အခန်း (၄၀၃-၄၀၅)

အခန်း (၄၀၃) - တတိယအဆင့် အလယ်အလတ် ဆေးပညာရှင်၊ အဆောင်လက်ဖွဲ့ ပညာရှင် (အပိုင်း ၅)

~"ထိုက်ရွှီ အင်မော်တယ် မဟာမိတ်အဖွဲ့၊ ချီမြစ် ဂိုဏ်းခွဲ ခေါင်းဆောင် ဟုတ်လား..."

တာအိုရုပ်သေးသည် ဒီသတင်းအချက်အလက်ကို စဉ်းစားလိုက်ပြီး သူ့မျက်နှာပေါ်တွင် အေးစက်သော အပြုံးတစ်ခု ပေါ်လာသည်။

"ဟဲဟဲ... စိတ်ဝင်စားစရာပဲ... ရွှေအမြုတေ အဆင့် (၉) လောက်ပဲ ရှိတဲ့ကောင်ကများ ငါ့ကို တားဆီးရဲတယ်ပေါ့..."

မောက်မာလိုက်တာ။

ချီမြစ် ဂိုဏ်းခွဲ ခေါင်းဆောင်သည် မျက်လုံးများကို မှေးစင်းကာ တာအိုရုပ်သေးကို စူးစမ်းလိုက်၏။ တာအိုရုပ်သေး မောင်းနှင်လာသော ပျံသန်းရေး ယာဉ်ပျံသည် ထိပ်တန်း မှော်လက်နက် တစ်ခု ဖြစ်ပြီး၊ အလွန် ရှားပါးသော ပစ္စည်းတစ်ခု ဖြစ်သည်။

ယခု တာအိုရုပ်သေးကို ကြည့်လိုက်သောအခါ ၎င်း၏ အရှိန်အဝါ၌ ထူးခြားသော အချက်တစ်ချက်ကို သူ သတိပြုမိလိုက်၏။ တာအိုရုပ်သေး၏ ကျင့်ကြံခြင်း အဆင့်ကို အကဲဖြတ်ရန် ကြိုးစားသော်လည်း၊ မြူခိုးတစ်လွှာ ဖုံးလွှမ်းထားသကဲ့သို့ ဖြစ်နေပြီး သူ၏ စူးစမ်းမှုကို တားဆီးထားသည်။

‘ဒီလိုသာ ဆိုရင်တော့... ဒီလူ့ဆီမှာ ရွှေအမြုတေ အဆင့် (၉) အရှင်သခင် တစ်ပါးရဲ့ စူးစမ်းမှုကို ကာကွယ်ပေးနိုင်တဲ့ နောက်ထပ် ထိပ်တန်း မှော်လက်နက် တစ်ခု ရှိနေတယ် ဆိုတဲ့ သဘောပဲ။

ဒီလူက သာမန်လူ မဟုတ်ဘူး',

ချီမြစ် ဂိုဏ်းခွဲ ခေါင်းဆောင်သည် သတိထားလိုက်မိသည်။ သူသည် တာအိုရုပ်သေးကို စိုက်ကြည့်ရင်း မေးလိုက်၏။

“မင်းက ဘယ်သူလဲ...”

သို့သော် တာအိုရုပ်သေးသည် စကားအပိုတွေ ပြောမနေချင်ပေ။ သူ့မျက်လုံးများထဲတွင် ရက်စက်အေးစက်သော အလင်းရောင်များ တောက်ပလာပြီး မာန်မဲလိုက်သည်။

“သွားစမ်း... မင်းကို အခွင့်အရေး တစ်ကြိမ် ပေးမယ်... ထိုက်ရွှီ အင်မော်တယ် မဟာမိတ်အဖွဲ့ဆီ အခုချက်ချင်း ပြန်သွားလိုက်... မဟုတ်ရင်...”

ချီမြစ် ဂိုဏ်းခွဲ ခေါင်းဆောင်က တုံ့ပြန်သည့် အနေဖြင့် ရယ်မောလိုက်၏။ သို့သော် နောက်တစ်ခဏ၌ သူ့ကျောရိုးထဲထိ စိမ့်တက်သွားစေသော ကြောက်မက်ဖွယ် အရှိန်အဝါ တစ်ခု တာအိုရုပ်သေးဆီမှ ပေါက်ကွဲထွက်ပေါ်လာသည်။

ဒီအရှိန်အဝါက သူ တစ်ခါတွေ့ဖူးသော ထိုက်ရွှီ အင်မော်တယ် မဟာမိတ်အဖွဲ့ ခေါင်းဆောင်ကြီး ထက်ပင် သာလွန်နေသေးသည်။

“ဝုန်း...”

ထိုအချိန်တွင် တာအိုရုပ်သေး၏ အသက်စွမ်းအားနှင့် ခွန်အားများ အားလုံးသည်၊ လော့ယွဲ့ မဟာမိတ်အဖွဲ့ လျှို့ဝှက်နယ်မြေ အပျက်အစီးထဲမှ ရရှိခဲ့သော "အင်မော်တယ် စာလုံး" အား ပုံဖော်ရန် စုစည်းလိုက်၏။ ပုံဖော်ထားသော အင်မော်တယ် စာလုံး ပေါ်လာသည်နှင့် တပြိုင်နက်၊ ရှေးဟောင်း အင်မော်တယ် တစ်ပါးဆီမှ လာသော ရှေးကျပြီး သဘာဝလွန် အရှိန်အဝါ တစ်ခုသည် ပတ်ဝန်းကျင် တစ်ခုလုံးကို လွှမ်းခြုံသွားလေသည်။

သူ၏ စူးရှထက်မြက်သော အကြည့်တစ်ချက်ကပင် ချီမြစ် ဂိုဏ်းခွဲ ခေါင်းဆောင်၏ အမွှေးအမျှင်များကို ထောင်ထသွားစေသည်။ ကြောက်စရာ ကောင်းသော သားရဲကြီး တစ်ကောင်၏ ချောင်းမြောင်းခြင်း ခံနေရသော ကြောင်ပေါက်စလေး တစ်ကောင်ပမာ၊ သူ၏ စိတ်ထဲတွင် ကြောက်ရွံ့ခြင်း လှိုင်းတံပိုးများ ရိုက်ခတ်သွားစေ၏။

သူ့စိတ်ကွက်လပ် ဖြစ်သွားသည်။ အတွေးများ အားလုံး ပျောက်ကွယ်သွားပြီး၊ အသက်ရှင်သန် လိုစိတ် တစ်ခုတည်းသာ ကျန်ရှိတော့သည်။

အန္တရာယ် ရှိတယ်...

ပြေးမှ...

“ရွှစ်…”

နောက်ထပ် စကားတစ်ခွန်းမှ မပြောတော့ဘဲ၊ ချီမြစ် ဂိုဏ်းခွဲ ခေါင်းဆောင်သည် ထွက်ပြေးခြင်း နည်းစနစ်ကို ချက်ချင်း အသုံးပြုလိုက်သည်။ အလင်းတန်း တစ်ခုအသွင် ပြောင်းလဲကာ ထိုနေရာမှ ချက်ချင်း ပျောက်ကွယ်သွားလေ၏။

ထွက်ပြေးသွားသော ချီမြစ် ဂိုဏ်းခွဲ ခေါင်းဆောင်ကို ကြည့်ရင်း တာအိုရုပ်သေး၏ မျက်လုံးများ မာကျောသွားသည်။

ချီမြစ် ဂိုဏ်းခွဲ ခေါင်းဆောင်က သူ့ကို တကယ် ရန်စလာခဲ့လျှင်တောင် သူ မကြောက်ပါချေ။ ဘာပဲပြောပြော ဒီ တာအိုရုပ်သေးက မူလတုန်းက စတုတ္ထအဆင့် ထိပ်တန်း ရုပ်သေး တစ်ရုပ် ဖြစ်ခဲ့၏။ "ရုပ်သေးဝိညာဉ် လက်နက်"က နှစ်ပေါင်းများစွာ ပြုပြင်ပေးပြီးနောက်၊ ယခုဆိုလျှင် တတိယအဆင့် အဆင့်မြင့် ရုပ်သေး တစ်ရုပ်၏ စွမ်းအားလောက်တော့ ထုတ်သုံးနိုင်နေပြီပင်။

ရန်သူကို မနိုင်လျှင်တောင်မှ၊ သူ့လက်ထဲမှာ ရှိနေသော "တစ်ဝက်တစ်ပျက် ပြုပြင်ပြီး မှော်လက်နက်" အား အသုံးပြုပြီး အသာလေး ထွက်ပြေး၍ ရသေးသည်။

သူ မတိုက်ခိုက်ရသည့် အဓိက အကြောင်းရင်းကတော့၊ သူရောက်နေသော နေရာက ဆေးလုံးမျှော်စင် တောင်တန်း နှင့် သိပ်မဝေးတော့၍ပါ။ မိသားစု၏ ဘေးကင်းရေးကို သူ စစ်ဆေးချင်သည်။

နောက်တစ်ခဏတွင်...

သူ့ပတ်ဝန်းကျင်ရှိ အရှိန်အဝါ ပျောက်ကွယ်သွား၏။ အစောက အင်မော်တယ် စာလုံး၏ အရှိန်အဝါကို ထုတ်သုံးလိုက်ရသဖြင့်၊ သူ့ အသက်စွမ်းအားနှင့် ခွန်အား သုံးပုံတစ်ပုံခန့် ကုန်ခန်းသွားခဲ့ပြီ။ အချိန်တိုလေး အတွင်းမှာ ဒီလောက် ကုန်သွားရသည်။

အင်မော်တယ် စာလုံး တစ်ခု၏ အရှိန်အဝါကို ပုံဖော်ပြီး အသက်သွင်းဖို့ ဆိုတာ စွမ်းအား ဘယ်လောက် ကုန်ကျသလဲ ဆိုတာ ခန့်မှန်းကြည့်၍ ရ၏။

“ရွှမ်း…”

တုံ့ဆိုင်းမနေဘဲ တာအိုရုပ်သေး၏ ပတ်ဝန်းကျင်ရှိ လေထုထဲတွင် လှိုင်းဂယက်များ ပေါ်လာသည်။ ဟင်းလင်းပြင် စွမ်းအား ကို အသုံးပြု၍ ခြေတစ်လှမ်း လှမ်းလိုက်ရာ၊ ဆေးလုံးမျှော်စင် တောင်တန်း အထက် ကောင်းကင်ယံသို့ ရောက်ရှိသွားသည်။

တောင်ခြေရှိ စုမိသားစုသည် ဘာအန္တရာယ်မှ မကြုံရဘဲ အေးချမ်းနေပုံ ရပါ၏။

တာအိုရုပ်သေး သက်ပြင်းချလိုက်ပြီး တောင်ပေါ်သို့ ဆင်းသက်ကာ မိသားစုဝင် အားလုံးကို ဆင့်ခေါ်လိုက်သည်။

တာအိုရုပ်သေးကို အံ့သြသွားစေသည့် အချက်မှာ၊ စုပင်း၊ စုရွီအန်း အစရှိသော စုမိသားစု၏ ပင်မ သွေးမျိုးဆက်များ ဒီနေရာတွင် မရှိကြတော့ခြင်း ဖြစ်၏။ ဂူစံအိမ်နှင့် ဝိညာဉ်စိုက်ခင်းများကို ပြုစုစောင့်ရှောက်ရန် ကျန်ရစ်ခဲ့သော အကွဲအပွား မိသားစုဝင် (၁၀၀၀) အောက်သာ ကျန်ရှိတော့သည်။

“သူတို့ကို တာအိုမိတ်ဆွေ လော့ က ယွင်ကျန်းဂိုဏ်းဆီ ခေါ်သွားတာလား...”

မိသားစုဝင်များထံမှ ထိုသတင်းကို ကြားရသောအခါ တာအိုရုပ်သေး မအံ့သြမိပေ။

ပိုင်ယွဲ့ အင်မော်တယ် မြို့တော်မှာ ဖြစ်ပျက်ခဲ့သော ကိစ္စပြီးနောက်၊ လော့ချန်ယွီ က သတိပြန်ဝင်လာပြီး စုမိသားစုကို ယာယီ ခိုလှုံဖို့ ယွင်ကျန်းဂိုဏ်းဆီ ပြောင်းရွှေ့ပေးလိုက်သည်မှာ ထင်ရှားသည်။

ယွင်ကျန်းဂိုဏ်းမှာ အလွန် အစွမ်းထက်သည့် ဂိုဏ်းကာကွယ်ရေး အခင်းအကျင်း ရှိ၏။ မူလဝိညာဉ် အဆင့် အရှင်သခင်ကြီး တစ်ပါးတောင် အလွယ်တကူ ဖောက်ဝင်နိုင်မှာ မဟုတ်ပေ။

ယွင်ကျန်းဂိုဏ်းမှာ ဆိုလျှင်တော့ စိတ်ချရသည်။

သို့သော် လက်ရှိ အခြေအနေအရ ဆေးလုံးမျှော်စင် တောင်တန်းတွင် ကျန်ရစ်နေသော အကွဲအပွား မိသားစုဝင်များကိုလည်း စုယွီက ခေါ်ဆောင်သွားရန် ဆုံးဖြတ်လိုက်၏။

သူတို့ကို ပျံသန်းနေသော သစ်သား စံအိမ်တော် အတွင်းသို့ ဝင်ရောက်စေလိုက်ပြီး၊ ဂူစံအိမ်နှင့် စိုက်ခင်းများကို ဆက်လက် စောင့်ရှောက်စရာ မလိုတော့ကြောင်း ပြောလိုက်သည်။

လူများကို စံအိမ်တော် အတွင်းသို့ ခေါ်ဆောင်ပြီးနောက်၊ တာအိုရုပ်သေးသည် ရှေ့ရှိ ဟင်းလင်းပြင် လှိုင်းဂယက်များကြားသို့ ခြေတစ်လှမ်း လှမ်းဝင်လိုက်ပြီး ခြေရာလက်ရာ မကျန် ပျောက်ကွယ်သွားလေ၏။

ထိုအချိန်တွင်...

မိုင် (၁၀၀၀) ကျော် ထွက်ပြေးပြီးနောက် ချီမြစ် ဂိုဏ်းခွဲ ခေါင်းဆောင် ရုတ်တရက် ရပ်တန့်လိုက်သည်။ သူ့မျက်နှာ အမူအရာ ပြောင်းလဲသွားသည်။

“... ဒါ တစ်ခုခု မှားနေပြီ...”

ရင်ထဲမှ ကြောက်စိတ်များ တဖြည်းဖြည်း လျော့ပါးသွားသောအခါ၊ သူ့မျက်နှာ မည်းမှောင်လာပြီး စဉ်းစားခန်း ဝင်သွား၏။

ခုနက အရှိန်အဝါက...

တကယ်သာ အဲဒီလောက် အစွမ်းထက်ပြီး ကြောက်စရာ ကောင်းတယ် ဆိုရင်၊ အဲဒီလူက သူ့ကို ဒီတိုင်း လွှတ်ပေးလိုက်ပါ့မလား။

ပြီးတော့ အဲဒီလူက တကယ်တော့ ဘယ်သူလဲ။

အဲဒီ အရှိန်အဝါကရော ဘာကြီးလဲ။

သူ့ကို ဖိနှိပ်ခဲ့သော ကြောက်မက်ဖွယ် အရှိန်အဝါကို ပြန်သတိရလိုက်သောအခါ၊ ချီမြစ် ဂိုဏ်းခွဲ ခေါင်းဆောင်၏ မျက်လုံးများထဲတွင် မထိန်းချုပ်နိုင်သော ထိတ်လန့်ကြောက်ရွံ့မှုများ ပေါ်လာပြန်သည်။ အခုထိ သူ့အမွှေးအမျှင်များ ထောင်ထနေဆဲ ဖြစ်၏။

ထိုအရှိန်အဝါက သူ့စိတ်ကူးထက် အများကြီး သာလွန်နေသည်။

ထိုက်ရွှီ အင်မော်တယ် မဟာမိတ်အဖွဲ့ ခေါင်းဆောင်ကြီးတောင်မှ အများကြီး နိမ့်ကျနေသေးသည်ဟု သူ ခံစားရ၏။

“အဲဒါ ရတနာ တစ်ပါးလား... ဒါမှမဟုတ် တကယ်ပဲ သူ့ရဲ့ စွမ်းရည်လား...”

ချီမြစ် ဂိုဏ်းခွဲ ခေါင်းဆောင်၏ မျက်နှာပေါ်တွင် တုန်လှုပ်ခြင်းနှင့် ကြောက်ရွံ့ခြင်းများ အကြိမ်ကြိမ် ဖြတ်သန်းသွားသည်။

ရပ်တန့်ပြီးနောက် သူ နောက်လှည့်ကြည့်လိုက်၏။

ပြန်သွားပြီး အဲဒီလူ၏ စွမ်းအားအစစ်အမှန်ကို အတည်ပြုချင်စိတ် ပေါက်သွားသည်။

သို့သော်၊ ကြောက်မက်ဖွယ် အရှိန်အဝါကို တွေးမိပြန်တော့ သူ တွန့်ဆုတ်သွားပြန်သည်။

တကယ်လို့ အစစ် ဖြစ်နေလျှင်ရော...

လေးလေးနက်နက် တွေးတော စဉ်းစားပြီးနောက်၊ ချီမြစ် ဂိုဏ်းခွဲ ခေါင်းဆောင်သည် ဘေးကင်းတာက အကောင်းဆုံးပဲဟု ဆုံးဖြတ်လိုက်သည်။ သူ့ခန္ဓာကိုယ် လှုပ်ရှားသွားပြီး ယွင်ကျန်းဂိုဏ်း နယ်မြေမှ အလျင်အမြန် ထွက်ခွာသွားလေ၏။

ဒီတစ်ခါ သူ ရောက်လာရသော ရည်ရွယ်ချက်က လော့ချန်ယွီ နှင့်၊ စုယွီ ကို ခြုံခိုတိုက်ခိုက်ဖို့ အခွင့်အရေး ရှာဖွေရန် ဖြစ်သည်။

သူ့ပစ်မှတ်က တာ့ယွဲ့ နယ်မြေ၏ ပြိုင်ဘက်ကင်း ပါရမီရှင် လူငယ် နှစ်ယောက်ပင်။

အခန်း (၄၀၄) - တတိယအဆင့် အလယ်အလတ် ဆေးပညာရှင်၊ အဆောင်လက်ဖွဲ့ ပညာရှင် (အပိုင်း ၆)

~လွန်ခဲ့သော တခဏချင်း၌ပင် သူသည် တာအိုရုပ်သေး၏ တည်ရှိမှုကို အာရုံခံမိလိုက်ကာ မည်သူမည်ဝါမှန်း သိရှိလိုသော စိတ်ဖြင့် လမ်းပိတ်ဆို့ တားဆီးခဲ့ခြင်း ဖြစ်၏။ ထိုစဉ်က သူ၏ ရင်တွင်း၌ ရက်စက်သော သတ်ဖြတ်လိုစိတ်များပင် ပြင်းပြစွာ ကိန်းအောင်းနေခဲ့သေးသည်။

သို့သော်ငြား...

အဆုံးသတ်၌မူ အသက်လုကာ ထွက်ပြေးရသူမှာ သူကိုယ်တိုင်ပင် ဖြစ်နေခဲ့တော့၏။

“ငါ ဒီမှာ ဆက်နေလို့ မဖြစ်တော့ဘူး... ငါ့အကြောင်းကို တစ်ယောက်ယောက် သိသွားပြီ... ဆက်နေရင် တာ့ယွဲ့ နန်းတော်က လူတွေ ရောက်လာတော့မယ်...”

ချီမြစ် ဂိုဏ်းခွဲ ခေါင်းဆောင်သည် သက်ပြင်းချလိုက်ပြီး၊ တာ့ယွဲ့ နယ်မြေမှ ထွက်ခွာရန် ဆုံးဖြတ်လိုက်သည်။

သို့သော် မထွက်ခွာမီ သူသည် ဆေးလုံးမျှော်စင် တောင်တန်း အခြေအနေကို စုံစမ်းရန် လူတစ်ယောက် စီစဉ်ခဲ့သေး၏။

ယွင်ကျန်းဂိုဏ်း နယ်မြေထဲမှာ ပေါ်လာသော ထိုလူက စုမိသားစု သို့မဟုတ် ယွင်ကျန်းဂိုဏ်း နှင့် တစ်ခုခု ပတ်သက်ဆက်နွယ်နေသလား ဆိုသည်ကို သိလို၍။

သို့နှင့်၊...

အချိန်အတန်ကြာသောအခါ...

ထိုည၌ ဆေးလုံးမျှော်စင် တောင်တန်းတွင် ကျန်ရစ်ခဲ့သော စုမိသားစုဝင် အားလုံး လျှို့ဝှက်ဆန်းကြယ်စွာ ပျောက်ဆုံးသွားကြောင်း သတင်းရရှိလိုက်သောအခါ၊ ချီမြစ် ဂိုဏ်းခွဲ ခေါင်းဆောင်၏ မျက်ဝန်းအိမ်များ ရုတ်တရက် ကျဉ်းမြောင်းသွားသည်။

အဲဒီလူက စုမိသားစုနဲ့ ပတ်သက်နေတာလား။

တစ်ခဏတာ အတွင်းမှာပင်...

ချီမြစ် ဂိုဏ်းခွဲ ခေါင်းဆောင် တစ်စုံတစ်ခုကို နားလည် သဘောပေါက်သွားသကဲ့သို့ ဖြစ်သွားသည်။ သူ၏ စိတ်အာရုံထဲတွင် အတိတ်က ချီမြစ် ဂိုဏ်းခွဲ ရင်ဆိုင်ခဲ့ရသော ကပ်ဘေးဆိုးကြီးကို ပြန်လည် သတိရလိုက်မိ၏။

“အရင်တုန်းက ချီမြစ် ဂိုဏ်းခွဲကို တိုက်ခိုက်ခဲ့တဲ့သူက... အဲဒီလူလား...”

ချီမြစ် ဂိုဏ်းခွဲ ခေါင်းဆောင်၏ စိတ်ထဲတွင် အံ့သြမှုနှင့် ဒေါသတို့ ရောပြွမ်းနေသည်။

“ဒါဆို တာအိုမိတ်ဆွေ ယီကျန်း တို့ အဖွဲ့ရော... ငါ့ရဲ့ သားရဲထိန်းကျောင်းတဲ့ နေရာ... ငါ့ရဲ့ ဆေးဥယျာဉ်... ငါ့ရဲ့ ဘဏ္ဍာတိုက်... ဒါတွေ အကုန်လုံးကို အဲဒီလူကပဲ ဝင်ရောက် စွက်ဖက်ခဲ့တာလား...”

တွေးနေ၍လည်း ဘာမှ ထူးလာမှာ မဟုတ်။

အလိုအလျောက် ထွက်ပြေးချင်စိတ် ပေါက်သွားစေလောက်အောင် ကြောက်မက်ဖွယ် ကောင်းလှသည့် ထိုအရှိန်အဝါကြီးကိုမူ သူ မည်သည့်ဘဝ ရောက်စေကာမူ မမေ့နိုင်တော့ပေ။

ထို့ကြောင့် ထိုသူအား ထပ်မံ ရှာဖွေရန် မရဲတော့သည့်အပြင်၊ စုမိသားစုနှင့် ယွင်ကျန်းဂိုဏ်းထံသို့ ပြဿနာ သွားရှာရန်လည်း မဝံ့ရဲတော့ပေ။

ချီမြစ် ဂိုဏ်းခွဲ ခေါင်းဆောင်သည် ထိုညနေက ထိုသူနှင့် ရင်ဆိုင်ခဲ့ရသည့် အခြေအနေကို ပြန်သတိရလိုက်သည်။

အချိန်အတော်ကြာ တွေးတော စဉ်းစားပြီးနောက်၊ ချီမြစ် ဂိုဏ်းခွဲ ခေါင်းဆောင်သည် ဤကိစ္စကို ထိုက်ရွှီ အင်မော်တယ် မဟာမိတ်အဖွဲ့ ခေါင်းဆောင်ကြီး ထံ တင်ပြ အစီရင်ခံရန် ဆုံးဖြတ်လိုက်၏။

ယွင်ကျန်းဂိုဏ်း...

တာအိုရုပ်သေး ပြန်ရောက်လာသည်ကို မြင်သောအခါ စုဇီ၊ ထျဲမန်ကျူ နှင့် အခြားသူများ အားလုံး အံ့အားသင့်သွားကြသည်။ သူတို့ အလျင်အမြန် ထွက်လာကြပြီး စုယွီကို ဂိုဏ်းအတွင်းသို့ ကြိုဆိုလိုက်ကြသည်။

သူ့ကို မြင်သောအခါ စုဇီက အံ့သြတကြီး မေးလိုက်သည်။

“နင် ဘယ်လိုလုပ် ဒီရောက်လာတာလဲ...”

စုယွီက ပြန်ဖြေသည်။

“ငါ မိသားစုကနေ ထွက်ပြီး မာမိသားစု မြေဆရာကို သွားလည်တာလေ... ပြီးတော့ တံခါးပိတ် ကျင့်ကြံလိုက်သေးတယ်... ကျင့်ကြံရာက ထွက်လာမှ တာ့ယွဲ့ နယ်မြေ အခြေအနေ မကောင်းဘူး ဆိုတာ သိလိုက်ရလို့ အမြန် ပြန်လာခဲ့တာ...”

“ခုနလေးတင် ဆေးလုံးမျှော်စင် တောင်တန်း နားရောက်တော့ ထိုက်ရွှီ အင်မော်တယ် မဟာမိတ်အဖွဲ့က ချီမြစ် ဂိုဏ်းခွဲ ခေါင်းဆောင် နဲ့ တိုးတယ်... သူက အဲဒီမှာ ငါ့ကို ခြုံခိုတိုက်ခိုက်ဖို့ စောင့်နေတာ ထင်တယ်...”

ထိုသတင်းကို ကြားလိုက်ရသောအခါ စုဇီ၊ ထျဲမုန်ကျူးနှင့် အခြားသူများ၏ မျက်နှာထားများ ချက်ချင်း ပြောင်းလဲသွားကြသည်။

စုဇီက စုယွီကို အမြန် လှမ်းကြည့်လိုက်ရာ၊ စုယွီက လက်ကာပြပြီး ပြောလိုက်သည်။

“စိတ်မပူပါနဲ့... ဒါ ကျွန်တော့်ရဲ့ ခန္ဓာကိုယ် အစစ် မဟုတ်ပါဘူး... ကျွန်တော် အခု ရုပ်သေး ကိုယ်ခန္ဓာ နဲ့ ရောက်နေတာ...”

စုဇီ: “...”

စိုးရိမ်လွန်း၍ သူမ မေ့သွားခဲ့၏။

ဒီကောင်က ပြီးခဲ့သည့် တစ်ခေါက်တုန်းကလည်း မိသားစုဆီကို ရုပ်သေး ကိုယ်ခန္ဓာ နှင့်ပဲ ပြန်လာခဲ့သည်ပဲ။

သူ့ကို မျက်စောင်းထိုးလိုက်ပြီး စုဇီ ပြောလိုက်သည်။

“ဒါဆိုလည်း တော်သေးတာပေါ့...”

စုယွီ ဆက်ပြော၏။

“ငါ ဆေးလုံးမျှော်စင် တောင်တန်းမှာ ကျန်ခဲ့တဲ့ မိသားစုဝင်တွေကို ဒီကို ခေါ်လာခဲ့တယ်... လောလောဆယ် အခြေအနေ အရ ဆေးလုံးမျှော်စင် တောင်တန်းမှာ ဆက်နေဖို့က အရမ်း အန္တရာယ် များလွန်းတယ်...”

“ငါတို့ မိသားစုဝင်တွေကို ယွင်ကျန်းဂိုဏ်းမှာ ခဏလောက် နေခိုင်းလိုက်ရအောင်... အရင်းအမြစ် နဲ့ တခြား လိုအပ်တာတွေကိုတော့ ငါ ကြည့်စီစဉ်လိုက်မယ်...”

စုဇီက ပြန်ပြောလိုက်သည်။

“အဲဒါအတွက် နင် ပူစရာ မလိုပါဘူး... နှစ်တွေ အများကြီး ဆေးလုံးမျှော်စင် လည်ပတ်ရင်း မိသားစုမှာ စုဆောင်းထားတာတွေ အများကြီး ရှိပါတယ်... ယွင်ကျန်းဂိုဏ်းမှာ (၁၀) နှစ်လောက် နေရင်တောင် ကိုယ့်ဘာသာ ရပ်တည်နိုင်ပါတယ်...”

စုယွီ အနေဖြင့် ထိုကိစ္စကို သိပ်ဂရုမစိုက်ပေ။ ဘာပဲပြောပြော သူ့လက်ထဲမှာ အရင်းအမြစ်တွေ အများကြီး ရှိနေသည်ပဲ။ ချီမြစ် ဂိုဏ်းခွဲ၏ ဘဏ္ဍာတိုက် တစ်ခုလုံးကို ပြောင်သလင်းခါအောင် သူ သိမ်းယူလာခဲ့သည်လေ။ စုမိသားစု အနေနှင့် နှစ် (၃၀) ၊ (၅၀) လောက် ဘာမှ မလုပ်ဘဲ နေလျှင်တောင်၊ ကျင့်ကြံဖို့ ဘာမှ လိုအပ်မှာ မဟုတ်ပေ။

သူသည် မိသားစုဝင်များကို ယွင်ကျန်းဂိုဏ်း အပြင်ဘက် ဂိတ်တံခါးတွင် နေရာချပေးလိုက်၏။ ထိုနေရာတွင် စုပင်း၊ စုရွီအန်း တို့နှင့် ပြန်လည် ဆုံစည်းစေသည်။ စုမိသားစု ယာယီ နေထိုင်ရန်အတွက် တောင်ထွတ်တစ်ခု သီးသန့် ပေးထားသည်။

ထို့နောက် စုယွီသည် စုဇီနှင့်အတူ ယွင်ကျန်းဂိုဏ်း၏ ကောင်းကင် နယ်မြေ အတွင်းသို့ ဝင်ရောက်သွားလေသည်။

ကောင်းကင် နယ်မြေ အတွင်း၌ ကြယ်တာရာများ တောက်ပနေပြီး၊ ငွေရောင် လရောင်သည် ပိုးသားပါးပါးလေး လွှမ်းခြုံထားသကဲ့သို့ ရှေ့ရှိ ဝိညာဉ်တောင်ပေါ်တွင် ဖြာကျနေသည်။

စုယွီနှင့် စုဇီတို့ ဝိညာဉ်တောင်ပေါ်သို့ တက်ရောက်ပြီး ခြံဝင်းငယ်လေး တစ်ခုရှေ့သို့ ရောက်သောအခါ၊ အဖြူရောင် ဝတ်ရုံကို ဝတ်ဆင်ထားသော အလွန် လှပသည့် အမျိုးသမီး တစ်ဦး တံခါးဝတွင် ရပ်နေသည်ကို တွေ့လိုက်ရ၏။ လရောင်အောက်တွင် သူမ၏ အလှတရားသည် ပိုမို တောက်ပ ထင်ရှားနေသည်။

စုယွီ ရောက်လာသည်ကို မြင်သောအခါ လော့ချန်ယွီသည် ခပ်ဖျော့ဖျော့ ပြုံးလိုက်သည်။

“ရောက်လာပြီလား...” သူမက တိုးညှင်းစွာ မေးလိုက်သည်။

နှစ်အတော်ကြာ မတွေ့ရပြီးနောက် လော့ချန်ယွီထံမှ ထွက်ပေါ်နေသော အရှိန်အဝါကို ခံစားမိလိုက်ရာ စုယွီ အံ့သြသွားရ၏။

“တာအိုမိတ်ဆွေ လော့... ခင်ဗျားရဲ့ ပါရမီက တကယ့်ကို အားကျစရာ ကောင်းတာပဲ... မတွေ့တာ သိပ်မကြာသေးဘူး... အခု ရွှေအမြုတေ အဆင့် (၄) တောင် ရောက်နေပြီ...”

သူတို့ သုံးဦး ခြံဝင်းထဲသို့ ဝင်ရောက်ပြီး ကျောက်စားပွဲဝိုင်းတွင် ထိုင်လိုက်ကြသည်။

လော့ချန်ယွီ လက်ညှိုး တစ်ချောင်း ထောင်လိုက်ရာ၊ ဘေးနားရှိ ဝိညာဉ်စမ်းချောင်းမှ ရေအချို့ စီးဆင်းလာပြီး ဝိညာဉ်လက်ဖက်ရည် ဖျော်စပ်ရန် အဆင်သင့် ဖြစ်သွားသည်။

ထိုအချိန်တွင် စုဇီသည် စုယွီကို ကြည့်ကာ သိချင်စိတ်ဖြင့် မေးလိုက်သည်။

“နင် ခုနက ပြောတယ်မလား... ထိုက်ရွှီ အင်မော်တယ် မဟာမိတ်အဖွဲ့က ရွှေအမြုတေ အဆင့် (၉) ရှိတယ်လို့ ဆိုကြတဲ့ ချီမြစ် ဂိုဏ်းခွဲ ခေါင်းဆောင်နဲ့ တွေ့ခဲ့တယ် ဆို... နင် ဘယ်လိုလုပ်ပြီး အထိအခိုက်မရှိ လွတ်လာတာလဲ... ပြီးတော့ ဆေးလုံးမျှော်စင် တောင်တန်းကို ပြန်သွားပြီး မိသားစုဝင်တွေကိုပါ ဘေးကင်းအောင် ခေါ်လာနိုင်သေးတယ်...”

လော့ချန်ယွီ လက်ဖက်ရည် ဖျော်နေရင်း စုယွီကို လှမ်းကြည့်လိုက်သည်။ သူမလည်း အဖြေကို သိချင်နေလေ၏။

ခဏမျှ တိတ်ဆိတ်နေပြီးနောက် စုယွီ ပြောပြလိုက်သည်။

“ကျွန်တော့်ရဲ့ ဒီရုပ်သေးက လော့ယွဲ့ မဟာမိတ်အဖွဲ့ လျှို့ဝှက်ဂူ အပျက်အစီးထဲက ရထားတာ... မူလက စတုတ္ထအဆင့် ထိပ်တန်း ရုပ်သေး တစ်ရုပ်ပေါ့... ဒါပေမဲ့ အကြီးအကျယ် ပျက်စီးနေတာ...”

စတုတ္ထအဆင့် ထိပ်တန်း ရုပ်သေး ဟုတ်လား။

လော့ချန်ယွီရော စုဇီပါ အံ့သြတုန်လှုပ်သွားကြ၏။

ထို ရုပ်သေးမျိုး ဆိုလျှင် မူလဝိညာဉ် အဆင့် အရှင်သခင်ကြီး တစ်ပါးနှင့် ညီမျှနေလေပြီ။

အတိတ်တုန်းက ရွှေကျောက်စိမ်း နတ်သမီး ဂိတ်တံခါး အပျက်အစီးထဲမှာ စတုတ္ထအဆင့် ရုပ်သေး တစ်ရုပ် ရှိခဲ့ဖူးသည်။ သို့သော်၊ ပျက်စီးနေပြီး အပိုင်းအစတွေလောက်ပဲ ကျန်တော့၏။ ဒါတောင်မှ အဲဒီ အပိုင်းအစတွေကို ရဖို့ တာ့ယွဲ့ နန်းတော်က အကြီးအကျယ် ကြိုးစားခဲ့ရသည်။

သို့သော်၊ ယခုတော့...

သူတို့၏ မျက်လုံးများသည် စုယွီ အပေါ်သို့ ကျရောက်သွားပြီး၊ အထက်အောက် စုန်ဆန် ကြည့်ရှုကာ ရုပ်သေးကို သေချာ လေ့လာနေကြသည်။ လက်ဖြင့် လှမ်းကိုင်ချင်သည့် ပုံစံမျိုးပင် ဖြစ်နေသည်။

စုယွီ အလျင်အမြန် လက်ကာပြလိုက်၏။

“မကြည့်ကြပါနဲ့တော့ဗျာ... ပျက်စီးနေတာပါ... တတိယအဆင့် အဆင့်မြင့် ရုပ်သေး တစ်ရုပ်ရဲ့ စွမ်းအားလောက်ပဲ ရှိတာပါ...”

“ကျွန်တော် လွတ်လာတာက တခြား နည်းလမ်းတွေ သုံးလိုက်လို့ပါ...”

လော့ချန်ယွီ သူတို့နှစ်ဦးအတွက် လက်ဖက်ရည် ငှဲ့ပေးရင်း စုယွီကို ကြည့်ကာ ပြောလိုက်သည်။

“ငါတို့က ရုပ်သေးကို ကြည့်နေတာပါ... နင့်ကို ကြည့်တာ မဟုတ်ပါဘူး...”

သူမကို မျက်စောင်းထိုးလိုက်ပြီး စုယွီ ပြန်ပြောလိုက်သည်။

“ဒါက တာအိုရုပ်သေး ပါ... တာအိုမိတ်ဆွေ လော့ အနေနဲ့ အဲဒီလို မတွေးသင့်ဘူးနော်...”

“ဟွန့်...”

လော့ချန်ယွီရော စုဇီပါ နှာခေါင်းရှုံ့လိုက်ကြ၏။ လက်ဖက်ရည် သောက်ရင်း လော့ချန်ယွီ မျက်မှောင်ကြုတ်ကာ မေးလိုက်သည်။

“ချီမြစ် ဂိုဏ်းခွဲ ခေါင်းဆောင် ပြန်ပေါ်လာတာက... ငါတို့ကို ခြုံခိုတိုက်ခိုက်ဖို့ ကြံစည်နေတာ ဆိုတဲ့ သဘောလား...”

သူမ၏ စကားအား စုယွီက ခေါင်းညိတ်လိုက်၏။

“အဲဒီလိုပဲ ထင်ရတယ်... မဟုတ်ရင် သူ ဒီနေရာမှာ ကိုယ်ယောင်ဖျောက်ပြီး ဘာမှ မလုပ်ဘဲ နေနေမှာ မဟုတ်ဘူး...”

လော့ချန်ယွီ စုယွီဘက်သို့ ပြန်လှည့်လာသည်။

“အခု နင်နဲ့ သူနဲ့ တွေ့ပြီးပြီ ဆိုတော့... နင် သူ့စခန်းကို မွှေနှောက်သွားတယ် ဆိုတာ သူ သံသယ ဝင်သွားလောက်ပြီလား...”

စုယွီ မျက်လုံးများ ကျဉ်းမြောင်းသွားပြီး နက်နက်ရှိုင်းရှိုင်း စဉ်းစားလိုက်သည်။ နောက်ဆုံးတွင် ပြောလိုက်၏။

“ဖြစ်နိုင်တယ်...”

“လောလောဆယ် ငါ ဒီမှာပဲ နေတာ အကောင်းဆုံး ဖြစ်မယ်... မမျှော်လင့်တာ တစ်ခုခု ဖြစ်လာရင် ထွက်ပြေးဖို့ လမ်းစ ရှိတာပေါ့...”

“အနည်းဆုံးတော့ ငါ ရှိနေရင်... မူလဝိညာဉ် အဆင့် အရှင်သခင်ကြီး တစ်ပါး ရောက်လာရင်တောင်... မင်းတို့ နှစ်ယောက်လုံးကို ခေါ်ပြီး ထွက်ပြေးနိုင်မှာပါ...”

တာအိုရုပ်သေးသည် ယွင်ကျန်းဂိုဏ်းတွင် ယာယီ နေထိုင်ရန် ဆုံးဖြတ်လိုက်သည်။

ချီမြစ် ဂိုဏ်းခွဲ ခေါင်းဆောင် ထွက်ခွာသွားပြီးနောက်၊ ယွင်ကျန်းဂိုဏ်း နယ်မြေအတွင်း မည်သည့် ပြဿနာမျှ ထပ်မဖြစ်တော့ပေ။ ချီမြစ် ဂိုဏ်းခွဲ ခေါင်းဆောင် သော်လည်းကောင်း၊ ထိုက်ရွှီ အင်မော်တယ် မဟာမိတ်အဖွဲ့မှ အခြား အစွမ်းထက် ပုဂ္ဂိုလ်များ သော်လည်းကောင်း ပေါ်မလာကြတော့ပေ။

သူတို့ မရှိတော့သဖြင့် စုယွီ စိတ်သက်သာရာ ရသွားသည်။ နေ့တိုင်း လော့ယွဲ့ မဟာမိတ်အဖွဲ့ လျှို့ဝှက်ဂူ နယ်မြေထဲတွင် အေးချမ်းစွာ ကျင့်ကြံရင်း စွမ်းရည် မြှင့်တင်နိုင်ခဲ့၏။

တာ့ယွဲ့ နန်းတော်နှင့် ချန် မိသားစု ထံမှ ရရှိသော ပစ္စည်းများဖြင့်၊ တတိယအဆင့် အလယ်အလတ်တန်းစား အဆောင်လက်ဖွဲ့များကို ပြန်လည် ဖန်တီးနိုင်ခဲ့သည်။

ကြေးမုံလမင်း အဆောင်လက်ဖွဲ့ ဖန်တီးမှု ကျွမ်းကျင်မှု (၆၀) ရာခိုင်နှုန်း အထိ ရောက်ရှိသွားသောအခါ၊ စုယွီသည် ခေတ္တ ရပ်နားလိုက်သည်။ ထျန်းရှု သိုင်းကျမ်း မျှော်စင်မှ အဘိုးအို ပေးခဲ့သော အမွေအနှစ်များထဲမှ "ကြွေကျသော ကြယ်တာရာ အဆောင်လက်ဖွဲ့" ဟု ခေါ်သော တတိယအဆင့် အလယ်အလတ်တန်းစား တိုက်ခိုက်ရေး အဆောင်လက်ဖွဲ့ တစ်ခုကို ရွေးချယ်ပြီး စတင် လေ့လာ ဖန်တီးလိုက်၏။

ဤ "ကြွေကျသော ကြယ်တာရာ အဆောင်လက်ဖွဲ့" သည် ကြယ်ကြွေကျသကဲ့သို့သော သိုင်းနည်းစနစ်တစ်ခုကို ဆင့်ခေါ်နိုင်ပြီး၊ ရွှေအမြုတေ အဆင့် အလယ်အလတ်တန်းစား စွမ်းအားနှင့် ညီမျှသည်။

သန့်စင်ထားသော ကြယ်တာရာ အဆောင်လက်ဖွဲ့ ဆိုလျှင် ရွှေအမြုတေ အဆင့် (၆) စွမ်းအားနှင့် ညီမျှ၏။

ကြယ်တာရာ အဆောင်လက်ဖွဲ့ အချို့၊ ကြေးမုံလမင်း အဆောင်လက်ဖွဲ့၊ ဝိညာဉ်ဖိနှိပ် အဆောင်လက်ဖွဲ့၊ အရောင်မှိန် အဆောင်လက်ဖွဲ့ ၊ ကိုယ်ယောင်ဖျောက် အဆောင်လက်ဖွဲ့ နှင့် အခြား သာမန် အဆောင်လက်ဖွဲ့များကို ဖန်တီးထားလိုက်လျှင်၊ သူသည် မည်သည့် အခြေအနေမျိုးကိုမဆို ရင်ဆိုင်ရန် အသင့် ဖြစ်နေပေလိမ့်မည်။

သူသည် တတိယအဆင့် အလယ်အလတ်တန်းစား အဆောင်လက်ဖွဲ့ အမျိုးမျိုးကို ဖန်တီးရင်း ကျွမ်းကျင်မှုကို တဖြည်းဖြည်း မြှင့်တင် ယူရပေဦးမည်။

တစ်နှစ် ကြာပြီးနောက်...

စုယွီ၏ ခန္ဓာကိုယ် အစစ်သည် တာ့ယွဲ့ တောင်တန်းရှိ တာ့ယွဲ့ မှောင်ခိုဈေးကွက်သို့ သွားရောက်ကာ တာအိုဆရာ ရှုဟိုင်နှင့် ပစ္စည်း လဲလှယ်ခဲ့၏။ လိုအပ်သော ပစ္စည်းများ ရယူပြီး အဆောင်လက်ဖွဲ့များ ပေးအပ်ပြီးနောက်၊ လော့ယွဲ့ မဟာမိတ်အဖွဲ့ လျှို့ဝှက်ဂူ နယ်မြေသို့ ပြန်လာခဲ့သည်။

အချိန်များ လျင်မြန်စွာ ကုန်ဆုံးသွားပြီး နောက်ထပ် (၄) နှစ် ကုန်လွန်သွားခဲ့ပြန်၏။

တစ်နေ့တွင် ဒုတိယအဆင့် အဆင့်မြင့် ကောင်းကင်မိုးကြိုး ကြွက်တစ်ကောင် စုယွီ ရှေ့သို့ ရောက်လာပြီး ကျယ်လောင်စွာ အော်မြည်လိုက်သည်။

စုယွီ နားမလည်မှန်း သိသောအခါ၊ ကြွက်ကလေးသည် စာရေးပြလိုက်၏။

“တတိယအဆင့် အလယ်အလတ်တန်းစား မြေကမ္ဘာဓာတ် မိစ္ဆာသားရဲ တစ်ကောင် တွေ့ထားတယ် ဟုတ်လား...”

ထိုစာကို ဖတ်ပြီးနောက် စုယွီ ဝမ်းသာသွားရသည်။

‘နောက်ဆုံးတော့ "ပြစ်ဒဏ်ပေးသူ" ရုပ်သေး ဖန်တီးဖို့ လိုအပ်နေတဲ့ ကုန်ကြမ်းပစ္စည်း ရပြီပေါ့’

အခန်း (၄၀၅) - အဆင့်ထိုးဖောက်ခြင်းနှင့် ကောင်းကင်ဖီးနစ် ဖြစ်စဉ် (အပိုင်း ၁)

~လော့ယွဲ့ မဟာမိတ်အဖွဲ့ လျှို့ဝှက်နယ်မြေ၏ အနောက်မြောက် ထောင့်ရှိ တောင်တန်းငယ်လေး တစ်ခု အတွင်း၌...

အနက်ရောင် ကြေးခွံများ ဖုံးအုပ်ထားသော ဧရာမ ချပ်ဝတ် သင်းခွေချပ် မိစ္ဆာသားရဲကြီး တစ်ကောင်သည်၊ ကြောက်မက်ဖွယ် ကောင်းသော အရှိန်အဝါများ ထုတ်လွှတ်ရင်း နှစ်ခြိုက်စွာ အိပ်ပျော်နေသည်။ ၎င်း၏ ခန္ဓာကိုယ် တစ်ခုလုံးကို ကွေးခွေထားသည်။

ထူထပ်သော ကြေးခွံများဖြင့် ကာကွယ်ထားသော ဤသားရဲမျိုးသည် ကိုင်တွယ်ရ အခက်ခဲဆုံး ဖြစ်၏။

တောင်တန်းငယ်လေး၏ ထိပ်ပိုင်းတွင် ရှေးဟောင်း အခင်းအကျင်းများနှင့် တားမြစ်ပိတ်ဆို့မှု အကြွင်းအကျန်များ ရှိနေပြီး၊ ထူထပ်သော တောအုပ် အတွင်း၌ သေစေနိုင်သော အန္တရာယ်များ ပုန်းအောင်းနေကြောင်း သတိပေးနေသကဲ့သို့ ရှိသည်။

ဤ ရှေးဟောင်း အခင်းအကျင်းများနှင့် တားမြစ်ပိတ်ဆို့မှု အကြွင်းအကျန်များကြောင့်၊ ကောင်းကင်မိုးကြိုး ကြွက်အုပ်စု အနေဖြင့် လျှို့ဝှက်နယ်မြေကို ရှာဖွေရာတွင် အခက်အခဲများ ကြုံတွေ့နေရခြင်း ဖြစ်၏။

မှန်ကန်သော မိစ္ဆာသားရဲကို ရှာဖွေရသည်မှာ မလွယ်ကူလှပေ။

စုယွီသည် ကောင်းကင်မိုးကြိုး ကြွက်အုပ်စု နောက်မှ လိုက်ပါလာပြီး၊ အခင်းအကျင်း သို့မဟုတ် တားမြစ်ပိတ်ဆို့မှု ကြားမှ ဟာကွက်တစ်ခု ရှာဖွေကာ တောင်ပေါ်သို့ တက်ရောက်ရန် ရည်ရွယ်ထားသည်။ သို့သော် ခဏကြာ ရှာဖွေပြီးနောက် ပျံ့နှံ့နေသော အန္တရာယ် အငွေ့အသက်များကြောင့် သူ စိတ်ပြောင်းသွားရ၏။

ရှေးဟောင်း သစ်ပင်ကြီးများသည် ကောင်းကင်ယံအထိ မြင့်မားစွာ ပေါက်ရောက်နေပြီး၊ ဆန်းကြယ်သော မြူခိုးများသည် တောင်ပေါ်ရှိ အရာအားလုံးကို ဖုံးလွှမ်းထားသည်။

ရှေးဟောင်း အခင်းအကျင်းများနှင့် တားမြစ်ပိတ်ဆို့မှု အကြွင်းအကျန်များကို ဖြတ်သန်း၍ အာရုံခံလိုက်သောအခါ၊ တောင်အတွင်း၌ အိပ်ပျော်နေသော တတိယအဆင့် အလယ်အလတ်တန်းစား မိစ္ဆာသားရဲ၏ အရှိန်အဝါကို စုယွီ ခံစားမိလိုက်သည်။

အစွမ်းထက်တယ်။

ရွှေအမြုတေ အဆင့် (၅) သို့မဟုတ် (၆) လောက် ရှိမည့်ပုံပင်။

ခဏမျှ စဉ်းစားပြီးနောက် စုယွီသည် မြေကြီးကို ရုတ်တရက် ဆောင့်နင်းလိုက်၏။

“ဘုန်း...”

ကိုယ်ခန္ဓာ သန့်စင်ခြင်း ကျင့်စဉ် အဆင့် (၂၃) နီးပါး ရှိသော စွမ်းအားတစ်ခု ပေါက်ကွဲထွက်ပေါ်လာသည်။ သူ ခြေဆောင့်နင်းလိုက်သည့် အခိုက်အတန့်တွင် စုယွီ၏ ပတ်ဝန်းကျင်ရှိ မြေပြင်သည် ပြင်းထန်စွာ တုန်ခါသွား၏။ သဘာဝ စွမ်းအင် လှိုင်းတံပိုးကြီး တစ်ခု အရပ်မျက်နှာ အနှံ့သို့ ပျံ့နှံ့သွားသကဲ့သို့ ဖြစ်ပေါ်လာပြီး၊ ဟင်းလင်းပြင်နှင့် မြေကြီးကိုပါ တုန်ခါသွားစေသည်။

“ဝုန်း... ဝုန်း... ဝုန်း...”

မြေကြီးများ အက်ကွဲ ပြိုကျကုန်ပြီး၊ ရှေးဟောင်း သစ်ပင်ကြီးများပင် ပြင်းထန်သော တုန်ခါမှုကြောင့် ထက်ပိုင်းကျိုးကုန်ကြ၏။

စုယွီ၏ ဘေးနားရှိ သစ်ပင်များနှင့် ကျောက်တုံးကြီးများသည် ချက်ချင်းပင် အမှုန့်ကြေသွားပြီး ဓာတ်ငွေ့အဖြစ်သို့ ပြောင်းလဲသွားကြသည်။

တောင်အတွင်း၌ အိပ်ပျော်နေသော ချပ်ဝတ် သင်းခွေချပ် မိစ္ဆာသားရဲကြီးသည် လန့်နိုးသွား၏။ မျက်လုံးများကို ဖွင့်လိုက်သည်နှင့် တပြိုင်နက်၊ ရိုင်းစိုင်းကြမ်းကြုတ်ပြီး ကြောက်မက်ဖွယ် ကောင်းသော အရှိန်အဝါ တစ်ခု နိုးထလာသည်။ ၎င်း၏ မျက်လုံးများ နီရဲတောက်ပလာပြီး အသက်ကို ပြင်းပြင်းရှူလိုက်၏။

အိပ်ပျော်နေတာကို အနှောင့်အယှက် ပေးခံလိုက်ရသဖြင့်၊ မီးတောင်ပေါက်ကွဲသကဲ့သို့ ပြင်းထန်သော ဒေါသများ ၎င်း၏ ရင်ထဲတွင် ဆူပွက်လာပြီး ထိန်းချုပ်၍ မရနိုင်အောင် ဖြစ်လာသည်။

တောင်အပြင်ဘက်ရှိ စုယွီ၏ အရှိန်အဝါကို အာရုံခံမိပြီး တရားခံကို တွေ့ရှိလိုက်သောအခါ၊ ၎င်း၏ ခန္ဓာကိုယ် လှုပ်ရှားသွားပြီး အဝါရောင် အလင်းတန်းများ ခန္ဓာကိုယ်မှ ဖြာထွက်လာသည်။ ကျန်ရစ်နေသော အခင်းအကျင်းများနှင့် တားမြစ်ပိတ်ဆို့မှုများကို မထိခိုက်စေဘဲ၊ တောင်ပေါ်မှ ဆင်းသက်နိုင်သော အထူးလမ်းကြောင်း တစ်ခုအတိုင်း လျင်မြန်စွာ ရွေ့လျားလာ၏။

“ဝုန်း...”

ချပ်ဝတ် သင်းခွေချပ်ကြီးသည် တောင်ပေါ်မှ ပြေးဆင်းလာပြီး သစ်တောအုပ်ထဲသို့ ဝင်ရောက်လာရာ၊ လမ်းတစ်လျှောက်ရှိ သစ်ပင်များကို တိုက်ခိုက် အဆင့်ချိုးဖြတ်ပစ်လိုက်သည်။ သစ်စ အပိုင်းအစများသည် အရပ်မျက်နှာ အနှံ့သို့ လွင့်စဉ်သွားပြီး ပတ်ဝန်းကျင် တစ်ခုလုံးကို ဖုံးလွှမ်းသွားသည်။

မျက်စိတစ်မှိတ် အတွင်းမှာပင်...

အနီးနားရှိ အပင်များ ပျက်စီးသွားပြီး မြေကန္တာရ တစ်ခု ဖြစ်ပေါ်လာ၏။ ဖုန်မှုန့်များ နေရာအနှံ့ ပျံ့လွင့်နေသည်။

အသက်ကို ပြင်းပြင်းရှူရှိုက်နေသော ချပ်ဝတ် သင်းခွေချပ်ကြီးသည် အနီရောင် သမ်းနေသော မျက်လုံးများဖြင့်၊ မလှမ်းမကမ်းတွင် ပုရွက်ဆိတ်လေး တစ်ကောင်ပမာ သေးငယ်စွာ ရပ်နေသော စုယွီကို စိုက်ကြည့်လိုက်ပြီး၊ စူးရှအေးစက်သော အသံဖြင့် ဟိန်းဟောက်လိုက်၏။

“ဝူး...”

နောက်တစ်ခဏ၌...

စုယွီသည် သူ့အောက်ခြေရှိ မြေကြီး၏ ပြောင်းလဲမှုကို ချက်ချင်း ခံစားလိုက်ရ၏။

မြေကမ္ဘာဓာတ် မိစ္ဆာစွမ်းအားများ သည် တတိယအဆင့် အလယ်အလတ်တန်းစား မိစ္ဆာသားရဲကြီး၏ ခြေသည်းများမှတဆင့် မြေကြီးထဲသို့ စီးဝင်သွားသည်။ ရုတ်တရက် သူ့အောက်ရှိ မြေကြီးများ ကွဲအက်သွားပြီး၊ စိတ်ကူးဖြင့် မှန်းဆ၍ မရနိုင်လောက်အောင် ပြင်းထန်သော ဆွဲငင်အား တစ်ခု စုယွီ အပေါ်သို့ ဖိနှိပ် ကျရောက်လာ၏။

ထိုစွမ်းအားသည် စုယွီကို ဖိနှိပ်ထားပြီး မြေကြီးအောက်တွင် ချုပ်နှောင်ထားလိုပုံ ရသည်။ သားကောင်ကို မြေကြီးထဲတွင် ဖမ်းချုပ်ထားရန် ကြိုးစားနေသကဲ့သို့ပင်။

သို့သော် တတိယအဆင့် အလယ်အလတ်တန်းစား မိစ္ဆာသားရဲ တစ်ကောင်၏ စွမ်းအားလောက်နှင့် စုယွီကို ဖိနှိပ် တုန်လှုပ်စေနိုင်မည် ဟူသော အတွေးသည် အိပ်မက်မက်နေခြင်း သက်သက်သာ ဖြစ်၏။

စုယွီ ပြုံးလိုက်သည်။ မန္တန်စွမ်းအားကို အသုံးမပြုဘဲ အဆင့် (၁၀၈) ကိုယ်ခန္ဓာ သန့်စင်ခြင်း ကျင့်စဉ်၏ စွမ်းအားကို လည်ပတ်လိုက်သည်။ ချက်ချင်းပင် အနီရောင် မျဉ်းကြောင်းများ သူ့ခန္ဓာကိုယ် အပေါ်ယံတွင် ပေါ်လာပြီး၊ ကြောက်မက်ဖွယ် ကြေးခွံများ အဖြစ် ပြောင်းလဲကာ တစ်ကိုယ်လုံးကို ဖုံးအုပ်သွား၏။

ရှေးဟောင်း မိကျောင်းကြီး တစ်ကောင်၏ ကြောက်မက်ဖွယ် အရှိန်အဝါ ပေါက်ကွဲထွက်ပေါ်လာပြီး ကောင်းကင်နှင့် မြေကြီးကို လွှမ်းခြုံသွားသည်။ ထိုအခိုက်အတန့်တွင် စုယွီ၏ ခန္ဓာကိုယ်သည် ဖောင်းကားလာပြီး၊ (၁၀) မီတာခန့် မြင့်မားသော လူသားပုံစံ မိကျောင်းကြီး အဖြစ် ပြောင်းလဲသွားလေ၏။

တစ်ချိန်တည်းမှာပင်...

နှစ်ပေါင်းများစွာ စွမ်းအား စုဆောင်းထားခဲ့သော "သွေးဝေလငါး လမင်းမြို နည်းစနစ်" ၏ အမြုတေကို လှုံ့ဆော်လိုက်ရာ၊ ပိုမို ရိုင်းစိုင်းကြမ်းကြုတ်သော စွမ်းအားလှိုင်းလုံးကြီး တစ်ခု သူ့ခန္ဓာကိုယ် အတွင်း၌ ဆူပွက်လာသည်။

“ဘုန်း...”

သူ နောက်ထပ် ခြေတစ်လှမ်း လှမ်းလိုက်သည်နှင့် တပြိုင်နက်၊ ပေါက်ကွဲထွက်ပေါ်လာသော စွမ်းအားကြောင့် ချပ်ဝတ် သင်းခွေချပ်၏ မိစ္ဆာစွမ်းအားနယ်ပယ် သည် ချက်ချင်း ပျက်စီးသွား၏။

သူ့အပေါ်သို့ ဖိနှိပ်ထားသော စွမ်းအားများသည် နင်းချေခံလိုက်ရသကဲ့သို့ ချက်ချင်း ပေါက်ကွဲ ပျက်စီးသွားကြသည်။

“လာစမ်း... တိုက်ကြမယ်...”

စုယွီ ဟိန်းဟောက်လိုက်သည်။ သွေးဝေလငါး လမင်းမြို နည်းစနစ် ပေါက်ကွဲထွက်ပေါ်လာ၏။ သူ၏ ကိုယ်ခန္ဓာ သန့်စင်ခြင်း စွမ်းအားသည် မျက်စိတစ်မှိတ် အတွင်းမှာပင် သုံးဆခန့် မြင့်တက်လာသည်။ ကြောက်မက်ဖွယ် မိကျောင်း အရှိန်အဝါသည် ကောင်းကင်နှင့် မြေကြီးကို ဖိနှိပ်ထားပြီး၊ ကမ္ဘာလောက တစ်ခုလုံးကို တုန်ခါသွားစေသော လှိုင်းဂယက်များ ပျံ့နှံ့သွား၏။

အဆုံးမဲ့ သဘာဝ ဝိညာဉ်စွမ်းအင်များသည် ဧရာမ လှိုင်းလုံးကြီး ပမာ တိုးဝင်လာသည်။ စုယွီသည် အနီရောင် ပုံရိပ်တစ်ခု အသွင် လျင်မြန်စွာ ပြောင်းလဲကာ ချပ်ဝတ် သင်းခွေချပ်ဆီသို့ ပြေးဝင် တိုက်ခိုက်လိုက်၏။

“ဘုန်း...”

ထူထပ်သော သစ်တောအုပ်ကြီးထဲတွင် အနီရောင်နှင့် အဝါရောင် ခန္ဓာကိုယ်ကြီး နှစ်ခု ခေါင်းချင်းဆိုင် ဝင်တိုက်မိကြသည်။

မျက်စိတစ်မှိတ် အတွင်းမှာပင် ဘယ်ခန္ဓာကိုယ်က ပိုသန်မာသလဲ ဆိုတာ အဖြေပေါ်သွား၏။

အဝါရောင် ပုံရိပ်ကြီးသည် အနီရောင် ပုံရိပ်ကြီးနှင့် ဝင်တိုက်မိပြီးနောက် လွင့်ထွက်သွားပြီး၊ မြေကြီးပေါ်သို့ ပြုတ်ကျကာ မြေပြင်ကို တုန်ခါ အက်ကွဲသွားစေသည်။

ရေတွက်၍ မရနိုင်သော မြေကြီး အပိုင်းအစများသည် ကောင်းကင်သို့ ထိုးတက်နေသော မြေနဂါးများ ပမာ ပေါက်ကွဲ လွင့်စဉ်ကုန်ကြ၏။

အဝါရောင် ပုံရိပ်ကြီး မြေပေါ်သို့ မကျရောက်မီမှာပင် စုယွီ ထပ်မံ ခုန်အုပ်လိုက်သည်။ သူ၏ ကြောက်မက်ဖွယ် ပုံသဏ္ဍာန်သည် ရှေးဟောင်း မိကျောင်းကြီး တစ်ကောင် ကဲ့သို့ပင်။ သူ၏ တိုက်ခိုက်မှုတိုင်းတွင် မြေကြီးကို တုန်ခါသွားစေနိုင်သော ကြောက်မက်ဖွယ် စွမ်းအားများ ပါဝင်နေသည်။

မိကျောင်း မိစ္ဆာ (၁၀၈) ကွက် ကိုယ်ခန္ဓာ သန့်စင်ခြင်း ကျင့်စဉ် နှင့် သွေးဝေလငါး လမင်းမြို နည်းစနစ်တို့ ပေါင်းစပ်လိုက်သောအခါ၊ စုယွီ၏ ရုပ်ခန္ဓာ စွမ်းအား သက်သက်သည် တတိယအဆင့် အလယ်အလတ်တန်းစား ချပ်ဝတ် သင်းခွေချပ်ကို အပြတ်အသတ် ချေမှုန်းပစ်ရန် လုံလောက်နေပြီ ဖြစ်သည်။

“ဘုန်း...”

လက်သီးတစ်ချက်တည်းနှင့်တင် မိကျောင်းကြီး တစ်ကောင်၏ ခြေသည်းများက မြေကြီးကို ကုတ်ခြစ် ဆွဲဖြဲလိုက်သကဲ့သို့ ဖြစ်သွား၏။

ချပ်ဝတ် သင်းခွေချပ်ကြီးသည် စူးရှစွာ အော်ဟစ်လိုက်သည်။ မည်သည့်အရာမှ မထိုးဖောက်နိုင်ဟု ယူဆထားသော ၎င်း၏ ချပ်ဝတ် ကြေးခွံများသည်၊ စုယွီ၏ လက်သီးချက်ကြောင့် ကွဲအက် ပေါက်ထွက်သွားပြီး ပူနွေးသော သွေးများ ပန်းထွက်လာ၏။

၎င်း၏ ဧရာမ ခန္ဓာကိုယ်ကြီး လွင့်စဉ်သွားပြီး တစ်မိုင်ခန့် အကွာရှိ တောင်ကုန်းငယ်လေး တစ်ခုနှင့် ပစ်ဆောင့်မိသွားသည်။ တောင်ကုန်းလေး ပြိုကျသွားပြီး ဖုန်မှုန့်များက ၎င်းကို ချက်ချင်း ဖုံးလွှမ်းသွားလေ၏။