အခန်း (၂၉၉-၃၀၀)

အခန်း (၂၉၉) - နေရောင်ခြည်သလင်းကျောက်ကို ထုတ်ယူခြင်း(၁)

အသိဉာဏ်ကင်းမဲ့နေသော မိစ္ဆာအလောင်းများသည် အနည်းငယ်မျှ ရန်စလိုက်ရုံဖြင့် သူတို့နောက်သို့ အပြေးအလွှား လိုက်လာကြလေသည်။

ဤနေရာရှိ မိစ္ဆာအလောင်းများနှင့် မိစ္ဆာသားရဲများ၏ အရေအတွက်မှာ သောင်းနှင့်ချီရှိပြီး အလွန်အမင်း များပြားလှပေသည်။

မိစ္ဆာအလောင်းနှင့် မိစ္ဆာသားရဲ တစ်ကောင်စီတိုင်း၏ စွမ်းအားမှာ လဲ့ချန်ထက် မနိမ့်ကျပေ။

တစ်စုံတစ်ယောက်ကသာ ဤမျှ ကြီးမားသော အရေအတွက်ကို ညွှန်ကြားပြီး မိစ္ဆာအလောင်း တပ်မတော် တစ်ခုအဖြစ် ဖန်တီးလိုက်မည်ဆိုပါက ဆန်းကြယ်ရှင်ခြင်းအဆင့် အားကောင်းသည့် သိုင်းပညာရှင်များကို မဆိုထားနှင့်၊ ဆန်းကြယ်သေခြင်းအဆင့် အားကောင်းသည့် သိုင်းပညာရှင်များပင်လျှင် တားဆီးနိုင်မည် မဟုတ်ပေ။

ဤမိစ္ဆာအလောင်းများနှင့် မိစ္ဆာသားရဲများမှာ သူတို့ သက်ရှိထင်ရှား ရှိစဉ်က အနည်းဆုံး ဆန်းကြယ်ရှင်ခြင်းအဆင့်တွင် ရှိခဲ့ကြကြောင်းကိုလည သိထားသင့်ပေသည်။

အဘယ်ကြောင့်ဆိုသော် အသက်စွမ်းအင် ဖွံ့ဖြိုးလာသော ရုပ်ပိုင်းဆိုင်ရာ ခန္ဓာကိုယ် တစ်ခုသာလျှင် ကမ္ဘာခြားနတ်ဆိုးစွမ်းအင်များ၏ တိုက်စားမှုအောက်တွင် ပျက်သုဉ်းမသွားဘဲ ကျန်ရှိနေနိုင်သောကြောင့်ပင်။

သူတို့ထံတွင် အသိဉာဏ်နှင့် အားကောင်းသော သိုင်းပညာရပ်များ မရှိတော့သော်လည်း တိုက်ခိုက်ရေး ဗီဇစိတ် အချို့တော့ ကျန်ရှိနေသေး၏။

သို့သော် သူတို့၏ ရုပ်ပိုင်းဆိုင်ရာ ခန္ဓာကိုယ်များမှာ အလွန်အမင်း မာကျောလှပေသည်။ ကမ္ဘာခြားနတ်ဆိုး စွမ်းအင်များ၏ တိုက်စားမှုက သူတို့၏ ခန္ဓာကိုယ်များကို သက်ရှိထင်ရှား ရှိစဉ်ကထက်ပင် ပိုမိုအားကောင်းလာစေခဲ့သည်။

ဤအခြေအနေတွင် ဘာသိုင်းပညာရပ်မှ မသုံးဘဲ တိုက်ရိုက် ဝင်တိုက်လိုက်ခြင်းကပင် အားကောင်းသည့် အဆင့်တူသိုင်းပညာရှင်များကို ဒုက္ခရောက်သွားစေနိုင်လေသည်။

ခရီးစဉ် တစ်လျှောက်တွင် ဝူယွမ်သည် ရှေးဟောင်းရတနာတိုက် အသီးသီးမှ မိစ္ဆာအလောင်းများနှင့် မိစ္ဆာသားရဲ တစ်သောင်းကျော် စုဆောင်းရရှိခဲ့လေသည်။

တောက်လောင်ခြင်း နေမင်းမသေမျိုးဂိုဏ်းမှ မိစ္ဆာအလောင်း သောင်းနှင့်ချီ ထပ်ပေါင်းထည့်လိုက်ပါက သူ့ထံတွင် မိစ္ဆာအလောင်း သုံးသောင်းနီးပါး ရှိလာပေလိမ့်မည်။

ကမ္ဘာသစ်ပင်က ဤမိစ္ဆာအလောင်းများထံမှ ကမ္ဘာခြားနတ်ဆိုးစွမ်းအင် အချို့ကို ထုတ်ယူပြီးနောက် ၎င်းတို့ကို အဘိုးအိုဟွမ်က အပြည့်အဝ ထိန်းချုပ်နိုင်မည် ဖြစ်သည်။

မိစ္ဆာအလောင်း သုံးသောင်းဆိုသည်မှာ လူငယ်ဘုရင် သုံးသောင်းနှင့် ညီမျှလေသည်။

ထို့အပြင် ဤမိစ္ဆာအလောင်းများသည် သေဆုံးခြင်း သို့မဟုတ် နာကျင်ခြင်းကို မကြောက်ရွံ့ကြပေ... တိုက်ပွဲတွင် သူတို့သည် အသိဉာဏ် ကင်းမဲ့စွာဖြင့် ဝင်တိုက်ကြမည်သာ ဖြစ်သည်။

ဟွမ်၏ ခန့်မှန်းချက်အရ ဆန်းကြယ်ရှင်ခြင်းနှင့် သေခြင်းအဆင့် အားကောင်းသည့် သိုင်းပညာရှင် တစ်ဦးပင်လျှင် သူ ထိန်းချုပ်ထားသော မိစ္ဆာအလောင်း တပ်မတော်၏ ဝိုင်းရံခြင်းကို ခံရပါက အသက်ရှင်လျက် လွတ်မြောက်နိုင်မည့် အခွင့်အရေး လုံးဝ ရှိမည်မဟုတ်ပေ။

ဝင်စားခြင်းအဆင့် အားကောင်းသည့် သိုင်းပညာရှင်များသာလျှင် သူတို့နှင့် ယှဉ်ပြိုင်နိုင်စွမ်း ရှိပေလိမ့်မည်။

ယခင်က ဝူယွမ်ထိန်းချုပ်ခဲ့သော ဆေးလုံးဝိညာဉ် အလောင်းတပ်မတော်နှင့် နှိုင်းယှဉ်လျှင် ဤမိစ္ဆာ အလောင်း တပ်မတော်မှာ လုံးဝ အဆင့်မြှင့်တင်ထားသောအရာ တစ်ခုပင် ဖြစ်လေသည်။

ထူထပ်လှသော မိစ္ဆာအလောင်း အပ်ကြီးသည် ကမ္ဘာသစ်ပင်၏ သစ်ကိုင်းများဖြင့် တည်ဆောက်ထားသော အာကာသတံခါးပေါက် အတွင်းသို့ ပြေးဝင်သွားသည်ကို ကြည့်ရင်း လင်ချင်းကျူမှာ လုံးဝ ဆွံ့အသွားခဲ့ပြီး သူမ၏ ပါးစပ်လေးမှာ အချိန်အတော်ကြာ ပွင့်ဟနေခဲ့လေသည်။

ကမ္ဘာခြားနတ်ဆိုးနယ်မြေရှိ ကျင့်ကြံသူများ၏ နှလုံးသားထဲတွင် ကြောက်ရွံ့မှုများကို ဖြစ်ပေါ်စေသော မိစ္ဆာအလောင်းများမှာ ဝူယွမ်၏ ဝိညာဉ်ရတနာ အတွင်းသို့ အလွယ်တကူ သိမ်းဆည်းခံလိုက်ရလေတော့သည်။

ထို့အပြင် ၎င်းတို့ကို သူထိန်းချုပ်နိုင်သော စွမ်းအားရပ် တစ်ခု အဖြစ်သို့ပင် ပြောင်းလဲလိုက်သေး၏。

လင်ချင်းကျူသည် ဝူယွမ် ပြောခဲ့သော စကားများကို နောက်ဆုံးတွင် ယုံကြည်သွားခဲ့ချေပြီ။

သူ၏ အခြား လျှို့ဝှက်ချက်များကို ဖယ်ထားလိုက်လျှင်ပင် ဤသောင်းနှင့်ချီသော မိစ္ဆာအလောင်း တပ်မတော် တစ်ခုတည်းကပင် သူတို့နှင့် ကိုးကောင်းကင် တိုင်ချင်းနန်းတော် ကြားရှိ အားကောင်းသည့် အဆင့်မြင့်သိုင်းပညာရှင်များ၏ ကွာဟချက်ကို ဖာထေးပေးနိုင်လေသည်။

တစ်နည်းအားဖြင့် ပြောရလျှင် အကယ်၍ ဝူယွမ်သာ ဝင်စားခြင်းအဆင့် စွမ်းအားကို ပိုင်ဆိုင်ထားပြီး ဤမိစ္ဆာအလောင်း တပ်မတော်ကို ဦးဆောင်မည်ဆိုပါက သူသည် ကိုးကောင်းကင် တိုင်ချင်းနန်းတော် ကိ အလွယ်တကူ ရှင်းလင်းပစ်နိုင်ပေလိမ့်မည်။

“တကယ်လို့ ရုပ်သေးတစ်သောင်းဂိုဏ်းက လူတွေသာ ဒီမြင်ကွင်းကို မြင်လိုက်ရရင် သူတို့ ဘယ်လောက်တောင် ရူးသွပ်သွားကြမလဲ မသိဘူး...”

လင်ချင်းကျူက သူမဘာသာရေရွတ်ရင်း သက်ပြင်းချလိုက်လေသည်။

စူပါဂိုဏ်းကြီး ရှစ်ခုထဲတွင် ရုပ်သေးတစ်သောင်းဂိုဏ်းသည် ဤမိစ္ဆာအလောင်းများကို စိတ်ဝင်စားဆုံး ဖြစ်လေသည်။

ဂိုဏ်းပြိုင်ပွဲအတွက် ကမ္ဘာခြားနတ်ဆိုးနယ်မြေသို့ သူတို့လာတိုင်း မိစ္ဆာအလောင်း တစ်လောင်း၊ နှစ်လောင်းခန့်ကို ပြန်လည်မျှားခေါ်သွားနိုင်ရန် သူတို့ နည်းလမ်း မျိုးစုံဖြင့် ကြိုးစားလေ့ ရှိကြသည်။

အားကောင်းသော ဤမိစ္ဆာ အလောင်းများသည် သောင်းချီရုပ်သေး ဂိုဏ်းတပည့်များအတွက် လင်ချင်းကျူထက်ပင် ပိုမိုဆွဲဆောင်မှု ရှိသည်ဟု ဆိုနိုင်ပေသည်။

ယခုအခါ ဝူယွမ် တစ်ယောက်တည်းကပင် မိစ္ဆာအလောင်း သောင်းနှင့်ချီ၍ စုဆောင်းထားနိုင်ခဲ့ချေပြီ။

ဤသည်မှာ မရေမတွက်နိုင်သော ရုပ်သေးတစ်သောင်းဂိုဏ်း တပည့်များ အိပ်မက်ထဲတွင်သာ မြင်နိုင်သော မြင်ကွင်းတစ်ခုပင် ဖြစ်လေသည်။

သုံးနာရီခန့်အကြာတွင် ဝူယွမ်၏ လမ်းညွှန်မှုအောက်၌ တောက်လောင်ခြင်း နေမင်းမသေမျိုးဂိုဏ်း အပျက်အစီးများကြားရှိ မိစ္ဆာအလောင်းများ အားလုံးမှာ မဟာရှေးဟောင်းတောရိုင်းကျောက်တိုင် အတွင်းသို့ ဝင်ရောက်သွားကြလေသည်။

မိစ္ဆာအလောင်းများ လျော့နည်းသွားသည်နှင့်အမျှ ဤနေရာရှိ စွမ်းအင်လှိုင်းဂယက်များမှာ သိသိသာသာ အားနည်းသွားခဲ့ပြီး ကမ္ဘာခြားနတ်ဆိုး စွမ်းအင်များမှာလည်း အကြီးအကျယ် လျော့ကျသွားခဲ့၏။

သို့သော်ငြားလည်း ၎င်းမှာ သိပ်သည်းနေဆဲပင် ဖြစ်သည်။

“ဂျီး၊ ဂျီး၊ ဂျီး...”

မည်းမှောင်နေသော ကမ္ဘာခြားနတ်ဆိုးစွမ်းအင်များ အတွင်းမှ ထူးဆန်းပြီး မကောင်းဆိုးဝါးဆန်သော အသံတစ်ခု ထွက်ပေါ်လာခဲ့လေသည်။

“ဒီအထဲမှာ အသက်ရှင်နေသေးတဲ့ ကမ္ဘာခြားနတ်ဆိုးတွေ တကယ်ကြီး ရှိနေတာပဲ...”

အဘိုးအိုဟွမ်က အံ့ဩတကြီး ပြောလိုက်လေသည်။

“ဒီမှာ စွမ်းအင်အတားအဆီး တစ်ခု ရှိတယ်... အဲ့ဒါက တောက်လောင်နေသော နေမင်းမသေမျိုးဂိုဏ်းရဲ့ အစောင့်အရှောက် အစီအရင် ဖြစ်ရမယ်..."

“အဲဒီ ကမ္ဘာခြားနတ်ဆိုးတွေကို ငါက အစီအရင်ထဲမှာ ပိတ်လှောင်ထားတာဆိုတော့ သူတို့ အပြင်ထွက်လို့ မရဘူးလေ...”

“ဒါပေမယ့် ဒီအစီအရင်ရဲ့ အခြေခံအုတ်မြစ်ကလည်း ကမ္ဘာခြားနတ်ဆိုးစွမ်းအင်တွေရဲ့ တိုက်စားမှုကို ခံနေရတယ်... ဒီကမ္ဘာခြားနတ်ဆိုးတွေ ဖောက်ထွက်မလာခင် ခဏပဲခံနိုင်လိမ့်မယ်၊ အချိန်ကြာကြာ ခံနိုင်တော့မှာ မဟုတ်ဘူး...”

အဘိုးအို တစ္ဆေဖန်ထျန်းက ပေါ်လာပြီး ပြောဆိုလိုက်လေသည်။

ကမ္ဘာသစ်ပင် ကမ္ဘာအတွင်းတွင် ဤကာလအတွင်း ကမ္ဘာသစ်ပင်က ကမ္ဘာခြားနတ်ဆိုးများကို ရူးသွပ်စွာ စုပ်ယူခဲ့မှုကြောင့် လုံလောက်သော စွမ်းအင် ထောက်ပံ့မှုများကို ရရှိခဲ့လေသည်။

အဘိုးအို တစ္ဆေဖန်ထျန်းနှင့် သူ၏ ဖန်ထျန်း ကြေးဝါအိုးကြီးပါ အတိုင်းအတာ တစ်ခုအထိ ပြန်လည်နာလန်ထူလာခဲ့ကြပြီး သူတို့၏ စွမ်းအားများမှာလည်း ယခင်ကထက် များစွာ တိုးတက်လာခဲ့ပြီ ဖြစ်သည်။

မိစ္ဆာစစ်သူကြီးများကို ကိုင်တွယ်ရန်မှာ ပြဿနာ မဟုတ်တော့သဖြင့် ဤကမ္ဘာခြားနတ်ဆိုးများကို ကိုင်တွယ်ရန်မှာ သဘာဝကျကျပင် ပို၍ အားထုတ်စရာ မလိုတော့ပေ။

ကမ္ဘာခြားနတ်ဆိုးဘုရင် တစ်ပါးသည် ပြန်လည်ဝင်စားခြင်းအဆင့်နှင့် ညီမျှလေသည်။

မိစ္ဆာစစ်သူကြီး တစ်ဦးသည် ပြန်လည်မွေးဖွားခြင်းအဆင့် နှင့် ညီမျှလေသည်။

သာမန် ကမ္ဘာခြားနတ်ဆိုး များ အားလုံးမှာမူ ပြန်လည်မွေးဖွားခြင်းအဆင့်၏ အောက်တွင်သာ ရှိကြလေသည်။

အဘိုးအို တစ္ဆေဖန်ထျန်း၏ အမြင့်ဆုံး စွမ်းအားမှာ ပြန်လည်မွေးဖွားခြင်းအဆင့်၏ အထွတ်အထိပ်တွင် ရှိခဲ့ပြီး ဝင်စားခြင်းကို ကျရှုံးခဲ့သော အားကောင်းသည့် သိုင်းပညာရှင် တစ်ဦး ဖြစ်လေသည်။

သူသည် ခြေတစ်လှမ်း ဝင်စားခြင်းအဆင့် အားကောင်းသော သိုင်းပညာရှင် တစ်ဦး ဖြစ်လေသည်။

အဘိုးအိုဟွမ်သည်လည်း အတော်လေး ပြန်လည်နာလန်ထူလာခဲ့ပြီ ဖြစ်သည်။ ဤကမ္ဘာရှိ အဆင့်သုံး နေရာတွင်ရှိသော နတ်ဘုရားရတနာ တစ်ခုအနေဖြင့် ၎င်း၏ ကိုယ်ပိုင် တိုက်ခိုက်ရေး စွမ်းအားမှာ အားမနည်းပေ။

အဆောင်ဘိုးဘေး၏ အသွင်ပြောင်းမှုအပြီးတွင် ၎င်းသည်လည်း ကမ္ဘာခြားနတ်ဆိုးများအပေါ် အားကောင်းသော ဖိနှိပ်နိုင်စွမ်းကို ပိုင်ဆိုင်လာလေသည်။

သူ့အတွက် ဤကမ္ဘာခြားနတ်ဆိုးများကို ကိုင်တွယ်ရန်မှာ ပို၍ပင် လွယ်ကူလှပေသည်။

ထို့ကြောင့် ယခုအခါ ဤကမ္ဘာခြားနတ်ဆိုးများကို မြင်တွေ့ရသောအခါ သူတို့ နှစ်ဦးစလုံးမှာ ဒေါသထွက်မှုနှင့် ဝမ်းသာမှု နှစ်မျိုးစလုံးကို ခံစားနေကြရလေသည်။

မူလက သူတို့၏ ယခင်အတွေးများအရဆိုလျှင် သူတို့ တွေ့မြင်သမျှ ကမ္ဘာခြားနတ်ဆိုးတိုင်းကို သေချာပေါက် သုတ်သင်ပစ်မည် ဖြစ်သော်လည်း ယခုအခါ မတူတော့ပေ... သူတို့၏ အမြင်တွင် ကမ္ဘာခြားနတ်ဆိုးများသည် ယခုအခါ စွမ်းအင်ဘက်ထရီများ ဖြစ်နေကြပြီ ဖြစ်သည်။

အသက်ရှင်နေသော ကမ္ဘာခြားနတ်ဆိုး များကို မြင်တွေ့ရခြင်းက ရတနာ တစ်ခုကို မြင်တွေ့ရသည်နှင့် တူလေသည်။

“မလောပါနဲ့... ဒီကမ္ဘာခြားနတ်ဆိုးတွေ ထွက်ပြေးမသွားအောင် တားဆီးဖို့အတွက် အစီအရင်ကို မဖျက်ဆီးခင် ဒီနေရာကို လုံးဝ လွှမ်းခြုံထားလိုက်ကြရအောင်...”

အဘိုးအိုဟွမ်က ဖြည်းညင်းစွာ ပြောလိုက်ပြီး အဘိုးအို တစ္ဆေဖန်ထျန်းကို ခဏစောင့်ရန် ပြောလိုက်လေသည်။

ထို့နောက် ကန္တာရတိမ်တိုက်၊ တံဆိပ်ခတ်တိမ်တိုက်နှင့် အဘိုးအိုဟွမ တို့ ပူးပေါင်းကာ ကမ္ဘာသစ်ပင်၏ သစ်ကိုင်းများကို တောက်လောင်ခြင်း နေမင်းမသေမျိုးဂိုဏ်း၏ အစောင့်အရှောက် အစီအရင် စွမ်းအင်အတားအဆီး ပတ်လည်တွင် ရစ်ပတ်ထားလိုက်ကြလေသည်။

ကမ္ဘာ့သစ်ပင်၏ သစ်ကိုင်းများသည် ကမ္ဘာခြားနတ်ဆိုးစွမ်းအင်များ အားလုံးကို စုပ်ယူနိုင်ပြီး ကောင်းကင်ချိတ်ပိတ်ခြင်း အစီအရင်မြေပုံသည် ကမ္ဘာ့သစ်ပင်၏ သစ်ကိုင်းများကို အားကိုးကာ အပြင်ဘက်တွင် ချိတ်ပိတ်မှု တစ်ခုကို ဖန်တီးနိုင်သဖြင့် မည်သည့် ကမ္ဘာခြားနတ်ဆိုးမျှ မလွတ်မြောက်နိုင်အောင် တားဆီးပေးထားနိုင်လေသည်။

ဤအရာအားလုံး ပြီးစီးသွားပြီးနောက် အဘိုးအို တစ္ဆေဖန်ထျန်းက အစီအရင်ကို စတင် ဖျက်ဆီးလိုက်လေသည်။

သူ၏ အစီအရင်ဖျက်ဆီးသည့် နည်းလမ်းမှာ မည်သည့် ကျွမ်းကျင်မှုမျှ မပါဝင်ချေ။

ဝူယွမ်က သူ့အတွက် အစီအရင်၏ အားနည်းသော နေရာတစ်ခုကို ရှာဖွေပေးလိုက်ပြီးနောက် သူက အစီအရင်ကို အင်အားသုံးဖျက်ဆီးသည့် နည်းလမ်းကို အသုံးပြုကာ ဖန်ထျန်း ကြေးဝါအိုးကြီးကို တိုက်ရိုက် ထိန်းချုပ်ပြီး ထိုအမှတ်ဆီသို့ ဘန်းခနဲ ဝင်တိုက်လိုက်လေသည်။

“ဘန်း...”

ကျယ်လောင်သော ပေါက်ကွဲသံကြီး တစ်ခုနှင့်အတူ စွမ်းအင်အတားအဆီးမှာ ချက်ချင်းပင် အမှုန့်ဖြစ်သွားခဲ့လေသည်။

“ဂျီး၊ ဂျီး၊ ဂျီး...”

အမှောင် ကမ္ဘာခြားနတ်ဆိုး စွမ်းအင်များမှာ လှိုင်းတံပိုးများအလား ထွက်ပေါ်လာပြီး အမှောင်ထဲရှိ ဝေဝါးပြီး ထူးဆန်းသော သတ္တဝါ အချို့က အဘိုးအို တစ္ဆေဖန်ထျန်းကို တိုက်ခိုက်လာကြလေသည်။

“ဖန်ထျန်း အစီအရင်...”

သို့သော် အဘိုးအို တစ္ဆေဖန်ထျန်းမှာ ကြောက်ရွံ့ခြင်း အလျဉ်းမရှိ၊ ပြုံးပင် ပြုံးနေခဲ့သေး၏။

သူက ဖန်ထျန်း ကြေးဝါအိုးကြီး ကို ထုတ်လွှတ်လိုက်ရာ အနီရင့်ရောင် ကြေးဝါအိုးကြီးမှာ လေထဲတွင် လျင်မြန်စွာ ကျယ်ပြန့်လာခဲ့လေသည်။

သိပ်သည်းလှသော မီးတောက်များက ကြေးဝါအိုးမှ ပေါက်ကွဲထွက်လာပြီး ဧရိယာတစ်ခုလုံးကို လင်းထိန်သွားစေခဲ့သည်။

“အဘိုးကြီး... ဖြည်းဖြည်းလုပ်အုံး၊ ဒီကမ္ဘာခြားနတ်ဆိုးတွေကို အကုန် သတ်မပစ်နဲ့ဦးနော်...”

ဟွမ်၏အသံ ထွက်ပေါ်လာပြီး အဘိုးအို တစ္ဆေဖန်ထျန်းကို သတိပေးလိုက်လေသည်။

သူတို့၏ ရည်ရွယ်ချက်မှာ ဤကမ္ဘာခြားနတ်ဆိုးများကို သုတ်သင်ပစ်ရန်သာမက ကမ္ဘာသစ်ပင်အတွက် စွမ်းအင်များ ထောက်ပံ့ပေးရန်လည်း ဖြစ်လေသည်။

“ဟားဟား၊ ငါ သိပါတယ်ကွ...”

အဘိုးအို တစ္ဆေဖန်ထျန်းက ကျယ်လောင်စွာ ရယ်မောလိုက်ပြီးနောက် သူ၏ လက်ကို အနည်းငယ် ဖော့လိုက်ကာ သူတို့ကို ဖိနှိပ်ရုံသာ ဖိနှိပ်ထားလိုက်လေသည်။

တစ်ချိန်က ကမ္ဘာခြားနတ်ဆိုးများ ကျူးကျော်ဝင်ရောက်လာစဉ်အတွင်း သူတို့သည် အလွန်ခက်ခဲစွာ ခုခံခဲ့ကြရပြီး တိုက်ကြီးတစ်ခုလုံးရှိ သက်ရှိများမှာ ကမ္ဘာခြားနတ်ဆိုးများ၏ ဝါးမျိုခြင်းကို ခံခဲ့ရလေသည်။

သူတို့သည် ကမ္ဘာခြားနတ်ဆိုးများကို အသုံးမချနိုင်ခဲ့ရုံသာမက ထိုကမ္ဘာခြားနတ်ဆိုး များ သေဆုံးသွားပြီးနောက်တွင်ပင် အခြားသူများကို တိုက်စားနိုင်စွမ်း ရှိနေသေးပြီး အသက်ရှင်နေသော လူများကို မိစ္ဆာအလောင်းများ အဖြစ်သို့ ပြောင်းလဲပစ်ခဲ့သည်။

ယခုအခါ ကမ္ဘာခြားနတ်ဆိုးများအပေါ် သူတို့ လက်စားချေနိုင်ရန် အခွင့်အရေး တစ်ခု နောက်ဆုံးတွင် ရရှိလာခဲ့ချေပြီ။

သူတို့သည် ကမ္ဘာခြားနတ်ဆိုးများကို ကျင့်ကြံခြင်း အရင်းအမြစ်များ အဖြစ်လည်း အသုံးပြုနိုင်ပြီ ဖြစ်သည်။

ဝူယွမ်သည်လည်း စစ်မြေပြင်ကို ဝင်ရောက်လာပြီး ကမ္ဘာခြားနတ်ဆိုး များကို ဖိနှိပ်ရာတွင် ကူညီပေးခဲ့လေသည်။

ဤကမ္ဘာခြားနတ်ဆိုးများက မည်သည့်အရာများလဲ ဆိုသည်ကို သူ မြင်တွေ့ချင်နေခဲ့၏။

အဘိုးအို တစ္ဆေဖန်ထျန်းက ဝူယွမ်၏ ပါဝင်လာမှုကို မတားဆီးခဲ့ပေ... ဝူယွမ်၏ စွမ်းအားကို သူ သိထားလေသည်။

ဆန်းကြယ်ရှင်ခြင်းနှင့်သေခြင်း အားကောင်းသော သိုင်းပညာရှင်များမှာ ဝူယွမ်ကို သတ်ဖြတ်ရန်မှာ ခက်ခဲလှပေလိမ့်မည်။

ထို့အပြင် ဤကမ္ဘာခြားနတ်ဆိုးများမှာ နှစ်ပေါင်းများစွာကြာ ဖိနှိပ်ခံထားရပြီး သူတို့၏ စွမ်းအားများမှာလည်း ယခင်ကလို မဟုတ်တော့ပေ... သူတို့ထဲမှ အားအကောင်းဆုံးသူပင်လျှင် ဆန်းကြယ်သေခြင်းအဆင့်တွင် မရှိတော့ချေ။

အမှောင် ကမ္ဘာခြားနတ်ဆိုးစွမ်းအင်များက ဝူယွမ်ထံသို့ လှိုင်းတံပိုးများအလား တိုးဝင်လာခဲ့၏။

သူ မည်သည့်အရာကိုမျှ ရှင်းလင်းစွာ မမြင်ရဘဲ ကမ္ဘာခြားနတ်ဆိုးစွမ်းအင်များ အတွင်းရှိ ထူးဆန်းသော ဧရာမလက်တစ်စုံက သူ၏ နှလုံးသားဆီသို့ လှမ်းလာနေသည်ကိုသာ သူ ခံစားလိုက်ရလေသည်။

ဝူယွမ်၏ ကြီးစိုးသူ သွေးများ ဆူပွက်လာပြီး လက်သီးတစ်ချက် ပစ်သွင်းလိုက်လေသည်။

အခန်း (၃၀၀) - နေရောင်ခြည်သလင်းကျောက်ကို ထုတ်ယူခြင်း(၂)

“အား...”

စူးရှသော အော်ဟစ်သံ တစ်ခုနှင့်အတူ ဝူယွမ်၏ လက်သီးနှင့် ပေါင်းစပ်သွားသော အာဏာရှင်ဆန်သည့် စွမ်းအားတစ်ခု ထွက်‌ပေါ်လာခဲ့လေသည်။

ထိုစွမ်းအားက ကမ္ဘာခြားနတ်ဆိုးစွမ်းအင်များ အတွင်းရှိ ဧရာမလက်မည်းကြီးများကို ပြန့်ကျဲသွားစေပြီး ခရမ်းရောင် မီးတောက်များဖြင့် လောင်ကျွမ်းသွားခဲ့လေသည်။

“ကောင်းတယ် ကောင်လေး... မင်းရဲ့ သွေးစွမ်းအင်တိုက်ခိုက်မှုက ကမ္ဘာခြားနတ်ဆိုးတွေအပေါ် အရမ်း ထိရောက်တာပဲ...” အဘိုးအို တစ္ဆေဖန်ထျန်းက အံ့ဩတကြီး ပြောလိုက်လေသည်။

အဆင့်တူ ထိပ်တိုက်တိုက်ပွဲတစ်ခုတွင် လူသားများအနေဖြင့် ကမ္ဘာခြားနတ်ဆိုး များအပေါ် အသာစီးရရန် ခက်ခဲလှပေသည်။

သို့သော် ယခုအခါ ဝူယွမ်မှာ ကမ္ဘာခြားနတ်ဆိုးများအတွက် အကြောက်ရဆုံး ရန်သူ တစ်ဦးအလား ဖြစ်နေခဲ့၏... သူ၏ လက်သီးက ကမ္ဘာခြားနတ်ဆိုးများ၏ ခန္ဓာကိုယ်များကိုပင် လောင်ကျွမ်းသွားစေခဲ့သည် မဟုတ်လော။

“အာဏာရှင်သွေးက ကမ္ဘာခြားနတ်ဆိုးတွေအပေါ် ဖိနှိပ်နိုင်တဲ့ အာနိသင် ရှိတယ်...”

ဝူယွမ်က တီးတိုးရေရွတ်လိုက်လေသည်။

ဤကမ္ဘာခြားနတ်ဆိုးများမှာ မကောင်းဆိုးဝါးဆန်ပြီး အေးစက်ကာ နှစ်ပေါင်းများစွာ အမှောင်ထဲတွင် နေထိုင်ခဲ့ကြသူများဖြစ်သည်။

သူ၏ အာဏာရှင်သွေးမှာမူ အလွန်အမင်း ယန်ဓာတ်ပြင်းထန်ပြီး အလျှော့မပေးတတ်သလို၊ ယှဉ်ပြိုင်၍ မရနိုင်လောက်အောင် ကြီးစိုးနိုင်သည့် အားကောင်းသော ဆန္ဒတစ်ခုကိုလည်း ပိုင်ဆိုင်ထားလေသည်။

သူ၏ ဂုဏ်သတ္တိများမှာ ကမ္ဘာခြားနတ်ဆိုးများ၏ ဂုဏ်သတ္တိများနှင့် ဆန့်ကျင်ဘက် ဖြစ်နေခဲ့၏။

လင်ချင်းကျူသည်လည်း တိုက်ပွဲတွင် ပါဝင်လာခဲ့လေသည်။ သူမထံတွင် ကမ္ဘာခြားနတ်ဆိုးစွမ်းအင်များ အတွင်းရှိ ကမ္ဘာခြားနတ်ဆိုးများ၏ လှုပ်ရှားမှုများကို မြင်တွေ့နိုင်စွမ်းရှိသည့် ထက်မြက်သော အာရုံခံနိုင်စွမ်း ရှိလေသည်။

သူမ၏ ယွမ်စွမ်းအင်မှာလည်း အထူး သန့်စင်ပေးနိုင်သော အာနိသင် ရှိပြီး ကမ္ဘာခြားနတ်ဆိုးများက သူမ အနီးသို့ ချဉ်းကပ်ရန် ဆန္ဒမရှိကြချေ။

ဝူယွမ်နှင့် အခြားနှစ်ဦးတို့က ပြန့်ကျဲနေသော ကမ္ဘာခြားနတ်ဆိုးများကို ဖိနှိပ်နေစဉ် ဟွမ်နှင့် ကန္တာရတိမ်တိုက်တို့သည်လည်း အတွင်းရှိ ကမ္ဘာခြားနတ်ဆိုး စွမ်းအင်များကို စုပ်ယူရန် ကမ္ဘာသစ်ပင်၏ သစ်ကိုင်းများကို ထိန်းချုပ်နေခဲ့ကြလေသည်။

ကမ္ဘာခြားနတ်ဆိုးစွမ်းအင်များ အားနည်းသွားသည်နှင့်အမျှ အမှောင်ပုံရိပ် တစ်ဒါဇင်ကျော် နောက်ဆုံးတွင် ပေါ်လာခဲ့သည်... သူတို့မှာ ကမ္ဘာခြားနတ်ဆိုးများပင် ဖြစ်လေသည်။

သူတို့၏ အနှစ်သာရမှာ ကမ္ဘာခြားနတ်ဆိုးစွမ်းအင် အစုအဝေး တစ်ခု၊ တစ်နည်းအားဖြင့် နတ်ဆိုးမျိုးစေ့ တစ်ခုမျှသာ ဖြစ်ပြီး ရုပ်ပိုင်းဆိုင်ရာ ခန္ဓာကိုယ်မှာ သူတို့အတွက် မလိုအပ်သော အရာတစ်ခု ဖြစ်လေသည်။

“ဖန်ထျန်း ကြေးဝါအိုးကြီး ချိတ်ပိတ်လိုက်...”

အဘိုးအိုဖန်ထျန်းက အော်ဟစ်လိုက်ပြီးနောက် ဖန်ထျန်း အစီအရင်ကို ဖြန့်ကျက်လိုက်လေသည်။ ဧရာမ ကြေးဝါအိုးကိုယ်ထည်က လေဟာနယ်ကို လွှမ်းခြုံသွားခဲ့၏။

ဝူယွမ်နှင့် လင်ချင်းကျူတို့ ချက်ချင်း နားလည်သွားကြပြီး ထွက်ပြေးရန် ကြိုးစားနေသော ပြန့်ကျဲနေသည့် ကမ္ဘာခြားနတ်ဆိုး များကို ကြေးဝါအိုးအတွင်းသို့ မြှားခေါ်သွားကြလေသည်။

အချိန်တိုလေး အတွင်းမှာပင် ကမ္ဘာခြားနတ်ဆိုး အကောင်ငယ်လေးများ အားလုံးမှာ ဖန်ထျန်း ကြေးဝါအိုးကြီးအတွင်းသို့ ဖိနှိပ် ချိတ်ပိတ်ခံလိုက်ရလေတော့သည်။

မိစ္ဆာစစ်သူကြီးတစ်ဦးနှင့် နှိုင်းယှဉ်လျှင် ဤကမ္ဘာခြားနတ်ဆိုး များမှာ အလွန်အမင်း အားနည်းလွန်းလှပေသည်။

သို့သော် လင်ချင်းကျူအတွက်လည်း မလွယ်ကူခဲ့ပေ။ ဤကမ္ဘာခြားနတ်ဆိုးများမှာ နှစ်ပေါင်းများစွာကြာ ဖိနှိပ် ချိတ်ပိတ်ခံထားရသဖြင့် အားနည်းသွားခဲ့ပြီ ဖြစ်သော်လည်း သူတို့သည် သာမန် ဆန်းကြယ်ရှင်ခြင်းအဆင့် အားကောင်းသော သိုင်းပညာရှင်များ ကိုင်တွယ်နိုင်မည့် သူများ မဟုတ်သေးချေ။

အကယ်၍ လင်ချင်းကျူသာ ဝိညာဉ်တံဆိပ်ကို ယခုလေးတင် ရရှိထားခြင်း မဟုတ်ဘဲ သူမ၏ ကိုယ်ပိုင် ယွမ်စွမ်းအင်က ဖိနှိပ်နိုင်သည့် အာနိသင် အချို့ ရှိမနေပါက သူမ တိုက်ပွဲတွင် ပါဝင်နိုင်ခဲ့မည် မဟုတ်ပေ။

“ဟူး...”

သူတို့နှစ်ဦးလုံးက ခပ်ဖွဖွ အသက်ရှူလိုက်ကြလေသည်။

“နောက်ဆုံးတော့ ပြီးသွားပြီ...”

“ဒါက ငါတို့ ပထမဆုံးအကြိမ် အတူတူ တိုက်ပွဲဝင်တာလို့ ပြောလို့ရတယ် မဟုတ်လား...”

ဝူယွမ်က လင်ချင်းကျူကို ကြည့်ကာ ပြောလိုက်လေသည်။

“ကျွန်မတို့ နေထိုင်တဲ့ ကမ္ဘာကြီးမှာ ဒီလောက်များပြားတဲ့ ကမ္ဘာခြားနတ်ဆိုးတွေ ဖုံးကွယ်နေလိမ့်မယ်လို့ ကျွန်မ တစ်ခါမှ မတွေးဖူးခဲ့ဘူး...” လင်ချင်းကျူက စိတ်လှုပ်ရှားစွာဖြင့် ပြောလိုက်လေသည်။

ဤကာလတွင် ဝူယွမ်နှင့်အတူ လှုပ်ရှားနေစဉ် အချိန်များအတွင်း ကောင်းကင်နှင့် မြေပြင် စစ်ပွဲကြီး၏ အမှန်တရားကိုလည်း သူမသိရှိခဲ့ရပြီး သူတို့၏ ကမ္ဘာကြီးမှာ မလုံခြုံကြောင်းနှင့် အဘိုးအို တစ္ဆေဖန်ထျန်းကဲ့သို့သော စီနီယာများ၏ စတေးမှုများက ဤငြိမ်းချမ်းရေးကို သူတို့အတွက် အသက်နှင့်လဲ၍ ဝယ်ယူပေးခဲ့ခြင်း ဖြစ်ကြောင်းကို သူမ သိရှိသွားခဲ့လေသည်။

သို့သော် ယခုအခါ ကမ္ဘာခြားနတ်ဆိုးများ ပြန်လည်အားကောင်းလာမည့် ဖြစ်နိုင်ခြေ ရှိနေသေးပြီး လက်ရှိတိုက်ကြီးတွင် အဆောင်ဘိုးဘေး ကဲ့သို့သော အားကောင်းသည့် သိုင်းပညာရှင်များလည်း မရှိတော့ပေ။

အဘိုးအို တစ္ဆေဖန်ထျန်းနှင့် အဘိုးအိုဟွမ်တို့၏ လုပ်ရပ်များမှတစ်ဆင့် သူတို့က ဝူယွမ်ကို ကယ်တင်ရှင် အသစ် တစ်ဦးအဖြစ် မြင်ထားကြောင်းကို လင်ချင်းကျူ မြင်တွေ့နိုင်ခဲ့ပြီး ထို့ကြောင့်ပင် သူတို့က သူ့နောက်သို့ လိုက်ကာ သူ ကြီးထွားလာရန် ကူညီပေးလိုကြခြင်း ဖြစ်သည်ကိုလည်း နားလည်ထာူလေသည်။

ဤသည်ကလည်း ဤကာလအတွင်း လင်ချင်းကျူက ဝူယွမ်အပေါ် ပို၍ သဘောကျလာရခြင်း၏ အကြောင်းရင်းများထဲမှ တစ်ခု ဖြစ်လေသည်...

ဤအမျိုးသားသည် ကမ္ဘာကြီးကို ကယ်တင်ရမည့် ကြီးလေးသော တာဝန်ကို ထမ်းပိုးထားသူ ဖြစ်နေချေသည်။

“တောက်လောင်ခြင်း နေမင်းမသေမျိုးဂိုဏ်း... ဒီလောက်တောင် ယိုယွင်းပျက်စီးနေတဲ့ အခြေအနေကို ရောက်သွားတာပဲ... အဲဒီအချိန်တုန်းက ဘယ်လောက်တောင် အဖြစ်ဆိုးခဲ့မလဲ...”

အဘိုးအို တစ္ဆေဖန်ထျန်းက ဖန်ထျန်း ကြေးဝါအိုးကြီးကို သိမ်းဆည်းလိုက်ပြီး လေထုထဲတွင် ပျံဝဲနေကာ စိတ်လှုပ်ရှားစွာဖြင့် သက်ပြင်းချလိုက်လေသည်။

ဤအချိန်တွင် ဝူယွမ်နှင့် လင်ချင်းကျူတို့သည်လည်း ပတ်ဝန်းကျင် မြင်ကွင်းကို သတိပြုမိသွားကြလေသည်။ အမှောင်ထု ဆုတ်ခွာသွားပြီးနောက် ရှေးကျကာ ပျက်စီးနေသော မြင်ကွင်းတစ်ခုက သူတို့၏ မျက်စိရှေ့တွင် ပေါ်လာခဲ့၏။

ကျိုးပဲ့နေသော ဧရာမခန်းမကြီးများ၊ ပြိုလဲနေသော အဆောက်အအုံများ၊ ပြိုကျနေသော နံရံများနှင့် ယိုယွင်းနေသော အပျက်အစီးများ... လုံးဝ သဲကန္တာရ အပျက်အစီး တစ်ခုပင် ဖြစ်လေသည်။

‘ရှေးကျတယ်၊ အေးစက်တယ်၊ မကောင်းဆိုးဝါးဆန်တယ်...’

တစ်ချိန်က အားကောင်းခဲ့သော ဤဂိုဏ်းကြီးသည် ကောင်းကင်နှင့် မြေပြင် စစ်ပွဲကြီးတွင် ဖျက်ဆီးခံခဲ့ရပြီး ကမ္ဘာခြားနတ်ဆိုးစွမ်းအင်များ၏ တိုက်စားမှုကြောင့် လုံးဝ မမှတ်မိနိုင်အောင် ဖြစ်သွားခဲ့လေသည်။

“မြေအောက်ထဲမှာ ပြင်းထန်တဲ့ မီးတောက်တွေ ရှိနေတယ်...”

ဟွမ်က သူတို့ကို သတိပေးလိုက်လေသည်။

ဝူယွမ်နှင့် အခြားသူများက မြေအောက်ကို အာရုံခံရန် သူတို့၏ ဝိညာဉ်စွမ်းအင်များကို လျင်မြန်စွာ ဖြန့်ကျက်လိုက်ကြ၏။

သူတို့ထင်ထားသည့်အတိုင်းပင် မြေကြီးအောက်တွင် ပူပြင်းသော စွမ်းအင်တစ်ခု ရှိနေခဲ့သည်။

အဘိုးအို တစ္ဆေဖန်ထျန်းက ပြောလိုက်၏။ “ဒီလောက် ကြီးမားတဲ့ တောက်လောင်ခြင်း နေမင်းမသေမျိုးဂိုဏ်းမှာ အဲဒီ အကောင်ငယ်လေးတွေ ဖြစ်တဲ့ ကမ္ဘာခြားနတ်ဆိုးတွေလောက်ပဲ ရှိနေမှာ မဟုတ်ဘူးလေ...”

“အဲဒီအချိန်တုန်းက မိစ္ဆာစစ်သူကြီး ဒါဇင်ပေါင်းများစွာက ဒီနေရာကို တိုက်ခိုက်ခဲ့ကြတာ... အောက်ဘက်မှာ အရေးကြီးတဲ့ အရာတစ်ခု ရှိလောက်တယ်...”

“ဒီပူပြင်းတဲ့ စွမ်းအင်တွေက အဲဒီ နေရောင်ခြည်အပိုင်းအစ ဆီကနေ လာတာပဲ ဖြစ်ရမယ်...”

“အောက်ဘက်က မိစ္ဆာစစ်သူကြီးတွေကို မလွှတ်ပေးမိအောင် ငါတို့ သတိထားဖို့ လိုမယ်၊ မဟုတ်ရင် ငါတို့အတွက် အကျိုးအမြတ်ထက် ဆုံးရှုံးမှုက ပိုများသွားလိမ့်မယ်...”

သူ၏ မျက်နှာအမူအရာမှာ လေးနက်နေခဲ့၏။

ယခုအခါ မဟာရှေးဟောင်းတောရိုင်းကျောက်တိုင်သည် ဘုရင်နှစ်ပါးနှင့် စစ်သူကြီးတစ်ဦးကို ဖိနှိပ်ထားနိုင်သော်လည်း ၎င်းက သူတို့ မိစ္ဆာစစ်သူကြီး တစ်ဦးကို ကိုင်တွယ်နိုင်ပြီဟု ဆိုလိုခြင်း မဟုတ်ပေ။

ထိုသူများမှာ ချိတ်ပိတ်ခံထားရပြီး သူတို့၏ စွမ်းအားများကို အပြည့်အဝ ထုတ်လွှတ်နိုင်ခြင်း မရှိပေ။

ကျန်သည့် ကိစ္စများကိုတော့ မဟာရှေးဟောင်းတောရိုင်းကျောက်တိုင်ကိုသာ လွှဲထားလိုက်ရတော့ပေမည်။

၎င်း၏ ကျောက်တိုင်ကိုယ်ထည်က မြေကြီးထဲသို့ တိုက်ရိုက် ထိုးစိုက်ဝင်ရောက်သွားခဲ့၏။

ထို့နောက် ကျောက်တိုင်ကိုယ်ထည်ကို ဗဟိုပြု၍ ကမ္ဘာသစ်ပင်၏ အမြစ်များက ပြန့်နှံ့သွားပြီး ကောင်းကင်ချိတ်ပိတ်ခြင်း အစီအရင်မြေပုံကလည်း ကမ္ဘာ့သစ်ပင်၏ အမြစ်များနှင့်အတူ ယှက်နွယ် ပြန့်နှံ့သွားခဲ့လေသည်။

လက်ရှိ ကောင်းကင်ချိတ်ပိတ်ခြင်း အစီအရင်မြေပုံသည် ဘိုးဘေးအဆောင် တစ်ခုအဖြစ် အဆင့်မြှင့်တင်နေသည့် လုပ်ငန်းစဉ်တွင် ရှိနေပြီ ဖြစ်သည်။

၎င်းမှာ ဘိုးဘေးအဆောင် တစ်ခုနှင့် မယှဉ်ပြိုင်နိုင်သေးသော်လည်း အများကြီး ကွာခြားနေခြင်းတော့ မရှိတော့ပေ။

ကောင်းကင်ချိတ်ပိတ်ခြင်း အစီအရင်မြေပုံအပြင် ဝါးမျိုခြင်းဘိုးဘေးအဆောင်လည်း ရှိနေသေး၏။

ကမ္ဘာသစ်ပင်တွင် တွယ်ကပ်နေသော ဝါးမျိုခြင်းစွမ်းအားသည် ကမ္ဘာခြားနတ်ဆိုး စွမ်းအင်များကို အဆက်မပြတ် ဝါးမျိုနိုင်ပြီး ၎င်းတို့ကို ကမ္ဘာသစ်ပင် လိုအပ်သော စွမ်းအင်များ အဖြစ်သို့ ပြောင်းလဲပေးနိုင်လေသည်။

ဤအတက်အကျက မြေအောက်ရှိ ကမ္ဘာခြားနတ်ဆိုးများအား ချိတ်ပိတ်သည့် လုပ်ငန်းစဉ်ကို အရှိန်မြှင့်ပေးလိမ့်မည် ဖြစ်သည်။

ကမ္ဘာသစ်ပင်က ရူးသွပ်စွာ ပြန့်နှံ့သွားပြီး တောက်လောင်ခြင်း နေမင်းမသေမျိုးဂိုဏ်း တစ်ခုလုံး၏ မြေပေါ်မြေအောက် နှစ်နေရာလုံးတွင် ပြည့်နှက်သွားခဲ့လေသည်။

ဤသို့ဖြင့် နေ့ရက်များ တစ်ရက်ပြီးတစ်ရက် ကုန်လွန်သွားခဲ့၏။

နောက်ဆုံးတွင် သုံးရက်အကြာ၌...

မြေအောက်ရှိ ချိတ်ပိတ်ခံထားရသော လေဟာနယ် အားလုံးမှာ မဟာရှေးဟောင်းတောရိုင်းကျောက်တိုင် အတွင်းသို့ ပြောင်းရွှေ့ခံလိုက်ရချေပြီ။

ဝူယွမ်နှင့် အခြားသူများကို ထိတ်လန့်သွားစေသည်မှာ တောက်လောင်ခြင်း နေမင်းမသေမျိုးဂိုဏ်း အောက်ရှိ မဟာအစီအရင်ကြီး အတွင်း၌ မိစ္ဆာစစ်သူကြီး ခုနစ်ဦးနှင့် ကမ္ဘာခြားနတ်ဆိုး သောင်းနှင့်ချီ၍ ချိတ်ပိတ်ခံထားရခြင်း ဖြစ်လသည်။

ဤမျှ များပြားလှသော ကမ္ဘာခြားနတ်ဆိုးများ ရုတ်တရက် တိုးလာခြင်းကဟွမ်၊ ကန္တာရတိမ်တိုက်နှင့် တံဆိပ်ခတ်တိမ်တိုက် တို့အတွက်လည်း အနည်းငယ် ခက်ခဲလှပေသည်။

တံဆိပ်ခတ်တိမ်တိုက်၏ ပင်မကိုယ်ထည်မှာ အချိန်တိုအတွင်း ရုန်းထွက်နိုင်မည် မဟုတ်ဘဲ ဤကြီးမားလှသော ကမ္ဘာခြားနတ်ဆိုးအုပ်ကြီးကို ချိတ်ပိတ်ရာတွင် အပြည့်အဝ ကူညီပေးရမည် ဖြစ်သည်။

အဘယ်ကြောင့်ဆိုသော် ဟွမ်က ကမ္ဘာခြားနတ်ဆိုးအုပ်ကြီးကို မူလက ချိတ်ပိတ်ထားခဲ့သော ပင်မရတနာဖြစ်သည့် နေရောင်ခြည်အပိုင်းအစကို ပြန်လည် ရယူလိုသောကြောင့်ပင် ဖြစ်သည်။

ဝူယွမ်နှင့် အခြားသူများက ရှေးဟောင်းကျောက်တိုင်နယ်မြေထဲသို့ ရောက်ရှိလာခဲ့ကြ၏။

ဟွမ်နှင့် ကန္တာရတိမ်တိုက်တို့ ထိန်းချုပ်နေသော ကမ္ဘာ့သစ်ပင်၏ သစ်ကိုင်းများ လှိုင်းတံပိုးများအလား ထွက်ပေါ်လာသည်နှင့်အမျှ အနီရင့်ရောင်နှင့် ဧရာမ သလင်းကျောက်ကြီး တစ်ခုကို ကမ္ဘာသစ်ပင်အတွင်းမှ ထုတ်ယူလိုက်လေသည်။

“ဟူး... ဟူး... ဟူး...”

ပူပြင်းလှသော စွမ်းအင်များက အရပ်မျက်နှာ အနှံ့အပြားသို့ ပြန့်နှံ့သွားခဲ့၏။

ဤမီးတောက်များကဲ့သို့ နီရဲနေသော သလင်းကျောက်ကြီးကို ရင်ဆိုင်ရချိန်တွင် ဝူယွမ်နှင့် အခြားသူများမှာ သူတို့၏ ခန္ဓာကိုယ်အတွင်းရှိ အစိုဓာတ်များ လျင်မြန်စွာ အငွေ့ပျံသွားပြီး ရေငတ်လာသည်ကို ခံစားလိုက်ရလေသည်။

သူတို့သည် သူတို့ကိုယ်သူတို့ ကာကွယ်ရန်အတွက် ယွမ်စွမ်းအင်ကို အသုံးပြုရုံမှလွဲ၍ အခြား ရွေးချယ်စရာ မရှိတော့ပေ။

“အဲ့တာကြီးကနေ ထုတ်လွှတ်လိုက်တဲ့ စွမ်းအား တစ်ခုတည်းကတင် သာမန် ဆန်းကြယ်ရှင်ခြင်းအဆင့် အားကောင်းတဲ့ သိုင်းပညာရှင် တစ်ယောက်ထက် ပိုပြီး အားကောင်းနေပြီ... နေရောင်ခြည်အပိုင်းအစ ဆိုတဲ့အတိုင်းပဲ... ထိုက်တန်ပါတယ်” ဝူယွမ်က အံ့ဩတကြီး ရေရွတ်လိုက်လေသည်။

ကမ္ဘာခြားနတ်ဆိုး အမြောက်အမြားကို ယင်းက ဖိနှိပ်ထားနိုင်ခြင်းမှာ အံ့ဩစရာ မဟုတ်တော့ပေ။

ဤနေရောင်ခြည်အပိုင်းအစ၏ ပင်မ အူတိုင်စွမ်းအင်မှာ ဝင်စားခြင်းအဆင့် အားကောင်းသော သိုင်းပညာရှင်များကိုပင် ခြိမ်းခြောက်မှုတစ်ခု ဖြစ်စေနိုင်လောက်ပေသည်။

ကံကောင်းစွာဖြင့် ကမ္ဘာသစ်ပင်က ဤမီးတောက် စွမ်းအားကို မကြောက်ရွံ့ပေ...

ဆန့်ကျင်ဘက်အားဖြင့် ယင်းက ဤစွမ်းအားကို စုပ်ယူနိုင်သေးပြီး နေမင်းထံမှ စွမ်းအင်မှာ ကမ္ဘာသစ်ပင်အတွက် ကြီးမားသော အားဆေး တစ်ခွက်ပင် ဖြစ်လေသည်။

သို့သော် ဤအရာကို ရွှေကျီးကန်းဥ အတွက် ပြင်ဆင်ထားခြင်း ဖြစ်လေသည်။

နေရောင်ခြည်အပိုင်းအစကို ထုတ်ယူလိုက်သည့် အခိုက်အတန့်မှာပင် သစ်ပင်ကြီးပေါ်ရှိ ရွှေကျီးကန်းဥ မှာ တုံ့ပြန်မှုများ ပြသလာခဲ့၏။

၎င်းက နေ၏ စွမ်းအင်ကို အာရုံခံမိပုံရပြီး ဥပေါ်ရှိ ရှုပ်ထွေးလှသော ပုံစံများမှ မှေးမှိန်သော အလင်းတန်း တစ်ခုကို ထုတ်လွှတ်လာခဲ့သည်။

“ဒီနေရောင်ခြည်အပိုင်းအစကို ဥအောက်မှာ ထားလိုက်...” ဝူယွမ်က ပြောလိုက်လေသည်။

ကမ္ဘာသစ်ပင်၏ သစ်ကိုင်းများက ဧရာမမီးတောက်များကဲ့သို့ နီရဲနေသော သလင်းကျောက်ကြီးကို သယ်ဆောင်သွားပြီး မကြာမီမှာပင် ၎င်းကို အခြေခံအုတ်မြစ်အဖြစ် အသုံးပြုကာ သစ်ကိုင်းများ ယှက်နွယ်ပြီး သပ်ရပ်လှပသော ငှက်သိုက်တစ်ခုကို ဖန်တီးလိုက်ကြလေသည်။

ထို့နောက် နောက်ထပ်သစ်ကိုင်းတစ်ခုက ရွှေကျီးကန်းဥကို ရစ်ပတ်ကာ ငှက်သိုက်ထဲသို့ ထည့်ပေးလိုက်၏။

စတင်ထိတွေ့လိုက်သည်နှင့်တစ်ပြိုင်နက် ရွှေကျီးကန်းဥမှာ အနည်းငယ် တုန်ခါသွားပြီး သလင်းကျောက်ကြီးထံမှ အနီရင့်ရောင် အလင်းတန်းများက ရွှေကျီးကန်းဥ အတွင်းသို့ မျက်စိဖြင့် မြင်နိုင်လောက်အောင် လျင်မြန်သော အမြန်နှုန်းဖြင့် စီးဝင်သွားခဲ့လေသည်။

ရွှေကျီးကန်းကိုယ်တိုင်က နေမင်းကို ကိုယ်စားပြုသော အရာတစ်ခုဖြစ်ပြီး ဤစွမ်းအားမှာ ၎င်းနှင့် မူလအစ တူညီလေသည်။

ဥမှာ နိုးထလာတော့မလို ဖြစ်နေပြီး ယင်းပေါ်ရှိ ပုံစံများက တောက်ပသော အလင်းတန်းများ ပေါက်ကွဲထွက်လာခဲ့လေတော့သည်။