အခန်း (၄၀၃-၄၀၅)

အခန်း (၄၀၃)- အဆင့် (၆) နတ်ဆိုးသားရဲဆောင် နှင့် လေဝိညာဉ် ပုလဲလုံး အား အဆင့်မြှင့်တင်ခြင်း

~ဂိုဏ်း ဂုဏ်သတင်းတန်ဖိုးများက (၁၀) သန်းကို ကျော်ဖြတ်သွားခဲ့တော့၏။

ဤသည်ကား ဂိုဏ်းချုပ် ၏ စတုတ္ထအဆင့် တာဝန်များထဲမှ ပထမဆုံးသော တာဝန်ပင် ဖြစ်သည်။

ယခုအခါ ယဲ့ဖုန်း သည် ထိုတာဝန်ကို နောက်ဆုံး၌ အောင်မြင်စွာ ပြီးဆုံးစေခဲ့ပြီ ဖြစ်၏။

“စောတာထက် စာရင် တိုက်ဆိုင်တာက ပိုကောင်းတယ် ဆိုသလိုပဲ... ဒီတစ်ခေါက်တော့ ဟန်ရီ နဲ့ ဟန်အာ တို့ နွယ်ပင်ဘီလူးကြီး ကို ဆင့်ခေါ်လိုက်တဲ့ ကိစ္စက ငါ့အတွက် အခွင့်အရေး ဖြစ်သွားတာပဲ...”

ယဲ့ဖုန်း တိုးညှင်းစွာ ရေရွတ်လိုက်မိသည်။

အကယ်၍ မနေ့က တိုက်ပွဲသာ မရှိခဲ့လျှင် မြူခိုးဂိုဏ်း ၏ ဂုဏ်သတင်းတန်ဖိုးသည် အလွန်ဆုံးရှိမှ (၅) သန်းလောက်အထိသာ တက်နိုင်မည် ဖြစ်ပြီး၊ (၁၀) သန်း ပြည့်ရန်မှာ အချိန်အတော်ကြာ စောင့်ရဦးမည် ဖြစ်သည်။

သို့သော် ယခုမူ တစ်ညအတွင်းမှာပင် သူသည် ဤတာဝန်ကို အပိုင်းအစမကျန် အောင်မြင်သွားခဲ့တော့၏။

“အရင်ဆုံး အဆင့်မြင့်သွားတဲ့ နတ်ဆိုးသားရဲဆောင် ကို စစ်ဆေးကြည့်ရအောင်...”

ယဲ့ဖုန်း သည် စနစ်ထဲမှ နတ်ဆိုးသားရဲဆောင် ဇယားကို ဖွင့်ကြည့်လိုက်၏။

[နတ်ဆိုးသားရဲဆောင် - အဆင့် (၆)]

[ဂိုဏ်းစောင့် ဝိညာဉ်သားရဲ - (၁၁) ကောင် / (၁၀၀) ကောင်]

[နတ်ဆိုးသားရဲဆောင် အဆင့်မြှင့်တင်မှု ဖော်ပြချက် - ဂုဏ်သတင်းတန်ဖိုး (သန်း ၁၀၀) ပြည့်ပါက အဆင့် (၇) သို့ ထပ်မံ မြှင့်တင်နိုင်မည် ဖြစ်ပြီး လုပ်ဆောင်ချက် အသစ်များ ပွင့်လာမည် ဖြစ်သည်]

[လုပ်ဆောင်ချက် (၁) - စွမ်းအား စုစည်းခြင်း - နတ်ဆိုးသားရဲဆောင် ရှိ ဝိညာဉ်သားရဲ များသည် ဂိုဏ်းချုပ် အတွက် အပိုဆောင်း ကျင့်ကြံခြင်း အဆင့် မြှင့်တင်မှုကို ပံ့ပိုးပေးနိုင်မည် ဖြစ်သည်]

[လုပ်ဆောင်ချက် (၂) - ထောက်လှမ်းခြင်း (အဆင့် ၃ ဆင့် မြှင့်တင်ထားသည်) - နတ်ဆိုးသားရဲ အမျိုးမျိုး၏ အမည်၊ အမျိုးအစား၊ အသုံးဝင်ပုံ၊ ပါရမီ နှင့် ပိုမိုနက်ရှိုင်းသော အားနည်းချက်များ အပါအဝင် အချက်အလက်များကို ရရှိနိုင်မည်]

[လုပ်ဆောင်ချက် (၃) - သွေးကြောသန့်စင်ဆေးလုံး - ဤဆေးလုံးသည် ဝိညာဉ်သားရဲ များ၏ သွေးကြောကို အကန့်အသတ်မရှိ သန့်စင်ပေးနိုင်ပြီး ပါရမီကို အမြင့်ဆုံးသို့ ရောက်ရှိစေမည်။ ၎င်းတွင် "ပုံရိပ်ယောင် ဆေးဖော်စပ်အိုး" ပါဝင်ပြီး လိုအပ်သော ကုန်ကြမ်းများ စုဆောင်းပြီးပါက တစ်နေ့လျှင် (၅) ကြိမ်အထိ ကိုယ်တိုင် ဖော်စပ်နိုင်သည်]

[လုပ်ဆောင်ချက် (၄) - ဝိညာဉ်သွေး လွှဲပြောင်းခြင်း - ကျဆုံးသွားသော နတ်ဆိုးသားရဲ များထံမှ သွေးကြောကို ထုတ်ယူကာ "ဝိညာဉ်သွေး" အဖြစ် သန့်စင်ပြီး မည်သည့် ဝိညာဉ်သားရဲ ထံသို့မဆို လွှဲပြောင်းပေးနိုင်သည်။ ထို့ပြင် ဝိညာဉ်သွေး ပေါင်းစပ်ခြင်း လုပ်ဆောင်ချက် အသစ်လည်း ပွင့်သွားမည် ဖြစ်ရာ သာမန် ဝိညာဉ်သွေး များကို အဆင့်မြင့် ဝိညာဉ်သွေး များအဖြစ် ပေါင်းစပ်နိုင်မည်]

[လုပ်ဆောင်ချက် (၅) - နတ်ဆိုးသားရဲ စင်မြင့် - ဝိညာဉ်သားရဲ များ နေထိုင်ရန် အထူးနေရာ ဖြစ်ပြီး၊ ထိုစင်မြင့်ပေါ်တွင် လေ့ကျင့်ပါက ဝိညာဉ်သားရဲ များ၏ ကျင့်ကြံခြင်း အရှိန်အဟုန်ကို နှစ်ဆ တိုးတက်စေမည်]

[လုပ်ဆောင်ချက် (၆) - နတ်ဆိုးဧကရာဇ် အရှိန်အဝါ- ဂိုဏ်းချုပ် သည် နတ်ဆိုးဧကရာဇ် အရှိန်အဝါ ၏ ကောင်းချီးကို ရရှိမည် ဖြစ်ပြီး၊ ၎င်းအား မိမိလက်အောက်ရှိ မည်သည့် ဝိညာဉ်သားရဲ ထံသို့မဆို ယာယီ လွှဲပြောင်းပေးနိုင်သည်]

နတ်ဆိုးသားရဲဆောင် ၏ လုပ်ဆောင်ချက် အသစ်များကို မြင်လိုက်ရသောအခါ ယဲ့ဖုန်း အလွန် စိတ်လှုပ်ရှားသွားရသည်။

ထောက်လှမ်းခြင်း စွမ်းရည်က (၃) ဆ တိုးလာခဲ့ပြီ ဖြစ်ပါ၏။

ပုံရိပ်ယောင် ဆေးဖော်စပ်အိုး ၏ တစ်နေ့တာ ထုတ်လုပ်နိုင်မှုကလည်း (၅) ကြိမ်အထိ ဖြစ်လာသည်။

ဝိညာဉ်သွေး လွှဲပြောင်းခြင်း နှင့်အတူ ဝိညာဉ်သွေး ပေါင်းစပ်ခြင်း လုပ်ဆောင်ချက် ပွင့်လာသည်မှာ တကယ့်ကို အကွက်အဆန်းပင်။

ဤနည်းဖြင့် သာမန် သွေးကြောများကို အစွမ်းထက်သော သွေးကြောများအဖြစ် ပေါင်းစပ်နိုင်မည့် အခွင့်အရေး ရှိလာပြီ ဖြစ်ရာ၊ ဝိညာဉ်သားရဲ များ၏ အလားအလာနှင့် တိုက်ခိုက်စွမ်းရည်ကို များစွာ မြှင့်တင်ပေးနိုင်ပေလိမ့်မည်။

နတ်ဆိုးသားရဲ စင်မြင့် ပေါ်တွင် ကျင့်ကြံခြင်း အရှိန်အဟုန်ကလည်း နှစ်ဆ တိုးသွားခဲ့ပြီ။

သို့သော် လုပ်ဆောင်ချက် (၆) ဖြစ်သည့် "နတ်ဆိုးဧကရာဇ် အရှိန်အဝါ" ကို မြင်သောအခါ ယဲ့ဖုန်း အနည်းငယ် ကြောင်အသွားရသည်။

ငါက နတ်ဆိုးဧကရာဇ် တစ်ပါးလို အရှိန်အဝါမျိုးကို ဆင်မြန်းပြီး နတ်ဆိုးသားရဲ အုပ်ကြီးကို အမိန့်ပေးနိုင်မှာလား။ ဒါက တကယ့်ကို မယုံနိုင်စရာပဲ။

ယဲ့ဖုန်း ပုခုံးတွန့်လိုက်မိသည်။

အဆင့် (၆) နတ်ဆိုးသားရဲဆောင် အကြောင်းကို စစ်ဆေးပြီးနောက် ယဲ့ဖုန်း လက်ကို မြှောက်လိုက်ရာ ရွှေရောင် တဖျပ်ဖျပ် တောက်နေသော "ကံထူးအိတ်" တစ်လုံး သူ့လက်ဖဝါးပေါ်တွင် ပေါ်လာ၏။

ဒါကတော့ ဂုဏ်သတင်းတန်ဖိုး (၁၀) သန်း ပြည့်သည့်အတွက် စနစ်မှ ပေးသော အထူးဆုလာဘ် အထုပ်ပင် ဖြစ်ပါသည်။

“အထူး ကံထူးအိတ် ကို ဖွင့်မယ်...”

သူ့လက်ထဲမှ ရွှေရောင် ကံထူးအိတ်လေးသည် တဖြည်းဖြည်း ပြိုကွဲသွားပြီး၊ လေထုထဲတွင် ဖျော့တော့သော ရွှေရောင် အလင်းတန်းလေးတစ်ခု အဖြစ် ပြောင်းလဲသွားကာ သူ့လက်ချောင်းထိပ်လေးတွင် ဝဲလည်နေတော့သည်။

အခြားတစ်ဖက်တွင်လည်း လေဝိညာဉ် ပုလဲလုံး သည် အလိုအလျောက် ပေါ်ထွက်လာပြီး ထိုရွှေရောင် အလင်းတန်းလေးအနားတွင် ပျံဝဲနေကာ အချင်းချင်း ဆွဲငင်နေကြ၏။

“စနစ်... ဒါက ဘာလဲ...”

စနစ်သည် ခေတ္တမျှ တိတ်ဆိတ်သွားပြီး (၁၀) စက္ကန့်ခန့် ကြာမှသာ ရှင်းပြလာ၏။

“ဒါက ရွှေရောင် မူလအစ စွမ်းအား တစ်မျှင် ဖြစ်ပါတယ်... ၎င်းက လေဝိညာဉ် ပုလဲလုံး ကို အဆင့်နိမ့် ဝိညာဉ်ရတနာ အဖြစ် အဆင့်မြှင့်တင်ပေးနိုင်ပါတယ်...”

“ဝိညာဉ်ရတနာလား...”

ယဲ့ဖုန်း မျက်လုံးအိမ်များ ကျဉ်းမြောင်းသွားရသည်။

လက်ရှိ လေဝိညာဉ် ပုလဲလုံး သည် အဆင့်မြင့် ဝိညာဉ်လက်နက် မျှသာ ရှိသေးသည်။ အဆင့်တက်လျှင်ပင် အထွတ်အထိပ် အဆင့် ဝိညာဉ်လက်နက် ဖြစ်ရမှာ မဟုတ်ဘူးလား။

စို့သော်၊ ယခုတော့ ဒီ ရွှေရောင် မူလအစ စွမ်းအား ကို စုပ်ယူလိုက်တာနှင့် မူလနတ်ဘုရား အဆင့်နှင့် ညီမျှသော အဆင့်နိမ့် ဝိညာဉ်ရတနာ တိုက်ရိုက် ဖြစ်သွားမည် ပေါ့လေ။

ဒါက တကယ့်ကို အစွမ်းထက်လွန်းလှသည်။

“ဂိုဏ်းချုပ် နားမကြားမှားပါဘူး... ဒီ ရွှေရောင် မူလအစ စွမ်းအား ကို အသုံးပြုပြီး လေဝိညာဉ် ပုလဲလုံး ကို အဆင့်နိမ့် ဝိညာဉ်ရတနာ အဖြစ် တကယ် ပြောင်းလဲနိုင်ပါတယ်... ဒါပေမဲ့ အပိုဆောင်း အနေနဲ့ ယုံကြည်မှု စွမ်းအား (၁) သိန်း လိုအပ်ပါလိမ့်မယ်...”

စနစ်က ဆက်လက် ပြောကြား၏။

ယဲ့ဖုန်း သည် ယုံကြည်မှု စွမ်းအား ဇယားကို အမြန် ဖွင့်ကြည့်လိုက်၏။

[ယုံကြည်မှု စွမ်းအား - ၁၀၇၆၄၃]

ယခုအချိန်တွင် သူ့ထံ၌ ယုံကြည်မှု စွမ်းအား စုစုပေါင်း (၁) သိန်းကျော် ရှိနေခဲ့ပြီ ဖြစ်သည်။

“ငါ့ဆီမှာ ယုံကြည်မှု စွမ်းအားတွေ ဒီလောက်တောင် များနေတာလား...”

ယဲ့ဖုန်း အံ့သြသွားရ၏။

သူ့စိတ်ထဲတွင် ယုံကြည်မှု စွမ်းအား သောင်းဂဏန်းလောက်ပဲ ရှိမယ် ထင်ထားတာ။ တကယ်တမ်းကျတော့ (၁) သိန်းတောင် ကျော်နေပြီပဲ။

“လူတစ်ယောက်စီကနေ ယုံကြည်မှု စွမ်းအားတွေကို အဆက်မပြတ် ရရှိနိုင်ပါတယ်... ဂိုဏ်းချုပ် ကို ယုံကြည်သူ အများကြီး မရှိသေးပေမယ့်၊ ရှိတဲ့သူတွေဆီကနေ နေ့တိုင်း ယုံကြည်မှု စွမ်းအားတွေ ရနေတာပါ... အချိန်ကြာလာတာနဲ့အမျှ သန်းချီ ဖြစ်လာတာက မဆန်းပါဘူး...”

စနစ်က ရှင်းပြလိုက်သည်။

ထိုစကားကို ကြားသောအခါ ယဲ့ဖုန်း ခေါင်းညိတ်လိုက်သည်။

“ယုံကြည်မှု စွမ်းအား ကလည်း လုံလောက်တယ်၊ ဒီ ရွှေရောင် မူလအစ စွမ်းအား ကလည်း ရှိနေပြီဆိုတော့... လေဝိညာဉ် ပုလဲလုံး ကို အဆင့်နိမ့် ဝိညာဉ်ရတနာ အဖြစ် အဆင့်မြှင့်တင်ကြတာပေါ့...”

ယဲ့ဖုန်း ဆုံးဖြတ်လိုက်၏။

ဝိညာဉ်ရတနာ... မူလနတ်ဘုရား အဆင့် နှင့် ညီမျှသော အရာ။

အကယ်၍ လေဝိညာဉ် ပုလဲလုံး သာ အောင်မြင်စွာ အဆင့်တက်သွားပါက သူ့စွမ်းအားသည် ဧကန်မုချ တစ်ဟုန်ထိုး တိုးတက်လာပေလိမ့်မည်။

သူ့အနေနဲ့ လက်ရှိ အဆင့်မြင့် ဝိညာဉ်ပင်လယ်အဆင့်ကို ကျော်လွန်ပြီး မူလနတ်ဘုရား အဆင့် နယ်ပယ်ထဲကို တိုက်ရိုက် ခြေစုံပစ် ဝင်ရောက်နိုင်မလား ဆိုတာ ဘယ်သူ သိနိုင်မှာလဲ။

“အဆင့်မြှင့်တင်ထားတဲ့ လေဝိညာဉ် ပုလဲလုံး က တိုက်ခိုက်ရေး အမျိုးအစား ဝိညာဉ်ရတနာ မဟုတ်ပါဘူး... လုပ်ဆောင်ချက် ပေါင်းစုံပါတဲ့ အထောက်အကူပြု ဝိညာဉ်ရတနာ ပါ... ၎င်းက ဂိုဏ်းချုပ် ရဲ့ စွမ်းအားကို မူလနတ်ဘုရား အဆင့် ဆီကို တိုက်ရိုက် ပို့ဆောင်ပေးမှာ မဟုတ်ပါဘူး...”

ဟု စနစ်က ထပ်ဖြည့်ပြောလိုက်သည်။

“ဒါဆိုရင် ဘာထူးမှာလဲကွ...”

ယဲ့ဖုန်း အနည်းငယ် စိတ်ပျက်သွားမိသည်။

သို့သော်လည်း အဆင့်မြှင့်တင်ထားသော လေဝိညာဉ် ပုလဲလုံး သည် အနည်းဆုံးတော့ အစွမ်းထက်သော ကာကွယ်ရေး စွမ်းရည်ကို ပေးစွမ်းနိုင်မည် ဖြစ်သည်။

ထို့ကြောင့် ယဲ့ဖုန်း သည် အဆင့်မြှင့်ရန်သာ ရွေးချယ်လိုက်တော့၏။

“တီ..တီ.. ရွှေရောင် မူလအစ စွမ်းအား (၁) မျှင် ကို အသုံးပြုနေပါတယ်...”

“တီ..တီ.. ယုံကြည်မှု စွမ်းအား (၁) သိန်း ကို အသုံးပြုနေပါတယ်...”

“တီ..တီ.. လေဝိညာဉ် ပုလဲလုံး အဆင့်မြှင့်တင်နေပါတယ်... ခေတ္တ စောင့်ဆိုင်းပါ...”

စနစ်ထံမှ အသိပေးသံ သုံးကြိမ် ဆက်တိုက် ထွက်ပေါ်လာသည်။

ယဲ့ဖုန်း ၏ ခန္ဓာကိုယ်ထဲမှ ထူးခြားသော မျှင်တန်းလေးများစွာ ထွက်ပေါ်လာပြီး၊ ထိုရွှေရောင် မူလအစ စွမ်းအား နှင့် ပေါင်းစပ်ကာ လေဝိညာဉ် ပုလဲလုံး ထဲသို့ စီးဝင်သွားသည်ကို တွေ့လိုက်ရ၏။

လေဝိညာဉ် ပုလဲလုံး သည် တဖြည်းဖြည်းနှင့် ကိုးရောင်ခြယ် အလင်းတန်းများ လင်းလက်လာပြီး၊ အတွင်းရှိ လေဓာတ် ဝိညာဉ်စွမ်းအင် (၃) မျှင်သည်လည်း ယခုအခါ အစိပ်စိပ်အမွှာမွှာ ကွဲထွက်သွားကာ (၁၀) မျှင်အထိ ဖြစ်လာ၏။

“ဟေး... ပမာဏက အဆပေါင်းများစွာ တိုးလာတာပဲ... သိပ်ကောင်းတာပဲ...”

ယဲ့ဖုန်း ပြုံးလိုက်မိသည်။

“တီ..တီ.. အဆင့်မြှင့်တင်မှု အောင်မြင်ပါသည်...”

(၁၀) မိနစ်ပင် မပြည့်သေးသော အချိန်အတွင်း စနစ်က ကြေညာလိုက်၏။

“မြန်လှချေလား...”

ယဲ့ဖုန်း မျက်လုံးများ ပြူးကျယ်သွားရသည်။

လေဝိညာဉ် ပုလဲလုံး အဆင့်နိမ့် ဝိညာဉ်ရတနာ ဖြစ်သွားတာ ကပ်ဘေးတောင် ကျော်ဖြတ်စရာ မလိုဘူးလား။

ပြီးတော့ ဒီအရှိန်က အရမ်း မြန်လွန်းနေသည်။

ယဲ့ဖုန်း သည် ၎င်းမှာ သတင်းမှားများလားဟုပင် သံသယ ဝင်မိသွား၏။

သူသည် လက်လှမ်းလိုက်ပြီး လေဝိညာဉ် ပုလဲလုံး ကို ထိတွေ့လိုက်ရာ၊ ၎င်းနှင့် ပတ်သက်သော အသေးစိတ် အချက်အလက်များ သူ့မျက်စိရှေ့တွင် ပေါ်လာတော့သည်။

[လေဝိညာဉ် ပုလဲလုံး - အဆင့်နိမ့် ဝိညာဉ်ရတနာ]

[မိတ်ဆက် - လေဓာတ် ဝိညာဉ်စွမ်းအင် (၁၀) မျှင် ပါဝင်သော လုပ်ဆောင်ချက် ပေါင်းစုံပါဝင်သည့် ဝိညာဉ်ရတနာ ဖြစ်သည်။ လေကို ထိန်းချုပ်ခြင်း၊ သတ်ဖြတ်ခြင်း၊ အသက်ကယ်ခြင်း၊ ထွက်ပြေးခြင်း နှင့် စွမ်းအား မြှင့်တင်ခြင်း စသည့် လုပ်ဆောင်ချက် အမျိုးမျိုး ရှိသည်။ လေဓာတ် ဝိညာဉ်စွမ်းအင် များကို အသုံးပြုပြီးပါက (၁) နာရီအတွင်း အားပြန်ပြည့်မည် ဖြစ်သည်]

[မှတ်ချက် - လေဝိညာဉ် ပုလဲလုံး သည် ပတ်ဝန်းကျင်ရှိ အရှင်မဲ့နေသော သူရဲကောင်း ဝိညာဉ်စွမ်းအားများကို စုပ်ယူနိုင်ပြီး၊ ၎င်းတို့ကို သန့်စင်ပြီးပါက အသုံးပြုသူ၏ စွမ်းအားကို တိုးတက်စေမည်]

[ပိုင်ဆိုင်သူ - ယဲ့ဖုန်း (သီးသန့်)]

“လေဓာတ် ဝိညာဉ်စွမ်းအင် (၁၀) မျှင်ကို အားပြန်ဖြည့်ဖို့ (၁) နာရီပဲ ကြာတယ်ပေါ့... ဒီအရှိန်က အရင်ကထက် အများကြီး ပိုမြန်လာတာပဲ...”

“ပြီးတော့ ဒီ လေဓာတ် ဝိညာဉ်စွမ်းအင် တွေကို အစွမ်းထက်တဲ့ တိုက်ကွက်တွေ အဖြစ် ပြောင်းလဲလို့ ရတယ်... (၁၀) မျှင်ပဲ ရှိသေးပေမယ့်၊ ဒီစွမ်းအားနဲ့ဆိုရင် မူလနတ်ဘုရား အဆင့် တွေနဲ့ ယှဉ်တိုက်လို့ ရလောက်ပြီ...”

“ဒါ့အပြင် လေဝိညာဉ် ပုလဲလုံး က အရှင်မဲ့ သူရဲကောင်း ဝိညာဉ်စွမ်းအား တွေကိုတောင် သန့်စင်ပေးနိုင်သေးတယ်... ဒီလိုဆိုရင် ငါ့စွမ်းအား တိုးဖို့အတွက် ထိုင်စောင့်နေစရာ မလိုတော့ဘူးပေါ့...”

ယဲ့ဖုန်း သည် လေဝိညာဉ် ပုလဲလုံး ၏ အချက်အလက်များကို ကြည့်ရင်း မျက်နှာတွင် ပြုံးပျော်မှုများ ပိုမို ထင်ဟပ်လာ၏။

သူသည် လေဝိညာဉ် ပုလဲလုံး ကို ဆုပ်ကိုင်ကာ အိမ်ထဲမှ ထွက်လာခဲ့သည်။

တစ်ညလုံး အပြင်းအထန် လုပ်ဆောင်ခဲ့ကြပြီးနောက် ပျက်စီးနေသော မြို့ရိုးများနှင့် လမ်းမများသည် အကြမ်းဖျင်း ပြန်လည် ကောင်းမွန်သွားခဲ့ပြီ ဖြစ်သည်။ ကျဆုံးသွားသော ကျင့်ကြံသူများနှင့် သာမန် ပြည်သူများကိုလည်း စနစ်တကျ သင်္ဂြိုဟ်ပေးပြီး ဖြစ်၏။

“ဂိုဏ်းချုပ် ဦးလေး... ကျွန်တော်တို့ အလုပ်တွေ ပြီးပါပြီ...”

ဖုန်တထောင်းထောင်းနှင့် အစ်ကိုကြီး ရှီလေ့ သည် အဝေးမှ ပျံသန်းလာပြီး၊ သူ့နောက်တွင် တပည့်များစွာ လိုက်ပါလာကြသည်။

သူတို့၏ အရှိန်အဝါများ တုန်ခါသွားပြီးနောက် ခန္ဓာကိုယ်ပေါ်ရှိ ဖုန်မှုန့်များ လွင့်စင်သွားကာ၊ ရေစင်တော်နှင့် ဆေးကြောထားသကဲ့သို့ လန်းဆန်းတောက်ပနေကြ၏။

“ကောင်းတယ်... တော်ကြပါတယ်...”

ယဲ့ဖုန်း က တပည့်များ၏ ပုခုံးကို ပုတ်ကာ ချီးကျူးလိုက်သည်။

“သွားပြီး အနားယူကြဦး... ငါ အပြင်ကို ခဏသွားဦးမယ်... ဒီညကျရင် ငါတို့ ခရိုင်ဘုရင်စံအိမ် မှာ ချိန်းထားတာ ရှိတယ်...”

ပြောပြီးနောက် ယဲ့ဖုန်း သည် လေဝိညာဉ် ပုလဲလုံး ကို သယ်ဆောင်ကာ ကောင်းကင်ယံသို့ ပျံတက်သွား၏။

လေဝိညာဉ် ပုလဲလုံး မှတစ်ဆင့် သူသည် ခရိုင်ဘုရင်မြို့တော် ၏ မြေအောက်နက်ရှိုင်းသော နေရာတွင် ဖုံးကွယ်နေသည့် အရှင်မဲ့ ရှေးဟောင်း သူရဲကောင်း ဝိညာဉ်စွမ်းအား များစွာ ရှိနေသည်ကို ခံစားလိုက်ရသဖြင့်၊ ၎င်းတို့ကို ကမန်းကတန်း စုပ်ယူ သန့်စင်လိုက်လေတော့သည်။

“ဝှစ်...”

ခရိုင်ဘုရင်မြို့တော် အတွင်း၌ မမြင်နိုင်သော လေဝဲကြီး တစ်ခု ပေါ်ထွက်လာပြီး၊ သဘာဝ ဝိညာဉ်စွမ်းအင်များကို တုန်ခါသွားစေကာ ပညာရှင်များစွာ၏ အာရုံကို ဆွဲဆောင်လိုက်၏။

ထိုလှုပ်ရှားမှုနောက်သို့ လိုက်ကြည့်လိုက်ရာ ကောင်းကင်တွင် ပျံဝဲနေသော ယဲ့ဖုန်း ကို တွေ့လိုက်ရသည်။ သူ့ဘေးပတ်လည်တွင် ရောင်စုံ ဝိညာဉ်စွမ်းအင်များ ဝန်းရံနေပြီး သူ့ကို တဖြည်းဖြည်း လွှမ်းခြုံသွား၏။

“ဘာဖြစ်တာလဲ...”

“ဂိုဏ်းချုပ်ယဲ့ က တစ်ခုခုသော လျှို့ဝှက်ဆန်းကြယ်တဲ့ နတ်ဘုရား စွမ်းရည် ကို ကျင့်ကြံနေတာ ဖြစ်မယ်...”

မြေပြင်ပေါ်ရှိ ကျင့်ကြံသူ အများအပြားက တီးတိုး ထင်ကြေးပေးနေကြတော့သည်။

*

ခရိုင်ဘုရင်စံအိမ် တွင် ဖြစ်သည်။

ရှုချန်ကျွင်း သည် ကျင့်ကြံနေရာမှ နိုးထလာပြီး ကောင်းကင်ယံရှိ ယဲ့ဖုန်း ကို လှမ်းကြည့်လိုက်ရာ မျက်လုံးအိမ်များ ရုတ်တရက် ကျဉ်းမြောင်းသွား၏။

“တကယ့်ကို ကောင်းကင်ဘုံက ရွေးချယ်ထားတဲ့သူပဲ... ဒီတိုက်ပွဲအပြီးမှာ ငါတို့ ခရိုင်ဘုရင်မြို့တော် ရဲ့ မြေအောက်ထဲက ခေါင်းမာလှတဲ့ ရှေးဟောင်း သူရဲကောင်း ဝိညာဉ်စွမ်းအား တွေတောင်မှ ဂိုဏ်းချုပ်ယဲ့ ဆီကို အကုန် စုပြုံသွားကြတာပဲ... ဒါက သူ့ကို အသိအမှတ်ပြုလိုက်တာပဲ... တကယ့်ကို အားကျမိပါတယ်ဗျာ...”

ခရိုင်ဘုရင် ရှုချန်ကျွင်း သက်ပြင်းချလိုက်မိသည်။

သူသည် ခရိုင်ဘုရင်မြို့တော် ၏ အရှင်သခင် ဖြစ်သော်လည်း ထို ရှေးဟောင်း သူရဲကောင်း ဝိညာဉ်စွမ်းအား များ၏ အသိအမှတ်ပြုမှုကို မရရှိခဲ့ပေ။

သို့သော် ယဲ့ဖုန်း မှာမူ ရောက်လာပြီး တစ်ညတည်းနှင့်တင် သူတို့၏ သဘောတူညီမှုကို ရရှိခဲ့သည်မှာ တကယ့်ကို အားကျစရာပင်။

သို့သော် ခရိုင်ဘုရင် ရှုချန်ကျွင်း မသိသည်မှာ ယဲ့ဖုန်း သည်လည်း သူ့ဘာသာသူ ထိုစွမ်းအားများကို အသိအမှတ်ပြုခံရအောင် လုပ်နိုင်ခြင်း မဟုတ်ပေ။

သူသည် လေဝိညာဉ် ပုလဲလုံး ၏ ထူးခြားသော စွမ်းရည်ကြောင့်သာ စုပ်ယူနိုင်ခြင်း ဖြစ်ပေသည်။

ခရိုင်ဘုရင်မြို့တော် ပတ်ဝန်းကျင်တွင် ဖြစ်သည်။

လူများသည် ကောင်းကင်ယံမှ ထူးခြားသော ဖြစ်စဉ်ကို တဖြည်းဖြည်း သတိပြုမိလာကြပြီး ခြေလှမ်းများကို ရပ်ကာ မော့ကြည့်နေကြလေတော့၏။

အခန်း (၄၀၄)- ရှေးဟောင်း သူရဲကောင်း ဝိညာဉ်စွမ်းအားကို သန့်စင်ခြင်းနှင့် အရပ်မျက်နှာအသီးသီးမှ တုန်လှုပ်ချောက်ချားသွားခြင်း

~ခရိုင်ဘုရင် ရှုချန်ကျွင်း သာမက၊ ခရိုင်ဘုရင်မြို့တော် အတွင်းရှိ စွမ်းအားကြီး ပုဂ္ဂိုလ်များစွာတို့သည်လည်း ယဲ့ဖုန်း က မြေအောက်ရှိ သူရဲကောင်း ဝိညာဉ်များ၏ စွမ်းအားကို ပေါင်းစပ်နေခြင်းဖြစ်ကြောင်း ရိပ်မိလိုက်ကြ၏။

“ကောင်းကင်ဘုံက ရွေးချယ်ထားတဲ့သူဆိုတာ တကယ့်ကို ကြောက်စရာကောင်းပါလား...”

လျူမင်၊ မိုဝမ်ရှီ နှင့် ဘိုးဘေးနင် တို့သည် စစ်မှန်သော နှလုံးသားဖြင့် ချီးကျူးလိုက်ကြကုန်၏။

ယဲ့ဖုန်း အပေါ် သူတို့၏ ကြည်ညိုလေးစားမှုမှာ အတိုင်းထက်အလွန်ပင်။

တောင်ပိုင်းမြစ်ဝှမ်း ဒေသ တစ်ခုလုံးတွင် ခရိုင်ဘုရင်မြို့တော် မြေအောက်ရှိ ရှေးဟောင်း သူရဲကောင်း ဝိညာဉ်များ၏ အသိအမှတ်ပြုမှုကို ခံယူနိုင်သည့် အရည်အချင်းမျိုးမှာ ယဲ့ဖုန်း တစ်ဦးတည်းသာ ရှိပေလိမ့်မည်။

အတိတ်ကာလကလည်း ဤမြို့တော်တွင် "ကောင်းကင်ဘုံက ရွေးချယ်ထားသူ" များ ပေါ်ထွန်းခဲ့ဖူးသည်ပင်။

သို့သော် ထိုသူတို့မှာ သူရဲကောင်း ဝိညာဉ်စွမ်းအား ၏ အစိတ်အပိုင်း အနည်းငယ်ကိုသာ ခံယူနိုင်ခဲ့ကြပြီး၊ နောက်ဆုံးတွင် ကြီးမားလှသော စိတ်ပိုင်းဆိုင်ရာ ဖိအားဒဏ်ကို မခံနိုင်ဘဲ စိတ်ဓာတ်ပြိုလဲကာ ဝိညာဉ်ပင်လယ်အဆင့် သို့ပင် မရောက်ရှိနိုင်ခဲ့ကြချေ။

သို့သော် ယခုမူ ယဲ့ဖုန်း ၏ ခန္ဓာကိုယ်အတွင်းရှိ သူရဲကောင်း ဝိညာဉ်စွမ်းအား မှာ ပိုမိုခမ်းနားထည်ဝါလာပြီး မူလနတ်ဘုရား အဆင့် သို့ပင် တစ်ရှိန်ထိုး တိုးဝင်သွားတော့မည့်အလား ခံစားနေရတော့၏။

‘သူရဲကောင်း ဝိညာဉ်စွမ်းအား တစ်ခုတည်းနဲ့တင် မူလနတ်ဘုရား အဆင့် ကို ယှဉ်နိုင်နေပြီဆိုရင်၊ ဂိုဏ်းချုပ်ယဲ့ ရဲ့ ကိုယ်ပိုင်အစွမ်းတွေပါ ပေါင်းလိုက်ရင် အဲဒီအဆင့်မှာ သူက ပြိုင်ဘက်ကင်း ဖြစ်မနေဘူးလား...’

လူအုပ်ကြီးမှာ ဤသို့ပင် တွေးတောမိလိုက်ကြတော့သည်။

ကောင်းကင်ယံ အမြင့်တွင် ဖြစ်သည်။

အောက်ဘက်ရှိ လူများ၏ ဆွေးနွေးပြောဆိုသံများကို ကြားလိုက်ရသောအခါ ယဲ့ဖုန်း ၏ မျက်နှာတွင် ထူးဆန်းသော အမူအရာတစ်ခု ပေါ်လာ၏။

‘ဟဲဟဲ... နောက်တစ်ခါ အထင်မှားခံရပြန်ပြီ...’

ယဲ့ဖုန်း စိတ်ထဲမှ ခပ်ပြုံးပြုံး ရေရွတ်လိုက်၏။

အကယ်၍ အဆင့်နိမ့် ဝိညာဉ်ရတနာ အဖြစ် အဆင့်တက်သွားသည့် လေဝိညာဉ် ပုလဲလုံး သာ မရှိခဲ့လျှင် သူသည် ခရိုင်ဘုရင်မြို့တော် မြေအောက်ရှိ ရှေးဟောင်း သူရဲကောင်း ဝိညာဉ်စွမ်းအား များကို စုပ်ယူနိုင်မည် မဟုတ်ပေ။

ထိုစွမ်းအားများသည် အလွန်ပင် ခေါင်းမာလှကြောင်း သူ ခံစားသိရှိနေသည်။

အကယ်၍သာ တကယ့် ပြိုင်ဘက်ကင်း သူရဲကောင်း တစ်ဦး မဟုတ်ပါက ထိုသူရဲကောင်း ဝိညာဉ်များ၏ အသိအမှတ်ပြုမှုကို ရရှိရန်မှာ ဝေလာဝေးပင်။

သို့သော် ယခုမူ လေဝိညာဉ် ပုလဲလုံး ဟူသော "ဖြတ်လမ်းနည်း" ကြောင့် ယဲ့ဖုန်း မှာ အောင်မြင်သွားခဲ့ပြီး၊ သူ့ခန္ဓာကိုယ်အတွင်းရှိ သူရဲကောင်း ဝိညာဉ်စွမ်းအား များမှာလည်း ပိုမို သန်မာလာတော့၏။

“ဝုန်း...”

နာရီဝက်ခန့်အကြာတွင် ယဲ့ဖုန်း ၏ သူရဲကောင်း ဝိညာဉ်စွမ်းအား သည် အတားအဆီးများစွာကို ချိုးဖြတ်ကာ ဝိညာဉ်ပင်လယ်အဆင့် အထွတ်အထိပ်နှင့် ညီမျှသော အဆင့်သို့ တစ်ဟုန်ထိုး တိုးတက်သွား၏။

သို့သော် ဤမျှနှင့် မပြီးသေးပေ။

သူရဲကောင်း ဝိညာဉ်စွမ်းအား များ ပိုမို စီးဝင်လာသည်နှင့်အမျှ ယဲ့ဖုန်း ၏ ပတ်လည်ရှိ စွမ်းအားများသည် မမြင်နိုင်သော အခြေအနေမှ မြင်နိုင်သော အခြေအနေသို့ ပြောင်းလဲလာပြီး၊ သူ့အား အရှိန်အဟုန်ဖြင့် ဝန်းရံလှည့်ပတ်နေသော ဖျော့တော့သော ရွှေရောင် အသက်ရှူသံများအဖြစ် ပြောင်းလဲသွား၏။

‘ရွှေရောင် သူရဲကောင်း ဝိညာဉ်စွမ်းအား လား...’

‘ငါ နားလည်ပြီ... ဒါက စွမ်းအားရဲ့ အသွင်ပြောင်းလဲမှုပဲ... အောင်မြင်သွားရင် မူလနတ်ဘုရား အဆင့် ထဲကို ခြေစုံပစ် ဝင်နိုင်ပြီ...’

ယဲ့ဖုန်း ဉာဏ်အလင်း ပွင့်သွားကာ ထိုအချက်ကို သဘောပေါက်လိုက်၏။

မြေပြင်ပေါ်တွင် ဖြစ်သည်။

စွမ်းအားကြီး ပုဂ္ဂိုလ်များသည် အရောင်အသွေး စုံလင်ရာမှ ရွှေရောင်သို့ ပြောင်းလဲသွားသော ချီပင်လယ်ကို ကြည့်ရင်း မျက်လုံးများ အရောင်တောက်လာကြသည်။

“ရွှေရောင် သူရဲကောင်း ဝိညာဉ်စွမ်းအား ပါလား...”

“ဒါက မူလနတ်ဘုရား အဆင့် ကို တက်လှမ်းတော့မယ့် လက္ခဏာပဲ...”

“ဂိုဏ်းချုပ်ယဲ့ က တကယ့် ကောင်းကင်ဘုံက ရွေးချယ်ထားတဲ့သူပဲ... မဟုတ်ဘူး... သူ့ကို ကံကြမ္မာရဲ့ သားတော် လို့တောင် ခေါ်သင့်တယ်...”

“အူး..အူး..အားကျလွန်းလို့ မျက်ရည်တောင် ထွက်တယ်ဗျာ...”

လူအုပ်ကြီးမှာ မော့ကြည့်ရင်း မည်သို့သော ပုံစံဖြင့် ဒူးထောက်အရိုအသေပေးရမည်ကိုပင် စဉ်းစားနေမိကြတော့သည်။

ကြီးမားသော စံအိမ်ကြီးတစ်ခုအတွင်း မြူခိုးဂိုဏ်း ၏ အကြီးအကဲများနှင့် တပည့်များ စုရုံးနေကြ၏။

"အရာရာသိ စွယ်စုံကျမ်း" ဟု အမည်ပြောင် ရရှိထားသော ကျီဇီလင်းသည် သူမ၏ မှတ်ဉာဏ်ထဲမှ မှတ်တမ်းများကို ပြန်လည် တိုက်ဆိုင်ကြည့်လိုက်ပြီးနောက် ပြောလိုက်သည်။

“ရှေးဟောင်း မှတ်တမ်းတွေထဲမှာ ရေးထားတာကတော့... ရွှေရောင် သူရဲကောင်း ဝိညာဉ်စွမ်းအား ဆိုတာ ရှေးဟောင်း သူရဲကောင်း ဝိညာဉ်တွေရဲ့ အပြည့်အဝ အသိအမှတ်ပြုမှုကို ရရှိပြီး၊ ပုံသဏ္ဌာန်မဲ့ စွမ်းအားကနေ ပုံသဏ္ဌာန်ရှိ စွမ်းအားအဖြစ် ပြောင်းလဲကာ မူလနတ်ဘုရား အဆင့် ကို တရားဝင် တက်လှမ်းလိုက်တာပဲတဲ့...”

ထိုစကားကို ကြားသောအခါ တပည့်များမှာ အံ့သြမှင်သက်သွားကြသည်။

“ကြည့်ရတာ ဂိုဏ်းချုပ် ရဲ့ စွမ်းအားက တစ်ဟုန်ထိုး တိုးတက်သွားတော့မယ့်ပုံပဲ...”

မိုယင် က တိုးညှင်းစွာ ရေရွတ်လိုက်၏။

“သူကိုယ်တိုင်ကလည်း မူလနတ်ဘုရား အဆင့် မဟာတန်ခိုးရှင် တစ်ယောက် ဖြစ်နေပြီလေ... အခု သူ့ရဲ့ သူရဲကောင်း ဝိညာဉ်စွမ်းအား ကပါ အဲဒီအဆင့်ကို ရောက်သွားပြီဆိုတော့ စွမ်းအားတွေ ပေါက်ကွဲထွက်သွားပြီလို့ ပြောရင်တောင် မမှားဘူး...”

အကြီးအကဲ ဖြစ်စေ၊ တပည့်ဖြစ်စေ အားလုံးက ထိုမြင်ကွင်းကို ရင်သပ်ရှုမော ငေးကြည့်နေကြသည်။

ကောင်းကင်ယံ နက်ရှိုင်းသော နေရာတွင် ဖြစ်၏။

ယဲ့ဖုန်း ၏ ပတ်လည်တွင် မရေမတွက်နိုင်သော မျက်နှာများ ပေါ်ထွက်လာသည်ကို သူ တွေ့လိုက်ရသည်။ အိုမင်းသူ၊ ငယ်ရွယ်သူ၊ ပင်ပန်းနွမ်းနယ်သူ၊ ဝမ်းနည်းသူနှင့် ပျော်ရွှင်သူ...

၎င်းတို့မှာ စစ်ပွဲအတွင်း ကျဆုံးခဲ့ကြသော ရှေးဟောင်း သူရဲကောင်း ဝိညာဉ်များ ပင်တည်း။

သူတို့သည် ယဲ့ဖုန်း ကို ဝေခွဲမရစွာ ကြည့်လိုက်ကြပြီးနောက်၊ လေဝိညာဉ် ပုလဲလုံး ကြောင့် သန့်စင်သော ရွှေရောင် သူရဲကောင်း ဝိညာဉ်စွမ်းအား များအဖြစ် ပြောင်းလဲကာ ယဲ့ဖုန်း ထံသို့ စီးဝင်သွားကြလေတော့သည်။

အချိန်အတော်ကြာပြီးနောက် ယဲ့ဖုန်း ၏ ပတ်လည်ရှိ သဘာဝ ဝိညာဉ်စွမ်းအင်များ လွင့်စင်သွားတော့၏။

အရှင်မဲ့နေသော သူရဲကောင်း ဝိညာဉ်စွမ်းအား အားလုံးကို သန့်စင်ပြီးစီးသွားတော့သည်။

ယဲ့ဖုန်း သည် ဘယ်လက်ဖြင့် လေဝိညာဉ် ပုလဲလုံး ကို ဆုပ်ကိုင်ထားပြီး၊ ညာလက်ကို လေထဲတွင် လက်သီးကျစ်ကျစ်ပါအောင် ဆုပ်လိုက်ရာ ကျယ်ပြောလှသော ပင်လယ်ကြီးပမာ တားဆီး၍ မရနိုင်သော အရှိန်အဝါကို ခံစားလိုက်ရ၏။

နက်ရှိုင်းသည်၊ ခမ်းနားသည်၊ ရှေးကျလှသည်။

ဒါကတော့ မရေမတွက်နိုင်သော ရှေးဟောင်း သူရဲကောင်း ဝိညာဉ်များ၏ မလျော့သော ဇွဲလုံ့လ စိတ်ဓာတ်ပင် ဖြစ်ချေ၏။

‘အခု ငါ့ရဲ့ ခန္ဓာကိုယ် ကြံ့ခိုင်မှုက ဝိညာဉ်ပင်လယ်အဆင့် အမြင့်ပိုင်းမှာ ရှိနေပြီး၊ ငါ့ရဲ့ သူရဲကောင်း ဝိညာဉ်စွမ်းအား ကတော့ မူလနတ်ဘုရား အဆင့် ထဲကို မနည်း တိုးဝင်ထားနိုင်ပြီ... တခြား နည်းစနစ်တွေကတော့ သိပ်မစွမ်းသေးဘူး...’

‘အရာအားလုံးကို ခြုံငုံသုံးသပ်ကြည့်ရင်တော့... အခု ငါ နွယ်ပင်ဘီလူးကြီး ကို ယှဉ်တိုက်လို့ ရနေပြီ...’

ယဲ့ဖုန်း သူ့ကိုယ်သူ တိုးတိုးလေး ပြောလိုက်မိသည်။

ယခုတစ်ခေါက် စွမ်းအား တစ်ဟုန်ထိုး တိုးတက်သွားမှုအပေါ် သူ အလွန် ကျေနပ်မိ၏။

သို့သော် ဤကဲ့သို့သော အခွင့်အရေးမျိုး နောက်နောင်တွင် ရရှိရန်မှာ ခက်ခဲပေလိမ့်မည်။

အဘယ်ကြောင့်ဆိုသော် ရှေးဟောင်း သူရဲကောင်း ဝိညာဉ်စွမ်းအား များသည် သမိုင်းဝင် အလွန်ကြီးမားသော မြို့ကြီးများ သို့မဟုတ် ရှေးဟောင်း စစ်မြေပြင်များတွင်သာ ကိန်းအောင်းနေတတ်သောကြောင့် ဖြစ်ပေသည်။

ခရိုင်ဘုရင်မြို့တော် သည် တောင်ပိုင်းမြစ်ဝှမ်း ဒေသ တစ်ခုလုံး၏ ဗဟိုချက်မ ဖြစ်၏။

ဤနေရာရှိ အရှင်မဲ့ ရှေးဟောင်း သူရဲကောင်း ဝိညာဉ်စွမ်းအား အားလုံးကို စုပ်ယူလိုက်သော်လည်း ယဲ့ဖုန်း မှာ မူလနတ်ဘုရား အဆင့် သို့ မနည်း တိုးဝင်နိုင်ရုံသာ ရှိသေးသည်။

အခြားသော ရှေးဟောင်း မြို့တော်များနှင့် စစ်မြေပြင်များတွင်လည်း အရှင်မဲ့ သူရဲကောင်း ဝိညာဉ်စွမ်းအား များစွာ ရှိနိုင်သော်လည်း၊ ထိုအရာအားလုံးကို စုပ်ယူလိုက်လျှင်ပင် ဝိညာဉ်ပင်လယ်အဆင့် စစ်သည် တစ်ဦး သို့မဟုတ် နှစ်ဦးစာ စွမ်းအားလောက်သာ ရရှိပေလိမ့်မည်။

လက်ရှိ ယဲ့ဖုန်း အတွက်မူ ထိုစွမ်းအားမှာ သမုဒ္ဒရာထဲမှ ရေတစ်ပေါက်မျှသာ ဖြစ်တော့သည်။

‘စွမ်းအားတွေ တစ်ရှိန်ထိုး တိုးတက်သွားတာကတော့ ခံစားလို့ ကောင်းပါတယ်... ဒါပေမဲ့ နောက်ပိုင်း စွမ်းအားတွေ ထပ်တိုးဖို့ဆိုရင်တော့ အတားအဆီးတစ်ခုနဲ့ တွေ့ပြီး တိုးတက်မှုနှုန်း နှေးသွားနိုင်တယ်...’

ယဲ့ဖုန်း တိုးညှင်းစွာ ရေရွတ်လိုက်သည်။ ‘ခရိုင်ဘုရင်မြို့တော် လိုမျိုး အလွန်ကြီးမားတဲ့ မြို့ကြီးတွေ၊ ဒါမှမဟုတ် ရှေးဟောင်း စစ်မြေပြင်ကြီးတွေဆီ သွားနိုင်မှပဲ ရမှာ...’

သူ့စွမ်းအားကို များစွာ မြှင့်တင်နိုင်မည့် နည်းလမ်းတစ်ခုကို သူ စဉ်းစားမိလိုက်သည်။

သို့သော် ထိုကဲ့သို့သော နေရာများမှာ အလွန်ပင် ရှားပါးလှသည်။

လျှို့ဝှက်ဆန်းကြယ် နိုင်ငံတော် တစ်ခုလုံးတွင် ခရိုင်ဘုရင်မြို့တော် နှင့် မြို့တော် ကဲ့သို့သော နေရာမျိုး အနည်းငယ်သာ ရှိပုံရသည်။

ရှေးဟောင်း စစ်မြေပြင်များနှင့် ပတ်သက်၍မူ သူ ပြန်ရောက်မှ အချက်အလက်များ ရှာဖွေရဦးမည် ဖြစ်သည်။

မကြာမီ ယဲ့ဖုန်း သည် သူ့အရှိန်အဝါများကို ရုပ်သိမ်းလိုက်ပြီး မြေပြင်ပေါ်သို့ ဆင်းသက်လိုက်၏။

သူသည် တပည့်များ၏ ရှေ့တွင် ရပ်နေလိုက်ရာ၊ သူ့ထံမှ ထွက်ပေါ်နေသော အရှိန်အဝါမှာ ကျောက်စိမ်းကဲ့သို့ သေသပ်လှပပြီး နတ်ဘုရားတစ်ပါး လူ့ပြည်သို့ ဆင်းသက်လာသကဲ့သို့ မွန်မြတ်သန့်စင်လှပေသည်။

“ဂိုဏ်းချုပ် က ပိုပြီး ထူးခြားလာတာပဲ...”

တပည့်များက အားကျစွာဖြင့် ရေရွတ်လိုက်ကြသည်။

ယဲ့ဖုန်း သည် သူ့အရှိန်အဝါကို ထိန်းချုပ်ထားသဖြင့် ဖိအားများ မရှိတော့ဘဲ သာမန်လူတစ်ယောက်ကဲ့သို့ ဖြစ်နေသော်လည်း၊ သူ့ထံမှ ထွက်ပေါ်နေသော ဆွဲဆောင်မှုရှိသည့် အငွေ့အသက်မှာမူ မေ့ဖျောက်ရန် ခက်ခဲလှပေသည်။

“အားလုံး ပစ္စည်းတွေ သိမ်းကြတော့... ဒီည ငါတို့ ခရိုင်မင်းသမီး ရဲ့ စံအိမ်ကို ချိန်းထားတဲ့အတိုင်း သွားကြမယ်...” ယဲ့ဖုန်း က ဆော်ဩလိုက်၏။

“ဟုတ်ကဲ့ပါ...”

တပည့်များက တညီတညွတ်တည်း ခေါင်းညိတ်လိုက်ကြ၏။

ယဲ့ဖုန်း က ကုန်းချင်းချိုး ကို ပြောလိုက်သည်။

“အကြီးအကဲကုန်း... ခရိုင်မင်းသမီး စံအိမ်ကို တစ်ချက် သွားပေးပါဦး... ကျွန်တော်တို့ ဒီည ချိန်းထားတဲ့အတိုင်း လာမယ်လို့ သတင်းသွားပို့ပေးပါ...”

“ကောင်းပါပြီ...” ကုန်းချင်းချိုး က အနည်းငယ် ခေါင်းညိတ်ပြပြီးနောက် ထွက်ခွာသွားလေတော့သည်။

...

ခရိုင်ဘုရင်မြို့တော် ၏ တိုက်ပွဲသတင်းမှာ လေအလျင် ရိုက်ခတ်နေတော့၏။

ချင်းယွင် တောင်တန်း တွင် ဖြစ်၏။

“ဘာ... ယဲ့ဖုန်း က လက်ဖျားနဲ့တောင် မထိရဘဲ၊ သူ့ရဲ့ ဂိုဏ်းစောင့် ဟူဖေးဖေး က ခရိုင်ဘုရင်မြို့တော် ကို ကျူးကျော်တဲ့ မူလနတ်ဘုရား အဆင့် နွယ်ပင်ဘီလူးကြီး ကို ရိုက်ခွဲပစ်လိုက်တယ် ဟုတ်လား...”

ထိုသတင်းကို ကြားလိုက်ရသောအခါ ချင်းယွင်ကျန်းရန် တစ်ကိုယ်လုံး တုန်ခါသွားပြီး၊ ကြောက်လန့်လွန်းသဖြင့် ကြိမ်ကုလားထိုင်ပေါ်သို့ ဘုန်းခနဲ ထိုင်ချလိုက်ကာ တစ်ကိုယ်လုံး ဆတ်ဆတ်တုန်နေတော့သည်။

“သတင်းပို့ပါတယ်... သတင်းအသစ် ရောက်လာပါပြီ...”

ထိုအချိန်တွင် ချင်းယွင်ဂိုဏ်း မှ အကြီးအကဲတစ်ဦးသည် ဂိုဏ်းချုပ် ခန်းမဆောင် အတွင်းသို့ ထိတ်လန့်တုန်လှုပ်စွာဖြင့် ပြေးဝင်လာပြီး ပြောလိုက်သည်။

“ဂိုဏ်းချုပ်... ဒုက္ခပါပဲ... ယဲ့ဖုန်း က ခရိုင်ဘုရင်မြို့တော် ရဲ့ ရှေးဟောင်း သူရဲကောင်း ဝိညာဉ်စွမ်းအား အားလုံးရဲ့ ကောင်းချီးပေးမှုကို ရရှိသွားပြီတဲ့... သူ့ရဲ့ သူရဲကောင်း ဝိညာဉ်စွမ်းအား က ရွှေရောင် ပြောင်းသွားပြီး မူလနတ်ဘုရား အဆင့် ကို တက်လှမ်းသွားပြီလို့ ပြောနေကြပါတယ်...”

“ဘာ...”

ချင်းယွင်ကျန်းရန် ၏ မျက်လုံးများ ပြူးထွက်သွားပြီး၊ ထို့နောက်တွင်တော့ သွေးဆောင့်တက်ကာ သတိလစ် မေ့မြောသွားလေတော့၏။

“ဂိုဏ်းချုပ်...”

အားလုံး ထိတ်လန့်သွားကြပြီး သူ့ကို ပြန်လည် သတိရလာအောင် ဝိုင်းဝန်း ပြုစုကြလေတော့သည်။

*ကျွန်းပေါင်းတစ်သောင်း မဟာမိတ်၌၊

မိုမင်ရှီသည် ဓာတ်ကြီးငါးပါး စုစည်းခြင်း အဆင့် (၉) သို့ ယခုလေးတင် အဆင့်ချိုးဖြတ်နိုင်ခဲ့၏။ သူမကဲ့သို့ ငယ်ရွယ်သူတစ်ဦးအဖို့ ဤအဆင့်သို့ ရောက်ရှိခြင်းမှာ တကယ့်ကို ကောင်းကင်ဘုံ၏ မျက်နှာသာပေးမှုကို ခံရသော ပါရမီရှင် အမျိုးသမီးတစ်ဦးပင် ဖြစ်သည်။

သို့သော် မကြာမီမှာပင် သူမသည် တုန်လှုပ်ဖွယ် သတင်းများကို ကြားလိုက်ရ၏။

“ဂိုဏ်းစောင့် ဟူဖေးဖေး က မူလနတ်ဘုရား အဆင့် နတ်ဆိုးမိစ္ဆာ ကို ရိုက်ခွဲပစ်လိုက်တယ် ဟုတ်လား...”

“ယဲ့ဖုန်း က ရှေးဟောင်း သူရဲကောင်း ဝိညာဉ်တွေရဲ့ စွမ်းအားကို ရရှိပြီး၊ သူ့ပတ်လည်မှာ ရွှေရောင် မြူခိုးတွေ ဝန်းရံနေကာ မူလနတ်ဘုရား အဆင့် ကို ရောက်သွားပြီ တဲ့လား...”

ဤသတင်းနှစ်ခုမှာ တစ်ခုပြီးတစ်ခု ရောက်ရှိလာပြီး သူမကို အကြီးအကျယ် အံ့သြသွားစေခဲ့၏။

*

မြင့်မြတ်သော လေဓားဂိုဏ်းလည်း၊

ဓားကလေး မူရူရွှယ်သည် သူမ၏ တံခါးပိတ် ကျင့်ကြံခြင်းကို အဆုံးသတ်လိုက်ပြီ ဖြစ်သည်။

ရှေ့တန်းမှ ရောက်ရှိလာသော သတင်းများကို ကြားလိုက်ရသောအခါ သူမ အံ့သြတကြီးဖြင့် ထရပ်လိုက်မိပြီး ပြောလိုက်သည်။

“ကြယ်တစ်ပွင့်အဆင့် ဂိုဏ်းလေးတစ်ခုမှာ မူလနတ်ဘုရား အဆင့် ပညာရှင် နှစ်ယောက်တောင် ဖုံးကွယ်နေလိမ့်မယ်လို့ ဘယ်သူ ထင်မှာလဲ... ထိပ်တန်း ကြယ်နှစ်ပွင့်အဆင့် ဂိုဏ်းတွေကိုတောင် ချေမှုန်းနိုင်တဲ့ ပြိုင်ဘက်ကင်း စွမ်းအားတွေပဲ...”

“ဒါပေမဲ့ ဒါက နတ်ဆိုးချုပ်နှောင်မျှော်စင် ရဲ့ ဖောက်ပြန်ပြောင်းလဲမှုနဲ့ ရင်ဆိုင်ရတဲ့အခါ ငါတို့မှာ အစွမ်းထက်တဲ့ စစ်ကူတွေ ရလိုက်တာပဲ...”

“ငါ့အတွက်တော့ ဒါက သတင်းကောင်းပါပဲ...”

မူရူရွှယ် သည် အစပိုင်းတွင် အံ့သြသွားသော်လည်း နောက်ပိုင်းတွင်တော့ အတိုင်းထက်အလွန် ဝမ်းမြောက်သွားလေတော့သည်။

အခန်း (၄၀၅)- ခရိုင်ဘုရင်စံအိမ်သို့ သွားရောက်ခြင်းနှင့် ရှုဟုန်ယွီ ပေါ်လာခြင်း

~မြင့်မြတ်သော လေဓားဂိုဏ်း အတွင်းတွင် ဖြစ်သည်။

မဟာအကြီးအကဲသည် ထိုသတင်းကို ကြားလိုက်ရသောအခါ အသက်ရှူမှားမတတ် ထိတ်လန့်သွားရသည်။ သူသည် ချက်ချင်းပင် ကျောက်မဲ ကန္တာရ ရှိရာဘက်သို့ အပြေးနှင်လိုက်၏။ ကောင်းကင်ဝါးမြို နတ်ဆိုးဂိုဏ်း ၏ ဂိုဏ်းချုပ်ဟောင်းထံ သတင်းပို့ရန်နှင့် ဆုံးဖြတ်ချက်တစ်ခု ချပေးရန် တောင်းဆိုရန် ဖြစ်ပေသည်။

….

ရှေးဟောင်း မြို့တော်တစ်ခုတွင်မူ၊

သွေးနတ်ဆိုး ခန်းမဆောင် ၏ ဒုတိယ ခန်းမသခင်သည် ထိုနေရာတွင် ပုန်းအောင်းနေခဲ့သည်။

“မြူခိုးဂိုဏ်း က တကယ့်ကို ကြောက်စရာ ကောင်းတာပဲ... ဂိုဏ်းတစ်ခုတည်းမှာတင် မဟာတန်ခိုးရှင် နှစ်ယောက်တောင် ရှိနေတယ်... ငါတို့ သွေးနတ်ဆိုး ခန်းမဆောင် ပင်မဌာနချုပ်က မဟာတန်ခိုးရှင် ကိုယ်တိုင် လာရင်တောင် သူတို့ကို နှိမ်နင်းနိုင်ဖို့ အသေအချာ ပြောလို့မရဘူး...”

ဒုတိယ ခန်းမသခင်၏ မျက်နှာထားမှာ လေးနက်အုံ့မှိုင်းနေ၏။

ယဲ့ဖုန်း နှင့် သူ့အဖွဲ့သည် ခရိုင်ဘုရင်မြို့တော် သို့ သွားနေကြပြီဟု သူ ကြားသိထားရာ၊ မူလကတော့ မြူခိုးတောင်ထိပ် ကို ခိုးဝင်တိုက်ခိုက်ရန် သူ ကြံစည်ထားခဲ့ခြင်း ဖြစ်သည်။

သို့သော် မြူခိုးဂိုဏ်း သားအားလုံးသာ ခရိုင်ဘုရင်မြို့တော် သို့ သွားကြမည်ဆိုလျှင် သူ ထိုနေရာသို့ သွားရောက်တိုက်ခိုက်ခြင်းမှာ ဘာအကျိုးထူးမည်နည်း။

အထီးကျန်မှုတွေကိုပဲ ခိုးယူရမှာလား။

မဟုတ်သေးဘူး...

ဝိညာဉ်သွေးကြော ကို ဖျက်ဆီးပြီး ဝိညာဉ်အမြုတေ ကို လုယူရမယ်...

ထိုသို့ တွေးမိလိုက်သည်နှင့် ဒုတိယ ခန်းမသခင်၏ မျက်လုံးများတွင် သတ်ဖြတ်လိုသော အရိပ်အယောင်များ လျှပ်ပြေးသွား၏။

သူသည် ချက်ချင်းပင် မြူခိုးတောင်ထိပ် ဆီသို့ ဦးတည်ထွက်ခွာလိုက်သည်။ ညအမှောင်ကို အကာအကွယ်ယူကာ ဝိညာဉ်စမ်းရေတွင်း ၏ အမြုတေကို လုယူပြီး မြူခိုးဂိုဏ်း ၏ တောင်ကြီး (၄) လုံးကိုပါ ရိုက်ခွဲဖျက်ဆီးပစ်ရန် ပြင်ဆင်လိုက်တော့သည်။

ရေပေါ်ဖြူမြို့တော် ကိုပါ အစပျောက်အောင် သူ ချေမှုန်းပစ်ချင်နေခြင်း ဖြစ်သည်။

“ဟဲဟဲ... ယဲ့ဖုန်း... မင်းက မူလနတ်ဘုရား အဆင့် မဟာတန်ခိုးရှင် ဖြစ်နေရင်ရော ဘာဖြစ်လဲ... မိုင်ပေါင်း သောင်းချီ ဝေးတဲ့နေရာကနေ မင်း အချိန်မီ ပြန်လာနိုင်ပါ့မလား...”

ဒုတိယ ခန်းမသခင်သည် ရက်စက်စွာ ဟားတိုက် ရယ်နေလေ၏။

...

ဤအချိန်တွင် ညဉ့်နက်ပိုင်းသို့ ရောက်ရှိနေပြီ ဖြစ်သည်။

ယဲ့ဖုန်း နှင့် သူ့တပည့်များသည် ဝိညာဉ်မြွေ ပျံသန်းလှေ ကို စီးနင်းကာ မိုင်ပေါင်း ရာချီ ဝေးကွာသော ခရိုင်ဘုရင်စံအိမ် ဆီသို့ ဦးတည်နေကြ၏။

ခရိုင်ဘုရင်မြို့တော် သည် မိုင်ပေါင်း ရာချီ၊ ထောင်ချီ ကျယ်ဝန်းပြီး တောင်တန်းများ၊ ကန်များ၊ စံအိမ်များ၊ ဂိုဏ်းများနှင့် သူကောင်းမျိုးနွယ်များစွာ ယှက်နွယ်နေသော ဧရိယာကြီးတစ်ခု ဖြစ်သည်။ ၎င်း၏ နယ်မြေအကျယ်အဝန်းမှာ အချို့သော နိုင်ငံငယ်လေးများထက်ပင် ပိုမို ကြီးမားလှပေသည်။

မကြာမီ ဝိညာဉ်မြွေ ပျံသန်းလှေ သည် စံအိမ်ကြီးတစ်ခု၏ ရှေ့တွင် ဆိုက်ကပ်လိုက်၏။

“ဝှစ်...”

ယဲ့ဖုန်း သည် ဝိညာဉ်မြွေ ပျံသန်းလှေ ကို ပြန်သိမ်းလိုက်သည်။ သူ့နောက်တွင် ကုန်းချင်းချိုး နှင့် လီဇီလုံ ဟူသော အကြီးအကဲ နှစ်ဦး ရှိနေပြီး၊ ၎င်းတို့နောက်တွင် ပါးလျသော မျက်နှာဖုံးပဝါကို ဆင်မြန်းထားသည့် ကြီးကြပ်သူ ချူယွင်အာ ပါရှိ၏။

ထို့နောက်တွင်တော့ ရှီလေ့၊ မိုယင် နှင့် အခြားသော ပထမ၊ ဒုတိယမျိုးဆက် တပည့်များ၊ မြေခွေးတာ့ဟုန် နှင့် သံမဏိလက်သည်း နဂါးလင်းယုန် ကဲ့သို့သော ဂိုဏ်းစောင့် ဝိညာဉ်သားရဲများ လိုက်ပါလာကြသည်။

အစ်ကိုကြီး ခေါင်းပြား နှင့် နှစ်တစ်ထောင် ထင်းရှူးပင်အိုကြီး မှလွဲ၍ အားလုံး ရောက်ရှိလာကြခြင်း ဖြစ်သည်။

“ဂိုဏ်းချုပ်... ကျွန်မ ဒီနေ့ ခရိုင်ဘုရင်စံအိမ် က အစေခံမလေး ‘ယွဲ့အာ’ ဆီကို ကျုပ်တို့ လာမယ့်အကြောင်း သတင်းပို့ထားပါတယ်... အခုဆိုရင် သူတို့ ထွက်လာကြတော့မှာပါ...”

ကုန်းချင်းချိုး က တင်းကျပ်စွာ ပိတ်ထားသော စံအိမ်တံခါးကြီးကို ညွှန်ပြရင်း ပြောလိုက်သည်။

“ကျွိ...”

စံအိမ်တံခါးကြီး ရုတ်တရက် ပွင့်လာပြီး လရောင်ပမာ ဖြူဖွေးသော ဝတ်ရုံရှည်ကို ဆင်မြန်းထားသည့် သွယ်လျလှပသော အမျိုးသမီးငယ်တစ်ဦး ထွက်လာ၏။

သူမ၏ နောက်တွင် အစေခံမလေး ဒါဇင်ပေါင်းများစွာ လိုက်ပါလာကြ၏။

သူတို့သည် ဘေးတစ်ဖက်စီတွင် ခွဲရပ်လိုက်ကြပြီး ခါးကို ညင်သာစွာ ကိုင်းညွတ်လျက် ‘ကြွပါ’ ဟု လက်ဟန်ခြေဟန်ဖြင့် ဖိတ်ခေါ်လိုက်ကြသည်။

“မြူခိုးဂိုဏ်း က လေးစားရတဲ့ စီနီယာတွေ အားလုံးကို ခရိုင်ဘုရင်စံအိမ် ကနေ နွေးထွေးစွာ ကြိုဆိုပါတယ်ရှင်...”

အစေခံမလေး ယွဲ့အာ က ပျူငှာစွာ ပြုံးပြလိုက်သည်။

သူမသည် မူလက ခရိုင်ဘုရင်စံအိမ် မှ ဖြစ်ကြသော လေရှောင်ဟူ နှင့် အခြားသူများကို ကြည့်လိုက်မိသည်။ သူတို့အားလုံးမှာ မြူခိုးဂိုဏ်း တပည့်ဝတ်စုံများကို သေသပ်စွာ ဆင်မြန်းထားကြပြီး ဒုတိယမျိုးဆက် တပည့်များကြားတွင် စနစ်တကျ ရပ်နေကြသည်ကို တွေ့လိုက်ရ၏။

ကောင်းကင်နှင်းရည် ၏ ကောင်းချီးကြောင့် သူတို့၏ ကျင့်ကြံခြင်း အဆင့်များမှာလည်း တစ်ရှိန်ထိုး တိုးတက်နေခဲ့ပြီ ဖြစ်သည်။

“ဂိုဏ်းချုပ်ယဲ့... ခရိုင်မင်းသမီး က အားလုံးကို တည်ခင်းဧည့်ခံပွဲ ခန်းမဆောင်ထဲမှာ စောင့်နေပါတယ်... ကျွန်မနောက်ကို လိုက်ခဲ့ပါရှင်...”

ယွဲ့အာ က လမ်းပြကာ ဦးဆောင်ဝင်သွား၏။

“ရှဲ...”

ကျန်ရှိနေသော အစေခံမလေးများသည် သိုလှောင်လက်စွပ်များထဲမှ ပန်းခြင်းများကို ထုတ်ယူကာ မွှေးပျံ့သော ပန်းပွင့်ဖတ်များကို ကြဲပက်လိုက်ကြသည်။ ထို့ပြင် အမျိုးမျိုးသော တူရိယာများကို တီးခတ်ရင်း ဆွဲဆောင်မှုရှိသော အကအလှများဖြင့် ကခုန်နေကြသော အမျိုးသမီးငယ်လေးများလည်း ပါဝင်၏။

‘ဒီ ကြိုဆိုပွဲ အခမ်းအနားကတော့...’

ယဲ့ဖုန်း ၏ မျက်နှာထားမှာ ထူးဆန်းနေတော့သည်။

ဘာမှ မသိသူသာဆိုလျှင် ဂီတသံစဉ် နားထောင်ဖို့ အပျော်အိမ်ကို သွားနေသည် ဟုပင် ထင်မိလောက်စရာပင်။

နဂါးနှင့် ဖီးနစ် ရုပ်တုများဖြင့် ခမ်းနားထည်ဝါစွာ မွမ်းမံထားသော ဧည့်ခံပွဲ ခန်းမဆောင်ကြီး အတွင်းသို့ ရောက်သောအခါ၊

ယဲ့ဖုန်း သည် ခရိုင်မင်းသမီး ၏ ရုပ်သွင်အစစ်အမှန်ကို နောက်ဆုံး၌ မြင်တွေ့လိုက်ရတော့၏။

သူမသည် အမျိုးသမီးတစ်ဦး ဖြစ်သည်။

သူမက အရပ်ရှည်ပြီး မျက်နှာကို ပဝါဖြင့် ဖုံးကွယ်ထားသော်လည်း လှပသော မျက်ခုံးတန်းလေးများအောက်တွင် ဉာဏ်ရည်ထက်မြက်ပြီး လှပလွန်းသော မျက်ဝန်းအစုံ ရှိနေ၏။

ခရိုင်မင်းသမီး ၏ ကျင့်ကြံခြင်း အဆင့်မှာမူ သိပ်မမြင့်လှပေ။

ကောင်းကင်နှင်းရည် ၏ သန့်စင်မှုနှင့် ခရိုင်ဘုရင်စံအိမ် မှ များပြားလှသော ကျင့်ကြံခြင်း အရင်းအမြစ်များ၏ အထောက်အပံ့ဖြင့်ပင် သူမသည် ဓာတ်ကြီးငါးပါး စုစည်းခြင်း အဆင့် (၃) အထွတ်အထိပ်သို့သာ ရောက်ရှိသေးသည်။

သို့သော်လည်း သူမထံမှ တော်ဝင်မျိုးနွယ်တို့၏ ကျက်သရေရှိသော အရှိန်အဝါတစ်ခု ထွက်ပေါ်နေ၏။

“ဟင်...”

ခရိုင်မင်းသမီး ကို မြင်လိုက်ရသောအခါ ရှီလေ့၊ ဟိုယွင်ကျဲ နှင့် လီကျောက်ကျောက် တို့ အားလုံး အံ့သြသွားကြသည်။ ထိုအမျိုးသမီးကို မြင်ဖူးသလိုလို၊ အတူတူပင် နေထိုင်ခဲ့ဖူးသလိုလို ခံစားလိုက်ရသောကြောင့် ဖြစ်ပေသည်။

‘နောက်ဆုံးတော့ နင် ပေါ်လာပြီပေါ့...’

မိုယင် သည် ခရိုင်မင်းသမီး ကို မြင်လိုက်ရသောအခါ အနက်ရောင် မျက်နှာဖုံးပဝါအောက်ရှိ သူမ၏ နှုတ်ခမ်းများမှာ အနည်းငယ် ကွေးညွတ်သွား၏။

“ကျွန်မက ခရိုင်မင်းသမီး ရှုဟုန်ယွီ ပါ... မြူခိုးဂိုဏ်း က လူအားလုံး ကြွရောက်လာတာကို ကြိုဆိုပါတယ်ရှင်...”

အမျိုးသမီးသည် သူမ၏ မျက်နှာပေါ်မှ ပဝါကို ညင်သာစွာ ဖယ်ရှားလိုက်ရာ၊ ပြုံးလိုက်လျှင် ပါးချိုင့်လေးများ ပေါ်လာသော လှပနုပျိုသည့် မျက်နှာလေး ပေါ်ထွက်လာ၏။

“ဟုန်ယွီ...”

“နင်က တကယ်ပဲ ခရိုင်မင်းသမီး လား...”

ခရိုင်မင်းသမီး က သူမ၏ မည်သူမည်ဝါဖြစ်ကြောင်းကို ဖွင့်ဟလိုက်သည့် ခဏ၌ ရှီလေ့၊ ဟိုယွင်ကျဲ နှင့် လီကျောက်ကျောက် တို့မှာ အကြီးအကျယ် ထိတ်လန့်သွားကြပြီး မျက်လုံးများ ပြူးကျယ်သွားကြ၏။

ခရိုင်ဘုရင် ၏ သမီးတော်မှာ ရှုဟုန်ယွီ ဖြစ်နေသည်တဲ့။

မြူခိုးဂိုဏ်း ၏ ပဉ္စမမြောက် တပည့်ဟောင်းလေးပေါ့။

သူတို့၏ နှလုံးသားများမှာ တုန်လှုပ်သွားရ၏။

ယဲ့ဖုန်း သည် ရှုဟုန်ယွီ ကို ကြည့်ရင်း၊ ရှီလေ့ နှင့် အခြားသူများ၏ အံ့သြတကြီး ပြောဆိုသံများကို နားထောင်ကာ အခြေအနေကို နောက်ဆုံး၌ သဘောပေါက်သွား၏။

“ဒါဆိုရင် ခရိုင်ဘုရင်မြို့တော် ရဲ့ မြင့်မြတ်လှတဲ့ ခရိုင်ဘုရင် သမီးတော်၊ အခု လက်ရှိ ခရိုင်မင်းသမီး က... ငါတို့ မြူခိုးဂိုဏ်း ကနေ ထွက်သွားခဲ့တဲ့ ပဉ္စမမြောက် တပည့်လေး ဖြစ်နေတာပေါ့...”

ယဲ့ဖုန်း က လေးနက်စွာ ပြောလိုက်သည်။

ဤသတင်းမှာ မအံ့သြဘဲ နေရန် မဖြစ်နိုင်ပေ။

ရှုဟုန်ယွီ ဘာကြောင့် ဂိုဏ်းက ထွက်သွားရသလဲဆိုတာ သူ မသိသော်လည်း၊ မည်သည့် အကြောင်းကြောင့်ပင် ဖြစ်စေ သူမသည် ရန်သူ မဟုတ်သည့်အပြင် မြူခိုးဂိုဏ်း တစ်ခုလုံးကိုပါ တည်ခင်းဧည့်ခံနေသည်မှာ သူမတွင် စေတနာကောင်း ရှိနေကြောင်း သက်သေပြနေခြင်းပင်။

“ဂိုဏ်းချုပ် က ကျွန်မကို အရမ်း မြှောက်ပြောနေပါပြီ... ဂိုဏ်းချုပ် ရဲ့ ရှေ့မှာတော့ ကျွန်မက သာမန် ပါရမီနဲ့ အဆင့်မရှိတဲ့ ကျင့်ကြံခြင်းရှိတဲ့ သူဌေးသမီးလေး တစ်ယောက်ပါပဲ...”

ရှုဟုန်ယွီ က တိုးညှင်းစွာ ပြောလိုက်သည်။

သူမသည် ခရိုင်ဘုရင် ၏ သမီးတော် ဖြစ်သော်လည်း၊ သူမ၏ ရှေ့မှောက်တွင် ရှိနေသူမှာ မူလနတ်ဘုရား အဆင့် မဟာတန်ခိုးရှင် တစ်ဦး ဖြစ်သည့် ယဲ့ဖုန်း ဖြစ်နေသည်။ ထို့ပြင် သူ့လက်အောက်တွင်လည်း ကြောက်မက်ဖွယ်ကောင်းသော ဂိုဏ်းစောင့် ဟူဖေးဖေး ရှိနေသေးသည် မဟုတ်ပါလား။

သူမ၏ ဖခင်သည် မူလနတ်ဘုရား အဆင့် သို့ တက်လှမ်းနိုင်ခဲ့လျှင်တောင်မှ ဝါရင့် မဟာတန်ခိုးရှင် နှစ်ဦးနှင့် ယှဉ်လျှင်တော့ လောက်ငမည် မဟုတ်ပေ။

“သာမန် သူဌေးသမီးလေး ဟုတ်လား...”

ယဲ့ဖုန်း သည် ရှုဟုန်ယွီ ၏ စကားကြောင့် နှုတ်ခမ်းထောင့်များ တွန့်သွားရသည်။

“ခရိုင်ဘုရင်မြို့တော် တစ်ခုလုံးကို ဆက်ခံမယ့်သူက သာမန် ဖြစ်နိုင်ပါ့မလား...”

ရှုဟုန်ယွီ ညင်သာစွာ သက်ပြင်းချလိုက်သည်။

“အကယ်၍ အနာဂတ် ခရိုင်ဘုရင် အဖြစ် ဆက်ခံရမယ့် တာဝန်သာ မရှိခဲ့ရင်... ဟုန်ယွီ ဘာလို့ ဂိုဏ်းက ထွက်သွားပါ့မလဲ... ကျွန်မကို ရွေးချယ်ခွင့် ပေးမယ်ဆိုရင် ကုဋေ ကုဋာ ချမ်းသာတဲ့ စည်းစိမ်တွေကို ဆက်ခံမယ့်အစား မြူခိုးဂိုဏ်း မှာပဲ ဆက်ပြီး ကျင့်ကြံနေချင်ပါတယ်...”

ထိုစကားကို ကြားလိုက်ရသောအခါ ပတ်ဝန်းကျင်ရှိ လူအားလုံး၏ မျက်နှာတွင် အံ့သြမှုများ ပြည့်နှက်သွား၏။

ရှုဟုန်ယွီ က မြူခိုးဂိုဏ်း တပည့် ဖြစ်ခဲ့ဖူးတယ်လား။

ဒါက တစ်ခါမှ မကြားဖူးတဲ့ သတင်းပဲ။

“ခရိုင်မင်းသမီး က ကျွန်မကို မြူခိုးဂိုဏ်း ကို အထူး ဂရုစိုက်ပေးပါလို့ ဘာလို့ မှာခဲ့တာလဲဆိုတာ အခုမှ ရှင်းသွားတော့တယ်... သူကိုယ်တိုင်က ဒီဂိုဏ်းဝင် ဖြစ်ခဲ့ဖူးတာကိုး...”

အစေခံမလေး ယွဲ့အာ သည် လက်ဖြင့် ပါးစပ်ကို အုပ်ကာ မျက်လုံးများ ပြူးကျယ်လျက် ရေရွတ်လိုက်မိသည်။

ယဲ့ဖုန်းကမူ စကားမပြောခဲ့ပေ။

သူ့စိတ်ထဲမှနေ၍ ‘ရှုဟုန်ယွီ က ငါတို့ဂိုဏ်းကို ပြန်ဝင်ဖို့ အရည်အချင်း ပြည့်မီလား’ ဟု စနစ်ကို မေးကြည့်လိုက်သည်။

စနစ်ကမူ တိတ်ဆိတ်နေပြီး ဘာမှ ပြန်မဖြေခဲ့ပေ။

ယဲ့ဖုန်း မေးစေ့ကို ပွတ်သပ်လိုက်ပြီး ရှုဟုန်ယွီ ကို ကြည့်ကာ ပြောလိုက်သည်။

“အတိတ်က ကိစ္စတွေကို ထားလိုက်ပါတော့... မင်း ကျုပ်တို့ကို ဧည့်သည်အဖြစ် ဖိတ်ခေါ်တာက အတိတ်က အကြောင်းတွေကို ပြောဖို့သက်သက်တော့ မဟုတ်လောက်ဘူးနော်... တစ်ခြား ရည်ရွယ်ချက်လည်း ရှိဦးမှာပေါ့...”

“မရှိပါဘူး... အတိတ်ကို ပြန်ပြောဖို့ သက်သက်ပါပဲ...”

ရှုဟုန်ယွီ ခေါင်းခါလိုက်သည်။

မူလကတော့ သူမ၏ အစီအစဉ်မှာ ဤဧည့်ခံပွဲတွင် သူမ၏ မည်သူမည်ဝါ ဖြစ်ကြောင်းကို ထုတ်ဖော်ပြသရန်နှင့်၊ လိုအပ်လာပါက ယဲ့ဖုန်း ကို ခရိုင်မင်းသမီး တစ်ဦးအနေဖြင့် ကူညီပေးရန် ဖြစ်သည်။

သို့သော် ယဲ့ဖုန်း က ဤမျှလောက်အထိ စွမ်းအားကြီးနေလိမ့်မည်ဟု ဘယ်သူ ထင်ထားမည်နည်း။

သူ့အတွက် သူမ၏ အကူအညီမှာ လုံးဝ မလိုအပ်ပေ။

ဆန့်ကျင်ဘက်အနေဖြင့် သူမကသာ ယဲ့ဖုန်း ၏ အကူအညီကို လိုအပ်နေခြင်း ဖြစ်ကောင်း ဖြစ်နိုင်ပေသည်။

ထို့ကြောင့် ဤဧည့်ခံပွဲမှာ သာမန် ထမင်းစားပွဲတစ်ခု အဖြစ်သို့သာ သဘာဝအလျောက် ပြောင်းလဲသွားခဲ့တော့၏။

“အားလုံး ထိုင်ကြပါရှင်...”

ရှုဟုန်ယွီ သည် စိတ်ကို ပြန်လည် ထိန်းချုပ်လိုက်ပြီး အမြင့်ဆုံး ထိုင်ခုံတွင် ဝင်ထိုင်လိုက်သည်။ ယဲ့ဖုန်း မှာမူ အဓိက ဧည့်သည်တော် ထိုင်ခုံတွင် ထိုင်သည်။ ကျန်ရှိသူများမှာမူ သူတို့၏ အဆင့်အတန်းအလိုက် စားပွဲ ဒါဇင်ပေါင်းများစွာတွင် ခွဲထိုင်လိုက်ကြ၏။

မကြာမီ ဟင်းပွဲများ ရောက်ရှိလာ၏။

လီကျောက်ကျောက် သည် စားပွဲပေါ်ရှိ ဝိညာဉ် ဟင်းလျာများကိုသာ အာရုံစိုက်နေပြီး၊ နတ်ဆိုးသတ်ဖြတ်ပွဲ ပြီးလျှင် ၎င်းတို့ကို သေသေချာချာ လေ့လာကာ ကိုယ်တိုင် ချက်ကြည့်ရန် ကြံစည်နေသည်။

“စီနီယာ အစ်မကြီး ကျောက်ကျောက်... ဒါက အစ်မကြီး အတွက်ပါ...”

ရှုဟုန်ယွီ သည် "ဝိညာဉ်ချက်ပြုတ်နည်း အဆင့်မြင့်ကျမ်း" ဟု အမည်ရသော ရှေးဟောင်းစာအုပ်တစ်အုပ်ကို ထုတ်ယူကာ လီကျောက်ကျောက် ထံ ကမ်းပေးလိုက်၏။

“အစ်မကြီးက ဝိညာဉ်ချက်ပြုတ်နည်း အတတ်ပညာကို ဝါသနာပါတယ်လို့ ကြားသိရလို့... ဒီစာအုပ်ကို လက်ဆောင်ပေးတာပါ...”

“ကျေးဇူးတင်ပါတယ် ဟုန်ယွီ... အဲ... ခရိုင်မင်းသမီး...”

လီကျောက်ကျောက် သည် သူမကို ‘ဂျူနီယာ ညီမလေး’ ဟု ခေါ်မိတော့မည့် အခြေအနေမှ၊ ရှုဟုန်ယွီ သည် မြူခိုးဂိုဏ်း က ထွက်သွားပြီးသားဖြစ်သဖြင့် ‘ခရိုင်မင်းသမီး’ ဟု အမြန် ပြောင်းလဲ ခေါ်ဆိုလိုက်ရသည်။

ထိုစကားကို ကြားသောအခါ ရှုဟုန်ယွီ ၏ မျက်နှာလေးမှာ အနည်းငယ် ညှိုးငယ်သွားရရှာ၏။

သူမမှာ ရွေးချယ်ခွင့်သာ ရှိခဲ့လျှင် ကုဋေ ကုဋာ ချမ်းသာသော စည်းစိမ်များကို မဆက်ခံချင်ဘဲ မြူခိုးဂိုဏ်း မှာသာ နေထိုင်သွားချင်မိသည်။

ယခု မြူခိုးဂိုဏ်း သည် ခရိုင်ဘုရင်မြို့တော် ထက်ပင် ပို၍ ကောင်းမွန်နေသည် မဟုတ်ပါလား။

နှမြောစရာ ကောင်းလိုက်တာ။

ကောင်းကင်ဘုံက သူမဆန္ဒကို မလိုက်လျောခဲ့ဘဲ၊ သူမကို ကုဋေ ကုဋာ ချမ်းသာတဲ့ စည်းစိမ်တွေပဲ အတင်း ဆက်ခံခိုင်းနေတယ်လေ...

“ကဲ... လာကြ... လာကြ... မတွေ့တာ ကြာပြီဆိုတော့ အတူတူ ခွက်ချင်း တိုက်ကြရအောင်...”

အခြေအနေက အဆင်မပြေ ဖြစ်နေသည်ကို ရိပ်မိလိုက်သော ရှီလေ့ သည် ချက်ချင်းပင် ဝိုင်ခွက်ကို မြှောက်ကာ စကားလမ်းကြောင်း လွှဲလိုက်၏။

အစ်ကိုကြီး တစ်ယောက်ပီပီ သူသည် ပတ်ဝန်းကျင် အခြေအနေကို ပြုပြင်ပြောင်းလဲပေးရာတွင် ကျွမ်းကျင်လှပေသည်။

ဧည့်ခံပွဲသည် ဆက်လက် စည်ကားနေဆဲပင်။

*

မိုင်ပေါင်း သောင်းချီ ဝေးကွာသော နေရာ၌မူ၊

ကောင်းကင်ယံတွင် တောက်ပသော လမင်းကြီး ထွန်းလင်းနေပြီး၊ ငွေရောင် လရောင်ခြည်များမှာ မြေပြင်ပေါ်သို့ ပါးလျသော ဇာပဝါ တစ်ခု လွှမ်းခြုံထားသကဲ့သို့ ကျဆင်းနေ၏။

ဖူယွင် တောအုပ်နက် အထက်တွင် ဖြစ်သည်။

သွေးနတ်ဆိုး ခန်းမဆောင် ၏ ဌာနခွဲ ခန်းမသခင်သည် လေထဲတွင် ပျံဝဲလျက်၊ မြူခိုးတိမ်တိုက်များ လွှမ်းခြုံထားသော မြူခိုးဂိုဏ်း ဆီသို့ လှမ်းကြည့်လိုက်သည်။ သူသည် လက်ဝှေ့ယမ်းလိုက်ပြီး အေးစက် လေးလံသော အသံဖြင့် အမိန့်ပေးလိုက်၏။

“တိုက်စစ်ဆင်ကြစမ်း... မြူခိုးတောင်ထိပ် ကို အပိုင်းပိုင်း ချေမှုန်းပစ်လိုက်...”

နောက်တစ်ခဏတွင် လူပုံရိပ် ရာပေါင်းများစွာသည် ကြောက်မက်ဖွယ် သတ်ဖြတ်လိုသော အရှိန်အဝါများကို သယ်ဆောင်လျက် ကောင်းကင်ယံသို့ ပျံတက်သွားကြပြီး၊ မြူခိုးတောင်ထိပ် ဆီသို့ ရေလှိုင်းကြီးပမာ တိုးဝင်သွားကြလေတော့သည်။

နားကွဲမတတ် ကျယ်လောင်လှသော စစ်ကြွေးကြော်သံများကြောင့် အစ်ကိုကြီး ခေါင်းပြား၊ နှစ်တစ်ထောင် ထင်းရှူးပင်အိုကြီး နှင့် ရေပေါ်ဖြူမြို့တော် မှ ကျင့်ကြံသူ အများအပြား ချက်ချင်းပင် သတိပြုမိသွားကြ၏။

“ဝါး...”

အစ်ကိုကြီး ခေါင်းပြား သည် မတ်တပ်ရပ်လိုက်ပြီး၊ သူ့ထံသို့ တိုးဝင်လာသော ရန်သူ ရာပေါင်းများစွာကို ဒေါသတကြီးနှင့် အားခဲကာ စိုက်ကြည့်လိုက်သည်။ သူ့မျက်လုံးများတွင် ဒေါသတရားများနှင့် တိုက်ပွဲဝင်လိုသော စိတ်ဆန္ဒများ ပြည့်နှက်နေ၏။

ထို့ပြင်... စိတ်လှုပ်ရှားမှုများလည်း ပါဝင်နေချေ၏။