အခန်း (၁၄၃၅-၁၄၃၆)
Vol. 144 Ch. 1435-1436
အခန်း (၁၄၃၅) - မလွဲမသွေ သေဆုံးရမည့် အခြေအနေ
နက်မှောင်သော ကောင်းကင်ပြင်ကျယ်ထဲတွင် နဂါးနက်လှေသည် အရှိန်အဟုန်ဖြင့် ပြေးလွှားနေသည်။
ကြာနီနတ်မိမယ်က အနည်းငယ် သိချင်စိတ်ဖြင့် မေးမြန်းလိုက်သည် ။
"စီနီယာအစ်မကြီး... ဒီတစ်ခေါက် အောက်နယ်မြေ ခြောက်ခုကို သွားတဲ့အခါ ကျမတို့ရဲ့ ဦးတည်ရာက ဘယ်နေရာလဲဟင် "
"ရှေးဟောင်းနယ်မြေ ပဲ "
စီနီယာအစ်မကြီးက ပြုံး၍ ဖြေကြားပြီးနောက် ဖန့်ချန်ဘက်သို့ လှည့်ကြည့်ကာ
"ဖန့်မောင်လေး... ရှေးဟောင်းနယ်မြေက ထျန်းရှန်းဂိုဏ်း အကြောင်း ကြားဖူးသလား "
"ကြားဖူးသလိုလိုတော့ ရှိပါတယ် "
ဖန့်ချန်က ပြန်ပြောလိုက်သည်။
သူ့စိတ်ထဲတွင်တော့ အနည်းငယ် အံ့ဩသွားမိသည်။
ထိုစီနီယာအစ်မကြီးက ဝမ်ချုံစန်းရဲ့ ဇာတိအိမ်ကို ဝင်မွှေဖို့ ပြင်နေတာများလား
သို့သော်လည်း ဝမ်ချုံစန်း၏ စရိုက်အရ အရေးကြီးသော အရာမှန်သမျှကို ထျန်းရှန်းဂိုဏ်းထဲမှာ ဝှက်ထားလိမ့်မည် မဟုတ်ပေ။
"အင်း... ထျန်းရှန်းဂိုဏ်းကလည်း တာအိုဂိုဏ်းတစ်ခုပဲ။ မင်းကလည်း ရှေးဟောင်းနယ်မြေက လာတာဖြစ်သလို တာအိုကျင့်ကြံသူလည်း ဖြစ်နေတော့၊ ဒီတစ်ခေါက် ငါ့ကို အကူအညီလေးတစ်ခုလောက် ပေးစေချင်တယ် "
စီနီယာအစ်မကြီးက ဆိုသည်။
"ဖန့်မိတ်ဆွေရဲ့ ကျင့်စဉ်အဆင့်နဲ့ဆိုရင်..."
ကြာနီနတ်မိမယ်၏ မျက်နှာထားက ထူးဆန်းသွားသည်။
"ထျန်းရှန်းဂိုဏ်းထဲမှာ ငါ့အတွက် အလွန်အရေးကြီးတဲ့ ပစ္စည်းတစ်ခု ဝှက်ထားနိုင်တယ်။ ဒါပေမဲ့ အဲဒီဂိုဏ်းထဲမှာ အဆင့် ၈ မသေမျိုးတစ်ပါး ပုန်းအောင်းနေနိုင်တယ်လို့ ငါသံသယရှိနေတာ။ အောက်နယ်မြေခြောက်ခုမှာ မသေမျိုးလှေအစီရင်ကို အသုံးပြုလို့မရသလို၊ အသုံးပြုဖို့လည်း ခွင့်မပြုထားဘူး။ ဒီနဂါးနက်လှေရဲ့ စွမ်းအားတစ်ခုတည်းနဲ့တော့ အဆင့် ၈ မသေမျိုးကို ငါမယှဉ်နိုင်သေးဘူး "
"ဒါကြောင့် ဒုတိယနည်းလမ်းအနေနဲ့... မင်းက ထျန်းရှန်းဂိုဏ်းထဲကို ဧည့်သည်တော်အဖြစ် ဝင်ရောက်ပြီး အဲဒီပစ္စည်းရဲ့ သဲလွန်စကို စုံစမ်းပေးရမယ်။ ငါ့လက်ထဲမှာ သဲလွန်စတချို့ ရှိပြီးသားပါ။ အဲဒီပစ္စည်း တကယ်ရှိနေတယ်ဆိုတာ အတည်ပြုနိုင်တာနဲ့ နောက်ပိုင်းကိစ္စတွေကို ငါကိုယ်တိုင် တာဝန်ယူဖြေရှင်းမယ် "
စီနီယာအစ်မကြီးက ရှင်းပြသည်။
အဆင့် ၈ ရှေးဟောင်းမသေမျိုး
ထျန်းရှန်းဂိုဏ်းမှာလား
ဖန့်ချန်သည် ထိုသတင်းကြောင့် အလွန်အံ့ဩသွားရသည်။
အကယ်၍ ရှေးဟောင်းနယ်မြေမှာ အဆင့် ၈ ရှေးဟောင်းမသေမျိုးသာ ရှိနေခဲ့လျှင် ဘာကြောင့် အခုထိ သတင်းမထွက်ပေါ်ခဲ့ရတာလဲ
ဝမ်ချုံစန်းနှင့် ပတ်သက်သော ကိစ္စများကြောင့်ပင် ထျန်းရှန်းဂိုဏ်းမှ ကျင့်ကြံသူများသည် ဝိညာဥ်နတ်ဘုရားဂိုဏ်းအတွင်း အမျိုးမျိုး နှိပ်ကွပ်ခံခဲ့ရဖူးသည်။
ဝမ်ချုံစန်း၏ ညီငယ်ဖြစ်သူ စုန့်ကျိလီ ဆိုလျှင်ပင် ဖန်တီးရှင်ဂြိုလ် လို ဝေးလံခေါင်သီတဲ့ နေရာမှာ အစောင့်အဖြစ် အပို့ခံခဲ့ရသည်။
အကယ်၍ ထိုအဆင့် ၈ မသေမျိုးသာ တကယ်ရှိနေပြီး လျှို့ဝှက်ပုန်းအောင်းနေခဲ့လျှင် သူ၏ ရည်ရွယ်ချက်က ဘာများဖြစ်မလဲ ကြာနီနတ်မိမယ်ရဲ့ ဇာတိ နှင့်ရော ပတ်သက်နေမလား
သို့သော် စီနီယာအစ်မကြီး ပြောနေသည့် အရေးကြီးသော ပစ္စည်း ဆိုသည်မှာ ဘာဖြစ်မည်ကိုလည်း သူ သိချင်နေမိသည်။
ထိုက်ဟောက် နတ်မှန်ပြောင်း များလား ဝမ်ချုံစန်းက သူမကို လိမ်ညာခဲ့တာလား။
"စီနီယာအစ်မကြီး... တကယ်လို့ ထျန်းရှန်းဂိုဏ်းမှာ အဆင့် ၈ မသေမျိုး ရှိနေတာမှန်ရင် ဖန့်မိတ်ဆွေအတွက် အထဲဝင်စုံစမ်းဖို့က အန္တရာယ် မများလွန်းဘူးလား "
ကြာနီနတ်မိမယ်က စိုးရိမ်တကြီး မေးလိုက်သည်။
"ဖန့်မောင်လေးက အခုထိ အမာခံတပည့်လည်း မဟုတ်သေးသလို၊ မင်းရဲ့ အဖော် လည်း ဖြစ်မနေသေးပါဘူး။ ဘာလဲ... မင်းက အခုကတည်းက သူ့အတွက် စိုးရိမ်နေပြီလား "
စီနီယာအစ်မကြီးက ပြုံးစစဖြင့် နောက်ပြောင်လိုက်သည်။
ကြာနီနတ်မိမယ်မှာ ခဏတာ မှင်သက်သွားပြီးနောက် တိုးညင်းစွာ ပြောရှာသည်
"သူက ကျမရဲ့ အဖွဲ့ဝင်တစ်ယောက်ပဲလေ။ အန္တရာယ် အရမ်းများမယ်ဆိုရင်တော့ ဒီကိစ္စထဲ သူ့ကို မပါစေချင်ဘူး "
သိသာသည်မှာ ကြာနီနတ်မိမယ်သည် ယခုအချိန်တွင် အမာခံတပည့် တစ်ယောက်၏ အဆင့်အတန်းဖြင့် စီနီယာအစ်မကြီးကို စကားပြောနေခြင်း ဖြစ်သည်။
ကျင့်စဉ်အဆင့်ချင်း ကွာခြားလွန်းလှသော်လည်း သူမ၏ အဖွဲ့ဝင်အတွက် ရဲရဲဝံ့ဝံ့ ရပ်တည်ပေးနေခြင်းပင်။
စီနီယာအစ်မကြီးက သူမ၏ တည်ကြည်သော မျက်နှာထားကို မြင်သောအခါ ရယ်မောလျက်
"စိတ်ချပါ... ငါ ဒီကိစ္စကို အမြဲစောင့်ကြည့်နေမှာပါ။ တကယ်လို့ အန္တရာယ် တစ်ခုခု ကြုံလာရင် ကျွယ်မင်နန်းတော်ရဲ့ အမာခံတပည့် ခေါင်းဆောင်အဖြစ် ငါကိုယ်တိုင် ပေါ်ထွက်လာပြီး သူ့ကို ခေါ်ထုတ်သွားမှာပေါ့။ အဆင့် ၈ မသေမျိုး ရှိနေရင်တောင် ဘာဖြစ်လဲ အဆင့် ၉ မသေမျိုး မဟုတ်သရွေ့တော့ ကျွယ်မင်နန်းတော် ဆိုတဲ့ နာမည်ကြားတာနဲ့ ငါ့ကို ရိုရိုသေသေ ဆက်ဆံရမှာပဲ "
"တကယ်လို့ ဖန့်မိတ်ဆွေ က မသွားချင်ဘူးဆိုရင်တော့..."
ကြာနီနတ်မိမယ်က ဖန့်ချန်ဘက်သို့ လှည့်ကြည့်သည်။
ဖန့်ချန်က ခဏတာ စဉ်းစားပြီးနောက် ခေါင်းညိတ်ပြလိုက်သည်
"ဒီလောက် အကူအညီလေးကတော့ ကျနော် ပေးသင့်ပါတယ်။ စီနီယာအစ်မကြီး ပေးထားတဲ့ ကျူလုံလှေက တန်ဖိုးအရမ်းကြီးတာဆိုတော့ ဒီအခွင့်အရေးနဲ့ ကျေးဇူးပြန်ဆပ်တာပေါ့ "
"ဒါပေါ့... ဒါကိုမှ လောကဝတ် သိတယ်လို့ ခေါ်တာ။ ငါက မင်းကို ကျူလုံလှေ ပေးတယ်၊ မင်းက ငါ့ကို ဒီအကူအညီ ပြန်ပေးတယ်"
စီနီယာအစ်မကြီးက သဘောကျစွာ ခေါင်းညိတ်သည်
"ငါ ရှာခိုင်းချင်တဲ့ ပစ္စည်းက ထိုက်ဟောက် နတ်မှန်ပြောင်း လို့ ခေါ်တယ်။ သူ့ရဲ့ နောက်ခံသမိုင်းက နည်းနည်း ထူးခြားတယ်၊ ကျွယ်မင်ယင်လောကနဲ့ သက်ဆိုင်တဲ့ ပစ္စည်းတစ်ခုပဲ။ ဒီလို ယင်လောကပစ္စည်းမျိုး လူသားလောကမှာ ရှိနေရင် ထူးခြားတဲ့ နည်းလမ်းတွေနဲ့ သိမ်းဆည်းထားရတယ်။ လူသားလောက နယ်မြေကိုးခုမှာ အဲဒီလို နည်းလမ်းရှိတဲ့ ဂိုဏ်းက သိပ်မရှိဘူး၊ အများစုက တာအိုဂိုဏ်းတွေရဲ့ လက်ထဲမှာပဲ ရှိတာ "
"မင်း အဲဒီကို သွားတဲ့အခါ ငါ ရတနာတစ်ခု ပေးလိုက်မယ်။ တကယ်လို့ မင်းက ထိုက်ဟောက် နတ်မှန်ပြောင်း နဲ့ နီးစပ်သွားရင် အဲဒီရတနာက မင်းကို အချက်ပေးလိမ့်မယ်။ အချက်ပေးတာ ရတာနဲ့ မင်းရဲ့ တာဝန်က ပြီးပြီ၊ ကျန်တာ ငါ့အလုပ် "
တကယ်ပဲ ထိုက်ဟောက် နတ်မှန်ပြောင်း ဖြစ်နေသည်။
ဖန့်ချန်က ပုံမှန်အတိုင်းပင် ဟန်မပျက်ဘဲ
"စီနီယာအစ်မကြီးရဲ့ တာဝန်ကို အတတ်နိုင်ဆုံး အောင်မြင်အောင် လုပ်ဆောင်ပါ့မယ် "
"ဒါနဲ့... တကယ်လို့ ရှာမတွေ့ရင်လည်း ကိစ္စမရှိပါဘူး။ ဒီသတင်းကို နတ်ရိုသေနန်းတော် ဆီက ဝယ်ထားတာ၊ သူတို့သတင်းတွေကလည်း အမြဲတမ်း မှန်ချင်မှ မှန်တာ။ ဆယ်နှစ်ပေါ့... ဆယ်နှစ်အတွင်း ရှာမတွေ့ရင် ငါတို့ အထက်နယ်မြေ သုံးခုကို ပြန်ကြတာပေါ့ "
စီနီယာအစ်မကြီးက ပြောပြီးနောက် ထျန်းရှန့်ဂိုဏ်းရှိရာသို့ အနီးဆုံးလမ်းကြောင်းကို ကြယ်မြေပုံ ထဲတွင် စတင်ရှာဖွေတော့သည်။
“သူတောင် နတ်ရိုသေနန်းတော်ဆီက သတင်းဝယ်ရတာလား ”
ဖန့်ချန်၏ စိတ်ထဲတွင် အံ့ဩသွားမိသည်။
သတ်ဖြတ်ခြင်းနတ်ဆိုးတောင်တန်းမှာ ဝမ်ချုံစန်းက ထိုက်ဟောက် နတ်မှန်ပြောင်းဟာ ရှေးဟောင်းနဂါးနတ်ဘုရား နန်းတော်မှာ ရှိတယ်လို့ စီနီယာအစ်မကြီးကို အတည်ပေါက် လိမ်ညာခဲ့တဲ့ ပုံရိပ်ကို ပြန်မြင်ယောင်လာမိသည်။
စီနီယာအစ်မကြီးက ဝမ်ချုံစန်းရဲ့ စကားကို လုံးဝ မယုံကြည်ခဲ့ဘူးဆိုတာကို သူ သိသွားခဲ့ပြီ။
“ဖန့်ကျင့်မိတ်ဆွေ.. ဒီကိစ္စကို ရှင် ငြင်းလို့ရပါတယ်။ အဆင့် ၈ မသေမျိုး ရှိတဲ့ ဂိုဏ်းဆိုတာ သေးသေးမွှားမွှား မဟုတ်ဘူး။ သူတို့နောက်ကွယ်မှာ အသွေးသားနန်းတော်တို့၊ ထိုက်ယီမသေမျိုးဂိုဏ်းတို့လို အင်အားကြီးတွေနဲ့ ဆက်နွှယ်နေနိုင်တယ်။ တကယ်လို့ ပြဿနာတစ်ခုခု တက်လာရင် ကျွယ်မင်နန်းတော်ရဲ့ အမာခံတပည့် ဆိုတာတောင် ရှင့်ကို ဘေးကင်းအောင် ကာကွယ်ပေးနိုင်ချင်မှ ပေးနိုင်မှာ”
ကြာနီနတ်မိမယ်က ဖန့်ချန်ထံသို့ လျှို့ဝှက် အသံလှိုင်း ပေးပို့လိုက်သည်။
“ရပါတယ်... ကျုပ် သတိထားပါ့မယ် ”
ဖန့်ချန်က ပြုံး၍ အကြောင်းပြန်လိုက်သည်။
သူကိုယ်တိုင်လည်း ထိုက်ဟောက် နတ်မှန်ပြောင်း ကို စိတ်ဝင်စားသည်။
ထို့အပြင် ဝမ်ချုံစန်း၏ ရည်ရွယ်ချက်မှာလည်း သူနှင့် အတူတူပင် ဖြစ်နေသည်။
ယခုအခါ စီနီယာအစ်မကြီးက ထျန်းရှန်းဂိုဏ်းကို အာရုံစိုက်နေပြီဖြစ်သည်။
အကယ်၍ ထိုက်ဟောက် နတ်မှန်ပြောင်းသာ ထိုနေရာတွင် တကယ်ရှိနေပြီး သူမက လုယူသွားခဲ့လျှင် ဝမ်ချုံစန်း၏ အစီအစဉ်များ ပျက်စီးသွားနိုင်သည်။
ထို့ကြောင့် သူကိုယ်တိုင် ထိုကိစ္စတွင် ပါဝင်ပြီး အခြေအနေကို ထိန်းချုပ်ထားရန် လိုအပ်သည်။
ထိုက်ဟောက် နတ်မှန်ပြောင်း ရှိသည်ဖြစ်စေ၊ မရှိသည်ဖြစ်စေ သူ့ဆီကထွက်မည့် အဖြေကတော့ မရှိဘူး ဟူ၍သာ ဖြစ်ပေလိမ့်မည်။
စီနီယာအစ်မကြီးက သူ့ကို အကူအညီတောင်းရခြင်းမှာလည်း သူ၏ တာအိုနောက်ခံနှင့် ပါရမီကြောင့်ပင်။
သို့သော် သူသည် သူလျှို တစ်ယောက် ဖြစ်နေနိုင်သည်ကိုတော့ သူမ သိလိမ့်မည် မဟုတ်ပေ။
ကြယ်မြေပုံ အရ စီနီယာအစ်မကြီးသည် ဖြတ်လမ်းတစ်ခုကို ရှာတွေ့ခဲ့သည်။
အားလုံးသည် တည်နေရာကူးပြောင်းခြင်း အစီရင် ကို အသုံးပြုကာ ခြောက်လအတွင်းမှာပင် ထျန်းရှန်းဂိုဏ်း တည်ရှိရာ ရွှမ်ဟွမ်ဂြိုလ် သို့ ရောက်ရှိလာခဲ့သည်။
သို့သော် နဂါးနက်လှေ ပေါ်ထွက်လာသည်နှင့် တပြိုင်နက်၊ ဟင်းလင်ပြင်ကြီးတစ်ခုလုံးသည် စွမ်းအားတစ်ခုခုကြောင့် ချက်ချင်း အေးခဲသွားသလို ဖြစ်သွားတော့သည်။
ဖန့်ချန်ပင်လျှင် လက်ဖျားခြေဖျားမျှ လှုပ်ရှား၍ မရတော့ပေ။
ကြာနီနတ်မိမယ်၏ မျက်ဝန်းများတွင် တုန်လှုပ်ခြောက်ခြားမှုများ ပြည့်နှက်သွားသည်။
စီနီယာအစ်မကြီး၏ မျက်နှာမှာမူ အလွန်အမင်း မည်းမှောင်သွားတော့သည်။
“နတ်ရိုသေနန်းတော်ရဲ့ သတင်းက အမှားပဲ... ငါ အလိမ်ခံလိုက်ရပြီ။ ဒါက အမာခံတပည့်တချို့နဲ့ ပတ်သက်နေနိုင်တယ်။ ကျွယ်မင်နန်းတော်ထဲမှာ ငါ ဘာရှာနေတယ်ဆိုတာကို လူအနည်းငယ်ပဲ သိတာ ”
“ခဏနေရင် ငါ မင်းတို့ကို လွတ်အောင် ပို့ပေးမယ်။ လုံးဝ နောက်လှည့်မကြည့်နဲ့။ ငါကတော့ ဒီလောက်နဲ့ အလွယ်တကူ သေမယ့်သူ မဟုတ်ဘူး ”
သူမ၏ အသံသည် ဖန့်ချန်နှင့် ကြာနီနတ်မိမယ်၏ နားထဲတွင် ပဲ့တင်ထပ်သွားသည်။
အလိမ်ခံလိုက်ရတာလား
နှစ်ယောက်စလုံး ဆွံ့အသွားကြသည်။
နောက်တစ်စက္ကန့်တွင် ကောင်းကင်ထက်၌ ဗုဒ္ဓရောင်ခြည်များ တောက်ပနေသော ဧရာမ လက်ဝါးတော်ကြီး တစ်ခု ပေါ်ထွက်လာပြီး နဂါးနက်လှေဆီသို့ တည့်တည့်မတ်မတ် ကျဆင်းလာတော့သည်။
ထိုလက်ဝါးတော် ပေါ်ထွက်လာသည်နှင့် ကြောက်မက်ဖွယ်ကောင်းသော အရှိန်အဝါကြောင့် ဖန့်ချန်နှင့် ကြာနီနတ်မိမယ်တို့မှာ ဦးရေပြားများပင် ထုံကျဉ်သွားရသည်။
ထိုလက်ဝါးပိုင်ရှင်သည် ရှေးဟောင်းမသေမျိုး တစ်ပါး ဖြစ်နေနိုင်သည်။
ရှေးဟောင်းမသေမျိုး တစ်ပါးက ကျွယ်မင်နန်းတော်ရဲ့ အမာခံတပည့် ခေါင်းဆောင်အတွက် ထောင်ချောက်ဆင်ထားတာလား
တစ်စုံတစ်ယောက်က ကျွယ်မင်နန်းတော်ကို ပစ်မှတ်ထားနေတာလား။
“ရုလိုင်ဘုရားကျောင်း က ကတုံးတွေလား ”
စီနီယာအစ်မကြီးက အေးစက်စွာ ရေရွတ်လိုက်သည်။
သို့သော် ချက်ချင်းဆိုသလိုပင် ပတ်ဝန်းကျင်၌ တောက်လောင်နေသော မီးလျှံနတ်အိုးကြီး တစ်လုံး ပေါ်ထွက်လာပြီး လက်ဝါးတော်ကြီးနှင့်အတူ နဂါးနက်လှေဆီသို့ အပြိုင်အဆိုင် တိုက်ခိုက်လာတော့သည်။
ထိုမီးလျှံနတ်အိုး၏ အရှိန်အဝါမှာ လက်ဝါးတော်ထက် မနိမ့်ပေ။
နောက်ထပ် ရှေးဟောင်းမသေမျိုး တစ်ပါး
ရှေးဟောင်းမသေမျိုး နှစ်ပါး တစ်ပြိုင်တည်း တိုက်ခိုက်လာခြင်း ဖြစ်သည်။
မသေမျိုးလှေအစီရင်ကို အသုံးမပြုနိုင်သော အခြေအနေမျိုးတွင် ဤသည်မှာ မလွဲမသွေ သေဆုံးရမည့် အခြေအနေ ပင် ဖြစ်တော့သည်။
အခန်း (၁၄၃၆) - အမန်... လိမ်မာစမ်း
ဖန့်ချန်သည် အဆိုးဆုံးအခြေအနေအတွက် ပြင်ဆင်ထားပြီးဖြစ်သည်။
ထိုရှေးဟောင်းမသေမျိုးနှစ်ပါးသည် တိုက်ခိုက်ခြင်းမပြုမီ ပတ်ဝန်းကျင်တစ်ခုလုံးကို တစ်စုံတစ်ရာသော မန္တန်စွမ်းအားဖြင့် ပိတ်ဆို့ထားကြသည်။
သူ့အနေဖြင့် ယခုချက်ချင်းပင် ခန္ဓာကိုယ်နှင့်တကွ ယင်လောကသို့ ကူးပြောင်းကာ ထွက်ပြေး၍ရသော်လည်း၊ နယ်နိမိတ်ဘူးသီး ကို အသုံးပြု၍ ကြာနီနတ်မိမယ်နှင့် စီနီယာအစ်မကြီးတို့ကိုပါ ခေါ်ဆောင်သွားနိုင်ရန် စွမ်းအားမလောက်ငပေ။
တကယ်လို့ ထိုသို့သာ လုပ်ခဲ့ပါက၊ စီနီယာအစ်မကြီးသာ မသေဘဲ အသက်ရှင်ခဲ့လျှင် နောင်တစ်ချိန်တွင် သူသည် ကျွယ်မင်နန်းတော်သို့ ပြန်သွား၍ ရတော့မည်မဟုတ်ပေ။
၎င်းသည် ဖုံးကွယ်ထားသော အမှတ်အသားတစ်ခုကို ဆုံးရှုံးလိုက်ရခြင်းနှင့် အတူတူပင်ဖြစ်သည်။
သို့သော် မထွက်ခွာဘဲ နေမည်ဆိုလျှင်လည်း ရှေးဟောင်းမသေမျိုးနှစ်ပါး၏ တိုက်ကွက်မှ အနည်းငယ်သော အရှိန်အဝါရိုက်ခတ်မှုသည်ပင် သူနှင့် ကြာနီနတ်မိမယ်တို့ကို အမှုန့်ဖြစ်သွားစေနိုင်ပြီး၊ နောင်တွင် ယင်လောက နတ်ဘုရားဝိညာဉ်လမ်းစဉ်ကိုသာ လျှောက်လှမ်းရပေတော့မည်။
"ကျူလီနတ်အိုး လား "
စီနီယာအစ်မကြီး၏ မျက်နှာမှာ မှောင်ကျသွားသည်
"အဆိပ်ငါးပါးဂိုဏ်းက ချန်စန်းလား... နင် ကတောင် ဒီကိစ္စမှာ ပါဝင်ပတ်သက်ရဲတယ်ပေါ့လေ"
ထိုစဉ် သူမ၏ကိုယ်ပေါ်ရှိ ဝတ်ရုံသည် ရုတ်တရက် ရေလှိုင်းတစ်ခုကဲ့သို့ ပြောင်းလဲသွားသည်။
ဖန့်ချန်နှင့် ကြာနီနတ်မိမယ်တို့သည် မျက်စိရှေ့တွင် မှောင်အတိကျသွားသလို ခံစားလိုက်ရပြီး ဝတ်ရုံ၏ ဖုံးအုပ်ခြင်းကို ခံလိုက်ရသည်။
ဝတ်ရုံအတွင်းမှ ကြည့်လျှင် စီနီယာအစ်မကြီး၏ သွယ်လျလှပသော ခန္ဓာကိုယ်ကို မည်သည့်အရာမျှ ဖုံးကွယ်မထားသကဲ့သို့ အထင်သား မြင်နေရသည်။
ထိုဝတ်ရုံသည် ရှေးဟောင်းမသေမျိုးနှစ်ပါး၏ ပိတ်ဆို့မှုကို ဖြတ်တောက်ပေးနိုင်ပုံရပြီး၊ ၎င်းတို့နှစ်ဦးမှာ ပြန်လည်လှုပ်ရှားနိုင်စွမ်း ရှိလာကြသည်။
ကြာနီနတ်မိမယ်က လေးနက်သော အမူအရာဖြင့် ပြောသည်
"စီနီယာအစ်မကြီးရဲ့ ဒီဝတ်ရုံက သူမရဲ့ ဝိညာဉ်ရတနာ ဖြစ်ရမယ်။ တစ်ယောက်ချင်းဆိုရင် စီနီယာအစ်မကြီးရဲ့ အစွမ်းနဲ့ အဆင့် ၈ ရှေးဟောင်းမသေမျိုး မဟုတ်သရွေ့ ရှုံးဖို့မရှိဘူး။ ဒါပေမဲ့ အခု သူမ ရင်ဆိုင်နေရတာက ရှေးဟောင်းမသေမျိုး နှစ်ပါးဆိုတော့ နိုင်ဖို့ အခွင့်အရေးက မရှိသလောက်ပဲ"
"ကျုပ်တို့ရဲ့ အစွမ်းနဲ့ကတော့ ဒီလိုတိုက်ပွဲမျိုးမှာ ဝင်ပါလို့ မရဘူး"
ဖန့်ချန်က တိုးညင်းစွာ ရေရွတ်ရင်း တွေးတောနေသော အမူအရာ ပြုလိုက်သည်။
သူသည် ယခုအချိန်တွင် နယ်နိမိတ်ဘူးသီးကို အသုံးပြု၍ ကြာနီနတ်မိမယ်ကို အရင်ဆုံး ဘေးကင်းရာသို့ ခေါ်ဆောင်သွားနိုင်သည်။
သို့သော် ထွက်သွားပြီးနောက် ဘာဆက်ဖြစ်မည်နည်း
ထိုစီနီယာအစ်မကြီးသည် သူ့ကို ကျူလုံလှေတစ်စင်း ပေးထားရုံသာမက ဝမ်ချုံစန်းနှင့်လည်း ရင်းနှီးသော ဆက်ဆံရေး ရှိနေသည်။
အကယ်၍ ထွက်ပြေးမည်ဆိုလျှင် သူမကိုပါ တစ်ပါတည်း ခေါ်သွားသင့်သည်။
သို့သော်လည်း... နယ်နိမိတ်ဘူးသီးသည် ရှေးဟောင်းမသေမျိုး တစ်ပါးကို ဆံ့နိုင်ပါ့မလား တကယ်လို့ ဆံ့ခဲ့ရင်တောင် အထဲမှာရှိတဲ့ ဓာတ်ငါးပါး စွမ်းအားတွေကို သူ ဘယ်လို ရှင်းပြမလဲ ယွမ်သံလိုက် ဓာတ်ငါးပါးတောင် တုန်းက သူမကို လိမ်ခဲ့တာ သူဆိုတာကို သူမ ချက်ချင်း ရိပ်မိသွားလိမ့်မည်။
ဖန့်ချန်သည် မိမိကိုယ်မိမိ ဝမ်ချုံစန်းကဲ့သို့ မဟုတ်ဟု ခံစားရသဖြင့်၊ ဒေါသထွက်နေသော စီနီယာအစ်မကြီးက သူ့ကို တိုက်ခိုက်လာမည် မဟုတ်ကြောင်း အာမမခံနိုင်ပေ။
မသေချာသော ကိစ္စကိုတော့ သူ မလုပ်လိုပါ။
"ဟုတ်တယ်... ကျမတို့ အစွမ်းနဲ့က ဒီအဆင့်အတန်းက တိုက်ပွဲမှာ ဝင်ပါဖို့ မဖြစ်နိုင်ဘူး။ ကျွယ်မင်နန်းတော်ရဲ့ အမာခံတပည့်တွေထဲမှာ သစ္စာဖောက် ရှိနေပြီ"
ကြာနီနတ်မိမယ်၏ မျက်နှာမှာ တည်ကြည်လေးနက်နေသည်။
စီနီယာအစ်မကြီး၏ စကားအရ ထိုကဲ့သို့သော ထောင်ချောက်ကို ဆင်နိုင်သူမှာ အတွင်းရေးကို သိရှိသော အမာခံတပည့် အနည်းငယ်သာ ရှိနိုင်သည်။
"ပုံမှန်အားဖြင့်တော့ ဒီလို စီစဉ်တာက ပုဂ္ဂိုလ်ရေး ရန်ငြိုးကြောင့် မဖြစ်နိုင်ဘူး။ တကယ်လို့ ရန်ငြိုးကြောင့်ဆိုရင်လည်း ဒါက အရမ်းကို သတ္တိရှိလွန်းရာ ရောက်တယ်၊ တခြား ရည်ရွယ်ချက် တစ်ခုခု ရှိနေဦးမှာပဲ"
ဖန့်ချန်က ရေရွတ်လိုက်သည်။
စကားပြောနေစဉ်အတွင်း အပြင်ဘက်ရှိ တိုက်ပွဲမှာ အထွတ်ထိပ်သို့ ရောက်ရှိနေပြီ ဖြစ်ကြောင်း သူတို့ ခံစားနေရသည်။
သို့သော်လည်း သူတို့နှစ်ဦးမှာ မသေမျိုးဝတ်ရုံ၏ အကာအကွယ်အောက်တွင် ရှိနေသဖြင့် မည်သည့်သက်ရောက်မှုမျှ မရှိပေ။
၎င်းက စီနီယာအစ်မကြီးသည် တိုတောင်းသော အချိန်အတွင်း သေတွင်းကို ခုခံထားနိုင်ကြောင်း သက်သေပြနေသည်။
ရှေးဟောင်းမသေမျိုး အချင်းချင်း ဖြစ်သော်လည်း သူမ၏ စွမ်းအားမှာ အမှန်တကယ်ပင် မြင့်မားလှသည်။
"တခြား ရည်ရွယ်ချက်လား ရတနာ လုဖို့လား ဒါမှမဟုတ် မသေမျိုးလှေ အစီရင်ဗဟိုချက် အတွက်လား အဲဒါအတွက်တင် ဆိုရင်တော့ ဒီလောက်ထိ မလုပ်လောက်ဘူး။ ဒါက အဖိုးတန်ပေမဲ့ ကျွယ်မင်နန်းတော်မှာ အမာခံတပည့် တစ်ထောင်ကျော် ရှိနေတာပဲ၊ စီနီယာအစ်မကြီးကို ပစ်မှတ်ထားစရာ မလိုပါဘူး"
"နေပါဦး... ဒါမှမဟုတ်..."
ကြာနီနတ်မိမယ်သည် တစ်စုံတစ်ခုကို တွေးမိသွားဟန်ဖြင့် သူမ၏ မျက်ဝန်းများမှာ လက်ခနဲ ဖြစ်သွားသည်။
ဖန့်ချန်က သိချင်စိတ်ဖြင့် ကြည့်နေသည်ကို မြင်သောအခါ သူမက ခဏတာ ဝေခွဲမရဖြစ်ပြီးမှ လျှို့ဝှက် အသံလွှင့်လိုက်သည်။
"ကျွယ်မင်နန်းတော်မှာ သာမန်လူတွေ မသိတဲ့ စည်းကမ်းတစ်ခု ရှိတယ်။ စီနီယာအစ်မကြီးက အမာခံတပည့်တွေရဲ့ ခေါင်းဆောင် ဖြစ်နေတာက သူမကို အနာဂတ်ရဲ့ အဆင့် ၉ မသေမျိုးအဖြစ် မွေးမြူနေတာပဲ။တကယ်လို့ နန်းတော်သခင်ရဲ့ သက်တမ်း ကုန်ဆုံးသွားတဲ့ တစ်နေ့မှာ စီနီယာအစ်မကြီးက အဲဒီရာထူးကို ဆက်ခံပြီး အဆင့် ၉ ကို တက်လှမ်းရမှာ။ စီနီယာအစ်မကြီးကို ဖယ်ရှားလိုက်ရင် ကျွယ်မင်နန်းတော်က သူမနေရာမှာ အစားထိုးဖို့ အမာခံတပည့်ခေါင်းဆောင်သစ် တစ်ယောက် ပြန်ရွေးရလိမ့်မယ်။ ဒါက ဘာကို ဆိုလိုသလဲဆိုတော့... တစ်စုံတစ်ယောက်က နန်းတော်သခင်ရဲ့ သက်တမ်း ကုန်ခါနီးပြီလို့ ယူဆပြီး လက်ဦးမှုယူဖို့ ကြိုးစားနေတာပဲ..."
"အမာခံတပည့်ခေါင်းဆောင် နေရာကို လုတာလား "
ဖန့်ချန်၏ စိတ်အာရုံမှာ လှုပ်ရှားသွားသည်။
ကြာနီနတ်မိမယ်၏ ခန့်မှန်းချက်မှာ ဖြစ်နိုင်ခြေ ရှိသည်။
အကယ်၍ အနာဂတ် အဆင့် ၉ ရာထူးအတွက်ဆိုလျှင် ရင်းနှီးမြှုပ်နှံမှု အမြောက်အမြား ပြုလုပ်ကာ ရှေးဟောင်းမသေမျိုး နှစ်ပါးကိုပင် ငှားရမ်း၍ လုပ်ကြံခိုင်းခြင်းမှာ ဖြစ်နိုင်သည်။
သို့သော် ထိုကိစ္စကို စီစဉ်သူ၏ နောက်ခံမှာ အလွန်ကျယ်ပြန့်လှသည်။
လက်ဝါးတော်ကြီး၏ ပိုင်ရှင်မှာ ရုလိုင်ဘုရားကျောင်းမှ ဖြစ်နိုင်သည်။
၎င်းသည် ကျွယ်မင်နန်းတော်ကဲ့သို့ပင် စိတ်ဝိညာဥ်နယ်မြေ၏ ထိပ်တန်း အင်အားစု တစ်ခုဖြစ်သည်။
အကယ်၍ နတ်ရိုသေနန်းတော်ပါ ပါဝင်ပတ်သက်နေမည်ဆိုလျှင် စီနီယာအစ်မကြီးကို လုပ်ကြံလိုသည့် အမာခံတပည့်၏ နောက်ကွယ်တွင် ပိုမိုကြီးမားသော အင်အားစုတစ်ခု ရှိနေကြောင်း ထင်ရှားနေသည်။
"ရှေးဟောင်းမသေမျိုး နှစ်ပါးတည်း မဟုတ်ဘူး"
ဖန့်ချန်၏ မျက်နှာထား ပြောင်းလဲသွားသည်
"မင်းရဲ့ ခန့်မှန်းချက်က မှန်ပြီး ဒါက အမာခံတပည့်ခေါင်းဆောင်နေရာ လုပွဲဆိုရင် တစ်ဖက်လူက ရှေးဟောင်းမသေမျိုး နှစ်ပါးတည်းနဲ့ ရပ်နေမှာ မဟုတ်ဘူး။တကယ်လို့ ဒီနေ့ စီနီယာအစ်မကြီး လွတ်သွားခဲ့ရင် ရုလိုင်ဘုရားကျောင်းရော နတ်ရိုသေနန်းတော်ပါ ဒုက္ခရောက်နိုင်တယ်။ ဒါကြောင့် သူတို့မှာ လုံးဝ အပိုင်တွက်ချက်မှု ရှိထားမှာပဲ"
"အပိုင်တွက်ချက်မှု ဟုတ်လား "
"စီနီယာအစ်မကြီး ပြောခဲ့တယ်မလား၊ ထျန်းရှန်းဂိုဏ်းမှာ အဆင့် ၈ ရှေးဟောင်းမသေမျိုး တစ်ပါး ရှိတယ်ဆိုတာလေ။ တစ်ဖက်လူက ဒီနေရာမှာ တိုက်ခိုက်ဖို့ ရွေးချယ်တာက... အဲဒီ အဆင့် ၈ ရှေးဟောင်းမသေမျိုးက သူတို့ရဲ့ နောက်ဆုံးလက်နက် ဖြစ်နေနိုင်တယ်။ တကယ်လို့ အခြေအနေက ထင်သလို မဖြစ်လာရင် သူက ဝင်တိုက်လိမ့်မယ် "
"အခု စီနီယာအစ်မကြီး ခုခံနေနိုင်တာက တစ်ဖက်လူက တမင်တကာ လျှော့ပေးထားတာ ဖြစ်ရမယ်။ စီနီယာအစ်မကြီးမှာ ဘာလျှို့ဝှက်လက်နက်တွေ ရှိသေးလဲ၊ ဒါမှမဟုတ် ကျွယ်မင်နန်းတော်က တစ်စုံတစ်ယောက်က တိတ်တဆိတ် လိုက်ပါစောင့်ရှောက်နေသလား ဆိုတာကို စမ်းသပ်ချင်နေတာပဲ"
"ဒါဆို ကျမတို့ သေရတော့မှာလား"
ကြာနီနတ်မိမယ်၏ မျက်နှာမှာ ဖြူလျော့သွားသည်။
အောက်နယ်မြေခြောက်ခုကို လာရုံလေးနှင့် ထိုကဲ့သို့ ကိစ္စမျိုး ကြုံရလိမ့်မည်ဟု သူမ မထင်ထားမိပေ။
"ကျွယ်မင်နန်းတော်ဘက်ကလည်း တစ်ခုခု လှုပ်ရှားနေလောက်ပြီ။ အခုသာ နန်းတော်ကို ပြန်ရောက်နိုင်ရင် ပွဲကောင်းတစ်ပွဲ ကြည့်ရမှာပဲ"
ထိုသို့ တွေးမိရင်း ဖန့်ချန်သည် ကြာနီနတ်မိမယ်ကို ကြည့်လိုက်သည်
"ကြာနီမိတ်ဆွေ... ကျုပ်ဆီမှာ ဒီဘေးကနေ လွတ်မြောက်နိုင်မယ့် နည်းလမ်းတစ်ခု ရှိတယ်"
"ဘာနည်းလမ်းလဲ "
"ယာယီတော့ အသေးစိတ် မပြောနိုင်သေးဘူး၊ ဒီဘူးသီးထဲကို ခေတ္တ ဝင်နေပါဦး"
ဖန့်ချန်သည် နယ်နိမိတ်ဘူးသီးကို ထုတ်ယူကာ ကြာနီနတ်မိမယ်ဘက်သို့ ချိန်လိုက်သည်။
ကြာနီနတ်မိမယ်မှာ ခဏတာ မှင်သက်သွားသော်လည်း၊ ချက်ချင်းပင် ခေါင်းညိတ်ပြကာ မည်သည့် ခုခံမှုမျှ မပြုဘဲ ဘူးသီးအတွင်းသို့ ဝင်ရောက်သွားတော့သည်။
"စီနီယာအစ်မကြီး... ကျနော်မှာ လွတ်မြောက်နိုင်မယ့် နည်းလမ်းတစ်ခု ရှိတယ်"
ဖန့်ချန်က လှမ်းပြောလိုက်သည်။
ဝတ်ရုံပြင်ပမှ စီနီယာအစ်မကြီး၏ ရယ်မောသံ ထွက်ပေါ်လာသည်
"လွတ်မြောက်ဖို့ မလိုပါဘူး။ ဒီရှေးဟောင်းမသေမျိုး နှစ်ယောက်က အစွမ်း သိပ်မရှိပါဘူး။ လက်ဖက်ရည်တစ်ခွက်စာ အချိန်လောက် ပေးပါ၊ ငါ သူတို့ကို သေမင်းဆီ ပို့ပေးမယ် "
"မောက်မာလှချည်လား "
"စီနီယာအစ်မကြီး... တကယ်လို့ သူတို့ရဲ့ ပစ်မှတ်က အစ်မကြီးရဲ့ နေရာဆိုရင် ဒါက အဆင့် ၉ ရောက်မယ့် လမ်းစဉ်အတွက်ပဲ။ လမ်းစဉ်တစ်ခုမှာ အဆင့် ၉ တစ်ယောက်တည်း ရှိနိုင်တဲ့အတွက် ဒီလောက် အရေးကြီးတဲ့ ကိစ္စကို အဆင့် ၇ ရှေးဟောင်းမသေမျိုး နှစ်ယောက်တည်းနဲ့ လွှတ်ပါ့မလား "
ဖန့်ချန်က သက်ပြင်းချလိုက်သည်။
"မင်းမှာ ဘာအကြံရှိလို့လဲ "
စီနီယာအစ်မကြီး၏ အသံသည် သူ၏ နားထဲတွင် ကပ်၍ ထွက်ပေါ်လာသည်။
"ကျနော်မှာ ကိုယ်ယောင်ဖျောက် ထွက်ပြေးနိုင်တဲ့ ပညာတစ်ခု ရှိပါတယ်။ စီနီယာအစ်မကြီး အနေနဲ့ စွမ်းအားတွေကို ရုပ်သိမ်းပြီး ကျနော်ရဲ့ ဒီဘူးသီးထဲကို ခဏလောက် ဝင်ပေးမယ်ဆိုရင် ဒီနေရာကနေ တိုက်ရိုက် လွတ်မြောက်နိုင်မယ့် အခွင့်အရေး ရှိပါတယ်"
"မင်းလား အဆင့် ၁ မသေမျိုးလေး တစ်ယောက်ကလေ မင်းရဲ့ စွမ်းရည်တွေက မဆိုးပေမဲ့..."
"အမန်... လိမ်မာစမ်း"
စီနီယာအစ်မကြီး၏ စကားသံမှာ ရုတ်တရက် ရပ်တန့်သွားသည်။
ဖန့်ချန်သည် သူ၏ကိုယ်ပေါ်သို့ ပြင်းထန်သော သတ်ဖြတ်လိုသည့် အရှိန်အဝါ တစ်ခု ကျရောက်လာသည်ကို ခံစားလိုက်ရပြီး၊ ယင်လောကသို့ တိုက်ရိုက် ကူးပြောင်းထွက်ပြေးချင်စိတ်ကို မနည်း ထိန်းထားလိုက်ရသည်။
"ငါ စွမ်းအားတွေ ရုပ်သိမ်းလိုက်တာနဲ့ သူတို့ရဲ့ တိုက်ကွက်တွေက ချက်ချင်း ပေါက်ထွက်လာလိမ့်မယ်။ မင်းမှာ တစ်စက္ကန့်တောင် မပြည့်တဲ့ အချိန်ပဲ ရမယ်၊ လောက်ပါ့မလား "
"လောက်ပါတယ်"
နောက်တစ်ခဏတွင် စီနီယာအစ်မကြီးသည် ဖန့်ချန် ပြောသည့်အတိုင်း အမှန်တကယ်ပင် လုပ်ဆောင်ခဲ့သည်။
သူမသည် ရှေးဟောင်းမသေမျိုး နှစ်ပါး၏ တိုက်ကွက်များကို ခုခံထားရာမှ စွမ်းအားများကို ရုပ်သိမ်းလိုက်ပြီး နယ်နိမိတ်ဘူးသီးအတွင်းသို့ တိုက်ရိုက် တိုးဝင်လိုက်သည်။
ဖန့်ချန်သည် ဘူးသီးကို ဆုပ်ကိုင်လျက် မျက်တောင်တစ်ခတ်အတွင်းမှာပင် ယင်လောကအတွင်းသို့ ကိုယ်ယောင်ဖျောက် ဝင်ရောက်သွားတော့သည်။
ဝုန်း
ဧရာမ လက်ဝါးတော်ကြီးနှင့် ကျူလီနတ်အိုးတို့သည် ပစ်မှတ် ပျောက်ဆုံးသွားသဖြင့် တစ်ခုနှင့်တစ်ခု တိုက်မိကာ ဟင်းလင်ပြင်ထဲတွင် လှိုင်းလုံးကြီးများ ထကြွသွားစေသည်။
ဟင်းလင်ပြင်ကြီးမှာ ပြန်လည် တိတ်ဆိတ်သွားတော့သည်။
ဖန့်ချန်တို့ သုံးဦး၏ အငွေ့အသက်မှာ လုံးဝ ပျောက်ကွယ်သွားပြီ ဖြစ်သည်။
ခဏအကြာတွင် ပုံရိပ်နှစ်ခုသည် ဟင်းလင်ပြင်ထဲမှ တစ်ဦးပြီးတစ်ဦး ရှေ့ဆင့်နောက်ဆင့် ထွက်ပေါ်လာကြတော့သည်။