ရှိနေသည်။

ဝုန်း... ဝုန်း... ဝုန်း...

အချိန်လေဟာနယ် မှော်စာလုံးများဖြင့် ဖွဲ့စည်းထားသော မရေမတွက်နိုင်သည့် တာအိုအလင်းတိုင်များသည် မိုးကောင်းကင်ယံသို့ မြင့်တက်သွားပြီး မိုးကောင်းကင်ယံ၏ အနက်ရှိုင်းဆုံးနေရာသို့ ထွင်းဖောက်သွားသည်။

ဤသည်က သန်းရာနှင့်ချီသောကြယ်များကို တည်ငြိမ်သွားစေပြီး တောက်ပလာစေကာ အတိုင်းအတာမရှိသော အလင်းတန်းများကို ထုတ်လွှတ်လိုက်သည်။

အချိန်တခဏအတွင်းမှာပင် အချိန်လေဟာနယ် တားမြစ်နယ်မြေ တည်ရှိရာ အမှောင် ကြယ်တာရာနယ်မြေသည် အဆက်မပြတ် ဆူပွက်နေပြီး အလင်းမိုးစက်များ မရေမတွက်နိုင်အောင် ရွာကျလာကာ မယုံနိုင်လောက်အောင် တောက်ပနေသည်။

ထိုကဲ့သို့ ရုတ်တရက်ဖြစ်ပေါ်လာပြီး တောက်ပသော ထူးခြားသည့် သဘာဝလွန်ဖြစ်စဉ်သည် မရေမတွက်နိုင်သော ကျင့်ကြံသူများ၏အာရုံစိုက်မှုကို နောက်တစ်ကြိမ် ဆွဲဆောင်နိုင်ခဲ့သည်။

"ဒါက... အချိန်လေဟာနယ် တားမြစ်နယ်မြေ ရှိတဲ့ဘက်ကလား..."

"ဘာလို့ အချိန်လေဟာနယ် တားမြစ်နယ်မြေက ဒီလို ကြောက်စရာကောင်းတဲ့ ချီ စွမ်းအင်တွေ ထပ်ပြီးပေါက်ကွဲထွက်လာတာလဲ... တခြား မဟာတာအိုရဲ့ ထူးခြားတဲ့ သဘာဝလွန်ဖြစ်စဉ်တစ်ခု ထပ်ပြီး သရုပ်ထင်ဟပ်လာပြန်တာလား..."

"..."

ကောင်းကင်ဘုံများနှင့်အင်္သချေနယ်မြေများမှ မရေမတွက်နိုင်သော ကျွမ်းကျင်သူများက တက်ကြွစွာ ဆွေးနွေးနေကြသည်။

အချိန်လေဟာနယ် တားမြစ်နယ်မြေ၏ ဆက်တိုက်ဖြစ်ပေါ်နေသော ထူးခြားသည့် သဘာဝလွန်ဖြစ်စဉ်များအပြီးတွင် သူတို့၏ အာရုံကြောများ အနည်းငယ် တင်းမာလာခဲ့ကြ၏။

မည်သို့ပင်ဆိုစေကာမူ ယခင်မဟာတာအို၏ ထူးခြားသည့် သဘာဝလွန်ဖြစ်စဉ်များသည် အမှန်တကယ်ကို အလွန်မယုံနိုင်စရာကောင်းပြီး အလွန်ကြီးကျယ်ခမ်းနားလှသည်။ ယခု အချိန်လေဟာနယ် တားမြစ်နယ်မြေတွင် အနည်းငယ်မျှသော လှုပ်ရှားမှုကပင် မရေမတွက်နိုင်သော မဟာတာအို ကျွမ်းကျင်သူများ၏ အာရုံစိုက်မှုကို ဆွဲဆောင်နိုင်ပေလိမ့်မည်။

"အမ်... တစ်ခုခုတော့ မှားနေပြီ... ဒါက မဟာတာအိုရဲ့ ထူးခြားတဲ့ သဘာဝလွန်ဖြစ်စဉ်နဲ့ မတူဘူး... ဒါ... ဒါက အချိန်လေဟာနယ် တားမြစ်နယ်မြေရဲ့ အချိန်လေဟာနယ်အမိန့်တော်ပဲ..."

ရုတ်တရက် သဲလွန်စကို မြင်တွေ့လိုက်ရသော မဟာတာအို ကျွမ်းကျင်သူတစ်ဦးက အံ့အားသင့်တုန်လှုပ်စွာဖြင့် ရေရွတ်လိုက်သည်။

ထိုအချိန်မှာပင် အချိန်လေဟာနယ် တားမြစ်နယ်မြေတည်ရှိရာ ကြယ်တာရာနယ်မြေသည် တောက်ပစွာ လင်းလက်လာပြီး ရှေးဟောင်း စွမ်းအားတစ်ခုက ဖြည်းညှင်းစွာ နိုးထလာသည့်အလားပင်။

မရေမတွက်နိုင်သော အံ့အားသင့်မှင်သက်နေသည့် မျက်လုံးများ၏ စောင့်ကြည့်မှုအောက်တွင် ကြယ်တာရာနယ်မြေ ဟင်းလင်းပြင်သည် မှန်တစ်ချပ်ကဲ့သို့ ကွဲအက်သွားသည်။

ခမ်းနားထည်ဝါသော အချိန်လေဟာနယ် စွမ်းအားများဖြင့် ပြည့်နှက်နေသည့် အချိန်လေဟာနယ် အမိန့်တော်တစ်ခုသည် အက်ကွဲကြောင်းထဲမှ ရုတ်တရက် ပျံသန်းထွက်လာသည်။

ထို့နောက် အဆုံးမဲ့ မဟာတာအို နတ်ဘုရားအလင်းတန်းများသည် လှိုင်းထကာ တဝုန်းဝုန်းထလာပြီး ခမ်းနားထည်ဝါသော ပုံရိပ်တစ်ခုအဖြစ် သရုပ်ထင်ဟပ်လာသကဲ့သို့ ရှိနေသည်။

ထိုပုံရိပ်၏ကောက်ကြောင်းသည် ဝေဝါးနေပြီး အစွမ်းထက်သော မွန်စတားကြီးတစ်ကောင်သည် အချိန်မြစ်ကြောင်းရှည်ကြီးအထက်တွင် ရပ်ကာ သက်ရှိအားလုံးကို နှိမ့်ချကြည့်ရှုပြီး ကောင်းကင်ဘုံများနှင့်အင်္သချေနယ်မြေများကို လွှမ်းမိုးထားသည့်အလားပင်။

အလွန်အမင်းကြီးမားသော ဖိအားများကြောင့် မရေမတွက်နိုင်သော ကြယ်များ တုန်ယင်သွားပြီး မဟာဧကရာဇ် ကျွမ်းကျင်သူများပင်လျှင် ထိုတည်ရှိမှုအောက်တွင် ထိုအရာ၏အရှိန်အဝါကို ရှောင်ရှားရုံသာ တတ်နိုင်သည်။

လောကကြီးကို တုန်ခါစေသော မိုးကြိုးကဲ့သို့ နက်ရှိုင်းပြီး အတိုင်းအတာမရှိသော အသံတစ်ခုက ကောင်းကင်ဘုံများနှင့်အင်္သချေနယ်မြေများတွင် ပဲ့တင်ထပ်သွားပေ၏။

"ဒီနေ့... ငါတို့ရဲ့ အချိန်လေဟာနယ် တားမြစ်နယ်မြေက ကောင်းကင်ဘုံတွေနဲ့အင်္သချေနယ်မြေတွေဆီကို ထုတ်ပြန်ကြေညာလိုက်တယ်..."

"ငါတို့ အချိန်လေဟာနယ် တားမြစ်နယ်မြေရဲ့ နတ်ဘုရားသားတော် ခုံးဝူတောက်က လောကကြီးဆီ ပြန်လည်ရောက်ရှိလာပြီ... အနာဂတ်မှာ သူက ကောင်းကင်ဘုံတွေနှင့်အင်္သချေနယ်မြေတွေမှာ တရားဝင် ခရီးသွားမယ်... ဧကရာဇ်လမ်းစဉ်ကို နင်းလျှောက်မယ်... ထာဝရ အတိတ်ကို ဖိနှိပ်ပြီး ဒီခေတ်ရဲ့ ပြိုင်ဘက်ကင်းတဲ့ ကံကြမ္မာကို ရယူလိမ့်မယ်..."

"တကယ်လို့ ငါတို့ တားမြစ်နယ်မြေရဲ့ နတ်ဘုရားသားတော်က ကောင်းကင်ဘုံတွေနဲ့ အင်္သချေနယ်မြေတွေမှာ ခရီးသွားတဲ့အချိန်ကျရင်... တစ်ယောက်ယောက်က ညစ်ပတ်တဲ့ လက်တွေနဲ့ အရှက်မရှိတဲ့ လုပ်ရပ်တွေ လှုပ်ရှားတာနဲ့..."

"ငါတို့ အချိန်လေဟာနယ် တားမြစ်နယ်မြေက အဲ့ဒီလူကို သေချာပေါက် သုတ်သင်ပစ်မယ်..."

လှိုင်းထနေသော အစွမ်းထက်သည့် အသံသည် အရပ်မျက်နှာအားလုံးသို့ မိုင်ပေါင်းသောင်းချီ၍ ပျံ့နှံ့သွားပြီး ကောင်းကင်ဘုံများနှင့်အင်္သချေနယ်မြေများအားလုံးသို့ ပျံ့နှံ့သွားသည့်အလားပင်။

နတ်ဘုရားအသံလှိုင်း ဖြတ်သန်းသွားသော နေရာတိုင်းတွင် ကြားရသူတိုင်းသည် သူတို့၏ နတ်ဘုရားစိတ်ဝိညာဉ်များ တုန်ယင်သွားသည်ကို ခံစားလိုက်ရပြီး သူတို့အားလုံး ထိတ်လန့်သွားကြ၏။ သူတို့၏မျက်လုံးသူငယ်အိမ်များသည် မြေငလျင်တစ်ခုကဲ့သို့ တုန်လှုပ်သွားပြီး ရွှံ့ရုပ်တုများကဲ့သို့ နေရာတွင်ပင် တွေဝေမိန်းမောသွားကြသည်။

ခုံးဝူတောက်ကို မသိသော ကျင့်ကြံသူအများအပြားသည် သူတို့၏ မျက်လုံးများတွင် သံသယများအပြည့်ဖြင့် တစ်ယောက်ကိုတစ်ယောက် စိုက်ကြည့်နေသည်။

အချိန်လေဟာနယ် တားမြစ်နယ်မြေ နတ်ဘုရားသားတော်... ခုံးဝူတောက်...

သူသည် မည်သူဖြစ်သနည်း....

သူသည် အချိန်အတော်ကြာ တိတ်ဆိတ်နေခဲ့သော အချိန်လေဟာနယ် တားမြစ်နယ်မြေကို ကောင်းကင်ဘုံများနှင့်အင်္သချေနယ်မြေများဆီသို့ သူ၏ပေါ်ထွက်လာမှုကို ထုတ်ပြန်ကြေညာအောင် အမှန်တကယ် လုပ်နိုင်ခဲ့သလော။

ထို့ပြင် အချိန်လေဟာနယ် တားမြစ်နယ်မြေတွင် နတ်ဘုရားသားတော်တစ်ပါး မည်သည့်အချိန်က ရှိသွားသနည်း။ ဧကရာဇ်သားတော်အစဉ်အဆက် ကိုးဦးသာ ရှိသည် မဟုတ်လော။

...

အခန်း (၃၄) ကောင်းကင်ဘုံတွေအားလုံးမှာ မိုးကြိုးတွေ ဟိန်းဟောက်နေပြီး ကံကြမ္မာပိုင်ရှင် အသစ် ရောက်ရှိလာပြီ

သို့သော် ဤ ခမ်းနားထည်ဝါသော ပုံရိပ် ဆင်းသက်လာပြီးသည်နှင့် တပြိုင်နက်...

အချိန်လေဟာနယ် တားမြစ်နယ်မြေ တည်ရှိသော ကျယ်ဝန်းသော ကြယ်တာရာနယ်မြေသည် အဆုံးမဲ့ တောက်ပမှုများဖြင့် ရုတ်တရက် ပေါက်ကွဲထွက်လာသည်။

ရှေးဟောင်းတာအို ကျွမ်းကျင်သူများစွာ ဆက်တိုက်ပေါ်ထွက်လာပြီး အချိန်လေဟာနယ် တားမြစ်နယ်မြေ ရှိရာဘက်သို့ သူတို့၏လက်နှစ်ဖက်ကို ပူးဆုပ်ကာ အရိုအသေပေးလိုက်ကြသည်။

"ရွှမ်ထျန်အင်မော်တယ်လှိုဏ်ဂူက တားမြစ်နယ်မြေ နတ်ဘုရားသားတော် ခုံးဝူတောက် လောကကြီးဆီ ပြန်လည်ရောက်ရှိလာတဲ့အတွက် ဂုဏ်ပြုပါတယ်... တားမြစ်နယ်မြေ နတ်ဘုရားသားတော်က ပြိုင်ဘက်ကင်းပြီး ဒီခေတ်ကို သေချာပေါက် ကြီးစိုးနိုင်လိမ့်မယ်..."

"ရှေးဟောင်းအကျဉ်းထောင်ဂိုဏ်းက တားမြစ်နယ်မြေ နတ်ဘုရားသားတော် ခုံးဝူတောက် လောကကြီးဆီ ပြန်လည်ရောက်ရှိလာတဲ့အတွက် ဂုဏ်ပြုပါတယ်... တားမြစ်နယ်မြေ နတ်ဘုရားသားတော်က အနှိုင်းမဲ့ဖြစ်ပြီးတော့ မျိုးဆက်တစ်သောင်းတိုင်အောင် မသေနိုင်တဲ့သူ ဖြစ်လိမ့်မယ်..."

"စိတ်ကူးယဉ်အိပ်မက်ကျွန်းက တားမြစ်နယ်မြေ နတ်ဘုရားသားတော် ခုံးဝူတောက် လောကကြီးဆီ ပြန်လည်ရောက်ရှိလာတဲ့အတွက် ဂုဏ်ပြုပါတယ်... တားမြစ်နယ်မြေ နတ်ဘုရားသားတော် က ပြိုင်ဘက်ကင်းပြီး အထွတ်အထိပ် မဟာဧကရာဇ်အဖြစ်ကို သေချာပေါက် ရောက်ရှိပါလိမ့်မယ်..."

"..."

အချိန်တခဏအတွင်းမှာပင် မရေမတွက်နိုင်သော ကျွမ်းကျင်သူများ ဆက်တိုက်ပေါ်ထွက်လာသည်။ တောက်ပသော အလင်းတန်းများက ကျယ်ဝန်းသော ကြယ်တာရာကောင်းကင်ယံကို လင်းထိန်သွားစေသည်။ သူတို့အားလုံးသည် တညီတညွတ်တည်း လှုပ်ရှားလိုက်ကြပြီး အချိန်လေဟာနယ် တားမြစ်နယ်မြေ ရှိရာဘက်သို့ သူတို့၏လက်နှစ်ဖက်ကို ပူးဆုပ်ကာ အရိုအသေပေးလိုက်ကြ၏။ သူတို့အားလုံးသည် အချိန်လေဟာနယ် တားမြစ်နယ်မြေ၏ လက်အောက်ခံ အင်အားစုများပင်။

ဤအချိန်အခိုက်အတန့်တွင် ဤအင်အားစုများ၏သခင်များအားလုံး သရုပ်ထင်ဟပ်လာပြီး ရိုးသားသော ကောင်းချီးမင်္ဂလာများကို ပေးအပ်ခဲ့ကြသည်။

သူတို့၏ရှေ့ရှိ မြင်ကွင်းများသည် အမှန်တကယ်ကို ကြီးကျယ်ခမ်းနားလွန်းလှသည်။ ကျယ်ဝန်းသော ကြယ်တာရာ ကောင်းကင်ယံအထက်တွင် မရေမတွက်နိုင်သော အစွမ်းထက်သည့် ပုံရိပ်များ သရုပ်ထင်ဟပ်လာပြီး သူတို့၏ အော်ဟစ်သံများက ကောင်းကင်ယံကို တုန်ခါသွားစေသည်။ သူတို့အားလုံးသည် အချိန်လေဟာနယ် တားမြစ်နယ်မြေ ရှိရာဘက်သို့ သူတို့၏လက်နှစ်ဖက်ကို ပူးဆုပ်ကာ အရိုအသေပေးနေကြသည်။ ထိုသို့သော ခမ်းနားသည့် ပြသမှုမျိုးသည် သမိုင်းတလျှောက်လုံးတွင် အမှန်တကယ်ကို ရှားပါးလှသည်။

"အချိန်လေဟာနယ် တားမြစ်နယ်မြေ နတ်ဘုရားသားတော်... ခုံးဝူတောက်... သူက ပျက်စီးခြင်းခေတ်တုန်းက ချိပ်ပိတ်ခံထားရတဲ့ ပါရမီရှင် တစ်ယောက်လို့ ကောလာဟလ ရှိတယ်..."

ရှေးဟောင်း ကျွမ်းကျင်သူတစ်ဦးက ခုံးဝူတောက်၏အထောက်အထားကို ခန့်မှန်းမိပြီးသားဖြစ်ပြီး သူ၏စိတ်နှလုံးသားထဲတွင် အလွန်အမင်း အံ့အားသင့်တုန်လှုပ်သွားသည်။

"သူက သမိုင်းမှတ်တမ်းတွေမှာ ဖော်ပြထားတဲ့ တားမြစ်နယ်မြေရဲ့ မိစ္ဆာနတ်ဘုရားသားတော်များ ဖြစ်နေမလား..."

"စောစောက အချိန်လေဟာနယ် တားမြစ်နယ်မြေကနေ ပေါက်ကွဲထွက်လာတဲ့ ကြောက်စရာကောင်းတဲ့ ထူးခြားတဲ့ သဘာဝလွန်ဖြစ်စဉ်တွေအားလုံးက ခုံးဝူတောက်ကြောင့်များလား..."

"ပြီးတော့ သူကရုပ်ခန္ဓာကိုယ် တားမြစ်နယ်ပယ်ထဲကိုတောင် အောင်မြင်စွာ ဝင်ရောက်နိုင်ခဲ့တာလား..."

ခုံးဝူတောက်အကြောင်းမသိသော ကျွမ်းကျင်သူတစ်ဦးက ချက်ချင်းအမိန့်ပေးလိုက်သည်။

"စုံစမ်းစစ်ဆေးစမ်း... ဒီအချိန်လေဟာနယ် တားမြစ်နယ်မြေ နတ်ဘုရားသားတော် အကြောင်း အချက်အလက်တွေကို ဘယ်လို တန်ကြေးမျိုး ပေးရပါစေ စုဆောင်းကြစမ်း..."

"မှတ်ထား... ဒါကို လျှို့ဝှက်ပြီး လုပ်ဆောင်ရမယ်... အချိန်လေဟာနယ် တားမြစ်နယ်မြေက သတိမထားမိအောင် သေချာလုပ်ကြစမ်း..."

"..."

မည်သို့ပင်ဆိုစေကာမူ အချိန်လေဟာနယ် တားမြစ်နယ်မြေသည် ကောင်းကင်ဘုံများနှင့်အင်္သချေနယ်မြေများ၏ တားမြစ်နယ်မြေတစ်ခုဖြစ်ရာ တစ်ဖက်လူကို ပွင့်ပွင့်လင်းလင်း စော်ကားရန် သူတို့ မလုပ်ရဲကြပေ။ ခုံးဝူတောက်အကြောင်း စုံစမ်းစစ်ဆေးသည့်အချိန်၌ပင် အချိန်လေဟာနယ် တားမြစ်နယ်မြေမှ မကျေမနပ်ဖြစ်စေမည်ကို ကြောက်ရွံ့သဖြင့် လျှို့ဝှက်စွာသာ လုပ်ဆောင်ရဲကြသည်။

သို့သော် အချိန်လေဟာနယ် တားမြစ်နယ်မြေ၏ ရာထူးမြင့်အကြီးအကဲများသည် ကောင်းကင်ဘုံများနှင့်အင်္သချေနယ်မြေများရှိ မရေမတွက်နိုင်သော ကျွမ်းကျင်သူများ၏ တုံ့ပြန်မှုများကို လုံးဝဂရုမစိုက်ခဲ့ကြပေ။ သူတို့ အချိန်လေဟာနယ် တားမြစ်နယ်မြေ၏ တားမြစ်နယ်မြေ နတ်ဘုရားသားတော်ဖြစ်သော ခုံးဝူတောက် ပေါ်ထွက်လာပြီဖြစ်ကြောင်းကို လူတိုင်းကို သိစေချင်ရုံသာ ဖြစ်ပေ၏။

အချိန်လေဟာနယ် တားမြစ်နယ်မြေ၏ တားမြစ်နယ်မြေ နတ်ဘုရားသားတော် တစ်ပါးအနေဖြင့် သူသည် သူ့ကိုယ်သူ ဖုံးကွယ်ထားရန် လုံးဝမလိုအပ်သည့်အပြင် ထိုသို့ပြုလုပ်ရန်လည်း အကြောင်းပြချက် မရှိပေ။ ခုံးဝူတောက်သည် အထွတ်အထိပ်တွင် ရပ်တည်ရန်နှင့် ကောင်းကင်ဘုံများအားလုံး၏ လေးစားအားကျခြင်းကို ခံရရန် မွေးဖွားလာခြင်းပင်။

ထို့အပြင် သူတို့၏ အချိန်လေဟာနယ် တားမြစ်နယ်မြေသည် သူတို့၏နတ်ဘုရားသားတော် အတွက် သူ၏ဆန္ဒအားလုံးကို ဖြည့်ဆည်းပေးနိုင်မည့် အထူးအခွင့်အရေးများ ဖန်တီးပေးရန် စွမ်းရည်နှင့်ယုံကြည်မှု ရှိနေသည်။ ဤခေတ်ကာလကို ကြီးစိုးရန်မှာ အချိန်လေဟာနယ်တားမြစ်နယ်မြေထက် ခုံးဝူတောက်နှင့် ပို၍သက်ဆိုင်သည်။

...

မြောက်ဘက်ရွှမ်တာအိုနယ်မြေနှင့်ဖရိုဖရဲ မြင့်မြတ်နယ်မြေ၏နယ်နိမိတ်၌...

သူ၏မျက်နှာအများစုကို ဖုံးကွယ်ထားသည့် ဝတ်ရုံနက်ကို ဝတ်ဆင်ထားသော ယဲ့ချန်သည် လက်သီးများကို ဆုပ်ထားကာ အချိန်လေဟာနယ် တားမြစ်နယ်မြေ ရှိရာဘက်သို့ မုန်းတီးမှု အပြည့်ရှိသော မျက်နှာဖြင့် ကြည့်နေသည်။

"အချိန်လေဟာနယ် တားမြစ်နယ်မြေ... ခုံးဝူတောက်..."

ထိုကောင်စုတ်သည် သူ၏ချစ်သူကို သတ်ခဲ့ကာ သူ၏ ဆရာသခင်ကို ဖိနှိပ်ခဲ့ပြီး သူ့ထံမှ အရာအားလုံးကို လုယူသွားခဲ့သည်။ ယခုချိန်၌ သူသည် ရွှံ့နွံထဲတွင် ကြေမွှနေလေပြီ။ သို့သော် ထို ကျိန်ဆဲခံသင့်သောကောင်က ကောင်းကင်ဘုံများအားလုံး၏ဂုဏ်ပြုမှုကို ခံစားနေသည်။ ဤသည်က ခုံးဝူတောက်အပေါ် သူ၏သတ်ဖြတ်လိုစိတ်ကို ပို၍ပင်ပြင်းထန်လာစေပြီး အပိုင်းပိုင်းဆုတ်ဖြဲပစ်ချင်စိတ် ပေါက်လာစေသည်။

သူ၏စိတ်နှလုံးသားထဲရှိ သတ်ဖြတ်လိုစိတ်ကို ဖိနှိပ်လိုက်ပြီးနောက် ယဲ့ချန်၏အကြည့်က မိုးကုတ်စက်ဝိုင်း၏အဆုံးဆီသို့ နောက်တစ်ကြိမ် ကျရောက်သွားသည်။

အလွန်အမင်း တောက်ပနေသော မြင့်မြတ်နယ်မြေတစ်ခုသည် ကောင်းကင်ယံ၏အစွန်းတွင် တည်ရှိနေသည်။ ထိုအရာသည် မြောက်ဘက်ရွှမ်တာအိုနယ်မြေမှ ထိပ်သီးမြင့်မြတ်နယ်မြေဖြစ်သော ဖရိုဖရဲမြင့်မြတ်နယ်မြေပင်။

ဒဏ္ဍာရီများအရ ဤဖရိုဖရဲ မြင့်မြတ်နယ်မြေ ကို ထိုအချိန်က တည်ထောင်ခဲ့သော ကျွမ်းကျင်သူသည် သာမန်လောကတွင် တွေ့ရခဲသော အထွတ်အထိပ် ဖရိုဖရဲရုပ်ခန္ဓာကိုယ်ပိုင်ရှင်ဖြစ်သည်ဟု ဆိုကြ၏။ လွန်ခဲ့သော အချိန်အတော်ကြာကတည်းက သူသည် မဟာဧကရာဇ်တစ်ပါး၏ ကန့်သတ်ချက်များကို ဖောက်ထွင်းမြင်နိုင်ခဲ့လေပြီ။ ထို့ပြင် သူ၏ သွေးသောက်ညီအစ်ကို ယွင်ရှောင်သည် လက်ရှိ ဖရိုဖရဲ မြင့်မြတ်နယ်မြေ၏ အကျော်ကြားဆုံးဖရိုဖရဲသူတော်စင်ပင်။

"ညီအစ်ကိုယွင်ရှောင်ရဲ့ အကူအညီသာ ရမယ်ဆိုရင်... ငါ သေချာပေါက် ပြန်ပြီးမြင့်တက်လာနိုင်မှာပါ..."

"ခုံးဝူတောက်... မင်းရဲ့ လည်ပင်းကိုဆေးပြီး စောင့်နေလိုက်စမ်း..."

..........

တခြားတစ်ဖက်တွင်....

အချိန်လေဟာနယ် တားမြစ်နယ်မြေက ကောင်းကင်ဘုံများနှင့်အင်္သချေနယ်မြေများသို့ ထုတ်ပြန်ကြေညာလိုက်သည်နှင့်အတူ မရေမတွက်နိုင်သော ရှေးဟောင်းကျွမ်းကျင်သူများနှင့် လက်ရှိခေတ် အထွတ်အထိပ် ပါရမီရှင်များ အားလုံး ခုံးဝူတောက်ဆိုသည့် နာမည်ကို သိရှိလာကြသည်။ အချိန်တခဏအတွင်းမှာပင် ခုံးဝူတောက်၏ဂုဏ်သတင်းသည် ကောင်းကင်ဘုံများအားလုံးတွင် အထွတ်အထိပ်သို့ ရောက်ရှိသွားခဲ့သည်။ အချိန်လေဟာနယ် တားမြစ်နယ်မြေတွင် ထူးခြားသော နတ်ဘုရားသားတော် တစ်ပါး ပေါ်ထွက်လာကြောင်းကို လူတိုင်း သိရှိသွားကြ၏။

ယခင်က ဖြစ်ပေါ်ခဲ့သော ထူးခြားသည့် သဘာဝလွန်ဖြစ်စဉ်များသည် ဤ ကြောက်မက်ဖွယ်ကောင်းသော တားမြစ်နယ်မြေ နတ်ဘုရားသားတော်ကြောင့် ဖြစ်နိုင်ခြေ အလွန်များသည်။

လူအများအပြားသည် ခုံးဝူတောက်၏ အချက်အလက်များကို စတင်၍ စုံစမ်းစစ်ဆေးနေကြတော့သည်။

ခုံးဝူတောက်သည် ဤကိစ္စနှင့်ပတ်သက်၍ မည်သည့် အတွေးမျှ မရှိပေ။ မည်သို့ပင်ဆိုစေကာမူ အထွတ်အထိပ် ပါရမီရှင်များဖြစ်စေ ရှေးဟောင်း ပါရမီရှင်များဖြစ်စေ သူတို့အားလုံးသည် သူ၏မျက်လုံးထဲတွင် သားကောင်များ သက်သက်သာ ဖြစ်ပေ၏။

သားကောင်များအကြောင်း ပြောရလျှင် ယခင်က ကံကောင်းမှုဖြင့် ပြန်အသက်ရှင်လာခဲ့သော ယဲ့ချန်ကို သူ သတိရသွားသည်။ ခုံးဝူတောက်၏ စိတ်က လှုပ်ရှားသွားပြီး ယဲ့ချန်၏ တည်နေရာကို စစ်ဆေးရန် စနစ်ဇယားကို နောက်တစ်ကြိမ် ဆင့်ခေါ်လိုက်သည်။

"အော်... ဒီကောင်က တကယ်ပဲ ပြန်လည်ဝင်စားခြင်း တာအိုဂိုဏ်းကို ပြန်မသွားဘူးပဲ..."

"သူက မြောက်ဘက်ရွှမ် တာအိုနယ်မြေကို တကယ်ကြီး သွားခဲ့တာလား..."

"ပြီးတော့... အဲဒါက တကယ့်ကို ဖရိုဖရဲ မြင့်မြတ်နယ်မြေရဲ့ တာအိုနယ်မြေထဲမှာပဲ..."

ဤအချက်က ခုံးဝူတောက်၏ စိတ်ဝင်စားမှုကို ဆွဲဆောင်နိုင်ခဲ့သည်။ သူ၏မျက်လုံးထဲတွင် ယဲ့ချန်သည် မယုံနိုင်လောက်အောင် အားနည်းနေသော်လည်း တစ်ဖက်လူတွင် ကောက်ကျစ်မှု အနည်းငယ် ရှိနေဆဲပင်။ ခုံးဝူတောက်က လူများကို ပြန်လည်ဝင်စားခြင်း တာအိုဂိုဏ်းဆီ စေလွှတ်လိုက်နိုင်သည်အား သူ သိသောကြောင့် သူ၏ဂိုဏ်းမှ လူအားလုံးကို စွန့်ပစ်ပြီး ပြန်မသွားရန် ရွေးချယ်လိုက်ခြင်းဖြစ်သည်။

သူသည် ထိုဖရိုဖရဲ မြင့်မြတ်နယ်မြေသို့ သွားရန် ရွေးချယ်ခဲ့မှတော့ ဖရိုဖရဲ မြင့်မြတ်နယ်မြေတွင် သူ ပြန်လည်မြင့်တက်လာရန် နည်းလမ်းတချို့ ရှိနေ၍သာ ဖြစ်ပေမည်။

"ကျန်ယွဲ့... ဖရိုဖရဲ မြင့်မြတ်နယ်မြေက ဘယ်လို အင်အားစုမျိုးလဲ... အဲ့ဒီအကြောင်းကို မင်း တစ်ခုခု သိလား..."

ခုံးဝူတောက်က သူ၏နံဘေးရှိ ခုံးကျန်ယွဲ့ကို မေးမြန်းလိုက်သည်။

"နတ်ဘုရားသားတော်သခင်... အဲ့ဒီဖရိုဖရဲ မြင့်မြတ်နယ်မြေက ဓမ္မဆုတ်ယုတ်ခြင်းခေတ် အကုန်မှာ မြောက်ဘက်ရွှမ် တာအိုနယ်မြေမှာ မြင့်တက်လာတဲ့ ထိပ်သီးမြင့်မြတ်နယ်မြေ တစ်ခုပါ..."

"နောက်ပိုင်းခေတ်ကာလတွေမှာ ဖရိုဖရဲ မြင့်မြတ်နယ်မြေက သူတို့ရဲ့ အစွမ်းထက်တဲ့ စွမ်းအားကို အားကိုးပြီး မြောက်ဘက်ရွှမ် တာအိုနယ်မြေက မရေမတွက်နိုင်တဲ့ အင်အားစုတွေကို ဖိနှိပ်ခဲ့တယ်....သူတို့က မြောက်ဘက်ရွှမ် တာအိုနယ်မြေရဲ့ အုပ်စိုးရှင်အဆင့် အင်အားစုတစ်ခုတောင် ဖြစ်လာခဲ့တယ်..."

"ဒါပေမယ့် ဖရိုဖရဲ မြင့်မြတ်နယ်မြေကို တည်ထောင်ခဲ့တဲ့ မဟာဧကရာဇ် ပျောက်ကွယ်သွားပြီးတဲ့နောက်မှာ ဖရိုဖရဲ မြင့်မြတ်နယ်မြေကဆုတ်ယုတ်သွားခဲ့ပြီး အရင်အုပ်စိုးရှင်အဆင့်ကနေ လက်ရှိ သာမန် ထိပ်သီးအင်အားစုအဆင့်အထိ ကျဆင်းသွားခဲ့တယ်..."

"လွန်ခဲ့တဲ့ ရက်အနည်းငယ်က မြောက်ဘက်ရွှမ် တာအိုနယ်မြေမှာ ထူးခြားတဲ့ သူတော်စင် တစ်ပါး ထွက်ပေါ်လာတယ်..."

"အဲ့ဒီသူတော်စင်က ဖရိုဖရဲ မြင့်မြတ်နယ်မြေရဲ့ နှစ်စဉ် တပည့်စုဆောင်းရေး အခမ်းအနားမှာ ထင်ပေါ်ကျော်ကြားခဲ့ပြီးတော့ ဒဏ္ဍာရီလာ ဖရိုဖရဲ ခေါင်းလောင်းကို ကိုးကြိမ်တိုင်တိုင် မြည်အောင် လုပ်နိုင်ခဲ့တယ်လို့ ပြောကြတယ်..."

"သူက သန့်စင်တဲ့ ဖရိုဖရဲရုပ်ခန္ဓာကိုယ်ကို ပိုင်ဆိုင်ထားရုံတင်မကဘူး.... သမိုင်းတလျှောက်လုံးမှာ မကြုံဖူးတဲ့ ကျင့်ကြံခြင်း ပါရမီလည်း ရှိတယ်..."

"သူ့ကို အပြင်စည်းတပည့်ကနေ သူတော်စင် အဖြစ် ဖရိုဖရဲ မြင့်မြတ်နယ်မြေက တိုက်ရိုက် တိုးမြှင့်ပေးခဲ့ပြီးတော့ လက်ရှိ ဖရိုဖရဲ မြင့်မြတ်နယ်မြေရဲ့မြင့်တက်လာမှုအတွက် မျှော်လင့်ချက်ရောင်ခြည်အဖြစ် ချီးကျူးခံရတယ်..."

"ဒါပေမယ့် ကျန်ယွဲ့ရဲ အမြင်အရတော့... ဒီ ဖရိုဖရဲသူတော်စင် ဆိုတာက နတ်ဘုရားသားတော်သခင်နဲ့ ယှဉ်ရင် ဘာမှမဟုတ်ပါဘူး... နတ်ဘုရားသားတော်သခင်က..."

ခုံးဝူတောက်သည် ခုံးကျန်ယွဲ့၏ နောက်ဆက်တွဲ မြှောက်ပင့်သော စကားများကို နားမထောင်ခဲ့ပေ။ ထိုအစား သူမ စောစောက ပြောခဲ့သည့်အရာများအပေါ် အခြေခံ၍ သူ နက်ရှိုင်းသော တွေးတောမှုထဲသို့ ကျရောက်သွားသည်။

"ဖရိုဖရဲသူတော်စင်..."

ဤကောင်စုတ်၏ ကြီးထွားလာမှု လမ်းကြောင်းသည်လည်း ဒဏ္ဍာရီဆန်သည့် အရောင်အသွေး အနည်းငယ် ရှိနေပေ၏။ သူသည်လည်း ကောင်းကင်ကံကြမ္မာပိုင်ရှင် တစ်ယောက် ဖြစ်နိုင်သလော။

သူ တွေးတောနေစဉ်မှာပင် သက်တော်စောင့် တစ်ဦးသည် ကောင်းကင်ယံမှ ရုတ်တရက် ဆင်းသက်လာပြီး ခုံးဝူတောက်၏ရှေ့တွင် ဒူးတစ်ဖက်ထောက်ကာ လက်နှစ်ဖက်ကို ပူးဆုပ်၍ ပြောဆိုသည်။

"နတ်ဘုရားသားတော် သခင်... နေလ နတ်ဘုရား အင်ပါယာ ပြန်လည်ဝင်စားခြင်းတာအိုဂိုဏ်းနဲ့ တခြား အင်အားစု အများအပြားက ကျွန်တော်တို့ အချိန်လေဟာနယ် တားမြစ်နယ်မြေဆီကို သံတမန်တွေ စေလွှတ်ခဲ့ပြီးတော့ နတ်ဘုရားသားတော်သခင်ကို လာရောက်ဂါရဝပြုချင်တယ်လို့ ပြောနေကြပါတယ်..."

"ငါ့ကို လာပြီး ဂါရဝပြုချင်တာလား..."

ခုံးဝူတောက်က မျက်မှောင်ကြုတ်လိုက်သည်။ သူသည် လောလောဆယ်တွင် ဖရိုဖရဲ မြင့်မြတ်နယ်မြေသို့ သွားရန် စီစဉ်နေပြီး ဤလူများ၏ လာရောက်လည်ပတ်မှုများကို လက်ခံရန် အချိန်မရှိပေ။

သို့သော် သူ ငြင်းဆန်ရန် ပြင်လိုက်စဉ်မှာပင် စနစ်၏အသံက ရုတ်တရက် ထွက်ပေါ်လာသည်။

"ဒင်... သခင် ရဲ့အနီးအနားမှာ ကောင်းကင်ကံကြမ္မာပိုင်ရှင် တစ်ယောက် ပေါ်လာတာကို ထောက်လှမ်းတွေ့ရှိရပါတယ်..."

ခုံးဝူတောက် အနည်းငယ် ရပ်တန့်သွားသည်။ သူ့ကို လာရောက် ဂါရဝပြုသော သူများထဲတွင် ကောင်းကင်ကံကြမ္မာပိုင်ရှင်တစ်ယောက် ရှိနေသလော။ ထိုသို့ဆိုလျှင် သူတို့ကို တွေ့ဆုံရန် သူ့အတွက် အမှန်တကယ်ကို လိုအပ်သည်။ ဤ အသစ်ထွက်ပေါ်လာသော ကောင်းကင်ကံကြမ္မာပိုင်ရှင်သည် ပို၍စိတ်ဝင်စားစရာ ကောင်းလိမ့်မည်ဟု သူ မျှော်လင့်မိသည်။