အခန်း (၁၄၉-၁၅၀)

လော့ချန်နှင့် သူ၏စွန့်စားခန်းများ

အခန်း (၁၄၉) - လာပြန်ပြီလား…. နောက်ထပ် ဂိုဏ်းအစည်းအဝေး

လောလောဆယ်တွင် လော့ချန်အား ခြောက်လှန့်နေသည့် ထိုစိုးရိမ်စိတ်များသည် အဘယ်မှ မြစ်ဖျားခံလာသနည်း။

အဖြေမှာ ရှင်းသည်။ အဆင့်မြင့်ကျင့်ကြံသူများကြားမှ ပဋိပက္ခများသည် လော့ချန်ကဲ့သို့ ချီသန့်စင်အဆင့်ရှိသူများ တောင့်ခံနိုင်သည့်အရာ မဟုတ်ခြင်းကြောင့်ပင်။

ထိုကဲ့သို့သော တိုက်ပွဲများမှ ထွက်ပေါ်လာသော အသေးငယ်ဆုံး နောက်ဆက်တွဲ ရိုက်ခတ်မှုမှာပင် ဘေးမှကြည့်နေသူများအတွက် ဘေးဒုက္ခဆိုးကြီး ဖြစ်စေနိုင်သည်။ လော့ချန်သည် ထိုတိုက်ပွဲများကို ကျော်ဖြတ်နိုင်လောက်အောင် မသန်မာသေးသည်ကို သူ့ကိုယ်သူ ကောင်းကောင်းသိသည်။

သူစိုးရိမ်ရသည့် အဓိက အချက်မှာ ယခုအချိန်တွင် သူအင်အား နည်းနေသောကြောင့်ဖြစ်သည်။

ဤသို့ဆိုသဖြင့် တခဏချင်းအတွင်း အသေအလဲ ဖိအားပေးကာ ကျင့်ကြံမှုအဆင့်ကို အတင်းတွန်းတင်၍လည်း မရပေ။

ထို့ကြောင့် အပြင်ပန်းတွင် လော့ချန်သည် သူ၏ ပုံမှန် အသွားအလာကိုသာ ထိန်းသိမ်းထားသည်။ နေ့ဘက်တွင် ဆေးလုံးဖော်စပ်ပြီး ညဘက်တွင် ကျင့်ကြံသည်။ သူ့အလုပ်သည် တည်ငြိမ်ပြီး ယုံကြည်စိတ်ချရသော ပုံမှန်အလုပ်ဖြစ်သဖြင့် မည်သူမျှလည်း သံသယမဝင်နိုင်ပေ။

ဤအတောအတွင်း၌ သူသည် ချန်ယင်းတောင် တစ်ဝိုက် လေ့လာစူးစမ်းမှုကို အရှိန်မြှင့်တင်ခဲ့သည်။ အစပိုင်းတွင် မိုင်အနည်းငယ်အတွင်းသာ ဂရုတစိုက် လေ့လာခဲ့သော်လည်း ရက်အနည်းငယ်အတွင်း မိုင်တစ်ရာ ပတ်လည်အထိ ချဲ့ထွင်ခဲ့သည်။

သူ၏ လေ့လာမှုများအရ ချန်ယင်းတောင်အတွင်း ဝိညာဉ်ဝံပုလွေများ သိသိသာသာ လျော့နည်းသွားပြီး ဒုတိယအဆင့် မိစ္ဆာသားရဲတစ်ကောင်မျှပင် မကျန်တော့ကြောင်း အတည်ပြုနိုင်ခဲ့သည်။ သူတို့ အခြားနေရာသို့ ပြောင်းရွှေ့သွားပုံရသည်။

ကျန်ရှိနေသည်မှာ မီးခိုးသစ်ရွက်ဝံပုလွေ၊ နှင်းခဲဝံပုလွေ နှင့် အားနည်းသော ပထမအဆင့် မိစ္ဆာသားရဲ အချို့သာ ဖြစ်သည်။

ထိုသားရဲများသည် ချီဖုံးကွယ်မှော်အတတ်ကြောင့် လော့ချန်အား မရိပ်မိနိုင်ကြပေ။ အကယ်၍ ပါရမီရှိသော ပထမအဆင့်သားရဲတစ်ကောင် မြင်သွားလျှင်ပင် သူ၏ ပြိုင်ဘက် မဟုတ်ချေ။

ဤအားသာချက်ကို အသုံးပြုပြီး လော့ချန်သည် လျှို့ဝှက်ထွက်ပြေးရန် နေရာအချို့ကို ကြိုတင်ပြင်ဆင်ထားလိုက်သည်။ တာဟဲစျေးမြို့တော်တွင် မမျှော်လင့်ဘဲ တစ်ခုခုဖြစ်လာခဲ့လျှင် ပြဿနာစတက်သည်နှင့် သူ ရှောင်တိမ်းနိုင်မည်ဖြစ်သည်။

စိုးရိမ်မှုများ ပြေပျောက်သွားပြီးနောက် လော့ချန်သည် ကျင့်ကြံခြင်းတွင်သာ အပြည့်အဝ အာရုံစိုက်လိုက်သည်။

….

“နောက်ဆုံးတော့ ချီသန့်စင် အဆင့် ၈ ကို ရောက်ပြီ”

ဝိညာဉ်ကြောဂူအတွင်း၌ လော့ချန် မျက်လုံးများကို ဖြည်းညှင်းစွာ ဖွင့်လိုက်သည်။

သူ မျက်လုံးဖွင့်လိုက်သည့် ခဏတွင် မှောင်မိုက်နေသော ဂူအတွင်း၌ ဖြူဆွတ်သော အလင်းတန်းများ ဖျတ်ခနဲ လင်းလက်သွားသည်။ ၎င်းမှာ သူ၏ နတ်မျက်စိမှော်အတတ် ပိုမိုနက်ရှိုင်းလာသည့် လက္ခဏာပင်။

အဆင့်အသစ်သို့ ယခုလေးတင် တက်လှမ်းနိုင်ခဲ့သဖြင့် သူ၏ ချီစွမ်းအားကို အပြည့်အဝ မထိန်းချုပ်နိုင်သေးသောကြောင့် နတ်မျက်စိများ အလိုအလျောက် ပွင့်လာခြင်းဖြစ်သည်။

လော့ချန် မျက်တောင်ကို ဖြည်းဖြည်းချင်း ခတ်လိုက်ပြီး စိတ်ကို တည်ငြိမ်စေရန် အသက်ကို ပြင်းပြင်းရှူလိုက်သည်။

ဤအဆင့်တက်မှုမှာ သူခန့်မှန်းထားသည်ထက် နှစ်ရက်ခန့် နောက်ကျခဲ့သည်။ သို့သော် မကောင်းသောအချက် မဟုတ်ပေ။

သူ၏ ချီစွမ်းအားမှာ ယခင်ကထက် ပိုမိုသန့်စင်လာပြီး အရောင်မှာလည်း အစိမ်းဖျော့ရောင်သို့ ပြောင်းလဲသွားသည်။ ဤသန့်စင်မှု လုပ်ငန်းစဉ်ကြောင့်သာ အချိန်အနည်းငယ် ပိုကြာသွားခြင်း ဖြစ်သည်။

“အခုမှ အဆင့် ၈ ကို ရောက်တာဆိုပေမဲ့ ငါ့ရဲ့ ချီစွမ်းအား သန့်စင်မှုက သာမန် တစ်ကိုယ်တော်ကျင့်ကြံသူတွေထက် အများကြီး သာနေပြီ၊ ပြီးတော့ ငါ့ရဲ့ ချီစွမ်းအား ပမာဏကလည်း တခြားသူတွေထက် ပိုများတယ်၊ အဆင့်တူချင်း တိုက်ခိုက်ရင် ငါ့အတွက် အသာစီးရမှာပဲ”

ချီသန့်စင်ခြင်း နောက်ဆုံးအဆင့်များဖြစ်သော အဆင့် ၇ မှ ၉ တွင် ကျင့်ကြံခြင်းသည် အစောပိုင်းအဆင့်များနှင့် မတူတော့ပေ။

အစောပိုင်းတွင် ဒန်တျန်ကို ချဲ့ထွင်ရန် အဓိကထားသော်လည်း ယခုအခါ ချီစွမ်းအား သန့်စင်ခြင်းမှာ အဓိက ဖြစ်လာသည်။

အဆင့် ၈ မှ ၉ သို့ တက်ရန်မှာ ချီစွမ်းအား အားလုံးကို အပြည့်အဝ သန့်စင်ရန် လိုအပ်သည်။

ကြားရသည်မှာ လွယ်ကူသော်လည်း လက်တွေ့တွင် အလွန်ခက်ခဲသည်။

တစ်ကိုယ်တော်ကျင့်ကြံသူ အများစုမှာ သန့်စင်သည့် နည်းစနစ်များ မရှိကြသလို၊ သန့်စင်ပြီးနောက် လျော့နည်းသွားသည့် စွမ်းအားကို ပြန်ဖြည့်ရန်အတွက်လည်း ဝိညာဉ်ကျောက်တုံး အမြောက်အမြား လိုအပ်သည်။

ထို့ကြောင့် တာဟဲစျေးမြို့တော်တွင် ကျင့်ကြံသူ သောင်းချီရှိသော်လည်း အဆင့် ၉ သို့ ရောက်သူမှာ လက်ချိုးရေတွက်၍ ရသည်။

စီကုန်းရှို့ကျားကဲ့သို့သော သူများသည် ဘဝတစ်လျှောက်လုံး ကြိုးစားမှသာ အဆင့် ၉ သို့ ရောက်ကြသည်။ သို့သော် ထိုအချိန်ရောက်သောအခါ အခြေခံတည်ဆောက်ခြင်းအဆင့်သို့ တက်လှမ်းရန် အင်အား မရှိကြတော့ပေ။

သို့သော် လော့ချန်မှာမူ ထိုကဲ့သို့ မျက်စိမှိတ် လျှောက်နေရသူ မဟုတ်တော့ပေ။

သူ၏ နွေဦးကျင့်စဉ်မှာ အထွတ်အထိပ်အဆင့်သို့ ရောက်ရှိသွားပြီ ဖြစ်သဖြင့် ချီစွမ်းအားကို သန့်စင်ပေးမည့် နည်းစနစ်ကို သူ ပိုင်ဆိုင်ထားပြီးသား ဖြစ်သည်။

….

“လာပြန်ပြီလား၊ နောက်ထပ် ဂိုဏ်းအစည်းအဝေး”

လော့ချန် စိတ်ပျက်စွာ နှုတ်ခမ်းဆူလိုက်သည်။ ကမ္ဘာကူးပြောင်းလာသော်လည်း လစဉ်အစည်းအဝေးများ တက်နေရခြင်းကို သူ ငြီးငွေ့လှပြီ။

သို့သော် စီကုန်းရှို့ကျားက အရေးကြီးသည်ဟု ဆိုသဖြင့် သူ ဖိုရှန်းဂိုဏ်း ဌာနချုပ်သို့ သွားလိုက်သည်။

သို့သော် ဌာနချုပ်တွင် ဂိုဏ်းချုပ် မီရှုဟွာကို မတွေ့ရဘဲ မီကျွင်းဖျင်ကသာ ဦးဆောင်နေသည်ကို တွေ့ရသည်။ ဆွေးနွေးသည့် အကြောင်းအရာများမှာလည်း သိပ်အရေးမကြီးလှပေ။

‘ဒီလူတွေ ငါ့များ လာနောက်နေတာလား၊ အဆင့်တက်ထားလို့ လုပ်စရာတွေ အများကြီး ရှိနေတာကို’ ဟု စိတ်ထဲမှ မေတ္တာပို့ပေးနေလိုက်သည်။

လော့ချန်သည် ဝေစုများနှင့် ဆေးလုံးများကို ယူပြီးနောက် သူ့အစ်ကိုကြီးဝမ်ယွမ်ထံ ခြေလှည့်လိုက်သည်။

….

နှစ်ဦးသား ဝမ်ယွမ်၏ အိမ်သို့ အတူတူ လမ်းလျှောက်လာစဉ် သွေးအဆီအနှစ်ဆေးလုံး အကြောင်း ဆွေးနွေးရန် ပြင်လိုက်ကြသည်။

သို့သော် ခြံဝင်းတစ်ခုအရောက်တွင် သူတို့၏ ခြေလှမ်းများ ရပ်တန့်သွားသည်။

ရှေ့တွင် လူအုပ်တစ်စု ရှိနေပြီး အသံတစ်သံ ထွက်ပေါ်လာသည်။

“ဒါ ခန္ဓာကိုယ် သန့်စင်ခြင်းလမ်းစဉ်ကို လိုက်နေတဲ့ ကျင့်ကြံသူလား”

လော့ချန်နှင့် ဝမ်ယွမ်တို့ ချက်ချင်း ခေါင်းငုံ့ကာ အရိုအသေ ပေးလိုက်ကြသည်။ ရှေ့တွင် ရပ်နေသူမှာ မီရှုဟွာနှင့် သူနှင့်အတူ ပါလာသော အစွမ်းထက်သည့် လူစိမ်းတစ်ယောက် ဖြစ်သည်။

မီရှုဟွာက ပြုံးရင်း ဝမ်ယွမ်အား ညွှန်ပြလိုက်သည်။

“ဟုတ်ပါတယ်၊ သူပါပဲ၊ ဝမ်ယွမ်…. လာခဲ့၊ တာဝန်ခံမြောင်ကို နှုတ်ဆက်လိုက်ဦး”

ဝမ်ယွမ် တည်ငြိမ်စွာပင် နှုတ်ဆက်လိုက်သည်။

“တာဝန်ခံမြောင်ကို နှုတ်ခွန်းဆက်ပါတယ်”

“ဟားဟား.... တာဝန်ခံမြောင်လို့ ခေါ်တာထက် ကျင့်ကြံသူမြောင်လို့ ခေါ်တာကို ငါ ပိုသဘောကျတယ်"

ဤသည်မှာ ကျင့်ကြံခြင်းလောက၏ အဆင့်အတန်း ခေါ်ဝေါ်မှုတစ်ခု ဖြစ်သည်။

အခြေခံတည်ဆောက်ခြင်းအဆင့် ရောက်သူကို ကျင့်ကြံသူ၊ ရွှေအမြုတေအဆင့်ကို စီရင်စုသခင်နှင့် ဝိညာဉ်သန္ဓေတည်အဆင့်ကို သူတော်စင်ဟု ခေါ်ဝေါ်ကြသည်။

မြောင်ကျန်းသည် ဝမ်ယွမ်အား သေချာကြည့်ကာ ခေါင်းညိတ်လိုက်သည်။

“တကယ့်ကို ပါရမီရှိတဲ့သူပဲ၊ မင်းရဲ့ ခန္ဓာကိုယ်က.... သံမဏိကနေ ကျောက်စိမ်းဖြူအဖြစ် ပြောင်းလဲနေပြီပဲ၊ မင်း အခြေခံတည်ဆောက်ခြင်းအဆင့် ရောက်ဖို့ နီးစပ်နေပြီ၊ နှမြောစရာပဲ….”

သူ စကားကို အဆုံးမသတ်ခဲ့ပေ။ သို့သော် ‘အခြေခံတည်ဆောက်ခြင်းအဆင့် ရောက်ဖို့ နီးစပ်နေပြီ’ ဆိုသည့် စကားကြောင့် ပတ်ဝန်းကျင်တစ်ခုလုံး တိတ်ဆိတ်သွားသည်။ မီရှုဟွာ၏ မျက်လုံးများမှာလည်း စူးရှသွားသည်။

ဤ တာဝန်ခံမြောင်သည် အလွန် အမြင်စူးရှသူ ဖြစ်သည်။ ကျောက်စိမ်းအိုးဓားဂိုဏ်းမှ လာသူ ဖြစ်သဖြင့် သူ၏ အသိပညာမှာ သာမန်ထက် သာလွန်နေသည်မှာ သေချာသည်။

အခြေအနေ ထူးဆန်းသွားသည်ကို မြောင်ကျန်း သိလိုက်ပုံရသဖြင့် သူ ရယ်မောရင်း လော့ချန်ဘက်သို့ လှည့်လိုက်သည်။

“ဒါဆို ဒါက မင်းတို့ဂိုဏ်းက ဆေးဖော်ဆရာကြီး တန်ချန်ဇီပေါ့"

သွားပြီ ငါ့ကို လာမကြည့်ပါနဲ့….။

လော့ချန် အောင့်သက်သက်ပြုံးရင်း “လော့ချန်က ကျင့်ကြံသူမြောင်ကို နှုတ်ခွန်းဆက်ပါတယ်" ဟု ဆိုလိုက်လေသည်။

လော့ချန်နှင့် သူ၏စွန့်စားခန်းများ

အခန်း (၁၅၀) - ချီသန့်စင် အဆင့် ၈

လော့ချန်သည် တာဝန်ခံမြောင်၏ အာရုံစိုက်မှုကို မခံချင်သည်မှာ အမှန်ပင်။

အကြောင်းမှာ သူ၏ ဆေးဖော်ဆရာ ဖြစ်တည်မှုကြောင့် မဟုတ်ဘဲ မနေ့ညကမှ ချီသန့်စင် အဆင့် ၈ သို့ ခိုးကြောင်ခိုးဝှက် တက်လှမ်းထားသောကြောင့် ဖြစ်သည်။

သူ၏ မယုံနိုင်စရာ ကျင့်ကြံမှုအရှိန်ကို မီရှုဟွာ ရိပ်မိမသွားစေရန် ချီဖုံးကွယ်မှော်အတတ် သုံး၍ အဆင့်မှန်ကို တမင်ဖုံးကွယ်ထားခဲ့သည်။

ပါရမီရှင်အဆင့် ရှိနေသော ဤမှော်အတတ်သည် အခြေခံတည်ဆောက်ခြင်းအဆင့် ကျင့်ကြံသူအား လှည့်စားနိုင်ပါ့မလား ဆိုသည်မှာ သူ ကိုယ်တိုင်လည်း ရင်တထိတ်ထိတ်နှင့် ဘုရားတနေရသည်။

အမှန်စင်စစ် ဤမှော်အတတ်ကြောင့် ချန်ယင်းတောင်မှ ဒုတိယအဆင့် မိစ္ဆာဝံပုလွေများကိုပင် သူ လှည့်စားနိုင်ခဲ့သည်။

လူသား အခြေခံတည်ဆောက်ခြင်းအဆင့် ကျင့်ကြံသူများသည် သားရဲများထက် အာရုံခံစားမှု ပိုနိုင်သော်လည်း ထိုဝံပုလွေများ၏ ဝိညာဉ်အာရုံမှာလည်း အဆင့်တူ လူသားများထက် မနိမ့်ကျလှပေ။ သူတို့အား လှည့်စားနိုင်ခဲ့လျှင် လူသားကိုလည်း လှည့်စားနိုင်လိမ့်မည်ဟု လော့ချန် ယူဆခဲ့သည်။

ထို့ကြောင့်ပင် သူ ယနေ့ လင်းစန္ဒာခန်းမ အစည်းအဝေးသို့ ခေါင်းမော့ရင်ကော့ တက်ရောက်ခဲ့ခြင်း ဖြစ်သည်။

သို့သော် ယခုအခါ ကျောက်စိမ်းအိုးဓားဂိုဏ်းမှ တပည့်တစ်ဦးဖြစ်သူ တာဝန်ခံမြောင်ရှေ့တွင်မူ သူ၏ ယုံကြည်မှုမှာ အနည်းငယ် ယိုင်နဲ့သွားသည်။ ထိုသို့သောဂိုဏ်းကြီးမျိုးတွင် ထူးခြားသော စစ်ဆေးသည့် ပညာရပ်များ ရှိနိုင်ပေသည်။ ဝမ်ယွမ်၏ ခန္ဓာကိုယ်သန့်စင်မှုအခြေအနေကို တစ်ချက်ကြည့်ရုံနှင့် သူ သိခဲ့သည် မဟုတ်ပါလော။

ကျောက်စိမ်းအိုးဓားဂိုဏ်းမှ တပည့်များသည် အခြေခံတည်ဆောက်ခြင်းအဆင့်သို့ ရောက်ပြီးနောက် စက္ခုအလင်း အမြုတေဆေးအား သုံးစွဲခွင့်ရကြသည်ဟု ဆိုကြသည်။ ကြာရှည်သုံးစွဲပါက သူတို့၏ မျက်လုံးများသည် ဓားကဲ့သို့ စူးရှလာပြီး အာရုံခံနိုင်စွမ်းကို များစွာ မြင့်တက်စေကာ တိုက်ပွဲများတွင်လည်း အားသာချက်များ ရရှိစေသည်။

သို့သော် အံ့သြစရာကောင်းသည်မှာ တာဝန်ခံမြောင်သည် လော့ချန်၏ ဖုံးကွယ်မှုကို မြင်ဟန်မတူပေ။ သို့မဟုတ် ဂရုမစိုက်ခြင်းလည်း ဖြစ်နိုင်သည်။

သူ့အတွက်မူ ချီသန့်စင် အဆင့် ၇ နှင့် ၈ ကြားတွင် ဘာမျှ ခြားနားမှု ရှိမည်မဟုတ်ပေ။

အခြေခံတည်ဆောက်ခြင်းအဆင့်နှင့် နီးစပ်နေသော ဝမ်ယွမ်သာလျှင် သူ၏ စိတ်ဝင်စားမှုကို ရရှိခဲ့သည်။

လော့ချန်က နှိမ့်ချစွာ ပြုံးရင်း ဆိုသည်။

“ကျင့်ကြံသူမြောင်၊ ကျွန်တော့်ကို လော့လေး လို့ပဲ ခေါ်ပါ၊ ဒီအငယ်တန်းက ဆေးဖော်ဆရာကြီးဆိုတဲ့ ဘွဲ့နဲ့ မထိုက်တန်သေးပါဘူး"

“မဟုတ်တာ၊ မဟုတ်တာ…. အခု မထိုက်တန်သေးပေမဲ့ နောင်မှာ ဘယ်သူပြောနိုင်မလဲ"

မြောင်ကျန်းက လော့ချန်အား ချီးကျူးသည့် အကြည့်များဖြင့် ကြည့်လိုက်သည်။

“မင်းဆီက ထွက်နေတဲ့ ဆေးလုံးအနံ့အသက်က ဆေးအညစ်အကြေးတွေ ဒါမှမဟုတ် မီးဓာတ်အညစ်အကြေးတွေ လုံးဝမပါဘူး၊ ဒါဟာ ဆေးဖော်ဆရာကြီးတစ်ယောက်ရဲ့ အရှိန်အဝါပဲ”

လော့ချန် ဆွံ့အသွားသည်။

ဆေးပညာအရည်အချင်းအား အနံ့နှင့်ပင် သိနိုင်သလော။

သူသည် သန့်စင်ခြင်းမှော်အတတ်ဖြင့် ဆေးနံ့များကို ပုံမှန် ဖယ်ရှားလေ့ရှိသော်လည်း ဆေးလုံးများ၏ သန့်စင်သော စွမ်းအင်အငွေ့အသက်ကိုမူ တမင် ချန်ထားခဲ့ခြင်း ဖြစ်သည်။

မြောင်ကျန်း၏ အာရုံငါးပါးမှာ အမှန်ပင် ထက်မြက်လှသည်။

“တကယ့်ကို ချီးကျူးစရာကောင်းတဲ့ လူငယ်တွေပဲ”

မြောင်ကျန်းက မီရှုဟွာဘက် လှည့်ကာ ပြောလိုက်သည်။

“မိတ်ဆွေမီ မင်းရဲ့ ဖိုရှန်းဂိုဏ်းက တကယ့်ကို ပါရမီရှင်တွေနဲ့ စည်ကားနေတာပဲ၊ မင်းတို့ရဲ့ အနာဂတ်က တောက်ပလာမှာ သေချာတယ်"

မီရှုဟွာက အပြုံးဖြင့် တုံ့ပြန်လိုက်သည်။

“ဒါက မိတ်ဆွေမြောင်ရဲ့ ကူညီစောင့်ရှောက်မှုပေါ်မှာလည်း မူတည်တာပေါ့"

“ဒါပေါ့.... ဒါပေါ့၊ ဒါနဲ့ ငါအကူအညီတောင်းထားတဲ့ ကိစ္စကိုလည်း အထူးဂရုစိုက်ပေးပါဦး"

“ကျုပ် အစွမ်းကုန် ကြိုးစားပေးပါ့မယ်” ဟု မီရှုဟွာက ပြန်ဖြေသည်။

ထို့နောက် မြောင်ကျန်းသည် သူ၏ ပါးစပ်မှ ဓားအမြုတေကို ထွေးထုတ်လိုက်ရာ ၎င်းမှာ ချက်ချင်းပင် ဓားတစ်စင်းအဖြစ် ပြောင်းလဲသွားသည်။ သူ ဓားပေါ်သို့ ခုန်တက်ကာ ချက်ချင်းပင် လေဟုန်စီး၍ ပျံသန်းထွက်ခွာသွားတော့သည်။

ဒါက တကယ့် ဓားစီးခြင်းပဲ….။

လော့ချန် ထိုမြင်ကွင်းကို ကြည့်ရင်း မျက်တောင် ခတ်လိုက်မိသည်။

နေပါဦး၊ ဒါကြီးက နည်းနည်းတော့ ရွံစရာမကောင်းဘူးလား၊ ခြေထောက်နဲ့ နင်းထားတဲ့ ဓားကို ပြန်မျိုချပြီး ဒန်တျန်ထဲမှာ သိမ်းထားရတယ်ဆိုတော့….။

မြောင်ကျန်း ထွက်သွားပြီးနောက် လေထုမှာ ထူးဆန်းသွားသည်။ မီရှုဟွာ၏ စူးရှသော အကြည့်များမှာ ဝမ်ယွမ်အပေါ်သို့ ကျရောက်နေသည်။

ဝမ်ယွမ် အစပိုင်းတွင် ခေါင်းငုံ့ထားသော်လည်း နောက်ပိုင်းတွင် မီရှုဟွာ၏ မျက်လုံးများကို တည့်တည့် ပြန်ကြည့်လိုက်သည်။

လော့ချန်၏ ခန္ဓာကိုယ်တစ်ခုလုံး တင်းမာသွားသည်။ မီရှုဟွာ၏ အကြည့်များမှာ ကျောက်သားလို မာကျောပြီး ဝမ်ယွမ်အား စစ်ဆေးနေသကဲ့သို့ ရှိသည်။

အချိန်အတော်ကြာ တိတ်ဆိတ်နေပြီးနောက်….။

“မင်း တစ်ခုခု လိုအပ်ရင်…. ငါ့ဆီကို လာခဲ့လို့ ရတယ်” ဟု မီရှုဟွာ တိုးတိုးလေး ပြောကာ လှည့်ထွက်သွားတော့သည်။

လော့ချန် မျက်တောင်ခတ်လိုက်မိသည်။

ဒါပဲလား….။

သူ ထင်ထားသကဲ့သို့ တိုက်ပွဲဖြစ်ပွားခြင်း သို့မဟုတ် ပြဿနာရှာခြင်းများ လုံးဝ ဖြစ်မလာခဲ့ပေ။

ဖြောင်း….။

လော့ချန်၏ ပုခုံးအား ဝမ်ယွမ် အားကိုးတကြီး လာကိုင်လိုက်သည်။ သူ၏ မျက်နှာမှာ ဖြူဖတ်ဖြူရော် ဖြစ်နေပြီး အသက်ကို ပြင်းပြင်းရှူနေရသည်။

“အခြေခံတည်ဆောက်ခြင်းအဆင့် ကျင့်ကြံသူတစ်ယောက်ရဲ့ ဝိညာဉ်အသိစိတ်က တကယ့်ကို နတ်ဘုရားတစ်ပါးရဲ့ အရှိန်အဝါလိုပဲ” ဟု ဝမ်ယွမ် မောပန်းစွာ ပြောလိုက်သည်။

လော့ချန် ချက်ချင်း သဘောပေါက်သွားသည်။

“အစ်ကိုဝမ်…. အစ်ကိုက အခြေခံတည်ဆောက်ခြင်းအဆင့် ကျင့်ကြံသူရဲ့ ဝိညာဉ်အသိစိတ်ကို ကိုယ့်ရဲ့ စိတ်ဆန္ဒနဲ့ တိုက်ရိုက် ခုခံခဲ့တာလား”

ချီသန့်စင်သူများက စိတ်ဝိညာဉ်ကို လေ့ကျင့်ကြပြီး၊ ခန္ဓာကိုယ်သန့်စင်သူများကမူ စိတ်ဆန္ဒကို လေ့ကျင့်ကြသည်။ ဝမ်ယွမ်သည် သူ၏ ကျောက်သားအလား မာကျောသော စိတ်ဆန္ဒဖြင့် မီရှုဟွာ၏ ဝိညာဉ်ဖိအားကို တောင့်ခံခဲ့ခြင်း ဖြစ်သည်။

ရလဒ်ကမူ ရှင်းသည်။ မီရှုဟွာ အနိုင်ရခဲ့သည်။ သို့သော် ဝမ်ယွမ်သည် အဆင့် ၈ သာ ရှိသေးပြီး မီရှုဟွာမှာ အခြေခံတည်ဆောက်ခြင်း အလယ်အလတ်အဆင့် ဖြစ်သဖြင့် ဤသို့ တောင့်ခံနိုင်ခြင်းမှာပင် အံ့ဩစရာ ဖြစ်သည်။

….

တိတ်ဆိတ်သော အခန်းအတွင်း ဝမ်ယွမ်သည် ကျင့်ကြံရင်း အမောဖြေနေသည်။ လော့ချန်က ဘေးမှ ငြိမ်သက်စွာ စောင့်ဆိုင်းပေးနေသည်။

အချိန်အတော်ကြာမှ ဝမ်ယွမ် မျက်လုံးဖွင့်လာသည်။

“အခြေခံတည်ဆောက်ခြင်းအဆင့် ကျင့်ကြံသူတွေက တကယ့်ကို မလွယ်ဘူး၊ မီရှုဟွာရဲ့ အကြည့်တစ်ချက်က ငါ့ရဲ့ စိတ်ကို သိမ်းပိုက်လုနီးပါး ဖြစ်သွားခဲ့တယ်၊ အဲဒီအချိန်မှာ ငါသာ ခေါင်းငုံ့ပြီး အရှုံးပေးလိုက်ရင် ငါ့ဘဝမှာ ဘယ်တော့မှ အခြေခံတည်ဆောက်ခြင်းအဆင့်ကို တက်လှမ်းနိုင်တော့မှာ မဟုတ်ဘူး"

“တကယ်ပဲ အဲဒီလောက်အထိ အရေးကြီးတာလားဗျ”

“ယောက်ျားတစ်ယောက်ဟာ လိုအပ်ရင် ဦးညွှတ်ရမှာမှန်ပေမဲ့ သိက္ခာကိုတော့ အကျမခံရဘူး၊ မင်းရဲ့ စိတ်ဆန္ဒ ကျိုးပျက်သွားရင် အဲဒီလို ငုံ့ထားတဲ့ခေါင်းက ဘယ်တော့မှ ပြန်မော့လာမှာ မဟုတ်တော့ဘူး"

ဝမ်ယွမ်၏ စကားများတွင် လေးနက်သော အဓိပ္ပာယ်များ ပါဝင်နေသည်။ လော့ချန်သည် လိုအပ်လျှင် လိုက်လျောတတ်သူ ဖြစ်သော်လည်း သူ၏ ဘဝတွင် ယခုကဲ့သို့ ပြတ်သားရမည့် အခိုက်အတန့်မျိုး မကြုံဖူးသေးပေ။

ဝမ်ယွမ် အကြောင်းအရာကို ပြောင်းလိုက်သည်။

“သွေးအဆီအနှစ် ဆေးလုံးရဲ့ စမ်းသပ်ချက် ရလဒ်တွေ ထွက်ပြီ"

“လူသားတွေအတွက်တော့ အသိစိတ် ပျောက်မသွားဘူး၊ ဒါပေမဲ့ စိတ်တိုလွယ်လာတယ်။ တခြား အာနိသင်တွေကတော့ မိစ္ဆာသားရဲတွေမှာ စမ်းသပ်တုန်းကအတိုင်းပဲ"

၎င်းမှာ သွေးအနှစ်သာရအား လောင်ကျွမ်းစေပြီး ခွန်အား ၃၀ ရာခိုင်နှုန်း တိုးစေသည်။ အချိန်မှာ မိနစ်အနည်းငယ်မျှသာ ခံသည်။

“ဒီဆေးကို အမြောက်အမြား ဖော်စပ်လို့ ရမလား" ဟု ဝမ်ယွမ် မေးလိုက်သည်။

လော့ချန် ထိုစကားကြောင့် အံ့ဩသွားသည်။

“အရေးပေါ်သုံးဖို့ အနည်းအကျဉ်းဆို ရပြီ မဟုတ်လား၊ ဘာလို့ အများကြီး လိုချင်ရတာလဲ”

“ငါ အရေးကြီးတဲ့ အချိန်ကျရင် ဒီဆေးကို သုံးပြီး အဟန့်အတားတစ်ခုကို ချိုးဖျက်နိုင်မလားလို့ပါ” ဟု ဝမ်ယွမ်က ဖြေသည်။

“မလုပ်နဲ့ အစ်ကိုဝမ်”

လော့ချန် အမြန် တားလိုက်သည်။

“ဒါက တိုက်ခိုက်ရေးအတွက်ပဲ သုံးရတဲ့ ဆေး၊ ကျင့်ကြံဖို့ မဟုတ်ဘူး၊ ကျွန်တော် နောက်ကျရင် အစ်ကို ကျင့်ကြံတဲ့နေရာမှာ သုံးလို့ရမယ့် သွေးမိစ္ဆာဆေးလုံးကို ထပ်ပြီး ဖန်တီးပေးမယ်"

လော့ချန်သည် ဝမ်ယွမ်၏ အပြုအမူများကို ကြည့်ပြီး တစ်ခုခု ထူးဆန်းနေသည်ဟု ခံစားရသည်။

“အစ်ကိုဝမ်…. အစ်ကို ဘာလို့ ဒီလောက် အလောတကြီး ဖြစ်နေတာလဲ”

ဝမ်ယွမ်သည် ပြီးခဲ့သည့် တစ်နှစ်အတွင်း အလွန် ပြောင်းလဲသွားခဲ့သည်။ သူ နာမည်ကြီးအောင် လုပ်သည်၊ အဆုံးအဖြတ်စင်မြင့်တွင် ယှဉ်ပြိုင်သည်၊ ခန်းမခေါင်းဆောင်ရာထူးကို လက်ခံသည်။ ယခုမူ ခန္ဓာကိုယ် ထိခိုက်စေမည့် ဆေးကိုပင် သုံးချင်နေသည်။

ဝမ်ယွမ် တိုးတိုးလေး ပြောလိုက်သည်။

“ငါ ဘယ်လိုလုပ် မလောဘဲ နေနိုင်မှာလဲ၊ စောစောက တာဝန်ခံမြောင် စကားပြောနေရင်း ဆက်မပြောဘဲ တန်းလန်းရပ်သွားတာမှတ်မိလား....”

လော့ချန် ပြန်စဉ်းစားလိုက်သည်။ စကားပြောဆိုမှု အများကြီး မရှိခဲ့သော်လည်း အခြေခံတည်ဆောက်ခြင်းအဆင့် ကျင့်ကြံသူ နှစ်ဦးထံမှ ထွက်ပေါ်လာသော ဖိအားမှာ သူ့အပေါ် စွဲကျန်နေဆဲ ဖြစ်သည်။

သေချာစဉ်းစားကြည့်သောအခါ ထိုစကားလုံးကို သူ မှတ်မိသွားသည်။

“နှမြောစရာပဲ....”

နေပါဦး၊ ဘာကို နှမြောတာလဲ….။

“မင်းမှာ ထာဝရအသက်ရှည်ခြင်းကို ရနိုင်ဖို့ အခွင့်အရေး မရှိတော့တာ နှမြောစရာပဲလို့ သူ ပြောချင်တာပေါ့”