အခန်း (၅၁၇-၅၁၈)

အပိုင်း(၅၁၇) အာကာသ ကာကွယ်ရေးစနစ်

လော်ယွမ်၏ အမြင်တွင်တော့ ဤစစ်သင်္ဘောသစ်ကြီးက လူဦးရေ ပိုမိုများပြားစွာ လက်ခံနိုင်စွမ်းရှိခြင်းသည်သာ အရေးအကြီးဆုံးအချက် ဖြစ်နေပေသည်။ ထိုပမာဏက မှန်းဆထားသည်ထက်ပင် အလွန်များပြားနေသည်။

လူငါးသန်းဆိုသည်မှာ ပြောနေစရာပင် မလိုတော့ချေ။ လက်ရှိ မိခင်ယာဉ်ကြီး၏ လူဦးရေ သိပ်သည်းဆကို စံထားကြည့်လျှင်ပင် လူသန်းတစ်ထောင်ခန့်ကို အေးဆေးစွာ နေရာချထားပေးနိုင်သည်။

အထပ်မြင့် အဆောက်အအုံများက လူဦးရေ အမြောက်အမြားကို နေရာချထားရန် အကောင်းဆုံး လက်နက်တစ်ခု ဖြစ်ခဲ့သည်မှာ ကြာပြီဖြစ်သည်။

မြို့ငယ်တစ်မြို့စာမျှသာ ရှိသော ဧရိယာလေးတစ်ခုကပင် ကမ္ဘာမပျက်မီက တရုတ်နိုင်ငံ၏ စုစုပေါင်း လူဦးရေနီးပါးကို နေရာချထားပေးနိုင်သည့် အံ့ဖွယ်ရလဒ်ကို ဖန်တီးပေးနိုင်သည်။

သို့သော် လူသားများ၏ လက်ရှိ တိုးပွားနှုန်းအရဆိုလျှင် ဤယာဉ်ပျံကြီး ပြည့်သွားစေရန် ရာစုနှစ်ပေါင်းများစွာ အချိန်ယူရဦးမည်ဟု ခန့်မှန်းရသည်။

လွန်ခဲ့သော နှစ်များအတွင်း ဗိုရှင်းမိခင်ယာဉ်ပျံကြီး၏ လျှို့ဝှက် စမ်းသပ်စက်ရုံများတွင် လူသားကိုယ်ပွား ဖန်တီးခြင်း လုပ်ငန်းများကို ရပ်နားခဲ့ခြင်း မရှိပေ။ ထုတ်လုပ်မှု ပမာဏကိုသာ အနည်းငယ် လျှော့ချခဲ့ခြင်း ဖြစ်သည်။

ဆယ်နှစ်တာ ကာလအတွင်း လူသားဦးရေမှာ သန်းနှစ်သန်းခန့် တိုးလာခဲ့ပြီး စုစုပေါင်း လူဦးရေ ရှစ်သန်းအထိ ရောက်ရှိလာခဲ့ပြီ ဖြစ်သည်။

ထိုသို့ဖြစ်ရခြင်းမှာ ကိုယ်ပွားများကို ပိုမို မဖန်တီးနိုင်၍ မဟုတ်သလို လျှို့ဝှက်ချက် ပေါက်ကြားသွားမည်ကို စိုးရိမ်၍လည်း မဟုတ်ပေ။

ကလေးထိန်းများနှင့် ဆရာဆရာမ အရေအတွက် ပြင်းထန်စွာ ရှားပါးနေခြင်းကြောင့်သာ ဖြစ်သည်။

အိပ်စက်ခြင်းမရှိဘဲ နိုးကြားနေသူ အရေအတွက်မှာ အလွန်နည်းပါးလွန်းလှပြီး စုစုပေါင်းမှ ငါးသိန်းပင် မပြည့်ချေ။ ထိုအထဲမှ အများစုမှာလည်း သိပ္ပံနှင့် သုတေသန ပညာရှင်များသာ ဖြစ်ကြသည်။

သီးသန့် ကလေးထိန်းဝန်ထမ်း အရေအတွက်မှာ သုံးသောင်းကျော်မျှသာ ရှိသည်။ မည်သို့ပင်ဆိုစေ ကိုယ်ပွားလူသားများဆိုသည်မှာ စက်ရုံထုတ် ကုန်ပစ္စည်းများ မဟုတ်ကြပေ။

ထို့အပြင် လော်ယွမ်၏ အစွမ်းထက်သော ကိုယ်ပွားများကဲ့သို့ အာဟာရရည်ထဲမှ ထွက်လာသည်နှင့် လျစ်လျူရှုထား၍ ရသည်မျိုးလည်း မဟုတ်ချေ။

မွေးကင်းစ ကိုယ်ပွားကလေးငယ်များမှာ အလွန် နုနယ်ပျော့ပျောင်းလှသည်။ သာမန်လူများနှင့် သိပ်ပြီး ကွာခြားမှုမရှိဘဲ အနည်းငယ်မျှသာ ပို၍ ကျန်းမာကြံ့ခိုင်ကြသည်။

အစာကျွေးခြင်းမှအစ အညစ်အကြေး စွန့်ခြင်းအဆုံး အရာအားလုံးကို ဂရုတစိုက် ပြုစုစောင့်ရှောက်ပေးမည့်သူ လိုအပ်ပေသည်။

အသက် ခြောက်လပြည့်ပြီးချိန်မှသာ သူတို့က သာမန်ထက် ထူးခြားသော စွမ်းရည်များကို စတင်ပြသလာကြသည်။

ကိုယ်တိုင် လမ်းလျှောက်လာနိုင်သလို စကားပြောရန်လည်း သင်ယူတတ်မြောက်လာကြသည်။

ဤအချိန်သို့ ရောက်ရှိသွားပါက သူတို့ကို အနီးကပ် ဂရုစိုက်ပေးရန် သိပ်မလိုအပ်တော့ချေ။

ဤကိုယ်ပွားကလေးငယ်များကို ပုံရိပ်ယောင်ကမ္ဘာထဲတွင် တွေ့မြင်ခွင့် မရှိပေ။ သူတို့အားလုံးက မိခင်ယာဉ်ပျံကြီးပေါ်ရှိ မိဘမဲ့ဂေဟာများတွင်သာ နေထိုင်သင်ကြားကြရပြီး ပုံရိပ်ယောင်ကမ္ဘာထဲသို့ ဝင်ရောက်လှုပ်ရှားခွင့် မရှိကြချေ။

သူတို့၏ သိမြင်နားလည်နိုင်စွမ်းနှင့် ခွဲခြားဆင်ခြင်နိုင်စွမ်းတို့မှာ ရင့်ကျက်ရန် အလှမ်းဝေးနေသေးသည်။ ပုံရိပ်ယောင်ကမ္ဘာထဲတွင် အချိန်ကြာမြင့်စွာ နေထိုင်မိပါက လက်တွေ့ကမ္ဘာနှင့် ပုံရိပ်ယောင်ကမ္ဘာကြား ကွာခြားချက်ကို ရောထွေးသွားစေနိုင်ပေသည်။

တကယ်တော့ ကလေးများကို ပြောနေစရာပင် မလိုပေ။ လူကြီးတော်တော်များများပင် ဤသို့သော အခြေအနေမျိုးကို ကြုံတွေ့နေရပြီ ဖြစ်သည်။

ပုံရိပ်ယောင်ကမ္ဘာထဲမှ ထွက်လာတိုင်း သူတို့က ဘဝတစ်ခုလုံး ပြောင်းလဲသွားသကဲ့သို့ ခံစားကြရသည်။

သူတို့အတွက်တော့ လက်တွေ့ကမ္ဘာဆိုသည်မှာ ဇီဝကမ္မဆိုင်ရာ လိုအပ်ချက်များကို ဖြည့်ဆည်းပေးသည့် နေရာတစ်ခုမျှသာ ဖြစ်နေတော့သည်။

သူတို့၏ အချိန်အများစုကို ပုံရိပ်ယောင်ကမ္ဘာထဲတွင်သာ ကုန်ဆုံးစေကြပြီး ထိုနေရာတွင် နေထိုင်ခြင်း၊ အလုပ်လုပ်ခြင်းနှင့် ပျော်ပါးခြင်းတို့ကို ပြုလုပ်ကြသည်။

မည်သည့်အရာက လက်တွေ့လဲ... မည်သည့်အရာက အတုအယောင်လဲ...။ ပုံရိပ်ယောင်ကမ္ဘာကြီးက တစ်နေ့တခြား ပိုမို လက်တွေ့ကျလာသည်နှင့်အမျှ ဤအဓိပ္ပာယ် ဖွင့်ဆိုချက်များက တဖြည်းဖြည်း ဝေဝါးလာခဲ့ပြီ ဖြစ်သည်။

ဤသည်မှာ ပုံရိပ်ယောင်ကမ္ဘာထဲတွင် အချိန်ကြာမြင့်စွာ နေထိုင်ခြင်း၏ ရှောင်လွှဲ၍မရသော ရလဒ်ဖြစ်သလို နောက်ဆက်တွဲ ဆိုးကျိုးတစ်ခုလည်း ဖြစ်သည်။

သို့သော် လော်ယွမ်က ဤကိစ္စကို ဝင်ရောက်စွက်ဖက် ပြင်ဆင်လိုစိတ် မရှိပေ။ ထိုသုတေသနပညာရှင်များ၏ အကြီးမားဆုံး တန်ဖိုးမှာ သူတို့၏ ဉာဏ်ပညာကို မြှုပ်နှံပေးဆပ်ခြင်းပင် ဖြစ်သည်။

သူတို့ မည်သည့်နေရာမှာ အလုပ်လုပ်သည်ဖြစ်စေ အလုပ်ကို မထိခိုက်သရွေ့ အရာအားလုံးက အဆင်ပြေနေမည်သာ ဖြစ်သည်။

ဤစစ်သင်္ဘောသစ်ကြီးက မည်မျှပင် အစွမ်းထက်ပြီး ခေတ်မီနေပါစေ လက်ရှိ လူသားများအတွက်တော့ ဘာအသုံးမှ မဝင်သေးပေ။

လူသားများက ဟောင်းနွမ်းနေပြီဖြစ်သော ဤဗိုရှင်းမိခင်ယာဉ်ပျံကြီးထဲတွင်သာ ဆက်လက်နေထိုင်ရဦးမည်ဖြစ်ပြီး နည်းပညာ စမ်းသပ်မှုများကိုလည်း ပုံရိပ်ယောင်ကမ္ဘာထဲတွင်သာ ပြုလုပ်နိုင်သေးသည်။

ဤနေရာက အရှေ့ကိုသွားရန် ရွာမရှိသလို အနောက်ကိုဆုတ်ရန်လည်း စခန်းမရှိပေ။ မှောင်မိုက်နေသော အာကာသဟင်းလင်းပြင်ကြီးသာရှိပြီး သယံဇာတ ဟူ၍ တစ်စက်ကလေးမျှပင် မရှိချေ။

ကံကောင်းထောက်မစွာဖြင့် ဂြိုဟ်သိမ်ဂြိုဟ်မွှား တစ်လုံးကို တွေ့ရှိခဲ့လျှင်တောင်မှ ပေါင်ချိန် ဘီလီယံပေါင်းများစွာ အလေးချိန်ရှိသော ဧရာမ အာကာသယာဉ်ကြီး တစ်စီးကို တည်ဆောက်နိုင်စွမ်း ရှိမည်မဟုတ်ပေ။

ဤအရာကြီးကို တည်ဆောက်ရန်အတွက် ဂြိုဟ်တစ်လုံးလုံးကို သတ္တုတွင်းအဖြစ် အသုံးပြုရမည် ဖြစ်သည်။ ဂြိုဟ်သိမ်ဂြိုဟ်မွှား တစ်လုံး၊ နှစ်လုံးမျှဖြင့် လုံလောက်မည် မဟုတ်ချေ။

ထို့ကြောင့် ဘားနတ် ကြယ်အဖွဲ့အစည်းသို့ ရောက်ရှိသွားမှသာ တည်ဆောက်ရေး လုပ်ငန်းများကို အမှန်တကယ် စတင်နိုင်မည် ဖြစ်သည်။

ထိုနေရာသို့ ရောက်ရန်အတွက်လည်း ဆယ်နှစ်ကျော်ကြာ ခရီးနှင်ရဦးမည် ဖြစ်သည်။

သို့သော် ဆယ်နှစ်ကျော် ကြာပြီးနောက်တွင် လူသားများ၏ နည်းပညာ တိုးတက်မှု အဟုန်အရဆိုလျှင် ဤကဲ့သို့သော အာကာသယာဉ်မျိုးကို အရေးလုပ်တော့မည် မဟုတ်ပေ။

ဤယာဉ်ပျံကြီးက ပုံကြမ်းစာရွက်ပေါ်တွင်သာ ကျန်ရစ်ရမည့် ကံကြမ္မာရှိပြီး နောင်တွင် ၎င်း၏ ခမ်းနားကြီးကျယ်မှုများကို ပုံရိပ်ယောင်ကမ္ဘာထဲတွင်သာ လေ့လာရှုစားနိုင်တော့မည် ဖြစ်သည်။

ယာဉ်ပျံကို လေ့လာကြည့်ရှုပြီးနောက် သူတို့အဖွဲ့က ယာဉ်ပျံငယ်လေးကို စီးနင်းကာ နောက်တစ်နေရာသို့ ဆက်လက် ထွက်ခွာလာခဲ့ကြသည်။

ဤနေရာရှိ အာကာသဟင်းလင်းပြင်ကြီးက လူသားတို့၏ စစ်ရေးစွမ်းအားများကို စမ်းသပ်ရာ နေရာတစ်ခု ဖြစ်လာခဲ့ပြီ ဖြစ်သည်။

ယာဉ်ပျံများနှင့် စက်ရုံများအပြင် ထူးဆန်းအံ့ဩဖွယ်ကောင်းသော အာကာသ ကာကွယ်ရေး လက်နက်များစွာလည်း လွင့်မျောနေကြသည်။

"ဒီဟာက ကောင်းကင်ဒိုင်းလွှာ လက်နက်သုတေသနဌာနက ဒီဇိုင်းဆွဲထားတဲ့ လက်နက်တပ်ဆင်ထားတဲ့ ဂြိုဟ်တု ကမ္ဘာလုံးဆိုင်ရာ ကာကွယ်ရေးစနစ်ရဲ့ အစိတ်အပိုင်းတစ်ခုပါ"

"သူ့ရဲ့အလေးချိန်က ပေါင် ဘီလီယံ ၆၀၀ ကျော်လောက် ရှိတယ်... ဧရာမ အနုမြူ ပေါင်းစပ်ဖို ဆယ်လုံး... ဂမ်မာရောင်ခြည် အမြောက်တစ်လက်နဲ့ အမြန်ပစ် လျှပ်စစ်သံလိုက် အမြောက် ၁၂ လက် ပါဝင်တဲ့ ကာကွယ်ရေး စနစ်တစ်ခု ပိုင်ဆိုင်ထားတယ်"

"ပစ်မှတ်တွေကို အသိဉာဏ်တုနဲ့ ဖမ်းယူနိုင်ပြီး အစုံလိုက်ဆိုရင် ဂြိုဟ်တုပေါင်း တစ်သောင်းရှစ်ထောင် ပါဝင်မှာဖြစ်လို့ ဂြိုဟ်တစ်စင်းလုံးကို လွှမ်းခြုံထားနိုင်မှာပါ"

ကောင်းကင်ဒိုင်းလွှား လက်နက်ဒီဇိုင်းဌာနသည် အာကာသ ကာကွယ်ရေး လက်နက်များကို သီးသန့် ဒီဇိုင်းဆွဲပေးသော အကြီးဆုံး သုတေသန ဌာနများထဲမှ တစ်ခုဖြစ်သည်။

ဤနေရာရှိ အာကာသ ကာကွယ်ရေး လက်နက် သုံးပုံနှစ်ပုံခန့်ကို သူတို့ကသာ ဒီဇိုင်းဆွဲပေးထားခြင်း ဖြစ်သည်။

ယခုတစ်ခေါက် လော်ယွမ်နှင့် ခေါင်းဆောင်အဖွဲ့က အာကာသ ကာကွယ်ရေး ကိစ္စရပ်များကို လာရောက်စစ်ဆေးမည်ဖြစ်ရာ ဌာနမှူးဖြစ်သူက အစွမ်းကုန် ကြိုးစားကာ သေသေချာချာ ရှင်းပြနေခြင်း ဖြစ်သည်။

သို့သော် လော်ယွမ်က ထိုကိန်းဂဏန်းများကို ကြားလိုက်ရချိန်တွင် မျက်မှောင်ကြုတ်သွားခဲ့သည်။

"ပေါင် ဘီလီယံ ၆၀၀ ကျော်... အရေအတွက်ကလည်း တစ်သောင်းကျော်ဆိုတော့ ဒီလောက် သယံဇာတ ကုန်ကျစရိတ်ကို ကျုပ်တို့ တတ်နိုင်ပါ့မလား"

"အဲဒါက..."

ဒီဇိုင်းဌာနမှူး၏ မျက်နှာပေါ်တွင် အခက်တွေ့သွားသော အမူအရာများ ပေါ်လွင်သွားသည်။

"အဲဒါက လူငယ်တချို့ ဒီဇိုင်းဆွဲထားတာပါ... ကျွန်တော်တို့ ချက်ချင်း ပြင်ဆင်လိုက်ပါ့မယ်"

"ဒီဇိုင်းဆွဲတဲ့အခါ ရဲရဲဝံ့ဝံ့ လုပ်လို့ရတယ်... ဒါပေမဲ့ သီအိုရီနဲ့ လက်တွေ့ကိုလည်း ချိတ်ဆက်ရမယ်... လက်တွေ့ကမ္ဘာက ပုံရိပ်ယောင်ကမ္ဘာ မဟုတ်ဘူး... တူးဖော်ဖို့ သယံဇာတ အဲဒီလောက် အများကြီး မရှိဘူး"

လော်ယွမ်က လေးနက်သော လေသံဖြင့် သတိပေးလိုက်သည်။

"မြို့တော်ဝန် ပြောတာ မှန်တယ်... အဲဒါကိုပဲ ကျွန်တော်လည်း ပြောချင်နေတာ... ဒီနှစ်တွေထဲမှာ စက်မှုနဲ့ စစ်ဘက်ဆိုင်ရာ ဒီဇိုင်းဌာနတွေက ဒီဇိုင်းဆွဲရင် ပိုပိုပြီး ရဲတင်းလာကြတယ်"

"ကြီးလေလှလေ များလေကောင်းလေဆိုတဲ့ အယူအဆကို ကိုင်စွဲထားကြတာ... တလောက ပေတစ်ထောင်ကျော် မြင့်တဲ့ စက်ရုပ်ကြီးဆိုရင် ကျွန်တော်တောင် တော်တော်လေး လန့်သွားတာ... အဲဒီလောက် ကြီးမားမြင့်မားနေတော့ ဘာအသုံးကျမှာလဲ"

"တကယ်တမ်း စစ်ဖြစ်လာရင် အာကာသ တိုက်လေယာဉ်လောက်တောင် အသုံးဝင်မှာ မဟုတ်ဘူး... ဒီလို အလေ့အထမျိုးကို ကျွန်တော်တို့ တားဆီးသင့်ပြီ ထင်တယ်"

သူ့ဘေးနားရှိ ပိကျန့်ဖိန်ကလည်း ချက်ချင်း ထောက်ခံပြောဆိုလိုက်သည်။

အထက်လူကြီး နှစ်ဦး၏ ဆက်တိုက် ဝေဖန်မှုကြောင့် သုတေသန ဌာနမှူးခမျာ ချွေးပြန်သွားခဲ့ပြီး ဘာမှပင် ပြန်လည် မချေပရဲတော့ချေ။

"ဒါက တော်သေးတာပေါ့... အရင်က တည်ဆောက်မယ့် စစ်သင်္ဘောရဲ့ ပထမဆုံး ဒီဇိုင်းမူကြမ်း အလေးချိန်က ဘယ်လောက်ရှိလဲဆိုတာ ခင်ဗျားတို့ လုံးဝ တွေးမိမှာ မဟုတ်ဘူး... ပေါင်ချိန် ထရီလီယံ ၆၀၀ ကျော်လေ... ဒီလူတွေ ဘာတွေ တွေးနေကြတာလဲ"

ထျန်ကျင်းဖိန်က အေးအေးဆေးဆေး လူကြီးတစ်ဦးကဲ့သို့ ပြုံးရွှင်စွာ ပြောလိုက်သည်။ သို့သော် တကယ်တမ်းတွင် သူသည် အပြင်ပိုင်း၌ တင်းမာခက်ထန်သူ တစ်ဦးဖြစ်သည်။

စက်မှုဝန်ကြီးဌာန၏ တာဝန်ခံ အကြီးအကဲ တစ်ဦးအနေဖြင့် သူ၏ လုပ်ဟန်များက အလွန် တင်းကျပ်ပြီး ပြတ်သားလှသည်။

သာမန် လက်အောက်ငယ်သားများဆိုလျှင် သူ၏ရှေ့တွင် အသက်ကိုပင် ပြင်းပြင်း မရှူရဲကြပေ။

လော်ယွမ်က ပြုံးလိုက်သည်။

"သူတို့ရဲ့ ပုံရိပ်ယောင်ကမ္ဘာ အသုံးပြုခွင့်က နည်းနည်း မြင့်လွန်းနေတယ်... ပြန်ပြီး ချိန်ညှိဖို့ လိုနေပြီထင်တယ်"

"အကန့်အသတ်မရှိ သယံဇာတ ထောက်ပံ့မှုက သိပ္ပံသုတေသန စွမ်းဆောင်ရည်ကို မြန်ဆန်စေပေမဲ့ နည်းပညာ ဖွံ့ဖြိုးတိုးတက်မှုကို လမ်းမှားရောက်သွားစေနိုင်တယ်"

"ဘားနတ် ကြယ်အဖွဲ့အစည်းက သယံဇာတ ရှားပါးပြီး တူးဖော်ဖို့လည်း ခက်ခဲတယ်... ဒီအတိုင်း ဆက်သွားနေရင် တစ်ချိန်ချိန်မှာ ကျွန်တော်တို့ရဲ့ ဖွံ့ဖြိုးတိုးတက်မှုက ပြင်းပြင်းထန်ထန် ကန့်သတ်ခံရလိမ့်မယ်"

ဤသည်မှာ ထင်ကြေးပေးနေခြင်း မဟုတ်ဘဲ လက်တွေ့ အမှန်တရားပင် ဖြစ်သည်။ ယာဉ်ပျံမှ ထောက်လှမ်းရရှိသော အချက်အလက်များအရ ဤကြယ်အဖွဲ့အစည်းအတွင်းရှိ ကျောက်သားဂြိုဟ်ဆို၍ နှစ်လုံးမျှသာ ရှိပြီး ကျန်ရှိနေသည်များမှာ ဓာတ်ငွေ့ဂြိုဟ်များသာ ဖြစ်ကြသည်။

ထို့အပြင် ထိုကြယ်မှာလည်း ကြယ်ပုနီအဆင့်သို့ ရောက်ရှိနေပြီဖြစ်ရာ အလင်းရောင် ထုတ်လွှတ်မှုမှာ အလွန် မှေးမှိန်အားနည်းနေသည်။

ထို့ကြောင့် ဤဂြိုဟ်များ၏ မျက်နှာပြင်ပေါ်တွင် အလွန်ထူထဲသော ရေခဲလွှာများ ဖုံးလွှမ်းနေသည်။

ထိုရေခဲလွှာများသည် ကမ္ဘာမြေပေါ်ရှိ ပါးလွှာသော ရေခဲလွှာမျိုး မဟုတ်ဘဲ ပေ သောင်းချီ သို့မဟုတ် ပေ သိန်းချီ အထူရှိသော ရေခဲလွှာကြီးများ ဖြစ်သည်။

ရယူရန် လွယ်ကူသော ရေအရင်းအမြစ်များမှလွဲ၍ အခြားသော သယံဇာတများကို တူးဖော်ရန်မှာ အလွန် ခက်ခဲရှုပ်ထွေးပြီး အချိန်ကုန် လူပန်းဖြစ်စေမည့် ကိစ္စဖြစ်သည်။

ပို၍ ဆိုးရွားသည်မှာ လူသားများအနေဖြင့် ကျောက်သားဂြိုဟ်များဟု ထင်ရသော ဂြိုဟ်များသည် အမှန်တကယ်တွင် ဓာတ်ငွေ့ သို့မဟုတ် အရည်များ ဖြစ်နေနိုင်ခြေကိုလည်း ထည့်သွင်း စဉ်းစားရမည် ဖြစ်သည်။

အကယ်၍ ထိုအချက်သာ မှန်ကန်နေခဲ့ပါက လူသားများအတွက်တော့ သေချာပေါက် သတင်းဆိုးကြီး တစ်ခုပင် ဖြစ်လာပေလိမ့်မည်။

အမှန်တကယ်တွင် ဤကိစ္စမျိုး ဖြစ်လာရန် အလားအလာ နည်းပါးလှသည် မဟုတ်ပေ။ ထိုကြယ်အဖွဲ့အစည်း၏ အပူချိန်မှာ အလွန်အမင်း နိမ့်ကျလွန်းလှသည်။

အကယ်၍ သာမန် ဓာတ်ငွေ့ဂြိုဟ်တစ်လုံး၏ ဒြပ်ထုသည် အလိုအလျောက် အပူထုတ်လွှတ်နိုင်လောက်အောင် မကြီးမားပါက ရေခဲသွားနိုင်ခြေ ရှိသည်။

အဘယ်ကြောင့်ဆိုသော် မီသိန်းဖြစ်စေ၊ ဟိုက်ဒရိုဂျင်ဖြစ်စေ ပကတိသုညနှင့် နီးကပ်နေသော အလွန်အမင်း အေးခဲသည့် အပူချိန်ကို ခံနိုင်ရည် မရှိသောကြောင့်ပင် ဖြစ်သည်။

ဆက်ရန်...

အပိုင်း(၅၁၈) တတိယအကြိမ်မြောက် လေးဘက်မြင် အသွင်ပြောင်းလဲခြင်း

ထိုစဉ်မှာပင် လော်ယွမ်က ရှင်းပြ၍မရသော ကြိုတင်နိမိတ်တစ်ခုကို ရုတ်တရက် ခံစားလိုက်ရ၏။

သူ၏ စိတ်ထဲတွင် ရုတ်ချည်း သဘောပေါက်သွားကာ တိုးတိတ်စွာ သက်ပြင်းချလိုက်သည်။

"ခင်ဗျားတို့ ကျွန်တော့်ကိုယ်စား ဆက်ပြီး စစ်ဆေးပေးကြ... ကျွန်တော် အရင်သွားနှင့်မယ်"

ထိုသို့ပြောပြီးသည်နှင့် လော်ယွမ်၏ ပုံရိပ်သည် ယာဉ်ပျံထဲမှနေ၍ ရုတ်တရက် ပျောက်ကွယ်သွားလေတော့သည်။

လူအားလုံးက တစ်ယောက်မျက်နှာ တစ်ယောက် ကြည့်လိုက်ကြ၏။

ဒီဇိုင်းဌာနမှ ကျောင်းအုပ်ကြီးဆိုလျှင် မျက်နှာတစ်ခုလုံး ဖြူဖပ်ဖြူရော် ဖြစ်သွားရသည်အထိ ထိတ်လန့်သွားခဲ့သည်။

မြို့တော်ဝန်ကို မကျေမနပ် ဖြစ်စေခဲ့သည့်အတွက် သူ၏ ကျောင်းအုပ်ရာထူးမှာ မည်မျှကြာကြာ ခံမည်နည်း။

လော်ယွမ်သည် မျက်စိတစ်မှိတ်အတွင်းမှာပင် လက်တွေ့ကမ္ဘာဆီသို့ ပြန်လည်ရောက်ရှိလာခဲ့သည်။

ဤနေရာမှာ မြို့တော်ခန်းမ ရုံးခန်းမဟုတ်ဘဲ သူ၏ အိမ်ရာရှိ အိပ်ခန်းပင် ဖြစ်သည်။

သူက တတိယမျိုးဆက် ဇီဝအခန်းငယ်ထဲမှ ထလာပြီး ကိုယ်လက်သန့်စင်ကာ အဝတ်အစားလဲလှယ်ပြီးနောက် ကုတင်စွန်းတွင် ဝင်ထိုင်လိုက်၏။

သူက အိပ်ရာခင်း၏ နူးညံ့ချောမွေ့သော အထိအတွေ့ကို ဖွဖွလေး ပွတ်သပ်လိုက်သော်လည်း မျက်နှာပေါ်တွင် မည်သည့် ခံစားချက်မျှ မပေါ်လွင်နေပေ။

ဟွမ်ကျားဟွေ အပါအဝင် အမျိုးသမီးများကို သူကိုယ်တိုင် နားချပြီး အိပ်မောကျအခန်းငယ်ထဲသို့ ဝင်ရောက်စေခဲ့ပြီးနောက် ချန်ရှင်းကျယ်ကလည်း ဤနေရာသို့ ပြန်မလာချင်တော့သဖြင့် အိမ်ကြီးမှာ အတော်လေး ခြောက်ကပ်သွားခဲ့သည်။

သို့သော်လည်း ပြီးခဲ့သည့် နှစ်များအတွင်း သူက ဤအထီးကျန်ဆန်မှုနှင့် အသားကျနေခဲ့ပြီ ဖြစ်သည်။ တစ်ခါတစ်ရံ ချန်ရှင်းကျယ်၏ အိမ်သို့ သွားရောက်ကာ ကလေးများကို ကြည့်ရှုရင်း ရက်အနည်းငယ် နေထိုင်တတ်သည်မှအပ အချိန်အများစုကို ဤနေရာတွင်သာ နေထိုင်လေ့ရှိသည်။

နောက်ဆုံးအချိန် ရောက်လာမည့်အခိုက်အတန့်ကို စောင့်ဆိုင်းရင်း သူက တိတ်ဆိတ်ငြိမ်သက်စွာ ထိုင်နေလိုက်၏။

ရောက်လာမည့် အရာသည် ငြင်းဆန်နေရုံဖြင့် ရှောင်လွှဲသွားမည် မဟုတ်ချေ။ ဤအချိန်အတွက် လော်ယွမ်က စိတ်ပိုင်းဆိုင်ရာ ကြိုတင်ပြင်ဆင်ထားခဲ့သည်မှာ ကြာမြင့်နေပြီ ဖြစ်သည်။

မိနစ်အနည်းငယ် ကြာသွားသည်လား၊ သို့မဟုတ် နာရီဝက်ခန့် ကြာသွားသည်လား မသိပေ။ သူ၏ ခန္ဓာကိုယ်က ရုတ်တရက် အနည်းငယ် ယိမ်းယိုင်သွားပြီး ဦးနှောက်ထဲတွင် ဝေဝါးသွားကာ မျက်စိတစ်မှိတ်အတွင်းမှာပင် ကြီးကျယ်ခမ်းနားလှသော ကမ္ဘာကြီးတစ်ခုက သူ၏ အမြင်အာရုံထဲသို့ ခုန်ဝင်လာသကဲ့သို့ ခံစားလိုက်ရသည်။

တစ်ချိန်တည်းမှာပင် သူ၏ မျက်စိရှေ့ရှိ အိပ်ခန်းကြီးမှာ တဖြည်းဖြည်း သေးငယ်သွားလေတော့သည်။

သူက လေးဘက်မြင် ကမ္ဘာကြီးနှင့် အလွန်လျင်မြန်စွာ နီးကပ်လာနေပြီး သူ၏ ခန္ဓာကိုယ် အစိတ်အပိုင်း အချို့မှာလည်း ထိုလေးဘက်မြင် ကမ္ဘာထဲသို့ တဖြည်းဖြည်း ပေါင်းစပ်ဝင်ရောက်သွားကြောင်းကို ခံစားနေရသည်။

ကြီးမားလှသော သတင်းအချက်အလက် ပမာဏက သူ၏ ဦးနှောက်ထဲသို့ ရေလှိုင်းကြီးများကဲ့သို့ လိမ့်ဝင်လာ၏။ အစပိုင်းတွင် သူ၏ ဦးနှောက်မှာ အနည်းငယ် ပိတ်ဆို့သွားသလို ဖြစ်ကာ တွေးခေါ်နိုင်စွမ်းများလည်း ရှုပ်ထွေးသွားခဲ့သည်။

သို့သော်လည်း မျက်စိတစ်မှိတ်အတွင်းမှာပင် သူက ဖော်ပြ၍မရနိုင်အောင် ကြည်လင်ပြတ်သားသော အသိအာရုံတစ်ခုကို ခံစားလိုက်ရသည်။

အရာအားလုံးမှ လွတ်မြောက်သွားသလိုမျိုး၊ လူတိုင်း မူးယစ်နေချိန်တွင် ကိုယ်တိုင်ကသာ အမှီအခိုကင်းစွာ ရပ်တည်နေနိုင်သည့် ခံစားချက်မျိုး ဖြစ်သည်။

သူက ရောင်စုံအလင်းတန်းများကို မြင်တွေ့နေရကာ စစ်မှန်သော စကြဝဠာကြီးကို မြင်တွေ့နေရသည်။ ထို့အပြင် စကြဝဠာ၏ အမြှေးပါးမျှသာ ဖြစ်သော သုံးဘက်မြင် ကမ္ဘာကြီးကိုလည်း တွေ့မြင်နေရ၏။

မူလက ဤကမ္ဘာကြီးနှင့် ဆီနှင့်ရေကဲ့သို့ လုံးဝ ပေါင်းစပ်၍ မရနိုင်သော အမှောင်စွမ်းအင်များက သူ၏ ခန္ဓာကိုယ်ထဲသို့ တဖြည်းဖြည်း စိမ့်ဝင်လာနေသည်။

ပြင်းထန်လှသော သာယာကြည်နူးမှု တစ်ခုက သူ၏ စိတ်နှလုံးထဲတွင် ပြည့်နှက်လာသော်လည်း ထိုအရာကို သူက စိတ်ထဲ၌ လုံးဝ မထားချေ။

ယခုအချိန်တွင် သူသည် အလွန်အမင်း တည်ငြိမ်အေးဆေးနေကာ အမြင့်ဆုံးနေရာတွင် ရှိနေသော နတ်ဘုရားတစ်ပါးကဲ့သို့ လောကရှိ အရာအားလုံးကို ထိန်းချုပ်ထားပြီး သစ္စာတရားကို ဆုပ်ကိုင်ထားနိုင်လေသည်။ ရုပ်ပိုင်းဆိုင်ရာ သာယာမှုများက သူ၏ စိတ်နှလုံးကို မည်သို့မျှ မလှုပ်ခတ်နိုင်တော့ပေ။

"ဒိုင်း" ခနဲ အသံနှင့်အတူ ဤတန်ဖိုးကြီးမားလှသော သစ်သားကုတင်ကြီးမှာ လေးလံလှသော ခန္ဓာကိုယ်၏ ဖိအားကြောင့် ကျိုးပဲ့ပျက်စီးသွားလေ၏။

သို့သော်လည်း လော်ယွမ်က မြေပြင်ပေါ်သို့ ပြုတ်ကျမသွားခဲ့ပေ။ သူ၏ ခန္ဓာကိုယ်သည် တောင်ကုန်းတစ်ခုကဲ့သို့ တည်ငြိမ်စွာဖြင့် လေထဲတွင် တိတ်ဆိတ်စွာ ပေါလောပေါ်လျက် ထိုင်နေဆဲ ဖြစ်သည်။ လေထဲတွင် မျက်စိဖြင့် မမြင်နိုင်သော ကုတင်တစ်လုံး ရှိနေသည့်အလားပင်။

သိပ်မကြာမီမှာပင် ခေါင်းထက်ရှိ သတ္တုမျက်နှာကြက်မှာလည်း ဦးခေါင်းနှင့် ထိမိကာ ပေါက်ပြဲသွားလေ၏။

အဆောက်အအုံ၏ ပါးလွှာသော အကြိတ်ခံ သတ္တုပြားများမှာ သူ၏ ရှေ့တွင် ကြွပ်ဆတ်သော ရေညှိပြားတစ်ချပ်ကဲ့သို့ ချက်ချင်းပင် အပိုင်းပိုင်းအစစ ကွဲအက်သွားလေတော့သည်။

သူ၏ ခန္ဓာကိုယ်မှာ အရည်အသွေးပိုင်းဆိုင်ရာ ပြောင်းလဲမှုများ ဖြစ်ပေါ်နေပုံရသော်လည်း အခြားတစ်ဖက်တွင်မူ မည်သည့်အရာမျှ မဖြစ်ပျက်နေသကဲ့သို့ ခံစားရပြန်သည်။

ဧည့်ခန်းထဲတွင် အိမ်မှုကိစ္စများကို လုပ်ဆောင်နေသော ယဲ့ချိုးယွီက ပြင်းထန်လှသော ထိတ်လန့်ကြောက်ရွံ့မှုကို ခံစားလိုက်ရသည်။

ယခုတစ်ကြိမ် ခရီးဝေး သွားလာမှုတွင် သူမက အိပ်မောကျအခန်းငယ်ထဲသို့ မဝင်ရောက်ခဲ့ဘဲ ကိုယ်တိုင် ဆန္ဒအလျောက် ကျန်ရစ်ခဲ့ခြင်း ဖြစ်သည်။

လော်ယွမ် မိသားစု၏ မိသားစုဆရာဝန်နှင့် အိမ်အကူ တစ်ယောက်အနေဖြင့် အိမ်မှုကိစ္စများကို ဖြေရှင်းရန် ကျန်ရစ်ခဲ့ခြင်းက သူမ၏ အဓိက တာဝန်ပင် ဖြစ်သည်။

ဤအချိန်တွင် သူမက စားပွဲကို အားယူကာ ကိုင်တွယ်ထားရပြီး နှုတ်ခမ်းငယ်များမှာလည်း အားအင်ကင်းမဲ့စွာ ပွင့်ဟနေလျက် အသက်ကို ပြင်းပြင်းရှူနေရသည်။

ဦးနှောက်ထဲတွင်လည်း ဟာလာဟင်းလင်း ဖြစ်နေကာ သူမ၏ အသက်ဝိညာဉ်မှာ ဖယောင်းတိုင်မီးကဲ့သို့ ယိမ်းယိုင်နေပြီး သေမင်းက မျက်စိရှေ့မှောက်သို့ ရောက်နေသကဲ့သို့ ခံစားနေရသည်။

သူမက နောက်ဆုံး ကျန်ရစ်နေသော အားအင်များကို စုစည်းကာ စံအိမ်ကြီး၏ အပြင်ဘက်ဆီသို့ ဒယိမ်းဒယိုင်ဖြင့် ခက်ခဲစွာ ပြေးထွက်သွားလေ၏။

တံခါးဝသို့ ရောက်သည်နှင့် တစ်ပြိုင်နက် "ကျွီ... ကျွီ" ဟူသော အသံများကို ကြားလိုက်ရသည်။ သူမ၏ စိတ်ထဲတွင် ကြောက်လန့်နေသော်လည်း နောက်သို့ လှည့်ကြည့်ရန် အနည်းငယ်မျှပင် မဝံ့ရဲချေ။

ကြောက်မက်ဖွယ်ကောင်းသော အငွေ့အသက်များက ပိုမို ပြင်းထန်ကာ ဖိနှိပ်လာပြီး လေထုမှာလည်း ရူးသွပ်မတတ် လှုပ်ရှားနေလေသည်။

မလှမ်းမကမ်းရှိ လူလုပ်ရေကန်ကြီးမှာလည်း ပုံမှန်မဟုတ်ဘဲ ရေဝဲများ ဖြစ်ပေါ်နေကာ တစ်ခါတစ်ရံတွင် ရေပန်းများပင် ပန်းထွက်လာတတ်သည်။

ဤကဲ့သို့ သဘာဝဘေးအန္တရာယ်ကဲ့သို့သော မြင်ကွင်းမျိုးကို ရင်ဆိုင်လိုက်ရချိန်တွင် ယဲ့ချိုးယွီက နောက်ဆုံး၌ ဆက်လက် မတောင့်ခံနိုင်တော့ဘဲ ခန္ဓာကိုယ် တစ်ခုလုံး ပျော့ခွေကာ မြေပြင်ပေါ်သို့ လဲကျသွားလေတော့သည်။

နောက်တစ်စက္ကန့်တွင်တော့ စူးရှလှသော သတ္တုပွတ်တိုက်သံ တစ်ခုက သူမ၏ နားစည်ကို တုန်ခါသွားစေခဲ့သည်။

သူမက ခက်ခဲစွာဖြင့် နောက်သို့ လှည့်ကြည့်လိုက်သောအခါ မျက်လုံးများ ပြူးကျယ်သွားရသည်။ မျက်လုံးထဲတွင် ထိတ်လန့်မှုနှင့် မျှော်လင့်ချက် ကင်းမဲ့မှုများ ပြည့်နှက်နေပြီး ခန္ဓာကိုယ်မှာလည်း ရုန်းကန်ရန် ခွန်အားမရှိတော့သော သတ္တဝါငယ်လေး တစ်ကောင်ကဲ့သို့ တစ်ဆက်ဆက် တုန်ယင်နေ၏။

မူလက ခမ်းနားထည်ဝါလှသော ဤစံအိမ်ကြီးမှာ ယခုအချိန်တွင် လိမ်ကျစ်နေသော မုန့်ကြိုးလိမ် တစ်ခုကဲ့သို့ အလုံးကြီးတစ်ခု အဖြစ်သို့ ပြောင်းလဲသွားခဲ့လေပြီ။

မရေမတွက်နိုင်သော အပျက်အစီးများနှင့် သတ္တုတုံးများမှာ လေထဲတွင် ပေါလောပေါ်နေကာ သတ်မှတ်ထားသော လမ်းကြောင်းတစ်ခုအတိုင်း အဆက်မပြတ် လည်ပတ်နေပြီး ထိုအထဲတွင် လူရိပ်တစ်ခုကိုမျှ လုံးဝ မတွေ့ရချေ။

...

မြောက်မြားစွာသော သက်တော်စောင့်တပ်ဖွဲ့များက ဤနေရာသို့ လျင်မြန်စွာ ဝင်ရောက်လာကြသည်။

နံပါတ်တစ် ခေါင်းဆောင် နေထိုင်ရာ စံအိမ် ဖြစ်သည်နှင့်အညီ အနီးတစ်ဝိုက်တွင် တင်းကျပ်သော ကာကွယ်ရေး အင်အားများကို ချထားလေသည်။

အနည်းငယ် လှုပ်ရှားမှု ရှိသည်နှင့် ချက်ချင်း တုံ့ပြန်နိုင်ပြီး ယခုကဲ့သို့ ပြင်းထန်သော လှုပ်ရှားမှုမျိုး ဆိုလျှင် ပို၍ပင် ပြောစရာ မလိုတော့ချေ။

စံအိမ် တစ်ခုလုံးကို မြောက်မြားစွာသော စစ်သားများက အုံခဲကာ ဝန်းရံထားကြသော်လည်း မည်သူတစ်ဦးတစ်ယောက်ကမျှ အနီးသို့ မကပ်နိုင်ကြပေ။

မဆင်မခြင် လှုပ်ရှားခဲ့သော စစ်သား ဆယ်ဂဏန်းခန့်မှာ မလှမ်းမကမ်းတွင် သတိလစ် မေ့မြောနေကြပြီး သေသည်ရှင်သည်ကိုပင် မသိရချေ။

"မယဲ့ကို အောက်ခေါ်သွားပြီး အခြေအနေကို သေချာ မေးမြန်းကြစမ်း"

သက်တော်စောင့်တပ်ဖွဲ့ တပ်မှူးက လက်ယမ်းပြလိုက်သည်နှင့် ခွန်အားကြီးမားသော စစ်သားနှစ်ဦးက ချက်ချင်း ရှေ့တိုးလာကာ ယဲ့ချိုးယွီကို တွဲကူထူမပြီး လျင်မြန်စွာ ဆုတ်ခွာသွားကြသည်။

သူက လွန်ခဲ့သော နှစ်အနည်းငယ်အတွင်းမှ ရှာဖွေတွေ့ရှိခဲ့သော စူပါဆင့်ကဲပြောင်းလဲသူ တစ်ဦး ဖြစ်သည်။ သို့သော်လည်း ယခုအချိန်တွင်မူ သူကလည်း အခြားစစ်သားများကဲ့သို့ပင် အားအင်ကင်းမဲ့နေလေသည်။

ယခင်က ခေါင်းဆောင်၏ အရာအားလုံးထက် သာလွန်နေသော စွမ်းအားအကြောင်းကို ကြားဖူးရုံသာ ကြားဖူးခဲ့ပြီး ကိုယ်တိုင် မျက်မြင် မကြုံတွေ့ခဲ့ဖူးချေ။

သို့သော် ယခု တကယ်တမ်း မြင်တွေ့လိုက်ရချိန်တွင်မူ ထိုအရာ၏ ကြောက်မက်ဖွယ်ကောင်းမှုကို အမှန်တကယ် ခံစားလိုက်ရလေပြီ။

ယခုလို အပြင်သို့ လျှံကျနေသော စွမ်းအားသက်သက်ကပင် သူ၏ အဆင့်ထက် များစွာ သာလွန်နေကာ အနီးသို့ ချဉ်းကပ်သွားရုံနှင့်ပင် သေဆုံးတော့မည့်ကဲ့သို့သော ထင်ယောင်ထင်မှား ဖြစ်မှုကို ခံစားရစေသည်။

"စွမ်းအင်တွေ ထိန်းချုပ်မရ ဖြစ်သွားတာများလား... ဒီနေရာက အာကာသယာဉ်ရဲ့ အတွင်းပိုင်းလေ"

သူ၏ စိတ်ထဲတွင် ထိတ်လန့်သွားသော်လည်း မျက်နှာပေါ်တွင်မူ အနည်းငယ်မျှ မပေါ်လွင်စေခဲ့ပေ။

ထိုကြောက်မက်ဖွယ်ကောင်းပြီး ရူးသွပ်မတတ် အငွေ့အသက်များကို မခံနိုင်တော့သဖြင့် အကြောင်းရင်းမရှိဘဲ ရုတ်တရက် သတိလစ် မေ့မြောသွားသော စစ်သားများလည်း မကြာခဏ ရှိနေသည်။

"စက်ရုပ်တပ်ဖွဲ့ကို ချက်ချင်း လွှတ်ပြီး ခေါင်းဆောင်ကို ကယ်တင်ကြ"

သူက ချက်ချင်း အမိန့်ပေးလိုက်၏။ အထဲတွင် မည်သည့်အရာများ ဖြစ်ပျက်နေသည်ကို သူ မသိသလို ခေါင်းဆောင် ဘေးကင်းရဲ့လား ဆိုတာကိုလည်း သေချာ မသိပေ။ သို့သော်လည်း သက်တော်စောင့်တပ်ဖွဲ့ တပ်မှူး တစ်ယောက်အနေဖြင့် သူ တစ်ခုခု လုပ်ဆောင်ရန် လိုအပ်လေသည်။

စက်ရုပ်ဝတ်စုံများမှာ မကြာသေးမီ နှစ်များအတွင်းကမှ ထုတ်လုပ်ထားသော အာကာသယာဉ် အတွင်းပိုင်းသုံး တစ်ကိုယ်တော် လက်နက်များ ဖြစ်ပြီး ထုတ်လုပ်နိုင်သည့် အရေအတွက်မှာ အလွန်နည်းပါးကာ သက်တော်စောင့်တပ်ဖွဲ့တွင်သာ အနည်းငယ် တပ်ဆင်ထားနိုင်လေသည်။

အာကာသယာဉ် အတွင်းပိုင်းတွင် အသုံးပြုရန် ဖြစ်သောကြောင့် ဤစက်ရုပ်များတွင် အဖျက်စွမ်းအားကြီးမားသော လက်နက်များကို တပ်ဆင်ထားခြင်း မရှိပေ။

သို့သော်လည်း အရပ် ၁၀ ပေ ခန့် အမြင့်နှင့် အလေးချိန် ၂၂၀၀၀ ပေါင် ခန့် ရှိသော ဒြပ်ထုအပြင် အားကောင်းလှသော စွမ်းအင်များက အရာအားလုံးကို ဖိချေပစ်ရန် လုံလောက်နေပြီ ဖြစ်သည်။

စက်ရုပ်တပ်ဖွဲ့မှာ ဤအဆောက်အအုံ အနီးတွင် တပ်စွဲထားသဖြင့် အချိန်သိပ်မကြာမီမှာပင် ဤနေရာသို့ ရောက်ရှိလာကြသည်။

သို့သော်လည်း အနီးသို့ မကပ်နိုင်သေးခင်မှာပင် စက်ရုပ်ဝတ်စုံများမှာ မျက်စိဖြင့် မမြင်နိုင်သော စွမ်းအားတစ်ခု၏ ရစ်ပတ်မှုကို ခံလိုက်ရပြီး ပတ်ဝန်းကျင်ရှိ အပျက်အစီးများကဲ့သို့ စတင် လည်ပတ်နေလေတော့သည်။

အင်ဂျင်စက်သံများမှာ ပြင်းထန်စွာ ဆူညံနေပြီး အားကောင်းလှသော စွမ်းအင်များကို အမြင့်ဆုံးအထိ ထုတ်လွှတ်ထားသော်လည်း အနည်းငယ်မျှ အကျိုးမသက်ရောက်ပေ။

အာကာသထဲတွင် အလယ်အလတ်နှင့် အကွာအဝေးတိုများကို အမြန်နှုန်းမြင့်စွာ ပျံသန်းနိုင်သော ဤစက်ရုပ်များမှာ ယခုအချိန်တွင် ကလေးငယ် တစ်ယောက်ကဲ့သို့ အားအင်ကင်းမဲ့နေလေသည်။

ဤနေရာရှိ အခြေအနေများကို အချိန်ကြာမြင့်စွာ ဖုံးကွယ်ထားနိုင်စွမ်း မရှိသဖြင့် မကြာမီမှာပင် အထက်လူကြီးများထံ အဆင့်ဆင့် သတင်းပို့လိုက်ကြသည်။

ပိကျန့်ဖိန် တစ်ယောက် သတင်းရရှိသည်နှင့် တစ်ပြိုင်နက် ပုံရိပ်ယောင်ကမ္ဘာထဲမှ ချက်ချင်း ထွက်လိုက်ပြီး ကွမ်တမ် ဆက်သွယ်ရေးစနစ်မှ တစ်ဆင့် သက်ဆိုင်ရာ အခြေအနေများကို လျင်မြန်စွာ နားလည်အောင် လုပ်ဆောင်လိုက်ကာ ဆက်သွယ်မှုကို ချက်ချင်း ပိတ်ချလိုက်သည်။

သူက ဆေးလိပ်ကို ထုတ်ယူကာ လက်များ တုန်ယင်စွာဖြင့် မီးညှိလိုက်ပြီး ရုံးခန်းထဲတွင် ဟိုဟိုဒီဒီ လမ်းလျှောက်နေရင်း စိတ်ထဲတွင်လည်း ပူလောင်နေလေ၏။

ယခုတစ်ကြိမ် လော်ယွမ်မှာ မမျှော်လင့်ထားသော အခြေအနေအချို့နှင့် ကြုံတွေ့နေရသည်က သိသာထင်ရှားလှသည်။ စစ်ဆေးရေး ခရီးစဉ်အတွင်း ဂယက်ရိုက်ခတ်မှုများကို ဂရုမစိုက်ဘဲ အလျင်စလို ထွက်ခွာသွားကတည်းက သူက ထူးခြားမှုကို ရိပ်မိနေခဲ့ခြင်း ဖြစ်သည်။

ယခုအချိန်တွင် တစ်ခုတည်းသော မေးခွန်းမှာ သူ၏ ခန္ဓာကိုယ် ပြဿနာက မည်မျှအထိ ပြင်းထန်သနည်း ဆိုသည်ပင်။

နံပါတ်နှစ် ခေါင်းဆောင် အဖြစ် နှစ်ပေါင်းများစွာ လုပ်ဆောင်လာခဲ့ပြီးမှ အမြင့်ဆုံး နေရာသို့ တက်ရောက်ချင်သော စိတ်မရှိဘူးဟု ပြောလျှင် ကိုယ့်ကိုယ်ကိုယ် လှည့်စားခြင်းသာ ဖြစ်ပေလိမ့်မည်။

ဤနှစ်များအတွင်း သူက နေရာတိုင်းတွင် သတိထားခဲ့ပြီး အောက်ကျို့ခံရန် ဝန်မလေးခဲ့ပေ။ မျက်နှာချိုသွေးကာ ဒူးထောက်ခယရမည်ကိုလည်း မနှမြောခဲ့သလို မိမိပုံရိပ်ကိုလည်း ကိုယ်တိုင် ဖျက်ဆီးပစ်ခဲ့သည်။

သို့သော်လည်း အခြေအနေများက လူထက် ပိုမို အင်အားကြီးမားလှသည်။ မိမိ မလုပ်လျှင် အခြားသူတစ်ယောက်က လုပ်သွားမည်သာ ဖြစ်ပြီး သူ၏ နေရာကို လိုချင်သော်လည်း မရနိုင်သူများ မည်မျှများပြားနေသနည်း။

နိုင်ငံရေး ဆိုသည်မှာ ဘယ်သောအခါမှ အမှန်တရား၊ ကြင်နာမှုနှင့် အလှတရားများ မဟုတ်ခဲ့ပေ။ အခြေအနေကို ရှင်းလင်းစွာ နားလည်သဘောပေါက်ခြင်းက ဝါရင့် နိုင်ငံရေးသမားတိုင်းတွင် ရှိသင့်သော အခြေခံ အရည်အချင်း တစ်ခုပင် ဖြစ်သည်။

သို့သော်လည်း လူနည်းစုသာ ပိုင်ဆိုင်ထားသော အရည်အချင်း တစ်ခုလည်း ရှိသေးသည်။ ယင်းမှာ အကျပ်အတည်းများ ကြုံတွေ့ရချိန်တွင် အခွင့်အရေးကို ဆုပ်ကိုင်နိုင်ခြင်းပင် ဖြစ်သည်။

ယခင်က မြို့တော်ဝန်ဟောင်း ကျဆုံးသွားချိန်တွင် အခွင့်အရေး တစ်ခု ဖြစ်ခဲ့သော်လည်း သူက မဆုပ်ကိုင်နိုင်ခဲ့ဘဲ အိမ်သာ ဧည့်သည်လုပ်သည့်အဖြစ်မျိုး ကြုံခဲ့ရသည်။

လော်ယွမ်က ကမ္ဘာကြီးကို ကယ်တင်လိုက်သည့် အခြေအနေကြီး အောက်တွင် အာဏာကို သူတစ်ပါးထံ လက်ပြောင်းပေးလိုက်ရသည်။

သို့သော် ယခုအချိန်တွင်မူ အခွင့်အရေး တစ်ခု ထပ်မံ ပေါ်ပေါက်လာပုံရလေသည်။

အကယ်၍ သူက ကောင်းကောင်းမွန်မွန် အသက်ရှင်နေဆဲ ဆိုလျှင်တော့ အရာအားလုံးက ပြီးဆုံးသွားမည် ဖြစ်သော်လည်း နောက်ဆုံးတွင် သေဆုံးသွားခြင်း သို့မဟုတ် အသိဉာဏ်မဲ့ လူနာတစ်ယောက် ဖြစ်သွားမည် ဆိုပါက ဤအချိန်အတောအတွင်း လုပ်ဆောင်စရာ အခွင့်အလမ်းများစွာ ရှိနေလေပြီ။

ဤသည်မှာ လောင်းကစား တစ်ခုပင်။ အောင်မြင်သူက လူသားမျိုးနွယ်၏ ခေါင်းဆောင် ဖြစ်လာမည် ဖြစ်ပြီး ရှုံးနိမ့်သူကတော့ မြေမြှုပ်စရာ နေရာလေးပင် ရမည်မဟုတ်ချေ။

"ထပ်စောင့်ကြည့်ဦးမယ်... ထပ်စောင့်ဦးမှပါ... အခုက အချိန်မကျသေးဘူး"

သူ၏ စိတ်ထဲတွင် ရုန်းကန်နေရပြီး ဆုံးဖြတ်ချက်ချရန် ခက်ခဲနေလေသည်။ လော်ယွမ်အပေါ် ကြောက်ရွံ့မှုက သူ၏ အရိုးထဲအထိ စိမ့်ဝင်နေပြီး တွေးကြည့်လိုက်ရုံနှင့်ပင် သူ့ကို သဘာဝမကျစွာ တုန်ယင်သွားစေသည်။

ထိုစဉ် သူက မိမိ၏ လက်နှစ်ဖက်ကို မျက်လုံးထောင့်မှ သတိပြုမိသွားပြီး အနည်းငယ် ကြက်သေ သေသွားလေ၏။

ဤသည်ကား အရေးအကြောင်းများ ပြည့်နှက်နေသော လက်တစ်စုံပင် ဖြစ်လေသည်။

မသိမသာဖြင့် မိမိကိုယ်တိုင် အသက်အရွယ် ကြီးရင့်လာပုံရသည်။ အသက် ရှစ်ဆယ်အရွယ် ဆိုသည်မှာ ယခုအချိန်တွင်ပင် ဘဝ၏ နေဝင်ချိန်သို့ ရောက်ရှိနေပြီ ဖြစ်သည်။

သူ၏ စိတ်များ လွင့်မျောသွားကာ အချိန်အတန်ကြာ ငေးမောရပ်နေမိပြီး လက်ချောင်းများကို ဆေးလိပ်မီးခဲ လောင်ကျွမ်းသွားမှသာ ရုတ်တရက် သတိဝင်လာကာ ဆေးလိပ်တိုကို ကပျာကယာ ပစ်ချလိုက်လေတော့သည်။

ဆက်ရန်...