အခန်း (၅၀၇-၅၀၈)

အပိုင်း(၅၀၇) မျိုးဆက်သစ်လူသား

ပြီးခဲ့သည့်ရက်များအတွင်း ချွေ့ဝေ့ချွမ်၏ မိသားစုတွင် အရေးကြီးသည့် ကိစ္စကြီးနှစ်ခု ဖြစ်ပျက်ခဲ့သည်။

ပထမအချက်မှာ နှစ်နှစ်ကျော်ကြာ ပြင်းပြင်းထန်ထန် ကြိုးစားပညာသင်ယူခဲ့ပြီးနောက် သူက အငယ်တန်း လျှပ်စစ်သံလိုက် အင်ဂျင်နီယာ စာမေးပွဲကို ခက်ခက်ခဲခဲ အောင်မြင်သွားခဲ့ကာ လျှပ်စစ်သံလိုက် ဓာတ်ခွဲခန်းတစ်ခုတွင် အလုပ်သင်အဖြစ် ဝင်ရောက်ခွင့် ရရှိသွားခြင်းပင် ဖြစ်သည်။

သို့သော်လည်း ယခုခေတ်ကာလက အရင်လို မဟုတ်တော့ပေ။ လူ့အဖွဲ့အစည်းက အင်ဂျင်နီယာများအပေါ် ထားရှိသည့် သတ်မှတ်ချက်များမှာ ပို၍ မြင့်မားလာခဲ့သည်။

အငယ်တန်း အင်ဂျင်နီယာ အရည်အချင်းစစ် စာမေးပွဲကို အောင်မြင်ခဲ့လျှင်တောင်မှ ထိုအရာက အလုပ်ခွင်ဝင်ရန် အစပျိုးရုံသာ ရှိသေးသည်။

လွန်ခဲ့သော နှစ်အနည်းငယ်ကလို အလုပ်ထဲတွင် ခြောက်လ သို့မဟုတ် တစ်နှစ်ခန့် လုပ်ရုံဖြင့် လက်ထောက် အင်ဂျင်နီယာအဖြစ် ရာထူးတိုးနိုင်သည့် အချိန်ကောင်းများမှာ လုံးဝ ပြန်မလာနိုင်တော့ချေ။

ထင်ရှားသော ရလဒ်တစ်ခုမှ မပြသနိုင်ပါက လက်ထောက် အင်ဂျင်နီယာအဖြစ် ရာထူးတိုးရန်ဟူသည်မှာ လုံးဝ မဖြစ်နိုင်တော့ပေ။

အလုပ်သင် တစ်ယောက်သာ ဖြစ်နေသေးသော်လည်း သူ၏ လစာနှင့် ခံစားခွင့်များက သိသိသာသာ မြင့်တက်လာခဲ့ပြီး မိသားစု စားဝတ်နေရေးမှာလည်း အတော်လေး အဆင်ပြေလာခဲ့သည်။

ပို၍ အရေးကြီးသည်မှာ အပြင်သွား၍ သူ၏ အလုပ်အကြောင်း ပြောလိုက်သည်နှင့် အခြားသူများထံမှ အံ့သြမင်သက်သံများကို ကြားရတတ်ပြီး မနာလိုအားကျစွာဖြင့် မြှောက်ပင့်ပြောဆိုခြင်းများကိုပါ ခံရလေ့ရှိသည်။

ယခုအချိန်သည် သိပ္ပံနှင့် သုတေသနကို ဦးစားပေးသော ခေတ်ဖြစ်ပြီး အရင်းအမြစ် အားလုံးကိုလည်း သုတေသန လုပ်ငန်းများအတွက်သာ အဓိကထား ထောက်ပံ့ပေးနေသည်။

သုတေသနလုပ်ငန်းခွင်သို့ ဝင်ရောက်နိုင်ခြင်းက သာမန်လူတန်းစား ဘဝမှ အထူးအခွင့်အရေးရ လူတန်းစားတစ်ရပ်အဖြစ်သို့ ခြေတစ်လှမ်းတည်းဖြင့် ကူးပြောင်းသွားနိုင်သကဲ့သို့ပင်။

လစာနှင့် ခံစားခွင့်များ ကောင်းမွန်ရုံသာမက ငွေကြေးမည်မျှပင် ပေးပေး ဝယ်ယူ၍မရနိုင်သော လူမှုအဆင့်အတန်းနှင့် အခွင့်အရေးများကိုပါ ရရှိနိုင်ပေသည်။

ဒုတိယ အရေးကြီးသည့် ကိစ္စမှာတော့ သူ၏ ဇနီးသည်က နောက်ဆုံးတွင် ကလေးမီးဖွားခဲ့ပြီး သူ့အတွက် သားယောကျ်ားလေး တစ်ယောက် မွေးဖွားပေးခဲ့ခြင်း ဖြစ်သည်။

သို့သော် ဤကိစ္စနှင့် ပတ်သက်၍ သူ၏ စိတ်ထဲတွင် အနည်းငယ် ရှုပ်ထွေးနေမိသည်။

အကြောင်းမှာ ထိုကလေးက မိဘနှစ်ပါးနှင့် လုံးဝ မတူသောကြောင့်ပင်။ ဥပမာအားဖြင့် သူနှင့် သူ၏ ဇနီးမှာ အသားအနည်းငယ် ညိုသော်လည်း သားဖြစ်သူ၏ အသားအရေက အလွန် ဖြူဝင်းနေသည်။

ထို့အပြင် သူတို့ ဇနီးမောင်နှံ နှစ်ဦးစလုံးက မျက်ရစ်မပါသော်လည်း သားဖြစ်သူမှာမူ မျက်ရစ်များနှင့် ဖြစ်နေသည်။ မွေးကင်းစ အရွယ်လေးသာ ရှိသေးသော်လည်း ရုပ်ရည်မှာ အလွန် ချောမောခန့်ငြားနေပြီ ဖြစ်သည်။

အကယ်၍ ရုပ်ရည်သွင်ပြင် ကွဲပြားမှုလောက်သာ ဆိုလျှင် ထားလိုက်ပါတော့။ သို့သော် သာမန် ကလေးငယ်များနှင့် လုံးဝမတူညီသော ကလေး၏ ထူးခြားသည့် တိုးတက်မှုများက သူ့ကို ရင်ထိတ်စေခဲ့သည်။

ကလေးမွေးပြီး လဝက်ပင် မပြည့်သေးချိန်တွင် ဇနီးဖြစ်သူ၏ မိခင်နို့ရည်က ကလေးအတွက် မလုံလောက်တော့ပေ။ ထို့ကြောင့် ဆရာဝန်၏ အကြံပြုချက်အရ ဆန်ပြုတ်ကျဲကျဲဖြင့် အစားထိုး တိုက်ကျွေးခဲ့ရသည်။

ကံကောင်းထောက်မစွာပင် ဤသားဖြစ်သူ၏ ခန္ဓာကိုယ် ကြံ့ခိုင်မှုက သာမန်ထက် များစွာ သာလွန်နေပြီး အစာခြေဖျက်နိုင်စွမ်းလည်း အလွန် ကောင်းမွန်လှသဖြင့် အချိန်တိုအတွင်းမှာပင် အသားကျသွားခဲ့သည်။

ထို့နောက် သုံးလသား အရွယ်သို့ ရောက်သောအခါတွင် ကလေးက စကားပြောတတ်နေပြီ ဖြစ်ပြီး မကြာမီမှာပင် ပုံမှန် လမ်းလျှောက်တတ်နေပြီ ဖြစ်သည်။

သားဖြစ်သူ၏ ဉာဏ်ရည်ထက်မြက်မှုက မယုံနိုင်လောက်အောင် အံ့မခန်း ဖြစ်နေသော်လည်း အစွန်းရောက်ဆုံး အိပ်မက်ထဲတွင်ပင် သူ ဤသို့ မယုံကြည်နိုင်လောက်အောင် ထူးချွန်လိမ့်မည်ဟု မမျှော်လင့်ခဲ့ဖူးပေ။

ဒါက... သာမန် ကလေးတစ်ယောက် ဟုတ်သေးရဲ့လား။

ချွေ့ဝေ့ချွမ်၏ စိတ်ထဲတွင် အတွေးများ ဗြောင်းဆန်နေရင်းဖြင့် မကြာမီ အိမ်သို့ ရောက်ရှိလာခဲ့သည်။

"အဖေ... ပြန်လာပြီလား" တံခါးကို ဖွင့်လိုက်သည်နှင့် သားဖြစ်သူက ဝမ်းသာအားရ အော်ခေါ်လိုက်သည်။

ဇနီးဖြစ်သူမှာ ဟင်းချက်နေဆဲ ဖြစ်သည်။ ချွေ့ဝေ့ချွမ်က သူ၏ စာရွက်စာတမ်းအိတ်ကို ချလိုက်ရင်း ပြုံးကာ မေးလိုက်သည်။

"ဒီနေ့ သား လိမ်လိမ်မာမာ နေရဲ့လား"

"သား အရမ်းလိမ္မာတာ... မယုံရင် အမေ့ကို မေးကြည့်"

ထိုအချိန်တွင် ဇနီးဖြစ်သူက ချက်ပြုတ်ပြီးသား ဟင်းလျာများကို စားပွဲပေါ်သို့ လာချလိုက်သည်။ ထို့နောက် သားဖြစ်သူ၏ ပါးပြင်ကို ဆွဲယူကာ အားရပါးရ နမ်းလိုက်ရင်း ပြုံးကာ ပြောလိုက်သည်။

"အင်း... သားသားက အလိမ္မာဆုံးပဲ... ဒီနေ့တောင် စာလုံးရေ တစ်ရာကျော် မှတ်မိနေပြီ... နောက်ရက်အနည်းငယ်လောက်ဆိုရင် သူ့ဘာသာသူ စာဖတ်နိုင်တော့မှာ"

"အမေ... သား အခုလည်း ပုံပြင်စာအုပ်တွေ ဖတ်လို့ရနေပါပြီ... စာလုံး အနည်းငယ်လောက်ပဲ မသိသေးတာ" သားဖြစ်သူက ဘေးမှနေ၍ မကျေမချမ်း ဝင်ပြောလိုက်သည်။

ချွေ့ဝေ့ချွမ်က ကြားပြီးနောက် အနည်းငယ် တုံ့ဆိုင်းသွားကာ တွေဝေစွာဖြင့် ပြောလိုက်သည်။

"ဒီလောက်စောစော စာသင်တာ သိပ်မကောင်းဘူး ထင်တယ်... သူက ငယ်သေးတာကို"

ဇနီးဖြစ်သူက ဂရုမစိုက်သည့်ဟန်ဖြင့် သားဖြစ်သူ၏ ပါရမီအပေါ် ဂုဏ်ယူဝင့်ကြွားစွာ ပြောလိုက်သည်။

"ဘာမကောင်းရမှာလဲ... ကျွန်မတို့သားက ပါရမီရှင်လေးပဲ... ဘာသင်သင် တစ်ခေါက်တည်းနဲ့ အကုန်တတ်တယ်... နောင်ကျရင် သိပ္ပံပညာရှင်ကြီး ဖြစ်လာမှာ သေချာတယ်"

ကလေးက လေးလသားပဲ ရှိသေးတာလေ... ငါ့သားက ဒီလောက်အထိ ပါရမီရှင် ဖြစ်ဖို့ဆိုတာ မဖြစ်နိုင်ပါဘူး။

ချွေ့ဝေ့ချွမ်က ပါးစပ်ဟလိုက်သော်လည်း နောက်ဆုံးတွင် ဘာမှမပြောဖြစ်တော့ချေ။

"ပြီးခဲ့တဲ့တစ်ခေါက် ဆေးရုံသွားတုန်းက ဆရာဝန်ပြောတာ ကြားခဲ့ရတယ်... အစိုးရက စောစောစီးစီး ပညာပေးတဲ့ အတန်းတွေ ဖွင့်မယ်တဲ့... ကျွန်မတို့သားကို အဲ့ဒီမှာ ထားရမလား"

ဇနီးဖြစ်သူက သားဖြစ်သူ၏ ရုန်းကန်နေမှုကို ဂရုမစိုက်ဘဲ ကလေးကို ချစ်ခင်မြတ်နိုးစွာ ပွေ့ချီကာ ကုလားထိုင်ပေါ်တွင် ထိုင်လိုက်ပြီး စိတ်အားထက်သန်စွာဖြင့် ဆက်ပြောလိုက်သည်။

ချွေ့ဝေ့ချွမ်က ကြည့်ရင်းဖြင့် စိတ်ထဲတွင် အနည်းငယ် မနာလိုသလို ခံစားလိုက်ရသည်။

ကလေးမွေးပြီးကတည်းက ဇနီးဖြစ်သူ၏ အာရုံစိုက်မှု အားလုံးက ကလေးထံသို့သာ ရောက်သွားခဲ့သည်။

သို့သော်လည်း ကိုယ့်သားအရင်းကို မနာလိုနေခြင်းမှာ အဓိပ္ပာယ်မရှိမှန်း သူ ကောင်းကောင်း သိပါသည်။

"အဲဒီအတန်းတွေက အနည်းဆုံး သုံးနှစ်ပြည့်မှ လက်ခံတာမလား... စောပါသေးတယ်"

"မစောတော့ဘူး... ဒီအတန်းတွေက ကျွန်မတို့သားလိုမျိုး နည်းပညာသစ်နဲ့ မွေးလာတဲ့ ကလေးတွေအတွက် သီးသန့်ရည်ရွယ်တာတဲ့... ခြောက်လပြည့်တာနဲ့ ကျောင်းထားလို့ရပြီ... မထားဘူးဆိုရင် နောက်ပိုင်း ပညာရေးမှာ သူများနောက် နောက်ကျကျန်ခဲ့လိမ့်မယ်" ဇနီးဖြစ်သူက တက်ကြွစွာ ရှင်းပြသည်။

"ဒါဆိုလည်း ထားလိုက်လေ... ဘာပဲဖြစ်ဖြစ် သားလေးရဲ့ ပညာရေးကိုတော့ အနှောင့်အနှေး အဖြစ်မခံနိုင်ဘူး" ချွေ့ဝေ့ချွမ်က သူ၏ ဇနီး အကျင့်ကို ကောင်းကောင်း သိသည်။

သူမ၏ စိတ်ထဲတွင် ဆုံးဖြတ်ချက် ချပြီးနေပြီ ဖြစ်ပြီး ယခု သူ့ကို မေးခြင်းမှာ အတည်ပြုရုံ သက်သက်သာ ဖြစ်သည်။

နည်းပညာသစ်ဖြင့် မွေးဖွားလာသည့် အခြားကလေးများကလည်း ဤကဲ့သို့ ပါရမီရှင်တွေပဲ ဖြစ်နေမလား။ သူ၏ စိတ်ထဲတွင် စိုးရိမ်မှုတစ်ရပ် ရုတ်တရက် ပေါ်ပေါက်လာခဲ့သည်။

သုတေသန လုပ်ငန်းခွင်တွင် အချိန်ကြာကြာ လုပ်ကိုင်လေလေ ဉာဏ်ရည်ဉာဏ်သွေး၏ အရေးပါမှုကို ချွေ့ဝေ့ချွမ်က ပို၍ နားလည်သဘောပေါက်လာလေလေ ဖြစ်သည်။

သူလိုမျိုး သာမန်လူထက် အနည်းငယ်သာ ပိုထက်မြက်သည့် လူတစ်ယောက်အနေဖြင့် အစွမ်းကုန် ကြိုးစားလျှင်တောင်မှ ခရီးပေါက်မည် မဟုတ်ပေ။

အကယ်၍ မမျှော်လင့်ထားသည့် အပြောင်းအလဲများ မရှိပါက လက်ထောက် အင်ဂျင်နီယာ ရာထူးက သူ၏ ဘဝအတွက် အမြင့်ဆုံး ရည်မှန်းချက် ဖြစ်လာလိမ့်မည်။

အကယ်၍ ဤကလေးများအားလုံးက ပါရမီရှင်တွေချည်းသာ ဖြစ်နေမည် ဆိုပါက သူတို့ အရွယ်ရောက်လာချိန်တွင် မိမိတို့လို လူဟောင်းများမှာ ဖယ်ရှားခံရတော့မည်မှာ အသေအချာပင်။

............

ဆယ်ကြိမ်ကျော်ခန့် စမ်းသပ် ပျံသန်းမှုများ ပြုလုပ်ပြီးနောက် မိခင်ယာဉ်ကြီးသည် သောကြာဂြိုဟ်၏ အနားသို့ ရောက်ရှိလာခဲ့ပြီ ဖြစ်သည်။

ဤနေရာမှနေ၍ ကမ္ဘာမြေကို သာမန် မျက်စိဖြင့် လှမ်းကြည့်မည် ဆိုပါက အခြားသော ကြယ်များနှင့် ဘာမှကွာခြားမှု မရှိတော့ပေ။

ဧရာမ သားရဲကြီး၏ အလောင်းကို တူးဖော်ရေး လုပ်ငန်းများ စတင် ဆောင်ရွက်နေပြီ ဖြစ်သည်။ မြောက်မြားစွာသော အင်ဂျင်နီယာသုံး စက်ရုပ်များသည် ပုရွက်ဆိတ်များကဲ့သို့ သားရဲကြီး၏ နေရာအနှံ့အပြားတွင် တွယ်ကပ်နေကြသည်။

၎င်း၏ အရေပြား မျက်နှာပြင် အများစုကို ခွာချထားပြီးဖြစ်ရာ ကြောက်မက်ဖွယ်ကောင်းလောက်အောင် ရှုပ်ထွေးလိမ်ယှက်နေသော ကြွက်သားများကို မြင်တွေ့နေရသည်။

၎င်း၏ ဧရာမ ကိုယ်ထည်ကြီးမှာ မိခင်ယာဉ်ကြီးထက်ပင် များစွာ မသေးငယ်လှပေ။ အနီးအနား ၃ မိုင်ခန့်အကွာတွင် ကြားခံ စခန်းအဖြစ် အသုံးပြုနေသော အရေးပေါ်ယာဉ်မှာ ထိုသားရဲကြီးနှင့် ယှဉ်လိုက်ပါက သုံးပုံတစ်ပုံပင် မပြည့်ချေ။

ပထမအကြိမ် ဧရာမ သားရဲကြီး၏ အလောင်းမှ အစိတ်အပိုင်းများ ခွဲထုတ်ရယူစဉ်က လုပ်သားအင်အား အမြောက်အမြား လိုအပ်ခဲ့သော်လည်း ယခုအကြိမ် စစ်ဆင်ရေးကတော့ ယခင်ကထက် အဆပေါင်းများစွာ ပိုမို အဆင့်မြင့်မားနေပြီ ဖြစ်သည်။

လုပ်ငန်းခွင် တစ်ခုလုံးတွင် လူတစ်ယောက်မှ မရှိသလောက်ပင်။ အားလုံးကို အဝေးထိန်း စနစ်ဖြင့် စက်ရုပ်များနှင့် ဒရုန်းများကို အသုံးပြုကာ အာကာသထဲတွင် အလုပ်လုပ်ဆောင်နေကြခြင်း ဖြစ်သည်။

၎င်းတို့သည် ပျားများကဲ့သို့ သားရဲကြီး၏ ခန္ဓာကိုယ်ပေါ်မှ ပျံတက်သွားကာ အရေးပေါ်ယာဉ်ဆီသို့ သွားရောက်ကြပြီး ယာဉ်အတွင်းမှ အခြားစက်ရုပ် အများအပြားကလည်း သားရဲကြီးဆီသို့ ပြန်လည် ပျံသန်းလာကြသည်။

ထို အင်ဂျင်နီယာသုံး စက်ရုပ်များမှာ တစ်ရုပ်လျှင် အမြင့်ပေ ၄၀ ခန့်စီ ရှိပြီး စွမ်းအင် အလွန် ပြင်းထန်ကာ အာကာသထဲတွင် ပျံသန်းနိုင်စွမ်းလည်း ရှိကြသည်။ ၎င်းတို့၏ ကြီးမားလှသော ခွန်အားများကြောင့် သားရဲကြီး၏ ခန္ဓာကိုယ်ကို အလွယ်တကူ ခွဲစိတ်နိုင်ပြီး တာဝန်များကို ပြီးပြည့်စုံစွာ ထမ်းဆောင်နိုင်ကြသည်။

......

ထိုအချိန်တွင် အရေးပေါ်ယာဉ်အတွင်းရှိ စီမံကိန်း ကွပ်ကဲရေး စင်တာ၌ အလွန် စွမ်းအားမြင့်မားသော သံလိုက်ပဲ့တင်ရိုက်ခတ်မှု ပုံရိပ်ဖော်စက်နှင့် အိတ်က်စ်ရေး စက်တို့မှတစ်ဆင့် သားရဲကြီး၏ အတွင်းပိုင်း တည်ဆောက်ပုံကို အသေးစိတ် ဖော်ပြထားသည့် ရှင်းလင်းပြတ်သားသော ပုံရိပ်တစ်ခုက ဖန်သားပြင် အလယ်တွင် ပေါ်လာခဲ့သည်။

နယ်ပယ် အသီးသီးမှ ကျွမ်းကျင်ပညာရှင် ဆယ်ဦးကျော်ခန့်သည် ထိုတည်ဆောက်ပုံ ပုံကြမ်းကို သေချာစွာ လေ့လာနေကြသည်။

သားရဲကြီး၏ အရွယ်အစားမှာ အလွန် ကြီးမားလွန်းလှသည်။ လူသားများအနေဖြင့် သားရဲကြီး တစ်ကောင်လုံးကို ယာဉ်ထဲသို့ ထည့်သွင်းရန်မှာ လုံးဝ မဖြစ်နိုင်ပေ။

ယာဉ်ပေါ်ရှိ ပစ္စည်းများ သိုလှောင်ရန် နေရာလွတ်များနှင့် ပြီးခဲ့သည့် နှစ်များအတွင်း ကုန်ဆုံးသွားခဲ့သော ရိက္ခာများ နေရာတွင် အစားထိုး ဖြည့်တင်းမည် ဆိုလျှင်တောင်မှ အသား တန်ချိန် တစ်သိန်းကျော်ခန့်သာ ဆံ့မည် ဖြစ်သည်။ ထိုပမာဏမှာ သားရဲကြီး၏ တစ်ရာခိုင်နှုန်းပင် မပြည့်ချေ။

ထို့ကြောင့် အရေးကြီးသော အစိတ်အပိုင်းများကို လွတ်ကျန်ရစ်မှု မရှိစေရန်အတွက် သားရဲကြီး၏ ခန္ဓာကိုယ် တည်ဆောက်ပုံကို ခွဲခြမ်းစိတ်ဖြာ လေ့လာရန်မှာ အထူးပင် အရေးကြီးလှသည်။

"သူ့ရဲ့ မျိုးဗီဇပြောင်းလဲမှုက တော်တော်လေး ပြင်းထန်တယ်... ခန္ဓာကိုယ်ထဲက ကလီစာအများစုက ကျုံ့ဝင်သွားပေမဲ့ တချို့အင်္ဂါအစိတ်အပိုင်းတွေကတော့ ပိုပြီး အားကောင်းလာတယ်... ဥပမာ နှလုံးလိုမျိုးပေါ့"

ဝဝဖိုင့်ဖိုင့် လူလတ်ပိုင်းအရွယ် ပညာရှင်တစ်ဦးက အံ့သြတကြီးဖြင့် ပြောလိုက်သည်။ သူသည် ဇီဝဗေဒပညာရှင် တစ်ဦးဖြစ်ပြီး ကမ္ဘာပျက်ကပ်ဘေး မတိုင်မီကတည်းက သန္ဓေပြောင်း သက်ရှိများဆိုင်ရာ ဇီဝတုပဗေဒ သုတေသန လုပ်ငန်းများကို လုပ်ကိုင်ခဲ့သူ ဖြစ်ရာ အတွေ့အကြုံ အလွန် ကြွယ်ဝသူ ဖြစ်သည်။

"စက်ရုပ်တွေကနေ ပို့လိုက်တဲ့ အတွင်းပိုင်းပုံရိပ်တွေအရ နှလုံးနားမှာ အဖုအကျိတ်တွေ အများကြီး ထွက်နေတယ်... သက်ရှိတွေရဲ့ ဆင့်ကဲပြောင်းလဲမှုတိုင်းက အကြောင်းပြချက်ရှိတယ်... ဒီအဖုအကျိတ်တွေကလည်း ထူးခြားတဲ့ လုပ်ဆောင်ချက်တွေ ရှိနေမှာ သေချာတယ်"

"ဖြစ်နိုင်ချေ တော်တော်များတယ်လို့ ကျွန်တော်လည်း ထင်တယ်... ဒါပေမဲ့ သန္ဓေပြောင်းသားရဲတွေက သာမန် ဆင့်ကဲပြောင်းလဲလာတဲ့ သက်ရှိတွေမှ မဟုတ်တာ... မျိုးဗီဇဖောက်ပြန်တဲ့ ရောဂါဖြစ်နိုင်ချေကိုလည်း ထည့်သွင်းစဉ်းစားရမယ်"

"ကနဦး သုတေသနလုပ်ဖို့ နမူနာတချို့ အရင်ယူရလိမ့်မယ်... အခုချက်ချင်း ကောက်ချက်ချဖို့ဆိုတာ စောလွန်းသေးတယ်" အခြား ဇီဝဗေဒပညာရှင် တစ်ဦးက စဉ်းစားခန်းဖွင့်ကာ ဝင်ပြောလိုက်သည်။

ဆက်ရန်...

အပိုင်း(၅၀၈) အကျိတ်လုံး၏ လျှို့ဝှက်ချက်

အာကာသသားရဲကြီး၏ ဧရာမခန္ဓာကိုယ်ကြီးသည် ယနေ့ခေတ် လူသားများအတွက်ပင်လျှင် သေးငယ်လှသော လုပ်ငန်းခွင်တစ်ခုတော့ မဟုတ်ပေ။

ထိုတူးဖော်ရေးစက်ကိရိယာများနှင့် အမျိုးမျိုးသော ထောက်လှမ်းရေးကိရိယာများကို ထုတ်လုပ်ရန်အတွက် စက်မှုဇုန်တစ်ခုလုံးက နေ့ရောညပါ အလုပ်လုပ်နေခဲ့ပြီး စက်ယန္တရားအမြောက်အမြားကို ရေစီးကြောင်းတစ်ခုပမာ အဆက်မပြတ် ထုတ်လုပ်နေခဲ့သည်။

ယခုအချိန်တွင် လူသားအရေအတွက် ငါးသန်း၊ ခြောက်သန်းခန့်သာ ကျန်ရှိတော့သည်ဟု ဆိုသော်လည်း ကုန်ထုတ်လုပ်မှုစွမ်းအားကို ယှဉ်ကြည့်မည်ဆိုပါက ကမ္ဘာပျက်ကပ်ဘေးမတိုင်မီက သမ္မတနိုင်ငံထက် လုံးဝလျော့နည်းခြင်း မရှိပေ။ နည်းပညာအဆင့်အတန်းဆိုလျှင်တော့ နှိုင်းယှဉ်၍ပင် မရနိုင်တော့ချေ။

ပေသုံးဆယ်ကျော် အမြင့်ရှိသော ဂန်းဒမ်းစက်ရုပ်ပုံစံ ဧရာမအင်ဂျင်နီယာသုံးစက်ရုပ်ကြီး တစ်ရုပ်ကို အပိုပစ္စည်းထုတ်လုပ်ရေးလမ်းကြောင်း ပြုပြင်မွမ်းမံမှု ပြီးစီးသွားသည်နှင့် တစ်နေ့လျှင် အစီးရေ ဒါဇင်နှင့်ချီ၍ ထုတ်လုပ်နိုင်ပြီဖြစ်သည်။

ဤသည်မှာ လုပ်ငန်းလည်ပတ်မှု ထက်ဝက်သာရှိသေးသည့် အခြေအနေဖြစ်ပြီး အကယ်၍ အရေးပေါ်အခြေအနေ သို့မဟုတ် စစ်မက်ဖြစ်ပွားချိန်မျိုးတွင်ဆိုပါက ထုတ်လုပ်နိုင်စွမ်းမှာ ယခုထက် အဆပေါင်းများစွာ မြင့်တက်လာဦးမည်ဖြစ်သည်။

လဝက်ခန့်တိုတောင်းသော အချိန်ကာလအတွင်းမှာပင် အမျိုးအစားစုံလင်လှသော အင်ဂျင်နီယာသုံးစက်ရုပ် အစီးရေ တစ်ထောင်ကျော်က ဤလုပ်ငန်းခွင်အတွင်းသို့ ဝင်ရောက်လာခဲ့ကြသည်။

သို့သော် ဤတာဝန်ကြီး ပြီးဆုံးသွားသည့်အခါ ထိုစက်ရုပ်အများစုကို မီးဖိုထဲပြန်သွင်းကာ အခြေခံဒြပ်စင်များအဖြစ် ပြန်လည်ခွဲထုတ်ပစ်ရမည်ဖြစ်သည်။

အကြောင်းမှာ လက်ရှိလူသားများအတွက် အာကာသယာဉ်ကြီးမှာ အနည်းငယ် ကျဉ်းမြောင်းကျပ်တည်းနေပြီဖြစ်ရာ ထိုစက်ယန္တရားများကို ထားသိုရန် အပိုနေရာ မရှိတော့သောကြောင့်ပင်။

လော်ယွမ်က ဗဟိုထိန်းချုပ်ရေးခန်းမထဲတွင် မတ်တတ်ရပ်ရင်း မိုင်သိန်းနှင့်ချီ ဝေးကွာသော နေရာမှ ကျိုင်းကောင်အုပ်ကြီးပမာ လှုပ်ရှားနေကြသော အင်ဂျင်နီယာသုံး စက်ယန္တရားများကို ကြည့်ကာ ရင်ထဲတွင် သက်ပြင်းတစ်ချက် ချမိသွားသည်။

ဤနှစ်တွေအတွင်း အရှိန်အဟုန်ဖြင့် လေ့လာစုပ်ယူမှုနှင့် ဖွံ့ဖြိုးတိုးတက်မှုများအရ လူသားတို့၏ နည်းပညာအဆင့်အတန်းသည် လွန်ခဲ့သော အနှစ်ခြောက်ဆယ်ခန့်က ဗိုရှင်းဂြိုဟ်သားတို့၏ အဆင့်အတန်းနှင့် အခြေခံအားဖြင့် တန်းတူဖြစ်နေပြီဖြစ်သည်။ အချို့နေရာများတွင် အားနည်းချက်များ ရှိနေသေးသော်လည်း အချို့ကဏ္ဍများတွင်မူ ကျော်လွန်နိုင်ခဲ့ပြီဖြစ်သည်။

လူသားများသည် ဤနှစ်များအတွင်း ဗိုရှင်းနည်းပညာများကို သာမန်ကာလျှံကာ လေ့လာစုပ်ယူခဲ့ခြင်းမျိုး မဟုတ်ပေ။ စနစ်နှစ်ခုကြား အပြန်အလှန် လေ့လာမှီငြမ်းမှုများမှတစ်ဆင့် နည်းပညာအမြောက်အမြားကို ဆန်းသစ်တီထွင်နိုင်ခဲ့ပြီး ဆရာ့ထက်လက်စွမ်းထက်သည့် အခြေအနေသို့ပင် ရောက်ရှိနေပြီဖြစ်သည်။

နေရာကွက်ကျား အောင်မြင်မှုလေးများသာဖြစ်ပြီး စနစ်တကျ မရှိသေးသဖြင့် ဗိုရှင်းဂြိုဟ်သားတို့၏ နည်းပညာအဆင့်ကို တစ်ကြိမ်တည်းဖြင့် အလုံးစုံ ကျော်လွန်သွားနိုင်ခြင်း မရှိသေးသော်လည်း၊ လူသားတို့သည် ဗိုရှင်းနည်းပညာ၏ ဘောင်ထဲမှ တရားဝင် ရုန်းထွက်နိုင်ခဲ့ပြီဖြစ်ကာ ရှေ့သို့ တဖြည်းဖြည်း ချီတက်နေပြီဖြစ်ကြောင်းတော့ သက်သေပြနေသည်။

နှမြောစရာကောင်းသည်မှာ ဤအရာများသည် ဗိုရှင်းဂြိုဟ်သားတို့၏ လွန်ခဲ့သော အနှစ်ခြောက်ဆယ်က နည်းပညာအဆင့်သာဖြစ်ပြီး တကယ့်လက်တွေ့ နည်းပညာအဆင့်အတန်းနှင့် ယှဉ်လျှင် နောက်ကျနေဆဲပင် ဖြစ်သည်။

ဗိုရှင်းဂြိုဟ်သားတို့၏ ပထမဆုံးသော ကြယ်တာရာသွား အာကာသယာဉ်ဖြစ်သည့်အတွက် ၎င်း၏ အဆင့်မြင့်မားမှုမှာ ယုံမှားသံသယဖြစ်ဖွယ် မရှိပေ။ သို့သော် ထိုအရာသည် ယင်းယဉ်ကျေးမှု၏ အမြင့်ဆုံးနည်းပညာတော့ လုံးဝမဟုတ်ချေ။

အဘယ်ကြောင့်ဆိုသော် ဤကဲ့သို့ ကြယ်တာရာများကြား ခရီးဝေးနှင်ရသော စူးစမ်းရှာဖွေရေးယာဉ်များအတွက် အဆင့်မြင့်မားမှုဆိုသည်မှာ ဒုတိယဦးစားပေးသာဖြစ်ပြီး အရေးအကြီးဆုံးမှာ လုံခြုံရေးနှင့် တည်ငြိမ်မှုသာဖြစ်သည်။

ထို့ကြောင့် အာကာသယာဉ်တွင် အများဆုံးအသုံးပြုထားသည်မှာ အသေချာဆုံးနှင့် အခိုင်မာဆုံးသော နည်းပညာများသာဖြစ်ပြီး ဓာတ်ခွဲခန်းထဲတွင် စမ်းသပ်ဆဲဖြစ်သော မရင့်ကျက်သေးသည့် နည်းပညာများကို ဤနေရာတွင် လုံးဝအသုံးပြုမည် မဟုတ်ပေ။

အနှစ်ခြောက်ဆယ် သို့မဟုတ် ခုနစ်ဆယ်၊ ရှစ်ဆယ်ခန့် ကွာဟမှုဆိုသည်မှာ နည်းပညာဖွံ့ဖြိုးတိုးတက်မှု ခေတ်တစ်ခေတ်ကို ကျော်လွန်သွားရန် လုံလောက်ရုံသာမက နည်းပညာတော်လှန်ရေးတစ်ရပ်ကိုပါ ဖြစ်ပေါ်စေနိုင်ပြီး နည်းပညာပိုင်းဆိုင်ရာ ဧရာမကွာဟချက်ကြီးကိုပါ ဖြစ်တည်စေနိုင်သည်။

အမှန်တကယ်တော့ ဤမျှကြီးမားသော ကွာဟချက်ကြီး ရှိနေသော်လည်း လက်ရှိ လူသားတို့၏ အံ့မခန်း ဖွံ့ဖြိုးတိုးတက်မှုအမြန်နှုန်းအရဆိုလျှင် နောက်ထပ် ဆယ်စုနှစ် သုံးလေးခုခန့် အချိန်ပေးလိုက်ပါက သူတို့ကို လိုက်မီရန် သို့မဟုတ် ကျော်တက်သွားရန် လုံလောက်သည်ဟု လော်ယွမ် ခန့်မှန်းထားသည်။

ဒုတိယမြောက် စွမ်းအင်ဗဟိုချက်က ဉာဏ်ပညာသစ်ပင်ကို စတင်ပျိုးထောင်ပေးပြီးနောက်ပိုင်း ဉာဏ်ပညာဆေးရည် ထုတ်လုပ်မှုမှာ တစ်နှစ်လျှင် ပြွန်ပေါင်း လေးထောင်ကျော်အထိ ရောက်ရှိလာခဲ့ပြီး ထုတ်လုပ်မှုနှုန်း လေးဆအထိ တိုးတက်လာခဲ့သည်။

တစ်နှစ်လျှင် ဉာဏ်ရည် ၁၆ မှတ်မှ ၁၈ မှတ်အထိရှိသော စူပါသိပ္ပံပညာရှင် သုံးထောင်ခန့် ထွက်ပေါ်လာခြင်းက လူသားတို့၏ နည်းပညာဖွံ့ဖြိုးတိုးတက်မှုအပေါ် တွန်းအားပေးနိုင်စွမ်းမှာ သာမန်သိပ္ပံပညာရှင် ထောင်ပေါင်းများစွာထက်ပင် ပိုမိုများပြားလှသည်။

ဤအရေအတွက်မှာ နှစ်စဉ်နှစ်တိုင်း ဖြစ်ပေါ်နေမည်ဖြစ်ရာ ဗိုရှင်းဂြိုဟ်သားများဘက်တွင် တူညီသော ဦးနှောက်စွမ်းရည်မြှင့် နည်းပညာမျိုး မရှိသရွေ့ လူသားများနှင့် သူတို့ကြားမှ နည်းပညာကွာဟချက်သည် တဖြည်းဖြည်း ကျဉ်းမြောင်းလာမည်သာ ဖြစ်သည်။

တစ်ခုတည်းသော ပြဿနာမှာ ဗိုရှင်းဂြိုဟ်သားများ မည်သည့်အချိန်တွင် ရောက်လာမည်နည်း ဆိုသည်ပင်ဖြစ်သည်။

ပြီးခဲ့သည့်အကြိမ်ကဲ့သို့ အနှစ်ငါးဆယ်ခန့် အချိန်ယူရနိုင်သော်လည်း ထိုသို့ဖြစ်နိုင်ခြေမှာ အလွန်နည်းပါးလှသည်။ အဖြစ်နိုင်ဆုံးမှာ ဤသုံးလေးနှစ်အတွင်း သို့မဟုတ် ထို့ထက်ပင် ပို၍ မြန်ဆန်နိုင်သည်။

ဤသည်မှာ လောင်းကစားတစ်ရပ်ပင်။ အကယ်၍ သူတစ်ယောက်တည်းသာ ဆိုပါက လော်ယွမ်သည် အိမ်ရာမဲ့ခွေးတစ်ကောင်လို ထွက်ပြေးပုန်းရှောင်နေမည့်အစား တစ်ကြိမ်တစ်ခါလောက်တော့ စွန့်စားကြည့်လိုက်မည်ဖြစ်သည်။ သို့သော် လူသားမျိုးနွယ်တစ်ခုလုံးအတွက်မူ ဤသို့စွန့်စားရန် မဖြစ်နိုင်ချေ။

အကယ်၍ စစ်ရှုံးခဲ့ပါက လူသားများကို စောင့်ကြိုနေသည်မှာ မျိုးတုံးပျောက်ကွယ်ခြင်းသာ ဖြစ်ပေလိမ့်မည်။ ဗိုရှင်းဂြိုဟ်သားတို့သည် ၎င်းတို့အတွက် ကြီးမားသော ခြိမ်းခြောက်မှုဖြစ်စေနိုင်သည့်အပြင် သေခန်းပြတ် ရန်ငြိုးဖွဲ့ထားပြီးဖြစ်သော လူမျိုးတစ်မျိုးကို သူတို့အနီးအနားတွင် ဆက်လက်ရှင်သန်ခွင့် ပြုထားမည်မဟုတ်ပေ။

ဤပေးဆပ်ရမှုက ကြီးမားလွန်းလှသည်။

ရှင်သန်ရေးသည် ယဉ်ကျေးမှုတစ်ခု၏ ပထမဆုံးနှင့် အရေးအကြီးဆုံးသော တာဝန်ဖြစ်သည်။ ရှင်သန်နိုင်ရန်အတွက် အရာအားလုံးကို ရှောင်ကွင်းရမည်ဖြစ်ပြီး အင်အားကြီးမားသော ရန်သူကို ခေတ္တရှောင်ရှားရခြင်းမှာ ဘာမှမဟုတ်ပေ။

သူက အဝေးမှ ကြယ်ရောင်များကို ငေးကြည့်နေမိသည်။ ထိုအရပ်မျက်နှာမှာ ဗိုရှင်းဂြိုဟ်သားများ ရှိနေသည့်နေရာပင် ဖြစ်သည်။ သူက အချိန်အတော်ကြာသည့်တိုင်အောင် မလှုပ်မယှက် ရပ်နေခဲ့ပြီး ဉာဏ်ရည်တုစနစ်၏ အသံထွက်ပေါ်လာမှသာ သတိပြန်ဝင်လာတော့သည်။

"သတိပေးချက်... သံဓာတ်ပါဝင်သည့်ပစ္စည်းများ၏ လက်ကျန်မှာ ၃၁ ရာခိုင်နှုန်းသာ ကျန်ရှိတော့ပြီး အန္တရာယ်ရှိသည့်မျဉ်းနားသို့ ကပ်နေပါပြီ"

လော်ယွမ်က တစ်ချက်ကြည့်လိုက်သော်လည်း သိပ်ပြီး ဂရုမစိုက်လှပေ။ ဤကာလအတွင်း အင်ဂျင်နီယာသုံး စက်ရုပ်အမြောက်အမြားကို ထုတ်လုပ်ခဲ့ရသဖြင့် သတ္တုဒြပ်စင် အများအပြား ကုန်ဆုံးသွားခဲ့ရသည်။ သို့သော် ထိုကုန်ဆုံးသွားမှု အများစုကို ဒြပ်စင်ခွဲထုတ်သည့် မီးဖိုမှတစ်ဆင့် ပြန်လည်ရယူနိုင်ပြီး လက်ကျန်ပမာဏကို ပြန်လည်ဖြည့်တင်းနိုင်သည်။

"လက်ကျန် ဒြပ်စင်အားလုံးကို စာရင်းလုပ်ပြစမ်း"

"ဟုတ်ကဲ့ပါ ယာဉ်မှုး"

လော်ယွမ်က ဖန်သားပြင်ပေါ်ရှိ လက်ကျန်စာရင်းပြဇယားကို ကြည့်လိုက်သည်။ လက်ကျန်များထဲတွင် အနည်းဆုံးကုန်ကျသည်မှာ ရေဖြစ်ပြီး ထိုကုန်ကျမှုမှာ လျစ်လျူရှုထားနိုင်လောက်အောင် နည်းပါးလှသည်။

မည်သို့ပင်ဆိုစေကာမူ အာကာသယာဉ်တွင် ပြီးပြည့်စုံသော ရေသံသရာလည်ပတ်မှုစနစ် ရှိနေပြီး သုံးစွဲပြီးရေများကို ပြန်လည်အသုံးပြုသည့် နည်းပညာမှာလည်း အလွန်ရင့်ကျက်နေပြီဖြစ်ရာ ရေတစ်စက်ကိုမျှ အလေအလွင့် ဖြစ်စေမည်မဟုတ်ပေ။

ကုန်ကျသွားသော ရေများမှာ အနုမြူပေါင်းစပ်မှု လောင်စာအတွက် အသုံးပြုသွားခြင်းသာ ဖြစ်သည်။

အခြားသော ဒြပ်စင်များမှာမူ အနည်းနှင့်အများဆိုသလို လက်ကျန်လျော့နည်းနေပြီဖြစ်သည်။ အများဆုံးကျန်ရှိနေသည်မှာ ၈၀ ရာခိုင်နှုန်းခန့်ဖြစ်ပြီး အနည်းဆုံးမှာမူ သံဒြပ်စင်ကဲ့သို့ပင် ၃၀ ရာခိုင်နှုန်းဝန်းကျင်သို့ ကပ်နေပြီဖြစ်သည်။

အသစ်ထုတ်လုပ်ထားသော အမျိုးမျိုးသော အင်ဂျင်နီယာသုံး စက်ယန္တရားများ၊ စက်ကိရိယာများနှင့် အာကာသတိုက်လေယာဉ်များအပြင် လူနေထူထပ်သော စခန်းရှိ လူဦးရေ ၅ သန်း၊ ၆ သန်းခန့်၏ စားဝတ်နေရေးအတွက် လိုအပ်သော နေ့စဉ်သုံးပစ္စည်း အမျိုးမျိုးကလည်း ကြီးမားသော ကုန်ကျမှုတစ်ခုဖြစ်သည်။

ဤဒြပ်စင်အများစုကို ပြန်လည်အသုံးပြုနိုင်သည် ဆိုသော်လည်း အစိတ်အပိုင်း အတော်များများမှာမူ အမြဲတမ်း အသုံးပြုသွားရမည်ဖြစ်သည်။

"မထွက်ခွာခင် လက်ကျန်ပစ္စည်းတွေကို တစ်ကြိမ်လောက်တော့ ပြန်ဖြည့်ထားမှ ရမယ်ထင်တယ်" လော်ယွမ်က စိတ်ထဲမှ တိတ်တဆိတ် တွေးလိုက်သည်။

............

တစ်လကြာပြီးနောက်။

ထိုအချိန်တွင် အာကာသသားရဲကြီး၏ ဝမ်းဗိုက်တစ်ခုလုံးကို ခွဲခြမ်းစိတ်ဖြာပြီးဖြစ်ကာ ဧရာမ ကလီစာအစိတ်အပိုင်းများကို အင်ဂျင်နီယာသုံးစက်ရုပ်များက အရေးပေါ်ယာဉ်ဆီသို့ ဆွဲယူပျံသန်းသွားကြသည်။

ယခုအခါ အရေးပေါ်ယာဉ်တစ်ခုလုံးမှာ ဧရာမ ဓာတ်ခွဲခန်းကြီးတစ်ခုအဖြစ် ပြောင်းလဲသွားခဲ့ပြီဖြစ်သည်။ ခဲရည်စိမ်ထားသော လေလုံအကာအကွယ်ဝတ်စုံများကို ဝတ်ဆင်ထားသည့် သုတေသီအမြောက်အမြားသည် အသားတောင်၊ သွေးချောင်းများကြားတွင် အလုပ်များစွာဖြင့် ကူးလူးသွားလာနေကြသည်။ မြင်ကွင်းတစ်ခုလုံးမှာ သွေးသံရဲရဲဖြစ်နေပြီး သားသတ်ရုံတစ်ခုထဲသို့ ရောက်နေသကဲ့သို့ပင်။

အလယ်ဗဟိုတွင် နှစ်ပိုင်းပိုင်းခံထားရသော်လည်း ပေတစ်ရာနီးပါး အမြင့်ရှိနေဆဲဖြစ်သော နှလုံးသားကြီးဘေးတွင် လူအများအပြား ဝိုင်းရံနေကြသည်။

အနီးအနားရှိ အထူးတီထွင်ဖန်တီးထားသော ဧရာမစက်ကိရိယာကြီးတစ်ခုက စက်ရုပ်လက်တံများကို ဝှေ့ယမ်းကာ ၎င်းကို အသေးစိတ် စကင်ဖတ်စစ်ဆေးမှုများ ပြုလုပ်နေသည်။

"အကျိတ်လုံးက အခဲပုံစံမဟုတ်ဘူး... ရှစ်လိမ်ခွေဖွဲ့စည်းပုံစနစ်နဲ့ တွေ့ရတယ်" မန်ကျွင်းဟွာက စကင်ဖတ်ထားသော သုံးဘက်မြင် ဖန်သားပြင်ကို သေချာကြည့်ရှုရင်း ပြောလိုက်ရာ ဘေးနားရှိ လက်ထောက်အချို့က ချက်ချင်း မှတ်တမ်းတင်လိုက်ကြသည်။

သူ့ပုံစံက အတော်လေးငယ်ရွယ်ပြီး မျက်နှာသွင်ပြင်ကလည်း ကလေးဆန်နေဆဲဖြစ်သည်။ အသက် ၂၇ နှစ်သာရှိသေးပြီး သုတေသနလုပ်ငန်းခွင်သို့ ဝင်ရောက်လာသည်မှာ လေးနှစ်ခန့်သာ ရှိသေးသည်။

သူသည် ကပ်ဘေးအပြီး သိပ္ပံသုတေသနအဖွဲ့သို့ အသစ်ဝင်ရောက်လာသော ပထမဆုံး ဘွဲ့ရကျောင်းသားအသုတ်မှ ဖြစ်သည်။ အလုပ်လုပ်သက် မကြာသေးသော်လည်း သူ၏စွမ်းဆောင်ရည်မှာ အလွန်ထူးချွန်လှသည်။

ဤနှစ်များအတွင်း စွမ်းအင်မြင့်ရူပဗေဒနှင့် သင်္ချာနယ်ပယ်များတွင် ကောင်းမွန်သော ပင်ကိုယ်စွမ်းရည်များ ရှိကြောင်း ပြသနိုင်ခဲ့ပြီး အလုပ်သင်ကာလအတွင်းမှာပင် တန်ဖိုးရှိသော သုတေသနစာတမ်းများစွာကို ထုတ်ဝေနိုင်ခဲ့သည်။

လူသားများနှင့် ဗိုရှင်းဂြိုဟ်သားများကြား အကြီးမားဆုံး ကွာဟချက်က ဘာလဲဟုမေးလျှင် သီအိုရီပိုင်းဆိုင်ရာ နယ်ပယ်ပင်ဖြစ်သည်ဟု ဖြေရပေမည်။

ဤကဏ္ဍနှင့်ပတ်သက်၍ လူသားများ ရရှိထားသော အချက်အလက်မှာ အလွန်နည်းပါးလှပြီး လူသားများကိုယ်တိုင် ဖြည့်စွက်လေ့လာနေရသည်။

ယခုလက်ရှိ လူသားတို့၏ နည်းပညာအဆင့်အတန်းနှင့် သီအိုရီအဆင့်အတန်းမှာ လုံးဝ ကိုက်ညီမှုမရှိဟု ဆိုနိုင်သည်။

နည်းပညာများစွာကို မည်သို့ထုတ်လုပ်ရမည်ကို သိရှိပြီး ဗိုရှင်းဂြိုဟ်သားများနှင့် ကွာခြားမှုမရှိသော ထုတ်ကုန်များကို ထုတ်လုပ်နိုင်သော်လည်း ၎င်းကို ထောက်ပံ့ပေးနိုင်မည့် သက်ဆိုင်ရာ သီအိုရီ အထောက်အထားများ လုံးဝမရှိပေ။

၎င်းမှာ ကျောင်းသားတစ်ယောက် ပုစ္ဆာတွက်ရာတွင် ဖော်မြူလာကို အလွတ်ကျက်မှတ်ပြီး အတင်းအကျပ် အစားသွင်းတွက်ချက်နေသော်လည်း အဘယ်ကြောင့် ဤသို့ဖြစ်ရသည်ကို လုံးဝနားမလည်နိုင်သည့် အခြေအနေမျိုးနှင့် တူနေသည်။

ယခုအချိန်တွင် ၎င်း၏ သက်ရောက်မှုမှာ သိပ်မကြီးမားသေးသော်လည်း ဤကွက်လပ်ကို မဖြည့်ဆည်းနိုင်ပါက နည်းပညာဖွံ့ဖြိုးတိုးတက်မှုကို ဆိုးရွားစွာ ထိခိုက်စေမည်ဖြစ်သည်။

ဝမ်းနည်းစရာကောင်းသည်မှာ သီအိုရီပိုင်းဆိုင်ရာ သုတေသနပညာရှင် အများစုမှာ ကပ်ဘေးမတိုင်မီက ရှင်းကျင်းမြို့တွင် ရှိနေခဲ့ကြခြင်းဖြစ်သည်။

အဘယ်ကြောင့်ဆိုသော် ထိုနေရာရှိ စက်ကိရိယာများက ပိုမိုခေတ်မီဆန်းသစ်သောကြောင့် ဖြစ်သည်။

မျှော်လင့်ချက်မြို့တော်နှင့် အခြားမြို့သုံးမြို့တွင် ကျန်ရစ်ခဲ့သူများမှာ လက်ချိုးရေတွက်၍ ရလောက်အောင်ပင် နည်းပါးလှသည်။

မန်ကျွင်းဟွာသည် ထိုသို့သော အခြေအနေမျိုးအောက်တွင် ထင်ပေါ်ကျော်ကြားလာခဲ့ပြီး အဓိက အရည်အချင်းရှိသူတစ်ဦးအဖြစ် သတ်မှတ်ခံခဲ့ရသည်။

လွန်ခဲ့သောတစ်နှစ်က ဉာဏ်ပညာဆေးရည်ကိုပင် ချီးမြှင့်ခံခဲ့ရပြီး ယခုအခါ အကြီးတန်း သုတေသီတစ်ဦး ဖြစ်နေလေပြီ။

"အဏုကြည့်ဖွဲ့စည်းပုံမှာ ဆဲလ်တွေ မရှိဘူး... အဲဒီအစား ချည်မျှင်လို ဝါဂွမ်းလို အရာမျိုးတွေ တွေ့ရတယ်... ဖွဲ့စည်းပုံက အတော်လေး ခိုင်မာတယ်... သာမန်ကြွက်သားတွေထက် ခြောက်ဆ၊ အရေပြားထက် နှစ်ဆခွဲလောက် ပိုမိုခိုင်မာတယ်... တိကျတဲ့လုပ်ဆောင်ချက်ကိုတော့ ဆက်လက်လေ့လာဖို့ လိုအပ်သေးတယ်"

"နှလုံးနဲ့ ဆက်သွယ်ထားတဲ့နေရာက... ဖွဲ့စည်းပုံက နည်းနည်း ထူးခြားနေတယ်" မန်ကျွင်းဟွာက ခဏမျှ ကြည့်ရှုပြီးနောက် ဖန်သားပြင်ပေါ်တွင် လျင်မြန်စွာ ခလုတ်အချို့ကို နှိပ်လိုက်သည်။

ထိုဖွဲ့စည်းပုံအလွှာသည် အဏုကြည့်အဆင့်သို့ ချက်ချင်း ပြောင်းလဲသွားပြီး သူ၏မျက်လုံးများက အရောင်လက်သွားသည်။

"ဒါက အက်တမ်စစ်ထုတ်တဲ့ ဇကာပဲ... အက်တမ်တွေနဲ့ မော်လီကျူးတွေကို စစ်ထုတ်ပေးတာ... ဒါက သူ့ရဲ့ စွမ်းအင်ဖြတ်သန်းတဲ့ လမ်းကြောင်းဖြစ်ဖို့ များတယ်"

စွမ်းအင်သည် နှလုံး၏ စွမ်းအင်ဗဟိုချက်မှတစ်ဆင့် အကျိတ်လုံးဆီသို့ စီးဆင်းသွားပြီး အကျိတ်လုံးအတွင်းရှိ ရှစ်လိမ်ခွေ ဖွဲ့စည်းပုံမှတစ်ဆင့် စွမ်းအင်အဆင့်ကို မြှင့်တင်ကာ ဂမ်မာရောင်ခြည်တန်းအဖြစ် ပြောင်းလဲသွားခြင်းဖြစ်မည်ဟု သူ စိတ်ထဲမှ တွေးတောနေမိသည်။

သို့သော် ဝမ်းနည်းစရာမှာ စွမ်းအင်ပို့ဆောင်သည့် လမ်းကြောင်းကို ရှာမတွေ့ခြင်းပင်။ ဤဂမ်မာရောင်ခြည်တန်း ပေါက်ကွဲမှုကို မည်သို့ထုတ်လွှတ်သနည်းဆိုသည်မှာ စဉ်းစားစရာပင်။

စွမ်းအင်ကူးပြောင်းမှုလား... ဒါမှမဟုတ် တခြားဒြပ်ပစ္စည်းတွေရဲ့ ပြွန်လမ်းကြောင်းကနေလား။

ဒီအကျိတ်လုံး ရာနဲ့ချီပြီး ဘယ်လိုမျိုး ပူးပေါင်းလုပ်ဆောင်ကြသလဲ။

ပြီးတော့ ဒီလောက်တိုတောင်းတဲ့ အချိန်လေးအတွင်းမှာ ဘယ်လိုလုပ် ချက်ချင်း ပေါက်ကွဲထွက်သွားအောင် လုပ်နိုင်တာလဲ။

......

မရေမတွက်နိုင်သော အတွေးအမြင်များက မန်ကျွင်းဟွာ၏ ဦးနှောက်ထဲမှ ပေါက်ကွဲထွက်ပေါ်လာသော်လည်း ၎င်းက သူ၏ တွေဝေမှုများကို ပိုမိုနက်ရှိုင်းသွားစေသည်။

ကံမကောင်းစွာဖြင့် ရရှိထားသော အချက်အလက်များက နည်းပါးလွန်းနေသေးရာ ပိုမိုနက်ရှိုင်းပြီး ကျယ်ပြန့်သော သုတေသနများ ပြုလုပ်ရန် လိုအပ်နေသေးသည်။

သူက ခေါင်းကို ကုတ်လိုက်မိသည်။ ဉာဏ်ပညာဆေးရည်ကို သောက်သုံးပြီးကတည်းက သူ့ကို ဤမျှလောက် အချိန်ကြာမြင့်စွာ ခေါင်းစားစေသည့်ကိစ္စမျိုး မရှိသလောက် နည်းပါးသွားခဲ့ပြီဖြစ်သည်။

သို့သော် ဤအရာက သူ၏ စိတ်ဝင်စားမှုကို ပိုမိုနှိုးဆွပေးလိုက်သကဲ့သို့ ဖြစ်သွားသည်။

ဒီအထဲမှာ လူမသိသူမသိတဲ့ လှုံ့ဆော်မှုပုံစံတစ်မျိုးမျိုး သေချာပေါက် ရှိရမည်... ရှာမတွေ့သေးတဲ့ ရူပဗေဒ၊ ဓာတုဗေဒ ဖြစ်စဉ်တစ်ခုခုလည်း ဖြစ်နိုင်သည်။

သူ တစ်နေကုန် အလုပ်များနေခဲ့သော်လည်း ရလဒ်ကတော့ အကန့်အသတ်နှင့်သာ ရှိနေခဲ့သည်။ အဘယ်ကြောင့်ဆိုသော် ဤနေရာရှိလုပ်ငန်းမှာ အသုံးဝင်သော အစိတ်အပိုင်းများကို ရွေးချယ်ရန်အတွက် အကိုးအကားအဖြစ်သာ အသုံးပြုသော ကနဦးသုတေသနမျှသာ ဖြစ်သောကြောင့်ပင်။ ပိုမိုနက်ရှိုင်းသော သုတေသနများအတွက်မူ မိခင်ယာဉ်ကြီးဆီသို့ ပြန်သွားမှသာ ပြုလုပ်နိုင်မည်ဖြစ်သည်။

သို့သော် ဤအကျိတ်လုံးသည် ဂမ်မာရောင်ခြည်တန်း ပေါက်ကွဲမှု ထုတ်လွှတ်ခြင်းနှင့် လုံးဝသက်ဆိုင်နေကြောင်းကိုတော့ သူ သေချာပေါက် အတည်ပြုနိုင်ခဲ့သည်။

ညစာစားချိန်တွင် သူနှင့် တစ်ဝိုင်းတည်းထိုင်နေသော သုတေသီအချို့နှင့် ခဏတဖြုတ် ဆွေးနွေးဖြစ်ခဲ့သည်။

သူတို့ထဲမှ တစ်ဦးမှာ ဇီဝအာရုံကြောနယ်ပယ်မှ ကျွမ်းကျင်သူတစ်ဦးဖြစ်ပြီး သူ၏ အကြံဉာဏ်အချို့က မန်ကျွင်းဟွာကို အတွေးသစ် အမြင်သစ်များစွာ ရရှိစေခဲ့သည်။

ဆက်ရန်...