အခန်း (၅၀၉-၅၁၀)

အပိုင်း(၅၀၉) အိမ်စေမလေး

ထမင်းစားပြီးသည်နှင့် မန်ကျွင်းဟွာက အခန်းထဲသို့ ကမန်းကတန်း ပြန်လာခဲ့သည်။

ဤစီမံကိန်းအတွက် ဤအရေးပေါ် အာကာသယာဉ်ကို တရားဝင် သိပ္ပံသုတေသနယာဉ်အဖြစ် ပြုပြင်မွမ်းမံထားပြီးဖြစ်သည်။

ကြီးငယ်မဟူသော ဓာတ်ခွဲခန်းအချို့အပြင် အပြင်ဘက်ပတ်လည်တွင် လူဦးရေ တစ်သိန်းခန့် နေထိုင်နိုင်သော လူနေရပ်ကွက်များကိုပါ တည်ဆောက်ထားသည်။

သို့သော် အခန်းအများစုမှာ အလွတ်ဖြစ်နေပြီး လူတစ်ထောင်ကျော်မျှသာ နေထိုင်ကြသည်။ အများစုမှာ သုတေသီများသာ ဖြစ်ကြ၏။

"သခင်... ပြန်ရောက်လာပြီလား" တံခါးဖွင့်လိုက်သည်နှင့် သင်းပျံ့သော ရနံ့လေးနှင့်အတူ အိမ်စေမလေးတစ်ဦးက ခြေသံဖွဖွဖြင့် လျှောက်လာပြီး တံခါးဝတွင် ရိုသေစွာ ပြောလိုက်သည်။

သူမက အလွန်လှပပြီး နံနက်ခင်းနှင်းပေါက်လေးများ တင်ကျန်နေသည့် နှင်းပန်းလေးတစ်ပွင့်လို ဖြူစင်နုနယ်လှသည်။

ကြီးမားကြည်လင်နေသော မျက်လုံးဝိုင်းဝိုင်းကြီးများက သနားကရုဏာ သက်ချင်စရာကောင်းနေသည်။

ပေါင်တံဖြူဖြူဖွေးဖွေးများကို ဖော်ပြနေသော အိမ်စေဝတ်စုံလေးက သူမကို အနိုင်ကျင့်ချင်စရာကောင်းလောက်အောင် နူးညံ့သိမ်မွေ့ပုံ ပေါက်နေစေသည်။

သူမ၏ ခန္ဓာကိုယ် အစိတ်အပိုင်းတိုင်းက အပြစ်ဆိုဖွယ်ရာမရှိအောင် ပြီးပြည့်စုံနေပြီး အသားအရေမှာလည်း အပြစ်အနာအဆာကင်းကာ ဖြူဖွေးနုဖတ်နေသဖြင့် အစစ်အမှန် လူသားတစ်ယောက်ဟုပင် မထင်ရပေ။

အမှန်တကယ်လည်း သူမက လူအစစ်မဟုတ်ဘဲ စက်ရုပ်အိမ်စေမလေး တစ်ဦးသာ ဖြစ်သည်။

သူမ၏ အရိုးအဆစ်များကို ပေါ့ပါးသော သတ္တုများဖြင့် ပြုလုပ်ထားပြီး သွေးသားများကိုမူ လူသားတို့၏ သွေးသားဖွဲ့စည်းပုံအတိုင်း ပုံတူကူးချ ဖန်တီးထားသည်။

ထို့အပြင် ရိုးရှင်းသော ဉာဏ်ရည်တုစနစ်ကိုပါ ထည့်သွင်းထားသဖြင့် လူသားများနှင့် အဆင်ပြေချောမွေ့စွာ စကားပြောဆိုနိုင်ပြီး အိမ်မှုကိစ္စ အဝဝနှင့် အခြားသော အထူးလုပ်ဆောင်ချက်များကိုပါ ပြီးပြည့်စုံစွာ လုပ်ဆောင်ပေးနိုင်သည်။ ထို့ကြောင့် လူလွတ်သုတေသီများအကြားတွင် အလွန်ရေပန်းစားလှသည်။

သို့ရာတွင် ဤစက်ရုပ်အိမ်စေမများကို လူပျိုသုတေသီများသာ ဝယ်ယူခွင့်ရှိပြီး အပြင်ဘက်လောကတွင်မူ တွေ့မြင်ရခဲလှသည်။

အချက်အလက်အချို့အရ စက်ရုပ်အိမ်စေမများကို ဝယ်ယူပြီးနောက် သုတေသီများ၏ အိမ်ထောင်ကျနှုန်းမှာ သနားစရာကောင်းလောက်အောင် ကျဆင်းသွားခဲ့သည်။

အကယ်၍သာ ၎င်းတို့ကို အများပြည်သူအား လွတ်လပ်စွာ ဝယ်ယူခွင့်ပြုလိုက်ပါက လူမှုရေးပြဿနာများစွာ ဆက်တိုက်ဖြစ်ပေါ်လာနိုင်ပေသည်။

သုတေသီများအတွက်မူ သူတို့၏ အကြီးမားဆုံးသော ပေးဆပ်မှုမှာ သူတို့၏ ဉာဏ်ပညာကို အသုံးချရန်ပင်ဖြစ်ရာ မိသားစု၊ ကလေး စသည့်ကိစ္စများဖြင့် သူတို့၏ အချိန်များကို အနှောင့်အယှက် မဖြစ်စေသည်ကသာ အကောင်းဆုံးဖြစ်သည်။

ထို့အပြင် သုတေသီများ၏ မွေးရာပါ အခန်းအောင်းချင်သော စရိုက်လက္ခဏာများအရ သူတို့သည် သီးခြားလွတ်လပ်သော ကိုယ်ပိုင်ဟန်ရှိသည့် အိမ်ထောင်ဖက်မျိုးကို လိုအပ်မည် မဟုတ်ပေ။

မန်ကျွင်းဟွာက သူ၏ ကာကွယ်ရေးဝတ်စုံကို အိမ်စေမလေးအား ညင်သာစွာ ချွတ်ခွင့်ပြုလိုက်ရင်း ပေါ့ပေါ့ပါးပါး မေးလိုက်သည်။

"ရှောင်လင်း... ဒီနေ့ ဘယ်လိုနေလဲ"

"အင်း... အဆင်ပြေပါတယ်... သခင့်ကို နည်းနည်းလွမ်းနေတာကလွဲရင်ပေါ့" ရှောင်လင်းက ဖြေလိုက်သည်။

"ဒါကလည်း တတ်နိုင်တဲ့ကိစ္စမှ မဟုတ်တာ... ငါလည်း အလုပ်လုပ်ရဦးမယ်လေ... နောက်ကြာရင်တော့ အဆင်ပြေသွားမှာပါ... အဲဒီကျရင် တစ်ရက်လောက် သေချာနားရမှာပါ"

မန်ကျွင်းဟွာက အိမ်စေမလေး၏ မျက်လုံးထဲမှ တိတ်တခိုး ချစ်မြတ်နိုးမှုနှင့် ဝမ်းနည်းအားငယ်နေမှုများကို ကြည့်လိုက်သည်။

ဤသည်မှာ သူကိုယ်တိုင် သတ်မှတ်ပေးထားသည့် စရိုက်လက္ခဏာဖြစ်ပြီး အေးစက်စက် ယုတ္တိဗေဒ ပရိုဂရမ်တစ်ခုသာ ဖြစ်ကြောင်း ကောင်းကောင်းကြီး သိနေသော်လည်း သူ့ရင်ထဲတွင် အနည်းငယ်တော့ နာကျင်သွားရသေးသည်။

"ရပါတယ်... သခင့်အလုပ်က ပိုအရေးကြီးပါတယ်... ကျွန်မအနားမှာနေဖို့ အချိန်တွေ အလဟဿ မဖြုန်းပါနဲ့... သခင့်ရင်ထဲမှာ ကျွန်မရှိနေရင်ကို ကျေနပ်ပါပြီ"

"သခင်... တစ်နေကုန် အလုပ်လုပ်ထားရတော့ အရမ်းပင်ပန်းနေမှာပေါ့... ကျွန်မ နှိပ်နယ်ပေးရမလား" ထိုစဉ် အိမ်စေမလေးက ရုတ်တရက် ဆွဲဆောင်မှုရှိရှိ ပြုံးလိုက်သည်။

ထိုအပြုံးလေးကြောင့် ပန်းပေါင်းရာချီ တစ်ပြိုင်နက် ပွင့်လန်းသွားသကဲ့သို့ အခန်းတစ်ခုလုံး ချက်ချင်းပင် လင်းလက်တောက်ပသွားတော့သည်။

မန်ကျွင်းဟွာတစ်ယောက် ငေးမောသွားပြီး ရင်ထဲတွင် တလှပ်လှပ် ဖြစ်သွားရသည်။ သူက အသက်နှစ်ဆယ်ကျော်အရွယ် လူငယ်တစ်ယောက်ဖြစ်ပြီး ဟော်မုန်းများ အားကောင်းနေချိန်လည်း ဖြစ်သည်။

အကယ်၍ အရင်ကသာဆိုလျှင် ဤသွေးဆောင်ဖြားယောင်းမှုကို လုံးဝခုခံနိုင်မည် မဟုတ်ပေ။ သို့သော် ဒီနေ့တွင်တော့ သူက အကြံဉာဏ်အသစ်အချို့ ရရှိထားသဖြင့် စိတ်လှုပ်ရှားမှုများကို အတင်းဖိနှိပ်ကာ ထိန်းချုပ်လိုက်သည်။

"နေပါစေတော့... ငါ မှတ်တမ်းအချို့ ဖတ်စရာရှိသေးတယ်... လက်ဖက်ရည်တစ်ခွက်လောက် ဖျော်ပေးပါလား"

"ဟုတ်ကဲ့ပါ သခင်" အိမ်စေမလေး၏ မျက်နှာပေါ်တွင် စိတ်ပျက်သွားသည့် အရိပ်အယောင်လေးများ ပေါ်လာကာ လူအစစ်တစ်ယောက်နှင့် လုံးဝတူနေသည်။

"ရေနွေးနွေးလေးနဲ့ ဖျော်ပေးရမလား"

"ရေနွေးနဲ့ပဲ ဖျော်ပေးပါ"

လက်ဖက်ရည်ဖျော်ရန် လှပနွဲ့နှောင်းစွာ လျှောက်သွားသည့် အိမ်စေမလေး၏ ကျော့ရှင်းသော နောက်ကျောလေးကိုကြည့်ရင်း မန်ကျွင်းဟွာက သူ၏ လျှာဖျားကို ကိုက်လိုက်ကာ တိတ်တဆိတ် ညည်းတွားလိုက်မိသည်။

"တကယ် သေစေနိုင်တဲ့ အလှပဲ"

"ဒီစက်ရုပ်အိမ်စေမလေးနဲ့ ယှဉ်လိုက်ရင် အရင်က ဆိုးသွမ်းပြီး အလိုလိုက်ခံချင်တဲ့ ရည်းစားဟောင်းက လုံးဝအမှိုက်ပဲ"

……

အိမ်စေမလေး ထွက်သွားပြီးနောက် မန်ကျွင်းဟွာက ကုတင်ပေါ်တွင် ကမန်းကတန်း လှဲလျောင်းလိုက်ပြီး မျက်လုံးများကို မှိတ်ကာ ကွန်ရက်ထဲသို့ ဝင်ရောက်သွားတော့သည်။

အရေးပေါ် အာကာသယာဉ်ပေါ်တွင် မိခင်ယာဉ်ကြီးနှင့် ချိတ်ဆက်ထားသော ဧရာမ ကွမ်တမ် ကြားခံဆက်သွယ်ရေးစက်ကြီး တစ်လုံးရှိသည်။

ထို့ကြောင့် မိုင်ပေါင်း သိန်းချီ ဝေးကွာနေသော်လည်း ကွန်ရက်လိုင်းမှာ ပြတ်တောက်သွားခြင်း လုံးဝမရှိဘဲ ကြည်လင်ပြတ်သားနေသည်။

သူက အီလက်ထရောနစ် စာကြည့်တိုက်ဝင်ပေါက်သို့ အလျင်အမြန် ရောက်ရှိသွားသည်။

ဤသည်မှာ ကြီးမားခမ်းနားသော စာကြည့်တိုက်ကြီးဖြစ်ပြီး ဧရာမ မျှော်စင်ကြီးတစ်ခုကဲ့သို့ တည်ရှိနေကာ မြင်တွေ့ရသူတိုင်းကို အံ့မခန်း ဖြစ်သွားစေသည်။

ယနေ့ခေတ် အီလက်ထရောနစ် စာကြည့်တိုက်သည် ယခင်ကလို သာမန် အချက်အလက်သိုလှောင်ရုံ သက်သက်မဟုတ်တော့ဘဲ ပုံရိပ်ယောင် လက်တွေ့ကမ္ဘာတစ်ခုအဖြစ် ဖန်တီးထားခြင်းဖြစ်သည်။

ဤစာကြည့်တိုက်ကြီးသည် စတုရန်းပေ သိန်းချီ ကျယ်ဝန်းပြီး စုစုပေါင်း အထပ် ၆၉ ထပ်ရှိကာ နှစ်စဉ် အထပ် ၈ ထပ်မှ ၁၀ ထပ်အထိ ဆက်တိုက် တိုးချဲ့တည်ဆောက်နေသည်။

နောက်နှစ်တစ်ရာခန့် ကြာသောအခါ ဤအဆောက်အအုံကြီးသည် အထပ်ပေါင်း ထောင်ချီ မြင့်မားလာပြီး တိမ်တိုက်များကိုပင် ဖောက်ထွက်သွားမည့် အဆင့်အထိ တိုးတက်လာနိုင်ပေသည်။

အဆောက်အအုံ၏ အောက်ခြေတွင် လူများ အဝင်အထွက် ရှုပ်ထွေးနေပြီး အချို့မှာ သူနှင့်ရင်းနှီးသူများ ဖြစ်ပုံရသည်။ သို့သော် မန်ကျွင်းဟွာက နှုတ်ဆက်ရင်း အချိန်မဖြုန်းချင်သဖြင့် ခေါင်းငုံ့ကာ အီလက်ထရောနစ် စာကြည့်တိုက်ထဲသို့ ခပ်သုတ်သုတ် ဝင်သွားလိုက်သည်။

ပထမထပ် တစ်ထပ်လုံးတွင် စာအုပ်စင်များ ပြည့်နှက်နေသည်။ သို့သော် ဤနေရာသည် အစစ်အမှန် စာကြည့်တိုက်မဟုတ်သဖြင့် မည်သူကမျှ ဤနေရာတွင် စာအုပ်များကို စိတ်ရှည်လက်ရှည် ရှာဖွေဖတ်ရှုနေမည် မဟုတ်ပေ။ ဤနေရာကို စာကြည့်တိုက်ဟု ခေါ်ဆိုခြင်းထက် ဗဟုသုတ နန်းတော်တစ်ခု၏ ပြယုဂ်ဟု ခေါ်ဆိုလျှင် ပိုမှန်ပေလိမ့်မည်။

"ပြီးခဲ့တဲ့ သုံးနှစ်အတွင်းက ဇီဝအာရုံကြောနယ်ပယ်နဲ့ သက်ဆိုင်တဲ့ မှတ်တမ်းအားလုံးကို ရှာပေး... ပတ်ဝန်းကျင်ကိုတော့ မြက်ခင်းပြင်အဖြစ် ပြောင်းလိုက်"

မျက်စိတစ်မှိတ်အတွင်းမှာပင် ပတ်ဝန်းကျင်ရှိ မြင်ကွင်းများ လျင်မြန်စွာ ပြောင်းလဲသွားပြီး မူလစာကြည့်တိုက်ကြီး တဖြည်းဖြည်း ပျောက်ကွယ်သွားကာ အစိမ်းရောင် မြင်ကွင်းများ အစားထိုး ဝင်ရောက်လာသည်။

စက္ကန့်အနည်းငယ် အကြာတွင်တော့ မျက်စိတစ်ဆုံး ကျယ်ဝန်းလှသော မြက်ခင်းစိမ်းစိမ်းကြီးတစ်ခု သူ၏ မြင်ကွင်းထဲတွင် ပေါ်လာပြီး စာအုပ်စင် ဒါဇင်ပေါင်းများစွာကလည်း သူ့ပတ်လည်တွင် သပ်ရပ်စွာ နေရာယူထားကြသည်။

ခေါင်းပေါ်တွင် ပြာလဲ့သော ကောင်းကင်နှင့် တိမ်ဖြူများရှိနေပြီး ခြေအောက်တွင်မူ ကျယ်ပြောလှသော မြက်ခင်းပြင်ကြီး ရှိနေသည်။

မန်ကျွင်းဟွာက ခေတ္တမျှ ငေးကြည့်နေလိုက်ရာ သူ၏ ရင်ထဲတွင် ပေါ့ပါးလန်းဆန်းသွားသလို ခံစားလိုက်ရသည်။

ကမ္ဘာမြေကို စွန့်ခွာလာပြီးနောက်ပိုင်း ဤကဲ့သို့သော ကမ္ဘာမြေ၏ ယခင်မြင်ကွင်းများကို ကွန်ရက်ပေါ်တွင်သာ မြင်တွေ့နိုင်တော့သည်။

နှမြောစရာကောင်းသည်မှာ ဤအရာအားလုံးသည် ပုံရိပ်ယောင်များသာဖြစ်ပြီး လက်တွေ့ခံစားမှုမျိုး အပြည့်အဝ မပေးနိုင်ခြင်းပင်။

ဤနေရာတွင် မြက်ခင်းများ၏ ရနံ့ကို မရနိုင်သလို လေတိုက်ခတ်မှုကိုလည်း မခံစားရပေ။ မြေကြီးပေါ်တွင် နင်းထားရသည့် ခံစားချက်မျိုးပင် တိတိပပ မရှိလှချေ။ အစစ်အမှန် ပုံရိပ်ယောင် လက်တွေ့ကမ္ဘာနှင့် ယှဉ်လျှင် ကွာဟချက်များ ရှိနေသေးသည်။

"ဦးနှောက်အာရုံကြောတွေနဲ့ တိုက်ရိုက်ချိတ်ဆက်နိုင်တဲ့ အစစ်အမှန် ပုံရိပ်ယောင် လက်တွေ့နည်းပညာက တော်တော်လေး အောင်မြင်နေပြီလို့ ကြားတယ်... ဘယ်အချိန်မှ အသုံးပြုနိုင်မလဲတော့ မသိသေးဘူး... အဲဒီအချိန်ရောက်ရင်တော့ ပုံရိပ်ယောင်နဲ့ လက်တွေ့ကမ္ဘာကြားမှာ ဘာကွာခြားချက်မှ ရှိတော့မှာ မဟုတ်ဘူး"

(အခုဟာက VR နည်းပညာကိုပြောတာပါ။ ဒီ VR နည်းပညာကတော့ အသိစိတ်ပါ VR ကမ္ဘာထဲ ဝင်လို့ရတယ်)

သူက ခေတ္တမျှ သက်ပြင်းချလိုက်ပြီးနောက် ချက်ချင်းပင် စိတ်ကိုစုစည်းကာ မှတ်တမ်းများကို စတင်ဖတ်ရှုလိုက်သည်။

ဇီဝဗေဒနှင့် ပတ်သက်၍ သူ သိပ်နားမလည်လှပေ။ သို့သော် သိပ်နားမလည်လှဘူး ဆိုသည်မှာ ဤနယ်ပယ်ကို အထူးပြုလေ့လာထားသော သိပ္ပံပညာရှင်များနှင့် ယှဉ်လျှင်သာ ဖြစ်သည်။

ဉာဏ်ပညာဆေးရည်ကို သောက်သုံးထားသော သူ့လို သိပ္ပံပညာရှင်တစ်ယောက်အတွက်မူ အခြေခံအားဖြင့် နယ်ပယ်ပေါင်းစုံကို လေ့လာထားပြီး ဖြစ်သည်။

နည်းပညာများ တိုးတက်လာသည့် ယနေ့ခေတ်တွင် နယ်ပယ်အသီးသီးမှ ဗဟုသုတများသည် တစ်ခုနှင့်တစ်ခု ဆက်စပ်နေပြီး သွယ်ဝိုက်သောနည်းဖြင့် ပေါင်းစပ်နေကြပြီ ဖြစ်သည်။

အဘယ်ကြောင့်ဆိုသော် မည်သည့်နယ်ပယ်တွင်မဆို အဏုကြည့်အဆင့်အထိ အသေးစိတ် ခွဲခြမ်းစိတ်ဖြာလိုက်ပါက အားလုံးသည် တူညီနေသောကြောင့်ပင်။

မျက်မမြင် ပုဏ္ဏား ခြောက်ယောက် ဆင်စမ်းသကဲ့သို့ပင် ဖြစ်သည်။ အားလုံးက ဤကမ္ဘာလောကကြီးကို နားလည်သဘောပေါက်ရန် ကြိုးစားနေကြခြင်းသာ ဖြစ်ပြီး ချဉ်းကပ်ပုံချင်းသာ ကွာခြားသွားခြင်း ဖြစ်သည်။

သူ၏ ဖတ်ရှုနှုန်းမှာ အလွန်မြန်ဆန်လှပြီး ရံဖန်ရံခါတွင်သာ ခေတ္တရပ်ကာ စဉ်းစားလေ့ရှိသည်။ သို့တိုင်အောင် စာအုပ်တစ်အုပ်ကို အများဆုံး ငါးမိနစ်အတွင်း အပြီးဖတ်နိုင်စွမ်း ရှိသည်။

မကြာသေးမီ နှစ်များအတွင်း ဇီဝအာရုံကြော နယ်ပယ်၏ တိုးတက်မှုမှာ အလွန်မြန်ဆန်ခဲ့သည်။

သီအိုရီပိုင်းအရဖြစ်စေ၊ လက်တွေ့အသုံးချမှုပိုင်းအရဖြစ်စေ မရေမတွက်နိုင်သော အောင်မြင်မှုရလဒ်များကို ရရှိခဲ့သည်။

ဥပမာအားဖြင့် သူ အလွန်နှစ်သက်သော စက်ရုပ်အိမ်စေမလေးတွင် လူလုပ် အာရုံကြောမျှင် အမြောက်အများကို အသုံးပြုထားသည်။

ဤအာရုံကြောမျှင် ကွန်ရက်များ၏ တိုက်ရိုက် သို့မဟုတ် သွယ်ဝိုက်သော ထိန်းချုပ်မှုအောက်တွင် အချင်းချင်း ချိတ်ဆက်ကာ လွှမ်းမိုးမှုရှိပြီး နီးကပ်စွာ ပူးပေါင်းလုပ်ဆောင်ကြသဖြင့် စက်ရုပ်တစ်ကိုယ်လုံးကို ပြီးပြည့်စုံသော သက်ရှိခန္ဓာကိုယ်တစ်ခုကဲ့သို့ ဖြစ်တည်လာစေသည်။

၎င်းက စက်ရုပ်အိမ်စေမလေး၏ လှုပ်ရှားမှုများကို ဟန်ချက်ညီစေကာ သွက်လက်ပေါ့ပါးစေပြီး လူအစစ်နှင့် ခွဲခြား၍မရနိုင်အောင် ဖြစ်စေသည်။

ထို့အပြင် သက်ရှိများကဲ့သို့ အာရုံခံနိုင်စွမ်းကိုပါ ပိုင်ဆိုင်ထားသဖြင့် အတွင်းအပြင် ပတ်ဝန်းကျင် အပြောင်းအလဲများကိုပါ ခံစားသိရှိနိုင်ကာ အထိအတွေ့၊ အနံ့နှင့် နာကျင်မှုတို့ကိုပါ ခံစားသိရှိနိုင်သည်။

အချို့သော အထူးအစိတ်အပိုင်းများဆိုလျှင် လူသားများထက်ပင် ပိုမို အာရုံခံနိုင်စွမ်း မြင့်မားသေးသည်။ ၎င်းအပြင် ထည့်သွင်းထားသော စွမ်းရည်ပေါင်းများစွာကြောင့်...

မန်ကျွင်းဟွာက အမြန်ပင် စိတ်ကိုပြန်စုစည်းလိုက်ပြီး မှတ်တမ်းများကို ဆက်လက်ဖတ်ရှုနေလိုက်သည်။

နာရီအနည်းငယ် အကြာတွင်...

"ဟင်... ကွမ်တမ် အာရုံကြော ပို့လွှတ်မှုစနစ်တဲ့လား... ဒါက အသစ်ပဲ"

သူက ထုတ်ဝေသည့်ရက်စွဲကို ကြည့်လိုက်ရာ ဤမှတ်တမ်းမှာ မကြာသေးမီကမှ အတည်ပြု ထုတ်ဝေထားသော ပညာရပ်ဆိုင်ရာ မှတ်တမ်းတစ်ခု ဖြစ်နေကြောင်း တွေ့လိုက်ရသည်။

သူက ချက်ချင်းပင် လျင်မြန်သောနှုန်းဖြင့် ဖတ်ရှုလိုက်သည်။

သီအိုရီ ရူပဗေဒ နယ်ပယ်တွင် ထင်ရှားသော ပညာရှင်တစ်ယောက်အနေဖြင့် ကွမ်တမ်ပညာရပ်သည်လည်း သူ၏ အထူးပြုလေ့လာထားသော နယ်ပယ်တစ်ခုပင် ဖြစ်သည်။

ဤမှတ်တမ်းတွင် သူ၏ ဗဟုသုတနယ်ပယ်ထက် ကျော်လွန်နေသော အရာများ မပါဝင်သော်လည်း ဤအံ့ဖွယ်ကောင်းသော အာရုံကြော ပို့လွှတ်မှုစနစ်က သူ့ကို မျက်စိပွင့်သွားစေပြီး ရင်ထဲတွင် အကြံဉာဏ်သစ်များစွာ ပေါ်ထွက်လာစေသည်။

အရေးအကြီးဆုံးအချက်မှာ ဤအရာသည် သိပ္ပံနည်းကျ တွေးတောမှန်းဆချက်တစ်ခု မဟုတ်ဘဲ အစစ်အမှန် တွေ့ရှိမှုတစ်ခု ဖြစ်နေခြင်းပင်။

၎င်းတို့နှစ်ခု၏ ကွာခြားချက်မှာ ပထမတစ်ခုသည် အတည်ပြုရန် လိုအပ်နေသေးသော သီအိုရီတစ်ခုသာဖြစ်ပြီး ဒုတိယတစ်ခုကမူ တကယ်တမ်း တည်ရှိနေခြင်းပင် ဖြစ်သည်။

ဤဖြစ်စဉ်ကို ယခင် အာကာသ သားရဲကြီး၏ တစ်သျှူးဖွဲ့စည်းပုံများမှ တွေ့ရှိခဲ့ခြင်းဖြစ်သည်။ ဤကံကောင်းသော သုတေသီက အာရုံကြောမျှင်တစ်ခုအတွင်းမှ ထူးခြားသော မျိုးဗီဇပြောင်း အာရုံကြောကလာပ်စည်း တစ်ခုကို ရှာဖွေတွေ့ရှိခဲ့သည်။ ၎င်းသည် ပတ်ဝန်းကျင်ရှိ အခြား အာရုံကြော ကလာပ်စည်းများနှင့် လုံးဝ ကွာခြားနေသည်။

၎င်းသည် သေးသွယ်ရှည်လျားသော အမွေးအမျှင်များ ဖုံးလွှမ်းနေသည့် အလုံးလေးတစ်ခုနှင့် တူပြီး ထိုအမွေးအမျှင်လေးများသည် အနီးနားရှိ ကလာပ်စည်းများကြားရှိ ကွက်လပ်များတွင် ပေါက်ရောက်နေကြသည်။ အရှည်အားဖြင့် မိုက်ခရိုလက်မ ၆၀၀ မှ ၄၀၀၀ ခန့်အထိ အသီးသီး ရှိကြသည်။

အချိန်ကြာမြင့်စွာ ဆက်လက် သုတေသနပြုပြီးနောက် ဤအာရုံကြော ကလာပ်စည်း၏ ဖွဲ့စည်းပုံမှာ သဘာဝ ကွမ်တမ် ဆက်သွယ်ရေးစက်တစ်ခု ဖြစ်နေကြောင်းကို ဓာတ်ခွဲခန်းက အံ့သြဖွယ် တွေ့ရှိခဲ့ရသည်။

ဖွဲ့စည်းပုံမှာ အလွန်သေးငယ်သိမ်မွေ့ပြီး သဘာဝတရား၏ လက်ရာသဖွယ် အံ့မခန်း ဖြစ်နေသည်။ လူသားများ ဖန်တီးထားသော ကွမ်တမ် ဆက်သွယ်ရေးစက်များနှင့် ယှဉ်လျှင် ဤကလာပ်စည်းအရွယ်အစားသာရှိသော ကွမ်တမ် ဆက်သွယ်ရေးစက်တွင် ပါဝင်သော နည်းပညာမှာ ကြက်သီးမွေးညင်းထစရာပင် ကောင်းလှသည်။

ထိုသို့သော ကလာပ်စည်းမျိုးကို ဆက်တိုက်ဆိုသလို တွေ့ရှိခဲ့ရသော်လည်း အရေအတွက်မှာ မများပြားလှဘဲ အများစုမှာ အရေးပါသော ဆက်သွယ်ရေး အချက်အချာ နေရာများတွင်သာ တည်ရှိနေကြသည်။

သုတေသီက စာတမ်း၏ နောက်ဆုံးအပိုဒ်တွင် ကောက်ချက်ချထားသည်မှာ အာရုံကြောအချက်ပြမှုများ ပို့လွှတ်ခြင်းသည် ၎င်း၏ လုပ်ဆောင်ချက်များထဲမှ တစ်ခုသာဖြစ်နိုင်ကြောင်းပင်။

အဘယ်ကြောင့်ဆိုသော် ယခုအချိန်အထိ ရှင်းလင်းစွာ နားမလည်သေးသော ဖွဲ့စည်းပုံအစိတ်အပိုင်းအချို့ ကျန်ရှိနေသေးသောကြောင့်ဖြစ်သည်။

ထို့ကြောင့် ဤကွမ်တမ် အာရုံကြော ကလာပ်စည်းများသည် စွမ်းအင်များကိုပါ ပို့လွှတ်ပေးနိုင်လိမ့်မည်ဟု သူက ရဲရဲဝံ့ဝံ့ မှန်းဆထားသည်။

မန်ကျွင်းဟွာက စာအုပ်ကို ချထားလိုက်ချိန်တွင် သူ၏ ရင်ထဲ၌ လှိုင်းလုံးကြီးများ ရိုက်ခတ်နေသကဲ့သို့ အကြီးအကျယ် လှုပ်ရှားနေပြီး နဂိုက စိတ်ရှုပ်ထွေးနေခဲ့သော အရာများအားလုံး ချက်ချင်းပင် ရှင်းလင်းသွားတော့သည်။

အကယ်၍ ကွမ်တမ်နည်းပညာဖြင့် စွမ်းအင်ပို့လွှတ်နိုင်သည်ဆိုသော မှန်းဆချက်သာ အမှန်တကယ်ဖြစ်ခဲ့ပါက အရာအားလုံးက အလိုလို အဖြေထွက်သွားမည်ဖြစ်ကြောင်း သူက နားလည်သွားသောကြောင့်ပင်။

စွမ်းအင်ပို့လွှတ်သည့် လမ်းကြောင်းများ လုံးဝမလိုအပ်တော့ဘဲ အကျိတ်ရာပေါင်းများစွာက ကွမ်တမ် အချက်ပြမှုများ ပို့လွှတ်ခြင်းဖြင့် တစ်ပြိုင်နက်တည်း အပြည့်အဝ ပူးပေါင်းလုပ်ဆောင်နိုင်ပေလိမ့်မည်။

ထို့ကြောင့် ပြန်ရောက်သည်နှင့် တစ်ပြိုင်နက် ဤသတ္တဝါကြီးတွင်လည်း ကွမ်တမ် ကလာပ်စည်းများ ရှိမရှိ ချက်ချင်း အတည်ပြုစစ်ဆေးရန် သူ ဆုံးဖြတ်လိုက်သည်။

ထို့အပြင် ဤကိစ္စမှာ ရှစ်ဆယ်ရာခိုင်နှုန်းကျော် သေချာနေပြီဟုလည်း သူက ခန့်မှန်းထားသည်။

သူက နဖူးကိုရိုက်ကာ စိတ်ထဲတွင် အနည်းငယ် နောင်တရသွားသည်။ သူ ဒီအချက်ကို စောစောကတည်းက တွေးမိခဲ့သင့်သည်လေ။

ခန္ဓာကိုယ်အရှည် ပေ ၃၃၀၀ နီးပါးခန့်ရှိသော ဤကဲ့သို့ ဧရာမ သတ္တဝါကြီးတစ်ကောင်အတွက် အကယ်၍ သာမန် ဇီဝလျှပ်စစ်ဖြင့်သာ အာရုံကြော အချက်ပြမှုများကို ပို့လွှတ်မည်ဆိုပါက လှုပ်ရှားမှုများ အလွန်နှေးကွေးနေမည်သာ ဖြစ်သည်။

ပြင်ပမှ လှုံ့ဆော်မှုများကို လက်ခံရရှိချိန်မှစ၍ တုံ့ပြန်လှုပ်ရှားမှု ပြုလုပ်ချိန်အထိ စက္ကန့်အနည်းငယ်ခန့်ပင် ကြာမြင့်နိုင်ပေသည်။

သို့သော် အမှန်တကယ်တွင်မူ ဤသတ္တဝါကြီးက အလွန်သွက်လက်ပြီး အံ့မခန်း တုံ့ပြန်နိုင်စွမ်းရှိကာ သာမန်လူများထက်ပင် များစွာ သာလွန်နေသည်။

အကယ်၍ ထူးခြားသော အာရုံကြော အချက်ပြ ပို့လွှတ်မှုစနစ်သာ မရှိလျှင် ဤသို့ဖြစ်လာရန် လုံးဝ မဖြစ်နိုင်ပေ။

(ပြောချင်တာက လူတစ်ယောက်က ခြေထောက်ကို လှုပ်မယ်ဆိုရင် ဦးနှောက်ကနေ ခြေထောက်စီကို လျှပ်စစ်လှိုင်းတွေကတဆင့် သတင်းပို့လိုက်တာပါ။ ခြေထောက်က သတင်းလက်ခံရတာနဲ့ လှုပ်လိုက်တာပါ။ ဒီအဖြစ်က အရမ်းကို မြန်ဆန်လို့သာမန်အနေနဲ့ သတိထားမိဖို့မဖြစ်နိုင်ပါဘူး။ ဒါပေမဲ့ ပေ၃၀၀၀ ရှိတဲ့တောင်တစ်လုံးလောက် မြင့်မားတဲ့သတ္တဝါကြီးဆိုရင်တော့ ဦးနှောက်ကခြေထောက်လှုပ်ဖို့ပို့လိုက်တဲ့လျှပ်စစ်လှိုင်းက ခြေထောက်ဆီရောက်ဖို့ ဆိုရင် ၁၅စက္ကန့်လောက်ကြာသွားပါပြီ။ အဲ့လိုဆိုရင် ဦးနှောက်က ညာခြေလှမ်းဖို့တွေးလိုက်တဲ့အချိန်မှာ ခြေထောက်က တစ်ကယ်လှမ်းဖို့ ၁၅စက္ကန့်စောင့်ရမှာပါ။ အဲ့ဒီလိုပဲ ခြေထောက်က ချွန်တဲ့အရာတစ်ခုခုတက်နင်းမိတဲ့အချိန်မှာ ဦးနှောက်က ချက်ချင်းမသိနိုင်တဲ့အတွက် တစ်ခုခုဖြစ်နေကြောင်း သတိပေးတဲ့နာကြင်မှုက တော်တော်နောက်ကျပြီးမှ ပေါ်လာမှာပါ။ တစ်ကယ်လို ခန္ဓာကိုယ်ယိုင်သွားလို့ပြန်ထိန်းမယ်ဆိုရင်တောင် ဦးနှောက်နဲ့ ခြေထောက် အဆက်အသွယ်က ၁၅စက္ကန့်ကြာတဲ့အတွက် ချော်လဲပြီးမှပဲ ခြေထောက်က ပြန်ထိန်းဖို့သတိရတော့မှာပါ။ ဒါမျိုးကို ဆင်တွေမှာ တွေ့ရလေ့ရှိပါတယ်။ ဆင်တွေက ခြေတစ်လှမ်းလှမ်းဖို့ဆိုရင် သာမန်သက်ရှိတွေထက် ပိုပြီးနောက်ကျလေ့ရှိပါတယ်တဲ့)

ယခုအချိန်တွင်မူ သူ၏ စိတ်ထဲ၌ အလွန်သေးငယ်သော ဂမ်မာရောင်ခြည်တန်း ပေါက်ကွဲမှု ဇီဝတစ်သျှူးဖွဲ့စည်းပုံ၏ အရေးပါမှုက တရှိန်ထိုး ကျဆင်းသွားပြီး ထိုထူးခြားသော ကွမ်တမ် အာရုံကြော ကလာပ်စည်းကသာ သူ၏ စိတ်အာရုံအများစုကို လွှမ်းမိုးသွားတော့သည်။

"အဲဒီ ဇီဝဗေဒ ဓာတ်ခွဲခန်းတွေက ဘာပဲပြောပြော အပျော်တမ်းတွေပဲလေ... ဘယ်လောက်ပဲ သုတေသနလုပ်လုပ် ဘာရလဒ်မှ ထွက်လာမှာ မဟုတ်ဘူး... ငါတို့လို ရူပဗေဒနယ်ပယ်က ကျွမ်းကျင်ပညာရှင်နဲ့ ဘယ်လိုလုပ် ယှဉ်နိုင်ပါ့မလဲ... တကယ်လို့ ဒါကသာ စွမ်းအင်ပို့လွှတ်နိုင်တယ်ဆိုတာကို တကယ်အတည်ပြုနိုင်ခဲ့ရင် ဒါဟာ တကယ့်ကို ကြီးမားတဲ့ တိုးတက်မှုကြီးတစ်ခု ဖြစ်လာမှာပဲ"

"တကယ်လို့ လူသားတွေသာ ဒီနည်းပညာကို ဖော်ထုတ်နိုင်ခဲ့ရင် သိပ္ပံနည်းပညာ တော်လှန်ရေးကြီးတစ်ခု ဖြစ်လာနိုင်ပြီး လူသားတွေရဲ့ အခြေအနေကလည်း ကြီးမားတဲ့ အပြောင်းအလဲတွေ ဖြစ်လာလိမ့်မယ်... ငါလည်း သမိုင်းမှာ နာမည်တွင်သွားမှာပဲ"

သူက ကွန်ရက်ထဲမှ အလျင်စလို ထွက်လိုက်ပြီး ကုတင်ပေါ်မှ လွှားခနဲ ခုန်ထလိုက်သည်။

"သခင်... အပြင်သွားတော့မလို့လား" စက်ရုပ်အိမ်စေမလေးက လှုပ်ရှားမှုအသံကို ကြားလိုက်သဖြင့် အသင့်အနေအထားမှ နိုးထလာပြီး တံခါးဝသို့ လျှောက်လာကာ သံသယဖြစ်နေသော မျက်နှာလေးဖြင့် မေးလိုက်သည်။

မန်ကျွင်းဟွာ၏ မျက်နှာပေါ်တွင် စိတ်လှုပ်ရှားမှုများ ပြည့်နှက်နေပြီး ကာကွယ်ရေးဝတ်စုံကို ဝတ်ဆင်ရင်း အိမ်စေမလေးအား ပြောလိုက်သည်။ "ငါ့ရဲ့ သုတေသနက အဖြေသိလိုက်ရပြီ... ငါ့ကို စောင့်မနေနဲ့... စောစောသာ အိပ်လိုက်တော့"

ဆက်ရန်...

ပိုင်း(၅၁၀) ခရီးမထွက်ခွာမီ

ကြယ်တာရာများဆီသို့ ခရီးနှင်မည့်အချိန်မှာ နောက်ပြန်ရေတွက်နေပြီ ဖြစ်သည်။

အာကာသ သားရဲကြီး၏ ရုပ်အလောင်းကို ရယူပြီးသည်နှင့် မကြာမီမှာပင် ထွက်ခွာခြင်းမပြုမီ မိခင်ယာဉ်ကြီးအတွက် လိုအပ်မည့် အရင်းအမြစ်များကို ဖြည့်တင်းရန် ပထမဆုံးအကြိမ် ဥက္ကာပျံတူးဖော်ရေးလုပ်ငန်းကို စတင်နိုင်ခဲ့လေပြီ။

မလှမ်းမကမ်းတွင် ရှိနေသော ဥက္ကာပျံငယ်တစ်ခုမှာ ယခုအကြိမ်အတွက် ပစ်မှတ်ဖြစ်လာခဲ့သည်။

ထိုဥက္ကာပျံငယ်မှာ အရွယ်အစား အတော်လေး ကြီးမားလှပေသည်။ အကျယ်ဆုံးအပိုင်းသည် ၄ မိုင်ခန့်ရှိပြီး အကျဉ်းဆုံးအပိုင်းသည်ပင်လျှင် ၂ မိုင်ခန့် ရှိနေသည်။

၎င်း၏ မျက်နှာပြင်တစ်ခုလုံးကို ရေခဲနှင်းများက ဖုံးလွှမ်းထားသည်။ နေနှင့် နီးကပ်စွာ တည်ရှိနေသောကြောင့် ၎င်း၏အမြီးပိုင်းတွင် မိုင် ၆၀ ခန့် ရှည်လျားသော အမြီးတန်းကြီးတစ်ခု ထွက်ပေါ်နေပြီး ကြည့်ရသည်မှာ အလွန် ခမ်းနားထည်ဝါလှသည်။

ကံကောင်းထောက်မစွာဖြင့် စမ်းသပ်စစ်ဆေးမှုများအရ ၎င်း၏မျက်နှာပြင်ပေါ်ရှိ ရေခဲနှင်းထုမှာ သိပ်မထူထပ်လှဘဲ ပေ ၁၀၀ ခန့်သာ ရှိကြောင်း သိရသည်။

အတွင်းပိုင်းတွင်မူ သံပါဝင်သော ဥက္ကာခဲများ အများအပြား ပါဝင်သည့်အပြင် အခြားသော ဒြပ်စင်များစွာလည်း ပါဝင်နေသေးသည်။

လူသားများအနေဖြင့် ရေအရင်းအမြစ်ကို သိပ်ပြီး သုံးစွဲလေ့မရှိသော်လည်း သတ္တုများကိုမူ အများဆုံး သုံးစွဲကြသည်။

ယခု တူးဖော်ရေးလုပ်ငန်း၏ အဓိကရည်ရွယ်ချက်မှာလည်း သတ္တုများကို စုဆောင်းရန်ပင် ဖြစ်သည်။

ဤကဲ့သို့သော ဥက္ကာပျံတစ်လုံးသည် ကုန်ခမ်းသွားသော သတ္တုလက်ကျန်များ အားလုံးကို ဖြည့်တင်းပေးရန် လုံလောက်မှု ရှိပေသည်။

ပထမအသုတ်အနေဖြင့် အင်ဂျင်နီယာစက်ရုပ် ရာပေါင်းများစွာက ကိရိယာတန်ဆာပလာ အများအပြားကို သယ်ဆောင်ကာ ဥက္ကာပျံပေါ်သို့ စတင်ဆင်းသက်ခဲ့ကြသည်။

ရှေ့ဆက်ရမည့် အချိန်များတွင် ၎င်းတို့က ဥက္ကာပျံပေါ်ရှိ ရေခဲနှင်းများကို ရှင်းလင်းကာ မြေပြင်ကို ညှိပေးမည် ဖြစ်သည်။

ထို့အပြင် ရိုးရှင်းသော လျှပ်စစ်ဓာတ်အားပေးစက်ရုံတစ်ခု တည်ဆောက်ပြီး ဓာတ်ကြိုးများကို သွယ်တန်းပေးရမည် ဖြစ်သည်။

ထို့အပြင် ဥက္ကာပျံငယ် အဝေးသို့ လွင့်စင်မသွားစေရန်အတွက် ၎င်း၏ တစ်ဖက်ခြမ်းတွင် အင်ဂျင်သုံးလုံးကိုလည်း တပ်ဆင်သွားမည် ဖြစ်သည်။

ဤလုပ်ငန်းစဉ်ကြီး တစ်ခုလုံး ပြီးစီးရန်အတွက် တစ်ပတ်ပင် အချိန်မယူခဲ့ရချေ။

ထို့နောက်တွင်တော့ ဒုတိယအသုတ် အင်ဂျင်နီယာစက်ရုပ်များက ဧရာမ ကုန်သေတ္တာကြီးများနှင့် တူသော အစိတ်အပိုင်းများခွဲ၍ တပ်ဆင်ရသည့် စက်ရုံများကို တွန်းယူလာကာ အာကာသထဲသို့ ထွက်ခွာလာကြသည်။

စက်ရုပ်များ၏ ကျောဘက်မှနေ၍ ပလာစမာမီးတောက်များ အဆက်မပြတ် ပန်းထွက်နေပြီး ပိုးစုန်းကြူးများ အလား ဥက္ကာပျံပေါ်သို့ တစ်စစီ ဆင်းသက်လာကြလေသည်။

အစိတ်အပိုင်းများခွဲ၍ တပ်ဆင်ရသည့် ထိုစက်ရုံများက သတ်မှတ်ထားသော နေရာများသို့ ဖြည်းညင်းစွာ ကျဆင်းသွားကြသည်။

မြေပြင်ပေါ်တွင် ကြိုတင်စီစဉ်ထားသော လျှို့ဝှက်ချိတ်ဆက်ကိရိယာများနှင့် စက်ရုံ၏ အောက်ခြေတို့သည် အံဝင်ခွင်ကျ ချိတ်ဆက်သွားပြီးနောက် စက်ရုံမှာလည်း တဖြည်းဖြည်း ပွင့်ဟလာတော့သည်။

၎င်းတို့မှာ အမှန်တကယ်ကို လူမလိုသော စက်ရုံများပင် ဖြစ်သည်။ ၎င်းတို့အပေါ်တွင် ပိုလျှံနေသော မီးရောင်များ မရှိသကဲ့သို့ ရှုပ်ထွေးနေသော လမ်းကြောင်းများလည်း မရှိပေ။

စက်ဝိုင်းပုံ သို့မဟုတ် ဆလင်ဒါပုံစံ ရှိသည့် ရှုပ်ထွေးသော ဧရာမ သတ္တုအရည်ကျိုစက်ကြီးများကို တစ်စုတစ်စည်းတည်း တပ်ဆင်ထားပြီး နေရာလွတ်အားလုံးကို အကျိုးရှိရှိ အသုံးချထားသည်။

စက်ရုံများ ပွင့်ဟလာပြီး မကြာမီမှာပင် အချင်း ပေ ၁၀၀ ခန့်ရှိသော ဧရာမ သတ္တုပိုက်လုံးကြီး တစ်ခုက သားရဲကြီးတစ်ကောင် နိုးထလာသကဲ့သို့ တဖြည်းဖြည်း မြင့်တက်လာသည်။

ထိုပိုက်လုံးကြီး၏ အဝသည် မလှမ်းမကမ်းရှိ ကွင်းပြင်တစ်ခုဆီသို့ တည့်မတ်စွာ ချိန်ရွယ်ထားပြီး နောက်တစ်ခဏတွင် ကြောက်မက်ဖွယ်ကောင်းသော သံလိုက်စက်ကွင်း တစ်ခုက ပိုက်လုံးအတွင်းမှ ပျံ့နှံ့ထွက်ပေါ်လာတော့သည်။

မကြာမီမှာပင် မြေပြင်က အရည်များကဲ့သို့ စတင် ပျော့ပျောင်းလာသည်။ ထိုပိုက်လုံးကြီးက ဒြပ်စင်များကို စုပ်ယူရင်း အောက်ဘက်သို့ တဖြည်းဖြည်း တိုးဝင်သွားလေသည်။

ဤသတ္တုပိုက်လုံးကြီး၏ အချင်းက ဤမျှ ကြီးမားနေရခြင်းမှာ ၎င်းသည် ဆွဲဆန့်နိုင်သော ပိုက်အမျိုးအစား ဖြစ်ပြီး အတွင်းဘက်တွင် သတ္တုပိုက်လွှာပေါင်း ရာချီ၍ ထပ်နေသောကြောင့် ဖြစ်သည်။

မူလဒီဇိုင်းအရ ဆိုလျှင် ၎င်းသည် မြေအောက် အနက် ၃ မိုင်ခန့်အထိ ထိုးဖောက်ဝင်ရောက်ကာ တွင်းထွက်သတ္တုများကို စုပ်ယူနိုင်စွမ်း ရှိပေသည်။

ဗိုရှင်းယဉ်ကျေးမှုတွင် ဥက္ကာပျံတူးဖော်ရေး နည်းပညာမှာ အတော်လေး ရင့်ကျက်နေပြီဖြစ်ကာ ပြည့်စုံသော လုပ်ငန်းစဉ်တစ်ခု ရှိပြီးဖြစ်သည်။

လူသားများကမူ ဤနည်းပညာကို ဆက်ခံသင်ယူထားခြင်း ဖြစ်သော်လည်း ပထမဆုံးအကြိမ် ဖြစ်နေသည့်တိုင် အရာအားလုံးက စနစ်တကျ ရှိကာ အထစ်အငေါ့ မရှိချေ။

...

အချိန်များက ၂၀၂၀ ခုနှစ် ဧပြီလသို့ လျင်မြန်စွာ ရောက်ရှိလာခဲ့ပြီး လူသားများ အာကာသထဲတွင် အခြေချခဲ့ရသည်မှာ လေးနှစ် တင်းတင်း ပြည့်ခဲ့လေပြီ။

ခရီးရှည်အတွက် ပြင်ဆင်မှုများအားလုံး ပြီးစီးသွားခဲ့ပြီ ဖြစ်သည်။ လုံခြုံရေးအတွက် မိခင်ယာဉ်ကြီး၏ အပြင်ဘက် သံချပ်ကာပေါ်ရှိ မရေမတွက်နိုင်သော အခြစ်အရာများကိုပင် ပြန်လည် ပြုပြင်မွမ်းမံထားရာ အာကာသယာဉ်ကြီး တစ်ခုလုံးမှာ အသစ်စက်စက်ကဲ့သို့ တောက်ပနေတော့သည်။

ထို့အပြင် ပျက်စီးရန် အချိန်လိုသေးသော်လည်း သက်တမ်းတစ်ခုအထိ အသုံးပြုပြီးဖြစ်သော အစိတ်အပိုင်းများကိုပါ အကုန်လုံး အသစ်လဲလှယ်ထားလိုက်သည်။

လွန်ခဲ့သည့် တစ်လခန့်ကတည်းက အာကာသယာဉ် ပြုပြင်ထိန်းသိမ်းရေး အင်ဂျင်နီယာများက ထောက်လှမ်းရေး ကိရိယာမျိုးစုံကို ကိုင်ဆောင်ကာ ဖြစ်ပေါ်လာနိုင်သည့် အန္တရာယ်များကို ရှာဖွေနိုင်ရန်အတွက် နေရာတိုင်းကို အထပ်ထပ်အခါခါ စစ်ဆေးနေကြသည်ကို နေရာအနှံ့တွင် တွေ့မြင်နိုင်ပေသည်။

...

မသိမသာဖြင့်ပင် မူလက တည်ငြိမ်အေးချမ်းနေသော လူ့အဖွဲ့အစည်း၏ လေထုက တင်းမာကာ ဖိနှိပ်မှုများဖြင့် ပြည့်နှက်လာခဲ့သည်။

သတင်းမီဒီယာ အများအပြားက နေ့စဉ်နှင့်အမျှ အားပေးစကားများ ပြောကြားကာ စိတ်ဓာတ်ခွန်အားများ ပေးနေသော်လည်း အချိန်ကြာလာသည်နှင့်အမျှ လူတိုင်း၏ မျက်နှာပေါ်တွင် စိုးရိမ်ပူပန်မှုများနှင့် မတည်ငြိမ်မှုများက ပိုမို ထင်ရှားလာတော့သည်။

လော်ယွမ် ကိုယ်တိုင်ပင်လျှင် တစ်ခါတစ်ရံတွင် စိတ်ထဲ၌ တွေဝေမှုများကို ခံစားနေရသည်။

မည်သို့ပင်ဆိုစေကာမူ ဤခရီးစဉ်သည် အနာဂတ်ကို မသိနိုင်သော စွန့်စားခန်း တစ်ခုသာ ဖြစ်သည်။ ဤသည်မှာ လူသားတို့၏ ဂုဏ်ကျက်သရေကို ပြန်လည် တည်ဆောက်မည့် ခရီးရှည်ကြီး တစ်ခု ဖြစ်နိုင်သကဲ့သို့ အပြန်လမ်းမရှိသော လမ်းတစ်လမ်းလည်း ဖြစ်သွားနိုင်ပေသည်။ သို့သော် မည်မျှပင် တွေဝေနေပါစေ ထွက်ခွာရမည့် အချိန်က တစ်ရက်ပြီးတစ်ရက် နီးကပ်လာခဲ့ပြီ ဖြစ်သည်။

ခရီးစဉ်အတွက် လမ်းကြောင်းကိုလည်း စောစီးစွာကတည်းက ဆုံးဖြတ်ပြီး ဖြစ်သည်။

ကမ္ဘာမြေနှင့် အလင်းနှစ် ၆ နှစ်ခန့် ကွာဝေးသော ဘားနတ် ကြယ်အဖွဲ့အစည်းက ယခုအကြိမ်အတွက် ပစ်မှတ်ဖြစ်လာခဲ့သည်။

ဤကြယ်ကို ရွေးချယ်ရသည့် အကြောင်းရင်းမှာ တစ်ဖက်တွင် အကွာအဝေးမှာ အတော်လေး နီးကပ်သောကြောင့် ဖြစ်သည်။

ပထမဆုံးအကြိမ် ခရီးရှည်ထွက်ခွာခြင်း ဖြစ်သောကြောင့် အလွန်ဝေးကွာသော အကွာအဝေးကို ရွေးချယ်ခြင်းက လူသားတို့အတွက် အလွန် စွန့်စားလွန်းရာကျပြီး အန္တရာယ်များလွန်းလှသည်။

အခြားတစ်ဖက်တွင်မူ ၎င်းက အလင်းရောင် အားအနည်းဆုံး ဖြစ်နေသောကြောင့်ပင်။ ဤသည်မှာ သက်တမ်းရင့်နေပြီဖြစ်သော အနီရောင် ကြယ်ပုတစ်လုံး ဖြစ်ပြီး မှိန်ပျပျ အနီရောင် အလင်းတန်းလေးများကိုသာ ထုတ်လွှတ်ပေးနေသောကြောင့် ပုန်းကွယ်ရန် အကောင်းဆုံးနေရာ တစ်ခုဖြစ်သည်။

အမှန်တကယ်တော့ ယဉ်ကျေးမှု နှစ်ခုကြားရှိ အကွာအဝေးမှာ နက္ခတ္တဗေဒပညာအရ တွက်ချက်ရလောက်အောင် ကြီးမားလွန်းသောကြောင့် အချင်းချင်း ထောက်လှမ်းရန်မှာ ထင်ထားသလောက် မလွယ်ကူပေ။

မည်မျှပင် အဆင့်မြင့်သော ထောက်လှမ်းရေး စနစ်များ၊ မည်မျှပင် စွမ်းဆောင်ရည်မြင့်မားသော ကွန်ပျူတာများ ရှိနေပါစေ ကျယ်ပြောလှသော ကြယ်တာရာ ကောင်းကင်ကြီး၏ ရှေ့တွင်တော့ အားနည်းသွားရစမြဲ ဖြစ်သည်။

ထို့အပြင် တစ်ခုနှင့်တစ်ခု အလွန်ဝေးကွာလှသောကြောင့် တွက်ချက်မှုတိုင်းကို အလင်းနှစ်ဖြင့်သာ ပြုလုပ်ရပေသည်။

အလင်းနှစ် တစ်နှစ် အကွာအဝေး ဆိုသည်မှာ အလင်းက တစ်နှစ်ကြာအောင် သွားရသည့် အကွာအဝေးကို ဆိုလိုခြင်း ဖြစ်သည်။

ဥပမာအားဖြင့် ဗိုရှင်းဂြိုဟ်သည် ကမ္ဘာနှင့် အလင်းနှစ် ၂၈ နှစ် ကွာဝေးသောကြောင့် ၎င်းမှ ထုတ်လွှတ်လိုက်သော အလင်းရောင်က နေအဖွဲ့အစည်းဆီသို့ ရောက်ရှိရန် ၂၈ နှစ် အချိန်ယူရမည် ဖြစ်သည်။

ဆိုလိုသည်မှာ လူသားများ ရရှိထားသော ဗိုရှင်းဂြိုဟ်၏ ပုံရိပ်များမှာ လွန်ခဲ့သော ၂၈ နှစ်က သမိုင်း ပုံရိပ်များသာ ဖြစ်နေပေလိမ့်မည်။

ပြောင်းပြန်အနေဖြင့်လည်း ထိုနည်းလည်းကောင်းပင် ဖြစ်သည်။

ယခုအခါ ဗိုရှင်း ရှေ့ပြေးတပ်ဖွဲ့များ သုတ်သင်ခံရသည်မှာ ငါးနှစ်ပင် မပြည့်သေးချေ။ ဆိုလိုသည်မှာ အနည်းဆုံးတော့ လာမည့် ၂၃ နှစ်အတွင်း လူသားများ၏ လှုပ်ရှားမှုများသည် လုံးဝ ပုန်းကွယ်နေမည် ဖြစ်သည်။

အကယ်၍ တစ်ဖက်ရန်သူများက အလင်းအပေါ် မှီခိုရန်မလိုသော အလင်းထက်မြန်သည့် ထောက်လှမ်းရေးစွမ်းရည်များကို တီထွင်ထားနိုင်ခြင်း၊ သို့မဟုတ် စစ်သင်္ဘောများ၏ အမြန်နှုန်းက အလင်းထက် ကျော်လွန်နေခြင်းမျိုး ရှိနေရင်တော့တစ်မျိုးပေါ့။

ထိုကဲ့သို့ အခြေအနေမျိုးသာဆိုလျှင် လူသားများအနေဖြင့် မည်သို့ပင် ပုန်းကွယ်နေစေကာမူ ပစ်မှတ်ထားခံရပြီး ဖြစ်နေပေလိမ့်မည်။ ပထမ အခြေအနေကမူ အနည်းငယ် ပိုကောင်းမွန်ပြီး အနည်းဆုံးတော့ ပုန်းကွယ်ချိန် အတိုင်းအတာ တစ်ခုအထိ ရရှိနိုင်သေးသည်။

သို့သော် ဤသည်က အဆိုးရွားဆုံး အခြေအနေများကိုသာ တွက်ဆထားခြင်း ဖြစ်သည်။

ယေဘုယျအားဖြင့် တစ်ဖက်ရန်သူ၏ ထောက်လှမ်းရေးစနစ်က အလင်းကို မှီခိုနေရဆဲဆိုလျှင် အလင်းရောင် အားနည်းသော နေရာများတွင် ရှာဖွေတွေ့ရှိနိုင်ခြေ ပိုနည်းသွားမည် ဖြစ်သည်။

ကြယ်များကြားရှိ ကျယ်ပြောလှသော အမှောင်ထုထဲတွင် အာကာသယာဉ် တစ်စင်းကို ရှာတွေ့နိုင်ခြေမှာ မဖြစ်နိုင်လောက်အောင်ပင် နည်းပါးလွန်းလှသည်။

သို့သော် လူသားများအနေဖြင့် ထိုအမှောင်ထုထဲတွင် ထာဝရ ပုန်းအောင်းနေရန်မှာ မဖြစ်နိုင်ပေ။ ထိုနေရာသည် လေဟာနယ်နီးပါး ဖြစ်နေသော ဧရိယာတစ်ခု ဖြစ်ပြီး ရုပ်ဝတ္ထုပစ္စည်းများကို ဖြည့်တင်းရန် လုံးဝ မဖြစ်နိုင်သလောက်ပင်။

လူသားများအနေဖြင့် ကြွက်များကဲ့သို့ "ချွေတာစားသောက်ရင်း" ဆယ်စုနှစ်ပေါင်းများစွာ ပုန်းအောင်းနေနိုင်ကောင်း နေနိုင်မည် ဖြစ်သော်လည်း ပေးဆပ်လိုက်ရမည့် တန်ဖိုးမှာ လူသားတို့၏ တိုးတက်မှုကို ကန့်သတ်လိုက်ရခြင်းပင် ဖြစ်ပေလိမ့်မည်။

ပြီးခဲ့သည့် ခြောက်လကျော် ကာလအတွင်း လူသားများကြားတွင် မွေးကင်းစ ကလေးငယ်ပေါင်း ၂၄၀,၀၀၀ ခန့် မွေးဖွားခဲ့သည်။

ထိုအထဲမှ ၅၀,၀၀၀ မှာ မိခင်၏ ကိုယ်ဝန်ဆောင်မှုဖြင့် မွေးဖွားလာခြင်း ဖြစ်ပြီး ကျန် ၁၉၀,၀၀၀ မှာမူ ဓာတ်ခွဲခန်းများမှ မွေးဖွားလာခြင်း ဖြစ်သည်။

ဤကဲ့သို့သော တိုးတက်မှုနှုန်းဖြင့်သာဆိုလျှင် နောက်ထပ် ဆယ်နှစ်ကျော်အကြာတွင် လူဦးရေမှာ နှစ်ဆအထိ တိုးလာမည်ဖြစ်ပြီး အာကာသယာဉ်ကြီးမှာလည်း ပိုမို ပြည့်ကျပ်လာကာ လူဦးရေ ထပ်မံ ထည့်သွင်းနိုင်တော့မည် မဟုတ်ပေ။

ထို့ကြောင့် လူသားများအနေဖြင့် ယာယီအခြေချရန် ကြယ်အဖွဲ့အစည်းသစ် တစ်ခုကို မဖြစ်မနေ ရှာဖွေရတော့မည် ဖြစ်သည်။

မိခင်ယာဉ်ကြီး၏ ထောက်လှမ်းမှုများအရ ဘားနတ် ကြယ်အဖွဲ့အစည်းတွင် ကျောက်သားဂြိုဟ်များနှင့် ဓာတ်ငွေ့ဂြိုဟ်များ တည်ရှိနေကြောင်း သိရသည်။

ထိုနေရာသည် အရင်းအမြစ်များ ဖြည့်တင်းရန် ခေတ္တနားခိုရာ နေရာအဖြစ်ဖြစ်စေ၊ အမြဲတမ်း အခြေချရန် နေရာအဖြစ်ဖြစ်စေ အလွန် သင့်တော်ပြီး ရှေ့တိုးနောက်ဆုတ် လုပ်နိုင်သော နေရာတစ်ခု ဖြစ်ပေသည်။

ထိုနေရာရှိ ဆိုးရွားကြမ်းတမ်းလှသော ပတ်ဝန်းကျင် အခြေအနေကိုမူ ကြယ်တာရာ ယဉ်ကျေးမှုစနစ်သို့ စတင် ခြေချနေပြီဖြစ်သော လူသားများအတွက် ထည့်တွက်နေစရာပင် မလိုချေ။

အချိန်လုံလုံလောက်လောက်သာ ရမည်ဆိုလျှင် လက်ရှိ လူသားတို့၏ နည်းပညာ စွမ်းရည်များဖြင့် ဂြိုဟ်တစ်လုံးကို အပြည့်အဝ ပြုပြင်ပြောင်းလဲနိုင်စွမ်း ရှိပေသည်။ ဤသည်မှာ စွမ်းဆောင်ရည် အနိမ့်အမြင့်အပေါ်တွင်သာ မူတည်ပေလိမ့်မည်။

"မြို့တော်ဝန်... ဒါက ဆန့်ကျင်ဘက်ဒြပ်သား ဓာတ်ခွဲခန်းက ပို့လိုက်တဲ့ သတင်းကောင်းပဲ"

ထိုအချိန်တွင် အတွင်းရေးမှူး ချန်ရှင်းကျယ်က မျက်နှာတွင် အပြုံးပန်းများ ဝေဆာလျက် တံခါးကို တွန်းဖွင့်ကာ ဝင်လာခဲ့သည်။

"ဟမ်... " လော်ယွမ်က စာရွက်စာတမ်းကို လှမ်းယူကာ စာမျက်နှာ အနည်းငယ် လှန်ကြည့်လိုက်ပြီးနောက် သူ၏ တွန့်ချိုးနေသော မျက်ခုံးများက ချက်ချင်း ပြေလျော့သွားတော့သည်။

"စွမ်းအင် ပြောင်းလဲမှုနှုန်းက သုံးသန်းပုံ တစ်ပုံအထိ ရောက်သွားပြီပဲ"

အမှန်တကယ်တော့ ပထမဆုံး ဆန့်ကျင်ဘက်ဒြပ်သား စမ်းသပ်ထုတ်လုပ်ရေး စက်ရုံကို တည်ဆောက်ခဲ့သည်မှာ ခြောက်လခန့် ရှိပြီ ဖြစ်သော်လည်း နည်းပညာများ အပြည့်အဝ မရင့်ကျက်သေးခြင်းနှင့် လုံခြုံရေးအရ အပြည့်အဝ အာမမခံနိုင်သေးခြင်းတို့ကြောင့် နည်းပညာဆိုင်ရာ အတည်ပြုမှု အဆင့်တွင်သာ ရှိနေခဲ့သည်။

ထုတ်လုပ်သည့်တိုင်အောင် လုံခြုံသော ပမာဏ အတွင်း၌သာ ထုတ်လုပ်ခြင်း ဖြစ်သည်။ မည်သို့ပင်ဆိုစေကာမူ ဤနေရာသည် အာကာသယာဉ်ကြီးပေါ်တွင် ဖြစ်ရာ မတော်တဆမှု တစ်ခုခု ဖြစ်ပွားခဲ့ပါက ပြင်းထန်သော ဆိုးကျိုးများနှင့် ပျက်စီးဆုံးရှုံးမှုများကို ဖြစ်ပေါ်စေရန် လုံလောက်ပေသည်။

"နှမြောစရာကောင်းတာက ဒီအရာတွေက အရမ်းအန္တရာယ်များလွန်းနေတာပဲ... အာကာသယာဉ်ပေါ်မှာ အများကြီး ထုတ်လုပ်လို့ မရဘူး... အရန်နည်းပညာ အဖြစ်ပဲ ထားလို့ရမယ်"

လော်ယွမ်က ချန်ရှင်းကျယ်ကို လှည့်ပြောလိုက်သည်။ "ဂုဏ်ပြုလွှာ တစ်စောင် ထုတ်ပြန်လိုက်... သူတို့ ဓာတ်ခွဲခန်းကို ဆက်ပြီး ကြိုးစားကြဖို့ ပြောလိုက်ပါ"

"ဟုတ်ကဲ့ပါ... မြို့တော်ဝန်"

ချန်ရှင်းကျယ် ထွက်သွားပြီးနောက် လော်ယွမ်က စာရွက်စာတမ်းများကို ပြန်လည်ကောက်ယူကာ ဝမ်းသာအားရဖြင့် ထပ်မံ ကြည့်ရှုလိုက်သည်။

စွမ်းအင်ပြောင်းလဲမှုနှုန်းမှာ သုံးသန်းပုံ တစ်ပုံမျှသာ ရှိသည်ဟု မထင်လိုက်ပါနှင့်။ အမှန်တကယ်တော့ ဤအချိုးအစားသို့ ရောက်ရှိသွားခြင်းကပင် အကြီးစား ဆန့်ကျင်ဘက်ဒြပ်သား ထုတ်လုပ်မှုအတွက် အခြေခံအားဖြင့် ရင့်ကျက်နေပြီ ဖြစ်ကြောင်း ပြသနေခြင်းပင် ဖြစ်သည်။

အနုမြူ ပေါင်းစပ်ဓာတ်ပေါင်းဖို၏ စွမ်းအင်ထုတ်လုပ်မှု စွမ်းရည်အရ ဆိုလျှင် ရေသန့် ပေါင် ၁၃ ဘီလီယံမှ ၂၂ ဘီလီယံခန့် အသုံးပြုရုံဖြင့် ဆန့်ကျင်ဘက်ဒြပ်သား ပေါင် ၂,၂၀၀ ခန့်ကို ထုတ်လုပ်နိုင်ပြီ ဖြစ်သည်။

ယင်းကို တွန်းကန်အား စွမ်းအင်အဖြစ် အသုံးပြုရန်မှာ အလွန် ဖြုန်းတီးရာ ကျကောင်း ကျနိုင်သော်လည်း အဆုံးအဖြတ်ပေးနိုင်သော မဟာဗျူဟာမြောက် လက်နက်တစ်ခု အနေဖြင့်မူ ၎င်း၏ တန်ဖိုးက အပေါ်ယံ မြင်တွေ့နေရသည်ထက် အဆပေါင်းများစွာ သာလွန်နေပေတော့သည်။

ဆက်ရန်...