အခန်း (၁၇၁၇-၁၇၁၉)

အခန်း (၁၇၁၇) စကြဝဠာအဆင့်၊ ထွက်ခွာခြင်း

ချူးယွင်ဖန်းသည် ဤအချက်ကို တစ်ခါမျှ သံသယမဖြစ်ခဲ့ဖူးပေ။

"ဒီပေါင်ထိုက်မြို့ဆိုတာ ဘယ်လိုနေရာမျိုးလဲ" ချူးယွင်ဖန်းက မေးမြန်းလိုက်သည်။

"စီနီယာချူး ကျွန်တော် ရှာဖွေထားတဲ့ အချက်အလက်တွေအရ ပေါင်ထိုက်မြို့က ထူးဆန်းတဲ့နေရာတစ်ခုပါ။ မြို့က အနောက်ဘက်နယ်စပ်မှာရှိပြီး ကြီးမြတ်တဲ့တရှနဲ့ နတ်ဆိုးတွေကြားမှာ တိုက်ပွဲဖြစ်ခဲ့တဲ့နေရာနဲ့ တော်တော်လေး နီးတယ်။ အမှန်တော့ အဲ့ဒီ့မြို့က လွန်ခဲ့တဲ့ဆယ်စုနှစ်တွေတုန်းက နတ်ဆိုးတွေရဲ့ ကျူးကျော်မှုကြောင့် အကြိမ်ကြိမ် ပျက်စီးခဲ့ရဖူးတယ်။ ဒါပေမယ့် ဒီနှစ်တွေအတွင်း ဘုရင်မင်းမြတ်က ထီးနန်းတက်လှမ်းပြီးနောက်ပိုင်း စစ်တပ်တွေကို ပြန်လည်ဖွဲ့စည်းခဲ့တယ်"

"ဒါ့အပြင် ပေါင်ထိုက်မြို့ရဲ့ မြောက်ဘက်မှာ ဟူမျိုးနွယ်စု၊ တောင်ဘက်မှာ လူရိုင်းမျိုးစုတွေရှိနေပြီး အလယ်မှာ နတ်ဆိုးမျိုးနွယ်စုတွေ ရှိနေတော့ အရမ်းအန္တရာယ်များတဲ့ မြို့တစ်ခုဖြစ်နေတာ။ ပြီးတော့ အခြေအနေတွေကလည်း တော်တော်ရှုပ်ထွေးတယ်လို့ ဆိုကြတယ်။ အရင်က တာဝန်ထမ်းဆောင်ခဲ့တဲ့ ဗိုလ်မှူးကြီးတွေလည်း အဲဒီမှာပဲ ကျဆုံးခဲ့ကြတာ" ယူချူးယွင်က ဆက်ပြောလိုက်သည်။

ယူချူးယွင်သည် အချက်အလက်များစွာကို စုဆောင်းထားခဲ့သော်လည်း ရရှိလာသမျှ အချက်အလက်များအရ ပေါင်ထိုက်မြို့သည် အန္တရာယ်များသော နေရာတစ်ခုဖြစ်၍ နဂါးရေကန်နှင့် ကျားဂူတစ်ခုကဲ့သို့ ခံစားနေရသည်။

"တကယ် နဂါးတွေ ကျားတွေရှိတဲ့နေရာပေါ့လေ။ ဒါပေမယ့် ကျုပ်ကို ဒီလိုပုံစံမျိုးနဲ့ ဖြေရှင်းနိုင်မယ်လို့ ထင်နေရင် ခင်ဗျား အကြီးအကျယ် မှားယွင်းသွားလိမ့်မယ် လီချန်းယွမ်" ချူးယွင်ဖန်းက လှောင်ရယ်ကာ ပြောလိုက်သည်။

"စီနီယာ၊ ကျွန်တော်တို့ ဘာလုပ်ကြမလဲ။ စစ်ဝန်ကြီးဌာနရဲ့ ခန့်အပ်ချက်ကို ကျွန်တော်တို့ ငြင်းဆန်လို့မရဘူး"

"စိတ်မပူပါနဲ့၊ ကျုပ်မှာ ယုံကြည်ချက်ရှိပါတယ်။ ပြီးတော့ ကောင်းကင်ပြိုကျလာရင်တောင် ကျုပ် ထိန်းထားနိုင်တယ်။ ခင်ဗျား ဘာကို ကြောက်နေတာလဲ" ချူးယွင်ဖန်းက ပြောလိုက်သည်။

"အားလုံးကို ခရီးထွက်ဖို့ ပြင်ဆင်ကြဖို့ အမိန့်ပေးလိုက်"

"နားလည်ပါပြီ" ယူချူးယွင်က အလျင်အမြန် ခေါင်းညိတ်လိုက်သည်။

ယူချူးယွင်ကို နှုတ်ဆက်ပြီးနောက် ချူးယွင်ဖန်းသည် ချက်ချင်းပင် စတင် ကျင့်ကြံလိုက်သည်။ မိမိကို ပေါင်ထိုက်မြို့သို့ ပြောင်းရွှေ့ခြင်းသည် သေးငယ်သော လှည့်ကွက်တစ်ခုသာဖြစ်မည်ဟု ချူးယွင်ဖန်း မယုံကြည်ပေ။ လီချန်းယွမ်က နောက်ပိုင်းတွင် နည်းလမ်းမျိုးစုံ အသုံးပြုလာမည်ကို ချူးယွင်ဖန်း စိုးရိမ်နေသည်။ ကြယ်ကြွေကောင်းကင်ဂိုဏ်းမှ ထွက်ခွာပြီးနောက် အန္တရာယ်အဆင့်သည် အဆမတန် မြင့်တက်လာပေလိမ့်မည်။ သို့သော် စစ်ဝန်ကြီးဌာနမှ စာရွက်စာတမ်းများသည် စိန်ခေါ်ရန် မရနိုင်သကဲ့သို့ ညှိနှိုင်း၍လည်း မရနိုင်ပေ။ ယခု အရေးကြီးဆုံးအချက် မိမိ၏ ခွန်အားကို မြှင့်တင်ရန်ဖြစ်သည်။ ခွန်အား လုံလောက်မှသာ လီချန်းယွမ် သို့မဟုတ် ဝမ်ယိဖန်တို့၏ လုပ်ကြံမှုကို ရှောင်ရှားနိုင်မည်ဖြစ်သည်။

ထိုအကြောင်းကို တွေးမိသောအခါ ချူးယွင်ဖန်းသည် အလွန်အလျင်လိုလာသည်။

"ကျုပ် စကြဝဠာအဆင့်ကို တတ်နိုင်သမျှ မြန်မြန် အဆင့်ဖြတ်ကျော်ရမယ်..." ချူးယွင်ဖန်းသည် တီးတိုး ရေရွတ်လိုက်သည်။

ကျင့်ကြံမှုအဆင့်အရ သူသည် ဒြပ်မဲ့လေ့လာသူအဆင့်တွင်သာ ရှိသေးသည်။ ဒြပ်မဲ့အဆင့်နှင့် အထက်သို့ အချိန်တိုအတွင်း တက်လှမ်းရန် အလွန်ခက်ခဲပေလိမ့်မည်။ သို့သော်လည်း သူ၏ တိုက်ခိုက်ရေးစွမ်းရည်နှင့် ကျင့်ကြံမှုအဆင့် ဘယ်သောအခါကမျှ မတူညီခဲ့ဘဲ တိုက်ခိုက်ရေးစွမ်းရည်သည် ကျင့်ကြံမှုအဆင့်ထက် အမြဲသာလွန်နေခဲ့သည်။ ဒြပ်မဲ့အဆင့်အထက်တွင် စကြဝဠာအဆင့်ဆိုသည့် ပိုမိုမြင့်မားသော နယ်ပယ်တစ်ခု တည်ရှိနေသေးသည်။

ကျင့်ကြံသူများသည် ကောင်းကင်နှင့် မြေကြီးကို ဆန့်ကျင်၍ သက်တမ်းကို မြှင့်တင်သည့် လမ်းကြောင်းများ ဖောက်ထွက်လေ့ရှိကြသည်။ ဒြပ်မဲ့အဆင့်ပြီးနောက် စကြဠာအဆင့်တည်ရှိသည်။

စကြဝဠာအဆင့်သို့ မရောက်မီတွင် လူသားတို့ကို နတ်ဘုရားငယ်များဟုသာ ခေါ်ဆိုနိုင်သည်။ ၎င်းတို့တွင် နတ်စွမ်းရည်အချို့ ရှိသော်လည်း ကောင်းကင်ဘုံ၏ အလိုကိုသာ လိုက်နာရသည်။ သို့သော် စကြဝဠာအဆင့်သို့ တက်လှမ်းနိုင်သည့်အခါ ၎င်းတို့ကို နတ်ဘုရားများဟု ခေါ်ဆိုနိုင်သည်။ ဤအဆင့်တွင် အပြိုင်စကြဝဠာကိုပင် ပြောင်းပြန်လှန်နိုင်သည်။ ၎င်းတို့၏ ခွန်အားသည် ဒြပ်မဲ့အဆင့် ကျင့်ကြံသူများ စိတ်ကူးမယဉ်နိုင်သော အတိုင်းအတာဖြစ်သည်။

ထို့ကြောင့်ပင် စကြဝဠာအဆင့်သို့ တက်လှမ်းနိုင်ခဲ့သည့် အစစ်အမှန်တပည့်များသည် အဆင့်အတန်း အလွန်မြင့်မားကြသည်။ ၎င်းတို့သည် မြင့်မြတ်၍ ဩဇာကြီးမားကြသည်။ စကြဝဠာအဆင့်သို့ တက်လှမ်းပြီးနောက် တစ်သက်တာလုံး ကြီးမားသော အသွင်ပြောင်းလဲမှုတစ်ခုဖြစ်ပေါ်လာသည်။ လူသားများကဲ့သို့ သက်တမ်းမရှည်သည့် မျိုးနွယ်စုများပင် နှစ် ၁၀၀၀ ကျော်မျှ ရှင်သန်နိုင်ကြသည်။ ဤအချက်ကို ကြည့်ခြင်းအားဖြင့် စကြဝဠာအဆင့်၏ စွမ်းအင်ကို မှန်းဆနိုင်သည်။

လူများစွာသည် အစစ်အမှန်တပည့်ဖြစ်လာ၍ စကြဝဠာအဆင့်သို့ ရောက်ရှိရန် အသည်းအသန် ကြိုးပမ်းကြသည်။ အဓိက အကြောင်းရင်းတစ်ခုမှာ ၎င်းတို့၏ သက်တမ်းကို မြှင့်တင်နိုင်ခြင်းကြောင့်ဖြစ်သည်။ လူသားများသည် သက်တမ်းမရှည်လျားသည့် မျိုးနွယ်စုဖြစ်သောကြောင့် သက်တမ်း တိုးမြင့်လာခြင်းသည် ကျင့်ကြံခြင်းအတွက် အလွန်အရေးပါသည်။ နှစ်ပေါင်းများစွာ အလွယ်တကူ အသက်ရှင်နိုင်သော နတ်ဆိုးမျိုးနွယ်စုနှင့် နှိုင်းယှဉ်ပါက လူသားများ၏သက်တမ်းသည် အလွန်တိုတောင်းလှသည်။ သို့သော် လူသားမျိုးနွယ်တွင် အားသာချက်တစ်ခုရှိသည်။ ကျင့်ကြံမှု ပြီးပြည့်စုံသွားသည်နှင့် အဆပေါင်းများစွာ တိုးတက်သွားမည်ဖြစ်သည်။ ထိုအခါ ၎င်းတို့သည် အခြားမျိုးနွယ်စုများထက် အဆများစွာ ပို၍မြန်ဆန်ကြသည်။

ချူးယွင်ဖန်းသည် စကြဝဠာအဆင့်သို့ ရောက်ရှိမှသာ လီချန်းယွမ်ထံမှ မိမိကိုယ်ကို ကာကွယ်နိုင်ကာ ဝမ်ယိဖန်ကိုလည်း သတ်ဖြတ်နိုင်မည်ဖြစ်သည်။ ကံကောင်းထောက်မစွာပင် သူ၏လက်ထဲတွင် ကောင်းကင်နတ်ဆိုးဆေးလုံး တစ်လုံး ကျန်ရှိနေသေးသည်။ ၎င်းသည် သူ၏ ကျင့်ကြံမှုကို ပိုမိုတိုးတက်စေရန် လုံလောက်သည်။ ထိုအခါ သူ၏ ကျင့်ကြံမှုသည် နောက်ထပ် ကြီးမားစွာ တိုးတက်လာပေလိမ့်မည်။

သူသည် ဒြပ်မဲ့ကျွမ်းကျင့်အဆင့်သို့ မရောက်ရှိသေးသော ထူးချွန်တပည့်သစ်တစ်ယောက်ဟု လူတိုင်း ထင်မှတ်နေကြသည်။ သို့သော် သူ၏ တိုက်ခိုက်နိုင်စွမ်းများ အမှန်တကယ် ပေါက်ကွဲထွက်လာသည့်အခါ အတွေ့အကြုံရင့် ထူးချွန်တပည့်များပင် သူနှင့် ယှဉ်နိုင်မည်မဟုတ်ပေ။ သူသည် သိုင်းကွက် အနည်းငယ်ဖြင့်ပင် ၎င်းတို့ကို သတ်ဖြတ်နိုင်သည်။

'အချိန်... ကျုပ် အခု လိုအပ်နေတာက အချိန်ပဲ' ချူးယွင်ဖန်းက ထိုသို့တွေးပြီးနောက် အကြံကောင်းတစ်ခု ရရှိသွားသည်။

တစ်ချိန်တည်းမှာပင် ဝမ်ယိဖန်သည်လည်း ချူးယွင်ဖန်း ပေါင်ထိုက်မြို့သို့ တာဝန်ထမ်းဆောင်ရမည်ဟူသော သတင်းကို ကြားသိလိုက်ရသည်။ ပင်မခန်းမဆောင်တွင် ထိုင်နေသော ဝမ်ယိဖန်သည် တစ်ခုခုကို စဥ်းစားမိသွားဟန်ဖြင့် သူ၏မျက်လုံးများတွင် အေးစက်သော အလင်းရောင်များ ပေါ်ပေါက်လာသည်။

"မင်းလိုမျိုး အောက်ခြေလူတန်းစားက လီချန်းယွမ်ကို ထိပါးရဲလိမ့်မယ်လို့ ကျုပ် မထင်ထားခဲ့ဘူး..." ဝမ်ယိဖန်က ရေရွတ်လိုက်သည်။

ထိုအမည်ကို တွေးမိလိုက်ချိန်တွင် လီချန်းယွမ်နှင့် တစ်ကြိမ် ဆုံတွေ့ခဲ့ဖူးကြောင်း ဝမ်ယိဖန်သတိသွားသည်။ ထိုအချိန်က သူသည် အစစ်အမှန်တပည့်ပင် မဖြစ်သေးသော်လည်း လီချန်းယွမ်သည် ကမ္ဘာတစ်ဝန်းလုံးတွင် ကျော်ကြားနေပြီဖြစ်သည်။ အချုပ်အခြာအာဏာပိုင်တစ်ယောက်၏ မရှုံးနိမ့်နိုင်သော အရှိန်အဝါသည် သူ၏ စိတ်ထဲတွင် ခိုင်မြဲစွာ စွဲထင်နေခဲ့သည်။ လီချန်းယွမ်သည် အစစ်အမှန်တပည့်အားလုံး၏ စံနှုန်းတစ်ခုဟု ဆိုနိုင်သည်။ လီချန်းယွမ်နှင့် ပခုံးချင်းယှဉ်နိုင်မည့်သူဟူ၍ အများအပြား မရှိခဲ့ပေ။ အရှုံးပေးသည်ဖြစ်စေ၊ အရှုံးမပေးသည်ဖြစ်စေ လီချန်းယွမ်၏ ခွန်အားကိုမူ သူ၏ စိတ်ထဲတွင် အသိအမှတ်ပြုနေဆဲဖြစ်သည်။

"ဒါပေမယ့် လီချန်းယွမ်ဖြစ်နေရင်ရော ဘာဖြစ်လဲ။ ကျုပ် မင်းကို သတ်ချင်ရင် တခြားသူတွေရဲ့ အကူအညီ မလိုဘူး" ဝမ်ယိဖန်က လှောင်ရယ်လိုက်သည်။

"တစ်နှစ်လား။ ဟားဟား"

သူသည် တစ်နှစ်တာ ကတိစကားကို ဂရုမစိုက်ပေ။ ချူးယွင်ဖန်းသည် ပုရွက်ဆိတ်တစ်ကောင်မျှသာဖြစ်သည်။ ယီယွင်ယောင်ကို စိုးရိမ်နေခြင်းကြောင့် မဟုတ်လျှင် တစ်နှစ်တာ ကတိကို သဘောမတူဘဲ ထိုနေရာတွင်ပင် ချူးယွင်ဖန်းကို သတ်ပစ်နိုင်သည်။

"ဂိုဏ်းထဲကနေ ထွက်သွားပြီး ပေါင်ထိုက်မြို့မှာ တာဝန်ထမ်းဆောင်နေချိန် ယီယွင်ယောင်က မင်းကို ဘယ်လို ကာကွယ်ပေးမလဲဆိုတာ ကြည့်ရသေးတာပေါ့။ ဘာမှ မလိုအပ်ဘူးလို့ ထင်တာပဲ။ အဲဒီမှာ ဗိုလ်မှူးကြီးတွေ အများကြီး သေသွားခဲ့တာဆိုတော့ တစ်ယောက်လောက် ထပ်သေသွားရင် ဘာဖြစ်တာမို့လို့လဲ"

ထိုသို့တွေးတောနေစဉ် ဝမ်ယိဖန်၏ မျက်နှာပေါ်တွင် အေးစက်သော အပြုံးတစ်ခု ပေါ်ပေါက်လာသည်။ သူသည် သူ၏ လူယုံတစ်ဦးကို ဆင့်ခေါ်ကာ ညွှန်ကြားချက်အချို့ ပေးလိုက်ပြီးနောက် ပင်မခန်းမဆောင်မှ ကျေနပ်စွာ ထွက်ခွာသွားသည်။

ဝမ်ယိဖန်သည် သီးသန့်ကျင့်ကြံရာ နေရာဆီသို့ ဦးတည်ထွက်ခွာသွားသည်။ မကြာမီတွင် ချူးယွင်ဖန်းနှင့် သူ၏ နောက်လိုက် ၁၁ ဦးတို့သည် လူတိုင်း၏ စောင့်ကြည့်မှုအောက်တွင် ခရီးထွက်သွားကြသည်။ သို့သော် လူတိုင်း အံ့အားသင့်သွားသည့်အချက်မှာ ၎င်းတို့သည် ပေါင်ထိုက်မြို့သို့ ပျံသန်းသွားခြင်း မဟုတ်ဘဲ မြင်းများ စီးကာ ခရီးထွက်သွားကြသည်။

ချူးယွင်ဖန်းနှင့် အဖွဲ့သားများသည် အလျင်လိုပုံမရကြပေ။ ပေါင်ထိုက်မြို့သည် နဂါးရေကန်နှင့် ကျားဂူဖြစ်ကြောင်း လူများစွာ နားလည်ကြသည်။ မည်သူသည် သေဆုံးရမည့်နေရာသို့ အလျင်စလို ခရီးနှင်မည်နည်း။ သို့သော် ဤခရီးသည် အမှန်တကယ် မုန်တိုင်းတစ်ခုဖြစ်လာမည်ကို မည်သူမျှ မသိကြပေ။

အခန်း (၁၇၁၈) အလယ်အလတ် ဒြပ်မဲ့လေ့လာသူအဆင့်သို့ ရောက်ရှိခြင်းနှင့် အင်အားကြီး ရန်သူ၏ တိုက်ခိုက်မှု

ကြီးမြတ်သောတရှ၏ နယ်စပ်အနီးတွင် တရားဝင်လမ်းမကြီးတစ်ခု တည်ရှိသည်။ ထိုလမ်းမကြီးသည် ရထားလုံးဆယ်စင်း ဘေးချင်းယှဉ်၍ မောင်းနှင်နိုင်သည်အထိ ကျယ်ဝန်းသည်။ ထိုနေ့တွင် မြင်းများ စီးနင်းနေသော လူတစ်စုသည် ရထားလုံးတစ်စင်းကို ဝန်းရံ၍ ထိုလမ်းမပေါ်တွင် စိမ်ပြေနပြေ ခရီးနှင်နေကြသည်။ ယူချူးယွင်သည် မြင့်မား၍ သန်မာသော မြင်းပေါ်တွင် စီးနင်းလျက်ရှိ၍ သူ၏အကြည့်များသည် အဝေးသို့ အဆက်မပြတ် ကြည့်ရှုနေခဲ့ရာ သူ၏အမူအရာသည် သတိဝီရိယရှိနေသည်။ သူ့အနောက်တွင် မြင်းစီးနေသည့် လူဆယ်ဦး လိုက်ပါလာကြသည်။ ၎င်းတို့တစ်ဦးစီသည် ပြင်းထန်သော အရှိန်အဝါများ ရှိကြသည်။ ၎င်းတို့အားလုံးသည် ပေါင်ထိုက်မြို့သို့ ဦးတည်နေကြသည့် ချူးယွင်ဖန်း၏ နောက်လိုက်များဖြစ်ကြသည်။

၎င်းတို့သည် ခရီးတစ်လျှောက်လုံးတွင် အေးချမ်းစွာပင် ခရီးနှင်ခဲ့ကြသည်။ လမ်းတွင်တွေ့ဆုံရသည့် သူပုန်များသည် ၎င်းတို့၏ လျှို့ဝှက်ဆန်းကြယ်သော အရှိန်အဝါကို မြင်လိုက်သည်နှင့် ပြဿနာမရှာဝံ့ကြပေ။ ကြယ်ကြွေကောင်းကင်ဂိုဏ်းတွင် ထိပ်တန်းကျင့်ကြံသူများဟု မဆိုနိုင်သော်လည်း ၎င်းတို့အားလုံးသည် ပြင်ပလောကတွင် အင်အားကြီး ကျွမ်းကျင်သူများဖြစ်ကြသည်။ အလယ်အလတ်အဆင့် ဂိုဏ်းများရှိ ထိပ်တန်းကျွမ်းကျင်သူအချို့၏ ကျင့်စဥ်များပင် ၎င်းတို့နှင့် ထပ်တူကျပေသည်။

သို့သော်လည်း ယူချူးယွင်သည် စိတ်အေးလက်အေး မနေဝံ့ပေ။ ချူးယွင်ဖန်း ရန်စထားသူများသည် သာမန်လူများ မဟုတ်ကြောင်း သူ သိထားသောကြောင့်ဖြစ်သည်။ ယခုအချိန်အထိ အဆင်ပြေနေသော်လည်း အမြဲတမ်း ဤကဲ့သို့ ဖြစ်နေလိမ့်မည်ဟု မဆိုလိုပေ။ ချူးယွင်ဖန်းသည် မည်သို့ကြောင့် ပေါင်ထိုက်မြို့သို့ တိုက်ရိုက်ပျံသန်းမသွားဘဲ ရထားလုံးဖြင့် သွားရသည်ကို သူ နားမလည်နိုင်ပေ။

တိုက်ရိုက်ပျံသန်းခဲ့လျှင် မတော်တဆဖြစ်ရပ်မျိုး ကြုံတွေ့နိုင်ခြေ ပို၍နည်းပါးပေလိမ့်မည်။ ချူးယွင်ဖန်းသည် ကြယ်ကြွေကောင်းကင်ဂိုဏ်းမှ ထွက်ခွာပြီးနောက် ရထားလုံးတစ်စင်းကို ပြောင်းလဲစီးနင်းခဲ့သည်။ ပြီးနောက် တစ်ဖွဲ့လုံး ဖြည်းညင်းစွာ ရှေ့ဆက်လိုက်ကြသည်။

ချူးယွင်ဖန်းသည် အလျင်လိုပုံမပေါ်ပေ။ ကံကောင်းထောက်မစွာဖြင့် စစ်ဝန်ကြီးဌာနမှ ပေးအပ်သည့် တာဝန်ထမ်းဆောင်ရန် ခန့်အပ်လွှာတွင် ခရီးသွားရန် အချိန်အလုံအလောက် ပေးအပ်ထားခဲ့သည်။ မဟုတ်လျှင် ၎င်းတို့အားလုံး အချိန်မီရောက်ရှိနိုင်မည် မဟုတ်ပေ။ အားလုံး၏ စိတ်ထဲတွင် သံသယများရှိနေသော်လည်း ချူးယွင်ဖန်းကို မေးမြန်းရန် မည်သူမျှ မဝံ့ရဲကြပေ။ ယခုအချိန်တွင် ရထားလုံးထဲ၌ မည်သူမျှ မရှိချေ။ ချူးယွင်ဖန်းသည် ရထားလုံးထဲတွင် မရှိဘဲ တောင်မြစ်ပန်းချီကားထဲသို့ ဝင်ရောက်ကာ ယူချူးယွင်နှင့် အခြားသူများကိုသာ ရထားလုံးအား ဆက်လက်မောင်းနှင်ခိုင်းထားသည်။

တောင်မြစ်ပန်းချီကားထဲတွင် ချူးယွင်ဖန်းသည် ကောင်းကင်ယံတွင် တင်ပျဉ်ခွေထိုင်နေသည်။ သူ၏ခန္ဓာကိုယ်မှ အလင်းရောင်ဖျော့ဖျော့များ ထွက်ပေါ်နေ၍ ချွေးပေါက်များမှ မြူခိုးများ ထွက်လာသည်။ ကြောက်မက်ဖွယ်ကောင်းသော စွမ်းအင်များသည် သူ၏ခန္ဓာကိုယ်ရှိ ဆဲလ်များကို အဆက်မပြတ် ဆေးကြောပေးနေသည်။

ကျင့်ကြံမှုလမ်းစဉ်တွင် အချိန်အတိုင်းအတာဟူ၍ မရှိပေ။ ပြင်ပလောကတွင် တစ်လကြာမြင့်သွားခဲ့သည်။ ယူချူးယွင်သည် ၎င်းတို့၏ ခရီးသွားနှုန်းကို ရည်ရွယ်ချက်ရှိရှိ ထိန်းချုပ်ထားသည်။ မြင်း၏ ရုပ်ပိုင်းဆိုင်ရာ ကြံ့ခိုင်မှုဖြင့်ဆိုလျှင် တစ်ရက်လျှင် မိုင်တစ်ထောင်၊ တစ်ညလျှင် မိုင်ရှစ်ရာ ခရီးသွားရန် ပြဿနာမရှိပေ။ ၎င်းတို့သည် တစ်လအတွင်း ကြီးမြတ်သောတရှ၏ နယ်စပ်သို့ ချဉ်းကပ်လာသည်။ အဖွဲ့သည် ပေါင်ထိုက်မြို့သို့ ရောက်ရှိရန် တစ်ရက်သာ လိုအပ်တော့သည်။

နယ်စပ်နှင့် နီးကပ်လေ ပြင်းထန်သော အငွေ့အသက်များ ပို၍ခံစားရလေဖြစ်သည်။ ဤနေရာရှိ မြို့တိုင်းသည် ပြည်နယ်အတွင်းပိုင်းနှင့် မတူညီကြပေ။ ၎င်းတို့သည် ခံတပ်များကဲ့သို့ လုံခြုံရေး တင်းကျပ်ထားကြသည်။ မည်သို့ဆိုစေကာမူ ဤနေရာသည် နယ်စပ်နှင့် နီးကပ်နေသည်။ ဤနေရာသည် နှစ်ရှည်လများအတွင်း စစ်မြေပြင်တစ်ခုဖြစ်လာလေ့ရှိသည်။

ဘုံး

ချူးယွင်ဖန်း၏ ခန္ဓာကိုယ်ထဲမှ ကြီးမားသော ပေါက်ကွဲမှုတစ်ခု ထွက်ပေါ်လာကာ ရေလှိုင်းများကဲ့သို့ ပြန့်နှံ့သွားသည်။ စွမ်းအင်များ ပတ်ဝန်းကျင်တွင် ကြောက်မက်ဖွယ် မုန်တိုင်းတစ်ခုအဖြစ် ပြောင်းလဲသွား၍ သူသည် ထိုမုန်တိုင်း၏ အလယ်ဗဟိုဖြစ်လာသည်။ သူ၏တိုးတက်မှုကို ပိတ်ဆို့ထားသော ဒြပ်မဲ့လေ့လာသူအဆင့်၏ အတားအဆီးများ ထိုစွမ်းအင်လှိုင်းကြောင့် ကွဲအက်သွားကြောင်း ခံစားလိုက်ရသည်။ ချူးယွင်ဖန်း၏ကျင့်စဥ်သည် ဒြပ်မဲ့လေ့လာသူအဆင့် အလယ်ပိုင်းသို့ ရောက်ရှိသွားသည်။

တစ်လအတွင်း ကျင့်ကြံမှုများ ထပ်မံတိုးတက်လာခဲ့ရာ သူ၏ တိုက်ခိုက်ရေးစွမ်းရည်သည်လည်း နောက်တစ်ဆင့်သို့ မြင့်တက်လာသည်။ ဤတိုးတက်မှုနှုန်းသည် အလွန်တည်ငြိမ်သည်။ တစ်ချိန်တည်းမှာပင် သူပိုင်ဆိုင်သော ဆေးလုံးအားလုံး ကုန်ဆုံးသွားခဲ့သည်။ သို့သော် အကျိုးသက်ရောက်မှု များပြားလှသည်။ အချိန်တိုအတွင်းတွင် ဒြပ်မဲ့အဆင့် အထွတ်အထိပ်မှ အဆင့်နှစ်ဆင့် တက်လှမ်းနိုင်ခဲ့သည်။ ချူးယွင်ဖန်း၏ခွန်အားသည် နှစ်ဆကျော်မျှ တိုးတက်လာသည်။

ထို့အပြင်အတွင်းစည်းတပည့် ပြိုင်ပွဲတွင် ဆုလာဘ်အဖြစ်ရရှိခဲ့သော အလယ်အလတ်အဆင့် ဝိညာဉ်ကျောက်တုံး တစ်သန်း၏ တစ်ဝက်ကျော်ကိုလည်း အသုံးပြုလိုက်သည်။ ချူးယွင်ဖန်း၏ ကျင့်ကြံမှုတိုးတက်နှုန်းသည် အလွန်မြန်ဆန်သော်လည်း တစ်ချိန်တည်းမှာပင် သူ သုံးစွဲလိုက်ရသော အရင်းအမြစ်များကို သာမန်လူများ စိတ်ကူးယဉ်၍ပင် မရနိုင်ပေ။ ဤသည်မှာ ချူးယွင်ဖန်း ကြယ်ကြွေကောင်းကင်ဂိုဏ်းသို့ ဝင်ရောက်ရန် ရွေးချယ်ရသည့် အကြောင်းရင်းဖြစ်သည်။ ဂိုဏ်း၏ အထောက်အပံ့ မရှိလျှင် ဤကဲ့သို့ တိုးတက်ရန် ခက်ခဲပေလိမ့်မည်။

'ဒီအဆင့်နဲ့ မလုံလောက်သေးဘူး။ နောက်တစ်ဆင့်တက်ဖို့ လိုသေးတယ်။ ဒြပ်မဲ့ကျွမ်းကျင်အဆင့်ကို ရောက်နိုင်ရင် အကောင်းဆုံးပဲ'

ချူးယွင်ဖန်းသည် ဒြပ်မဲ့ကျွမ်းကျင်အဆင့်သို့ ရောက်ရှိသွားပါက စကြဝဠာအဆင့် ကျင့်ကြံသူများနှင့်ပင် တိုက်ခိုက်နိုင်ပေလိမ့်မည်။ သူသည် ထိုအချိန်တွင် မိမိကိုယ်ကို အမှန်တကယ် ကာကွယ်နိုင်စွမ်းရှိလာလိမ့်မည်။ ချူးယွင်ဖန်းသည် ရုတ်တရက်ဆိုသလိုပင် အလွန်အန္တရာယ်ရှိသော အငွေ့အသက်တစ်ခုကို ခံစားလိုက်ရသည်။ သူသည် ခေါင်းမော့၍ မျက်လုံးများကို ဖွင့်ကြည့်လိုက်သည်။ မော့ကြည့်လိုက်ရာ ကောင်းကင်မှ ကျဆင်းလာသော ကြောက်မက်ဖွယ် လက်ဖဝါးတစ်ခုသည် ရထားလုံးကို ရိုက်ချလာကြောင်း မြင်တွေ့လိုက်ရသည်။

ဘန်း

ရထားလုံးသည် ချက်ချင်းဆိုသလိုပင် အပိုင်းပိုင်းကွဲကြေသွား၍ ဆွဲလာသော မြင်းများသည်လည်း ပျက်သုဥ်းသွားသည်။

"ဘယ်သူလဲ" ယူချူးယွင်သည် ချက်ချင်း နိုးကြားလာ၍ ကောင်းကင်ကို မော့ကြည့်ကာ အော်ဟစ်လိုက်သည်။

အနက်ရောင်ဝတ်ရုံ ဝတ်ဆင်ထားသော လူတစ်စုသည် ကောင်းကင်တွင် ပေါ်ပေါက်လာကြောင်း သူ မြင်တွေ့လိုက်ရသည်။ ၎င်းတို့တစ်ဦးစီသည် အလွန်ပြင်းထန်သော အရှိန်အဝါများ ထုတ်လွှတ်နေသည်။ ၎င်းတို့သည် မိုင်အနည်းငယ် ပတ်လည်အထိ ဖုံးလွှမ်းသွား၍ ယူချူးယွင်နှင့် အခြားလူများကို အရှိန်အဝါများဖြင့် ချက်ချင်း ဖိနှိပ်ထားသဖြင့် မည်သူမျှ မလှုပ်ရှားနိုင်တော့ပေ။ ယူချူးယွင်နှင့် အခြားသူများ ထိတ်လန့်သွားကြသည်။ ဒြပ်မဲ့ကျွမ်းကျင်အဆင့် ကျင့်ကြံသူများဖြစ်လေသလော။ ဤအနက်ရောင် ဝတ်စုံနှင့် လူများသည် အမှန်တကယ် ဒြပ်မဲ့ကျွမ်းကျင်အဆင့်များဖြစ်သည်။

ဒြပ်မဲ့ကျွမ်းကျင်အဆင့်ဟူသည် လွယ်လွယ်ရရှိနိုင်သည့် ကျင့်ကြံမှုအဆင့်မဟုတ်ကြောင်း သိထားရပေလိမ့်မည်။ ၎င်းတို့သည် အုပ်ချုပ်သူလူတန်းစားများဖြစ်ကြသည့် စကြဝဠာအဆင့် ကျင့်ကြ့သူများကဲ့သို့ မမြင့်မားသော်လည်း၊ ဂိုဏ်းငယ်များစွာ၏ ဂိုဏ်းခေါင်းဆောင်များသည် ဒြပ်မဲ့ကျွမ်းကျင်အဆင့်တွင်သာ တည်ရှိကြသည်။ ကြီးမြတ်သောတရှတွင် စစ်သားတစ်ဦးသည် ဒုတိယဗိုလ်မှူးကြီးဖြစ်လာနိုင်သည်။ သို့သော် ဤလူများသည် သွေးစွန်းသော အငွေ့အသက်များနှင့် နတ်ဆိုးဆန်သော အရိပ်အမြွက်များ သယ်ဆောင်ထားကြသည်။ ၎င်းတို့သည် ဖြောင့်မတ်သောသူများ မဟုတ်ကြောင်း သိသာထင်ရှားသည်။

"ချူးယွင်ဖန်းဆိုတာ ဘာမို့လို့လဲ။ သူက သာမန်ပါပဲ။ သူ့ကို လက်ဖဝါးတစ်ချက်နဲ့တင် သတ်နိုင်တယ်" မျက်နှာဖုံးစွပ်ထားသော သူပုန်ခေါင်းဆောင်သည် မထီမဲ့မြင်ပြုသည့် လေသံဖြင့် ပြောလိုက်သည်။

ဤနေရာသို့ မရောက်လာမီ ချူးယွင်ဖန်းသည် အလွန်ကောက်ကျစ်သည့်အပြင် ကျင့်စဥ်သည်လည်း အလွန်လျှို့ဝှက်ဆန်းကြယ်ကြောင်း သတိပေးခံခဲ့ရသည်။ ၎င်းတို့ကို သတိထားရန် ပြောထားသော်လည်း ယခု အခြေအနေအရ ချူးယွင်ဖန်းသည် နာမည်နှင့် ထိုက်တန်ပုံမပေါ်ပေ။ သူသည် ကြယ်ကြွေကောင်းကင်ဂိုဏ်း၏ အတွင်းစည်းတပည့် ပြိုင်ပွဲတွင် ချန်ပီယံရရှိထားသော်လည်း နောက်ဆုံးတွင် ဒြပ်မဲ့လေ့လာသူအဆင့်တွင်သာ ရှိနေသည်။ ဒြပ်မဲ့လေ့လာသူအဆင့်တစ်ဦးကို ဤဒြပ်မဲ့ကျွမ်းကျင်အဆင့်အားလုံး စုပေါင်းတိုက်ခိုက်ခြင်းသည် အလွန်ဇိမ်ကျသော စီစဉ်မှုဖြစ်သည်။

"အရှင့်ရဲ့ အမိန့်အတိုင်း ကျန်တဲ့သူတွေကိုပါ သတ်ပစ်ရမယ်။ တစ်ယောက်မှ မချန်ထားနဲ့" သူပုန်ခေါင်းဆောင်က အော်ပြောလိုက်သည်။

ချက်ချင်းပင် အနက်ရောင် ဝတ်စုံဝတ်ဆင်ထားသူများ ယူချူးယွင်နှင့် အခြားလူများကို အရပ်မျက်နှာပေါင်းစုံမှ တိုက်ခိုက်လာကြသည်။

"အစွမ်းကုန် တိုက်ခိုက်ကြ" ယူချူးယွင်သည် အံကြိတ်ကာ ပြောလိုက်သည်။

ယခုအချိန်တွင် အခြားစကားများ ပြောနေရန် အချိန်မရှိတော့ပေ။ သို့သော် ၎င်းတို့သည် ကြယ်ကြွေကောင်းကင်ဂိုဏ်း၏ ထိပ်တန်းတပည့်များဖြစ်ကြသည်။ စိတ်ပျက်အားငယ်ရသည့် အခြေအနေတွင် ရှိနေသော်လည်း မတိုက်ခိုက်ဘဲ အရှုံးပေးမည် မဟုတ်ပေ။

"ဟားဟားဟား၊ မင်းတို့က မင်းတို့ရဲ့ ခွန်အားကို အထင်ကြီးလွန်းနေတာပဲ"

အနက်ရောင် ဝတ်စုံဝတ်နှင့် သူပုန်းများအနက် တစ်ဦးသည် ကောက်ကျစ်သော လေသံဖြင့် ရယ်မောလိုက်သည်။ သို့သော် ထိုစကားများ ပြီးဆုံးသည်နှင့် သူ၏လည်ချောင်းတွင် နာကျင်မှုတစ်ခု ခံစားလိုက်ရပြီးနောက် သူ၏နောက်ကျောကို ရုတ်တရက် မြင်တွေ့လိုက်ရသည်။

'ငါ သေသွားပြီလား'

သူ၏ဦးခေါင်း ပြတ်ထွက်သွားသောကြောင့် သူ၏နောက်ကျောကို မြင်တွေ့နိုင်ခဲ့ခြင်းဖြစ်သည်။ ထိုလူသည် ပွဲချင်းပြီး သေဆုံးသွားလေသည်။

အခန်း (၁၇၁၉) အစုလိုက်အပြုံလိုက် လူသတ်ပွဲကြီး

အရာအားလုံးသည် အလွန်မြန်ဆန်စွာ ဖြစ်ပျက်သွားခဲ့ရာ မျက်စိတစ်မှိတ်အတွင်း ပြီးဆုံးသွားလေသည်။ သူပုန်များအားလုံး တုံ့ပြန်ရန်အချိန်ပင် မရလိုက်ပေ။ ၎င်းတို့သည် လေထုထဲ၌ ဓားအလင်းတန်းတစ်ခု ရုတ်တရက် ပေါ်လာခြင်းကိုသာ မြင်တွေ့လိုက်ရသည်။ ထိုဓားချက်ဖြင့် တိုက်ခိုက်ခံလိုက်ရသူသည် အနည်းငယ်မျှ မတုံ့ပြန်နိုင်ဘဲ ချက်ချင်းပင် အသက်ပျောက်သွားလေသည်။

"ဘယ်သူလဲ"

ဤသူပုန်များအားလုံးသည် ဒြပ်မဲ့ကျွမ်းကျင်အဆင့်များဖြစ်ကြသည့်အပြင် အလောင်းတောင်များနှင့် သွေးပင်လယ်များကြားတွင် ရုန်းကန်တိုက်ခိုက်လာသူများဖြစ်ကြသည်။ ၎င်းတို့၏ တုံ့ပြန်မှုသည် အထူးမြန်ဆန်လှသဖြင့် ချက်ချင်းပင် သတိဝီရိယရှိသွားကြသည်။ သို့သော်လည်း အချည်းအနှီးသာဖြစ်ပေသည်။ သတိပေးခြင်းပင်မရှိဘဲ ဓားအလင်းတန်းနှစ်ခု လေထုထဲတွင် ထပ်မံပေါ်လာပြီးနောက် သူပုန်နှစ်ဦး၏ ခန္ဓာကိုယ်ကို ထိုးဖောက်သွားသည်။

သူပုန်နှစ်ဦး၏ မျက်လုံးများ ပြူးကျယ်သွားကြသည်။ ဤမျှလွယ်ကူစွာ သတ်ဖြတ်ခံရလိမ့်မည်ဟု ၎င်းတို့ တစ်ခါမျှ မတွေးခဲ့ဖူးပေ။ ၎င်းတို့သည် ရန်သူကိုပင် မမြင်လိုက်ရပေ။ နောက်ထပ် အလောင်းနှစ်လောင်း ကောင်းကင်ယံမှ ပြုတ်ကျလာသည်။ လူနှစ်ဦး ထပ်မံသတ်ဖြတ်ခံလိုက်ရသဖြင့် ကျန်ရှိနေသော သူပုန်များ ကြောက်လန့်တကြားဖြစ်သွားကြသည်။ ၎င်းတို့သည် ခြေလှမ်းများကို ရပ်တန့်လိုက်ကြသည်။ ယူချူးယွင်နှင့် အခြားသူများကို မည်သို့မျှ ဆက်လက်လိုက်ဖမ်းရန် ရဲဝံ့ကြမည်နည်း။

"ကျုပ်တို့တွေ အသက်ရှင်ပြီ"

ယူချူးယွင်နှင့် အခြားသူများသည် ချက်ချင်းပင် စိတ်သက်သာရာရသွားကြသည်။ ၎င်းတို့သည် ငရဲတံခါးဝမှ ပြန်လည်လွတ်မြောက်လာသကဲ့သို့ ခံစားလိုက်ရသည်။

"အဲဒီဓားအလင်းတန်းက... စီနီယာချူး မဟုတ်လား" ယူချူးယွင်သည် ဦးစွာသဘောပေါက်လိုက်သည်။ အကြောင်းမှာ သူသည် ချူးယွင်ဖန်း​၏တိုက်ခိုက်မှုကို ယခင်က မြင်တွေ့ဖူးသောကြောင့်ဖြစ်သည်။ သူသည် အစောပိုင်းရှိ ဓားအလင်းတန်းများနှင့် အလွန်ပင် ရင်းနှီးနေသည်။

"ဘယ်သူလဲ၊ ထွက်လာခဲ့စမ်း၊ သူရဲဘောကြောင်တဲ့ကောင်" သူပုန်ခေါင်းဆောင်က ဒေါသတကြီး အော်ဟစ်လိုက်သည်။ သူ၏မျက်လုံးများတွင် ပြင်းထန်သော သတ်ဖြတ်လိုစိတ်များ တောက်ပနေသည်။

သူ၏ ရဲဘော်ရဲဘက်များသည် မရေမတွက်နိုင်သော ဝိုင်းရံတိုက်ခိုက်မှုများမှ လွတ်မြောက်လာကြ၍ အလောင်းတောင်များနှင့် သွေးပင်လယ်များကြားတွင် တိုက်ပွဲဝင်ခဲ့ကြသော်လည်း ယခုအချိန်ထိ မသေဆုံးခဲ့ကြချေ။ ယခုမူ ရှင်းပြ၍မရနိုင်သော အကြောင်းပြချက်များဖြင့် ဤနေရာတွင် သေဆုံးသွားကြသည်။ ထို့ကြောင့် သူ မည်သို့လျှင် ဒေါသထွက်ခြင်းမရှိဘဲ နေနိုင်မည်နည်း။

"ခင်ဗျားတို့လို ခေါင်းကို ဝှက်၊ အမြီးကိုပဲ ပြတဲ့ သူရဲဘောကြောင်တဲ့ ကြွက်တွေက ဒီလိုစကားမျိုး ပြောရဲတယ်ပေါ့လေ။ တကယ့်ကို ရယ်စရာပဲ"

ကြည်လင်ပြတ်သားသော အသံတစ်ခု ထွက်ပေါ်လာပြီးနောက် လေထုထဲမှ လူတစ်ယောက် ရုတ်တရက် ထွက်ပေါ်လာသည်။ ထိုလူသည် ချူးယွင်ဖန်း မဟုတ်လျှင် ဘယ်သူဖြစ်မည်နည်း။

"တကယ် စီနီယာချူးပဲ၊ ကျုပ် သိနေတယ်၊ သူ ဒီလောက်လွယ်လွယ်လေး သေသွားစရာ အကြောင်းမရှိဘူး" ယူချူးယွင်က ဝမ်းမြောက်စွာ အော်ပြောလိုက်သည်။

အခြားသူများ၏မျက်နှာတွင်လည်း ပျော်ရွှင်သော အမူအရာများ ပေါ်လာကြသည်။ ချူးယွင်ဖန်း ရောက်ရှိလာခြင်းသည် ၎င်းတို့၏ ယုံကြည်မှုကို ချက်ချင်းပင် မြင့်တက်သွားစေသည်။

"ဒါဆို မင်းက မသေသေးဘူးပေါ့"

သူပုန်ခေါင်းဆောင်သည် ချူးယွင်ဖန်းကို စိုက်ကြည့်လိုက်သည်။ သူသည် ချူးယွင်ဖန်းကို အပြတ်ရှင်းပစ်လိုက်ပြီဟု ထင်မှတ်ခဲ့သော်လည်း၊ ချူးယွင်ဖန်းသည် အသက်ရှင်နေရုံသာမကဘဲ မိမိ၏ ရဲဘော်သုံးဦးကိုပင် သတ်ဖြတ်သွားလိမ့်မည်ဟု မည်သူ ထင်မှတ်ထားမည်နည်း။

"ကျုပ် မင်းကို အထင်သေးမိသွားတာပဲ"

ချူးယွင်ဖန်းသည် သူပုန်ခေါင်းဆောင်ကို အထင်အမြင်သေးစွာ ကြည့်လိုက်သည်။ ၎င်းတို့သည် အခြားလူတစ်ယောက်၏ စေခိုင်းမှုကြောင့် တိုက်ခိုက်လာခြင်းဖြစ်ပေသည်။ ထိုလူသည် ဝမ်ယိဖန်နှင့် လီချန်းယွမ်အနက် မည်သူဖြစ်မည်ကို သူ မသိသော်လည်း ဤအကြောင်းအရာသည် အရေးမကြီးပေ။ ထိုလူနှစ်ဦးသည် သူ၏ ရန်သူများဖြစ်သောကြောင့် အတည်ပြုရန် မလိုအပ်ပေ။ မည်သို့ပင်ဆိုစေကာမူ နောက်ဆုံး၌ ၎င်းတို့ကြားတွင် တိုက်ပွဲတစ်ခုဖြစ်လာပေလိမ့်မည်။

"ဒါပေမယ့် မင်း ဘယ်လောက်ပဲ ပရိယာယ်များများ မင်းကို အပိုင်းပိုင်းဖြတ်ပြီးရင် မင်းရဲ့ ဝိညာဉ်နဲ့ တစ္ဆေတွေကို အစာကျွေးပစ်မယ်။ မဟုတ်ရင် ကျုပ် အမုန်းတရားတွေ ပျောက်ကွယ်သွားမှာ မဟုတ်ဘူးကွ" သူပုန်ခေါင်းဆောင်က ဟိန်းဟောက်လိုက်သည်။

"ခင်ဗျားက ကျုပ်ကို သတ်ချင်လို့လား" ချူးယွင်ဖန်းက လှောင်ရယ်လိုက်သည်။

"လုပ်နိုင်မလား ကြည့်ကြတာပေါ့။ ဖြစ်ချင်တော့ ကျုပ်လည်း အခုမှ ရာထူးစယူခါစဆိုတော့ ထောင့်ပံ့မှုတွေ လိုအပ်နေတာ။ ကြည့်ရတာ ခင်ဗျားတို့က လူကောင်းတွေဖြစ်မယ့်ပုံ မပေါ်ဘူး။ ကျုပ် ခင်ဗျားတို့ခေါင်းတွေကို ဖြတ်ပြီး စစ်ဝန်ကြီးဌာနဆီက ဆုလာဘ်တွေ တောင်းယူမှပဲ။ ဒြပ်မဲ့ကျွမ်းကျင်အဆင့်တွေဆိုတော့ သာမန်လူတွေ မဟုတ်တာတော့ သေချာတယ်။ ခင်ဗျားတို့ကို ဆုလာဘ်တွေနဲ့ လဲလှယ်လို့ ရမှာပါ"

ချူးယွင်ဖန်းသည် အနည်းငယ်မျှ စိုးရိမ်ခြင်းမရှိဘဲ မောက်မာစွာ ပြောနေခြင်းကို မြင်သောအခါ သူပုန်များ ချက်ချင်းပင် ဒေါသထွက်သွားကြသည်။ ထိုအခါ သူပုန်ခေါင်းဆောင်က အော်ဟစ်လိုက်သည်။

"သူ့ကို သတ်ကြစမ်း၊ ပြီးရင် ကျန်တဲ့သူတွေကိုပါ သတ်ပစ်လိုက်။ သတိထားကြ၊ ဒီကောင်က ရက်စက်ကြမ်းကြုတ်ပြီး ပရိယာယ်များတယ်"

သူပုန်ခေါင်းဆောင်၏ စကားကို ကြားသောအခါ သူပုန်များအားလုံးသည် ထူးဆန်းသော အော်သံများနှင့်အတူ အရှေ့သို့ ပြေးဝင်လာကာ ချူးယွင်ဖန်းတို့အုပ်စုကို လေးဘက်လေးလံမှ ဝိုင်းရံလိုက်ကြသည်။ ၎င်းတို့သည် ပူးပေါင်းတိုက်ခိုက်နည်းကို သိရှိထားပုံရသည်။ ၎င်းတို့သည် အတူတကွ တိုက်ခိုက်၍ ဖွဲ့စည်းပုံတစ်ခုကို ပြုလုပ်လိုက်ကြသည်။

ချူးယွင်ဖန်းသည် ၎င်းတို့ကို လှည့်ပင်မကြည့်ဘဲ လျှပ်စီးကြောင်းတစ်ခုကို စီးနင်း၍ စတင်လှုပ်ရှားလိုက်သည်။ နောက်တစ်ခဏတွင် သူသည် သူပုန်တစ်ဦး၏ အရှေ့သို့ ရောက်ရှိသွားသည်။ အနက်ရောင်ဝတ်ရုံ ဝတ်ဆင်ထားသော သူပုန်သည် တုံ့ပြန်ရန် အချိန်ပင် မရလိုက်ဘဲ ခေါင်းပြတ်သွားလေသည်။

"သေလိုက်"

အနက်ရောင်ဝတ်ရုံ ဝတ်ဆင်ထားသော သူပုန်များသည် ထိုမြင်ကွင်းကို မြင်သောအခါ ဟိန်းဟောက်လျက် ချူးယွင်ဖန်းကို တိုက်ခိုက်လာကြသည်။ ထိုအချိန်တွင် ချူးယွင်ဖန်း၏ ခေါင်းပေါ်၌ ဆေးမီးဖိုတစ်လုံး ပေါ်ပေါက်လာ၍ သူ့ကို ကာကွယ်ပေးထားကြောင်း ၎င်းတို့ မြင်တွေ့လိုက်ရသည်။ တိုက်ခိုက်မှု အမျိုးမျိုးကို ဆေးမီးဖိုက စုပ်ယူလိုက်သဖြင့် ချူးယွင်ဖန်းကို အန္တရာယ် မပေးနိုင်ခဲ့ပေ။

"ခင်ဗျားတို့လို အမှိုက်သရိုက်တွေက ကျုပ်ကို နိုင်မယ်လို့ ထင်နေတာလား" ချူးယွင်ဖန်းက အော်ဟစ်ပြီးနောက် တောင်မြစ်ဆေးမီးဖို၏ ထောင့်တစ်ခုကို လက်တစ်ဖက်ဖြင့် ကိုင်လိုက်သည်။ ဧရာမဆေးမီးဖိုကြီး စတင်ကခုန်လာ၍ ကြောက်မက်ဖွယ် ဒီရေလှိုင်းများဖြစ်ပေါ်လာသည်။

ဘုံး

အနက်ရောင်ဝတ်ရုံ ဝတ်ဆင်ထားသော သူပုန်တစ်ဦးသည် ရှောင်တိမ်းချိန်ပင် မရလိုက်ဘဲ ဆေးမီးဖိုဖြင့် ရိုက်ခတ်ခံလိုက်ရသည်။ ထိုသူပုန်သည် သွေးများ အန်ထွက်၍ လွင့်စင်သွားခဲ့ရာ မြေပြင်ပေါ်သို့ ပြင်းထန်စွာ ပြုတ်ကျပြီးနောက် လှုပ်ရှားမှုများ ရပ်တန့်သွားလေသည်။ ဒြပ်မဲ့ကျွမ်းကျင်အဆင့် သူပုန်တစ်ဦးသည် ချူးယွင်ဖန်း၏ တောင်မြစ်ဆေးမီးဖိုဖြင့် ရိုက်သတ်ခံလိုက်ရသည်။ ဒြပ်မဲ့ကျွမ်းကျင်အဆင့် သူပုန်တစ်ဦးကို ရိုက်သတ်ပြီးနောက် ချူးယွင်ဖန်းသည် ခေတ္တမျှ မရပ်တန့်ခဲ့ပေ။ သူသည် လက်ကို အားစိုက်လိုက်ရာ ဆေးမီးဖိုတစ်ခုလုံး ချက်ချင်းပင် တောင်ကုန်းငယ်တစ်ခုနီးပါး ကြီးမားလာလေသည်။

ဘန်း

ဘန်း

ဘန်း

တစ်ခဏအတွင်း၌ သူပုန်အချို့ ထပ်မံရိုက်ချခံလိုက်ရသည်။ ၎င်းတို့၏ ဦးခေါင်းများ ပေါက်ထွက်သွား၍ ခန္ဓာကိုယ်များသည်လည်း အပိုင်းပိုင်း ပြတ်ထွက်ကုန်သည်။ ချူးယွင်ဖန်းသည် အချိန်တိုအတွင်း ဤသူပုန်များ၏ တစ်ဝက်ကျော်ကို သတ်ဖြတ်လိုက်သည်။ ၎င်းတို့သည် ဒြပ်မဲ့ကျွမ်းကျင်အဆင့် ကျင့်ကြံသူများဖြစ်ကြသော်လည်း ဒြပ်မဲ့ကျွမ်းကျင်အဆင့် အစောပိုင်း သို့မဟုတ် အလယ်အလတ်အဆင့် ကျင့်ကြံသူများသာ ဖြစ်ကြသည်။ ၎င်းတို့ကို ဒြပ်မဲ့ကျွမ်းကျင်အဆင့်များကြားတွင် ထိပ်တန်းအဆင့်ဟု မသတ်မှတ်နိုင်သဖြင့် ချူးယွင်ဖန်း၏ တိုက်ခိုက်မှုကို ၎င်းတို့အားလုံး မည်သို့မျှ ခံနိုင်ရည်ရှိမည်နည်း။

ချူးယွင်ဖန်း၏ ထိတ်လန့်ဖွယ် အစုလိုက်အပြုံလိုက်သတ်ဖြတ်ပွဲသည် သူပုန်များကို ကြောက်လန့်သွားစေသည်။ ၎င်းတို့သည် အစုလိုက်အပြုံလိုက်သတ်ဖြတ်ပွဲများကို ယခင်က မမြင်တွေ့ဖူးခြင်း မဟုတ်ပေ။ ၎င်းတို့ထက် အဆပေါင်းများစွာ သာလွန်သူများပင် ထိုကဲ့သို့ မြင်ကွင်းမျိုးကို မြင်ဖူးကြသည်။ သို့သော်လည်း ချူးယွင်ဖန်းကဲ့သို့ ရိုးရှင်း၍ ကြမ်းတမ်းသော နည်းလမ်းဖြင့် သတ်ဖြတ်ခြင်းကို ၎င်းတို့ တစ်ခါမျှ မတွေ့ဖူးခဲ့ချေ။ သူ၏ဆေးမီးဖိုဖြင့် ရိုက်ချလာသည်နှင့် ထိမိသမျှအရာအားလုံး ချက်ချင်း ပျက်သုဥ်းသွားလေသည်။ သူ၏ ကြောက်မက်ဖွယ် ခွန်အားသည် ဆေးမီးဖို၏ ပံ့ပိုးမှုဖြင့် ပြင်းထန်စွာ ထွက်ပေါ်လာသည်။ လူတစ်ယောက်၏ မွေးရာပါ နတ်ခွန်အားများ ဤမျှ ကြောက်မက်ဖွယ်ကောင်းနေခြင်းကို ၎င်းတို့အားလုံး ပထမဆုံးအကြိမ် သိမြင်ခြင်းဖြစ်သည်။

ဆေးမီးဖို၏ အဆင့်သည် အလွန်မြင့်မားသောကြောင့် မပျက်စီးခဲ့ပေ။ အကယ်၍ ၎င်းတို့သာ ထိုဆေးမီးဖိုဖြင့် ရိုက်ခတ်ခံရပါက ချက်ချင်းပင် သေဆုံးသွားပေလိမ့်မည်။ ၎င်းတို့သည် ယခင်က အကြောက်အရွံ့ ကင်းမဲ့ကြသော်လည်း ချူးယွင်ဖန်း၏ သတ်ဖြတ်မှုကြောင့် ကြောက်လန့်တကြားဖြစ်နေကြသည်။ ထိုအချိန်၌ သူပုန်ခေါင်းဆောင် အလွန်ဒေါသထွက်သွားလေသည်။ သူသည် ဟိန်းဟောက်ပြီးနောက် ချူးယွင်ဖန်းဆီ ချီတက်လာခဲ့သည်။ သူပုန်ခေါင်းဆောင်သည် အချိန်ခဏမျှ နောက်ဆုတ်သွားခဲ့သော်လည်း သူ၏ လက်အောက်ငယ်သားများအနက် ထက်ဝက်ကျော် သေဆုံးသွားခဲ့ရ၍ ကျန်ရှိနေသူများသည်လည်း ကြောက်လန့်တကြားဖြစ်နေကြသည်။