အခန်း (၃၇-၃၈)

အခန်း (၃၇) မဟာဧကရီက ခေါင်းငုံ့ပြီး နတ်ဘုရားသားတော်ကို သနားညှာတာဖို့ တောင်းဆိုလာတယ်

ဤအချိန်အခိုက်အတန့်တွင် ခုံးဝူတောက်သည် လင်းမြောင်ယန်၏ရှေ့သို့ ရောက်ရှိနေလေပြီ။

ဤကြောက်မက်ဖွယ်ကောင်းသော ဖိအားအောက်တွင် လင်းမြောင်ယန်သည် ခေါင်းမော့ရန်ပင် မတတ်နိုင်ခဲ့ပေ။

သို့သော် သူမသည် နတ်ဘုရားတစ်ပါးကဲ့သို့ အထက်မှနေ၍ သူမကို နှိမ့်ချကြည့်နေသော အကြည့်တစ်ခုကို ခံစားမိသည်။ ထိုခံစားချက်မဲ့နေသော အကြည့်သည် သေလုမျောပါး လူတစ်ယောက်ကို ကြည့်နေသည့်အလားပင်။

ခုံးဝူတောက်ထံတွင် သနားညှာတာမှု အနည်းငယ်မျှပင် မရှိချေ။

ဤကြောက်မက်ဖွယ်ကောင်းသော ဖိအားအောက်တွင် အလွန်ဆုံး နောက်ထပ်ဆယ်စက္ကန့်ခန့်ကြာလျှင် လင်းမြောင်ယန်၏အတွင်းအင်္ဂါများ ပေါက်ကွဲထွက်သွားမည်ဖြစ်ပြီး သူမ သေဆုံးသွားပေလိမ့်မည်။

ရူးသွပ်စွာ ရုန်းကန်နေသော လင်းမြောင်ယန်ကို ကြည့်ရင်း ခုံးဝူတောက်၏မျက်နှာအမူအရာ အေးစက်တင်းမာနေသည်။

တခြားသူများ၏မျက်လုံးထဲတွင် အိပ်မက်နတ်သမီးဆိုသူသည် သူ၏မျက်လုံးထဲတွင်မူ ညစ်ပတ်သော ပုရွက်ဆိတ် တစ်ကောင်မျှသာ ဖြစ်ပေ၏။

သူ အမုန်းဆုံးအရာမှာ တခြားသူများ၏ ခြိမ်းခြောက်မှုကို ခံရခြင်းဖြစ်ပြီး ထိုနောက်တွင် သူ့အပေါ် အကြံအစည်ရှိသူများကိုဖြစ်သည်။

ထိုမိန်းကလေးသည် ကိုယ့်ကိုယ်ကိုယ် အထင်ကြီးနေရုံသာမက သူ့အပေါ် အကြံအစည်ရှိပြီး လှည့်စားချင်နေသည်။ သူမသည် အမှန်တကယ်ကို သေလမ်းရှာနေခြင်းပင်။

လူတိုင်းက အလွန်ကြောက်ရွံ့နေသဖြင့် အသက်ရှူအောင့်ထားကြပြီး ငရဲကိုးထပ်သို့ ကျရောက်သွားသကဲ့သို့ သူတို့၏ခန္ဓာကိုယ်များ လုံးဝအေးစက်သွားကြသည်။

ထို့ပြင် လင်းမြောင်ယန်၏ရုန်းကန်မှုများ တဖြည်းဖြည်း အားနည်းလာပြီး သူမ၏ချီ စွမ်းအင်တစ်ခုလုံး လွင့်စင်ပျောက်ကွယ်သွားတော့မည်ကို သူတို့ ကူကယ်ရာမဲ့စွာ ကြည့်နေကြရသည်။

အခြေအနေကို ကြည့်ရလျှင် ခုံးဝူတောက်သည် တစ်ဖက်လူကိုသတ်ရန် အမှန်တကယ် ရည်ရွယ်ထားပုံရသည်။

ဤမြင်ကွင်းကို မည်သူမျှ မမျှော်လင့်ထားခဲ့ကြပေ။

အချိန်လေဟာနယ် တားမြစ်နယ်မြေ၏ နတ်ဘုရားသားတော်သည် တကယ်ကို အာဏာရှင်ဆန်လွန်းလှ​၏။ သူက သဘောထား အနည်းငယ် ကွဲလွဲရုံဖြင့် လူတစ်ယောက်ကို သတ်ပစ်ပေလိမ့်မည်။

လင်းမြောင်ယန်၏အသိစိတ်များ ပို၍ဝေဝါးလာချိန်မှာပင်...

ဝီ...

သူမ၏ခန္ဓာကိုယ်သည် ရုတ်တရက် တောက်ပစွာ လင်းလက်လာပြီး အဆုံးမဲ့ ပြန်လည်ဝင်စားခြင်းအလင်းတန်းများက လှိုင်းထကာ ဆူပွက်လာသည်။

"နောက်ဆုံးတော့ ပေါ်လာပြီပေါ့..."

ခုံးဝူတောက်က မျက်ခုံးတစ်ချက် ပင့်လိုက်သည်။

သူသည် အချိန်အတော်ကြာကတည်းက ထိုအခြေအနေကို မျှော်လင့်ထားပြီးဖြစ်သည်။

လင်းမြောင်ယန်သည် ပြန်လည်ဝင်စားခြင်း မဟာဧကရီ၏ တပည့်ရင်း ဖြစ်နေသဖြင့်...

တစ်ဖက်လူတွင် ပြန်လည်ဝင်စား မဟာဧကရီ ၏ နတ်ဘုရားစိတ်ဝိညာဉ် တစ်စိတ်တစ်ပိုင်း သေချာပေါက် ရှိနေပေလိမ့်မည်။

သူ၏လုပ်ရပ်များသည် တစ်ဖက်လူကို အောင်မြင်စွာ ထွက်လာစေရန် ဖိအားပေးနိုင်ခြေ အလွန်များသည်။

သူသည် အစကတည်းက ဤရည်မှန်းချက်ကို ဦးတည်နေခဲ့သည်ဟု ဆိုနိုင်ပေ၏။

သေချာသည်မှာ သူ၏တွက်ချက်မှု မှားယွင်းသွားလျှင်ပင် ကိစ္စမရှိပေ။

အဆိုးဆုံးအခြေအနေတွင် သူက လင်းမြောင်ယန်ကို အရင်သတ်ပစ်လိုက်မည်။

သူမ၏ ကောင်းကင်အမိန့်တော်အမှတ်များအားလုံးကို စုပ်ယူပြီးနောက် ဤကိစ္စအတွက် ရှင်းလင်းချက်တောင်းရန် ပြန်လည်ဝင်စားခြင်း တာအိုဂိုဏ်းသို့ သွားရပေမည်။

ရလဒ်ကမူ အတူတူပင် ဖြစ်လိမ့်မည်... ပြန်လည်ဝင်စားခြင်း မဟာဧကရီသည် သူ၏ လက်ထဲသို့ ကျရောက်လာဆဲသာ ဖြစ်ပေလိမ့်မည်။

ထို့နောက် လူတိုင်း၏ အံ့သြမှင်သက်နေသော အကြည့်များအောက်တွင်..

လောကီနှင့် ကင်းကွာကာ သာလွန်ထူးကဲသည့် အရှိန်အဝါကို ထုတ်လွှတ်နေပြီး မြူခိုးများကဲ့သို့ ကြယ်ရောင်များဖြင့် ရစ်ပတ်နေသော အရပ်ရှည်ရှည်နှင့် ပြိုင်ဘက်ကင်းလောက်အောင် လှပသည့် အမျိုးသမီးတစ်ဦးသည် ပြန်လည်ဝင်စားခြင်း အလင်းတန်းများအတွင်းမှ ရုတ်တရက် သရုပ်ထင်ဟပ်လာသည်။

ဤသူမှာ တခြားသူမဟုတ်ဘဲ ပြန်လည်ဝင်စားခြင်း မဟာဧကရီပင်။

ပြန်လည်ဝင်စားခြင်း မဟာဧကရီသည် ခုံးဝူတောက်ဆီသို့ ရိုသေလေးစားစွာ သူမ၏လက်နှစ်ဖက်ကို ပူးဆုပ်ကာ အရိုအသေပေးလိုက်ပြီး သူမ၏အသံတွင် နှိမ့်ချစွာ တောင်းပန်မှုများဖြင့် ပြည့်နှက်နေသည်။

"ကျေးဇူးပြုပြီး နတ်ဘုရားသားတော် ခုံးဝူတောက်... သနားညှာတာပြီး ကျွန်မရဲ့ စကားနားမထောင်တဲ့ တပည့်ကို ချမ်းသာပေးပါ..."

ဤသည်မှာ နတ်ဘုရားစိတ်ဝိညာဉ်တစ်မျှင်သာ ဖြစ်သော်လည်း ပြန်လည်ဝင်စားခြင်း မဟာဧကရီ ထံမှ ထွက်ပေါ်လာသော မဟာဧကရာဇ်၏ဖိအားသည် ကြောက်မက်ဖွယ်ကောင်းနေဆဲပင်။

သို့သော် သူမသည် တိုက်ရိုက် တိုက်ခိုက်ပြီး ခုံးဝူတောက်၏ဖိအားကို ဖြေရှင်းရန် သူမ၏ ကိုယ်ပိုင်စွမ်းအားကို အသုံးပြုရဲခြင်း မရှိပေ။

မည်သို့ပင်ဆိုစေကာမူ ဤလုပ်ရပ်က သူ့ကို ပို၍ ဒေါသထွက်စေပြီး အခြေအနေကို ပိုဆိုးသွားစေနိုင်ခြေ အလွန်များသည်။

ထို့ပြင် ဤနေရာက အချိန်လေဟာနယ် တားမြစ်နယ်မြေ၏တံခါးဝပင်။

သူမ ဆင်းသက်လာသည့် အချိန်အခိုက်အတန့်တွင် ကြောက်မက်ဖွယ်ကောင်းသည့် မရေမတွက်နိုင်သော အကြည့်များက သူမအား စူးစိုက်ကြည့်နေသည်ကို သူမ ခံစားခဲ့ရသည်။

အကယ်၍ သူမက လှုပ်ရှားမှု တစ်ခုခုလုပ်ရန် ရဲတင်းမည်ဆိုလျှင် သူမ သေချာပေါက် သေဆုံးရမည်ဖြစ်ရုံသာမက ပြန်လည်ဝင်စားခြင်း တာအိုဂိုဏ်းပင်လျှင် အကြောင်းမဲ့ ဘေးဒုက္ခတစ်ခုကို ခံစားရပေလိမ့်မည်။

ခုံးဝူတောက်က သူမ၏မျက်နှာကို ထောက်ထားပြီး သူမတပည့်၏အသက်ကို ချမ်းသာပေးမည်ဟုသာ သူမ ဆုတောင်းနိုင်တော့သည်။

"ဆရာသခင်... ကျွန်မကို ကယ်ပါဦး..."

လင်းမြောင်ယန်သည် သူမ၏စွမ်းအားများအားလုံးကို အသုံးပြုကာ မျှော်လင့်ချက်မဲ့စွာဖြင့် နောက်ထပ်တောင်းပန်သံတစ်သံကို ထုတ်လွှတ်လိုက်၏။

သူမ၏စိတ်နှလုံးသားတွင် အဆုံးမဲ့ နောင်တများဖြင့် ပြည့်နှက်နေသည်။

ဤသို့ဖြစ်မည်မှန်း သူမ သိခဲ့လျှင် ခုံးဝူတောက်ကို သွားရန်စရန် ကိုယ့်ကိုယ်ကိုယ် အထင်မကြီးခဲ့သင့်ပေ။

သို့သော် သူမတပည့်၏ တောင်းပန်သံကို နားထောင်ရင်း ပြန်လည်ဝင်စားခြင်း မဟာဧကရီ သည် သူမ၏ နှုတ်ခမ်းနီနီလေးများကို တင်းတင်းစေ့ကာ တိတ်ဆိတ်နေခဲ့သည်။

သူမသည် ခေါင်းကိုပင် တစ်ဖက်သို့ လှည့်သွားပြီး သူမ၏တပည့်ကို ထပ်မကြည့်ချင်တော့ပေ။

သူမ၏နှလုံးသားထဲတွင် သက်ပြင်းမချဘဲ မနေနိုင်ခဲ့ပေ။

သူမ၏တပည့်သည် အမှန်တကယ်ကို အရူးတစ်ယောက်ဖြစ်ပြီး ဦးနှောက်မရှိသူပင်။

သူမ အစောပိုင်းက များစွာအလေးအနက်ထား၍ ပြောခဲ့ပြီးဖြစ်သည်။

ဤသို့သော နည်းလမ်းများဖြင့် ခုံးဝူတောက်ကို လုံးဝရန်မစရန်ပင်။

သို့သော် တစ်ဖက်လူက ဂရုမစိုက်ခဲ့ပေ။

ထိုအစား သူမက မောက်မာထောင်လွှားပြီး ခုံးဝူတောက်၏ဒေါသကို တက်ကြွစွာ ရန်စခဲ့သည်။

အကယ်၍ သူမသာ ကြိုတင်ပြင်ဆင်မှုများ လုပ်မထားခဲ့လျှင်....

ထို့ပြင် အဆိုးဆုံးအခြေအနေကို ကာကွယ်ရန်အတွက် လင်းမြောင်ယန်၏ ခန္ဓာကိုယ်ပေါ်တွင် သူမ၏ နတ်ဘုရားစိတ်ဝိညာဉ်တစ်မျှင်ကို ချန်မထားခဲ့လျှင်....

လင်းမြောင်ယန် တစ်ခုခု ဖြစ်သွားရုံသာမက ပြန်လည်ဝင်စားခြင်း တာအိုဂိုဏ်းမှ လူတိုင်းလည်း အပြစ်ဒဏ် ခံရလောက်သည်။

သို့သော် ယခုချိန်၌ ကိစ္စက ဖြစ်သွားပြီဖြစ်ရာ....

သူမပင်လျှင် ဝင်ရောက်စွက်ဖက်၍ မရနိုင်ဘဲ ခုံးဝူတောက်၏ ဆုံးဖြတ်ချက်ကို စောင့်ဆိုင်းရပေမည်။

...

ဤသည်ကို မြင်သောအခါ ခုံးဝူတောက်သည်လည်း အနည်းငယ် အံ့အားသင့်သွားသည်။

လင်းမြောင်ယန်၏ ဆရာသခင်သည် မဟာဧကရာဇ်နယ်ပယ် ကျွမ်းကျင်သူတစ်ဦးဖြစ်ပြီး သက်ရှိထင်ရှား မဟာဧကရာဇ်တစ်ပါး ဖြစ်နေလိမ့်မည်ဟု သူ မမျှော်လင့်ထားခဲ့ပေ။

သို့သော် သူသည် ဤကိစ္စကို လုံးဝဂရုမစိုက်ပေ။

သူ၏အကြည့်က တစ်ဖက်လူကို တုံ့ဆိုင်းမနေဘဲ ကြည့်လိုက်ပြီး သူမ၏အချက်အလက်ဇယားကို စစ်ဆေးလိုက်၏။

[အမည်: ချူယွင်ရှီး ဧကရာဇ်...ပြန်လည်ဝင်စားခြင်း မဟာဧကရီ

နယ်ပယ်: အဆင့်ကိုး မဟာဧကရာဇ်...လောကီဧကရာဇ် (ဒုတိယဘဝ)]

ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသမီး ပြန်လည်ဝင်စားခြင်း တာအိုဂိုဏ်းရဲ့ အထွတ်အထိပ် ရှေးဟောင်းဘိုးဘေးကြီး

ရုပ်ခန္ဓာကိုယ်: ယင်ယန် ပြန်လည်ဝင်စားခြင်း နတ်ဘုရားရုပ်ခန္ဓာကိုယ် အကြီးစား အောင်မြင်မှုအဆင့်

ကျင့်စဉ်: လမ်းစဉ်ခြောက်သွယ် ပြန်လည်ဝင်စားခြင်းကျင့်စဥ် စိတ်ဝိညာဉ် အသွင်ပြောင်းခြင်း နှလုံးသားကျမ်းစာ ဘဝသုံးပါး ဧကရာဇ်ကျမ်းစာ...

ရတနာများ: ပြန်လည်ဝင်စားခြင်း စည်းတံဆိပ် မူလဘူတ ပုလဲ...

ကောင်းကင်အမိန့်တော်အမှတ်: ????? ]

ဤ အချက်အလက်ဇယားကို မြင်သောအခါ ခုံးဝူတောက်သည်လည်း အနည်းငယ် အံ့အားသင့်သွားသည်။

ပြန်လည်ဝင်စားခြင်း မဟာဧကရီ၏ အချက်အလက်ဇယားတွင် မှတ်သားလောက်စရာ အချက်အနည်းငယ် ရှိနေသည်။

ဥပမာအားဖြင့် သူမ၏ကျင့်ကြံဆင့်နယ်ပယ် ပြီးနောက် "ဒုတိယဘဝ" ဟူသော ကြီးမားသည့် စာလုံးသုံးလုံးပင်။

ခုံးဝူတောက်၏တွေဝေမှုကို အာရုံခံမိသည့်အလား စနစ်က ချက်ချင်းစကားပြောဆိုလာသည်။

[သခင်... စနစ်ရဲ့ စစ်ဆေးမှုအရ ပြန်လည်ဝင်စားခြင်း မဟာဧကရီ ချူယွင်ရှီးက ပြန်လည်မွေးဖွားလာသူ တစ်ယောက်ပါ... ဒီဘဝက သူမရဲ့ ဒုတိယဘဝ ဖြစ်တဲ့အတွက် စနစ်က အထူး မှတ်သားထားတာပါ...]

ပြန်လည်မွေးဖွားသူလား...

စနစ်၏ပြောဆိုချက်ကို ကြားသောအခါ ခုံးဝူတောက် ပို၍ပင် အံ့အားသင့်သွားသည်။

ကောင်းကင်ကံကြမ္မာ ဇာတ်လိုက်များဆိုသည်မှာ လူငယ် အထွတ်အထိပ်ပါရမီရှင်များ၏ အတိုင်းအတာအတွင်း၌သာ ကန့်သတ်ထားသင့်သည်ဟု သူ တွေးထင်ခဲ့သည်။

မဟာဧကရာဇ်နယ်ပယ်သို့ ရောက်ရှိပြီးသော တည်ရှိမှုတစ်ခုကလည်း ကောင်းကင်ကံကြမ္မာပိုင်ရှင်တစ်ယောက် ဖြစ်နေလိမ့်မည်ဟု သူ မျှော်လင့်မထားခဲ့ပေ။

"အဲ့ဒီလိုဆိုရင်... ဒုတိယဘဝကို အသက်ရှင်နေတဲ့ ပြန်လည်ဝင်စား မဟာဧကရီက သူ့ရဲ့ အရင်ဘဝက သမိုင်းကြောင်းကို သိနေနိုင်ခြေ အရမ်းများတယ်..."

"သူက အနာဂတ်မှာ ဖြစ်လာမည့် ကိစ္စတွေကိုတောင် ကြိုတင်ပြီး ဟောကိန်းထုတ်နိုင်လောက်တယ်..."

အခြားတစ်ခုခုကို တွေးမိသည့်အလား ခုံးဝူတောက်က ဆက်လက်၍ ပြောဆိုလိုက်သည်။

"ဒါပေမယ့် ပြန်လည်ဝင်စားခြင်း မဟာဧကရီရဲ့ ကောင်းကင်အမိန့်တော်အမှတ်တွေက ဘာလို့ မေးခွန်းသင်္ကေတတွေ ဖြစ်နေရတာလဲ..."

[သခင်ကို ပြန်လည်ဖြေကြားရရင် ဒီနေရာမှာ ရှိနေတာက ပြန်လည်ဝင်စား မဟာဧကရီရဲ့ နတ်ဘုရားစိတ်အာရုံ တစ်မျှင်သာ ဖြစ်ပြီး တစ်ဖက်လူရဲ့ ကောင်းကင်အမိန့်တော်အမှတ်တွေက အရမ်းမြင့်မားနေလို့ပါ... ပိုပြီးတိတိကျကျ သိရဖို့အတွက် သူ့ရဲ့ အစစ်အမှန်ခန္ဓာကိုယ်ကို မြင်တွေ့ဖို့ လိုအပ်ပါတယ်...]

"အရမ်းမြင့်မားတဲ့ ကောင်းကင်အမိန့်တော်အမှတ်တွေလား..."

ဤသည်က ခုံးဝူတောက်ကို ပို၍ပင် စိတ်ဝင်စားသွားစေသည်။

သူမက ဒုတိယဘဝကို အသက်ရှင်နေရုံသာမက အကြီးစား အောင်မြင်မှုအဆင့်ရှိသော ယင်ယန် ပြန်လည်ဝင်စားခြင်း နတ်ဘုရားရုပ်ခန္ဓာကိုယ် ကိုလည်း ပိုင်ဆိုင်ထားသည်။

ယင်ယန် ပြန်လည်ဝင်စားခြင်း နတ်ဘုရားရုပ်ခန္ဓာကိုယ်သည် မဟာတာအို ရုပ်ခန္ဓာကိုယ်သုံးထောင်ထဲတွင် ထိပ်ဆုံးစာရင်းဝင် ရုပ်ခန္ဓာကိုယ် များထဲမှ တစ်ခုလည်း ဖြစ်သည်။

ထိုသို့သော ထိပ်တန်းအဆင့် ရုပ်ခန္ဓာကိုယ် များအတွက် အကြီးစား အောင်မြင်မှုအဆင့်သို့ ရောက်ရှိရန် အလွန် မြင့်မားသော နားလည်သဘောပေါက်နိုင်စွမ်း လိုအပ်ပေ၏။

အကြီးစား အောင်မြင်မှုအဆင့်အထိ ကျင့်ကြံနိုင်သူများသည် သာမန်လောကတွင် ရှားပါးသည်ဟု ယူဆရပြီဖြစ်ရာ တစ်ဖက်လူက ပြန်လည်ဝင်စားခြင်းကို ဖြတ်သန်းနိုင်ခဲ့သည်မှာ အံ့အားသင့်စရာ မဟုတ်ပေ။

ထိုအရာသည် သူမ၏ အကြီးစားအောင်မြင်မှုအဆင့် ရှိသော ယင်ယန် ပြန်လည်ဝင်စားခြင်း နတ်ဘုရားရုပ်ခန္ဓာကိုယ်ကြောင့်လည်း ဖြစ်နိုင်သည်ဟု ယူဆရသည်။

ထို့ပြင် တစ်ဖက်လူသည် မဟာဧကရာဇ်တစ်ပါးပင်။

ထိုသို့သော ကျင့်ကြံခြင်းနှင့် ပေါင်းစပ်လိုက်လျှင် သူမက အားစိုက်ထုတ်ရန်မလိုဘဲ အဆင့်ကိုး မဟာဧကရာဇ်နှစ်ပါးကိုပင် တိုက်ခိုက်နိုင်လောက်သည်။

ယင်ယန် ပြန်လည်ဝင်စားခြင်း နတ်ဘုရားရုပ်ခန္ဓာကိုယ်ကို ယင်ယန် ပြန်လည်ဝင်စားခြင်း ရုပ်ခန္ဓာကိုယ်ထက်ပင် ပို၍ရှားပါးသော မီးပြင်းဖိုရုပ်ခန္ဓာကိုယ်အဖြစ် လူသိများသည်။

သေချာသည်မှာ သူမသည် မဟာဧကရီ တစ်ပါးဖြစ်ပြီး ပြန်လည်ဝင်စားခြင်း တာအိုဂိုဏ်း၏ ရှေးဟောင်းဘိုးဘေးကြီးပင်။

အနိမ့်ဆုံး နယ်ပယ်ရှိ အဆင့်ကိုး မဟာဧကရာဇ် တစ်ပါးပင်လျှင် အခွင့်အရေးယူနိုင်သော လူစားမျိုး မဟုတ်ပေ။

"သူ့ကို တိုက်ရိုက်သတ်ပစ်လိုက်ရမလား..."

ခုံးဝူတောက် အတွေးထဲ နစ်မျောသွားသည်။

တစ်ဖက်လူ၏ကျင့်ကြံဆင့်က မြင့်မားလွန်းနေသည်။ သူ၏ လက်ရှိကျင့်ကြံဆင့်ဖြင့် သူမကို အမဲလိုက်ရန်မှာ လုံးဝမဖြစ်နိုင်ပေ။

သူမကို အမဲလိုက်ရန် သူ၏အချိန်လေဟာနယ် တားမြစ်နယ်မြေ နောက်ကွယ်ရှိ အစွမ်းထက်သော ပုဂ္ဂိုလ်များကိုသာ သူ အားကိုးနိုင်သည်။

သေချာသည်မှာ ဤကိစ္စအတွက် အချိန်လေဟာနယ် တားမြစ်နယ်မြေ၏ စွမ်းအားကို အသုံးပြုရန်ကိုလည်း သူ အရှက်ရမိသည်။

မည်သို့ပင်ဆိုစေကာမူ သူသည် မကြာသေးမီကမှ နိုးထလာခဲ့ခြင်း ဖြစ်ပေ၏။

သူ များစွာတွေးတောပြီးနောက်ယဉ်ပါးအောင် သွေးဆောင်ခြင်း လမ်းကြောင်းကသာ ပို၍သင့်တော်ပုံရသည်။

မဟာဧကရီတစ်ပါးကို ယဉ်ပါးအောင် သွေးဆောင်ခြင်းက အလွန် ခက်ခဲသော်လည်း...

သို့သော် ထိုအရာက အရမ်းစိတ်ဝင်စားစရာကောင်းမည်မဟုတ်လော...

...

အခန်း (၃၈) လင်းမြောင်ယန်ကို သတ်ဖြတ်ခြင်း... ထူးခြားတဲ့ ဝါသနာရှိတဲ့ နတ်ဘုရား အင်ပါယာရဲ့ နန်းမွေခံမင်းသမီးလား

အချိန်များ တစ်စက္ကန့်ပြီးတစ်စက္ကန့် ကုန်ဆုံးသွားသည်။

ပတ်ဝန်းကျင်နေရာတဝိုက်လုံး သုသာန်တစပြင်ကဲ့သို့ တိတ်ဆိတ်နေသည်။

ထိုနေရာရှိ ကျင့်ကြံသူများအားလုံး အသက်ရှူအောင့်ထားပြီး လင်းမြောင်ယန်၏သက်စောင့်စွမ်းအားများ ယိုစိမ့်ထွက်သွားသည်ကို ကြည့်နေကြသည်။

ဤအချိန်အတောအတွင်း၌ ခုံးဝူတောက်သည် အစမှအဆုံးတိုင် သူ၏ အရှိန်အဝါကို အနည်းငယ်မျှပင် မလျှော့ချခဲ့ချေ။

ထိုအစား သူက ပြန်လည်ဝင်စားခြင်း မဟာဧကရီကို နောက်ပြောင်ကျီစယ်လိုသော မျက်နှာအမူအရာဖြင့် ကြည့်နေသည်။

တစ်ဖက်လူက ပြန်လည်မွေးဖွားသူ ဖြစ်နေသဖြင့် သူမသည် အနာဂတ်အကြောင်း ကိစ္စများစွာကို သေချာပေါက် သိနေရပေမည်။

လင်းမြောင်ယန်က သူ့ဆီ ဤသို့ ချဉ်းကပ်လာခြင်းမှာ ပြန်လည်ဝင်စားခြင်း မဟာဧကရီ၏ ညွှန်ကြားချက်ကြောင့် ဖြစ်နိုင်ခြေ အလွန်များပြီး သူမထံတွင် လျှို့ဝှက်ရည်ရွယ်ချက်များ ရှိနေနိုင်သည်။

အကယ်၍ သူသာ မည်သည့်အစီအမံမှ မလုပ်လျှင် တစ်ဖက်လူက သူ့ကို အခွင့်အရေး ယူသွားနိုင်ခြေ များစွာရှိသည်။

ခုံးဝူတောက်က ခေါင်းခါယမ်းပြီး ရယ်မောလိုက်၏။

"ဟဲ ဟဲ... ငါ့ရဲ့ရှေ့မှာ ဉာဏ်နီဉာဏ်နက်တွေ သုံးပြီး ငါ့အပေါ် မကောင်းတဲ့ ရည်ရွယ်ချက်တွေ ထားရဲတဲ့သူတွေကို ငါ ရွံရှာတယ်..."

သူ၏အသံဆုံးသွားသည်နှင့်အမျှ ခုံးဝူတောက်က ကန်ကျောက်လိုက်သည်။

'ဘုန်း'ခနဲ အသံတစ်ခုကိုသာ ကြားလိုက်ရပြီးနောက်..

ခုံးဝူတောက်၏ မြေကြီးပေါ်သို့ ဖိနှိပ်ထားခြင်းကို ခံနေရသော လင်းမြောင်ယန်သည် ကြောက်မက်ဖွယ်ကောင်းသော စွမ်းအားတစ်ခု၏ ရိုက်ခတ်မှုကို ချက်ချင်းခံလိုက်ရသည်။

သူမ၏ရင်ဘတ်ရှိ နံရိုးအနည်းငယ် ကျိုးသွားပြီး သွေးများပန်းထွက်လာကာ ဝေးကွာသော ကြယ်တာရာ ကောင်းကင်ယံဆီသို့ ပြင်းထန်စွာ ကျဆင်းသွားစဉ် မြင့်မားသော မျဉ်းကွေးတစ်ခုအဖြစ် ပြောင်းလဲသွားသည်။

လင်းမြောင်ယန်သည် လူသူကင်းမဲ့သော ကြယ်အကြွင်းအကျန်တစ်ခုပေါ်သို့ ပြင်းထန်စွာ ကျဆင်းသွားမှသာ သူမ၏ကျဆင်းမှုကို ရပ်တန့်သွားစေနိုင်ခဲ့သည်။

သို့သော် ဤအချိန်အခိုက်အတန့်တွင် လင်းမြောင်ယန်သည် အလွန်အမင်း အားနည်းနေပြီး သူမ၏ရင်ဘတ် ချိုင့်ဝင်နေကာ သူမ၏ အဝတ်အစားများ၌ သွေးများစွန်းထင်းနေပေ၏။

သူမ၏ခန္ဓာကိုယ်တစ်ခုလုံးသည် နာကျင်မှုကြောင့် တုန်ရီနေပြီး သွေးအမြှုပ် အမြောက်အများကို အန်ထုတ်နေသည်။

ဤအချိန်အခိုက်အတန့်တွင် သူမသည် ခုံးဝူတောက်ကို လုံးလုံးလျားလျား ကြောက်ရွံ့သွားခဲ့လေပြီ။

သူမ၏ဆရာသခင် ဤနေရာတွင် ရှိနေသော်လည်း တစ်ဖက်လူက သူမကို ဤမျှထိ ရက်စက်စွာ တိုက်ခိုက်ရဲလိမ့်မည်ဟု သူမ ဘယ်သောအခါမှ မမျှော်လင့်ထားခဲ့ပေ။

သူမကို ပို၍မျှော်လင့်ချက်မဲ့သွားစေသည်မှာ သူမ၏ ဆရာသခင်သည် ခုံးဝူတောက်ကို မကျေမနပ်ဖြစ်စေမည်အား ရှောင်ရှားရန်အတွက် အစမှအဆုံးတိုင် ဝင်မပါဘဲ ရပ်ကြည့်နေခဲ့ခြင်းပင်။

သူမသည် ယောက်ျားတစ်ယောက်ကို ရန်စခဲ့မိသလော။

မဟုတ်ပေ....သူသည် သက်ရှိထင်ရှား ငရဲမင်းကြီးပင်။

"ရှီး..."

ဤမြင်ကွင်းကို မြင်တွေ့ချိန်၌ လူတိုင်း အသက်ရှူမှားသွားကြပြီး သူတို့၏မျက်လုံးများ ပြူးကျယ်သွားကာ ဦးရေပြားများပင် ထုံကျင်သွားကြသည်။

ရက်စက်လိုက်တာ...

ခုံးဝူတောက်သည် အမှန်တကယ်ကို အလွန်ရက်စက်လွန်းပေ၏။

လင်းမြောင်ယန်သည် ပြန်လည်ဝင်စားခြင်း မဟာဧကရီ၏ တပည့်ရင်းဖြစ်ပြီး ယှဉ်ပြိုင်၍မရနိုင်လောက်အောင် မြင့်မြတ်သော အဆင့်အတန်းကို ပိုင်ဆိုင်ထားကြောင်း လူတိုင်း သိကြသည်။

သို့သော် ယခုချိန်၌ ပြန်လည်ဝင်စားခြင်း မဟာဧကရီ၏ နတ်ဘုရားစိတ်အာရုံတစ်ခု ဆင်းသက်လာခဲ့သည့်တိုင်....

ခုံးဝူတောက်သည် ဤမျှထိ ရက်စက်စွာ တိုက်ခိုက်ရဲသေးသည်။ သူသည် တကယ်ကို အကြွင်းမဲ့ ရက်စက်သူတစ်ယောက်ပင်။

ဤသည်က သူတို့ကို ကြောက်ရွံ့သွားစေပြီး ခုံးဝူတောက်အပေါ်ကြည့်သော သူတို့၏အကြည့်များတွင် ပို၍ပင် အံ့အားသင့်ရိုသေမှုများ ထင် ဟပ်လာခဲ့သည်။

အချိန်လေဟာနယ် တားမြစ်နယ်မြေ၏ နတ်ဘုရားသားတော်သည် အမှန်တကယ်ကို ကြုံရာကျပန်းလူတစ်ယောက်က ရန်စ၍ရသည့်သူ မဟုတ်ပေ။

...

လူတိုင်းက ခုံးဝူတောက်သည် သူမကို အပြစ်ပေးရုံသာဟု ထင်နေကြချိန်မှာပင်....

"ဒါပေမယ့် ငါ တောင်းပန်ပါတယ်..."

"တခြားသူတွေက ငါ့အပေါ် ထူးဆန်းတဲ့ အတွေးတွေ တွေးရဲတာကို ငါ ရွံရှာတယ်..."

"ဒါကြောင့် စီနီယာ... ကျေးဇူးပြုပြီး အနာဂတ်မှာ တပည့်အသစ်တစ်ယောက် ရှာလိုက်ပါ..."

သူ၏ အသံဆုံးသွားသည်နှင့်အမျှ သတိပေးချက် မရှိဘဲ ခုံးဝူတောက်သည် သူ၏ လက်ကို တိုက်ရိုက်မြှောက်ကာ လက်ဝါးရိုက်ချက်တစ်ချက်ကို ထုတ်လွှတ်လိုက်သည်။

ဝုန်း...

လှိုင်းထနေသော နတ်ဘုရားအလင်းတန်းများသည် အထက်သို့ ပျံ့နှံ့သွားပေ၏။

အရာအားလုံးကို ဖျက်ဆီးနိုင်သော အရှိန်အဝါကို သယ်ဆောင်လာသည့် ရွှေရောင်လက်ဝါးပုံရိပ်ယောင်ကြီးတစ်ခုသည် လေထဲတွင် လင်းမြောင်ယန်ဆီသို့ ဆင်းသက်လာသည်။

"ခုံးဝူတောက်... နင်..."

လင်းမြောင်ယန်၏မျက်နှာအမူအယာ သိသိသာသာ ပြောင်းလဲသွားသည်။

သူမ၏ဆရာသခင် ဤနေရာ၌ ရှိနေသည့်တိုင်....

တစ်ဖက်လူက သူမ၏ဆရာသခင်ရှေ့မှာ သူမကို မည်သည်ကြောင့် သတ်ဖြတ်ရန် ကြိုးစားရဲသနည်း.....

သူမသည် ပြင်းထန်စွာ ဒဏ်ရာရရှိနေပြီဖြစ်ရာ ခုံးဝူတောက်ကို မည်သို့ ယှဉ်ပြိုင်နိုင်မည်နည်း....

"ဆရာသခင်... ကျွန်မကို ကယ်ပါဦး..."

သူမ၏ဆရာသခင်ထံမှ အကူအညီကို မျှော်လင့်ချက်မဲ့စွာ တောင်းပန်ရန်အတွက် သူမ၏စွမ်းအားများအားလုံးကိုသာ သူမ အသုံးပြုနိုင်တော့သည်။

သို့သော် ပြန်လည်ဝင်စားခြင်း မဟာဧကရီက မည်သို့ လှုပ်ရှားရဲမည်နည်း။

ဤအချိန်အခိုက်အတန့်တွင် သူမသည် ကြောက်မက်ဖွယ်ကောင်းသော စွမ်းအားတစ်ခု၏ ချိတ်ပိတ်ခြင်းကို ခံထားရသည်။

ထိုအရာက အချိန်လေဟာနယ် တားမြစ်နယ်မြေ၏ အနက်ရှိုင်းဆုံးနေရာမှ လာခြင်းဖြစ်သည်မှာ သိသာထင်ရှားသည်။

အကယ်၍ သူမက အနည်းငယ်မျှ လှုပ်ရှားရဲမည်ဆိုလျှင် သူမသည် မြေမြှုပ်သင်္ဂြိုဟ်စရာ နေရာမရှိဘဲ သေချာပေါက် သေရပေလိမ့်မည်။

သူမ၏ ယခင်ဘဝမှ အတွေ့အကြုံများက ခုံးဝူတောက်နှင့် ပတ်သက်၍ စိတ်ပိုင်းဆိုင်ရာ အရိပ်မည်းတစ်ခုကို ဖန်တီးထားပြီးကြောင်းကို ထည့်ပြောနေရန်ပင် မလိုတော့ချေ။

အကယ်၍ သူမက သူမ၏ပုန်ကန်တတ်သော တပည့်ကို ကယ်တင်ရန် လှုပ်ရှားမည်ဆိုလျှင် သူမသည် မြေမြှုပ်သင်္ဂြိုဟ်စရာ နေရာမရှိဘဲ သေချာပေါက် သေရပေလိမ့်မည်။

ဖူး...

ရွှေရောင်လက်ဝါးပုံရိပ်ယောင်ကြီးသည် လင်းမြောင်ယန်၏ခန္ဓာကိုယ်ကို ချက်ချင်းခြေမွှဖျက်ဆီးလိုက်၏။

တောက်ပသော အရိုးဖြူ အပိုင်းအစများနှင့် ရောနှောနေသော လွင့်စင်လာသည့် သွေးများသည် ဟင်းလင်းပြင်တွင် မီးရှူးမီးပန်းများကဲ့သို့ ပွင့်လန်းလာသည်။

လင်းမြောင်ယန်သည် ခုခံနိုင်စွမ်း မရှိဘဲ ဖျက်ဆီးခံလိုက်ရပြီး သူမ၏နတ်ဘုရားစိတ်ဝိညာဉ် လုံးလုံးလျားလျား ပျောက်ကွယ်သွားသည်။

[ဒင်... သခင်က ကောင်းကင်ကံကြမ္မာ ဇာတ်လိုက်မင်းသမီးရဲ့တပည့် လင်းမြောင်ယန်ကို အောင်မြင်စွာ အမဲလိုက်နိုင်ခဲ့ပြီးတော့ သူ့ရဲ့ ကျန်ရှိနေတဲ့ ကောင်းကင်အမိန့်တော်အမှတ် ၄၀၀၀ကို ရရှိပါတယ်...]

ကောင်းကင်နှင့်မြေကြီးအကြား၌ တိတ်ဆိတ်သွားလေ၏။

လူများအားလုံး အလွန်အမင်း ထိတ်လန့်သွားကြပြီး ခုံးဝူတောက် ရုတ်တရက် တိုက်ခိုက်လိမ့်မည်ဟု လုံးဝမျှော်လင့်မထားခဲ့ကြပေ။

သူက တစ်ဖက်လူ၏တပည့်ကို မဟာဧကရီ တစ်ပါးရှေ့၌ လူသိရှင်ကြား သတ်ပစ်လိုက်ပြီး ညှိနှိုင်းရန် အခွင့်အရေးပင် မပေးခဲ့ချေ။

သူက တကယ်ကို အာဏာရှင်ဆန်လွန်းတယ်..

ဤသည်က သူတို့ကို ကြောက်ရွံ့သွားစေပြီး တစ်ချိန်တည်းမှာပင် ခုံးဝူတောက်အပေါ် သူတို့၏ရိုသေလေးစားမှုက ပို၍ပင် အားကောင်းလာခဲ့သည်။

ကောင်းကင်ဘုံများနှင့်အင်္သချေနယ်မြေများ အားလုံးတွင် သူတို့ အကြောက်ဆုံးအရာမှာ သူ၏စိတ်ခံစားမှုများနှင့် ဆန္ဒများကို မပြသသော ဤကဲ့သို့ ခန့်မှန်းရခက်သည့် လူတစ်ယောက်နှင့် ကြုံတွေ့ရခြင်းပင်။

မည်သို့ပင်ဆိုစေကာမူ ထိုသို့သောလူက ဘာလိုချင်သလဲ သို့မဟုတ် ဘာလုပ်ရန် ရည်ရွယ်ထားသလဲဆိုတာကို မည်သူမျှ ခန့်မှန်း၍မရနိုင်ပေ။

ဖြစ်နိုင်တာက အစပိုင်းမှာ သူက သနားညှာတာစွာနဲ့ မင်းကို မျှော်လင့်ချက် ပေးလိမ့်မယ်...

ဒါပေမယ့် နောက်တစ်စက္ကန့်မှာပဲ သူက မင်းကို မျှော်လင့်ချက်မဲ့ ချောက်ကမ်းပါးထဲကို ချက်ချင်း တွန်းချပစ်လိမ့်မယ်...

သို့သော် ပြန်လည်ဝင်စားခြင်း မဟာဧကရီသည် လူတိုင်း စိတ်ကူးထားသကဲ့သို့ ဒေါသတကြီး ပေါက်ကွဲမလာခဲ့ပေ။ ထိုအစား သူမ၏မျက်နှာ သိသိသာသာ ဖြူဖျော့နေသည်။

ပြန်လည်ဝင်စားခြင်း မဟာဧကရီသည် အပြင်ပန်းတွင် တည်ငြိမ်နေပုံပေါ်သော်လည်း....

သူမ၏ခန္ဓာကိုယ်တစ်ခုလုံးသည် ရေခဲလှိုဏ်ဂူထဲသို့ ကျရောက်သွားသကဲ့သို့ ခံစားနေရသည်။

ပြီးဆုံးသွားပြီ...

ခုံးဝူတောက်သည် သူမ၏ယခင်ဘဝတွင် အမြဲတစေ ခန့်မှန်းရခက်သော လူတစ်ယောက် ဖြစ်ခဲ့သည်။

ယခု သူသည် သူမ၏တပည့်ကို တိုက်ရိုက် သတ်ပစ်လိုက်လေပြီ။

သူသည် အချိန်လေဟာနယ် တားမြစ်နယ်မြေမှ ကျွမ်းကျင်သူများကို သူမနှင့် ပြန်လည်ဝင်စားခြင်း တာအိုဂိုဏ်းကိုလည်း လုံးဝဖျက်ဆီးပစ်ရန် အမိန့်ပေးမည် မဟုတ်လော....

ထိုအကြောင်းကို တွေးတောမိချိန်တွင်...

ပြန်လည်ဝင်စားခြင်း မဟာဧကရီသည် ထိတ်လန့်နေစဉ်မှာပင် သူမ၏နှလုံးသားအတွင်း၌ အဆုံးမဲ့နောင်တများဖြင့် ပြည့်နှက်နေသည်။

သူမကိုယ်တိုင် ခုံးဝူတောက်ဆီ သွားခဲ့သင့်တယ်... အဲ့ဒီအရူးနဲ့ ဦးနှောက်မရှိတဲ့ တပည့်ကို ဒီလောက် မဆင်မခြင် ပြုမူခွင့် မပေးခဲ့သင့်ဘူး...

ယခု သူမသည် သူမ၏ယခင်ဘဝမှ ရန်ငြိုးများကို စွန့်လွှတ်လိုက်ပြီး ခုံးဝူတောက်ကို လက်စားချေရန် ရည်ရွယ်ချက် မရှိတော့သော်လည်း....

သူမ၏ ပုန်ကန်တတ်သောတပည့် ပြုလုပ်ခဲ့သော ထောင်ချောက်ထဲသို့ သူမ ကျရောက်သွားခဲ့လေပြီ။

ဤပုန်ကန်တတ်သော တပည့်သည် အမှန်တကယ် သေသင့်သည်။

ပြန်လည်ဝင်စားခြင်း မဟာဧကရီသည် သူမ၏ နှလုံးသားထဲတွင် ဝမ်းနည်းမှုနှင့် ဒေါသများကို ခံစားရစဉ် ခုံးဝူတောက်၏အကြည့်က သူမဆီသို့ ရောက်လာကြောင်းကိုလည်း ရုတ်တရက် သတိပြုလိုက်မိသည်။

ခုံးဝူတောက်က သူမနှင့် ပြန်လည်ဝင်စားခြင်း တာအိုဂိုဏ်းကို အတူတကွ ဖျက်ဆီးပစ်မည့် သူ၏ရည်ရွယ်ချက်ကို ကြေညာတော့မည်ဟု သူမ တွေးထင်လိုက်စဉ်မှာပင်...

ခုံးဝူတောက်က သူ၏အရှိန်အဝါကို ရုပ်သိမ်းလိုက်ပြီး သူ၏အမူအယာသည် နွေဦးလေနုအေးကို ခံစားနေရသည့် ခံစားချက်မျိုး ပေးစွမ်းနေသည်။

"ပြန်လည်ဝင်စားခြင်း မဟာဧကရီ....စီနီယာက ထိတ်လန့်စရာ မလိုပါဘူး..."

ခုံးဝူတောက်က အပြုံးဖျော့ဖျော့ဖြင့် ပြောဆိုလိုက်သည်။

"အမှားတိုင်းမှာ အဲ့ဒါကို ကျူးလွန်တဲ့သူ ရှိတယ်... ပြီးတော့ ငါက သဘောထားသေးသိမ်တဲ့သူ မဟုတ်ပါဘူး..."

ထိုစကားကို ကြားချိန်၌....

ပြန်လည်ဝင်စားခြင်း မဟာဧကရီသည် အလွန်အမင်း အံ့အားသင့်သွားပေ၏။

သို့သော် သူမ လျင်မြန်စွာ ပြန်လည်အသိဝင်လာပြီး အလျင်အမြန် ဦးညွှတ်လိုက်သည်။

"နတ်ဘုရားသားတော် ခုံးဝူတောက်ရဲ့ သက်ညှာမှုအတွက် ကျေးဇူးတင်ပါတယ်..."

"နတ်ဘုရားသားတော် ခုံးဝူတောက်က ဘာတွေပြောနေတာလဲ..."

"ဒီပုန်ကန်တတ်တဲ့ တပည့်က နတ်ဘုရားသားတော် ခုံးဝူတောက်ကို စော်ကားရဲတယ်... သူက အကြိမ်တစ်သောင်းလောက် သေဖို့ ထိုက်တန်ပါတယ်... ကျွန်မရဲ့ ဂိုဏ်းကို သန့်ရှင်းအောင် ရှင်းလင်းပေးတဲ့အတွက် နတ်ဘုရားသားတော် ခုံးဝူတောက်ကို ကျေးဇူးတင်ပါတယ်..."

ဘယ်လောက်တောင် ရယ်စရာကောင်းလိုက်လဲ...

သူမ၏ ယခင်ဘဝတွင် ခုံးဝူတောက်သည် သတ်ဖြတ်ရာ၌ အမှန်တကယ်ကို ရူးသွပ်ခဲ့ခြင်းပင်။

မဟာဧကရာဇ် နယ်ပယ်သို့ ရောက်ရှိပြီးနောက် သူ့ကို ရန်စစော်ကားသူတိုင်းအား သူ သတ်ဖြတ်ခဲ့သည်။

သူတို့၏မိသားစုများနှင့် သူတို့နောက်ကွယ်ရှိ အင်အားစုများအားလုံး လုံးလုံးလျားလျား ဖျက်ဆီးခံခဲ့ရသည်။

တစ်ဖက်လူသည် ရက်စက်သည်ဟု နာမည်ကြီးကာ သူ လှုပ်ရှားလိုက်သည်နှင့် ရန်သူများကို သေချာပေါက် သတ်ပစ်ပေလိမ့်မည်။

အကယ်၍ ခုံးဝူတောက်သာ လိုချင်လျှင်...

ယနေ့ ဖြစ်ရပ်ကို ပြဿနာရှာရန် အကြောင်းပြချက်အဖြစ် သူ အသုံးပြုနိုင်သည်။

...

"ဒါက..."

အကြောင်းစုံကို မသိသော လူအုပ်ကြီးသည် ဤစကားကို ကြားသောအခါ သူတို့၏ကျောရိုးများတစ်လျှောက် ပို၍ပင် ချမ်းစိမ့်သွားပြီး ထိတ်လန့်သွားကြသည်။

ပြန်လည်ဝင်စားခြင်း တာအိုဂိုဏ်း၏ အထွတ်အထိပ် ရှေးဟောင်းဘိုးဘေးကြီးဖြစ်ကာ ဂုဏ်သိက္ခာရှိသော မဟာဧကရာဇ် ကျွမ်းကျင်သူ တစ်ဦးသည် သူမ၏တပည့် ကွပ်မျက်ခံရသည်ကို ကူကယ်ရာမဲ့စွာ ကြည့်နေခဲ့ရသည်...

သူမသည် ဒေါသမထွက်ရဲရုံသာမက ကြီးမားသော ခွင့်လွှတ်မှုကို ရရှိထားသကဲ့သို့ပင် ပြုမူနေပြီး သူ၏သက်ညှာမှုအတွက် တစ်ဖက်လူကို ကျေးဇူးပြန်တင်နေရပေ၏။

ဤသည်က တရားလွန်လွန်းလှသည်... အလွန်အမင်းကို တရားလွန်လှသည်။

..........

မူလက ခုံးဝူတောက်သည်လည်း ဤဖြစ်ရပ်ကို အသုံးပြုပြီး ပြန်လည်ဝင်စားခြင်း မဟာဧကရီကို ထိုးနှက်ရန် သူ အလိုရှိခဲ့သည်။

သို့သော် သူမက ကောင်းကင်ဘုံများ၏ အနာဂတ် ဖွံ့ဖြိုးတိုးတက်မှုအကြောင်းကို သိနိုင်သည်ဟု ယူဆပြီး...

သူမကို ယဉ်ပါးအောင် သွေးဆောင်ချင်သည့် အကြောင်းအရင်းကြောင့်....

ထို့ကြောင့် ဤတစ်ကြိမ်တွင် သူက ချွင်းချက်အနေဖြင့် သူ အမြဲတမ်း ပိုနှစ်သက်သော ပူးတွဲ အပြစ်ပေးသည့် နည်းလမ်းကို အသုံးမပြုခဲ့ပေ။

ထိုအချိန်မှာပင် စနစ်၏အသံက ရုတ်တရက် ထွက်ပေါ်လာသည်။

[ဒင်... ကောင်းကင်ကံကြမ္မာ ဇာတ်လိုက်မင်းသမီး ရှားချူလီက သခင်ရဲ့ နည်းလမ်းတွေကို အထင်ကြီးသွားပြီး သခင်အပေါ် လေးစားအားကျမှု ဖြစ်ပေါ်လာတာကို ထောက်လှမ်းတွေ့ရှိရပါတယ်... စနစ်က ဒါကို ယဉ်ပါးအောင် သွေးဆောင်ခြင်း လုပ်ငန်းစဉ်အဖြစ် အလိုအလျောက် သတ်မှတ်လိုက်ပါတယ်...]

[ကောင်းကင်ကံကြမ္မာ ဇာတ်လိုက်မင်းသမီး ရှားချူလီကို ၁၀ ရာခိုင်နှုန်း ယဉ်ပါးအောင် သွေးဆောင်နိုင်ခဲ့တဲ့အတွက် သခင်ကို ဂုဏ်ယူပါတယ်... သူ့ရဲ့ ကောင်းကင်အမိန့်တော်အမှတ် တွေက အမှတ် ၈၀၀ လျော့ကျသွားပါတယ်...]

[သုံးဆ ပြင်းထန်တဲ့ ထိုးနှက်ချက်ကို အောင်မြင်စွာ ဖြစ်ပေါ်စေပြီး ကောင်းကင်အမိန့်တော်အမှတ် ၂၄၀၀ ကို ရရှိခဲ့တဲ့အတွက် သခင် ကို ဂုဏ်ယူပါတယ်...]

[တစ်ဖက်လူရဲ့ ကျန်ရှိနေတဲ့ ကောင်းကင်အမိန့်တော်အမှတ်: ၇၂၀၀]

စနစ်၏ကြေညာချက်ကို နားထောင်ရင်း ခုံးဝူတောက်က မျက်ခုံးတစ်ချက် ပင့်လိုက်သည်။

မမျှော်လင့်ထားတဲ့ အကျိုးအမြတ်တစ်ခု ရှိနေတာလား....

အမဲလိုက်ခြင်းအပြင် ယဉ်ပါးအောင် သွေးဆောင်ခြင်း လမ်းကြောင်းလည်း ရှိကြောင်း စနစ် ပြောဖူးသည်ကို သူ ကြားခဲ့သည်။

"ဒါက... ဒီ ယဉ်ပါးအောင် သွေးဆောင်ခြင်း ဆိုတာ... တစ်ဖက်လူက ငါ့ကို သွယ်ဝိုက်ပြီး အညံ့ခံလိုက်တာကို ဆိုလိုတာလား..."

သူ တွေးတောနေစဉ် သူ၏အကြည့်က ရှားချူလီအပေါ်သို့ ကျရောက်သွားသည်။

သူ၏ မျက်လုံးများနှင့် သူမ၏ မျက်လုံးများ ဆုံမိသည့် အခိုက်အတန့်တွင် သူမက မသိစိတ်အရ ရှောင်ဖယ်သွားပြီး သူ၏အကြည့်ကို မဆုံရဲပေ။

ဤအချိန်အခိုက်အတန့်တွင် ရှားချူလီ ၏ နှလုံးသားသည်လည်း ကဆုန်စိုင်းခုန်နေသည်။

ဤသည်က ခုံးဝူတောက် ကိုယ်တိုင်ထံမှ ထွက်ပေါ်လာသော သေစေနိုင်ပြီး အန္တရာယ်ရှိသည့် အရှိန်အဝါကြောင့်သာမက သူမကိုပင် ရိုသေကြောက်ရွံ့မှုကို ခံစားရစေသည့် နည်းလမ်းများကြောင့်လည်းဖြစ်သည်။

တစ်ဖက်လူသည် ကောင်းကင်ကိုးထပ်တွင် ပျံသန်းနေသော အစစ်အမှန် နတ်ဘုရားနဂါး တစ်ကောင်အလားပင်။

အကယ်၍ အမြင်ကျဉ်းမြောင်းသော စာကလေး တစ်ကောင်က သူ့ကို သွားထိရဲမည်ဆိုလျှင် နတ်ဘုရားနဂါး၏အဆုံးမဲ့ဒေါသကို သေချာပေါက် ရရှိပေလိမ့်မည်။

သေချာသည်မှာ ခုံးဝူတောက်၏ မကြာသေးမီက လုပ်ရပ်များသည် အချိန်လေဟာနယ် တားမြစ်နယ်မြေ၏ နတ်ဘုရားသားတော် အဖြစ် သူ၏အထောက်အထားကို ခိုင်မာစေရုံသာမက ကြီးမားသော ဂုဏ်သိက္ခာကိုလည်း တည်ဆောက်နိုင်ခဲ့ခြင်းပင်။

ထို့အပြင် ဤသည်က သူ့ထံသို့ လာရောက်လည်ပတ်သည့် သံတမန်များကို ကြီးမားစွာ ဟန့်တားနိုင်ခဲ့သည်။

နေလနတ်ဘုရား အင်ပါယာ၏ နန်းမွေခံမင်းသမီးတစ်ဦးအနေဖြင့် သူမသည် ပြိုင်ဘက်ကင်း ပါရမီရှင်များစွာကို မြင်တွေ့ခဲ့ဖူးပေ၏။

သို့သော် ခုံးဝူတောက်ကဲ့သို့ အရှိန်အဝါမျိုးရှိသော ပါရမီရှင်တစ်ယောက်ကို သူမ တစ်ကြိမ်တစ်ခါမှ မမြင်ဖူးပေ။

သာမန်လူတစ်ယောက်အတွက် မဟာဧကရာဇ် ကျွမ်းကျင်သူတစ်ဦးကို ရင်ဆိုင်ရလျှင် တည်ငြိမ်သော စိတ်ကို ထိန်းသိမ်းထားနိုင်ခြင်းရှိမရှိ ဆိုသည်က တခြားကိစ္စတစ်ခုပင်။

ခုံးဝူတောက်သည် အကြောက်တရားကို မပြရုံသာမက သူမ၏ရှေ့တွင် တစ်ဖက်လူ၏တပည့် ကို တိုက်ရိုက်သတ်ပစ်ရန်ပင် ရဲဝံ့ခဲ့သည်။

နောက်ဆုံးတွင် လူတိုင်း၏ စိတ်ကူးယဉ်မှုများကို ကျော်လွန်သော နည်းလမ်းများကို သူ ကျင့်သုံးခဲ့ပြီး ကဏဦးခြေလှမ်းအားလုံးကို သူ၏ကိုယ်ပိုင်လက်ထဲသို့ ရယူခဲ့သည်။

သူ၏ လုပ်ရပ်များသည် ပြန်လည်ဝင်စားခြင်း မဟာဧကရီကို သူ့အပေါ် ကြီးမားသော ကျေးဇူးကြွေး တင်သွားစေသည့် သွယ်ဝိုက်သော နည်းလမ်းတစ်ခုအဖြစ်လည်း ယူဆနိုင်ပေ၏။

ယခင်ဖြစ်ရပ်များအားလုံးသည် ခုံးဝူတောက် တမင်သက်သက် စီစဉ်ထားခြင်းဖြစ်သည်ဟု ဆိုနိုင်သည်။

ထို့ပြင် သူ၏အစီအစဉ်ကို အစမှအဆုံးတိုင် အကောင်အထည်ဖော်သည့်အချိန်၌....

သူ၏စိတ်အခြေအနေသည် လုံးဝ တည်ငြိမ်နေပြီး အလွန်ပေါ့ပါးသော အလုပ်တစ်ခုကို လုပ်ဆောင်နေသည့်အလားပင်။

ဤအစွမ်းထက်သူတစ်ဦး၏ ထူးခြားသော အရှိန်အဝါသည် လူတစ်ယောက်ကို အတော်လေး အန္တရာယ်ရှိသည်ဟု ခံစားရစေသော်လည်း အလွန်အမင်း ဆွဲဆောင်မှုတစ်ခုကိုလည်း ပေးစွမ်းနေသည်။

ဒီလို အန္တရာယ်ရှိတဲ့ လူတစ်ယောက်က တကယ်တမ်း ဘယ်လိုလူမျိုးလဲ ဆိုတာကို လူတွေကို မရည်ရွယ်ဘဲ နားလည်ချင်စိတ် ဖြစ်လာစေတယ်.....

ပြီးတော့ သူ့ရဲ့ အတိတ်မှာ ဘယ်လို ဒဏ္ဍာရီလာ ဇာတ်လမ်းတွေ ရှိခဲ့သလဲ...

[ဒင်... ကောင်းကင်ကံကြမ္မာ ဇာတ်လိုက်မင်းသမီး ရှားချူလီက သခင်အပေါ် စူးစမ်းချင်စိတ်တွေ ဖြစ်ပေါ်လာပြီး သူမရဲ့ လေးစားအားကျမှုတန်ဖိုး နောက်တစ်ကြိမ် မြင့်တက်လာတာကို ထောက်လှမ်းတွေ့ရှိရပါတယ်...]

[ကောင်းကင်ကံကြမ္မာ ဇာတ်လိုက်မင်းသမီး ရှားချူလီကို ၁၀ ရာခိုင်နှုန်း ယဉ်ပါးအောင် သွေးဆောင်နိုင်ခဲ့တဲ့အတွက် သခင်ကို ဂုဏ်ယူပါတယ်... သူ့ရဲ့ ကောင်းကင်အမိန့်တော်အမှတ် တွေက အမှတ် ၈၀၀ လျော့ကျသွားပါတယ်...]

[နှစ်ဆ ပြင်းထန်တဲ့ ထိုးနှက်ချက်ကို ဖြစ်ပေါ်စေပြီး ကောင်းကင်အမိန့်တော်အမှတ် ၁၆၀၀ ကို အောင်မြင်စွာ ရရှိခဲ့တဲ့အတွက် သခင် ကို ဂုဏ်ယူပါတယ်...]

[တစ်ဖက်လူရဲ့ ကျန်ရှိနေတဲ့ ကောင်းကင်အမိန့်တော်အမှတ်: ၆၄၀၀]

[တစ်ဖက်လူရဲ့ ယဉ်ပါးအောင် သွေးဆောင်ခြင်း တိုးတက်မှု:၂၀ %]

စနစ်၏ ရုတ်တရက်အသိပေးချက်ကို နောက်တစ်ကြိမ် ကြားသောအခါ ခုံးဝူတောက်သည် သိသိသာသာ အနည်းငယ် တွေဝေသွားသည်။

ရှားချူလီအပေါ် သူ၏အကြည့်သည် အနည်းငယ် ထူးဆန်းနေပေ၏။

ဒီကောင်မလေးက... သူ့ဆီမှာ ထူးဆန်းတဲ့ ဝါသနာ တစ်ခုခုများ ရှိနေတာလား...