အခန်း (၆၄၃-၆၄၄)
Vol. 65 Ch. 643-644
အခန်း (၆၄၃) သတ်ဖြတ်ခြင်း၏ အစပြုခြင်း
လုံချန်းသည် သူရှိနေသည့် အကျဉ်းထောင်နားသို့ တဖြည်းဖြည်း နီးကပ်လာနေသော အကြီးအကဲများကို လှည့်ကြည့်လိုက်သည်။ သူတို့အားလုံးမှာ သူ၏ တိုက်ကွက် အကွာအဝေးအတွင်းသို့ သေချာပေါက် ရောက်ရှိနေကြပြီ ဖြစ်သည်။
"အလုပ်စကြရအောင်" လုံချန်းက ပြုံးစစဖြင့် ရေရွတ်လိုက်သည်။
သူ၏ မျက်လုံးများမှာ ကြယ်ရောင်တောက်နေသော အနက်ရောင်အဖြစ် ပြောင်းလဲသွားပြီး တောက်ပလာတော့သည်။ သူ၏ သိုင်းဟင်းလင်းပြင် အတွင်းရှိ ဟင်းလင်းပြင် နိယာမ ပျိုးပင်လေးမှာလည်း စတင်တောက်ပလာပြီး လုံချန်း၏ ပတ်ဝန်းကျင်ရှိ ဟင်းလင်းပြင်ကို စတင်ရိုက်ခတ်လာသည်။
လုံချန်းသည် သူရှိနေသည့် နေရာမှ ရုတ်တရက် ပျောက်ကွယ်သွားသဖြင့် ဘေးတွင်ရပ်နေသော မိန်းကလေးမှာ မှင်တက်သွားရသည်။
မိန်းကလေးက ပတ်ဝန်းကျင်ကို ထိတ်လန့်တကြား လိုက်ကြည့်သော်လည်း အကျဉ်းထောင်အတွင်းတွင် သူမတစ်ယောက်တည်းသာ ကျန်ရစ်တော့သည်။ လုံချန်းမှာ ပျောက်ကွယ်သွားပြီဖြစ်ရာ ဘယ်ကိုသွားမှန်း သူမ မသိနိုင်ပေ။ သူသည် ထွက်ပြေးသည့် အဆောင်ကို အသုံးပြုပြီး ထွက်သွားသည်လော။ ကြောက်ပြီး ထွက်ပြေးသွားသည်လော။ သူမအနေဖြင့် သူမ၏ အကြီးအကဲ ဖန်တီးထားသော ဤစွမ်းရည်အကြောင်းကို ကောင်းကောင်းသိသည်။ ကောင်းကင်ဘုံအဆင့် သို့မဟုတ် ထိုထက်မြင့်သော အဆင့်ရှိသည့် မှော်ဆရာများ ပြုလုပ်ထားသည့် အဆောင်မျိုး မဟုတ်လျှင် ဤအကျဉ်းထောင်မှ ဖောက်ထွက်ရန်မှာ မဖြစ်နိုင်ပေ။
လုံချန်းတွင် ထိုမျှအထိ အစွမ်းထက်သည့် ပစ္စည်းများ ရှိနေသလားဟု သူမ တွေးတောနေစဉ်မှာပင် ညည်းတွားသံတစ်သံကို ကြားလိုက်ရသည်။
သူမသည် ဘယ်ဘက်ရှိ ကောင်းကင်ဘုံအဆင့် ၃ ကျင့်ကြံသူ ရှိရာဘက်သို့ လှည့်ကြည့်လိုက်သည်။
ထိုကျင့်ကြံသူမှာ မလှုပ်မယှက် ရပ်နေပြီး မျက်လုံးများမှာ ပြူးကျယ်လျက် ပါးစပ်မှာလည်း အနည်းငယ် ဟနေသည်။ သူ၏ မျက်နှာတွင် နာကျင်နေသည့် အရိပ်အယောင်များ ထင်ဟပ်နေ၏။
သူ၏ နှုတ်ခမ်းအောက် နည်းနည်းအကွာတွင်ရှိသော လည်ပင်းမှာ ပုံမှန်မဟုတ်တော့ပေ။ သွေးများ စီးကျနေသည်။ သူ၏ လည်ပင်းကို ဖောက်ထွက်နေသည်မှာ သွေးများဖြင့် ရဲရဲနီနေသော အနီရောင်ဓားတစ်လက်ပင် ဖြစ်သည်။
ကျင့်ကြံသူ၏ နှုတ်ခမ်းများကြားမှလည်း သွေးများ စတင်စီးကျလာတော့သည်။
သူမသည် ထိုလူ၏ နောက်တွင် ရပ်နေသော ဆံပင်နက်နှင့် ကောင်လေးကို မြင်လိုက်ရသည်။ ကောင်လေး၏ ဆံပင်ရှည်များမှာ လေတိုးသဖြင့် ဝဲပျံနေသည်။ ကောင်လေးသည် လူတစ်ယောက်ကို သတ်လိုက်သော်လည်း တုန်လှုပ်ခြောက်ခြားခြင်း မရှိပေ။ သူ၏ မျက်နှာတွင် တုံ့ဆိုင်းမှု မရှိသည့်အပြင် ပျော်ရွှင်မှုနှင့် စိတ်လှုပ်ရှားမှုလေးပင် ရှိနေသလို ခံစားရသည်။
မိန်းကလေးသည် လုံချန်းကို ကြည့်ပြီး အံ့အားသင့်သွားရသည်။
သူမ နားမလည်နိုင်တော့ပေ။ သူသည် အလွန်အစွမ်းထက်သလို အကျဉ်းထောင်မှ လွတ်မြောက်နိုင်သည့် နည်းလမ်းလည်း ရှိနေသည်။ သို့သော် သူသည် ထွက်မပြေးဘဲ ရန်သူကို ထိပ်တိုက်ရင်ဆိုင်ခဲ့သည်။ ထို့ထက် ပိုသည်မှာ ထိုမျှ အစွမ်းထက်ပါလျက် သူမကိုတော့ မသတ်ခဲ့ပေ။ လုံချန်းသည် သူမ၏ မျိုးနွယ်စုမှ အကြီးအကဲတစ်ဦးကို သတ်လိုက်သော်လည်း သူမသည် သူ့ကို မမုန်းနိုင်ဘဲ ရှိနေသည်။ လုံချန်း၏ ရဲရင့်သော ပုံရိပ်ကြောင့် သူမ၏ နှလုံးသားမှာ ပို၍ပင် ခုန်မြန်လာရသည်။
'ငါ ဘာတွေ ဖြစ်နေတာလဲ။ ဘာတွေ တွေးနေတာလဲ။ သူက လူတွေရဲ့ ရန်သူပဲလေ။ ငါက သူ့ကို ဘယ်လိုဖြစ်ပြီး ကြိုက်နိုင်မှာလဲ။ ဒါပေမဲ့... သူက လူဆိုးတော့ မဟုတ်ပါဘူး။ သူက ဘယ်သူ့ကိုမှ အကြောင်းမဲ့ မသတ်ခဲ့ဘူး။ သူက ဒီအတိုင်း ထွက်သွားချင်တာကို တခြားသူတွေက သူ့ကို သတ်ဖို့ ကြိုးစားခဲ့တာပဲ။ ဒါက သူ့အမှားလား။ သူက ကိုယ့်ကိုယ်ကိုယ် ကာကွယ်နေတာပဲလေ။ ငါသာ သူ့နေရာမှာဆိုရင်လည်း ဒီလိုပဲ လုပ်မှာပဲ။ သူ မမှားဘူး၊ သူ လုပ်တာ မှန်တယ်။ သူက အမွေဆက်ခံသူ ဖြစ်နေရင်လည်း ဘာဖြစ်လဲ။ ဒါက ဓားတစ်လက်ပဲလေ။ အဲဒီဓားကြောင့် သူက ရှန်းဝူလို မကောင်းဆိုးဝါး ဖြစ်သွားမှာ မဟုတ်ပါဘူး။ တကယ်လို့ သူက မကောင်းဆိုးဝါးဆိုရင် ငါ့ကိုလည်း သတ်မှာပေါ့။ သူက လူသတ်သမား မဟုတ်ပါဘူး။ တခြားလူတွေကသာ သူ့အပေါ် မှားနေကြတာ။ အကြောင်းမဲ့ သူ့ကို တိုက်ခိုက်နေကြတာ' နက်ပြာရောင်ဆံပင်နှင့် မိန်းကလေးက တွေးရင်း လုံချန်းအတွက် စိုးရိမ်ကာ မျက်ရည်များပင် ဝဲလာတော့သည်။
သူမသည် မိမိ၏ မျိုးနွယ်စုထက် လုံချန်းကို ဘာကြောင့် ပိုစိုးရိမ်နေရသနည်းဆိုသည်ကို သူမကိုယ်တိုင်ပင် မသိပေ။ ဖြစ်နိုင်သည်မှာ သူမ၏ မျိုးနွယ်စုက သူမ၏ အသက်ကို တကယ်တမ်း ဂရုမစိုက်ခဲ့ကြ၍ ဖြစ်ပေလိမ့်မည်။ ယခု အသတ်ခံလိုက်ရသည့် အကြီးအကဲများမှာလည်း သူမကို သတ်ရန် ဝန်လေးကြမည့်သူများ မဟုတ်ပေ။ သူတို့က သူမကို ကယ်ရန် လာကြခြင်း မဟုတ်ဘဲ သူတို့၏ ဂုဏ်သိက္ခာကို ကာကွယ်ရန်သာ လာကြခြင်း ဖြစ်သည်။ အခြားတစ်ဖက်တွင်မူ လူသတ်သမားဟု သတ်မှတ်ခံထားရသော လုံချန်းကသာ သူမကို ကယ်တင်ခဲ့သူ ဖြစ်သည်။ သူမသည် တွေးလေလေ လုံချန်းအပေါ် ပို၍ စွဲလမ်းလေလေ ဖြစ်နေတော့သည်။
လုံချန်း၏ ဘုရင်ဓားမှာ ကျင့်ကြံသူ၏ လည်ပင်းတွင် စိုက်ဝင်နေသည်မှာ တစ်စက္ကန့်ပင် မပြည့်သေးပေ။
လုံချန်းသည် လက်ကို လှုပ်ရှားလိုက်ပြီး လည်ပင်းတွင် စိုက်နေသော ဓားဖြင့် ဝှေ့ယမ်းခုတ်လိုက်ရာ ကျင့်ကြံသူ၏ လည်ပင်းတစ်ဝက် ပြတ်သွားတော့သည်။ သူ ထိုနေရာတွင် မရပ်တန့်ဘဲ နောက်တစ်ကြိမ် ထပ်မံခုတ်လိုက်ရာ လည်ပင်းတစ်ခုလုံး ပြတ်ထွက်သွားပြီး ကောင်းကင်ဘုံအဆင့် ကျင့်ကြံသူ၏ ဦးခေါင်းမှာ မြေပြင်ပေါ်သို့ ပြုတ်ကျသွားတော့သည်။
လုံချန်းသည် ထိုလူ ပြန်လည် အသက်မရှင်နိုင်စေရန် ဦးခေါင်းကို ဖြတ်ပစ်လိုက်ခြင်း ဖြစ်သည်။ အသက်ပေးဆေးလုံးသည် ခေါင်းမပြတ်သေးသရွေ့နှင့် သေဆုံးသွားသည်မှာ တစ်မိနစ်မကျော်သေးလျှင် မည်သူ့ကိုမဆို ပြန်လည် အသက်ရှင်စေနိုင်သည်။ ဤအဆင့် ၃ ကျင့်ကြံသူမှာ ဤနေရာတွင် အင်အားအကြီးဆုံး ဖြစ်သဖြင့် သူ ပြန်လည် အသက်မရှင်စေလိုပေ။ လုံချန်းသည် ထိုလူကို ယခုကဲ့သို့ လျင်မြန်စွာ သတ်နိုင်ခဲ့ခြင်းမှာ ထိုလူက လုံချန်းကို အထင်သေးပြီး လုံချန်းအနေဖြင့် အကျဉ်းထောင်မှ မလွတ်မြောက်နိုင်ဟု ယူဆထားသောကြောင့် ဖြစ်သည်။
အကယ်၍ ထိုလူက အထင်မသေးဘဲ သတိရှိနေခဲ့လျှင် ရလဒ်မှာ ပြောင်းလဲသွားနိုင်ပြီး လုံချန်း၏ တိုက်ခိုက်မှုမှ ရှောင်တိမ်းနိုင်ပေလိမ့်မည်။
လုံချန်းသည် မိမိကိုယ်ကို ကံကောင်းသည်ဟု မှတ်ယူထားပြီး ထိုကံကောင်းမှုကို အသုံးချကာ ရန်သူအား အခွင့်အရေး မပေးတော့ပေ။ ရန်သူ ပြန်လည် နိုးထလာလျှင် သူ့အတွက် အခက်တွေ့နိုင်သဖြင့် သူသည် မည်သည့် စွန့်စားမှုကိုမျှ မပြုလုပ်လိုခြင်း ဖြစ်သည်။
အခြား အကြီးအကဲများ သတိမပြုမိခင်မှာပင် ထိုလူ၏ ဦးခေါင်းမှာ မြေပြင်ပေါ်သို့ ရောက်ရှိသွားပြီ ဖြစ်သည်။
သူတို့ မလှုပ်ရှားရသေးခင်မှာပင် နောက်ဘက်မှ အော်ဟစ်သံများကို ကြားလိုက်ရပြန်သည်။
နောက်ဘက်က လူများ အဘယ်ကြောင့် အော်နေကြကြောင်း သူတို့ နားမလည်နိုင်ပေ။ လုံချန်းက သူတို့ရှေ့တွက် ရှိနေသည် မဟုတ်လော။ သို့ဆိုလျှင် နောက်ဘက်က လူများကို မည်သူက ဒုက္ခပေးနေသနည်း။
သူတို့ နောက်လှည့်ကြည့်ချင်သော်လည်း လုံချန်းမှာ သူတို့အတွက် တကယ့် ခြိမ်းခြောက်မှု ဖြစ်နေသဖြင့် မကြည့်ရဲကြပေ။ သူတို့သည် ဝိညာဉ်အာရုံကို အသုံးပြုကာ အဖြေ ရှာဖွေရင်း လုံချန်းအား တိုက်ခိုက်ရန် ရှေ့သို့ တိုးလာကြသည်။
သူတို့နှစ်ဦးလုံးသည် လုံချန်းကို အရင်သတ်ရန် ဆုံးဖြတ်လိုက်ကြပြီး ဝိညာဉ်အာရုံကို အသုံးပြုကာ နောက်ဘက်တွင် မည်သူက လူသတ်နေသနည်းဆိုသည်အား ကြည့်လိုက်ကြသည်။
သူတို့နှစ်ဦးလုံးက လုံချန်းရှိရာသို့ ဓားဖြင့် အစွမ်းကုန် ခုတ်လိုက်ကြသည်။ သူတို့၏ အရှိန်မှာ အလွန်မြန်သဖြင့် သာမန်မျက်စိဖြင့် ကြည့်လျှင် နေရာရွှေ့ပြောင်းခြင်း လုပ်လိုက်သကဲ့သို့ ထင်ရသော်လည်း အစစ်အမှန် နေရာရွှေ့ပြောင်းခြင်း ရှေ့တွင်မူ နှေးကွေးနေဆဲ ဖြစ်သည်။
လုံချန်းသည် နေရာရွှေ့ပြောင်းခြင်းကို အသုံးပြုကာ အလွယ်တကူ ပျောက်ကွယ်သွားပြီး အခြား အကြီးအကဲတစ်ဦး၏ နောက်တွင် ပေါ်လာကာ လည်ပင်းကို ခုတ်လိုက်သည်။ သို့သော် ထိုအကြီးအကဲမှာ သတိရှိနေသဖြင့် ဓားကို နောက်သို့ လွှဲကာ လုံချန်း၏ တိုက်ကွက်အား ခုခံလိုက်နိုင်သည်။
လုံချန်းတွင် ဟင်းလင်းပြင်ကို အသုံးချနိုင်သည့် ရှားပါးစွမ်းရည်ရှိမှန်း သူတို့ သိသွားကြသဖြင့် အလွန် သတိထားနေကြပြီ ဖြစ်သည်။
ထို့အပြင် မိန်းကလေးတစ်ဦးက သူတို့၏ ကောင်းကင်အဆင့် နောက်လိုက်များကို တိုက်ခိုက်နေသည်အား မြင်သောအခါ အကြီးအကဲများမှာ အံ့အားသင့်သွားကြသည်။
ထိုမိန်းကလေးမှာ အလွန် လျင်မြန်ဖြတ်လတ်လှသည်။ သူမ၏ တိုက်စစ်မှာ သွက်လက်ပြီး ကာကွယ်ရေးမှာလည်း အပြစ်ပြောစရာ မရှိပေ။ သူမ၏ တိုက်စစ်မှာ ကောင်းကင်အဆင့် ကျင့်ကြံသူများကို သတ်ရန် မလုံလောက်သော်လည်း သူမ၏ ကာကွယ်ရေးမှာမူ ကောင်းကင်အဆင့် အထွက်အထိပ် ကျင့်ကြံသူများထက်ပင် ပိုမို အစွမ်းထက်နေပုံ ရသည်။
တကယ့် ပြဿနာမှာ ခိုးကြောင်ခိုးဝှက် တိုက်ခိုက်နေသည့် ဝိညာဉ်ဓားပင် ဖြစ်သည်။ ၎င်းသည် နေရာအနှံ့ ပျံဝဲနေပြီး မိန်းကလေးက ကျင့်ကြံသူများကို အချိန်ဆွဲပေးထားစဉ် ကောင်းကင်အဆင့် ကျင့်ကြံသူများအား လိုက်လံ သတ်ဖြတ်နေသည်။
သူတို့ မသိသည်မှာ ထိုမိန်းကလေးမှာ လုံချန်းက သွေးမျိုးဆက်ကျောင်းတော်မှ ရရှိခဲ့သော ရုပ်သေးရုပ် ဖြစ်နေခြင်းပင်။
သူမ၏ ကာကွယ်ရေးမှာ အစွမ်းထက်သော်လည်း တိုက်စစ်မှာတော့ အားနည်းသည်။
ကောင်းကင်ဘုံအဆင့် ကျင့်ကြံသူ နှစ်ဦး၏ ခေါင်းထဲတွင် နောက်ထပ် ဇဝေဇဝါ ဖြစ်စရာတစ်ခု ရှိနေသေးသည်။ ထိုဓားမှာ လုံချန်း၏ ဓားဖြစ်မှန်း သူတို့ သိသည်။ လုံချန်းက သူတို့နှင့် တိုက်ခိုက်နေစဉ်မှာပင် ဓားက တခြားလူများကို လိုက်သတ်နေနိုင်ခြင်းမှာ မည်သို့ ဖြစ်နိုင်မည်နည်း။ သူသည် စိတ်အာရုံကို မည်သို့ ခွဲဝေ အသုံးပြုနေသနည်း။ တိုက်ပွဲကို အာရုံစိုက်နေစဉ်မှာပင် ဓားကို မည်သို့ ထိန်းချုပ်နေသနည်း။
'ဒါ... ဒါက တကယ့် ဝိညာဉ်ပါတဲ့ ရှားပါး ဝိညာဉ်ဓားလား' ကျင့်ကြံသူတစ်ဦးက လောဘဇောဖြင့် ရေရွတ်လိုက်သည်။
"အဲဒီလိုပဲ ဖြစ်ရမယ်။ သူ့ကို အရှင်ဖမ်းလို့ မရဘူး။ သူ့ကို သတ်ပြီး အဲဒီဓားကိုပဲ ယူကြစို့။ သူက အန္တရာယ်များလွန်းတယ်။ အရှင်ဖမ်းဖို့ဆိုတာ မဖြစ်နိုင်ဘူး" အခြား ကျင့်ကြံသူက မျက်မှောင်ကြုတ်ကာ ဆိုသည်။
တတိယအဆင့် ကျင့်ကြံသူ၏ အစီအစဉ်မှာ မှားယွင်းနေပြီး ဤလူကို အရှင်ဖမ်းရန် မဖြစ်နိုင်ကြောင်း သူတို့ သဘောပေါက်သွားကြသည်။
ထို့အပြင် သူတို့၏ အင်အားများမှာလည်း တစ်စုံတစ်ခုကြောင့် ကန့်သတ်ခံထားရသလို ခံစားနေရသည်။ သူတို့၏ အစွမ်းအစ အပြည့်အဝကို အသုံးမပြုနိုင်အောင် တစ်စုံတစ်ခုက ပိတ်ဆို့ထားသလိုမျိုး ဖြစ်နေခြင်း ဖြစ်သည်။
လုံချန်းက သူတို့ကို ထပ်မံ တိုက်ခိုက်ရန် ပြင်လိုက်သော်လည်း ထိုအချိန်တွင် ကျင့်ကြံသူတစ်ဦးထံမှ လေပြင်းများ ထွက်ပေါ်လာပြီး လုံချန်းကို နောက်သို့ လွင့်စဉ်သွားစေသည်။
လုံချန်းမှာ ကျောက်ခဲတစ်လုံးလို လွင့်ထွက်သွားပြီး အနီးအနားရှိ အိမ်တစ်လုံးပေါ်သို့ ပြုတ်ကျသွားတော့သည်။
အခန်း (၆၄၄) ကိုယ်ထည်ကို ပြန်လည်သွန်းလုပ်ခြင်း
လုံချန်းသည် အိမ်ထဲသို့ လွင့်စဉ်ဝင်သွားပြီး အသက်လတ်ပိုင်း အမျိုးသမီးတစ်ဦး အိပ်နေသည့် ခုတင်ပေါ်သို့ တည့်တည့်ပိကျသွားသည်။
ထိုအမျိုးသမီးမှာ နိုးနိုးချင်းမှာပင် သူမ၏အိမ်ထဲသို့ သူစိမ်းတစ်ယောက် ပျံဝင်လာပြီး သူမအပေါ် ပိကျလာသည်ကို မြင်လိုက်ရသဖြင့် ကြောက်လန့်တကြား အော်ဟစ်တော့သည်။
လုံချန်းက သူမကို ကြောင်စီစီဖြင့် ကြည့်လိုက်မိသည်။ သူသည် ဘာမှမပြောဘဲ ချက်ချင်းပင် မတ်တတ်ထရပ်လိုက်ပြီး ထိုနေရာတွင် ဘယ်တုန်းကမှ မရှိခဲ့သလိုမျိုး အပြင်ဘက်သို့ နေရာပြောင်းကာ ထွက်ခွာသွားတော့သည်။
အမျိုးသမီးမှာ လုံချန်း ရုတ်တရက် ပျောက်ကွယ်သွားသည်ကို မြင်လိုက်ရသောအခါ ပို၍ပင် ကြောက်လန့်သွားပြီး အော်ဟစ်ရင်း သတိလစ်မေ့မြောသွားရှာသည်။
လုံချန်း အပြင်ဘက်သို့ အလျင်အမြန် ထွက်လာချိန်တွင် မီးလုံးကြီးတစ်လုံးမှာ ထိုအိမ်ပေါ်သို့ ကျရောက်လာပြီး ပေါက်ကွဲမှု ဖြစ်ပေါ်သွားသည်။ အိမ်မှာ ပြာကျသွားပြီး အထဲက အမျိုးသမီးမှာလည်း ဘာဖြစ်သွားမှန်းပင် မသိလိုက်ဘဲ ချက်ချင်း သေဆုံးသွားခဲ့ရသည်။
လုံချန်းက ပျက်စီးသွားသော အိမ်ကို ကြည့်ပြီး မျက်မှောင်ကြုတ်လိုက်သည်။ ထိုအမျိုးသမီး သေဆုံးသွားသည်ကို သူ ရိပ်မိလိုက်သည်။ သူသာ အချိန်မီ ထွက်မလာခဲ့လျှင် သူပါ ဒဏ်ရာရသွားနိုင်သည်။ သူသည် အပြစ်မဲ့သူတစ်ဦး သေဆုံးသွားရခြင်းအတွက် စိတ်မကောင်းဖြစ်နေခြင်း မဟုတ်ဘဲ သူတို့၏ တိုက်ခိုက်မှုက သူ့ကိုပါ ထိခိုက်လုနီးပါး ဖြစ်သွားခြင်းကိုသာ စိတ်အနှောင့်အယှက် ဖြစ်နေခြင်း ဖြစ်သည်။
သူက ဘယ်ဘက်သို့ လှည့်ကြည့်လိုက်ရာ အကြီးအကဲ နှစ်ဦးက သူ့ကို စိုက်ကြည့်နေသည်အား မြင်လိုက်ရသည်။
"သူတို့ထဲက တစ်ယောက်က လေနိယာမကို တတ်ထားတာပဲ။ သူ့ရဲ့ ကျွမ်းကျင်မှုကလည်း မဆိုးဘူး" လုံချန်းက သူ့ကို လေပြင်းဖြင့် တိုက်ခိုက်ခဲ့သည့် အကြီးအကဲကို ကြည့်ကာ ရေရွတ်လိုက်သည်။
"အဲဒီလူယုတ်မာ။ သူ နောက်တစ်ခါ လွတ်သွားပြန်ပြီ" ထိုအကြီးအကဲမှာ လုံချန်းကို အဝေးတွင် မြင်လိုက်ရသောအခါ ဒေါသချောင်းချောင်း ထွက်သွားသည်။ သူ၏ တိုက်ကွက်က လုံချန်းကို ပြင်းပြင်းထန်ထန် ဒဏ်ရာရစေမည်ဟု သူ အခိုင်အမာ ယုံကြည်ထားခဲ့ခြင်း ဖြစ်သည်။
သူက လက်ကို ထပ်မံ ဝှေ့ယမ်းလိုက်ရာ မျက်စိဖြင့် မမြင်နိုင်သော လေဓားသွားနှစ်စင်းမှာ လုံချန်းရှိရာသို့ တဟုန်ထိုး ပြေးဝင်သွားတော့သည်။
လေဓားသွားများ လုံချန်းနားသို့ နီးကပ်လာချိန်တွင် လုံချန်းက မလှုပ်မယှက် ရပ်နေသဖြင့် အကြီးအကဲများက သူ သေရတော့မည်ဟု ထင်မှတ်နေကြသည်။ လုံချန်းက ရှောင်ရန်ပင် မကြိုးစားသည်ကို သူတို့ မြင်နေရသည်။
'ဒီအရူးကောင်၊ သူ့မှာ ဘယ်လို လှည့်ကွက်တွေပဲ ရှိရှိ၊ သူ့ဆီလာနေတဲ့ တိုက်ကွက်ကိုတောင် မမြင်နိုင်ဘူးဆိုရင်တော့ ဘာမှလုပ်လို့ ရမှာမဟုတ်ဘူး' ထိုအကြီးအကဲက ပြုံးရင်း တွေးလိုက်သည်။
အခြား အကြီးအကဲများမှာလည်း ထိုအချက်ကို ရိပ်မိပြီး လုံချန်းအား စကားဖြင့် လှည့်ဖြားကာ တိုက်ခိုက်မှုလာနေသည်ကို မသိအောင် အာရုံလွှဲရန် ကြိုးစားတော့သည်။
"မင်းက ကလေးပဲ ရှိသေးတယ်။ အခု လက်နက်ချမယ်ဆိုရင် မင်း အသက်ချမ်းသာရာ ရလိမ့်မယ်။ သေချာ စဉ်းစားစမ်း" ဒုတိယ အကြီးအကဲက ပြုံးစစမျက်နှာကို ဖုံးကွယ်ရင်း လုံချန်းအား ပြောလိုက်သည်။
သူတို့က လုံချန်း သေရတော့မည်ဟု ယုံကြည်နေကြသော်လည်း သူတို့၏ မျှော်လင့်ချက်များမှာ ပြောင်းပြန် ဖြစ်သွားခဲ့ရသည်။ လုံချန်းမှာ ဘာမှမဖြစ်ဘဲ အကောင်းတိုင်း ရှိနေသည်။
လေဓားသွားများမှာ လုံချန်း၏ ခန္ဓာကိုယ်ကို ဖောက်ထွက်သွားသော်လည်း သူ့ကို နည်းနည်းလေးမှ ဒဏ်ရာမရစေခဲ့ပေ။ လုံချန်းမှာ ထိတွေ့၍မရသော တစ္ဆေတစ်ကောင်ကဲ့သို့ ဖြစ်နေသည်။ သူတို့ မသိသည်မှာ လုံချန်းက အတိုက်ခံရခြင်း မဟုတ်ဘဲ လေဓားသွား သူ့ဆီ ရောက်ခါနီးတွင် သူ့ရှေ့က ဟင်းလင်းပြင်မှာ အနည်းငယ် ကွဲအက်သွားပြီး လေဓားသွားကို ဝါးမြိုလိုက်ခြင်း ဖြစ်သည်။
ထိုလေဓားသွားမှာ လုံချန်း၏ နောက်ဘက်က ဒုတိယ ဟင်းလင်းပြင် အက်ကြောင်းမှ ပြန်ထွက်သွားခြင်း ဖြစ်သည်။ ထိုအရာမှာ အလွန် လျင်မြန်လှသဖြင့် သူတို့အနေဖြင့် ဟင်းလင်းပြင် အက်ကြောင်းကိုပင် မြင်လိုက်ရခြင်း မရှိပေ။ လုံချန်းက အကြီးအကဲများ၏ ယုံကြည်မှုကို ရိုက်ချိုးရန်နှင့် သူတို့ အံ့သြနေချိန်အား အသုံးချကာ ပြန်လည် တိုက်ခိုက်ရန် ဤသို့ လုပ်ဆောင်ခြင်း ဖြစ်သည်။
'ငါက သူတို့ရဲ့ လေနိယာမကို သိနေပါလျက်နဲ့ ဘာမှမလုပ်ဘဲ နေလိမ့်မယ်လို့ သူတို့ တကယ် ထင်နေတာလား။ သူတို့က လေဆိုရင် ငါက ဟင်းလင်းပြင်ပဲ။ သူတို့က မြေကြီးဆိုရင် ငါက စကြဝဠာပဲ။ သူတို့က မကောင်းဆိုးဝါးတွေဆိုရင် ငါက အဲဒီ မကောင်းဆိုးဝါးတွေကိုပါ ဝါးမြိုပစ်မယ့် အမှောင်ထုပဲ' လုံချန်းက တွေးလိုက်သည်။
သူ့ကို တိုက်ခိုက်ခဲ့သည့် အကြီးအကဲ မှင်တက်နေစဉ်မှာပင် ဝိညာဉ်ဓားမှာ ကောင်းကင်အဆင့် ကျင့်ကြံသူများနှင့် တိုက်ခိုက်နေရာမှ ခိုးကြောင်ခိုးဝှက် ဆုတ်ခွာလာပြီး ကောင်းကင်ဘုံအဆင့် အကြီးအကဲဆီသို့ ပျံသန်းသွားသည်ကို သူ မသိလိုက်ပေ။
"အကြီးအကဲ ဆန်း။ သတိထား" ကောင်းကင်အဆင့် ကျင့်ကြံသူများက ဝိညာဉ်ဓားမှာ အကြီးအကဲဆီသို့ ပျံသွားသည်အား မြင်သောအခါ လှမ်းသတိပေးလိုက်ကြသည်။
အကြီးအကဲ ဆန်းမှာ လေနိယာမကို တတ်မြောက်ထားသူ ဖြစ်သည်။ သူ၏ လေတိုက်ကွက်က လုံချန်းကို အဘယ်ကြောင့် မထိမှန်ရသနည်း ဆိုသည်အား သူ ဇဝေဇဝါ ဖြစ်နေခြင်း ဖြစ်သည်။ သူ၏ လေနိယာမ ပါဝင်သော တိုက်ကွက်များမှာ ရှောင်တိမ်းရန် မဖြစ်နိုင်သလို ဘယ်တော့မှလည်း မလွဲချော်ခဲ့ဖူးပေ။ သူ အံ့သြနေစဉ်မှာပင် သတိပေးသံများကို ကြားလိုက်ရသည်။
သူ နောက်လှည့်ကြည့်လိုက်စဉ်မှာပင် ဓားတစ်လက်က သူ၏ မျက်စိရှေ့သို့ ရောက်လာပြီး နဖူးတည့်တည့်ကို ဖောက်ထွက်သွားတော့သည်။
အကြီးအကဲ၏ နဖူးမှာ အပေါက်ကြီး ဖြစ်သွားပြီး သူသည် ဒူးထောက်လျက် လဲကျသွားကာ မျက်လုံးများမှာလည်း အသက်ကင်းမဲ့သွားတော့သည်။ ထိုအချိန်မှာပင် ဝိညာဉ်ဓားမှာ နောက်တစ်ကြိမ် ဝဲပျံလာပြီး သူ၏ ဦးခေါင်းကို ကိုယ်ထည်မှ ဖြတ်ပစ်လိုက်ပြန်သည်။ သူ၏ ဦးခေါင်းနှင့် ကိုယ်ထည်မှာ မြေပြင်ပေါ်သို့ သီးခြားစီ ပြုတ်ကျသွားတော့သည်။
ကောင်းကင်ဘုံအဆင့် အကြီးအကဲ တစ်ဦးသာ ကျန်တော့ရာ လုံချန်းက သူ၏ အဖော်အား သတ်လိုက်သည်ကို မြင်သောအခါ ထိုသူမှာ အနောက်သို့ ချက်ချင်း ခုန်ဆုတ်လိုက်သည်။ သို့သော် လုံချန်းသည် သူ၏ ဘုရင်ဓားကို ကိုင်လျက် ထိုလူ၏ နောက်တွင် ပေါ်လာသည်။ ထိုလူမှာ မြေပြင်ပေါ်သို့ ပြန်ဆင်းသက်ရန် အရှိန်ယူနေစဉ်မှာပင် လုံချန်း၏ ဓားမှာ သူ၏ ကျောဘက်သို့ တည့်တည့် စိုက်ဝင်သွားတော့သည်။
ဘုရင်၏ဓားမှာ ထိုလူ၏ ကျောမှ ဖောက်ဝင်ကာ ရင်ဘတ်မှ ပြန်ထွက်သွားသည်။
ထိုလူမှာ ဓားတွင် သီလျက်သား ဖြစ်နေပြီး သွေးများကို အန်ထုတ်နေတော့သည်။ သူသည် သူ၏ အသက်စွမ်းအားများ ကုန်ဆုံးနေသည်ကို ခံစားနေရသော်လည်း အရှုံးမပေးသေးပေ။
"ငါ... ငါ သေရရင်တောင် မင်းကိုပါ တစ်ခါတည်း ခေါ်သွားမယ်" ထိုလူက အားနည်းစွာ ပြောလိုက်ပြီး သူ၏ အမြူတေမှာ တောက်ပလာတော့သည်။ သူ၏ မျက်လုံးများမှာလည်း အဆိပ်ပြင်းသော အစိမ်းရောင်အဖြစ် ပြောင်းလဲသွားသည်။
"လုံချန်း၊ အခုချက်ချင်း အဲဒီကနေ ထွက်သွားတော့။ သူ့နားမှာ မနေနဲ့၊ အနည်းဆုံး မီတာ ၅၀ လောက် ဝေးဝေးကို သွားလိုက်တော့" ရွှင်းက အရေးတကြီး လှမ်းအော်လိုက်သည်။
လုံချန်းသည် သူမ၏ အသံထဲက စိုးရိမ်မှုကို ကြားလိုက်ရသည်။ သူသည် နောက်ဆုံး ကျန်နေသော ကျင့်ကြံသူ၏ ခေါင်းကို ဖြတ်ရန် ပြင်နေသော်လည်း ရွှင်း၏ စကားကြောင့် ထိုအကြံကို လက်လွှတ်လိုက်သည်။ တစ်ခုခု မှားနေကြောင်း သူ သိလိုက်သည်။
သူသည် မိမိကိုယ်ကို ကာကွယ်ရန် ခန္ဓာကိုယ်ကို ဟင်းလင်းပြင် အလွှာတစ်ခုဖြင့် ဖုံးအုပ်လိုက်ပြီးနောက် နေရာပြောင်းခြင်းကို အသုံးပြုကာ ထိုကျင့်ကြံသူနှင့် အဝေးဆုံးသို့ ထွက်ခွာလိုက်သည်။
သို့သော် ဝိညာဉ်ဓားမှာမူ လုံချန်းကဲ့သို့ မမြန်လှသဖြင့် ထိုကျင့်ကြံသူ၏ အနီးအနားမှ မလွတ်မြောက်နိုင်ခဲ့ပေ။
လုံချန်းမှာ မီတာ နှစ်ရာခန့် အကွာတွင် ပေါ်လာပြီးနောက် လှမ်းကြည့်လိုက်ရာ ထိုကျင့်ကြံသူ၏ ခန္ဓာကိုယ်မှာ ပေါက်ကွဲသွားသည်ကို မြင်လိုက်ရသည်။ ခန္ဓာကိုယ်ထဲမှ အနက်ရောင် သန်းနေသော အစိမ်းရောင် ဓာတ်ငွေ့များ ထွက်ပေါ်လာပြီး မီတာ ၅၀ ပတ်လည်ကို ဖုံးလွှမ်းသွားတော့သည်။
လုံချန်းမှာ ထိုအကွာအဝေးမှ လွတ်မြောက်ခဲ့သော်လည်း ဝိညာဉ်ဓားမှာမူ မလွတ်ခဲ့ပေ။
ဝိညာဉ်ဓား၏ လက်ကိုင်နေရာမှာ ထိုအစိမ်းရောင် ဓာတ်ငွေ့များနှင့် ထိတွေ့သွားခဲ့သည်။
ခဏအကြာတွင် ထိုဓာတ်ငွေ့တိမ်တိုက်မှာ ပျောက်ကွယ်သွားသည်။ ဓာတ်ငွေ့အတွင်းရှိ အရာအားလုံး ပျောက်ကွယ်သွားပြီး အလောင်းများ ရှိခဲ့သည့် နေရာတွင်မူ ရုပ်ဆိုးလှသော အညိုရောင်နှင့် အနီရောင် အရည်များသာ ကျန်ရစ်တော့သည်။
လုံချန်းသည် သူ၏ ဝိညာဉ်ဓား၏ လက်ကိုင်မှာ အရည်ပျော်သွားသည်ကို မြင်လိုက်ရသည်။ ထိုဓာတ်ငွေ့နှင့် ထိတွေ့ခဲ့သော လက်ကိုင်မှာ အပြင်းဆုံး အက်ဆစ်ဖြင့် လောင်ကျွမ်းသွားသကဲ့သို့ ပျောက်ကွယ်သွားခြင်း ဖြစ်သည်။
"ဒါက... အက်ဆစ်ဓာတ်ငွေ့လား။ ဒါက ဘယ်လို စွမ်းရည်မျိုးလဲ" လုံချန်းက မျက်မှောင်ကြုတ်ကာ မေးလိုက်သည်။
"အဲဒါ အက်ဆစ် မဟုတ်ဘူး။ အဲဒါ အဆိပ်ပဲ" ရွှင်းက ပြန်ပြောသည်။ "ဒါက အဆိပ်နိယာမကို နားလည်ပြီး အဆိပ်မျိုးစေ့ကို တည်ဆောက်ထားတဲ့သူတွေရဲ့ မိမိကိုယ်ကိုယ် အသေခံ တိုက်ခိုက်တဲ့ စွမ်းရည်ပဲ။ အဲဒါက မီတာ ၅၀ ပတ်လည်က အရာအားလုံးကို ဖျက်ဆီးပစ်သလို သူတို့ကိုယ်တိုင်လည်း သေရမှာပဲ" သူမက ထပ်လောင်း ရှင်းပြသည်။
"ဒါက ခက်ခဲတဲ့ စွမ်းရည်ပဲ။ အသေခံစွမ်းရည် မဟုတ်ဘူးဆိုရင်တော့ ငါ ရအောင်ယူမယ့် အသုံးဝင်တဲ့ စွမ်းရည်တစ်ခု ဖြစ်မှာပဲ" လုံချန်းက ထိုလူ ရှိခဲ့သော နေရာကို ကြည့်ရင်း ရေရွတ်လိုက်သည်။
သူသည် သူ့ရှေ့တွင် ပျံဝဲနေသော ဝိညာဉ်ဓားကို ကြည့်လိုက်သည်။ ယခုတွင်မူ လက်ကိုင်မရှိတော့ဘဲ ဓားသွားသက်သက်သာ ကျန်တော့သည်။
"အဆိပ်က တကယ် ပြင်းတာပဲ။ ငါ့ ရတနာဓားရဲ့ လက်ကိုင်ကိုတောင် အရည်ပျော်သွားစေတယ်။ ငါ့ဓားကို ထိခိုက်သွားစေပြီ" လုံချန်းက စိတ်ပျက်လက်ပျက်ဖြင့် ဆိုလိုက်သည်။
"စိတ်မပူပါနဲ့။ ဓားရဲ့ ကိုယ်ထည်ပဲ ထိခိုက်သွားတာပါ။ အထဲက ဝိညာဉ်ကတော့ အကောင်းအတိုင်း ရှိပါသေးတယ်" ရွှင်းက ပြန်ဖြေသည်။
"ဒါဆို ဒီထိခိုက်သွားတဲ့ ဓားထဲက ဝိညာဉ်ကို ဓားအသစ်တစ်လက်ထဲကို ပြောင်းလို့ ရမလား" လုံချန်းက မေးသည်။
"အဲဒီလိုတော့ လုပ်လို့ မရဘူး။ ဒါပေမဲ့ ပိုပြီး အစွမ်းထက်တဲ့ ဓားတစ်လက်ကို အခြေခံပစ္စည်းအနေနဲ့ သုံးပြီး ဒီဓားကို ပြန်သွန်းလုပ်လို့ ရတယ်။ အဲဒါဆိုရင် သူ့ရဲ့ ကိုယ်ထည်က ပြန်ကောင်းသွားမယ့်အပြင် အဆင့်လည်း ပိုမြင့်လာလိမ့်မယ်" ရွှင်းက လုံချန်းကို အကြံပေးလိုက်သည်။