အခန်း (၁၄၆-၁၄၇)

အခန်း (၁၄၆) - လှုပ်ရှားမှုမရှိခြင်း

ဘာသာပြန် - အားသစ်

လင်းဖုန်း တောင်ပိုင်းတောင်တန်း အခြေစိုက်စခန်းသို့ ရောက်ရှိလာသည်။ ပထမသုံးရက်အတွက် သူသည် နေ့တိုင်းနီးပါး တောင်ပိုင်းတောင်တန်း အခြေစိုက်စခန်းရှိ တပ်ရင်း ၃၆ ခုမှ အခြေအနေများကို လေ့လာရာတွင် အချိန်ကုန်ဆုံးခဲ့သည်။ တပ်ရင်း ၂၅ ခုမှာ သူတို့၏ တပ်ရင်းမှူးများ ဆုံးရှုံးခဲ့ရပြီး သာလွန်လူသား ကျွမ်းကျင်သူများ မရှိတော့ပေ။

တပ်ရင်းတစ်ခုစီရှိ အမည်စာရင်း တင်သွင်းမှုများအရ လင်းဖုန်းသည် ထောက်ခံသူ အများဆုံးရှိသော သိုင်းသမားကို ယာယီ တပ်ရင်းမှူးအဖြစ် ခေတ္တ ရာထူးတိုးပေးခဲ့သည်။ ၎င်းမှာ ယာယီ တပ်ရင်းမှူး ရာထူးသာ ဖြစ်သော်လည်း ယှဉ်ပြိုင်မှုမှာ ပြင်းထန်နေဆဲပင်။ အကယ်၍ ထောက်ခံသူ အရေအတွက် တူညီနေပါက ယာယီ တပ်ရင်းမှူးကို တိုက်ခိုက်မှုမှတစ်ဆင့် ဆုံးဖြတ်မည် ဖြစ်သည်။

တရားဝင် ခေါင်းဆောင်အဖြစ် ရာထူးတိုးရန်နှင့် ပတ်သက်၍မူ မျိုးရိုးဗီဇကန့်သတ်ချက်ကို ချိုးဖျက်ပြီး သာလွန်လူသား တစ်ဦး ဖြစ်လာရန် လိုအပ်မည် ဖြစ်သည်။

ဤသည်မှာ သုံးရက်အတွင်း လင်းဖုန်း၏ တစ်ခုတည်းသော လှုပ်ရှားမှု ဖြစ်သော်လည်း သူသည် တပ်ရင်း ၁၅ ရင်း၏ အာဏာကို သူ့လက်ထဲတွင် လျင်မြန်စွာ ဆုပ်ကိုင်နိုင်ခဲ့သည်။ ဤသည်က အခြား တပ်ရင်းမှူး ၂၁ ယောက်ကိုလည်း သူ့အား မတူညီသော အမြင်ဖြင့် အကဲဖြတ်စေခဲ့သည်။

တောင်ပိုင်းတောင်တန်း အခြေစိုက်စခန်းရှိ သာလွန်လူသား ကျွမ်းကျင်သူ ၂၁ ဦးအတွက် သူတို့သည် လင်းဖုန်း အာဏာရှင်ဆန်မည် သို့မဟုတ် အာဏာသိမ်းမည်ကို မကြောက်ကြပေ။ လက်တွေ့တွင် သာမန် တောင်ပိုင်းတောင်တန်း အခြေစိုက်စခန်းတစ်ခု၌ အာဏာ မည်မျှ ရှိနိုင်မည်နည်း။

လင်းဖုန်းက အာဏာမပြမည်ကို သို့မဟုတ် တောင်ပိုင်းတောင်တန်း အခြေစိုက်စခန်းကို ဂရုမစိုက်မည်ကိုသာ သူတို့ ကြောက်ကြသည်။ မည်သို့ပင်ဆိုစေ တောင်ပိုင်းတောင်တန်း အခြေစိုက်စခန်းသည် ကြီးမားသော ဆုံးရှုံးမှုများကို ခံစားခဲ့ရုံသာ ရှိသေးသည်။ အကယ်၍ တောင်ပိုင်းတောင်တန်း အခြေစိုက်စခန်းကို ဂရုမစိုက်ဘဲ ဘာမှမလုပ်သော စစ်သေနာပတိချုပ်တစ်ဦးသာ ရှိနေပါက ၎င်းသည် တောင်ပိုင်းတောင်တန်း အခြေစိုက်စခန်း တစ်ခုလုံးအတွက် ဘေးဒုက္ခတစ်ခု ဖြစ်လာပေလိမ့်မည်။

လှုပ်ရှားမှု မရှိခြင်းဆိုသည်မှာ သာမန်ကာလျှံကာဖြစ်ခြင်းကို ဆိုလိုပြီး သာမန်ကာလျှံကာဖြစ်ခြင်းသည် အန္တရာယ်များသော ရှေ့တန်း အခြေစိုက်စခန်းတစ်ခုတွင် အကြီးမားဆုံးသော အပြစ်ပင် ဖြစ်သည်။

ယခုအချိန်တွင် တောင်ပိုင်းတောင်တန်း အခြေစိုက်စခန်းသည် အစွမ်းထက်သော စစ်သေနာပတိချုပ်တစ်ဦး ပေါ်ထွက်လာပြီး သင်းခွေချပ်သားရဲများကို တွန်းလှန်ရန် သူတို့ကို ဦးဆောင်နိုင်လိမ့်မည်ဟု မျှော်လင့်နေကြသည်။ လင်းဖုန်း၏ လုပ်ရပ်များသည် တောင်ပိုင်းတောင်တန်း အခြေစိုက်စခန်း၏ စိတ်ဓာတ်ကို တဖြည်းဖြည်း တည်ငြိမ်သွားစေခဲ့သည်။

သို့သော် ၎င်းမှာ သုံးရက်သာ ကြာခဲ့သည်။

သုံးရက်အကြာတွင် လင်းဖုန်း စစ်ဆေးခြင်းကို ရပ်လိုက်သည်။ သူသည် တောင်ပိုင်းတောင်တန်း အခြေစိုက်စခန်း၏ ကိစ္စရပ်များတွင် ပါဝင်ပတ်သက်ခြင်းမှ အခြေခံအားဖြင့် ရပ်တန့်လိုက်ပြီး မည်သူနှင့်မျှ မတွေ့ဘဲ သူ၏နေအိမ်တွင်သာ နေထိုင်တော့သည်။

ဆယ်ရက်၊ နှစ်ဆယ်ရက်...

လင်းဖုန်း ပျောက်ကွယ်သွားသကဲ့သို့ပင်။ တောင်ပိုင်းတောင်တန်း အခြေစိုက်စခန်းတွင် သူ၏ တည်ရှိမှုမှာ အလွန် နည်းပါးနေပြီ ဖြစ်သည်။ ခဏတာမျှ လူတိုင်း အလွန် စိတ်ပျက်သွားကြသည်။ တောင်ပိုင်းတောင်တန်း အခြေစိုက်စခန်းရှိ ဤမျှ လှုပ်ရှားမှုမရှိသော စစ်သေနာပတိချုပ်တစ်ဦးက ရက်စက်ကြမ်းကြုတ်သော သင်းခွေချပ်သားရဲများကို ခုခံနိုင်စွမ်း ရှိပါမည်လော။

ထိုအချိန်တွင် လူတိုင်း ပြောဆိုနေကြသော လင်းဖုန်းသည် အခန်းထဲတွင် သက်ပြင်းရှည်ကြီးတစ်ခု ချလိုက်သည်။

"ကိုးထပ်ခန္ဓာကိုယ်ကျင့်စဉ်ရဲ့ စတုတ္ထအဆင့်က ရုပ်ပိုင်းဆိုင်ရာအတွက် တကယ်ကို မြင့်မားတဲ့ စံနှုန်းတွေ ရှိတာပဲ။ ငါ့ရဲ့ လက်ရှိ ရုပ်ပိုင်းဆိုင်ရာနဲ့တောင်မှ ငါ အဲဒါကို ခံနိုင်ရည်မရှိလုနီးပါးပဲ"

လင်းဖုန်း မျက်လုံးများကို ဖွင့်လိုက်သည်။ သူ့ခန္ဓာကိုယ်ထဲရှိ လှိုင်းထနေသော စွမ်းအားများကို ခံစားလိုက်ရသည့်အလား သူ့လက်များကို ညင်သာစွာ ဆုပ်လိုက်သည်။

သူ တောင်ပိုင်းတောင်တန်း အခြေစိုက်စခန်းသို့ ရောက်လာသည်မှာ တစ်လရှိပြီ ဖြစ်သည်။ လွန်ခဲ့သည့် သုံးရက်က သူသည် တပ်ရင်း ၃၆ ရင်းကို စစ်ဆေးခဲ့ပြီး တပ်ရင်းမှူးသစ် ၁၅ ယောက်ကို ထောက်ခံပေးခဲ့သည်။ ကျန် ၂၇ ရက်အတွက် သူသည် သူ၏ ဗီလာတွင်သာ နေထိုင်ခဲ့သည်။

စစ်သေနာပတိချုပ်၏ ဗီလာတွင် လေ့ကျင့်ရန် သီးသန့် အသုံးပြုသော လျှို့ဝှက်ခန်းတစ်ခု ရှိသည်။ တစ်လတာလုံး လင်းဖုန်းသည် ကိုးထပ်ခန္ဓာကိုယ်ကျင့်စဉ်၏ စတုတ္ထအဆင့်ကို လက်တွေ့ လေ့ကျင့်နေခဲ့ခြင်း ဖြစ်သည်။ ကိုးထပ်ခန္ဓာကိုယ်ကျင့်စဉ်အတွက် ရုပ်ပိုင်းဆိုင်ရာ လိုအပ်ချက်များမှာ အလွန် မြင့်မားနေပြီ ဖြစ်သည်။ ယခု သူ စတုတ္ထအဆင့်သို့ ရောက်ရှိနေပြီဖြစ်သည်။ ထိုအဆင့်ကို ပုံမှန်ထက်ပို၍ ထူးကဲသည်ဟုပင် ယူဆနိုင်သည်။

ကံကောင်းထောက်မစွာဖြင့် လင်းဖုန်း၏ ခန္ဓာကိုယ်မှာ အလွန် သန်မာသည်။ သူသည် နောက်ဆုံးတွင် စတုတ္ထအဆင့်ကို ကျွမ်းကျင်သွားခဲ့ပြီ ဖြစ်သည်။

ကိုးထပ်ခန္ဓာကိုယ်ကျင့်စဉ်၏ စတုတ္ထအဆင့်မှာ ပထမ သုံးဆင့်နှင့် လုံးဝနီးပါး ကွာခြားသည်။ ထိုအဆင့်သည် ခန္ဓာကိုယ်လေ့ကျင့်ခြင်း၏ အကျိုးသက်ရောက်မှုကို တိုက်ရိုက်ပြသပေးသည်။

ယခုအချိန်အထိ ကိုးထပ်ခန္ဓာကိုယ်ကျင့်စဉ်သည် ခန္ဓာကိုယ်လေ့ကျင့်သည့် သိုင်းပညာတစ်ခု မဟုတ်ဘဲ တိုက်ခိုက်ရေး နည်းစနစ်တစ်ခုအဖြစ် ပေါ်လာခဲ့သည်။ သို့သော် ယခုမှသာ သူ မှားနေကြောင်း လင်းဖုန်း သိလိုက်ရသည်။

စစ်မှန်သော ကိုးထပ်ခန္ဓာကိုယ်ကျင့်စဉ်သည် စတုတ္ထအဆင့်မှ စတင်ခြင်း ဖြစ်သည်။ ၎င်းသည် အစွမ်းထက်သော တိုက်ခိုက်မှုများကို ထုတ်လွှတ်နိုင်ရုံသာမက ခန္ဓာကိုယ်ကို လေ့ကျင့်ရန်အတွက်လည်း အသုံးပြုနိုင်သည်။ သို့သော် ဤကဲ့သို့သော ခန္ဓာကိုယ်လေ့ကျင့်ခြင်းကို သာမန်လူများ လေ့ကျင့်၍မရနိုင်ပေ။ အကြောင်းမှာ ၎င်းသည် တုန်ခါအားတစ်မျိုးနှင့် သက်ဆိုင်သောကြောင့် ဖြစ်သည်။

ဟုတ်ပေသည်၊ ထိုသည်မှာ တုန်ခါအားဖြစ်သည်။ နေ့တိုင်း လင်းဖုန်းသည် ကိုးထပ်ခန္ဓာကိုယ်ကျင့်စဉ်၏ စတုတ္ထအဆင့်ကို လေ့ကျင့်နေသည်။ သူလေ့ကျင့်သည့်အချိန်တိုင်း သူ့ခန္ဓာကိုယ်ရှိ ကြွက်သားများနှင့် အရိုးများ အားလုံး တုန်ခါသွားမည် ဖြစ်သည်။ ဤသည်မှာ တုန်ခါအားဖြစ်သည်။ ဤတုန်ခါအားကို အသုံးပြု၍ လူတစ်ဦး၏ ရုပ်ပိုင်းဆိုင်ရာကို ဖြည်းဖြည်းချင်း တိုးတက်စေနိုင်သည်။

သို့သော် ဤနည်းလမ်းသည် တစ်စုံတစ်ဦး၏ ရုပ်ပိုင်းဆိုင်ရာအတွက် အလွန် မြင့်မားသော လိုအပ်ချက်များ ရှိပြီး အလွန်တရာလည်း အစွန်းရောက်လှသည်။ အကြောင်းမှာ တုန်ခါအားသည် တစ်စုံတစ်ယောက်၏ ခန္ဓာကိုယ်ကို မတော်တဆ ဒဏ်ရာရစေနိုင်ပြီး ပြန်လည်သက်သာရန် အလွန် ခက်ခဲသောကြောင့် ဖြစ်သည်။

ထို့ကြောင့် ကိုးထပ်ခန္ဓာကိုယ်ကျင့်စဉ်တွင် ခန္ဓာကိုယ်လေ့ကျင့်ခြင်း၏ အကျိုးသက်ရောက်မှု ရှိသော်လည်း ၎င်းကို လေ့ကျင့်ရန် ဆန္ဒရှိသော သိုင်းသမား အများအပြား မရှိပေ။ အခြေခံအားဖြင့် စတုတ္ထအဆင့်အထက်တွင် ဆက်လက် လေ့ကျင့်နိုင်သော သိုင်းသမားများမှာ အလွန် ရှားပါးလှသည်။

သိုင်းသမား အများစုသည် ဤအတွက် အချိန်နှင့် စွမ်းအင်ပေးမည့်အစား ကြယ်တာရာစွမ်းအား ကျင့်ကြံခြင်းကိုသာ အပြည့်အဝ အာရုံစိုက်လိုကြသည်။ အကျိုးသက်ရောက်မှုများမှာလည်း များစွာ ပိုကောင်းပေလိမ့်မည်။

သို့သော် လင်းဖုန်းအတွက်မူ တုန်ခါအားမှာ လက်တွေ့တွင် သူနှင့် အတိအကျ ကိုက်ညီအောင် ဖန်တီးထားခြင်း ဖြစ်သည်။ သူ့တွင် မသေမျိုးအစွမ်းသတ္တိ ရှိပြီး သူ၏ ပြန်လည်ကုသနိုင်စွမ်းမှာ အံ့မခန်း ဖြစ်သည်။ အသေးအမွှား ဒဏ်ရာလေးတစ်ခုက ဘာမှမဟုတ်ပေ။ သူသည် မျက်စိတစ်မှိတ်အတွင်း ပြန်လည် သက်သာလာနိုင်သည်။

ထို့ကြောင့် သူသည် အချိန်တိုင်းတွင် တုန်ခါအားကိုပင် ထိန်းသိမ်းထားနိုင်သည်။ ဤနည်းအားဖြင့် သူ၏ ရုပ်ပိုင်းဆိုင်ရာမှာလည်း အချိန်တိုင်း တိုးတက်နေမည် ဖြစ်သည်။ သူ၏ ခန္ဓာကိုယ်အသွင်ပြောင်းလဲခြင်း ပြီးဆုံးသွားပြီးနောက်တွင်ပင် သူ၏ ရုပ်ပိုင်းဆိုင်ရာကြံ့ခိုင်မှုမှာ အဆက်မပြတ်တိုးတက်နိုင်သေးသည်။

အနာဂတ်တွင် လင်းဖုန်းသည် ပဉ္စမ၊ ဆဋ္ဌမ၊ သတ္တမအဆင့်များနှင့် အဋ္ဌမနှင့် နဝမအဆင့်များကိုပင် အချိန်တိုအတွင်း ကျွမ်းကျင်ရန် ဖြစ်နိုင်ချေ ရှိသေးသည်။

"အားလေးဆ..."

လင်းဖုန်း အလွန် ကျေနပ်နေသည်။ ယခု သူသည် ကိုးထပ်ခန္ဓာကိုယ်ကျင့်စဉ်၏ စတုတ္ထအဆင့်ကို ထုတ်လွှတ်ပြီး ဝဲဂယက်အား လေးခုကို စုစည်းလိုက်သည်။ ဝဲဂယက်အား လေးခုကို ထုတ်လွှတ်ရုံဖြင့် သူ့ကို ခွန်အား တန် ၁၄၀၀ ပေးစွမ်းနိုင်မည် ဖြစ်သည်။ သူ၏ မူလ ရုပ်ပိုင်းဆိုင်ရာ ခွန်အားကိုပါ ပေါင်းထည့်လိုက်ပါက ခွန်အား တန် ၁၇၅၀ ကျော် ရှိမည် ဖြစ်သည်။

တွေးကြည့်ရုံနှင့်တင် ကြောက်စရာကောင်းလှသည်။ အကယ်၍ သူသာ ကြယ်တာရာစွမ်းအားကိုပါ ထပ်မံ ပေါက်ကွဲထွက်လာစေပါက တန်ချိန် ၂၀၀၀ ကျော်ရှိသော ပေါက်ကွဲအားကို အလွယ်တကူ ထုတ်လွှတ်နိုင်မည် ဖြစ်သည်။

သို့သော် လင်းဖုန်းသည် လောလောဆယ်တွင် ကိုးထပ်ခန္ဓာကိုယ်ကျင့်စဉ်၏ စတုတ္ထအဆင့်ကိုသာ ကျွမ်းကျင်နိုင်သေးသည်။ သူ၏ ရုပ်ပိုင်းဆိုင်ရာမှာ ပဉ္စမအဆင့်အတွက် အနည်းငယ် လိုနေသေးသည်။ တုန်ခါအား၏ အကျိုးသက်ရောက်မှုများနှင့် သူ၏ ခန္ဓာကိုယ်အသွင်ပြောင်းလဲခြင်းတို့အရ ကိုးထပ်ခန္ဓာကိုယ်ကျင့်စဉ်၏ ပဉ္စမအဆင့်ကို မကျွမ်းကျင်မီ တစ်လခန့် အချိန်ယူရမည် ဖြစ်သည်။

"စစ်သေနာပတိချုပ်... ခေါင်းဆောင်ချန်ရွှယ် ထပ်ရောက်နေပါတယ်"

ရုတ်တရက် အစောင့်တစ်ဦးသည် လျှို့ဝှက်ခန်း အပြင်ဘက်သို့ လာရောက် သတင်းပို့သည်။

"သူမကို ပြန်လွှတ်လိုက်"

လင်းဖုန်း ခေါင်းခါလိုက်သည်။ ဤအမျိုးသမီးမှာ အမှန်တကယ်ပင် ဇွဲကောင်းလွန်းလှသည်။ လွန်ခဲ့သည့် တစ်လအတွင်း သူမသည် လင်းဖုန်းကို ဆယ်ကြိမ်ထက်မက လာရှာခဲ့ပြီး ဖြစ်သည်။ သူမသည် နှစ်ရက်လျှင် တစ်ကြိမ် လာလေ့ရှိပြီး လင်းဖုန်း အလွန် စိတ်အနှောင့်အယှက် ဖြစ်ရသည်။

"လင်းဖုန်း... ရှင် ဘာလို့ ထွက်မလာတာလဲ။ ရှင်က စစ်သေနာပတိချုပ်လေ။ ဘယ်သူနဲ့မှ မတွေ့ဘဲ ပုန်းနေလို့ မရဘူး။ ဟွန့်... မနက်ဖြန်လည်း ကျွန်မထပ်လာမယ်"

ချန်ရွှယ်၏ အသံ အပြင်ဘက်မှ ထပ်မံ ထွက်ပေါ်လာသည်။ လင်းဖုန်း လျှို့ဝှက်ခန်းထဲတွင်ပင် သူမ၏ အသံကို ပီပီသသ ကြားနိုင်သည်။

လင်းဖုန်း၏ မျက်နှာအမူအရာ အနည်းငယ် စိတ်အနှောင့်အယှက် ဖြစ်သွားသည်။ လုဝေ့၏ ရှင်းပြချက်ကို ကြားပြီးကတည်းက သူသည် ချန်ရွှယ်၏ အခြေအနေကို သဘာဝကျကျ သိခဲ့သည်။ သို့သော် ချန်ရွှယ်သည် သူ့ကို အကြိမ်ကြိမ် နှောင့်ယှက်နေခဲ့သည်။ သူ၏ စစ်သေနာပတိချုပ် ရာထူးမှာ ဟန်ပြသက်သက်ဟု သူမ တကယ် ထင်နေသည်လော။

ချန်ရွှယ်မှာ အမှန်တကယ်ပင် သနားစရာ ကောင်းသည်။ သူမသည်လည်း ရှေ့တန်းတွင် တိုက်ပွဲဝင်နေခဲ့သူ ဖြစ်သော်လည်း ကျိုးယွင်၏ သေဆုံးမှုက ဤအမျိုးသမီးကို ရူးသွပ်လုမတတ် ဖြစ်စေခဲ့သည်။ အကယ်၍ သူမ၏ အတွင်းစိတ် နတ်ဆိုးများကို မဖြေရှင်းနိုင်ပါက သူမ၏ သိုင်းလမ်းစဉ်မှာ ဤနေရာမှစ၍ ပြတ်တောက်သွားမည်ဖြစ်ပြီး သူမသည် နောက်ထပ် တိုးတက်ရန် မေ့ထားလိုက်၍ ရပြီ ဖြစ်သည်။

လင်းဖုန်း ချန်ရွှယ်ကို လျစ်လျူရှုလိုက်သည်။ သူ လုပ်စရာ ပိုအရေးကြီးသော ကိစ္စများ ရှိသေးသည်။ လက်တွေ့တွင် လင်းဖုန်းသည် တောင်ပိုင်းတောင်တန်း အခြေစိုက်စခန်း၏ စီမံခန့်ခွဲမှုကို အမှန်တကယ် ဂရုမစိုက်ပေ။ သူ ဤအာဏာများကို မလိုအပ်ပေ။ သူ ပို၍ တန်ဖိုးထားသည်မှာ သူ၏ ကိုယ်ပိုင် ခွန်အားသာ ဖြစ်သည်။

တစ်စုံတစ်ယောက်ကသာ လုံလောက်စွာ အစွမ်းထက်ပြီး နဂါးစီးသူရဲကောင်း ဟောက်ရှီရီ အဆင့်ရှိသော ခွန်အားရှိပါက သာမန် သင်းခွေချပ်သားရဲများမှာ ဘာမှမဟုတ်တော့ပေ။

သူသည် သင်းခွေချပ်သားရဲများကို တစ်ယောက်တည်း သွားရောက် ဖျက်ဆီးပစ်နိုင်ပေသည်။ သင်းခွေချပ်သားရဲများထဲတွင် နတ်ဆိုးဗိုလ်ချုပ်များ ရှိနေလျှင်တောင်မှ နဂါးစီးသူရဲကောင်း ဟောက်ရှီရီနှင့် တွေ့ပါက သူတို့ သေရမည်သာ ဖြစ်သည်။

ထို့ကြောင့် သင်းခွေချပ်သားရဲများကို အစပြု တိုက်ခိုက်ရန် ချန်ရွှယ်၏ တောင်းဆိုချက်ကို သူ သဘောမတူခဲ့ပေ။ ခွန်အားမရှိဘဲ သင်းခွေချပ်သားရဲများကို အင်အားသုံး တိုက်ခိုက်ခြင်းက တောင်ပိုင်းတောင်တန်း အခြေစိုက်စခန်း တစ်ခုလုံးအတွက် ကြီးမားသော ထိုးနှက်ချက်တစ်ခုကိုသာ ယူဆောင်လာမည် ဖြစ်သည်။

တစ်လကြာ ပြင်ဆင်ပြီးနောက် လင်းဖုန်း အချိန်တန်ပြီဟု ခံစားလိုက်ရသည်။ ဤကာလအတွင်း ကိုးထပ်ခန္ဓာကိုယ်ကျင့်စဉ်ကို လေ့ကျင့်သည့်အပြင် သူသည် အသွင်ပြောင်းနယ်ပယ်၏ အဆင့်သုံးဆင့်ကြားရှိ ဆက်စပ်မှုအချို့ကိုလည်း လေ့လာခဲ့သည်။

သူ ဘယ်လို အဆင့်တက်သင့်သလဲ။

လင်းဖုန်းသည် အရာအားလုံးကို အကြမ်းဖျင်း နားလည်သွားပြီဟု ခံစားရပြီး အနည်းငယ် ယုံကြည်မှုလည်း ရှိလာသည်။ ထို့ကြောင့် သူ ဤမျှ အရေးကြီးသော အချိန်ကို အလဟဿ ဖြုန်းတီးမည် မဟုတ်ပေ။ သူ ဆက်လက် ကျင့်ကြံရမည် ဖြစ်သည်။

ထို့အပြင် ဤတစ်ကြိမ်တွင် သူသည် အသွင်ပြောင်းနယ်ပယ် ဒုတိယအဆင့်သို့ တက်လှမ်းရန် ပြင်ဆင်နေပြီ ဖြစ်သည်။

ထာဝရသိုင်းတာအိုအရှင်

အခန်း (၁၄၇) - ခေတ်သစ်တစ်ခု အစပြု

ဘာသာပြန် - အားသစ်

ဤကာလအတွင်း လင်းဖုန်းသည် အသွင်ပြောင်းနယ်ပယ် သိုင်းသမားများ၏ ကျင့်ကြံမှုအဆင့်များနှင့် ပတ်သက်သော အသေးစိတ် အချက်အလက်များကို စုဆောင်းနေခဲ့သည်။

ထို့ကြောင့် လင်းဖုန်း အချို့သောအရာများကို သိရှိလာခဲ့ရသည်။

အသွင်ပြောင်းနယ်ပယ်၏ ပထမ၊ ဒုတိယနှင့် တတိယအဆင့်များမှာ အသက်အနှစ်သာရ အသွင်ကူးပြောင်းမှုများ မဟုတ်သလို အခြေခံကျသော ကွဲပြားခြားနားမှုများလည်း မရှိပေ။ အသွင်ပြောင်းနယ်ပယ် သိုင်းသမားများ၏ အသက်အနှစ်သာရမှာ လက်တွေ့တွင် အတူတူပင်ဖြစ်ပြီး တစ်ဦးက တစ်ဦးထက် နိမ့်ကျခြင်း သို့မဟုတ် သာလွန်ခြင်း မရှိပေ။

အသွင်ပြောင်းနယ်ပယ်ရှိ အသေးစားနယ်ပယ် သုံးခုကြားတွင် သိသာထင်ရှားသော ကွဲပြားမှု ရှိနေရခြင်း၏ အကြောင်းရင်းမှာ လက်တွေ့တွင် ကြယ်တာရာစွမ်းအားကြောင့် ဖြစ်သည်။

အသွင်ပြောင်းနယ်ပယ် သိုင်းသမားများသည် မျိုးရိုးဗီဇကန့်သတ်ချက်ကို ချိုးဖျက်ပြီးနောက် စကြဝဠာအတွင်းရှိ ကြယ်စွမ်းအားများကို လက်ခံရယူကာ ၎င်းတိုြကို ကြယ်တာရာစွမ်းအားအဖြစ် ပြောင်းလဲနိုင်သည်။ ထိုအချိန်မှစ၍ ကြယ်တာရာစွမ်းအားသည် ဆက်လက် အသွင်ပြောင်းလဲရန်နှင့် နောက်ဆုံးတွင် အသက်ဝိညာဉ်အသွင်ကူးပြောင်းရန်အတွက် သော့ချက် ဖြစ်လာသည်။

ကြယ်တာရာစွမ်းအားက သော့ချက်ဖြစ်သော်လည်း လူ့ခန္ဓာကိုယ်တွင် ကြယ်တာရာစွမ်းအား လက်ခံနိုင်စွမ်းမှာ အကန့်အသတ် ရှိသည်။ ရုပ်ပိုင်းဆိုင်ရာကို သန်မာအောင် လုပ်ခြင်းဖြင့် ကြယ်တာရာစွမ်းအား ပိုမို လက်ခံနိုင်ရန် ခွင့်ပြုနိုင်ကောင်း ခွင့်ပြုနိုင်သော်လည်း ဤသည်မှာ လင်းဖုန်း၏ ကိုယ်ပိုင် ယူဆချက်သာ ဖြစ်သည်။

သိုင်းသမားမြောက်များစွာထဲတွင် သန်မာသော ရုပ်ပိုင်းဆိုင်ရာ မရှိသူ တစ်ယောက်မှ မရှိဟု ပြောရန် ခက်ခဲသည်။ သူတို့ ဘာကြောင့် အကန့်အသတ်ကို မချိုးဖျက်နိုင်ကြသေးတာလဲ။ သူတို့သည် အသွင်ပြောင်းနယ်ပယ် ပထမအဆင့်တွင် ကြယ်တာရာစွမ်းအားမျှင် ၉၉ ခုစာလောက်သာ ရှိနေဆဲပင်။

ဤသည်မှာ အခြေခံအားဖြင့် သိုင်းသမား အားလုံးအတွက် ဖြစ်သည်။ လင်းဖုန်းမှာ တစ်ခုတည်းသော ခြွင်းချက်သာ ဖြစ်သည်။ ဆိုလိုသည်မှာ ကြယ်တာရာစွမ်းအား ပိုမို လက်ခံနိုင်ရန် ရုပ်ပိုင်းဆိုင်ရာကို ဆက်လက် သန်မာအောင် လုပ်ခြင်းက အလုပ်ဖြစ်မည် မဟုတ်ပေ။ လင်းဖုန်းမှာ အလွန် ထူးခြားသော အခြေအနေတစ်ခုသာဖြစ်ပြီး ၎င်းကို သိုင်းသမား အားလုံးအတွက် အသုံးချ၍ မရနိုင်ပေ။

ဒါဆိုရင် ကြယ်တာရာစွမ်းအား ပိုမို လက်ခံနိုင်ဖို့ သူ ဘာလုပ်သင့်သလဲ။

သိုင်းသမားများသည် သဘာဝကျကျပင် ဖြေရှင်းနည်းတစ်ခုကို တွေးမိခဲ့ကြသည်။ ၎င်းမှာ ဖိသိပ်ခြင်းပင် ဖြစ်သည်။ ကြယ်တာရာစွမ်းအားမှာ ပေါ့ပါးပြီး အမျှင်တစ်ခုချင်းစီမှာ ဆံပင်တစ်မျှင်ထက်ပင် ပိုမို သေးငယ်သည်။ ၎င်းကို သာမန်မျက်စိဖြင့်ပင် မမြင်နိုင်ပေ။ အကယ်၍ သူတို့သည် ကြယ်တာရာစွမ်းအားကို ဆက်လက် ဖိသိပ်ပြီး နေရာလွတ်များ ပြုလုပ်နိုင်ပါက သူတို့သည် သဘာဝကျကျပင် ကြယ်တာရာစွမ်းအား ပိုမို လက်ခံနိုင်မည် ဖြစ်သည်။

ဤသည်မှာ သိုင်းသမားများ လွန်ခဲ့သော အချိန်အတော်ကြာကတည်းက တွေးမိခဲ့သော နည်းလမ်းတစ်ခု ဖြစ်သည်။ ထိုနည်းလမ်းမှာ အမှန်တကယ် အလုပ်ဖြစ်ကြောင်း အချက်အလက်များဖြင့် သက်သေပြခဲ့သည်။ ခန္ဓာကိုယ်ထဲရှိ ကြယ်တာရာစွမ်းအား အကန့်အသတ်သို့ ရောက်ရှိသွားပါက တစ်စုံတစ်ယောက်၏ ခိုင်မာသော စိတ်ဆန္ဒဖြင့် ၎င်းကို ဖိသိပ်နိုင်ပြီး စဉ်ဆက်မပြတ် ဖိသိပ်သွားနိုင်သည်။ သီအိုရီအရ ကြယ်တာရာစွမ်းအား သန်းပေါင်းများစွာကို ဖိသိပ်လိုက်လျှင်ပင် ရေတစ်စက်ထက် လျော့နည်းသော ဒြပ်ထုကိုသာ ရရှိမည် ဖြစ်သည်။

ကြယ်တာရာစွမ်းအားကို အကန့်အသတ်မရှိနီးပါး ဖိသိပ်နိုင်သော်လည်း အဓိကသော့ချက်မှာ တစ်ဦး၏ စိတ်ဆန္ဒက ကြယ်တာရာစွမ်းအားကို မည်မျှအထိ ဖိသိပ်နိုင်မည်နည်း ဆိုသည့်အချက်ပင် ဖြစ်သည်။

အချို့သော သိုင်းသမားများသည် မျိုးရိုးဗီဇကန့်သတ်ချက်ကို ချိုးဖျက်ပြီးနောက် အမြဲတမ်း အသွင်ပြောင်းနယ်ပယ် ပထမအဆင့်မှာပဲ ရှိနေခဲ့ကြသည်။ အကြောင်းမှာ သူတို့၏ စိတ်ဆန္ဒမှာ ကြယ်တာရာစွမ်းအားကို ဖိသိပ်ရန် လုံလောက်အောင် မခိုင်မာသောကြောင့် ဖြစ်သည်။

စိတ်ဆန္ဒဆိုသည်မှာ နာမ်ပိုင်းဆိုင်ရာဖြစ်ပြီး ကျွမ်းကျင်သိုင်းသမား အဆင့်တွင် လုံးဝနီးပါး အသုံးမဝင်ပေ။ သို့သော် မျိုးရိုးဗီဇကန့်သတ်ချက်ကို ချိုးဖျက်ပြီးနောက်တွင်မူ စိတ်ဆန္ဒသည် အလွန်တရာ အရေးကြီးလာသည်။

တစ်ဦး၏ စိတ်ဆန္ဒကို လေ့ကျင့်ရန် နည်းလမ်းများစွာ ရှိသော်လည်း အထိရောက်ဆုံးမှာ သေခြင်းရှင်ခြင်း ဖိအားများနှင့် တိုက်ပွဲများ ဖြစ်သည်မှာ သေချာလှသည်။ သေခြင်းရှင်ခြင်း တိုက်ပွဲများသည် တစ်စုံတစ်ယောက်၏ စိတ်ဆန္ဒကို အရှိန်အဝါ အကောင်းဆုံး ဖြစ်စေသည်။ အကယ်၍ တစ်စုံတစ်ယောက်က ဓားသွားကဲ့သို့ ထက်မြက်သော စိတ်ဆန္ဒကို လိုချင်ပါက သူတို့သည် ရေတွက်မရနိုင်သော သေခြင်းရှင်ခြင်း တိုက်ပွဲများကို ဖြတ်သန်းရမည် ဖြစ်သည်။

ဤသည်မှာလည်း အစိုးရအဖွဲ့ရှိ အသွင်ပြောင်းနယ်ပယ် သိုင်းသမား အများစုမှာ ပထမအဆင့်မှာသာ ရှိနေရခြင်း၏ အကြောင်းရင်းဖြစ်ပြီး ဒုတိယအဆင့်မှာ ရှိသူများမှာ ပို၍ပင် နည်းပါးလှသည်။ အသက်ဝိညာဉ်အသွင်ကူးပြောင်းမှု နှစ်ကြိမ် ဖြတ်သန်းခဲ့သော သံတမန်များမှာမူ သူတို့ အသွင်ပြောင်းနယ်ပယ် သိုင်းသမားများ ဖြစ်ခဲ့စဉ်က တိုက်ပွဲမြေပြင်သို့ သွားရောက် တိုက်ခိုက်ခဲ့ကြသူများ ဖြစ်သည်။ သို့မဟုတ်ပါက သူတို့အတွက် ဒုတိယအကြိမ် အသက်ဝိညာဉ်အသွင်ကူးပြောင်းမှုကို ဖြတ်သန်းရန်မှာ မဖြစ်နိုင်ပေ။

သို့သော် နတ်ဘုရားနယ်ပယ်သို့ ရောက်ရှိပြီးနောက်တွင်မူ သူတို့သည် တိုက်ပွဲမြေပြင်သို့ မသွားချင်ကြတော့သဖြင့် နောက်တန်းသို့ ဆုတ်ခွာခဲ့ကြသည်။

လင်းဖုန်း၏ စိတ်ဆန္ဒက လုံလောက်အောင် ခိုင်မာပါ၏လော။

လက်တွေ့တွင် လင်းဖုန်း ကိုယ်တိုင်လည်း မသိပေ၊ သို့သော် သူ၏ စိတ်ဆန္ဒမှာ အတော်လေး ခိုင်မာသင့်သည်ဟု သူ ခန့်မှန်းထားသည်။ မည်သို့ပင်ဆိုစေ သူသည် ငယ်စဉ်ကတည်းက နာမကျန်းဖြစ်မှုဒဏ်ကို အလူးအလဲ ခံစားခဲ့ရသူ ဖြစ်သည်။ နောက်ပိုင်းတွင် သူသည် သားရဲများ၏ မျိုးရိုးဗီဇများကို ပေါင်းစပ်ကာ သားရဲမျိုးရိုးဗီဇများ၏ သက်ရောက်မှုကို ခံခဲ့ရသဖြင့် ထိုသက်ရောက်မှုကို အပြီးတိုင် ဖယ်ရှားပစ်ရန် ကြိုးစားခဲ့ရသည်။ ဤအရာအားလုံးမှာ ခိုင်မာသော စိတ်ဆန္ဒ လိုအပ်သည်။

ထို့ကြောင့် လင်းဖုန်း၏ စိတ်ဆန္ဒမှာ အတော်လေး ခိုင်မာသင့်သည်။ ဤသည်မှာလည်း လင်းဖုန်း သူ၏ ကြယ်တာရာစွမ်းအားကို ဖိသိပ်ပြီး အခုချက်ချင်းပင် အဆင့်တက်ရန် ဆုံးဖြတ်ခဲ့ရခြင်း၏ အကြောင်းရင်း ဖြစ်သည်။

လင်းဖုန်းသည် မျိုးရိုးဗီဇကန့်သတ်ချက်ကို ချိုးဖျက်ခဲ့သည်မှာ တစ်လ သို့မဟုတ် နှစ်လသာ ရှိသေးသော်လည်း သူသည် အသွင်ပြောင်းနယ်ပယ် ဒုတိယအဆင့်သို့ ရောက်ရှိရန် ပြင်ဆင်နေပြီ ဖြစ်သည်။ ဤသည်မှာ မကြားဖူးသော ကိစ္စပင်။ သူတော်စင်တစ်ဦးပင်လျှင် ထိုမျှ မြန်ဆန်သော ကျင့်ကြံမှုနှုန်း မရှိနိုင်ပေ။

မည်သို့ပင်ဆိုစေ တစ်လ သို့မဟုတ် နှစ်လသာ ရှိသေးသဖြင့် သူ့ခန္ဓာကိုယ်မှာ အသွင်ပြောင်းလဲမှု မပြီးဆုံးသေးပေ။ သာမန် သိုင်းသမားများသည် သူတို့၏ ကြယ်တာရာစွမ်းအားမျှင်ကို ၉၉ ခုစာ အကန့်အသတ်အထိ စုစည်းနိုင်မည် မဟုတ်ပေ။ ဒါပေမဲ့ လင်းဖုန်းကရော။

လင်းဖုန်း၏ ခန္ဓာကိုယ်က အသွင်ပြောင်းလဲသည်ဖြစ်စေ၊ မပြောင်းလဲသည်ဖြစ်စေ လက်တွေ့တွင် အရေးမကြီးပေ။ အကြောင်းမှာ ကြယ်တာရာစွမ်းအား ဖိသိပ်မှု ကျရှုံးသွားလျှင်ပင် သူ့ခန္ဓာကိုယ်သည် သူ၏ ရုပ်ပိုင်းဆိုင်ရာဖြင့် ကြယ်တာရာစွမ်းအား၏ ရိုက်ခတ်မှုကို သေချာပေါက် ခံနိုင်ရည် ရှိမည် ဖြစ်သည်။ သူ၏ ခန္ဓာကိုယ် အသွင်ပြောင်းလဲမှု အပြည့်အဝပြီးဆုံးသည်အထိ စောင့်နေရန် မလိုပေ။

သူ၏ အကန့်အသတ်နှင့် ပတ်သက်၍မူ လင်းဖုန်းသည် ကြယ်တာရာစွမ်းအား အမျှင်တန်း ၅၂၃ ခုကို စုစည်းထားပြီး ဖြစ်သည်။ သူ့ခန္ဓာကိုယ်ထဲရှိ ကြယ်တာရာစွမ်းအားမှာ အကန့်အသတ်သို့ ရောက်ရှိနေသည်မှာ ကြာပြီ ဖြစ်သည်။ လင်းဖုန်းသည် ကြယ်တာရာစွမ်းအားကို ဖိသိပ်ပြီး အဆင့်တက်ဖို့ ကြိုးစားရန် အသင့်ဖြစ်နေပြီ ဖြစ်သည်။

လင်းဖုန်းသည် မည်သည့်ကဏ္ဍတွင်မဆို လိုအပ်ချက် အားလုံးနှင့် ကိုက်ညီနေပုံရသည်။

သူသည် အဆင့်တက်ရန် အခြေအနေများနှင့် ကိုက်ညီနေပြီဖြစ်သဖြင့် လင်းဖုန်းသည် ထိုသည်ကို တကူးတက နှောင့်နှေးအောင် လုပ်မည် မဟုတ်ပေ။ အကယ်၍ သူ ပိုမို စောစီးစွာ အဆင့်တက်နိုင်ပါက သူ ဝမ်းသာအားရ အဆင့်တက်မည် ဖြစ်သည်။ ကျောက်တုံးမြို့တွင် ဖြစ်ပျက်ခဲ့သောအရာများပြီးနောက် သူ၏ လက်ရှိ ခွန်အားမှာ မပြောပလောက်ကြောင်း သူ နားလည်သွားသည်။ သူသည် အေးအေးဆေးဆေး နေနိုင်မည့် အခြေအနေနှင့် အလွန် ဝေးကွာနေသေးသည်။

"ဒါဆိုရင် ငါ စတော့မယ်"

လင်းဖုန်း အသက်ပြင်းပြင်း ရှူသွင်းလိုက်ပြီး သူ၏ ကြယ်တာရာစွမ်းအားကို ဖိသိပ်ရန် ပြင်ဆင်လိုက်သည်။

လင်းဖုန်းသည် သူ၏ ကြယ်တာရာစွမ်းအားကို အစွမ်းကုန် ဖိသိပ်ရန် ကြိုးစားနေပြီး အသွင်ပြောင်းနယ်ပယ် ဒုတိယအဆင့်သို့ တက်လှမ်းရန် ကြိုးစားနေစဉ်မှာပင် တောင်ပိုင်းတောင်တန်း အခြေစိုက်စခန်းနှင့် တစ်ကမ္ဘာလုံးတွင်ပင် ကြီးမားသော လှုပ်ခတ်မှုကြီး တစ်ခု ဖြစ်ပွားနေသည်။

အကြောင်းရင်းမှာ သူတော်စင် ကိုးပါးနှင့် အဓိက အဖွဲ့အစည်း ငါးခုတို့က ပြုပြင်ပြောင်းလဲရေး သဘောထားတစ်ရပ်ကို ထုတ်ပြန်ခဲ့ခြင်းကြောင့် ဖြစ်သည်။

၎င်းသည် လူမှုအသိုင်းအဝိုင်း၏ ကဏ္ဍအားလုံးတွင် ရှေ့တန်းရှိ သိုင်းသမားများ၏ အဆင့်အတန်းနှင့် အကျိုးခံစားခွင့်များကို မြှင့်တင်ပေးခဲ့သည်။ ရှေ့တန်းရှိ သာလွန်လူသား ကျွမ်းကျင်သူများဖြစ်စေ၊ ကျွမ်းကျင်သိုင်းသမားများဖြစ်စေ သူတို့၏ အဆင့်အတန်းနှင့် အကျိုးခံစားခွင့်များမှာ များစွာ တိုးတက်လာခဲ့သည်။

အကယ်၍ ရှေ့တန်းရှိ သိုင်းသမားများက ပြစ်မှုတစ်ခု ကျူးလွန်ခဲ့ပါက သူတို့ကို အဓိက အဖွဲ့အစည်း ငါးခုမှ ပူးပေါင်း တည်ထောင်ထားသော သိုင်းသမား တရားရုံးတွင်သာ စစ်ဆေးနိုင်သည်။ ဤသည်မှာ အစိုးရအဖွဲ့၏ သိုင်းသမားများအပေါ် စီရင်ပိုင်ခွင့်နှင့် စီမံခန့်ခွဲပိုင်ခွင့် အာဏာများကို လုံးဝ ဖယ်ရှားပစ်လိုက်ခြင်းပင် ဖြစ်သည်။

သိုင်းသမားများအပေါ် ပြစ်မှုကျူးလွန်သူ မည်သူမဆို ပြင်းထန်စွာ အပြစ်ပေးခံရမည် ဖြစ်သည်။ ထို့အပြင် အပြစ်ပေးပိုင်ခွင့် အာဏာကို အဓိက အဖွဲ့အစည်း ငါးခုမှ ဖွဲ့စည်းထားသော သိုင်းသမား တရားရုံးသို့ လွှဲပြောင်းပေးမည် ဖြစ်သည်။

ပို၍ အရေးကြီးသည်မှာ အစိုးရအဖွဲ့ရှိ သာလွန်လူသား ကျွမ်းကျင်သူ အားလုံးသည် မဖြစ်မနေ စစ်မှုထမ်းရမည်ဖြစ်ပြီး ရှေ့တန်းတွင် သားရဲများနှင့် တိုက်ခိုက်ရမည် ဖြစ်သည်။ သူတို့သည် အခြားသော အဖွဲ့အစည်း လေးခုမှ သာလွန်လူသား ကျွမ်းကျင်သူများနှင့် ထူးမခြားနား ဖြစ်သွားသည်။

သာလွန်လူသား ကျွမ်းကျင်သူများသည် မဖြစ်မနေ စစ်မှုထမ်းရမည် ဖြစ်သည်။ အကယ်၍ သူတို့က ငြင်းဆန်ပါက အဓိက အဖွဲ့အစည်း ငါးခုမှ ဖွဲ့စည်းထားသော ဥပဒေစိုးမိုးရေး အဖွဲ့က သူတို့ကို ဖမ်းဆီးပြီး အပြစ်ပေးရန်အတွက် သိုင်းသမား တရားရုံးသို့ လွှဲပြောင်းပေးမည် ဖြစ်သည်။

အစိုးရအဖွဲ့၏ သံတမန် ရာထူးကို အစိုးရထံမှ ရုပ်သိမ်းလိုက်သည်။ အဓိက အဖွဲ့အစည်း ငါးခုသည် အရေးကြီးသော မြို့အားလုံး၏ သံတမန်များအဖြစ် အဓိက အဖွဲ့အစည်း ငါးခုမှ နတ်ဘုရားနယ်ပယ် ကျွမ်းကျင်သူများကို စေလွှတ်ရန် သဘောတူညီခဲ့ကြသည်။ သူတို့သည် အရပ်ဘက် ကိစ္စရပ်များကို တာဝန်ယူတော့မည် မဟုတ်ဘဲ သိုင်းသမားများနှင့် ပတ်သက်သော ကိစ္စရပ်များကိုသာ ကိုင်တွယ်တော့မည် ဖြစ်သည်။

သာမန် ကျွမ်းကျင်သိုင်းသမားများအတွက် ရှေ့တန်းသို့ သွားရန်မှာ မဖြစ်မနေ မဟုတ်ပေ။ သူတို့ကို ရှေ့တန်းသို့ သွားရန်သာ တိုက်တွန်းထားသည်။ ရှေ့တန်းသို့ သွားသော ကျွမ်းကျင်သိုင်းသမား အားလုံးမှာ ရက်ရောသော ထောက်ပံ့ကြေးများကို ရရှိကြသည်။

၎င်းမှာ တုန်လှုပ်စရာပင်။ တစ်ကမ္ဘာလုံး တုန်လှုပ်သွားသည်။ ဤသတင်းမှာ အလွန်တရာ တုန်လှုပ်စရာ ကောင်းလှသည်။

ဤသည်မှာ ဘာကို ဆိုလိုသည်ကို လူတိုင်း သိကြသည်။ ဤသည်မှာ ခေတ်သစ်တစ်ခု အစပြုရောက်ရှိလာပြီ ဖြစ်ကြောင်း၊ သိုင်းသမားများ လွှမ်းမိုးသည့် ခေတ်တစ်ခု ရောက်ရှိလာပြီ ဖြစ်ကြောင်း ဆိုလိုခြင်းပင်။

အဓိက အဖွဲ့အစည်း ငါးခုသည် သိုင်းသမားများ၏ အဆင့်အတန်းကို မြှင့်တင်ပေးခဲ့ပြီး သာမန်လူတန်းစားထက် သာလွန်သော သိုင်းသမား လူတန်းစားတစ်ရပ်ကို လုံးဝ ပုံဖော်လိုက်သည်။ အကယ်၍ ဤစည်းမျဉ်းကို ဆက်လက် ကျင့်သုံးသွားပါက သုံးနှစ်မှ ငါးနှစ်အတွင်း လူမှုအသိုင်းအဝိုင်း တစ်ခုလုံးသည် လုံးဝ ပြောင်းလဲသွားမည် ဖြစ်ပြီး သိုင်းပညာကို အားပေးသော ခေတ်ရေစီးကြောင်း တစ်ခုကို ပုံဖော်ပေးလိမ့်မည် ဖြစ်သည်။

သိုင်းသမားများ ရရှိသည့် အခွင့်ထူး အမျိုးမျိုးနှင့် ပတ်သက်၍မူ အချို့က ထောက်ခံကြပြီး အချို့က ကန့်ကွက်ကြသည်။

ထောက်ခံသူများက လူ့အဖွဲ့အစည်းသည် ငြိမ်းချမ်းနေခဲ့သည်မှာ ကြာပြီဖြစ်ကြောင်း ခံစားကြရသည်။ သာမန်လူများသည် သိုင်းသမားများမှာ အရေးမပါဟုပင် ခံစားခဲ့ကြရသော်လည်း လက်တွေ့တွင် လူသားများသည် ကြီးမားသော အန္တရာယ်နှင့် ရင်ဆိုင်နေရသည်။ တစ်ကမ္ဘာလုံးမှာ သားရဲများမှ ပိုင်ဆိုင်ထားဆဲ ဖြစ်ပြီး လူသားများက လွှမ်းမိုးထားခြင်း မရှိပေ။ သူတို့သည် သိုင်းပညာကို မြှင့်တင်ရမည်ဖြစ်ပြီး သိုင်းသမားများ၏ လူမှုအဆင့်အတန်းကို မြှင့်တင်ပေးရမည် ဖြစ်သည်။

ကန့်ကွက်သူများကမူ လူသားအများစုမှာ သာမန်လူများဖြစ်ပြီး လူတိုင်း တန်းတူညီမျှသည်ဟု ခံစားကြရသည်။ မည်သူကမျှ သာမန်လူများထက် သာလွန်မနေသင့်ပေ။ သူတို့သည် ဤအတွက် အစုလိုက်အပြုံလိုက် ဆန္ဒပြမှုများပင် ပြုလုပ်ခဲ့ကြသည်။

သို့သော် သူတို့ မည်မျှပင် ကန့်ကွက်စေကာမူ သို့မဟုတ် အစုလိုက်အပြုံလိုက် ဆန္ဒပြစေကာမူ ၎င်းမှာ အချည်းနှီးသာ ဖြစ်သည်။ ဤသည်မှာ သူတော်စင် ကိုးပါးနှင့် အဓိက အဖွဲ့အစည်း ငါးခုတို့က သဘောတူညီထားပြီးသား ဖြစ်သည်။ လက်ရှိတွင် လူ့အဖွဲ့အစည်းကို အဓိက အဖွဲ့အစည်း ငါးခုက ကိုယ်တိုင် လွှမ်းမိုးထားခြင်း ဖြစ်သည်။

အဓိက အဖွဲ့အစည်း ငါးခုတွင် သိုင်းသမားများသာ ပါဝင်သည် မဟုတ်ပေ။ ပညာရှင်များ၊ အစိုးရ အဆင့်မြင့် အရာရှိကြီးများ စသည်ဖြင့်လည်း ပါဝင်သည်။ ဒဏ္ဍာရီလာ သူတော်စင် ကိုးပါး၏ ထောက်ခံမှုဖြင့် ဤစည်းမျဉ်းများကို ဥပဒေဖြင့် လျင်မြန်စွာ ပြဋ္ဌာန်းခဲ့ပြီး တရားဝင် စတင် ကျင့်သုံးခဲ့သည်။

ရှေ့တန်းရှိ သိုင်းသမား အားလုံးမှာ ဝမ်းမြောက်ဝမ်းသာ ဖြစ်နေကြပြီး စိတ်လှုပ်ရှားနေကြသည်။ အချို့သော သိုင်းသမားများမှာ မျက်ရည်ပင် ကျနေကြသည်။ သူတို့သည် နောက်ဆုံးတွင် ရှေ့တန်းတွင် အသက်စွန့် တိုက်ခိုက်နေစဉ်မှာပင် လုံးဝ စိတ်အေးလက်အေး ဖြစ်သွားနိုင်ပြီ ဖြစ်သည်။

သူတို့ တိုက်ပွဲတွင် ကျဆုံးသွားလျှင်ပင် သူတို့၏ မိသားစုများ၏ အနာဂတ် လူမှုဘဝအတွက် စိုးရိမ်နေရန် မလိုတော့ပေ။

အစိုးရအဖွဲ့မှ သိုင်းသမားများအတွက်မူ သူတို့၏ မျက်နှာများမှာ ပြာနှမ်းနေသည်။ သံတမန်များပင်လျှင် ဒေါသထွက်နေကြသည်။

ဒါပေမဲ့ ဘာလုပ်လို့ရမှာလဲ။

စည်းမျဉ်းကို လူသိရှင်ကြား ချိုးဖောက်ခဲ့သော သံတမန်တစ်ဦးကို အစိုးရအဖွဲ့ကိုယ်တိုင် စေလွှတ်လိုက်သော ကျွမ်းကျင်သူများကပင် ကွပ်မျက်လိုက်သည်။ ဤဖြစ်ရပ်ပြီးနောက် အစိုးရအဖွဲ့သည်လည်း ဤစည်းမျဉ်းကို ထောက်ခံရန် ဆုံးဖြတ်ထားကြောင်း လူတိုင်း သိသွားကြသည်။

ထို့ကြောင့် မည်သူမျှ လူသိရှင်ကြား ကန့်ကွက်ရန် မဝံ့ရဲကြတော့ပေ။

သို့သော် သိုင်းသမား အသိုင်းအဝိုင်းတွင် အမည်တစ်ခုက တဖြည်းဖြည်း ပျံ့နှံ့လာခဲ့သည်။ ၎င်းမှာ လင်းဖုန်းပင် ဖြစ်သည်။

လင်းဖုန်းက ကျောက်တုံးမြို့တွင် ရုတ်ရုတ်သဲသဲ ဖြစ်အောင် လုပ်ခဲ့ခြင်းကြောင့် သူတော်စင် ကိုးပါး၏ အာရုံစိုက်မှုကို ခံခဲ့ရသည်ဟု ကောလာဟလများ ထွက်ပေါ်နေခဲ့သည်။ နောက်ဆုံးတွင် သူတို့သည် ဤဆုံးဖြတ်ချက်ကို ဆွေးနွေးရန် သူတော်စင်များ ညီလာခံကို ကျင်းပခဲ့ကြသည်။

လင်းဖုန်းကို ခေတ်သစ်တစ်ခုကို စတင်ခဲ့သူအဖြစ် သတ်မှတ်နိုင်သည်။ သူသည် သိုင်းသမား အများအပြား၏ မှတ်မိခြင်းကို ခံခဲ့ရသည်။ အနာဂတ်တွင် လင်းဖုန်း၏ အောင်မြင်မှုများက မည်သို့ပင်ဖြစ်စေ သူ၏အမည်နာမကို မေ့ပျောက်သွားလိမ့်မည် မဟုတ်ပေ။