အခန်း (၃၅-၃၆)

အခန်း (၃၅) ပြန်လည်ဝင်စားခြင်း နယ်မြေရဲ့ လရောင်ဖြူလေးက နတ်ဘုရားသားတော်ကို ထိန်းချုပ်မလို့လား

အချိန်လေဟာနယ် တားမြစ်နယ်မြေ၏ အပြင်ဘက်တွင် ခမ်းနားထည်ဝါသော အင်မော်တယ်လှေ အမြောက်အများသည် ကြယ်တာရာ ကောင်းကင်ယံကို ဖြတ်သန်းသွားလာနေကြ၏။

လေထဲတွင် လူးလွန့်နေသော အလံများကို ကြည့်ခြင်းအားဖြင့် ထိုအင်မော်တယ်လှေများအားလုံးသည် မတူညီသော တာအိုအမွေအနှစ် အင်အားစုများမှ လာကြောင်း ရှင်းလင်းစွာ သိနိုင်သည်။

အင်မော်တယ်လှေများပေါ်တွင် မြင့်မြတ်သော ပုံရိပ်များ မရေမတွက်နိုင်အောင် ရှိနေပြီး သူတို့အားလုံး စိတ်အားထက်သန်စွာ စောင့်ဆိုင်းနေကြသည်။

သူတို့၏အကြည့်များသည် အချိန်လေဟာနယ် တားမြစ်နယ်မြေ၏ တံခါးဝဆီသို့ တစ်ခါတစ်ရံ ရောက်သွားကြပြီး တစ်စုံတစ်ခုကို စောင့်ဆိုင်းနေသည့်အလားပင်။

သံတမန်များအဖြစ် လာရောက်ကြသော မရေမတွက်နိုင်သည့် ပုံရိပ်များထဲတွင် ကျော့ရှင်းသော ပုံရိပ်နှစ်ခုက အထူးမျက်စိကျစရာ ဖြစ်နေသည်။

အင်အားစုများမှစေလွှတ်လိုက်သော သံတမန်အများစုမှာ အမျိုးသားများ ဖြစ်ကြသည်။

သို့သော် ထိုအင်အားစုနှစ်ခုက အမျိုးသမီး သံတမန်များကို စေလွှတ်ခဲ့ပြီး သူမတို့နှစ်ဦးလုံးသည် သူမတို့၏ သက်ဆိုင်ရာ အဓိက အင်အားစုများ၏ လူငယ်ဆက်ခံသူများ ဖြစ်ကြ၏။

ထိုအမျိုးသမီးများသည် နေလနတ်ဘုရားအင်ပါယာမှ ရှားချူလီနှင့် ပြန်လည်ဝင်စားခြင်း တာအိုဂိုဏ်း မှ ပြန်လည်ဝင်စားခြင်းမဟာဧကရီ၏ တပည့်ရင်း လင်းမြောင်ယန်တို့ပင်။

...

ဝီ...

ဤအချိန်အခိုက်အတန့်မှာပင် ဟင်းလင်းပြင်တလျှောက် တောက်ပသော အလင်းတန်းများ လှိုင်းထသွားသည်။

ခမ်းနားထည်ဝါသော မိုးပြာနဂါးတစ်ကောင်၏ အကြေးခွံများသည် တောက်ပသော အဖြူရောင် အလင်းတန်းများဖြင့် လင်းလက်နေပြီး ဟင်းလင်းပြင် ဝဲကတော့အတွင်းမှ ဖြည်းညှင်းစွာ ထွက်ပေါ်လာသည်။

ထိုသားရဲထံမှ ကြောက်မက်ဖွယ်ကောင်းသော နဂါးအရှိန်အဝါ တစ်ခု ထွက်ပေါ်လာပြီး လာရောက်လည်ပတ်သော သံတမန်များစွာ၏ မျက်နှာအမူအရာများကို ပြောင်းလဲသွားစေသည်။

ထို့ပြင် ဧရာမနဂါးခေါင်းပေါ်တွင် အနက်ရောင်ဝတ်စုံနှင့်အဖြူရောင်ဝတ်ရုံကို ဝတ်ဆင်ထားသော ခုံးဝူတောက်သည် လေဟာနယ်ကို မျက်နှာမူပြီး မတ်တတ်ရပ်နေလေ၏။

သူ ထွက်ပေါ်လာခြင်းနှင့်အတူ အလွန်ထူထပ်သိပ်သည်းသော ခမ်းနားထည်ဝါမှု အရှိန်အဝါတစ်ခုက နေရာတစ်ခုလုံးကို ပျံ့နှံ့သွားပြီး ထာဝရ တောက်ပနေသော နေမင်းကြီးကဲ့သို့ အံ့အားသင့်ရိုသေမှုကို ဖြစ်ပေါ်စေသည်။

ကျင့်ကြံသူအများအပြားသည် အလွန်အမင်း ထိတ်လန့်တုန်လှုပ်သွားကြ၏။

နဂါးများအနက် မြင့်မြတ်သော ကောင်းကင်အလင်း မိုးပြာနဂါးကို စီးတော်ယာဉ်အဖြစ် အသုံးပြုပြီး သူ၏ခေါင်းမှ ခြေဖျားအထိ ကြောက်မက်ဖွယ်ကောင်းသော အရှိန်အဝါကို ထုတ်လွှတ်နေသည်။

ဤသည်မှာ အချိန်လေဟာနယ် တားမြစ်နယ်မြေမှ ဒဏ္ဍာရီလာသူတော်စင် ခုံးဝူတောက်မှလွဲ၍ တခြားမည်သူ ဖြစ်နိုင်မည်နည်း။

"တောင်ပိုင်းတောင်တန်းရဲ့ မြေအောက်ကမ္ဘာမျိုးနွယ်စုက သူတော်စင်ခုံးဝူတောက် ကို ဂါရဝပြုပါတယ်..."

အစွမ်းထက် ကျင့်ကြံသူတစ်ဦးက သူ၏လက်နှစ်ဖက်ကို ပူးဆုပ်ကာ ဦးညွှတ်ပြီး ပထမဆုံး နှုတ်ခွန်းဆက်လိုက်သည်နှင့်အမျှ လူများစွာသည် သူတို့၏မိန်းမောနေမှုမှ လျင်မြန်စွာ ပြန်လည်သတိရလာကြပြီး သူတို့အားလုံး ခေါင်းငုံ့ကာ ဦးညွှတ်အရိုအသေလိုက်ကြသည်။

"ထိုက်ယိနက်နဲသိမ်မွေ့ဂိုဏ်းက သူတော်စင်ခုံးဝူတောက်ကို ဂါရဝပြုပါတယ်..."

"ထျန်ယွီသူတော်စင်ဂိုဏ်းက သူတော်စင် ခုံးဝူတောက်ကို ဂါရဝပြုပါတယ်..."

"နေလနတ်ဘုရားအင်ပါယာက ရှားချူလီ... သူတော်စင် ခုံးဝူတောက်ကို ဂါရဝပြုပါတယ်..."

"..."

အချိန်တခဏအတွင်းမှာပင် ရိုသေလေးစားသော အော်ဟစ်သံများသည် တစ်ခုပြီးတစ်ခု အဆက်မပြတ် ပဲ့တင်ထပ်သွားသည်။

အကယ်၍ ဤမြင်ကွင်းသာ ပြန့်နှံ့သွားပါက ကောင်းကင်ဘုံများနှင့်အင်္သချေနယ်မြေများအားလုံးကို စိတ်လှုပ်ရှားမှုများဖြင့် ဆူညံပွက်လောရိုက်သွားစေနိုင်သည်။

ဤနေရာသို့ လာရောက်ကြသူအားလုံးသည် အင်မော်တယ် တာအိုအမွေအနှစ်များမှ ဖြစ်ကြောင်း သိထားရပေမည်။

ကျင့်ကြံသူများစွာ၏ မျက်လုံးထဲတွင် ထိုအင်အားစုများသည် တိမ်များပေါ်ရှိ နတ်ဘုရားများကဲ့သို့ မြင့်မြတ်မှုများဖြင့် မွေးဖွားလာကြခြင်းပင်။

သို့သော် ယခု၌မူ ဤကဲ့သို့ ငယ်ရွယ်သော တည်ရှိမှု၏ရှေ့တွင် သူတို့အားလုံးသည် ရိုသေလေးစားစွာဖြင့် နှိမ့်ချနေကြရာ ဤမြင်ကွင်းက အမှန်တကယ်ကို အလွန်အမင်း တုန်လှုပ်စရာ ကောင်းလှသည်။

"အင်း..."

ခုံးဝူတောက်က တုံ့ပြန်သည့်အနေဖြင့် ခေါင်းကို ညင်သာစွာ ညိတ်ရုံသာ ပြုလုပ်လိုက်သည်။

သူ၏အကြည့်သည် စနစ် ပြောခဲ့သော ကောင်းကင်ကံကြမ္မာပိုင်ရှင်ကို ရှာဖွေနေလေပြီ။

သူ၏အမြင်အာရုံသည် ရှားချူလီအပေါ်သို့ လျှင်မြန်စွာ ကျရောက်သွားသည်။

[အမည်: ရှားချူလီ]

[ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသမီး.. နေလနတ်ဘုရားအင်ပါယာရဲ့ နန်းမွေခံမင်းသမီး]

[နယ်ပယ်: တာအိုနန်းတော်နယ်ပယ် အဆင့်ကိုး]

[ရုပ်ခန္ဓာကိုယ်: မဟာအထွတ်အထိပ် ကြယ်နတ်ဘုရား ရုပ်ခန္ဓာကိုယ် ကဏဦးအဆင့်]

[ကျင့်စဉ်: နေလ စိတ်ဝိညာဉ် အသွင်ပြောင်းခြင်းကျင့်စဉ် ကြယ်သူတော်စင်ကျမ်းစာ မဟာဧကရာဇ် ကောင်းကင်ချေမှုန်းခြင်းကျင့်စဉ်...]

[ရတနာများ: မဟာဧကရာဇ်ဓား အင်မော်တယ်သက်တံ့ ပိတ်ပါးဝတ်ရုံ နှလုံးသားကာကွယ်ခြင်း သူတော်စင်ပုလဲ...]

[ကောင်းကင်အမိန့်တော်အမှတ်: ၈၀၀၀]

[ရနိုင်ခြေရှိသော တာအို အပိုင်းအစများ: ကြယ်တာအို အပိုင်းအစ မီးတောက်တာအို အပိုင်းအစ ဂီတတာအို အပိုင်းအစ...]

ခုံးဝူတောက် မျက်ခုံးတစ်ချက် ပင့်လိုက်သည်။

နေလနတ်ဘုရားအင်ပါယာ ဖြစ်နေသလော...

သူ မှတ်မိသည်မှာ မှန်ကန်လျှင် ထိုနေလနတ်ဘုရားအင်ပါယာသည် အချိန်လေဟာနယ် တားမြစ်နယ်မြေ၏နံဘေးတွင် တည်ရှိသည် မဟုတ်လော...

နေလနတ်ဘုရားအင်ပါယာ၏ နန်းမွေခံမင်းသမီးသည်လည်း ကောင်းကင်ကံကြမ္မာပိုင်ရှင်တစ်ယောက် ဖြစ်နေလိမ့်မည်ဟု မမျှော်လင့်ထားခဲ့ပေ။ ထို့ပြင် သူမ၏ ကောင်းကင်အမိန့်တော်အမှတ်များကလည်း အတော်အသင့်မြင့်မားနေသည်။

တစ်ဖက်လူက သူ့ထံသို့ သီးသန့်အလည်အပတ်ရောက်လာခြင်း ဖြစ်သော်လည်း ဤမျှများပြားသော ကောင်းကင်အမိန့်တော်အမှတ် များကို လက်လွတ်ခံရခြင်းက အလွန်နှမြောစရာ ကောင်းလှသည်။

ခုံးဝူတောက်၏အကြည့်ကို အာရုံခံမိသည့်အလား ရှားချူလီက စကားပြောရန် ဟန်ပြင်လိုက်စဉ်တွင် အသံတစ်သံက သူမထက် အရင် ထွက်ပေါ်လာသည်။

"ကျွန်မက သူတော်စင်ခုံးဝူတောက်ရဲ့ နာမည်ကြီးမှုကို အချိန်အတော်ကြာကတည်းက လေးစားအားကျခဲ့ရတာပါ..."

"အနာဂတ်မှာ သူတော်စင် ခုံးဝူတောက် ကောင်းကင်ဘုံတွေနှင့်အင်္သချေနယ်ပယ်တွေကို ခရီးသွားတဲ့အချိန်မှာ အတူလိုက်ပါပြီး ဂုဏ်ယူခွင့် ရနိုင်မလား..."

အသံလာရာဆီသို့ ကြည့်လိုက်သောအခါ စကားပြောဆိုနေသူမှာ နူးညံသိမ်မွေ့သော မျက်နှာသွင်ပြင်ရှိသည့် အရပ်ရှည်ရှည် အမျိုးသမီးတစ်ဦး ဖြစ်နေသည်။

သူမသည် ဖီးနစ်ဝတ်ရုံနှင့် ပါးလှပ်သောဝတ်စုံကို ဝတ်ဆင်ထားပြီး သူမ၏ရှည်လျားပြီး ဖြူဖွေးသော ခြေတံများတွင် အမည်းရောင် ပိုးသားခြေအိတ်များကို ဝတ်ဆင်ထားသည်။

ဤသည်က သူမ၏ ဆွဲဆောင်မှုရှိပြီး စွဲမက်ဖွယ်ကောင်းသော ခန္ဓာကိုယ် အချိုးအစားကို ပို၍ပင် ပေါ်လွင်စေပေ၏။

အချိန်တခဏအတွင်းမှာပင် ကျင့်ကြံသူအမြောက်အများ၏ အကြည့်များသည် သူမထံသို့ ကျရောက်သွားကြသည်။

အထူးသဖြင့် အမျိုးသားကျင့်ကြံသူများသည် တံတွေးမမျိုချဘဲ မနေနိုင်ကြဘဲ သူတို့၏ ခန္ဓာကိုယ်များ အနည်းငယ် ပူနွေးလာသည်ကို ခံစားလိုက်ရသည်။

"အဲဒါက ပြန်လည်ဝင်စားခြင်း တာအိုဂိုဏ်းရဲ့ သူတော်စင်မိန်းမပျို... လင်းမြောင်ယန် ပဲ..."

"ပြီးတော့ သူက ပြန်လည်ဝင်စားခြင်း မဟာဧကရီရဲ့ တပည့်ရင်းလည်း ဖြစ်တယ်..."

"သူက ပြန်လည်ဝင်စားခြင်း တာအိုနယ်မြေတစ်ခုလုံးက မရေမတွက်နိုင်တဲ့ အမျိုးသားတွေရဲ့ နှလုံးသားထဲက နတ်သမီးလို့ ငါ ကြားဖူးတယ်..."

"ပြန်လည်ဝင်စားခြင်း တာအိုနယ်မြေက မရေမတွက်နိုင်တဲ့ ထိပ်တန်းအင်အားစုတွေရဲ့ ဆက်ခံသူတွေက သူရဲ့ သစ္စာရှိနောက်လိုက်တွေ ဖြစ်ပုံရတယ်..."

"အဖြူရောင် မြေအောက်ကမ္ဘာ သူတော်စင်ဂိုဏ်းရဲ့ သူတော်စင်က လင်းမြောင်ယန် ကို လိုက်ရှာဖို့အတွက် အဖြူရောင် မြေအောက်ကမ္ဘာ သူတော်စင်ဂိုဏ်းရဲ့ တစ်ဝက်ကိုတောင် ဗလာကျင်းသွားအောင် လုပ်ခဲ့ဖူးတယ်... သူ့ရဲ့ မျက်နှာသာပေးမှုကိုရဖို့ မျှော်လင့်ချက်နဲ့လေ..."

"ပြီးတော့ ရွှေမြို့တော် ကုန်သည်မဟာမိတ်အဖွဲ့ ရဲ့ သားအကြီးဆုံးက စိတ်ဝိညာဉ်ကျောက်တုံး သန်းရာချီပြီး ပေးကမ်းခဲ့တယ်...သူက နတ်မိမယ်လေးရဲ့ မျက်နှာသာပေးမှုကို ရချင်လို့ပဲ... ဒါပေမယ့် နောက်ဆုံးမှာတော့ သူက လင်းမြောင်ယန်ရဲ့ လက်ကိုတောင် မထိခဲ့ရဘူး..."

"ဒီကိုယ်ဟန်အမူအရာကို ကြည့်ရရင် လင်းမြောင်ယန်က သူတော်စင် ခုံးဝူတောက်ကို သိသိသာသာ မျက်နှာသာပေးနေပြီးတော့ သူ့ရဲ့အနားကို ကပ်ချင်နေတာပဲ..."

"..."

ကျင့်ကြံသူအများအပြားသည် တက်ကြွစွာ ဆွေးနွေးနေကြပြီး ခုံးဝူတောက်အပေါ် သူတို့၏ အကြည့်များ၌ အားကျလေးစားမှုများဖြင့် ပို၍ပြည့်နှက်နေသည်။

သို့သော် သူတို့၏ မျက်လုံးများထဲတွင် မနာလိုမှု အရိပ်အယောင် တစိုးတစိမျှ မရှိပေ။

မည်သို့ပင်ဆိုစေကာမူ သူ၏ ပါရမီနှင့်နောက်ခံက ရှင်းလင်းနေသည်ဖြစ်ရာ သူတို့က မည်သို့ မနာလိုဖြစ်နိုင်မည်နည်း....

သူမ၏နံဘေးပတ်လည်ရှိ ဆွေးနွေးမှုများကို နားထောင်ရင်း လင်းမြောင်ယန်၏ နှုတ်ခမ်းများသည်လည်း ဂုဏ်ယူဝင့်ကြွားသော အပြုံးတစ်ခုဖြင့် မသိမသာ ကွေးတက်သွားသည်။

ရိုးရိုးသားသား ပြောရလျှင် သူမသည် သူမ၏ လှပမှုအပေါ် အကြွင်းမဲ့ယုံကြည်မှု ရှိသည်။

သူမ၏ခြေထောက်အောက်တွင် ဒူးထောက်ခဲ့ရသော အမျိုးသားကျင့်ကြံသူ အရေအတွက်သည် မရေမတွက်နိုင်အောင် များပြားလှပြီး သူမ၏အလှကြောင့် ရူးသွပ်သွားခဲ့သူများလည်း အများအပြား ရှိသည်။

မည်သို့ပင်ဆိုစေကာမူ သူမသည် ပြိုင်ဘက်ကင်းသော လှပချောမောမှုကို ပိုင်ဆိုင်ထားရုံသာမက ထိပ်တန်းအဆင့်ရှိသော နှစ်ကိုယ်တူကျင့်ကြံခြင်း ရုပ်ခန္ဓာကိုယ်ကိုလည်း ပိုင်ဆိုင်ထားသည်။

မည်သည့်အမျိုးသားက သူမကို မလိုချင်ဘဲ နေမည်နည်း....

သူက အချိန်လေဟာနယ် တားမြစ်နယ်မြေ ၏ သူတော်စင် ဖြစ်နေလျှင်တောင်မှ ဘာဖြစ်သနည်း ...

နောက်ဆုံးတွင် သူသည်လည်း ယောက်ျားတစ်ယောက်ပင် မဟုတ်လော....

"ခစ် ခစ်... ဆရာသခင်က တကယ့်ကို အံ့အားသင့်စရာပဲ... သူက ငါ့ကို ခုံးဝူတောက်နဲ့ ဘယ်လို တန်ကြေးမျိုး ပေးရပါစေ ဆက်ဆံရေးကောင်းတစ်ခု တည်ဆောက်ဖို့ ပြောခဲ့တယ်... ပြီးတော့ သူ့ကို မြူဆွယ်ဖို့ အောက်တန်းကျတဲ့ နည်းလမ်းတွေ မသုံးဖို့လည်း ပြောခဲ့တယ်..."

လင်းမြောင်ယန်က ဂုဏ်ယူဝင့်ကြွားစွာ တွေးတောလိုက်သည်။

"ဒါပေမယ့် အခု ခုံးဝူတောက်ရဲ့ အကြည့်က ငါ့ဆီကို စူးစိုက်နေပြီလေ... ဒီ ယောက်ျားတွေကို ထိန်းချုပ်ရတာ ဆန်မုန့်တစ်ပိုင်း စားရသလိုပဲ အရမ်းလွယ်တယ် မဟုတ်ဘူးလား..."

အစောပိုင်းက သူမ၏ဆရာသခင် ဖြစ်သော ပြန်လည်ဝင်စားခြင်း မဟာဧကရီက သူမကို ညွှန်ကြားထားပြီးဖြစ်သည်။

ခုံးဝူတောက်၏ စစ်မှန်သောစွမ်းအားနှင့် ပါရမီသည် လောကကြီးက စိတ်ကူးနိုင်သည်ထက် များစွာသာလွန်ပြီး အနာဂတ်တွင် ကောင်းကင်ကိုးထပ်နှင့်မြေပြင်ဆယ်လွှာကို ကျော်လွန်ကာ အထွတ်အထိပ်သို့ ရောက်ရှိရန် ဖန်တီးခံထားရသူဖြစ်သည်ဟု ဆိုခဲ့ပေ၏။

ထို့ကြောင့် ခုံးဝူတောက်အပေါ် ကောင်းမွန်သော အထင်အမြင်တစ်ခု ချန်ရစ်ခဲ့ရန်အတွက် သေချာလုပ်ဆောင်ရန် သူမကို ပြောဆိုခဲ့သည်။

သူမသည် ဆရာသခင်၏ရှေ့တွင် သဘောတူခဲ့သော်လည်း ခုံးဝူတောက်ကို အမှန်တကယ် မြင်တွေ့လိုက်ရချိန်၌ သူမ၏ခန္ဓာကိုယ်ဖြင့် သူ့ကို ရန်စချင်စိတ် ဖြစ်ပေါ်လာသည်ကို မတားဆီးနိုင်ခဲ့ပေ။

မည်သို့ပင်ဆိုစေကာမူ လင်းမြောင်ယန် အနိုင်မယူနိုင်သော ယောက်ျားဟူ၍ မရှိပေ။

သူက အချိန်လေဟာနယ် တားမြစ်နယ်မြေ၏ သူတော်စင် ဖြစ်နေလျှင်တောင်မှ ဘာဖြစ်သနည်း....

နောက်ဆုံးတော့ သူသည်လည်း ယောက်ျားတစ်ယောက်ပင် မဟုတ်လော...

သူမ သူ့ကို မည်သို့ ကိုင်တွယ်မည်အား စောင့်ကြည့်ရုံသာ ရှိတော့သည်။

...

အခန်း (၃၆) မင်းက ဒီလိုလူမျိုးလား.... ဒီနတ်ဘုရားသားတော်ရဲ့ မျက်နှာသာပေးမှုကို ခံရဖို့ ထိုက်တန်တယ်လို့ မင်း ထင်နေတာလား

ခုံးဝူတောက်၏အကြည့်က လင်းမြောင်ယန်ပေါ်သို့ ကျရောက်သွားသည်။

သို့သော် သူမ အလွန်ဂုဏ်ယူနေသော သူမ၏ ခန္ဓာကိုယ်အပေါ်တွင် သူ အမှန်တကယ်ကို သိပ်စိတ်မဝင်စားပေ။

ထိုအစား သူမ၏အချက်အလက်ဇယားကို သူ စစ်ဆေးနေခြင်းဖြစ်သည်။

[အမည်: လင်းမြောင်ယန်

ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသမီး၏တပည့်...ပြန်လည်ဝင်စားခြင်း တာအိုဂိုဏ်း ၏ သူတော်စင်မိန်းမပျို

ရုပ်ခန္ဓာကိုယ်: ယင်ယန် ပြန်လည်ဝင်စားခြင်း ရုပ်ခန္ဓာကိုယ် ကဏဦးအဆင့်

ကျင့်ကြံခြင်း: တာအိုနန်းတော်နယ်ပယ် အဆင့်ခုနစ်...

ကောင်းကင်အမိန့်တော်အမှတ်: ၅၀၀၀

ရနိုင်ခြေရှိသော မဟာတာအို အပိုင်းအစများ: ပြန်လည်ဝင်စားခြင်း မဟာတာအို အပိုင်းအစ ကြာပွတ် မဟာတာအို အပိုင်းအစ...]

သူမသည် ကောင်းကင်ကံကြမ္မာ ဇာတ်လိုက်မင်းသမီးမဟုတ်ဘဲ ကောင်းကင်ကံကြမ္မာဇာတ်လိုက်မင်းသမီး၏တပည့် ဖြစ်နေသလော...

ဤထူးခြားသည့်ဖြစ်စဉ်က သူ၏ စိတ်ဝင်စားမှုကို ဆွဲဆောင်နိုင်ခဲ့သည်။

ကောင်းကင်ကံကြမ္မာ ဇာတ်လိုက်မင်းသမီး မဟုတ်သော လူတစ်ယောက်ထံတွင် ကောင်းကင်အမိန့်တော်အမှတ် အနည်းငယ် ရှိနေမည်ဟု သူ အမှန်တကယ်ကို မမျှော်လင့်ထားခဲ့ပေ။

ခုံးဝူတောက်၏ အကြည့်က သူမအပေါ်တွင် ရပ်တန့်နေဆဲဖြစ်သည်ကို မြင်သောအခါ လင်းမြောင်ယန်၏ နှုတ်ခမ်းများတွင် ဂုဏ်ယူဝင့်ကြွားသော အပြုံးတစ်ခု ထင်ဟပ်လာသည်။

ဤအခြေအနေအကြောင်း ထပ်ပြောနေရန် မလိုတော့ပေ။

တစ်ဖက်လူသည် သူမ၏အလှကြောင့် ဆွဲဆောင်ခံလိုက်ရသည်မှာ သေချာပြီး သူမကိုပင် စွဲလမ်းသွားလောက်သည်။

ဤထူးခြားသည့်ဖြစ်စဉ်က လင်းမြောင်ယန်၏ ယုံကြည်မှုကို ကောင်းကင်သို့ မြင့်တက်သွားစေသည်။ ဘာအချိန်လေဟာနယ် တားမြစ်နယ်မြေ နတ်ဘုရားသားတော်နည်း။

သူသည်လည်း သူမ၏အလှရှေ့တွင် ဒူးထောက်ရမည် မဟုတ်လော...

ထို့နောက် ကျင့်ကြံသူအများအပြား၏ အံ့အားသင့်မှင်သက်နေသော အကြည့်များအောက်တွင် လင်းမြောင်ယန်သည် သူမ၏နူးညံချောမွတ်ခြေထောက်များကို ညင်သာစွာရွှေ့ကာ ခုံးဝူတောက်ထံသို့ တက်ကြွစွာ ချဉ်းကပ်သွားသည်။

"နတ်ဘုရားသားတော် ခုံးဝူတောက်... ကျွန်မမှာ ယင်ယန် ပြန်လည်ဝင်စားခြင်း ရုပ်ခန္ဓာကိုယ်ရှိပြီး ကျွန်မရဲ့ပါရမီက အတော်လေး ကောင်းတယ်လို့ ယုံကြည်ပါတယ်..."

သူမက သူမ၏လည်ချောင်းကိုပင် တမင်သက်သက် ရှင်းလင်းလိုက်ပြီး သူမ၏ အသံက အနည်းငယ် ဆွဲဆောင်မှုရှိကာ ညှို့ငင်မှုများ​ပြည့်နှက်နေသည်။

"ကျေးဇူးပြုပြီး ကျွန်မကို လက်ခံပေးပါ နတ်ဘုရားသားတော်သခင်... အဝတ်လျှော် စောင်ခေါက်တာကအစ တခြားကိစ္စတွေအထိ ကျွန်မက အရာအားလုံးကို လုပ်နိုင်ပါတယ်..."

ဤစကား၏အဓိပ္ပာယ်မှာ သိသာထင်ရှားနေသည်။ ယင်ယန်ပြန်လည်ဝင်စားခြင်း ရုပ်ခန္ဓာကိုယ်သည် လောကကြီးတွင် ထိပ်တန်းအဆင့်ရှိသော မီးပြင်းဖိုရုပ်ခန္ဓာကိုယ်ပင်။

အကယ်၍ တစ်စုံတစ်ယောက်က ထိုရုပ်ခန္ဓာကိုယ်ပိုင်ရှင်နှင့် နှစ်ကိုယ်တူကျင့်ကြံခြင်း လုပ်နိုင်မည်ဆိုလျှင် အကျိုးကျေးဇူးများသည် အကန့်အသတ်ရှိမည် မဟုတ်ချေ။

ဤသည်က လင်းမြောင်ယန်၏ ဂုဏ်ယူစရာ အကောင်းဆုံး အားကိုးရာလျှို့ဝှက်ချက်များအနက်မှ တစ်ခုလည်း ဖြစ်သည်။

ပြိုင်ဘက်ကင်းသော အလှအပနှင့် ထိပ်တန်းအဆင့် မီးပြင်းဖိုရုပ်ခန္ဓာကိုယ်တို့၏ ပေါင်းစပ်မှုကို လောကရှိ မည်သည့် အမျိုးသား ကျင့်ကြံသူ က တောင့်ခံနိုင်မည်နည်း။

အမျိုးသားများ သူမကို ထိတွေ့ခြင်းအား သူမ မုန်းတီးသော်လည်း...

ခုံးဝူတောက်တွင် မြင့်မြတ်သော အဆင့်အတန်းနှင့် ပြိုင်ဘက်ကင်းသော ပါရမီ ရှိသည်။

သူမဆရာသခင်၏ ကြီးမားသော အသိအမှတ်ပြုမှုကိုပင် သူ ရရှိထားခဲ့သည်ဖြစ်ရာ သူမ အနည်းငယ်ဒုက္ခခံပြီး စွန့်လွှတ်အနစ်နာခံမှုတချို့ ပြုလုပ်ရန်မှာ မဖြစ်နိုင်သည်တော့ မဟုတ်ပေ။

"ဒါက..."

ဤမြင်ကွင်းကို မြင်သောအခါ ထိုနေရာရှိ ကျင့်ကြံသူများစွာ၏ မျက်လုံးများ ပြူးကျယ်သွားကြပြီး အံ့အားသင့်လွန်းသဖြင့် သူတို့၏ မျက်လုံးများ မျက်လုံးအိမ်ထဲမှ ထွက်ကျလုမတတ် ဖြစ်သွားကြသည်။

ဤသည်က... ဤသည်က သူတို့သိထားသော ပြန်လည်ဝင်စားခြင်းတာအိုနယ်မြေမှ မရေမတွက်နိုင်သော ကျင့်ကြံသူများ၏ အိပ်မက်နတ်သမီး အမှန်တကယ်ပင် ဟုတ်ပါသလော...

မည်သည့်အမျိုးသားကမျှ သူမကို မရနိုင်ဟု ပြောကြသည် မဟုတ်လော...

ယခုချိန်၌ သူမသည် ခုံးဝူတောက်ဆီသို့ သူမကိုယ်တိုင် အပြေးအလွှား သွားရောက်ပြီး ပေးအပ်နေသည်။ ဤခြားနားချက်က အမှန်တကယ်ကို ကြီးမားလွန်းနေသည် မဟုတ်လော။

ပြိုင်ဘက်ကင်းသော နောက်ခံ ပြိုင်ဘက်ကင်းသော ပါရမီနှင့် ချောမောသော ရုပ်ရည်ရှိသည့် တည်ရှိမှုတစ်ခုသည် အမှန်တကယ်ပင် သူလုပ်ချင်တာမှန်သမျှ လုပ်နိုင်သည်ကို ဝန်ခံရပေလိမ့်မည်။

"ဒီ မြေခွေးမ..."

သူမ၏နံဘေးရှိ ရှားချူလီ၏ မျက်နှာအမူအယာသည်လည်း အနည်းငယ် ပျက်ယွင်းနေသည်။

သူမသည် နေလနတ်ဘုရားအင်ပါယာကို ကိုယ်စားပြုပြီး ဤနေရာသို့ လာခဲ့ခြင်းဖြစ်ပြီး အမှန်အားဖြင့် သူမသည်လည်း ခုံးဝူတောက် အချိန်လေဟာနယ် တားမြစ်နယ်မြေတို့နှင့် ဆက်ဆံရေးကောင် တစ်ခု တည်ဆောက်လိုခဲ့ခြင်းဖြစ်သည်။

ဤလင်းမြောင်ယန်၏ စိတ်နှလုံးသားထဲတွင် တခြားအတွေးများ ရှိနေသော်လည်း...

သို့သော် အစကတည်းက သူမကိုယ်သူမ ပေးအပ်ရန် တိုက်ရိုက်ရွေးချယ်လိုက်ခြင်းကမူ...

ဤကိစ္စက သူမ သေချာပြင်ဆင်လာခဲ့သော အဖိုးတန်ရတနာများနှင့် နှိုင်းယှဉ်ကြည့်လျှင် အနည်းငယ် "ရိုးသားမှု မရှိ" ဟု ထင်ရစေသည်။

ခုံးဝူတောက်၏မျက်နှာအမူအရာက တည်ငြိမ်နေသည်။ လင်းမြောင်ယန်၏ မျက်လုံးများထဲရှိ ဂုဏ်ယူဝင့်ကြွားမှုကို သူ ရှင်းလင်းစွာ မြင်တွေ့နိုင်ပေ၏။

ဟဲ ဟဲ... အမှန်တကယ်ကို တစ်ဖက်လူသည် လက်တစ်ဆစ်ပေးလျှင် တစ်တောင် ယူမည့်သူပင်။

ဝုန်း...

ကောင်းကင်အလင်း မိုးပြာနဂါးသည် သူ၏သခင် မပျော်မရွှင်ဖြစ်နေသည်ကို အာရုံခံမိပုံရသည်။

ထိုနဂါးက သူ၏ပါးစပ်ကို ရုတ်တရက် ဖွင့်လိုက်ပြီး ကနွဲ့ကလျခြေလှမ်းများဖြင့် ကျော့ရှင်းစွာ ချဉ်းကပ်လာနေသော လင်းမြောင်ယန်ဆီသို့ မြေပြင်ကို တုန်ခါစေသော နဂါးဟိန်းဟောက်သံကြီးတစ်သံအား ထုတ်လွှတ်လိုက်သည်။

ရုတ်ချည်းဆိုစလိုပင် ကြောက်မက်ဖွယ်ကောင်းသော နတ်ဘုရားအသံ မုန်တိုင်းတစ်ခု ပျံ့နှံ့သွားပြီး သူတော်စင်နယ်ပယ် နဂါးအရှိန်အဝါက နေရာတစ်ဝိုက်လုံးကို လွှမ်းခြုံသွားသည်။

သတိမထားမိလိုက်သော လင်းမြောင်ယန်သည် အင်မော်တယ် နတ်ဘုရားတောင်ကြီးတစ်လုံး၏ တိုက်ခိုက်ခြင်းကို ခံလိုက်ရသကဲ့သို့ ဖြစ်သွားလေ၏။

"ဖူး..."

သူမ၏ပါးစပ်မှ သွေးများပန်းထွက်လာပြီး ကြိုးပြတ်သွားသော စွန်တစ်ခုအလား အနောက်သို့ လွင့်စင်သွားသည်။

ဤမြင်ကွင်းက လူတိုင်းကို နောက်တစ်ကြိမ် မိုးကြိုးပစ်ချလိုက်သကဲ့သို့ ဖြစ်သွားစေပြီး ထိုနေရာတွင်ပင် အံ့အားသင့်မှင်သက်ကာ တွေဝေမိန်းမောသွားစေခဲ့သည်။ ဤကဲ့သို့ ရုတ်တရက် အပြောင်းအလဲကို သူတို့ အနည်းငယ်မျှ မျှော်လင့်မထားခဲ့ကြပေ။

နတ်ဘုရားသားတော် ခုံးဝူတောက်၏ စီးတော်ယာဉ်သည် အထိန်းအကွပ်မရှိဘဲ လင်းမြောင်ယန်အပေါ် သူ၏နဂါးအရှိန်အဝါကို ထုတ်လွှတ်လိုက်ခြင်းဖြစ်သလော...

သို့သော် နဂါးမျိုးနွယ်စုသည် အလွန်မောက်မာထောင်လွှားကြ၏။ ယေဘုယျအားဖြင့် သူတို့၏ ခေါင်းပေါ်တွင် တစ်ယောက်ယောက်ကို ရပ်ခွင့်ပြုရန်မှာ ထိုလူက သူတို့၏ အကြွင်းမဲ့ အသိအမှတ်ပြုမှုကို ရရှိထားမှသာ ဖြစ်ပေလိမ့်မည်။

ထိုနဂါးက နတ်ဘုရားသားတော် ခုံးဝူတောက်၏ စကားများကို မည်သို့ နားမထောင်ဘဲ နေမည်နည်း။

နတ်ဘုရားသားတော် ခုံးဝူတောက်က တိတ်တဆိတ် ခွင့်ပြုထား၍ ဖြစ်သလော...

[ဒင်... လင်းမြောင်ယန်ရဲ့ တာအို နှလုံးသားက ပြင်းပြင်းထန်ထန် ဒဏ်ရာရသွားတာကို ထောက်လှမ်းတွေ့ရှိရပါတယ်... တစ်ဖက်လူရဲ့ ကောင်းကင်အမိန့်တော်အမှတ်တွေက အမှတ် ၁၀၀၀ လျော့ကျသွားပြီး အမှတ် ၄၀၀၀ ကျန်ရှိနေပါတယ်...]

[နှစ်ဆ ပြင်းထန်တဲ့ ထိုးနှက်ချက်ကို အောင်မြင်စွာ ဖြစ်ပေါ်စေပြီး ကောင်းကင်အမိန့်တော်အမှတ် ၂၀၀၀ ကို ရရှိခဲ့တဲ့အတွက် သခင်ကို ဂုဏ်ယူပါတယ်...]

"အဟွတ် အဟွတ် အဟွတ်..."

လင်းမြောင်ယန်သည် မြေပြင်ပေါ်သို့ လဲကျသွားပြီး သူမ၏မျက်နှာ ဖြူဖျော့နေကာ သွေးများကို အန်ထုတ်နေသည်။

သူမ၏အတွင်းအင်္ဂါများတွင် ဖြစ်ပေါ်နေသော ပြင်းထန်သည့်နာကျင်မှုနှင့် နှိုင်းယှဉ်လျှင်...

ခုံးဝူတောက်အပေါ် သူမ၏အကြည့်သည် မယုံကြည်နိုင်မှုများဖြင့် ပြည့်နှက်နေပေ၏။

အဘယ်ကြောင့်နည်း..

တစ်ဖက်လူက အဘယ်ကြောင့် သူမကို ဤသို့ ဆက်ဆံရသနည်း...

တစ်ဖက်လူသည် သူမ၏အလှကြောင့် ဆွဲဆောင်ခံလိုက်ရသည် မဟုတ်လော..

သူမ ကိုယ့်ကိုယ်ကိုယ် သံသယဝင်နေချိန်မှာပင်...

ခုံးဝူတောက်သည် ကောင်းကင်အလင်း မိုးပြာနဂါးပေါ်မှ ခုန်ဆင်းလာပြီးဖြစ်သည်။

သူက လက်ကိုနောက်ပစ်ထားကာ ဟင်းလင်းပြင်ကို ဖြတ်သန်း၍ လျှောက်လှမ်းလာသည်။

ခုံးဝူတောက်၏မျက်နှာအမူအရာက တည်ငြိမ်နေပြီး ပုံမှန်မဟုတ်သော စိတ်ခံစားမှုများကို မတွေ့ရသကဲ့သို့ ရှိနေပေ၏။

သို့သော် ကြီးမားသော မုန်တိုင်းတစ်ခု တိတ်တဆိတ် ဖြစ်ပေါ်နေသကဲ့သို့ ရှိပြီး ဤနေရာရှိ အခြေအနေကို အနည်းငယ် လေးလံထိုင်းမှိုင်းသွားစေသည်။

တစ်ဖက်လူသည် အလွန် ငယ်ရွယ်သော်လည်း ခမ်းနားသော မြင်ကွင်းများနှင့် ရင်းနှီးနေသော အင်မော်တယ် တာအိုအမွေအနှစ်မြေများမှ သံတမန်များအားလုံးကို ကြီးမားသော ဖိနှိပ်မှု ခံစားချက်အား ရရှိစေခဲ့သည်။

ဤအချိန်အခိုက်အတန့်တွင် သူတို့၏ မျက်နှာများ ဖြူဖျော့သွားပြီး သူတို့၏ နဖူးများမှ ချွေးစေးများ ကျဆင်းလာသည်။

ဤအခြေအနေကို မြင်သောအခါ လင်းမြောင်ယန်သည်လည်း တစ်စုံတစ်ခု မှားယွင်းနေပြီဖြစ်ကြောင်း နားလည်သဘောပေါက်သွားပေ၏။

သို့သော် သူမသည်လည်း အတွေ့အကြုံရင့် မာယာများသူတစ်ယောက် ဖြစ်သည်ဟု ဆိုရပေမည်။

သူမ ချက်ချင်း တုံ့ပြန်လိုက်ပြီး သူမ၏ လှပသော မျက်လုံးများတွင် မျက်ရည်များ ရုတ်တရက် ပြည့်နှက်လာသည်။

"နတ်ဘုရားသားတော် ခုံးဝူတောက်... ဘာလို့..."

သို့သော် လင်းမြောင်ယန်သည် သူမ၏ သနားစရာကောင်းသော သရုပ်ဆောင်မှုကို မစတင်နိုင်မီမှာပင်....

ဝုန်း...

ရုတ်တရက် အလွန်ကြောက်မက်ဖွယ်ကောင်းပြီး ကျယ်ပြန့်သော ဖိအားတစ်ခုက ခုံးဝူတောက်၏ ခန္ဓာကိုယ်အတွင်းမှ ထွက်ပေါ်လာပြီး သူ၏ ဟင်းလင်းပြင်နတ်ဘုရားနယ်ပယ် အရှိန်အဝါကို ထိန်ချန်ထားခြင်းမရှိ ဖော်ထုတ်လိုက်သည်။

ကျယ်ပြန့်သော ဖိအားသည် ဤနေရာသို့ ကျဆင်းလာသော အမြင့်မြတ်ဆုံး တောင်ကြီးတစ်တောင်အဖြစ် ပြောင်းလဲသွားသကဲ့သို့ဖြစ်ပြီး ဂါရဝပြုရန် လာရောက်ကြသော သံတမန်များကို ပို၍ပင် အသက်ရှူရ ခက်ခဲသွားစေသည်။

တစ်ချိန်တည်းမှာပင် ခုံးဝူတောက်အပေါ် သူတို့၏စိုးရိမ်မှုက ပို၍နက်ရှိုင်းလာသည်။

ဤမျှ ငယ်ရွယ်သောအရွယ်နှင့် ဟင်းလင်းပြင်နတ်ဘုရားနယ်ပယ်သို့ ရောက်ရှိနေခြင်းမှာ...

အကြီးအကဲ အများစုပင်လျှင် သူ့လောက် မစွမ်းဆောင်နိုင်ကြမည် မဟုတ်ချေ။

"ဟမ့်... မင်းရဲ့ ကိုယ်ပိုင်နေရာကို မင်း သိပ်မရှင်းလင်းဘူး ထင်တယ်..."

ခုံးဝူတောက်၏အသံက အေးစက်တင်းမာနေသည်။

"မင်းလို အဆင့်အတန်းရှိတဲ့ သူတစ်ယောက်က ဒီနတ်ဘုရားသားတော်ရဲ့ မျက်နှာသာပေးမှုကို ခံရဖို့ ထိုက်တန်တယ်လို့ မင်း တကယ်ကြီး ထင်နေတာလား..."

ဤစကားများသည် သံတမန်များစွာ၏ နှလုံးသားထဲတွင် ထိတ်လန့်သွားစေခဲ့သည်မှာ သေချာပေါက်ပင်။

"ဤသို့သော အဆင့်အတန်း" ဆိုသည်မှာ မည်သည့်အဓိပ္ပာယ်နည်း....

လင်းမြောင်ယန်သည် ပြန်လည်ဝင်စားခြင်း တာအိုဂိုဏ်း၏ သူတော်စင်မိန်းမပျိုဖြစ်ပြီး ပြန်လည်ဝင်စားခြင်း မဟာဧကရီ၏ တပည့်ရင်း ပင်။

သူမ၏အလှနှင့်ပါရမီက ထိပ်တန်းအဆင့်ဖြစ်ပြီး ပြန်လည်ဝင်စားခြင်း တာအိုနယ်မြေရှိ လူငယ်မျိုးဆက်သစ်များ၏ အိပ်မက်နတ်သမီးလည်း ဖြစ်ပေ၏။

သူမသည် ခုံးဝူတောက်၏ မျက်လုံးထဲတွင် မည်သည်ကြောင့် တန်ဖိုးမရှိသော အမှိုက် ဖြစ်သွားရသနည်း...

...

ခုံးဝူတောက် ခြေတစ်လှမ်း လှမ်းလိုက်တိုင်း သူ၏ခန္ဓာကိုယ်အတွင်းရှိ ကြောက်မက်ဖွယ်ကောင်းသောဖိအားက ပို၍ပြင်းထန်လာသည်။

ဤကြီးမားသောဖိအားကို တိုက်ရိုက်ရင်ဆိုင်နေရသော လင်းမြောင်ယန်သည် သူမ၏အရိုးများနှင့်အဆစ်များ အက်ကွဲသံကို ခံစားလိုက်ရသည်။

သူမ၏ခန္ဓာကိုယ်သည် အလိုအလျောက် ပို၍နိမ့်ကျစွာ ဒူးထောက်ကျသွားသည်။

"နတ်ဘုရားသားတော်သခင်... ကျွန်မ..."

လင်းမြောင်ယန်က ရှင်းပြချင်သေးသော်လည်း ဖိအားက ပို၍ကြောက်မက်ဖွယ်ကောင်းလာသည်။

ထိုဖိအားက သူမကို အလွန်ပြင်းထန်စွာ ဖိနှိပ်ထားသဖြင့် သူမ၏အတွင်းအင်္ဂါများ ပေါက်ကွဲထွက်တော့မည်ဟု ခံစားရပြီး နောက်ထပ်စကားတစ်ခွန်းမျှပင် မပြောနိုင်တော့ပေ။

သူမ အလွန်အမင်းနာကျင်မှုကို ခံစားနေရစဉ်မှာပင် သူမ၏စိတ်နှလုံးသားအတွင်း၌ အဆုံးမဲ့ နောင်တများဖြင့် ပြည့်နှက်နေသည်။

သူမ၏ ဉာဏ်နီဉာဏ်နက်လေးများကို ခုံးဝူတောက်က အချိန်အတော်ကြာကတည်းက ဖောက်ထွင်းမြင်ခဲ့ပြီးဖြစ်ကြောင်း သိသာထင်ရှားနေသည်။

သူမ အလွန်ဂုဏ်ယူခဲ့သော သူမ၏အလှနှင့် ရုပ်ခန္ဓာကိုယ်ကို သူ လုံးဝအထင်သေးနေခဲ့သည်။

သူမ မှားသွားခဲ့လေပြီ။ အစကတည်းက သူမ မှားယွင်းသွားခဲ့ခြင်းပင်။