အခန်း (၂၅၀၉-၂၅၁၀)

အခန်း(၂၅၀၉)

ကြီးကြပ်ရေးမှု ရှဖေး၏ နေအိမ်ရှိ ဆိတ်ငြိမ်သော အခန်းတစ်ခန်းထဲတွင် ကျန်းချန်သည် မျက်လုံးများကို မှိတ်ထားပြီး တင်ပျဥ်ခွေကာ ငြိမ်သက်စွာ ထိုင်နေခဲ့သည်။

သူ၏ ခန္ဓာကိုယ်မှ ထွက်ပေါ်နေသာ အရှိန်အဝါသည် ကြောက်မက်ဖွယ်ရာ ကောင်းသော အရှိန်အဟုန်ဖြင့် လျင်မြန်စွာ တိုးတက်နေခဲ့သည်။

အချိန်မည်မျှကြာသွားမှန်း မသိရ‌ပေ။

အဆုံးသတ်တွင် ကျန်းချန်သည် သူ၏ မျက်လုံးများကို ဖြည်းညင်းစွာ ဖွင့်လိုက်သည်။

“သုံးရက်အတွင်းမှာ ငါ့ရဲ့ခန္ဓာကိုယ်ထဲက အုပ်စိုးသူစွမ်းအားက ဆယ်ပုံတစ်ပုံ အထိ ရောက်လာလိမ့်မယ်လို့ မထင်ထားခဲ့ဘူး”

သူ၏ ခန္ဓာကိုယ်အတွင်းမှ အင်အားကို ခံစားမိလျှင် ကျန်းချန်၏ နှုတ်ခမ်း‌ထောင့်တွင် ကျေနပ်သောအပြုံး တစ်ခု ဖြစ်ပေါ်လာခဲ့သည်။

အင်မော်တယ်ခရစ္စတယ် အစိတ်အပိုင်းသည် ခန္ဓာကိုယ်အတွင်းရှိ နတ်ဘုရင်စွမ်းအားကို အားဖြည့်ပေးနိုင်ပြီး အုပ်စိုးသူစွမ်းအား အဖြစ် အလိုအလျောက် ပြောင်းလဲပေးနိုင်မှန်း အတည်ပြုပြီးနောက်တွင် ကျန်းချန်သည် အလဟဿ ထိုင်မနေဘဲ အခြေအနေကို သိရှိရန် ကျင့်ကြံခဲ့သည်။

ချက်ချင်းဆိုသလိုပင် ကျန်းချန်သည် သူ၏ ကိုယ်ပိုင် ကျင့်ကြံမှုကလည်း သူ၏ ခန္ဓာကိုယ်အတွင်းမှ အုပ်စိုးသူစွမ်းအားကို တိုးတက်စေနိုင်ကြောင်း ရှာဖွေ တွေ့ရှိခဲ့သည်။

ထို့ကြောင့် ကျန်းချန်သည် လွန်ခဲ့သော ရက်အနည်းငယ်အတွင်း အာရုံစူးစိုက်ကာ ကျင့်ကြံနေခဲ့သည်။

သုံးရက်မျှသာ ရှိသေးသော အချိန်တွင် ကျန်းချန်၏ ခန္ဓာကိုယ်အတွင်းရှိ နတ်ဘုရင် စွမ်းအားသည် အရည်အသွေးပိုင်းအရ ပြောင်းလဲသွားခဲ့ပြီး ခန္ဓာကိုယ်အတွင်းရှိ စွမ်းအား၏ ဆယ်ပုံတစ်ပုံခန့်ကို အုပ်စိုးသူစွမ်းအားက နေရာယူထားပြီ ဖြစ်သည်။

တစ်နည်းအားဖြင့်ဆိုသော် ဤနှုန်းအတိုင်း ဆက်လက် တိုးတက်သွားမည် ဆိုလျှင် ဆယ့်ငါးရက်ခန့် အာရုံစူးစိုက်၍ ကျင့်ကြံရုံဖြင့် အုပ်စိုးသူအဆင့်ကို ထိုးဖောက်နိုင်ပေလိမ့်မည်။

“ဒီနေ့က စိမ်းလန်းသောမြစ် ကုန်သွယ်ရေးအဖွဲ့ရဲ့ လေလံပွဲနေ့ပဲ.. အရင်ဆုံး လေလံပွဲကို သွားကြည့်မယ်”

ကျန်းချန်က သူ့ဘာသာသူ တစ်ကိုယ်တည်း တီးတိုးရေရွတ်လိုက်ပြီးနောက်တွင် မတ်တတ်ရကာ အခန်းအပြင်ဘက်သို့ လှမ်းထွက်လာခဲ့သည်။

ယခုအခါတွင် သူသည် အင်မော်တယ်ခရစ္စတယ် အစိတ်အပိုင်း၏ အထောက်အပံ့ဖြင့် အုပ်စိုးသူ တစ်ပိုင်း အဆင့်သို့ အောင်မြင်စွာ ရောက်ရှိနေပြီ ဖြစ်သည်။

သူ့အတွက် အုပ်စိုးသူအဆင့်သို့ ထိုးဖောက်ရန်မှာ လွယ်ကူသောကိစ္စ ဖြစ်နေပြီ ဖြစ်ရာ ကပ်ဘေးဆေးလုံး အပေါ်တွင် စိတ်ဝင်စားမှု ကြီးကြီးမားမား မရှိတော့ပေ။

သို့သော်လည်း ဤနေရာသို့ ရောက်နေပြီ ဖြစ်၍ ကျန်းချန်သည် စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲကို ကြည့်ရှုလိုနေသေးသည်။

အဆုံးသတ်တွင် စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲတွင် ထွက်ပေါ်လာနိုင်သည့် အရာများသည် မည်သည့်နည်းနှင့်မျှ သာမန်ပစ္စည်းများ မဟုတ်ပေ။

ထိုအထဲတွင် အင်မော်တယ်ခရစ္စတယ် အစိတ်အပိုင်းနှင့် ဆင်တူသော အရာမျိုးပင် ပေါ်လာနိုင်ပေသည်။

အကယ်၍ လေလံပွဲတွင် အင်မော်တယ်ခရစ္စတယ် အစိတ်အပိုင်းနှင့် ဆင်တူသော ရတနာတစ်ခု သို့မဟုတ် နှစ်ခုလောက် ရရှိနိုင်မည် ဆိုလျှင် သူ့အနေဖြင့် အကျိုးအမြတ်အမြောက်အများ ရရှိပေလိမ့်မည် မဟုတ်ပါလား။

အခန်းထဲမှ ထွက်လာပြီးနောက်တွင် ကျန်းချန်သည် ရွှယ်ချန်ကျဲနှင့်အတူ စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲကျင်းပသည့် နေရာသို့ တိုက်ရိုက်ပင် သွားရောက်ခဲ့သည်။

ကပ်ဘေးဆေးလုံး၏ ကျော်ကြားမှုကြောင့် စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲသည် စိမ်းလန်းသောမြစ်ကောင်းကင်နယ်မြေ ပတ်ဝန်းကျင်ရှိ အခြားသော နယ်မြေအသီးသီးမှ အစွမ်းထက် ကျင့်ကြံသူများကို ဆွဲဆောင်နိုင်ခဲ့သည်။

ထို့ကြောင့် ကျန်းချန်တို့ နှစ်ယောက် လေလံပွဲ တံခါးဝသို့ ရောက်ရှိလာသောအခါတွင် လူအုပ်ကြီးသည် ပြည့်နှက်နေခဲ့ချေပြီ။

“ကပ်ဘေးဆေးလုံးရဲ့ ဆွဲဆောင်မှုက တကယ်ကို မသေးဘူးပဲ"

"ကပ်ဘေးဆေးလုံး ဆိုတာက တိမ်မြုပ်ပျောက်ကွယ်နေတဲ့ ရှေးဟောင်းဆေးလုံးတစ်မျိုးပဲ.. အဲဒီဆေးလုံးရဲ့စွမ်းအားက မဟာယာနအဆင့် ကျင့်ကြံသူတစ်ဦးကို ဖန်တီးပေးနိုင်တာနဲ့ အတူတူပဲ.. ထိပ်တန်း အင်မော်တယ် ဂိုဏ်းကြီးဆယ်ဂိုဏ်းတောင်မှ ကပ်‌ဘေးဆေးလုံးကို အတော်လေး လိုချင်နေကြတယ်"

"တကယ်လို့ စိမ်းလန်းသောမြစ် ကုန်သွယ်ရေးအဖွဲ့က လေလံပွဲကို အလျင်စလို မကျင်းပဘဲ စိမ်းလန်းသောမြစ် ကောင်းကင်နယ်မြေ ပတ်ဝန်းကျင်က နယ်မြေတချို့ကိုပဲ သတင်းမဖြန့်ခဲ့ဘူး ဆိုရင် စိမ်းလန်သောမြစ် ကုန်သွယ်ရေးအဖွဲ့က အခုထက် အဆပေါင်းများစွာ ပိုပြီး စည်းကားနေမှာပဲ”

ရွှယ်ချန်ကျဲက ခပ်တိုးတိုး ပြောလိုက်သည်။

ကပ်ဘေးအဆင့် ကျင့်ကြံသူတစ်ဦး အနေဖြင့် ရွှယ်ချန်ကျဲသည် ကပ်ဘေးဆေးလုံးက မည်မျှအထိ ဆွဲ‌ဆောင်မှုရှိမှန်း ကောင်းစွာ သိရှိထားခဲ့သည်။

ကျန်းချန်က ခပ်ယဲ့ယဲ့ပြုံးကာ ပြောလိုက်သည်။

“ငါတို့ အထဲဝင်ကြစို့”

ယခုအခါတွင် သူက အင်မော်တယ်ခရစ္စတယ် အစိတ်အပိုင်း၏ အကူအညီဖြင့် အုပ်စိုးသူ တစ်ပိုင်းအဆင့်ကို ရောက်ရှိနေပြီ ဖြစ်သည်။

သူ့အတွက်မူ ကပ်ဘေးဆေးလုံးသည် မရှိမဖြစ် မဟုတ်တော့၍ တောင်ပေါ်တွင် ထိုင်ကာ ကျားနှစ်ကောင် တိုက်ခိုက်သည်ကို ကြည့်နေရုံသာ ဖြစ်၏။

အထူးသဖြင့် သွေးနတ်ဆိုးဂိုဏ်းမှ ရွှယ်ဝူရှ ဖြစ်သည်။

အကယ်၍ ရွှယ်ဝူရှသာ ကပ်ဘေးဆေးလုံး အတွက် တိုက်ခိုက်နေစဥ် အတွင်း ပြဿနာနှင့် ကြုံတွေ့ရလျှင် သူက ထိုအရေးကြီးသော အခိုက်အတန့်၌ သေစေလောက်သော ထိုးနှက်ချက် တစ်ခုကို ပေးစွမ်းမည် ဖြစ်ပြီး သွေးနတ်ဆိုးဂိုဏ်း၏ နံပါတ်တစ် ပါရမီရှင်ကို အဆုံးသတ်ပေးမည် ဖြစ်သည်။

ရှဖေးထံမှ အထူးဧည့်သည်တော် ဖိတ်စာ ရရှိထားသောကြောင့် ကျန်းချန်သည် လေလံပွဲ အတွင်းသို့ တန်းစီစောင့်ဆိုင်းနေစရာ မလိုဘဲ တိုက်ရိုက်ပင် ဝင်ရောက်နိုင်ခဲ့သည်။

လေလံပွဲ၏ တံခါးဝသို့ ဝင်ရောက်လိုက်သောအခါတွင် စင်္ကြန်လမ်း၏ အလင်းရောင်သည် အနည်းငယ် မှိန်ဖျော့နေခဲ့၏။

ကျန်းချန်တို့က စင်္ကြန်လမ်းအတိုင်း လျှောက်သွားခဲ့ရာ လမ်းအဆုံးတွင် လေလံပွဲကျင်းပသည့် နေရာသည် ကျန်းချန်တို့၏ မြင်ကွင်းရှေ့၌ ပေါ်လာခဲ့သည်။

ဤလေလံပွဲ ကျင်းပသော နေရာသည် ကျန်းချန် ယခင်က မြင်ဖူးသမျှ လေလံပွဲကျင်းပရာ နေရာများထက် ပို၍ ကြီးမား၏။

စီတန်းထားသော ထိုင်ခုံများနှင့် တောက်ပသော ခရစ္စတယ်များဖြင့် တည်ဆောက်ထားသည့် လေလံစင်မြင့်သည် လူကို အနည်းငယ်ပင် မျက်စိကျိန်းစေခဲ့သည်။

“သခင်လေး.. သခင်လေးရဲ့ ထိုင်ခုံနံပါတ်က ဘယ်လောက်လဲရှင့်”

ထိုအခိုက်အတန့်တွင် လှပသော အစေခံ မိန်းကလေး တစ်ဦးသည် သူ့အနားသို့ အလျင်အမြန် လျှောက်လာပြီး ကျန်းချန်ကို တရိုတသေ မေးလိုက်သည်။

“ထိုင်ခုံနံပါတ်လား”

ကျန်းချန်က ခဏမျှ မှင်တက်သွားပြီးနောက်တွင် ရှဖေး ပေးထားသည့် အထူးဧည့်သည်တော် ဖိတ်စာကို ထုတ်ပြလိုက်သည်။

“ငါ့မှာ ဒါပဲ ရှိတယ်”

ကျန်းချန်၏ လက်ထဲရှိ အထူးဧည့်သည်တော် ဖိတ်စာကို မြင်လျှင် အစေခံ မိန်းကလေး မျက်ဝန်းထဲတွင် အံ့အားသင့်သော အရိပ်အယောင် တစ်ခု ဖြစ်ပေါ်လာခဲ့သည်။

လေလံပွဲ၏ အစေခံတစ်ဦး အနေဖြင့် ကျန်းချန်၏ လက်ထဲရှိ အထူးဧည့်သည်တော် ဖိတ်စာ၏ အထူး အဆင့်အတန်းကို သူမ သဘာဝကျစွာပင် မြင်နိုင်ခဲ့သည်။

ဤသည်မှာ ပထမတန်းစား အထူးဧည့်သည်တော် ဖိတ်စာ ဖြစ်သည်။

ယင်းက အထူးဖိတ်စာတချို့မှ လွဲလျှင် စိမ်းလန်းသောမြစ် ကုန်သွယ်ရေးအဖွဲ့၏ အမြင့်ဆုံးအဆင့် အထူးဧည့်သည်တော် ဖိတ်စာ ဖြစ်၏။

လေလံပွဲတိုင်းတွင် စိမ်းလန်းသောမြစ် ကုန်သွယ်ရေးအဖွဲ့က ထုတ်ပေးသည့် ပထမတန်းစား အထူးဖိတ်စာ အရေအတွက်သည် အစောင်သုံးဆယ်ထက် မပိုပေ။

ထို့ကြောင့် ပထမတန်းစား အထူး ဧည့်သည်တော် ဖိတ်စာကို ရရှိနိုင်သူသည် မည်သို့မှ သာမန် လူတစ်ယောက် မဟုတ်သည်မှာ သေချာ၏။

“သခင်လေးက ကျွန်မတို့ စိမ်းလန်းသောမြစ် ကုန်သွယ်ရေးအဖွဲ့ရဲ့ ပထမတန်းစား အထူးဧည့်သည် ဖြစ်နေတာကိုး.. ကျွန်မ နောက်ကို လိုက်ခဲ့ပါရှင့်”

အစေခံမိန်းကလေးသည် ယခင်ကထက်ပင် ပို၍ ရိုသေကိုင်းညွှတ်သွားခဲ့ပြီး ကျန်းချန်ကို လေလံပွဲ အတွင်းသို့ လျင်မြန်စွာ ခေါ်ဆောင်သွားခဲ့သည်။

ကြီးမားလှသော လေလံပွဲ ကျင်းပရာနေရာတွင် အတန်ကြာ လျှောက်သွားပြီးနောက် အစေခံမိန်းကလေးသည် ကျန်းချန်ကို ခရစ္စတယ် လေလံစင်မြင့်၏ အနီးတွင် နေရာချပေးကာ အရိုအသေ ပေး၍ ထွက်ခွာသွားခဲ့သည်။

ကျန်းချန်က ကျယ်ဝန်းပြီး နူးညံ့သော ဇိမ်ခံထိုင်ခုံတွင် ထိုင်ချလိုက်ရင်း လေလံပွဲ ကျင်းပသည့် နေရာကို အကဲခတ် ကြည့်ရှုလိုက်သည်။

ကျင့်ကြံသူ အများအပြားသည် လေလံပွဲကို ရောက်ရှိနေခဲ့ကြပြီ ဖြစ်၏။

ကျန်းချန် တစ်ချက် ဝေ့ကြည့်လိုက်ရုံဖြင့်ပင် တစ်ရာထက်မနည်းသော ကပ်ဘေးအဆင့် ကျင့်ကြံသူများနှင့် ဆယ်ဦးထက် မနည်းသော မဟာယာန တစ်ပိုင်းအဆင့် ကျင့်ကြံသူများ၏ အရှိန်အဝါကို ခံစားလိုက်ရသည်။

“အင်မော်တယ် ကျင့်ကြံခြင်း စကြဝဠာရဲ့ အင်အားက တကယ်ကို မသေးဘူးပဲ”

ကျန်းချန်က စိတ်ထဲတွင် သက်ပြင်းချမိလိုက်၏။

လေလံပွဲသို့ ရောက်ရှိနေသော အစွမ်းထက် ကျင့်ကြံသူများ၏ အင်အားဖြင့်ပင် သူတို့ နတ်ဘုရားနယ်မြေ တစ်ခုလုံးကို ချေမှုန်းရန် လုံလောက်၏။

“သခင်လေးလီရှောင်.. ဟိုကောင်လည်း ရောက်နေတယ်”

ကျန်းချန်က ခန်းမတစ်ခုလုံးကို လှည့်ပတ် ကြည့်ရှုနေစဥ်မှာပင် ကျန်းချန်တို့နှင့် မျက်နှာချင်းဆိုင်ရှိ ပထမတန်းစား အထူး ဧည့်သည်တော် ထိုင်ခုံရှိ လီရှောင်၏ နံဘေးမှ အဘိုးအိုက ခပ်တိုးတိုး ပြောလိုက်သည်။

“စိတ်မပူပါနဲ့ ငါဒီသတင်းကို ဂိုဏ်းဆီ အကြောင်းကြားပြီးပြီ.. ဂိုဏ်းက မဟာယာနအဆင့် ကျင့်ကြံသူတစ်ဦးကို စေလွှတ်လိမ့်မယ်.. ဒီကောင့်အတွက် ပြေးစရာမြေ မရှိစေရဘူး”

လီရှောင်က အေးစက်စက် ပြောလိုက်သည်။

“ဒီနေ့က စိမ်းလန်းသောမြစ် ကုန်သွယ်ရေးအဖွဲ့ရဲ့ လေလံပွဲနေ့ပဲ.. အရင်ဆုံး ကပ်ဘေးဆေးလုံးကို ရအောင် ယူလိုက်ဦးမယ်”

“စိမ်းလန်းသောမြစ် ကုန်သွယ်ရေးအဖွဲ့က ကပ်ဘေးဆေးလုံးကို လေလံတင်မယ် ဆိုတဲ့သတင်းက အတော်လေး အလျင်စလို ဖြစ်သွားခဲ့တဲ့ အတွက် စိမ်းလန်းသောမြစ်ကောင်းကင်နယ်မြေရဲ့ ပတ်ဝန်းကျင်နယ်မြေ အနည်းငယ်လောက်ကိုပဲ ဆွဲဆောင်နိုင်ခဲ့တယ်.. ဒါကြောင့် ဒီနေ့မှာ ငါတို့ရဲ့အကြီးမားဆုံး ပြိုင်ဘက်က သွေးနတ်ဆိုးဂိုဏ်းက ရွှယ်ဝူရှ တစ်ယောက်ပဲ ရှိလိမ့်မယ်”

အဘိုးအိုက ထိုစကားကိုပြောရင်း ရွှယ်ဝူရှ ရှိရာဘက်သို့ လှမ်းကြည့်လိုက်သည်။

“ရွှယ်ဝူရှ အတွက် ငါမစိုးရိမ်ဘူး.. အဲဒီကောင်ကို ငါ ပိုပြီး စိုးရိမ်နေမိတယ်”

လီရှောင်က မျက်နှာချင်းဆိုင်ရှိ ကျန်းချန်ကို လှမ်းကြည့်ကာ လေးနက်စွာ ပြောလိုက်သည်။

“အဲဒီကောင်က ဆိတ်ငြိမ်သွေးကောင်းကင်နယ်မြေက လာတယ် ဆိုတာ မင်းသေချာရဲ့လား”

အဘိုးအိုက ခေါင်းညိတ်၍ ပြောလိုက်သည်။

“အဲဒီကောင်က စိမ်းလန်းသောမြစ် ကုန်သွယ်ရေးအဖွဲ့နဲ့ အတူ ဆိတ်ငြိမ်သွေးကောင်းကင် နယ်မြေကနေ တကယ်ပဲ လာခဲ့တာပါ”

လီရှောင်၏ မျက်ဝန်းထဲတွင် ထူးဆန်းသော အမူအရာတစ်ခု ရုတ်တရက် ပေါ်ပေါက်လာခဲ့သည်။

“ဒီကောင့်လို လူမျိုးကို ထိပ်တန်းအင်မော်တယ် ဂိုဏ်းကြီး ဆယ်ဂိုဏ်းကပဲ ပျိုးထောင်နိုင်လိမ့်မယ်.. ဒါပေမဲ့ သွေးနတ်ဆိုးဂိုဏ်းက ရွှယ်ဝူရှကို စေလွှတ်လိုက်ပြီးပြီပဲ.. ကပ်ဘေးဆေးလုံး အတွက် နောက်ထပ် လူတစ်ယောက်ကို ဘယ်လိုလုပ်ပြီး လျှို့ဝှက်စေလွှတ်ဖို့ ဖြစ်နိုင်မှာလဲ.. တကယ်လို့ ဒီကောင်က သွေးနတ်ဆိုးဂိုဏ်းက မဟုတ်ဘူး ဆိုရင် ဒီကောင့်ရဲ့နောက်ခံက ဘာများ ဖြစ်နေမလဲ”

အခန်း(၂၅၀၉)ပြီး၏။

အခန်း(၂၅၁၀)

လီရှောင်က ကျန်းချန်တို့ နှစ်ဦး မည်သူမည်ဝါဖြစ်ကြောင်း တိတ်တဆိတ် ခန့်မှန်းနေချိန်မှာပင် အခြားတစ်ဖက်တွင်လည်း ရွှယ်ဝူရှတို့ လူစု၏ အကြည့်သည် ကျန်းချန်တို့ ဆီသို့ ကျရောက်နေခဲ့သည်။

“အကြီးအကဲယင်.. ဒီနှစ်ယောက်ရဲ့ အသေးစိတ် အချက်အလက်တွေကို စုံစမ်းခိုင်းထားတာ ဘယ်လိုလဲ.. ဘာတွေသိရပြီလဲ”

ရွှယ်ဝူရှက မျက်မှောင်ကြုတ်ကာ ကျန်းချန်တို့ နှစ်ဦးကို ကြည့်ရင်း သူ၏ နံဘေးရှိ ပိန်ပါးပါး အဘိုးအိုကို ခပ်တိုးတိုး မေးလိုက်သည်။

“ဒီနှစ်‌ယောက်ရဲ့ မူလအစက အတော်လေး လျှို့ဝှက်ဆန်းကြယ်တယ်.. သူတို့က လေထဲကနေ ရုတ်တရက် ထွက်ပေါ်လာသလိုပဲ.. ကျွန်တော်လည်း ရှိသမျှ အဆက်အသွယ်တွေအကုန်သုံးပြီး ရှာကြည့်ပေမဲ့ သူတို့ ဘယ်နေရာက လာလဲ ဆိုတာ မသိခဲ့ဘူး”

ပိန်ပါးပါး အဘိုးအိုက ခေါင်းခါရမ်းလိုက်ပြီးနောက်တွင် လေးနက်စွာ ပြောလိုက်သည်။

“ဒါပေမဲ့ တစ်ခုတော့ သေချာတယ်.. ဒီနှစ်ကောင်က ကျွန်တော်တို့ ဆိတ်ငြိမ်သွေးကောင်းကင်နယ်မြေကနေ လာတာပဲ”

ထိုစကားကိုကြားလျှင် ရွှယ်ဝူရှ၏ မျက်ဝန်းများသည် အနည်းငယ် ကျဥ်းမြောင်းသွားခဲ့သည်။

ထိုနေ့က ကုန်သွယ်ရေးစျေး တတိယအလွှာတွင် ထိုလျှို့ဝှက်ဆန်းကြယ်သော လူငယ်သည် လီရှောင်နှင့် ထိပ်တိုက်ရင်ဆိုင်ပြီး လီရှောင်ကိုပင် အသာစီး ရခဲ့သည်။

ယင်းမှာ လီရှောင်၏ ပေါ့ဆမှုကြောင့် ဖြစ်နိုင်သော်လည်း လျှို့ဝှက်ဆန်းကြယ်သော လူငယ်၏ ပင်ကိုစွမ်းရည်သည် အလွန်တရာ ထူးခြားသည်ကို သက်သေပြရန် လုံလောက်၏။

ထိုလူငယ်က သူနှင့် နှိုင်းယှဥ်လျှင်ပင် အနည်းငယ်မျှ နိမ့်ကျလိမ့်မည် မဟုတ်ချေ။

ရွှယ်ဝူရှသည် ဆိတ်ငြိမ်သွေးကောင်းကင် နယ်မြေတွင် ဤကဲ့သို့ ကြောက်မက်ဖွယ်ရာကောင်းသော ပါရမီရှင် တစ်ဦး ရှိနေသည်ကို မယုံကြည်နိုင်အောင် ဖြစ်နေခဲ့သည်။

“ဒီလို ပါရမီရှင်မျိုး ဆိတ်ငြိမ်သွေးကောင်းကင်နယ်မြေမှာ ပုန်းအောင်းနေလိမ့်မယ်လို့ မထင်ထားခဲ့ဘူး.. သူတို့က သွေးဓားအင်မော်တယ်ဂိုဏ်းကများ ဖြစ်နေမလား”

ရွှယ်ဝူရှ၏ မျက်ဝန်းထဲတွင် ထက်ရှသော အလင်းတန်း တစ်ခု လက်ခနဲ ဖြစ်သွားခဲ့သည်။

သွေးဓားအင်မော်တယ်ဂိုဏ်းသည် အထွတ်အထိပ်ကာလတွင် အင်မော်တယ် ကျင့်ကြံခြင်းစကြဝဠာ၏ ထိပ်တန်းအင်မော်တယ် ဂိုဏ်းကြီးဆယ်ဂိုဏ်း ထဲတွင် ပါဝင်ပြီး ယခု လက်ရှိသွေးနတ်ဆိုးဂိုဏ်းထက်ပင် များစွာ ပို၍ အင်အားကြီးခဲ့သည်။

ယခုအခါတွင် သွေးဓားအင်မော်တယ်ဂိုဏ်းသည် ဆုတ်ယုတ်နေပြီ ဖြစ်သော်လည်း ပိန်သွားသော ကုလားအုပ်သည် မြင်းထက် ကြီးမားနေဆဲ ဟူသော ဆိုရိုးစကားကဲ့သို့ပင်။

သွေးဓားအင်မော်တယ်ဂိုဏ်းသည် ဤကဲ့သို့ ပါရမီရှင်မျိုးကို လျှို့ဝှက် ပျိုးထောင်ထားရန်မှာ မဖြစ်နိုင်သည်တော့ မဟုတ်ပေ။

“ဒါတော့ မဖြစ်နိုင်ဘူးထင်တယ် သခင်လေး”

ပိန်ပါးပါး အဘိုးအိုက ခေါင်းခါရမ်း၍ ပြောလိုက်သည်။

“ဒီနှစ်တွေအတွင်း ကျွန်တော်တို့ရဲ့ ဖိနှိပ်မှုအောက်မှာ သွေးဓားအင်မော်တယ်ဂိုဏ်းက တပည့်သစ် စုဆောင်းဖို့တောင် အနိုင်နိုင်ပဲ.. သူတို့က ဒီလိုမျိုး ပါရမီရှင်ကို ဘယ်လိုလုပ်ပြီး ပျိုးထောင်နိုင်မှာလဲ”

သွေးဓားအင်မော်တယ်ဂိုဏ်းသည် ရှည်လျားသော သမိုင်းကြောင်း ရှိပြီး အခြေခံအုတ်မြစ်သည် အလွန်တရာပင် နက်ရှိုင်း၏။

သွေးဓားအင်မော်တယ်ဂိုဏ်းသည် ထိပ်တန်း ပါရမီရှင်များအား ပျိုးထောင်နိုင်စွမ်း ရှိသည်ကို ပိန်ပါးပါး အဘိုးအို သံသယမရှိပေ။

သို့သော်လည်း အဓိကအချက် အနေဖြင့် သွေးဓားအင်မော်တယ်ဂိုဏ်းသည် အစွမ်းထက် ပါရမီရှင် တပည့်ကို ရှာတွေ့နိုင်ရန် လိုအပ်၏။

ယခုအခါတွင် ဆိတ်ငြိမ်သွေးကောင်းကင် နယ်မြေကို သူတို့သွေးနတ်ဆိုးဂိုဏ်းက ထိန်းချုပ်ထားပြီး သူတို့၏ ပိတ်ဆို့မှုအောက်တွင် ပါရမီရှင် တပည့်တစ်ဦးသည် သွေးဓားအင်မော်တယ်ဂိုဏ်းသို့ ဝင်ရောက်ရန်မှာ မဖြစ်နိုင်သလောက်ပင်။

ထို့ကြောင့် သွေးဓားအင်မော်တယ်ဂိုဏ်းသည် နက်ရှိုင်းသော အခြေခံအုတ်မြစ် ရှိသော်လည်း လေ့ကျင် ပျိုးထောင်ပေးရန် ပါရမီရှင်တပည့် မရှိသည့်အတွက် "ဆန်မရှိ၍ ထမင်းချက်ရခက်နေသော မိန်းမကောင်း"ကဲ့သို့ ဖြစ်နေခဲ့သည်။

ရွှယ်ဝူရှက မျက်မှောင်ကြုတ်ကာ ပြောလိုက်၏။

“တကယ်လို့ ဒီနှစ်ယောက်က သွေးဓားအင်မော်တယ်ဂိုဏ်းက မဟုတ်ဘူးဆိုရင် ဘယ်သူတွေ ဖြစ်နိုင်မလဲ”

ဆိတ်ငြိမ်သွေးကောင်းကင် နယ်မြေသည် သူတို့ သွေးနတ်ဆိုးဂိုဏ်းက ထိန်းချုပ်ထားသော နယ်မြေ ဖြစ်သည်။

ယခုအခါတွင် ဆိတ်ငြိမ်သွေးကောင်းကင် နယ်မြေထဲ၌ သူ့ထက်ပင် မနိမ့်ကျသည် ကြောက်မက်ဖွယ်ပါရမီရှင် တစ်ဦး ရှိနေသော်လည်း သူတို့ သွေးနတ်ဆိုးဂိုဏ်းသည် လုံးဝ သတိမထားမိခဲ့ပေ။

ယင်းမှာ သူတို့ သွေးနတ်ဆိုးဂိုဏ်း အတွက် သတင်းကောင်းတစ်ခု မဟုတ်ချေ။

“သခင်လေး.. သိပ်မကြာခင်က သွေးနတ်ဆိုးဂိုဏ်းရဲ့ ပါရမီရှင်နှစ်ယောက်က ရွှယ်ချန်ကျဲနဲ့ လူငယ် တစ်ယောက်ရဲ့ လက်ထဲမှာ တစ်ယောက်ပြီး တစ်ယောက် ကျဆုံးသွားခဲ့တယ်”

ထိုအခိုက်အတန့်တွင် စကားတစ်လုံးမှ ဝင်မပြောသေးသည့် သွေးရောင်ဆံပင်နှင့် အဘိုးအိုသည် ရုတ်တရက် လေးနက်စွာ ပြောလိုက်သည်။

သွေးရောင်ဆံပင်နှင့် အဘိုးအို၏ စကားကိုကြားလျှင် ရွှယ်ဝူရှ၏ မျက်ဝန်းများသည် ရုတ်တရက် ကျဥ်းမြောင်းသွားခဲ့၏။

သွေးနတ်ဆိုးဂိုဏ်းသည် ဆိတ်ငြိမ်သွေးကောင်းကင် နယ်မြေကို နှစ်ပေါင်းများစွာ ထိန်းချုပ်လာခဲ့သည် ဖြစ်ရာ အကယ်၍ ဆိတ်ငြိမ်သွေးကောင်းကင် နယ်မြေ ထဲတွင် ဤကဲ့သို့ ပါရမီရှင်တစ်ဦး ရှိနေလျှင် သွေးနတ်ဆိုးဂိုဏ်းသည် မသိဘဲနေရန် မဖြစ်နိုင်ပေ။

သို့သော်လည်း မကြာသေးမီက စပြီး ဆိတ်ငြိမ်သွေးကောင်းကင် နယ်မြေတွင် ပါရမီရှင်များကို သတ်ဖြတ်နိုင်သည့် ကြောက်မက်ဖွယ် ပုဂ္ဂိုလ်တစ်ဦး ပေါ်ထွက်လာခဲ့သည်မှာ အမှန်ပင် ဖြစ်၏။

ထို့အပြင် ထိုလူသည် သူတို့ သွေးနတ်ဆိုးဂိုဏ်း၏ သစ္စာဖောက် ဖြစ်သည့် ရွှယ်ချန်ကျဲ၏ အပေါင်းအဖော်လည်းဖြစ်သည်။

ရွှယ်ချန်ကျဲသည် သွေးနတ်ဆိုးဂိုဏ်းကို တမင် ရည်ရွယ်၍ တိုက်ခိုက်ခဲ့ပြီး သွေးနတ်ဆိုးဂိုဏ်း၏ ပါရမီရှင် နှစ်ဦးကို သတ်ဖြတ်ခဲ့သည်။

ထိုသတင်းသည် ဆိတ်ငြိမ်သွေးကောင်းကင် နယ်မြေတစ်ခုလုံးကိုပင် လှုပ်လှုပ်ရှားရှား ဖြစ်သွားစေခဲ့သည်။

ထို့အပြင် ရွှယ်ယန်မြို့စား ရွှယ်ချင်းယန်သည်လည်း ရွှယ်ချန်ကျဲတို့ နှစ်ဦး၏ လက်ထဲမှာပင် ကျဆုံးသွားခဲ့ရ၏။

ယခုတစ်ကြိမ် စိမ်းလန်းသောမြစ် ကုန်သွယ်ရေးအဖွဲ့သို့ လာရောက်ရသည့် ရည်ရွယ်ချက်မှာ ကပ်ဘေးဆေးလုံး အတွက်သာမက အခြား ရည်ရွယ်ချက်တစ်ခု ဖြစ်သည့် ရွှယ်ချန်ကျဲတို့ နှစ်ဦးကို ဖော်ထုတ်ရန် အတွက် ဖြစ်သည်။

သို့သော်လည်း ရွှယ်ချန်ကျဲတို့ နှစ်ဦးသည် သတိကြီးစွာ ထားနေပုံရပြီး သူ့အပေါ်တွင် မည်သည့် လှုပ်ရှားမှုမှ မပြုလုပ်ခဲ့ကြပေ။

သို့ရာတွင် ရွှယ်ချန်ကျဲတို့ နှစ်ဦး လှုပ်ရှားမှု မပြုလုပ်ခြင်းသည် သူ့အပေါ်တွင် တိုက်ခိုက်ရန် လက်လျော့လိုက်သည်ဟု မဆိုလိုချေ။

ထိုနှစ်ယောက်သည် စိမ်းလန်းသောမြစ်မြို့ကို ရောက်နှင့်နေခြင်းလည်း ဖြစ်နိုင်၏။

မျက်နှာချင်းဆိုင်မှ လျှို့ဝှက်ဆန်းကြယ်သော လူနှစ်ယောက်သည် ဆိတ်ငြိမ်သွေးကောင်းကင်နယ်မြေမှ လာသည် ဆိုလျှင် ၎င်းတို့သည် အမှန်တကယ်ပင် ရုပ်ဖျက်ထားသည့် ရွှယ်ချန်ကျဲတို့ နှစ်ဦး ဖြစ်နိုင်လောက်၏။

“သခင်လေးဝူရှ.. ကျွန်တော်လည်း ဒီနှစ်ယောက်ကို ရွှယ်ချန်ကျဲတို့ နှစ်ဦး ဖြစ်နိုင်ခြေများတယ်လို့ ထင်မိတယ်.. သူတို့ကို စမ်းသပ်လိုက်ရမလား”

ပိန်ပါးပါး အဘိုးအို၏ မျက်ဝန်းက လက်ခနဲ ဖြစ်သွားခဲ့ပြီး ခပ်တိုးတိုး မေးလိုက်သည်။

ရွှယ်ဝူရှက ခဏမျှ စဥ်းစားပြီးမှ ပြောလိုက်သည်။

“မြွေကို လန့်ပြေးအောင် မခြောက်မိစေနဲ့.. သူတို့ကို တိတ်တဆိတ်ပဲ လေလံပွဲပြီးတဲ့အထိ သတိထားပြီး စောင့် ကြည့်နေပါ”

ဤသည်က စိမ်းလန်းသောမြစ် ကုန်သွယ်ရေးအဖွဲ့၏ ဌာနချုပ် ဖြစ်သည်။

အကယ်၍ ထိုနှစ်ယောက်က သူတို့ ထင်ထားသလို အမှန်တကယ် ဖြစ်နေလျှင်ပင် ဤနေရာတွင် သတ်၍ မရပေ။

ထို့အပြင် စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲသည် စတင်တော့မည် ဖြစ်ရာ ယခုအချိန်တွင် သူ့အတွက် အရေးကြီးဆုံး အရာမှာ ကပ်ဘေးဆေးလုံးကို ရရှိရန်သာ ဖြစ်သည်။

အဆုံးသတ်တွင် ကပ်ဘေးဆေးလုံး ဆိုသည်မှာ သူ့ကို မဟာယာန အဆင့်သို့ ထိုးဖောက်ရန် အကူအညီပေးမည့် သော့ချက်ဆိုလည်း မမှားပေ။

“သခင်ကြီး.. ကျိုလီအင်မော်တယ်ဂိုဏ်းက လီရှောင်နဲ့ သွေးနတ်ဆိုးဂိုဏ်းက ရွှယ်ဝူရှတို့က ကျွန်တော်တို့ကို သတိထားပြီး စောင့်ကြည့်နေပုံပဲ”

မျက်နှာချင်းဆိုင်မှ အကြည့်များကို ခံစားမိလျှင် ရွှယ်ချန်ကျဲက ကျန်းချန်ကို ခပ်တိုးတိုး ပြောလိုက်သည်။

“အထူးသဖြင့် သွေးနတ်ဆိုးဂိုဏ်းက လူတွေပဲ.. သူတို့က ကျွန်တော်တို့ ဘယ်သူလဲ ဆိုတာ သိသွားလောက်ပြီလို့ ကျွန်တော် သံသယဖြစ်မိတယ်”

ကျန်းချန်ကမူ ထွေထွေထူးထူး ဂရုစိုက်မနေခဲ့ပေ။

“ဘာမှမစိုးရိမ်ပါနဲ့.. ဒါက စိမ်းလန်းသောမြစ် ကုန်သွယ်ရေး အဖွဲ့အစည်းရဲ့ ပိုင်နက်ပဲ.. သူတို့တွေ ငါတို့ကို ဘာမှလုပ်လို့မရဘူး”

စိမ်းလန်းသောမြစ် ကုန်သွယ်‌ရေးအဖွဲ့သည် ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းထဲမှ စိမ်းလန်းသောမြစ်ဂိုဏ်းနှင့် ဆက်နွှယ် ပတ်သက်နေသော အဖွဲ့ ဖြစ်သည်။

ထို့ကြောင့် ကျိုလီအင်မော်တယ်ဂိုဏ်းဖြစ်စေ၊ သွေးနတ်ဆိုးဂိုဏ်းဖြစ်စေ၊ ဤနေရာတွင်မူ စိမ်းလန်းသောမြစ် ကုန်သွယ်ရေးအဖွဲ့ကို မျက်နှာသာပေးရပေလိမ့်မည်။

ထို့အပြင် သူက အုပ်စိုးသူ တစ်ပိုင်းအဆင့်ကို ထိုးဖောက်ခဲ့ပြီဖြစ်ရာ မဟာယာနအဆင့် ကျင့်ကြံသူတစ်ဦး မလှုပ်ရှားသရွေ့ သူ့ကို ဘာမျှ လုပ်ဆောင်နိုင်မည် မဟုတ်ပေ။

ယင်းအပြင် သူ၏ ခန္ဓာကိုယ်ထဲတွင် အင်မော်တယ် ခရစ္စတယ် အစိတ်အပိုင်းလည်း ရှိနေသေးပြီး အုပ်စိုးသူ စွမ်းအားများကလည်း စဥ်ဆက်မပြတ် တိုးပွားနေခဲ့သည်။

လေလံပွဲပြီးသည်နှင့် သူက စိမ်းလန်းသောမြစ် ကုန်သွယ်ရေး အဖွဲ့တွင် ဆယ်ရက်၊ ဆယ့်ငါးရက်ခန့် ကျင့်ကြံရုံမျှဖြင့် အုပ်စိုးသူ အဆင့်ကို အောင်မြင်စွာ ထိုးဖောက်နိုင်မည် ဖြစ်၏။

ထိုအချိန်သို့ ရောက်လျှင် သွေးနတ်ဆိုးဂိုဏ်း သို့မဟုတ် ကျိုလီအင်မော်တယ်ဂိုဏ်း တို့မှ မဟာယာနအဆင့် ကျင့်ကြံသူ ကိုယ်တိုင် ရောက်လာခဲ့လျှင်ပင် သူ့အနေဖြင့် လုံးဝ ကြောက်ရွံ့နေမည် မဟုတ်ပေ။

ကျန်းချန်က သူတို့၏ အထောက်အထား ပေါ်သွားမည်ကို ဂရုစိုက်ပုံ မရသည်ကို မြင်လျှင် ရွှယ်ချန်ကျဲသည် ထပ်မပြောတော့ဘဲ မျက်လုံးကို မှိတ်ကာ ကျင့်ကြံနေလိုက်သည်။

မိုးမခသွေးနတ်ဆိုးသစ်သီးကို မျိုချပြီးနောက်တွင် ရွှယ်ချန်ကျဲသည် သစ်သီး၏ စွမ်းအားကို ရက်အနည်းငယ်ကြာ စုပ်ယူခဲ့ရာ မဟာယာနအဆင့် စွမ်းအားများကို ထိတွေ့နိုင်နေပြီ ဖြစ်သည်။

သူ့ကို အချိန်အနည်းငယ်သာ ထပ်ပေးမည် ဆိုလျှင် မဟာယာန တစ်ပိုင်းအဆင့်သို့ ရောက်ရှိနိုင်မည် ဖြစ်၏။

ဤကဲ့သို့ စောင့်ဆိုင်းရင်းဖြင့် နာရီဝက်ခန့် အချိန်သည် မျက်တောင်တစ်ခတ် အတွင်း ကုန်ဆုံးသွားခဲ့သည်။

ထိုအခိုက်အတန့်မှာပင် ကြည်လင်ပြတ်သားသော ခေါင်းလောင်းသံ တစ်သံသည် အဆုံးသတ်တွင် ပဲ့တင်ထပ်လာခဲ့သည်။

ခေါင်းလောင်းသံကို ကြားလိုက်ရလျှင် ဆူညံနေသော လေလံခန်းမကြီးသည် ချက်ချင်းဆိုသလို တိတ်ဆိတ်သွားခဲ့သည်။

လူတိုင်းသည် လေလံခန်းမ၏ အလယ်ဗဟိုရှိ ခရစ္စတယ်စင်မြင့် ဆီသို့ ကြည့်လိုက်ကြသည်။

ခရစ္စတယ်စင်မြင့် ပေါ်တွင် မည်သည့် အချိန်ကတည်းက ရောက်လာသည်ကို မသိရသည့် ဆံပင်များ ဖြူဖွေးနေသော အဘိုးအို တစ်ဦး ပြုံး၍ ရပ်နေသည်ကို အားလုံးက မြင်လိုက်ရ၏။

အခန်း(၂၅၁၀)ပြီး၏။