အခန်း (၃၁၀)

ယခုအချိန်၌ ကျုံးရှန်သည် နဂါးမြွေငါးရှဉ့်ဟူသော အမည် မည်သို့ပေါ်ပေါက်လာသည်ကို အသေအချာ သိရှိသွားရလေသည်။ ထို့ပြင် ဂျောက်လန် ပြောဆိုခဲ့သော ပေါင်းစပ်ခြင်းဟူသည့် အဓိပ္ပာယ်မှာ မည်သို့သော အရာဖြစ်သည်ကိုလည်း ပိုမို နားလည်သဘောပေါက်သွားရ၏။ အနှီ နဂါးမြွေငါးရှဉ့်များသည် သူတို့၏ သွေးသားစိုင်များကို အရည်ပျော်စေကာ တစ်ဦးနှင့်တစ်ဦး ပေါင်းစပ်လျက် နဂါးအသွင်သို့ ပြောင်းလဲနိုင်ကြခြင်းသည် အလွန်ထူးဆန်းလှသည်။

ဝမ်ရှန့်နတ်ဘုရားကုန်းမြေတိုက်ကြီးတွင်ပင် ထိုကဲ့သို့သော ထူးခြားလှသည့် သက်ရှိမျိုးကို မြင်တွေ့ဖူးခြင်း မရှိခဲ့ချေ။ ယခုကဲ့သို့ ကိုယ်တိုင် မြင်တွေ့ရသောအခါတွင်မူ ကျုံးရှန်သည် အလွန်ပင် စိတ်ဝင်စားသွားရကာ ဖန်ဆင်းခြင်း၏ လက်ရာများသည် မည်မျှအထိ ပြောင်းလဲဆန်းကြယ်နိုင်သည်ကို အံ့ဩချီးကျူးမိလေသည်။

သို့သော်လည်း နဂါးမြွေငါးရှဉ့်များနှင့် စစ်မှန်သော နဂါးများအကြား မည်သို့သော ဆက်နွှယ်မှု ရှိနေသနည်းဟူသော အချက်သည် စဉ်းစားစရာ ဖြစ်နေ၏။

အပြင်ပန်း သွင်ပြင်ကို ကြည့်မည်ဆိုပါက အစစ်အမှန်နဂါးနှင့် အလွန်ပင် တူညီနေသော်လည်း နဂါးမြွေငါးရှဉ့်များတွင် နဂါးတို့၏ အရှိန်အဝါကို ထုတ်လွှတ်နိုင်ခြင်း မရှိဘဲ နဂါးတို့ ပိုင်ဆိုင်သည့် သက်ရှိအပေါင်းကို ဖိနှိပ်နိုင်သော အရှိန်အဝါမျိုးလည်း မရှိပေ။ ဒဏ္ဍာရီများအရ အစစ်အမှန် နဂါးနှင့် ဖီးနစ်ငှက်များသည် မိစ္ဆာအပေါင်းကို တုန်လှုပ်ခြောက်ခြားစေနိုင်ကာ သူတို့၏ အဆင့်အတန်းသည် ဓာတ်ကြီးငါးပါး၏အထွတ်အမြတ် သားရဲများဖြစ်သည့် ကောက်ချန်း၊ မိုးပြာနဂါး၊ ကြိုးကြာနီ၊ လိပ်နက်နှင့် ကျားဖြူတို့၏ အထက်တွင် ရှိနေပေသည်။

ယင်းတို့သည် အလွန်မြင့်မြတ်လှသော တည်ရှိမှုများ ဖြစ်ကြ၏။

အစစ်အမှန် နဂါးတစ်ကောင် ပေါ်ထွက်လာသည်နှင့် သက်ရှိအပေါင်းတို့သည် ကြောက်ရွံ့တုန်လှုပ်လျက် ဦးညွှတ်ရမည် ဖြစ်သော်လည်း နဂါးမြွေငါးရှဉ့်များ၌မူ ထိုကဲ့သို့သော အရှိန်အဝါမျိုး ကိန်းဝပ်ခြင်း မရှိချေ။ ယင်း၏ နဂါးအသွင်အပြင်သည် အပေါ်ယံ ရုပ်သွင်ကိုသာ တုပထားခြင်း ဖြစ်ပေသည်။ သို့သော်လည်း အနှီမျိုးစိတ်သည် စစ်မှန်သော နဂါးမျိုးနွယ်စုနှင့် ဆက်နွှယ်နေသောတစ်စုံတစ်ရာရှိနေသည်မှာ အမှန်ပင်ဖြစ်သည်။

နဂါးမြွေငါးရှဉ့်များ ပေါင်းစည်းခြင်းမှဖြစ်ပေါ်လာသော ဧရာမ နဂါးကြီးသည် ခန္ဓာကိုယ် အရွယ်အစား တစ်ခုတည်းဖြင့်ပင် ကြောက်မက်ဖွယ် ကောင်းလှပေသည်။ ကျုံးရှန် သိမ်းဆည်းခဲ့သော လင်လုံသားရဲဘုရင်သည်ပင် ယခုကဲ့သို့ အသွင်ပြောင်းထားသော နဂါးမြွေငါးရှဉ့်ကြီး၏ ရှေ့မှောက်၌ သေးငယ်လှသော သတ္တဝါလေး တစ်ကောင်ကဲ့သို့ ဖြစ်သွားပေမည်။

အစွယ်ပါကြယ်ငါးများသည်လည်း ချက်ချင်းပင် အားနည်းသည့်အခြမ်းဖြစ်သွားရကာ အခြေအနေမကောင်း‌တော့ပေ။ သို့သော်လည်း ထိုအစွယ်ပါကြယ်ငါးများတွင်လည်း သူတို့၏ နောက်ဆုံးလက်နက်များ ရှိနေသေးဟန် တူပေသည်။ အစွယ်ပါကြယ်ငါးများသည် ရုတ်တရက်လှုပ်ရှားလာကြပြီး အစွယ်ပါကြယ်ငါးဘုရင်ကို ဗဟိုချက်အဖြစ် ထားရှိလိုက်ကာ သူတို့၏ လက်တံများကို တစ်ခုနှင့်တစ်ခု ချိတ်ဆက်ပြီး ထူးဆန်းလှသော အစီရင် တစ်ခုကို စတင် ပုံဖော်လာကြသည်။

ထိုအစီရင်အတွင်း၌ အစွယ်ပါကြယ်ငါး တစ်ကောင်စီသည် အချက်အခြာနေရာများ ဖြစ်ကြပြီး အလယ်ဗဟို၏အဓိကကျသောနေရာ၌ အစွယ်ပါကြယ်ငါးဘုရင်ရှိနေသည်။ ယင်းသည် လူသားတို့၏ တိုက်ခိုက်ရေး အစီရင်များ နှင့်ပင် အနည်းငယ် ဆင်တူနေ၏။

'အစီရင်တစ်ခုလား...'

ကျုံးရှန်သည် အစွယ်ပါကြယ်ငါးများ၏ လုပ်ဆောင်ချက်ကို စိတ်ဝင်တစား ကြည့်နေသည်။

ထို့နောက်တွင် သူ၏ ကိုယ်တွင်းဟင်းလင်းပြင်၌ရှိသည့် စစ်မှန်သော အတ္တအမှုန်အမွှားများကို အသုံးပြုကာ အစွယ်ပါကြယ်ငါးများ၏ အစီအရင်အတိုင်း ပုံဖော်စမ်းသပ်ကြည့်လိုက်သည်။ သူသည် ဝိညာဉ်စွမ်းအားများကို လက်တံများကဲ့သို့ အသုံးပြုကာ အမှုန်အမွှားများတစ်ခုနှင့်တစ်ခုကို ချိတ်ဆက်လိုက်ပြီး အစွယ်ပါကြယ်ငါးများ ခင်းကျင်းထားသော အစီရင်ကဲ့သို့ ပုံစံတူအစီအရင်တစ်ခု ဖန်တီးနေလေသည်။

အစွယ်ပါကြယ်ငါးများ၏ ပေါင်းစပ်မှုအပြီး နောက်ဆုံးတွင် အစီရင်ပြီးဆုံးသွားလေသည်။ ထိုအခါ ကြယ်ငါးအားလုံး၏ စွမ်းအားများသည် တစ်ခုတည်းအဖြစ် ချိတ်ဆက်သွားကြကာ ကျစ်လစ်သိပ်သည်းသွား၏။

ကျုံးရှန်၏ မျက်လုံးများ ဝင်းလက်သွားရလေသည်။ ထိုအစီရင်သည် အလွန်ပင် ဆန်းကြယ်လှသည်။ သူ၏ ခန္ဓာကိုယ်အတွင်းရှိ အတ္တအမှုန်အမွှားများ၏ စွမ်းအားများသည် ထိုအစီရင်၏ နည်းလမ်းအတိုင်း ချိတ်ဆက်သွားကြသည့်အခါတွင် အစိတ်အပိုင်းများအားလုံးသည် တစ်ခုတည်းသော အရာအဖြစ်သို့ ပြောင်းလဲသွားသည်။

ထိုစွမ်းအားများသည် အလွန်ပင် သိပ်သည်း ကျစ်လျစ်လှကာ ယခင်ကကဲ့သို့ ပြန့်ကျဲနေခြင်း မရှိတော့ချေ။ ပုံမှန်အားဖြင့် ကျုံးရှန်၏ ခန္ဓာကိုယ်အတွင်းရှိ အတ္တအမှုန်အမွှားများသည် တစ်ခုစီ သီးခြား တည်ရှိနေကြခြင်း ဖြစ်သည်။ ထိုအမှုန်အမွှားများ၏ စွမ်းအားကို အသုံးပြုလိုလျှင် အမှုန်အမွှား တစ်ခုချင်းစီကို နှိုးဆွရန်လိုအပ်ပြီး လက်သီးအတွင်းသို့ စုစည်းပြီးနောက်မှသာ ဝူလုံနတ်ဘုရားလက်သီးကို ထုတ်ဖော်နိုင်ခြင်း ဖြစ်သည်။

ထိုနည်းလမ်းသည် စွမ်းအား၏ အထွတ်အထိပ်သို့ ရောက်ရှိနိုင်သော်လည်း စွမ်းအားများသည် သိပ်သည်းကျစ်လစ်မှုမရှိဘဲ ပြန့်ကျဲလွန်းလှပေသည်။ ဤသည်မှာ နဂါးမဲ့နှလုံးသားကျင့်စဉ်၏ သေးငယ်လှသော အားနည်းချက်တစ်ခုလည်း ဖြစ်သည်။

သို့သော်လည်း နဂါးမဲ့နှလုံးသားကျင့်စဉ်သည် လူတိုင်း ကျင့်ကြံနိုင်ခြင်းနှင့် ပါရမီဟူသော ကန့်သတ်ချက်ကို ချိုးဖျက်နိုင်ခြင်းဟူသော အားသာချက်များရှိနေသဖြင့် ထိုအားနည်းချက်သည် မပြောပလောက်ချေ။

ကျုံးရှန်အတွက်မူ အကယ်၍ အမှုန်အမွှားများအားလုံးကို တစ်ခုနှင့်တစ်ခု ချိတ်ဆက်နိုင်မည်ဆိုပါက သူ၏ ခန္ဓာကိုယ် တစ်ခုလုံးသည် တစ်သားတည်း ဖြစ်သွားကာ ပိုမို ကြောက်မက်ဖွယ်ကောင်းသော အစွမ်းများကို ထုတ်ဖော်နိုင်လိမ့်မည် ဖြစ်သည်။

ကြယ်ငါးများ၏ အစီရင်သည် ဆန်းကြယ်သော်လည်း အားနည်းချက် မြောက်မြားစွာ ရှိနေသေးသည်။ ထို့ပြင် ကျုံးရှန်၏ ခန္ဓာကိုယ်အတွင်း၌ ကြယ်ငါးများကဲ့သို့ အရေအတွက် အနည်းငယ်သာ ရှိနေခြင်း မဟုတ်ဘဲ သူ၏ အတ္တအမှုန်အမွှားများသည် ၈၁၀ သန်း ဟူသော ကြီးမားလှသည့် အရေအတွက် ရှိနေလေသည်။ ထိုမျှ မြောက်မြားလှသော အမှုန်အမွှားများကို အစွယ်ပါကြယ်ငါးများ၏အစီရင်နည်းလမ်းဖြင့် ချိတ်ဆက်ရန်ကြိုးစားခြင်းသည် ရှုပ်ထွေးလှသော လုပ်ငန်းစဉ်တစ်ခု ဖြစ်ပေသည်။

အဆင့်ဆင့်သော တွက်ချက်မှုများကို အကြိမ်ကြိမ် ပြုလုပ်ရမည် ဖြစ်ကာ အစီရင်ကို အထွတ်အထိပ်သို့ ရောက်အောင် မြှင့်တင်ပြီးမှသာ သူ၏ ခန္ဓာကိုယ်အတွင်း၌ အသုံးပြုနိုင်မည် ဖြစ်၏။

မည်သို့ပင်ဆိုစေကာမူ ထိုအစီရင်သည် ကျုံးရှန်အတွက် လမ်းစတစ်ခုကို ပေးစွမ်းလိုက်ခြင်း ဖြစ်ပေသည်။ ၈၁၀သန်းသော အတ္တအမှုန်အမွှားများအားလုံးကို ချိတ်ဆက်နိုင်မည်ဆိုပါက သူ၏ စွမ်းအားသည် မည်သူမျှ မှန်းဆနိုင်ခြင်းမရှိသော အဆင့်သို့ ရောက်ရှိသွားပေလိမ့်မည်။ ထိုအချိန်သို့ ရောက်ရှိလျှင် သူသည် မိစ္ဆာနတ်ဘုရားနယ်ပယ် အဆင့် ၃ အထွတ်အထိပ်သို့ ရောက်ရှိနေသော မဟာမိစ္ဆာအရှင်သခင်များကိုပင် အလွယ်တကူ နှိမ်နင်းနိုင်လိမ့်မည် ဖြစ်သည်။

ကျုံးရှန်သည် ပင်လယ်သားရဲ မျိုးနွယ်စု နှစ်ခုကို အလျင်အမြန် နှိမ်နင်းရန် မလောတော့ချေ။ သူသည် တိုက်ပွဲ၏ အလယ်ဗဟိုနေရာမှ ပြန်လည် ဆုတ်ခွာလိုက်ကာ ဂျောက်လန်၏ ဘေးသို့ ပြန်သွားလိုက်သည်။ ထိုပင်လယ်သားရဲများ အချင်းချင်း တိုက်ခိုက်ပုံကို ကြည့်ရှုကာ အခြားသော အသုံးဝင်သည့် အချက်များကို ရှာဖွေလိုခြင်း ဖြစ်ပေသည်။

လောကကြီး၏ ဖန်ဆင်းမှုများသည် မည်မျှပင် နက်နဲဆန်းကြယ်သည်ကို မည်သူမျှ အကုန်အစင် မသိနိုင်ချေ။

ထိုပင်လယ်သားရဲများကို ကြည့်ရှုခြင်းဖြင့် သူသည် အစွယ်ပါကြယ်ငါးများ၏ အစီရင်ကဲ့သို့ ဉာဏ်အလင်းအသစ်များ ထပ်မံရရှိကောင်းရရှိနိုင်‌လေသည်။

အဝေးတစ်နေရာ၌မူ အသွင်ပြောင်းလဲထားသော ဧရာမ နဂါးမြွေငါးရှဉ့်ကြီးသည် အစီရင် ခင်းကျင်းထားသော အစွယ်ပါကြယ်ငါးများကို အနည်းငယ်မျှပင် ဂရုမစိုက်ချေ။ နဂါးအသွင်သည် နဂါးမြွေငါးရှဉ့်ဘုရင်၏ အသန်မာဆုံးသော အခြေအနေ ပင်ဖြစ်သည်။

ထိုအခြေအနေ၌ သူတို့ ယခင်က ဝါးမြို သိမ်းဆည်းထားသော ဝိညာဉ်စွမ်းအားများ အားလုံးသည် တစ်ခုတည်းအဖြစ် ပေါင်းစပ်သွားကြကာ သူတို့၏ စွမ်းအားသည်လည်း ယခင်ကထက် အဆပေါင်း ထောင်နှင့်ချီ၍ မြင့်တက်သွားပြီဖြစ်သည်။ ထိုစွမ်းအားသည် ပင်လယ်ပြင်တစ်ခုလုံးကို လွှမ်းမိုးထားရန် လုံလောက်လှပေသည်။

အကယ်၍ ကောင်းကင်တက်လှမ်းခြင်းမျှော်စင်၏ စည်းမျဉ်းနိယာမများဖြင့် ဖိနှိပ်ထားခြင်း မရှိသည့် ပြင်ပလောကသို့ နဂါးမြွေငါးရှဉ့်ကြီးကို လွှတ်လိုက်မည်ဆိုလျှင် အလွန်ကြောက်မက်ဖွယ်ကောင်းသော တည်ရှိမှုတစ်ခု ဖြစ်လာပေလိမ့်မည်။ ထိုမျှ ကြီးမားလှသော စွမ်းအားသည် ဖိနှိပ်မှုများ မရှိလျှင် ကမ္ဘာငယ် တစ်ခုကိုပင် လက်တစ်ချက်ဖြင့် ဖျက်ဆီးပစ်နိုင်စွမ်းရှိပေသည်။

ဤအချက်က အထပ်တစ်ထောင်ဟင်းလင်းပြင်ကမ္ဘာများအတွင်းရှိ သက်ရှိများသည် အားနည်းကြသောသက်ရှိများမဟုတ်ကြောင်းဖော်ပြနေသည်။ မျှော်စင်၏ စည်းမျဉ်းနိယာမများ၏ ပြင်းထန်စွာ ဖိနှိပ်ထားခြင်းကြောင့်သာ သူတို့သည် သာမန်အတိုင်း ရှိနေကြခြင်း ဖြစ်သည်။ ကျုံးရှန်ပင်လျှင် ဤနေရာသို့ ရောက်ရှိလာသောအခါ၌ သူ၏ အစွမ်းများကို အပြည့်အဝ အသုံးမပြုနိုင်တော့ဘဲ သူ၏ နတ်ဘုရားအာရုံသည်ပင် ဆယ်မီတာ ပတ်ဝန်းကျင်ကို ကျော်လွန်နိုင်ခြင်းမရှိတော့သည်အထိ ဖိနှိပ်ခြင်း ခံထားရလေသည်။

အကယ်၍ ထိုစည်းမျဉ်းနိယာမများသာ ကွယ်ပျောက်သွားမည်ဆိုပါက မြက်ခင်းပြင်ကမ္ဘာမှ ဂူမုံစစ်သည်တော် တစ်ဦးစီသည်ပင် နိယာမနယ်ပယ် အဆင့် ၁၈သို့ ရောက်ရှိကာ နိယာမ ရွှေအမြုတေ ကို ကျင့်ကြံအောင်မြင်ထားသော ပညာရှင်များကဲ့သို့ စွမ်းအားမျိုး ရှိနေကြပေလိမ့်မည်။ ထိုအချက်သည် ကောင်းကင်တက်လှမ်းခြင်းမျှော်စင်၏ တန်ဖိုးကို ပိုမို ထင်ရှားစေသည်။

မျှော်စင်၏ အဆင့်အတန်းသည် လွတ်မြောက်ခြင်းအဆင့် ထက် များစွာ သာလွန်နေကာ စည်းမျဉ်းနိယာမများ၏ ဖိနှိပ်မှုသည် ဝမ်ရှန့်နတ်ဘုရား ကုန်းမြေတိုက်ကြီး သို့မဟုတ် ငရဲမဟာကမ္ဘာကြီးများကဲ့သို့သော မဟာကမ္ဘာများ၏ ကောင်းကင်တာအိုထက်ပင် နိမ့်ကျခြင်း မ‌ရှိ‌ပေ။

ကောင်းကင်တက်လှမ်းခြင်းမျှော်စင်သည် မဟာကမ္ဘာတစ်ခုနှင့် အဆင့်တူညီသော ရတနာတစ်ခု ဖြစ်နိုင်ခြေ ရှိပေသည်။ ကျုံးရှန်၏ ခန့်မှန်းချက်အရ သူသည် မျှော်စင်၏ ထိပ်ဆုံးသို့ ရောက်ရှိကာ တက်လှမ်းခြင်းတာအို လမ်းစဉ်ကို လုံးဝ နားလည်သွားသည့်အခါမှသာ မျှော်စင်ကို ထိန်းချုပ်နိုင်လိမ့်မည် ဖြစ်သည်။

သို့သော်လည်း ကောင်းကင်တက်လှမ်းခြင်းမျှော်စင်၏ မြင့်မားလှသော အဆင့်အတန်းအရ သူသည် လွတ်မြောက်ခြင်းအဆင့်သို့ ရောက်ရှိပြီး ဒဏ္ဍာရီလာ ကောင်းကင်အရှင်သခင် အဆင့်သို့ တက်လှမ်းနိုင်မှသာ အပြည့်အဝ ထိန်းချုပ်နိုင်မည် ဖြစ်သည်။ ထိုအချိန် မတိုင်မီ မျှော်စင်၏ အစွမ်းအချို့ကို အသုံးပြုနိုင်ပါကလည်း မလွဲဧကန်အသုံးဝင်နေမည်ဖြစ်သည်။

ထိုအချက်များသည် ကျုံးရှန်အနေဖြင့် ယခုအချိန်တွင် တွေးတောနေရန် မလိုအပ်သေးချေ။ ယခုအခါတွင် သူသည် မျှော်စင်အတွင်းမှ ရနိုင်သမျှသော အကျိုးကျေးဇူးများကိုသာ ရယူရန် လိုအပ်နေခြင်းဖြစ်သည်။ မျှော်စင်၏ ထိပ်ဆုံးသို့ ရောက်ရှိကာ ကောင်းကင်ဘုံ သို့ ရောက်ရှိသွားသောအခါမှသာ ဝမ်ရှန့်နတ်ဘုရားကုန်းမြေတိုက်ကြီးကို ပေါင်းစည်းရန်အတွက် အခြေခံအုတ်မြစ်များကို ချနိုင်ပေလိမ့်မည်။

ထိုအခါမှသာ ကောင်းကင်တာအို၏ ကံတရားကျိန်စာ ချုပ်နှောင်မှုများကို ချိုးဖျက်ကာ အသာစီး ရရှိနိုင်မည် ဖြစ်သည်။

ကောင်းကင်တာအို ဆိုသည်မှာ ကောင်းကင်ဘုံ၏ လမ်းစဉ်ပင် ဖြစ်သည်။ အကယ်၍ ကျုံးရှန်သည် ကောင်းကင်တာအို၏ ကျိန်စာကို လွဲချော်သွားစေရန် သို့မဟုတ် ချိုးဖျက်ရန် လုပ်ဆောင်နိုင်မည်ဆိုပါက သူ၏ကောင်းကင်ကို အနိုင်ယူ‌ကျော်လွှားခြင်း တာအိုလမ်းစဉ် အတွက် များစွာ အထောက်အကူ ဖြစ်စေလိမ့်မည် ဖြစ်ကာ အနာဂတ်တွင် လွတ်မြောက်ခြင်း အဆင့်သို့ တက်လှမ်းရန် ပိုမို သေချာသွားပေလိမ့်မည်။

ကျုံးရှန် တွေးတောနေစဉ်၌ပင် နဂါးမြွေငါးရှဉ့်နှင့် အစွယ်ပါကြယ်ငါးတို့၏ နောက်ဆုံး တိုက်ပွဲကြီး စတင်လာလေသည်။တိုက်ပွဲမြင်ကွင်းသည် အလွန်တရာပင် ပြင်းထန်လာလေတော့သည်။

Thank For Reading.