အခန်း (၁၀၉၇-၁၀၉၈)
Vol. 74 Ch. 1097-1098
Ch 1097
(ငါ့ကိုတိုက်ကွက်သုံးကွက် ပေးမယ် ဟုတ်လား)
မိစ္ဆာမျိုးနွယ်ဝင်တွေက လူသားမျိုးနွယ်တွေထက် ရုပ်ပိုင်းဆိုင်ရာအားဖြင့် ပိုသန်မာကြသည်။
ထို့အပြင် ပဟွမ်က ပျက်ဆီးခြင်းရှစ်ပါးကို ပိုင်ဆိုင်ထားသည့်အတွက် သူ့ခန္ဓာကိုယ်က ရှစ်ဆ ပိုသန်မာသွားခဲ့ပြီ။
သူဘယ်လောက်တောင် သန်မာသွားတာလဲ..
လဲ့ထျန်၏ မျက်နှာက ချက်ချင်းကို မည်းမှောင်သွားလေကာ..
“ဒါတင်မကသေးမှာပဲ စိုးတယ်”
“ဟမ်၊ အဲ့ဒါဘာကိုပြောချင်တာလဲ” ချီဖုန်း တုန်ယင်စွာ မေးလိုက်တော့၏။
“ပြောကြတာတော့ ပျက်ဆီးခြင်းရှစ်ပါး ခန္ဓာကိုယ်ကို အဆုံးထိအသက်သွင်းလိုက်ရင် တစ်ခြားထူးခြားတဲ့တာအိုအစွမ်းသိုင်း တွေလည်း ရလာတယ်တဲ့”
“ထူးခြားတဲ့တာအိုအစွမ်းသိုင်း ဟုတ်လား၊ အဲ့ဒါဘာတွေလဲ”
လဲ့ထျန် ခေါင်းယမ်းပြလိုက်သည်။
“အဲ့ဒါတော့ ကျုပ်လဲမသိဘူး”
တစ်ခြားသူတွေရဲ့မျက်နှာက ချက်ချင်း ဖြူဖွေးသွားလေတော့၏။
“ဘယ်လိုလုပ် ဖြစ်နိုင်မှာလဲ။ ဒါဆိုရင် မသေမျိုးဘုရင်လောထျန်းက သူ့ကို အနိုင်ယူနိုင်ပါ့မလား”
သူတို့အားလုံးက လောထျန်းကို တစ်ခြားဒေသကလာသော မသေမျိုးဘုရင်တစ်ယောက်ဟု ထင်နေကြသည်။
လဲ့ထျန် အံကြိတ်လိုက်ပြီး ခြောက်ကပ်စွာ ပြုံးလိုက်ရင်းမှ ပြောလိုက်သည်။
“ခက်ခဲလောက်တယ်”
ထိုအချိန်တွင် ပဟွမ်က ဗုဒ္ဓပုံရိပ်ရှစ်ခုကို အနောက်မှာချန်ထားရင်း ကြောက်စရာ အရောင်အဝါများ ထုတ်လွှတ်ထားသည်။ ထို့နောက် သူ၏ရှည်လျားသော အရပ်အားကိုးဖြင့် လောထျန်းကို အထင်သေးစွာ ပြုံးကြည့်လိုက်လေ၏။
“ဟေ့ကောင်၊ မင်းကဘာနည်းလမ်းတွေနဲ့ ကျို့ကုန်းကို အခုလိုကြောက်အောင် ဖြဲခြောက်ထားလဲငါမသိဘူး။ ဒါပေမဲ့ ငါပြောမယ်၊ ငါနဲ့သူနဲ့က ဘာမှမဆိုင်ဘူး.. မင်း ငါ့အရှေ့မှာ အခွင့်အရေးတစ်ခုတောင် ရမှာမဟုတ်ဘူး”
“ငါနဲ့သူ့နဲ့က ကွာခြားတယ်ဆိုတာ သက်သေပြဖို့ ငါမင်းကို မဟာအခွင့်အရေးကြီးတစ်ခု ချီးမြှင့်လိုက်မယ်”
ပဟွမ်က လက်ဖဝါးတစ်ဖက် ဖြန့်လိုက်ပြီး လောထျန်းကို ပြုံးပြလိုက်ပြီးမှ ဆက်ပြောသည်။
“ငါမင်းကို သုံးကွက်ဦးစားပေးမယ်.. ငါပြန်မတိုက်ဘူး”
ပဟွမ်က ပြုံးပြုံးကြီး ကြည့်နေလေ၏။
ထိုစကားလုံးများ ထွက်လာသည်နှင့် ပတ်ဝန်းကျင်တစ်ခုလုံး ဆူညံသွားသည်။
“ဘာ၊သုံးကွက်တောင်.. ပျက်ဆီးခြင်းအရှင်၈က ယုံကြည်မှုလွန်ကဲနေတာ မဟုတ်ဘူးလား”
“ဒါက နဲနဲ မသင့်တော်သလိုပဲ”
ပဟွမ်၏ ဂုဏ်မောက်နေပုံကြောင့် မိစ္ဆာဂိုဏ်းသားတစ်ချို့ ရှုတ်ထွေးလာတော့သည်။
သို့သော် ထိုစကားတွေကိုနားထောင်ရင်း လက်မောင်းအရှင်၆က ခပ်ဖွဖွ ပြုံးသွားလေ၏။
“ဟမ်”
ကံကြမ္မာအရှင်၇က ချက်ချင်း.လှည့်ကြည့်လာခဲ့သည်။
လက်မောင်းအရှင်၆က ခပ်တိုးတိုး ရှင်းပြလိုက်သည်။
“ပဟွမ်ရဲ့ အားသာချက်က ရုပ်ပိုင်းဆိုင်ရာ သန်မာမှုပဲလေ။ သာမာန်သူဆိုရင် သူ့ကို လာတိုက်တာနဲ့ ခန္ဓာကိုယ်ရဲ့တန်ပြန်အားနဲ့တင် သေသွားလိမ့်မယ်။.သူ လက်တစ်ချောင်းတောင် လှုပ်ရှားဖို့ လိုမှာ မဟုတ်ဘူး”
“ဟိုလူသားစောက်ကျင့်မကောင်းတဲ့ကောင်က ဉာဏ်နီဉာဏ်နက်တွေနဲ့ လှည့်ကွက်သုံးမှာစိုးလို့ သူက တိုက်ရိုက်တိုက်ခိုက်ဖို့ အခွင့်အရေး.ပေးလိုက်သလိုနဲ့ သူ့ရဲ့အားသာချက်ကို အသုံးပြုပြီး သတ်ဖို့ ကြိုးစားခဲ့တာပဲ”
ထိုမှပဲ ကံကြမ္မာအရှင်၇ သဘောပေါက်လိုက်သည်။
“ဒါဆို ပဟွမ်က မောက်မာနေတာ မဟုတ်ဘူးပဲ”
သို့သော် ထိုစကားတွေကို ကျို့ကုန်းတစ်ယောက် ကြားသည်နှင့် ချက်ချင်း.မျက်နှာပျက်သွားပြီး အော်ဟစ်တော့သည်။
“ပဟွမ် မလုပ်နဲ့၊ ဒီကောင်က ပုံမှန်မဟုတ်ဘူး.. မင်းသူ့ရဲ့ တိုက်ကွက်ကို ပိတ်နိုင်မှာ မဟုတ်ဘူး”
သူ၏ မသေမျိုးလက်နက်က မူလအဆင့် မသေမျိုးလက်နက် ဖြစ်နေတဲ့အချိန်မှာကို ထိုကောင်လေးက လက်ဗလာဖြင့် ဖမ်းဆုတ်ခဲ့တာ မှတ်မိပါသေး၏။
ထိုကောင်လေး၏ ကြောက်စရာစွမ်းအားက မကောင်းဆိုးဝါးတစ်ကောင်လိုပဲ။
သို့သော် ကျို့ကုန်း မအော်လိုက်ခဲ့လျှင်တောင် ပိုကောင်းအုံးမည်။ ကျို့ကုန်း၏အော်သံကို ကြားသည်နှင့် ပဟွမ် မျက်မှောင်ကြုတ်သွားပြီး စူးရှစွာ ပြန်အော်လိုက်တော့၏။
“စောက်ကြောက်.. မင်းပါးစပ်ကိုပိတ်ထားလိုက်စမ်း”
“ငါ့ကိုမင်းလို စောက်သုံးမကျတဲ့ ကောင် ထင်နေလားကွ၊ ငါသူ့ကို သုံးကြိမ်တိုက်ခွင့် ပေးမယ်လို့ ပြောပြီးပြီ။ ငါ့စကားကို ပြန်ပြောင်းစရာ အကြောင်းမရှိဘူး”
အငေါက်ခံလိုက်ရ၍ ကျို့ကုန်း၏ မျက်နှာက တွန့်လိမ်သွားတော့သည်။
ခဏကြာပြီးနောက် သူအေးစက်စွာ နှာမှုတ်လိုက်ပြီး ပြောလိုက်လေ၏။
“မကောင်းဆိုးဝါးကို တရားချလည်း ဘုရားမဖြစ်နိုင်ဘူးတဲ့.. ကောင်းပြီ၊ မင်း သေချင်သပဆိုလဲ သေလိုက်”
ပြီးသည်နှင့် ကျို့ကုန်းက ဘေးကိုသွားလိုက်ပြီး တစ်ခွန်းမှမပြောတော့ပေ။
ပဟွမ်တစ်ယောက် အနိုင်ရသလို ခံစားလိုက်ရ၍ ပိုမိုဂုဏ်မောက်သွားလေကာ လောထျန်းကို ကြည့်ပြီး ပြောလိုက်သည်။
“လာစမ်းပါ.. မင်းတိုက်လို့ရပြီ”
တစ်ဖက်က လောထျန်းကတော့ ရုတ်တရက် ပေါ်လာသော လူထွားထွားကြီးကို ကြည့်နေရင်း အနည်းငယ် မှင်သက်နေဟန်ပဲ။.
အထူးသဖြင့် ထိုသူ၏စကားတွေကို.နားထောင်ပြီးနောက်မှာ သူ အလိုမကျစွာ မျက်မှောင်တင်းတင်း ကြုတ်လိုက်သည်။
ဒီကောင်က ဘာဖြစ်ချင်နေတာလဲ..
ရုတ်တရက်ကြီး ရောက်လာတဲ့အပြင် သူ့ကို သုံးကြိမ်အရင်တိုက်ခိုက်မည်ဟု ဆိုနေသေး၏။
“မင်း သေချာလား”
လောထျန်း လှမ်းကြည့်ကာ မျက်မှောင်ကြုတ်ဖြင့် မေးလိုက်တော့သည်။
“ သေချာပေါက်ပေါ့၊ လာစမ်းပါ၊ လာတိုက်လိုက်”
ပဟွမ် လှောင်ပြုံးဖြင့် ပြောလာသည်။
ထို့နောက်မှာ သူ့အနောက်မှာရှိနေသော ဗုဒ္ဓပုံရိပ်ရှစ်ခုက စတင်းဝန်းရံလာခဲ့ပြီး ကိုယ့်ကိုယ်ကို.ကာကွယ်မှုကို အမြင့်ဆုံး အနေအထားအထိ တိုးမြင့်လိုက်သည်။
ဒီဗုဒ္ဓပုံရိပ်ရှစ်ခုသာ အပြည့်အဝ ကာကွယ်ပေးနေသရွေ့.. မိစ္ဆာနတ်ဘုရားကိုယ်တိုင် လာတိုက်လျှင်တောင်မှ တန်ပြန်သက်ရောက်မှုကို ခံရလိမ့်မည်.. ထိုကောင်လေး ဘယ်လိုမှ တိုက်ရဲမှာ မဟုတ်ဘူး။
“မင်း.ဘယ်နေရာက လာခဲ့သလဲ ကျုပ်မသိဘူး။ ဒါပေမဲ့ မင်းရဲ့စကားတွေကို.နားထောင်ရသလောက် မင်းက မိစ္ဆာနတ်ဘုရားနန်းတော်နဲ့ တစ်ဖက်ထဲပဲ။ ဒီတော့ ကျုပ် ယဥ်ကျေးနေမှာ မဟုတ်တော့ဘူး”
လောထျန်း မျက်မှောင်ကြုတ်ဖြင့် ပြောလိုက်သည်။
ပြီးတာနှင့် လောထျန်း လက်သီးကို တင်းနေအောင် ဆုတ်ထားလိုက်သည်။
“အေး၊ မယဥ်ကျေးနဲ့၊ ယဥ်ကျေးရင် ငါမင်းကို အထင်သေးမိမှာပဲ”
ပဟွမ်က ခပ်ပြုံးပြုံး ပြန်ချေပသည်။
လောထျန်း ခေါင်းညိတ်ပြလိုက်၏။
“ကောင်းပြီလေ”
လောထျန်း ပေါ့ပါးစွာ လက်သီးတစ်ချက် ပစ်သွင်းလိုက်သည်….
“ကောင်းကင်ဘုံလက်သီး”
“ဟဟ၊ ခံပေတော့”
လောထျန်း၏ လက်သီးကို ကြည့်နေရင်း ပဟွမ်မျက်နှာကပိုမို ဂုဏ်မောက်လာတော့သည်။
ထို့အပြင် လောထျန်းပုံစံကို ကြည့်ရသလောက် လက်သီးက အားမပါပေ.. သို့ပေမဲ့ သူ့၏ တန်ပြန်အစွမ်းက အမြင့်ဆုံးနှုန်းထားမှာ ဖြစ်သည်။
လောထျန်း ပြင်းထန်စွာဒဏ်ရာရလိမ့်မည်ဟု ပဟွမ် ယုံကြည်ချက်အပြည့် ရှိနေသည်.. အနည်းဆုံးတော့ လောထျန်း ဒုက္ခိတ ဖြစ်သွားလိမ့်မည်။
ထိုအချိန်မှာပဲ လောထျန်း၏ လက်သီးက သူ့ခန္ဓာကိုယ်အနားကိုရောက်လာသည်။
သူ.ပြုံးရွှင်စွာပဲ လောထျန်း၏ လက်သီးက သွေးမြူအဖြစ် ပြောင်းသွားမှာကို စောင့်စားနေလိုက်သည်။
သို့ပေမဲ့ နောက်တစ်စက္ကန့်မှာ တစ်ခုခု မူမမှန်တာကို သူ.အာရုံခံမိလိုက်သည်။
သူ၏ အကာအကွယ်ပုံရိပ် ရင်ဘက်နှင့် တိုက်သွားသည့်တိုင်အောင် လောထျန်းလက်သီးက မပြိုကွဲသွားပဲ.. သူ၏ ပုံရိပ်ကသာ ယိုယွင်းချင်ဟန် ပြလာသည်။
“ဟမ်၊ ဘာဖြစ်နေတာလဲ”
ပဟွမ်၏ အပြုံးက အေးခဲသွားပြီး သူ့အစွမ်းကို ချက်ချင်း အသက်သွင်းကာ ရင်ဘက်အကာအကွယ်ကို အားဖြည့်လိုက်သည်။
သို့သော် အစွမ်းကုန် အသက်သွင်းထားသည့် တိုင်အောင် လောထျန်းလက်သီး၏အရှိန်ကို မလျှော့ချနိုင်သေးဘူး။
“တစ်ခုခုမှားနေတယ်.. ဒီကောင်က”
ပဟွမ်၏ အတွေးမဆုံးခင်မှာပဲ..
ခွပ်
လောထျန်း၏လက်သီးက ချက်ချင်းပဲ ပေါက်ထွက်သွားခဲ့သည်.. သူ့လက်သီးက ပဟွမ်၏ ရင်ဘက်ကိုသာမက၊ ခန္ဓာကိုယ်တစ်ခုလုံးကို သွေးမှုန်အဖြစ် ပျောက်ကွယ်စေခဲ့လေ၏။
ရှီး
ပဟွမ်အနောက်မှာရှိသော ပုံရိပ်ရှစ်ခုလည်း ရုတ်ချည်းပျောက်ကွယ်သွားသည်။
ကောင်းကင်နှင့်မြေကြီးကြားမှာ အသံတွေ တိတ်ဆိတ်နေခဲ့ပြီး အရောင်အဝါလက်ကျန် တစ်ခုတောင် မရှိခဲ့ပေ..
လောထျန်းတစ်ယောက်သာ ထိုးရက်အနေအထားဖြင့် လေထဲမှာ တန့်နေသည်။
“ပဟွမ်ဘယ်ရောက်သွားတာလဲ”
“ဘာ”
တစ်ဖက်ခြမ်းက မိစ္ဆာဂိုဏ်းသားတွေ အားလုံး မှင်သက်သွားသည်။
လက်မောင်းအရှင်၆၊ မြူခိုးအရှင်၁.. ဘယ်သူမှ စကားမပြောနိုင်တော့ပေ။
ဒါဘာအခြေအနေကြီးလဲ။
မိစ္ဆာမျိုးနွယ်ရဲ့ ရုပ်ပိုင်းဆိုင်ရာ အသန်မာဆုံး ပဟွမ်က လက်သီးတစ်ချက်ထဲနဲ့ ပျောက်ကွယ် သွားခဲ့တာလား။
ဒါ့အပြင် သူတို့တွေ ပဟွမ်၏ ဝိညာဥ်ကို အစအနတောင် ရှာမရနေဘူး
ဆိုလိုတာက လောထျန်းလက်သီးက ခန္ဓာကိုယ်ကို ဖျက်ဆီးလိုက်ရုံတင်မကပဲ၊ ဝိညာဥ်ကိုပါ ရှင်းလင်းခဲ့တာလား။
ဒါ.. ဒါဘယ်လို တည်ရှိမှုကြီးလဲ။
“ကျို့ကုန်း၊ ဒီကောင်ကဘာကြီးလဲ”
မြူခိုးအရှင်၁ ချက်ချင်းပဲ ကျို့ကုန်းဘက် လှည့်ကာ အော်ဟစ်လိုက်သည်။
ကျို့ကုန်း ပုခုံးတွန့်ပြလိုက်ပြီး ကူကယ်ရာမဲ့စွာ ရှင်းပြလာ၏။
“ငါပြောခဲ့သားပဲ.. မင်းတို့တွေ နားထောင်ခဲ့လို့လား”
Ch 1098
(တိုက်ပွဲကြားမှာ လေ့ကျင့်ခြင်း)
မြူခိုးအရှင်၁ နှင့် ကျန်နှစ်ယောက် အချင်းချင်း လှည့်ကြည့်လိုက်ကြသည်။
ကျို့ကုန်းက တကယ်ကို သူတို့ကို သတိပေးခဲ့ပါ၏။
သူတို့အရှေ့က လူက အရမ်းကိုသန်မာတာမလို့ အတူတူ တိုက်ခိုက်ကြရန် အကြိမ်ကြိမ် ပြောဆိုခဲ့သည်။
ဘယ်သူကမှ ကျို့ကုန်းကို မယုံခဲ့ကြဘူး။
သို့သော် ဒါကယုတ္တိမရှိတာတော့ မဟုတ်ပေ။
ကျိလန်ဒေသ၏မိစ္ဆာမျိုးနွယ်တွေ အမြင်မှာ လူသားမျိုးနွယ်ဆိုတာ အလွန်အားနည်းသော မျိုးနွယ်စုတစ်ခုသာ..
ထို့ကြောင့်ပဲ လောထျန်းကို မြင်တာနှင့် ဘာမှမစဥ်းစားပဲ အထင်သေးခဲ့ကြသည်။
ရလဒ်အဖြစ် အခုတော့မသေမျိုးဘုရင် တစ်ယောက် အလကား သေဆုံးသွားရပေပြီ။
“ဟွန့်.. အခုဒါတွေ ပြောရမဲ့အချိန် မဟုတ်ဘူး။ ဟိုကောင်က အခုထိ အလတ်ကြီးရှိနေသေးတယ်။ သူ့ကို အမြန်ဆုံး ဖယ်ရှားရမယ်”
လက်မောင်းအရှင်၆က ပြောပြီးတာနှင့် ကျယ်လောင်သောအသံတစ်ချက်နှင့်အတူ ပုံစံအမှန် ဖော်ထုတ်လိုက်သည်။
ဖြန်း ဖြန်း ဖြန်း
လက်မောင်းကြီး ခြောက်ဖက်ထဲမှာ ကိုင်ထားသော အဆင့်ကိုးမသေမျိုးဓားတွေကနေ အချင်းချင်း ရိုတ်ခတ်သံတွေ ထွက်ပေါ်လာ၏။
ကံကြမ္မာအရှင်၇ လည်း လက်တစ်ဖက် ဝှေ့ယမ်းလိုက်တော့သည်။
ဘုန်း
ချက်ချင်းပဲ သူ့ဦးခေါင်းမှာ တောက်လောင်နေသော မီးတောက်ကြီးတစ်ခု ထွက်ပေါ်လာကာ ပတ်ဝန်းကျင်အပူချိန်ကို များစွာ.မြင့်တက်စေခဲ့သည်။
ဒါကိုမြင်တော့ ကျို့ကုန်း မျက်မှောင်ကြုတ်ကာ ပြောလိုက်သည်။
“အရှင်တို့.. ငါတို့တွေကြည့်ပဲဆိုရင် ဒီကောင့်ကို ရင်ဆိုင်ဖို့ခက်ခဲမှာ စိုးရတယ်”
လက်မောင်းအရှင်၆ ချက်ချင်း မျက်မှောင်ကြုတ်သွား၏။
သူ ပြန်ပြောလိုက်ချင်ပေမဲ့ ပဟွမ်၏ မြန်ဆန်သော သေဆုံးမှုကို မြင်ယောင်လိုက်သောကြောင့် ပါးစပ် ပြန်ပိတ်လိုက်လေသည်။
ထိုအချိန်မှာပဲ ဘေးက မြူခိုးအရှင်၁က အေးစက်စွာ ပြောလိုက်သည်။
“မင်းတို့သုံးယောက် ငါ့ကိုကူညီပြီး သူ့ကို အချိန်ဆွဲထားပေး”
“ဟမ်”
ကျို့ကုန်း လန့်သွားပြီး မြူခိုးအရှင်၁ ကို ချက်ချင်း လှည့်ကြည့်လိုက်၏။
မြူခိုးအရှင်၁ ၏ မျက်နှာမှာ အေးစက်သော အပြုံးတစ်ခု ရှိနေသည်။
“မင်းတို့ငါ့အစား အသက်ရှုချိန်တစ်ရာလောက် အချိန်ဆွဲပေးထားရင် ရပြီ၊ ဒီကောင်ဘာကောင်လဲ ငါမသိဘူး။ ဒါပေမဲ့ ငါတို့ မိစ္ဆာနတ်ဘုရားနန်းတော်ကို ရန်စရဲတဲ့ အတွက် ဒီနေ့သေချာပေါက် သေဆုံးရမယ်”
ကျို့ကုန်း တစ်ယောက် ချက်ချင်းပဲ မျက်လုံးများ တောက်ပသွားလေကာ
“ဒါဆို အောင်မြင်ခဲ့တယ်ပေါ့”
မြူခိုးအရှင်၁က ပြုံးလိုက်သည်။
“ဟုတ်တယ်.. ငါဒီကို မလာခင်က မိစ္ဆာနတ်ဘုရားက ငါ့ကို စထားဖို့ အမိန့်ပေးထားတယ်”
ကျို့ကုန်း၏ မူလက မသက်မသာ.ဖြစ်နေသော မျက်နှာက ချက်ချင်း စိတ်လှုပ်ရှားလာတော့သည်။
“ ဟဟ၊ ကောင်းတယ်။ ဒါဆိုဒီကောင် ဒီနေ့သေချာပေါက် သေပြီပဲ၊ ငါသူ့ကို အနိုင်ယူဖို့ ယုံကြည်ချက်မရှိပေမဲ့ အချိန်ဆွဲတာကတော့ မခက်ဘူးထင်တာပဲ”
ကျို့ကုန်းက ရယ်မောရင်း ပြောလိုက်သည်။
လက်မောင်းအရှင်ခြောက် လည်း စိတ်သက်သာစွာ သက်ပြင်းချပြီး ခေါင်းညိတ်ပြလာသည်။
“ရတယ်၊ အချိန်ဆွဲတာက ရိုးရှင်းပါတယ်။ ငါအရင်တိုက်မယ်..မင်းတို့ နှစ်ယောက်က သူ့ကို ဘေးကနေ တုတ်နှောင်ဖို့ ကြိုးစားကြ”
ဝုန်း
လက်မောင်းအရှင် ၆ က လောထျန်းရှိရာကို ချက်ချင်း ပြေးဝင်သွားခဲ့သည်။
ရွှမ်..
တစ်ချိန်ထဲမှာပဲ ဓားခြောက်ချောင်း၏ အရောင်အဝါက ထိုးတက်လာပြီး အရိပ်တွေအဖြစ် တစ်ချောင်းတည်းစုဝေး သွားကာ လောထျန်းရှိရာ ရိုက်ချလိုက်သည်။
“အိုး.. ကောင်းကင်ဘုံတစ္ဆေဓားသွားလား၊ လက်မောင်းအရှင်၆က အသန်မာဆုံး ဓားသိုင်းကို ထုတ်သုံးနေမှတော့ ငါ နောက်ကောက်ကျ ကျန်ခဲ့လို့ ဘယ်ဖြစ်မလဲ”
ကံကြမ္မာအရှင်၇ က ရယ်မောလိုက်ပြီး လက်ဖဝါးနှစ်ဖက်ကို စုဝေးလိုက်သည်။
ဝုန်း
ချက်ချင်းပဲ သူ့ခန္ဓာကိုယ်အနှံ့ကနေ ထွင်းစာတွေ ထွက်ပေါ်လာပြီး မျက်ခုံးစပ်ကြားကို စုဝေးဝင်ရောက်သွားသည်။
သူ့ဦးခေါင်းထက်က မီးတောက်က သေးငယ်သွားပြီး ထုတ်လွှတ်သည့်ဖိအားက အဆပေါင်းများစွာ တိုးမြှင့်လာ၏။
“ နဂါးဧကရာဇ်မီးတောက်ခုနှစ်သွယ်”
ကံကြမ္မာအရှင်၇ ကျယ်လောင်စွာ အော်လိုက်သည်။
ထိုမြင်ကွင်းကြောင့် မိစ္ဆာဂိုဏ်းသားတွေ ကြားထဲက မိစ္ဆာအိုကြီး လန့်ဖြန့်သွားလေသည်။
“နဂါးဧကရာဇ်မီးတောက်ခုနှစ်သွယ်လား.. ကံကြမ္မာအရှင်၇ က နဂါးဧကရာဇ်မီးတောက်ခုနှစ်သွယ်ကို လေ့ကျင့်နိုင်ခဲ့တာလား”
“နဂါးဧကရာဇ်မီးတောက်ခုနှစ်သွယ်က ဘာမလို့လဲ”
အဖိုးအိုက တံတွေးတစ်ချက် မြိုချလိုက်ပြီးမှ ဆက်ပြောသည်။
“အဲ့ဒါက မိစ္ဆာမျိုးနွယ် ဧကရာဇ်ရဲ့ အကောင်းဆုံးသိုင်းပဲ.. သူ့ရဲ့ကြောက်ဖို့ ကောင်းတဲ့ မီးတောက်က မသေမျိုးဧကရာဇ်ကိုတောင် မီးလောင်ပြာချလိုက်လို့ရတယ်”
“ဘာ..မသေမျိုးဧကရာဇ်တစ်ယောက်ကို မီးလောင်ပြာချမယ် ဟုတ်လား။ ကံကြမ္မာအရှင်၇က ဒီလောက်တောင် သန်မာတာလား”
မိစ္ဆာဂိုဏ်းသားတွေအားလုံး ကံကြမ္မာအရှင် ၇ ကို မတူကွဲပြားစွာ ကြည့်လိုက်ကြသည်။
အဖိုးအိုက ပါးစပ်အပြည့် တံတွေးမြိုချလိုက်ပြီးမှ ဆက်ပြော၏။
“ သေချာပေါက် ကံကြမ္မာအရှင်၇က အဲ့လောက် မသန်မာသေးဘူး။ သူ ထုတ်တဲ့ နဂါးဧကရာဇ်မီးတောက်ခုနှစ်သွယ်က အရမ်းသေးတယ်.. ဒါပေမဲ့ နဂါးဧကရာဇ်မီးတောက်ခုနှစ်သွယ်ကို ဖန်တီးနိုင်တာကိုက အထင်ကြီးစရာ ကောင်းနေပြီ။ ဒါကိုကြည့်လိုက်ရင် သူက မသေမျိုးဧကရာဇစ်တစ်ပိုင်း.. မဟုတ်ဘူး မသေမျိုးဧကရာဇ်ဖြစ်လာဖို့အထိ အရည်အချင်းရှိတဲ့သူပဲ”
ထိုမှသာ ခံစားချက်တွေ ပြည့်နေသော မျက်နှာများဖြင့် သူတို့တွေ သက်ပြင်းချလိုက်တော့သည်။
ထိုအချိန်တွင် ကံကြမ္မာအရှင်၇ နဲ့ လက်မောင်းအရှင်၆ကို ကြည့်နေသော ကျို့ကုန်း၏ မျက်လုံးထဲ အံ့သြမှုတစ်ချို့ ထင်ဟပ်လာ၏။
“ ဒီနှစ်ယောက်က ဒီလောက်တောင် သန်မာကြတာလား။ ငါ့ကိုငါ သူတို့နဲ့ အတူတူပဲ ထင်နေတာ.. ငါအများကြီး နောက်ကျနေပြီမှန်း အခုမှသိတော့တယ်”
သူ့ နှလုံးသားထဲမှာ အမုန်းတရားတစ်ချို့ ဝင်ရောက်လာသလိုပဲ။
ဒီနှစ်ယောက်က လူမသိအောင် စွမ်းအားကြီးသိုင်းပညာတွေ ခိုးကျင့်ထားပြီး သူတို့ကြားက ကွာခြားချက်ကို ကြီးမားအောင် လုပ်ခဲ့သည်။
“ဒါပေမဲ့ ဒီနှစ်ကောင်သန်မာတာလဲ ကောင်းသွားပါတယ် သူတို့နဲ့ဆိုရင် လောထျန်းကို အသက်ရှုချိန်တစ်ရာ အချိန်ဆွဲဖို့ မပြောနဲ့။ သတ်လို့မရနိုင်ရင်တောင် ဒဏ်ရာအပြင်းအထန် ရအောင် လုပ်နိုင်လိမ့်မယ်”
ထိုအတွေးကြောင့် ကျို့ကုန်း၏ နှလုံးသားက တဖြည်းဖြည်း တည်ငြိမ်သွားသည်။
ထိုအချိန်မှာ လက်မောင်းအရှင်၆က အရှေ့ပြေးဝင်သွားခဲ့ချေပြီ။
“ဟေ့ကောင်၊ မင်းင့ါရဲ့ ဒေသ ကိုးခုလုံးမှာ အသန်မာဆုံး ဓားတိုက်ကွက်ကို လက်ခံရဲလား”
ပြောပြီးသည်နှင့် ကြောက်မက်ဖွယ် ဖိအားအသီးသီး ရှိကြသော သူ့ဓားခြောက်ချောင်း၏ အရိပ်တွေက လောထျန်းရှိရာ ကျလာခဲ့သည်။
သူ့မျက်လုံးက တိုက်ခိုက်လိုစိတ်တို့ဖြင့် လောင်မြိုက်နေပြီး လောထျန်းကို ဖိနှိပ်ဖို့သာ စိတ်အားထက်သန်နေလေ၏။
လောထျန်းကတော့ တစ်ဖက်ကိုကြည့်နေရင်း အနည်းငယ် မျက်မှောင်ကြုတ်သွားသည်။
“ဒေသကိုးခုရဲ့ အသန်မာဆုံးဓားတိုက်ကွက် ဟုတ်လား”
သူ့မျက်လုံးက အနည်းငယ် နိုးကြားသွား၏။
“ကောင်းပြီလေ၊ ကောင်းကင်ဘုံဓားသိုင်းရဲ့ အဆုံးအစမဲ့နယ်ပယ်အတွက် လေ့ကျင့်မှုကို မင်းနဲ့စရတာပေါ့”
ဘုန်း
ထိုအချိန်မှာပဲ လက်မောင်းအရှင်၆၏ ဓားအရိပ်တွေက ရောက်လာခဲ့သည်။
သူ့ဓားရိုက်ချက်မှာ ကမ္ဘာတစ်ခုလုံးကို ဖျက်ဆီးနိုင်သော အရောင်အဝါတွေ ပြည့်နေပြီး ကြောက်ဖို့ကောင်းသော အရှိန်ဖြင့် ပြေးလွှားနေ၏။
ထိုဓားက နောက်ဆုံးတော့ လောထျန်းကို ဆုတ်ဖြဲပစ်တော့မည်။
ထိုအချိန်မှာပဲ လောထျန်းက ကိုးရိုးကားယား.လက်တစ်ဖက်မြှောက်ကာ မျက်လုံးပိတ်လိုက်သည်။ အဆုံးအစမဲ့နယ်ပယ်အတွက် ရရှိထားသော ကောင်းကင်ဘုံဓားသိုင်းကို ပြန်စဥ်းစားရင်း တိုက်ကွက်တစ်ခု ဖန်တီးလိုက်၏။
“ကောင်းကင်ဘုံဓားသိုင်း ပထမပုံစံ
ဖြန်း
ဒလဟော စီးဝင်လာသော ရေစီးကြောင်း တစ်ခုလိုမျိုး ကြောက်မက်ဖွယ် ဓားစွမ်းအင်က လက်မောင်းအရှင်၆ ရှိရာ အပြေးရောက်သွားသည်။
ဝုန်း
လောထျန်း၏ ဓားစွမ်းအင်ကို ရင်ဆိုင်လိုက်ရသည်နှင့် ဓားအရှင်၆၏ ဧရာမ ဓားအရိပ်က အစိတ်စိတ်အမြွှာမြွှာ ကွဲကြေသွားလေသည်။
“ဘာ”
လက်မောင်းအရှင်၆ မျက်လုံးများ ပြူးကျယ်သွားပြီး အံ့သြနေလေရာ၊ တုံ့ပြန်ချိန်ကို မရခဲ့လိုက်ပေ။
အွတ်
မရပ်တန့်သေးသော လောထျန်း၏ ဓားစွမ်းအင်က နောက်ဆုံးမှာ သူ့ကိုပါ ရိုက်ခတ်လာသည်။
ထို့နောက်..
သူ့ဝိညာဥ်ကွဲကြေသွားလေပြီ။
“ဟမ်၊ ငါ့တိုက်ကွက်က မမှန်သေးဘူးပဲ။ အေးကွာ..သေချာမကျင့်ရသေးတော့ အမှားတွေ ပါနေတာ”
လောထျန်း မျက်မှောင်ကြုတ်ပြီး လက်ထဲက ဓားကို စိုက်ကြည့်ကာ ပြောလိုက်သည်။
တကယ်လဲ စဥ်းစားကြည့်လိုက်လျှင် အဆုံးအစမဲ့နယ်ပယ်အတွက် ကောင်းကင်ဘုံဓားသိုင်းကို ရရှိပြီးကတည်းက သူလေချာ မလေ့ကျင့်ရသေးဘူး။
အခုမှသာ သူ ပထမဆုံးလေ့ကျင့်ဖူးတာ ဖြစ်သည်။ သို့သော် ပထမအကြိမ်လေ့ကျင့်မှုက သူ့ကို မကျေနပ်စေဘူး..
သူ ခန့်မှန်းထားတာထက် ဆယ်ဆလောက် နိမ့်နေသေးသည်..
“နောက်တစ်ခေါက် လုပ်ရအောင်.. နောက်တစ်ခေါက်ကျ သေချာပေါက် အဆင်ပြေလိမ့်မယ်”
လောထျန်း ခေါင်းမော့ကာ လက်မောင်းအရှင်၆ကို ကြည့်ပြီး ပြောလိုက်သည်။
သို့သော် သူ့မျက်စိရှေ့က မြင်ကွင်းက ဗလာဖြစ်နေလေ၏။
ဘယ်လိုဝိညာဥ်.. ဘယ်လိုလက်မောင်းအရှင်၆ကိုမှ မတွေ့ရတော့ဘူး။
ဘာမှကို မကျန်တော့တာပင်..
“ဟမ်၊ လူရော”
လောထျန်း အံ့သြသွားပြီး ခေါင်းလှည့်ရှာတော့သည်။
“သူ အရမ်းမြန်ပြီး ငါ့နောက်မှာ ပုန်းနေတာများလား”
သို့သော် သူ အနောက်လှည့်ကြည့်လိုက်ချိန်တွင် ကြောက်ရွံ့နေသော မျက်နှာနှင့် ဝေ့လင်ယွီမှအပ တစ်ခြားဘယ်သူမှ မရှိနေခဲ့ဘူး။
တကယ်ကို ဘာမှမရှိတော့တာပင်။