အခန်း (၅၁၉-၅၂၀)

အပိုင်း(၅၁၉) လူနှင့်နတ်သဘာဝ

ယခုအချိန်တွင် လော်ယွမ်၏ မျက်ဝန်းများက ခံစားချက်ကင်းမဲ့နေပြီး သက်ရှိဝေနေယျအားလုံးကို အထက်စီးမှ ငုံ့ကြည့်နေသော နတ်ဘုရားတစ်ပါးနှင့် တူလှသည်။

အရာအားလုံးကို သိမြင်နိုင်စွမ်း၊ စွမ်းဆောင်နိုင်စွမ်းရှိသည့် ခံစားချက်မျိုးက သူ့အလိုလို ပေါ်ပေါက်လာကာ သူ၏ကိုယ်ပေါ်မှ လူသားမဟုတ်သော အငွေ့အသက်များက ပိုမိုထင်ရှားလာ၏။

သူ၏ ဧရာမခန္ဓာကိုယ်ကြီးကို မရေမတွက်နိုင်သော အပျက်အစီးများနှင့် အကျိုးအပဲ့များက ကွယ်ဝှက်ထားသော်လည်း သူ၏ အာရုံခံနိုင်စွမ်းကိုမူ မဟန့်တားနိုင်ပေ။

ဤနေရာသာမက ယာဉ်ပျံကြီးတစ်ခုလုံးတွင် ဖြစ်ပျက်နေသမျှ အရာအားလုံးကို သူ၏စိတ်ထဲ၌ အစအနမကျန် ရှင်းလင်းပြတ်သားစွာ မြင်တွေ့နေရသည်။

သူ၏ ဖိအားပေးမှုအောက်တွင် အစောင့်တပ်ခွဲမှ စစ်သားများ တစ်ယောက်ပြီးတစ်ယောက် သတိလစ်မေ့မြောသွားကြသည်ကို သူ မြင်တွေ့လိုက်ရ၏။

အဆောက်အအုံတစ်ခုလုံးကို စစ်သားအမြောက်အမြားက လေဝင်ပေါက်မရှိအောင် တင်းကျပ်စွာ ဝိုင်းရံပိတ်ဆို့ထားသည်ကိုလည်း သူ မြင်တွေ့လိုက်ရသည်။

ပိကျန့်ဖိန်က ရုံးခန်းထဲတွင် ဆုံးဖြတ်ချက်မချနိုင်ဘဲ တွေဝေတုံ့ဆိုင်းနေသည်ကိုလည်း သူ မြင်တွေ့လိုက်ရ၏။

ချန်ရှင်းကျယ်က စစ်သားအချို့အား ဂုဏ်သိက္ခာမငဲ့ဘဲ ငိုယိုဆဲဆိုကာ အတင်းဝင်ရောက်ရန် ကြိုးစားနေသော်လည်း ဘာမှမတတ်နိုင်ဖြစ်နေသည်ကိုလည်း သူ မြင်တွေ့လိုက်ရသည်။

ထို့ပြင် ပုံရိပ်ယောင်ကမ္ဘာထဲရှိ မရေမတွက်နိုင်သော စက်ရုံများနှင့် သုတေသနခန်းများ၊ ဤကမ္ဘာကြီးကို ဖွဲ့စည်းတည်ဆောက်ထားသည့် ထရီလီယံနှင့်ချီသော အခြေခံကုဒ်များကိုပါ သူ မြင်တွေ့လိုက်ရ၏။

သို့သော်လည်း အရာအားလုံးက သူ၏ စိတ်ထဲတွင် လေပြေလေညင်းလေး တိုက်ခတ်သွားသကဲ့သို့သာ ဖြတ်သန်းသွားပြီး သူ၏ စိတ်ခံစားမှုကို အနည်းငယ်မျှပင် မလှုပ်ခတ်စေနိုင်ပေ။

တဖြည်းဖြည်းနှင့် သူက ပိုမိုခမ်းနားကြီးကျယ်သော ကမ္ဘာတစ်ခုဆီသို့ ချဉ်းကပ်သွားလေသည်။ ဤကမ္ဘာသည် အဆုံးအစမရှိ ဟာလာဟင်းလင်းဖြစ်နေသော ကမ္ဘာတစ်ခုဖြစ်ပြီး သုံးဘက်မြင်ကမ္ဘာဆိုသည်မှာ ဤကမ္ဘာ၏ အပြင်ဘက်ဆုံး အလွှာပါးလေးတစ်ခုမျှသာ ဖြစ်သည်။

ထိုကမ္ဘာကြီးကို ကြည့်ရင်း လော်ယွမ်၏ ငြိမ်သက်နေသော စိတ်နှလုံးထဲတွင် ရုတ်တရက် တွန်းအားတစ်ခု ပေါ်ပေါက်လာခဲ့၏။

အစပိုင်းတွင် ဤတွန်းအားက ရှိသလိုလို မရှိသလိုလိုသာ ဖြစ်သော်လည်း စိတ်ကူးပေါ်လာသည်နှင့် တစ်ပြိုင်နက် ခြောက်သွေ့နေသော ထင်းကို မီးပွားကျသွားသကဲ့သို့ ရုတ်ချည်း ပြင်းထန်ရှင်းလင်းလာတော့သည်။

သူ ထိုနေရာသို့ သွားရမည်... ထိုကမ္ဘာကသာလျှင် သူ၏ နောက်ဆုံး ခိုလှုံရာဖြစ်ပေသည်။

သူ့ထံတွင် ပြင်းပြသော ဆန္ဒတစ်ခု ဖြစ်ပေါ်လာခဲ့၏။ ဤအခိုက်အတန့်တွင် ဆဲလ်များအားလုံးက သူ၏ စိတ်ကူးနှင့် ထပ်တူကျစွာ တုန်ခါသွားကြသည်။

သူ၏ ခန္ဓာကိုယ်ကြီးက ရုတ်တရက် နောက်တစ်ဆ ထပ်မံကြီးမားလာပြီး အရပ်အမြင့် ၆၅ ပေခန့်အထိ ရောက်ရှိသွားလေပြီ။

သူ၏ ကိုယ်ပေါ်တွင် ရောင်စုံစွမ်းအင်များက ထူထပ်စွာ ရစ်သိုင်းနေပြီး ခန္ဓာကိုယ်မှာလည်း တစ်ခါတစ်ရံ တောက်ပလိုက်၊ တစ်ခါတစ်ရံ မှေးမှိန်လိုက် ဖြစ်လာကာ နတ်ဘုရားတစ်ပါးကဲ့သို့ မြင့်မြတ်သော အသွင်ကို ဆောင်နေပေသည်။

သူ၏ ကိုယ်ပေါ်ရှိ စွမ်းအင်များမှာ သူ၏ ခန္ဓာကိုယ်မှ ထွက်ပေါ်လာခြင်း မဟုတ်ဘဲ အမှောင်စွမ်းအင်များ စိမ့်ထွက်လာခြင်း ဖြစ်သည်။

(အမှောင်စွမ်းအင်ဆိုတာ အခုလက်ရှိ သိပ္ပံပညာရှင်တွေ ရှာတွေ့ထားတယ်ဆိုတဲ့ Dark Matter လို့ခေါ်တဲ့ စွမ်းအင်ဖြစ်ပါတယ်။ ဒီ Dark Matter က သီအိုရီတစ်ခုမဟုတ်ပဲ တစ်ကယ် သိပ္ပံနည်းကျ သက်သေတွေနဲ့ ရှာတွေ့ထားတဲ့အရာတစ်ခုဖြစ်ပါတယ်)

သာမန် သဘာဝတရားအရ လေးဘက်မြင်ကမ္ဘာမှ လာသော ဤစွမ်းအင်မျိုးသည် အလွန်မြင့်မားသော အနှစ်သာရရှိပြီး စောင့်ကြည့်၍ မရနိုင်၊ ဖမ်းယူ၍ မရနိုင်သလို အခြားစွမ်းအင်များဖြင့်လည်း ပြောင်းလဲ၍ မရနိုင်ပေ။

သုံးဘက်မြင်ကမ္ဘာနှင့် လုံးဝ ရောယှက်နိုင်မည် မဟုတ်ချေ။ သို့သော်လည်း တစ်ဝက်တစ်ပျက် လေးဘက်မြင်ဖြစ်တည်မှု ရှိနေသော လော်ယွမ် ရှိနေခြင်းကြောင့် သုံးဘက်မြင်နှင့် လေးဘက်မြင်ကြားတွင် တံတားတစ်စင်း ထိုးလိုက်သကဲ့သို့ ဖြစ်သွားကာ ထိုနှစ်ခုကို ဆက်သွယ်ပေးလိုက်ခြင်းပင်။

၎င်းက အမှောင်စွမ်းအင်များကို လေးဘက်မြင်ကမ္ဘာမှ လျှောကျလာစေပြီး အတိုင်းအတာတစ်ခုအထိ လျော့ကျသွားစေသည်။

အတိုင်းအတာတစ်ခုအထိ လျော့ကျသွားသော်လည်း ဤစွမ်းအင်က ကြောက်မက်ဖွယ် ကောင်းနေဆဲပင်။ အနည်းငယ်မျှ စိမ့်ထွက်လာရုံဖြင့် လက်တွေ့ကမ္ဘာတွင် လှိုင်းဂယက်များ ဖြစ်ပေါ်စေပြီး လေဟာနယ်ကိုပင် တဖြည်းဖြည်း လွှမ်းမိုးနိုင်စွမ်း ရှိသည်။

...

အချိန်များ တစ်မိနစ်ပြီးတစ်မိနစ် ကုန်လွန်သွားကာ အခြေအနေက ပိုမိုဆိုးရွားလာခဲ့သည်။

သတင်းရရှိသော အဆင့်မြင့် အရာရှိများ ပိုမိုရောက်ရှိလာကြသော်လည်း အောက်ထပ်တွင် အားလုံး တားဆီးခံထားရ၏။ ကံကောင်းသည်မှာ ယခုအချိန်အထိ လက်နက်ကိုင် ထိပ်တိုက်ရင်ဆိုင်မှုမျိုး မဖြစ်ပွားသေးခြင်းပင်။ အနည်းဆုံးတော့ အခြေအနေ မရှင်းလင်းသေးခင်မှာ ဘယ်သူကမှ ထိပ်တိုက်မရင်ဆိုင်ရဲကြပေ။

ထိုစဉ် လေးဘက်မြင် အာရုံခံစားမှုထဲတွင် နစ်မြောနေသော လော်ယွမ်က ရုတ်တရက် ရင်ထဲတွင် ဟာကျသွားသလို ခံစားလိုက်ရသည်။

လေးဘက်မြင်ကမ္ဘာက မျက်စိရှေ့မှ လျင်မြန်စွာ ပျောက်ကွယ်သွားပြီး သုံးဘက်မြင်ကမ္ဘာသို့ ပြန်လည်ရောက်ရှိသွား၏။

လေးဘက်မြင်ကမ္ဘာကို သူ ဆက်လက်မြင်တွေ့နေရဆဲ ဖြစ်သော်လည်း ယခင်ကဲ့သို့ လက်တစ်ကမ်းတွင် ရှိမနေတော့ပေ။

"တစ်လှမ်းလေးပဲ လိုတော့တာကို... နောက်ဆုံးတော့လည်း အခြေခံက မလုံလောက်သေးလို့ လေးဘက်မြင်ကမ္ဘာကို ကူးပြောင်းလို့ မရသေးတာပဲ"

သူက သက်ပြင်းတစ်ချက်ချလိုက်ပြီး ရင်ထဲတွင် နောင်တအနည်းငယ် ဖြစ်ပေါ်လာသည်။ သို့သော် ချက်ချင်းဆိုသလိုပင် သူက သတိဝင်လာပြီး ထိတ်လန့်သွားလေ၏။

"မဖြစ်နိုင်တာ... ငါက ဘယ်လိုလုပ် လေးဘက်မြင်ကမ္ဘာထဲ အရမ်းဝင်ချင်စိတ် ဖြစ်သွားတာလဲ"

လော်ယွမ်၏ မျက်နှာက တည်တင်းသွားပြီး စိတ်ထဲတွင် အံ့ဩထိတ်လန့်သွားသည်။

တကယ်တမ်းတွင် ဤသည်မှာ လူ့သဘာဝနှင့် နတ်ဘုရားသဘာဝတို့ကြားမှ ပဋိပက္ခနှင့် ဆန့်ကျင်ဘက်ဖြစ်မှုပင်။

နတ်ဘုရားသဘာဝက သက်ရှိဝေနေယျများကို အထက်မှနေ၍ ငုံ့ကြည့်တတ်သော်လည်း လူ့သဘာဝကမူ ထိုအထဲတွင် ပါဝင်နေသည်။

၎င်းတို့၏ ရည်မှန်းချက်များက မတူညီသလို အဆင့်အတန်းလည်း မတူညီပေ။ ထို့ကြောင့် တွေးခေါ်ပုံနည်းစနစ်များလည်း သဘာဝကျကျ ကွဲပြားနေခြင်း ဖြစ်သည်။

သို့သော် ယခုအချိန်က အသေအချာ စဉ်းစားရမည့်အချိန် မဟုတ်သည်မှာ ရှင်းလင်းလှသည်။ လော်ယွမ်ကလည်း သိပ်မတွေးတော့ဘဲ သူ၏ ကိုယ်ပတ်ဝန်းကျင်တွင် လွင့်မျောနေဆဲဖြစ်သော အပျက်အစီးများနှင့် ဖရိုဖရဲဖြစ်နေသော ပျက်စီးမှုမြင်ကွင်းကို တစ်ချက်ကြည့်လိုက်သည်။

ရင်ထဲမှ အတွေးများကို ဖိနှိပ်လိုက်ပြီး သူ၏ စိတ်အာရုံကို အနည်းငယ် လှုပ်ရှားလိုက်သည်နှင့် မရေမတွက်နိုင်သော အပျက်အစီးများက လေထဲတွင် ရုတ်တရက် ရပ်တန့်သွားကြသည်။

ဟမ်... စိတ်စွမ်းအားက ဘယ်တုန်းက ဒီလောက်အထိ အားကောင်းသွားတာလဲ... သူ၏ စိတ်ထဲတွင် အတွေးတစ်ချက် ဖြတ်ပြေးသွားပြီးနောက် အမိန့်ပေးလိုက်သည်။

"တပ်ရင်းမှူးတုန်း... လူအားလုံးကို ခေါ်ပြီး ထွက်သွားလိုက်တော့"

ကြီးကျယ်ခမ်းနားသော အသံကြီးက ပဲ့တင်ထပ်နေသကဲ့သို့ နားထဲနှင့် ရင်ဘတ်ထဲမှ ထွက်ပေါ်လာပြီး လူအများစုမှာ အသံနှစ်ထပ်ကြားလိုက်ရသလို ခံစားလိုက်ရသည်။

အမှန်တကယ်တော့ ဤနေရာရှိ စစ်သားများ၊ အောက်ထပ်သို့ ရောက်ရှိလာသော အဆင့်မြင့် အရာရှိများသာမက လူမှုစောင့်ရှောက်ရေးဂေဟာမှ ကလေးငယ်များ၊ အရန်အဆောက်အအုံတွင် အိပ်မောကျနေသော ပြည်သူများနှင့် ယာဉ်ပျံကြီး၏ နေရာအနှံ့အပြားတွင် ရှိနေသူများအားလုံး ရှင်းလင်းပြတ်သားစွာ ကြားလိုက်ရခြင်း ဖြစ်သည်။

အစောင့်တပ်ရင်းမှူးမှာ ထိုအသံကြောင့် ဦးနှောက်တစ်ခုလုံး ဟာလာဟင်းလင်း ဖြစ်သွားလေသည်။ ရုပ်ဝတ္ထုအားလုံး လည်ပတ်မှု ရပ်တန့်သွားသည်နှင့်အမျှ ဧရာမကိုယ်လုံးကြီးတစ်ခု တင်ပျဉ်ခွေထိုင်နေသည်ကို သူ ဝေဝေဝါးဝါး မြင်လိုက်ရသည်။

ကြောက်မက်ဖွယ်ကောင်းပြီး ဩဇာတိက္ကမကြီးမားသော မျက်လုံးတစ်စုံက ဖုန်များနှင့် အပျက်အစီးများကြားမှ ဖောက်ထွက်လာကာ သူ၏ ရင်ဘတ်ထဲအထိ ထိုးဖောက်ဝင်ရောက်လာသကဲ့သို့ ခံစားလိုက်ရ၏။ သူ၏ ခန္ဓာကိုယ်က တုန်ခါသွားပြီး ထပ်မကြည့်ရဲတော့ဘဲ ခေါင်းကို ကမန်းကတမ်း ငုံ့ကာ ရိုသေလေးစားစွာ ပြောလိုက်သည်။

"ဟုတ်ကဲ့ အကြီးအကဲ"

"အားလုံးပဲ အာရုံစိုက်... ဒဏ်ရာရထားတဲ့သူတွေ အားလုံးကို ခေါ်ပြီး ထွက်သွားကြ... မြန်မြန်လုပ်"

စစ်သားများအားလုံး စိတ်ပိုင်းဆိုင်ရာ တုန်လှုပ်မှုမှ သတိပြန်ဝင်လာကြပြီး တစ်ကိုယ်လုံး တုန်ယင်သွားကာ သတိလစ်နေသော ရဲဘော်ရဲဘက်များကို အလျင်အမြန် ပွေ့ချီပြီး ဤနေရာမှ အပြေးအလွှား ထွက်ခွာသွားကြသည်။

လေထဲတွင် လွင့်မျောနေဆဲဖြစ်သော စက်ရုပ်ဝတ်စုံအချို့ကို လော်ယွမ်က တံခါးအပြင်ဘက်သို့ မပို့ပေးခဲ့လျှင် ထိုအရာများ ကျန်ရစ်ခဲ့မည်မှာ သေချာလှသည်။

မိနစ်အနည်းငယ်အတွင်းမှာပင် လူအားလုံး အရိပ်အယောင်မျှပင် မကျန်တော့ဘဲ ပျောက်ကွယ်သွားကြသည်။

လော်ယွမ်က နေရာလွတ်တစ်ခုလုံး နီးပါးကို ပြည့်နှက်နေသည့် သူ၏ ဧရာမကိုယ်လုံးကြီးကို ကြည့်ကာ မျက်နှာက တိတ်ဆိတ်ငြိမ်သက်နေ၏။

သူသာ တင်ပျဉ်ခွေ မထိုင်ထားလျှင် ဤငါးထပ်အမြင့်ရှိသော နေရာလွတ်ကြီးက သူ၏ လက်ရှိ ခန္ဓာကိုယ်ကို လုံးဝ ဆံ့နိုင်မည် မဟုတ်ပေ။

သူ၏ ပတ်ဝန်းကျင်တွင် လေထဲ၌ လွင့်မျောနေဆဲဖြစ်သော အပျက်အစီးများကို သူ သတိပြုမိလိုက်သည်။

လေးဘက်မြင်ကမ္ဘာသို့ ကူးပြောင်းစဉ်က အရာအားလုံးကို တတ်စွမ်းနိုင်သည်ဟူသော ခံစားချက်မျိုးက ရင်ထဲသို့ တစ်ဖန် ပြန်လည်ရောက်ရှိလာ၏။

ထိုစွမ်းရည်မျိုးက ရှိနေသေးသည်ဟု ခံစားရသဖြင့် ရင်ထဲမှ တွန်းအားအတိုင်း လက်ကို ဖွဖွလေး ဝှေ့ယမ်းလိုက်သည်။

နောက်တစ်ခဏတွင် အချိန်တွေ နောက်ပြန်ဆုတ်သွားသကဲ့သို့ အကျိုးအပဲ့များနှင့် ဖုန်မှုန့်များအားလုံးက နဂိုနေရာသို့ လျင်မြန်စွာ ပြန်လည်ရောက်ရှိသွားကြသည်။

ပျက်စီးသွားသော အထပ်များက လျင်မြန်စွာ ပြန်လည်ပြုပြင်ခံရပြီး စံအိမ်ကြီးကလည်း ပြန်လည်မတ်တတ်ရပ်လာသည်။

ခြေမွခံထားရသော အပင်များပင်လျှင် သေရာမှ ပြန်လည်ရှင်သန်လာ၏။

စက္ကန့်အနည်းငယ် ကြာပြီးနောက် အရာအားလုံးက ဘာမှမဖြစ်ခဲ့သကဲ့သို့ နဂိုအတိုင်း ပြန်ဖြစ်သွားကာ နတ်ဘုရားများ၏ အံ့ဖွယ်တန်ခိုးတစ်ခုအလား ထင်မှတ်ရပေသည်။

"ဒါက..."

ကိုယ်တိုင်ကိုယ်ကျ ပြုလုပ်ခဲ့ခြင်း ဖြစ်သော်လည်း ဤအံ့ဖွယ်ဖြစ်ရပ်ကို ကြည့်ကာ လော်ယွမ်ကိုယ်တိုင်ပင် အနည်းငယ် အံ့ဩသွားလေသည်။

သူ၏ စွမ်းအားအဆင့်က အခြေခံကျကျ ပြောင်းလဲသွားပုံရသည်။ စနစ်၏ဇယားကွက်ကို မကြည့်ရသေးလျှင်တောင် ဦးနှောက် လေးဘက်မြင်ပြောင်းလဲခြင်းက ကြီးမားသော ခြေလှမ်းတစ်လှမ်း လှမ်းနိုင်ခဲ့ပြီကို သူ ခန့်မှန်းနိုင်ပေသည်။

ဤလုပ်ငန်းစဉ်က ပေါ့ပေါ့ပါးပါး လုပ်ဆောင်လိုက်သကဲ့သို့ ထင်ရသော်လည်း တကယ်တမ်းတွင်မူ အတိုင်းအတာ မသိနိုင်လောက်သော အချက်အလက် တွက်ချက်မှုများနှင့် အလွန်သေးငယ် သိမ်မွေ့သော လုပ်ဆောင်မှုများ ပါဝင်နေသည်။

အပျက်အစီးတစ်ခုစီ၏ အရွယ်အစား၊ ပုံပျက်မှုအခြေအနေ၊ အားမည်မျှသုံးရမည်၊ မူလက မည်သည့်နေရာတွင် ရှိနေခဲ့သည်၊ ပြန်လည်ဆက်စပ်ရာတွင် အက်တမ်အဆင့်အထိ မည်သို့ အသေးစိတ် လုပ်ဆောင်ရမည် စသည်တို့ကို တွက်ချက်ရခြင်း ဖြစ်သည်။

အပျက်အစီးတစ်ခုအတွက် အချက်အလက် တွက်ချက်မှုကပင် သာမန် ကွမ်တမ်ကွန်ပျူတာတစ်လုံးကို ရပ်တန့်သွားစေနိုင်သည်။

ထိုမျှမက ဤနေရာရှိ အပျက်အစီးများမှာ သောင်းနှင့်ချီ၍ ရှိနေပြီး ဖုန်မှုန့်များဆိုလျှင် သန်းနှင့်ချီ၍ ရှိနေပေသည်။

စက္ကန့်အနည်းငယ်အတွင်း ဤမျှ ကြီးမားသော အချက်အလက်များကို တွက်ချက်ရာတွင် သူက အလွန်လွယ်ကူနေပုံရ၏။

သူကိုယ်တိုင်ပင် အားစိုက်ထုတ်၍ တွက်ချက်နေရသည်ဟု မခံစားရဘဲ အရာအားလုံးက ပင်ကိုယ်ဗီဇကဲ့သို့ အလိုအလျောက် ဖြစ်တည်နေခြင်း ဖြစ်သည်။

ဤတွက်ချက်နိုင်စွမ်းက ယနေ့ခေတ် လူသားများ၏ စူပါကွမ်တမ်ကွန်ပျူတာများနှင့်ပင် နှိုင်းယှဉ်၍ ရနိုင်ပေသည်။

သူက လေထဲမှ တဖြည်းဖြည်း ဆင်းသက်လာပြီး သူ၏ စိတ်ထဲတွင် အတွေးများက လျှပ်တစ်ပြက် ပြေးလွှားနေ၏။

ယခင် လေးဘက်မြင် ကူးပြောင်းမှု လုပ်ငန်းစဉ်အတွင်း လျစ်လျူရှုထားခဲ့မိသော များပြားလှသည့် မှတ်ဉာဏ်များနှင့် သိမြင်နားလည်မှုများက ဒီရေအလား ရင်ထဲမှ အရှိန်အဟုန်ဖြင့် ထွက်ပေါ်လာကာ ချက်ချင်းပင် စီစဉ်စစ်ထုတ်လိုက်သည်။

တစ်စက္ကန့်အကြာတွင် အချက်အလက် စစ်ထုတ်မှု ပြီးဆုံးသွားလေသည်။ သူက ခေါင်းမော့ကာ အရှေ့ဘက်သို့ ကြည့်လိုက်ရာ မျက်လုံးများက ဝေဝါးဟာလာဟင်းလင်း ဖြစ်သွားပြီး လေးဘက်မြင်ကမ္ဘာက မျက်စိရှေ့တွင် တစ်ဖန် ပြန်လည်ပွင့်ဟလာ၏။ သူက လက်တစ်ဖက်ကို ဆန့်ထုတ်လိုက်ရာ လက်ပေါ်တွင် အလင်းရောင်များ တောက်ပနေသည်။

လေဟာနယ်က အစပိုင်းတွင် အနည်းငယ် လှိုင်းထနေပြီး လက်ကို ရှေ့သို့ ဆက်လက်ဆန့်ထုတ်လိုက်သည်နှင့်အမျှ တဖြည်းဖြည်း အတွင်းသို့ ချိုင့်ဝင်သွားလေသည်။

ထို့နောက် ကြေးမုံပြင်တစ်ခုထဲသို့ ထိုးသွင်းလိုက်သကဲ့သို့ သူ၏ လက်ချောင်းအချို့မှာ မျက်စိရှေ့မှ ပျောက်ကွယ်သွားပြီး လေဟာနယ်၏ မျိုချခြင်းကို ခံလိုက်ရသကဲ့သို့ ဖြစ်သွား၏။

သူက ငြိမ်သက်စွာ ရပ်နေလိုက်သော်လည်း ငါးစက္ကန့်ပင် မပြည့်သေးခင် ရုတ်တရက် လျှပ်စစ်ရှော့ခ်မိသွားသကဲ့သို့ သူ၏လက်ကို ကမန်းကတမ်း ပြန်ရုပ်လိုက်သည်။

သူ၏ လက်ဖဝါးကို ကြည့်ကာ လော်ယွမ်၏ မျက်နှာက တည်တင်းသွား၏။ လက်ချောင်းအချို့၏ အသားနှင့် သွေးများမှာ လုံးဝ ပျောက်ကွယ်သွားပြီ ဖြစ်ပြီး လက်ဖဝါးနှင့် ဆက်နေသော ဖြူဖွေးသည့် အရိုးအချို့သာ ကျန်ရစ်တော့သည်။

သူ ဂရုစိုက်နေသည်မှာ ဒဏ်ရာကို မဟုတ်ဘဲ လေးဘက်မြင်ကမ္ဘာ၏ အန္တရာယ်ကြီးမားမှုကို ဖြစ်သည်။ သူ့အတွက်တော့ ဤဒဏ်ရာမျိုးက သာမန် ပွန်းပဲ့ဒဏ်ရာလောက်ပင် ဖြစ်သည်။

လက်ဖဝါးကို ကြည့်နေစဉ်မှာပင် လက်ချောင်းများမှ အသားနှင့် သွေးများက လျင်မြန်စွာ ပြန်လည်ပေါက်ဖွားလာပြီး အံ့မခန်း အမြန်နှုန်းဖြင့် နဂိုအတိုင်း ပြန်လည်ကောင်းမွန်လာသည်။

အသက်တစ်ခါရှူစာ အချိန်အကြာတွင်တော့ ယခင်အတိုင်း ပြန်လည်ကောင်းမွန်သွားပြီ ဖြစ်သည်။ သူက လက်ချောင်းများကို လှုပ်ရှားကြည့်ရင်း ထိုလေးဘက်မြင်ကမ္ဘာ၏ အခြေအနေကို တွေးတောနေမိလေသည်။

ဆက်ရန်...

အပိုင်း(၅၂၀) သာလွန်ထူးကဲသော စွမ်းအား

လေးဘက်မြင်ကမ္ဘာသည် သုံးဘက်မြင်ကမ္ဘာနှင့် မတူညီပေ။ သုံးဘက်မြင်ကမ္ဘာတွင် စွမ်းအင်အများစုသည် ကြယ်များကဲ့သို့သော ဟိုတစ်ပွင့် ဒီတစ်ပွင့်သာ စုစည်းနေတတ်သော်လည်း လေးဘက်မြင်ကမ္ဘာတွင်မူ စွမ်းအင်များ ပင်လယ်ရေပြင်ကြီးသဖွယ် ပြည့်နှက်နေလေသည်။

အဆုံးအစမဲ့သော အမှောင်စွမ်းအင်တို့မှာ ဒီရေလှိုင်းများပမာ နိမ့်ချည်မြင့်ချည် လှုပ်ခတ်နေသည်။

အနည်းငယ်မျှသော ဂယက်ထမှုလေးကပင် ကောင်းကင်နှင့်မြေကြီးကို ဖျက်ဆီးပစ်နိုင်လောက်သည့် စွမ်းအင်မုန်တိုင်းတစ်ခုအဖြစ် ပြောင်းလဲသွားနိုင်သည်။

သူ၏ခန္ဓာကိုယ်မှာ အတိုင်းအတာတစ်ခုအထိ အဆင့်တက်လာစဉ်အတွင်း အမှောင်စွမ်းအင်များ၏ ဆေးကြောသန့်စင်မှုကို ခံယူခဲ့ရပြီးဖြစ်၍ ယခုအခါ အတော်အသင့် ခံနိုင်ရည်ရှိနေပြီ ဖြစ်သော်လည်း ထိုစွမ်းအင်ပင်လယ်ပြင်ကြီးထဲတွင်မူ အလွယ်တကူ စုတ်ပြဲပျက်စီးသွားနိုင်သော စက္ကူလှေငယ်လေးတစ်စင်းနှင့် တူနေဆဲပင်။ အနည်းငယ်မျှ ပေါ့ဆမိသည်နှင့် လှေကွဲကာ လူပါသေဆုံးသွားနိုင်ချေ ရှိနေသည်။

ဤသည်မှာ အတိုင်းမသိ အန္တရာယ်များလှသော ကမ္ဘာတစ်ခုဖြစ်သည်။ ဓားတောင်များကိုကျော်၍ မီးပင်လယ်များကို ဖြတ်သန်းရသည်ထက်ပင် အဆပေါင်းများစွာ ပိုမိုကြောက်မက်ဖွယ် ကောင်းလှသည်။

လော်ယွမ်က အတိတ်က သူ မကြာခဏ အသုံးပြုခဲ့သော လေဟာနယ် ဖြတ်သန်းသွားလာခြင်း စွမ်းရည်များကို ပြန်တွေးမိပြီး နောက်ကျမှ ကြောက်စိတ်ဝင်လာမိသည်။ ထိုအချိန်က သူ၏ ခန္ဓာကိုယ်သည် ယခုလောက် မသန်မာခဲ့ပေ။

ကံကောင်းသည်မှာ ယခင်က သူ၏ လေဟာနယ် ဖြတ်သန်းသွားလာမှုများသည် အကွာအဝေးတိုတောင်းလှပြီး လေးဘက်မြင်ကမ္ဘာတွင် နေထိုင်ရသည့် အချိန်မှာလည်း အလွန်တိုတောင်းလှသည်။

စက္ကန့်တစ်ဘီလီယံပုံ တစ်ပုံမျှပင် မကြာခဲ့ပေ။ လက်ညှိုးဖြင့် ဖယောင်းတိုင်မီးလျှံကို လျင်မြန်စွာ ဖြတ်သန်းလိုက်သည့်အခါ အပူမလောင်နိုင်သကဲ့သို့ပင် သူ၏ အစောပိုင်း ကူးပြောင်းမှုများတွင် မည်သည့် မတော်တဆမှုမျှ မဖြစ်ပွားခဲ့ခြင်း ဖြစ်သည်။

ထိုစဉ် ဤလေဟာနယ်ထဲ၌ တဖြည်းဖြည်း လေတိုက်ခတ်လာသည်ကို သူ သတိပြုမိလိုက်သည်။ အစပိုင်းတွင် လေပြေလေးသာ ဖြစ်သော်လည်း မကြာမီမှာပင် လေပြင်းများအဖြစ်သို့ ပြောင်းလဲသွားပြီး နောက်ဆုံးတွင် မုန်တိုင်းကြီးပမာ တိုက်ခတ်လာလေသည်။

လော်ယွမ်သည် သူ၏ လက်ဝါးကို တစ်ချက်ပြန်ကြည့်လိုက်ပြီး လက်ချောင်းများ လှုပ်ရှားနေမှုကို ကပျာကယာ ရပ်တန့်လိုက်သည်။ ထိုအခါမှသာ တိုက်ခတ်နေသော လေပြင်းမုန်တိုင်းကြီးမှာ ချက်ချင်းဆိုသလို ငြိမ်သက်သွားတော့သည်။

သူ့အနေဖြင့် လက်ရှိခန္ဓာကိုယ်၏ စွမ်းအား မည်မျှကြီးမားနေသည်ကို တိတိကျကျ မသိသေးပေ။ ဤတစ်ကြိမ် အဆင့်တက်ခြင်းက သူ့ကို ယခင်ကထက် အဆပေါင်းများစွာ သန်မာလာစေပြီး အဆုံးမရှိသော စွမ်းအားများက သူ၏ ခန္ဓာကိုယ်တစ်ခုလုံးတွင် ပြည့်လျှံနေသည်ကိုသာ သူ သိထားသည်။

သူ၏ အမြင်တွင် ဤအာကာသယာဉ်ကြီးမှာ အလွန်တရာ ကျွတ်ဆတ်လွန်းလှပြီး သူသာ ဆန္ဒရှိပါက မျက်တောင်တစ်ခတ်အတွင်း အလုံးစုံ ဖျက်ဆီးပစ်နိုင်စွမ်း ရှိနေသည်ဟု ခံစားရသည်။ သို့သော် သူ၏ အစွမ်း မည်မျှအထိ ရောက်ရှိနေပြီဆိုသည်ကိုမူ ခန့်မှန်း၍ မရသေးပေ။

သို့သော်လည်း ယခုလေးတင် သူ လက်ချောင်းများကို အနည်းငယ် လှုပ်ရှားလိုက်ရုံဖြင့် ဤနေရာတွင် လေပြင်းမုန်တိုင်းကြီးတစ်ခုကို ဖြစ်ပေါ်စေခဲ့သည် မဟုတ်ပါလော။

သူ၏ စွမ်းအားကို ပိုမိုတိကျစွာ စမ်းသပ်နိုင်ရန်အတွက် လော်ယွမ်က သူ၏လက်ဝါးကို ဖြည်းညှင်းစွာ ဆုပ်ကြည့်လိုက်သည်။

မျက်စိဖြင့် မမြင်နိုင်သော လေထုကို သူ၏ လက်ဝါးကြီးဖြင့် ဆုပ်ကိုင်လိုက်မိသကဲ့သို့ ဖြစ်သွားပြီး "ဝုန်း" ဟူသော ပေါက်ကွဲသံကြီး ထွက်ပေါ်လာသည်။

သူ၏ အမြင်တွင်မူ ကမ္ဘာကြီးတစ်ခုလုံး၏ အပြောင်းအလဲများသည် အလွန်တရာ နှေးကွေးနေပြီး လေထု၏ အသေးစား ပြောင်းလဲမှုနှင့် လှိုင်းထမှုတိုင်းကို သူ၏ မျက်စိနှင့် အာရုံခံစားမှုတို့က ရှင်းလင်းစွာ သိမြင်နေသည်။

သူ လက်သီးဆုပ်လိုက်သော အခိုက်အတန့်လေးမှာပင် လေထုက ပြင်းထန်စွာ ပွတ်တိုက်မိသွားပြီး နေမင်းကြီးပမာ စူးရှတောက်ပသော မီးတောက်များ ထွက်ပေါ်လာကာ ဘေးပတ်ဝန်းကျင်သို့ ပြန့်နှံ့သွားသော အဖျက်စွမ်းအားလှိုင်းတစ်ခု ပါဝင်လာသည်ကို သူ အလွန် ရှင်းလင်းပြတ်သားစွာ မြင်တွေ့နေရသည်။

အစပိုင်းတွင် ထိုအဖျက်စွမ်းအားလှိုင်းမှာ အပြာနုရောင် အခိုးအငွေ့များ ဖြစ်ပြီး အရည်ကဲ့သို့ အသွင်အပြင်ရှိသည်။ ၎င်းမှာ လေထုကို အစွန်အဖျားအထိ ဖိသိပ်လိုက်ရာမှ အရည်အဖြစ်သို့ ပြောင်းလဲသွားလုမတတ် ဖြစ်သွားခြင်းပင်။

သို့သော် ထိုအရောင်မှာ စက္ကန့်ဆယ်ပုံတစ်ပုံခန့်သာ ကြာမြင့်ပြီး ချက်ချင်းဆိုသလို အဖြူရောင်အဖြစ်သို့ ပြောင်းလဲသွားသည်။

ငြိမ်သက်နေသော ရေပြင်ထဲသို့ ကျောက်ခဲတစ်လုံး ပစ်ချလိုက်သကဲ့သို့ လေထုထဲတွင် အဖြူရောင် လှိုင်းဂယက်များ ထွက်ပေါ်လာပြီး ဘေးပတ်ဝန်းကျင်သို့ တဖြည်းဖြည်း ရွေ့လျားသွားလေသည်။

လှပသော်လည်း အလွန်အန္တရာယ်များလှပေသည်။

သို့သော်လည်း ထိုအန္တရာယ်များသော အဖျက်စွမ်းအားလှိုင်းများက အရာဝတ္ထုများကို မဖျက်ဆီးမီမှာပင် လော်ယွမ်၏ စိတ်အာရုံ စေခိုင်းမှုကြောင့် မမြင်ရသော လက်ဝါးကြီးတစ်ဖက်က ဖွဖွလေး ပွတ်ဆွဲလိုက်သကဲ့သို့ ဖြစ်သွားပြီး အရာအားလုံးမှာ ချက်ချင်းဆိုသလို လေငြိမ်လှိုင်းအေး သွားတော့သည်။

လော်ယွမ်၏ မျက်နှာမှာ ထုံပေပေ ဖြစ်သွားပြီး အတန်ကြာမှ လက်ဝါးကို ပြန်ဖြန့်လိုက်သည်။ လက်ထဲမှ အပြာရင့်ရောင် ရေခဲပွင့်လေးများ မြေပြင်ပေါ်သို့ ပြန့်ကျသွားပြီး "ချလွင်" ဟူသော ကြည်လင်သည့် အသံများ ထွက်ပေါ်လာကာ အချိန်အတော်ကြာသည်အထိ အရည်မပျော်ဘဲ ရှိနေသည်။

သူ၏ ခန္ဓာကိုယ်မှာ လူစွမ်းအားဖြင့် လျှောက်လှမ်းနေသော အနုမြူဗုံး တစ်လုံးသဖွယ် ဖြစ်နေချေပြီ။ သူ၏ လှုပ်ရှားမှုတိုင်းက လက်တွေ့ကမ္ဘာကြီးအပေါ် ကြီးမားသော ဂယက်ရိုက်ခတ်မှုများကို ဖြစ်ပေါ်စေနိုင်သည်။

ဤအရာသည် သာမန် စွမ်းအားထိန်းချုပ်မှုမျိုးဖြင့် ထိန်းချုပ်၍ ရနိုင်သောအရာ မဟုတ်တော့ပေ။ သူ၏ ကြွက်သားများ သဘာဝအလျောက် လှုပ်ရှားသွားမှုလေး သို့မဟုတ် မရည်ရွယ်ဘဲ တွေးလိုက်မိသော စိတ်ကူးလေး တစ်ခုကပင် သာမန်လူတစ်ယောက်ကို သေဆုံးစေနိုင်သည်။

အခြားသူများနှင့် အတူယှဉ်တွဲ နေထိုင်ရန် ဆိုသည်မှာ ဝေလာဝေး၊ အနီးကပ် ချဉ်းကပ်ရန်ပင် အလွန်တရာ အန္တရာယ်များလှသော ကိစ္စရပ်တစ်ခု ဖြစ်နေပေသည်။

လော်ယွမ်သည် စိတ်ထဲတွင် ဗျာများလာပြီး စိတ်အခြေအနေလည်း အလွန် ဆိုးရွားလာသည်။

အချိန်အတော်ကြာမှသာ လက်ရှိအခြေအနေကို လက်ခံလိုက်ပြီး အရည်အသွေးပြဇယားကို ဖွင့်ကြည့်လိုက်သည်။

အမည် - လော်ယွမ်

အလုပ်အကိုင် - မုဆိုး

အဆင့် - ၁၃

အတွေ့အကြုံ - ၃၇၃၅၂၀ / ၁၂၂၈၈၀၀

အရည်အသွေးများ

ခွန်အား - ၅၂ (၁၀)

လျင်မြန်မှု - ၂၇ (၁၀)

ကြံ့ခိုင်မှု - ၅၃+၃၇ (၁၀)

ဉာဏ်ရည် - ၃၄ (၁၀)

အာရုံခံနိုင်စွမ်း - ၂၃+၁ (၁၀)

စိတ်စွမ်းအား - ၂၆+၁ (၁၀)

ကျွမ်းကျင်မှုများ

သိပ္ပံ ကျွမ်းကျင်အဆင့် - ၁၂

သင်္ချာ ကျွမ်းကျင်အဆင့် - ၇

လက်နက်မဲ့တိုက်ခိုက်ခြင်း ကျွမ်းကျင်အဆင့် - ၁၁

ဓားပညာ ကျွမ်းကျင်အဆင့် - ၁၅

သေနတ်ပစ်ခတ်ခြင်းပညာ ကျွမ်းကျင်အဆင့် - ၈

ပစ်ပေါက်ခြင်း ကျွမ်းကျင်အဆင့် - ၂

အထူးကျွမ်းကျင်မှု - အမျိုးအမည်ခွဲခြားအစွမ်း၊ ပေါင်းစပ်အစွမ်း၊ ထောက်လှမ်းအစွမ်း

ပင်ကိုယ်အစွမ်းများ

မြေလှိုင်းကြိမ်နှုန်း - အဆင့် ၃၇

ပေါင်းစပ်ခန္ဓာကိုယ် - အဆင့် ၂၅

လေးဖက်မြင်လေဟာနယ်ခရီးသွားခြင်း - အဆင့် ၂၆

လေးဘက်မြင် အမြင်အာရုံ - ၅၀%

လေးဘက်မြင် ဦးနှောက် - ၂၀%

လေးဘက်မြင် ခန္ဓာကိုယ် - ၅%

အရည်အသွေးအားလုံးမှာ မျက်စိကျိန်းလောက်အောင် အံ့မခန်း ဖြစ်နေသည်။

ဤတစ်ကြိမ် အဆင့်တက်မှုသည် ပြီးပြည့်စုံခြင်း မရှိသေးသော်လည်း အသက်ဇီဝအရမူ ကြီးမားသော ခုန်ပျံကျော်လွှားမှု တစ်ခုပင် ဖြစ်သည်။

အာကာသ ဧရာမသားရဲကြီးများနှင့် ယှဉ်လျှင်ပင် ယခုလက်ရှိ သူ၏ အနေအထားနှင့် သိပ်မကွာလှတော့ပေ။ လူတစ်ပိုင်း နတ်တစ်ပိုင်းဟု ခေါ်ဆိုလျှင်ပင် လွန်အံ့မထင်ပေ။

အများဆုံး ပြောင်းလဲသွားသည်မှာ ခွန်အားပင် ဖြစ်သည်။ ခန္ဓာကိုယ် ကြီးမားလာခြင်းကြောင့် ပိုမို၍ အထောက်အပံ့ ရရှိခြင်းလည်း ဖြစ်ကောင်းဖြစ်နိုင်သည်။

ခွန်အားမှာ အဆပေါင်း သုံးထောင်ကျော်အထိ တိုးလာပြီး ပေါင်သန်းပေါင်း လေးထောင်နီးပါးအထိ ရောက်ရှိသွားသည်။

လျင်မြန်မှုပိုင်းတွင် များများစားစား မတိုးလာသော်လည်း အဆ ခြောက်ဆယ်ကျော်ခန့် မြင့်တက်လာသည်။ ဉာဏ်ရည်မှာမူ အံ့အားသင့်ဖွယ်ရာ ၃၄ မှတ်အထိ ရောက်ရှိသွားပြီး အခြားသော အရည်အသွေးများမှာလည်း ပြောင်းလဲမှု ကြီးမားလှသည်။

သို့သော်လည်း ဤအရည်အသွေးများ တိုးတက်လာခြင်းမှာ အကျိုးဆက်သာ ဖြစ်ပြီး အကြောင်းရင်း မဟုတ်ပေ။ အရာအားလုံးမှာ လေးဘက်မြင် အသွင်ပြောင်းလဲခြင်း၏ ဘေးထွက်ဆိုးကျိုးများသာ ဖြစ်သည်။

"လေးဘက်မြင် အမြင်အာရုံ"

"လေးဘက်မြင် အသွင်ပြောင်းလဲမှု - ၅၀%"

"အာနိသင် - လေးဘက်မြင် ကမ္ဘာကြီးသည် သင့်မျက်စိရှေ့တွင် အထင်းသား ပေါ်လွင်နေမည်ဖြစ်ပြီး လေးဘက်မြင် ကမ္ဘာ၏ အရာခပ်သိမ်းကို သင် ဂရုတစိုက် လေ့လာစူးစမ်းနိုင်သည်"

"သုံးသပ်ချက် - လေးဘက်မြင် ကမ္ဘာသည် အလွန် ကျယ်ပြောလှပြီး အဆုံးမဲ့ လျှို့ဝှက်ချက်များ ကိန်းအောင်းနေပုံရသည်"

"သတိပေးချက် - လေးဘက်မြင် သက်ရှိများကို ရှာဖွေရန် မကြိုးစားပါနှင့်။ အလွန်တရာ အန္တရာယ်များသည်"

ထိုသတိပေးချက်ကို မြင်လိုက်ရသောအခါ လော်ယွမ်၏ မျက်နှာထား အနည်းငယ် ပြောင်းလဲသွားသည်။ သူက လေးဘက်မြင် ဦးနှောက်၏ ကဏ္ဍအခွဲကို ထပ်ဖွင့်ကြည့်လိုက်သည်။

"လေးဘက်မြင် ဦးနှောက်"

"လေးဘက်မြင် အသွင်ပြောင်းလဲမှု - ၂၀%"

"အာနိသင် (၁) - ၁၂ စက္ကန့်စာ ကြိုတင်သိမြင်နိုင်ခြင်း"

"သုံးသပ်ချက် - ... "

"အာနိသင် (၂) - ကွမ်တမ် ဦးနှောက်"

"သုံးသပ်ချက် - သင်၏ ဦးနှောက်သည် ကွမ်တမ် ကွန်ပျူတာတစ်လုံးကဲ့သို့ ဖြစ်နေပြီဖြစ်သည်"

"အာနိသင် (၃) - စိတ်ချင်းဆက်သွယ်နိုင်စွမ်း"

"အာနိသင် - မည်သည့် အာရုံခံစားမှု အင်္ဂါကိုမျှ အသုံးမပြုဘဲ သတင်းအချက်အလက်များကို မည်သည့် သက်ရှိထံသို့မဆို စိတ်ပိုင်းဆိုင်ရာ ကွမ်တမ်လှိုင်း အသွင်ဖြင့် တိုက်ရိုက် ပေးပို့နိုင်စွမ်း"

"သုံးသပ်ချက် - သင်သည် လေးဘက်မြင် သက်ရှိများ၏ အခြေခံ ဆက်သွယ်ရေးစွမ်းရည်ကို ကနဦး ပိုင်ဆိုင်ထားပြီဖြစ်သည်"

...

"လေးဘက်မြင် ခန္ဓာကိုယ်"

"လေးဘက်မြင် အသွင်ပြောင်းလဲမှု - ၅%"

"အာနိသင် (၁) - ကနဦး အမှောင်စွမ်းအင်နှင့် သဟဇာတဖြစ်သော ခန္ဓာကိုယ်"

"သုံးသပ်ချက် - သင်သည် အမှောင်စွမ်းအင်ကို အနည်းငယ် စုပ်ယူ အသုံးပြုနိုင်ပြီဖြစ်ရာ သင်၏ လှုပ်ရှားမှုတိုင်းတွင် သာလွန်ထူးကဲသော စွမ်းအားများ ပါဝင်နေပြီဖြစ်သည်"

"အာနိသင် (၂) - ကနဦး အကန့်အသတ်မဲ့ ခန္ဓာကိုယ်"

"သုံးသပ်ချက် - လေးဘက်မြင်တစ်ပိုင်း ဝိသေသလက္ခဏာများက သင်၏ ခန္ဓာကိုယ်ကို သုံးဘက်မြင် ရူပဗေဒ၏ အမြင့်ဆုံး အကန့်အသတ်များဆီသို့ ချဉ်းကပ်သွားစေသည်။ သင်သည် ဖျက်ဆီးရခက်ခဲသော အရာတစ်ခု ဖြစ်လာမည်။ မကြာမီ အချိန်အတွင်း ကြယ်များ၏ ဗဟိုချက်မှ အပူချိန်သည်ပင်လျှင် သင့်အတွက် ခပ်ကြီးကြီး ရေချိုးကန်တစ်ခုမျှသာ ဖြစ်လာပေလိမ့်မည်"

လော်ယွမ်က ထိုစနစ်ကို ကြည့်ရင်း ရုတ်တရက် အေးစက်စက် ပြုံးလိုက်သည်။ ယခုလေးတင် သူ၏ ခန္ဓာကိုယ်ထဲမှ အလွန် သေးငယ်ပြီး သတိမပြုမိနိုင်လောက်သော သတင်းအချက်အလက် လှိုင်းဂယက်လေးတစ်ခု ထွက်ပေါ်လာကာ လေးဘက်မြင် ကမ္ဘာထဲသို့ ချက်ချင်း ဝင်ရောက် ပျောက်ကွယ်သွားသည်ကို သူ ခံစားလိုက်ရသည်။

ယခင်ကဆိုလျှင် အဆုံးအစမဲ့သော အမှုန်များ လှုပ်ရှားနေသည့် ဤနေရာတွင် ရောနှောနေသော ထိုသို့သော သတင်းအချက်အလက် လှိုင်းဂယက်များကို သူ သတိပြုမိနိုင်မည် မဟုတ်ပေ။

သို့သော် ယခုအချိန်တွင်မူ သူ၏ ခန္ဓာကိုယ် အတွင်းပိုင်းတွင်ဖြစ်စေ၊ ပြင်ပ ပတ်ဝန်းကျင်တွင်ဖြစ်စေ သတင်းအချက်အလက် အားလုံးကို အပြည့်အဝ ထိန်းချုပ် သိရှိနိုင်သော အရာခပ်သိမ်းကို သိမြင်စွမ်းနိုင်သည့် အခြေအနေတွင် ရှိနေသည်။

ထို့ကြောင့် အနီးအနားရှိ မည်သည့် ပုံမှန်မဟုတ်သော သေးငယ်သည့် အပြောင်းအလဲများကိုမဆို သူ ရှင်းလင်းစွာ သိမြင်နေသည်။

ဤစနစ်ကို တီထွင်ခဲ့သော ယဉ်ကျေးမှုအဖွဲ့အစည်း၏ ရည်ရွယ်ချက်မှာ သာမန်ရိုးရှင်းလှသည်တော့ မဟုတ်ပေ။ ၎င်းစနစ်တွင် သတင်းအချက်အလက် စုဆောင်းသည့် လုပ်ဆောင်ချက်များ ပါဝင်နေပုံရသည်။

ထို့အပြင် လေးဘက်မြင် သက်ရှိများနှင့် ပတ်သက်၍ ဤစနစ်က မကြာခဏ သတိပေးချက်များ ထုတ်ပြန်ခြင်းကို ကြည့်ခြင်းအားဖြင့် သူ၏ ယခင်က ခန့်မှန်းချက်များနှင့် ပေါင်းစပ်ကာ ဤစနစ်၏ ရည်ရွယ်ချက်နှင့် ဇာစ်မြစ်ကို သူ အကြမ်းဖျင်း သုံးသပ်မိသွားသည်။

ဤစနစ်ကို တီထွင်ခဲ့သော ယဉ်ကျေးမှုအဖွဲ့အစည်းသည် လူသားများ၏ စိတ်ကူးဉာဏ်ထက် များစွာ သာလွန်သည့် အဆင့်မြင့် စူပါအဖွဲ့အစည်းတစ်ခု ဖြစ်ပေမည်။

၎င်းတို့၏ နည်းပညာများ တိုးတက်လာချိန်တွင် လေးဘက်မြင် ကမ္ဘာကို ရှာဖွေတွေ့ရှိခဲ့ပြီး နောက်ဆုံးတွင် လေးဘက်မြင် သက်ရှိများကို ရှောင်လွှဲမရဘဲ တွေ့ရှိခဲ့ကာ ထိုလေးဘက်မြင် သက်ရှိများနှင့် စစ်ပွဲများပင် ဖြစ်ပွားခဲ့ဖူးပေလိမ့်မည်။

မည်သို့ပင်ဆိုစေ စစ်ပွဲ မဖြစ်ပွားခဲ့လျှင်တောင်မှ နည်းပညာပိုင်းဆိုင်ရာ ယဉ်ကျေးမှုအဖွဲ့အစည်း တစ်ခုအနေဖြင့် နတ်ဘုရားများသဖွယ် ဖြစ်နေသော ထိုသို့သော လေ့လာစူးစမ်းစရာ သတ္တဝါများကို အလွတ်ပေးမည် မဟုတ်ပေ။

၎င်းတို့သည် လေးဘက်မြင် သက်ရှိများကို စတင် ထောက်လှမ်း လေ့လာခဲ့ကြပြီး နောက်ဆုံးတွင် လူသားဖန်တီးမှုဖြင့် လေးဘက်မြင် သက်ရှိများကို ဖန်တီးရန်ပင် ကြိုးစားခဲ့ကြပေမည်။

ဤစနစ်မှာ ၎င်းတို့၏ လူသားဖန်တီးမှု လေးဘက်မြင် သက်ရှိ စမ်းသပ်ချက်၏ အစိတ်အပိုင်းတစ်ခု ဖြစ်နိုင်ခြေ အလွန်များပြားပြီး သူကိုယ်တိုင်က ထိုစမ်းသပ်ခံများထဲမှ တစ်ဦး ဖြစ်နေသည်။

စနစ်မှတစ်ဆင့် စွမ်းအင်များကို စုဆောင်းကာ စမ်းသပ်ခံကို အဆက်မပြတ် သန်မာလာစေပြီး နောက်ဆုံးတွင် အဆင့်တက်စေမည့် ရည်ရွယ်ချက်ကို အကောင်အထည်ဖော်ခြင်း ဖြစ်သည်။ စနစ်ကမူ ဤဖြစ်စဉ်အတွင်း စမ်းသပ်ခံ၏ အဆင့်တက်ခြင်းဆိုင်ရာ အချက်အလက်များကို စုဆောင်းနေခြင်းသာ ဖြစ်ပေလိမ့်မည်။

ဆက်ရန်...