ထူးဆန်းလွန်းသော ကျူးကျော်သူ (၁)

ဟင်းလင်းပြင်ကိုပင် ဆုတ်ဖြဲပစ်နိုင်မည့် အရှိန်အဟုန်များ ပါဝင်သော သူ၏ ငွေပြာမိုးကြိုးလက်သည်းများက ဧရာမပုတ်သင်ညို၏ လည်ချောင်းဆီသို့ တိုက်ရိုက် တိုး၀င်သွားသည်။

“ပြီးသွားပြီ”

လျှပ်စီးနှင့် ရေခဲများရောယှက်နေသော လက်သည်းများက လေထုကို ခွဲထွက်သွားပြီး ဧရာမချော်ရည်ပုတ်သင်ညို၏ လည်ချောင်းတွင် အရိုးပေါ်သည်အထိ နက်ရှိုင်းသော ဒဏ်ရာတစ်ခုကို ချန်ရစ်ထားခဲ့သည်။

အနီရင့်ရောင် သွေးများက ရေတံခွန်ပမာ ပန်းထွက်လာပြီး လေနှင့် ထိတွေ့မိသည်နှင့် လောင်ကျွမ်းသွားကာ ဂူတစ်ခုလုံးကို သွေးနီရောင်အဖြစ် ဆေးခြယ်လိုက်တော့သည်။

“ဂါးးး“

ဧရာမချော်ရည်ပုတ်သင်ညိုက သေခါနီး အော်ဟစ်သံတစ်ခု ပေးလိုက်ပြီး သူ၏ ဧရာမခန္ဓာကိုယ်ကြီးက ပြင်းထန်စွာ ရုန်းကန်နေရာ ဂူတစ်ခုလုံး ပြိုကျတော့မည့်အလား တုန်ခါနေသည်။

သို့သော် လည်ချောင်းဒဏ်ရာထဲတွင် ငွေပြာမိုးကြိုးစွမ်းအားများက သူ၏ အသက်စွမ်းအင်ကို အဆက်မပြတ်ဖျက်ဆီးနေပြီး ရေခဲများက သွေးကြောများတစ်လျှောက် လျင်မြန်စွာပြန့်နှံ့နေသည်။

“အဆုံးသတ်လိုက်တော့” လင်းထျန်းလုံက တည်ငြိမ်စွာ အမိန့်ပေးလိုက်သည်။

ရန့်မြဲ့၏ ရေခဲမီးတောက်၊ ထျန်းပင်း၏ ပြင်းထန်သော တိုက်ကွက်နှင့် ယင်းဖုန်း၏ လုပ်ကြံမှုတို့က ဧရာမပုတ်သင်ညို၏ အရေးကြီးသော နေရာများပေါ်သို့ ကျရောက်သွားသည်။

စစ်သူကြီးသုံးဦး၏ သေစေနိုင်သော တိုက်ကွက်များက ကုလားအုတ်ကျောကို ကျိုးသွားစေသော နောက်ဆုံးကောက်ရိုးလေးပမာ ဖြစ်သွားကာ ဧရာမချော်ရည်ပုတ်သင်ညို၏ ရုန်းကန်မှုများ တဖြည်းဖြည်း အားနည်းလာပြီး နောက်ဆုံးတွင် ချော်ရည်အိုင်ထဲသို့ ဘုန်းခနဲ ပြုတ်ကျသွားကာ မီးလျှံမိုးများ ပန်းထွက်သွားသည်။

ဧရာမချော်ရည်ပုတ်သင်ညို၏ ဧရာမခန္ဓာကိုယ်ကြီး ချော်ရည်ထဲသို့ နစ်မြုပ်သွားစဉ် သန့်စင်သော စွမ်းအင်စီးကြောင်းများက တိုက်ခိုက်သူများ၏ ခန္ဓာကိုယ်များထဲသို့ ရေစီးကြောင်းပမာ စီးဝင်လာသည်။

[စနစ်အသိပေးချက်]။ ။အဆင့် ၄၀ ဒုတိယ ဘုရင်အဆင့် မိစ္ဆာသားရဲ · ချော်ရည်ဧရာမပုတ်သင်ညိုကို အောင်မြင်စွာ သတ်ဖြတ်နိုင်ခဲ့ပြီး အတွေ့အကြုံရမှတ်များစွာ ရရှိပါသည်။

[စနစ်အသိပေးချက်]။ ။အဆင့် ၃၂ (ပထမ ဘုရင်အဆင့်) သို့ တက်လှမ်းသွားပါသည်။ စွမ်းရည်အချက်အလက်အားလုံး သိသိသာသာ တိုးတက်လာပါသည်။

[စနစ်အသိပေးချက်]။ ။ပင်ကိုယ်စွမ်းရည် မိုးပြာနက်နဲရေခဲ ဝံပုလွေသွေးမျိုးဆက် အကျိုးသက်ရောက်မှု တိုးတက်လာပြီး အာဏာစက်လက္ခဏာရပ် ၉၀ ရာခိုင်နှုန်း၊ ဘုရင်သွေးလက္ခဏာရပ် ၄၅ ရာခိုင်နှုန်းသို့ မြင့်တက်လာပါသည်။

တစ်ချိန်တည်းမှာပင် စစ်သူကြီးသုံးဦးထံမှလည်း အဆင့်တက်ခြင်းကြောင့် အလင်းရောင်များ ပေါက်ကွဲထွက်လာသည်။

ရန့်မြဲ့၊ ထျန်းပင်းနှင့် ယင်းဖုန်းတို့အားလုံး အဆင့် ၂၅ (ပါရမီရှင်အဆင့်) သို့ ချိုးဖျက်ဝင်ရောက်သွားကြပြီး သူတို့၏ အငွေ့အသက်များလည်း ပိုမိုနက်ရှိုင်းလာသည်။

ယင်းဖုန်းက တဖြည်းဖြည်း ခဲလာသော ချော်ရည်များထဲမှ တလက်လက်တောက်ပနေသော ရတနာသုံးခုကို ဆယ်ယူလိုက်ပြီး အမြုတေသုံးခုကိုပါ ထုတ်ယူကာ ရိုသေစွာ ဆက်သလိုက်သည်။

အနီရင့်ရောင် အမြုတေတစ်ခု - (ဧရာမချော်ရည်ပုတ်သင်ညို အမြုတေ ရွှေရောင် အဆင့်မြင့်)

ရေခဲပြာရောင် အမြုတေတစ်ခု - (ရေခဲနဂါးစပါးအုံး အမြုတေ ရွှေရောင် အဆင့်မြင့်)

သွေးရောင် အမြုတေတစ်ခု - (ကြေးနီမြေအောက်မီးနဂါး အမြုတေ ရွှေရောင် အဆင့်မြင့်)

လင်းထျန်းလုံ၏ ငွေပြာဘုရင်မျက်၀န်းက စစ်ပွဲအနိုင်ပစ္စည်းအားလုံးကို ကြည့်ရှုစစ်ဆေးလိုက်သည်။

ဧရာမချော်ရည်ပုတ်သင်ညိုအမြုတေတွင် ချော်ရည်အရှင်သခင် (ရွှေရောင် အဆင့်မြင့်)နှင့် သုံးမွှာမျက်လုံးအကြည့် (ရွှေရောင် အဆင့်မြင့်) ပင်ကိုစွမ်းရည်များ ပါဝင်သည်။”

ရေခဲမနဂါးစပါးအုံးအမြုတေတွင် အစွန်းရောက်ယင်နဂါးဝိညာဉ် (ရွှေရောင် အဆင့်မြင့်) နှင့် လျှို့ဝှက်ရေခဲကြေးခွံချပ်ဝတ် (ရွှေရောင် အဆင့်မြင့်) ပင်ကိုစွမ်းရည်များ ပါဝင်သည်။

ကြေးနီမြေအောက်မီးနဂါးအမြုတေတွင် ချော်ရည်နှလုံးသား (ရွှေရောင် အဆင့်မြင့်) နှင့် [နဂါးအရှိန်အဝါခြောက်လှန့်ခြင်း (ခရမ်းရောင် အဆင့်မြင့်) ပင်ကိုစွမ်းရည်များ ပါဝင်သည်။

“မျက်လုံးသုံးလုံးပုတ်သင်ညို အကြေးခွံမှာ ဟင်းလင်းပြင်ချုပ်နှောင်မှုရဲ့ လျှို့ဝှက်ချက်တွေ ပါတယ်၊ ယင်းဖုန်း မင်းလေ့လာဆင်ခြင်ဖို့ သင့်တော်တယ်”

“မြေမီးလျှံနှလုံးသား... ထျန်းပင်း၊ မင်းရဲ့ ထာ၀ရဗာဂျရာခန္ဓာက ဒါနဲ့ ပေါင်းစပ်နိုင်ရင် မီးဒဏ်ခံနိုင်ရည် တိုးလာနိုင်တယ်”

ထျန်းပင်းက စိတ်လှုပ်ရှားစွာ ခပ်သြသြ ဟိန်းဟောက်လိုက်သည်။ “ကျေးဇူးတင်ပါတယ် ဘုရင်မင်းမြတ်”

လင်းထျန်းလုံ စစ်ပွဲအနိုင်ပစ္စည်းများကို ခွဲဝေပေးရန် ပြင်ဆင်နေစဉ် စနစ်အသိပေးချက် ထပ်မံထွက်ပေါ်လာသည်။

[စနစ်အသိပေးချက်]။ ။စုပ်ယူနိုင်သော ပင်ကိုစွမ်းရည်များ-

ချော်ရည်အရှင်သခင် (ရွှေရောင် အဆင့်မြင့်)၊နှင့် သုံးမွှာမျက်လုံးအကြည့် (ရွှေရောင် အဆင့်မြင့်) ကို တွေ့ရှိပါသည်။ စုပ်ယူလိုပါသလား။

လင်းထျန်းလုံ၏ နှလုံးသား လှုပ်ခတ်သွားသည်။ “သုံးမွှာမျက်လုံးအကြည့်ကို စုပ်ယူမယ်။”

[စနစ်အသိပေးချက်]။ ။ပင်ကိုစွမ်းရည် စုပ်ယူခြင်း အောင်မြင်ပါသည်။ ပင်ကိုစွမ်းရည် ငွေပြာဘုရင်မျက်၀န်းကို အားဖြည့်ပေးပြီး ဟင်းလင်းပြင် ချိတ်ပိတ်ခြင်း” လက္ခဏာရပ်အသစ်တစ်ခု ထပ်တိုးလာပါသည်။

သူ၏ မျက်လုံးများထဲတွင် စီးဆင်းနေသော စွမ်းအားအသစ်များကို ခံစားရင်း လင်းထျန်းလုံ မြောက်ဘက်အရပ်ဆီသို့ ကြည့်လိုက်သည်။

“အခု မိခင်သစ်ပင်ရဲ့ အသွင်ပြောင်းလဲမှုကို ကြိုဆိုဖို့ ပြန်သွားကြရအောင်”

……

ဝင်ခါနီးနေမင်းကြီးက လောင်ကျွမ်းထားသော မြေရိုင်းမျက်နှာပြင်ပေါ်တွင် နှင်းဝံပုလွေအုပ်စု၏ အရိပ်များကို ရှည်လျားစွာ ထင်ဟပ်နေစေသည်။

ဘုရင်အဆင့် နဂါးသားရဲများနှင့် ဧရာမချော်ရည်ပုတ်သင်ညိုတို့ထံမှ ရရှိသော စစ်ပွဲပစ္စည်းများကို သယ်ဆောင်လာသည့် ဤအဖွဲ့သည် ပြင်းထန်သောတိုက်ပွဲများကို ဆက်တိုက်ဆိုသလို ဖြတ်သန်းပြီးနောက် ဝံပုလွေအသိုက်ရှိရာ မြောက်ဘက်သို့ ပြန်လည်ဦးတည်နေပြီဖြစ်သည်။

လင်းထျန်းလုံသည် အဖွဲ့၏ရှေ့ဆုံးမှ လျှောက်လှမ်းနေပြီး သူ၏ ဧရာမခန္ဓာကိုယ်ကြီးက နေဝင်ဆည်းဆာအောက်တွင် ခမ်းနားသောအရိပ်တစ်ခုကို ဖန်တီးနေလေသည်။

သူ၏ အသိစိတ်နေရာလွတ်အတွင်းတွင် ဘုရင်အဆင့် အမြုတေသုံးခုက ပြင်းထန်သော စွမ်းအင်လှိုင်းများကို ထုတ်လွှတ်နေသည်။

ရေခဲနဂါးစပါးအုံး အမြုတေက သမုဒ္ဒရာပမာ ကျယ်ပြန့်လွန်းကာ ရေပြာရောင်အဆင်းရှိပြီး ကြေးနီမြေအောက်မီးနဂါး အမြုတေက ချော်ရည်ပမာ ပူလောင်နေသည်။

ဧရာမချော်ရည်ပုတ်သင်ညို အမြုတေကမူ ခဲနေသော သွေးများပမာ အနီရင့်ရောင် ရှိလေသည်။

[စနစ်အသိပေးချက်]။ ။စုပ်ယူ၍ရရှိနိုင်သော ပင်ကိုစွမ်းရည်များကို တွေ့ရှိပါသည် - အစွန်းရောက်ယင်နဂါးဝိညာဉ် (ရွှေရောင် အဆင့်မြင့်)၊ လျှို့ဝှက်ရေခဲကြေးခွံချပ်ဝတ် (ရွှေရောင် အဆင့်မြင့်)၊ ချော်ရည်နှလုံးသား (ရွှေရောင် အဆင့်မြင့်)

“လောလောဆယ် မစုပ်ယူသေးဘူး” လင်းထျန်းလုံ စိတ်ထဲမှ ပြန်လည်ဖြေကြားလိုက်သည်။ အဆင့် ၃၂ သို့ ချိုးဖျက်ဝင်ရောက်ထားခါစဖြစ်၍ သူ၏အဆင့်ကို တည်ငြိမ်အောင် အချိန်ယူရန် လိုအပ်သည်။

ကိုယ်တွင်း၌ စီးဆင်းနေသော စွမ်းအားများကို ခံစားကြည့်ရာ မိုးပြာနက်နဲရေခဲဝံပုလွေသွေးမျိုးဆက်မှ အာဏာစက်မှာ ၉၀ ရာခိုင်နှုန်းအထိ မြင့်တက်လာပြီး ဘုရင်သွေးမှာ ၄၅ ရာခိုင်နှုန်းသို့ ရောက်ရှိလာသည်။

ထို့ကြောင့် ဝံပုလွေအုပ်တစ်ခုလုံး၏ အငွေ့အသက်များမှာ ပိုမိုခိုင်မာလာခဲ့သည်။

“ဖေဖေ ဦးလေးထျန်းပင်းက အရမ်းလင်းလက်နေသလိုပဲ” ရှောင်ယင်းက လင်းထျန်းလုံ၏ ကျယ်ပြန့်သော ကျောပြင်ပေါ်တွင် မှီရင်း ဘေးရှိထျန်းပင်းကို လက်ညိုးလေးဖြင့် ထိုးပြလိုက်သည်။

အဆင့် ၂၅ သို့ ချိုးဖျက်ဝင်ရောက်ထားသော ထျန်းပင်း၏ပတ်လည်တွင် ပိုမိုကြွယ်ဝသော ရွှေရောင်ရင့်ရင့် အလင်းများ စီးဆင်းနေပြီး သူ၏ ထာ၀ရဗာဂျရာခန္ဓာ ပုံသဏ္ဍာန်များကြားတွင် ချော်ရည်ကဲ့သို့ အနီရင့်ရင့် မျဉ်းကြောင်းများက မှိန်ဖျော့ဖျော့ ပေါ်လာလေသည်။

သူသည် မြေအောက်မီးလျှံနှလုံးသားကို ပါးစပ်ဖြင့် ဂရုတစိုက်ကိုက်ထားရာ ပူလောင်သော မီးစွမ်းအင်များနှင့် သူ၏ ကိုယ်ပိုင်ရေခဲစွမ်းအင်တို့ အဆက်မပြတ် ပွတ်တိုက်ပေါင်းစပ်နေပြီး အသက်ရှူလိုက်တိုင်း အပူငွေ့များ ထွက်ပေါ်နေသည်။

ရှောင်ယင်း၏အနောက်တွင် ထိုင်နေသော ရှောင်လန်က အဖွဲ့တစ်ခုလုံးကို ထက်မြက်သောအကြည့်ဖြင့် လှည့်ပတ်ကြည့်ရှုလိုက်သည်။

“ဦးလေးထျန်းပင်း တစ်ယောက်တည်း မဟုတ်ဘူး၊ ဦးလေးရန့်မြဲ့ပတ်လည်က လေအေးတွေကလည်း အသက်ဝင်နေသလိုပဲ၊ ပြီးတော့ ဦးလေးယင်းဖုန်းရဲ့ ပုံရိပ်က နေရောင်အောက်မှာတောင် မှုန်ဝါးနေတယ်”

လင်းထျန်းလုံသည် အနည်းငယ် ခေါင်းညိတ်ပြလိုက်ပြီး သူ၏အသံက စိတ်ခြင်းဆက်သွယ်ခြင်းမှတစ်ဆင့် သမီးနှစ်ဦး၏ နားထဲသို့ ရောက်ရှိသွားသည်။

“သေရေးရှင်ရေးတိုက်ပွဲတွေက အလားအလာတွေကို လှုံ့ဆော်ပေးဖို့ အကောင်းဆုံးပဲ၊ အခုလို ဘုရင်အဆင့် အစွမ်းထက်မိစ္ဆာသားရဲ သုံးကောင်နဲ့ ဆက်တိုက်ရင်ဆိုင်လိုက်ရတာက သူတို့အတွက် ရှားပါးတဲ့စမ်းသပ်မှုတစ်ခု ဖြစ်သွားတယ်”

ထိုအချိန်တွင် ရန့်မြဲ့သည် အသစ်စက်စက် နားလည်သဘောပေါက်မှုများထဲတွင် နစ်မြုပ်နေသည်။

အစောင့်အရှောက်ခေါင်းဆောင်တစ်ဦးအနေဖြင့် ဧရာမချော်ရည်ပုတ်သင်ညိုနှင့် တိုက်ပွဲတွင် ဟင်းလင်းပြင်နယ်ပယ်ကို ပထမဆုံးအကြိမ် ထိတွေ့ခွင့်ရခဲ့ရာ ထိန်းချုပ်မှုအပိုင်းတွင် ကျွမ်းကျင်သော သူ့အတွက် အရည်အသွေးပိုင်းဆိုင်ရာ တိုးတက်မှုတစ်ခု ဖြစ်လာသည်။

ဖြူဖျော့ဖျော့ ရေခဲမီးတောက်များက သူ၏လက်သည်းများကြားတွင် ခုန်ပေါက်လည်ပတ်နေပြီး ၎င်းတို့ ဖြတ်သန်းသွားရာ နေရာတိုင်းရှိ အလင်းရောင်များ အနည်းငယ် လိမ်ကောက်သွားကာ ဟင်းလင်းပြင်ပင် ထိုအစွန်းရောက်အအေးဓာတ်ကြောင့် အေးခဲသွားမည့်အလား ဖြစ်နေသည်။

“ရှောင်ယင်း နင်သတိထားမိလား၊ဦးလေးရန့်မြဲ့ရဲ့ ရေခဲနိယာမတွေအပေါ် ထိန်းချုပ်နိုင်စွမ်းက သာမန် စွမ်းအင်အသုံးပြုမှုထက် အများကြီးကျော်လွန်နေပြီ”

“ငါခံစားမိတယ်၊ အဲဒီအအေးဓာတ်ထဲမှာ ဝိညာဉ်ကိုတောင် အေးခဲစေနိုင်တဲ့ စွမ်းအားတစ်ခုပါနေတယ်”

အဖွဲ့၏ဘေးဘက်တွင် ယင်းဖုန်း၏ပုံရိပ်က လင်းလက်နေပြီး အသစ်ရရှိထားသော မျက်လုံးသုံးလုံးပုတ်သင်ညိုအကြေးခွံ ကို ကိုယ်နှင့်မကွာ သိမ်းဆည်းထားသည်။

ကင်းထောက်ခေါင်းဆောင်တစ်ဦးအနေဖြင့် ဟင်းလင်းပြင်ချုပ်နှောင်မှု စွမ်းရည်မှာ သူ့အတွက် တန်ဖိုးဖြတ်မရနိုင်အောင် အရေးပါပေသည်။

တစ္ဆေရေခဲအရိပ်ထွက်ပြေးခြင်းကို အသုံးပြုလိုက်တိုင်း ယခင်ကထက် များစွာချောမွေ့နေပြီး မည်သည့်အချိန်တွင်မဆို ဗလာဟင်းလင်းပြင်ထဲသို့ ပျော်ဝင်သွားကာ အစစ်အမှန်နှင့် စိတ်ကူးယဉ်နယ်နိမိတ်များကြား လွတ်လပ်စွာ သွားလာနိုင်တော့မည့်အလား ဖြစ်နေသည်။

“ရှောင်လန် အခု ဦးလေးယင်းဖုန်းဆီကရနေတဲ့ ခံစားချက်က... ဝိညာဉ်ခေတ်က မှတ်တမ်းတင်ထားတဲ့ ဗလာဟင်းလင်းပြင်မိစ္ဆာဧကရာဇ်နဲ့ အရမ်းတူနေတယ်”

“နင်လည်း ခံစားမိတာပဲလား၊ ဒိုင်မန်းရှင်းတွေကြားမှာ လွတ်လွတ်လပ်လပ်သွားလာနိုင်တဲ့ အဲဒီလက္ခဏာက ဟင်းလင်းပြင်အာဏာကို ကိုင်စွဲထားတဲ့ အဲဒီဧကရာဇ်နဲ့ တစ်ထပ်တည်းကျနေတယ်”

“ဦးလေးယင်းဖုန်းတစ်ယောက်တည်းမဟုတ်ဘူး” ရှောင်လန်က စိတ်ထဲမှ ဆက်ပြောလိုက်သည်။

“ဦးလေးရန့်မြဲ့ရဲ့ ဝိညာဉ်အေးခဲခြင်း အအေးဓာတ်ကလည်း ထာဝရရေခဲမိစ္ဆာဧကရာဇ်ရဲ့ အမွေအနှစ်နဲ့ ပိုပိုပြီးကိုက်ညီလာတယ်”

“ပြီးတော့ ဦးလေးထျန်းပင်းရဲ့ ကြမ်းတမ်းပြီး ပြိုင်ဘက်ကင်းတဲ့ တိုက်ခိုက်ရေးပုံစံကလည်း ရေခဲအရိုးမိစ္ဆာဧကရာဇ်လမ်းစဉ်ရဲ့ အစပိုင်းရုပ်ဖော်မှုပဲ” ရှောင်ယင်းကလည်း ပြီးပြည့်စုံသော နားလည်မှုဖြင့် ထောက်ခံလိုက်သည်။

အဖွဲ့၏အနောက်ဘက်တွင် မဟာနှင်းအစောင့်အရှောက်များက ညီညာသော ခြေလှမ်းများဖြင့် ချီတက်လာကြသည်။

ဘုရင်အဆင့်တိုက်ပွဲကို ဖြတ်သန်းထားသဖြင့် သူတို့၏ နှင်းခဲအကာအကွယ်ပေါ်တွင် လောင်ကျွမ်းနေသော အမာရွတ်အချို့ ကျန်ရစ်နေသော်လည်း ဤသည်က စစ်ပွဲအတွေ့အကြုံရင့်ကျက်သူများ၏ သတ်ဖြတ်လိုသော အငွေ့အသက်ကို ပိုမိုပေါ်လွင်စေသည်။

သူတို့၏ ရေခဲပြာရောင်ကြေးခွံများက နေဝင်ဆည်းဆာ အလင်းရောင်အောက်တွင် ရွေ့လျားနေသော ရေခဲမြစ်ကြီးပမာ အေးစက်မာကျောသော အလင်းများ ရောင်ပြန်ဟပ်နေသည်။

ရေပြာကြေးခွံအစောင့်အရှောက်ငါးဦးကမူ တိုက်ပွဲအတွေ့အကြုံများကို စိတ်လှုပ်ရှားစွာ ဖလှယ်နေကြသည်။

အဆင့်တက်ခါစ အရံအစောင့်အရှောက်များအနေဖြင့် ယခုတိုက်ပွဲကို လေ့လာခွင့်ရခြင်းက သူတို့အတွက် များစွာ အကျိုးရှိစေသည်။

အစိမ်းနုရောင် ကြေးခွံများပေါ်တွင် အေးစက်စက်အလင်းများ စီးဆင်းနေပြီး မဟာနှင်းအစောင့်အရှောက်များလောက် မထူထဲသေးသော်လည်း ပုံပေါ်စပြုနေပြီ ဖြစ်သည်။

“‌တောက်စ်၊ နောက်တစ်ကြိမ်ဆိုရင် တိုက်ပွဲထဲ ကိုယ်တိုင်ပါဝင်ခွင့်ရရင် သိပ်ကောင်းမှာပဲ” ရေပြာကြေးခွံအစောင့်အရှောက်တစ်ဦးက ရင်ဘတ်ပေါ်ရှိ အကြေးခွံကို လက်သည်းဖြင့်ခေါက်ကာ တောက်ခေါက်ရင်း ပြောလိုက်လေသည်။