အခန်း (၂၅၀၇-၂၅၀၈)

အခန်း(၂၅၀၇)

ကုန်သွယ်‌ရေးစျေး၏ တတိယအလွှာမှ ထွက်လာပြီးနောက်တွင် ကျန်းချန်သည် စျေးအတွင်း၌ အချိန်အကြာကြီး ဆက်လက် မနေထိုင်တော့ပေ။

အဆုံးသတ်တွင် ကျိုလီအင်မော်တယ်ဂိုဏ်းမှ လီရှောင်သည် သူ၏လက်ထဲမှ ကြေးနီပြားကို အလွန်အမင်း စိတ်ဝင်စားနေပုံရ၏။

ဤစိမ်းလန်းသောမြစ် မြို့အတွင်း၌ လီရှောင်သည် အလွယ်တကူ လုယူရဲမည် မဟုတ်သော်လည်း "မဖြစ်နိုင်တာ ဘာမှမရှိဘူး" ဟူသော စကားအတိုင်းပင် သူ့အနေဖြင့် သတိထားရလိမ့်မည် ဖြစ်သည်။

လီရှောင်သာ စတင် လှုပ်ရှားလာမည် ဆိုလျှင် ကပ်‌ဘေး အထွတ်အထိပ် အဆင့်သို့ ရောက်ရှိနေသည့် ပါရမီရှင် တစ်ဦးနှင့် မဟာယာန တစ်ပိုင်းအဆင့် ကျင့်ကြံသူ နှစ်ဦးသည် သူ့အတွက် ပြဿနာများစွာ ပေးစွမ်းနိုင်ပေသည်။

ထို့အပြင် နံဘေးတွင် ရွှယ်ဝူရှလည်း ရှိနေသေး၏။

အကယ်၍ သူနှင့် ရွှယ်ချန်ကျဲသာ လီရှောင်တို့နှင့် အစွမ်းကုန် တိုက်ခိုက်ကြမည် ဆိုလျှင် ရွှယ်ဝူရှသည် သူတို့ မည်သူမည်ဝါဖြစ်မှန်း ရိပ်စားမိသွားနိုင်ပြီး ထိုအချိန်တွင် အခြေအနေသည် ပို၍ပင် ရှုပ်ထွေးသွားပေလိမ့်မည် မဟုတ်ပါလား။

ထိုအကြောင်းကြောင့်ပင် ကျန်းချန်သည် ကုန်သွယ်ရေးစျေးမှ ထွက်ခွာလာပြီးနောက်တွင် ရှဖေး၏ နေအိမ်သို့ တိုက်ရိုက်ပင် ပြန်လာခဲ့သည်။

နေအိမ်သို့ ပြန်ရောက်ပြီးနောက်တွင် ကျန်းချန်သည် ရွှယ်ချန်ကျဲကို တံခါးဝတွင် စောင့်ကြပ်ရန်နှင့် သူ၏ အခန်းထဲသို့ မည်သူ့ကိုမှ အနားမကပ်စေရန် အမိန့်ပေးခဲ့ပြီး အခန်းထဲတွင်သာ အောင်းနေခဲ့သည်။

အခန်းထဲသို့ ရောက်ပြီးနောက်တွင် ကျန်းချန်သည် ချက်ချင်း ဆိုသလိုပင် သူ၏ လက်ဖဝါးကို လှုပ်ရှားလိုက်ရာ ပစ္စည်းနှစ်ခုသည် သူ၏ရှေ့တွင် ပေါ်လာခဲ့၏။

ယင်းမှာ ကြေးနီပြားနှင့် ဒဏ္ဍာရီလာ အင်မော်တယ် ကျောက်တိုင် တို့ပင် ဖြစ်သည်။

“စီနီယာ.. အခု ဒီကြေးနီပြားက ဘာလဲဆိုတာ ကျွန်တော့်ကို ပြောပြလို့ရပြီလား”

ကျန်းချန်သည် သာမန်ထက်ပင် ပိုမို၍ သာမန်ဆန်နေသည့် ကြေးနီပြားကို စူးစမ်းစွာ စိုက်ကြည့်နေခဲ့သည်။

ကြေးနီပြားက မည်သည့်နေရာတွင် ထူးခြားနေသလဲ ဆိုသည်ကို သူ အမှန်တကယ် မမြင်နိုင်ခဲ့ပေ။

“ကောင်လေး မင်းသာ တကယ်လို့ ဒီကြေးနီပြားရဲ့ လျှို့ဝှက်ချက်ကို မြင်နိုင်မယ်ဆိုရင် ဒီပစ္စည်းက မင်းရဲ့လက်ထဲကို ဒီလောက် လွယ်လွယ်နဲ့ ဘယ်ရောက်လာပါ့မလဲ”

အင်မော်တယ်ကျောက်တိုင်၏ ဝိညာဥ်က အထင်အမြင်သေးစွာဖြင့် ပြောလိုက်သည်။

“အင်မော်တယ် ကျင့်ကြံခြင်း စကြဝဠာမှာ အင်မော်တယ်လမ်းစဥ် ပြတ်တောက်သွားတာ နှစ်ပေါင်းများစွာ ကြာမြင့်ခဲ့ပြီ.. ဒီနေရာက မဟာယာနအဆင့် ကျင့်ကြံသူတွေတောင်မှ ဒီကြေးနီပြားရဲ့ မူလအစကို မြင်နိုင်မှာ မဟုတ်ဘူး.. ဒါပေမဲ့ ကျိုလီအင်မော်တယ်ဂိုဏ်းက ဒီကြေးနီပြားဆီကနေ တစ်ခုခုကို ရှာတွေ့သွားပုံပဲ”

ကျန်းချန်က တအံ့တဩ ပြောလိုက်သည်။

“အဲဒီကောင်လေး ရှာတွေ့သွားတာက သူ့ရဲ့နံဘေးမှာ ကျိလင်နတ်ဆိုးသားရဲ့ မျိုးဆက်ဖြစ်တဲ့ သားရဲတစ်ကောင် ရှိနေလို့ပဲ.. အဲဒီ သားရဲရဲ့ သွေးမျိုးဆက်က သိပ်မကောင်းပေမဲ့လည်း စွမ်းရည်တချို့တော့ နိုးထနေခဲ့ပြီ”

ကျန်းချန်က အံ့အားသင့်သွားခဲ့သည်။

“ကျိလင်နတ်ဆိုးသားရဲရဲ့ မျိုးဆက်က အနက်ရောင်ယူနီကွန်းကို ပြောတာလား”

“ဟုတ်တယ်.. အနက်ရောင်ယူနီကွန်းက အလွန်ဆုံး ဒီကြေးနီပြားပေါ်မှာ ရှိတဲ့ အင်မော်တယ် အရှိန်အဝါလောက်ကိုပဲ အာရုံခံနိုင်တာပါ.. ဒီကြေးနီပြားက ဘာလဲဆိုတာ ဒီသားရဲလည်း မသိပါဘူး”

ထိုစကားကိုကြားလျှင် ကျန်းချန်၏ မျက်နှာအမူအရာသည် အနည်းငယ် ပြောင်းလဲသွားခဲ့သည်။

အင်မော်တယ် ကျင့်ကြံခြင်းစကြဝဠာ၏ အင်မော်တယ်လမ်းစဥ်သည် ပြတ်တောက်နေခဲ့ပြီး ထိပ်တန်း အင်မော်တယ်ဂိုဏ်ကြီး ဆယ်ဂိုဏ်းသည် အင်မော်တယ် ဖြစ်လာနိုင်မည့် အခွင့်အရေးများကို အစဥ်မပြတ် ရှာဖွေနေကြသည် ဖြစ်ရာ အင်မော်တယ်နှင့် ပတ်သက်သည့် မည်သည့်အရာကိုမျှ အလွယ်တကူ လက်လွှတ်ခံမည် မဟုတ်ပေ။

အနက်ရောင်ယူနီကွန်း အနေဖြင့် ကြေးနီပြားထဲမှ အင်မော်တယ် အရှိန်အဝါကို ခံစားမိရုံဖြင့်ပင် ကျိုလီအင်မော်တယ်ဂိုဏ်း တစ်ဂိုဏ်းလုံးကို ရူးသွပ်သွားစေရန် လုံလောက်မည်ဖြစ်သည်။

“ပြဿနာပဲ.. သွေးနတ်ဆိုးဂိုဏ်ကိုတောင် မဖြေရှင်းရသေးဘူး ကျိုလီအင်မော်တယ်ဂိုဏ်းကို ရန်စမိပြန်ပြီ”

ကျန်းချန်က သူ့ဘာသာသူ တစ်ကိုယ်တည်း တီးတိုးရေရွတ်လိုက်သည်။

သို့သော်လည်း ကိစ္စက ဤအခြေအနေအထိ ရောက်ရှိနေပြီဖြစ်ရာ ကျန်းချန်သည် အတွေးများမနေတော့ပေ။

ဤကြေးနီပြားတွင် အင်မော်တယ်စွမ်းအင် ပါဝင်၍ ကြေးနီပြားသည် အင်မော်တယ်လောကမှ ပစ္စည်း ဖြစ်နိုင်ပေသည်။

သူ့ကို နောက်တစ်ကြိမ် ထပ်မံ ရွေးချယ်ခိုင်းလျှင်ပင် သူက တုံ့ဆိုင်းမနေဘဲ ကြေးနီပြားကို အရယူရန်သာ ရွေးချယ်မိမည် ဖြစ်သည်။

ကျန်းချန်က ခေါင်းခါရမ်းလိုက်ပြီး အသက်ကို ခပ်ပြင်းပြင်းရှူရှိုက်လိုက်ကာ အင်မော်တယ်ကျောက်တိုင်ကို မေးလိုက်သည်။

“စီနီယာ.. ဒီကြေးနီပြားက ဘာလဲဆိုတာ ကျွန်တော် သိလို့ရမလား”

“ဒီပစ္စည်းက အင်မော်တယ်လောကမှာတော့ ရှားပါးတဲ့ပစ္စည်း မဟုတ်ပါဘူး.. မင်းရဲ့ လက်ရှိစွမ်းရည်က တိုးတက်ဖို့ လိုအပ်နေလို့သာပေါ့.. ဒီလိုမှ မဟုတ်ရင်တော့ ဒီပစ္စည်းက ငါ့မျက်စိထဲမှာ အမှိုက်နဲ့ ဘာမှမခြားဘူး.. ဒါပေမဲ့ မင်းအတွက်တော့ ဒါက အစိတ်အပိုင်းလေး တစ်ခုပဲ ဖြစ်နေရင်တောင် ကြီးမားတဲ့ အခွင့်အရေး တစ်ခုပဲ.. သေချာကြည့်ထား ငါ ဒီပစ္စည်းကို မူလပုံစံ ဖြစ်အောင် ပြန်လည် ပြုပြင်ပေးမယ်”

စကားဆုံးသည်နှင့် အင်မော်တယ်ကျောက်တိုင် ထံကနေ လျှို့ဝှက်ဆန်းကြယ်သော အလင်းတန်းတစ်ခု ထွက်ပေါ်လာခဲ့ပြီး ကြေးနီပြားကို လွှမ်းခြုံသွားခဲ့သည်။

“အစိတ်အပိုင်းလား”

ကျန်းချန်က အင်မော်တယ်ကျောက်တိုင်၏ အလင်းရောင် လွှမ်းခြုံမှုအောက်ရှိ ကြေးနီပြားကို စူးစမ်းစွာ ကြည့်နေခဲ့သည်။

ဤကြေးနီပြားက မည်သည့်အရာ၏ အစိတ်အပိုင်း ဖြစ်နေမလဲ ဆိုသည်ကို သူမသိပေ။

အင်မော်တယ်ကျောက်တိုင်ထံမှ အလင်းတန်းများ လွှမ်းခြုံပြီး သိပ်မကြာမီမှာပင် ပုံသဏ္ဌာန် မှန်မှန်ကန်ကန်နှင့် ကြည်လင်တောက်ပသော ခရစ္စတယ် အစိတ်အပိုင်း တစ်ခုသည် ကျန်းချန်၏ မြင်ကွင်းထဲတွင် ပေါ်လာခဲ့သည်။

ထိုခရစ္စတယ် အစိတ်အပိုင်း၏ အပေါ်တွင် ခပ်ဖျော့ဖျော့ အင်မော်တယ် အလင်းတန်းများ ဖြာထွက်နေခဲ့၏။

ယင်းက အစိတ်အပိုင်း တစ်ခုမျှသာ ဖြစ်သော်လည်း မြင့်မြတ်ပြီး မည်သူမျှ မကျူးကျော်ရဲသည့် ထက်မြက်သော ဓားဆန္ဒများ ထွက်ပေါ်နေခဲ့သည်။

ကျန်းချန်၏ လက်ရှိစွမ်းရည်ဖြင့်ပင် ထိုခရစ္စတယ်အစိတ်အပိုင်းမှ ထွက်ပေါ်လာသည့် ဓားဆန္ဒ အရှိန်အဝါဖိအားအောက်တွင် ကိုယ့်ကိုယ်ကိုယ် သိမ်ငယ်သလို ခံစားမိခဲ့သည်။

“အင်မော်တယ်အရှိန်အဝါ.. ဒါက တကယ့် အင်မော်တယ်အရှိန်အဝါပဲ”

ကျန်းချန်သည် ဤကဲ့သို့ အင်မော်တယ် အရှိန်အဝါကို ထာဝရရှင်သန်ခြင်း နန်းတော်တွင် ခံစားခဲ့ရဖူးသည်။

“စီနီယာ.. ဒါ ဒါက ဘာခရစ္စတယ်ရဲ့ အစိတ်အပိုင်းလဲ

.. ဒါက အင်မော်တယ်လက်နက်ရဲ့ အစိတ်အပိုင်းများလား”

ကျန်းချန်က မှင်တက်ရာကနေ သတိပြန်ဝင်လာပြီးနောက်တွင် တအံ့တဩ မေးလိုက်သည်။

အင်မော်တယ်ကျောက်တိုင်က လေးနက်စွာ ပြန်ဖြေလိုက်၏။

“ဒါက အင်မော်တယ် အစိတ်အပိုင်းရဲ့ လက်နက် မဟုတ်ဘူး.. ဒါက အင်မော်တယ် ခရစ္စတယ်ရဲ့ အစိတ်အပိုင်းပဲ.. မင်းတို့နတ်ဘုရား နယ်မြေက အုပ်စိုးသူအဆင့်နဲ့ အင်မော်တယ်ကျင့်ကြံခြင်း စကြဝဠာက မဟာယာနအဆင့် ကျင့်ကြံသူတွေရဲ့ နောက်ဆုံးအဆင့်က အင်မော်တယ်အဆင့်ကို ထိုးဖောက်ပြီး အင်မော်တယ်လောကကို တက်လှမ်းဖို့ပဲ"

"အင်မော်တယ်တစ်ယောက် ဖြစ်လာတာနဲ့ ထာဝရရှင်သန်နိုင်ပြီး မသေမျိုးဘဝကို ရရှိလိမ့်မယ်.. အင်မော်တယ်တွေ မသေနိုင်တဲ့ အခြေခံအုတ်မြစ်က သူတို့ရဲ့ ခန္ဓာကိုယ်ထဲမှာ အင်မော်တယ် ခရစ္စတယ်တစ်ခုကို ပေါင်းစည်းထားတာကြောင့်ပဲ.. ပြောရရင် အင်မော်တယ် ခရစ္စတယ်က အင်မော်တယ် တစ်ယောက်ရဲ့ စွမ်းအားအနှစ်သာရပဲ”

ကျန်းချန်၏ မျက်ဝန်းများတွင် တောက်ပသော အလင်းတန်းများ လက်ခနဲ ဖြစ်သွားခဲ့သည်။

“စီနီယာ ဒါဆို ကျွန်တော့်ရှေ့က ဒီအစိတ်အပိုင်းက အင်မော်တယ်ခရစ္စတယ်ရဲ့ အစိတ်အပိုင်းပေါ့”

“ဟုတ်တယ်.. ဒါက အင်မော်တယ် တစ်ယောက်ရဲ့ အင်မော်တယ် ခရစ္စတယ် အစိတ်အပိုင်းပဲ.. ဒါ့အပြင် ဒါက ဓားအင်မော်တယ် တစ်ယောက်ရဲ့ အင်မော်တယ် ခရစ္စတယ် အစိတ်အပိုင်းလည်း ဖြစ်တယ်”

အင်မော်တယ်ကျောက်တိုင်က လေးနက်စွာ ပြောလိုက်သည်။

“တကယ်လို့ မင်းသာ ဒီအင်မော်တယ် ခရစ္စတယ်ကို အသုံးပြုလိုက်မယ်ဆိုရင် အုပ်စိုးသူအဆင့်ကို အလွယ်တကူ ထိုးဖောက်နိုင်ပြီး အချိန်တိုအတွင်း အင်မော်တယ်လောကကို တက်လှမ်းနိုင်လိမ့်မယ်”

အင်မော်တယ်ကျောက်တိုင်ထံမှ စကားကိုကြားလျှင် ကျန်းချန်၏ မျက်ဝန်းများသည် အရောင်လက်သွားခဲ့သည်။

ဤအင်မော်တယ်ခရစ္စတယ်ဟု ခေါ်သော အရာသည် နတ်ဘုရားနယ်မြေရှိ နယ်မြေနတ်ဘုရား သလင်းကျောက်နှင့် အနည်းငယ် ဆင်တူသည်မှာ သံသယဖြစ်ဖွယ်ရာ မရှိပေ။

သို့သော် နယ်မြေနတ်ဘုရား သလင်းကျောက်သည် ပေါင်းစည်းယူရခြင်း ဖြစ်ပြီး အင်မော်တယ် ခရစ္စတယ်ကမူ အင်မော်တယ် တစ်ယောက်၏ ခန္ဓာကိုယ်ထဲတွင် တိုက်ရိုက်မွေးဖွားလာခြင်း ဖြစ်ရာ နယ်မြေနတ်ဘုရား သလင်းကျောက်သည် အင်မော်တယ် ခရစ္စတယ်ကို မည်သို့မှ နှိုင်းယဥ်၍ မရနိုင်ပေ။

ကံကောင်းစွာဖြင့် ယခုတစ်ကြိမ်တွင် အင်မော်တယ်ကျောက်တိုင်၏ သတိပေးမှုကြောင့် အင်မော်တယ် ခရစ္စတယ် အစိတ်အပိုင်းကို ဝယ်ယူနိုင်ခဲ့သည်။

ဆိုရလျှင် အင်မော်တယ် ခရစ္စတယ် အစိတ်အပိုင်း၏ တန်ဖိုးသည် ကပ်ဘေးဆေးလုံးထက်ပင် အဆပေါင်းများစွာ ပိုမိုမြင့်မား၏။

ဤတစ်ခေါက်တွင် သူက အင်မော်တယ် ခရစ္စတယ် အစိတ်အပိုင်းကို ရရှိခဲ့၍ ဤခရီးစဥ်သည် အလွန်ပင် ထိုက်တန်နေခဲ့ပြီ ဖြစ်သည်။

ကျန်းချန်က အသက်ကို ခပ်ပြင်းပြင်း ရှူရှိုက်လိုက်ပြီး သူ၏ ရင်ထဲမှ စိတ်လှုပ်ရှားမှုများကို ဖိနှိပ်လိုက်သည်။

သူ၏ မျက်ဝန်းထဲတွင် ထက်ရှသော အလင်းတန်းများ ဖြစ်ပေါ်လာခဲ့၏။

ယခုအခါတွင် သူ၏ စွမ်းရည်သည် အားမနည်းသော်လည်း အင်မော်တယ် ကျင့်ကြံခြင်း စကြဝဠာ၏ မဟာယာနအဆင့် ကျင့်ကြံသူများနှင့် ယှဥ်ပြိုင်ရန် ခဲယဥ်းနေသေးသည်။

ထို့ကြောင့် သူက သူ၏ လှုပ်ရှားမှုများကို အကန့်အသတ်ဖြင့်သာ လှုပ်ရှားနေခဲ့ရသည်။

ဤအင်မော်တယ် ခရစ္စတယ် အစိတ်အပိုင်းဖြင့် ဆိုလျှင် သူက အချိန်တိုအတွင်း အုပ်စိုးသူ အဆင့်ကို ထိုးဖောက်နိုင်ပေလိမ့်မည်။

ထိုအချိန်သို့ ရောက်လျှင် သူ့အနေဖြင့် အင်မော်တယ် ကျင့်ကြံခြင်း စကြဝဠာရှိ မဟာယာနအဆင့် ကျင့်ကြံသူများကို အလွန်အမင်း စိုးရိမ်နေစရာမလိုတော့ဘဲ အင်မော်တယ် ကျင့်ကြံခြင်း စကြဝဠာတစ်ခုလုံးကို ဇောက်ထိုးမိုးမျှော် ဖြစ်အောင် လုပ်ဆောင်နိုင်မည့် စွမ်းအားမျိုး အမှန်တကယ် ပိုင်ဆိုင်သွားလိမ့်မည် ဖြစ်၏။

ကျန်းချန်က တုံ့ဆိုင်းမနေတော့ဘဲ အင်မော်တယ်ကျောက်တိုင်ကို တိုက်ရိုက်ပင် မေးလိုက်သည်။

“စီနီယာ ဒီအင်မော်တယ် ခရစ္စတယ်အစိတ်အပိုင်းရဲ့ စွမ်းအားကို ဘယ်လိုအသုံးပြုရမလဲ ဆိုတာ ကျွန်တော့်ကို ပြောပြပေးပါ”

အခန်း(၂၅၀၇)ပြီး၏။

အခန်း(၂၅၀၈)

အင်မော်တယ်‌ကျောက်တိုင်က အေးစက်စက် ပြောလိုက်သည်။

“မင်းက အခု အင်မော်တယ် မဟုတ်သေးဘူး.. မင်းရဲ့ခန္ဓာကိုယ်ထဲမှာ အင်မော်တယ်စွမ်းအား မရှိသေးတဲ့ အတွက် အင်မော်တယ်ခရစ္စတယ်ရဲ့ စွမ်းအားကို တိုက်ရိုက် စုပ်ယူနိုင်မှာ မဟုတ်ဘူး.. မင်းအနေနဲ့ ဒါကို ဖြည်းဖြည်းချင်း စုပ်ယူမှပဲ ဖြစ်နိုင်လိမ့်မယ်”

ထိုစကားကိုကြားပြီးနောက်တွင် ကျန်းချန်သည် သူ၏‌ရှေ့ရှိ အင်မော်တယ်ခရစ္စတယ် အစိတ်အပိုင်းကို တုံ့ဆိုင်းမှုမရှိ မျိုချလိုက်သည်။

ကျူလီအင်မော်တယ်ဂိုဏ်းမှ လီရှောင်သည် ဤအရာက အင်မော်တယ်ခရစ္စတယ် အစိတ်အပိုင်း ဖြစ်မှန်း မသိသော်လည်း အင်မော်တယ်နှင့် ပတ်သက် ဆက်စပ်နေသည်ကို သိထားခဲ့သည်။

ထို့‌ကြောင့် လီရှောင်သည် လွယ်လွယ်နှင့် လက်လွှတ်ခံမည် မဟုတ်လောက်ပေ။

အင်မော်တယ်ခရစ္စတယ် အစိတ်အပိုင်း အတွက်ဖြင့် လီရှောင်သည် ကျူလီအင်မော်တယ်ဂိုဏ်းမှ မဟာယာနအဆင့် ကျင့်ကြံသူကိုပင် ဆက်သွယ်ပေလိမ့်မည်။

ထို့ကြောင့် ကျန်းချန်သည် အင်မော်တယ်ခရစ္စတယ် အစိတ်အပိုင်းများကို အနည်းငယ်မျှ ချန်ထားရန်ပင် အစီအစဥ် မရှိခဲ့ပေ။

သူက အုပ်စိုးသူအဆင့်သို့ ထိုးဖောက်ရန် အတွက် အင်မော်တယ်ခရစ္စတယ် အစိတ်အပိုင်း၏ စွမ်းအားကို အမြန်ဆုံးအသုံးပြုရမည် မဟုတ်ပါလား။

“ကောင်လေး မင်းရူးနေလား.. အင်မော်တယ်ခရစ္စတယ် အစိတ်အပိုင်းတစ်ခုလုံးကိုတောင် မင်းမျိုချရဲတယ်.. မသေချင်ဘူးဆိုရင် အခုချက်ချင်း မြန်မြန် ထွေးထုတ်စမ်း”

ကျန်းချန်က အင်မော်တယ်ခရစ္စတယ် အစိတ်အပိုင်းကို တစ်လုတ်တည်းဖြင့် မျိုချလိုက်သည်အား မြင်လျှင် အင်မော်တယ်ကျောက်တိုင် ထံမှ ဒေါသတကြီး အော်ဟစ်သံသည် ကျန်းချန်၏ နားထဲတွင် လျင်မြန်စွာ ထွက်‌ပေါ်လာခဲ့သည်။

အင်မော်တယ်ခရစ္စတယ် ဆိုသည်မှာ အင်မော်တယ်တစ်ဦး၏ စွမ်းအားအဆီအနှစ် ဖြစ်ပြီး သာမန် အင်မော်တယ်တစ်ဦး ဖြစ်နေလျှင်ပင် ထိုအထဲ၌ ပါဝင်နေသော စွမ်းအားသည် အလွန်တရာပင် ကြီးမားလှ၏။

ဤအင်မော်တယ်ခရစ္စတယ်သည် အစိတ်အပိုင်း တစ်ခုမျှသာ ဖြစ်သော်လည်း အထဲတွင် ကိန်းအောင်းနေသော စွမ်းအင်သည် အင်မော်တယ်ခရစ္စတယ် အစစ်အမှန်၏ သုံးပုံတစ်ပုံခန့် ရှိနိုင်သည် ဖြစ်ရာ ယင်းသည် နတ်ဘုရင်နဝမအဆင့်သာ ရှိသော ကျန်းချန် အတွက် ခံနိုင်ရည်ရှိမည့်အရာ မဟုတ်ပေ။

“စီနီယာမစိုးရိမ်ပါနဲ့.. ကျွန်တော် ဘာမှမဖြစ်ပါဘူး”

ကျန်းချန်က အင်မော်တယ်ကျောက်တိုင်၏ ဒေါသတကြီးသတိပေးသံကို ကြားလျှင် ခပ်ယဲ့ယဲ့ပြုံးကာ ပြန်ဖြေလိုက်သည်။

အင်‌မော်တယ်ကျောက်တိုင်၏ ဝိညာဥ်သည် အင်မော်တယ်ခရစ္စတယ် အစိတ်အပိုင်း မည်မျှ အစွမ်းထက်သည်ကို သဘာဝကျစွာပင် နားလည်ထားခဲ့သည်။

ထို့ကြောင့် အင်မော်တယ်ခရစ္စတယ်တွင် ကိန်းအောင်းနေသော စွမ်းအားကို ကျန်းချန် ခံနိုင်ရည်မရှိမည်အား စိုးရိမ်နေခဲ့၏။

သို့သော် ကျန်းချန်သည် သူ၏ အခြေအနေကို ကောင်းစွာ သိရှိထားခဲ့သည်။

အဆ ၁၀၀ စနစ်ကို စတင် အသက်သွင်းပြီးကတည်းကပင် ကျန်းချန်သည် မည်သည့်အရာကိုပင် မျိချခဲ့ပါစေ၊ စွမ်းအားများ လျှံထွက်ပြီး ပေါက်ကွဲမည့် လက္ခဏာမျိုး တစ်ခါမှ မရှိခဲ့ဖူးချေ။

ထို့ကြောင့်လည်း အင်မော်တယ်ခရစ္စတယ် အစိတ်အပိုင်းသည် အင်‌မော်တယ်စွမ်းအင် အဆီအနှစ် ဖြစ်နေသည့်တိုင် ကျန်းချန် စိတ်မပူခဲ့ခြင်းပင်။

ကျန်းချန်က အင်မော်တယ်ခရစ္စတယ် အစိတ်အပိုင်းကို မျိုချလိုက်ပြီးနောက်တွင် အင်မော်တယ်ခရစ္စတယ် အစိတ်အပိုင်းသည် ချက်ချင်းဆိုသလိုပင် အလင်းတန်း တစ်ခု အဖြစ်သို့ ပြောင်းလဲသွားခဲ့ပြီး ကျန်းချန်၏ ဒန်တျန် အတွင်းသို့ နစ်မြုပ်သွားခဲ့ကာ ကျန်းချန်၏ ခန္ဓာကိုယ်အတွင်းရှိ ဓားလမ်းစဥ် စွမ်းအင် ပင်လယ်ပြင်ကြီးထဲတွင် လွင့်မျောနေခဲ့သည်။

ထို့နောက်တွင်မူ ဘာမှ ထပ်မဖြစ်တော့ပေ။

ကျန်းချန်၏ စိတ်ထဲတွင် စနစ်၏ သတိပေးချက်များ မထွက်ပေါ်လာသလို ခန္ဓာကိုယ်သည်လည်း မည်သည့်တုံ့ပြန်မှုမှ မရှိခဲ့ချေ။

“ဘယ်လိုဖြစ်တာလဲဟ”

ကျန်းချန်က အချိန်အတော်ကြာအောင် မှင်တက်သွားခဲ့သည်။

ထို့နောက်တွင် သူက အင်မော်တယ်ကျောက်တိုင်ကို မ‌မေးဘဲ မနေနိုင်အောင် ဖြစ်သွားခဲ့သည်။

“စီနီယာ တစ်ခုခုများ အမှားအယွင်းဖြစ်သွားတာလား.. ကျွန်တော်မျိုချလိုက်တာ ဘာလို့ ဘာတုံ့ပြန်မှုမှ မရှိရတာလဲ”

“............”

အင်မော်တယ်ကျောက်တိုင် အတွင်းမှ စကားသံသည် ခဏမျှ တိတ်ဆိတ်သွားခဲ့၏။

သူ၏ မြင်နိုင်စွမ်းဖြင့် ဆိုလျှင် အမှားပြုလုပ်ရန် မည်ကဲ့သို့ ဖြစ်နိုင်ပါမည်နည်း။

ကျန်းချန် မျိုချလိုက်သောအရာသည် ဓားအင်မော်တယ် တစ်ပါး၏ အင်မော်တယ်ခရစ္စတယ် အစိတ်အပိုင်း ဖြစ်သည်မှာ သေချာသလောက်ပင်။

သူ၏ အမြင်တွင် ထိုဓားအင်မော်တယ်၏ စွမ်းအင် အဆီအနှစ်သည် အလွန်တရာ ညံ့ဖျင်းသော်လည်း အင်မော်တယ်ခရစ္စတယ် အစိတ်အပိုင်းတွင် ပါဝင်သော စွမ်းအင်သည် မဟာယာနအဆင့် ကျင့်ကြံသူတစ်ဦးကိုပင် ချက်ချင်းဆိုသလို ပေါက်ကွဲသွားစေရန် လုံလောက်၏။

ကျန်းချန်၏ ကျင့်ကြံခြင်းအဆင့်သည် မဟာယာနအဆင့် ကျင့်ကြံသူများထက်ပင် အဆင့်နိမ့်နေသော်လည်း အင်မော်တယ် ခရစ္စတယ်၏ စွမ်းအားကို ခံနိုင်ရည်ရှိနေခြင်းမှာ အမှန်တကယ်ပင် မယုံကြည်နိုင်စရာ ကောင်းနေခဲ့သည်။

အင်မော်တယ်ကျောက်တိုင် နှုတ်ဆိတ်နေသော အချိန်မှာပင် စနစ်၏ သတိပေးသံသည် ကျန်းချန်၏ စိတ်ထဲတွင် ထွက်ပေါ်လာခဲ့တော့သည်။

“ဒင်.. သင်က အင်မော်တယ်ခရစ္စတယ် အစိတ်အပိုင်းကို မျိုချပြီး အဆ ၁၀၀ နားလည်မှုကို စတင်လိုက်ပါပြီ”

“ဒင်.. သင်က အုပ်စိုးသူ စွမ်းအားကို နားလည်သဘောပေါက်ပြီး အုပ်စိုးသူ စွမ်းအား အတွေ့အကြုံရမှတ် ဆယ်မှတ်ကို အဆ ၁၀၀ ရရှိပါတယ်”

စနစ်၏ သတိပေးချက်က ကျန်းချန်၏ စိတ်ထဲတွင် ပဲ့တင်ထပ်သွားသည်နှင့်အမျှ ကျန်းချန်သည် သူ၏ ခန္ဓာကိုယ် အတွင်းမှ အပြောင်းအလဲများကို ရှင်းလင်းစွာ ခံစားမိလိုက်သည်။

သူ၏ ခန္ဓာကိုယ်အတွင်းတွင် ဓားလမ်းစဥ် နတ်ဘုရင်စွမ်းအားထက် ပိုမို အစွမ်းထက်သော အရာတစ်ခု ရှိလာသကဲ့သို့ ခံစားခဲ့ရ၏။

ယင်းက အစအနမျှသာ ဖြစ်သော်လည်း ခန့်ညားသော ဓားလမ်းစဥ် နတ်စွမ်းအားများနှင့် ကြယ်တာရာများက အလယ်ဗဟိုတွင် ထား၍ ဝန်းရံစောင့်ကြပ်ထားသည် ဖြစ်ရာ ဓားလမ်းစဥ် နတ်စွမ်းအားများကို အုပ်စိုးသည့် ဘုရင်တစ်ပါးနှယ် ဖြစ်နေခဲ့သည်။

“ဒါက အုပ်စိုးသူအဆင့်ရဲ့ စွမ်းအားလား”

အုပ်စိုးသူအဆင့်၏ စွမ်းအားကို ခံစားမိလျှင် ကျန်းချန်သည် ခပ်တိုးတိုး ရေရွတ်မိလိုက်သည်။

အုပ်စိုးသူအဆင့်၏ စွမ်းအားသည် မျှော်လင့်ထားသည့်အတိုင်းပင် နတ်ဘုရင်အဆင့်စွမ်းအားနှင့် လုံးဝကို ကွဲပြားခြားနားနေခဲ့သည်။

ယခုအခါတွင် ကျန်းချန်၏ တိုက်ခိုက်ရေးစွမ်းရည်သည် ယခင်ထက် နှစ်ဆမက တိုးတက်လာခဲ့ပြီ ဖြစ်သည်။

လက်ရှိ စွမ်းရည်ဖြင့်ဆိုလျှင် ကျန်းချန်သည် သာမန် မဟာယာန တစ်ပိုင်းအဆင့် ကျင့်ကြံသူတစ်ဦးနှင့် ရင်ဆိုင်ရလျှင်ပင် အင်မော်တယ်ကျောက်တိုင်၏ စွမ်းအားကို အသုံးမပြုဘဲ တစ်ခဏအတွင်း သတ်ဖြတ်နိုင်မည်ဟု ယုံကြည်ချက် ရှိနေခဲ့သည်။

“အခု ငါ့မှာ အုပ်စိုးသူအဆင့် စွမ်းအား ရှိနေပြီ ဆိုတော့ အုပ်စိုးသူ တစ်ပိုင်းအဆင့်လို့ သတ်မှတ်လို့ရနေပြီ.. င့ါအနေနဲ့ စစ်မှန်တဲ့ အုပ်စိုးသူအဆင့်ကို ထိုးဖောက်ချင်ရင်တော့ ငါ့ခန္ဓာကိုယ်ထဲက နတ်ဘုရင် စွမ်းအား အကုန်လုံးကို အုပ်စိုးသူ စွမ်းအားအဖြစ် ပြောင်းလဲရမယ် ထင်တယ်”

ကျန်းချန်က စိတ်ထဲတွင် အနည်းငယ် တွေးတောလိုက်သည်။

ဤသည်မှာ ဝေးကွာလှသော ခရီးလမ်းတစ်ခု ဖြစ်မည်မှာ သေချာ၏။

ကျန်းချန်က ခေါင်းခါရမ်းလိုက်ပြီး သူ၏ အတွေးများကို ရှင်းထုတ်ကာ သူ၏ ဒန်တျန်ထဲတွင် လွင့်မျောနေသော အင်မော်တယ်ခရစ္စတယ် အစိတ်အပိုင်းကို ကြည့်လိုက်သည်။

“ဒီအင်မော်တယ်ခရစ္စတယ် အစိတ်အပိုင်းထဲက စွမ်းအင်တွေကို ငါသိပ်မစုပ်ယူရသေးဘူး ထင်တယ်”

ကျန်းချန်၏ မျက်ဝန်းများက လက်ခနဲ ဖြစ်သွားခဲ့သည်။

ယခုလေးတင် အင်မော်တယ်ကျောက်တိုင်သည် ဤအင်မော်တယ်ခရစ္စတယ် အစိတ်အပိုင်း၏ စွမ်းရည်က သူ့ကို အုပ်စိုးသူအဆင့်သို့ အလွယ်တကူ ထိုးဖောက်နိုင်မည်ဟု ပြောခဲ့သော်လည်း ယခု သူ့တွင် အုပ်စိုးသူ စွမ်းအား အစအနမျှသာ ရှိ၏။

“အခုမှတော့ ကြိုးစားကျင့်ကြံပြီး အင်မော်တယ်ခရစ္စတယ် အစိတ်အပိုင်းကို သန့်စင်နိုင်မလား စမ်းကြည့်ရမယ်”

ကျန်းချန်က တစ်ကိုယ်တည်း တီးတိုး ရေရွတ်လိုက်သည်။

အင်မော်တယ်ကျောက်တိုင်က အင်မော်တယ်စွမ်းအား မရှိသူတစ်ဦးသည် ခရစ္စတယ်ထဲမှ စွမ်းအားကို မသန့်စင်နိုင်ဟု ပြောခဲ့သော်လည်း သူ့အနေဖြင့် စမ်းကြည့်ရုံမှ တစ်ပါး တခြားနည်းလမ်းမရှိပေ။

သို့သော်လည်း ကျန်းချန်က အင်မော်တယ်ခရစ္စတယ်၏ အစိတ်အပိုင်းများကို သန့်စင်ရန် ကြိုးစားတော့မည့် အချိန်မှာပင် စနစ်၏ နောက်ထပ် သတိပေးချက်တစ်ခုသည် သူ၏ စိတ်ထဲတွင် ထွက်ပေါ်လာခဲ့သည်။

“ဒင်.. သင်က အင်မော်တယ် ခရစ္စတယ် အစိတ်အပိုင်းရဲ့ အားဖြည့်မှုကို ခံရပြီး အုပ်စိုးသူ စွမ်းအား အတွေ့အကြုံရမှတ် ၁၀မှတ်ကို အဆ ၁၀၀ ရရှိပါတယ်”

ကျန်းချန်က ချက်ချင်းဆိုသလိုပင် မှင်တက်သွားခဲ့သည်။

သူ၏ ဒန်တျန်ထဲရှိ အင်မော်တယ် ခရစ္စတယ် အစိတ်အပိုင်းသည် သူ၏ ခန္ဓာကိုယ်အတွင်းရှိ နတ်ဘုရင် စွမ်းအားကို အလိုအလျောက် အားဖြည့်ပေးနိုင်ပြီး အုပ်စိုးသူ စွမ်းအားအဖြစ် တဖြည်းဖြည်း ပြောင်းလဲပေးနိုင်ပုံ ရ၏။

သူ၏ ခန့်မှန်းချက်ကို အတည်ပြုရန် အတွက် ကျန်းချန်သည် ဘာမှမလုပ်ဘဲ တစ်ခဏမျှ စောင့်ဆိုင်းနေခဲ့သည်။

ဆယ်မိနစ်ခန့် အကြာမှာပင် ရင်းနှီးပြီးသား စနစ်၏ သတိပေးချက်သည် ထပ်မံ ထွက်ပေါ်လာခဲ့သည်။

“ဒင်..သင်က အင်မော်တယ်ခရစ္စတယ် အစိတ်အပိုင်းရဲ့ အားဖြည့်ပေးမှုကို ခံရပြီး အုပ်စိုးသူစွမ်းအား အတွေ့အကြုံရမှတ် ၁၀မှတ်ကို အဆ ၁၀၀ ရရှိပါတယ်”

ကျန်းချန်၏ မျက်ဝန်းထဲတွင် အတိုင်းထက်အလွန် ဝမ်းသာသော အရိပ်အယောင်များ ဖြစ်ပေါ်လာခဲ့သည်။

ဤအင်မော်တယ်ခရစ္စတယ် အစိတ်အပိုင်းဖြင့် ဆိုလျှင် သူ၏ ခန္ဓာကိုယ် အတွင်းရှိ အုပ်စိုးသူ စွမ်းအားသည် တိုးပွားလာလိမ့်မည် ဖြစ်သည်။

အကယ်၍ ဤအတိုင်းသာ ဆက်သွားမည်ဆိုလျှင် သူ့အနေဖြင့် ဘာမှလုပ်စရာမလိုဘဲ အင်မော်တယ်ခရစ္စတယ် အစိတ်အပိုင်း၏ အားဖြည့်ပေးမှုအောက်တွင် အုပ်စိုးသူအဆင့်သို့ အလွယ်တကူ ထိုးဖောက်နိုင်ပေလိမ့်မည် မဟုတ်ပါလား။

“လခွမ်း ဘာလဲဟ”

ကျန်းချန်၏ ခန္ဓာကိုယ်အတွင်းမှ အပြောင်းအလဲကို ခံစားမိလျှင် အင်မော်တယ်ကျောက်တိုင်၏ ဝိညာဥ်ထံကနေ တအံ့တဩရေရွတ်သံ ထွက်ပေါ်လာခဲ့သည်။

ထိုကောင်လေးသည် အင်မော်တယ်ခရစ္စတယ် အစိတ်အပိုင်းကို အထိအခိုက်မရှိ မျိုချနိုင်ရုံသာမက အင်မော်တယ်ခရစ္စတယ် အစိတ်အပိုင်း၏ စွမ်းအားကိုလည်း အဆက်မပြတ် စုပ်ယူကာ သန့်စင်နိုင်ခဲ့သည်။

အကယ်၍ ထိုကောင်လေး နေရာတွင် အင်မော်တယ်စစ်စစ် တစ်ဦးသာ ဆိုလျှင် သူ့အနေဖြင့် အံ့ဩစရာမရှိပေ။

သို့သော်လည်း ကျန်းချန်သည် အင်မော်တယ်အဆင့်နှင့် အလွန်တရာ အလှမ်းဝေးလွန်းနေသော ကျင့်ကြံသူ တစ်ဦးသာ ဖြစ်နေသေးသည် မဟုတ်ပါလော။

ဤအခိုက်အတန့်တွင် အင်မော်တယ်ကျောက်တိုင်သည် ဓားအင်မော်တယ်ဧကရာဇ် ရှချင်းက အဘယ်ကြောင့် သူ့ရှေ့မှ ကောင်လေးကို ရွေးချယ်ခဲ့မှန်း အနည်းငယ် နားလည်သွားခဲ့သည်။

ထိုကောင်လေး၏ ခန္ဓာကိုယ် တည်ဆောက်ပုံသည် အမှန်တကယ်ပင် သာမန် မဟုတ်ပေ။

အခန်း(၂၅၀၈)ပြီး၏။