အခန်း (၂၅၀၅-၂၅၀၆)

အခန်း(၂၅၀၅)

မီးခိုးရောင်ဝတ်ရုံဝတ် အဘိုးအို၏ ယုံကြည်ရခက်သော အဖြေကြောင့် ထိုနေရာရှိ လူအများစုသည် ကြေးနီပြားပေါ်တွင် စိတ်ဝင်စားမှု လျော့နည်းသွားကြသည်။

ကုန်သွယ်ရေး စျေးလောကသည် အလွန်တရာပင် နက်ရှိုင်းလှသည်ဖြစ်ရာ မီးခိုးရောင်ဝတ်ရုံဝတ် အဘိုးအို၏ စကားတစ်ခွန်းကြောင့်ဖြင့် ဤကြေးနီပြားက ထျန်းယွိနှင့် အမှန်တကယ် ပတ်သက်နေမည်ဟု မည်သူမျှ အလွယ်တကူ ယုံကြည်လိမ့်မည် မဟုတ်ပေ။

ထို့အပြင် မီးခိုးရောင်ဝတ်ရုံဝတ် အဘိုးအို တောင်းဆိုနေသော စျေးနှုန်းသည် မယုံကြည်နိုင်လောက်အောင် မြင့်မားလွန်းနေသဖြင့် ထိုနေရာရှိ ကျင့်ကြံသူ အများစုကို လက်ရှောင် သွားစေရန် လုံလောက်၏။

ရွှယ်ဝူရှ ကဲ့သို့ ငွေကြေးတတ်နိုင်သူများ ရှိနေလျှင်ပင် ကြေးနီပြား၏ စစ်မှန်သော အသုံးဝင်ပုံကို အသေအချာ မသိဘဲ စွန့်စားမှု ပြုကြလိမ့်မည် မဟုတ်ပေ။

အဆုံးသတ်တွင်မူ ယခုတစ်ကြိမ် သူတို့အားလုံး စိမ်းလန်းသောမြစ် ကုန်သွယ်ရေး အဖွဲ့သို့ လာရောက်ရသည့် အဓိကရည်ရွယ်ချက်သည် စိမ်းလန်းသောမြစ် ကုန်သွယ်ရေးအဖွဲ့က လေလံတင်တော့မည့် ကပ်ဘေးဆေးလုံးကြောင့် ဖြစ်သည်။

ယွမ်ကျောက်တုံး တစ်သန်း ဆိုသည်မှာ သူတို့အတွက် နည်းပါးသော ပမာဏ မဟုတ်ပေ။

အကယ်၍ ဤကြေးနီပြားအတွက် ယွမ်ကျောက်တုံး တစ်သန်း အသုံးပြုလိုက်လျှင် ကပ်ဘေးဆေးလုံး အတွက် လေလံဆွဲရာတွင် သူတို့ အပေါ် ကြီးမားသော သက်ရောက်မှု ရှိလာနိုင်ပေသည်။

ကျင့်ကြံသူ အများအပြားက ကြေးနီပြားနှင့် ပတ်သက်၍ နောက်ဆုတ်သွားသည်ကို မြင်လျှင် ကျန်းချန် အနည်းငယ် စိတ်သက်သာရာ ရသွားခဲ့သည်။

သူက ရွှယ်ချန်ကျဲ ထံသို့ အသံလွှင့်ကာ မေးလိုက်သည်။

“ချန်ကျဲ မင်းဆီမှာ ယွမ်ကျောက်တုံး တစ်သန်း ရှိလား”

“ရှိတယ် သခင်ကြီး”

ရွှယ်ချန်ကျဲက အနည်းငယ် အံ့အားသင့်သွားသော်လည်း ပြန်လည် ဖြေကြားလိုက်သည်။

ယခင်က သူသည် သွေးနတ်ဆိုးဂိုဏ်း၏ ကပ်ဘေးအဆင့်ကျင့်ကြံသူ ဖြစ်ခဲ့ပြီး ယခုအခါတွင် ကပ်ဘေး အထွတ်အထိပ် အဆင့်ကို ရောက်ရှိနေသော ကျင့်ကြံသူ တစ်ဦး ဖြစ်သည်။

သူ စုဆောင်းထားသည့် ယွမ်ကျောက်တုံးများမှာ အဆင့်တက်ရန် အတွက် လိုအပ်သည့် ရတနာများကို ဝယ်ယူရန် ရည်ရွယ်ထားခြင်း ဖြစ်၏။

ယခုအခါတွင် ကျန်းချန်က သူ့အတွက် မိုးမခသွေးနတ်ဆိုးသစ်သီးကို ဝယ်ယူပေးထားပြီးပြီ ဖြစ်ရာ လောလောဆယ်တွင် အခြား ရတနာများကို ဝယ်ယူရန် မလိုအပ်တော့ပေ။

“စီနီယာ ဒီကြေးနီပြားကို ကျွန်တော်ဝယ်မယ်”

ကျန်းချန်က ခပ်ယဲ့ယဲ့ ပြုံးလိုက်ပြီး ရွှယ်ချန်ကျဲကို တိုက်ရိုက်ပင် ပြောလိုက်သည်။

“ချန်ကျဲ စီနီယာကို ယွမ်ကျောက်တုံးတစ်သန်း ပေးလိုက်ပါ”

“ဝုန်း..”

ကျန်းချန်၏ စကားအဆုံးတွင် ပတ်ဝန်းကျင်ရှိ ကျင့်ကြံသူ အများအပြား၏ အကြည့်သည် ကျန်းချန်၏ ခန္ဓာကိုယ် ပေါ်သို့ စုပြုံ၍ ကျရောက်လာခဲ့သည်။

လူအများအပြားက ကျန်းချန်ကို လူအ တစ်ယောက် ကဲ့သို့ ကြည့်နေခဲ့ကြသည်။

ပျက်စီးနေသော ကြေးနီပြား တစ်ချပ် အတွက် ယွမ်ကျောက်တုံး တစ်သန်းကို အမှန်တကယ် ပေးဝယ်သူ ရှိလိမ့်မည်ဟု သူတို့ မမျှော်လင့်ထားခဲ့ပေ။

ရွှယ်ချန်ကျဲသည် စိတ်ထဲတွင် သံသယတချို့ ရှိနေသော်လည်း ကျန်းချန်၏ ညွှန်ကြားချက်ကို လိုက်နာကာ ယွမ်ကျောက်တုံး တစ်သန်းကို ထုတ်ယူ၍ မီးခိုးရောင်ဝတ်ရုံဝတ် အဘိုးအိုထံ ပေးလိုက်သည်။

ကျန်းချန်က ကြေးနီပြားကို ဝယ်ယူရန် ယွမ်ကျောက်တုံးတစ်သန်းကို အမှန်တကယ် ထုတ်ပေးနေသည်အား မြင်လျှင် မီးခိုးရောင်ဝတ်ရုံဝတ် အဘိုးအို၏ မျက်ဝန်းထဲတွင် ဇဝေဇဝါအမူအရာများ ဖြစ်ပေါ်လာခဲ့၏။

သူက ဤကြေးနီပြားကို ထျန်းယွိ ကျင့်ကြံခဲ့သည်ဟု ယူဆရသည့် ရှေးဟောင်း အမွေအနှစ်နယ်မြေ အတွင်း စူးစမ်းရှာဖွေစဥ်က ရရှိခဲ့ခြင်း ဖြစ်သည်။

သို့သော်လည်း နှစ်အတန်ကြာအောင် ကြေးနီပြားကို အသေးစိတ် သုတေသန ပြုလုပ်ခဲ့သည့်တိုင် ထူးခြားသော အရာတစ်ခုကိုမျှ ရှာမတွေ့ခဲ့ပေ။

သူ့အနေဖြင့် ကြေးနီပြားကို ဤမျှအထိ‌ စျေးတင်ထားခြင်းမှာ ကြေးနီပြား၏ လျှို့ဝှက်ချက်ကို သိရှိနိုင်သူ ရှိ၊မရှိ စမ်းသပ်လိုသောကြောင့်သာ ဖြစ်၏။

သူ့ရှေ့မှ ကောင်လေးသည် ကြေးနီးပြားကို ဝယ်ယူရန် ယွမ်ကျောက်တုံး တစ်သန်းကို တုံ့ဆိုင်းမှု မရှိဘဲ သုံးစွဲလိုက်ပုံထောက်လျှင် တစ်စုံတစ်ရာကို ရှာတွေ့သွား၍များ ဖြစ်နိုင်ပါသလော။

“ယူထားလိုက်.. ဒီကြေးနီပြားက မင်းအပိုင် ဖြစ်သွားပြီ”

မီးခိုးရောင်ဝတ်ရုံဝတ် အဘိုးအိုက ခပ်ပြတ်ပြတ်ပင် ပြောလိုက်ပြီး သူ၏ လက်ဖဝါးကို ဝှေ့ယမ်းလိုက်ရာ ကြေးနီပြားသည် ကျောက်စိမ်းစင်မြင့်ထက်ကနေ ကျန်းချန် ထံသို့ ပျံသန်းသွားခဲ့သည်။

ကျန်းချန်က အလွန်အမင်း ဝမ်းသာသွားခဲ့ပြီး ကြေးနီပြားကို ဖမ်းရန် လက်လှမ်းလိုက်၏။

ကျန်းချန်၏ လက်ဖဝါးက ကြေးနီပြားနှင့် ထိတွေ့တော့မည့် အခိုက်အတန့်မှာပင် အနက်ရောင်အရိပ် တစ်ခုသည် ကျန်းချန်၏ ရှေ့ရှိ လေထုထဲတွင် တစ္ဆေတစ်ကောင်နှယ် ရုတ်တရက် ပေါ်လာခဲ့ပြီး ကြေးနီပြားကို ဖမ်းယူလိုက်သည်။

တစ်ချိန်တည်းမှာပင် ကျန်းချန်၏ နားထဲကို ခပ်ထေ့ထေ့ ရယ်သံတစ်သံ ဝင်ရောက်လာခဲ့သည်။

“ဟားဟား ဒီကမိတ်ဆွေ.. ငါလည်း ဒီကြေးနီပြားကို သဘောကျတယ်.. မိတ်ဆွေ ငါ့ကို ဒီကြေးနီပြား ပေးလို့ရမလား”

ထိုခဏဝယ် ကျန်းချန်၏ မျက်နှာ အမူအရာသည် ချက်ချင်းဆိုသလိုပင် အလွန်တရာ သုန်မှုန်သွားခဲ့သည်။

သူ့ရှေ့တွင် ပေါ်လာသူမှာ နဂါးပုံစံ ချည်ထိုးထားသော အနက်ရောင် ဝတ်စုံကို ဝတ်ဆင်ထားသည့် ခန့်ညားသော ရုပ်ရည်ရှိပြီး နူးညံ့သော အပြုံးကို ဆင်မြန်းထားသည့် လူငယ်တစ်ဦး ဖြစ်သည်။

သို့သော်လည်း ထိုအပြုံးသည် မည်သူ့ကိုမဆို ကြက်သီးထစေလောက်သော ခံစားချက် ပေးစွမ်းနေခဲ့၏။

အနက်ရောင်ဝတ်စုံဝတ် လူငယ်၏ နောက်တွင် ပုံရိပ်နှစ်ခုသည် ကပ်ရပ် လိုက်ပါလာခဲ့သည်။

ထိုနှစ်ဦး၏ အရှိန်အဝါသည် အလွန်တရာပင် နက်ရှိုင်းပြီး ကျင့်ကြံခြင်း အဆင့်သည် မဟာယာန တစ်ပိုင်းအဆင့်သို့ ရောက်ရှိနေပြီ ဖြစ်သည်။

ထိုနှစ်ယောက်အနက် မဟာယာန တစ်ပိုင်းအဆင့် အနက်ရောင်ဝတ်စုံဝတ် လူလတ်ပိုင်းအရွယ် အမျိုးသား၏ ခန္ဓာကိုယ်မှ အရှိန်အဝါသည် ကျန်းချန်ကို အလွန် ရင်းနှီးနေသကဲ့သို့ ခံစားရစေခဲ့၏။

“ဒီအနက်ရောင်ဝတ်စုံဝတ် လူလတ်ပိုင်းအရွယ် ကျင့်ကြံသူက ကျိုလီအင်မော်တယ်ဂိုဏ်းက အနက်ရောင် ယူနီကွန်း ဖြစ်နေတာပဲ”

ကျန်းချန်က ရုတ်တရက် မျက်မှောင်ကြုတ်သွားခဲ့သည်။

ဤအခိုက်အတန့်တွင် သူ၏ ကြေးနီပြားကို လုယူသွားသောလူငယ်မှာ မည်သူမည်ဝါ ဖြစ်မှန်း ကျန်းချန် ခန့်မှန်းရ လွယ်ကူသွားခဲ့၏။

ထိုလူငယ်သည် ကျိုလီအင်မော်တယ်ဂိုဏ်း၏ နံပါတ်တစ်ပါရမီရှင် ဖြစ်သည့် လီရှောင်မှ လွဲ၍ အခြားသူ မဖြစ်နိုင်ပေ။

လီရှောင်၏ ရုတ်တရက် ဝင်ရောက် နှောင့်ယှက်မှုကြောင့် ဤနေရာရှိ လူအများအပြားသည် အံ့အားသင့်သွားကြသည်။

ဤနေရာရှိ လူများသည် လီရှောင် မည်သူမည်ဝါ ဖြစ်မှန်း ကောင်းစွာ သိရှိထားကြ၏။

ကျိုလီအင်မော်တယ်ဂိုဏ်းမှ ပါရမီရှင်သည် လျှို့ဝှက်ဆန်းကြယ်သော ကြေးနီပြားကို ဝင်ရောက် လုယူလိမ့်မည်ဟု သူတို့ မထင်ထားခဲ့ကြပေ။

ကြေးနီပြားသည် အမှန်တကယ်ပင် အံ့မခန်း ရတနာတစ်ပါး ဖြစ်နေပါသလော။

ထိုအခိုက်အတန့်တွင် ရွှယ်ဝူရှ၏ မျက်ဝန်းများတွင် အံ့အားသင့်သော အရိပ်အယောင် တစ်ခု ဖြစ်ပေါ်လာခဲ့သည်။

ယခု တစ်ကြိမ် စိမ်းလန်းသောမြစ် ကုန်သွယ်ရေး အဖွဲ့သို့ လီရှောင် လာရောက်ရသည့် ရည်ရွယ်ချက်မှာ လေလံပွဲအတွက် ဖြစ်မှန်း ရွှယ်ဝူရှ ကောင်းစွာ သိရှိထားခဲ့သည်။

သို့ရာတွင် လေလံပွဲ မကျင်းပရသေးမီမှာပင် လီရှောင်သည် လျှို့ဝှက်ဆန်းကြယ်သော ကြေးနီပြားကို ဝယ်ယူရန် ယွမ်ကျောက်တုံး တစ်သန်းကို အကုန်အကျ ခံလိုနေခဲ့၏။

လီရှောင်၏ အမြင်တွင် ထိုကြေးနီပြား၏ တန်ဖိုးသည် ကပ်ဘေးဆေးလုံးထက်ပင် မြင့်မားနေပါသလော။

“သခင်လေး ကျွန်တော်တို့ရော ဝင်ပါကြမလား”

ထိုအခိုက်တွင် ရွှယ်ဝူရှ၏ အနောက်တွင် လိုက်ပါလာသည့် မဟာယာန တစ်ပိုင်းအဆင့် ကျင့်ကြံသူ တစ်ဦးက ခပ်တိုးတိုး မေးလိုက်သည်။

အကယ်၍ ထိုကောင်လေး တစ်ဦးတည်းသာ ကြေးနီပြားကို စိတ်ဝင်စားနေလျှင် သူတို့အနေဖြင့် ဂရုစိုက်နေမည် မဟုတ်ပေ။

သို့သော် ယခုအခါတွင်မူ ကျိုလီအင်မော်တယ်ဂိုဏ်းမှ လီရှောင်သည်ပင် ကြေးနီပြားကို စိတ်ဝင်စားနေပုံ ရ၏။

ဤအချက်ကို ထောက်လျှင် ကြေးနီပြားသည် မည်သည့်နည်းနှင့်မျှ မရိုးရှင်းသည်မှာ ထင်ရှားနေခဲ့သည်။

“မလိုပါဘူး.. ငါစိမ်းလန်းသောမြစ် ကုန်သွယ်ရေးအဖွဲ့ကို လာတဲ့ ခရီးစဥ်မှာ အစကနေ အဆုံးအထိ ရည်ရွယ်ချက် တစ်ခုပဲ ရှိတယ်.. အဲဒါက ကပ်ဘေးဆေးလုံးကို အရယူဖို့ပဲ”

ရွှယ်ဝူရှက ခပ်ယဲ့ယဲ့ပြုံးကာ ပြောလိုက်သည်။

“လီရှောင်က အဲဒီကောင်လေးနဲ့ တိုက်ခိုက်ချင်တယ် ဆိုရင်လည်း တိုက်ခိုက်ပါစေ.. တကယ်လို့ သူက ကြေးနီပြားကို ဝယ်ဖို့အတွက် ယွမ်ကျောက်တုံး တစ်သန်း အကုန်အကျ ခံလိုက်မယ်ဆိုရင် ကပ်ဘေးဆေးလုံးကို လေလံအပြိုင် ဆွဲတဲ့အခါ ငါတို့အတွက် ပိုပြီး အကျိုးရှိစေလိမ့်မယ်”

စိမ်းလန်းသောမြစ် မြို့သို့ ရောက်ရှိလာပြီးနောက်တွင် ရွှယ်ဝူရှသည် ကပ်ဘေးဆေးလုံး အတွက် လေလံပွဲတွင် သူ အဓိက ယှဥ်ပြိုင်ရမည့် ပြိုင်ဘက်များကို ရှာဖွေထားခဲ့သည်။

ကျိူလီအင်မော်တယ်ဂိုဏ်းမှ လီ‌ရှောင်သည် သူ၏ အကြီးမားဆုံး ပြိုင်ဘက်များထဲမှ တစ်ဦး ဖြစ်သည်မှာ သံသယဖြစ်ဖွယ်ရာမရှိပေ။

ယခုအခါတွင် လီရှောင်သည် ဤလျှို့ဝှက်ဆန်းကြယ်သော ကြေးနီပြား အတွက် ယွမ်ကျောက်တုံး တစ်သန်းပင် အကုန်အကျခံရန် ဆန္ဒ ရှိနေသည်မှာ သူ့အတွက် ဝမ်းသာစရာပင် မဟုတ်ပါလော။

“မင်းက ကျိုလီအင်မော်တယ်ဂိုဏ်းက လီရှောင် မဟုတ်လား.. ဒါပေမဲ့ စိတ်မကောင်းပါဘူး.. ငါ ဒီကြေးနီပြားကို ဝယ်ပြီးပြီ. အခု မင်း လုပ်ရပ်က ဘာသဘောလဲ”

“ဟားဟား ငါလည်း ဒီကြေးနီပြားကို စိတ်ဝင်စားသွားလို့ပါ.. မိတ်ဆွေအနေနဲ့ ငါ့ကို မျက်နှာသာပေးပြီး ဒီကြေးနီပြားကို ပေးနိုင်မယ်လို့ မျှော်လင့်ပါတယ်.. ဒါဆိုရင် လီရှောင်က မိတ်ဆွေကို ကျေးဇူးတင်မိမှာပါ”

လီရှောင်က ကျန်းချန်ကို ကြည့်ကာ ပြုံး၍ ပြောလိုက်သည်။

ကျိုလီအင်မော်တယ်ဂိုဏ်း၏ နံပါတ်တစ် ပါရမီရှင်တစ်ဦး အနေဖြင့် လီရှောင်သည် သူ၏ နာမည်ဂုဏ်သတင်း အပေါ်တွင် အလွန်တရာ ယုံကြည်မှု ရှိသည်။

အင်မော်တယ် ကျင့်ကြံခြင်းစကြဝဠာ တစ်ခုလုံးတွင်ပင် သူ့ကို မျက်နှာသာမပေးရဲသူမှာ အလွန်တရာပင် ရှားပါးလှ၏။

“လီရှောင်.. မင်း ကိုယ့်ကိုယ်ကိုယ် အထင်ကြီးလွန်းနေပြီ.. ငါက မင်းနဲ့ မရင်းနှီးဘဲ မင်းကို ဘာလို့ မျက်နှာသာပေးရမှာလဲ”

ကျန်းချန်က နှာခေါင်းရှုံ့ကာ အေးစက်စက် ပြောလိုက်သည်။

သူ၏ မျက်ဝန်းတွင် ဒေါသရိပ်များ ဖြစ်ပေါ်လာခဲ့၏။

“အခုချက်ချင်း ငါ့ရဲ့ ကြေးနီပြားကို ပြန်ပေးစမ်း”

အခန်း(၂၅၀၅)ပြီး၏။

အခန်း(၂၅၀၆)

“စီနီယာ ကျွန်တော်လည်း ဒီကြေးနီပြားကို စိတ်ဝင်စားလို့ပါ.. ဒီကြေးနီပြားကို ကျွန်တော့်ဆီ ရောင်းပေးနိုင်မလား”

လီရှောင်က ကျန်းချန်ကို လျစ်လျူရှုကာ မီးခိုးရောင်ဝတ်ရုံဝတ် အဘိုးအိုကို တိုက်ရိုက်ပင် ပြောလိုက်သည်။

“သခင်လေးလီရှောင်.. သခင်လေးက ကုန်သွယ်ရေးစျေးရဲ့ စည်းမျဥ်းတွေကို ချိုးဖောက်နေတာပဲ.. ဒါက စိမ်းလန်းသောမြစ် ကုန်သွယ်ရေးအဖွဲ့ရဲ့ နယ်မြေ ဆိုတာ သခင်လေး သိသင့်တယ်.. သခင်‌လေးက ကျိုလီအင်မော်တယ်ဂိုဏ်းရဲ့ အဖွဲ့ဝင်တစ်ယောက် ဖြစ်နေရင်တောင် ဒီနေရာမှာတော့ ထိန်းထိန်းသိမ်းသိမ်း နေထိုင်သင့်တယ်”

မီးခိုးရောင်ဝတ်ရုံဝတ် အဘိုးအိုက ခေါင်းခါရမ်းလိုက်ပြီး တည်ငြိမ်စွာ ပြောလိုက်သည်။

“ငါ ဒီကြေးနီပြားကို ခုနကပဲ ဒီလူငယ်လေးဆီ ရောင်းလိုက်ပြီးပြီ.. ဒါကြောင့် သူ့ဆီ ကြေးနီပြား ပြန်ပေးလိုက်ပါ”

ထိုအခိုက်အတန့်တွင် လီ‌ရှောင်၏ မျက်ဝန်းထဲ၌ အေးစက်စက် အလင်းတန်းတစ်ခု ယှက်သန်းသွားခဲ့သည်။

အဘိုးအိုက သူ့ကို မျက်နှာသာပေးမည်ဟု သူထင်ထားခဲ့သော်လည်း လက်တွေ့တွင်မူ ထိုသို့ မဟုတ်ချေ။

ထို့ကြောင့် လီရှောင်က ဘာမှ ထပ်မပြောတော့ဘဲ ကျန်းချန်ကို တိုက်ရိုက်ပင် ကြည့်လိုက်သည်။

“ဒီကမိတ်ဆွေ ငါ့ကို ကြေးနီပြားပေးလိုက်တာက မင်းအတွက် အကောင်းဆုံးပဲ.. ကြေးနီပြားလေး တစ်ခုအတွက်နဲ့ မစော်ကားသင့်တဲ့လူကို မစော်ကားမိစေနဲ့.. ငါနဲ့ ရန်သူလုပ်တာက ဥာဏ်ရှိတဲ့ ရွေးချယ်မှုမဟုတ်ဘူး”

ထိုစကားကိုကြားလျှင် ကျန်းချန်သည် ခံစားချက် ကင်းမဲ့သော အမူအရာဖြင့် အေးစက်စက် ပြောလိုက်သည်။

“လီရှောင်.. ငါ နောက်ဆုံးတစ်ကြိမ် ထပ်ပြောမယ်.. ကြေးနီပြားကို ငါ့ဆီ ပြန်ပေးစမ်း”

လီရှောင်၏ နှုတ်ခမ်းထောင့်တွင် အေးစက်စက်အပြုံး တစ်ခု ဖြစ်ပေါ်လာခဲ့သည်။

“တကယ်လို့ ငါက မပေးဘူးဆိုရင်ရော”

ထိုအခိုက်တွင် ကျန်းချန်၏ ပုံရိပ်သည် လက်ခနဲ ဖြစ်သွားခဲ့ပြီး နေရာကနေ ရုတ်တရက် ပျောက်ကွယ်သွားခဲ့သည်။

နောက်ထပ် တစ်ခဏတွင် သူ၏ ပုံရိပ်သည် လီရှောင်၏ ရှေ့တွင် တစ္ဆေတစ်ကောင်နှယ် ရိပ်ခနဲ ပေါ်လာခဲ့ပြီး ကြေးနီပြားကို ဆုပ်ကိုင်ထားသော လီရှောင်၏ လက်ဖဝါးကို မြဲမြံစွာ ချုပ်ကိုင်လိုက်သည်။

ရုတ်တရက် ဖြစ်ပေါ်လာသော မြင်ကွင်းသည် ပတ်ဝန်းကျင်ရှိ လူအားလုံးကို အံ့အားသင့်သော အမူအရာများ ဖြစ်ပေါ်စေခဲ့၏။

ဤနေရာတွင် ရှိနေသူ အားလုံးသည် လီရှောင် မည်သူမည်ဝါဖြစ်သည်ကို ကောင်းစွာ သိရှိထားကြသည်။

လီရှောင်သည် ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းထဲမှ ကျိုလီအင်မော်တယ်ဂိုဏ်း၏ နံပါတ်တစ် ပါရမီရှင်တစ်ဦး ဖြစ်သည်။

အင်မော်တယ် ကျင့်ကြံခြင်း စကြဝဠာ တစ်ခုလုံးဖြင့် ကြည့်လျှင်ပင် လီရှောင်ကို ယှဥ်နိုင်သူမှာ အလွန်တရာပင် ရှားပါးလှ၏။

ကပ်ဘေးအဆင့် ကျင့်ကြံသူများထဲတွင် လီရှောင်၏ တိုက်ခိုက်ရေးစွမ်းရည်သည် ပြိုင်ဘက်ကင်းဟုပင် အမွှန်းတင်ခံရပြီး မဟာယာန တစ်ပိုင်းအဆင့် ကျင့်ကြံသူများနှင့်ပင် ရင်ဆိုင်နိုင်စွမ်း ရှိသည်။

ဤကဲ့သို့ ကပ်ဘေးအဆင့် အထွတ်အထိပ်တွင် ရှိသည့် ပြိုင်ဘက်ကင်း ပါရမီရှင်၏ လက်ဖဝါးကို ချုပ်ကိုင်နိုင်ခဲ့ခြင်းသည် တကယ်ကို မယုံကြည်နိုင်စရာပင်။

သူ့ရှေ့မှ လျှို့ဝှက်ဆန်းကြယ်သော လူငယ်သည် မည်သည်နည်းနှင့်မျှ သာမန် လူတစ်ယောက် မဟုတ်သည်မှာ ထင်ရှားနေခဲ့၏။

“မင်းမှာ ဒီလိုစွမ်းရည် ရှိနေလိမ့်မယ်လို့ ငါမထင်ထားခဲ့ဘူး.. ဒါက ငါ့ကို အနည်းငယ် အံ့အားသင့်စေတယ်”

ကျန်းချန်က သူ၏ လက်ဖဝါးကို ချုပ်ကိုင်ထားသည်အား မြင်လျှင် လီရှောင်၏ အေးစက်စက် မျက်ဝန်းထဲတွင် အံ့အားသင့်သော အရိပ်အယောင်များ ဖြစ်ပေါ်လာခဲ့သည်။

ကျိုလီအင်မော်တယ်ဂိုဏ်း၏ နံပါတ်တစ် ပါရမီရှင် တစ်ဦးအပြင် ကပ်ဘေး အထွတ်အထိပ်အဆင့် ကျင့်ကြံသူတစ်ဦး အနေဖြင့် လီရှောင်သည် သူ၏ စွမ်းရည် အပေါ်တွင် အလွန်တရာ ယုံကြည်မှု ရှိသည်။

သို့ရာတွင် သူ့ရှေ့မှ လျှို့ဝှက်ဆန်းကြယ်သော လူငယ်သည် သူ၏ လက်ဖဝါးကိုပင် လျှပ်တစ်ပြက်အတွင်း ချုပ်ကိုင်နိုင်ခဲ့သည်။

သာမန် ကပ်ဘေးအထွတ်အထိပ်အဆင့် ကျင့်ကြံသူ တစ်ဦးပင် ထိုကဲ့သို့ အလွယ်တကူ မလုပ်ဆောင်နိုင်သည်မှာ သေချာ၏။

ဤကဲ့သို့သော လူမျိုးကို အင်မော်တယ် ကျင့်ကြံခြင်းစကြဝဠာ တစ်ခုလုံးဖြင့် ကြည့်လျှင်ပင် ထိပ်တန်း အင်မော်တယ် ဂိုဏ်းကြီး ဆယ်ဂိုဏ်းကသာ လေ့ကျင့်ပေးနိုင်လိမ့်မည် ဖြစ်သည်။

သို့သော်လည်း လီရှောင်သည် ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းမှ ထိပ်တန်း ပါရမီရှင် အားလုံးကို ကောင်းစွာ သိရှိထားခဲ့၏။

ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းထဲတွင် မည်သည့် အင်အားစုက ဤကဲ့သို့ ပြိုင်ဘက်ကင်း ပါရမီရှင်ကို ပိုင်ဆိုင်ထားမှန်း သူ အမှန်တကယ် စဥ်းစား၍ မရခဲ့ပေ။

သို့သော်လည်း လီရှောင် အသေအချာ သိရှိထားသည်မှာ အင်မော်တယ် ကျင့်ကြံခြင်းစကြဝဠာ၏ ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းသည် အပြင်ပန်းတွင် မြင်တွေ့ရသကဲ့သို့ ရိုးရှင်းခြင်း မရှိခြင်းပင်။

သာမန်လူများသည် သူ့ကို ကျိုလီအင်မော်တယ်ဂိုဏ်း၏ နံပါတ်တစ် ပါရမီရှင်ဟု ဆိုကြသော်လည်း ကျိုလီအင်မော်တယ်ဂိုဏ်းတွင် သူ့ထက်ပင် ပိုမို ကြောက်စရာကောင်းသည့် တည်ရှိမှုမျိုးကို ဝှက်ထားသေးမှန်း မည်သူ သိနိုင်ပါမည်နည်း။

ယင်းကြောင့် ဤကောင်လေးသည်လည်း အင်မော်တယ်ဂိုဏ်းကြီး တစ်ဂိုဏ်းဂိုဏ်း၏ လျှို့ဝှက်စွာ ပျိုးထောင်ထားသည့် ပါရမီရှင်တစ်ဦး ဖြစ်နိုင်ပေသည်။

ယခုတစ်ကြိမ် ကျင်းပမည့် လေလံပွဲတွင် သူ၏ ပြိုင်ဘက်က တစ်ဦးတည်းသာ ရှိမည်ဟု လီရှောင် မူလက ထင်ခဲ့သည်။

သို့သော်လည်း ယခုအခါတွင် နောက်ထပ် တစ်ဦး ထပ်မံ တိုးလာခဲ့ချေပြီ။

“စိမ်းလန်းသောမြစ်မြို့မှာ ဒီလိုလူမျိုး ရှိနေလိမ့်မယ်လို့ မထင်ထားခဲ့ဘူး.. ဒီခရီးစဥ်က ပိုပြီး စိတ်ဝင်စားဖို့ ကောင်းလာပြီ”

အချင်းများနေသော ကျန်းချန်တို့ နှစ်ဦးကို ကြည့်ရင်း ရွှယ်ဝူရှ၏ မျက်ဝန်းထဲတွင် ထူးဆန်းသော အရိပ်အယောင် တစ်ခု ဖြစ်ပေါ်လာခဲ့သည်။

ကျန်းချန်က လီရှောင်ကို အေးစက်သော မျက်ဝန်းများဖြင့် စိုက်ကြည့်လိုက်၏။

“လီရှောင်.. မင်းက ကျိုလီအင်မော်တယ်ဂိုဏ်းရဲ့ နံပါတ်တစ်ပါရမီရှင် ဖြစ်တဲ့အတွက် တခြားလူတွေက မင်းကို ကြောက်ရွံ့ကြပေမဲ့ အဲဒီ ဂုဏ်ဒြပ်တွေက ငါ့ရှေ့မှာတော့ ဘာမှ အသုံးမဝင်ဘူး.. ငါ မင်းနဲ့ ဒီမှာ အချိန်ဖြုန်းဖို့ စိတ်မပါဘူး.. အခုချက်ချင်း ကြေးနီပြားကို လွှဲပေးမယ် ဆိုရင် အချိန်မီသေးတယ်”

“ဟားဟား အတော်လေး စိတ်ဝင်စားဖို့ ကောင်းတာပဲ”

လီရှောင်၏ မျက်နှာပေါ်ရှိ အပြုံးသည် ပို၍ပင် အေးစက်လာခဲ့သည်။

“ဒီနှစ်တွေအတွင်းမှာ ငါ့ရှေ့မှာ ဒီလိုစကားမျိုး ပြောရဲတာ မင်း ပထမဆုံးပဲ”

စကားဆုံးသည်နှင့် လီရှောင်၏ မျက်ဝန်း အတွင်းကနေ မှော်ဆန်သော အလင်းတန်း တစ်ခု ပွင့်ထွက်လာခဲ့သည်။

မကြာမီမှာပင် ထိုနေရာရှိ အခြေအနေသည် ရပ်တန့်သွားသလို ဖြစ်သွားခဲ့ပြီး ကျန်းချန်တို့ နှစ်ဦးသည် လှုပ်ရှားမှု မရှိဘဲ ကျောက်ရုပ်များ ကဲ့သို့ ရပ်နေခဲ့ကြသည်။

ဤအခိုက်အတန့်တွင် ကုန်သွယ်ရေးစျေး၏ တတိယအလွှာ တစ်ခုလုံးသည် တစပြင်နှယ် တိတ်ဆိတ်သွားခဲ့ပြီး လူတိုင်း၏ အကြည့်သည် ကျန်းချန်တို့ နှစ်ဦး ကိုယ်ပေါ်သို့ ကျရောက်သွားခဲ့သည်။

အချိန်မည်မျှ ကြာသွားမှန်းပင် မသိရပေ။

လီရှောင်ကို ချုပ်ကိုင်ထားသော ကျန်းချန်၏ လက်ဖဝါးသည် ရုတ်တရက် ပြင်းပြင်းထန်ထန် ညှစ်ချလိုက်ရာ လီရှောင်၏ လက်ဖဝါး တစ်ခုလုံးသည် အင်အားမဲ့သွားခဲ့ပြီး ကိုင်ထားသော ကြေးနီပြားကို လွှတ်ချလိုက်ရသည်။

ကျန်းချန်က ရုတ်တရက် မျက်လုံးဖွင့်လိုက်ပြီး ကြေးနီပြားကို လက်ထဲသို့ ဖမ်းယူလိုက်သည်။

ကျန်းချန်၏ ဆန့်ကျင်ဘက်မှ လီရှောင်ကမူ ခြေလှမ်း ငါးလှမ်းခန့် နောက်သို့ ဆုတ်သွားခဲ့ရပြီး မျက်နှာတစ်ခုလုံး ဖြူဖျော့သွားခဲ့သည်။

ဤမြင်ကွင်းကို မြင်လျှင် ထိုနေရာရှိ ကြည့်ရှုနေသူအများအပြားသည် အသက်ကို ခပ်ပြင်းပြင်း ရှူရှိုက်လိုက်ကြရသည်။

ဂုဏ်သိက္ခာကြီးမားသော ကျိုလီအင်မော်တယ်ဂိုဏ်း၏ နံပါတ်တစ် ပါရမီရှင် ဖြစ်ပြီး ကပ်ဘေးအဆင့် ကျင့်ကြံသူများထဲတွင် ပြိုင်ဘက်ကင်းဟု ကျော်ကြားသူသည် လျှို့ဝှက်ဆန်းကြယ်သော လူငယ်လေးနှင့် ရင်ဆိုင်ရာတွင် အမှန်တကယ်ပင် ရှုံးနိမ့်သွားခဲ့ရသည်။

“ဒါက တကယ်ကို မယုံနိုင်စရာပဲ”

“ဒီလျှို့ဝှက်ဆန်းကြယ်တဲ့ လူငယ်ရဲ့ နောက်ခံက ဘာများ ဖြစ်နေမလဲ”

“ဘာလို့ ဒီလောက်တောင် ကြောက်စရာကောင်းတဲ့ စွမ်းရည်မျိုးကို ပိုင်ဆိုင်ထားရတာလဲ”

“မင်းက တကယ် အတင့်ရဲတာပဲ”

လီရှောင်၏ အနောက်မှ အဘိုးအိုနှင့် အနက်ရောင်ယူနီကွန်းတို့သည် လီရှောင်၏ နံဘေးသို့ တိုက်ရိုက်ပင် ရောက်ရှိလာကြသည်။

မဟာယာန တစ်ပိုင်းအဆင့် ကျင့်ကြံသူ နှစ်ဦး၏ အားကောင်းသော အရှိန်အဝါသည် ကုန်သွယ်ရေးစျေး၏ တတိယအလွှာ တစ်ခုလုံးသို့ တမဟုတ်ချင်း ပျံ့နှံ့သွားခဲ့သည်။

“လီရှောင်.. ကုန်သွယ်ရေးစျေးကို တည်ထောင်ကတည်းက ဒီမှာ ဘယ်သူမှ ပြဿနာမရှာရဲဘူး.. မင်းက ကျူလီအင်မော်တယ်ဂိုဏ်းရဲ့ အဖွဲ့ဝင်တစ်ဦး ဖြစ်နေရင်တောင် ဒီအကျိုးဆက်ကို တာဝန်ယူနိုင်မှာ မဟုတ်ဘူး.. ဒါကြောင့် အခုပဲ ရပ်တန့်လိုက်ပါ”

ထိုအခိုက်အတန့်တွင် ကြေးနီပြားကို ရောင်းချခဲ့သော မီးခိုးရောင်ဝတ်ရုံဝတ် အဘိုးအိုထံကနေ အေးစက်စက် စကားသံ ထွက်ပေါ်လာခဲ့သည်။

“ဒီကိစ္စကို ငါမေ့လိုက်မှာမဟုတ်ဘူး.. မင်းကို ငါ မှတ်ထားလိုက်ပြီ”

လီရှောင်က ကျန်းချန်ကို စူးစိုက်ကြည့်လိုက်ပြီး သူ၏ နံဘေးရှိ လူနှစ်ဦးကို ပြောလိုက်သည်။

“မင်းတို့နှစ်ယောက် နောက်ဆုတ်လိုက်ကြ”

“သွားစို့”

ကျန်းချန်က လီရှောင်ကို ဂရုစိုက်မနေဘဲ ရွှယ်ချန်ကျဲကို ခေါ်ကာ တတိယအလွှာ၏ တံခါးဝ ဆီသို့ လျင်မြန်စွာ လျှောက်လှမ်းသွားခဲ့သည်။

သို့ရာတွင် သူက လီရှောင်၏ နံဘေးမှ ဖြတ်သွားချိန်တွင် ခြေလှမ်းကို အနည်းငယ် ရပ်တန့်လိုက်ပြီး သူတို့ နှစ်ဦးတည်းသာ ကြားနိုင်လောက်သော လေသံဖြင့် ပြောလိုက်၏။

“ငါ့ကို ရန်လာမစနဲ့.. မဟုတ်ရင် မင်း စိမ်းလန်းသောမြစ်မြို့ကနေ အသက်ရှင်လျက် ပြန်ထွက်သွားနိုင်မှာ မဟုတ်ဘူး”

ထိုစကားကို ပြောပြီးသည်နှင့် ကျန်းချန်သည် လီရှောင်၏ အလွန်အမင်း သုန်မှုန်နေသော မျက်နှာကို ဂရုစိုက်မနေတော့ဘဲ ရွှယ်ချန်ကျဲနှင့် အတူ လူမြင်ကွင်းကနေ ချက်ချင်းဆိုသလို ပျောက်ကွယ်သွားခဲ့သည်။

ကျန်းချန်တို့နှစ်ဦး ထွက်ခွာသွားသည်ကို သုန်မှုန်သော အမူအရာဖြင့် ငေးကြည့်နေပြီးနောက်တွင် လီရှောင်၏ မျက်ဝန်းထဲ၌ ကောက်ကျစ်သော အပြုံးတစ်ခု ဖြစ်ပေါ်လာခဲ့သည်။

“ငါ လီရှောင်က တစ်နေ့နေ့မှာ ခြိမ်းခြောက်ခံရလိမ့်မယ်လို့ မထင်ထားခဲ့ဘူး.. ဒီခရီးစဥ်က တကယ်ကို စိတ်ဝင်စားဖို့ကောင်းနေပြီ.. ဒီနှစ်ယောက်ရဲ့ နောက်ခံကို အခုချက်ချင်း စုံစမ်းလိုက်.. လေလံပွဲ မတိုင်ခင် သူတို့ရဲ့ အသေးစိတ် အချက်အလက်တွေကို ငါသိချင်တယ်”

အခန်း(၂၅၀၆)ပြီး၏။