အခန်း (၂၃၅-၂၃၆)

အခန်း ၂၃၅

- အပိုင်း ၄၄ - လူလိမ် (၃)

နောက်တစ်နေ့မှစ၍ ယူဂျွန်ဟော့သည် ကောင်းကင်ဖြိုခွင်းဓါး သူတော်စင်နှင့်အတူ လေ့ကျင့်မှုတွင် အာရုံစိုက်နှစ်မြှုပ်နေခဲ့သည်။

ကောင်းကင်ဖြိုခွင်းဓါး သူတော်စင်သည် သူ၏ မျိုးနွယ်စုကို ပြန်လည်ရှာဖွေနိုင်ပြီဟူသော စကားကို ကြားလိုက်ရသည့် အချိန်မှစ၍ တည်ကြည်လေးနက်သော အမူအရာကို ဆက်တိုက်ထိန်းထားခဲ့သည်။ ယူဂျွန်ဟော့သည် ကောင်းကင် ဖြိုခွင်းဓါး သူတော်စင်၏ စိတ်ခံစားချက်ကို သိရှိသော်လည်း ဆရာဖြစ်သူကို နှစ်သိမ့်ပေးမည့်အစား တရားထိုင်ခြင်း၌သာ အာရုံစိုက်နေခဲ့သည်။

'အစကတော့ ငါကိုယ်တိုင် ရှေးဟောင်း ဧရာမ နတ်ဘုရားတွေကို သွားရောက်တွေ့ဆုံဖို့ ရည်ရွယ်ထားတာပါ... ဒါပေမဲ့'

မည်သို့ပင်ဖြစ်စေ ဤကိစ္စကို ကင်ဒေါ့ဂျာလက်ထဲ အပ်ထားလိုက်ခြင်းမှာ မဆိုးလှပေ။ အကယ်၍ ယူဂျွန်ဟော့သာ သူ၏ မူလအစီအစဉ်အတိုင်း ဆက်သွားမည်ဆိုပါက ရှေးဟောင်း ဧရာမ နတ်ဘုရားတစ်ပါးနှင့် တွေ့ဆုံနိုင်ရန်အတွက် ဇာတ်ဝင်ခန်းပေါင်း ၄၀ကို ကျော်ဖြတ်ရမည် ဖြစ်သည်။

'အဲဒီကောင်က ငရဲပြည်နဲ့ အဲဒီလို ပတ်သက်မှုမျိုး ရှိနေလိမ့်မယ်လို့ ငါမထင်ထားခဲ့ဘူး'

ကင်ဒေါ့ဂျာတွင် အမှန်တကယ်ပင် နားမလည်နိုင်သော အချက်များ ရှိနေခဲ့သည်။ သူသည် ထိုနက္ခတ်များအားလုံးကို မည်သို့သော နည်းလမ်းဖြင့် ဖမ်းစားနိုင်ခဲ့သနည်း။

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က ရယ်မောနေပါသည်။]

ဒီနတ်ခေါင်ချုပ်ကိုသာ ကြည့်လိုက်တော့။

‘မိစ္ဆာကဲ့သို့ မီးလျှံတရားစီရင်သူ’ သည် ဒုတိယအကြိမ်မြောက် နောက်ပြန်ဆုတ်ခြင်းတုန်းက ယခုကဲ့သို့သော နက္ခတ်မျိုး မဟုတ်ခဲ့ပေ။ ‘မိစ္ဆာကဲ့သို့ မီးလျှံတရားစီရင်သူ’သည် တရားမျှတမှုနှင့် ပြည့်ဝပြီး တည်ကြည်မြင့်မြတ်လှသော နတ်ခေါင်ချုပ်တစ်ဦးသာ ဖြစ်ခဲ့သည်။ ထိုကဲ့သို့သော တည်ရှိမှုမျိုးက ယခုအကြိမ်တွင် အဘယ်ကြောင့် ဤမျှအထိ ပျက်စီးသွားရသည်ကို ယူဂျွန်ဟော့ နားမလည်နိုင်အောင် ဖြစ်နေရသည်။

"နင် တကယ်ပဲ ပြိုင်ပွဲမှာ ပါဝင်ဖို့ စဉ်းစားနေတာလား"

ကောင်းကင်ဖြိုခွင်းဓါး သူတော်စင်၏ မေးခွန်းကို ယူဂျွန်ဟော့က တိတ်ဆိတ်စွာ ခေါင်းညိတ်ပြလိုက်သည်။

"နင် သေသွားနိုင်တယ်နော်။ ပြိုင်ပွဲ ဇာတ်ဝင်ခန်းတွေဆိုတာ ဘယ်တော့မှ မလွယ်ကူဘူး"

"ကျနော်က ပြီးခဲ့တဲ့ အကြိမ်တုန်းက ဒီအချိန်မှာ ရှိခဲ့တဲ့ ကျနော့်ထက် အများကြီး ပိုအစွမ်းထက်နေပါပြီ"

"ဒါတောင်မှ မဟာသခင်ကြီး ၁၀ ပါးနဲ့ ယှဉ်နိုင်တဲ့ အဆင့်မှာ မရှိသေးဘူး"

ယူဂျွန်ဟော့သည် သိုင်းလောက၏ မဟာသခင်ကြီး ၁၀ ပါး အကြောင်းကို ကောင်းစွာ သိရှိထားသည်။ ၎င်းတို့ထဲမှ တစ်ဦးမှာ ကင်ဒေါ့ဂျာကို ကြိုဆိုခဲ့သော ကုန်သည်ရောင်းချခဲ့သော သိုင်းတွေထဲမှ သိုင်းတစ်ခု၏ပိုင်ရှင် ‘ရေခဲပန်းနတ်ဘုရားမ’ ပင် ဖြစ်သည်။ ထို့အပြင် ကောင်းကင်ဖြိုခွင်းဓါး သူတော်စင်နှင့် အမျိုးဝေးတော်စပ်သည့် နမ်ဂွန် မိသားစုမှ မဟာသခင်ကြီး တစ်ဦးလည်း ရှိနေသေးသည်။ သိုင်းပညာပြိုင်ပွဲ စတင်သည့်အခါ ၎င်းတို့အားလုံး ထွက်ပေါ်လာကြမည်မှာ သေချာ၏။

ထို့အပြင် သိုင်းပညာပြိုင်ပွဲသည် စီးပွားဖြစ် အစီအစဉ်တစ်ခု ဖြစ်သောကြောင့် ပါဝင်ယှဉ်ပြိုင်မည့် နာမည်ကြီး နက္ခတ်များ၏ ကိုယ်စားလှယ်များကိုလည်း သူ ထည့်သွင်းစဉ်းစားရမည် ဖြစ်သည်။

[နက္ခတ်အချို့သည် သိုင်းပညာပြိုင်ပွဲကို မျှော်လင့်စောင့်စား နေကြပါသည်။]

[နက္ခတ်အချို့သည် သိုင်းပညာပြိုင်ပွဲကို ငြီးငွေ့နေကြပါသည်။]

ကံကောင်းထောက်မစွာဖြင့် စွမ်းအားကြီးသော နက္ခတ်အချို့မှာမူ ဤဇာတ်ဝင်ခန်းများကို ငြီးငွေ့နေကြပြီ ဖြစ်သည်။ သိုင်းလောကတွင် နှစ်စဉ် ကျင်းပနေကျ ဇာတ်ဝင်ခန်းတစ်ခု ဖြစ်နေသောကြောင့် သိုင်းပညာပြိုင်ပွဲကို အာရုံစိုက်နေသည့် နက္ခတ်အရေအတွက်မှာ အလွန်အမင်း များပြားခြင်း မရှိပေ။

ကောင်းကင်ဖြိုခွင်းဓါး သူတော်စင်သည် ယူဂျွန်ဟော့၏ ဆန္ဒကို သိမြင်သွားပြီးနောက် စကားစလိုက်သည်။

"နင်ဟာ အဆင့်ကျော်လွန်ခြင်း ဒုတိယအဆင့်ကို ဖွင့်လှစ်ရလိမ့်မယ်"

"ကျနော် အရင်ကလည်း ဖွင့်လှစ်ဖူးတာမလို့ သိပ်ပြီး မခက်လောက်ပါဘူး"

"ဒါက ပထမအဆင့်ကို ဖောက်ထွက်တာနဲ့ မတူဘူးနော်"

"ကျနော် တစ်နည်းနည်းနဲ့ အောင်မြင်အောင်လုပ်ဆောင်ပါ့မယ်။ ပြီးခဲ့တဲ့ အကြိမ်တုန်းက ကျနော် တတိယအဆင့်အထိ ရောက်ရှိခဲ့ဖူးပါတယ်"

"…တတိယအဆင့်ဟုတ်လား"

ကောင်းကင်ဖြိုခွင်းဓါး သူတော်စင်၏ မျက်လုံးများမှာ တုန်လှုပ်သွားခဲ့သည်။ အဆင့်ကျော်လွန်ခြင်း တတိယအဆင့်ဆိုသည်မှာ ပါရမီတစ်ခုတည်းဖြင့် ရောက်ရှိနိုင်သည့် အဆင့်မျိုး မဟုတ်ပေ။ ထိုအဆင့်ကို ကျော်ဖြတ်နိုင်ရန်အတွက် အလွန်အမင်း များပြားလှသော ‘အချိန်’ ကို အသုံးပြုရမည် ဖြစ်သည်။ အခြားတစ်ဖက်တွင်လည်း ယူဂျွန်ဟော့အနေဖြင့် ပြီးခဲ့သည့် အကြိမ်တွင် ထိုမျှလောက် များပြားလှသော အချိန်ကို အသုံးပြုခဲ့နိုင်ရန် အခွင့်အလမ်း မရှိသလောက်ပင်…

ယူဂျွန်ဟော့သည် ဆရာဖြစ်သူ၏ သိချင်စိတ်ကို နားလည်သဖြင့် ပြန်လည်ဖြေကြားလိုက်သည်။

"ကျနော် အမှောင်ဒိုင်မင်းရှင်းထဲမှာ ရှိတဲ့ အချိန်လွဲချော်မှု တစ်ခုကို အသုံးပြုခဲ့တာပါ"

အမှောင်ဒိုင်မင်းရှင်းရှိ အချိန်လွဲချော်မှု။ ၎င်းကို ‘သိုင်းလောက၏ သုသာန်’ ဟုလည်း မကြာခဏ ခေါ်ဆိုကြသည်။ ထိုနေရာသို့ ရောက်သွားသော သိုင်းလောကသား နှစ်မျိုးရှိ၏။ ဧရာမ အချိန်အကျဉ်းထောင်ကြီးအတွင်းတွင် ပါရမီ၏ တံတိုင်းကို တိုက်မိပြီး အရူးဖြစ်သွားသူများ ရှိသကဲ့သို့ ထိုတံတိုင်းကို ကျော်ဖြတ်နိုင်သူများလည်း ရှိသည်။ ယူဂျွန်ဟော့မှာမူ ကျော်ဖြတ်နိုင်သူဖြစ်သည်။

"…နင့်ရဲ့ လေ့ကျင့်မှုက ဘယ်လောက်တောင် ခက်ခဲခဲ့မလဲဆိုတာ ငါ မတွေးဝံ့ဘူး။ နင် အဲဒီထဲမှာ ဘယ်နှနှစ်လောက် နေခဲ့ရတာလဲ"

"နှစ်ပေါင်း ၁၀၀ နီးပါးပါ"

"နှစ် ၁၀၀ အတွင်းမှာ တတိယအဆင့်ကို ရောက်ခဲ့တာပေါ့လေ... နင် အခုလို မောက်မာနေတာလည်း မဆန်းပါဘူး"

နှစ်ပေါင်း ၁၀၀ဆိုသည်မှာ သာမန်လူသားများအတွက် ရှည်လျားသော အချိန်ဖြစ်သော်လည်း အဆင့်ကျော်လွန်သူများအတွက်မူ ထိုသို့မဟုတ်ပေ။

ဤကမ္ဘာပေါ်တွင် အနှစ် ၂၀၀ သို့မဟုတ် ၃၀၀ ခန့် အသက်ရှင်နေထိုင်ပြီး သိုင်းပညာကို မည်မျှပင် လေ့ကျင့်ခဲ့သော်လည်း အဆင့်ကျော်လွန်ခြင်းသို့ မရောက်ရှိနိုင် သူများစွာ ရှိကြ၏။ အဆင့်ကျော်လွန်ခြင်းမှာ မည်သည့် နတ်ဆေးရည်မျိုးဖြင့်မဆို ကိုယ်ခန္ဓာကို မြှင့်တင်ရုံဖြင့် မကျော်လွှားနိုင်သော တံတိုင်းတစ်ခု ဖြစ်သည်။ အဆင့်ကျော်လွန်ခြင်းတွင် ထူထဲသော တံတိုင်းတစ်ခု ရှိနေသော်လည်း ယူဂျွန်ဟော့သည် နှစ်ပေါင်း ၁၀၀ အတွင်းမှာပင် ထိုတံတိုင်းကို သုံးကြိမ်တိုင်တိုင် ဖြတ်ကျော်နိုင်ခဲ့ခြင်း ဖြစ်၏။

"ကျနော် အချိန်လွဲချော်မှုထဲကို နောက်တစ်ကြိမ် ထပ်ဝင်မယ်ဆိုရင် အဲဒီအချိန်ကို လျှော့ချနိုင်ပါလိမ့်မယ်"

"အဲ့ဒါက ရူးသွပ်တဲ့ အတွေးပဲ။ အချိန်လွဲချော်မှုကို အသုံးပြုတာက ဝိညာဉ်ကို ထုံထိုင်းသွားစေလိမ့်မယ်။ အချိန်လွဲချော်မှုထဲမှာ ရူးသွပ်သွားကြတဲ့ သိုင်းပညာရှင်တွေကို နင် မမြင်ဖူးဘူးလား။ ရူးသွပ်ခြင်းနဲ့ အဆင့်ကျော်လွန်ခြင်းကြားမှာ သေးငယ်တဲ့ မျဉ်းတစ်ကြောင်းပဲ ရှိတယ်ဆိုတာ နင် မသိဘူးလား"

"…ပြီးခဲ့တဲ့ အကြိမ်တုန်းကတော့ အချိန်လွဲချော်မှုထဲကို ဝင်ခဲ့ပြီးနောက်ပိုင်းမှာတောင် ကျနော် ခင်ဗျားကို မကျော်နိုင်ခဲ့ပါဘူး"

"ဘယ်ကျော်နိုင်မလဲ။ ငါ့ကို လိုက်မီဖို့အတွက် နှစ် ၁၀၀ ဆိုတာ စောလွန်းပါသေးတယ်"

ကောင်းကင်ဖြိုခွင်းဓါး သူတော်စင်သည် ခေတ္တခဏမျှ တုံ့ဆိုင်းနေပြီးနောက် ပြောလိုက်သည်။

"ဘာပဲဖြစ်ဖြစ်... နင်က တတိယအဆင့်ကို ရောက်ခဲ့ပြီးပြီဆိုတော့ ဘာမှမသိတဲ့လူတစ်ယောက်ကို သင်ပေးရတာထက်စာရင် နင့်ကို သင်ပေးရတာက ပိုကောင်းပါတယ်"

ဆရာဖြစ်သူ၏ ချီးကျူးစကားကို ကြားရသော်လည်း ယူဂျွန်ဟော့၏ အမူအရာမှာမူ သိပ်ပြီး မတောက်ပလှပေ။ ကောင်းကင်ဖြိုခွင်းဓါး သူတော်စင်သည် မသင်္ကာဖွယ် တစ်ခုခုကို ခံစားလိုက်ရသဖြင့် သူ့ကို မေးခွန်းထုတ်ခဲ့သည်။ နောက်ဆုံးတွင် ယူဂျွန်ဟော့က ဖြစ်ကြောင်းကုန်စင် ပြောပြလိုက်တော့သည်။

ဇာတ်လမ်းကို ကြားသိပြီးနောက် ကောင်းကင်ဖြိုခွင်းဓါး သူတော်စင်က အဓိပ္ပာယ်မရှိသကဲ့သို့ မေးလိုက်သည်။

"နင့်ရဲ့ စိတ်ပိုင်းဆိုင်ရာ နိုးထမှုက နင် ပင်ပန်းနွမ်းနယ်နေတဲ့ အချိန်မှာ ဖြစ်ခဲ့တာလား"

"ဟုတ်ကဲ့… ကျနော်လည်း သေသေချာချာတော့ မမှတ်မိတော့ဘူး"

နောက်ဆုံးတွင် သူသည် မည်သည့်အရာကို အခြေခံပြီး တတိယအဆင့်သို့ ဖောက်ထွက်နိုင်ခဲ့သည်ကို သူကိုယ်တိုင်ပင် မသိရှိခြင်းဖြစ်သည်။ ကောင်းကင်ဖြိုခွင်းဓါး သူတော်စင်၏ အမူအရာမှာ မကောင်းလှတော့ပေ။

"နင့်ရဲ့ မသိစိတ်ကို ယုံကြည်ပြီး တတိယအဆင့်ကို နောက်တစ်ကြိမ် ထပ်ပြီး ဖောက်ထွက်နိုင်မယ်လို့ နင်က ကိုယ့်ကိုယ်ကိုယ် ယုံကြည်မှု ရှိရဲ့လား။ အဲဒါက ‘ရေခဲပန်းနတ်ဘုရားမ’ ရဲ့ နောက်လိုက်တွေ ပြောနေကျ စကားတွေနဲ့ တူနေပြီ"

"ဒါကြောင့်မလို့ ကျနော့်အတွက် ခင်ဗျားကို လိုအပ်နေတာပါ။ ကျေးဇူးပြုပြီး ခင်ဗျားရဲ့ သိုင်းပညာတွေကို နောက်တစ်ကြိမ် ထပ်ပြီး သင်ပေးပါ"

"ဘာဖြစ်တယ်"

"အရင်က နည်းလမ်းအတိုင်း သုံးဖို့ကတော့ ခက်ခဲလိမ့်မယ်။ အချိန်တွေ အရမ်းကုန်လွန်းလို့ပါ"

ကောင်းကင်ဖြိုခွင်းဓါး သူတော်စင်သည် တပည့်ဖြစ်သူ၏ အရှက်မရှိလှသော စကားများကြောင့် မှင်တက်သွားခဲ့သည်။

"ငါ နင့်ကို ကူညီသင့်လားဆိုတာ မသေချာဘူး။ နင်ကိုယ်တိုင်လည်း အဆင့်ကျော်လွန်ခြင်း တံတိုင်းကို ဖြတ်ကျော်ဖူးတာပဲဆိုတော့ အဆင့်ကျော်လွန်ခြင်းဆိုတာ ဘယ်တော့မှ နည်းလမ်းတစ်ခုထဲနဲ့ မပြီးမြောက်ဘူးဆိုတာ သိမှာပါ။ အဆင့်ကျော်လွန်သူတိုင်းက ကျော်လွန်နိုင်ဖို့အတွက် ကိုယ်ပိုင်နည်းလမ်းကို ကိုယ်စီ ရှာဖွေကြရတယ်"

"ခင်ဗျား ကူညီပေးနိုင်ပါတယ်။ ‘မူလဘူတ စီးကြောင်း’ ဆိုတာ ရှိနေတာပဲ မဟုတ်လား"

"အဲဒါက ငါတို့အနေနဲ့ အဲဒီစီးဆင်းမှု မြောက်မြားစွာထဲက တစ်ခုကို ရှာဖွေရမယ်လို့ ဆိုလိုတာပဲ။ ဒီလောကမှာ အဲဒီလိုမျိုး လွယ်လွယ်နဲ့ နိုးထလာနိုင်တဲ့ အသိဉာဏ်ဆိုတာ မရှိဘူး။ အဲဒီလိုမျိုး အလွယ်တကူ ဖြစ်လာနိုင်တဲ့ ဇာတ်လမ်းဆိုတာ မရှိသလိုမျိုးပေါ့"

"ဒါပေမဲ့ စီးဆင်းမှုပေါင်း သောင်းဂဏန်းလောက် ရှိနေရင်တော့ အဲဒီထဲက တစ်ခုကို ကျနော်တို့ ဖမ်းဆုပ်နိုင်မှာ မဟုတ်ဘူးလား။ ပြီးခဲ့တဲ့ အကြိမ်တုန်းကလည်း ကျနော် တစ်ခုကို ရှာတွေ့ခဲ့ဖူးတာပဲလေ"

ယူဂျွန်ဟော့သည် ဤသို့ပြောလိုက်မိပြီးနောက် မိမိကိုယ်ကိုယ် ကင်ဒေါ့ဂျာကဲ့သို့ စကားပြောနေမိသည်ဟု ခံစားလိုက်ရသည်။ မူလက သူသည် ဤကဲ့သို့ စကားပြောတတ်သူ မဟုတ်ပေ။ သူတို့နှစ်ဦး အတူရှိနေခဲ့စဉ်အတွင်း ကင်ဒေါ့ဂျာ၏ လွှမ်းမိုးမှုကို ခံလိုက်ရခြင်း ဖြစ်လောက်ပေသည်။ ကောင်းကင်ဖြိုခွင်းဓါး သူတော်စင်သည် တိတ်ဆိတ်နေသော တပည့်ဖြစ်သူကို ကြည့်ကာ သက်ပြင်းချလိုက်သည်။

"မင်းက အစကတည်းက ဒီလောက်အထိ စကားများတတ်တာလား။ ဒါက လွယ်မှာ မဟုတ်ဘူးနော်။ ကောင်းကင်ဖြိုခွင်းဓါးသိုင်းဆိုတာ အစကတည်းက အမျိုးသားတွေအတွက် ရည်ရွယ်ထားတာ မဟုတ်ဘူးဆိုတာကို ပြီးခဲ့တဲ့ အကြိမ်တုန်းကလည်း နင် တွေ့ခဲ့ရမှာပဲ"

ယူဂျွန်ဟော့လည်း ထိုအချက်ကို သိရှိပြီးသား ဖြစ်သည်။ ထို့ကြောင့်ပင် ပြီးခဲ့သည့် အကြိမ်က ကောင်းကင်ဖြိုခွင်းဓါး သူတော်စင်၏ သိုင်းပညာရပ်များကို သင်ယူရန် အလွန်ခက်ခဲခဲ့ခြင်း ဖြစ်၏။ သို့သော်လည်း ယခုအကြိမ်မှာမူ ထိုသို့မဟုတ်တော့ပေ။

"ကျား၊ မ ခွဲခြားမှု ပြဿနာကို တစ်နည်းနည်းနဲ့ ဖြေရှင်းလို့ ရနိုင်ပါတယ်"

"အဲဒါက ဘာကို ဆိုလိုတာလဲ"

[လိင်ပြောင်းလဲရသည်ကို နှစ်သက်သော နက္ခတ်က နှာခေါင်းရှုံ့နေပါသည်။]

သွယ်ဝိုက်သော မက်ဆေ့ချ်ကို မြင်လိုက်ရသဖြင့် ယူဂျွန်ဟော့ မျက်မှောင်ကြုတ်သွားခဲ့သည်။ ထိုအကြောင်းကို တွေးမိတိုင်း ရှုပ်ထွေးသော ခံစားချက်များနှင့်အတူ ပြင်းထန်သော ဒေါသများ ထွက်ပေါ်လာတတ်သော်လည်း သူသည် အသုံးချနိုင်သမျှ အရာအားလုံးကို အသုံးချရပေလိမ့်မည်။

"ဒါကို အဆုံးသတ်ရမယ့် အချိန်ရောက်ပြီ"

ခဏအကြာတွင်တော့ အံ့အားသင့်သွားသော ကောင်းကင်ဖြိုခွင်းဓါး သူတော်စင်မှာ ပါးစပ်အဟောင်းသား ဖြစ်သွားခဲ့ရသည်။ ယူဂျွန်ဟော့သည် မည်သည့်ခံစားချက်မျှ မရှိသော မျက်နှာထားဖြင့် သူ၏ ဓားကို ထုတ်ယူလိုက်သည်။

"အပြင်မှာ ရှိနေတဲ့ ဟိုကောင့်ကိုတော့ ဒီကိစ္စကို ဘယ်တော့မှ မပြောပြပါနဲ့"

[ကင်ဒေါ့ဂျာ စက်မှုဇုန်တွင် သင်၏ စွမ်းဆောင်ချက်များကို သံသယဝင်နေသူများ ရှိနေပါသည်။]

[‘လူလိမ် ကင်ဒေါ့ဂျာ’ ဟူသော ဇာတ်လမ်းသည် ကင်ဒေါ့ဂျာ စက်မှုဇုန်အတွင်း ပျံ့နှံ့နေပါသည်။]

လေထဲတွင် ပေါ်လာသော မက်ဆေ့ချ်ကြောင့် ကျနော် ခေတ္တအိပ်ပျော်နေရာမှ နိုးလာခဲ့သည်။ မက်ဆေ့ချ်အရ ကျနော် မရှိခိုက် စက်မှုဇုန်အတွင်း ကောလဟာလဆိုးများ ထွက်ပေါ်နေပုံရသည်။ စက်မှုဇုန်၏ အုပ်စိုးသူအသစ်မှာ လူကိုယ်တိုင် ထွက်မပြလာသဖြင့် ဤသို့ဖြစ်သည်မှာ သဘာဝပင်။

ဒါနဲ့... လူလိမ် ကင်ဒေါ့ဂျာ တဲ့လား။

ကျနော့်မျက်နှာကို မမြင်ဖူးသူတွေက ကျနော့်အကြောင်းကို ပိုသိနေကြသလို ခံစားနေရ၏။

"ကင်ဒေါ့ဂျာ။ မင်း ဘာလုပ်နေတာလဲ"

တစ်စုံတစ်ယောက်က ကန်လိုက်သဖြင့် ကျနော် ညည်းတွားရင်း ထလိုက်ရသည်။ ကောင်းကင်ဖြိုခွင်းဓါး သူတော်စင်ထံတွင် ပြင်းထန်စွာ လေ့ကျင့်ထားပုံရသော ချွေးများဖြင့် စိုရွှဲနေသည့် ယူဂျွန်ဟော့ကို တွေ့လိုက်ရ၏။

"…ခဏလောက် စဉ်းစားနေတာပါ"

"မင်းက အပျင်းထူနေတာပဲ"

"အခုတော့ အပျင်းထူနေရမှာပေါ့ကွ။ ငါက လူနာလေ"

ကျနော်ပြောလိုက်သောစကားက ဆင်ခြေပေးခြင်း ဖြစ်သော်လည်း အမှန်တရားလည်း ဖြစ်သည်။ ကျနော်သည် ထုတ်ပယ်ခြင်း ပြစ်ဒဏ်၏ နောက်ဆက်တွဲဆိုးကျိုးမှ အပြည့်အဝ မသက်သာသေးပေ။ ထို့ပြင် ကောင်းကင်ဖြိုခွင်းဓါး သူတော်စင်နှင့် ဖြစ်ပျက်ခဲ့သည့် ကိစ္စများကြောင့် ပြန်လည်ကျန်းမာလာမှုမှာလည်း နှောင့်နှေးနေခဲ့သည်။ ကျနော်သည် ‘လာမာ့ခ်၏ သစ်ကုလားအုတ်’ စွမ်းရည်ကို မြှင့်တင်နေပြီး ဇာတ်လမ်းအပိုင်းအစများကိုလည်း မှန်မှန် စားသုံးနေသောကြောင့် မကြာမီ ပြန်လည်ကောင်းမွန်လာမည် ဖြစ်သည်။

ရှေ့ခြံထဲတွင် ပြင်းပြင်းထန်ထန် လေ့ကျင့်နေကြသူများကို ကျနော် ကြည့်လိုက်သည်။

"အဲဒီလူတွေရော အခြေအနေဘယ်လိုရှိလဲ"

ချွေးတပြိုက်ပြိုက်နှင့် ဖြစ်နေသော ဂျန်ဟာယောင်းသည် ဟန်မြုံအိုနှင့် ယှဉ်ပြိုင်လေ့ကျင့်နေ၏။ ကောင်းကင်ဖြိုခွင်း သခင်က ဘေးမှကြည့်ရှုကာ အမှားများကို ထောက်ပြနေခဲ့သည်။

"အဲဒီကောင်မလေးက ပါရမီအတော်ရှိတယ်။ သူ့ရဲ့ ထူးဆန်းတဲ့ ဝိသေသလက္ခဏာကြောင့် အလွန်မြန်မြန် သင်ယူနိုင်နေတာ"

"အဲဒါ ကောင်မလေး မဟုတ်ဘူး။ ယောက်ျားလေး"

"မင်း မျက်လုံးတွေက ဘယ်ရောက်နေလဲဆိုတာ ငါ တစ်ခါတလေ နားမလည်နိုင်ဘူး"

ဒီမအေဘေးကတော့ကွာ... သူက ယောက်ျားလေးပဲလေ။ မဟုတ်ဘူးလား။ မူရင်းဝတ္ထုထဲမှာလည်း ဒီအတိုင်းပဲလေ။

ကျနော် စကားပြောရန် ပြင်လိုက်စဉ်မှာပင် ယူဂျွန်ဟော့က မေးလာသည်။

"ဒါထက်... နက္ခတ်တွေနဲ့ ကိစ္စကရော ဘာဖြစ်နေပြီလဲ"

"…စဉ်းစားနေတုန်းပဲ"

ပါစီဖုန်းထံမှ မက်ဆေ့ချ် ရရှိခဲ့သည်မှာ တစ်ပတ်ပင် ရှိတော့မည်။

[‘အမှောင်ဆုံးသော နွေဦး၏ ဘုရင်မ’ နက္ခတ်သည် သင့်ကို ‘စားတော်ဆက်အသင်း’ သို့ ဖိတ်ကြားနေပါသည်။]

[တစ်ပတ်အတွင်း ‘စားတော်ဆက်အသင်း’ ပွဲတော်ကို အိုရိုရဲတိုက်တွင် ကျင်းပမည် ဖြစ်ပါသည်။]

[ယနေ့ညတွင် သင် ထွက်ခွာမည်၊ မထွက်ခွာမည်ကို ဆုံးဖြတ်ပေးပါ။]

‘စားတော်ဆက်အသင်း’ ထံမှ ဖိတ်ကြားချက်။ တစ်နေ့နေ့တွင် ဤသို့ဖြစ်လာမည်ဟု ကျနော် မျှော်လင့်ထားသော်လည်း ထင်ထားသည်ထက် စောနေခဲ့သည်။

‘စားတော်ဆက်အသင်း’ ဆိုသည်မှာ အရသာရှိသော အစားအစာများကို နှစ်သက်သော နက္ခတ်များ စုဝေးရာ ဖြစ်သည်။ အပေါ်ယံကြည့်လျှင် ‘နက္ခတ်များ၏ စားသောက်ပွဲ’ နှင့် တူသော်လည်း လက်တွေ့မှာမူ လုံးဝကွဲပြားသည်။

နက္ခတ်များ၏ စားသောက်ပွဲမှာ တရားဝင်ပွဲ ဖြစ်သော်လည်း ‘စားတော်ဆက်အသင်း’ ပွဲတော်မှာမူ တရားမဝင်ပွဲ ဖြစ်ပြီး ထိုနေရာတွင် ဖြစ်ပျက်မည့် အဖြစ်အပျက်များ၏ ပြင်းထန်မှုမှာလည်း ကွဲပြားလှ၏။

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က သင့်အတွက် စိုးရိမ်နေပါသည်။]

အဓိကအချက်မှာ ‘စားတော်ဆက်အသင်း’ တွင် ယူရီအယ် မရှိပေ။

[‘ရွှေခေါင်းကွင်း၏အကျဉ်သား’ နက္ခတ်က သင်၏ ရွေးချယ်မှုကို သိလိုနေပါသည်။]

ထိုနေရာတွင် ‘ကောင်းကင်တစ်မျှ မဟာပညာရှိ’ လည်း မရှိသလို ‘လျှို့ဝှက်ကြံစည်သူ’ လည်း မရှိပေ။ ‘မဟူရာမီးလျှံ အသူတစ်ရာနဂါး’ ကတော့... ရှိသလား မသေချာပေ။

ဘာပဲဖြစ်ဖြစ် ထိုနေရာ၏ အခြေအနေမှာ ‘နက္ခတ်များ၏ စားသောက်ပွဲ’ ကဲ့သို့ ကျနော့်အတွက် အခွင့်သာမည့် နေရာမဟုတ်ပေ။ ကြယ်တာရာ ရုပ်သံထုတ်လွှင့်မှုအတွင်း စိတ်မတည်ငြိမ်သော နက္ခတ်များ စုဝေးရာသို့ သွားခြင်းထက် ပို၍ အန္တရာယ်ရှိသော အရာ မရှိဟုပြော၍ရသည်။

ယူဂျွန်ဟော့သည် ကျနော့်အမူအရာကို ကြည့်ပြီး မေးလိုက်သည်။

"မင်းက ကြောက်နေတာလား"

"ကြောက်စရာလား"

ထိုအကြောင်းပြချက်ကြောင့်သာ ‘စားတော်ဆက်အသင်း’ သို့ မသွားခဲ့လျှင် ကျနော် ဤနေရာအထိ ရောက်လာမည် မဟုတ်ပေ။ ကျနော်သည် ဂျန်ဟာယောင်းနှင့် ဟန်မြုံအိုတို့ လေ့ကျင့်နေသည်ကို တိတ်ဆိတ်စွာ ကြည့်နေခဲ့သည်။ ဟန်မြုံအိုမှာ ဆက်တိုက် အရိုက်ခံရသဖြင့် အော်ဟစ်နေခဲ့သည်။ ယူဂျွန်ဟော့ကလည်း ကျနော်နှင့်အတူ ကြည့်နေရင်း ပြောလိုက်သည်။

"ဒီနေရာကြောင့် မဟုတ်လား"

"…ဟုတ်တယ်"

ပါစီဖုန်း၏ မက်ဆေ့ချ်အရ ‘စားတော်ဆက်အသင်း’ ပွဲတော်မှာ တစ်ပတ်တိတိအကြာတွင် ကျင်းပမည်ဖြစ်သည်။ တိုက်တိုက်ဆိုင်ဆိုင်ပင် ထိုရက်မှာ သိုင်းပညာပြိုင်ပွဲနှင့် တစ်ရက်တည်း ဖြစ်နေခဲ့၏။

ဆိုလိုသည်မှာ သိုင်းပညာပြိုင်ပွဲ ဇာတ်ဝင်ခန်း ဖြစ်ပေါ်မည့်နေ့တွင် ကျနော် ပထမဆုံး သိုင်းလောက၌ ရှိနေမည် မဟုတ်ပေ။ အကယ်၍ တစ်ခုခု ဖြစ်လာခဲ့လျှင်...

"သွားပြီးတော့ ပြန်လာခဲ့ပါ။ ကင်ဒေါ့ဂျာ"

အခန်း ၂၃၆

- အပိုင်း ၄၄ - လိမ်လည်သူ (၄)

ယူဂျွန်ဟော့၏ ပြတ်သားလှသော စကားများကြောင့် ကျနော် ခေါင်းမော့ကြည့်လိုက်မိသည်။

"ငါသွားလို့…အဆင်ပြေပါ့မလား"

"အခု ငါတို့ ရင်ဆိုင်နေရတဲ့ ဇာတ်ဝင်ခန်းက မိစ္ဆာဘုရင် ရွေးချယ်ပွဲ မဟုတ်ဘူး၊ သိုင်းပညာပြိုင်ပွဲပဲ"

ကျနော်သည် ထိုသို့ပင် တွေးတောနေခဲ့သော်လည်း ယူဂျွန်ဟော့ကိုယ်တိုင် ထိုစကားကို ပြောသည်ကို ကြားလိုက်ရသည့်အခါ ထူးဆန်းသော စိတ်သက်သာရာရမှုနှင့် ဂုဏ်ယူမှုကို ခံစားလိုက်ရ၏။

"မင်း... တကယ့်ကို လူပီသလာပြီပဲ။ အနည်းဆုံးတော့ ငါ လောလောဆယ် သေမှာမဟုတ်ပါဘူးကွာ"

ယူဂျွန်ဟော့က ကျနော့်စကားကို လျစ်လျူရှုပြီး ဆက်ပြောသည်။

"ဒီပြိုင်ပွဲကနေ ရနိုင်တာဆိုလို့ မဟူရာကောင်းကင်မိစ္ဆာဓါးပဲ ရှိတယ်။ မဟူရာကောင်းကင်မိစ္ဆာဓါးကို ရလိုက်ရုံနဲ့ မိစ္ဆာဘုရင် ရွေးချယ်ပွဲမှာ ငါတို့ နိုင်မယ်လို့ မဆိုလိုဘူး"

ယူဂျွန်ဟော့ ပြောသည်မှာ မှန်သည်။ သိုင်းလောက၏ ပြိုင်ပွဲတွင် အနိုင်ရခြင်းသည် မိစ္ဆာဘုရင် ရွေးချယ်ပွဲတွင် အနိုင်ရမည်ဟု မဆိုလိုပေ။

"ဒါကြောင့်မလို့ စားတော်ဆက်အသင်းကို မင်းသွားရမယ်။ ငါတို့ နက်ဗျူလာအတွက် အဖော်တွေ လိုအပ်တယ်။ မင်းသာ စားတော်ဆက်အသင်းကို သွားမယ်ဆိုရင် မဟာမိတ်တွေ ရနိုင်လိမ့်မယ်"

သူပြောလိုသည်ကို ကျနော် နားလည်လိုက်သည်။ စားတော်ဆက်အသင်းကို သွားပြီး အသုံးချလို့ရမည့် နက္ခတ်အချို့နှင့်အတူ ပြန်လာခဲ့ရန်ပင်။ သို့သော် စိုးရိမ်စရာ အချက်တစ်ခု ရှိနေသည်။

"…ငါတို့ နက်ဗျူလာ ဟုတ်လား"

"ပြီးခဲ့တဲ့ အကြိမ်တုန်းက မင်းပဲ နက်ဗျူလာတစ်ခု တည်ထောင်မယ်လို့ ပြောခဲ့တယ်လေ။ မဟုတ်ဘူးလား"

"ကင်ဒေါ့ဂျာ ကုမ္ပဏီကို ပြောတာလား"

"အဲဒီနာမည်သာ တကယ်ပေးမယ်ဆိုရင် ငါ အခုချက်ချင်း နုတ်ထွက်မယ်"

ယူဂျွန်ဟော့က မျက်မှောင်ကြုတ်လျက် ခေါင်းလွှဲသွားသည်။ ကျနော်သည် ဝမ်းသာအားရဖြင့် အံ့သြသွားမိသည်။

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က လက်ကိုင်ပုဝါဖြင့် သူ၏ မျက်ရည်များကို သုတ်နေပါသည်။]

သူ ကျနော့်လည်ပင်းကို ပထမဆုံးအကြိမ် ဆွဲညှစ်ခဲ့စဉ်တုန်းကဆိုလျှင် ယခုအခြေအနေအထိ ဖြစ်လာလိမ့်မည်ဟု တွေးတောင်မတွေးခဲ့ချေ။ ယူဂျွန်ဟော့နှင့် ကျနော်သည် တကယ့် အပေါင်းအဖော်များ ဖြစ်လာခဲ့ကြလေပြီ။ ဘာပဲဖြစ်ဖြစ် ယူဂျွန်ဟော့က ဤသို့ပြောနေသည့်တိုင် ကျနော် တွန့်ဆုတ်နေမိသည်မှာ ရယ်စရာကောင်းလှ၏။

ကျနော် မတ်တတ်ရပ်လိုက်ပြီး ကြေညာလိုက်သည်။

"ငါ သွားမယ်"

ထိုညတွင် ကူးပြောင်းမုခ်ဝမှတစ်ဆင့် ပျံသန်းလာသော စားတော်ဆက်အသင်း လမ်းညွှန်တစ်ဦးက ကျနော့်ကို လာရောက်ကြိုဆိုသည်။ လမ်းညွှန်သည် အနောက်တိုင်း ကောင်းဘွိုင်ဝတ်စုံကို ဝတ်ဆင်ထားပြီး မြင်းနက်တစ်ကောင် ဆွဲသော ရထားလုံးငယ်လေးကို မောင်းနှင်လာသည်။ သူသည် အိုရိုရဲတိုက်သခင်၏ လက်အောက်ငယ်သားများထဲမှ တစ်ဦးဖြစ်ပုံရသည်။

လမ်းညွှန်သည် ရထားလုံးပေါ်မှ ဆင်းလာပြီး ကျနော့်ကို ယဉ်ကျေးစွာ အရိုအသေပေးသည်။

[မင်းက ကယ်တင်ခြင်း၏ မိစ္ဆာဘုရင် လား]

"ဟုတ်ပါတယ်"

[ရထားလုံးပေါ် တက်လိုက်ပါ။ ခရီးက တော်တော်ဝေးတာမလို့ မင်း အနားယူရင်း လာခဲ့လို့ရပါတယ်]

လမ်းညွှန်သည် ကျနော့်အပေါ် ထူးထူးခြားခြား ဆက်ဆံခြင်း သို့မဟုတ် တုံ့ပြန်ခြင်းမျိုး မပြသပေ။ သူက စားတော်ဆက်အသင်း၏ လမ်းညွှန်ဖြစ်နေသောကြောင့် ‘ကယ်တင်ခြင်း၏ မိစ္ဆာဘုရင်’ ကို မြင်သော်လည်း ပြာပြာသလဲလဲဖြစ်မနေခြင်း ဖြစ်လောက်၏။ လမ်းညွှန်သည် ရထားလုံးပေါ်တက်ပြီး ကျနော့်ဘက်သို့ လှည့်ကာ မေးသည်။

[လမ်းမှာ ခရီးသည်တချို့ကို ကြိုသွားဦးမှာပါ။ အဆင်ပြေတယ် မလား]

"ဪ... ရပါတယ်"

ခရီးသည်တချို့ တဲ့... ဘယ်သူတွေပါလိမ့်။

လမ်းညွှန်က ရထားလုံးကို ချက်ချင်း စတင်မောင်းနှင်လိုက်သဖြင့် ကျနော် မေးမြန်းရန် အခွင့်အရေး လွတ်သွားခဲ့သည်။

ရထားလုံးအတွင်းပိုင်းမှာ ကျယ်ဝန်းပြီး သက်သောင့်သက်သာ ရှိလှပေသည်။ လုံးဝ တုန်ခါခြင်း မရှိသောကြောင့် ရွေ့လျားနေသည်ဟုပင် မထင်ရပေ။ အလွန်ကောင်းလှပေသည်။ ခရီးသွားနေစဉ်အတွင်း Ways of Survival ကို ကျနော် ဖတ်ရှုနိုင်ပေတော့မည်။

နာရီအနည်းငယ်ကြာအောင် Ways of Survival ကို ကျနော် ဖတ်နေမိသည်။ နာရီအနည်းငယ် မဟုတ်ဘဲ ရက်အနည်းငယ်ကြာအောင် ဖတ်နေမိခြင်းလည်း ဖြစ်နိုင်၏။ ရထားလုံး မည်မျှမြန်မြန် သွားနေသည်ကို ကျနော် မသိသဖြင့် အချိန်ကို တိုင်းတာရန် ခက်ခဲလှသည်။

「 ...ထို့ကြောင့် ၁၅ ကြိမ်မြောက် နောက်ပြန်ဆုတ်သူ ယူဂျွန်ဟော့သည် သေဆုံးခါနီးတွင် ‘ငါ ကံမကောင်းခဲ့ဘူး’ ဟု တွေးခဲ့လေသည်။ 」

「 ...၁၉ ကြိမ်မြောက် ဘဝ၏ အဆုံးသတ်တွင် ယူဂျွန်ဟော့က ‘နောက်တစ်ကြိမ်ပေါ့’ ဟု တွေးခဲ့သည်။ 」

「 ...ယူဂျွန်ဟော့သည် သူ၏ ၂၅ ကြိမ်မြောက် ဘဝကို အဆုံးသတ်လိုက်ပြီး ‘တကယ့်ကို နောက်တစ်ကြိမ် ဖြစ်လာမှာပါ’ ဟု ရေရွတ်ခဲ့သည်။ 」

…သူ့ကို လူပီသလာပြီဆိုတဲ့ စကားကို ကျနော် ပြန်ရုပ်သိမ်းရမည်။

ဒီကောင်ကတော့ ပထမအကြိမ် ပြင်ဆင်ချက်မှာတောင် ရေဆန်ကို အစကနေပြန်ပြီးဆန်တက်ဖို့ကြိုးစားနေသည့် ငါးရံ့လေးအတိုင်း ဖြစ်နေတုန်းပင်။ ကျနော် ကူညီသည်ဖြစ်စေ၊ မကူညီသည်ဖြစ်စေ အတူတူပဲ ဖြစ်နေလေသည်။

ယူဂျွန်ဟော့၏ သေဆုံးမှုများကြားမှ ကျနော် လိုအပ်သော အချက်အလက်များကို ရှာဖွေရန်လည်း မမေ့ခဲ့ပေ။ စားတော်ဆက်အသင်းနှင့် ပတ်သက်ပြီး အသေးစိတ် အချက်အလက်များမှာမူ သိပ်မရှိလှပေ။ ယူဂျွန်ဟော့သည် နောက်ပိုင်းအဆင့်များတွင် စားတော်ဆက်အသင်းသို့ သွားရောက်ခဲ့ သော်လည်း ထိုသို့သွားရောက်ခြင်းမှာ သူတို့နှင့် ပေါင်းသင်းရန် မဟုတ်ဘဲ သတ်ဖြတ်ရန်အတွက် ဖြစ်၏။ ထိုအပိုင်းများမှာ များသောအားဖြင့် "အားးးးးး" ဟူသော အော်ဟစ်သံများဖြင့်သာ ပြည့်နှက်နေလေသည်။

「 မြေခွေးပျံက ‘နက္ခတ်တွေ အားလုံးက မကောင်းဘူး။ ဒါပေမဲ့ စားတော်ဆက်အသင်းကတော့ သူတို့ထဲမှာ အဆိုးဆုံးပဲ’ ဟု ပြောခဲ့သည်။ 」

သူတို့နှင့် ပတ်သက်ပြီး ကောင်းမွန်သော အကြောင်းအရာများကို ရှာဖွေရန်မှာလည်း မဖြစ်နိုင်သလောက်ပင်။ ကျနော် ဖတ်ရှုလေလေ၊ စားတော်ဆက်အသင်းသို့ သွားခြင်းမှာ မှန်ကန်သော ဆုံးဖြတ်ချက် ဟုတ်၊ မဟုတ် ပို၍ မသေချာလေလေ ဖြစ်လာသည်။ ဘာပဲဖြစ်ဖြစ် ကျနော် Ways of Survival ကို ဆက်လက်ဖတ်ရှုနေမိသည်။

「 ယူဂျွန်ဟော့က ‘သူသာ ငါနဲ့အတူ လိုက်လာခဲ့ရင် ကောင်းမှာပဲ’ ဟု တွေးနေခဲ့သည်။ 」

မူရင်းနှင့် ပြင်ဆင်ချက်ကြားတွင် ခံစားချက် ကွာခြားချက် ရှိသည်ဆိုလျှင် ဤစကားလုံးများ ထွက်ပေါ်လာသည့် အချိန်ပင် ဖြစ်လောက်သည်။ ထိုစကားလုံးတို့မှာ ကျနော် မူရင်းလက်ရာထဲသို့ ဝင်ရောက် စွက်ဖက်ခဲ့သဖြင့် ကျန်ရစ်ခဲ့သော အမှတ်အသားများ ဖြစ်သည်။ ဤစာကြောင်းများ ပေါ်လာတိုင်း ကျနော် အထူး အာရုံစိုက်မိသည်။ အကြောင်းမှာ ‘တတိယအကြိမ် နောက်ပြန်ဆုတ်ခြင်း’ အကြောင်း ဖော်ပြထားသော အခန်း အနည်းငယ်သာ ရှိသောကြောင့် ဖြစ်၏။

「 ‘မင်း ဒါကို လုပ်ရမယ်။ ဒါက မှန်ကန်တဲ့ လမ်းစဉ်လို့ သူပြောခဲ့တယ်’ 」

…မှန်ကန်တဲ့ လမ်းစဉ် ဟုတ်လား။ ဒါက ဘာကို ဆိုလိုတာလဲ။

[စားသောက်ဖို့ အချိန်ရောက်ပါပြီ။ စိတ်ထဲမထားဘူးဆိုရင် ရိုးရိုးရှင်းရှင်းလေး တစ်ခု ပြင်ဆင်ထားပေးပါတယ်]

"ကျေးဇူးတင်ပါတယ်"

ရထားလုံး ရပ်သွားပြီး လမ်းညွှန်က ကျနော့်အတွက် အစားအစာတစ်ခု ပေးသည်။ အစားအစာမှာ လေယာဉ်ပေါ်တွင် ကျွေးသော အစားအစာမျိုး ဖြစ်သည်။ အဆင့်မြင့် ဝက်ပေါင်ခြောက်နှင့် ဆင်တူပြီး အလွန်မွှေးကြိုင်လှ၏။ သို့ပေသိ ထိုအရာက တကယ့် ဝက်ပေါင်ခြောက်တော့ မဟုတ်ပေ။

[ဆီလီဂျီဒွန်ဂြိုဟ် ၏ နောက်ဆုံးသော လက်ဝှေ့ကျော်]

ဤသည်က စားတော်ဆက်အသင်း၏ ထုံးစံအတိုင်း ဇာတ်လမ်းဖြင့် ပြုလုပ်ထားသော အစားအစာ ဖြစ်သည်။ ကျနော် ခံစားရသော ခံစားချက်အရ အတော်လေး အားကောင်းသော ဇာတ်လမ်းတစ်ခု ဖြစ်ပုံရသည်။

လမ်းညွှန်က ကျနော့်ကိုပေးထားသော ခက်ရင်းဖြင့် နူးညံ့သော ဝက်ပေါင်ခြောက်ကို ကျနော် ထိလိုက်သည်။ ထိုအခိုက်အတန့်တွင် ဇာတ်လမ်း၏ အကြောင်းအရာ အချို့မှာ ကျနော့်ဦးနှောက်ထဲသို့ စီးဝင်လာသည်။

—ကျေး... ကျေးဇူးပြုပြီး ကျနော့်ကို ချမ်းသာပေးပါ။ ကျေးဇူးပြုပြီး ချမ်းသာပေးပါ…

နက္ခတ်များ၏ ရုန်းရင်းဆန်ခတ်မှုကြောင့် ကြောက်မက်ဖွယ်ကောင်းအောင် ပြိုလဲသွားသော မြို့တစ်မြို့။ ပြင်းထန်သော ဖိအားအောက်တွင် ပေါက်ကွဲထွက်သွားကြသော ကိုယ်စားလှယ်များ၏ သဏ္ဌာန်။ ဂုဏ်သိက္ခာအားလုံး ဆုံးရှုံးသွားသော သေလုမျောပါး လက်ဝှေ့ကျော်…

ယုတ်မာစွာ ပြုံးနေကြသော နက္ခတ်များ၏ ပါးစပ်များထဲသို့ စုတ်ပြတ်နေသော ကိုယ်စားလှယ်များ၏ ရုပ်အလောင်းများ စီးဝင်သွားကြသည်။ ပျောက်ကွယ်သွားပြီဖြစ်သော ကမ္ဘာကြီး၏ နောက်ဆုံးမြင်ကွင်း။ ကိုယ်စားလှယ်များ၏ အော်ဟစ်သံများနှင့် မျှော်လင့်ချက်မဲ့မှုများသည် ကျနော့်နှာခေါင်းဝတွင် လာရောက် စုဝေးနေကြသည်။

ကျနော်သည် ဝက်ပေါင်ခြောက်ကို ငုံ့ကြည့်လိုက်ပြီး ခက်ရင်းကို တိတ်ဆိတ်စွာ ပြန်ချထားလိုက်သည်။

[...အစားအစာက မင်းရဲ့အရသာနဲ့ မကိုက်ညီလို့လား]

"အခုလောလောဆယ် ဗိုက်မဆာသေးလို့ပါ"

ကျနော်က တည်ငြိမ်သော အပြုံးဖြင့် ပြန်ဖြေလိုက်သည်။

[စိတ်မကောင်းပါဘူး။ နက္ခတ်တစ်ပါးအနေနဲ့ မင်းရဲ့ အကြိုက်ကို ငါ ထည့်မတွက်မိဘူးဖြစ်သွားတယ်။ အစားအစာအသစ်ကို ငါထပ်ပြီး ပြင်ဆင်ပေးပါမယ်...]

"ရပါတယ်။ ငါ့မှာ ပါလာတာပဲ စားပါ့မယ်"

လမ်းညွှန်သည် နှမြောတသဟန်ဖြင့် ပန်းကန်များကို သိမ်းဆည်းသွားပြီး မောင်းနှင်သူခုံတွင် ပြန်ထိုင်လိုက်သည်။ သူ လုံးဝထွက်သွားတော့မှ ကျနော်သည် တင်းမာနေသော မျက်နှာထားကို လျှော့ချလိုက်မိသည်။ အော့အန်ချင်စိတ်များပင် ပေါက်လာခဲ့သည်။

Ways of Survival ထဲတွင် ခုနကတင် ဖတ်လိုက်ရသည့် စာကြောင်းတစ်ကြောင်းမှာ ကျနော့်ဦးနှောက်ထဲသို့ ဖြတ်ပြေးသွားသည်။

「 "ဒါဟာ ကိုယ်စားလှယ်တွေအတွက်တော့ အိမ်မက်ဆိုးတစ်ခုပဲ" 」

ကျနော် ဘယ်ကိုသွားနေသည်၊ မည်သူများကို ရင်ဆိုင်ရမည်ဆိုသည်ကို တစ်ကျော့ပြန် သတိပြုမိသွားသည်။ ကျနော်သည် အပျော်ခရီးထွက်သလိုမျိုး မိုက်မဲစွာ ပြုမူခဲ့မိ၏။

ကျနော့်အိတ်ကပ်ထဲတွင် ရှိနေသော ဇာတ်လမ်းအချို့ကို ကျနော် တို့ထိကြည့်လိုက်သည်။ သူတို့ စားသုံးခဲ့သည့် ဇာတ်လမ်းများနှင့် နှိုင်းယှဉ်လျှင် 'ဇာတ်လမ်း၏ မိုးကုတ်စက်ဝိုင်း' တွင် စွန့်ပစ်ခံထားရသော ဇာတ်လမ်းများမှာ အရောင်အဆင်းနှင့် အနံ့အသက် လုံးဝမရှိသလောက်ပင်။ ၎င်းတို့မှာ သာမန်ကိုယ်စားလှယ်များ သာမန်အတိုင်း ရှင်သန်နေထိုင် သေဆုံးသွားကြသည့် အမှိုက်ကဲ့သို့သော ရိုးရှင်းသည့် ဇာတ်လမ်းများသာ ဖြစ်သည်။ ထို့ကြောင့်သာလျှင် စားတော်ဆက်အသင်းက ၎င်းတို့ကို လျစ်လျူရှုကာ စွန့်ပစ်ခဲ့ခြင်းဖြစ်လောက်သည်။

ကျနော်သည် 'လာမာ့ခ်၏ သစ်ကုလားအုတ်' ကို အသုံးပြု၍ ဇာတ်လမ်းအပိုင်းအစများကို စုပ်ယူလိုက်ပြီး မျက်လုံးများကို တိတ်ဆိတ်စွာ မှိတ်ထားလိုက်သည်။ ကျနော် အိမ်မက်ဆိုးတစ်ခု မက်တော့မည်ဟု ခံစားနေရလေသည်။

ခရီးစဉ်သည် ရက်အနည်းငယ်ကြာအောင် ဆက်လက်ဖြစ်ပေါ်နေခဲ့ပြီး ထိုအားလပ်ချိန်အတွင်း ကျနော် ဂရုမစိုက်ဖြစ်ခဲ့သော အရာအချို့ကို ပြန်လည်စစ်ဆေးကြည့်ရှုခဲ့သည်။

[ပိုင်ဆိုင်ထားသော ဒင်္ဂါးပမာဏ - ၁,၂၅၂,၃၅၃ ဒင်္ဂါး။]

ပထမဦးစွာ ကျနော် သတိမထားမိခဲ့သော ဒင်္ဂါးများကို စစ်ဆေးလိုက်သည်။ အရေအတွက်က တကယ့်ကို များပြားလှသော ငွေပမာဏပင် ဖြစ်သည်။

၁.၂ သန်းဆိုလျှင် မဟာမိစ္ဆာ၏မျက်လုံးကို ဝယ်ယူရန် လုံလောက်သော ပမာဏ ဖြစ်သော်လည်း အန်နာ ခရော့ဖ်က မဟာမိစ္ဆာ၏မျက်လုံးကို ရရှိသွားပြီးသား ဖြစ်သည်။ ကျနော့်တွင် ပိုမိုကောင်းမွန်သော စွမ်းရည်ရှိသဖြင့် ထိုမျက်လုံးကို မလိုအပ်သော်လည်း...

ကျန်ရှိနေသော ဒင်္ဂါးများကို မည်သို့အသုံးပြုရမည်နည်းဟု ကျနော် စဉ်းစားနေမိသည်။ စွမ်းရည်အလုံးစုံကို မြှင့်တင်ခြင်းမှာ မဆိုးလှသော်လည်း ပျမ်းမျှအဆင့် ၁၀၀ ကျော်သွားသည်နှင့် စွမ်းရည်များ၏ ထိရောက်မှုမှာ စတင်ကျဆင်းလာတတ်သည်။ ထို့ကြောင့် စွမ်းရည်အသစ်များတွင် ရင်းနှီးမြှုပ်နှံခြင်းက စွမ်းရည်အဆင့်များတွင် ရင်းနှီးမြှုပ်နှံခြင်းထက် ပိုမိုကောင်းမွန်ပေ လိမ့်မည်။

စုဆောင်းထားသော စွမ်းရည်အလုံးစုံမှာ အလွန်အမင်း များပြားနေသည့် အချိန်မျိုးလည်း ရှိတတ်သည်။ Fourth Wall ကို ကျနော် ဖျောင်းဖျပြီးသည်နှင့် ကျနော့်၏ ဝိသေသ လက္ခဏာ ဇယားကို သေချာပေါက် စစ်ဆေးရပေမည်။

[ခရီးသည်အသစ် တစ်ဦး ဝင်လာပါတော့မယ်။ အဆင်ပြေရဲ့လား]

ကျနော် အတွေးများထဲတွင် အာရုံနစ်ဝင်နေသဖြင့် ရထားလုံး ရပ်သွားသည်ကိုပင် သတိမထားမိခဲ့ပေ။

"အင်း။ ရပါတယ်"

ကျနော့် အဖြေကြောင့် ရထားလုံး၏ ဘယ်ဘက်တံခါးမှာ ပွင့်လာခဲ့သည်။ တံခါးကြားမှတစ်ဆင့် ကျနော်နှင့်အတူ လိုက်ပါလာမည့်သူများကို ကြည့်ရင်း ကျနော် အနည်းငယ် စိတ်လှုပ်ရှားမိ၏။ လိုက်ပါလာမည့်သူတို့မှာ နက္ခတ်များ ဖြစ်နိုင်ခြေ အလွန်မြင့်မားသောကြောင့်ပင်။

"ဟား... ငါ စောင့်နေရတာ တော်တော်ကြာပြီ။ ဘာလို့ ဒီလောက်တောင် နောက်ကျနေတာလဲ"

[တောင်းပန်ပါတယ်။ လမ်းက ကျနော် ထင်ထားတာထက် ပိုပြီး ကြမ်းတမ်းနေလို့ပါ...]

အနည်းငယ် ရင်းနှီးနေသော အသံတစ်ခု ကျနော့်နားထဲသို့ တိုးဝင်လာခဲ့သည်။ လေသံမှာ ရုရှား လေယူလေသိမ်း ရောနှောနေသော အမျိုးသမီးတစ်ဦး၏ စူးရှရှအသံပင် ဖြစ်သည်။

တံခါးကြားမှတစ်ဆင့် လူသုံးဦးကို ကျနော် မြင်လိုက်ရ၏။

[အရင် ရောက်နှင့်နေတဲ့သူ တစ်ယောက် ရှိပါတယ်။ မင်းတို့ ခရီးစဉ် သာယာပါစေလို့ ဆုတောင်းပေးပါတယ်။]

ကံကောင်းသည်လား၊ ကံဆိုးသည်လားတော့ မသိ၊ မည်သည့် နက္ခတ်၏ အငွေ့အသက်ကိုမျှ ကျနော် မခံစားရပေ။ တစ်နည်းအားဖြင့်ဆိုရသော် သူတို့အားလုံးမှာ ကိုယ်ပိုင်ဇာတ်လမ်းများ ရှိကြသော ကိုယ်စားလှယ်များသာ ဖြစ်ကြသည်။

ငြင်သာသော အပြုံးရှိသည့် အမျိုးသမီးတစ်ဦး ရထားလုံးပေါ်သို့ အရင်ဆုံး တက်လာခဲ့သည်။

"ခွင့်ပြုပါဦး"

ယဉ်ကျေးစွာ နှုတ်ဆက်လာသော ထိုအမျိုးသမီးတွင် လေထဲ၌ လွင့်ဝဲနေသော ဆံပင်ညိုရောင်များ ရှိသည်။ အမျိုးသမီးက ခေါင်းမော့လိုက်သည့် ခဏမှာပင် ကျနော်က အလိုအလျောက် မေးလိုက်မိသည်။

"ဆယ်လီနာ ကင် မလား"

ဆယ်လီနာ ကင်သည် နက္ခတ်များ၏ စားသောက်ပွဲတွင် ပါဝင်ခဲ့သော အမေရိကန် ကိုယ်စားပြု ခေါင်းဆောင်များထဲမှ တစ်ဦးဖြစ်သည်။ ကျနော့်၏ ပြောင်းလဲသွားသော မျက်နှာကြောင့် ဖြစ်ပေလိမ့်မည်၊ ထိုအမျိုးသမီးမှာ ခဏမျှ ဇဝေဇဝါ ဖြစ်နေပြီးမှ အော်ဟစ်လိုက်သည်။

"ဟမ်... ရှင်က..."

"ငါ ဘယ်သူလဲဆိုတာ မှတ်မိလား"

"မှတ်မိတာပေါ့။ ကင်ဒေါ့ဂျာ။ မတွေ့ရတာ ကြာပြီနော်။ ရှင်လည်း ဖိတ်ကြားခံရတာလား"

"ဟုတ်ကဲ့၊ အဲဒီလိုပဲ ပြောရမှာပေါ့"

ဆယ်လီနာနှင့် လက်ဆွဲနှုတ်ဆက်ပြီး ကျန်ရှိနေသော အဖွဲ့ဝင်များကို ကျနော် အကဲခတ်လိုက်သည်။ ဆယ်လီနာနောက်တွင် လိုက်ပါလာသူမှာ ဆံပင်နှစ်ဖက်ခွဲချည်ထားသော မိန်းကလေးတစ်ဦး ဖြစ်သည်။

"မင်းက... ဟင်"

မျှော်လင့်ထားသည့်အတိုင်း ထိုသူကို ကျနော် မြင်ဖူးသည်။ သူသည် နက္ခတ်များ၏ စားသောက်ပွဲတွင် တွေ့ခဲ့သော ရုရှားမိန်းကလေးပင် ဖြစ်သည်။

သူ့နာမည်က... ဘယ်လိုခေါ်ပါလိမ့်။

ထိုရုရှားမိန်းကလေးတွင် ‘မဟူရာ’ဘာဆိုလား ဆိုသော ဘွဲ့အမည် ရှိသည်ကိုတော့ ကျနော် မှတ်မိနေသည်။

ထိုမိန်းကလေးကို လျစ်လျူရှုပြီး ကျန်ရှိနေသော လူကို ကျနော် စစ်ဆေးလိုက်သည်။ ထိုအခိုက်အတန့်တွင် ကျနော့်တစ်ကိုယ်လုံး ကြက်သီးမွေးညင်းများ ထသွားခဲ့၏။

"ဒါက ငါတို့တွေ ပထမဆုံးအကြိမ် ဆုံဖြစ်ကြတာပဲနော်"

တည်ငြိမ်ပြီး အေးဆေးသော ထိုအသံထဲတွင် အတိုင်းအတာမဲ့သော နက်ရှိုင်းမှုများ ပါဝင်နေသည်။ ထိုသူကို ကျနော် ကောင်းကောင်း သိသည်။ သူသည် Ways of Survival ထဲတွင် ယူဂျွန်ဟော့နှင့်အတူ အင်အားအကြီးဆုံးသော ကိုယ်စားလှယ်များထဲမှ တစ်ဦးဖြစ်၏။ သူနှင့် ကျနော် ယခင်က ဆုံဖူးခဲ့သေးသည်။

"တခါတုန်းကတော့ နင့်ကို အိပ်မက်ထဲမှာ ငါ မြင်ခဲ့ဖူးတယ်။ အဲဒါက တော်တော်ကြာသွားပြီမို့လို့ ငါ သိပ်မမှတ်မိတော့ဘူး။ အဲဒီတုန်းက နင်ပြောခဲ့တာက ငါတို့ ပြန်ဆုံကြဦးမယ် ဆိုတာပဲ..."

ကျနော် မှတ်မိသွားသည်။ အစိမ်းရောင်ဇုန် ဇာတ်ဝင်ခန်းတွင် တစ္ဆေကျောက်တုံးကို စားသုံးပြီးနောက် သူ့ကို ကျနော် မြင်ခဲ့ရသည်။ ကျနော် သူ့ကို ပြောလိုက်၏။

"ငါ မှတ်မိပါတယ်"

"ငါ တရားဝင် နှုတ်ဆက်ပါရစေ။ နင်နဲ့ ဆုံရတာ ဝမ်းသာပါတယ်၊ ကင်ဒေါ့ဂျာ။ မဟုတ်ဘူး... ကယ်တင်ခြင်း၏ မိစ္ဆာဘုရင်"

သူ၏ ရွှေရောင်ဆံပင်များအထက်တွင် အဝါရောင် မိစ္ဆာမျက်လုံးတစ်လုံး ပျံဝဲနေစဉ်မှာပင် သူက ပြုံးပြလိုက်သည်။ အလွန်လှပသော အပြုံးတစ်ခု ဖြစ်သော်လည်း ကျနော် ထိုအပြုံးကို လက်မခံနိုင်ပေ။ အဘယ်ကြောင့်ဆိုသော် ထိုအပြုံး၏ နောက်ကွယ်ရှိ ထိတ်လန့်ဖွယ် အတွေးများကို မည်သူထက်မဆို ပို၍ ကျနော် သိနေသောကြောင့် ဖြစ်သည်။

"ငါက အန်နာ ခရော့ဖ် ပါ"

အက်စ်ဂတ်၏ ပရောဟိတ်။ ဇလွာတူစထွာ၏ အကြီးအကဲ၊ အန်နာ ခရော့ဖ်မှာ ဤနေရာသို့ ရောက်ရှိနေခဲ့ပြီ ဖြစ်သည်။