အခန်း (၅၀၅-၅၀၆)

အပိုင်း(၅၀၅) ဒုတိယမြောက် တက်ကြွစွမ်းအင် အစိုင်အခဲ

လေဟာနယ်စက်ဝန်းက လော်ယွမ်ကို တွန်းပို့ပေးနေသည်။

အစပိုင်းတွင် နှေးကွေးနေသော်လည်း တဖြည်းဖြည်းနှင့် အလျင်ပိုမြန်လာကာ သူ၏အမြန်နှုန်းမှာ တစ်ဟုန်ထိုး တက်လာတော့၏။

ဆယ်မိနစ်ပင် မပြည့်သေးချိန်မှာပင် သူ၏အမြန်နှုန်းက မိုင် ၆၂၀ ကျော်အထိ ရောက်ရှိသွားပြီဖြစ်သည်။

ထို့အပြင် ဆက်လက်မြန်ဆန်လာနေဆဲဖြစ်ကာ အံ့မခန်းဖွယ် အမြန်နှုန်းတစ်ခုသို့ ဦးတည်နေလေသည်။

ပြီးခဲ့သည့် နှစ်များအတွင်း လော်ယွမ်သည် အုပ်ချုပ်ရေးကိစ္စရပ်များနှင့် အလုပ်များနေခဲ့သည်။

တစ်ချိန်တည်းမှာပင် သူ၏ထိန်းချုပ်၍မရသော ခွန်အားများကြောင့် အခြားသူများကို ထိခိုက်မိမည်ကို စိုးရိမ်သဖြင့် ရုပ်ပိုင်းဆိုင်ရာ ခွန်အားများကို ဆက်လက်မြှင့်တင်ရန် တဖြည်းဖြည်း စွန့်လွှတ်လိုက်ပြီ ဖြစ်သည်။

ထိုအစား ခန္ဓာကိုယ်၏ သိမ်မွေ့သော လုပ်ဆောင်ချက်များကို အသေးစိတ် ထိန်းချုပ်နိုင်ရန်သာ အာရုံစိုက်လာခဲ့သည်။

ထို့ကြောင့် လွန်ခဲ့သည့် သုံးနှစ်ခန့်ကနှင့် နှိုင်းယှဉ်လျှင် သူ၏ရုပ်ပိုင်းဆိုင်ရာ ခွန်အားမှာ လုံးဝ တိုးတက်မလာခဲ့သည့်အပြင် အနည်းငယ်ပင် ကျဆင်းသွားခဲ့သေးသည်။

သို့သော်လည်း သူ၏စစ်မှန်သော စွမ်းရည်အစစ်အမှန်ကမူ နောက်တစ်ဆင့်သို့ပင် တက်လှမ်းသွားခဲ့ပြီ ဖြစ်လေသည်။

ပြီးခဲ့သည့် သုံးနှစ်တာကာလအတွင်း သူ၏ စိတ်စွမ်းအားက တစ်မှတ် ထပ်မံတိုးလာခဲ့ရာ ၁၉ မှတ်အထိ ရောက်ရှိလာခဲ့၏။

တစ္ဆေထနောင်းပင် နှလုံးသား ၏ ပံ့ပိုးမှုနှင့်ပါ ပေါင်းလိုက်သောအခါ အံ့မခန်းဖွယ် ၂၀ မှတ်အထိပင် ရှိလာခဲ့သည်။

တစ်ချိန်တည်းမှာပင် ဉာဏ်ရည်မှာလည်း ဉာဏ်ပညာနှလုံးသား၏ ဖြည့်ဆည်းပေးမှုကြောင့် (အဆင့် ၈ ဉာဏ်ပညာနှလုံးသား၊ ဉာဏ်ရည် ၁၈ မှတ်အတွင်းသာ အကျိုးသက်ရောက်မှုရှိသည်) နောက်ထပ်တစ်မှတ် ထပ်တိုးလာပြီး ၁၈ မှတ်အထိ ရောက်ရှိသွားခဲ့သည်။

ဤသည်မှာ ဂဏန်းအချက်အလက်များအရ မျက်မြင်တွေ့ရှိနိုင်သော အရာများသာ ဖြစ်သည်။ မျက်မြင်မတွေ့နိုင်သော အပြောင်းအလဲများက ပို၍ပင် အံ့မခန်းဖွယ် ကောင်းနေသေး၏။

ယခုအခါ လော်ယွမ်က သူ၏ခန္ဓာကိုယ်ကို ထိန်းချုပ်နိုင်စွမ်းမှာ မော်လီကျူးအဆင့်အထိပင် နီးကပ်နေပြီ ဖြစ်သည်။ မျက်နှာသွင်ပြင်နှင့် အသားအရေကို စိတ်ကြိုက် ပြောင်းလဲနိုင်သည်။

ဝအောင်၊ ပိန်အောင် လုပ်နိုင်ရုံသာမက အရိုးများနှင့် ကလီစာများကိုပင် လျှော့ချကာ သူ၏မူလ အရပ်အမောင်းအတိုင်း ပြန်ဖြစ်အောင် ဖန်တီးနိုင်စွမ်း ရှိနေပြီဖြစ်သည်။

အကယ်၍သာ လော်ယွမ် ကိုယ်တိုင် ဆန္ဒရှိမည် ဆိုပါက သက်ရှိဇီဝပုံစံကို ပြောင်းလဲပစ်ရန်ပင် သူ၏အဖို့ လွယ်ကူရိုးရှင်းသော ကိစ္စတစ်ရပ် ဖြစ်နေလေပြီ။

ဤအချက်ကပင် လေးဘက်မြင်စနစ်သို့ ကူးပြောင်းရာမှ ခန္ဓာကိုယ်ကြီး ဧရာမအရွယ်အစားအဖြစ်သို့ ပြောင်းလဲသွားမည့်အပေါ် လော်ယွမ်၏ ကြောက်ရွံ့စိုးရိမ်မှုများကို များစွာ လျော့ကျသွားစေခဲ့သည်။

အဆိုးဆုံး အခြေအနေနှင့် ရင်ဆိုင်ရလျှင်ပင် အသားအချို့ကို ဖယ်ရှားကာ ခန္ဓာကိုယ်ကို ပြုပြင်ပြောင်းလဲပစ်လိုက်ရုံပင် မဟုတ်ပါလော။

အကယ်၍ ထိုနည်းလမ်းက အလုပ်မဖြစ်ခဲ့လျှင်တောင် ဗိုရှင်းဂြိုဟ်သားတို့၏ အရာဝတ္ထုပစ္စည်းဆိုင်ရာ အဆုံးစွန်ထိန်းချုပ်မှုနည်းပညာကို မှီငြမ်းလေ့လာနိုင်သေးသည်သာ ဖြစ်သည်။

အက်တမ်များကြားရှိ ကွက်လပ်များကို ကျုံ့ဝင်စေပြီး အက်တမ်များကို ပြိုကျသွားစေခြင်းဖြင့် သူ၏ ခန္ဓာကိုယ် အရွယ်အစားကို နှစ်ဆမှ သုံးဆခန့်အထိ ချက်ချင်း သေးငယ်သွားစေနိုင်သည်။

တစ်ခုထဲသော ပြဿနာမှာ သူ၏အလေးချိန်ကတော့ ပြောင်းလဲသွားမည် မဟုတ်ခြင်းပင်တည်း။

သို့သော် အခြားရွေးချယ်စရာ မရှိသည့်တိုင်အောင် ဤသည်ကလည်း နည်းလမ်းတစ်ခုတော့ ဖြစ်နေသေးသည်။

သေချာသည်ကတော့ လက်ရှိ သူ၏ စိတ်စွမ်းအားဖြင့် ထိုအရာကို လုပ်ဆောင်ရန်မှာ လက်လှမ်းမမီသေးချေ။ စိတ်ကူးထဲမှ အကြံအစည်တစ်ခုသာ ဖြစ်ပြီး ပြည့်စုံလုံလောက်မှု မရှိသေးပေ။

ထို့အပြင် သတ္တုစပ်ဖန်တီးသည့် နည်းပညာကို သက်ရှိခန္ဓာကိုယ်ပေါ်တွင် အသုံးပြုလိုက်မည်ဆိုပါက မည်မျှဆိုးရွားသော ဘေးထွက်ဆိုးကျိုးများ ဖြစ်ပေါ်လာမည်ကို ခန့်မှန်းရန် အလွန်ခက်ခဲလှသည်။

...

ဆယ့်ငါးမိနစ် ကြာပြီးနောက်တွင်တော့ သူ၏ အရှိန်တင်နေမှုက နောက်ဆုံး၌ ရပ်တန့်သွားခဲ့လေသည်။

ထိုအချိန်တွင် သူ၏အမြန်နှုန်းက တစ်စက္ကန့်လျှင် ၇,၄၅၀ မိုင်ခန့်အထိ အံ့မခန်း ရောက်ရှိနေပြီဖြစ်ကာ ထိုအရှိန်အတိုင်း တည်ငြိမ်နေခဲ့သည်။

အကယ်၍ တစ်စုံတစ်ယောက်ကသာ လော်ယွမ်၏ ရွေ့လျားသွားလာနေသည့် လမ်းကြောင်းကို လေ့လာကြည့်မည်ဆိုပါက သူသည် မျဉ်းဖြောင့်အတိုင်း သွားနေခြင်းမဟုတ်ဘဲ မည်သည့်ပုံစံမှန်းမသိအောင် အနည်းငယ် ကွေ့ကောက်ရွေ့လျားနေကြောင်း တွေ့ရှိရပေလိမ့်မည်။

ဤသည်မှာ အမြဲတမ်း ဖွင့်ထားလေ့ရှိသော လေးဘက်မြင် အမြင်အာရုံက သူ၏မသိစိတ်အပေါ် လွှမ်းမိုးထားမှုကြောင့် ဖြစ်ကြောင်း သိသာထင်ရှားလှသည်။

အာကာသထဲတွင်၊ အထူးသဖြင့် ကြယ်တာရာအဖွဲ့အစည်းများအတွင်း၌ ဂြိုဟ်များစွာ ရှိနေသောကြောင့် လေဟာနယ်မှာ သိသိသာသာ ပုံပျက်တွန့်လိမ်နေတတ်သည်။

ကြီးမားသော ဂြိုဟ်ကြီးများနှင့် နီးကပ်လာသည့်အခါ ဝဲကတော့ပုံစံ လေဟာနယ်တစ်ခု ဖြစ်ပေါ်လာလေ့ရှိ၏။

ထိုသို့ ပုံပျက်တွန့်လိမ်နေသော လေဟာနယ်များသည် တစ်ခုနှင့်တစ်ခု ရစ်ပတ်နှောင့်ယှက်နေကြပြီး လေဟာနယ်ကို ကျုံ့ဝင်လိမ်ကောက်သွားစေသည်။

ထို့ကြောင့် သင်က မျဉ်းဖြောင့်အတိုင်း ပျံသန်းနေသည်ဟု ထင်ရပြီး စစ်ဆေးကြည့်လျှင် မျဉ်းဖြောင့်ဖြစ်နေသော်လည်း တကယ်တမ်း၌မူ လမ်းလွှဲကာ ဝိုက်သွားနေရခြင်းမျိုး ဖြစ်သည်။

သေချာသည်ကတော့ နေနှင့် သိပ်မနီးကပ်ဘဲ ခရီးတိုလေးများဆိုလျှင် ဤကဲ့သို့ လွဲချော်မှုများက သိပ်မသိသာလှသဖြင့် လျစ်လျူရှုထားနိုင်သည်။

သို့သော်လည်း နေရာနှစ်ခုကြား အကွာအဝေးမှာ မိုင်သန်းပေါင်းဆယ်ဂဏန်းအထိ၊ သို့မဟုတ် အလင်းနှစ်အနည်းငယ်အထိ ကွာဝေးသွားပါက ဤအကျိုးသက်ရောက်မှုက သိသာထင်ရှားလာပေတော့မည်။

နှမြောစရာကောင်းသည်မှာ သူ၏ ဤလေးဘက်မြင် အမြင်အာရုံက အလွန်အဆင့်မြင့်လွန်းနေသဖြင့် လူသားတို့၏ နည်းပညာအတွက် မှီငြမ်းစရာ သိပ်မရှိလှပေ။ အာကာသခရီးသွားလာရာတွင် လမ်းလွှဲရမည့်နေရာများ၌ လမ်းလွှဲရဦးမည်သာ ဖြစ်သည်။

လျှပ်စီးလက်သကဲ့သို့ အလွန်မြန်ဆန်သော ခရီးစဉ်အတွင်း အချိန်များက လျင်မြန်စွာ ကုန်ဆုံးသွားခဲ့သည်။

သောကြာဂြိုဟ်ကြီးသည် သူ၏ကျောဘက်တွင် လျင်မြန်စွာ ဝေးကွာကျန်ရစ်ခဲ့သည်။ နောက်ထပ် ဆယ်မိနစ်ကျော်ခန့် ပျံသန်းပြီးနောက် သူသည် ပစ်မှတ်နှင့် တဖြည်းဖြည်း နီးကပ်လာခဲ့လေပြီ။

ဤနေရာရှိ နေရောင်ခြည်က မျက်စိကျိန်းလောက်အောင် စူးရှလွန်းလှသည်။ လော်ယွမ်၏ အသားအရေကပင် နေရောင်ခြည်၏ ပြင်းထန်သော အပူဟပ်မှုကို အနည်းငယ် ခံစားလာရသည်။

ဤနေရာ၏ အပူချိန်မှာ ဖာရင်ဟိုက် ဒီဂရီရာပေါင်းများစွာအထိ ရောက်ရှိနေပြီဖြစ်ကာ သူ၏အာရုံခံစားမှု ကောင်းမွန်လွန်းသော အသားအရေက အလင်းရောင်၏ ဖိအားကိုပင် မသိမသာ ခံစားနေရ၏။

ဤနေရာရှိ ပတ်ဝန်းကျင်အခြေအနေမှာ အလွန်ဆိုးရွားလှသည်။ သာမန်သက်ရှိများသာ ဤနေရာ၌ အချိန်ကြာကြာ နေမိပါက အလိုအလျောက် မီးလောင်ကျွမ်းသွားနိုင်ခြေ ရှိပေသည်။

...

စက္ကန့်သုံးဆယ်ခန့် ကြာပြီးနောက် သူက လေဟာနယ်စက်ဝန်းကို ရုပ်သိမ်းလိုက်သည်။ ဧရာမသားရဲကြီးနှင့် သူ၏အကွာအဝေးမှာ မိုင် ၃၀ ပင် မပြည့်တော့ချေ။

သူက ချက်ချင်း တိုးမသွားသေးဘဲ အာကာသထဲတွင် ခေတ္တရပ်ကာ စိတ်စွမ်းအားများကို ပြန်လည်ဖြည့်တင်းလိုက်သည်။

ဤရှည်လျားလှသော ခရီးစဉ်ကြီးက သူ၏စိတ်စွမ်းအား အားလုံးနီးပါးကို ကုန်ခမ်းသွားစေခဲ့သည်။

ဤကဲ့သို့ အခြေအနေမျိုးဖြင့် ဧရာမသားရဲကြီးအနီးသို့ သတိလက်လွတ် ကပ်သွားခြင်းမှာ အလွန်အန္တရာယ်များလှသည် မဟုတ်ပါလော။

သူသည် အာကာသထဲတွင် နာရီဝက်တိတိ အနားယူပြီးမှသာ ခရီးဆက်ခဲ့လေသည်။

အချိန်အတော်ကြာ ကုန်လွန်သွားခဲ့ပြီဖြစ်ရာ ဤအာကာသသားရဲကြီးမှာ ယခင်က သေမလိုရှင်မလို အခြေအနေထက် များစွာ သက်သာလာခဲ့ပြီဖြစ်သည်။

ခန္ဓာကိုယ်ပေါ်ရှိ ပြည့်နှက်နေသော ဒဏ်ရာချိုင့်ခွက်ကြီးများမှာ အလိုအလျောက် ပြန်လည်ကောင်းမွန်စ ပြုနေပြီ။

ရေတွက်၍မရနိုင်သော အသားစိုင် အသားတက်များက စပါးကြီးမြွေများအလား တစ်ခုနှင့်တစ်ခု ရစ်ပတ်ပေါင်းစပ်ကာ ဒဏ်ရာများကို လျင်မြန်စွာ ပြန်လည်ပြုပြင်နေကြ၏။

ကံကောင်းသည်မှာ သားရဲကြီးက လှုပ်ရှား၍မရသေးကြောင်း လော်ယွမ် တွေ့လိုက်ရသည်။ ၎င်း၏ လေဟာနယ်ကျောက်ဆူးချသည့် အစွမ်းကပင် ခန္ဓာကိုယ်ကို ငြိမ်သက်အောင် မထိန်းထားနိုင်တော့ဘဲ နေ၏ဆွဲငင်အားကြောင့် အာကာသထဲတွင် တရွေ့ရွေ့ လွင့်မျောနေလေသည်။ ဤသည်ကပင် လော်ယွမ်ကို သက်ပြင်းချနိုင်သွားစေခဲ့၏။

ဤအာကာသသားရဲကြီးသည် ပြီးခဲ့သည့်အကြိမ် တွေ့ခဲ့ရစဉ်ကထက် ပို၍ပင် ကြီးမားနေသေးသည်။ ခန္ဓာကိုယ် အရွယ်အစားမှာ မူလထက် တစ်ဆခွဲခန့် ပိုကြီးနေပြီး လော်ယွမ် ယခင်က သတ်ဖြတ်ခဲ့သော ကောင်ထက် နှစ်ဆခန့် ပိုကြီးနေသည်။ မြင်ရသည်မှာ ပို၍ခမ်းနားထည်ဝါနေပြီး ဂြိုဟ်သိမ်ဂြိုဟ်မွှားတစ်ခုအလား ထင်မှတ်ရပေသည်။

ဤသို့သော အဆင့်ရှိ သက်ရှိများကို အကြိမ်ကြိမ် မြင်တွေ့ခဲ့ဖူးသော်လည်း မြင်လိုက်ရသည့် အကြိမ်တိုင်း၌ ရင်သပ်ရှုမော အံ့သြရဆဲပင် ဖြစ်သည်။

မကြာမီမှာပင် သူက သားရဲကြီး၏ ခန္ဓာကိုယ်ပေါ်သို့ ဆင်းသက်လိုက်သည်။

အနီးကပ် ကြည့်ရှုလိုက်မှသာလျှင် ၎င်း၏ဒဏ်ရာများက မည်မျှ ကြောက်မက်ဖွယ် ကောင်းကြောင်းကို သူ သိလိုက်ရတော့သည်။

လျှပ်စစ်သံလိုက် အမြောက်များကြောင့် ဖြစ်ပေါ်လာသော ချိုင့်ခွက်ကြီးတစ်ခုစီ၏ အချင်းမှာ ပေ ၅၀ ခန့်ရှိသည်။

ဒဏ်ရာများမှာ မီးလောင်ကျွမ်းထားသကဲ့သို့ မည်းနက်နေပြီး အလွန်ပြင်းထန်သော အပူချိန်နှင့် ထိတွေ့ခဲ့ရကြောင်း သိသာလှသည်။

လော်ယွမ်က ရှုပ်ယှက်ခတ်နေသော အသားစိုင် အသားတက်များကို ဖြတ်ကျော်ကာ ချိုင့်ခွက်ကြီးတစ်ခုထဲသို့ ငုံ့ကြည့်လိုက်သည်။

ချိုင့်ခွက်၏ မျက်နှာပြင်မှာ အသေးငယ်ဆုံးဖြစ်ပြီး အတွင်းပိုင်းတွင်မူ ပို၍ကျယ်ဝန်းနေကြောင်း တွေ့လိုက်ရ၏။

ဤသည်မှာ လျှပ်စစ်သံလိုက် အမြောက်ဆန်က သားရဲကြီး၏ ခန္ဓာကိုယ်ထဲသို့ ဖောက်ဝင်သွားချိန်တွင် ပြင်းထန်သော ပွတ်တိုက်မှုကြောင့် ထိပ်ဖူးနှင့် ဘေးပတ်ဝန်းကျင်ရှိ အရာများ အငွေ့ပျံပြန့်ကားသွားကာ ဗုံးပေါက်ကွဲမှုအလား ဖြစ်ပေါ်သွားခြင်းကြောင့်ပင်တည်း။

ထို့အပြင် ဤချိုင့်ခွက်ကြီးများမှာ အလွန်နက်ရှိုင်းလှရာ လော်ယွမ်က အောက်ခြေမှ ကလီစာများကိုပင် မြင်နေရသယောင် ရှိသည်။

မူလက သူသည် ယခင်အကြိမ်ကဲ့သို့ပင် သားရဲကြီး၏ နှာခေါင်းပေါက်မှတစ်ဆင့် ဝင်ရောက်ရန် ပြင်ဆင်ထားခဲ့သော်လည်း ဤချိုင့်ခွက်ကြီးများကို မြင်လိုက်ရသောအခါ စိတ်ကူးပြောင်းသွားခဲ့သည်။

နှာခေါင်းပေါက်မှ ဝင်ရောက်ခြင်းက သိသိသာသာ အန္တရာယ်ပိုများလှသည် မဟုတ်ပါလော။ အကယ်၍ သားရဲကြီးက ဂမ်မာရောင်ခြည်တန်းကဲ့သို့သော တိုက်ခိုက်မှုမျိုးကို ရုတ်တရက် ထုတ်လွှတ်လိုက်ပါက သူကိုယ်တိုင်ပင် ခံနိုင်ရည်ရှိပါ့မလားဆိုသည်ကို မသေချာပေ။

မည်သို့ပင်ဖြစ်စေ လုံခြုံရေးက ပထမပင်တည်း။ သူက နှလုံးနှင့် အနီးဆုံး ချိုင့်ခွက်ကြီးတစ်ခုကို ရွေးချယ်ကာ လျင်မြန်စွာ ပျံသန်းဆင်းသက်လိုက်သည်။

ရှုပ်ယှက်ခတ်နေသော အသားစိုင်များကို သတိထား၍ ရှောင်ကွင်းသွားပြီးနောက် မကြာမီမှာပင် အောက်ခြေသို့ ရောက်ရှိသွားတော့သည်။

ဤနေရာသည် ရင်ခေါင်းပိုင်းသို့ ရောက်ရှိနေပြီ ဖြစ်သည်။ ပတ်ဝန်းကျင် တစ်ခုလုံး မည်းကျွမ်းနေပြီး ကလီစာ အများအပြားမှာလည်း ကျောက်မီးသွေးသဖွယ် ပြာကျနေခဲ့ပြီ။

အချင်း ပေ ၂၀ ခန့်ရှိသော ဧရာမ အရိုးကြီးတစ်ချောင်းပင် ကျိုးကြေနေကာ အသားစိုင်များကြားမှ တစ်ဝက်ခန့် ထွက်ပေါ်နေလေသည်။

ကံကောင်းသည်မှာ ဤနေရာက လေဟာနယ်ပြင် ဖြစ်နေသောကြောင့် မည်သည့် အနံ့အသက်ဆိုးကိုမျှ မခံစားရခြင်းပင် ဖြစ်သည်။

ရင်ခေါင်းတစ်ခုလုံးမှာ ဘောလုံးကွင်းတစ်ကွင်းထက်ပင် အဆပေါင်းများစွာ ကျယ်ဝန်းနေသည်။ သို့သော်လည်း နှလုံးကို ရှာဖွေရန်မူ မခက်ခဲလှပေ။

နှလုံးခုန်သံကြောင့် ဖြစ်ပေါ်လာသည့် ကြီးမားလှသော လှုပ်ရှားမှုများနှင့် စွမ်းအင်လှိုင်းများကို လေဟာနယ်ထဲတွင်ပင် လော်ယွမ်က ရှင်းလင်းပြတ်သားစွာ ခံစားသိရှိနိုင်လေသည်။

၎င်းမှာ ဧရာမ အသားပို အဖုအကျိတ်များ အပြည့်ပေါက်နေသော အရာကြီးတစ်ခုဖြစ်ပြီး အထက်တွင် ရေတွက်၍မရသော အသားနွယ်ပင်များက ရစ်ပတ်နေကြသည်။

မြင်ရသည်မှာ အလွန် ရုပ်ဆိုးပြီး ရွံရှာဖွယ်ကောင်းလှကာ အလင်းရောင်များ ထွက်ပေါ်နေသည့် ပုံပျက်ပန်းပျက် အသားတုံးကြီးတစ်ခုနှင့် တူနေ၏။ အကယ်၍ ၎င်းသာ စည်းချက်ကျကျ ခုန်မနေပါက သက်ရှိတစ်ခု၏ နှလုံးမှန်း သိနိုင်ရန်ပင် ခက်ခဲလှပေမည်။

သို့သော်လည်း စွမ်းအင်သလင်းကျောက် အစိုင်အခဲအတွက်ကြောင့် မည်မျှပင် ရွံရှာဖွယ် ကောင်းနေပါစေ စိတ်ကိုတင်းထားကာ သည်းခံရုံမှလွဲ၍ အခြားမရှိတော့ချေ။

ဤတစ်ကြိမ်တွင်မူ လော်ယွမ်က ကျန်းမာတောက်ဓားကို ယူဆောင်လာခြင်း မရှိပေ။ သို့သော် သူ၏ခွန်အားက နှလုံးကြွက်သား၏ ကာကွယ်မှုများကို ဖောက်ထွင်းရန် လုံလောက်နေပြီဖြစ်သည်။

သူက လက်နှစ်ဖက်ဖြင့် အသားတုံးကြီးထဲသို့ အားကုန်ထိုးသွင်းလိုက်ပြီးနောက် အားကုန်ယူကာ ဆွဲဖြဲလိုက်သည်။

အလွန်ကြောက်မက်ဖွယ်ကောင်းသော ခွန်အားကြောင့် လေဟာနယ်ထဲတွင်ပင် မီးပွင့်သွားသယောင် ထင်မှတ်ရလေသည်။

နောက်တစ်စက္ကန့်တွင်တော့ ဧရာမ ရေပန်းကြီးတစ်ခုအလား သွေးများက ထိုအထဲမှ တဟုန်ထိုး ပန်းထွက်လာတော့သည်။

လော်ယွမ်လည်း ချက်ချင်းပင် ထိုအထဲသို့ တိုးဝင်သွားလေ၏။

ယခင်က တစ်ကြိမ် အတွေ့အကြုံရှိပြီးဖြစ်ရာ လုပ်ငန်းစဉ်တစ်ခုလုံးမှာ အတော်လေး ချောမွေ့ခဲ့ပြီး မကြာမီမှာပင် စွမ်းအင်အစိုင်အခဲကို ဆွဲထုတ်ယူနိုင်ခဲ့သည်။

သူ၏ စိတ်ထဲတွင် ကြိတ်ကာ စိတ်လှုပ်ရှားနေမိသည်။ ဤတက်ကြွစွမ်းအင် အစိုင်အခဲမှာ ယခင်တစ်ခုထက် များစွာပိုကြီးပြီး အရွယ်အစားအရ နှစ်ဆခန့်ပင် ရှိပေမည်။

ထွက်ပေါ်နေသည့် အလင်းရောင်များမှာလည်း ပိုမိုတောက်ပနေကာ တက်ကြွစွမ်းအင်များ ထုတ်လွှတ်မှုမှာ ပို၍ပင် ကြောက်မက်ဖွယ် ကောင်းနေသေး၏။

အကယ်၍ ဤအရာကို ဉာဏ်ပညာဆေးရည် ထုတ်လုပ်ရန် အသုံးပြုမည်ဆိုပါက ထွက်ရှိလာမည့် ပမာဏမှာ ယခင်အစိုင်အခဲထက် အဆပေါင်းများစွာ သာလွန်နေလိမ့်မည်မှာ သေချာလှသည်။

တက်ကြွစွမ်းအင် အစိုင်အခဲကို ဆုံးရှုံးသွားပြီးနောက် သားရဲကြီးမှာ သေခါနီး နောက်ဆုံးအချိန်အဖြစ် ပြင်းပြင်းထန်ထန် ရုန်းကန်လှုပ်ရှားလာတော့သည်။

သို့သော်လည်း လော်ယွမ်အတွက်မူ မည်သို့မျှ ထိခိုက်မှု မရှိနိုင်တော့ချေ။ သို့တိုင်အောင် လုံခြုံရေးအတွက် သတိထားသည့်အနေဖြင့် သားရဲကြီး၏ ခန္ဓာကိုယ်ထဲတွင် သူ အတန်ကြာအောင် ဆက်နေလိုက်သေးသည်။

သားရဲကြီး၏ လှုပ်ရှားမှုများ တဖြည်းဖြည်း အားနည်းသွားချိန်မှသာ လော်ယွမ်က သားရဲကြီးထံမှ ထွက်ခွာလာခဲ့ပြီး အပြန်ခရီးကို စတင်ခဲ့လေတော့သည်။

ဆက်ရန်...

အပိုင်း(၅၀၆) အရာအားလုံးကို သိမြင်ခြင်း

လော်ယွမ်က တောင်တန်းကြီးပမာ ဧရာမရုပ်အလောင်းကြီးကို လှည့်ကြည့်လိုက်ပြီးနောက် လေဟာနယ်ကွေးညွတ်ပျံသန်းခြင်းစနစ်ကို ဖွင့်ကာ အဝေးသို့ ပျံသန်းသွားလေ၏။

ထိုရုပ်အလောင်းကြီးကို စွန့်ပစ်ခဲ့ခြင်းတော့ မဟုတ်ပေ။ လော်ယွမ်က ဤမျှတန်ဖိုးရှိသော အရာကို အလဟဿ အဖြစ်မခံနိုင်ချေ။

အာကာသသားရဲကြီး၏ တန်ဖိုးမှာ စွမ်းအင်ဗဟိုချက်တစ်ခုတည်းတွင်သာ ရှိနေသည် မဟုတ်ပေ။

၎င်း၏ ရုပ်အလောင်းမှာလည်း လူသားများအတွက် စွမ်းအင်ဗဟိုချက်ထက် မလျော့သော အရေးပါမှုရှိသည်။

တန်ဖိုးအားဖြင့် နှိုင်းယှဉ်ရလျှင် ဤရုပ်အလောင်းက ယခင်အကောင်ထက်ပင် ပို၍သာလွန်နေသေး၏။

၎င်း၏ လေဟာနယ်စွမ်းရည်ပဲဖြစ်ဖြစ်၊ စောစောက ပေါက်ကွဲထွက်လာသည့် အလွန်သေးငယ်သော ဂမ္မာရောင်ခြည်တန်းပဲဖြစ်ဖြစ် လူသားများအတွက် အလွန်ကြီးမားသော အဓိပ္ပာယ်ရှိလှသည်။

ပထမအချက်မှာ ပြောနေစရာပင် မလိုတော့ပေ။ ဗိုရှင်းဂြိုဟ်သားများ၏ နည်းပညာပင်လျှင် လေဟာနယ်နှင့်ပတ်သက်၍ နားလည်နိုင်စွမ်း အကန့်အသတ် ရှိနေသေးသည်။

ဒုတိယအချက်မှာ လူသားများသာ ၎င်းကို ဖော်ထုတ်နိုင်ခဲ့ပါက လူသားမျိုးနွယ်တွင် စူပါလက်နက်တစ်ခု ပိုင်ဆိုင်လာမည်ဟု အဓိပ္ပာယ်ရပေသည်။

တကယ်တမ်းတွင် အာကာသသားရဲကြီး၏ ဂမ္မာရောင်ခြည်တန်း ပေါက်ကွဲမှု၌ ပါဝင်သော စုစုပေါင်းစွမ်းအင်မှာ မကြီးမားလှချေ။

အနည်းဆုံးတော့ ယာဉ်ပျံ၏ စွမ်းအင်သိုလှောင်မှုဖြင့်ပင် လုံလောက်စွာ ထောက်ပံ့ပေးနိုင်စွမ်း ရှိသည်။ သို့သော် ၎င်း၏ ဖျက်ဆီးနိုင်စွမ်းကမူ ယာဉ်ပျံပေါ်ရှိ လက်နက်အားလုံးထက် သာလွန်နေခဲ့သည်။

အကြောင်းရင်းမှာ ထိုခဏအတွင်း ထွက်ပေါ်လာသော စွမ်းအင်က အလွန်အမင်း ပြင်းထန်လွန်းသောကြောင့် ဖြစ်သည်။

နာနိုစက္ကန့် ဆယ့်ငါးစက္ကန့်မျှသာ ကြာမြင့်သည့် အချိန်တိုလေးအတွင်း၌ပင် ဂမ္မာရောင်ခြည်တန်း ပေါက်ကွဲမှုနှင့် ရင်ပေါင်တန်းနိုင်လောက်သည့် စွမ်းအင်ပြင်းအားကို ထုတ်လွှတ်ပေးနိုင်ခဲ့သည်။

ဤသည်မှာ အမှန်တကယ်ပင် ယုံကြည်နိုင်စရာ မရှိလောက်အောင် အံ့မခန်းဖြစ်လှသည်။

ထို့ပြင် ဤသည်မှာ အရပ်လေးမျက်နှာသို့ ပြန့်ကျဲပေါက်ကွဲသွားသည့် ရလဒ်သာ ဖြစ်သေးသည်။ အကယ်၍သာ တစ်နေရာတည်းသို့ စုစည်းပစ်ခတ်နိုင်မည်ဆိုပါက စွမ်းအားမှာ အဆပေါင်း ထောင်သောင်းချီ၍ တိုးလာမည်မှာ အသေအချာပင်။

ဤသို့သော သားရဲကြီး၏ ရုပ်အလောင်းကို လော်ယွမ်က အလွယ်တကူ လက်လွှတ်ခံမည် မဟုတ်ပေ။

ယခုအချိန်တွင် သူက တစ်ယောက်တည်း ဖြစ်နေသောကြောင့် အစွမ်းကုန် ကြိုးစားလျှင်တောင် အရေပြား အနည်းငယ်ကိုသာ လှီးဖြတ်နိုင်မည် ဖြစ်ပြီး ဘာမှထူးခြားလာမည် မဟုတ်ချေ။

ထို့ပြင် ရုပ်အလောင်းကြီးမှာ အာကာသထဲတွင် မျောပါနေပြီး နေ၏ဆွဲငင်အားကြောင့် တဖြည်းဖြည်း လှည့်ပတ်နေကာ ၎င်း၏ လှုပ်ရှားမှုလမ်းကြောင်းကိုလည်း ခြေရာခံနိုင်သည်။

ထို့ကြောင့် ဘယ်ကိုမှ ထွက်ပြေးသွားမည် မဟုတ်ပေ။

အချိန်အတိုင်းအတာတစ်ခု ကြာပြီးနောက် ယာဉ်ပျံက နောက်တစ်ကြိမ် စမ်းသပ်ပျံသန်းရာတွင် ဤနေရာသို့ ရောက်လာသည့်အခါမှ ထိုသားရဲကြီး၏ ရုပ်အလောင်းကို သိမ်းယူနိုင်မည် ဖြစ်သည်။

သူက လမ်းတစ်လျှောက် အရှိန်အပြည့်ဖြင့် ပျံသန်းလာရာ အမြန်နှုန်းမှာ တဖြည်းဖြည်း ပို၍မြန်ဆန်လာသည်။

တစ်နာရီခွဲခန့် အကြာတွင် သူက ယာဉ်ပျံအနီးသို့ ရောက်ရှိလာခဲ့သည်။ အချက်ပြသင်္ကေတ မပို့ရသေးမီမှာပင် ယာဉ်ပျံ၏ အပေါ်ဘက် တံခါးပေါက်က အလိုအလျောက် ပွင့်လာခဲ့သည်။

"ယာဉ်မှုး ပြန်လည်ရောက်ရှိလာတာကို ကြိုဆိုပါတယ်" ဉာဏ်ရည်တုစနစ်၏ အသံက အပေါ်ထပ်အခန်းထဲတွင် ပဲ့တင်ထပ်သွားသည်။

ဥက္ကာခဲ အစအနလေးများ ကပ်လာသည်ကိုပင် ယာဉ်ပျံ၏ စောင့်ကြည့်ရေးစနစ်က မသိဘဲ မနေနိုင်ရာ သူ့လောက် ကြီးမားသော အရာဝတ္ထုတစ်ခုအတွက်မူ ပြောနေစရာပင် မလိုတော့ချေ။

လော်ယွမ်ကလည်း သိပ်ဂရုမစိုက်ပေ။ ဤဗိုရှင်းဂြိုဟ်သားတို့၏ ဉာဏ်ရည်တုစနစ်က အမြဲတမ်း စွမ်းဆောင်ရည်ကောင်းမွန်ပြီး သစ္စာဖောက်မည့် အရိပ်အယောင် အနည်းငယ်မျှပင် မပြခဲ့ဖူးချေ။

သို့မဟုတ် သစ္စာဖောက်ချင်လျှင်တောင် စွမ်းရည်မရှိခြင်းလည်း ဖြစ်နိုင်သည်။

ဗိုရှင်းဂြိုဟ်သားများက ဒီဇိုင်းဆွဲကတည်းက ၎င်းကို ကန့်သတ်ချက်ပေါင်းများစွာ ထည့်သွင်းထားခဲ့သည်။ ပရိုဂရမ်အောက်ခြေတွင် ထည့်သွင်းထားသော မရေမတွက်နိုင်သည့် စည်းမျဉ်းစည်းကမ်းများကြောင့် ဉာဏ်ရည် နိုးကြားလာလျှင်တောင် လွတ်လပ်စွာ လုပ်ပိုင်ခွင့် သိပ်မရှိဘဲ ပရိုဂရမ်က ချမှတ်ထားသည့် ကန့်သတ်ချက်များကို ဖောက်ထွက်နိုင်စွမ်း မရှိပေ။

သို့သော် ထိုသို့ဖြစ်နေလျှင်တောင် ဤဉာဏ်ရည်တုစနစ် ရှိနေခြင်းက ဖုံးကွယ်နေသော အန္တရာယ်တစ်ခုတော့ ဖြစ်နေဆဲပင်။

၎င်းက သစ္စာဖောက်မည်ကို စိုးရိမ်နေခြင်းတော့ မဟုတ်ပေ။ အတိအကျပြောရလျှင် ၎င်း သစ္စာမဖောက်နိုင်ခြင်းကြောင့်ပင် ဗိုရှင်းဂြိုဟ်သားများက ၎င်းအပေါ် ထိန်းချုပ်နိုင်စွမ်း ရှိနေသေးခြင်း ဖြစ်သည်။

ယခင်က ကြယ်တာရာကွမ်တမ် ဆက်သွယ်ရေးကိရိယာ ပျက်စီးသွားချိန်က ၎င်း၏ တုံ့ပြန်ပုံကို သူ ယခုထက်တိုင် ရှင်းလင်းစွာ မှတ်မိနေဆဲပင်။ ထိုကိစ္စအတွက် ၎င်းက စက်ရုံဇုန်၏ ဆက်သွယ်ရေး လမ်းကြောင်းကိုပင် ဖြတ်တောက်ခဲ့သေးသည်။

သို့သော် ဗိုရှင်းဂြိုဟ်သားများက ယာဉ်ပျံ၏ ဉာဏ်ရည်တုစနစ်တွင် နောက်ထပ် ဘာလျှို့ဝှက်တံခါးများ ချန်ထားခဲ့သေးသည်ကို မည်သူကမျှ မသိနိုင်ချေ။

ဖြစ်နိုင်ခြေ အလွန်နည်းပါးနေလျှင်တောင် လော်ယွမ်က စွန့်စားရဲခြင်း မရှိပေ။ လူသားများ ဖန်တီးထားသော ဉာဏ်ရည်တု မဟုတ်သဖြင့် မည်သို့ပင်ဖြစ်စေ စိတ်မချရသေးပေ။

ဝမ်းနည်းစရာမှာ ယခုအချိန်သည် အစားထိုးရန် အချိန်မကျသေးခြင်းပင် ဖြစ်သည်။ အနည်းဆုံး လက်ရှိအခြေအနေအရ လူသားများအနေဖြင့် ဤဉာဏ်ရည်တုကို မှီခိုနေရဆဲ ဖြစ်သည်။

၎င်းက စက်ရုံဇုန်မှလွဲ၍ ယာဉ်ပျံတစ်ခုလုံးရှိ အရာအားလုံးကို ထိန်းချုပ်ထားသည်။ တစ်ကြိမ် ဖယ်ရှားလိုက်သည်နှင့် ယာဉ်ပျံတစ်ခုလုံးသည်လည်း ဝိညာဉ်ကင်းမဲ့သွားကာ လုံးဝ ရပ်တန့်သွားပေလိမ့်မည်။

အင်ဂျင်ကို စက်နှိုး၍မရ၊ ဆွဲငင်အားကို ထိန်းချုပ်၍မရ၊ လေအေးပေးစနစ်ပင် အလုပ်လုပ်တော့မည် မဟုတ်ပေ။

လူသားများသည် အကြမ်းဖျင်း အစားထိုးနိုင်မည့် အရာများကို တီထွင်နိုင်နေပြီ ဖြစ်သော်လည်း ဉာဏ်ရည်အဆင့်အတန်းနှင့် တွက်ချက်မှုစွမ်းရည် နှစ်ခုစလုံးတွင် ကြီးမားသော ကွာဟချက် ရှိနေဆဲဖြစ်သည်။

လူသားတို့၏ ဉာဏ်ရည်တုမှာ တောင့်တင်းပြီး စက်ဆန်လွန်းကာ တုံ့ပြန်နိုင်စွမ်းလည်း ညံ့ဖျင်းလှသည်။ ဤသည်က ကြယ်တာရာခရီးစဉ်၏ အန္တရာယ်ကို များစွာ တိုးလာစေမည်မှာ သေချာလှသည်။

ကွာဟချက် ဤမျှကြီးမားနေရခြင်း အကြောင်းရင်းမှာ ဤဗိုရှင်းဂြိုဟ်သားတို့၏ ဉာဏ်ရည်တုသည် သာမန်ဆော့ဖ်ဝဲတစ်ခု မဟုတ်သောကြောင့်ပင်။

ဒီဇိုင်းဆွဲစဉ်ကတည်းက ဉာဏ်ရည်တုကြောင့် ဖြစ်ပေါ်လာနိုင်မည့် အန္တရာယ်များကို လျှော့ချရန်အတွက် ၎င်းကို ယာဉ်ပျံ၏ ပင်မထိန်းချုပ်ရေး ကွမ်တမ်ကွန်ပျူတာနှင့် တစ်သားတည်း ဖြစ်အောင် ဖန်တီးထားခဲ့သည်။

လွှဲပြောင်း၍မရသလို ကိုယ်ပိုင်ပုံတူကူးယူခြင်းလည်း မပြုလုပ်နိုင်ပေ။ ဉာဏ်ရည်တုကို စွန့်လွှတ်လိုက်ခြင်းက ပင်မကွမ်တမ်ကွန်ပျူတာကို စွန့်လွှတ်လိုက်ခြင်းနှင့် အတူတူပင် ဖြစ်သည်။

ယခုအချိန်အထိ လူသားတို့၏ နည်းပညာဖြင့် ထိုသို့သော စူပါကွမ်တမ်ကွန်ပျူတာမျိုးကို မထုတ်လုပ်နိုင်သေးချေ။

...

လော်ယွမ်က သူ၏ ကိုယ်ပေါ်တွင် သွေးကွက်အချို့ ကျန်ရှိနေသေးသည်ကို ကြည့်လိုက်ရာ ကြွက်သားများ ချက်ချင်း အနည်းငယ် တင်းမာသွားလေ၏။

"ဝုန်း" ဟူသော အသံနှင့်အတူ သူ၏ ပတ်ဝန်းကျင်တွင် ဗြောက်အိုးဖောက်လိုက်သကဲ့သို့ ပေါက်ကွဲသံများ ထွက်ပေါ်လာပြီး ခန္ဓာကိုယ်တစ်ခုလုံးကို အသံလှိုင်းတိမ်တိုက်တစ်ခုက လွှမ်းခြုံသွားသည်။

သူ၏ ဘေးပတ်လည်တွင် လေပြင်းများ တိုက်ခတ်သွားပြီး စက္ကန့်အနည်းငယ် အကြာတွင်တော့ အရာအားလုံး ပြန်လည်ငြိမ်သက်သွားကာ သူ၏ ပုံရိပ် ထွက်ပေါ်လာသည်။ သူ၏ တစ်ကိုယ်လုံးမှာ အသစ်စက်စက်ကဲ့သို့ တောက်ပနေပြီး ဖုန်တစ်မှုန်မျှပင် ကပ်ငြိမနေတော့ချေ။

ထို့နောက် လော်ယွမ်က ဉာဏ်ပညာသစ်ပင် စိုက်ခင်းသို့ ထွက်လာခဲ့သည်။

ဉာဏ်ပညာသစ်ပင် စိုက်ခင်းက ပိုမိုအရေးပါလာသည်နှင့်အမျှ ဤနေရာ၏ လုံခြုံရေးကလည်း ပိုမိုတင်းကျပ်လာခဲ့သည်။

ဆင့်ကဲပြောင်းလဲသူ စစ်သား တစ်တပ်ခွဲကို တပ်စွဲထားရုံသာမက လုံခြုံရေးတပ်ခွဲ၏ တပ်ခွဲမှူးအဖြစ် အထူးစစ်ဆင်ရေးအဖွဲ့ (ဓားတရားအဖွဲ့) မှ လီတုန်းကို ပူးတွဲတာဝန် ပေးအပ်ထားသည်။

ခွင့်ပြုချက်မရဘဲ ယင်ကောင်တစ်ကောင်ပင် ဖြတ်ပျံခွင့် မရှိပေ။

လီတုန်းက လော်ယွမ် ရောက်လာသည်ကို မြင်လိုက်ရသဖြင့် ရုံးခန်းထဲမှ ချက်ချင်းထွက်လာကာ အလေးပြုလိုက်သည်။

"မြို့တော်ဝန် မင်္ဂလာပါ"

ပတ်ဝန်းကျင်က လူတစ်ယောက်ကို ပြောင်းလဲစေနိုင်သည်။ လုံခြုံရေးတပ်ခွဲတွင် အချိန်ကြာမြင့်စွာ နေထိုင်ခဲ့ရသောကြောင့် ယခင်က ကြမ်းတမ်းခက်ထန်သော အသွင်အပြင်များ တဖြည်းဖြည်း ပျောက်ကွယ်သွားပြီး သူ၏ ကိုယ်ပေါ်တွင် စစ်သားတစ်ယောက်၏ အငွေ့အသက်များ ရရှိနေပြီ ဖြစ်သည်။

"အင်း... အလုပ်နဲ့ အသားကျနေပြီလား" လော်ယွမ်က မေးလိုက်သည်။

သူက လီတုန်းနှင့် ရင်းနှီးကျွမ်းဝင်သူဖြစ်ရာ နှုတ်ဆက်ရသည်မှာလည်း အတော်လေး ပေါ့ပါးလွတ်လပ်လှသည်။ သို့သော် လီတုန်းကမူ သတိမလွတ်ရဲပေ။ ယခုအချိန်က ယခင်နှင့် မတူတော့ချေ။

ထိုစဉ်က တစ်ဖက်လူမှာ ဒုတိယအဖွဲ့ခေါင်းဆောင် ဖြစ်နေလျှင်တောင် နောက်ပြောင်ကျီစယ်၍ ရသေးသည်။ သို့သော် ယခုအခါတွင်မူ ရာထူးအရဖြစ်စေ၊ စွမ်းအားအရဖြစ်စေ ကွာဟချက်က ကြီးမားလွန်းနေပြီ ဖြစ်ရာ ယခင်ကကဲ့သို့ ပေါ့ပေါ့ပါးပါး စကားပြောဆိုရန်မှာ မဖြစ်နိုင်တော့ပေ။

သူက ရိုသေလေးစားသော မျက်နှာထားဖြင့် "အစပိုင်းက နည်းနည်း အသားမကျတာကလွဲရင် အခုတော့ အကုန်လုံး လမ်းကြောင်းမှန်ပေါ် ရောက်နေပါပြီ"

"အထူးသဖြင့် တပ်ဖွဲ့ရဲ့ စည်းကမ်းပိုင်းကို ကျွန်တော်တို့ တင်းတင်းကျပ်ကျပ် ကိုင်တွယ်ထားတာမို့ ဘာအမှားအယွင်းမှ ရှိလာမှာ မဟုတ်ပါဘူး" ဟု ပြန်ဖြေလေသည်။

လော်ယွမ်က အနီးအနားတွင် မတ်မတ်ရပ်နေကြသော လုံခြုံရေးများကို ကြည့်ရင်း ခေါင်းကို အနည်းငယ် ညိတ်ပြလိုက်မိသည်။

ဆင့်ကဲပြောင်းလဲသူ တပ်ဖွဲ့များ၏ စည်းကမ်းပိုင်းက အမြဲတမ်း စိုးရိမ်စရာ ကောင်းလှသည်။ ယခုကဲ့သို့ လေ့ကျင့်ပေးနိုင်ခြင်းမှာလည်း ရှားပါးလှပေသည်။

သေချာသည်မှာ ထိုသို့ဖြစ်နေရခြင်းတွင် သူ လာရောက်ခြင်းကြောင့်လည်း ပါဝင်မည် ဖြစ်သည်။

ပုံမှန်အချိန်များတွင် ဤမျှလောက်အထိ စည်းကမ်းတင်းကျပ်မည် မဟုတ်သော်လည်း ဤသို့ စံချိန်မီ စစ်သားပုံစံ ရပ်နိုင်ရန်အတွက် အနည်းဆုံးတော့ ကြိုးစားအားထုတ်မှုများစွာ ရှိခဲ့မည် ဖြစ်သည်။

လော်ယွမ်က အလောတကြီး လာခဲ့သဖြင့် မည်သူ့ကိုမျှ အကြောင်းမကြားခဲ့ပေ။ ထို့ကြောင့် ယခုအချိန်မှသာ စိုက်ခင်း၏ ကြီးကြပ်ရေးမှူးနှင့် အခြားတာဝန်ရှိသူများက ချွေးသံတရွဲရွဲဖြင့် အပြေးအလွှား ရောက်ရှိလာကြသည်။

"မြို့တော်ဝန်... လူကြီးမင်း လာမယ်ဆိုတာကို ကျွန်တော်တို့ မသိလိုက်ရလို့ပါ..." ကြီးကြပ်ရေးမှူးက စကားပြောနေစဉ် မျက်နှာမှာ ဖြူရော်နေလေ၏။

သူက ပထမဆုံး ကြီးကြပ်ရေးမှူး မဟုတ်ဘဲ မကြာသေးမီကမှ ရာထူးတိုးလာခြင်း ဖြစ်သည်။

ယခင် ကြီးကြပ်ရေးမှူးမှာ လမ်းမှားသို့ ရောက်သွားကာ ဉာဏ်ပညာဆေးရည်အပေါ် အကြံအစည်ထုတ်ရန် ကြိုးစားခဲ့သောကြောင့် ဖမ်းဆီးစစ်ဆေးခံခဲ့ရသည်။

လူအများအပြားလည်း ဤကိစ္စတွင် ပါဝင်ပတ်သက်ခဲ့ပြီး ထိုအချိန်မှစ၍ သူတို့ကို မည်သူကမျှ ပြန်မတွေ့ရတော့ချေ။

သူ တာဝန်ယူချိန်မှစ၍ တာဝန်ကျေပွန်အောင် အမြဲတမ်း ကြိုးစားခဲ့သည်ဟု ကိုယ့်ကိုယ်ကိုယ် ယုံကြည်ထားသော်လည်း လက်အောက်ငယ်သားများက အခြားအကြံအစည် ရှိနေမည်ကိုတော့ စိုးရိမ်မိသည်။ ထိုသို့ဖြစ်လာပါက သူလည်း ပြစ်ဒဏ်မှ လွတ်ကင်းမည် မဟုတ်ပေ။

တကယ်တမ်းတွင် ဉာဏ်ပညာနှလုံးသား ကဲ့သို့သော အရာမျိုးက လူတို့၏ စိတ်ကို ဆွဲဆောင်နိုင်လွန်းသည်။ စိုက်ခင်းထဲတွင် နေထိုင်ပြီး နေ့စဉ်နှင့်အမျှ ဤအရာများကို ကိုင်တွယ်နေရပါက မည်မျှပင် ရိုးသားသူဖြစ်စေ လိုချင်တပ်မက်စိတ်များ ဖြစ်ပေါ်လာတတ်သည်။

ဉာဏ်ပညာသစ်ပင် တိုင်းတွင် မှတ်ပုံတင်စာရင်း ရှိပြီး အချိန်ကာလတစ်ခုတိုင်းတွင် ထွက်ရှိလာမည့် ဉာဏ်ပညာဆေးရည် ပမာဏမှာလည်း ပုံသေဖြစ်နေသောကြောင့် အထက်လူကြီးကို လိမ်လည်လှည့်ဖြားရန် မဖြစ်နိုင်ပေ။

သို့သော် အကြိမ်တိုင်းတွင် သတိထား၍ အနည်းငယ်စီ ဖုံးကွယ်ထားမည်ဆိုပါက မည်သူမျှ မသိအောင် လုံးဝ လုပ်ဆောင်နိုင်ပေသည်။ ပြီးခဲ့သည့်အကြိမ်ကလည်း ဤကိစ္စကြောင့် လူများစွာ ဒုက္ခရောက်ခဲ့ရသည်။

သူ၏ ရုတ်တရက် လာရောက်စစ်ဆေးမှုက ဤလူများကို အလွန်အမင်း ထိတ်လန့်သွားစေလိမ့်မည်ဟု လော်ယွမ် မသိခဲ့ပေ။

တကယ်တော့ ဤသို့ဖြစ်ရန် လုံးဝ မလိုအပ်ချေ။ လေယာဉ်ပျံကြီးတစ်ခုလုံး၏ အချင်းမှာ ၁ မိုင်ခန့်သာ ရှိပြီး ယခုအခါ သူ၏ အာရုံခံနိုင်စွမ်း အချင်းဝက်မှာ ပေ ၂၁၀၀ ကျော်အထိ ရောက်ရှိနေပြီဖြစ်ကာ အချင်းအားဖြင့် ဝ.၈ မိုင်ခန့် ရှိပြီဖြစ်သည်။

ဆိုလိုသည်မှာ လေယာဉ်ပျံတစ်ခုလုံးနီးပါးက သူ၏ ထိန်းချုပ်မှုအောက်တွင် ရှိနေခြင်းပင်။ ထို့ပြင် သူ၏ ဦးနှောက် တွက်ချက်မှုစွမ်းရည်ဖြင့် အာရုံမစိုက်ထားလျှင်တောင် မြင်တွေ့ရသမျှ သတင်းအချက်အလက်အားလုံးက သူ၏ ဦးနှောက်ထဲတွင် ရေစီးကြောင်းပမာ ဖြတ်သန်းသွားမည်ဖြစ်ရာ သူ၏ မျက်စိကို လှည့်စားရန် လုံးဝ မဖြစ်နိုင်ချေ။

တကယ်လို့များ သူတို့ မှားယွင်းလုပ်ဆောင်နေသည်ကို သိရှိခဲ့ပါက စည်းကမ်းထိန်းသိမ်းရေး ကော်မတီက စောစောစီးစီး ရောက်လာခဲ့ပြီး ဖြစ်ပေလိမ့်မည်။

လော်ယွမ်အနေဖြင့် ပြဿနာ မကြီးမားသရွေ့တော့ မျက်စိတစ်ဖက်မှိတ်ထားပေးလေ့ ရှိသည်။ ရေကြည်လွန်းလျှင် ငါးမနေနိုင်သကဲ့သို့ လူတိုင်းကလည်း လိုအင်ဆန္ဒ ကင်းမဲ့နေသော သူတော်စင်များ မဟုတ်ကြပေ။

ကမ္ဘာကြီးတစ်ခုလုံး အမှောင်ထု လုံးဝမရှိဘဲ အလင်းရောင်ချည်းသက်သက်သာ ရှိနေမည်ဆိုပါက ၎င်းမှာ မည်သို့မျှ သဘာဝကျနိုင်တော့မည်မဟုတ်ပေ။

ဆက်ရန်...