အခန်း (၈၄၄-၈၄၆)

အခန်း ၈၄၄ - ခင်ဗျားတို့က အဆင့်ငါးမျိုးနွယ်စုကလား

"ကြယ်ဆယ်ပွင့်လား။ ဝိုး... တကယ့် သူဌေးကြီးပဲ"

ကျန်းမုန့်လောင်မှာ ထိုပုဂ္ဂိုလ်၏ ရက်ရောမှုအပေါ် မအံ့သြဘဲ မနေနိုင်ပေ။ အဖွဲ့ထဲရှိ စကြဝဠာအင်ပါယာအုပ်ချုပ်သူများတွင်ပင် စုစုပေါင်းပိုင်ဆိုင်မှု ကြယ်ဆယ်လုံး မရှိကြသော်ငြား ဤပုဂ္ဂိုလ်မှာမူ အမှန်တကယ် သုံးစွဲဝံ့ပေသည်။

"ဒီပိုင်ဆိုင်မှုမျိုးနဲ့ဆိုရင် အဆင့်ရှစ်သက်ရှိတွေထဲမှာတောင် သူဌေးစာရင်းဝင်တယ်"

အိုင်ရင်းက ဆို၏။

"ဒါပေမဲ့ အဆင့်ရှစ်သက်ရှိတွေဆိုတာ အစ်ကိုနဲ့ တန်းတူရည်တူမိတ်ဆွေဖွဲ့ဖို့ အရည်အချင်း ပြည့်မီတဲ့သူတွေပါပဲ"

"ပိုက်ဆံယူပြီး အဖွဲ့ထဲထည့်လိုက်တော့။ ဟားဟားဟား"

ပိုက်ဆံရပေါက်ရလမ်းကို ငြင်းဆန်သူမှာ အရူးပင် ဖြစ်ပေလိမ့်မည်။ ကျန်းမုန့်လောင်လည်း ထိုလူ့ကို အဖွဲ့ထဲသို့ ချက်ချင်းထည့်ရန် အိုင်းရင်းကို ပြောလိုက်၏။

မကြာခင်မှာပင် ကျန်းမုန့်လောင်သည် ထိုအဆင့်ရှစ်သက်ရှိထံမှ သူငယ်ချင်းအဖြစ် တောင်းခံလွှာတစ်ခုကို လက်ခံရရှိခဲ့သည်။

"ဂါယာစကြဝဠာအင်ပါယာတဲ့။ နာမည်ကတော့ အလန်းစားပဲ"

ကျန်းမုန့်လောင်လည်း အပ်နှံလွှာထဲရှိ အချက်အလက်များကို တစ်ချက်ကြည့်လိုက်သည်။

"ဒီလူက ဂါယာဆိုတဲ့ နာမည်ကိုတောင် သုံးထားတာပဲ"

ကမ္ဘာမြေတွင်မူ ဂါယာဆိုသည်မှာ ကမ္ဘာမြေစောင့်နတ်သမီး၏ နာမည်ဖြစ်ပြီး ဒဏ္ဍာရီများတွင် အမြင့်မြတ်ဆုံးသော ဖြစ်တည်မှုတစ်ခုပင်။ စကြဝဠာမျိုးနွယ်စုများတွင်မူ ဤနာမည်က မည်သည့်အရာကို ကိုယ်စားပြုကြောင်း မသိရသေးပေ။

"သူက ဂါယာအင်ပါယာရဲ့ ဘုရင်လား"

ထိုနာမည်ကို ကြားလိုက်သည်နှင့် အိုင်းရင်း စိတ်လှုပ်ရှားသွားသည်။

"မင်း ဒီလူ့ကို သိလို့လား"

"သူကတော့ ကျွန်တော့်ကို မသိပေမဲ့ ဒီစကြဝဠာထဲမှာ သူ့ကိုမသိတဲ့လူ ရှိမယ်မထင်ဘူး"

အိုင်းရင်းက ဆိုချေသည်။

"စစ်သေနင်္ဂဗျူဟာကျောင်းတော်အကြောင်း ကြားဖူးလား"

ကျန်းမုန့်လောင် ခေါင်းခါပြလိုက်၏။ သူသည် "ထူးရှယ်နတ်ဘုရားကျောင်းတော်"ကိုသာ သိပေသည်။ ကမ္ဘာပေါ်တွင်လည်း စစ်တက္ကသိုလ်များရှိသော်ငြား ဤစစ်သေနင်္ဂဗျူဟာကျောင်းတော်နှင့်မူ လားလားမျှ မသက်ဆိုင်ကြောင်း သိသာလှ၏။

"စကြဝဠာထဲမှာ ကျောင်းတွေအများကြီး ရှိတယ်လေ။ အစ်ကို နားလည်မှာပါ။ တချို့က ယဉ်ကျေးမှု၊ တချို့က နက္ခတ္တဗေဒ၊ တချို့က စက်မှုနည်းပညာတွေကို သင်ကြားပေးကြတယ်။ ဒါပေမဲ့ 'စစ်သေနင်္ဂဗျူဟာကျောင်းတော်'ကတော့ သိုင်းပညာရှင်တွေကို သီးသန့်လေ့ကျင့်ပေးတဲ့နေရာပဲ"

"စကြဝဠာသိုင်းပညာရှင်များအသင်းနဲ့ ဘာကွာတာလဲ"

ကျန်းမုန့်လောင်က ဆက်မေးလိုက်သည်။

"စကြဝဠာသိုင်းပညာရှင်များအသင်းကတော့ အောင်မြင်ပြီးသားပညာရှင်တွေ စုပေါင်းပြီး ပညာဖလှယ်ကြတဲ့ နေရာမျိုးပေါ့။ ကျောင်းတော်ကတော့ ပညာသင်ယူနေသူတွေအတွက်ပါပဲ။ တကယ်တမ်းကျတော့ ဒီနှစ်ခုကြားမှာ ထွေထွေထူးထူး ကွာခြားချက်တော့ မရှိပါဘူး"

"ဒီဂါယာဘုရင်ကတော့ တကယ့်'ဇော်'ပဲ။ သူက အဆင့်ရှစ်သက်ရှိတွေထဲမှာ အစွမ်းအထက်ဆုံး မဟုတ်နိုင်ပေမဲ့ သိုင်းပညာမှာတော့ ထိပ်ဆုံးပဲလို့ ပြောလို့ရတယ်။ သူ တိုက်ခဲ့သမျှ တိုက်ပွဲတွေမှာ သိုင်းနည်းစနစ်တစ်ခုတည်းကို နှစ်ကြိမ်ဆက်တိုက်သုံးတာတောင် မရှိဘူးလို့ ပြောကြတယ်"

"ဪ... သိုင်းရူးပေါ့"

"သိုင်းပညာတင် မဟုတ်ဘူး။ စစ်ပွဲကိုပါ ရူးသွပ်တာ"

အိုင်းရင်းက ရှင်းပြသည်။

"စကြဝဠာထဲမှာဖြစ်သမျှ စစ်ပွဲဆယ်ခုမှာ ငါးခုလောက်က တိုက်ရိုက်ဖြစ်စေ သွယ်ဝိုက်ဖြစ်စေ သူ့ကြောင့်ဖြစ်ရတာပဲ။ သူက ပေါင်းရသင်းရလွယ်တဲ့လူတော့ မဟုတ်ဘူး"

"နားလည်ပြီ"

ကျန်းမုန့်လောင်သည် ဂါယာအမည်ရှိ ထိုလူ၏ သူငယ်ချင်းအဖြစ် တောင်းခံလွှာကို ချက်ချင်းလက်ခံလိုက်သည်။ အဖွဲ့အတွင်း အစွမ်းထက်သူ များပြားလာလေလေ သူ ပိုစိတ်လှုပ်ရှားလာလေလေပင်။ ဤကဲ့သို့သော အဆင့်ရှစ်သက်ရှိမျိုးမှာ နောက်ပိုင်းတွင် တစ်ချိန်ချိန်၌ အသုံးတည့်လာမည်မှာ မြေကြီးလက်ခတ်မလွဲပေ။

"ဂါယာစကြဝဠာအင်ပါယာအရှင်ဘုရင်.. အဖွဲ့ထဲ ဝင်လာပြီလား"

"အမလေး... ဆရာသခင်ရဲ့ သြဇာအာဏာကတော့ မယုံနိုင်စရာပဲ"

"ဘုရားရေ... ဒီအဖွဲ့ထဲမှာ လူကြီးလူကောင်းတွေချည်းပဲ။ အဆင့်ခြောက်သက်ရှိဖြစ်တဲ့ ကျွန်တော်တောင် စကားမပြောရဲတော့ဘူး။ အထင်သေးခံရမှာ ကြောက်လို့"

ဂါယာဝင်ရောက်လာခြင်းကား အဖွဲ့တစ်ခုလုံးကို ဆူညံသွားစေခဲ့ပြီး အချို့မှာမူ သူနှင့် နီးစပ်ခွင့်ရရန် ကြိုးစားကြသလို အချို့လည်း ဖော်လံဖားလုပ်နေကြတော့သည်။

အခြားသူများနှယ် ဂါယာကလည်း သူငယ်ချင်းအဖြစ် အပ်နှံကာ နှုတ်ဆက်ပြီးနောက် သူ့ဆက်သွယ်ရေးစာမျက်နှာတွင် တိတ်ဆိတ်သွားခဲ့လေသည်။ နှစ်ပေါင်း သန်းနှင့်ချီ၍ နေထိုင်လာကြသော ဤလူကြီးပိုင်းများမှာ အတွေ့အကြုံရင့်ကျက်သူများ ဖြစ်ကြလေရာ ဤအဂ္ဂိရတ်ပညာရှင်ကို လက်နက်သွန်းလုပ်ခိုင်းရန်မှာ ချက်ချင်းမဖြစ်နိုင်ကြောင်း သူတို့ ကောင်းကောင်းသိထားကြသည်။

သို့သော် သူ၏ ကြယ်ဆယ်ပွင့်တန် စာအိတ်နီမှာ ဆရာသခင်၏ စိတ်ထဲတွင် စွဲထင်ကျန်ရစ်စေမည်ဖြစ်ပြီး အခွင့်အရေးရလာသည့်အခါ သူသည် အခြားသူများထက် ဦးစားပေးအဆင့် ပိုမြင့်လိမ့်မည်ဟု ယုံကြည်ထားသည်။

"အိုင်းရင်း.. အဖွဲ့ထဲမှာ ကြေညာချက်တစ်ခု ထုတ်ပေးပါဦး။ နောက်ပိုင်းဆိုရင် အဖွဲ့ထဲဝင်မယ့် အသင်းဝင်ကြေးကို ဆယ်ဆတိုးလိုက်ပြီလို့"

"ဟင်..."

အိုင်းရင်းခမျာ မှင်တက်သွားချေသည်။ တစ်နှစ်လျှင် စကြဝဠာဒင်္ဂါးပြား၁၀ထရီလီယံဆိုသည်မှာ ဓားပြတိုက်နေခြင်း မဟုတ်ပါလော။

"စိတ်မပူပါနဲ့။ မကြာခင် ဘယ်သူမှ မကန့်ကွက်ဘဲ လိုလိုလားလားနဲ့ ပေးကြလိမ့်မယ်"

ကျန်းမုန့်လောင်က ရယ်မောလိုက်သည်။

"ဒီအဖွဲ့ထဲက လူတိုင်းက ငါတို့ရဲ့ အရင်းအမြစ်တွေပဲလေ။ စဉ်းစားကြည့်။ သာမန်အဆင့်ခြောက်သက်ရှိတစ်ယောက်က အဆင့်ရှစ်သက်ရှိတွေရဲ့ရှေ့မှာ စကားပြောခွင့်ရှိပါ့မလား"

အိုင်းရင်း ခေတ္တမျှ စဉ်းစားလိုက်သည်။ သူကိုယ်တိုင် ထိုအဆင့်ကို မရောက်သေးသော်လည်း အဆင့်ခြောက်သက်ရှိတစ်ဦးသည် အဆင့်ရှစ်သက်ရှိများရှေ့တွင် ရှိနေရခြင်းမှာလည်း သူ အဆင့်ခြောက်သက်ရှိများရှေ့၌ ရှိနေသလိုဖြစ်လိမ့်မည်ဟု အိုင်းရင်း တွက်ဆလိုက်သည်။ စကားပြောရန် မဆိုထားနှင့်။ တစ်ဖက်လူက လှည့်ပင်ကြည့်မည်မဟုတ်ပေ။

"ဒါပေမဲ့ ငါ့အဖွဲ့ထဲမှာတော့ တစ်နှစ်ကို တစ်ဆယ်ထရီလီယံသုံးလိုက်တာနဲ့ အဆင့်ရှစ်သက်ရှိတွေနဲ့ သူငယ်ချင်းဖြစ်ခွင့်ရမယ့် အခွင့်အရေး ရှိသွားပြီလေ။ မတန်ဘူးလား"

"နားလည်ပြီ"

ဘေးနားရှိ ရှာယန်နာက ချက်ချင်း သဘောပေါက်သွားသည်။

"ဆရာသခင်က စကြဝဠာအရှင်သခင်တွေနဲ့ ဆက်သွယ်ဖို့တင် အဖွဲ့ဖွဲ့တာမဟုတ်ဘဲ သူတို့ရဲ့အရင်းအမြစ်တွေနဲ့ ကွန်ရက်တွေကို နောက်ထပ်'ကုန်ပစ္စည်း'တစ်ခုအနေနဲ့ ပြောင်းလဲလိုက်တာပဲ"

"မင်းရဲ့ကောင်မလေးက ထက်မြက်သားပဲ"

ကျန်းမုန့်လောင်က ရယ်မောလိုက်သည်။

"ပြီးတော့ ပစ္စည်းက ရှားမှ တန်ဖိုးတက်တာလေ။ တစ်နှစ်ကို အဖွဲ့ဝင်ခွင့်နေရာတစ်ရာဖွင့်ပေးမယ်။ အဲ့ဒီအခါကျရင် အဲဒီနေရာကိုရဖို့ သူတို့ လုယက်ကြလိမ့်မယ်"

"ဒါက အစ်ကိုပြောတဲ့... အင်း... 'အုပ်စုတွင်းစီမံခန့်ခွဲမှု'လို့ ခေါ်တာလား"

အိုင်းရင်းသည် ဤလုပ်ငန်းစဉ်၏ အနှစ်သာရကို စတင်မြင်ယောင်လာသည်။

"မင်း သင်ယူစရာတွေ အများကြီးကျန်သေးတယ်"

ကျန်းမုန့်လောင်က ဆိုလေ၏။

"ငါတို့ မရောက်သေးဘူးလား။ ပျံသန်းလာတာ တော်တော်တောင်ကြာနေပြီ"

ထိုအထက်တန်းလွှာများ စုဝေးရာ ဂြိုဟ်များသို့ သွားရောက်ရန်မှာ နေရာရွှေ့ပြောင်း၍ မရသဖြင့် အထူးသီးသန့် အာကာသယာဉ်ကို စီးနင်းရသည်။ ထို့ပြင် ထိုဂြိုဟ်များပေါ်သို့ တရားဝင် ဝင်ရောက်ရန်အတွက် လူတိုင်း၌ 'အမှတ်အသား' ပါရှိရမည်ဖြစ်၏။

"ရောက်တော့မယ်။ ဟိုဘက်က ခရမ်းရောင်ဂြိုဟ်ပဲ"

"ဒါကို ဂြိုဟ်လို့ခေါ်တာလား"

ကျန်းမုန့်လောင် ခရမ်းရောင်ဂြိုဟ်လေးကို မြင်လိုက်ရသည်။ ၎င်း၏အချင်းမှာ ကမ္ဘာမြေ၏ ဆယ်ပုံတစ်ပုံခန့်သာ ရှိဟန်တူပြီး ခရမ်းစွဲကျောက်နှင့် တူညီကာ အလင်းဖောက်နိုင်ပြီး အလွန်မြင့်မြတ်ခန့်ညားလှသော အသွင်ကို ဆောင်နေပေသည်။

"အဲ့ဒါကလည်း လူလုပ်ကြယ်တစ်ခုပဲလေ"

အိုင်းရင်းက မိတ်ဆက်ပေးလိုက်သည်။

"အဲ့ဒီခရမ်းရောင်ပစ္စည်းတွေကို 'အင်ပါယာသလင်းကျောက်'လို့ ခေါ်တယ်။ အဆင့်သုံးနဲ့ အထက်ရှိတဲ့ မျိုးနွယ်စုအရှင်သခင် အများစုက သူတို့ရဲ့နေအိမ်နဲ့ နန်းတော်တွေကို ဆောက်ဖို့ ဒီရှားပါးကျောက်ကို သုံးကြတာများတယ်။ တချို့အဆင့်ငါးမျိုးနွယ်စုရဲ့ အုပ်ချုပ်သူတွေဆိုရင် နန်းတော်တစ်ခုလုံးကိုတောင် ဒီပစ္စည်းနဲ့ဆောက်ကြတာ"

"ဒီကျောက်က အဖိုးတန်လို့လား"

"သူက အရမ်းမာကျောတယ်လေ။ အဆင့်ငါးအခြေခံအာကာသသင်္ဘောတွေရဲ့ တိုက်ခိုက်မှုကိုတောင် ခံနိုင်ရည်ရှိတယ်။ ထွက်နှုန်းကလည်း အရမ်းနည်းတော့ စပေါ်ကတည်းက အထက်တန်းလွှာတွေရဲ့ ပြယုဂ် ဖြစ်လာတာပဲ"

"ဒါဆို စိန်တွေလိုမျိုး ကြော်ငြာကောင်းလို့ နာမည်ကြီးတာပေါ့"

ကျန်းမုန့်လောင်သည် ၎င်း၏မာကျောမှုကို စိတ်မဝင်စားပေ။ သတ္တုစပ်အများစုမှာ ဤအရာထက် ပိုမိုမာကျောနိုင်သည်ဖြစ်ရာ ၎င်းမှာ ဟိတ်ဟန်ထုတ်ရန်အတွက်သာ ဖြစ်မည်ဟု တွက်ဆလိုက်သည်။

"ဒီလောက်ကြီးတဲ့ အင်ပါယာသလင်းကျောက်ဆိုရင် ကုန်ကျစရိတ်တင် ကြယ်ငါးပွင့်ကျော်လောက် ရှိမယ်"

အိုင်ရင်းက ခန့်မှန်းလိုက်၏။

"ဝိုး... အဆင့်ငါးမျိုးနွယ်စုငါးရာရဲ့ ပိုင်ဆိုင်မှုတွေကို ဒီဂြိုဟ်သေးသေးလေးထဲမှာ ပုံအောထားတာပဲ။ အဲဒါကြောင့် သူဌေးကြီးတွေပဲ သွားခွင့်ရှိတာ မဆန်းပါဘူးလေ.."

"ရှာယန်နာ ရှာဇီနာ"

သူတို့ ဆင်းလိုက်သည်နှင့် အနောက်ဘက်မှ တစ်စုံတစ်ယောက်က ညီအစ်မနှစ်ယောက်၏ နာမည်ကို လှမ်းခေါ်လိုက်ခြင်းပင်။

ကျန်းမုန့်လောင် လှည့်ကြည့်လိုက်သောအခါ သူတို့နှင့်ရွယ်တူခန့်ရှိသော လူငယ်တစ်ယောက်ကို တွေ့လိုက်ရသည်။ ထို့ပြင် အိုင်ရင်းအပေါ် ထားရှိသော သူ့အကြည့်မှာ ရန်လိုမှုများဖြင့် ပြည့်နှက်နေသည်။

"ဒါက ရုပ်ရှင်တွေထဲကလို 'အချစ်ပြိုင်ဘက်'ဆိုတဲ့ အခြေအနေမျိုးလား"

ကျန်းမုန့်လောင်က တိုးတိုးလေး ကပ်မေးလိုက်သည်။

အိုင်းရင်းက ခါးသက်သက်ပြုံးလျက် ပြန်ဖြေလိုက်သည်။

"ဒါကတော့ မဟုတ်ပါဘူး။ သူက ရှာယန်နာရဲ့ အစ်ကိုပါ။ အန်ဒရိုမီဒါမျိုးနွယ်စုရဲ့ တော်ဝင်မိသားစုဝင်တစ်ယောက်ပေါ့"

"ဪ... ယောက်ဖလောင်းပေါ့"

ကျန်းမုန့်လောင်မှာ ထိုလူငယ်၏ရုပ်ရည်က ညီအစ်မနှစ်ယောက်နှင့် ဆင်တူနေကြောင်း သတိပြုမိသွားသည်။

"လာပြန်ပြီ.. ဒီဂလက်ဆီမျိုးနွယ်စုကကောင်ပဲလား"

ထိုလူငယ်က အိုင်းရင်းထံသို့ ဒေါသတကြီး လျှောက်လှမ်းလာသည်။

"ပြီးခဲ့တဲ့တစ်ခေါက်က ငါ သတိပေးခဲ့ပြီးပြီလေ။ မင်း ရှာယန်နာ့ကို ကယ်ခဲ့တယ်ဆိုပေမယ့် မင်းရဲ့အဆင့်အတန်းက သူ့ကို ပိုးပန်းဖို့ မထိုက်တန်ဘူးလို့။ မင်း ငါ့စကားကို တစ်ဖက်နားကဝင်ပြီး တစ်ဖက်နားကထုတ်ပစ်လိုက်တာလား"

"ဟေ့ ကိုယ့်လူ"

ကျန်းမုန့်လောင်က ထိုလူငယ်၏စကားကို ဖြတ်ပြောလိုက်လေသည်။

"မင်း အခု ဘာပြောလိုက်တာလဲ။ သူက မင်းညီမကို ပိုးပန်းဖို့ မထိုက်တန်ဘူး ဟုတ်လား"

"ဟုတ်တယ်လေ"

ထိုလူငယ်က ကျန်းမုန့်လောင်ကို စိုက်ကြည့်လိုက်၏။

"သူ့မှာ ဘာအဆင့်အတန်းရှိလို့လဲ။ ငါတို့ မိသားစုက ဘယ်လိုအဆင့်အတန်းမျိုးမို့လို့လဲ"

"ခင်ဗျားတို့က အဆင့်ငါးမျိုးနွယ်စုကလား"

ကျန်းမုန့်လောင်က သိလျက်နှင့် မေးမြန်းလိုက်သည်။

"မင်းက ဘယ်သူလဲ"

ကျန်းမုန့်လောင်က အဆင့်ငါးမျိုးနွယ်စုအကြောင်း ပြောလိုက်သဖြင့် ထိုလူငယ်၏ စိတ်ထဲတွင် တစ်ခုခုထူးဆန်းသွားသည်ဟု ခံစားလိုက်ရသည်။

"ငါ ဘယ်သူလဲဆိုတာ အရေးမကြီးပါဘူး။ဒါပေမဲ့ ငါ့ညီလေးမှာ အဆင့်လေးမျိုးနွယ်စုတွေအများကြီးရဲ့ ပိုင်ဆိုင်မှုတွေနဲ့ စကြဝဠာဒင်္ဂါးပြားထရီလီယံပေါင်းများစွာ ရှိတယ်။ ငါ့အထင်တော့ သာမန်အဆင့်ငါးမျိုးနွယ်စုက မင်းသမီးတစ်ပါးနဲ့ဆိုရင် သူက တော်တော်သင့်တော်နေပြီ မဟုတ်ဘူးလား"

***************

အခန်း ၈၄၅ - ယောက်ဖလောင်းရဲ့ အမြင်ကတော့ တကယ်စူးရှတာပဲ

"မင်း ငါ့ကို နောက်နေတာလား"

ထိုလူငယ်၏ မျက်နှာပေါ်တွင် လှောင်ပြောင်သရော်လေဟန် အမူအရာများဖြင့် ပြည့်နှက်သွားလေသည်။

"သူ့နောက်ခံက အဆင့်နှစ်မျိုးနွယ်စု အရှင်သခင်ရဲ့ အငယ်ဆုံးသားတစ်ယောက်ပဲလေ။ သူ့မှာ ဘာအဆင့်အတန်း ဘာရာထူးမှမရှိဘူး။ သူ့မှာ အဆင့်လေးမျိုးနွယ်စုတွေရဲ့ ပိုင်ဆိုင်မှုတွေရှိတယ် ဟုတ်လား။ ဟားဟားဟား"

အကယ်၍ အိုင်းရင်းတွင် အဆင့်လေးမျိုးနွယ်စုပေါင်းများစွာ၏ ပိုင်ဆိုင်မှုများသာ အမှန်တကယ် ရှိနေပါက ရှာယန်နာ့ကို လက်ထပ်ရန် မဆိုထားနှင့်။ အန်ဒရိုမီဒါမျိုးနွယ်စု၏ တော်ဝင်မိသားစုရှိ မင်းသမီးအားလုံးကို သိမ်းပိုက်ချင်လျှင်ပင် သူတို့ဘက်က လိုလိုလားလား ကမ်းလှမ်းကြလိမ့်မည်ဖြစ်၏။

ဤသို့သော ပိုင်ဆိုင်မှုအတိုင်းအတာမျိုးမှာ အဆင့်ငါးမျိုးနွယ်စုအငယ်စားတချို့၏ အရှင်သခင်များနှင့်ပင် ရင်ဘောင်တန်းနိုင်သည်။ ထိုသို့သာဆိုလျှင် သူတို့အန်ဒရိုမီဒါမျိုးနွယ်စု၏ ရှာယန်နာကိုပင် အိုင်းရင်း၏ ကြင်ယာတော်တစ်ဦးအဖြစ် ထည့်သွင်းစဉ်းစားပေးရန် တောင်းပန်ရမည့် အခြေအနေမျိုး ဖြစ်လာပေလိမ့်မည်။

"ရှာယန်နာ.. မင်းလည်း တော်တော်ရူးကြောင်ကြောင်နိုင်တာပဲ"

ထိုလူငယ်က သူ့ညီမကိုကြည့်ကာ ပြောလိုက်လေသည်။

"အဖေက မင်းကို အရမ်းချစ်တယ်ဆိုပေမဲ့ ဒီကိစ္စမှာတော့ မင်းသဘောအတိုင်း ခွင့်ပြုပေးမှာ မဟုတ်ဘူး။ပြီးတော့ သူက မင်းကို လက်ထပ်ပေးဖို့ စီစဉ်ပြီးသွားပြီ။ တစ်ဖက်က လူက တခြားစကြဝဠာအင်ပါယာတစ်ခုရဲ့ အဆင့်လေးမျိုးနွယ်စုက ရေတပ်ဗိုလ်ချုပ်ကြီးရဲ့ သားပဲ။ ဒီတစ်ခေါက် အဲ့ဒီကိစ္စကို အတည်ပြုကြတော့မှာ"

"ဒါကို ဘာလို့ ကျွန်မ မသိရတာလဲ"

ဤသတင်းကို ကြားလိုက်ရသည့်အခါ အိုင်းရင်းသာမက ရှာယန်နာပါ စိုးရိမ်တကြီး ဖြစ်သွားသည်။

"ဒါတွေက လူကြီးချင်းဆုံးဖြတ်ထားတဲ့ ကိစ္စတွေပဲ။ မင်းက လိုက်နာဖို့ပဲလိုတယ်"

ထိုလူငယ်က အေးစက်စက် ပြောလိုက်သည်။ တော်ဝင်မိသားစုဝင်များ ဖြစ်ကြသော်လည်း သူတို့မှာ အဆင့်သုံးမျိုးနွယ်စုမျှသာ ဖြစ်ပြီး သူတို့အထက်တွင် ပိုအစွမ်းထက်သည့် အဆင့်မြင့်မျိုးနွယ်စုများ ရှိနေသဖြင့် မဟာမိတ်ဖွဲ့ရန်အတွက် ဤကဲ့သို့သော လက်ထပ်ထိမ်းမြားမှုများကို ပြုလုပ်ကြရခြင်းပင်။

"ကဲ... ငါနဲ့လိုက်ခဲ့တော့"

ထိုလူငယ်က ရှာယန်နာ၏ လက်ကောက်ဝတ်ကို ဆွဲကိုင်လိုက်သည်။

"ပြီးတော့ မင်းရော.. ရှာဇီနာ။ မင်းလည်း နောက်တစ်ခါ ဒီလိုဆိုးသွမ်းလို့မရတော့ဘူး။ မိန်းကလေးဆိုတာ မိန်းကလေးလို နေရမယ်။ အဖေက အခု ဒီအင်ပါယာသလင်းကျောက်ဂြိုဟ်ပေါ်မှာ ရှိနေတယ်။ ဒီတစ်ခေါက် အဖေက မင်းအတွက်လည်း သင့်တော်တဲ့ လက်တွဲဖော်တစ်ယောက် ရှာပေးလိမ့်မယ်"

"ငါ မှတ်မိတာသာမှန်ရင် ဒီအင်ပါယာသလင်းကျောက်ဂြိုဟ်ကို ဝင်မယ့်လူတိုင်းက ကိုယ်နဲ့အတူ လူသုံးယောက်ထက် ပိုခေါ်လာလို့မရဘူး မဟုတ်လား"

ထိုလူငယ်က ဝင်ရောက်ခွင့် အထောက်အထားများကို စစ်ဆေးနေသော ဝန်ထမ်းအား မေးမြန်းလိုက်သည်။

"ဟုတ်ပါတယ်။ အရင်ဆုံး လူကြီးမင်းရဲ့ အထောက်အထားကို အတည်ပြုပေးပါ"

"ငါက လာနီယာကီးယားဂလက်ဆီအစုအဝေး၊ အန်ဒရိုမီဒါဂလက်ဆီရဲ့ အရှင်သခင်၊ အမြွှာဝေလငါးစကြဝဠာအင်ပါယာရဲ့ မင်းသားပဲ။ ငါ့အဖေက အခု ဒီဂြိုဟ်ပေါ်မှာ ရှိတယ်"

"ခဏလောက် စောင့်ပေးပါ။ ပြီးတော့ လူကြီးမင်းရဲ့ အထောက်အထားကို ပြပေးပါ"

သူသည် အဆင့်သုံးမျိုးနွယ်စုမှ မင်းသားတစ်ပါးသာ ဖြစ်သဖြင့် ဤအင်ပါယာသလင်းကျောက်ဂြိုဟ်ပေါ်တွင် အောက်ခြေအဆင့်၌သာ ရှိသော်ငြား သာမန်ဝန်ထမ်းများနှင့် နှိုင်းယှဉ်လျှင်မူ အလွန်မြင့်မြတ်လှပေသည်။

ကံကောင်းထောက်မစွာဖြင့် လူတိုင်းက စည်းကမ်းများကို လိုက်နာကြသဖြင့် ဝန်ထမ်းများအတွက် အလုပ်လုပ်ရသည်မှာ ခက်ခဲခြင်းမရှိပေ။

ကျန်းမုန့်လောင်သည် စစ်ဆေးရေးဂိတ်နှင့် မလှမ်းမကမ်းတွင် လူလတ်ပိုင်းအမျိုးသား တချို့ ငြိမ်သက်စွာ ထိုင်နေကြောင်း သတိပြုမိလိုက်သည်။ သူတို့အားလုံးက အဆင့်ငါးသက်ရှိများ၏ အရှိန်အဝါကို ထုတ်လွှတ်နေသည်။ ဤအင်ပါယာသလင်းကျောက်ဂြိုဟ်၏ လုံခြုံရေးတာဝန်ခံများ ဖြစ်ဟန်တူသည်။

အဆင့်ငါးသက်ရှိအဆင့်အောက်ရှိ မည်သူမဆို ဤနေရာတွင် ပြဿနာရှာနိုင်စွမ်းမရှိသလို အဆင့်ငါးထက် ကျော်လွန်သူများမှာလည်း ဤနေရာသို့ ဝင်ရောက်ခွင့် အရည်အချင်းပြည့်မီသူများ ဖြစ်ကြသဖြင့် ဤလုံခြုံရေးအစီအစဉ်မှာ အလွန်သင့်လျော်လှလေသည်။

"မင်းသားအာပါချီ.. လူကြီးမင်းရဲ့ အထောက်အထားကို အတည်ပြုပြီးပါပြီ။ ဒါပေမဲ့ တစ်ခုသတိပေးချင်တာကတော့ လူကြီးမင်းအဖေရဲ့ ခွင့်ပြုချက်အရ လူသုံးယောက်ပဲ ဝင်ခွင့်ရှိပါတယ်။ အဲ့ဒီသုံးယောက်ရဲ့ အထောက်အထားကိုလည်း တစ်ကြိမ်သာ သတ်မှတ်ခွင့်ရှိပါတယ်။ လူစားလဲလို့မရပါဘူး"

ဝန်ထမ်းက အာပါချီထံသို့ တံဆိပ်သုံးခုကို ကမ်းပေးလိုက်သည်။ ထိုတံဆိပ်များကို အင်ပါယာသလင်းကျောက်ဖြင့် ပြုလုပ်ထားပြီး တံဆိပ်ပေါ်တွင် ဂြိုဟ်သေးသေးလေးသုံးလုံး ထွင်းထုထားလေရာ ၎င်းမှာ သူတို့၏အဆင့်အတန်းကို ကိုယ်စားပြုခြင်းပင်။

ဤကဲ့သို့သော လူမှုရေးနယ်ပယ်များတွင် တန်းတူရည်တူရှိသူများအကြား ဆက်ဆံရေးမှာ အလွန်အရေးကြီးသည်။ တစ်ဖက်လူ၏ နောက်ခံကို ကြည့်လိုက်သည်နှင့် သူတို့၏ရပ်တည်ချက်ကို သိရှိနိုင်ရန် ရည်ရွယ်ထားသည်။

"စည်းကမ်းတွေကို ငါ နားလည်ပါတယ်"

အာပါချီက ခေါင်းညိတ်ပြလိုက်သည်။

"အစ်ကို... ကျွန်မ မသွားချင်ဘူး"

"မင်းရဲ့သဘောထားက အရေးမကြီးဘူး"

အာပါချီက ပြတ်ပြတ်သားသားပြန်ပြောလိုက်သည်။

"တကယ်လို့ သူသာ တကယ်အစွမ်းအစရှိရင် ကိုယ့်ဘာသာကိုယ်ဝင်လာပြီး အဖေနဲ့ စကားပြောခိုင်းလိုက်လေ ဒါပေမဲ့ သူ့မှာ ဒီလိုအရည်အချင်းမျိုး ရှိမယ်လို့ ငါတော့မထင်ဘူး"

"ဟယ်လို.. ကျွန်တော်နဲ့ ကျွန်တော့်သူငယ်ချင်းလည်း ဝင်ချင်လို့ပါ"

ကျန်းမုန့်လောင်က စစ်ဆေးရေးဂိတ်သို့ ချဉ်းကပ်သွားလိုက်သည်။

"သူတို့ ဘယ်လိုဝင်မလဲဆိုတာ ငါ ကြည့်ချင်သေးတယ်"

အာပါချီက ချက်ချင်းမဝင်သွားသေးဘဲ အိုင်းရင်းတို့ ငြင်းပယ်ခံရပြီး စိတ်ပျက်လက်ပျက်ဖြင့် ထွက်ခွာသွားရမည့် မြင်ကွင်းကို စောင့်ကြည့်ချင်နေပေသည်။

ဝန်ထမ်းက သူတို့ကို တစ်ချက်ကြည့်လိုက်သည်။ အာပါချီတို့၏ စကားဝိုင်းကို သူ ကြားသိထားပြီးဖြစ်လေရာ ဤလူနှစ်ဦးမှာ အဆင့်နှစ်မျိုးနွယ်စုမှ အထက်တန်းလွှာများသာ ဖြစ်နိုင်သည်။ သူတို့သည် ဝန်ထမ်းများထက် မြင့်မြတ်သော်လည်း အင်ပါယာသလင်းကျောက်ဂြိုဟ်ကဲ့သို့ အဆင့်မြင့် လူမှုရေးနယ်ပယ်သို့ ဝင်ရောက်ရန်မူ အရည်အချင်းမပြည့်မီပေ။

သို့သော် ဝန်ထမ်းများ၏ လုပ်ငန်းစဉ်မှာ အလွန်တိကျလှသည်။

"ကျေးဇူးပြုပြီး လူကြီးမင်းတို့ရဲ့ပိုင်ဆိုင်မှု အထောက်အထားကို ပြသပေးပါ။ ဝင်ရောက်ခွင့်အတွက် မျိုးနွယ်စုဂြိုဟ်တစ်သိန်းနဲ့ညီမျှတဲ့ ပိုင်ဆိုင်မှု ဒါမှမဟုတ် ငွေသား လက်ကျန်ရှိမှရမှာပါ။ ဘယ်လိုနည်းလမ်းနဲ့ သက်သေပြချင်ပါသလဲ"

"မင်းရဲ့ပိုင်ဆိုင်မှုတွေကို ပြလိုက်"

ကျန်းမုန့်လောင်က အိုင်းရင်းကို တိုးတိုးလေး ကပ်ပြောလိုက်သည်။ သူသည် အဆင့်ငါးမျိုးနွယ်စု အရှင်သခင်များ ပို့လိုက်သည့်အရာများကို လက်ခံထားပြီးဖြစ်လေရာ စကြဝဠာဘဏ်လက်ကျန်ငွေအပြင် ဂါယာဘုရင်ထံမှ ကြယ်ဆယ်ပွင့်နှင့် အခြားပိုင်ဆိုင်မှုများစွာလည်း ရှိနေချေပြီ။

စကြဝဠာဘဏ်လက်ကျန်ငွေကိုသာ ထုတ်ပြလိုက်ပါက ဝန်ထမ်းခမျာ ထိတ်လန့်ပြီး မလိုလားအပ်သော ပြဿနာများ ဖြစ်လာနိုင်သဖြင့် ပိုင်ဆိုင်မှုများကိုသာ ထုတ်ပြရန် ဆုံးဖြတ်လိုက်သည်။

"ကောင်းပါပြီ"

အိုင်းရင်းသည် ကျန်းမုန့်လောင်၏ ရည်ရွယ်ချက်ကို သဘောပေါက်သွားသည်။

စကြဝဠာအင်ပါယာပိုင်ရှင်အဆင့်ရှိသူများအတွက် မည်သည့်ပိုင်ဆိုင်မှုလွှဲပြောင်းခြင်းလုပ်ငန်းစဉ်မဆို အထူးအခွင့်အရေးများ ရှိပြီး ရှုပ်ထွေးသောလုပ်ငန်းစဉ်များလည်း လုပ်ဆောင်ရန် မလိုပေ။

ထို့ကြောင့် 'စာအိတ်နီ'အနေနှင့် ပေးပို့ထားသော အဆင့်လေးမျိုးနွယ်စု ပိုင်ဆိုင်မှုများအားလုံးမှာ အိုင်းရင်း၏ အမည်ပေါက်သို့ တရားဝင်ရောက်ရှိနေပြီဖြစ်၏။

"ကျွန်တော့်နာမည်နဲ့ရှိနေတဲ့ ဂြိုဟ်ပိုင်ဆိုင်မှုတွေကို စစ်ဆေးကြည့်နိုင်ပါတယ်"

အိုင်းရင်းသည် သူ့စကြဝဠာနိုင်ငံသား အထောက်အထားကို စကန်ဖတ်လိုက်သည်။

"ခဏလောက်စောင့်ပေးပါ"

ဝန်ထမ်းလည်း အိုင်းရင်း၏ အမည်အောက်ရှိ ပိုင်ဆိုင်မှုများကို ချက်ချင်း ရှာဖွေလိုက်လေသည်။

"အဆင့်တစ်မျိုးနွယ်စု - ၁၂ခု၊ အဆင့်နှစ်မျိုးနွယ်စု - ဆယ်ခု"

"သူ့မှာ အဆင့်နှစ်မျိုးနွယ်စုဆယ်ခုတောင် ရှိတာလား"

အာပါချီ အနည်းငယ်အံ့သြသွားသည်။

အန်ဒရိုမီဒါမျိုးနွယ်စု၏ အတိုင်းအတာမှာ ဂလက်ဆီမျိုးနွယ်စုနှင့် သိပ်မကွာခြားလှဘဲ သက်ရှိများနေထိုင်နိုင်သည့် ဂြိုဟ်ပေါင်း တစ်သိန်းခန့်သာ ရှိရာ ၎င်းမှာ အဆင့်နှစ်မျိုးနွယ်စုတစ်ရာခန့်နှင့် ညီမျှသည်။ အာပါချီမှာ တော်ဝင်မင်းသားတစ်ပါးဖြစ်ပြီး ဖခင်ဖြစ်သူ၏ အချစ်ဆုံးသားဖြစ်သဖြင့်သာ ဤနေရာသို့ လိုက်ပါခွင့်ရခြင်းပင်။

သို့သော် သူ့မူလပိုင်ဆိုင်မှုမှာ အဆင့်နှစ်မျိုးနွယ်စုငါးခုသာ။

အဆင့်နှစ်မျိုးနွယ်စုရှိ ကောင်လေးတစ်ယောက်အနေနှင့် အဆင့်တစ်မျိုးနွယ်စု အနည်းငယ် ရှိနေခြင်းကပင် ထူးခြားနေသော်လည်း အဆင့်နှစ်မျိုးနွယ်စုဆယ်ခုအထိ ပိုင်ဆိုင်ထားခြင်းမှာ မည်သို့ဖြစ်နိုင်မည်နည်း။

သို့သော် အဆင့်နှစ်မျိုးနွယ်စုဆယ်ခု ပိုင်ဆိုင်ထားရုံမျှဖြင့် ဤနေရာသို့ ဝင်ရောက်ရန် အရည်အချင်းမပြည့်မီသေးပေ။

"အဆင့်လေးမျိုးနွယ်စု... ၁၂၀"

ဝန်ထမ်းခမျာ ထိုကိန်းဂဏန်းကို ကြေညာလိုက်သည့်အခါ သူကိုယ်တိုင်ပင် မယုံနိုင်အောင် ဖြစ်သွားရသည်။

သို့သော် ဤအချက်အလက်များမှာ စကြဝဠာမဟာမိတ်အဖွဲ့၏ ကွန်ရက်ကတစ်ဆင့် ရယူထားခြင်းဖြစ်သောကြောင့် ပမာဏမှာ မှားစရာအကြောင်းမရှိပါချေ။

ထို့ပြင် ထိုမျိုးနွယ်စုပိုင်ဆိုင်မှုအားလုံးမှာ ယနေ့မှသာ အိုင်းရင်း၏နာမည်အောက်သို့လွှဲပြောင်းလိုက်ကြောင်း တွေ့ရသည်။ အဆင့်လေးမျိုးနွယ်စုများမှာ အဆင့်ငါးအဆင့်ရှိသော မျိုးနွယ်စုတစ်ခု ဖြစ်လာရန် လုံလောက်လှပေသည်။ သူ အစောက လှောင်ပြောင်ခဲ့သော လူငယ်လေးမှာ အဆင့်ငါးမျိုးနွယ်စုတစ်ခုနှင့် ညီမျှသော ပိုင်ဆိုင်မှုများကို ပိုင်ဆိုင်ထားသည်။

"ကျွန်တော့်ရဲ့ စကြဝဠာဘဏ် လက်ကျန်ငွေကိုပါ ပြဖို့လိုဦးမလား"

အိုင်းရင်းက စနစ်အား လက်ကျန်ငွေ စစ်ဆေးခွင့်ကိုပေးလိုက်သည်။

"လူကြီးမင်း မပြချင်ရင် မလိုပါဘူး။ လူကြီးမင်းရဲ့ ပိုင်ဆိုင်မှုတွေကတင် ဝင်ရောက်ဖို့အတွက် လုံလောက်တာထက် ပိုနေပါပြီ"

"ကိစ္စမရှိပါဘူး။ စစ်ဆေးကြည့်လိုက်ပါ"

ကျန်းမုန့်လောင်က ရယ်မောလျက် အာပါချီကို လှမ်းကြည့်လိုက်သည်။ အာပါချီမှာမူ မှင်တက်နေပြီး မျက်နှာအမူအရာမှာ ဝါဆာဘိကို အများကြီးစားလိုက်မိသည့် လူတစ်ယောက်အလားပင်။

"လူကြီးမင်း... လူကြီးမင်းရဲ့ စကြဝဠာဘဏ် လက်ကျန်ငွေက ကြယ်၂.၇၅ပွင့်ရှိပါတယ်။ လူကြီးမင်းရဲ့ ပိုင်ဆိုင်မှု အတိုင်းအတာအရ အင်ပါယာသလင်းကျောက်ဂြိုဟ်ရဲ့ ဘယ်နေရာကိုမဆို သွားလာခွင့်ရှိပါတယ်။ ဒါကတော့ လူကြီးမင်းနဲ့ လူကြီးမင်းသူငယ်ချင်းအတွက် အထောက်အထား တံဆိပ်တွေပါ"

"ကျေးဇူးတင်ပါတယ်"

အိုင်ရင်းလည်း တံဆိပ်နှစ်ခုကို ယူလိုက်သည်။ တံဆိပ်တစ်ခုစီတွင် ဂြိုဟ်ပုံငါးလုံးစီ ပါရှိသည်ဖြစ်ရာ ၎င်းမှာ အမြင့်ဆုံးသော အဆင့်အတန်းကို ကိုယ်စားပြုလေသည်။

"မင်း... မင်းက အဆင့်နှစ်မျိုးနွယ်စုက မဟုတ်ဘူးလား။ ဒါက ဘယ်လိုလုပ်..."

"ကိုယ့်လူရေ... ကျွန်တော့်သူငယ်ချင်းက သိုသိုသိပ်သိပ်နေရတာကို ကြိုက်တာ"

ကျန်းမုန့်လောင်က အိုင်းရင်းကိုယ်စား ရှင်းပြလိုက်သည်။

"သူက သူ့အဆင့်အတန်းကို မကြည့်ဘဲ စိတ်ရင်းနဲ့ချစ်မယ့်လူကိုပဲ အမြဲရှာနေတာ။ ဒါကြောင့်လည်း သူ့ရဲ့ တကယ့်နောက်ခံအစစ်ကို ဖုံးကွယ်ထားခဲ့တာပေါ့"

"ရှာယန်နာ... မင်းရဲ့အမြင်က စူးရှတယ်ဆိုတာ ငါသိသားပဲ"

အာပါချီခမျာ ချက်ချင်းဆိုသလို မျက်နှာပြောင်းသွားပြီး ဖော်လံဖားထားသည့် ပုံစံသို့ ပြောင်းလဲသွားတော့သည်။

"ငါက အိုင်းရင်းကို စမ်းသပ်ကြည့်ရုံပါ။ တကယ်တော့ ငါက မင်းတို့နှစ်ယောက်လုံးကို အမြဲထောက်ခံပေးနေတဲ့သူပါ"

ကျန်းမုန့်လောင်သည် အိုင်းရင်း၏ယောက်ဖလောင်းမှာ လူသားဆန်လွန်းသူတစ်ယောက်ဖြစ်သည်ဟု တွေးမိသဖြင့် ရယ်ချင်စိတ်ကို အောင့်ထားလိုက်ရသည်။ ထို့နောက် သူသည် အာပါချီ၏ပခုံးကိုပုတ်ကာ ဆိုလိုက်တော့သည်။

"ကိုယ့်လူရေ... ခင်ဗျားရဲ့အမြင်က အရမ်းစူးရှတာပဲ"

******************

အခန်း ၈၄၆ - ကျွန်တော် ဂရုထဲသွားပြီး လူသွားခေါ်လိုက်မယ်

"ဟားဟားဟား.. အစ်ကိုက အရမ်းနောက်တတ်တာပဲ။ ကျွန်တော် ခုနကပြောတာတွေက စေတနာနဲ့ပြောတာပါ"

အာပါချီက ပြောလိုက်သည်။

"ရှာယန်နာက ကျွန်တော့်မျက်စိရှေ့တင် ကြီးပြင်းလာတာလေ။ သူ့ကို အနာဂတ်ကောင်းတစ်ခု ပိုင်ဆိုင်စေချင်တာပေါ့"

သူ့ကျောပြင်တစ်ခုလုံး ချွေးစေးပြန်နေသော်လည်း အာပါချီကတော့ နောက်ဆုံးအချိန်ထိ မျက်နှာပြောင်တိုက်နေဆဲပင်။

နောက်နေတာ မဟုတ်ဘူးနော်။ ဒီလိုလူမျိုးက သူ့ညီမလေးကို စိတ်ဝင်စားနေတယ်ဆိုတာ တကယ့်အခွင့်အရေးကြီးပဲ။

စကြဝဠာဘဏ်ထဲမှာ ကြယ်သုံးပွင့်အဆင့်နီးပါးရှိသော အပ်နှံငွေများနှင့် အဆင့်လေး မျိုးနွယ်စု၁၀၀ကျော်ကို ပိုင်ဆိုင်ထားကြောင်း သူ သေသေချာချာ ကြားလိုက်ရသည်။ ဤပိုင်ဆိုင်မှုမျိုးကို သာမန်အဆင့်ငါး အရှင်သခင်တစ်ယောက်ပင် ထုတ်မပြနိုင်ချေ။

အိုင်းရင်းက အလွန်ငယ်ရွယ်လှသည်။ ဤပိုင်ဆိုင်မှုများမှာ သူကိုယ်တိုင်ရှာဖွေထားခြင်း မဖြစ်နိုင်ကြောင်း အသိသာချည်းပင်။ သူ့မိသားစုထဲရှိ လူကြီးများက ပေးထားခြင်းသာ ဖြစ်ရမည်။

ဤပိုင်ဆိုင်မှုမျိုးကို ထုတ်ပေးနိုင်သည်ဆိုလျှင် သူ့အကြီးအကဲများ၏ နာမည်အောက်မှာ သာမန်စကြဝဠာအင်ပါယာအဆင့် ပိုင်ဆိုင်မှုမျိုး ဒါဇင်နှင့်ချီပြီး ရှိနေလောက်သည်မဟုတ်လော။ ဤသည်မှာ အနည်းဆုံးတော့ အဆင့်ခုနစ်သက်ရှိတစ်ယောက် ဖြစ်နေနိုင်သည်။ အိုင်းရင်းကို ဤမျှအရေးပေးထားခြင်းကိုကြည့်လျှင် အကြီးအကဲများ၏အမြင်တွင် သူ့အနေအထားက အလွန်မြင့်မားမည်မှာ သေချာလှသည်။

ထိုကဲ့သို့သော လူတစ်ယောက်က သူ့ညီမလေးကို စိတ်ဝင်စားနေခြင်းမှာ ကံကောင်းရုံသက်သက် မဟုတ်တော့ပေ။ ဘိုးဘေးများ ကောင်းချီးပေးလိုက်သလို ကံကြမ္မာမျိုးပင်။

"အစ်ကို.. ခုနကပြောတာတော့ ဒီလိုမဟုတ်ပါဘူး"

ရှာဇီနာက ဘေးနားကနေ၍ သူ(မ)အစ်ကိုကို နောက်ပြောင်လိုက်သည်။

"နင်က ဘာသိလို့လဲ"

အာပါချီကမူ ဟန်မပျက်ဆက်ပြောလေသည်။

"နင်သာ အစ်ကိုတစ်ယောက်ဖြစ်ရင် နောက်ကွယ်က ပင်ပန်းရတဲ့ ဒီစေတနာတွေကို နားလည်လာမှာပါ"

အာပါချီက အိုင်းရင်း၏ပခုံးကို ဖက်လိုက်ချင်သော်လည်း သူသည် အဆင့်သုံးမင်းသားတစ်ပါးသာ ဖြစ်ကြောင်း ရုတ်တရက်သတိရသွားသည်။ အဆင့်ခုနစ်သက်ရှိတစ်ယောက်၏ အရေးပါသော မျိုးဆက်သစ်တစ်ဦးနှင့် ရင်းရင်းနှီးနှီးနေရန် သူ့အနေနှင့် အရည်အချင်းမပြည့်မီသဖြင့် ထိုလုပ်ရပ်မှာ မလျော်ကန်လှပေ။

"အစ်ကိုအာပါချီက သဘောတူတယ်ဆိုတော့ အခုကစပြီး ကျွန်တော်တို့ မိသားစုတွေဖြစ်သွားပြီပေါ့။ မိသားစုတွေပဲမို့ တအားအားနာနေစရာမလိုပါဘူး"

အိုင်းရင်းက စိတ်သဘောစစ်မှန်စွာ ပြောလိုက်သည်။

"ဘယ်သူက ရှင့်မိသားစုလဲ"

ရှာယန်နာခမျာ မျက်နှာလေး ရဲတက်သွားပြီး အိုင်းရင်းကို မျက်စောင်းထိုးလိုက်သည်။

တကယ်တော့ အာပါချီ၏ သဘောထားကိုလည်း အပြစ်တင်၍ မရပေ။ သူသာ အာပါချီဆိုလျှင်လည်း သူ့ညီမလေးကို အင်အားကြီးသူတစ်ယောက်နှင့်သာ လက်ထပ်စေချင်မည်ဖြစ်၏။ ပထမအချက်က သူ(မ) ပျော်ရွှင်နိုင်ပြီး ဒုတိယအချက်အနေနှင့် သူတို့၏မျိုးနွယ်စုအတွက် နောက်ထပ်လုံခြုံရေးအကာအကွယ်တစ်ခု ရရှိသွားမည်ဖြစ်၏။

အရာရာတိုင်းကပြီးပြည့်စုံနေမည်မဟုတ်သလို တစ်စုံတစ်ယောက်၏ ပျော်ရွှင်မှုကို စတေးရခြင်းမျိုးလည်း မကြာခဏရှိတတ်သည်။

ဤစကားကို ကြားသောအခါ အာပါချီလည်း ချက်ချင်းပင် မျက်နှာပြုံးဖြီးသွားပြီး အိုင်းရင်းလို သဘောကောင်းလှသော ယောက်ဖမျိုးက စကားပြောရန် အလွန်လွယ်ကူလှသည်ဟု တွေးလိုက်သည်။

"အိုင်းရင်း.. မင်း မကန့်ကွက်ဘူးဆိုရင် ရှာယန်နာခေါ်သလို ငါ့ကို အစ်ကိုလို့ ခေါ်လို့ရပါတယ်"

"ဒါဆိုရင်လည်း ကျွန်တော် အားမနာတော့ဘူးနော်"

အိုင်းရင်းက ပြုံးကာ ပြောလိုက်သည်။

"အစ်ကို.. ခုနက ရှာယန်နာ့အဖေက သူ့ကို တခြားလူနဲ့ ပေးစားချင်နေတယ်လို့ ပြောခဲ့တယ်နော်။ အဲဒါက ဘယ်လိုဖြစ်ရတာလဲ"

"ဟူး"

အာပါချီလည်း သက်ပြင်းရှည်ကြီးချလိုက်ပြီးနောက် မျက်နှာထားကား ရုတ်တရက် အလွန် လေးနက်သွားသည်။

"အဲဒီမျက်နှာက ဘာဖြစ်တာလဲ အစ်ကို"

ရှာယန်နာနှင့် ညီမဖြစ်သူတို့ကလည်း သူတို့အစ်ကို တစ်ခုခုဖုံးကွယ်ထားသည်ဟု ရုတ်တရက် ခံစားလိုက်ရသည်။

"ငါတို့မျိုးနွယ်စုမှာ ပြဿနာတစ်ခုခုရှိနေလို့လား"

"ရောက်လာတဲ့အခြေအနေက အတူတူပဲဆိုတော့ ငါ နင်တို့ကို မဖုံးကွယ်တော့ပါဘူး"

အာပါချီက ပြောသည်။

"ရှာယန်နာ.. နင်သိတဲ့အတိုင်း ငါတို့က ဂူဂေါလ် မျိုးနွယ်စုနဲ့ နယ်မြေအငြင်းပွားမှုတွေ အမြဲဖြစ်နေခဲ့တာလေ"

"ဒါကို ကျွန်မသိပါတယ်"

ရှာယန်နာက ခေါင်းညိတ်ပြလိုက်သည်။

"ကျွန်မတို့မျိုးနွယ်စုနှစ်ခု တိုက်ခိုက်နေခဲ့ကြတာလည်း နှစ်ပေါင်းရာနဲ့ချီနေပြီ မဟုတ်ဘူးလား"

"ဟုတ်တယ်။ တကယ်တော့ ငါတို့မျိုးနွယ်စုနှစ်ခုက အင်အားချင်း တော်တော်မျှတယ်။ ဒီစစ်ပွဲက အချိန်ဆွဲတဲ့ တိုက်ပွဲသက်သက်ပဲ။ နောက်ဆုံးအချိန်ထိ တောင့်ခံနိုင်တဲ့သူက နိုင်မယ်။ ဒီလောက်ပဲ"

အာပါချီက ပြောလိုက်သည်။

"ဒါပေမဲ့ ဘယ်လိုဖြစ်သွားလဲမသိဘူး။ ဂူဂေါလ်မျိုးနွယ်စုက တလောတုန်းက ရှီကျစ်မျိုးနွယ်စုနဲ့ မဟာမိတ်ဖွဲ့လိုက်တော့ သူတို့ရဲ့စစ်သင်္ဘောအုပ်စု အကူအညီပါ ရသွားတယ်"

"ရှီကျစ်မျိုးနွယ်စုလား။ ကျွန်မတို့စကြဝဠာအင်ပါယာရဲ့ အဆင့်လေးမျိုးနွယ်စုကြီးကို ပြောတာလား"

ရှာယန်နာ၏ မျက်နှာထားမှာ ချက်ချင်းထူးဆန်းသွားသည်။

"ဟုတ်တယ် သူတို့ပဲ"

အာပါချီက ပြောလိုက်သည်။

"စစ်ရေးအကူအညီရဖို့ သူတို့ ဘယ်လိုစည်းကမ်းချက်တွေနဲ့ ကမ်းလှမ်းခဲ့လဲဆိုတာတော့ ငါ မသိဘူး။ ဒါပေမဲ့ မကြာသေးခင်နှစ်တွေအတွင်းမှာ ငါတို့ရဲ့စစ်သင်္ဘောတွေ အကြီးအကျယ်ဆုံးရှုံးခဲ့ရပြီး နယ်မြေတွေလည်း အများကြီးဆုံးရှုံးခဲ့ရတယ်"

"ကျွန်မတို့စကြဝဠာအင်ပါယာကရော ဂရုမစိုက်ဘူးလား"

"ဒါက ငါတို့စကြဝဠာအင်ပါယာရဲ့ အတွင်းရေးပဋိပက္ခလေ။ နယ်ချဲ့တာ ဒါမှမဟုတ် သယံဇာတလုတဲ့ စစ်ပွဲလည်း မဟုတ်ဘူး။ နယ်မြေအငြင်းပွားတာသက်သက်ပဲ။ ဒါကြောင့် သူတို့က ဝင်ပါမှာ မဟုတ်ဘူး"

အာပါချီက ပြောသည်။

"တခြားစကြဝဠာအင်ပါယာတစ်ခုခုက ဝင်ရောက်ကျူးကျော်လာတာမျိုးက လွဲရင်ပေါ့"

"ဒါဆို အဖေက စစ်ရေးအကူအညီရဖို့ ကျွန်မကို အလဲအထပ်လုပ်ရတဲ့အရာတစ်ခုလို သုံးချင်နေတာပေါ့"

"ရှာယန်နာ.. အဖေ့အခက်အခဲတွေကို နင် နားလည်ပေးဖို့ ကြိုးစားရမယ်"

အာပါချီက သက်ပြင်းချလိုက်သည်။

"အဲဒီနယ်မြေမှာ ငါတို့လူမျိုးတွေရဲ့ မျိုးနွယ်စု၁၀၀ကျော်ရှိတယ်။ သူတို့သာ ဆက်တိုက်ခိုက်နေမယ်ဆိုရင် မျိုးနွယ်စုတွေ အန္တရာယ်ကြီးကြီးမားမား ကျရောက်လိမ့်မယ်"

"အစ်မကက်သရင်းကရော။ သူက အဆင့်လေး မျိုးနွယ်စုထဲမှာ အိမ်ထောင်ကျသွားတာ မဟုတ်ဘူးလား"

ရှာဇီနာက ဆက်မေးသည်။

"သူက အဆင့်လေးမျိုးနွယ်စုက သာမန်မှူးမတ်မိသားစုထဲမှာ အိမ်ထောင်ကျသွားတာ။ စစ်တပ်မှာ ဘာဩဇာအာဏာမှမရှိတော့ ငါတို့ကို ဘာမှကူညီပေးလို့ မရဘူးလေ"

အာပါချီက ဆက်ပြောသည်။

"နောက်တော့ ဂါလာမျိုးနွယ်စုရဲ့တပ်မမှူးကို ငါတို့ ရှာတွေ့ခဲ့တယ်။ သူအချစ်ဆုံးဖြစ်တဲ့ အငယ်ဆုံးသားကလည်း အိမ်ထောင်ပြုရမယ့် အရွယ်ရောက်နေပြီဆိုတော့..."

"အစ်ကိုက အရမ်းရိုးအလွန်းတယ်"

ရှာယန်နာက ပြောသည်။

"ရှီကျစ်မျိုးနွယ်စုရဲ့ သင်္ဘောအရေအတွက်က ဂါလာမျိုးနွယ်စုနဲ့ အတူတူလောက်ဖြစ်နိုင်ပေမဲ့ သူတို့ရဲ့ပျမ်းမျှအဆင့်က တစ်ဆင့်ပိုမြင့်တယ်။ သူတို့က ကျွန်မတို့အတွက်နဲ့ ရှီကျစ်မျိုးနွယ်စုကို ဆန့်ကျင်ပေးဖို့ ဆန္ဒရှိမယ်လို့ အစ်ကိုထင်နေတာလား"

"ဒါက..."

"အဆင့်လေးမျိုးနွယ်စုကို ဘာကြောက်စရာရှိလို့လဲ"

ကျန်းမုန့်လောင်က ဝင်ပြောလိုက်သည်။

"အိုင်းရင်း.. မင်း ခုနကပဲ အဆင့်လေးမျိုးနွယ်စု၁၀၀ကျော်က ပိုင်ဆိုင်မှုတွေကို ရထားတာ မဟုတ်ဘူးလား။ အဲဒီက စစ်သင်္ဘောအုပ်စုနှစ်ခုလောက် ဒီကိုလွှတ်လိုက်ရင် ကိစ္စပြတ်သွားပြီ မဟုတ်ဘူးလား"

"အစ်ကိုကျန်း.. အဲဒါတော့ မဖြစ်နိုင်ဘူးထင်တယ်"

အိုင်းရင်းက ပြောလေသည်။

"အဲဒီမျိုးနွယ်စုအများစုက ကျွန်တော်တို့စကြဝဠာအင်ပါယာနဲ့ တော်တော်ဝေးတယ်ဆိုတာကို ထည့်မတွက်ရင်တောင် စကြဝဠာမျိုးနွယ်စုစည်းမျဉ်းတွေအရ စကြဝဠာအင်ပါယာက ခွင့်ပြုချက်ပေးထားတဲ့ ဖြတ်သန်းခွင့်လမ်းကြောင်းမရှိဘဲနဲ့ တခြား စကြဝဠာအင်ပါယာတွေရဲ့ စစ်သင်္ဘောတွေက ဝင်ရောက်ပြီး အင်အားသုံးစွက်ဖက်ခွင့် မရှိဘူးလေ"

"မင်းပြောတဲ့သဘောက တိုက်ခိုက်ဖို့အတွက် အမြွှာဝေလငါးစကြဝဠာအင်ပါယာရဲ့ အတွင်းပိုင်းအင်အားကို သုံးရမယ်။ ဒါမှမဟုတ်ရင် အမြွှာဝေလငါးစကြဝဠာအင်ပါယာဆီက ခွင့်ပြုချက်ရရမယ်ပေါ့ ဟုတ်လား"

ကျန်းမုန့်လောင်က အတည်ပြုမေးမြန်းလိုက်သည်။

"မှန်ပါတယ်"

"ယုတ္တိရှိသားပဲ"

ကျန်းမုန့်လောင်လည်း ခေါင်းတညိတ်ညိတ်လုပ်လိုက်သည်။ တခြားစကြဝဠာအင်ပါယာ၏ စစ်သင်္ဘောများသာ သည်အတိုင်း ဝင်လာနိုင်လျှင် ကမောက်ကမဖြစ်ကုန်ပေလိမ့်မည်။ စကြဝဠာဘဏ်၏ စစ်သင်္ဘောများပင် ဤစည်းမျဉ်းကို လိုက်နာရသည်ဖြစ်ရာ အခြားမျိုးနွယ်စုများအနေနှင့် မရမ်းကားရဲသည်မှာ သဘာဝပင်။

"ဒါပေမဲ့ ဒါက ပြဿနာကြီးကြီးမားမား မဟုတ်ပါဘူး"

ကျန်းမုန့်လောင်က ရယ်မောလိုက်သည်။

"ခွင့်ပြုချက်ယူရုံပဲ မဟုတ်ဘူးလား။ ကိုယ့်သဘောနဲ့ကိုယ် ခွင့်ပြုတာနဲ့ အတင်းအကျပ်ခွင့်ပြုခိုင်းတာ ဘာကွာလို့လဲ"

"အတင်းအကျပ်ခွင့်ပြုခိုင်းတာလား။ အဲဒါ ဘာသဘောလဲ"

"ဘာမှမဟုတ်ပါဘူး။ ငါ ဂရုထဲက လူတစ်ယောက်ကို မန်းရှင်းခေါ်လိုက်မယ်"

"လူခေါ်မယ်လား"

ကျန်းမုန့်လောင် ဘာကိုဆိုလိုမှန်း အိုင်းရင်း နားမလည်ပေ။

ကျန်းမုန့်လောင်က ကျူရှင်းဂရုကိုဖွင့်ပြီး စာတစ်စောင် ပို့လိုက်သည်။

"အမြွှာဝေလငါးစကြဝဠာအင်ပါယာနားမှာ ဘယ်သူ့စကြဝဠာအင်ပါယာ ရှိလဲ။ အကူအညီလေးတစ်ခု တောင်းချင်လို့"

ထိုစာလေးကြောင့် ဂရုထဲတွင် ပေါက်ကွဲသွားသည့်နှယ် ရုတ်ရုတ်သဲသဲဖြစ်သွားလေသည်။

ဂရုထဲမှာ ဆရာသခင်က နောက်ဆုံးတော့ စကားစပြောလာပြီပဲ။

"ဆရာသခင်.. ကျွန်တော့်ရဲ့မျိုးနွယ်စုက အမြွှာဝေလငါးစကြဝဠာအင်ပါယာနဲ့ အလင်းနှစ်ဘီလီယံ ၂၀ပဲ ကွာပါတယ်။ အရမ်းနီးတယ်နော်"

"ထွက်သွားစမ်းပါ။ အလင်းနှစ်ဘီလီယံ၂၀တောင် ကွာတာကိုများ နီးတယ်ပြောရသလား။ ဆရာသခင်.. ကျွန်တော့်ရဲ့မျိုးနွယ်စုက အလင်းနှစ် ၁၂ဘီလီယံပဲ ကွာတယ်။ အဲဒါကမှနီးတာ"

"ဆရာသခင်.. ကျွန်တော် ကူညီပေးရမယ့်ဟာများ ရှိလို့လား။ ကျွန်တော်တို့ စွမ်းဆောင်နိုင်သရွေ့ အစွမ်းကုန်ကြိုးစားပေးပါ့မယ်။ မစွမ်းဆောင်နိုင်ဘူးဆိုရင်တောင် ဖြစ်မြောက်အောင် နည်းလမ်းရှာပေးပါ့မယ်"

"ကိစ္စက ဒီလိုကွ။ ငါ့သူငယ်ချင်းရဲ့မျိုးနွယ်စု အနှောင့်အယှက်ပေးခံရလို့။ ငါ ဘာပြောချင်လဲဆိုတာ မင်းတို့ သဘောပေါက်တယ်မလား"

ကျန်းမုန့်လောင်က သွယ်ဝိုက်သောအဓိပ္ပာယ်ဖြင့် ပြောလိုက်သည်။

"ဘယ်သူက ဆရာသခင်ရဲ့သူငယ်ချင်းကို ထိရဲတာလဲ။ အသက်ဆက်မရှင်ချင်တော့လို့လား"

"သူတို့ကို ဖျက်ဆီးပစ်လိုက်မယ် ဆရာသခင်.. အဲဒီမျိုးနွယ်စုက ဘယ်အဆင့်လဲ"

"အဆင့်သုံးမျိုးနွယ်စုလေးတစ်ခုပါ"

ကျန်းမုန့်လောင်က ပြောလိုက်သည်။

"ပြဿနာက အမြွှာဝေလငါးစကြဝဠာအင်ပါယာက ဖြတ်သွားရမှာဆိုတော့ ပြင်ပမျိုးနွယ်စုတွေ ဝင်ရောက်ဖို့ နည်းနည်းရှုပ်ထွေးနေလို့"

"ဟားဟားဟား.. အမြွှာဝေလငါးစကြဝဠာအင်ပါယာလောက်ကတော့ ကျွန်တော်တို့မျိုးနွယ်စုရဲ့ ဆယ်ပုံတစ်ပုံတောင် မရှိပါဘူး။ ကျွန်တော့် စစ်သင်္ဘောအုပ်စု လမ်းကြောင်းဖြတ်တောင်းရင်တောင် ဘယ်သူမှတားရဲမှာမဟုတ်ဘူး"

"ဆရာသခင်.. သြဒိနိတ်တွေကိုသာ ပေးလိုက်ပါ။ သူတို့အတွက် အရာအားလုံးဖြေရှင်းပေးပါ့မယ်"

"ဆရာသခင်.. ဒါက အသေးအဖွဲလေးပါ။ ကျွန်တော်တို့တာဝန်သာထားလိုက်"

"ဆရာသခင်.. ဆရာသခင်ရဲ့ သူငယ်ချင်းကို အနိုင်ကျင့်တဲ့ အဲဒီအဆင့်သုံးမျိုးနွယ်စုကို ကျွန်တော်တို့ ဖျက်ဆီးပစ်လိုက်ရမလား"

"ဆရာသခင်... အဲဒီကို စစ်သင်္ဘောတွေ များများပို့ပေးရမလား။ ပြီးတော့ လမ်းကြုံတုန်း အမြွှာဝေလငါးမျိုးနွယ်စုကိုပါ တစ်ခါတည်းရှင်းပေးရမလား"