အခန်း (၃၉၇-၃၉၉)

အခန်း (၃၉၇) - မိစ္ဆာကျဆုံးခြင်း၊ ရွှေအမြုတေ အလယ်အလတ်အဆင့် (အပိုင်း ၅)

~မာရှီချင်းသည် စုယွီကို ကြည့်ကာ ပြောလိုက်သည်။

“တာအိုမိတ်ဆွေ စု... ကျွန်တော်တော့ ထျန်းလင်လေးကို တပည့်အဖြစ် လက်ခံပေးဖို့ တောင်းဆိုချင်ပါသေးတယ်...”

စုယွီ ခေါင်းကို ဖြည်းညှင်းစွာ ယမ်းလိုက်ပြီး ငြင်းဆိုလိုက်၏။

“တပည့်အဖြစ် လက်ခံတာမျိုးကို ကျွန်တော် ရှောင်ချင်ပါတယ်... ဒါပေမဲ့ ခင်ဗျား ကျွန်တော့်ကို ယုံကြည်တယ် ဆိုရင်တော့... သူ့ကို ကျွန်တော်နဲ့အတူ ကျင့်ကြံခွင့်ပြုပါ... နောင်တစ်ချိန်ကျရင် သူ ဘယ်အဆင့်ထိ ရောက်နိုင်မလဲ ဆိုတာကတော့ သူ့ကံတရားပေါ်မှာပဲ မူတည်ပါစေ...”

“ဒီနည်းနဲ့ဆိုရင်... ကျွန်တော် ဒီကနေ ထွက်ခွာသွားတဲ့အချိန်ကျရင် သူ မာမိသားစုဆီ ပြန်လာနိုင်မှာပေါ့...”

အချိန်အတန်ကြာ ဆွေးနွေးပြီးနောက်...

စုယွီသည် တတိယအဆင့် အဆင့်နိမ့် အခင်းအကျင်း ပညာရှင် အမွေအနှစ်ကို လက်ခံရရှိခဲ့ပြီး၊ မာထျန်းလင်ကိုလည်း မာမိသားစုမှ ခေါ်ဆောင်သွားခွင့် ရရှိခဲ့သည်။

မထွက်ခွာမီ စုယွီသည် မာရှီချင်းကို သတိပေးလိုက်၏။

“တာအိုမိတ်ဆွေ မာ... မိစ္ဆာဘုရင် ရွှမ်မင် ကိုတော့ သတိထားဖို့ လိုလိမ့်မယ်... ကိုးဝိညာဉ် မိစ္ဆာ နန်းတော် နဲ့ ထိုက်ရွှီ အင်မော်တယ် မဟာမိတ်အဖွဲ့တို့ရဲ့ လက်ထဲကနေတောင် ထွက်ပြေးလွတ်မြောက်လာနိုင်တဲ့ ဒီမိစ္ဆာကောင်က သေချာပေါက် သာမန်ကောင်တော့ မဟုတ်ဘူး...”

“အခု ဝိညာဉ်ကြွေ တောင်တန်း သခင်နဲ့ သူ့လက်အောက်ငယ်သား နှစ်ယောက်က ဒီမှာ သေသွားကြပြီ ဆိုတော့... အဲဒီ မိစ္ဆာဘုရင်က ကလဲ့စားချေဖို့ ကြိုးစားလာနိုင်ခြေ ရှိတယ်...”

“ဒါကြောင့် ကြိုတင်ပြင်ဆင်ထားဖို့ လိုပါလိမ့်မယ်...”

ထိုသတိပေးစကားကို ချန်ထားရစ်ခဲ့ပြီးနောက်၊ စုယွီသည် မာထျန်းလင်ကို ခေါ်ဆောင်၍ မာမိသားစုမှ ထွက်ခွာလာခဲ့သည်။

မာထျန်းလင်ကို အစိမ်းရောင် သစ်သား နန်းတော်ထဲသို့ ဝင်ရောက်စေပြီးနောက်၊ ပျံသန်းရေး ယာဉ်ပျံကို ထုတ်ယူလိုက်၏။ ယာဉ်ပျံပေါ်သို့ တက်ရောက်ပြီး တာ့ယွဲ့ တောင်တန်းရှိရာသို့ ဦးတည် မောင်းနှင် ထွက်ခွာသွားလေသည်။

အဝေးတစ်နေရာရှိ ကိုးဝိညာဉ် မိစ္ဆာ တောင်တန်း။

မြေအောက်ရှိ ရှေးဟောင်း မိစ္ဆာနန်းတော် အပျက်အစီး တစ်ခုအတွင်း၌၊ နှင်းကဲ့သို့ ဖြူဖွေးသော အသားအရေနှင့် လှပလွန်းသော ရုပ်ရည်ရှိသည့် လူငယ်တစ်ဦးသည် နန်းတော်၏ အနက်ရှိုင်းဆုံး နေရာရှိ ပလ္လင်ပေါ်တွင် ထိုင်နေ၏။ နန်းတော် တစ်ခုလုံးသည် မိစ္ဆာချီစွမ်းအင်များနှင့် ပြင်းထန်သော သွေးညှီနံ့များဖြင့် ပြည့်နှက်နေသည်။

ထိုလူငယ်၏ ကိုယ်ပေါ်မှ ထွက်ပေါ်နေသော အသက်ရှူကျပ်ဖွယ်ရာ မိစ္ဆာအရှိန်အဝါသည် လူတိုင်းကို ကြောက်ရွံ့တုန်လှုပ်သွားစေနိုင်၏။

သူသည် မူလဝိညာဉ် အဆင့် မိစ္ဆာ အဖြစ်သို့ မရောက်ရှိသေးသော်လည်း၊ ထိုအဆင့်သို့ ရောက်ရန် သိပ်မလိုတော့ပေ။

ရုတ်တရက်...

ထိုလူငယ်သည် မျက်လုံးများကို ဖွင့်လိုက်သည်။ သူ၏ မျက်ဝန်းနက်နက်ထဲတွင် သွေးရောင် အလင်းတန်း တစ်ချက် ဖြတ်သန်းသွား၏။ သွေးရောင် မိစ္ဆာအင်းကွက်များသည် သူ၏ အရေပြားအောက်မှ ထိုးထွက်လာသကဲ့သို့ ဖြစ်ပေါ်လာပြီး၊ ခဏအကြာတွင် ပြန်လည် ပျောက်ကွယ်သွားကြသည်။ သူ မျက်ခုံးပင့်လိုက်၏။

“ဟင်...”

လက်ကို ဝှေ့ယမ်းလိုက်ရာ လက်ဖဝါး အရွယ်အစားရှိသော ဝိညာဉ်ကတ်ပြား သုံးခု လက်ထဲတွင် ပေါ်လာသည်။ ထိုကတ်ပြား သုံးခုစလုံးသည် အက်ကွဲနေလေပြီ။

ဝိညာဉ်ကြွေ တောင်တန်း သခင်နှင့် အခြားနှစ်ဦးတို့၏ ဝိညာဉ်စွမ်းအားများသည် အချိန်တိုလေး အတွင်းမှာပင် ပျောက်ကွယ်သွားခဲ့ကြ၏။

ဆိုလိုတာက ဝိညာဉ်ကြွေ တောင်တန်းက သုံးကောင်စလုံး သေဆုံးသွားကြလေပြီ။

“သေကုန်ကြပြီလား...”

လူငယ်၏ မျက်လုံးများထဲတွင် ရက်စက်သော အရိပ်အယောင်များ ဖြတ်သန်းသွားပြီး၊ ကြီးမားသော လူသတ်ချင်စိတ်များ နန်းတော်တစ်ခုလုံး ပြည့်နှက်သွားသည်။ သိပ်သည်းသော မိစ္ဆာချီစွမ်းအင်များ လှုပ်ရှား ဆူပွက်လာသဖြင့် နန်းတော်ထဲရှိ အစေခံများသည် ကြောက်လန့်တကြား ဒူးထောက် ဦးညွှတ်လိုက်ကြရသည်။

“ဘယ်ကောင်က ငါ့လူတွေကို လက်ဖျားနဲ့ တို့ရဲတာလဲ...”

မိစ္ဆာဘုရင် ရွှမ်မင် သည် တိတ်တဆိတ် ဒေါသထွက်နေသည်။

“ငါ့လူတွေကို သတ်ရဲတဲ့ကောင် ဘယ်သူမဆို သေလမ်းရှာတာပဲ...”

သူက အနိုင်ကျင့်ခံရတာကို ဘယ်တုန်းကမှ သည်းမခံခဲ့ဖူးပေ။ အရင်တုန်းက ကိုးဝိညာဉ် မိစ္ဆာ နန်းတော်၏ ခြုံခိုတိုက်ခိုက်တာ ခံရတုန်းကတောင်၊ သူတို့ကို ပြန်သတ်ပြီးမှ ထွက်ပြေး လွတ်မြောက်လာခဲ့သူ ဖြစ်သည်။

ထိုက်ရွှီ အင်မော်တယ် မဟာမိတ်အဖွဲ့ နယ်မြေထဲမှာလည်း အင်မော်တယ် မြို့နှစ်မြို့ကို သွေးယဇ်ပူဇော်ပြီး၊ ကျင့်ကြံသူ မိသားစု သုံးစုကို မျိုးဖြုတ်သတ်ဖြတ်ပြီးမှ ဒီနေရာကို ပြန်လာခဲ့တာ ဖြစ်၏။

မူလက သူ ဒီနေရာမှာ ခဏလောက် အနားယူပြီးမှ၊ မူလဝိညာဉ် အဆင့် တက်လှမ်းနိုင်မည့် အခွင့်အရေးကို ရှာဖွေဖို့ ကိုးဝိညာဉ် မိစ္ဆာ တောင်တန်း၏ ရှေးဟောင်း နယ်မြေထဲကို ဝင်ရောက် စူးစမ်းရန် စီစဉ်ထားခြင်းပင်။

ဒါကြောင့်လည်း ဝိညာဉ်ကြွေ တောင်တန်း သခင်နှင့် သူ့လူတွေကို လွှတ်ပြီး၊ သူ့အတွက် အလုပ်လုပ်ပေးမည့် မြေဆရာ တချို့ကို သွားရောက် စုဆောင်းခိုင်းလိုက်၏။

သို့သော်၊ ယခုတော့ ဝိညာဉ်ကြွေ တောင်တန်းက သုံးကောင်စလုံး သေဆုံးသွားခဲ့ပြီ။

“တာ့ယွဲ့ နယ်မြေ... တာ့ယွဲ့ နန်းတော်ကများ ငါ့လူတွေကို သတ်ရဲတာလား... ကောင်းပြီလေ...”

မိစ္ဆာဘုရင် ရွှမ်မင် နှာခေါင်းရှုံ့လိုက်သည်။ အရင်တုန်းကတော့ သူ တာ့ယွဲ့ နယ်မြေကို သွားဖို့ စိတ်ကူးမရှိခဲ့။ ယခုတော့ သူ ထိုနေရာကို သွားလည်ချင်စိတ် ပေါက်သွားပြီပင်။

တာ့ယွဲ့ နယ်မြေကို မသွားခင်၊ ဝိညာဉ်ကြွေ တောင်တန်းက သုံးကောင် ဘယ်လို သေသွားသလဲ ဆိုတာကို အရင် စုံစမ်းရပေဦးမည်။

(၁၅) ရက် ကြာပြီးနောက်...၊

ချင်းယွဲ့ တောင်ထွတ်၊ လော့ယွဲ့ မဟာမိတ်အဖွဲ့ ကောင်းကင်ဂူ လျှို့ဝှက်နယ်မြေ အတွင်း၌...

စုယွီက မိန်းကလေးငယ် တစ်ဦးကို ခေါ်ဆောင်ပြီး ပြန်ရောက်လာသည်ကို မြင်သောအခါ၊ ယွီခယ်အာ၊ ယွီချန်ချင်း၊ စုချီ၊ လော့ချင်းယာနှင့် အခြားသူများ အားလုံး အံ့အားသင့်သွားကြ၏။

မာထျန်းလင်၏ သေးသေးကွေးကွေးနှင့် ချစ်စဖွယ်ကောင်းသော ပုံစံလေးကို မြင်လိုက်ရသောအခါ ယွီခယ်အာ သဘောကျသွားသည်။ သူမကို အနားသို့ အမြန် ခေါ်ယူလိုက်ပြီးနောက် စုယွီဘက်သို့ လှည့်ကာ မေးလိုက်သည်။

“ဘယ်က ကလေးမလေးကို ပြန်ပေးဆွဲလာတာလဲ...”

စုယွီ ခပ်ဖျော့ဖျော့ ရယ်မောလိုက်ပြီး ခေါင်းယမ်းလိုက်သည်။

“သူ့နာမည်က မာထျန်းလင်... မာမိသားစုက ကလေးမလေးပါ... တာအိုမိတ်ဆွေ မာရှီချင်းရဲ့ သမီးလေ... အသက်က (၁၁) နှစ် ရှိပြီ... မြေကမ္ဘာအဆင့် ရေဝိညာဉ်အမြစ် ပါရမီရှင်လေးပေါ့...”

“တာအိုမိတ်ဆွေ မာ က သူ့သမီးကို မြေဆရာ တစ်ယောက် အဖြစ် မကြီးပြင်းစေချင်လို့၊ ကျွန်တော့်ကို တပည့်အဖြစ် လက်ခံပေးပါလို့ တောင်းဆိုလာတာ... ဒါပေမဲ့ ကျွန်တော် စဉ်းစားပြီး ငြင်းလိုက်ပါတယ်...”

“ဒါပေမဲ့ တပည့်အဖြစ် လက်မခံတာက ကိစ္စမရှိပါဘူး... ထျန်းလင်လေးက ပါရမီ ကောင်းပါတယ်... ဒါကြောင့် ဒီကို ခေါ်လာခဲ့တာ... နောက်ဆိုရင် ကျွန်တော် ဖြစ်ဖြစ်၊ မင်းတို့ ဖြစ်ဖြစ် သူ့ကို ကျင့်ကြံခြင်းနဲ့ ပတ်သက်ပြီး သင်ကြားပေးလို့ ရတာပေါ့...”

မြေကမ္ဘာအဆင့် ဝိညာဉ်အမြစ် ပါရမီရှင်တဲ့လား...

စုချီ၊ လန်ရှီး၊ လန်ကုန်း၊ ယွီချန်ချင်း နှင့် အခြားသူများ အားလုံး အံ့သြတကြီး ရေရွတ်လိုက်မိကြသ၏

သူမတို့ထဲက ဘယ်သူမှ ဒီကလေးမလေးရဲ့ ပါရမီလောက် မကောင်းကြပေ။

ခဏကြာသောအခါ...

မာထျန်းလင်လေးသည် ယွီခယ်အာ၊ ယွီချန်ချင်း၊ စုချီ တို့၏ ဝိုင်းရံခြင်းကို ခံလိုက်ရပြီး၊ သူတို့အားလုံး စကားတွေ ဖောင်ဖွဲ့နေကြတော့၏။ မကြာခင်မှာပင် မာထျန်းလင်၏ အကြောင်းစုံကို သူတို့အားလုံး သိရှိသွားကြသည်။

ထိုအခါ မျက်လုံးများ အရောင်လက်နေသော စုချီက အကြံတစ်ခု ပေးလိုက်၏။

စုယွီကသာ မာထျန်းလင်ကို တပည့်အဖြစ် လက်မခံဘူး ဆိုလျှင်၊ ယွီခယ်အာ ဦးဆောင်ပြီး သူတို့အားလုံး ဝိုင်းပြီး တပည့်အဖြစ် လက်ခံကြမည် ပေါ့။ သို့သော် စုချီ၏ အကြံပြုချက်ကို ယွီခယ်အာနှင့် ယွီချန်ချင်းတို့က ချက်ချင်း ပယ်ချလိုက်သည်။

အကြောင်းကတော့ ယွီချန်ချင်းက စုချီရဲ့ ဆရာလေ။ တကယ်လို့ သူတို့အားလုံးကသာ မာထျန်းလင်ရဲ့ ဆရာတွေ ဖြစ်လာကြလျှင်၊ စုချီက မာထျန်းလင်နဲ့ ဆရာတူ အစ်မ ဖြစ်လာမှာ မဟုတ်ဘူးလား။ ရယ်စရာ ကောင်းလိုက်တာ။

အကြိမ်ကြိမ် ကန့်ကွက်သော်လည်း စုချီ မအောင်မြင်ခဲ့ပေ။ စိတ်ကောက်ပြီး ကျန်ရစ်ခဲ့ရ၏။

ကံကောင်းသည်မှာ မာထျန်းလင်လေးက အပြောအဆို ချိုသာပြီး၊ "အစ်မကြီး... အစ်မကြီး..." ဟု တတွတ်တွတ် ခေါ်နေသဖြင့် စုချီ သဘောကျသွား၏။ သူမက မာထျန်းလင်ထက် ဆယ်စုနှစ်ပေါင်းများစွာ အသက်ကြီးတယ် ဆိုသော အချက်ကိုတောင် မေ့သွားပြီး ပျော်ရွှင်နေလေသည်။

ယွီခယ်အာ၊ စုချီနှင့် အခြားသူများ၏ ဂရုစိုက်မှုအောက်တွင် မာထျန်းလင်သည် ချင်းယွဲ့ တောင်ထွတ်ရှိ အရာရာတိုင်းနှင့် လျင်မြန်စွာ ရင်းနှီးကျွမ်းဝင်သွား၏။

ရက်အနည်းငယ် ကြာပြီးနောက်...

စုယွီသည် မာထျန်းလင်ကို သူ့အနားသို့ ခေါ်ယူလိုက်သည်။ မာရှီချင်း၏ ပြုစုပျိုးထောင်မှုကြောင့် မာထျန်းလင်တွင် ခိုင်မာသော အခြေခံအုတ်မြစ် ရှိနေပြီး၊ စိတ်ဓာတ်ပိုင်းဆိုင်ရာရော ဗဟုသုတပိုင်းဆိုင်ရာပါ ထပ်မံ သင်ကြားပေးစရာ မလိုတော့ပေ။ သို့သော် ကျင့်ကြံခြင်းဆိုင်ရာ အခြေခံ ဗဟုသုတများကိုတော့ သင်ကြားပေးရန် လိုအပ်သေးသည်ဒး။

လက်ရှိအချိန်တွင် စုယွီ အဓိက လေ့ကျင့်နေသော ရေဝိညာဉ်အမြစ် ကျင့်စဉ်မှာ "နေရောင်ခြည် မူလသစ်သား အစစ်အမှန် ကျင့်စဉ်"ပင် ဖြစ်သည်။

အခန်း (၃၉၈) - မိစ္ဆာကျဆုံးခြင်း၊ ရွှေအမြုတေ အလယ်အလတ်အဆင့် (အပိုင်း ၆)

~ရှေးဟောင်းကာလက ရေဝိညာဉ်အမြစ် အတွက် အထွတ်အထိပ် ကျင့်စဉ်တစ်ခု။

ဒီကျင့်စဉ်ကို လေ့ကျင့်ဖို့ အတွက် ရေဓာတ် ရတနာ တစ်ပါး ဖြစ်သော "နေရောင်ခြည် နတ်ရေစင်" ကို အသုံးပြုပြီး အခြေခံ တည်ဆောက်ရ၏။

ထို့ကြောင့် မာထျန်းလင် အနေဖြင့် ဒီကျင့်စဉ်ကို လေ့ကျင့်၍ မရနိုင်ပေ။

သို့သော် စုယွီတွင် ရေဝိညာဉ်အမြစ် ကျင့်စဉ်များ မရှားပါးလှပေ။ လော့ယွဲ့ မဟာမိတ်အဖွဲ့ လျှို့ဝှက်နယ်မြေ အတွင်းမှ ကျင့်စဉ် အခု (၂၀) ကျော် ရှာဖွေတွေ့ရှိခဲ့ရာ၊ (၁၅) ခုကျော်သည် ရွှေအမြုတေ အဆင့် အတွက် သင့်တော်သည်။

ထိုအထဲတွင် မူလဝိညာဉ် အဆင့်အထိ ကျင့်ကြံနိုင်သော ရေဝိညာဉ်အမြစ် ကျင့်စဉ် နှစ်ခု ပါဝင်၏။

တစ်ခု၏ အမည်မှာ "ပါဆွေ အစစ်အမှန် နည်းစနစ်" ဖြစ်သည်။ ၎င်းသည် လွှမ်းမိုးချုပ်ကိုင်နိုင်သော မန္တန်စွမ်းအား ပေးစွမ်းနိုင်ပြီး၊ ရေတစ်စက်ချင်းစီသည် ပေါင်တစ်ထောင်မျှ လေးလံကာ အလွန် ပြင်းထန်သည်။

နောက်တစ်ခု၏ အမည်မှာ "နူးညံ့သိမ်မွေ့ခြင်း တစ်ထောင် ရေနတ်သမီး နည်းစနစ်" ဖြစ်သည်။ ၎င်းသည် အားနည်းခြင်းဖြင့် အားကြီးခြင်းကို အနိုင်ယူသည့် မူဝါဒကို ကျင့်သုံးပြီး၊ ရေကဲ့သို့ မေတ္တာတရားကို တန်ဖိုးထား၏။

ရေသည် အရာအားလုံးကို အကျိုးပြုသော်လည်း မည်သူနှင့်မျှ မယှဉ်ပြိုင်ဘဲ၊ လူတို့ မုန်းတီးသော နိမ့်ကျသည့် နေရာများတွင် စီးဆင်းနေထိုင်သဖြင့် မြင့်မြတ်သော သီလနှင့် ပြည့်စုံသည်... ယှဉ်ပြိုင်ခြင်း မရှိသောကြောင့် ပူပန်ခြင်းလည်း ကင်းဝေးသည်။

"နူးညံ့သိမ်မွေ့ခြင်း တစ်ထောင် ရေနတ်သမီး နည်းစနစ်" ၏ အနှစ်သာရသည် စုယွီ၏ ခံယူချက်နှင့် အကိုက်ညီဆုံး ဖြစ်၏။ ရေကဲ့သို့ နူးညံ့သိမ်မွေ့ပြီး၊ တိုက်ခိုက်ခြင်းထက် ခုခံကာကွယ်ခြင်းကို ပိုမို ဦးစားပေးသည်။

ထို့ကြောင့် စဉ်းစားသုံးသပ်ပြီးနောက် စုယွီသည် "နူးညံ့သိမ်မွေ့ခြင်း တစ်ထောင် ရေနတ်သမီး နည်းစနစ်" ကို မာထျန်းလင်အား သင်ကြားပေးရန် ဆုံးဖြတ်လိုက်၏။

သူသည် ဤကျင့်စဉ်ကို အချိန်အတန်ကြာ လေ့လာခဲ့ပြီး ၎င်း၏ ဝိသေသလက္ခဏာများကို ဓာတ်ကြီးငါးပါး ကျင့်စဉ်နှင့် ပေါင်းစပ်ထားပြီး ဖြစ်သဖြင့်၊ သူနှင့် မစိမ်းသက်လှပေ။

မာထျန်းလင် ကဲ့သို့သော မိန်းကလေးငယ် တစ်ဦးကို ကျင့်ကြံခြင်း လမ်းကြောင်းပေါ်သို့ ပို့ဆောင်ပေးရန် သူ့တွင် အရည်အချင်း အလုံအလောက် ရှိပါသည်။

"နူးညံ့သိမ်မွေ့ခြင်း တစ်ထောင် ရေနတ်သမီး နည်းစနစ်" ကို တစ်ရက်တည်းဖြင့် အောင်မြင်စွာ စတင် ကျင့်ကြံနိုင်ပြီး၊ ချီစုစည်းခြင်း အဆင့် (၁) သို့ ရောက်ရှိသွားသော မာထျန်းလင်ကို ကြည့်ရင်း စုယွီ အချိန်အတော်ကြာ တိတ်ဆိတ်ငြိမ်သက်နေမိ၏။

‘အရင်တုန်းက...

ငါ..ကျင့်ကြံခြင်း စတင်ဖို့ ဘယ်လောက်ကြာခဲ့ရသလဲ…’

စုယွီသည် မာထျန်းလင်၏ ကျင့်ကြံခြင်းကို အထောက်အကူ ပြုနိုင်ရန်၊ ဝိညာဉ်သန့်စင်အိုး ထဲမှ ပထမအဆင့် ဝိညာဉ်အရည်များကို ထုတ်ပေးလိုက်သည်။ ဝိညာဉ်အရည်ဖြင့် ကျင့်ကြံခြင်းသည် ဆေးလုံးများ သုံးစွဲခြင်းထက် ပိုမို ကောင်းမွန်၏။

(၆) လတာ ကာလတိုလေး အတွင်းမှာပင် မာထျန်းလင်၏ ကျင့်ကြံခြင်း အဆင့်သည် ချီစုစည်းခြင်း အဆင့် (၄) သို့ ရောက်ရှိသွားခဲ့ပြီ ဖြစ်သည်။

ဤ တိုးတက်မှုနှုန်းထားသည် စုယွီကိုပင် အနည်းငယ် မနာလို ဖြစ်သွားစေ၏။

‘ဒါ မြေကမ္ဘာအဆင့် ဝိညာဉ်အမြစ် နဲ့ အထူး ခန္ဓာကိုယ်ဖွဲ့စည်းပုံ တို့ရဲ့ အစွမ်းကြောင့် ရရှိလာတဲ့ ကျင့်ကြံနှုန်းလား။

အရင်တုန်းက ဆိုရင် ချီစုစည်းခြင်း အဆင့် (၁) ကနေ (၂) ကို ရောက်ဖို့ ၁ နှစ်၊ ၂ နှစ်လောက် ကြာခဲ့တာ။

အဆင့် (၄) ရောက်ဖို့ ဆိုရင် ဆယ်စုနှစ် တစ်ခုနီးပါး ကြာခဲ့တာလေ’

စုယွီသည် သူ၏ ထိပ်တန်းအဆင့် ဓာတ်ကြီးငါးပါး ဝိညာဉ်အမြစ်ကို ကြည့်ရင်း တိတ်တဆိတ် တွေးတောလိုက်မိသည်။

“ငါ့ရဲ့ ဝိညာဉ်အမြစ်က မြေကမ္ဘာအဆင့် ဝိညာဉ်အမြစ် အဖြစ် ပြောင်းလဲသွားနိုင်မယ့် အခွင့်အရေး ရှိသေးလား မသိဘူး...”

အကယ်၍ ပြောင်းလဲ၍ ရလျှင်တော့... မြေကမ္ဘာအဆင့် ဓာတ်ကြီးငါးပါး ဝိညာဉ်အမြစ် ဆိုတာ မာထျန်းလင်၏ မြေကမ္ဘာအဆင့် ရေဝိညာဉ်အမြစ် တစ်ခုတည်း ထက်တော့ အများကြီး ပိုသာလွန်နေမှာ သေချာ၏။

(၂) လ ကြာပြီးနောက်...၊

ထိုနေ့တွင်...

ချင်းယွဲ့ တောင်ထွတ်၏ ထိပ်ရှိ တစ်ဝက်တစ်ပျက် ပြိုကျနေသော အင်မော်တယ် နန်းတော် အောက်ဘက် ဂူစံအိမ် အတွင်း၌...

“ဝုန်း...”

“ဝူး... ဝူး... ဝူး...”

စုယွီသည် ဓာတ်ကြီးငါးပါး ကျင့်စဉ်ကို လည်ပတ်၍ နေ့စဉ် ကျင့်ကြံခြင်းကို စတင်လိုက်သည်နှင့် တပြိုင်နက်၊ အရပ်မျက်နှာ အသီးသီးမှ အဆုံးမဲ့ သဘာဝ ဝိညာဉ်စွမ်းအင်များသည် စုဝေးရောက်ရှိလာပြီး သူ့ထံသို့ တိုးဝင်လာကြသည်။ တဖြည်းဖြည်းနှင့် သူ့ပတ်ဝန်းကျင်တွင် သဘာဝ ဝိညာဉ်စွမ်းအင် ဝဲကတော့ကြီး တစ်ခု ဖြစ်ပေါ်လာ၏။

ကြီးမားသော သဘာဝ စွမ်းအားများသည် စုယွီ၏ ကိုယ်ထဲသို့ စီးဝင်သွားပြီး၊ ဓာတ်ကြီးငါးပါး ကျင့်စဉ်၏ လည်ပတ်မှုအောက်တွင် ဓာတ်ကြီးငါးပါး မန္တန်စွမ်းအား အမျှင်တန်းလေးများ အဖြစ်သို့ ပြောင်းလဲသွားကြသည်။

နောက်ဆုံးတွင် ထိုစွမ်းအားများသည် စုယွီ၏ ဒန်တျန် အတွင်း၌ စုစည်းကာ၊ လေးပတ်လည် ရွှေအမြုတေ ထဲသို့ ပေါင်းစပ်သွားကြသည်။

စုယွီ၏ ဓာတ်ကြီးငါးပါး ဝိညာဉ်အမြစ်နှင့် ရွှေအမြုတေ အပေါ်တွင် တွဲလွဲခိုနေသော ရွှေရောင် ကြေးပြားလေးသည် မှိန်ဖျော့ဖျော့ ရွှေရောင် အလင်းတန်းများဖြင့် လွှမ်းခြုံထား၏။ ထိုရွှေရောင် အလင်းတန်းများ၏ အောက်တွင် စုယွီ၏ ရွှေအမြုတေသည် သိမ်မွေ့သော ပြောင်းလဲမှုများ ဖြစ်ပေါ်နေသည်။

အချိန်များ ဖြည်းညှင်းစွာ ကုန်ဆုံးသွားသည်။

တစ်နာရီ ကြာပြီးနောက်...

“ဘုန်း...”

စုယွီ၏ အရှိန်အဝါသည် တိတ်တဆိတ် ပြောင်းလဲသွားသည်။ ရွှေအမြုတေ အဆင့် (၃) ရှိသော မန္တန်စွမ်းအား အရှိန်အဝါသည် ယခုအခါ အဆင့် (၄) သို့ သဘာဝကျကျ ထိုးဖောက် ဝင်ရောက်သွားပြီ ဖြစ်၏။ ကျင့်ကြံခြင်း အဆင့် တက်သွားသည်နှင့် တပြိုင်နက် ဒန်တျန် အတွင်းရှိ ကြေးပြားလေးသည် တုန်ခါသွားပြီး တိုးညှင်းသော မြည်သံတစ်ခု ထုတ်လွှတ်လိုက်သည်။

ကြောက်မက်ဖွယ် ကောင်းလှသော ဓာတ်ကြီးငါးပါး မန္တန်စွမ်းအား အရှိန်အဝါ ပေါက်ကွဲထွက်ပေါ်လာ၏။ စုယွီ အဆင့်တက်သွားသည့် အခိုက်အတန့်တွင်၊ သူ့ပတ်ဝန်းကျင်ရှိ သဘာဝ ဝိညာဉ်စွမ်းအင်များသည် ခေတ္တမျှ ရပ်တန့်သွားသကဲ့သို့ ဖြစ်သွားသည်။

မယုံကြည်နိုင်လောက်အောင် ပြင်းထန်သော ဝိညာဉ်ဖိအားကြောင့် စုယွီ၏ အရှိန်အဝါသည် အလွန်တရာ အစွမ်းထက်လာ၏။

ရွှေအမြုတေ အဆင့် (၄) သာ ရှိသေးသော်လည်း၊ သူ၏ မန္တန်စွမ်းအားသည် ရွှေအမြုတေ အဆင့် (၅) ရှိသော မာရှီချင်းထက်ပင် ပိုမို သန်မာနေသည်ဟု စုယွီ ခံစားလိုက်ရသည်။

ရွှေအမြုတေ အဆင့် (၄) ရှိသော ဓာတ်ကြီးငါးပါး မန္တန်စွမ်းအားသည်၊ သာမန် ရွှေအမြုတေ အဆင့် (၆) အရှင်သခင် တစ်ပါးနှင့် ယှဉ်ပြိုင်နိုင်စွမ်း ရှိနေပြီ ဖြစ်၏။

စုယွီ အဆင့်တက်သွားသည်နှင့် တပြိုင်နက် သဘာဝ ဝိညာဉ်စွမ်းအင်များသည် ဒီရေအလား ထပ်မံ တိုးဝင်လာပြီး၊ သူ့ခန္ဓာကိုယ်က ရူးသွပ်စွာ ဝါးမျိုလိုက်သည်။ ဤ ဖြစ်စဉ်သည် နေ့ဝက်ခန့် ကြာမြင့်ပြီးမှ ငြိမ်သက်သွားလေ၏။

မှောင်မည်းနေသော ဂူစံအိမ် အတွင်း၌ စုယွီ မျက်လုံးများကို ဖွင့်လိုက်ပြီး ပူနွေးသော လေငွေ့တစ်ချက် မှုတ်ထုတ်လိုက်သည်။

“ဟူး...”

လျှပ်စီးလက်သကဲ့သို့ တောက်ပသော နတ်ဘုရား အလင်းတန်းများ သူ့မျက်ဝန်းထဲမှ ထိုးထွက်လာပြီး အချိန်အတော်ကြာအောင် တည်ရှိနေ၏။

သူ၏ အရှိန်အဝါသည် ယခင်ကနှင့် နှိုင်းယှဉ်လျှင် သိသိသာသာ ပြောင်းလဲသွားခဲ့ပြီ ဖြစ်သည်။

ရွှေအမြုတေ အဆင့် (၃) မှ (၄) သို့ ကူးပြောင်းခြင်းသည် ကြီးမားသော တိုးတက်မှုကြီး တစ်ခု ဖြစ်၏။

ဤအဆင့် တက်လှမ်းမှုက စုယွီအား ရွှေအမြုတေ အဆင့် အစောပိုင်းမှ အလယ်အလတ်အဆင့်သို့ တွန်းပို့လိုက်ခြင်း ဖြစ်သည်။

ခန္ဓာကိုယ် အတွင်းရှိ မန္တန်စွမ်းအား၊ ဝိညာဉ်စွမ်းအားနှင့် နတ်ဘုရား စိတ်အာရုံတို့၏ ပြောင်းလဲမှုများကို ခံစားပြီးနောက်၊ စုယွီ စိတ်ထဲတွင် ကြေညာလိုက်မိ၏။

“ဓာတ်ကြီးငါးပါး ကျင့်စဉ်က ပတ်ဝန်းကျင် အခြေအနေ လိုအပ်ချက် မြင့်မားပြီး၊ စုပ်ယူရတဲ့ ဝိညာဉ်စွမ်းအင်နဲ့ ကုန်ကျရတဲ့ အရင်းအမြစ်တွေက ဝိညာဉ်အမြစ် တစ်ခုတည်း ရှိတဲ့ ကျင့်ကြံသူတွေထက် (၁၀) ဆလောက် ပိုများပေမယ့်... ဝန်ခံရရင်တော့ ငါ့ရဲ့ မန္တန်စွမ်းအားက တကယ့်ကို အံ့မခန်း အစွမ်းထက်တာပဲ...”

‘များပြားလွန်းလိုက်တာ။

သီအိုရီအရ ပြောရရင်... ကြာရှည်ဆွဲ တိုက်ခိုက်ရတဲ့ တိုက်ပွဲမျိုးမှာ ရွှေအမြုတေ အဆင့် (၆) အရှင်သခင် တစ်ပါးကိုတောင် မန္တန်စွမ်းအား ကုန်ခန်းသွားအောင် လုပ်ပစ်နိုင်တယ်’

ထို့နောက် စုယွီသည် ကျွမ်းကျင်မှု မျက်နှာပြင်ပေါ်သို့ အာရုံစိုက်လိုက်၏။

[ အမည် - စုယွီ ]

[ ကျင့်ကြံခြင်း - ရွှေအမြုတေ အဆင့် (၄) ]

[ သက်တမ်း - (၁၅၀) / (၁၀၅၅) နှစ် ]

[ ကျင့်စဉ်များ - ဓာတ်ကြီးငါးပါး ကျင့်စဉ် (ရွှေအမြုတေ အဆင့် - ၄ ၊ ကျွမ်းကျင်မှု ၀.၀၁%) ၊ မိကျောင်းမိစ္ဆာ (၁၀၈) ကွက် ကိုယ်ခန္ဓာ သန့်စင်ခြင်း ကျင့်စဉ် (အဆင့် - ၂၂ ၊ ကျွမ်းကျင်မှု ၆၄.၄၃%) ၊ သွေးဝေလငါး လမင်းမြို နည်းစနစ် (အဆင့် - ၃ ၊ ကျွမ်းကျင်မှု ၃၀%) ၊ ရွှေပုစဉ်းရင်ကွဲ ကျင့်စဉ် (အဆင့် - ၃ ၊ ကျွမ်းကျင်မှု ၇၈.၇၁%) ]

[ သိုင်းနည်းစနစ်များ - သစ်နွယ်ရှင် (ပြီးပြည့်စုံခြင်း) ၊ ဝိညာဉ်ပျိုးထောင်ခြင်း (ပြီးပြည့်စုံခြင်း) ... ရေခဲနှင့် မီး ဝိညာဉ်ဆင့်ခေါ်ခြင်း (ပြီးပြည့်စုံခြင်း) ၊ နဂါးပျံ ဖီးနစ်ကကြိုး (ပြီးပြည့်စုံခြင်း) ၊ ရေခဲနှင့် မီး ငရဲဘုံ (ပြီးပြည့်စုံခြင်း) ၊ ယင်ယန် ထွက်ပြေးခြင်း (ပြီးပြည့်စုံခြင်း) ]

“ငါ့သက်တမ်းက (၄၅) နှစ် တိုးလာတာပဲ...”

စုယွီ စိတ်ထဲတွင် ညည်းတွားလိုက်၏။

ရှေးဟောင်း အစိမ်းရောင် သစ်သား နှစ်ပတ်လည် ကွင်း ကျင့်စဉ်က တကယ်ကို ကြောက်စရာ ကောင်းတာပဲ။

ရွှေအမြုတေ အဆင့်မှာ အဆင့်တစ်ဆင့် တက်ရုံနှင့် ပုံမှန်အားဖြင့် သက်တမ်း အနှစ် (၂၀) လောက်ပဲ တိုးလေ့ရှိ၏။

သို့သော်၊ အစိမ်းရောင် သစ်သား နှစ်ပတ်လည် ကွင်း ကျင့်စဉ်ကို လေ့ကျင့်ထားလို့ သူ့သက်တမ်း တိုးနှုန်းက နှစ်ဆလောက် ဖြစ်နေသည်။

ဒီနှုန်းထားအတိုင်း ဆိုလျှင် ရွှေအမြုတေ အဆင့် (၉) ရောက်သည့် အချိန်ကျလျှင်၊ သူ့သက်တမ်းက နှစ် (၁၃၀၀) ကျော်လောက် ရှိနေလိမ့်မည်။

ဒါက မူလဝိညာဉ် အဆင့် အရှင်သခင်ကြီး တစ်ပါး၏ ပျမ်းမျှ သက်တမ်းထက်တောင် နှစ် (၃၀၀) ကျော် ပိုများနေသေး၏။

ဆက်လက် ကြည့်ရှုရင်း စုယွီ တွေးလိုက်သည်။

“ကိုယ်ခန္ဓာ သန့်စင်ခြင်း ကျင့်စဉ်ရဲ့ ကျွမ်းကျင်မှုက (၆၄) ရာခိုင်နှုန်း ရောက်နေပြီ... အဆင့် (၂၃) ကို ရောက်ဖို့ သိပ်မလိုတော့ဘူး...” အဆင့် (၂၃) ဆိုသည်မှာ ရွှေအမြုတေ အဆင့် (၅) နှင့် ညီမျှသည်။

“ရွှေပုစဉ်းရင်ကွဲ ကျင့်စဉ်က ကျွမ်းကျင်မှု (၇၈) ရာခိုင်နှုန်း အထိ စုဆောင်းထားပြီးပြီ...”

သူ၏ ဝိညာဉ်စွမ်းအား ပြောင်းလဲမှုများကို အာရုံခံလိုက်၏။

အကယ်၍ သူ၏ နတ်ဘုရား စိတ်ဝိညာဉ်ကို ဝိညာဉ်ဖိအား အဖြစ် စုစည်းလိုက်လျှင်၊ ထိုဖိအားသည် ရွှေအမြုတေ အဆင့် နှောင်းပိုင်း အရှင်သခင် တစ်ပါး၏ ဖိအားနှင့် ခွဲခြား၍ မရနိုင်အောင် တူညီနေပြီ ဖြစ်သည်။

သာမန် ရွှေအမြုတေ အဆင့် အလယ်အလတ်တန်းစား အရှင်သခင် တစ်ယောက်ယောက်က သူ့ကို တိုက်ခိုက်ချင်သည် ဆိုလျှင်တောင်၊ စုယွီ၏ ဝိညာဉ်ဖိအားအောက်မှာ ဖိနှိပ်ခံရပြီး သူတို့ စွမ်းအားရဲ့ (၈၀) ရာခိုင်နှုန်းလောက်ကိုတောင် ထုတ်သုံးနိုင်တော့မှာ မဟုတ်ပေ။

ဒီအားသာချက်က တကယ်ကို ကြီးမားလှသည်။

ဒီအချက်ကို တွေးမိရင်း စုယွီ တိတ်တဆိတ် ဆုံးဖြတ်လိုက်၏။

“အခု ငါ့ကျင့်ကြံခြင်းက ရွှေအမြုတေ အဆင့် (၄) ကို ရောက်နေပြီ ဆိုတော့... အစိမ်းရောင် သစ်သား နှစ်ပတ်လည် ကွင်း ကျင့်စဉ်ရဲ့ နောက်ဆက်တွဲ ကျင့်စဉ်တွေကို ရှာဖို့ နည်းလမ်းရှာရတော့မယ်...”

သူ့ခန္ဓာကိုယ် အစစ်က ဒီနေရာမှာ ဆက်လက် ကျင့်ကြံနေပြီး၊ တာအိုရုပ်သေးကို အပြင်ထွက် ရှာဖွေခိုင်း၍ ရသည်။

လွန်ခဲ့သော ကာလအတွင်း တာအိုရုပ်သေးသည် လျှို့ဝှက်နယ်မြေထဲမှ တတိယအဆင့် ဝိညာဉ်သတ္တုရိုင်း ကုန်ကြမ်းပစ္စည်း အချို့ကို စုဆောင်းထားခဲ့ရာ၊ အချိန်အတန်ကြာ စုပ်ယူ သန့်စင်ရန် လုံလောက်မှု ရှိသည်။

သူ့ရုပ်သေး၏ စွမ်းအားသည်လည်း ရွှေအမြုတေ အဆင့် (၆) သို့ တက်လှမ်းရန် နီးစပ်နေပြီ ဖြစ်၏။

လက်ရှိ တာအိုရုပ်သေး၏ အခြေအနေနှင့် ဆိုလျှင် ရွှေအမြုတေ အဆင့် (၇) ကျင့်ကြံသူ တစ်ဦး၏ စွမ်းအားကိုပင် ထုတ်ဖော်ပြသနိုင်စွမ်း ရှိသည်။

ဒီလောက် စွမ်းအားမျိုး ရှိနေလျှင် အစိမ်းရောင် သစ်သား နှစ်ပတ်လည် ကွင်း ကျင့်စဉ်၏ နောက်ဆက်တွဲတွေကို ရှာဖွေဖို့ ဆိုတာ မခဲယဉ်းလောက်ပေ။

ကိုယ်ခန္ဓာ သန့်စင်ခြင်း ကျင့်စဉ်ကို ဂူစံအိမ်ထဲတွင် နောက်ထပ် တစ်ကြိမ် လေ့ကျင့်ပြီးမှသာ စုယွီသည် ခရီးထွက်ရန် ပြင်ဆင်လိုက်သည်။

နောက်တစ်နေ့တွင်...

သူ၏ တာအိုရုပ်သေးသည် ကောင်းကင်မိုးကြိုး ကြွက်ဘုရင်နှင့် ကြွက်အကောင်ရေ တစ်ထောင်ကို ခေါ်ဆောင်ကာ လော့ယွဲ့ မဟာမိတ်အဖွဲ့ လျှို့ဝှက်နယ်မြေ အပျက်အစီးမှ တိတ်တဆိတ် ထွက်ခွာသွား၏။

တာ့ယွဲ့ မှောင်ခိုဈေးကွက်သို့ ရောက်ရှိသောအခါ၊ သတင်းဆိုး တစ်ခုကို သူ ကြားသိလိုက်ရသည်။

အခန်း (၃၉၉) - တတိယအဆင့် အလယ်အလတ် ဆေးပညာရှင်၊ အဆောင်လက်ဖွဲ့ ပညာရှင် (အပိုင်း ၁)

~လော့ယွဲ့ မဟာမိတ်အဖွဲ့၏ ကောင်းကင်ဂူ လျှို့ဝှက်နယ်မြေ။

ချင်းယွဲ့ တောင်ထွတ်အောက်ရှိ ဂူစံအိမ် အတွင်း၌...

စုယွီသည် ကျောက်စိမ်းခုံတစ်ခု၏ ရှေ့တွင် ရပ်နေသည်။ သူ၏ လက်ထဲတွင် တတိယအဆင့် ထိပ်တန်း စုတ်တံတစ်ချောင်းကို ကိုင်ဆောင်ထား၏။ သူ၏ စိတ်ထဲတွင် ရွှေပုစဉ်းရင်ကွဲ ကျင့်စဉ်ကို လည်ပတ်ထားပြီး၊ အတွေးအာရုံများကို တည်ငြိမ်စေကာ တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့၏ အမွေအနှစ် နည်းပညာများကို ဆင်ခြင်သုံးသပ်နေသည်။

တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ ပြုလုပ်နည်းကို နားလည်သဘောပေါက်ထားသည်မှာ ကြာခဲ့ပြီ ဖြစ်၏။

သို့သော် သူ တစ်ခါမှ စမ်းသပ် မပြုလုပ်ကြည့်ခဲ့ဖူးပေ။

သူ မလုပ်တတ်၍ မဟုတ်။ တတိယအဆင့် အလယ်အလတ်တန်းစား အဆောင်လက်ဖွဲ့ကို ဖန်တီးချင်သော သူ့ဆန္ဒကို ထိန်းချုပ်ထားခဲ့၍ ဖြစ်သည်။

အကြောင်းမှာ သူ့လက်ထဲတွင် ရှိသော တတိယအဆင့် အလယ်အလတ်တန်းစား အဆောင်လက်ဖွဲ့ ကုန်ကြမ်းပစ္စည်းများသည် အလွန် ရှားပါးသောကြောင့် ဖြစ်သည်။

နှစ်များစွာ စုဆောင်းလာခဲ့သော်လည်း အဆောင်လက်ဖွဲ့ ပစ္စည်း (၅၀) စုံတောင် မပြည့်ပေ။

တစ်ခု သုံးလိုက်လျှင် တစ်ခု လျော့သွားမှာ ဖြစ်ပြီး၊ ဒါတွေက အလွန် တန်ဖိုးကြီးလှ၏။

သူ ဖြုန်းတီးပစ်လိုက်ရမှာကို နှမြောသဖြင့် တတိယအဆင့် အလယ်အလတ်တန်းစား အဆောင်လက်ဖွဲ့ ပညာရှင် ဖြစ်ချင်သည့် သူ့ဆန္ဒကို ထိန်းချုပ်ထားခဲ့ခြင်း ဖြစ်သည်။

ယခုအချိန်တွင် သူ၏ ကျင့်ကြံခြင်း အဆင့်သည် ရွှေအမြုတေ အဆင့် (၄) သို့ ရောက်ရှိသွားခဲ့ချေပြီ။

မန္တန်စွမ်းအား၊ ဝိညာဉ်စွမ်းအားနှင့် နတ်ဘုရား စိတ်အာရုံတို့သည် နောက်ထပ် အဆင့်တစ်ဆင့်သို့ ပြောင်းလဲသွားခဲ့ပြီ ဖြစ်သည်။

ဒီအခြေအနေမှာ တတိယအဆင့် အလယ်အလတ်တန်းစား အဆောင်လက်ဖွဲ့ကို အောင်မြင်စွာ ဖန်တီးနိုင်မယ့် အခွင့်အလမ်းက ပိုများလာပြီ ဖြစ်၏။

နာရီဝက်ခန့် ကြာပြီးနောက်...

စုယွီ ရုတ်တရက် စုတ်တံကို လှုပ်ရှားလိုက်သည်။ တတိယအဆင့် အလယ်အလတ်တန်းစား ဝိညာဉ်အရည်နှင့် ရောစပ်ထားသော မင်ရည်ထဲသို့ စုတ်တံကို နှစ်လိုက်ပြီး၊ ကျောက်စိမ်းခုံပေါ်တွင် တင်ထားသော ကျောက်စိမ်းပြားပေါ်၌ ကြေးမုံလမင်း အဆောင်လက်ဖွဲ့ကို စတင် ရေးဆွဲလိုက်၏။

မန္တန်စွမ်းအားနှင့် ဝိညာဉ်စွမ်းအင်များသည် စုတ်တံထဲသို့ စီးဝင်သွားသည်။ တတိယအဆင့် အလယ်အလတ်တန်းစား အဆောင်လက်ဖွဲ့၏ စုတ်ချက်တစ်ချက်ချင်းစီကို ရေးဆွဲတိုင်း၊ သူ၏ များပြားလှသော မန္တန်စွမ်းအားနှင့် ဝိညာဉ်စွမ်းအင်များကို ကုန်ခန်းသွားစေသည်။

ပထမဆုံး အကြိမ် ကြိုးပမ်းမှုတွင် စုယွီ ရေးဆွဲနေစဉ် ဟင်းလင်းပြင် စွမ်းအားများ ကမောက်ကမ ဖြစ်သွားသဖြင့်၊ ပစ္စည်းများသည် အမှုန့်အဖြစ် ပြိုကွဲပျက်စီးသွားလေ၏။

စုယွီသည် သူ၏ တတိယအဆင့် ထိပ်တန်း စုတ်တံ မပျက်စီးစေရန် ကာကွယ်လိုက်ပြီး၊ ပစ္စည်းများ ပျက်စီးသွားသည်ကို ဘာမှ မတုံ့ပြန်ဘဲ ကြည့်နေလိုက်သည်။ ထို့နောက် သူသည် ထိုဖြစ်ရပ်ကို ပြန်လည် သုံးသပ်ပြီး အဆောင်လက်ဖွဲ့ ဖန်တီးခြင်း လုပ်ငန်းစဉ်အပေါ် နားလည်မှုကို ရယူလိုက်၏။

ခဏအကြာတွင် စုယွီ စုတ်တံကို ချထားလိုက်ပြီး ဘေးတွင် တင်ပျဉ်ခွေထိုင်ကာ သူ၏ ကျင့်စဉ်ကို အသုံးပြု၍ မန္တန်စွမ်းအားနှင့် ဝိညာဉ်စွမ်းအင်များကို ပြန်လည် ဖြည့်တင်းလိုက်သည်။

တစ်နာရီကျော် ကြာပြီးနောက်...

စုယွီ ပြန်လည် မတ်တတ်ရပ်လိုက်သည်။ နောက်ထပ် ကျောက်စိမ်းပြား တစ်ချပ်ကို ထုတ်ယူလိုက်ပြီး၊ တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ကို ဆက်လက် ကြိုးစား ရေးဆွဲလိုက်၏။

ညရောက်သောအခါ...

အမှောင်ထုကြီး လွှမ်းမိုးလာပြီး ငွေရောင် လရောင်သည် ပိုးသားပါးပါးလေး လွှမ်းခြုံထားသကဲ့သို့ ချင်းယွဲ့ တောင်ထွတ်ပေါ်သို့ ကျရောက်နေသည်။ ပိုးကောင်ငယ်လေးများ၏ အော်မြည်သံမှလွဲ၍ လျှို့ဝှက်နယ်မြေ တစ်ခုလုံး တိတ်ဆိတ်ငြိမ်သက်နေ၏။

ဂူစံအိမ် အတွင်း၌မူ သဘာဝ ဝိညာဉ်စွမ်းအင်များသည် အလယ်ဗဟိုရှိ ကျောက်စိမ်းခုံဆီသို့ ရူးသွပ်စွာ တိုးဝင်နေကြသည်။

ဂူစံအိမ် အတွင်းရှိ ဟင်းလင်းပြင် လေထုသည် လှိုင်းဂယက်များ ထကာ တုန်ခါနေ၏။

စုယွီ ခြေလှမ်း အနည်းငယ် နောက်ဆုတ်လိုက်သည်။

ကျောက်စိမ်းခုံ အပေါ်တွင် လေထဲ၌ တွဲလွဲခိုနေသော ကျောက်စိမ်းပြားကို ကြည့်ရင်း၊ စုယွီ၏ မျက်နှာပေါ်တွင် စိတ်လှုပ်ရှားသော အရိပ်အယောင်များ ဖြတ်သန်းသွား၏။

“တတိယ အကြိမ်မြောက် ကြိုးစားမှု... တတိယမြောက် ပစ္စည်း... အောင်မြင်သွားပြီ...”

သူ တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ကို ဖန်တီးနိုင်ခဲ့ပြီ။

ဒီည ပြီးသွားလျှင် သူဟာ တတိယအဆင့် အလယ်အလတ်တန်းစား အဆောင်လက်ဖွဲ့ ပညာရှင် တစ်ယောက် ဖြစ်ပြီဟု သတ်မှတ်နိုင်လေပြီ။

ကျောက်စိမ်းခုံပေါ်ရှိ ကျောက်စိမ်းပြားသည် မရေမတွက်နိုင်သော သဘာဝ ဝိညာဉ်စွမ်းအင်များနှင့် ဟင်းလင်းပြင် စွမ်းအားများကို စုပ်ယူနေ၏။ နာရီဝက်ခန့် ကြာပြီးနောက် တုန်ခါမှုများ တဖြည်းဖြည်း ငြိမ်သက်သွားပြီး၊ ကမ္ဘာလောကကြီး ပြန်လည် အေးချမ်းသွားသည်။ ကျောက်စိမ်းပြားသည် ကျောက်စိမ်းခုံပေါ်သို့ ဖြည်းညှင်းစွာ ကျဆင်းလာ၏။

စုယွီ ရှေ့သို့ တိုးသွားပြီး သူ ဖန်တီးထားသော တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ကို ကြည့်လိုက်သည်။

အပြာနုရောင် အပြစ်အနာအဆာ ကင်းစင်သော ဝိညာဉ်ကျောက်စိမ်းပြားပေါ်တွင် မမြင်နိုင်လောက်အောင် သေးငယ်သော ရွှေရောင် မျဉ်းကြောင်းလေးများ ယှက်သန်းနေ၏။

ထိုရွှေရောင် မျဉ်းကြောင်းများသည် ဝိညာဉ်ကျောက်စိမ်းပြားနှင့် တစ်သားတည်း ပေါင်းစပ်သွားခဲ့ပြီ ဖြစ်သည်။ သို့မှသာ ပြီးပြည့်စုံသော တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ တစ်ခု ဖြစ်လာမည်။

အဆောင်လက်ဖွဲ့ ဖန်တီးရတာ ဘာလို့ ပိုခက်ခဲလာရသနည်း။

အဆင့်မြင့် အဆောင်လက်ဖွဲ့တွေမှာ ပိုမို ရှုပ်ထွေးနက်နဲသော လျှို့ဝှက်ချက်တွေ ပါဝင်နေ၍ပါပဲ။

ဝိညာဉ်ကျောက်စိမ်းပြားပေါ်မှာ သင်္ကေတ အချို့ကို ရိုးရိုးလေး ရေးဆွဲလိုက်ရုံနှင့် အဆောင်လက်ဖွဲ့ ဖြစ်မလာပါချေ။

ပထမအဆင့်၊ ဒုတိယအဆင့် နှင့် တတိယအဆင့် အဆောင်လက်ဖွဲ့တွေကြားက ကွာခြားချက်က မိုးနှင့် မြေလိုပါပင်။

တတိယအဆင့် အလယ်အလတ်တန်းစား နှင့် တတိယအဆင့် အဆင့်နိမ့် ကြေးမုံလမင်း အဆောင်လက်ဖွဲ့ ကြားက ကွာခြားချက်ကတော့ ပိုပြီး ကြီးမားပါသည်။

သင်္ကေတ လျှို့ဝှက်ချက်တွေ ကွာခြားတာ အပြင်၊ ဟင်းလင်းပြင် စွမ်းအားနှင့် ပုံရိပ်‌ယောင် စွမ်းအား ကွာခြားချက်တွေလည်း ပါဝင်နေ၏။

“ငါ့မှာသာ တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့တွေ အများကြီး ရှိခဲ့ရင်... ရွှေအမြုတေ အဆင့် နှောင်းပိုင်း အရှင်သခင် တစ်ပါးတောင်မှ လွတ်မြောက်ဖို့ ခက်ခဲလိမ့်မယ်... နောက်ဆုံးတော့ အရှင်လတ်လတ် အချုပ်ခံရပြီး စိတ်ပျက်လက်ပျက်နဲ့ သေဆုံးသွားရမှာပဲ...”

စုယွီ တိတ်တဆိတ် တွေးတောလိုက်၏။

သူ၏ အဆောင်လက်ဖွဲ့ ဖန်တီးမှု အတွေ့အကြုံများကို ပြန်လည် သုံးသပ်ပြီးနောက်၊ စုယွီသည် နားလည်မှု အသစ်တစ်ခု ရရှိလိုက်သည်။

ထို့နောက် ကျောက်စိမ်းခုံပေါ်မှ အဆောင်လက်ဖွဲ့ကို အစိမ်းရောင် သစ်သားလက်စွပ် အတွင်းသို့ သိမ်းဆည်းလိုက်၏။ ပြီးနောက် တင်ပျဉ်ခွေထိုင်ကာ ဓာတ်ကြီးငါးပါး ကျင့်စဉ်နှင့် ရွှေပုစဉ်းရင်ကွဲ ကျင့်စဉ်ကို လည်ပတ်၍ မန္တန်စွမ်းအားနှင့် ဝိညာဉ်စွမ်းအင်များကို ပြန်လည် ဖြည့်တင်းလိုက်သည်။

နောက်ထပ် (၁၅) ရက်တာ ကာလအတွင်း စုယွီသည် ဂူစံအိမ်ထဲ၌ တံခါးပိတ် ကျင့်ကြံနေခဲ့၏။

နေ့စဉ် ကျင့်ကြံခြင်း လုပ်ငန်းစဉ်များအပြင်၊ တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့များကို ရေးဆွဲရင်း ဟင်းလင်းပြင်နှင့် ပုံရိပ်‌ယောင် စွမ်းအားများကို နားလည်သဘောပေါက်ရန် ကြိုးစားနေခဲ့သည်။

ရွှေအမြုတေ အဆင့် (၄) သို့ ရောက်ရှိပြီးနောက် စုယွီ၏ စွမ်းရည်များသည် သိသိသာသာ တိုးတက်လာခဲ့၏။

ယခုအချိန်တွင် တတိယအဆင့် အလယ်အလတ်တန်းစား အဆောင်လက်ဖွဲ့ ရေးဆွဲရာ၌ သူ ပင်ပန်းသည်ဟု မခံစားရတော့ပေ။ အမှန်တကယ်တော့ အောင်မြင်မှု နှုန်းထားကို မြှင့်တင်ရန် ပိုမို လွယ်ကူလာ၏။

လက်ထဲရှိ ပစ္စည်းအစုံ (၅၀) နီးပါး ကုန်ခန်းသွားချိန်တွင်၊ စုယွီသည် တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ ဖန်တီးမှု ကျွမ်းကျင်မှုကို (၄၂) ရာခိုင်နှုန်း အထိ မြှင့်တင်နိုင်ခဲ့သည်။ ယေဘုယျအားဖြင့် ပစ္စည်း (၅) စုံလျှင် (၂) ခု အောင်မြင်အောင် ဖန်တီးနိုင်လာသည်။

ပစ္စည်း (၄၈) စုံ အသုံးပြုပြီးနောက် သူသည် တတိယအဆင့် အလယ်အလတ်တန်းစား ကြေးမုံလမင်း အဆောင်လက်ဖွဲ့ (၁၁) ခုကို အောင်မြင်စွာ ဖန်တီးနိုင်ခဲ့၏။

ထို့နောက် စုယွီသည် တံခါးပိတ် ကျင့်ကြံရာမှ ထွက်ခွာလာခဲ့သည်။

အဆောင်လက်ဖွဲ့ ပစ္စည်းများ ကုန်သွားပြီ ဖြစ်သဖြင့်၊ စုယွီသည် အတိတ်က လော့ယွဲ့ မဟာမိတ်အဖွဲ့၏ အရင်းအမြစ် နေရာများကို စဉ်းစားလိုက်မိ၏။

“ဒီ လျှို့ဝှက်နယ်မြေထဲက ဘယ်တောင်ထွတ်က လော့ယွဲ့ မဟာမိတ်အဖွဲ့ရဲ့ အရင်းအမြစ် နေရာ ဖြစ်မလဲ မသိဘူး...”

လော့ယွဲ့ မဟာမိတ်အဖွဲ့ရဲ့ အရင်းအမြစ် နေရာတွေအကြောင်း သတင်းရနိုင်လျှင်၊ တတိယအဆင့် အဆောင်လက်ဖွဲ့ ပစ္စည်းတွေ ရနိုင်မည့် အရင်းအမြစ်တွေကို ရှာတွေ့နိုင်လောက်၏

လော့ယွဲ့ မဟာမိတ်အဖွဲ့၏ အင်အားနှင့် ဩဇာအာဏာ အရ ဆိုချှင်၊ သူတို့မှာ ဒီလို ပစ္စည်းတွေ မရှိဘဲ မနေပါချေ။