အခန်း (၁၇၂၀-၁၇၂၂)

အခန်း (၁၇၂၀) ပြိုင်ဘက်ကင်းသော စွမ်းအင်၊ အထွတ်အထိပ်ဝိညာဉ်လက်နက်ကို ဖျက်ဆီးခြင်း

"ချူးယွင်ဖန်း၊ ဒီနေ့ ဘယ်သူမှ မင်းကို ကယ်နိုင်မှာ မဟုတ်ဘူး"

သူပုန်ခေါင်းဆောင်က ဒေါသတကြီး အော်ဟစ်လိုက်သည်။ သူ၏စွမ်းအင်များ ချက်ချင်းပင် ပေါက်ကွဲထွက်လာ၍ ပတ်ဝန်းကျင်ရှိ ကျင့်ကြံသူအားလုံးကို ဖိနှိပ်လိုက်သည်။ ယူချူးယွင်နှင့် အခြားလူများသည် ရွှံ့နွံထဲတွင် ရောက်နေသကဲ့သို့ ခံစားလိုက်ရကာ အသက်ရှူရန်ပင် ခက်ခဲလာသည်။ သူပုန်ခေါင်းဆောင်သည် အခြားသူပုန်များထက် များစွာသန်မာပေသည်။

"သူက ဒြပ်မဲ့ကျွမ်းကျင်အဆင့် အထွတ်အထိပ်ပဲ" ယူချူးယွင်၏ မျက်လုံးများထဲတွင် ကြောက်ရွံ့မှုနှင့် မျှော်လင့်ချက်ကင်းမဲ့မှု အရိပ်အမြွက်များ ပေါ်ပေါက်လာသည်။

ဒြပ်မဲ့ကျွမ်းကျင်အဆင့်ဟူသည် သာမန်လူမဟုတ်ပေ။ အကယ်၍ ဤနေရာတွင် သာမန် ဒြပ်မဲ့ကျွမ်းကျင်အဆင့်တစ်ဦးသာဆိုလျှင် ၎င်းတို့တွင် လွတ်မြောက်ရန် အခွင့်အရေးရှိသေးသည်။ သို့သော် ဒြပ်မဲ့ကျွမ်းကျင်အဆင့် အထွတ်အထိပ်သို့ ရောက်ရှိနေသူသည် ကြယ်ကြွေကောင်းကင်ဂိုဏ်းရှိ တပည့်များကြား၌ အကောင်းဆုံးဟု ဆိုနိုင်၍ အစစ်အမှန်တပည့်များနှင့် အနည်းငယ်သာ ကွာခြားပေသည်။ ၎င်းတို့သည် ဒဏ္ဍာရီလာ အစစ်အမှန်တပည့်များဖြစ်လာ၍ စကြဝဠာအဆင့်သို့ တက်လှမ်းနိုင်သည့် အခွင့်အရေးပင် ရှိကြသည်။ ထိုသို့သောသူများသည် ထိပ်တန်းတပည့်များကြားတွင် ဩဇာအာဏာကြီးမားသူများဖြစ်သည်။

၎င်းတို့သည် ကမ္ဘာလှည့်နေသည့် ကျော်ကြားသူများလည်းဖြစ်ကြသည်။ ၎င်းတို့၏ စွမ်းအင်နှင့် အဆင့်အတန်းသည် လုံးလုံးလျားလျား ကွဲပြားခြားနားပေသည်။ ချူးယွင်ဖန်းကို သတ်ဖြတ်ရန် ရောက်လာသူသည် ဒြပ်မဲ့ကျွမ်းကျင်အဆင့် အထွတ်အထိပ် ကျင့်ကြံသူဖြစ်နေလိမ့်မည်ဟု ၎င်းတို့ မထင်မှတ်ထားခဲ့ပေ။ နောက်ကွယ်မှ အမိန့်ပေးသူသည် ချူးယွင်ဖန်းကို အလွန်မုန်းတီးနေ၍ အနည်းငယ်မျှ လွတ်မြောက်ခွင့် မပေးလိုကြောင်း သိသာထင်ရှားပေသည်။

"နှမြောစရာပဲ"

ချူးယွင်ဖန်း၏ မျက်နှာအမူအရာသည် အနည်းငယ်မျှ မပြောင်းလဲခဲ့ပေ။ သူပုန်ခေါင်းဆောင်သည် အခြားလူများကို ကြောက်လန့်အောင် ပြုလုပ်နိုင်သော်လည်း သူ့အပေါ်တွင် အနည်းငယ်မျှ မသက်ရောက်နိုင်ပေ။ ချူးယွင်ဖန်းကို တိုက်ခိုက်ခိုင်းခဲ့သူသည် အခြေအနေအားလုံးကို အလွန်ဂရုတစိုက် တွက်ဆထားသော်လည်း ချူးယွင်ဖန်း၏ စွမ်းအင်သည် ၎င်းတို့စိတ်ကူးထားသည်ထက် များစွာသာလွန်နေလိမ့်မည် ထင်မှတ်ထားမည် မဟုတ်ပေ။

"သေလိုက်တော့" သူပုန်ခေါင်းဆောင်က အော်ဟစ်လိုက်သည်။

ရုတ်တရက်ဆိုသလိုပင် ကောင်းကင်တစ်ခုလုံးတွင် သရဲတစ္ဆေများ၏ အော်ဟစ်သံများဖြင့် ပြည့်နှက်သွားသည်။ ကမ္ဘာကြီး ချက်ချင်းပင် ပြောင်းလဲသွားကာ နေသာသည့်နေ့တစ်နေ့သည် တစ္ဆေနယ်မြေအဖြစ် ရုတ်ချည်း ပြောင်းလဲသွားပုံပေါ်သည်။ ချူးယွင်ဖန်းက မော့ကြည့်လိုက်သောအခါ ကောင်းကင်တွင် ကြီးမားသည့် စည်းတံဆိပ်တစ်ခု လွင့်ပျံနေကြောင်း မြင်တွေ့လိုက်ရသည်။ ထိုစည်းတံဆိပ်သည် သာမန်စည်းတံဆိပ်များနှင့် မတူဘဲ မီးခိုးရောင်နှင့် အနက်ရောင်များ ရောစပ်နေကာ တစ္ဆေတစ်ရာည ပန်းချီကားကဲ့သို့ ကြောက်မက်ဖွယ် တစ္ဆေပုံများဖြင့် ရေးဆွဲထားသည်။

ယခုအခါ တစ္ဆေပေါင်းများစွာသည် ပန်းချီကားထဲမှ ထွက်ပေါ်လာ၍ မိုင်ပေါင်းများစွာခန့်ကို တစ္ဆေနယ်မြေအဖြစ် ဖန်တီးပစ်လိုက်သည်။ တစ္ဆေတစ်ကောင်ချင်းစီတွင် အစိမ်းရောင်မျက်နှာနှင့် အစွယ်များ ရှိနေသည်။ ၎င်းတို့၏ မျက်နှာပေါ်တွင် သွေးမျက်ရည်များ စီးကျနေ၍ လွတ်မြောက်ရန် ရုန်းကန်နေကြသော်လည်း အတားအဆီးမှ မလွတ်မြောက်နိုင်ကြပေ။ ဤစည်းတံဆိပ်၏ စွမ်းအားရင်းမြစ်သည် ထိုအငြိုးအတေးများ စုစည်းရာမှ ဖြစ်ပေါ်လာခြင်းဖြစ်သည်။

"ဟားဟားဟား ချူးယွင်ဖန်း၊ မင်း ဘယ်လိုသေမလဲဆိုတာ ကြည့်ရအောင်။ ကျုပ်ရဲ့ တစ္ဆေတစ်ရာညကနေ ဘယ်သူမှ မလွတ်မြောက်နိုင်ဘူး ကွ။ ကျုပ်ပန်းချီကားထဲမှာ တစ္ဆေဘုရင်တစ်ကောင် လိုအပ်နေတာနဲ့ အတော်ပဲ။ အခု ကျုပ် ဆုံးဖြတ်ချက်ကို ပြောင်းလိုက်ပြီ။ မင်းရဲ့ဝိညာဉ်ကို ထုတ်ယူပြီး ကျုပ်လက်နက်ရဲ့ တစ္ဆေဘုရင်အဖြစ် ဖန်တီးပစ်မယ်။ အခုကစပြီး မင်း ပြန်လည်မမွေးဖွားနိုင်ဘဲ ကျုပ်အတွက် ထာဝရအသုံးတော်ခံဖြစ်သွားစေရမယ်"

သူပုန်ခေါင်းဆောင်က ချူးယွင်ဖန်းကို သေလူတစ်ယောက်ကဲ့သို့ ကြည့်ကာ ရယ်မောနေသည်။ ဤသည်မှာ စစ်သည်တစ်ယောက်အတွက် အဆိုးရွားဆုံးသော ပြစ်ဒဏ်ဖြစ်သည်။ အသက်ရှင်စဉ်တွင် ရှုံးနိမ့်၍ သေဆုံးရုံသာမကဘဲ သေပြီးနောက်တွင်လည်း ရန်သူက မိမိ၏ ဝိညာဉ်ကို ထုတ်ယူကာ အသုံးချခြင်းသည် အလွန်ရက်စက်သော နည်းလမ်းဖြစ်သည်။

‘’ဒီတစ္ဆေတစ်ရာညကို ဖန်တီးဖို့ အပြစ်မဲ့တဲ့လူဘယ်နှစ်ယောက်ကို သတ်ထားလဲဆိုတာတောင် ကျုပ် မသိနိုင်ဘူး။ ခင်ဗျားအပြစ်တွေက အရမ်းကြီးလွန်းတယ် ကျုပ် ဒီနေ့ခင်ဗျားကို သတ်ပြီး အပြစ်တွေ ဆေးကြောဖို့ လူပြန်ဝင်စားခိုင်းရမယ်’’ ချူးယွင်ဖန်းက အော်ပြောလိုက်သည်။

တစ္ဆေတစ်ရာညဟု ခေါ်ဆိုသော်လည်း ၎င်းအတွင်းတွင် တစ္ဆေပေါင်း တစ်သောင်းကျော် တည်ရှိနေသည်။ ဤသူပုန်များသည် ၎င်းတို့သတ်ဖြတ်ခဲ့သူများ၏ ဝိညာဉ်များကို ထုတ်ယူထားခြင်းဖြစ်သည်။ အပြစ်မဲ့သူများကို ရက်စက်စွာ သတ်ဖြတ်ထားသဖြင့် ဝိညာဉ်တိုင်းတွင် အငြိုးအတေးများ တွယ်ကပ်နေ၍ ၎င်းတို့သည် ထိုအငြိုးများကို အသုံးချနေခြင်းဖြစ်သည်။ ဤနည်းလမ်းသည် အလွန်ရက်စက်ဖွယ်ကောင်းလှသည်။ ဤအကြောင်းရင်းကြောင့် နတ်ဆိုးလမ်းစဉ်သည် မြန်ဆန်သော်လည်း လူအများအပြားက လက်မခံခြင်းဖြစ်သည်။

"မင်းက ကျုပ်ကို သတ်မယ် ဟုတ်လား" သူပုန်ခေါင်းဆောင်က ဒေါသတကြီး အော်ဟစ်လိုက်သည်။

ချူးယွင်ဖန်း၏ ခေါင်းပေါ်ရှိ တစ္ဆေတစ်ရာည ပန်းချီကားသည် ပိုမိုကြီးမားလာပြီးနောက် တစ္ဆေများစွာသည် ချူးယွင်ဖန်းထံသို့ အရှိန်အဟုန်ဖြင့် ပြေးဝင်လာသည်။ နောက်တစ်စက္ကန့်တွင် ချူးယွင်ဖန်း၏ ကိုယ်ခန္ဓာတစ်ဝိုက်၌ လျှပ်စီးစွမ်းအင်များ ပေါက်ကွဲထွက်လာ၍ တစ်မိုင်ပတ်လည်ခန့် လျှပ်စီးပင်လယ်အဖြစ် ပြောင်းလဲသွားလေသည်။ ချူးယွင်ဖန်းထံ ချီတက်လာသည့် တစ္ဆေများအားလုံး ချက်ချင်းပင် ပေါက်ကွဲပျက်စီးသွား၍ ဤနီးအနားသို့ပင် မချဉ်းကပ်နိုင်ကြပေ။ ချူးယွင်ဖန်း၏ မိုးကြိုးကိုယ်ခန္ဓာမှ ထွက်ပေါ်လာသော လျှပ်စီးစွမ်းအင်သည် တစ္ဆေများ၏ သဘာဝရန်သူဖြစ်သည်။ ထိုတစ္ဆေများသည် ချက်ချင်းပင် အပြီးသတ် ချေမှုန်းခံလိုက်ရသည်။

"ထူးခြားတဲ့ ရုပ်ခန္ဓာပိုင်ရှင်လား" သူပုန်ခေါင်းဆောင်၏ မျက်လုံးများ ပြူးကျယ်သွားသည်။

ထိုကြောက်မက်ဖွယ် စွမ်းအင်သည် သူ၏လက်နက်အတွက် အဆိုးရွားဆုံး ရန်သူဖြစ်သည်။ ထိုသို့သော ထူးခြားသည့် ခန္ဓာကိုယ်ပိုင်ရှင်များသည် ကြီးပြင်းလာသောအခါ ထိပ်တန်းကျွမ်းကျင်သူများဖြစ်လာလေ့ရှိသည်။ ထို့ကြောင့် လူအများစုသည် ထိုလူများကို ရန်မစလိုကြပေ၊ သို့သော် မိမိတွင် ရွေးချယ်စရာမရှိတော့ပေ။

"သွားသေလိုက်" သူပုန်ခေါင်းဆောင်သည် အံကြိတ်၍ အော်ဟစ်လိုက်သည်။ သူသည် ချူးယွင်ဖန်းကို ရန်စမိသွားပြီဖြစ်သဖြင့် အပြီးတိုင် သတ်ဖြတ်ရမည်ဖြစ်သည်။ အကယ်၍ မသတ်ဖြတ်နိုင်ခဲ့ပါက သူသည် အနာဂတ်တွင် ချူးယွင်ဖန်း၏ လက်ချက်ဖြင့် သေဆုံးပေလိမ့်မည်။

ထိုအချိန်တွင် ကောင်းကင်ရှိ ကြီးမားလှသော ပန်းချီကားသည် အရှိန်အဟုန်ဖြင့် ထိုးဆင်းလာသည်။ အထွတ်အထိပ်ဝိညာဉ်လက်နက်၏ ကြောက်မက်ဖွယ် ဖိအားကို လူတိုင်း ချက်ချင်း ခံစားလိုက်ရသည်။

"ပျက်စီး" ချူးယွင်ဖန်းက အော်ဟစ်လိုက်သည်။

ချူးယွင်ဖန်း၏ အရေပြားများမှ ရွှေရောင်အမွေးများ ပေါက်ထွက်လာခဲ့ရာ သူသည် ခဏအတွင်း တောင်ငယ်တစ်ခု အရွယ်အစားခန့် မွန်းစတားတစ်ကောင်အဖြစ် ပြောင်းလဲသွားသည်။ ရိုင်းစိုင်းကြမ်းတမ်းသည့် အရှိန်အဝါများ ပေါက်ကွဲထွက်လာ၍ မိုင်အနည်းငယ်အထိ လွှမ်းခြုံသွားလေသည်။

"ဘာတွေဖြစ်နေတာလဲ"

ယူချူးယွင်နှင့် အခြားလူများသည် မွန်းစတားအသွင် ပြောင်းလဲသွားသည့် ချူးယွင်ဖန်းကို ကြည့်ကာ အံ့အားသင့်သွားကြသည်။ အထူးသဖြင့် ယူချူးယွင်က ပို၍ပင် အံ့အားသင့်နေသည်။ ချူးယွင်ဖန်းသည် ဝမ်ယိဖန်နှင့် လီချန်းယွမ်တို့ကို ရင်ဆိုင်စဉ်ကတည်းက မည်သို့ကြောင့် အားနည်းချက်မပြခဲ့သည်ကို သူ ယခုအချိန်မှ နားလည်သွားသည်။ ချူးယွင်ဖန်းသည် ဤကဲ့သို့သော ဝှက်ဖဲကို ၎င်းတို့အရှေ့တွင် တစ်ခါမျှ မထုတ်ပြခဲ့သည့်အပြင် အတွင်းစည်းတပည့် ပြိုင်ပွဲတွင်ပင် အသုံးမပြုခဲ့ပေ။

အသုံးပြုလိုက်သည်နှင့် ပတ်ဝန်းကျင်တစ်ခုလုံး ထိုရက်စက်ကြမ်းတမ်းသည့် အရှိန်အဝါဖြင့် လွှမ်းခြုံသွားပေလိမ့်မည်။ သူပုန်ခေါင်းဆောင်ပင် ဤမြင်ကွင်းကို မြင်လိုက်ရသောအခါ ထိတ်လန့်တုန်လှုပ်သွားသည်။ ထိုအချိန်တွင် ချူးယွင်ဖန်းသည် လက်သီးနှစ်ဖက်စလုံးဖြင့် ထိုးလိုက်ရာ လေထုတစ်ခုလုံး ပျက်စီးပြိုကွဲသွားခဲ့သည်။ သူ၏ဧရာမ ခန္ဓာကိုယ်သည် လေထုထဲသို့ မြင့်တက်သွား၍ တစ္ဆေတစ်ရာည ပန်းချီကားနှင့် ရိုက်ခတ်မိသွားလေသည်။

ဘုံး

တောင်နှစ်လုံး ရိုက်ခတ်မိသကဲ့သို့ ကျယ်လောင်သော ပေါက်ကွဲသံကြီး ထွက်ပေါ်လာသည်။ ဟော့သည် ပန်းချီကားကို ၎င်း၏လက်သည်းဖြင့် ဖမ်းဆုပ်လိုက်ကြောင်း လူတိုင်း မြင်တွေ့လိုက်ရသည်။ ဟော့သည် ဒေါသတကြီး အော်ဟစ်လိုက်သောအခါ ပန်းချီကားတစ်ခုလုံး စုတ်ပြဲသွားလေသည်။

ဘန်း

ထိုအခါ ကြီးမားလှသော စည်းတံဆိပ်ကြီး နှစ်ခြမ်းကွဲထွက်သွားခဲ့သည်။ ပန်းချီကားတွင် ချုပ်နှောင်ခံထားရသည့် တစ္ဆေပေါင်းများစွာ နောက်ဆုံးတွင် လွတ်မြောက်သွားကြ၍ ချူးယွင်ဖန်းကို အရိုအသေပေးပြီးနောက် တဖြည်းဖြည်း ပျောက်ကွယ်သွားကြသည်။

အခန်း (၁၇၂၁) ကျုပ် ဝမ်ယိဖန်ကို အသက်တစ်ရှိုက်အတွင်း သတ်နိုင်တယ်

"ဘုံး" ဟူသော ကျယ်လောင်သည့်အသံနှင့်အတူ တစ္ဆေတစ်ရာည စည်းတံဆိပ်သည် ချူးယွင်ဖန်း၏ ဖျက်ဆီးမှုကြောင့် ကောင်းကင်ယံတွင် ပေါက်ကွဲသွားလေသည်။

သူပုန်ခေါင်းဆောင်သည် သွေးများ အန်ထုတ်လိုက်သည်။ ပြန်လည်တုံ့ပြန်မှုဒဏ်ကြောင့် ပြင်းထန်စွာ ဒဏ်ရာရရှိသွားခဲ့သဖြင့် သူပုန်ခေါင်းဆောင်၏မျက်လုံးများတွင် ထိတ်လန့်မှုများဖြင့် ပြည့်နှက်နေသည်။ သူသည် ချူးယွင်ဖန်းကြောင့် အသက်ထွက်မတတ် ကြောက်ရွံ့နေမိသည်။ သူ၏ဘဝတွင် ရန်သူများစွာနှင့် တိုက်ခိုက်ဖူးသော်လည်း ချူးယွင်ဖန်းကဲ့သို့ ကျိုးကြောင်းမဲ့စွာ ရက်စက်သူကို တစ်ခါမှ မမြင်တွေ့ဖူးပေ။ မည်သည့်ရန်သူမျိုးဖြစ်ပါစေ ချူးယွင်ဖန်းသည် တစ်ချက်တည်း သတ်ဖြတ်နိုင်ဟန်ရှိသည်။ ရိုးရှင်း၍ ကြမ်းတမ်းလှသော်လည်း အလွန်အမင်း ထိရောက်ပေသည်။

"သေစမ်း"

သူပုန်ခေါင်းဆောင်သည် တစ်စုံတစ်ခုကို ရိပ်မိသွားပုံရသည်။ သူသည် ချက်ချင်းပင် မီတာတစ်ထောင်ကျော်အကွာသို့ စတင်ထွက်ပြေးလေသည်။ သူ၏အရှိန်အဟုန်သည် တယ်လီပို့မှု ပြုလုပ်နေသကဲ့သို့ အလွန်မြန်ဆန်လှသည်။ နောက်တစ်ခဏတွင် ဧရာမလက်သည်းကြီးတစ်ခု ကောင်းကင်ယံမှ ကျဆင်းလာ၍ သူပုန်ခေါင်းဆောင်ကို နေရာတွင်ပင် အမှုန့်ချေပစ်လိုက်သည်။

"ထွက်ပြေးမလို့လား" ဟော့သားရဲသည် ၎င်း၏ သွေးရောင်သမ်းနေသော ပါးစပ်ကြီးကို ဖွင့်ဟ၍ ကျယ်လောင်စွာ ဟိန်းဟောက်လိုက်သည်။ ၎င်း၏ခန္ဓာကိုယ်သည် အလွန်ကြီးမားသော်လည်း အရှိန်အဟုန်သည် သူပုန်ခေါင်းဆောင်ထက်ပင် ပိုမိုမြန်ဆန်နေသည်။

ချက်ချင်းဆိုသလိုပင် ဟော့သားရဲသည် သူပုန်ခေါင်းဆောင်၏ အရှေ့သို့ ရောက်ရှိလာသည်။ ၎င်းသည် ပါးစပ်ကိုဖွင့်ဟကာ သူပုန်ခေါင်းဆောင်ထံ ကြောက်မက်ဖွယ် မီးတောက်များဖြင့် မှုတ်ထုတ်လိုက်သည်။

"အား…."

သူပုန်ခေါင်းဆောင်သည် မီးတောက်များဖြင့် လောင်ကျွမ်းနေစဥ် အော်ဟစ်ကာ ထွက်ပြေးနေသည်။ ရုတ်တရက်ဆိုသလိုပင် မီးတောက်များကြားမှ သွေးရောင်အရိပ်တစ်ခု ထွက်ပြေးသွားသည်။ သူပုန်ခေါင်းဆောင်သည် မြွေတစ်ကောင်ကဲ့သို့ အရေခွံချွတ်ပြီးနောက် သွေးရောင်အလင်းတန်းအဖြစ် ပြောင်းလဲကာ အဝေးသို့ ထွက်ပြေးသွားသည်။ ထိုအခါ ချူးယွင်ဖန်းသည် လှောင်ပြုံးပြုံးကာ ရိုက်ချလိုက်သည်။

"ဘန်း"

သူပုန်ခေါင်းဆောင်သည် လက်ဖဝါးဖြင့် ရိုက်နှက်ခံလိုက်ရသည်။ ထိုအခါ သူပုန်ခေါင်းဆောင်သည် မြေပြင်ပေါ်သို့ ကြယ်တံခွန်တစ်စင်း ကျရောက်လာသကဲ့သို့ မြေပြင်နှင့် ပြင်းထန်စွာ ရိုက်ခတ်ပြီးနောက် အရိုးများ အစိပ်စိပ်အမွှာမွှာ ကျိုးကြေကာ အဆက်မပြတ် အော်ဟစ်နေတော့သည်။ ကောင်းကင်မှ ဓားအလင်းတန်းတစ်ခု ကျဆင်းလာပြီးနောက် သူပုန်ခေါင်းဆောင်ကို မြေပြင်တွင် ထိုးစိုက်လိုက်သည်။ ဤသည်မှာ နတ်ဖြတ်ဓားဖြစ်သည်။ သူပုန်ခေါင်းဆောင်သည် ထိုနေရာတွင် အဆုံးသတ်သွားလေသည်။

ယုချူးယွမ်နှင့် အခြားလူတို့သည် ဤမြင်ကွင်းကို ကြည့်၍ မှင်သက်နေကြသည်။ ဤသူပုန်အဖွဲ့ ပေါ်လာသည့်အချိန်မှစ၍ ၎င်းတို့သည် သေဆုံးရတော့မည်ဟု ထင်မှတ်ထားခဲ့ကြသည်။ သို့သော် ချူးယွင်ဖန်းက ၎င်းတို့အားလုံးကို အလွယ်တကူ သတ်ဖြတ်နိုင်ခဲ့သည်။

"ဒါ စီနီယာချူးရဲ့ စွမ်းအင်အစစ်လား။ တော်တော်သန်မာတာပဲ"

အခြားလူများသည် ချူးယွင်ဖန်း ဟော့သားရဲအဖြစ် ပြောင်းလဲသွားခြင်းကို မြင်သောအခါ ကြောက်ရွံ့ခြင်းမရှိဘဲ အလွန်ပျော်ရွှင်နေကြသည်။ ၎င်းတို့သည် ချူးယွင်ဖန်း၏ လှေပေါ်တွင် စီးနင်းလာသူများဖြစ်ကြသည်။ ချူးယွင်ဖန်း ပို၍သန်မာလေ၊ ၎င်းတို့ရရှိမည့် အကျိုးအမြတ်များ ပို၍များပြားလေဖြစ်သည်။ မူလတွင် ချူးယွင်ဖန်းသည် ဝမ်ယိဖန်နှင့် အခြားသူများ၏လက်ချက်ဖြင့် သေဆုံးသွားမည်ကို ၎င်းတို့ စိုးရိမ်ထိိတ်လန့်နေကြသည်။ အကယ်၍ ထိုသို့ဖြစ်ခဲ့လျှင် ၎င်းတို့၏ အနာဂတ်သည်လည်း ပျက်သုဉ်းသွားပေလိမ့်မည်။ သို့သော် ချူးယွင်ဖန်း၏ အံ့မခန်းစွမ်းအင်ကို မြင်တွေ့ပြီးနောက် ၎င်းတို့တွင် အဆုံးမရှိသော ယုံကြည်မှုများရရှိလာသည်။

ကောင်းကင်ယံရှိ ဟော့သားရဲ၏ အမွေးများ တဖြည်းဖြည်း လျော့နည်းလာ၍ လူပုံစံသို့ ပြောင်းလဲသွားသည်။ ဤသည်မှာ ချူးယွင်ဖန်းမဟုတ်လျှင် ဘယ်သူဖြစ်မည်နည်း။ လက်ကိုဝှေ့ယမ်းလိုက်သောအခါ နတ်ဖြတ်ဓားသည် အလင်းတန်းအဖြစ် ပြောင်းလဲကာ ချူးယွင်ဖန်း၏လက်ထဲသို့ ရောက်ရှိသွားသည်။ ခဏအကြာတွင် ၎င်းသည် သူ၏ကိုယ်ခန္ဓာထဲတွင် ပျောက်ကွယ်သွားသည်။ ဤသည်မှာ ဓားသမားတစ်ယောက်၏ နည်းလမ်းဖြစ်သည်။ ဓားကို ကိုယ်ခန္ဓာအတွင်း သိမ်းဆည်းကာ မိမိ၏ သွေးများ၊ အသက်ဓာတ်များဖြင့် ကျွေးမွေးပြုစုခြင်းဖြင့် ဓားစွမ်းအင်များ နေ့စဉ်တိုးတက်လာကာ အလွန် ကြောက်မက်ဖွယ်ကောင်းလာမည်ဖြစ်သည်။

ချူးယွင်ဖန်းသည် ဟော့အဖြစ် ပြောင်းလဲရန် သူ၏ နတ်စွမ်းအင်အများအပြားကို သုံးစွဲခဲ့သော်လည်း ခဏအတွင်း အများစု ပြန်လည်သက်သာလာသည်။ ဧကရာဇ်ခန္ဓာကိုယ်နည်းစနစ်၏ ကြောက်မက်ဖွယ်စွမ်းအင်သည် ဤအချိန်တွင် အလွန် သိသာထင်ရှားလာသည်။ တူညီသော အဆင့်၌ပင် ချူးယွင်ဖန်း၏ တိုက်ခိုက်ရေးစွမ်းရည်ကို အခြားသူများ သံသယဝင်လာကြသည်။

ယုချူးယွမ်နှင့် အခြားလူများသည် ဤမြင်ကွင်းကို မြင်သောအခါ အံ့အားသင့်စွာ စုတ်သပ်နေမိသည်။ ချူးယွင်ဖန်းသည် လူပုံစံသို့ ပြောင်းလဲချိန်တွင် အနည်းငယ် မောဟိုက်နေကြောင်း ၎င်းတို့အားလုံး ရှင်းလင်းစွာ မြင်တွေ့လိုက်ရသော်လည်း ခဏအတွင်း လုံးလုံးလျားလျား ပြန်လည်ကောင်းမွန်လာသည်။ ချူးယွင်ဖန်း၏ စွမ်းအင်သည် ခန့်မှန်းရခက်သည်ဟု ၎င်းတို့ ပိုမိုခံစားလာရသည်။ သူသည် ကြောက်မက်ဖွယ်ကောင်းသော မွန်းစတားတစ်ကောင်ဖြစ်သည်။

"သူတို့ အထောက်အထားတွေကို စစ်ဆေးဖို့ ခေါင်းတွေ ဖြတ်ပြီး စစ်ရေးဝန်ကြီးဌာနကို ပို့လိုက်" ချူးယွင်ဖန်းက ညွှန်ကြားလိုက်သည်။

သူသည် ၎င်းတို့မည်သူမည်ဝါဖြစ်ကြောင်း မေးမြန်းခြင်းမရှိခဲ့ပေ၊ အကြောင်းမှာ မေးမြန်းရန်မလိုသောကြောင့်ဖြစ်သည်။ မည်သို့ပင်ဆိုစေကာမူ စစ်ရေးဝန်ကြီးဌာနရှိနေသဖြင့် ၎င်းတို့မည်သူမည်ဝါဖြစ်ကြောင်း အလွယ်တကူ ရှာဖွေနိုင်မည်ဖြစ်သည်။ ယခုအခါ ချူးယွင်ဖန်းတွင် ဧကရာဇ်နန်းတော်မှ ပေးအပ်ထားသည့် ဗိုလ်မှူးကြီးဟူသော ရာထူးတစ်ခုရှိနေသည်။ ဤလူများသည် ဧကရာဇ်နန်းတော်၏ ဗိုလ်မှူးကြီးတစ်ဦးကို တိုက်ခိုက်ခဲ့ခြင်းဖြစ်သည်။ လီချန်းယွမ်၏ လူများဖြစ်လျှင်ပင် ခေါင်းထွက်လာဝံ့မည် မဟုတ်ပေ။

"သူတို့အတွက် သတ်မှတ်ထားတဲ့ ဆုလာဘ်တွေကို သေချာရှာဖွေပြီး အကုန်စုဆောင်းထားလိုက်"

ဤလူများသည် လူပေါင်းများစွာကို သတ်ဖြတ်ခဲ့သော ရာဇဝတ်သားဟောင်းများဖြစ်ကြောင်း သိသာထင်ရှားသည်။ စစ်ရေးဝန်ကြီးဌာန၌ ၎င်းတို့၏ရာဇဝင်များ ရှိနေပေလိမ့်မည်။ ထိုကဲ့သို့သောလူများကို သတ်ဖြတ်နိုင်လျှင် ဆုလာဘ်များ အလွန်များပြားပေလိမ့်မည်။ အကြောင်းမှာ ၎င်းတို့သည် ဒြပ်မဲ့ကျွမ်းကျင်အဆင့် ကျင့်ကြံသူများဖြစ်၍ ရာဇဝတ်သားများစွာအနက် ထူးချွန်သူများဟု သတ်မှတ်ခံထားရသောကြောင့်ဖြစ်သည်။

ယုချူးယွမ်နှင့် အခြားလူများသည် ဤစကားကို ကြားသောအခါ ခေါင်းများ အမြန်ဖြတ်၍ စုဆောင်းလိုက်ကြသည်။ ပြီးနောက် ၎င်းတို့ကို နေရာလွတ်အိတ်ထဲသို့ ထည့်လိုက်ကြသည်။ ပေါင်ထိုက်မြို့သို့ ရောက်သောအခါ ၎င်းတို့၏ အထောက်အထားများကို စစ်ဆေးရန် တရားဝင်လမ်းကြောင်းမှတစ်ဆင့် စစ်ရေးဝန်ကြီးဌာနသို့ ထိုခေါင်းများ ပေးပို့ရပေလိမ့်မည်။

"စီနီယာချူး၊ စီနီယာရဲ့ သိုင်းပညာက တကယ့်ကို ပြိုင်ဘက်ကင်းတာပဲ။ မကြာခင် ဝမ်ယိဖန်တောင် စီနီယာကို မယှဥ်နိုင်လောက်တော့ဘူး" ချူးယွင်ဖန်း၏ လက်အောက်ငယ်သားတစ်ဦးက ပြောလာသည်။ သူ၏အသံတွင် စိတ်လှုပ်ရှားမှုများဖြင့် ပြည့်နှက်နေသည်။ ချူးယွင်ဖန်းသည် ဤရာဇဝတ်သားများကို မည်မျှလွယ်ကူစွာ သတ်ဖြတ်လိုက်ခြင်းကို တွေးမိသောအခါ သူ အလွန်စိတ်လှုပ်ရှားနေမိသည်။

"ကျုပ်က ဝမ်ယိဖန်လို လူကို ဘာလို့ ဂရုစိုက်ရမှာလဲ။ သူ ကျုပ်ကို နောက်ကွယ်ကနေ လုပ်ကြံရင် ကိစ္စမရှိပေမယ့် ကျုပ် အရှေ့ထွက်လာရဲရင်တော့ ကျုပ် သူ့ကို အသက်တစ်ရှိုက်အတွင်းတောင် သတ်ပစ်နိုင်တယ်" ချူးယွင်ဖန်းက လှောင်ရယ်၍ ပြောလိုက်သည်။

သူ၏စိတ်ထဲတွင် ရှိနေသော အစစ်အမှန် ရန်သူသည် လီချန်းယွမ်ဖြစ်သည်။ ဝမ်ယိဖန်ဟူသည် မပြောပါ့လောက်ပေ။ သူ၏လက်ထဲတွင်ရှိသော ဓားအလင်းရောင်မန္တန်ဖြင့်ဆိုလျှင် ဝမ်ယိဖန်ကို သတ်ဖြတ်ခြင်းသည် ဖုန်မှုန့်များ မှုတ်ထုတ်သကဲ့သို့ လွယ်ကူပေလိမ့်မည်။ ဝမ်ယိဖန်မဆိုနှင့် လီချန်းယွမ်ပင် ဓားအလင်းရောင်မန္တန်ကြောင့် အကြီးအကျယ် ထိခိုက်ခဲ့ရသည်။

သို့သော် ချူးယွင်ဖန်းသည် လီချန်းယွမ်ကို ရင်ဆိုင်ရာတွင် ဓားအလင်းရောင်မန္တန်ကို အသုံးပြုရန် စီစဉ်ထားသဖြင့် ၎င်းကို အခြားနေရာတွင် အသုံးမပြုခြင်းက အကောင်းဆုံးဖြစ်ပေလိမ့်မည်။ သို့သော် ဝမ်ယိဖန်သာ ကိုယ်တိုင်လှုပ်ရှားဝံ့ပါက ချူးယွင်ဖန်းက သူ့ကို အဆုံးသတ်ရပေလိမ့်မည်။ ချူးယွင်ဖန်း၏ အမူအရာကို မြင်လိုက်ရသောအခါ သူသည် ကြွားဝါခြင်းမဟုတ်ကြောင်း လူတိုင်း သိလိုက်ကြသည်။ ၎င်းတို့အားလုံးသည် ချူးယွင်ဖန်း၏ ယုံကြည်မှုကြောင့် စိတ်ဓာတ်တက်ကြွလာကြသည်။ သူသည် ရထားလုံးထဲတွင် ကျင့်ကြံနေခဲ့ကြောင်း ၎င်းတို့ နားလည်သွားကြသည်။ ယခုအခါ သူ၏ကျင့်ကြံမှု အောင်မြင်စွာပြီးဆုံး၍ သီးသန့်ကျင့်ကြံရာမှ ထွက်လာလေသည်။

"အကုန်သိမ်းဆည်းပြီး ပေါင်ထိုက်မြို့ကို ဆက်သွားကြစို့။ ဒီနေရာက ဘယ်လိုနဂါးတွင်း၊ ကျားတွင်းဖြစ်မလဲဆိုတာ ကျုပ် ကြည့်ချင်သေးတယ်" ချူးယွင်ဖန်းက အေးစက်စက် အပြုံးတစ်ခုဖြင့် ကျယ်လောင်စွာ ပြောလိုက်သည်။

"ဟုတ်ကဲ့ပါ၊ စီနီယာချူး"

လူတိုင်းသည် ၎င်းတို့၏ ပစ္စည်းများကို အမြန်သိမ်းဆည်းကာ မြင်းများအပေါ် ပြန်တက်သွားကြသည်။ ၎င်းတို့၏ စီးတော်မြင်းများသည် တိမ်တိုက်များကို စီးနင်း၍ ပေါင်ထိုက်မြို့ဆီ ဦးတည် ပျံသန်းသွားလေသည်။ မကြာမီတွင် လူတိုင်း အရှေ့တွင် မြို့တစ်မြို့ ပေါ်ပေါက်လာသည်။

အခန်း (၁၇၂၂) မြို့စောင့်တပ် ပြန်ဖွဲ့စည်းခြင်း

ဤသည်မှာ တိုက်ပွဲ အရိပ်အမြွက် အနည်းငယ် ကျန်ရှိနေသည့် နယ်စပ်မြို့ငယ်တစ်ခုဖြစ်သည်။ မည်သည့်ခေတ်အခါကမှန်း မသိရသော သွေးကွက်ဟောင်းအချို့ပင် ရှိနေဆဲဖြစ်သည်။ ၎င်းတို့သည် ယခုအချိန်အထိ လုံးလုံးလျားလျား မခြောက်သွေ့သွားသည့်အပြင် ထိုသွေးများအတွင်းရှိ စွမ်းအင်များလည်း ကုန်ဆုံးသွားခြင်း မရှိပေ။ ၎င်းတို့သည် ကျွမ်းကျင်သူအများအပြား၏ သွေးများဖြစ်ကြောင်း သိသာထင်ရှားသည်။ ထိုနေ့တွင် မြင်းစီးလာသည့် အဖွဲ့တစ်ဖွဲ့သည် ဤနယ်စပ်မြို့ငယ်လေးသို့ ရောက်ရှိလာသည်။ ခေါင်းဆောင်ဖြစ်သူသည် လရောင်ကဲ့သို့ ဖြူစင်သော ဝတ်စုံကို ဝတ်ဆင်ထား၍ အလွန် သန့်ရှင်းသပ်ရပ်လှသည်။ ၎င်းတို့သည် ချူးယွင်ဖန်းနှင့် သူ၏အဖွဲ့ဝင်များဖြစ်ကြသည်။

‘ဒါဆို ဒါက ပေါင်ထိုက်မြို့ပေါ့။ ပေါင်ထိုက်မြို့က လူဦးရေ ၂ သိန်းလောက်ရှိပြီး လက်အောက်ခံ ကျေးရွာ၊ မြို့ငယ်လေးတွေကိုပါ ထည့်တွက်ရင် ၃ သိန်းလောက်ရှိတယ်’ ချူးယွင်ဖန်းက ပေါင်ထိုက်မြို့နှင့် ပတ်သက်သည့် အချက်အလက်အချို့ကို ပြန်တွေးလိုက်သည်။

နယ်စပ်မြို့များစွာတို့တွင် ပေါင်ထိုက်မြို့သည် အကြီးမားဆုံးမဟုတ်သော်လည်း အထူးခြားဆုံးဖြစ်သည်။ ၎င်း၏ ပထဝီဝင်အနေအထားအရ အစောပိုင်းနှစ်များတွင် မွန်းစတားများနှင့် ရှေ့တန်းက ရင်ဆိုင်ခဲ့ရသည်။ ၎င်း​၏မြောက်ဘက်သည် ဟူမျိုးနွယ်စု၏ နယ်မြေဖြစ်၍ တောင်ဘက်တွင်မူ လူရိုင်းများရှိကြသည်။ ၎င်းမြို့ကို အင်အားစု လေးခု၏ လမ်းဆုံဟု ဆိုနိုင်ပေသည်။ ယခုအခါ ၎င်းတို့သည် ရှေ့တန်းတွင် မရှိတော့သော်လည်း အင်အားစုအမျိုးမျိုးတို့ကြောင့် ရှုပ်ထွေးနေဆဲဖြစ်သည်။

မြို့ရိုးကို ကြည့်လိုက်သည်နှင့် နှစ်ပေါင်းများစွာကြာ ပြုပြင်မွမ်းမံခြင်း မရှိခဲ့ကြောင်း သိသာလှသည်။ မြို့ရိုးပေါ်ရှိ မှော်အတတ်များနှင့် ဖွဲ့စည်းပုံများ၌ ပျက်စီးမှုများစွာ ရှိနေသည်။ ဤနှစ်များတစ်လျှောက် အထက်လူကြီးများ ပြုပြင်ရန် ရန်ပုံငွေ မချပေးခြင်းသော်လည်းကောင်း ချအပ်ထားသော ရန်ပုံငွေများကို မြို့၏ အရာရှိများ သိမ်းပိုက်လိုက်ခြင်းသော်လည်းကောင်း မည်သူမျှ မသိနိုင်ပေ။ အကြောင်းမှာ ယခင်က တာဝန်ထမ်းဆောင်ခဲ့သော ဗိုလ်မှူးကြီးများအားလုံး မရေရာသောအကြောင်းရင်းများဖြင့် သေဆုံးခဲ့ကြသောကြောင့်ဖြစ်သည်။ အကြောင်းကိစ္စရပ်များစွာသည် ဝေဝါးနေဆဲဖြစ်သည်။

‘ဘာပဲဖြစ်ဖြစ်၊ ဒါက ကြီးမြတ်တဲ့ တရှမှာ ငါ့အင်အားကို စတင်တည်ဆောက်ရမယ့် နေရာပဲ။ ပေါင်ထိုက်မြို့က ငါ့ပိုင်နက် ဖြစ်လာလိမ့်မယ်’ ချူးယွင်ဖန်းသည် ရှေ့ရှိ ကြီးမားလှသော မြို့ကို ငေးကြည့်လျက် သူ၏ရင်ထဲတွင် ဂုဏ်ယူဝံ့ကြွားမှုများ တိုးပွားလာသည်။

လီချန်းယွမ်ကြောင့် ပေါင်ထိုက်မြို့သို့ ပြောင်းရွှေ့ခဲ့ရသော်လည်း ချူးယွင်ဖန်းသည် အနည်းငယ်မျှ ကြောက်ရွံ့လိမ့်မည် မဟုတ်ဘူးဟု လီချန်းယွမ် ထင်မှတ်ထားမည် မဟုတ်ပေ။ ဆန့်ကျင်ဘက်အနေဖြင့် ချူးယွင်ဖန်းသည် ဤအခွင့်အရေးကို အသုံးချကာ ကြီးမားသောအရာတစ်ခုကို လုပ်ဆောင်လိုနေသည်။

"ဘယ်သူလဲ" ချူးယွင်ဖန်းနှင့် အဖွဲ့သားများကို မြို့တံခါးစောင့် စစ်သည်များက တားဆီးလိုက်သည်။

"အတင့်ရဲလို့။ မင်းတို့ မျက်စိကန်းနေကြတာလား။ ဒါက ဗိုလ်မှူးကြီးအသစ်ပဲ။ မင်းတို့ရဲ့ တပ်မှူး ဘယ်မှာလဲ။ ခေါင်းဆောင်အသစ်ကို လာကြိုဆိုဖို့ သွားခေါ်လာခဲ့"

ချူးယွင်ဖန်း စကားမပြောမီ ယုချူးယွမ်က အရှေ့တိုး၍ မြို့စောင့်စစ်သားကို အော်ငေါက်လိုက်သည်။ စစ်သည်များ ထိုစကားကို ကြားသောအခါ ချက်ချင်းပင် ထိတ်လန့်သွားကြသည်။ ဗိုလ်မှူးကြီးဟူသည် ၎င်းတို့၏ တိုက်ရိုက်အထက်အရာရှိဖြစ်၍ တစ်မြို့လုံး၏ ပိုင်ရှင်အစစ်အမှန်ဖြစ်သည်။ အထူးသဖြင့် ဤကဲ့သို့သော နယ်စပ်မြို့တွင် ဗိုလ်မှူးကြီးဟူသည် များသောအားဖြင့် မြို့၏ အင်အားအကြီးဆုံးပုဂ္ဂိုလ်ဖြစ်သည်။ မကြာမီတွင် ခပ်ဝဝ သတ်လတ်ပိုင်းအရွယ် အမျိုးသားတစ်ဦး အလျင်အမြန် ပြေးလာသည်။ အမျိုးသားသည် ချူးယွင်ဖန်းကို မြင်သောအခါ အရိုအသေပေး၍ ပြောလိုက်သည်။

"ဗိုလ်မှူးကြီးကို ကြိုဆိုပါတယ်။ ကျွန်တော့်နာမည်က ချန်ထိုက်ပါ"

ချူးယွင်ဖန်းသည် ခပ်ဝဝ အမျိုးသားကို တစ်ချက်ကြည့်ပြီးနောက် မျက်မှောင်အနည်းငယ် ကြုတ်လိုက်သည်။ ဤနေရာရှိ အခြေအနေများသည် အလွန်ယောက်ယက်ခတ်နေသည်။ ပေါင်ထိုက်မြို့သည် ရှေ့တန်းတွင် မရှိသည့်အပြင် ထိုနေရာတွင် တပ်စွဲထားသည့် တပ်ဖွဲ့များသည် ဒုတိယတန်းစား တပ်ဖွဲ့များသာဖြစ်သော်လည်း ၎င်းတို့သည် စစ်သည်များနှင့် လုံးလုံးလျားလျား မတူညီပေ။

ချူးယွင်ဖန်းသည် ကြီးမြတ်သောတရှတွင် စစ်တပ်ထဲသို့ ပထမဆုံးအကြိမ် ဝင်ရောက်ခြင်းဖြစ်သော်လည်း သူသည် တစ်ချိန်က ပြည်ထောင်စု၏ လူသားတပ်မတော်တွင် အဆင့်မြင့်အရာရှိတစ်ဦးဖြစ်ခဲ့ဖူးသည်။ သူသည် အခြေအနေအမျိုးမျိုးကို မြင်တွေ့ခဲ့ရသောကြောင့် တစ်ချက်ကြည့်လိုက်ရုံဖြင့် ဤတပ်ဖွဲ့တွင် တစ်စုံတစ်ခု မှားယွင်းနေကြောင်း သိရှိသွားသည်။

သို့သော် ချူးယွင်ဖန်းသည် ကိုယ့်ကိုယ်ကို ထိန်းချုပ်၍ ပြောလိုက်သည်။

"ပေါင်ထိုက်မြို့ရဲ့ တပ်စခန်းက ဘယ်မှာလဲ။ ကျုပ်ကို လမ်းပြပေး"

"ဟုတ်ကဲ့၊ အမိန့်အတိုင်းပါ" ချန်ထိုက်က ပြန်ဖြေလာသည်။

ချန်ထိုက်သည် ရိုသေနေသော်လည်း ချူးယွင်ဖန်းအပေါ် မျှော်လင့်ချက်အနည်းငယ်သာ ထားရှိသည်။ ဗိုလ်မှူးကြီးသည် ၎င်းတို့၏ အထက်အရာရှိဖြစ်သော်လည်း ယခင် ဗိုလ်မှူးကြီးများသည် အကြောင်းမဲ့ သေဆုံးခဲ့ရသည်။ ဤတစ်ကြိမ်တွင်လည်း ထိုအတိုင်းပင် ဖြစ်ပေလိမ့်မည်။ ၎င်းတို့သည် အမြဲတစေ စိတ်ကြိုက်သာ လုပ်ဆောင်လေ့ရှိသည်။ သူသည် ကောင်းစွာ ဖုံးကွယ်ထားသည်ဟု ထင်မှတ်နေသော်လည်း ချူးယွင်ဖန်း၏ အမြင်မှ မည်သို့ လွတ်မြောက်နိုင်မည်နည်း။ ချူးယွင်ဖန်းသည် ယခုအချိန်တွင် စကားအပိုပြောရန် စိတ်မပါသေးသောကြောင့်သာ မည်သည့်စကားမျှ ပြန်မပြောခဲ့ပေ။

ချန်ထိုက်၏ လမ်းပြမှုဖြင့် ချူးယွင်ဖန်းတို့အဖွဲ့သည် မြို့၏အရှေ့ဘက်ရှိ ကြီးမားသော စစ်စခန်းတစ်ခုသို့ ရောက်ရှိလာသည်။ စခန်းသည် ပြုပြင်မွမ်းမံခြင်း မရှိသည်မှာ ကြာမြင့်ပြီဖြစ်သဖြင့် အတော်လေး ဟောင်းနွမ်းနေသည်။ ချူးယွင်ဖန်းတို့အဖွဲ့ စခန်းထဲသို့ ဝင်ရောက်လာစဉ် တားဆီးမှု တစ်စုံတစ်ရာ မရှိခဲ့ပေ။ စခန်းတွင် လူထောင်ပေါင်းများစွာ လက်ခံနိုင်သော်လည်း ယခုအချိန်တွင် အနည်းငယ် လစ်ဟင်းနေသည်။

လမ်းတစ်လျှောက်တွင် ချူးယွင်ဖန်းသည် ခါးကိုင်း၍ လေ့ကျင့်မှု ကင်းမဲ့နေဟန်ရှိသော စစ်သည်အချို့ကို တွေ့လိုက်ရသည်။ ချူးယွင်ဖန်းသာမကဘဲ ယုချူးယွမ်နှင့် အခြားသူများပင် မျက်မှောင်ကြုတ်လိုက်ကြသည်။ ဤနေရာသည် ထိုမျှပျက်စီးယိုယွင်းနေလိမ့်မည်ဟု ၎င်းတို့ မထင်မှတ်ထားခဲ့ပေ။ ဒုတိယတန်းစား တပ်ဖွဲ့များဆိုလျှင် ဤမျှဆိုးရွားသော အခြေအနေမျိုး ရှိမနေသင့်ပေ။ ရုတ်တရက်ဆိုသလိုပင် ဆူညံသံများ ကြားလိုက်ရပြီးနောက် ၎င်းတို့ဘက်သို့ စစ်သည်အချို့ ယိမ်းယိုင်စွာ လျှောက်လာကြသည်။ ထိုလူများသည် အရက်သောက်ရာမှ ပြန်လာဟန်ဖြင့် လက်ထဲတွင် ဘီယာပုလင်းများ ကိုင်ဆောင်ထားကြောင်း ချူးယွင်ဖန်း သတိပြုမိသွားသည်။

"ဟားဟားဟား၊ အဲဒီပတ္တမြားနီဆောင်ကြာမြိုင်က မိန်းကလေးက အကောင်းဆုံးပဲကွာ" အုပ်စုခေါင်းဆောင်ဟု ထင်ရသည့် စစ်သည်တစ်ဦးက ရယ်မောကာ ဆိုလိုက်သည်။

"နောက်တစ်ခါ မင်းတို့ကိုပါ ခေါ်သွားပေးမယ်"

"တော်တော်ဆိုးရွားတဲ့ လေထုအခြေအနေပဲ" ချူးယွင်ဖန်းက လှောင်ရယ်လိုက်သည်။

ချူးယွင်ဖန်း ထုတ်လွှတ်လိုက်သော ပြင်းထန်သည့် အရှိန်အဝါကြောင့် ချန်ထိုက် အလွန်တုန်လှုပ်သွား၍ ခေါင်းကို အမြန်ငုံ့ချလိုက်သည်။ ချန်ထိုက်သည် ချူးယွင်ဖန်း၏ ရှေးရေးအတွက် အကောင်းမမြင်သော်လည်း ချူးယွင်ဖန်းကဲ့သို့သော လူမျိုးသည် နောက်ခံအင်အားကြီးမားမှု မရှိဘဲ ဗိုလ်မှူးကြီးအဖြစ် ပြောင်းရွှေ့လာနိုင်မည် မဟုတ်ပေ။ ချူးယွင်ဖန်းသည် မိမိကဲ့သို့သော လူမျိုး စော်ကားမှုပြုနိုင်သော ပုဂ္ဂိုလ်မဟုတ်ပေ။

"ငါ့ကောင်တို့၊ ဒီအရက်သမားတွေကို အမူးပြေသွားအောင် ကြိုးနဲ့ချည်ပြီး ချိတ်ဆွဲထားလိုက်" ချူးယွင်ဖန်းက အမိန့်ပေးလိုက်သည်။

ယုချူးယွမ်နှင့် အဖွဲ့သားများသည် အနည်းငယ်မျှ သည်းမခံနိုင်တော့ဘဲ ပျံသန်းသွားကြသည်။

"မင်းတို့ ဘာလုပ်တာလဲ။ ကျုပ် ဘယ်သူလဲဆိုတာ သိလား"

ယစ်မူးနေသော စစ်သည်များက အော်ဟစ်လိုက်ကြသည်။ သို့သော် ၎င်းတို့သည် ရွှေအမတေပြီးပြည့်စုံအဆင့်သို့ပင် မရောက်သေးသူများဖြစ်ကြသည်။ ယုချူးယွမ်နှင့် အဖွဲ့သားများကဲ့သို့ ကျားသစ်၊ ဝံပုလွေများအလား သန်မာသူများကို ၎င်းတို့အားလုံး မည်သို့မျှ တားဆီးနိုင်မည်နည်း။ ယုချူးယွမ်နှင့် အဖွဲ့သားများသည် ကနဦးတွင် သူပုန်များ၏ ဖိနှိပ်မှုကြောင့် အလွန်ဒေါသထွက်ခဲ့ရသည်။ ၎င်းတို့သည် ထိုသူပုန်များကို မတိုက်ခိုက်နိုင်သော်လည်း ဤလူရမ်းကားများကိုမူ ကိုင်တွယ်နိုင်သေးသည်။ ၎င်းတို့သည် ခဏအတွင်း ထိုလူရမ်းကားများကို ကြိုးတုပ်ကာ တံခွန်တိုင်တွင် နှံကောင်များအလား ချိတ်ဆွဲလိုက်ကြသည်။

"ဗိုလ်မှူးကြီး၊ ဒီလိုလုပ်လို့ မရဘူးလေ။ အဲဒီလူက ဒု-ဗိုလ်မှူးကြီး တင်းချန်ရဲ့ ယောက်ဖပါ" ချန်ထိုက်၏ မျက်နှာအမူအရာ ဖြူဖျော့သွားသည်။ သူသည် ချူးယွင်ဖန်းထက်ပင် ထိုဒု-ဗိုလ်မှူးကြီးကို ပို၍ ကြောက်ရွံ့နေပုံပေါ်သည်။ တင်းချန်သည် ဩဇာအာဏာကြီးမားကြောင်း သိသာထင်ရှားသည်။

"ကျုပ်က ဒီစခန်းရဲ့ ဗိုလ်မှူးကြီးပဲ။ သာမန် ဒု-ဗိုလ်မှူးကြီးတစ်ယောက်က ဒီနေရာမှာ ကောင်းကင်ကို ပြောင်းပြန်လှန်လို့ မရဘူး" ချူးယွင်ဖန်းက ပြောလိုက်သည်။

"ကောင်းသားပဲ။ သူ ကျုပ်ကို လာမကြိုဆိုရသေးဘူး မဟုတ်လား၊ ခဏနေရင်တော့ သူ ပေါ်လာလိမ့်မယ်လို့ ကျုပ် ယုံကြည်တယ်" ချူးယွင်ဖန်း ဤနေရာသို့ ရောက်ရှိနေသည်မှာ ကြာမြင့်ပြီဖြစ်သော်လည်း စခန်းရှိ အရာရှိတစ်ဦးမျှ လာရောက်အရိုအသေ မပေးကြသေးပေ။

"စစ်စည် တီးပြီး အားလုံးကို စုရုံးခိုင်းလိုက်။ တပ်မှူးအဆင့်အထက်ရှိတဲ့ လူတွေအားလုံး ကျုပ် ရုံးခန်းကို လာခိုင်းလိုက်။ အမွှေးတိုင် တစ်တိုင်စာ အချိန်အတွင်း မရောက်လာတဲ့လူတွေကို ရာထူးကနေ ထုတ်ပယ်မယ်"

ချူးယွင်ဖန်းသည် အမိန့်ပေးပြီးနောက် သူ၏ရုံးခန်းထဲသို့ ဝင်သွားလေသည်။ ဤစစ်စခန်းသည် အဆိုးရွားဆုံးနေရာတစ်ခုဖြစ်လာသည်မှာ ကြမြင့်ပြီဖြစ်သည်။ ရက်စက်ကြမ်းကြုတ်မှု မပြသဘဲ ၎င်းတို့ကို ကိုင်တွယ်ရန် မဖြစ်နိုင်ပေ။

ဘုံး ဘုံး ဘုံး

အရေးပေါ် စစ်စည်တီးသံများ စခန်းတစ်ခုလုံးသို့ ပျံ့နှံ့သွားသောကြောင့် လူတိုင်း ရုတ်ရုတ်သဲသဲဖြစ်သွားကြသည်။ မည်သူက စစ်စည်တီးကာ လူစုခိုင်းဝံ့သနည်းဟု တွေးတောလျက် ဗိုလ်မှူးကြီး ရုံးခန်းရှိရာသို့ လူတိုင်း အံ့ဩတကြီး ကြည့်နေကြသည်။