အခန်း (၄၁-၄၂)

အခန်း (၄၁) ကောင်းကင်ဘုံဧကရာဇ်ရဲ့ အစောင့်အရှောက်....ယဲ့ချန် ထိတ်လန့်သွားခြင်း

အချိန်လေဟာနယ် တားမြစ်နယ်မြေ အတွင်း၌....

ရှေးဟောင်းဘိုးဘေးကြီးများသည်လည်း ခုံးဝူတောက်က မြောက်ဘက်ရွှမ် တာအိုနယ်မြေ သို့ ထွက်ခွာရန် ပြင်ဆင်နေကြောင်းကို သိရှိသွားကြသည်။

"ငါတို့က အခု ကောင်းကင်ဘုံတွေနဲ့ အင်္သချေနယ်မြေတွေကို အသိပေးလိုက်ပြီ ဆိုပေမယ့် ကောင်းကင်ဘုံတွေနှင့်အသင်္ချေနယ်မြေတွေကက ကျယ်ဝန်းပြီး အဆုံးအစမရှိဘူး... ပြီးတော့ မွန်းစတားအိုကြီးတွေ ဘယ်လောက်တောင် ပုန်းအောင်းနေသေးလဲဆိုတာ ဘယ်သူမှ မသိနိုင်ဘူး..."

ဘိုးဘေးဆယ့်ကိုးက ပြောဆိုသည်။

"ငါတို့ရဲ့ အချိန်လေဟာနယ် တားမြစ်နယ်မြေ လို နာမည်ကြီးခဲ့တဲ့ ရှေးဟောင်းတည်ရှိမှုတွေက သူတို့ရဲ့ အရိပ်အယောင်တွေကို မပြသသေးဘူးဆိုတာကိုတော့ ထည့်ပြောနေစရာတောင် မလိုပါဘူး..."

သူတို့၏ အချိန်လေဟာနယ် တားမြစ်နယ်မြေ သည် သူတို့ကို အသေအကြေ တိုက်ခိုက်ဝံ့သော မည်သူ့ကိုမျှ မကြောက်ပေ။

မည်သို့ပင်ဆိုစေကာမူ သူတို့ထံ၌ ယုံကြည်ချက်ရှိသည်။

ငါးသေသွားမည်မှာ သေချာသော်လည်း ပိုက်ကမူ လုံးဝပြတ်သွားမည် မဟုတ်ပေ။

သူတို့သည် အဘိုးကြီးတချို့က အောက်တန်းကျသော နည်းလမ်းများကို တိုက်ရိုက်အသုံးပြုပြီး ခုံးဝူတောက်ကို ရိုင်းစိုင်းစွာ တိုက်ခိုက်လာမည်ကိုသာ ကြောက်ရွံ့ကြခြင်းဖြစ်သည်။

ထို့ကြောင့် ခုံးဝူတောက် ကောင်းကင်ဘုံများနှင့်အသင်္ချေနယ်မြေများကို ခရီးသွားရန်အတွက် လုံလောက်သော အစွမ်းထက်သည့် အစောင့်အရှောက်တစ်ဦးကို သူ့အတွက် စီစဉ်ပေးရပေမည်။

"ငါတို့ အချိန်လေဟာနယ် တားမြစ်နယ်မြေက ကောင်းကင်ဘုံဧကရာဇ်နယ်ပယ် ကျွမ်းကျင်သူ တစ်ဦးကို ခုံးဝူတောက်ကို ကာကွယ်ဖို့ ဘာလို့ မစီစဉ်ပေးရမှာလဲ..."

ဘိုးဘေးဆယ့်ရှစ်က အကြံပြုလိုက်၏။

"ဟားဟား... ငါ အရင်က ပြောကြည့်ပြီးပြီ..."

"အဲ့ဒီကလေး ခုံးဝူတောက်က ဒီလောက် အစွမ်းထက်တဲ့ အစောင့်အရှောက်ကို မလိုချင်ဘူး... အဲဒါက သူ့ရဲ့ဂုဏ်သိက္ခာကို အနှောင့်အယှက် ဖြစ်စေမယ်လို့ သူက ပြောတယ်..."

ခုံးဝူကျီ က ရယ်မောပြီး ခေါင်းခါယမ်းလိုက်သည်။

"ခုံးဝူတောက်ရဲ့ အတွေးတွေအတိုင်းပဲ လုပ်ကြရအောင်..."

"ဘယ်လိုပဲဖြစ်ဖြစ် ခုံးဝူတောက်ဆီမှာလည်း ဧကရာဇ်အမိန့်တော်တွေ အများကြီး ရှိနေတယ်... ပြီးတော့ မဟာဧကရာဇ်ရဲ့ စစ်မှန်တဲ့ ခန္ဓာကိုယ်က လှုပ်ရှားဖို့ မလိုပါဘူး..."

ရှေးဟောင်းဘိုးဘေးကြီးများသည် ဤစကားကို ကြားသောအခါ ရယ်မောပြီး ခေါင်းခါယမ်းလိုက်ကြ၏။

တခြားလူတိုင်းက အစွမ်းထက်သော အစောင့်အရှောက်ကို လိုချင်ကြသည်။

သူတို့သည် ခုံးဝူတောက်အတွက် ကောင်းကင်ဘုံဧကရာဇ် အစောင့်အရှောက်တစ်ဦးကို စီစဉ်ပေးသော်လည်း သူက အမှန်တကယ်ကို ငြင်းပယ်ခဲ့သည်။

ထိုအစား သူက အားနည်းသော အစောင့်အရှောက်ကို တက်ကြွစွာ လိုချင်နေခဲ့သည်။

ခုံးဝူတောက်၏ အကျင့်စရိုက်သည် အမှန်တကယ်ကို ထူးဆန်းပေ၏။

ဘိုးဘေးဆယ့်ခုနစ်က ပြောဆိုသည်။

"ကောင်းကင်အရိပ် ခန်းမဆောင်ရဲ့ အစောင့်အရှောက်ဖြစ်တဲ့ ယင်ယန် အထွတ်အထိပ်ပုဂ္ဂိုလ်ကို ခုံးဝူတောက် ရဲ့ အစောင့်အရှောက်အဖြစ် ထားရင် ဘယ်လိုလဲ..."

ကောင်းကင်အရိပ် ခန်းမဆောင်သည် အချိန်လေဟာနယ် တားမြစ်နယ်မြေ အတွင်းရှိ ဌာနများစွာအနက်မှ တစ်ခုပင်။

ထိုခန်းမဆောင်သည် လုပ်ကြံသတ်ဖြတ်ခြင်းနှင့် ခြေရာခံခြင်းတို့ကို တာဝန်ယူရသည်။

ထိုခန်းမဆောင်အတွင်းရှိ အစွမ်းထက်ကျင့်ကြံသူ အများအပြားသည် အရိပ်နတ်ဘုရားစွမ်းရည်များကို ကျင့်ကြံကြပြီး ပုန်းအောင်းရာတွင် အလွန်ကျွမ်းကျင်ကြသည်။ မဟာဧကရာဇ် ကျွမ်းကျင်သူများပင်လျှင် သူတို့ကို ရှာဖွေတွေ့ရှိရန် ခက်ခဲပေလိမ့်မည်။

ထို့ထက်ပို၍ အရေးကြီးသည်မှာ ထိုလူသည် ယင်ယန်အထွတ်အထိပ်နယ်ပယ် အဆင့်ကိုး ကျွမ်းကျင်သူတစ်ဦးဖြစ်ပြီး အရိပ်ပညာရပ်တွင် ကျွမ်းကျင်ကာ ဤလောကကြီး၏ ဥပဒေသ များကြောင့် လုံးဝသက်ရောက်မှု မရှိပေ။

ယင်ယန် အထွတ်အထိပ်ပုဂ္ဂိုလ်သာလျှင် ခုံးဝူတောက်၏ လုံခြုံရေးကို တတ်နိုင်သမျှ သေချာစေရန် သင့်လျော်ပြီး သူ၏ဂုဏ်သိက္ခာကိုလည်း မလျော့ကျစေနိုင်ချေ။

..........

ရက်အနည်းငယ် အကြာတွင်...

မြောက်ဘက်ရွှမ် တာအိုနယ်မြေ...မဟာအထီးကျန်ပြည်နယ်..

မြောက်ဘက်ရွှမ် တာအိုနယ်မြေ၏ အလုံးစုံ စွမ်းအားသည် ကောင်းကင်ဘုံများနှင့်အင်္သချေနယ်မြေများအကြားတွင် ထိပ်တန်းအဆင့်ဟု မသတ်မှတ်နိုင်သော်လည်း....

ထိုနယ်မြေသည် အလွန်ကျယ်ဝန်းပြီး အဆုံးအစမဲ့ကာ သန်းရာထောင်ချီသော သက်ရှိများ ရှိသည်။

ဝုန်း...

ယနေ့တွင် မိုးကောင်းကင်ယံ တုန်ခါသွားပြီး နဂါးအရှိန်အဝါများ လှိုင်းထလာကာ မရေမတွက်နိုင်သော မိုးကြိုးသံများသည် ကောင်းကင်ယံ၏အနက်ရှိုင်းဆုံးနေရာတွင် ပေါက်ကွဲထွက်လာပုံရသည်။

အဝေးကြီးမှ ဖြစ်သော်လည်း....

ထိုအသံသည် အနည်းငယ် အားနည်းသော ကျင့်ကြံခြင်းရှိသည့် ကျင့်ကြံသူအများအပြားကို အလွန်အမင်း တုန်လှုပ်သွားစေဆဲဖြစ်ပြီး သူတို့အားလုံးသည် သီးသန့်တံခါးပိန်ကျင့်ကြံနေသော သူတို့၏အင်မော်တယ်လှိုဏ်ဂူများမှ ထွက်လာခဲ့ကြသည်။

ထိုသို့သော ကြီးမားသည့် ရုတ်ရုတ်သဲသဲဖြစ်မှုသည် ဤ ကျင့်ကြံသူများ၏ မကျေနပ်မှုကိုလည်း ဖြစ်ပေါ်စေခဲ့ပြီး အနှောင့်အယှက် ဖြစ်စေခဲ့သူထံမှ ရှင်းလင်းချက် တောင်းဆိုလိုသဖြင့် သူတို့၏မျက်နှာများတွင် ဒေါသများ ပြည့်နှက်နေသည်။

သို့သော် နောက်တခဏတွင် သူတို့ရှေ့ရှိ မြင်ကွင်းကို မြင်တွေ့လိုက်ရပြီးနောက်....

ကျင့်ကြံသူများအားလုံး မျက်နှာအမူအရာများ ပြောင်းလဲသွားပြီး အသက်ရှူမှားသွားသည်ကို မထိန်းချုပ်နိုင် ဖြစ်သွားကြ၏။

"ရှီး... အဲဒါက..."

"ငါ မြင်တာ မမှားပါဘူးနော်... အဲဒါက သူတော်စင်နယ်ပယ် ကောင်းကင်အလင်း မိုးပြာနဂါးလေ..."

"အိုး ဘုရားရေ... ဒီကောင်းကင်အလင်း မိုးပြာနဂါးရဲ့ ကိုယ်ဟန်အမူအရာကို ကြည့်ရရင် အဲ့ဒါက ထိပ်တန်းအဆင့် ပုဂ္ဂိုလ်တစ်ယောက်ရဲ့ စီးတော်ယာဉ် ဖြစ်ရမယ် မဟုတ်လား..."

"သူတော်စင်နယ်ပယ် ကောင်းကင်အလင်း မိုးပြာနဂါးကို စီးတော်ယာဉ်အဖြစ် အသုံးပြုတယ်... သူတော်စင်နယ်ပယ် အစွမ်းထက် ပုဂ္ဂိုလ်တစ်ဦး ဆင်းသက်လာတော့မလို့လား..."

"မဟုတ်ဘူး... အဲဒါ မမှန်ဘူး... ကောင်းကင်အလင်း မိုးပြာနဂါးရဲ့ ခေါင်းပေါ်မှာ လူတစ်ယောက် ရှိနေပုံရတယ်..."

အမြင်စူးရှသော လူတစ်ယောက်က ရုတ်တရက် အံ့အားတသင့် ရေရွတ်လိုက်သည်။

ဤစကားများ ထွက်ပေါ်လာသည်နှင့် တပြိုင်နက် လူအများအပြား၏အကြည့်များသည် ချက်ချင်းပင် ဆွဲဆောင်ခံလိုက်ရသည်။

အမြင်အာရုံ လမ်းကြောင်းအတိုင်း လိုက်ကြည့်လိုက်သောအခါ ပေတစ်ရာနီးပါး ရှည်လျားပြီး အဆုံးအစမရှိသော ကျယ်ပြန့်မှုကဲ့သို့ ဟင်းလင်းပြင်အား ဖြတ်ကျော်နေသည့် ငွေရောင် မြစ်ရှည်ကြီးတစ်စင်းကို သူတို့ မြင်တွေ့လိုက်ရသည်။

ကျယ်ပြန့်သော သွေးချီစွမ်းအားများသည် ကောင်းကင်မြစ် တစ်စင်းကဲ့သို့ ကျဆင်းလာကာ လူအများ၏ဦးရေပြားကို ထုံကျင်သွားစေသည်။

ခမ်းနားထည်ဝါသော နဂါးခေါင်းပေါ်တွင် ဝတ်ရုံဖြူဝတ်ပုံရိပ်တစ်ခုသည် ရပ်နေကာ သူ၏အနက်ရောင်ဆံပင်များ လူးလွန့်နေပြီး ပို၍ပင် သူရဲကောင်းဆန်ပုံပေါ်သည်။

ကံမကောင်းစွာဖြင့် နတ်ဘုရားမြူခိုးများက သူ၏ ပုံရိပ်နှင့် မျက်နှာသွင်ပြင်များကို ဖုံးကွယ်ထားသဖြင့် သူ၏ တိကျသော အသွင်အပြင်ကို ရှင်းလင်းစွာ မြင်တွေ့ရန် ခက်ခဲစေသည်။

ကောင်းကင်အလင်း မိုးပြာနဂါး၏ တစ်ဖက်တစ်ချက်စီတွင် အမျိုးမျိုးသော ထူးဆန်းသည့် ရှေးဟောင်းသားရဲများသည် ရွှေရောင် နတ်ဘုရားရထားလုံးများကို ဆွဲထားကာ ဟင်းလင်းပြင်ကို ခြေမွှဖျက်ဆီးနေကြသည်။

လကို ဝန်းရံနေသော ကြယ်များကဲ့သို့ သူတို့သည် ကောင်းကင်အလင်း မိုးပြာနဂါးနှင့်အတူ လိုက်ပါလာကြ၏။

ရွှေရောင် နတ်ဘုရားရထားလုံးများပေါ်တွင်လည်း အစွမ်းထက်သော အရှိန်အဝါများရှိသည့် မြင့်မြတ်သော ပါရမီရှင်တချို့ မတ်တတ်ရပ်နေကြကာ အလွန်ငယ်ရွယ်ပုံရသည်။

ကောင်းကင်ဘုံတောင် ရွှေပိုးကောင်ပိုးချည်ဖြင့် ယက်လုပ်ထားသော ရှေးဟောင်းအလံများသည် လေထဲတွင် လူးလွန့်နေသည်။ ထိုအပေါ်တွင် ရှိနေသည့် 'အဆုံးမဲ့တာအိုနယ်မြေ' ဟူသော စာလုံးကြီးများကို မြင်တွေ့လိုက်ရသောအခါ...

လူတိုင်းသည် မိုးကြိုးပစ်ခံလိုက်ရသကဲ့သို့ ခံစားလိုက်ရပြီး ရွှံ့ရုပ်တုများကဲ့သို့ အံ့သြမှင်သက်စွာ မတ်တတ်ရပ်နေကြသည်။

ထို ရှေးဟောင်း စာလုံးများမှ တိတိကျကျရည်ညွှန်းနေသည်မှာ အချိန်လေဟာနယ် တားမြစ်နယ်မြေပင်။

.........

အချိန်လေဟာနယ် တားမြစ်နယ်မြေသည် မူလကတည်းက ကြီးမားသော နာမည်ကျော်ကြားမှုရှိသည့် ကောင်းကင်ဘုံများနှင့်အင်္သချေနယ်မြေများ၏ တားမြစ်နယ်မြေတစ်ခုပင်။

ထို့အပြင် လွန်ခဲ့သော အချိန်အတန်ကြာက ခုံးဝူတောက်၏ ကိစ္စကြောင့် အချိန်လေဟာနယ် တားမြစ်နယ်မြေသည် ကောင်းကင်ဘုံများနှင့်အင်္သချေနယ်မြေများသို့ ထုတ်ပြန်ကြေညာခဲ့ပြီး ထိုနေရာ၏ဂုဏ်သတင်းကို ပို၍ပင် ကျော်ကြားလာစေခဲ့သည်။

ကျင့်ကြံသူများစွာအတွက် အချိန်လေဟာနယ် တားမြစ်နယ်မြေသည် တိမ်များအထက်ရှိ အင်မော်တယ် နတ်ဘုရားတောင်ကြီးတစ်လုံးအဖြစ် သတ်မှတ်နိုင်ပေ၏။

ထိုအရာကို မော့ကြည့်၍သာ ရနိုင်ပြီး မကျော်လွန်နိုင်ပေ။

လူအများအပြားသည်လည်း အနည်းငယ် တွေဝေသွားကြသည်။ အချိန်လေဟာနယ် တားမြစ်နယ်မြေသည် အိပ်မောကျရာမှ ယခုလေးတင် ပြန်လည်နိုးထလာခဲ့ခြင်းဖြစ်သည်။

အဘယ်ကြောင့် သူတို့၏ မြောက်ဘက်ရွှမ် တာအိုနယ်မြေသို့ ဤမျှ ခရီးဝေးကို လာရောက်ခဲ့သနည်း....

"သူတော်စင်... ဖရိုဖရဲ မြင့်မြတ်နယ်မြေ ရဲ့ နယ်နိမိတ်က အရှေ့မှာ သိပ်မဝေးတော့ဘူး..." ခုံးဝူတောက်၏နံဘေးရှိ ခုံးကျန်ယွဲ့က ရိုသေလေးစားစွာ ပြောဆိုသည်။

ခုံးကျန်ယွဲ့သည် မူလကတည်းက ခုံးဝူတောက်၏ မျိုးဆက်မှဖြစ်ပြီး သူ့အပေါ် အလွန် သစ္စာရှိသည်။

ထို့ပြင် သူသည် အချိန်ကြာမြင့်စွာ အိပ်မောကျနေခဲ့ပြီး လက်ရှိ ကောင်းကင်ဘုံများနှင့်အင်္သချေနယ်မြေများကို သိပ်မရင်းနှီးပေ။ ခုံးကျန်ယွဲ့သည် သူ၏လမ်းပြလည်း ဖြစ်ပေ၏။

ခုံးဝူတောက်က ခေါင်းညိတ်လိုက်ပြီး ပြောဆိုသည်။

"အင်း... မင်းနဲ့ ခုံးရွှမ်ယန်ကို ကိုင်တွယ်ခိုင်းထားတဲ့ ကိစ္စက ဘယ်လိုဖြစ်သွားပြီလဲ..."

"သူတော်စင်ကို တင်ပြရရင်... ယဲ့ချန်နဲ့စုချင်းကဲ တို့ရဲ့ မိသားစုဝင်အားလုံးကို ကောင်းကင်ပြစ်ဒဏ် အကျဉ်းထောင်ထဲမှာ အကျဉ်းချထားပါတယ်..."

"တကယ်လို့ သူတော်စင် ခုံးဝူတောက်မှာ တောင်းဆိုစရာ ရှိရင် ဒီရာဇဝတ်ကောင်တွေကို အချိန်မရွေး ထုတ်လာနိုင်ပါတယ်..."

မကြာသေးမီက ခုံးရွှမ်ယန်သည် အနောက်ဘက်ရွှမ် တာအိုနယ်မြေ မှ ပြန်ရောက်လာပြီး ယဲ့ချန် စုချင်းကဲတို့နှင့် ပတ်သက်သူအားလုံးကို ခေါ်ဆောင်လာခဲ့သည်။

ခုံးဝူတောက်၏လုပ်ရပ်များသည် အမှန်အားဖြင့် အလွန်ရိုးရှင်းသည်။

မည်သို့ပင်ဆိုစေကာမူ ယဲ့ချန်တွင် ကောင်းကင်အမိန့်တော်အမှတ် ၁၀၀၀ ကျော် ကျန်ရှိနေသေးသည်။

ဤသည်က သူ့တွင် အားကိုးရာလျှို့ဝှက်ချက် များ ရှိနေသေးကြောင်းနှင့် ဤ အားကိုးရာလျှို့ဝှက်ချက်က အခြေအနေကို ပြောင်းပြန်လှန်နိုင်သည်ဟု သူ တွေးထင်နေသေးသောကြောင့်ပင်။ ထိုကြောင့် သူ့ထံတွင် ဤမျှများပြားသော ကောင်းကင်အမိန့်တော်အမှတ်များ ကျန်ရှိနေသေးခြင်း ဖြစ်သည်မှာ သေချာပေါက်ပင်။

သူ၏ကိုယ်ပိုင်မိသားစုနှင့် သူ့ချစ်သူ၏ မိသားစုဝင်များက သူ့ကြောင့် အပြစ်ပေးခံရသည်ကို ယဲ့ချန် မြင်သောအခါ သူ ဘာတွေ တွေးနေမည်ကို ခုံးဝူတောက်က သိချင်မိသည်။

ခုံးဝူတောက်သည် အမြဲတစေ ပြီးပြည့်စုံသူတစ်ယောက် ဖြစ်ခဲ့သည်။

သူ၏ ပထမဆုံး သားကောင်အနေဖြင့် အမဲလိုက်ခြင်း လုပ်ငန်းစဉ်သည် လုံလောက်အောင် ပြီးပြည့်စုံရပေမည်။

..........

ယနေ့ ဖရိုဖရဲ မြင့်မြတ်နယ်မြေ၏ ရှန်းယွီ ရင်ပြင်တွင် လူများဖြင့် ပြည့်နှက်နေလေပြီ။

ဖရိုဖရဲ မြင့်မြတ်နယ်မြေ၏ တပည့် များနှင့် သူတော်စင်အစဉ်အဆက်များစွာသည် ရင်ပြင်ပေါ်တွင် စုရုံးနေကြရုံသာမက...

လက်ရှိ ဖရိုဖရဲ မြင့်မြတ်နယ်မြေ၏ မြင့်မြတ်အရှင်နှင့် ဖရိုဖရဲ ရာထူးမြင့်အကြီးအကဲများစွာပင်လျှင် သေသပ်စွာ ဝတ်စားဆင်ယင်ပြီး ဤနေရာတွင် စုရုံးနေကြသည်။

သူတို့၏အကြည့်သည် မိုးကုတ်စက်ဝိုင်းဆီသို့ တစ်ခါတစ်ရံ ရောက်သွားပြီး တစ်ခုခုကို စိတ်အားထက်သန်စွာ စောင့်ဆိုင်းနေသည့်အလားပင်။

အကြောင်းအရင်းမှာ မကြာသေးမီက သူတို့ ရရှိခဲ့သော သတင်းကြောင့်သာ ဖြစ်သည်။

ယနေ့တွင် အချိန်လေဟာနယ် တားမြစ်နယ်မြေ ၏ သူတော်စင်သည် ဖရိုဖရဲ မြင့်မြတ်နယ်မြေ သို့ ဆင်းသက်လာပေမည်။

သူတို့သည် အချိန်လေဟာနယ် တားမြစ်နယ်မြေ နှင့် မရင်းနှီးသော်လည်း...

ဒဏ္ဍာရီလာ အချိန်လေဟာနယ် တားမြစ်နယ်မြေ ၏ သူတော်စင်သည် သူတို့၏ ဖရိုဖရဲ မြင့်မြတ်နယ်မြေသို့ သီးသန့်လာရောက်လိမ့်မည်ဟု သူတို့ ဘယ်သောအခါမှ မမျှော်လင့်ထားခဲ့ပေ။

ခုံးဝူတောက်၏ မြင့်မြတ်သော အဆင့်အတန်းကြောင့်...

ဖရိုဖရဲ မြင့်မြတ်နယ်မြေသည် ခုံးဝူတောက် ရောက်ရှိလာမှုကို ကြိုဆိုရန် သူတို့၏ အကြီးမားဆုံး ရိုးသားမှုကို သဘာဝကျကျ ပြသရပေမည်။

တခြားသူများ၏ စူးစမ်းလိုစိတ်ရှိသော အမူအရာများနှင့် နှိုင်းယှဉ်လျှင် လူအုပ်ထဲတွင် မျက်နှာအနည်းငယ် ဖြူဖျော့နေပြီး တစ်ကိုယ်လုံး တုန်ရီနေပုံရသည့် လူတစ်ယောက် ရှိနေသည်။

ဤသူမှာ အခြားသူမဟုတ်ဘဲ သူ၏ သူငယ်ချင်းကောင်းထံတွင် ခိုလှုံရန် လာရောက်ခဲ့သော ယဲ့ချန်ပင်။

"ယဲ့ချန်... ဘာဖြစ်လို့လဲ... ဘာလို့ ဒီလောက်တောင် နေမကောင်းဖြစ်နေတဲ့ ပုံပေါက်နေတာလဲ..."

သူ၏နံဘေးရှိ အစေခံတစ်ဦးက စိုးရိမ်တကြီးဖြင့် မေးမြန်းလိုက်သည်။

လွန်ခဲ့သော ရက်အနည်းငယ်က ယဲ့ချန်သည် ရုတ်တရက် ရောက်လာပြီး သူတို့၏ ဖရိုဖရဲ မြင့်မြတ်နယ်မြေသို့ ဝင်ချင်ကြောင်း ပြောခဲ့သည်။

သူ၏ သွေးမျိုးဆက်ကို ခုံးဝူတောက်က ထုတ်ယူသွားခဲ့သော်လည်း သူ၏ ပါရမီနှင့် စွမ်းအားသည် ထူးခြားနေဆဲဖြစ်ပြီး ထိပ်တန်းအဆင့်ဟု သတ်မှတ်နိုင်သည်။

သူသည် ဖရိုဖရဲသူတော်စင်၏ သူငယ်ချင်းကောင်း တစ်ယောက်ဖြစ်သည့် အချက်နှင့် ပေါင်းစပ်လိုက်လျှင် ဖရိုဖရဲ မြင့်မြတ်နယ်မြေ သည် ဝမ်းမြောက်စွာ သဘောတူခဲ့လေ၏။

ဤအခွင့်အရေးကို ယူ၍ ယဲ့ချန်သည် သူ၏ ကိုယ်ပိုင်စွမ်းအားဖြင့် ဖရိုဖရဲ မြင့်မြတ်နယ်မြေ တွင် အထောက်အထားနှင့် အဆင့်အတန်းတစ်ခုကိုလည်း လျှင်မြန်စွာ ရရှိခဲ့သည်။

"မဟုတ်ပါဘူး... ဘာမှမဖြစ်ပါဘူး..."

ယဲ့ချန်က လက်ယမ်းလိုက်ပြီး သူ၏ နှုတ်ခမ်းများတွင် ဟန်လုပ်ပြုံးသော အပြုံးတစ်ခု ထင်ဟပ်လာသည်။

သို့သော် သူ၏နှလုံးသားထဲရှိ အကြောက်တရားသည် အနည်းငယ်မျှ လျော့ပါးမသွားပေ။ ထိုအစား ပို၍ပို၍အားကောင်းလာခဲ့သည်။

ခုံးဝူတောက်က ဘာလို့ ဒီကို လာရတာလဲ...

သူက ငါ့ကို ရှာဖို့ သီးသန့်လာတာများလား...

ဒါပေမယ့် အဲဒါက ဘယ်လိုလုပ်ပြီး ဖြစ်နိုင်မှာလဲ...

သူ ဤနေရာသို့ အပြေးအလွှား လာခဲ့စဉ်က သူ၏အရှိန်အဝါကို တမင်သက်သက် ဖုံးကွယ်ထားရုံသာမက လမ်းလျှောက်ရင်း သူ၏ ခြေရာလက်ရာများကိုလည်း ဖျောက်ဖျက်ပစ်ခဲ့သည်။

သူသည် သူ၏ မိသားစုနှင့် သူ၏နတ်ဘုရားစိတ်ဝိညာဉ်ဆက်သွယ်မှုကိုပင် ဖြတ်တောက်ခဲ့သေးသည်ဖြစ်ရာ တစ်ဖက်လူက သူ့ကို မည်သို့ ရှာတွေ့နိုင်မည်နည်း။

...

အခန်း (၄၂) ဒဏ္ဍာရီလာ သူတော်စင်က တစ်ခုဝယ် တစ်ခု အလကား ရတာလား...

တစ်ချိန်တည်းမှာပင် ဤနေရာတွင် စုရုံးနေကြသော ဖရိုဖရဲ မြင့်မြတ်နယ်မြေ၏ တပည့် အများအပြားသည်လည်း တက်ကြွစွာ ဆွေးနွေးနေကြသည်။

"အချိန်လေဟာနယ် တားမြစ်နယ်မြေ နတ်ဘုရားသားတော်... အရင်က အချိန်လေဟာနယ် တားမြစ်နယ်မြေ မှာ ထူးခြားတဲ့ သဘာဝလွန်ဖြစ်စဉ်တွေ တစ်ခုပြီးတစ်ခု ပေါက်ကွဲထွက်အောင် လုပ်ခဲ့တဲ့သူလား..."

"မင်းက အရူးလား... အချိန်လေဟာနယ် တားမြစ်နယ်မြေက လွန်ခဲ့တဲ့ အချိန်သိပ်မကြာခင်ကပဲ ခုံးဝူတောက်ဆိုတဲ့ ပြိုင်ဘက်ကင်း ပါရမီရှင် တစ်ယောက်ရှိတယ်လို့ ကောင်းကင်ဘုံတွေနှင့်အင်္သချေနယ်မြေတွေဆီ ကြေညာခဲ့တယ်လေ..."

"ရှီး... သူက တာအိုရဲ့ ထူးခြားတဲ့ သဘာဝလွန်ဖြစ်စဉ်တွေကို ဖြစ်ပေါ်စေခဲ့ရုံတင်မကဘူး ရုပ်ခန္ဓာကိုယ် တားမြစ်နယ်မြေကိုလည်း ဝင်ရောက်နိုင်ခဲ့တယ်... ဒီပါရမီက တကယ့်ကို ကောင်းကင်ကို အာခံနိုင်တာပဲ..."

လူတိုင်း ဆွေးနွေးနေကြစဉ် ကျင့်ကြံသူတစ်ဦးက ရုတ်တရက် မေးမြန်းလိုက်သည်။

"မင်းတို့ ပြောကြပါအုံး... ခုံးဝူတောက် နဲ့ သူတော်စင် ယွင်ရှောင်... ဘယ်သူက ပိုအစွမ်းထက်လဲ..."

ထိုစကား ထွက်ပေါ်လာသည်နှင့် တပြိုင်နက် လူအုပ်ကြီးသည် အချိန်တခဏကြာခန့် တိတ်ဆိတ်သွားသည်။

လူတိုင်း၏အကြည့်သည် သူတော်စင်အစဉ်အဆက်၏ရှေ့ဆုံးတွင် ရပ်နေသော လူငယ်လေးဆီသို့ အလိုအလျောက် ရောက်သွားကြ၏။

ထိုလူငယ်သည် ချောမောသော မျက်နှာသွင်ပြင် ရှိပြီး သူ၏ ဆံပင်များကို အပြာရောင် ဖဲကြိုးဖြင့် နောက်သို့စည်းနှောင်ထားသည်။

သူ၏လက်ကို နောက်ကျောဘက်တွင် ယှက်ကာ မတ်တတ်ရပ်နေရုံဖြင့် အစွမ်းထက်သော အရှိန်အဝါတစ်ခုက သူ၏ခန္ဓာကိုယ်တစ်ခုလုံးမှ ထွက်ပေါ်နေသည်။

ထို့ထက်ပို၍ ကြောက်မက်ဖွယ်ကောင်းသည်မှာ မရေမတွက်နိုင်သော ဖရိုဖရဲမှော်စာလုံးများသည် ဟင်းလင်းပြင်တွင် လှိုင်းထနေပြီး သူ၏ပုံရိပ်ကို ပို၍ခမ်းနားထည်ဝါကာ ထူးခြားပုံရစေသည်။

သူသည် မွေးရာပါ အထွတ်အထိပ်ပုဂ္ဂိုလ် တစ်ဦးအလား သဘာဝအတိုင်း တောက်ပနေပေ၏။

အမှန်တကယ်ကို သူသည် ဖရိုဖရဲ မြင့်မြတ်နယ်မြေ၏ ဒဏ္ဍာရီလာပါရမီရှင်ဖြစ်သော ဖရိုဖရဲသူတော်စင်ယွင်ရှောင်ပင်။

လွန်ခဲ့သော နှစ်အနည်းငယ်က သူ ဂိုဏ်းသို့ ဝင်ရောက်လာသောအခါ သူသည် ဖရိုဖရဲ ခေါင်းလောင်းကို ကိုးကြိမ်တိုင်တိုင် မြည်ဟီးအောင် လုပ်နိုင်ခဲ့ပြီး ဒဏ္ဍာရီလာ ဖရိုဖရဲရုပ်ခန္ဓာကိုယ် ကို နိုးထစေခဲ့သည်။

သူ အတွင်းစည်းတပည့် ဖြစ်လာသည့် အချိန်မှစ၍ သူ့ကို သူတော်စင်အစဉ်အဆက်အဖြစ် တိုက်ရိုက်ခန့်အပ်ခြင်း ခံခဲ့ရသည်။

နောက်ပိုင်းနှစ်များတွင် ဖရိုဖရဲ မြင့်မြတ်နယ်မြေ ၏ အပြည့်အဝ ပြုစုပျိုးထောင်မှုဖြင့်...

သူသည် ထင်ပေါ်လာခဲ့ပြီး အလွန်ကြောက်မက်ဖွယ်ကောင်းသော ပါရမီကို ပြသနိုင်ခဲ့သည်။

တစ်နှစ်အတွင်းမှာပင် သူသည် နဝမမြောက် သူတော်စင်ဘဝမှ ပထမသူတော်စင်အဖြစ်သို့ တိုက်ရိုက်ရောက်ရှိသွားခဲ့သည်။

သူသည် တခြားသော သူတော်စင်များနှင့် သူတော်စင်မိန်းမပျိုများအားလုံးကို သူ၏ခြေထောက်အောက်တွင် ဖိနှိပ်ထားခဲ့သည်။

ယခုနှစ်တွင်ပင် သူ၏ အလွန်ထူးချွန်သော ပါရမီကြောင့် ယွင်ရှောင်ကို ဖရိုဖရဲ မြင့်မြတ်နယ်မြေ ၏ ရာထူးမြင့်အကြီးအကဲများက မကြုံစဖူးသော နတ်ဘုရားသားတော်အစဉ်အဆက်ဘွဲ့ကိုပင် ပေးအပ်တော့ပေမည်။

ယွင်ရှောင်သည် သူတော်စင် များ၏ အထက်တွင်ရှိသော စစ်မှန်သည့် တည်ရှိမှုတစ်ခု ဖြစ်လာပေလိမ့်မည်။

ထို့ပြင် သူ၏ ဆန္ဒသည် ဖရိုဖရဲ မြင့်မြတ်နယ်မြေ၏ဆန္ဒလည်း ဖြစ်လာပေလိမ့်မည်။

ဤကဲ့သို့ ကောင်းကင်ကို အာခံနိုင်သည့် မြင့်တက်လာသော ပုဂ္ဂိုလ်သည် ဒဏ္ဍာရီဆန်သည့် အရောင်အသွေးများဖြင့် ပြည့်နှက်နေသည်ဟု ဆိုနိုင်ပေ၏။

ဖရိုဖရဲ မြင့်မြတ်နယ်မြေ၏ အမျိုးသား တပည့် များကို တောင့်တပြီး စိတ်လှုပ်ရှားစေကာ အမျိုးသမီးတပည့်များကို စွဲလမ်းစေပြီး ဖမ်းစားနိုင်ခဲ့သည်။

သူ၏နောက်ရှိ လူအများအပြား၏ စိတ်အားထက်သန်သော အကြည့်များကို အာရုံခံမိသည့်အလား လက်နောက်ပစ်ကာ မတ်တတ်ရပ်နေသော ယွင်ရှောင်သည် သူ၏ကျောကို မတ်လိုက်ပြီး သူ့ကိုကြည့်ရသည်မှာ ပို၍ သူရဲကောင်းဆန်ကာ တက်ကြွပုံပေါ်လာသည်။

သူ့ကဲ့သို့ ဒဏ္ဍာရီတစ်ခုက လူအများ လေးစားအားကျခံရရန် မွေးဖွားလာခြင်းပင်။

"အတော်ပဲ... ဒီခုံးဝူတောက်က အချိန်လေဟာနယ် တားမြစ်နယ်မြေရဲ့ နတ်ဘုရားသားတော်လေ... သူ ရောက်လာရင် ငါ သူနဲ့ ယှဉ်ပြိုင်တိုက်ခိုက်လို့ ရတာပေါ့..."

ယွင်ရှောင်က သူ၏စိတ်နှလုံးသားထဲတွင် တွေးလိုက်သည်။

သူ မြင့်တက်လာကတည်းက သူသည် ချောမွေ့စွာ ရွက်လွှင့်နေခဲ့ပြီး နတ်ဘုရားများက သူ့လမ်းကို ပိတ်ဆို့လျှင် နတ်ဘုရားများကို သတ်ကာ ဗုဒ္ဓများက သူ့လမ်းကို ပိတ်ဆို့လျှင် ဗုဒ္ဓများကို သတ်ခဲ့သည်။

သူ၏ အလွန်အမင်း အစွမ်းထက်သော စွမ်းအားကလည်း သူ့အတွက် ပြိုင်ဘက်တစ်ယောက် ရှာတွေ့ရန် ခက်ခဲစေခဲ့ပေ၏။

ယနေ့ရောက်လာမည့် အချိန်လေဟာနယ် တားမြစ်နယ်မြေ နတ်ဘုရားသားတော်က သူ့ကို စစ်မှန်သော ဖိအားတချို့ ယူဆောင်လာပေးလိမ့်မည်ဟု သူ မျှော်လင့်မိသည်။

ဝုန်း...

ထိုအချိန်မှာပင် မိုးကြိုးကဲ့သို့ ကြောက်မက်ဖွယ်ကောင်းသော ကျယ်လောင်သည့်အသံတစ်သံက မိုးကောင်းကင်ယံတွင် ရုတ်တရက် ပဲ့တင်ထပ်သွားသည်။

ဥပဒေသ သက်တံတံတား အများအပြားသည် ကောင်းကင်ကို ဖြတ်သန်းသွားပြီး ယှဉ်ပြိုင်၍မရနိုင်လောက်အောင် ကြောက်မက်ဖွယ်ကောင်းသည့် ဖိအားတစ်ခုကို သယ်ဆောင်လာကာ မိုးကုတ်စက်ဝိုင်းမှ ဆန့်ထွက်လာသည်။

ရုတ်ချည်းဆိုသလိုပင် သေသပ်လှပစွာ ဖန်တီးထားသော ရှေးဟောင်းစစ်သင်္ဘောများသည် ဟင်းလင်းပြင်ကို ဖြတ်သန်းကာ ဟိန်းဟောက်လာပြီး ဖရိုဖရဲ မြင့်မြတ်နယ်မြေ၏ အထက်တွင် လွင့်မျောနေလေ၏။

ရှေးဟောင်းစစ်သင်္ဘောများပေါ်တွင် မရေမတွက်နိုင်သော အလံများသည် လေထဲတွင် လူးလွန့်နေပြီး "အချိန်လေဟာနယ် တားမြစ်နယ်မြေ" ဟူသော ရှေးဟောင်း စာလုံးများကို သယ်ဆောင်ထားကာ ဖော်ပြ၍မရနိုင်လောက်အောင် ကြောက်မက်ဖွယ်ကောင်းသည့် စွမ်းအားတစ်ခုကို ထုတ်လွှတ်ထားသည်။

အထူးခြားဆုံးအရာမှာ ရှေးဟောင်းစစ်သင်္ဘော တစ်စင်းစီ၏အလယ်ဗဟိုရှိ ဧရာမအဖြူရောင် ကောင်းကင်အလင်း မိုးပြာနဂါးပင်ဖြစ်ပြီး သူ၏နဂါးအရှိန်အဝါသည် မိုးကောင်းကင်ယံသို့ မြင့်တက်နေကာ ရင်တလှပ်လှပ်ဖြစ်စေသည့် သွေးချီစွမ်းအားများကို ထုတ်လွှတ်နေသည်။

"အဲဒါ... အဲ့ဒါက... နဂါးတွေရဲ့ ဘုရင်... ကောင်းကင်အလင်း မိုးပြာနဂါးလား..."

"အိုး ဘုရားရေ... အဲ့ဒါက တကယ်ပဲ သူတော်စင်နယ်ပယ်က ကောင်းကင်အလင်း မိုးပြာနဂါး လား..."

"ရှီး... အချိန်လေဟာနယ် တားမြစ်နယ်မြေက တကယ်ကို ကြီးကျယ်ခမ်းနားတာပဲ... ဒီခေတ်မှာ မဟာဧကရာဇ်တွေက ထင်ရှားမနေဘဲ သူတော်စင်တွေကိုတောင် ရှားရှားပါးပါး တွေ့ရတာကို... သူတို့က သူတော်စင်နယ်ပယ် ကောင်းကင်အလင်း မိုးပြာနဂါးကို စီးတော်ယာဉ်အဖြစ် အသုံးပြုတယ်ပေါ့..."

ကျင့်ကြံသူ အများအပြား အံ့အားသင့်သွားကြပြီး ဖရိုဖရဲ မြင့်မြတ်နယ်မြေတစ်ခုလုံး လုံးဝဆူညံပွက်လောရိုက်သွားသည်။

အချိန်လေဟာနယ် တားမြစ်နယ်မြေမှ လူငယ် ကျွမ်းကျင်သူ အများအပြားသည် ဖရိုဖရဲ မြင့်မြတ်နယ်မြေ၏အထက်တွင် မတ်တတ်ရပ်နေကြသည်။

သူတို့တစ်ယောက်ချင်းစီတိုင်းသည် ကြောက်မက်ဖွယ်ကောင်းသော အရှိန်အဝါကို ထုတ်လွှတ်ထားပြီး မွေးရာပါ မြင့်မြတ်ကာ မောက်မာပြီး ယုံကြည်မှုရှိသည့် အမူအယာတစ်ခုကို သယ်ဆောင်ထားကြသည်။

အထူးသဖြင့် ထိုဧကရာဇ်သားတော်အစဉ်အဆက်၏ အရှိန်အဝါသည် ပို၍ပင် ကြောက်မက်ဖွယ်ကောင်းပေ၏။

ဖရိုဖရဲ မြင့်မြတ်နယ်မြေ၏ သူတော်စင် များနှင့် သူတော်စင်မိန်းမပျိုများသည် ဤမြင်ကွင်းကို မြင်ပြီးနောက် သူတို့၏ခေါင်းများကို မငုံဘဲ မနေနိုင်ခဲ့ကြဘဲ အကြည့်ချင်း အနည်းငယ်မျှပင် မဆုံရဲကြပေ။

သို့သော် ဤဧကရာဇ်သားတော်အစဉ်အဆက်၏နေရာယူမှုသည် အလွန် ထူးခြားသည်။

သူတို့သည် ကောင်းကင်အလင်း မိုးပြာနဂါး၏ နံဘေးပတ်လည်တွင် မတ်တတ်ရပ်နေကြပြီး လကို ဝန်းရံနေသော ကြယ်များကဲ့သို့ ဝင်္ကပါတစ်ခု ဖန်တီးထားကာ လူတစ်ယောက်တည်းကို ဗဟိုပြုနေသည့်အလားပင်။

ထိုအချိန်မှသာ ကောင်းကင်အလင်း မိုးပြာနဂါး ၏ ခေါင်းပေါ်တွင် ရပ်နေသော အရပ်ရှည်ရှည်နှင့် သွယ်လျသည့် ဝတ်ရုံဖြူဝတ်ပုံရိပ်တစ်ခုကို လူတိုင်း သတိပြုမိသွားကြသည်။

"အဲ့ဒါက..."

ခုံးဝူတောက်၏ ထူးခြားပြီး သိမ်မွေ့သော ကိုယ်ရည်ကိုယ်သွေးကြောင့် လူတိုင်း၏ အသက်ရှူသံများ ရပ်တန့်သွားသကဲ့သို့ ဖြစ်သွားသည်။

ထိုလူသည် ကောင်းကင်နှင့် မြေကြီး၏ တာအို နှင့် ပေါင်းစပ်နေပုံရပြီး ထူးခြားကာ လောကီနှင့် ကင်းကွာနေသော်လည်း ရှင်းလင်းပြီး သဘာဝကျပေ၏။

သူ၏မျက်နှာကို လောကီနှင့် ကင်းကွာသည့် အင်မော်တယ် မြူခိုးလွှာတစ်ခုက ဖုံးအုပ်ထားသဖြင့် ရှင်းလင်းစွာ မြင်တွေ့ရန် မဖြစ်နိုင်ပေ။

သို့သော် ဝေဝါးနေသော ကောက်ကြောင်းနှင့် ကြယ်များကဲ့သို့ ကျယ်ပြန့်သော တစ်ခုတည်းသော ဖော်ပြနေသည့် မျက်လုံးများမှနေ၍ သူသည် လောကကြီးရှိ ကျော့ရှင်းပြီး ချောမောသော သခင်လေး တစ်ယောက် ဖြစ်ရမည်ကို သိနိုင်သည်။

အထူးသဖြင့် အသွင်အပြင်ကို ပို၍ အလေးထားသော ဖရိုဖရဲ မြင့်မြတ်နယ်မြေ၏ အမျိုးသမီး တပည့်တချို့သည် သူမတို့၏ဖရိုဖရဲသူတော်စင် ယွင်ရှောင်ကို ပြည်နှင်ဒဏ်ခံရသော အင်မော်တယ်တစ်ပါးဟု အမြဲတစေ တွေးထင်ခဲ့ကြသည်။

ဒါပေမယ့် အခု... ခုံးဝူတောက်နဲ့ ယှဉ်လိုက်တဲ့အချိန်မှာ...

သူတို့နှစ်ယောက်က စစ်မှန်တဲ့ ထုတ်ကုန်တစ်ခုနဲ့ ခိုးကူးထားတဲ့ မိတ္တူတစ်ခုလိုပဲ လုံးဝနှိုင်းယှဉ်လို့ မရဘူး....

ဤအချိန်အခိုက်အတန့်တွင် ဖရိုဖရဲ မြင့်မြတ်နယ်မြေ၏ မရေမတွက်နိုင်သော အမျိုးသမီး တပည့်များ၏ စိတ်နှလုံးသားထဲရှိ ယွင်ရှောင် ၏နေရာသည် လုံးဝတုန်ခါသွားခဲ့လေပြီ။

ရှေးလူကြီးတွေက တကယ်ကို မလိမ်ညာခဲ့ပါဘူး... လူတွေထက် သာတဲ့ လူတွေ ရှိသလို ကောင်းကင်တွေထက် သာတဲ့ ကောင်းကင်တွေ တကယ် ရှိနေတာပဲ...

ဖရိုဖရဲ မြင့်မြတ်နယ်မြေ ၏ ရာထူးမြင့်အကြီးအကဲများစွာသည် သူတို့၏တွေဝေမိန်းမောနေမှုမှ လျှင်မြန်စွာ ပြန်လည်အသိဝင်လာပြီး အလျင်အမြန် ရှေ့သို့ ထွက်လာကာ လက်နှစ်ဖက်ကို ပူးဆုပ်ပြီး ဦးညွှတ်လိုက်ကြသည်။

"နတ်ဘုရားသားတော် ခုံးဝူတောက်ကို ဂါရဝပြုပါတယ်..."

ယခုအချိန်၌ ကောင်းကင်အလင်း မိုးပြာနဂါးကို စီးတော်ယာဉ်အဖြစ် အသုံးပြုနိုင်သော လူငယ် တည်ရှိမှုကြီးတစ်ခုဆိုသည်ကို အရူးတစ်ယောက်ပင် သိပေလိမ့်မည်။

ထို့ပြင် အချိန်လေဟာနယ် တားမြစ်နယ်မြေ၏ ဧကရာဇ်သားတော်အစဉ်အဆက်များက နာခံရို့ကျိုးနေသော လူတစ်ယောက်...

သူသည် အချိန်လေဟာနယ် တားမြစ်နယ်မြေ၏ နတ်ဘုရားသားတော် ဖြစ်သော ခုံးဝူတောက်မှလွဲ၍ တခြားမည်သူ ဖြစ်နိုင်မည်နည်း။

ဖရိုဖရဲ မြင့်မြတ်နယ်မြေ၏ ရာထူးမြင့်အကြီးအကဲများစွာ၏ အော်ဟစ်သံအပြီးတွင် တွေဝေမိန်းမောနေသော ဖရိုဖရဲ မြင့်မြတ်နယ်မြေ၏ လူငယ်မျိုးဆက် အများအပြားသည် လက်တွေ့ဘဝသို့ ပြန်လည်ရောက်ရှိလာကြသည်။

သူတို့က မရိုင်းစိုင်းရဲဘဲ သူတို့အားလုံးက လက်များကို ပူးဆုပ်ကာ ဦးညွှတ်လိုက်ကြသည်။

"နတ်ဘုရားသားတော် ခုံးဝူတောက်ကို ဂါရဝပြုပါတယ်..."

အချိန်တခဏအတွင်းမှာပင် နားကွဲမတတ် ကျယ်လောင်သော အသံများသည် ဖရိုဖရဲ မြင့်မြတ်နယ်မြေတစ်ခုလုံးတွင် ပဲ့တင်ထပ်သွားလေ၏။

ခုံးဝူတောက်ရောက်ရှိလာခြင်းနှင့်အတူ ဤနေရာသည် လုံးဝပေါက်ကွဲသွားလေပြီ။

"အင်း..."

သို့သော် သူတို့၏နှုတ်ခွန်းဆက်စကားများကို တုံ့ပြန်သည့်အနေဖြင့် ခုံးဝူတောက်သည် ခေါင်းကို အနည်းငယ်သာ ညိတ်ပြလိုက်သည်။

သူ၏မျက်လုံးများသည် လူအုပ်ထဲတွင် ယဲ့ချန်၏ ပုံရိပ်ကို ရှာဖွေနေစဉ် စနစ်၏ အသံက ရုတ်တရက် ထပ်မံ၍ ထွက်ပေါ်လာသည်။

[ဒင်... လက်ခံသူရဲ့အနီးအနားမှာ ကောင်းကင်ကံကြမ္မာပိုင်ရှင် တစ်ယောက်ကို ထောက်လှမ်းတွေ့ရှိရပါတယ်...]

[လက်ခံသူ အတွက် အောင်မြင်စွာ မှတ်သားပေးလိုက်ပါပြီ... ကျေးဇူးပြုပြီး စစ်ဆေးပေးပါ လက်ခံသူ...]

ထိုစကားကို ကြားသောအခါ ခုံးဝူတောက်က မသိစိတ်အရ လှမ်းကြည့်လိုက်၏။

အောက်ဘက်ရှိ လူအုပ်ထဲတွင် ယွင်ရှောင် ၏ ခေါင်းပေါ် တိုက်ရိုက်လွင့်မျောနေသော အချက်အလက်ဇယားတစ်ခုကို သူ မြင်တွေ့လိုက်ရသည်။

[အမည်: သူတော်စင် ယွင်ရှောင်]

[ကိုယ်ပိုင်အမှတ်အသား: ကောင်းကင်ကံကြမ္မာ ဇာတ်လိုက်မင်းသား ဖရိုဖရဲ မြင့်မြတ်နယ်မြေရဲ့ သူတော်စင်]

[နယ်ပယ်: တာအိုနန်းတော်နယ်ပယ် အဆင့်ကိုး]

[ရုပ်ခန္ဓာကိုယ်: ဖရိုဖရဲရုပ်ခန္ဓာကိုယ် ကဏဦးအဆင့်]

[ကျင့်စဉ်: ဖရိုဖရဲကျမ်းစာ တစ်ခုတည်းသော ဖရိုဖရဲကျင့်စဉ် နက်နဲသိမ်မွေ့ မူလအစပုံစံ နှစ်ဆယ့်ခြောက်ခု...]

[ရတနာများ: ဖရိုဖရဲ ရတနာစည်းတံဆိပ် အထီးကျန်ရှစ်ပါးလှံရှည်...]

[ကောင်းကင်အမိန့်တော်အမှတ်: ၉၀၀၀]

[ကျနိုင်ခြေရှိသော တာအို အပိုင်းအစများ: ဖရိုဖရဲ မဟာတာအို အပိုင်းအစ၊ လှံရှည်တာအို အပိုင်းအစ၊ မိုးကြိုးတာအို အပိုင်းအစ...]

ခုံးဝူတောက်က မျက်ခုံးတစ်ချက် ပင့်လိုက်သည်။

မမျှော်လင့်ထားတဲ့ အကျိုးအမြတ်တစ်ခု ရှိနေတာလား...

ဒီသားကောင်အသစ်ရဲ့ ကောင်းကင်အမိန့်တော်အမှတ်တွေက တော်တော်လေး မြင့်မားနေတယ်....

ဒီယဲ့ချန်ကို အကျိုးအမြတ်တွေ ပေးဖို့ သူ့ဆီ သီးသန့် လွှတ်လိုက်တာများလားလို့ သူ တကယ် သံသယဝင်မိတယ်...

ဒါက တစ်ခုဝယ် တစ်ခုအလကားရတဲ့ အရောင်းအဝယ်များ ဖြစ်နိုင်မလား..