အခန်း (၄၉၁-၄၉၂)

အပိုင်း(၄၉၁) လင်းယွမ် ပြန်လာပြီ

"အဲ့ဒါ... ဘာကြီးလဲ"

ဟန်ရှန်းမန်က မျက်လုံးများကို ပြူးကျယ်စွာ ဖွင့်ထားပြီး အလွန် လျင်မြန်သော အလျင်ဖြင့် ရောက်ရှိလာသည့် လိပ်ကြီးကို လှမ်းကြည့်လိုက်သည်။

သူမ၏ စိတ်ထဲတွင် အလိုလို သိမြင်မှု တစ်ခုက ရုတ်တရက် ပေါ်ထွက်လာခဲ့သည်။

"လင်းယွမ်... သူပဲ ဖြစ်ရမယ်"

သူမက လက်နှစ်ဖက်ကို အစွမ်းကုန် ယက်ကာ ခန္ဓာကိုယ်ကို အပေါ်သို့ လျင်မြန်စွာ ပင့်တင်လိုက်ပြီး ရေပြင်ပေါ်သို့ ပေါ်ထွက်လာခဲ့သည်။

လတ်ဆတ်သော လေကို လောဘတကြီး ရှူရှိုက်လိုက်ရင်း သူမ၏ အကြည့်များက ရေပြင်ကို စူးစိုက်စွာ ကြည့်နေခဲ့သည်။

နောက်တစ်စက္ကန့်မှာပင် ဝုန်းခနဲ မြည်ဟည်းသံကြီး တစ်ခုကို ကြားလိုက်ရသည်။

ဧရာမ ရေလှိုင်းကြီးများက ရေပြင်အောက်မှ ပန်းထွက်လာခဲ့သည်။

အပြာရောင် စွမ်းအင်အကာအကွယ်ဖြင့် ဖုံးလွှမ်းထားသော ဧရာမ ကျွန်းကြီးတစ်ခုက ကြီးမားလှသော ရေပန်းကြီးများနှင့်အတူ ရေအောက်မှ ပေါ်ထွက်လာခဲ့သည်။

ထိုကျွန်းကြီးက အလွန် ကြီးမားလှပြီး ရွေ့လျားနေသော အလျင်က အလွန် မြန်ဆန်လွန်းသောကြောင့် ချက်ချင်း ရပ်တန့်နိုင်ခြင်း မရှိခဲ့ပေ။

ကြောက်မက်ဖွယ်ကောင်းသော အင်အားတစ်ရပ်နှင့်အတူ ဂိုဏ်းကြီးသုံးဂိုဏ်း၏ စစ်သင်္ဘောများဆီသို့ အရှိန်ပြင်းပြင်း ဝင်တိုက်လိုက်တော့သည်။

"ဝုန်း"

မျက်စိတစ်မှိတ်အတွင်းမှာပင် ဂိုဏ်းကြီးသုံးဂိုဏ်း၏ သင်္ဘောများဆီမှ ကျယ်လောင်သော မြည်ဟည်းသံကြီးများ ထွက်ပေါ်လာခဲ့သည်။

သင်္ဘောများ အားလုံး၏ အကာအကွယ်များက ဝုန်းခနဲ ပျက်စီးသွားတော့သည်။

ဤမျှ ပြင်းထန်သော တိုက်မိမှုအောက်တွင် အချို့သော စစ်သင်္ဘောများဆိုလျှင် ထက်ပိုင်းကျိုးသွားပြီး အလယ်မှနေ၍ ပြတ်တောက်သွားကာ ချွန်ထက်သော ဦးပိုင်းနှင့် ပဲ့ပိုင်းတို့က ယိမ်းယိုင်ကျဆင်းသွားပြီး ရေလွှမ်းမိုးမှုထဲသို့ ထိုးကျသွားကြတော့သည်။

"ဘာလဲဟ"

"ဘာတွေဖြစ်ကုန်တာလဲ"

"ဘယ်က ကျွန်းကြီး ရောက်လာတာလဲ"

စစ်သင်္ဘောပေါ်ရှိ ဂိုဏ်းကြီးသုံးဂိုဏ်းမှ လူများက အနီးအနားရှိ ပစ္စည်းများကို ကမန်းကတန်း ဖမ်းကိုင်လိုက်ကြပြီး ရုတ်တရက် ပေါ်လာသော ဤကျွန်းကြီးကို အံ့ဩမှု၊ ဒေါသထွက်မှုများ ရောယှက်နေသော မျက်လုံးများဖြင့် လှမ်းကြည့်လိုက်ကြသည်။

သူတို့၏ အကြည့်များ ရောက်ရှိသွားသည်နှင့် တစ်ပြိုင်နက် နေရာရှိ ဂိုဏ်းကြီးသုံးဂိုဏ်းမှ အဆင့်မြင့် ခေါင်းဆောင်အချို့၏ မျက်နှာများက ချက်ချင်း ပျက်ယွင်းသွားကြတော့သည်။

"လင်းယွီကျွန်း"

"လင်းယွီကျွန်းပဲ... တောက်... သူတို့တွေ ဘယ်လိုလုပ် ရောက်လာတာလဲ"

"ဒုက္ခပဲ... အကူအညီ မြန်မြန်တောင်း"

"ယဇ်ပုရောဟိတ်ကြီးကို မြန်မြန် အကြောင်းကြားလိုက်"

...

ဂိုဏ်းကြီးသုံးဂိုဏ်း၏ စစ်သင်္ဘောများပေါ်တွင် အစွမ်းပိုင်ရှင်များက အထိတ်တလန့် အော်ဟစ်လိုက်ကြပြီး အချင်းချင်း လျင်မြန်စွာ သတိပေး အော်ဟစ်လိုက်ကြသည်။

လူအချို့က ကုန်းပတ်ပေါ်သို့ အလျင်စလို ပြေးထွက်သွားကြပြီး အချက်ပြ မီးကျည်များကို ပစ်ဖောက်လိုက်ကြသည်။

"ရွှီး"

ရေနတ်ဘုရားဂိုဏ်း၏ အချက်ပြ မီးကျည်တစ်ခုက ကောင်းကင်ယံသို့ ပစ်လွှတ်လိုက်ရာ ဧရာမ အပြာရောင် ငှက်ကြီးတစ်ကောင်၏ ပုံသဏ္ဍာန် ပေါ်ထွက်လာခဲ့သည်။

မြေမိခင်ဂိုဏ်းဘက်မှလည်း အလားတူပင် အချက်ပြ မီးကျည်တစ်ခုကို ကောင်းကင်သို့ ပစ်လွှတ်လိုက်ရာ ဒိုင်းခနဲ မြည်သံနှင့်အတူ ဧရာမ မြေဝါရောင် မီးရှူးမီးပန်း ပုံသဏ္ဍာန်တစ်ခု ဖြစ်ပေါ်လာခဲ့သည်။

ထိုအချိန်မှာပင် ဟန်ရှန်းမန်နှင့် အခြားသူများကလည်း ထိုဧရာမ ကျွန်းကြီးကို လှမ်းကြည့်လိုက်ကြပြီး ထိုက်ယန်တောင်မှ လူများအားလုံးက ဤမြင်ကွင်းကို ကြည့်ကာ အံ့ဩတုန်လှုပ်နေကြသည်။

ဟန်ရှန်းမန်၏ အကြည့်များက ထိုအပြာရောင် အလင်းတန်း အကာအကွယ် အတွင်းဘက်သို့ စူးစိုက်ကြည့်နေပြီး သူမက ထိုလူ၏ အရိပ်အယောင်ကို ရှာဖွေနေခြင်း ဖြစ်သည်။

နောက်တစ်စက္ကန့်မှာပင် သူမ မြင်တွေ့လိုက်ရပြီ ဖြစ်သည်။

လူတစ်ယောက်က အပြာရောင် အလင်းတန်း အကာအကွယ်ထဲမှ ထွက်ပေါ်လာခဲ့သည်။

ကြောက်မက်ဖွယ်ကောင်းသော ဖိအားတစ်ရပ်က ရေပြင်တစ်ခုလုံးကို လွှမ်းခြုံသွားတော့သည်။

သူ၏ ခန္ဓာကိုယ် အထက်ပိုင်းတွင် ရိုးရှင်းသော အနက်ရောင် တီရှပ်တစ်ထည်ကိုသာ ဝတ်ဆင်ထားပြီး တောင့်တင်းသန်မာသော လက်မောင်းများကို ဖော်ပြနေသည်။

သူ၏ မျက်လုံးအစုံတွင် ဒေါသမီးများက အပြည့်အဝ တောက်လောင်နေပေသည်။

လင်းယွမ်က ရေပေါ်တံတားဆိပ်ကမ်း၏ ဆိုးရွားလှသော အခြေအနေကို ကြည့်ကာ သူ၏ ရင်ထဲတွင် အဆုံးမဲ့ ဒေါသမီးများက အမှန်တကယ် လောင်ကျွမ်းနေခဲ့ပြီ ဖြစ်သည်။

သူက အချိန်တိုတို နှစ်ရက်မျှသာ ထွက်သွားခဲ့ခြင်း ဖြစ်သော်လည်း ဂိုဏ်းကြီးသုံးဂိုဏ်းက ဤမျှမြန်ဆန်စွာ လာရောက် တိုက်ခိုက်လိမ့်မည်ဟု လုံးဝ ထင်မှတ်မထားခဲ့ပေ။

ထို့အပြင် ကြည့်ရသည်မှာ ထိုက်ယန်တောင်ကို ကြီးမားသော ဘေးအန္တရာယ်ကြီးတစ်ခု ကျရောက်စေခဲ့ပြီ ဖြစ်သည်။

သူ၏ ရင်ထဲတွင် ဒေါသမီးများ တောက်လောင်နေပြီး အောက်ဘက်ရှိ ထိုဂိုဏ်းကြီးသုံးဂိုဏ်း၏ စစ်သင်္ဘောများကို ငုံ့ကြည့်လိုက်သည်။

ယခင်က ဟန်ရှန်းမန်ကို ဒဏ်ရာရအောင် လုပ်ခဲ့သော မြေမိခင်ဂိုဏ်းမှ အဆင့်မြင့် အစွမ်းပိုင်ရှင်က ခေါင်းမော့လိုက်ရာ လင်းယွမ်၏ အကြည့်များနှင့် ဆုံတွေ့သွားခဲ့သည်။

သူ၏ ရင်ထဲတွင် ထိတ်ခနဲ ဖြစ်သွားပြီး မသိစိတ်၏ စေ့ဆော်မှုအရ နောက်သို့ ခြေတစ်လှမ်း ဆုတ်လိုက်မိသည်။

သို့သော် ချက်ချင်းပင် သူက သတိပြန်ဝင်လာပြီး လင်းယွမ်နှင့် မျက်လုံးချင်း ဆုံကာ အော်ပြောလိုက်သည်။ "ဒါက ငါတို့ ဂိုဏ်းကြီးသုံးဂိုဏ်းနဲ့ ထိုက်ယန်တောင်ကြားက ရန်ငြိုးပဲ... မင်းတို့ လင်းယွီကျွန်းက ဝင်ပါစရာ မလိုဘူးမလား"

လင်းယွမ်၏ အကြည့်များက အေးစက်နေပြီး မေးလိုက်သည်။ "မင်းက မြေမိခင်ဂိုဏ်းကလား"

လူကောင်ကြီးက ကြားလိုက်ရသောအခါ ပြန်ဖြေလိုက်သည်။ "ဟုတ်တယ်... ငါက မြေမိခင်ဂိုဏ်း သစ်တောဂိုဏ်းအုပ် လက်အောက်က မြေလျှောက်ဝိဇ္ဇာ တပ်ခွဲမှူး ဟယ်ချုံရှန်းပဲ... မင်းက ဘယ်သူလဲ... မင်းတို့ လင်းယွီကျွန်းရဲ့ ကျွန်းပိုင်ရှင်ကြီးကို ထွက်လာပြီး စကားပြောခိုင်းလိုက်"

လင်းယွမ်က သူ့ကို ဂရုမစိုက်ဘဲ ပြောလိုက်သည်။ "ကောင်းတယ်... အရမ်းကောင်းတယ်... မြေမိခင်ဂိုဏ်းလည်း ရောက်နေတာကိုး... ဂိုဏ်းကြီးသုံးဂိုဏ်းဆိုတော့ ကြည့်ရတာ ဝိညာဉ်စွမ်းအင်ဂိုဏ်းလည်း ရောက်နေတာပေါ့လေ"

သူ၏ ရင်ထဲတွင် ဒေါသမီးများက အဆက်မပြတ် တောက်လောင်နေပြီး မူလက ရေနတ်ဘုရားဂိုဏ်း တစ်ခုတည်းသာ လာသည်ဟု ထင်မှတ်ထားခဲ့ခြင်း ဖြစ်သည်။

ဂိုဏ်းကြီးသုံးဂိုဏ်းလုံးက ထိုက်ယန်တောင်သို့ တစ်ပြိုင်နက်တည်း ရောက်လာကြလိမ့်မည်ဟု သူ လုံးဝ ထင်မှတ်မထားခဲ့ပေ။

ကောင်းလိုက်တဲ့ ဂိုဏ်းကြီးသုံးဂိုဏ်း။

"လင်းယွီကျွန်းက လူတွေ နားထောင်စမ်း... ဒီတစ်ကြိမ်က ငါတို့ ဂိုဏ်းကြီးသုံးဂိုဏ်း ပူးပေါင်းပြီး လှုပ်ရှားတာပဲ... ငါတို့ ဂိုဏ်းကြီးသုံးဂိုဏ်းရဲ့ အစီအစဉ်ကို ဖျက်ဆီးရဲတဲ့ ဘယ်သူမဆို ငါတို့ ဂိုဏ်းကြီးသုံးဂိုဏ်းရဲ့ သေမလောက် ရန်သူပဲ"

"လင်းယွီကျွန်းပိုင်ရှင်... သေချာ စဉ်းစားပြီးမှ လုပ်ဆောင်ပါ"

ရေနတ်ဘုရားဂိုဏ်းမှ အပြာရောင် ဝတ်ရုံဝတ် ရေဓာတ် အစွမ်းပိုင်ရှင်က အထက်သို့ ပျံတက်လာခဲ့ပြီး ရေလှိုင်းများက သူ့ကို ပင့်မထားကာ ပျက်စီးနေသော စစ်သင်္ဘောပေါ်မှ ထွက်ခွာလာခဲ့သည်။

သူက အေးစက်သော မျက်နှာထားဖြင့် တစ်ဖက်ရှိ ကျွန်းမှ လာသူများကို အသံကျယ်ကျယ်ဖြင့် ခြိမ်းခြောက်လိုက်သည်။

ထိုအချိန်တွင် ကျွန်းအတွင်းရှိ ထိုအပြာရောင် စွမ်းအင်အကာအကွယ်ထဲမှ လင်းယွီကျွန်း၏ မျိုးရိုးဗီဇမျိုးစေ့ အစွမ်းပိုင်ရှင်များစွာက တစ်ယောက်ပြီးတစ်ယောက် ထွက်ပေါ်လာကြသည်။

ကျန်းဇီယန်နှင့် လင်းဟယ်တို့က ဦးဆောင်ကာ လင်းယွမ်၏ ဘယ်ညာ နှစ်ဖက်တွင် ရပ်လိုက်ကြသည်။

လင်းဟယ်က အောက်ဘက်ရှိ ဂိုဏ်းကြီးသုံးဂိုဏ်း၏ ခြိမ်းခြောက်မှုကို ကြားလိုက်ရသောအခါ မနေနိုင်ဘဲ လှောင်ရယ် ရယ်မောလိုက်သည်။ "ဟေ့... ရေနတ်ဘုရားဂိုဏ်းက ကောင်တွေ... တခြားသူတွေက မင်းတို့ကို ကြောက်ရင် ကြောက်မယ်... ငါတို့ လင်းယွီကျွန်းက မင်းတို့ကို ကြောက်မယ် ထင်နေလား"

"ရန်သူ ဖြစ်မယ်... ဟီးဟီး... ငါတို့က အစတည်းက ရန်သူတွေ ဖြစ်နေပြီ မဟုတ်ဘူးလား... မင်းတို့ကို ပြောဖို့ မေ့နေတာ... ခုနက ငါတို့ကို လိုက်သတ်ဖို့ မင်းတို့ လွှတ်လိုက်တဲ့ ရေနစ် ဝိညာဉ်တပ်ဖွဲ့က အားလုံး သေကုန်ပြီ"

"အခုက ငါတို့က မင်းတို့ကို လာပြီး ဒုက္ခပေးရမယ့် အချိန်ပဲ... ဟားဟားဟား"

ကျန်းဇီယန်ကလည်း ထိုအချိန်တွင် ဝင်ပြောလိုက်သည်။ "ကိုလင်းယွမ်... ဒီနေရာကို ကျွန်မတို့ဆီ လွှဲထားလိုက်ပါ... ရှင်က တခြားသူတွေကို သွားပြီး မြန်မြန် ကယ်တင်လိုက်ပါဦး"

လင်းယွမ်က ကြားလိုက်ရသောအခါ သူ၏ ရင်ထဲမှ ဒေါသမီးများကို ဖောက်ခွဲရန် အချိန်မရတော့ဘဲ သူ၏ အကြည့်များက ရေပြင်ပေါ်ရှိ လူများကို တစ်ချက် ဝေ့ကြည့်လိုက်သည်။

ရုတ်တရက် ဟန်ရှန်းမန်ကို သတိထားမိသွားပြီး ချက်ချင်းပင် သူ၏ ခန္ဓာကိုယ်က လှုပ်ရှားသွားကာ သူမ၏ အနီးသို့ လျင်မြန်စွာ ပျံသန်းသွားပြီး သူမကို လက်တစ်ဖက်တည်းဖြင့် ပွေ့ချီကာ ရေပြင်ပေါ်မှ ခေါ်ဆောင်သွားခဲ့သည်။

ဟန်ရှန်းမန်၏ ပေါင်ပေါ်တွင် သွေးများ ရွှဲနစ်နေပြီး အရေပြားနှင့် အသားများကို သန္ဓေပြောင်း ငါးက ကိုက်ဖြတ်ထားသောကြောင့် သွေးများက အဆက်မပြတ် စီးကျနေသည်။

လင်းယွမ်၏ မျက်နှာက မှောင်မိုက်သွားပြီး ဆေးရည်တစ်ပြွန်ကို ထုတ်ယူကာ မေးလိုက်သည်။ "မင်း အခြေအနေ ဘယ်လိုနေလဲ"

ဟန်ရှန်းမန်က ယခုအချိန်တွင် ရင်ထဲ၌ အလွန် စိတ်လှုပ်ရှားနေပြီး ဆေးရည်ကို ဂလုခနဲ မော့သောက်လိုက်ရာ စိတ်ဓာတ်များ တက်ကြွသွားပြီး ခန္ဓာကိုယ်တွင်းရှိ သန္ဓေပြောင်းစွမ်းအင်များက အနည်းငယ် ပြန်လည် ပြည့်ဝလာခဲ့သည်။

တစ်ချိန်တည်းမှာပင် ဒဏ်ရာကလည်း လျင်မြန်စွာ ပြန်လည် ကောင်းမွန်လာခဲ့ပြီး သူမက စိတ်လှုပ်ရှားစွာဖြင့် ပြောလိုက်သည်။ "လင်းယွမ်... ရှင်... ရှင် ဘယ်လိုလုပ် အခုမှ ပြန်လာတာလဲ"

သူမ၏ မျက်ဝန်းများက နီရဲသွားပြီး ထိုစကားတစ်ခွန်းကို ပြောလိုက်ခြင်း ဖြစ်သည်။

သို့သော် ချက်ချင်းပင် သူမက ယခုအချိန်တွင် ဤစကားများကို မပြောသင့်ကြောင်း သတိထားမိသွားပြီး ချက်ချင်း ပြောလိုက်သည်။ "ဂိုဏ်းကြီးသုံးဂိုဏ်းက ပူးပေါင်းပြီး ကျွန်မတို့ ထိုက်ယန်တောင်ကို တိုက်ခိုက်နေကြတယ်... သူတို့ရဲ့ ခေါင်းဆောင်တွေနဲ့ တပ်ဖွဲ့ကြီးက တောင်ပေါ်ကို တက်သွားကြပြီ"

"ကျောက်ခိုင်က အားလုံးကို ခေါ်ပြီး မိန်တောင်နဲ့ လင်းယွင်တောင်စောင်းကို စွန့်လွှတ်လိုက်တယ်... ပြီးတော့ ထိုက်ယန်တောင် မီးဝါးတောဘက်မှာ သွားပြီး ခုခံနေကြတယ်"

"ရှင် မြန်မြန် သွားပါ... မြန်မြန်"

သူမက စိတ်လှုပ်ရှားစွာဖြင့် လင်းယွမ်ကို တွန်းထုတ်လိုက်သည်။

လင်းယွမ်က ကြားလိုက်ရသောအခါ မျက်နှာက တည်တင်းသွားပြီး ပြောလိုက်သည်။ "ဒါဆို မင်းကရော..."

"ကျွန်မ ဘာမှမဖြစ်ဘူး... ရှင် ကျွန်မကို ဂရုစိုက်မနေနဲ့... ကျွန်မ မသေသေးပါဘူး" ဟန်ရှန်းမန်က ချက်ချင်းပင် ပြတ်သားစွာ ပြောလိုက်သည်။

လင်းယွမ်က နောက်ဆုံးတွင် လင်းယွီကျွန်းဘက်သို့ လှမ်းကြည့်လိုက်ရာ စိတ်ထဲတွင် အနည်းငယ် တည်ငြိမ်သွားပြီး မေးလိုက်သည်။ "ဘယ်သူက မင်းကို ဒီလို ဒဏ်ရာရအောင် လုပ်တာလဲ"

ဟန်ရှန်းမန်က မသိစိတ်၏ စေ့ဆော်မှုအရ ထိုမြေမိခင်ဂိုဏ်းမှ အစွမ်းပိုင်ရှင်ကို လှမ်းကြည့်လိုက်မိသည်။

သို့သော် ချက်ချင်းပင် သူမက အမြန် ပြောလိုက်သည်။ "ရှင် အဲ့ဒါတွေကို ဂရုစိုက်မနေပါနဲ့... မီးဝါးတောကို မြန်မြန် သွားပါ... ကျောက်ခိုင် တောင့်ခံထားနိုင်မှာ မဟုတ်ဘူးလို့ ကျွန်မ စိုးရိမ်တယ်"

လင်းယွမ်က စကားများများ မပြောတော့ဘဲ ခေါင်းလှည့်ကာ မြေမိခင်ဂိုဏ်းမှ ထိုလူကောင်ကြီးကို လှမ်းကြည့်လိုက်သည်။

သူ၏ မျက်လုံးများက လက်ခနဲ ဖြစ်သွားပြီး လေထဲသို့ ခြေလှမ်းကာ ထိုလူ့ဆီသို့ လက်ညှိုး တစ်ချက် ထိုးလိုက်သည်။

ချက်ချင်းပင် လေဟာနယ်ထဲတွင် ကြောက်မက်ဖွယ်ကောင်းသော စိတ်စွမ်းအင်များ စုစည်းလာပြီး ဝိညာဉ်မီးတောက် တစ်ခုက မျက်စိတစ်မှိတ်အတွင်း လောင်ကျွမ်းလာခဲ့သည်။

"ဝုန်း"

ထိုဝိညာဉ်မီးတောက်က မြေမိခင်ဂိုဏ်းမှ လူကောင်ကြီး ရှိနေသော သင်္ဘောကို ချက်ချင်းပင် လောင်ကျွမ်းသွားစေခဲ့သည်။

မျက်စိတစ်မှိတ်အတွင်းမှာပင် တစ်သင်္ဘောလုံးရှိ မြေမိခင်ဂိုဏ်းမှ လူများအားလုံးက ခေါင်းကို ဖက်ကာ စူးရှစွာ အော်ဟစ်လိုက်ကြတော့သည်။

မြေမိခင်ဂိုဏ်းမှ လူကောင်ကြီးမှာမူ မျက်နှာက ပို၍ ပျက်ယွင်းသွားပြီး ခေါင်းကို ကမန်းကတန်း ဖက်ကာ နာကျင်စွာ အော်ဟစ်နေတော့သည်။

"စိတ်စွမ်းအင် အစွမ်းပိုင်ရှင်ပဲ... မလုပ်... မလုပ်ပါနဲ့..."

"ဝုန်း"

ဝိညာဉ်မီးတောက်က သင်္ဘောတစ်စင်းလုံးသို့ ပျံ့နှံ့သွားပြီး မျက်စိတစ်မှိတ်အတွင်းမှာပင် ထိုလူများ၏ စိတ်ပင်လယ်ကို လုံးဝ လောင်ကျွမ်းသွားစေခဲ့သည်။

တစ်သင်္ဘောလုံးရှိ လူများအားလုံးက ဦးနှောက်များ ခြောက်ကပ်သွားပြီး မျက်လုံးများက အဖြူရောင် လန်သွားကာ မြေပြင်ပေါ်သို့ ပျော့ခွေကျသွားကြပြီး ဦးနှောက်သေဆုံးသွားကြပြီ ဖြစ်သည်။

ဤမြင်ကွင်းကို မြင်လိုက်ရသောအခါ လူတိုင်းက လေအေးများကို ရှူရှိုက်လိုက်မိကြသည်။

လင်းယွီကျွန်းမှ ကျန်းဇီယန်၊ လင်းဟယ်နှင့် အခြားသူများပင်လျှင် အံ့ဩတုန်လှုပ်စွာဖြင့် မျက်လုံးများ ပြူးကျယ်သွားကြသည်။

ဂိုဏ်းကြီးသုံးဂိုဏ်းမှ အဖွဲ့ဝင်များဆိုလျှင်တော့ ပြောစရာပင် မလိုတော့ပေ။

"ဒါ... ဒါက ဘယ်လို တိုက်ကွက်ကြီးလဲ"

"စိတ်စွမ်းအင် တိုက်ကွက်လား... ဘယ်လိုလုပ်ပြီး ဒီလောက် အစွမ်းထက်နေရတာလဲ"

"သူ့ရဲ့ စိတ်စွမ်းအင်က အတိအကျ ဘယ်လောက်တောင် အစွမ်းထက်နေတာလဲ"

...

လင်းယွမ်က အေးစက်စွာ ရယ်မောလိုက်ပြီး အော်ပြောလိုက်သည်။ "ဒေါက်တာကျန်း... ဒီနေရာကို မင်းတို့ဆီ လွှဲထားခဲ့ပြီ... ဂိုဏ်းကြီးသုံးဂိုဏ်းက လူ တစ်ယောက်ကိုမှ မလွတ်စေနဲ့... ငါ သွားပြီးရင် ချက်ချင်း ပြန်လာခဲ့မယ်"

"ဝှစ်"

လင်းယွမ်၏ ခန္ဓာကိုယ်က လက်ခနဲ ဖြစ်သွားပြီး လေထဲတွင် ချက်ချင်း ပျောက်ကွယ်သွားခဲ့သည်။

လေထဲတွင် မီးတောက် လမ်းကြောင်းတစ်ခုသာ ကျန်ရစ်ခဲ့ပြီး ကြယ်တံခွန်တစ်ခု ကောင်းကင်ယံကို ဖြတ်သန်းသွားသည့်အလား ဖြစ်နေသည်။

သူက တစ်စက္ကန့်လျှင် ပေ ၂၆၀ နှုန်းဖြင့် မျက်စိတစ်မှိတ်အတွင်းမှာပင် ထိုက်ယန်တောင် မီးဝါးတော၏ အထက်ကောင်းကင်ယံသို့ ပြေးဝင်သွားခဲ့ပြီ ဖြစ်သည်။

ယခုအချိန်တွင် မီးဝါးတောအတွင်းရှိ မြို့ရိုးအောက်တွင် ဖြစ်သည်။

ကျောက်ခိုင်က လွန်ခဲ့သော ငါးမိနစ်ခန့်ကတည်းက ပေတံ၏ စွမ်းအင်များ ကုန်ခမ်းသွားခဲ့ပြီး လင်းကွမ်ချွန်း ကိုယ်တိုင် ဝင်ရောက် ဖိနှိပ်ခြင်းကို ချက်ချင်း ခံလိုက်ရသည်။

ပေတံကို သိမ်းဆည်းခံလိုက်ရရုံသာမက လက်မောင်းများပင်လျှင် လင်းကွမ်ချွန်း၏ ဥက္ကာခဲလက်သီးဖြင့် ရိုက်ချိုးခံလိုက်ရသည်။

ယခုအချိန်တွင် သူက မြေပြင်ပေါ်၌ လဲကျနေပြီး ပတ်လည်ရှိ မြေကြီးများက သူ့ကို မြေအောက်သို့ သေချာစွာ မြှုပ်နှံထားကာ တစ်ကိုယ်လုံးက ထိန်းချုပ်၍မရဘဲ ရွှံ့နွံထဲသို့ နစ်မြုပ်သွားနေသည်။

လင်းကွမ်ချွန်း၏ ခြေထောက်က ကျောက်ခိုင်၏ ခေါင်းပေါ်တွင် နင်းထားပြီး လက်ထဲတွင် ထိုပေတံကို ကိုင်ထားသည်။

သူက ပေတံကို တစ်ချက် အကဲခတ်လိုက်ပြီး အေးဆေးစွာ ပြောလိုက်သည်။ "ဒါက မင်းရဲ့ နောက်ဆုံး လက်နက်လား"

"သာမန် သန္ဓေပြောင်း လက်နက်လေး တစ်ခုနဲ့ ပင်မအရည်အသွေးရဲ့ ကြီးမားတဲ့ ကွာဟချက်ကို ဖြည့်ဆည်းနိုင်မယ်လို့ မင်း ထင်နေတာလား"

"ပင်မအရည်အသွေး ၅၄ မှတ်ဆိုတော့ မင်းကိုလည်း အရည်အချင်းရှိတဲ့ လူတစ်ယောက်လို့ သတ်မှတ်လို့ ရပါတယ်... အသာတကြည်အညံ့ခံမယ်ဆိုရင် မင်းရဲ့ အသက်ကို ငါ ချမ်းသာပေးနိုင်တယ်"

လင်းကွမ်ချွန်းက စတင်ပြီး လက်နက်ချရန် ဖျောင်းဖျနေကာ သူက ကျောက်ခိုင်၏ ရေခဲအစွမ်းကို တော်တော်လေး စိတ်ဝင်စားနေခြင်း ဖြစ်သည်။

အကယ်၍ သူ၏ လက်အောက်သို့ သိမ်းသွင်းနိုင်မည်ဆိုလျှင် နောင်တစ်ချိန်တွင် ရေနတ်ဘုရားဂိုဏ်းကို ရင်ဆိုင်ရမည့်အခါ ကြီးမားသော တိုက်ခိုက်ရေး လက်နက်ကြီး တစ်ခု ဖြစ်လာမည် ဖြစ်သည်။

"လင်းကွမ်ချွန်း... မင်း ဒါ ဘာလုပ်နေတာလဲ"

မလှမ်းမကမ်း နေရာမှ ကျန်းကောချန်က ထိုမြင်ကွင်းကို မြင်လိုက်ရသောအခါ မျက်နှာက အနည်းငယ် မည်းမှောင်သွားပြီး ထိုက်ယန်တောင်မှ အစွမ်းပိုင်ရှင် တစ်ယောက်ကို ခြေထောက်ဖြင့် ကန်ထုတ်လိုက်ကာ အော်ငေါက် မေးမြန်းလိုက်သည်။

ဟန်ထိုက်ကလည်း အနည်းငယ် အေးစက်နေသော အကြည့်များဖြင့် လင်းကွမ်ချွန်းကို လှမ်းကြည့်လိုက်သည်။

လင်းကွမ်ချွန်းက ခပ်ဖွဖွ ရယ်မောလိုက်သည်။ "သိပ်မဆိုးတဲ့ မျိုးစေ့ကောင်း တစ်ခုက ကြုံရခဲလို့ပါ... ဟဲဟဲ"

ဟန်ထိုက်က အေးစက်သော အသံဖြင့် ပြောလိုက်သည်။ "ဟဲဟဲ... သူက ရေခဲအစွမ်း မျိုးရိုးဗီဇမျိုးစေ့မလို့လား"

"မင်း သေချာ သိထားရမှာက... ငါတို့ ရေနတ်ဘုရားဂိုဏ်းက ရေဓာတ်အစွမ်း မျိုးရိုးဗီဇမျိုးစေ့ အစွမ်းပိုင်ရှင်တွေကို အခြေခံပြီး ရပ်တည်နေတာ မှန်ပေမယ့်... ငါကတော့ ရေဓာတ်အစွမ်း မျိုးရိုးဗီဇမျိုးစေ့ကို အားကိုးပြီး ကမ္ဘာကြီးကို သိမ်းပိုက်မှာ မဟုတ်ဘူး"

"ငါ့ကို ကိုယ်တိုင် ဝင်ပါရအောင် မလုပ်နဲ့... သူ့ကို မြန်မြန် သတ်လိုက်တော့"

လင်းကွမ်ချွန်းက ဟန်ထိုက်ကို စိုးရိမ်တကြီးဖြင့် တစ်ချက် ကြည့်လိုက်ရာ ဤလူအိုကြီး၏ ကပ်ရောဂါ အစွမ်းက အလွန် ထူးဆန်းလှပြီး သူ့အနေဖြင့် တစ်ဖက်လူကို ရင်ဆိုင်ရန် ရာခိုင်နှုန်းပြည့် ယုံကြည်ချက် မရှိပေ။

ထို့ကြောင့် သူက ပြုံးလိုက်သည်။ "မင်းတို့ နှစ်ယောက်လုံးက သဘောထားကွဲလွဲနေမှတော့ သူ့ကို အရင် သတ်လိုက်တာပေါ့... ထိုက်ယန်တောင်ကို သိမ်းပိုက်ပြီးမှ ထပ်ပြောကြတာပေါ့"

ထိုသို့ပြောရင်း သူက လက်ထဲရှိ ပေတံကို မြှောက်လိုက်ပြီး လှုပ်ရှားရန် ပြင်လိုက်သည်။

ရုတ်တရက် လေထဲမှ စူးရှသော လေခွဲသံကြီး တစ်ခု ထွက်ပေါ်လာခဲ့သည်။

လူတိုင်းက လန့်ဖြန့်သွားကြပြီး ကောင်းကင်သို့ တစ်ပြိုင်နက်တည်း မော့ကြည့်လိုက်ကြသည်။

ကောင်းကင်ယံမှ မီးတောက် လမ်းကြောင်းတစ်ခုက အရှိန်အဟုန်ဖြင့် ပစ်လွှတ်လာသည်ကိုသာ မြင်လိုက်ရသော်လည်း မီးတောက်၏ အရင်းအမြစ်ကိုမူ မမြင်ရပေ။

အဘယ်ကြောင့်ဆိုသော် လာနေသော သူ၏ အလျင်က အလွန် မြန်ဆန်လွန်းသောကြောင့် အမြင်အာရုံ၏ ခံနိုင်ရည် ကန့်သတ်ချက်ထက်ပင် ကျော်လွန်နေသောကြောင့် ဖြစ်သည်။

သူတို့က တစ်ဖက်လူ၏ ခန္ဓာကိုယ် ပုံသဏ္ဍာန်ကို ဖမ်းယူနိုင်ခြင်း မရှိတော့ပေ။

လေခွဲသံကြီးက အဆက်မပြတ် နီးကပ်လာသည်နှင့်အမျှ...

နောက်တစ်စက္ကန့်မှာပင် လူတစ်ယောက်၏ ပုံသဏ္ဍာန်က လေထုကို ဖောက်ထွင်းလာသော ဥက္ကာခဲကြီး တစ်ခုအလား ဝုန်းခနဲ မြည်ဟည်းသံကြီးနှင့်အတူ မီးဝါးတောဆီသို့ ရိုက်ချလာတော့သည်။

ကြောက်မက်ဖွယ်ကောင်းသော အပူလှိုင်းကြီးများက မျက်နှာဆီသို့ ရိုက်ခတ်လာသောကြောင့် လူတိုင်း၏ မျက်နှာများက ပျက်ယွင်းသွားကြပြီး မသိစိတ်၏ စေ့ဆော်မှုအရ နောက်သို့ အလျင်အမြန် ဆုတ်ခွာကာ ရှောင်တိမ်းလိုက်ကြသည်။

"မြန်မြန် ရှောင်ကြ"

"ဥက္ကာခဲကြီးလား"

"သောက်ကျိုးနည်း ဘာကြီးလဲ"

လူများစွာက အထိတ်တလန့် အော်ဟစ်လိုက်ကြပြီး ချက်ချင်းပင် ရှောင်တိမ်းလိုက်ကြသည်။

ထိုက်ယန်တောင်မှ လူများအားလုံးက ကောင်းကင်သို့ မော့ကြည့်လိုက်ရာ ထိုမီးတောက် လမ်းကြောင်းကို မြင်လိုက်ရသောအခါ မျက်စိတစ်မှိတ်အတွင်းမှာပင် အတိုင်းမသိ ဝမ်းသာပျော်ရွှင်သွားကြတော့သည်။

"မီးစင်္ကြာပဲ... ဆရာလင်း ရောက်လာပြီ"

"ဆရာလင်း ပြန်လာပြီ... ဆရာလင်း ပြန်လာပြီဟေ့"

"လင်းယွမ်..." မာကောချိုင်က မြေအောက်တွင် ပုန်းအောင်းနေရင်းမှ မနေနိုင်တော့ဘဲ အံ့ဩဝမ်းသာစွာဖြင့် အော်ဟစ်လိုက်မိသည်။

မြို့ရိုးအတွင်းရှိ တောင်၏ အတွင်းပိုင်း လျှို့ဝှက်ခန်းထဲတွင် ပြတင်းပေါက်မှတစ်ဆင့် အပြင်ဘက်ရှိ အခြေအနေများကို စိုးရိမ်တကြီး အကဲခတ်နေကြသော ရန်မေနှင့် အခြားသူများကလည်း ချက်ချင်းပင် မျက်လုံးများ ပြူးကျယ်သွားကြသည်။

"မောင်လေး... မောင်လေး ပြန်လာပြီ"

ဆုန့်ဝမ်ကလည်း ရုတ်တရက် မတ်တတ်ရပ်လိုက်ပြီး အံ့ဩဝမ်းသာစွာဖြင့် ပြောလိုက်သည်။ "အစ်ကိုလင်း ပြန်လာပြီလား"

တုံယန်ကလည်း ချက်ချင်းပင် ပြတင်းပေါက်တွင် မှီကာ ကောင်းကင်သို့ လှမ်းကြည့်လိုက်သည်။

ထိုရင်းနှီးနေသော မီးတောက် လမ်းကြောင်းမှာ သူမတို့ ဆုတောင်းနေခဲ့ရသည့် ချစ်သူပင် ဖြစ်ပေသည်။

"အစ်ကိုလင်း ပြန်လာပြီဆိုတော့ ထိုက်ယန်တောင်တော့ ကယ်တင်ရှင် ရသွားပြီ... ငါတို့ ပုန်းနေစရာ မလိုတော့ဘူး"

တိုက်ပွဲ စတင်ဖြစ်ပွားခဲ့သည့် ပထမဆုံး အချိန်ကတည်းက ကျောက်ခိုင်က မာကောချိုင်ကို သူ၏ မြေလျှိုးအစွမ်းအား အသုံးပြုစေကာ လင်းယွမ်၏ အမျိုးသမီး သုံးယောက်ကို တောင်ထိပ်ရှိ လျှို့ဝှက်ခန်းထဲသို့ ပို့ဆောင်ထားစေခဲ့ခြင်း ဖြစ်သည်။

သူက လင်းယွမ်၏ အမိန့်ကို ကြိုတင် ရရှိထားပြီးဖြစ်ရာ အခြေအနေ မဟန်ပါက ရန်မေတို့ကို အရင်ဆုံး ခေါ်ဆောင်သွားရမည် ဖြစ်သည်။

သို့သော် သူက မထွက်သွားချင်ဘဲ ထိုက်ယန်တောင်နှင့်အတူ အသက်ရှင်လျှင် အတူရှင်သန်ပြီး သေလျှင် အတူသေရန် ဆုံးဖြတ်ထားခဲ့သည်။

ထို့ကြောင့် သူက ရန်မေတို့ မိန်းကလေး သုံးယောက်ကို ပုန်းအောင်းနေစေရန် နည်းလမ်းရှာခဲ့ပြီး သူကိုယ်တိုင်က မြို့ရိုး အပြင်ဘက်တွင် ခုခံနေခဲ့ခြင်း ဖြစ်သည်။

ကံကောင်းထောက်မစွာဖြင့် သူက ဂိုဏ်းကြီးသုံးဂိုဏ်း၏ တိုက်ခိုက်မှုကို ဆွဲဆန့်ထားနိုင်ခဲ့ပြီး လင်းယွမ် ပြန်လာမည့်အချိန်အထိ စောင့်ဆိုင်းနိုင်ခဲ့သည်။

"ဝုန်း"

လင်းယွမ်၏ ခန္ဓာကိုယ်က ဒုံးကျည်တစ်ခုအလား မြို့ရိုးအောက်သို့ ပြုတ်ကျလာခဲ့သည်။

အနီးအနားရှိ မြေမိခင်ဂိုဏ်းမှ အဖွဲ့ဝင် တစ်ယောက်မှာမူ ရှောင်တိမ်းရန် အချိန်မမီတော့ဘဲ အရှိန်အဟုန်ဖြင့် ပြုတ်ကျလာသော လင်းယွမ်၏ ဖိကြိတ်မှုကြောင့် အသားစိုင်များအဖြစ်သို့ ကြေမွသွားခဲ့ရသည်။

သူ၏ တစ်ကိုယ်လုံးရှိ စွမ်းအင်အကာအကွယ်က လှိုင်းထန်နေပြီး ဤမျှလောက်သော ရိုက်ခတ်မှုအရှိန်က သူ၏ လိပ်ခွံစွမ်းအင်အကာအကွယ်ကိုပင် ဖောက်ထွင်းနိုင်ခြင်း မရှိခဲ့ပေ။

ယနေ့အချိန်ထိ လိပ်ခွံစွမ်းအင်အကာအကွယ်က အဖြူရောင်အဆင့် စွမ်းရည်တစ်ခုသာ ဖြစ်သော်လည်း သူ၏ ကြောက်မက်ဖွယ်ကောင်းသော စိတ်စွမ်းအင်ကြောင့် လိပ်ခွံစွမ်းအင်အကာအကွယ်၏ ကာကွယ်မှုစွမ်းအားက အလွန် ကြောက်မက်ဖွယ်ကောင်းသော အဆင့်တစ်ခုအထိ ရောက်ရှိနေဆဲပင် ဖြစ်သည်။

မြည်ဟည်းသံကြီး ထွက်ပေါ်လာသည်နှင့်အတူ ပတ်လည်ရှိ မြေကြီးများက ချက်ချင်း လွင့်စင်သွားကြပြီး လင်းယွမ် ခြေချလိုက်သော နေရာကို ဗဟိုပြုကာ မြေပြင်ကြီးက တိုက်ရိုက် ချိုင့်ဝင်သွားခဲ့သည်။

အစွမ်းထက်သော ရိုက်ခတ်မှု လှိုင်းဂယက်များက အရပ်မျက်နှာ အနှံ့အပြားသို့ ပြင်းထန်စွာ ရိုက်ခတ် ပျံ့နှံ့သွားတော့သည်။

ကြောက်မက်ဖွယ်ကောင်းသော လေဖိအားကြီးက နေရာရှိ လူများအားလုံး၏ မျက်နှာများဆီသို့ တိုက်ခတ်သွားပြီး ဂိုဏ်းကြီးသုံးဂိုဏ်းမှ လူများ၏ ပါးပြင်များကို ဓားဖြင့် လှီးဖြတ်ခံလိုက်ရသကဲ့သို့ ခံစားလိုက်ရစေသည်။

ဆက်ရန်...

အပိုင်း(၄၉၂) ဂိုဏ်းကြီးသုံးဂိုဏ်းကို တိုက်ထုတ်ခြင်း

လေပြင်းများက တိုက်ခတ်သွားပြီး သည်းထန်စွာ ရွာသွန်းနေသော မိုးရေစက်များကို ပေါက်ကွဲသွားစေရုံသာမက ပတ်ဝန်းကျင်ရှိ ဝါးတောများကိုပါ ယိမ်းယိုင်သွားစေကာ မီးဝါးတော အမြောက်အမြား ကျိုးကျသွားပြီး ဝါးရွက်များ လွင့်စင်သွားစေသည်။

လင်းယွမ်၏ ခြေနှစ်ဖက် မြေပြင်ပေါ်သို့ ကျရောက်သွားပြီး သူ၏ တစ်ကိုယ်လုံးမှ အရှိန်အဝါများက ကောင်းကင်သို့ ထိုးတက်သွားကာ သူ၏ ပတ်ပတ်လည်တွင် ကြောက်မက်ဖွယ်ကောင်းသော ရေခဲချွန်များက လေတိုးသံများနှင့်အတူ လည်ပတ်နေပေသည်။

ဤကဲ့သို့သော ဖိအားက ကျောက်ခိုင်ထက် ဆယ်ဆမက ပိုမို အားကောင်းနေပေသည်။

ရောက်လာသူ၏ ကြောက်မက်ဖွယ်ကောင်းသော အရှိန်အဝါကို ခံစားလိုက်ရသဖြင့် ဟန်ထိုက်၊ ကျန်းကောချန်နှင့် လင်းကွမ်ချွန်းတို့ သုံးဦးစလုံး၏ မျက်နှာအမူအရာများ ပြောင်းလဲသွားကြသည်။

"တကယ်ကို အားကောင်းတဲ့ အရှိန်အဝါပဲ" လင်းကွမ်ချွန်းက လေကို ပြင်းပြင်းရှူသွင်းလိုက်ပြီး လင်းယွမ်ကို စူးစိုက်ကြည့်လိုက်သည်။

"ဒီလောက် ကြီးတဲ့ ဖိအားဆိုတော့ ဒီလူရဲ့ အဓိက အရည်အသွေးက ငါတို့ထက်တောင် သာလွန်နေလောက်တယ်" ကျန်းကောချန်က လေးနက်သော မျက်နှာဖြင့် ပြောလိုက်သည်။

ဟန်ထိုက်က စကားမပြောဘဲ လင်းယွမ်ထံမှ ထွက်ပေါ်လာသော ကြောက်မက်ဖွယ် ဖိအားကို ခံစားနေရကာ ရင်ထဲတွင် တုန်လှုပ်သွားသည်နှင့် တစ်ပြိုင်နက် ဤသူသည် ကြီးမားသော ရန်သူဖြစ်ကြောင်းကို သဘောပေါက်သွားလေပြီ။

သူက ပထမဆုံး အနေဖြင့် စွမ်းအင်တိုင်းမျက်မှန်ကို တပ်ဆင်လိုက်ပြီး တစ်ချိန်တည်းမှာပင် အသံတိတ် ခြေလှမ်းအနည်းငယ် ဆုတ်လိုက်သည်။

စွမ်းအင်တိုင်းမျက်မှန်ပေါ်ရှိ ကိန်းဂဏန်းများက ရူးသွပ်စွာ ခုန်တက်သွားပြီး မျက်စိတစ်မှိတ်အတွင်းမှာပင် ခုနစ်ဆယ်အထက်သို့ ရောက်ရှိသွားသည်ကို မြင်လိုက်ရသည်။

ဟန်ထိုက်က လေအေးတစ်ချက်ကို ရှူသွင်းလိုက်ပြီး လင်းယွမ်ကို မယုံကြည်နိုင်စွာဖြင့် လှမ်းကြည့်လိုက်သည်။

လင်းယွမ်က ထိုလူစုကို ဂရုမစိုက်ဘဲ ရွှံ့နွံများထဲတွင် တစ်ကိုယ်လုံး နစ်မြုပ်နေသော ကျောက်ခိုင်ကို လှည့်ကြည့်လိုက်သည်။

ကျောက်ခိုင်၏ ခေါင်းတစ်ဝက်ခန့်သာ ပေါ်နေပြီး သတိလစ်လုနီးပါး ဖြစ်နေသည်။

သို့သော် လင်းယွမ်ကို မြင်လိုက်ရသောအခါ သူက ရုတ်တရက် စိတ်အားထက်သန်သွားပြီး ရွှံ့များ ပေကျံနေသော အပြာရောင် ဆံပင်များဖြင့် လင်းယွမ်ကို မော့ကြည့်ကာ ရုတ်တရက် ပြုံးပြလိုက်သည်။

"အစ်ကို... အစ်ကိုလင်း... အစ်ကို အချိန်မီ ပြန်လာမယ်ဆိုတာ ကျွန်တော်... ကျွန်တော် သိတယ်"

လင်းယွမ်က လက်တစ်ဖက်ကို ဆန့်ထုတ်ကာ မြေပြင်ပေါ်သို့ ဖိချလိုက်သည်။

မြေဝါရောင် အလင်းတန်းများက သူ၏ လက်ထဲမှ ပျံ့နှံ့သွားသည်။

မြေပြင်က ချက်ချင်းပင် ရေစီးကြောင်းကဲ့သို့ ပျော့ပျောင်းသွားသည်။

သူက လက်လှမ်းကာ ကျောက်ခိုင်ကို မြေအောက်မှ ဆွဲထုတ်လိုက်ပြီး မြေပြင်ပေါ်တွင် ချထားပေးကာ လေးနက်သော အသံဖြင့် ပြောလိုက်သည်။ "မင်း အရမ်းကောင်းကောင်း လုပ်နိုင်ခဲ့တာပဲ... ကျန်တဲ့ ကိစ္စတွေ ငါ့တာဝန်ထားလိုက်... မင်း ကောင်းကောင်း အနားယူလိုက်ပါဦး"

ထိုအချိန်တွင် မြေအောက်မှ လူတစ်ယောက် ထွက်ပေါ်လာရာ ယင်းမှာ မာကောချိုင်ပင် ဖြစ်သည်။

မာကောချိုင်က စိတ်လှုပ်ရှားစွာဖြင့် ပြောလိုက်သည်။ "လင်းယွမ်... မင်း ပြန်ရောက်လာတာ တော်သေးတယ်... မင်းသာ ပြန်မလာရင် ငါတို့... ငါတို့ တကယ်ကို တောင့်ခံနိုင်တော့မှာ မဟုတ်ဘူး"

လင်းယွမ်က ဦးလေးမာ၏ ပခုံးကို ပုတ်ကာ ပြောလိုက်သည်။ "ပင်ပန်းသွားပြီ... ခင်ဗျား ကျောက်ခိုင်ကို ခေါ်ပြီး အရင်သွားနားလိုက်ပါဦး"

ဦးလေးမာက ကျောက်ခိုင်ကို ကမန်းကတန်း ထူမလိုက်သော်လည်း ကျောက်ခိုင်က ရုန်းကန်ကာ ပြောလိုက်သည်။ "ဟင့်အင်း... ကျွန်တော် သွားမနားဘူး... အစ်ကိုလင်း ဒီတိရစ္ဆာန်တွေကို သတ်ပစ်တာကို ကျွန်တော် ကြည့်... ကြည့်ချင်တယ်"

ဦးလေးမာက လင်းယွမ်ကို မကြည့်ဘဲ မနေနိုင်တော့ဘဲ မျက်ရည်ဝဲကာ ပြောလိုက်သည်။ "လင်းယွမ်... မင်း... ဂရုစိုက်နော်"

လင်းယွမ်က လက်ကာပြကာ သူတို့ကို နောက်ဆုတ်ရန် အချက်ပြလိုက်သည်။

သူက ဂိုဏ်းကြီးသုံးဂိုဏ်းမှ လူများဘက်သို့ လှည့်ကာ ဖြည်းညင်းစွာ ပြောလိုက်သည်။ "ထိုက်ယန်တောင်က လူတွေအကုန်လုံး နားထောင်... အားလုံး နောက်ဆုတ်ကြ"

ထိုက်ယန်တောင်မှ လူများအားလုံး ချက်ချင်း အံ့သြသွားကြပြီး လင်းယွမ်ကို လှည့်မကြည့်ဘဲ မနေနိုင်အောင် ဖြစ်သွားကြသည်။

"ဆရာလင်း... ကျွန်တော့်အစ်ကို သေသွားပြီ... ကျွန်တော် နောက်မဆုတ်နိုင်ဘူး"

"ဆရာလင်း... ကျွန်တော်တို့ သူတို့နဲ့ အသေခံ တိုက်မယ်"

"ဆရာလင်း... ကျွန်တော် တိုက်နိုင်သေးတယ်... ကျွန်တော် သတ်နိုင်သေးတယ်"

လူအများက အသံကျယ်လောင်စွာဖြင့် အော်ဟစ်လိုက်ကြပြီး သူတို့၏ မျက်နှာများတွင် စိုးရိမ်ပူပန်မှုများ ပြည့်နှက်နေကာ လင်းယွမ်က အရှုံးပေးတော့မည်ဟု ထင်မှတ်သွားကြသည်။

တစ်ဖက်တွင် ဂိုဏ်းကြီးသုံးဂိုဏ်းမှ လူများမှာမူ ချက်ချင်းပင် ဝမ်းသာအားရ ဖြစ်သွားကြသည်။

"ဟားဟားဟား... ခွေးကောင်လေး... မင်းက အခြေအနေကို နားလည်သားပဲ"

"ဒီကောင်လေးက အကဲခတ်တတ်သားပဲ... ငါတို့ ဂိုဏ်းကြီးသုံးဂိုဏ်းရဲ့ အစွမ်းကို သိလို့ သူ့ဘာသာ နောက်ဆုတ်သွားတာပဲ"

"ကောင်လေး... မင်းရဲ့ ဒီအသိအမြင်လေးကြောင့် ငါတို့ ဂိုဏ်းကြီးသုံးဂိုဏ်းက မင်းကို အသက်ချမ်းသာပေးလို့ ရတယ်"

"ဟားဟားဟား"

ဂိုဏ်းကြီးသုံးဂိုဏ်းမှ လူများက ရယ်မောလိုက်ကြသည်။ ယခုလေးတင် လင်းယွမ်၏ ထွက်ပေါ်လာပုံက အလွန် ဟိုးလေးတကျော် ဖြစ်လွန်းသဖြင့် သူတို့ကို တကယ်ပင် လန့်သွားစေခဲ့သည်။

သို့သော် လင်းယွမ်၏ စကားကို ကြားလိုက်ရသောအခါ သူတို့အားလုံးက လင်းယွမ် အရှုံးပေးလိုက်ပြီဟု ထင်မှတ်သွားကြပြီး ချက်ချင်း ဝမ်းသာသွားကာ အချို့က လှောင်ပြောင်သရော်လိုက်ကြသေးသည်။

လင်းယွမ်က မျက်နှာသေဖြင့် ဂိုဏ်းကြီးသုံးဂိုဏ်းဘက်သို့ တစ်လှမ်းချင်း လျှောက်သွားကာ အေးစက်စက် ပြောလိုက်သည်။ "ထိုက်ယန်တောင်က လူတွေ အကုန် နောက်ဆုတ်"

ထိုက်ယန်တောင်မှ လူများက ထိုစကားကို ကြားပြီး လင်းယွမ်၏ မျက်နှာအမူအရာကို ထပ်မံ ကြည့်ရှုလိုက်သောအခါ ချက်ချင်း သဘောပေါက်သွားကြသည်။

ဆရာလင်းက နောက်ဆုတ်ရန် မဟုတ်ဘဲ တိုက်ခိုက်တော့မည် ဖြစ်သည်။

မာကောချိုင်ကလည်း မနေနိုင်တော့ဘဲ အော်ပြောလိုက်သည်။ "အားလုံး နောက်ဆုတ်ကြ... ဆရာလင်း တိုက်ခိုက်ရင် မင်းတို့ကိုပါ ထိခိုက်မိလိမ့်မယ်... အားလုံး နောက်ဆုတ်လိုက်ကြ"

ထိုက်ယန်တောင်မှ လူများစွာက ထိုအခါမှသာ သဘောပေါက်သွားကြပြီး ကုဖုန်း၊ ရန်ဆန်းမင်၊ ဝူယင်တို့ကလည်း အလျင်အမြန် အော်ဟစ်လိုက်ကြသည်။

"နောက်ဆုတ်... အကုန် နောက်ဆုတ်ကြ... ဆရာလင်း တိုက်ခိုက်တော့မယ်"

"မြန်မြန်ဖယ်ပေးလိုက်ကြ... ဆရာလင်းအတွက် နေရာဖယ်ပေးလိုက်"

လူအများက ဒီရေကဲ့သို့ တဖွဲဖွဲ နောက်ဆုတ်သွားကြသည်။

ရှေ့တွင် အံ့အားသင့်နေသော ဂိုဏ်းကြီးသုံးဂိုဏ်းမှ လူများသာ ကျန်ရစ်ခဲ့တော့သည်။

ကျန်းကောချန်က လင်းယွမ်ကို ကြည့်ကာ လေးနက်သော အသံဖြင့် မေးလိုက်သည်။ "မင်းကလည်း ထိုက်ယန်တောင်ရဲ့ ခေါင်းဆောင်ပဲလား"

လင်းယွမ်က ဂရုမစိုက်ဘဲ ဂိုဏ်းကြီးသုံးဂိုဏ်းမှ အစွမ်းပိုင်ရှင်များကိုသာ စူးစိုက်ကြည့်နေသည်။

ယင်းတို့အထဲတွင် အများစုမှာ မျိုးရိုးဗီဇမျိုးစေ့အဆင့် အစွမ်းပိုင်ရှင်များ ဖြစ်ကြသည်။

အချို့သော သူများ၏ အဓိက အရည်အသွေးများက ၅၅ မှတ် အထက်သို့ပင် ရောက်ရှိနေကြပြီ ဖြစ်သည်။

လူနည်းစုမှာ ၆၀ မှတ် နားသို့ပင် ကပ်နေကြလေပြီ။

လင်းယွမ်၏ ရင်ထဲတွင် ဒေါသများ ပွက်ပွက်ဆူနေပြီး သူက အေးစက်သော အသံဖြင့် ပြောလိုက်သည်။ "မင်းတို့အားလုံး... ဒီနေ့ သေရမယ်"

"ဝုန်း"

သူ၏ ခြေအောက်မှ ပေါက်ကွဲသံ တစ်ချက်က ချက်ချင်း ထွက်ပေါ်လာသည်။

နောက်တစ်စက္ကန့်တွင် လင်းယွမ်၏ ပုံရိပ်က ပျောက်ကွယ်သွားလေပြီ။

ထိုနေရာတွင် ရှိနေသူ အားလုံးက သူ၏ ပုံရိပ်ကိုပင် မမြင်လိုက်ရချေ။

သူ၏ အလျင်က အလွန် မြန်ဆန်လွန်းလှပြီး လူသားတို့၏ အမြင်အာရုံ ကန့်သတ်ချက်ကိုပင် ကျော်လွန်နေပြီ ဖြစ်သည်။

ထို့ကြောင့် သူတို့၏ မြင်လွှာများပေါ်တွင် လင်းယွမ်၏ ပုံရိပ်ကို လုံးဝ ဖမ်းမမိနိုင်တော့ပေ။

အဘယ်ကြောင့်ဆိုသော် လင်းယွမ်က တစ်ခဏအတွင်းမှာပင် သူတို့၏ အမြင်အာရုံ အကွာအဝေးကို ကျော်ဖြတ်သွားပြီး သူတို့၏ မြင်လွှာများမှ ပျောက်ကွယ်သွားသောကြောင့်ပင် ဖြစ်သည်။

"ဝုန်း"

ရေနတ်ဘုရားဂိုဏ်းမှ အစွမ်းပိုင်ရှင် တစ်ယောက်က တုံ့ပြန်ရန် အချိန်ပင် မရလိုက်ဘဲ သူ၏ ရှေ့တွင် ကြောက်မက်ဖွယ်ကောင်းသော လေပေါက်ကွဲသံကြီး တစ်ခု ထွက်ပေါ်လာသည်။

နောက်တစ်စက္ကန့်တွင် ဧရာမ ရိုက်ခတ်မှု လှိုင်းလုံးကြီး တစ်ခုက ဝင်ရောက်လာသည်။

ကြောက်မက်ဖွယ်ကောင်းသော လေဖိအားက သူ၏ မျက်နှာ ကြွက်သားများကို တဆတ်ဆတ် တုန်ခါသွားစေပြီး ပုံပျက်သွားစေသည်။

မျက်စိတစ်မှိတ်အတွင်းမှာပင် ကြီးမားသော ရိုက်ခတ်မှု အင်အားကြီးက ဝင်ရောက်လာခဲ့သည်။

"ဝှီး"

အင်အားများ မရောက်လာသေးမီ ယိုစိမ့်ထွက်လာသော ကြောက်မက်ဖွယ် ရိုက်ခတ်မှု အင်အားကပင် သူ၏ အရေပြားနှင့် အသားများကို ဆွဲဆုတ်လိုက်လေပြီ။

"အား"

ရက်စက်ကြမ်းကြုတ်သော ရိုက်ခတ်မှု အင်အားအောက်တွင် သွေးများက သူ၏ အနောက်ဘက်သို့ ပန်းထွက်သွားပြီး သွေးကြောများက ဤအင်အား၏ ဖိနှိပ်မှုကြောင့် ပေါက်ကွဲထွက်သွားတော့သည်။

"ဖုတ်"

ကြောက်မက်ဖွယ် ရိုက်ခတ်မှု အင်အားက မျက်နှာကို တိုက်ရိုက် ထိမှန်သွားရာ သူ၏ စူးရှသော အော်ဟစ်သံက လုံးဝ ထွက်မလာနိုင်တော့ဘဲ ခန္ဓာကိုယ်ထဲရှိ သန္ဓေပြောင်းစွမ်းအင်များကိုပင် အသုံးပြုရန် အချိန်မရလိုက်ချေ။

တုံးတိသော ပေါက်ကွဲသံ တစ်ချက် ထွက်ပေါ်လာသည်။

ထိုသူ၏ ခန္ဓာကိုယ်က ဖရဲသီးတစ်လုံးကဲ့သို့ ရုတ်တရက် ပေါက်ကွဲထွက်သွားသည်။

သွေးရောင် အသားစများက အရပ်မျက်နှာ အနှံ့အပြားသို့ ပန်းထွက်သွားတော့သည်။

ဂိုဏ်းကြီးသုံးဂိုဏ်းမှ အစွမ်းပိုင်ရှင်များ အားလုံး ချက်ချင်းပင် အလွန်တရာ အံ့အားသင့်ကာ ထိတ်လန့်သွားကြသည်။

"သတိထားကြ"

"သူ့ကို တားထားကြ"

"အတူပေါင်း တိုက်ကြ"

ထိုသူများက အသံကျယ်လောင်စွာ အော်ဟစ်လိုက်ကြပြီး တစ်ချိန်တည်းလိုလိုပင် အတူတကွ တိုက်ခိုက်လိုက်ကြသည်။

ရေဓာတ်၊ မြေဓာတ်၊ စိတ်စွမ်းအင် အရည်အသွေး၊ ခွန်အား အရည်အသွေး၊ အလျင် အရည်အသွေး...

အမျိုးအစားစုံလင်သော အစွမ်းပိုင်ရှင်များက အလျင်အမြန် အတူတကွ တိုက်ခိုက်လိုက်ကြသည်။

အချို့က ပထမဆုံး အနေဖြင့် အကာအကွယ် သင်္ကေတ ကျောက်တုံးများကို ဖွင့်လှစ်လိုက်ကြသည်။

သို့သော် သူတို့၏ မျက်နှာအမူအရာများတွင် ထိတ်လန့်ကြောက်ရွံ့မှုများဖြင့် ပြည့်နှက်နေပေသည်။

မမြင်ရဘူး...

လုံးဝကို မမြင်ရဘူး...

သူတို့က ရန်သူ၏ ပုံရိပ်ကို လုံးဝ ရှာမတွေ့နိုင်ကြပေ။

လူအုပ်ကြီးထဲတွင် လေတိုးသံများနှင့်အတူ ကြောက်မက်ဖွယ်ကောင်းသော အော်ဟစ်သံများက အဆက်မပြတ် ထွက်ပေါ်လာနေသည်။

ထို့ပြင် လူများကို ရင်တုန်သွားစေသော ခန္ဓာကိုယ် ပေါက်ကွဲသံများလည်း ပါဝင်နေသည်။

"အား"

"ကယ်ကြပါဦး"

"မလုပ်... မလုပ်နဲ့"

"မြန်မြန် ပြေးကြ... ဒါက လူမဟုတ်ဘူး"

"သူ ငါ့ဆီမှာ... အား"

ဂိုဏ်းကြီးသုံးဂိုဏ်းမှ လူရာပေါင်းများစွာက မိနစ်အနည်းငယ်အတွင်းမှာပင် အဆက်မပြတ် အော်ဟစ်ညည်းညူနေကြသည်။

သူတို့က ခေါင်းမပါသော ယင်ကောင်များကဲ့သို့ ကမန်းကတန်း ထွက်ပြေးကြတော့သည်။

အချို့က ရေဘောလုံးအဖြစ်သို့ ပြောင်းလဲသွားကာ မြေပြင်ပေါ်ရှိ ရေအိုင်များထဲသို့ အလျင်အမြန် ဝင်ရောက်သွားကြသည်။

အချို့က မြေဓာတ် အစွမ်းများကို တိုက်ရိုက် အသုံးပြုကာ မြေအောက်သို့ ပုန်းလျှိုးသွားကြသည်။

အလျင် အရည်အသွေး အစွမ်းပိုင်ရှင်များကလည်း ချက်ချင်းပင် အစွမ်းများကို အသုံးပြုကာ ဤနေရာမှ ထွက်ခွာရန် အလျင်အမြန် ပြေးလွှားကြတော့သည်။

ဟန်ထိုက်က ဤမြင်ကွင်းကို ကြည့်ကာ နှုတ်ခမ်းထောင့်များ တွန့်လိမ်သွားပြီး ချက်ချင်း အော်ဟစ်လိုက်သည်။ "ရေနတ်ဘုရားဂိုဏ်းက လူတွေ နားထောင်ကြ... ရေဘောလုံး အစီအရင်ကြီးကို ဖန်တီးကြ"

တစ်ခဏချင်းမှာပင် ရေနတ်ဘုရားဂိုဏ်းမှ တပည့်များ အားလုံးက ဟန်ထိုက်အနီးသို့ အလျင်အမြန် ချဉ်းကပ်သွားကြသည်။

တစ်ချိန်တည်းမှာပင် သူတို့က ရေစီးကြောင်း အမြောက်အမြားကို ဖန်တီးလိုက်ရာ လေတိုးသံများနှင့်အတူ ဧရာမ ရေကန့်လန့်ကာ အကာအကွယ်များကို ဖြစ်ပေါ်လာစေသည်။

ပတ်ပတ်လည်တွင် ဧရာမ ရေဘောလုံးကမ္ဘာကြီး တစ်ခုကို ဖြစ်ပေါ်လာစေသည်။

ဟန်ထိုက် အပါအဝင် ထိုလူများက ရေဘောလုံးကြီးထဲသို့ ပုန်းအောင်းသွားကြသည်။

ရေဘောလုံးကြီးက ပေရာဂဏန်းခန့် မြင့်မားပြီး အလျားနှင့် အနံမှာလည်း ပေရာဂဏန်းခန့် ရှိကာ အားလုံးက ရေစီးကြောင်းများဖြင့် စုစည်းဖွဲ့တည်ထားခြင်း ဖြစ်သည်။

လင်းယွမ်က သူတို့အနီးသို့ ချဉ်းကပ်လိုပါက ဤရေဘောလုံးကြီးကို ဖောက်ထွင်းကာ သူတို့ ဖန်တီးထားသော ရေအောက် ပတ်ဝန်းကျင်ထဲသို့ ဝင်ရောက်တိုက်ခိုက်ရမည် ဖြစ်သည်။

သို့သော် သူတို့က လင်းယွမ်၏ တိုက်ခိုက်ရေး ပါရမီကို ထင်ရှားစွာ လျှော့တွက်ထားကြပေသည်။

သူက ရေဘောလုံးကြီး အနီးသို့ မချဉ်းကပ်ဘဲ လက်နှစ်ဖက်ဖြင့် ထိုရေဘောလုံးကြီးရှိရာ အရပ်ဆီသို့ ရုတ်တရက် ရိုက်ချလိုက်သည်။

ဝုန်းခနဲ အသံနှင့်အတူ ကြောက်မက်ဖွယ်ကောင်းသော အအေးဓာတ်များက ဤဧရာမ ရေဘောလုံးကြီးထဲသို့ ချက်ချင်း စီးဆင်းသွားသည်။

မျက်စိတစ်မှိတ်အတွင်းမှာပင် ဤရေဘောလုံးကြီးက ရေခဲတုံးများအဖြစ်သို့ အလျင်အမြန် စုစည်းသွားပြီး ဆယ်စက္ကန့်မျှသာ ကြာသောအခါ မျက်စိရှေ့ရှိ ဧရာမ ရေဘောလုံးကြီးက လေးထောင့်စပ်စပ် ရေခဲသေတ္တာကြီး တစ်လုံးအဖြစ်သို့ ချက်ချင်း ပြောင်းလဲသွားတော့သည်။

ဤရေခဲသေတ္တာကြီး၏ အတွင်းပိုင်းတွင် ဟန်ထိုက်နှင့် အစွမ်းပိုင်ရှင် တစ်စု၏ မျက်နှာအမူအရာများ ကြီးစွာ ပြောင်းလဲသွားကြသည်။

ကံကောင်းထောက်မစွာဖြင့် သူတို့၏ ရေဘောလုံးကြီး အတွင်းပိုင်းတွင် သူတို့ ရပ်တည်ရန်အတွက် အခေါင်းပေါက် နေရာလွတ် ကြီးတစ်ခု ရှိနေသေးသည်။

သို့သော် ဤသို့ဖြစ်သွားသောအခါ သူတို့ ကိုယ်တိုင် ဒုက္ခရှာမိသကဲ့သို့ ဖြစ်သွားပြီး ယခုအခါ ရေခဲတုံးကြီးထဲတွင် ပိတ်လှောင်ခံလိုက်ရပြီ ဖြစ်သည်။

လင်းယွမ်က ရေဘောလုံးကြီးကို ရေခဲအဖြစ် ပိတ်လှောင်လိုက်ချိန်တွင် အခြားတစ်ဖက်ရှိ ဝိညာဉ်စွမ်းအင်ဂိုဏ်းမှ အစွမ်းပိုင်ရှင် ဆယ်ဂဏန်းခန့်က နောက်ဆုံးတွင် အခွင့်အရေးကို ဆုပ်ကိုင်ကာ လင်းယွမ်၏ ပုံရိပ်ကို မြင်လိုက်ရသည်။

သူတို့က တစ်ချိန်တည်းလိုလိုပင် အတူတကွ တိုက်ခိုက်လိုက်ကြသည်။

မီးလုံးများ၊ လေဓားသွားများနှင့် ရေကျည်ဆန်များက လင်းယွမ်ဆီသို့ ရူးသွပ်စွာ ကျဆင်းလာတော့သည်။

ခွန်အား အမျိုးအစား အစွမ်းပိုင်ရှင်များကလည်း ဧရာမ ကျောက်တုံးကြီးများကို တိုက်ရိုက် မတင်ကာ လင်းယွမ်ဆီသို့ ပြင်းထန်စွာ ပစ်ပေါက်လိုက်ကြသည်။

မြေမိခင်ဂိုဏ်းဘက်ကလည်း တစ်ချိန်တည်းမှာပင် တိုက်ခိုက်လိုက်သည်။

မြေလျှိုးအစွမ်းကို ကျွမ်းကျင်သော မြေမိခင်ဂိုဏ်းမှ အစွမ်းပိုင်ရှင် ခုနစ်ယောက် ရှစ်ယောက်ခန့်က ချက်ချင်းပင် လက်နှစ်ဖက်ဖြင့် မြေပြင်ကို ဖိချလိုက်ကြသည်။

မြေပြင် တစ်ခုလုံးက ရွှံ့နွံတောအဖြစ်သို့ တိုက်ရိုက် ပြောင်းလဲသွားပြီး ရွှံ့များထဲမှ မြေနဂါး အမြောက်အမြားက ကောင်းကင်သို့ ထိုးတက်လာကာ လင်းယွမ်ဆီသို့ ရုတ်တရက် ဖမ်းဆုပ်လိုက်ကြသည်။

လင်းယွမ်၏ ပုံရိပ်က တုံ့ဆိုင်းသွားပြီး ရုတ်တရက် လှည့်ကာ ဤကြောက်မက်ဖွယ်ကောင်းသော တိုက်ခိုက်မှုများကို ကြည့်ရင်း ရက်စက်စွာ ရယ်မောလိုက်မိသည်။

"အလကားကောင်တွေ... သေလိုက်ကြစမ်း"

သူ၏ မျက်လုံးနှစ်လုံးထဲမှ အစစ်အမှန်ကဲ့သို့ ကြောက်မက်ဖွယ်ကောင်းသော စိတ်စွမ်းအင် အင်အားများ ပေါက်ကွဲထွက်လာသည်။

ဧရာမ စိတ်စွမ်းအင် ရိုက်ခတ်မှု လှိုင်းလုံးကြီး တစ်ခုက သူ့ကို ဗဟိုပြုကာ အရပ်မျက်နှာ အနှံ့အပြားသို့ ရုတ်တရက် ရိုက်ခတ်သွားတော့သည်။

"စိတ်ဝိညာဉ်ရိုက်ခတ်အစွမ်း"

သူ၏ ၈၃.၅ အထိ မြင့်မားသော ကြောက်မက်ဖွယ်ကောင်းသည့် စိတ်စွမ်းအင်ဖြင့် လွှမ်းခြုံနိုင်သော အကွာအဝေးမှာ ပေ ၁၂၆၀ အထိ ရောက်ရှိကာ အလွန် ကျယ်ပြန့်သော တိုက်ခိုက်မှုကြီးပင် ဖြစ်သည်။

ဤအချိန်တွင် ပတ်ဝန်းကျင် ပေ ၁၃၀၀ ခန့်အတွင်းရှိ သက်ရှိများ အားလုံးက စိတ်စွမ်းအင် ရိုက်ခတ်မှု၏ တိုက်ခိုက်ခြင်းကို ခွဲခြားမှုမရှိဘဲ ခံလိုက်ရလေပြီ။

မျက်စိတစ်မှိတ်အတွင်းမှာပင် သက်ရှိ အားလုံး၏ ဦးခေါင်းများက အသံကျယ်လောင်စွာဖြင့် ပေါက်ကွဲထွက်သွားကြတော့သည်။

လင်းယွမ်၏ အားကောင်းသော စိတ်စွမ်းအင် အင်အားများက သူတို့၏ စိတ်ပင်လယ်ကို တိုက်ရိုက် ဖျက်ဆီးပစ်လိုက်ပြီး အားနည်းသော ဦးနှောက်များက ချက်ချင်းပင် ပေါက်ကွဲထွက်သွားတော့သည်။

ထိုအစွမ်းပိုင်ရှင်များက အားပျော့ကာ မြေပြင်ပေါ်သို့ လဲကျသွားကြသည်။

သို့သော် မြေအောက်ထဲရှိ မြေလျှိုးသူများကမူ ကံကောင်းထောက်မစွာဖြင့် ဘေးအန္တရာယ်မှ လွတ်မြောက်သွားကြသည်။

ဤစိတ်စွမ်းအင် ရိုက်ခတ်မှုက မြေအောက်ထဲတွင် ပုန်းအောင်းနေသော ထိုကောင်များကို မလွှမ်းမိုးနိုင်ခဲ့ချေ။

သို့သော် ဟိန်းဟောက်နေသော ထိုမြေနဂါး ဆယ်ကောင်ကျော်ကိုမူ စိတ်စွမ်းအင် ရိုက်ခတ်မှုက တိုက်ရိုက် တုန်ခါကာ ပြိုကွဲသွားစေခဲ့သည်။

ရွှံ့နွံများ အဖြစ်သို့ ပြောင်းလဲသွားကာ မြေပြင်ပေါ်သို့ ပြုတ်ကျသွားတော့သည်။

လင်းယွမ်၏ ပုံရိပ်က အောက်သို့ ကျဆင်းသွားပြီး မြေအောက် ရွှံ့နွံတောကို လှမ်းကြည့်လိုက်သည်။

သူ၏ မျက်လုံးထဲတွင် ရက်စက်သော အပြုံးများက ထပ်မံ ထွက်ပေါ်လာပြန်သည်။

လက်တစ်ဖက်ကို ဆန့်ထုတ်လိုက်ရာ ဂျစ်ဂျစ် အသံနှင့်အတူ သူ၏ အနောက်ဘက်ရှိ ရေခဲစိုင်များက ဧရာမ ကြယ်ရေခဲ သံကြိုးကြီး တစ်ချောင်းအဖြစ်သို့ တိုက်ရိုက် စုစည်းသွားတော့သည်။

သံကြိုးကြီးက လေထဲတွင် နဂါးတစ်ကောင်ကဲ့သို့ တွန့်လိမ်နေသည်။

"ဟားဟားဟား... ထွက်လာခဲ့စမ်း"

လင်းယွမ်က မြေပြင်ကို ရုတ်တရက် ညွှန်ပြလိုက်ရာ ဂျစ်ဂျစ် အသံများ ထွက်ပေါ်လာသည်။

ကြယ်ရေခဲ သံကြိုးကြီးက လွန်သွားတစ်ခုကဲ့သို့ မြေကြီးထဲသို့ ရူးသွပ်စွာ တိုးဝင်သွားတော့သည်။

နောက်တစ်စက္ကန့်တွင် ကြယ်ရေခဲ သံကြိုးကြီးက မြေအောက်ထဲတွင် ရူးသွပ်စွာ သွားလာနေပြီး မြေပြင်က တုန်ခါကာ အသံများ ထွက်ပေါ်လာပြီး မြေပြင်က အဆက်မပြတ် ဖောင်းကြွလာတော့သည်။

ဆယ်စက္ကန့် အကြာတွင်။

လင်းယွမ်က လက်ကို ရုတ်တရက် လှုပ်ရှားလိုက်ရာ ကြယ်ရေခဲ သံကြိုးကြီးက ဝုန်းခနဲ အသံနှင့်အတူ မြေအောက်မှ ထိုးဖောက်ထွက်လာသည်။

သံကြိုးပေါ်တွင် အလောင်း ခုနစ်လောင်း ရှစ်လောင်းခန့် ဖောက်ဝင်နေသည်ကို မြင်တွေ့လိုက်ရပြီး လူနှစ်ယောက်ကပင် မသေသေးဘဲ ကြယ်ရေခဲ သံကြိုးပေါ်တွင် တွဲလောင်းကျကာ ရူးသွပ်စွာ ရုန်းကန် အော်ဟစ်နေကြသည်။

လင်းယွမ်က သံကြိုးကို လွှဲရမ်းလိုက်ရာ ကြီးမားသော အရှိန်ကြောင့် အလောင်း အချို့က ကြယ်ရေခဲ သံကြိုး၏ ချွန်ထက်သော ထိပ်ပိုင်းသို့ ပွတ်တိုက်ကာ ပြုတ်ကျသွားတော့သည်။

လင်းယွမ်က ရေနတ်ဘုရားဂိုဏ်း ရှိနေသော ရေခဲတုံးကြီးဆီသို့ ရုတ်တရက် ရိုက်ချလိုက်သည်နှင့် တစ်ပြိုင်နက်တည်းပင်။

ကျယ်လောင်သော ပေါက်ကွဲသံကြီး တစ်ချက်ကို ကြားလိုက်ရသည်။

"ဝုန်း"

ရေခဲတုံးကြီးက တစ်စစီ ပေါက်ကွဲထွက်သွားပြီး ကြယ်ရေခဲ သံကြိုးပေါ်ရှိ ထိုအလောင်းများကလည်း သွေးမြူခိုးများ အဖြစ်သို့ ပေါက်ကွဲသွားကြတော့သည်။

လင်းယွမ်၏ အကြည့်များက မီးတောက်များကဲ့သို့ စူးရှနေပြီး မျက်လုံးများထဲတွင် မီးတောက်များ ခုန်ပေါက်နေသည်။

"သေကြစမ်း"

လက်ထဲရှိ ကြယ်ရေခဲ သံကြိုးကြီးက ရုတ်တရက် ပေါက်ကွဲထွက်သွားပြီး မီးနဂါးတစ်ကောင်က သူ၏ လက်ထဲမှ တိုက်ရိုက် ပန်းထွက်လာသည်။

မီးနဂါးက ရေခဲတုံးကြီး၏ အက်ကွဲကြောင်းများအတိုင်း အတွင်းပိုင်း နေရာလွတ်ထဲသို့ ရူးသွပ်စွာ ဝင်ရောက်သွားတော့သည်။

ဟန်ထိုက်က ဤမြင်ကွင်းကို မျက်မြင်ကိုယ်တွေ့ မြင်လိုက်ရသောအခါ အိုမင်းနေသော မျက်နှာပေါ်တွင် ပထမဆုံးအကြိမ်အဖြစ် ထိတ်လန့်ကြောက်ရွံ့မှုများ ထွက်ပေါ်လာသည်။

သူက မြေဝါရောင် သင်္ကေတ ကျောက်တုံး တစ်တုံးကို ကျစ်ကျစ်ပါအောင် ဆုပ်ကိုင်လိုက်သည်။

နောက်တစ်စက္ကန့်တွင် သူ၏ တစ်ကိုယ်လုံး၌ မြေဝါရောင် အလင်းတန်းများ တိုက်ရိုက် လင်းလက်သွားပြီး တစ်ကိုယ်လုံးက မြေအောက်သို့ အလျင်အမြန် ပုန်းလျှိုးသွားတော့သည်။

သို့သော် အခြားသော ရေနတ်ဘုရားဂိုဏ်းမှ အဖွဲ့ဝင်များကမူ တုံ့ပြန်ရန် အချိန်မရလိုက်ဘဲ တစ်ခဏချင်းမှာပင် မီးနဂါး၏ ဝါးမျိုခြင်းကို ခံလိုက်ရလေပြီ။

မျက်စိတစ်မှိတ်အတွင်းမှာပင် ညည်းညူ အော်ဟစ်သံများက အဆက်မပြတ် ထွက်ပေါ်လာနေသည်။

အချို့က ပွဲချင်းပြီး မီးလောင်ကျွမ်းခံလိုက်ရသည်။

အချို့ကလည်း ရေမြူခိုးများ အဖြစ်သို့ အလျင်အမြန် ပြောင်းလဲသွားကာ ဤနေရာမှ ထွက်ပြေးရန် ကြိုးစားကြသော်လည်း ချက်ချင်းပင် ကြောက်မက်ဖွယ် မီးတောက်များ၏ လောင်ကျွမ်းခြင်းကို ခံရကာ အငွေ့ပျံသွားကြတော့သည်။

မီးနဂါးအက... ဤအရာက သာမန်ထက် ပိုမို သာမန်ဆန်လွန်းသော အဖြူရောင် အဆင့် ပညာရပ် တစ်ခုသာ ဖြစ်သည်။

ယခုအချိန်တွင် လင်းယွမ်၏ ကြောက်မက်ဖွယ်ကောင်းသော စိတ်စွမ်းအင် အရည်အသွေးအောက်၌ ပြိုင်ဘက်ကင်းလုနီးပါး ဖြစ်သော စွမ်းအားများကို ပြသလာခဲ့ပြီ ဖြစ်သည်။

ရေနတ်ဘုရားဂိုဏ်းမှ ရေဓာတ် အစွမ်းပိုင်ရှင်များမှာ စိတ်စွမ်းအင် ၇၅ မှတ် အထက် မရောက်ရှိပါက အားလုံးလိုလို တိုက်ရိုက် မီးလောင်ပြာကျသွားကြလေပြီ။

ဓာတ်အဖြစ် ပြောင်းလဲထားသော ခန္ဓာကိုယ်များပင်လျှင် မလွတ်မြောက်နိုင်ဘဲ ချက်ချင်းပင် အငွေ့ပျံသွားကြတော့သည်။

ယင်းမှာ သူတို့၏ အဓိက အရည်အသွေးနှင့် လင်းယွမ်၏ ကြားရှိ ကွာဟချက်က အလွန် ကြီးမားလွန်းသောကြောင့်ပင် ဖြစ်သည်။

ဒါက အကြွင်းမဲ့ ဖိနှိပ်မှုကြီးပင် ဖြစ်သည်။

"သွား... မြန်မြန်သွား"

"တောက်... ထိုက်ယန်တောင်ရဲ့ ခေါင်းဆောင်က ဘာလို့ ဒီလောက်တောင် ကြောက်ဖို့ကောင်းနေရတာလဲ"

"ရေလွှမ်းမိုးခံရတော့မယ့် ရပ်ကွက်သစ်လေး တစ်ခုမှာ ဘယ်လိုလုပ်ပြီး အဓိက အရည်အသွေး ၉၀ မှတ် အထက် ကျော်လွန်နေတဲ့ အရူးကောင်မျိုး ပေါ်လာရတာလဲ"

"သောက်ကျိုးနည်း... သတင်းကမှားနေတာပဲ... မြန်မြန် ထွက်ပြေးကြ... မြန်မြန်"

မီးဝါးတောထဲတွင် ပုံရိပ် ဆယ်ဂဏန်းခန့်က ရူးသွပ်စွာ ထွက်ပြေးနေကြသည်။

ကျန်းကောချန်၊ ဟန်ထိုက်နှင့် လင်းကွမ်ချွန်းတို့က ဦးဆောင်ကာ အနောက်ဘက်တွင် ကျန်ရစ်နေသော တပည့်များကို ခေါ်ဆောင်ပြီး ရေလွှမ်းမိုးနေသော နေရာဆီသို့ အလျင်အမြန် ထွက်ပြေးသွားကြတော့သည်။

သူတို့၏ မျက်လုံးများထဲတွင် ထိတ်လန့်မှုများဖြင့် ပြည့်နှက်နေပြီး ဖြူရော်နေသော မျက်နှာများပေါ်တွင် ကြောက်ရွံ့မှုများဖြင့် ပြည့်နှက်နေပေသည်။

ဤတစ်ကြိမ် ထိုက်ယန်တောင် ခရီးစဉ်က အကျိုးအမြတ် ခွဲဝေယူရုံသက်သက် ရိုးရှင်းသော လှုပ်ရှားမှု တစ်ခုဟုသာ သူတို့က ထင်မှတ်ထားခဲ့ကြသည်။

သို့သော် မည်သူကမျှ ဤမျှလောက် ကြောက်မက်ဖွယ်ကောင်းသော ဘီလူးကြီး တစ်ကောင်ကို ဆွပေးမိလိမ့်မည်ဟု ထင်မှတ်မထားခဲ့ကြပေ။

ဆက်ရန်...