အခန်း (၅၁၁-၅၁၂)

အပိုင်း(၅၁၁) ဝူယောင်ပန်း၏ အစွမ်း

"ဘာ"

ဝူယောင်ပန်း၏ ထိုစကားတစ်ခွန်းကြောင့် မလှမ်းမကမ်းတွင် ရှိနေသော တင်းယန်နှင့် ကျိုးချင်းမင်တို့က ချက်ချင်းပင် အံ့အားသင့်သွားကြသည်။

သူတို့နှစ်ဦးက မနေနိုင်ဘဲ အနားသို့ လျှောက်လာခဲ့ကြသည်။

လင်းယွမ်ကမူ အံ့အားသင့်သွားခြင်း မရှိပေ။

တကယ်တမ်းတွင် သူက အစော‌ကြီးကတည်းက ခန့်မှန်းမိပြီးသား ဖြစ်သည်။

အကယ်၍ ပြန်လည်ကုသခြင်း အမျိုးအစား အစွမ်းသာ ဖြစ်ခဲ့လျှင် ဝူယောင်ပန်း၏ အလောင်းက အသားစများအဖြစ် ပေါက်ကွဲထွက်သွားပြီးနောက် ပြန်လည်ကောင်းမွန်လာမည့် အရိပ်အယောင် အနည်းငယ်မျှ ရှိမနေခြင်းမျိုး ဖြစ်လာမည် မဟုတ်ပေ။

ဤအချက်ကို ကြည့်ခြင်းအားဖြင့် တစ်ဖက်လူက ပြန်လည်ကုသခြင်း အမျိုးအစား အစွမ်းပိုင်ရှင် ဖြစ်နိုင်ခြေကို ဖယ်ရှားပစ်နိုင်သည်။

လင်းယွမ်က "ဒါဆို မင်းအစွမ်းက ဘာလဲ" ဟု မေးလိုက်သည်။

"ကျွန်တော်... ကျွန်တော့်အစွမ်းက ကိုယ်ပွားဖန်တီးတာပါ"

"ကိုယ်ပွား"

"ဘာ"

တင်းယန်နှင့် ကျိုးချင်းမင်တို့က အလွန် အံ့အားသင့်သွားကြသည်။

လင်းယွမ်ကလည်း အနည်းငယ် မှင်တက်သွားသည်။ ကိုယ်ပွားဖန်တီးခြင်း အစွမ်း။

သူက ဤကဲ့သို့သော အစွမ်းမျိုးကို ပထမဆုံးအကြိမ် ကြားဖူးခြင်းပင် ဖြစ်သည်။

"မင်းရဲ့ အဲဒီအစွမ်းအကြောင်း ပြောပြစမ်း"

ဝူယောင်ပန်းက မဖြေဘဲ မနေရဲပေ "ကျွန်တော့်အစွမ်းက ကိုယ်ပွားတွေ အများကြီး ဖန်တီးနိုင်အောင် ထောက်ပံ့ပေးနိုင်တယ်... အဲဒီ ကိုယ်ပွားတွေအားလုံးရဲ့ အာရုံခံစားမှုတွေက တစ်ခုနဲ့တစ်ခု ချိတ်ဆက်နေကြတာ"

"ခင်ဗျား အရင်က သတ်ပစ်ခဲ့တဲ့ သူတွေအားလုံးက ကျွန်တော့်ရဲ့ ကိုယ်ပွားတွေချည်းပဲ"

"ကျွန်တော့် ကိုယ်ပွားက သေဆုံးသွားပေမဲ့ သူ့ရဲ့ အတွေ့အကြုံတွေနဲ့ မြင်တွေ့ခဲ့ရတာတွေ အားလုံးက တခြား ကိုယ်ပွားတွေဆီကို ရောက်သွားတယ်"

လင်းယွမ်က မျက်မှောင်ကြုတ်လိုက်ပြီး "မင်းက အခု ကိုယ်ပွားလား... ဒါမှမဟုတ် မူလခန္ဓာကိုယ်လား" ဟု မေးလိုက်သည်။

ဝူယောင်ပန်းက ခေါင်းခါလိုက်သည်။ "ကျွန်တော့်မှာ ကိုယ်ပွားတွေ အရမ်းများလွန်းတော့ ကျွန်တော်က မူရင်းခန္ဓာကိုယ်ပိုင်ရှင် ဟုတ်မဟုတ် ဆိုတာကိုတောင် မသိတော့ဘူး"

"မင်းမှာ ကိုယ်ပွား ဘယ်လောက်ရှိလဲ"

"ကိုယ်ပွား ၈၇ ခုပါ"

လင်းယွမ်၊ တင်းယန်နှင့် အခြားသူများက တိတ်တဆိတ် အံ့အားသင့်သွားကြသည်။

ဤဝူယောင်ပန်း၏ အစွမ်းက တကယ်တော့ ကိုယ်ပွားဖန်တီးခြင်းပင် ဖြစ်သည်။

သူ၏ ကိုယ်ပွားများ သေဆုံးသွားမည်ကို အနည်းငယ်မျှ မကြောက်ရွံ့နေသည်မှာ အံ့သြစရာတော့ မဟုတ်ပေ။

အဘယ်ကြောင့်ဆိုသော် ဤကိုယ်ပွား သေဆုံးသွားလျှင်တောင် သူ၏ အသိစိတ်က သေဆုံးသွားမည် မဟုတ်သောကြောင့် ဖြစ်သည်။

အတွေ့အကြုံများနှင့် မြင်တွေ့ခဲ့ရသည်များ အားလုံးက အခြားကိုယ်ပွားများထံသို့ အမွေဆက်ခံသကဲ့သို့ ရောက်ရှိသွားမည်ပင် ဖြစ်သည်။

လင်းယွမ်က ရုတ်တရက် တစ်ခုခုကို တွေးမိသွားပြီး "မင်းရဲ့ ပင်မ အရည်အသွေးမှတ်က ၈၇ မှတ်... ကိုယ်ပွားက ၈၇ ခု... ဒါဆို မင်းရဲ့ ပင်မ အရည်အသွေးမှတ် တစ်မှတ် တိုးလာတိုင်း ကိုယ်ပွားတစ်ခု ထပ်တိုးလာတာပေါ့ ဟုတ်လား" ဟု မေးလိုက်သည်။

ဝူယောင်ပန်းက ခေါင်းညိတ်ပြလိုက်သည်။

လင်းယွမ်က "မင်းရဲ့ ပင်မ အရည်အသွေးမှတ်က စိတ်စွမ်းအင်လား" ဟု ချက်ချင်းပင် မေးလိုက်သည်။

"မဟုတ်ဘူး... ကျွန်တော့်ရဲ့ ပင်မ အရည်အသွေးမှတ်က ခန္ဓာကိုယ်ကြံ့ခိုင်မှုပါ"

လင်းယွမ်က မှင်တက်သွားသည်။ ဤကိုယ်ပွားဖန်တီးခြင်း အစွမ်း၏ ပင်မ အရည်အသွေးမှတ်က ခန္ဓာကိုယ်ကြံ့ခိုင်မှုတဲ့လား။

ဒါဆို ကိုယ်ပွားဖန်တီးခြင်း အစွမ်းက ခန္ဓာကိုယ်ကြံ့ခိုင်မှု အမျိုးအစား အစွမ်းထဲမှာ ပါဝင်နေတာပေါ့။

ရုတ်တရက် လင်းယွမ်၏ အကြည့်က စူးရှသွားပြီး ဝတ်ရုံနက်များနှင့် မျက်နှာဖုံးစွပ်ထားသော ကောင်းကင်တမန်အဖွဲ့ဝင်များကို တွေးမိသွားသည်။

ထိုလူများက တစ်ယောက်ပြီးတစ်ယောက် သေရမည်ကို မကြောက်ကြဘဲ တက်လာသည်နှင့် မိမိကိုယ်ကိုယ် ဖောက်ခွဲပစ်ကြခြင်းပင် ဖြစ်သည်။

"အဲဒီ ကောင်းကင်တမန်အဖွဲ့ဝင်တွေက မင်းရဲ့ ကိုယ်ပွားတွေလား"

ဝူယောင်ပန်းက ခေါင်းညိတ်ပြလိုက်သည်။ "အများစုက ဟုတ်တယ်... ကျွန်တော့်အနားမှာ ရှိနေတဲ့သူတွေက အခြေခံအားဖြင့် အားလုံး ကျွန်တော့်ကိုယ်ပွားတွေချည်းပဲ"

"ဒီလူတွေက သေရမှာကို နည်းနည်းလေးတောင် မကြောက်ကြတာ အံ့သြစရာတော့ မဟုတ်ဘူး"

လင်းယွမ်က သဘောပေါက်သွားသော်လည်း ချက်ချင်းပင် မျက်မှောင်ပြန်ကြုတ်သွားသည်။ "မဖြစ်နိုင်ဘူး... ခုနက ငါတွေ့ခဲ့တဲ့ ကောင်းကင်တမန်အဖွဲ့ဝင် အရေအတွက်က ရာချီမက ရှိတယ်"

ဝူယောင်ပန်းက "အားလုံးက ကျွန်တော့်ကိုယ်ပွားတွေ မဟုတ်ဘူး... တစ်စိတ်တစ်ပိုင်းက ဘုရားသခင်ကို တကယ် ယုံကြည်ကိုးကွယ်တဲ့ သူတွေပါ... သူတို့က ကျွန်တော့်စကားတွေကို ယုံကြည်ပြီး ကျွန်တော့်ရဲ့ ရူးသွပ်တဲ့ သစ္စာခံတွေ ဖြစ်လာကြတာ" ဟု ပြောလိုက်သည်။

"ဒါ့အပြင် ကျွန်တော့်ကိုယ်ပွားတွေ သေဆုံးသွားတာနဲ့ ကျွန်တော့်ရဲ့ မူရင်းခန္ဓာကိုယ်က ကိုယ်ပွားအသစ်တွေကို ချက်ချင်း ပြန်ဖန်တီးနိုင်တယ်"

"ကျွန်တော့်ရဲ့ မူရင်းခန္ဓာကိုယ်က ဘယ်မှာလဲ ဆိုတာကိုတော့ မမေးနဲ့... ကျွန်တော် တကယ် မသိဘူး... ခင်ဗျား ကျွန်တော့်ကို သတ်ပစ်မယ်ဆိုရင်တောင် ကျွန်တော် တကယ် မသိတာပါ"

ဝူယောင်ပန်းက ကြောက်ရွံ့စွာဖြင့် ပြောလိုက်သည်။

"မင်းက လာလိမ်နေတာလား... မင်းက ကိုယ်ပွားဆိုမှတော့ မင်းရဲ့ မူရင်းခန္ဓာကိုယ် ဘယ်မှာရှိလဲဆိုတာ မသိဘဲ နေမလား" ကျိုးချင်းမင်က ဒေါသတကြီး အော်ဟစ်လိုက်ပြီး ရှေ့သို့တက်ကာ လက်သီးဖြင့် တစ်ချက် ထိုးချလိုက်သည်။

ချက်ချင်းပင် ဝူယောင်ပန်း၏ ကျန်ရှိနေသော မျက်နှာတစ်ခြမ်းက တိုက်ရိုက် ရောင်ရမ်းသွားတော့သည်။

ဝူယောင်ပန်းက ချက်ချင်း ငိုယိုအော်ဟစ်သွားပြီး တရစပ် တောင်းပန်တော့သည်။ "ကျွန်တော် တကယ် မသိတာပါ... မူရင်းခန္ဓာကိုယ်က အရမ်း အရေးကြီးတာလေ... ကျွန်တော်တို့ ကိုယ်ပွားတွေကို ဘယ်လိုလုပ်ပြီး ရှိတဲ့နေရာကို အသိခံပါ့မလဲ"

"ကျွန်တော်တို့ရဲ့ အတွေ့အကြုံတွေ အားလုံးက မျှဝေခံစားလို့ ရပေမဲ့ မူရင်းခန္ဓာကိုယ်ရဲ့ အတွေ့အကြုံကိုတော့ ဘယ်လိုမှ မျှဝေခံစားခွင့် မရှိဘူး"

"သူက ကျွန်တော်တို့ ကိုယ်ပွားတွေအားလုံး ဖြတ်သန်းခဲ့ရသမျှကို မြင်တွေ့နိုင်တယ်... အခု ခင်ဗျားတို့ ကျွန်တော့်ကို အတင်းအကျပ် မေးခွန်းထုတ်နေတာတွေကိုလည်း သူက တကယ်တော့ သိနေပြီးပြီ"

တင်းယန်က မျက်မှောင်ကြုတ်လိုက်ပြီး လင်းယွမ်ကို ကြည့်ကာ "ဒီကိစ္စက ဖြစ်နိုင်လို့လား" ဟု မေးလိုက်သည်။

လင်းယွမ်က ခေါင်းအနည်းငယ် ညိတ်ပြလိုက်သည်။ "အစွမ်းပိုင်ရှင်တွေရဲ့ လောကမှာ မဖြစ်နိုင်တာ ဘာမှ မရှိဘူး... တကယ်လို့ငါသာ ဒီလိုမျိုး ကိုယ်ပွားဖန်တီးနိုင်တဲ့ အစွမ်း ရှိမယ်ဆိုရင် ငါ့ရဲ့ မူရင်းခန္ဓာကိုယ် တည်နေရာကို ကိုယ်ပွားတွေ သိခွင့်မရအောင် သေချာပေါက် နည်းလမ်းရှာပြီး ကန့်သတ်ထားမှာပဲ"

"ရန်သူတွေက ကိုယ်ပွားတွေကတစ်ဆင့် ငါ့ရဲ့ မူရင်းခန္ဓာကိုယ်ဆီကို တိုက်ရိုက် ရှာတွေ့သွားမှာကို ကာကွယ်ရမှာလေ"

"ဒီလို အစွမ်းမျိုးက မူရင်းခန္ဓာကိုယ် မသေမချင်း ကိုယ်ပွားတွေက အဆုံးအစမရှိ ထွက်ပေါ်နေမှာပဲ"

ထို့နောက် လင်းယွမ်က ဝူယောင်ပန်းကို ကြည့်ကာ "မင်း အပြင်ဘက်ကို သွားဖူးလား" ဟု မေးလိုက်သည်။

"ကျွန်တော် မဟုတ်ဘူး... အပြင်မှာ ရောက်နေတဲ့ တခြား ကိုယ်ပွားတွေ ရှိတယ်"

"ဘယ်မှာလဲ"

"နေရာတိုင်းမှာ ရှိတယ်... ကွမ်ဖူ... ခရိုင်အသစ်... စက်မှုဇုန်... မြို့လယ်ခေါင်နဲ့ တချို့ ရေပေါ်ကျွန်းတွေပေါ်မှာလည်း ရှိတယ်"

"အဝေးဆုံး ရောက်နေတဲ့ ကိုယ်ပွားဆိုရင် ကျန့်အန်းမြို့ဘက်ကိုတောင် ရောက်နေပြီ"

ဝူယောင်ပန်း၏ စကားကြောင့် လင်းယွမ်က အနည်းငယ် သက်ပြင်းချမိသွားသည်။

ဤကိုယ်ပွားဖန်တီးခြင်း အစွမ်းက အသုံးပြုရသည်မှာ အလွန် အဆင်ပြေလှပေသည်။ ဤကောင်က ကိုယ်ပွားများကို ရေဒါတစ်ခုအဖြစ် တိုက်ရိုက် အသုံးချပြီး အပြင်ထွက်ကာ မြေပုံတစ်ခုလုံးကို ရူးသွပ်စွာ ရှင်းလင်း ရှာဖွေနေခြင်းပင် ဖြစ်သည်။

ဝူယောင်ပန်း၏ အဆိုအရ သူ၏ မူရင်းခန္ဓာကိုယ်က ပုန်းအောင်းနေပြီး ကိုယ်ပွားများကို အပြင်ဘက်တွင် လွတ်လပ်စွာ စွန့်စားခွင့် ပြုထားသရွေ့ လုံးဝ အန္တရာယ်ကင်းနိုင်ပေသည်။

"မင်းရဲ့ အစွမ်းက ဘယ်လိုလုပ်ပြီး ဒီလောက် မြန်မြန် တိုးတက်လာတာလဲ... ၈၇ မှတ်ကိုတောင် ရောက်နေပြီ... ဒါက ဘယ်လိုဖြစ်ရတာလဲ" လင်းယွမ်က သူ၏ ရင်ထဲမှ အကြီးမားဆုံးသော သံသယကို မေးလိုက်သည်။

ဝူယောင်ပန်းက ခေါင်းခါလိုက်သည်။ "ကျွန်တော် မသိဘူး... မူရင်းခန္ဓာကိုယ်ရဲ့ အစွမ်းပမာဏအလျောက် ကျွန်တော်တို့ ကိုယ်ပွားတွေကလည်း အဲဒီစွမ်းအားအတိုင်း ရှိနေတာပဲ"

"ကျွန်တော်က မူရင်းခန္ဓာကိုယ် ဘယ်မှာရှိလဲဆိုတာတောင် မသိတာ... ကိုယ်တိုင် ဘယ်လိုမျိုး ပင်မ အရည်အသွေးမှတ် ၈၇ မှတ်ကို ဖောက်ထွက်နိုင်ခဲ့လဲ ဆိုတာကို ဘယ်လိုလုပ် သိနိုင်မှာလဲ"

လင်းယွမ်က အနည်းငယ် မယုံကြည်နိုင်သလို ခံစားလိုက်ရပြီး ထပ်မေးလိုက်သည်။ "မင်းပြောချင်တာက မင်းရဲ့ မူရင်းခန္ဓာကိုယ်မှာ ဘယ်လို အစွမ်းမျိုးပဲ ရှိရှိ မင်းတို့ ကိုယ်ပွားတွေကလည်း မူရင်းခန္ဓာကိုယ်နဲ့ တန်းတူ အစွမ်းတွေကို ရရှိနိုင်တယ် ဆိုတဲ့ သဘောလား"

"ဟုတ်တယ်"

"ရှီး"

လင်းယွမ်က မနေနိုင်ဘဲ လေအေးတစ်ချက်ကို ရှိုက်သွင်းလိုက်မိသည်။ ဤဝူယောင်ပန်း၏ ကိုယ်ပွားဖန်တီးခြင်း အစွမ်းက အတော်လေး အစွမ်းထက်လွန်းနေပေသည်။

တစ်ဖက်လူ၏ ကိုယ်ပွားများက မူရင်းခန္ဓာကိုယ်၏ စွမ်းအားများကို ရာခိုင်နှုန်းပြည့် အမွေဆက်ခံနိုင်သည်တဲ့လား။

အကယ်၍ သူ၏ ပင်မ အရည်အသွေးမှတ်ကိုသာ ဆက်တိုက် တိုးမြှင့်ခွင့် ပြုလိုက်ပါက လူအင်အား သုံးပြီး တိုက်ခိုက်သည့် နည်းဗျူဟာကို အသုံးပြုနိုင်မည် မဟုတ်ပါလား။

လူတစ်ယောက်တည်းက စစ်တပ်တစ်တပ်အဖြစ် ပြောင်းလဲသွားနိုင်ခြင်းကလည်း မဖြစ်နိုင်သည့် ကိစ္စ မဟုတ်ပေ။

လင်းယွမ်က ရုတ်တရက် မေးလိုက်သည်။ "မင်းရဲ့ ကိုယ်ပွားတွေက တိုက်ခိုက်တဲ့အခါ ခွန်အားနဲ့ အလျင်ကိုပဲ အားကိုးကြတယ်... ပြီးတော့ ခွန်အားကလည်း အမြင့်ဆုံးမှ အမှတ် ၇၀ ဝန်းကျင်လောက်ပဲ ရှိတာ... ဒါက ဘယ်လိုဖြစ်ရတာလဲ"

ဝူယောင်ပန်းက "ကျွန်တော့် မူရင်းခန္ဓာကိုယ်ရဲ့ အမြင့်ဆုံး အရည်အသွေးမှတ်က ခန္ဓာကိုယ်ကြံ့ခိုင်မှုပဲ... ဒုတိယက စိတ်စွမ်းအင်ပေါ့... ဒါပေမဲ့ စိတ်စွမ်းအင်က ကိုယ်ပွားတွေနဲ့ သက်ဆိုင်နေတော့ တိုက်ခိုက်တဲ့နေရာမှာ တိုက်ရိုက် အသုံးပြုလို့ မရဘူး" ဟု ပြောလိုက်သည်။

"ဒါကြောင့် ကျွန်တော်တို့က တိုက်ခိုက်တဲ့အခါ ခွန်အားနဲ့ အလျင်ကိုပဲ အားကိုးလို့ ရတယ်"

"ကျွန်တော် အစတုန်းက ခွန်အား အရည်အသွေးမှတ်က မမြင့်ဘူး... နောက်ပိုင်း ပြန်နိုးလာတဲ့ အချိန်တိုင်း ကျွန်တော့်ရဲ့ ခွန်အားတွေက တိုးလာတာ"

"ကျွန်တော့်ရဲ့ မူရင်းခန္ဓာကိုယ်ဘက်မှာ စွမ်းအားတွေ အလျင်အမြန် တိုးတက်လာနေလို့ ဖြစ်ရမယ်"

"မူရင်းခန္ဓာကိုယ်က ဘာတွေလုပ်ခဲ့လဲဆိုတာ ကျွန်တော် မသိဘူး... ဒါပေမဲ့ သူက စွမ်းအားတွေ တိုးလာမှ ကျွန်တော်တို့ရဲ့ စွမ်းအားတွေကလည်း လိုက်ပြီး တိုးလာမှာပါ"

လင်းယွမ်က စကားမပြောတော့။ ဝူယောင်ပန်း၏ ပြောစကားက သူ နားလည်ထားသည်နှင့် များစွာ ကွာခြားမှု မရှိပေ။

သူ၏ ပင်မ အရည်အသွေးမှတ်က ခန္ဓာကိုယ်ကြံ့ခိုင်မှု ဖြစ်ပြီး ၈၇ မှတ် အထိပင် ရောက်ရှိနေသော်လည်း အခြားသော အရည်အသွေးမှတ်များကမူ ပင်မ အရည်အသွေးမှတ်ထက် သိသိသာသာ နောက်ကျနေပေသည်။

ထိုအထဲတွင် စိတ်စွမ်းအင် အရည်အသွေးမှတ်က ခန္ဓာကိုယ်ကြံ့ခိုင်မှု အရည်အသွေးမှတ်နှင့် နီးကပ်စွာ ဆက်စပ်နေပေမည်။ သူ၏ ကိုယ်ပွားဖန်တီးခြင်း အစွမ်းက မြင့်မားသော ခန္ဓာကိုယ်ကြံ့ခိုင်မှု လိုအပ်ရုံသာမက မြင့်မားသော စိတ်စွမ်းအင်ကိုလည်း လိုအပ်ပေသည်။

သို့သော်လည်း ထိုစိတ်စွမ်းအင်က တိုက်ခိုက်ရေး စွမ်းရည်ပေါ်တွင် တိုက်ရိုက် ထင်ဟပ်နိုင်ခြင်း မရှိပေ။

ဒြပ်စင် အမျိုးအစား အစွမ်းပိုင်ရှင်များနှင့် အတူတူပင် ဖြစ်ပြီး တိုက်ခိုက်ရာတွင် အမှန်တကယ် အသုံးဝင်စေရန် ဒြပ်စင်နှင့် စိတ်စွမ်းအင်ကို ပေါင်းစပ်ပေးမှသာ အဆင်ပြေမည် ဖြစ်သည်။

စိတ်စွမ်းအင် ပိုမို အားကောင်းလေ ဒြပ်စင် ပေါက်ကွဲမှုမှ ရရှိသော ထိခိုက်ပျက်စီးမှုကလည်း ပိုမို အားကောင်းလေပင် ဖြစ်သည်။

ယခု မျက်စေ့အောက်ရှိ ဤဝူယောင်ပန်းမှာမူ ခန္ဓာကိုယ်ကြံ့ခိုင်မှုနှင့် စိတ်စွမ်းအင် ပိုမို အားကောင်းလေ ကိုယ်ပွားများ ပိုမို များပြားလေ ဖြစ်သည်မှာ သိသာထင်ရှားလှသည်။

တိုက်ခိုက်ရေးနှင့် ပတ်သက်လျှင် တစ်ဖက်လူက ခွန်အားနှင့် အလျင် ဟူသော အရည်အသွေးမှတ် နှစ်ခုကိုသာ အားကိုးနိုင်တော့သည်။

သို့သော်လည်း ယုံမှားသံသယဖြစ်ဖွယ် မရှိသည်မှာ ဤအရည်အသွေးမှတ် နှစ်ခုတွင် တစ်ဖက်လူက အမှတ် ၇၀ ဝန်းကျင် အဆင့်တွင်သာ ရှိနေရမည် ဖြစ်သည်။

သေချာပေါက်ပင် ဤအဆင့်ရှိ ခွန်အားနှင့် အလျင်က လင်းယွမ်အတွက်မူ သဘာဝကျကျပင် တစ်ချက်တည်းနှင့် လဲကျသွားနိုင်လောက်အောင် အားနည်းလှပေသည်။

သို့သော်လည်း သာမန် အစွမ်းပိုင်ရှင်များ အကြားတွင်မူ ဤအရာက ကြောက်စရာကောင်းလောက်အောင် အစွမ်းထက်နေပြီ ဖြစ်သည်။

ဝူယောင်ပန်း၏ မူရင်းခန္ဓာကိုယ်က သေချာပေါက် မျိုးရိုးဗီဇမျိုးစေ့ကို စုစည်းနိုင်ခဲ့သော ထိပ်တန်း အစွမ်းပိုင်ရှင် ဖြစ်ရမည်။ သူက ကိုယ်ပွားများ ဖန်တီးလိုက်ပြီးနောက် ဤကိုယ်ပွားများကလည်း မျိုးရိုးဗီဇမျိုးစေ့ အဆင့်ရှိ ထိပ်တန်း အစွမ်းပိုင်ရှင်များ၏ တိုက်ခိုက်ရေးစွမ်းရည်ကို ပိုင်ဆိုင်ထားကြပေသည်။

ဤအချက်က အလွန် ကြောက်စရာ ကောင်းနေပြီ ဖြစ်သည်။

ဝူယောင်ပန်း တစ်ယောက်တည်းက ခွန်အား အမျိုးအစား မျိုးရိုးဗီဇမျိုးစေ့ အဆင့်ရှိ ထိပ်တန်း အစွမ်းပိုင်ရှင် ၈၇ ယောက်နှင့် ညီမျှနေပေသည်။

ထို့နောက် လင်းယွမ်က သူ၏ ကိုယ်ပွားဖန်တီးခြင်း အစွမ်းနှင့် ပတ်သက်သည့် ကိစ္စရပ်များစွာကို ဆက်လက် မေးမြန်းခဲ့သည်။

ဝူယောင်ပန်း၏ ကိုယ်ပွားဖန်တီးခြင်း အစွမ်းအကြောင်းကို အပြည့်အဝ နားလည်သွားပြီးနောက် ဤဝူယောင်ပန်း၏ ခြိမ်းခြောက်မှုက အလွန် ကြီးမားကြောင်း လင်းယွမ်က ပို၍ ခံစားလာရသည်။

ဤသူ၏ မူရင်းခန္ဓာကိုယ်က အမှောင်ထဲတွင် ပုန်းကွယ်နေပြီး ကိုယ်ပွားများက အပြင်ဘက်တွင် ပြဿနာများ ဖန်တီးနေခြင်းပင် ဖြစ်သည်။

ထို့ပြင် ကိုယ်ပွားများက မူရင်းခန္ဓာကိုယ်ကို အာရုံခံနိုင်စွမ်းကိုလည်း ကိုယ်တိုင် ချိတ်ပိတ်ထားသေးရာ ရှုံးနိမ့်၍မရနိုင်သော အခြေအနေသို့ ရောက်ရှိနေပြီဟုပင် ဆိုနိုင်ပေသည်။

"ဒီ ဧဒင်ဥယျာဉ်က မင်း တည်ဆောက်ခဲ့တာလား... ဒါမှမဟုတ် မင်းရဲ့ မူရင်းခန္ဓာကိုယ်က တည်ဆောက်ခဲ့တာလား... ဘာဖြစ်လို့ ဒီနေရာမှာ လူအင်အား ဒီလောက်အများကြီး အသုံးပြုထားရတာလဲ"

ဝူယောင်ပန်း၏ မျက်နှာအမူအရာက အနည်းငယ် ပြောင်းလဲသွားပြီး အကြည့်များ တုန်ယင်လာခဲ့သည်။ "ကျွန်တော်... မသိဘူး"

သူ၏ စကားသံ အဆုံးတွင် လင်းယွမ်က ချက်ချင်းပင် အေးစက်စွာ ရယ်မောလိုက်သည်။ "လိမ်နေတာပဲ... ငါ မင်းကို ကြိုမပြောထားဘူးလို့ အပြစ်မတင်နဲ့... မင်းရဲ့ သွေးသားခွန်အား အတက်အကျကို ငါ ရှင်းရှင်းလင်းလင်း အာရုံခံနိုင်တယ်"

"မင်း လိမ်ပြောလိုက်တဲ့ အချိန်တိုင်း ငါက ရှင်းရှင်းလင်းလင်း သိနေတယ်"

ဝူယောင်ပန်း၏ မျက်နှာက ချက်ချင်း ပြောင်းလဲသွားပြီး အထစ်ထစ်အငေါ့ငေါ့ဖြင့် ပြန်ဖြေလိုက်သည်။

"ဟုတ်... ဟုတ်တယ်... မူရင်းခန္ဓာကိုယ် တည်ဆောက်ခဲ့တာပါ... ဧဒင်ဥယျာဉ် အစောဆုံး အချိန်တုန်းက မူရင်းခန္ဓာကိုယ် ကိုယ်တိုင် တည်ဆောက်ခဲ့တာ... ပြီးတော့ အချိန်တစ်ခု ကြာတိုင်း ကိုယ်ပွားတွေက ဧဒင်ဥယျာဉ်ထဲကို ဝင်လာပြီး ဒီက ကောင်းကင်တမန်အဖွဲ့ဝင် တစ်ယောက် ဖြစ်လာကြတာပါ"

"ဘာဖြစ်လို့လဲ... မင်းရဲ့ မူရင်းခန္ဓာကိုယ်က ဘာဖြစ်လို့ ဒီနေရာကို ဒီလောက်တောင် အလေးထားနေရတာလဲ"

"ဒါ... ကျွန်တော် မသိဘူး... အပြင်ဘက်မှာက ရေလွှမ်းမိုးခံထားရပြီဆိုတော့ ဒီနေရာက တစ်ခုတည်းသော ဘေးကင်းတဲ့ နေရာ ဖြစ်နေလို့လည်း ဖြစ်နိုင်တယ်"

"ဒါမှမဟုတ်ရင်လည်း ဒီနေရာမှာ မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါတွေ အများကြီး ရှိနေပြီး သတ္တုအရင်းအမြစ်တွေလည်း ပေါကြွယ်ဝနေလို့ ဖြစ်မယ်"

"ဒီနေရာကို လျှို့ဝှက်စခန်း တစ်ခုအနေနဲ့ အသုံးပြုပြီး တိုးတက်အောင် လုပ်လို့ ရတယ်လေ"

"မူရင်းခန္ဓာကိုယ်ရဲ့ အတွေးကို ကျွန်တော် မသိပါဘူး... တကယ်ပြောတာပါ"

ဝူယောင်ပန်းက အစွမ်းကုန် ရှင်းပြနေသည်။ ဘေးတွင် ကျားတစ်ကောင်ကဲ့သို့ စောင့်ကြည့်နေသော ကျိုးချင်းမင်က ဓားမြှောင်ကို မြှောက်လိုက်ပြီ ဖြစ်ရာ သူ့အား အလွန် ကြောက်ရွံ့သွားစေသည်။

ပွင့်ပွင့်လင်းလင်း ပြောရလျှင် သူက ညှဉ်းပန်းနှိပ်စက် ခံရမည့်အစား သေရန်သာ ရွေးချယ်လိုပေသည်။

သေဆုံးခြင်းက သူ့အတွက် အဆုံးသတ် မဟုတ်ပေ။ သူ၏ အသိစိတ်နှင့် သူ သိနားလည်ထားသည်များ အားလုံးက အခြားသော ကိုယ်ပွားများထံသို့ ပြောင်းရွှေ့သွားမည်ပင် ဖြစ်သည်။

လင်းယွမ်က မျက်လုံးကိုမှိတ်ကာ တစ်ဖက်လူ၏ သွေးသားခွန်အားကို အာရုံခံလိုက်သည်။

ဝူယောင်ပန်း၏ ဤကိုယ်ပွားက အမှန်တကယ်ပင် လိမ်ညာထားခြင်း မရှိပေ။

"ငါ့ သူငယ်ချင်းက ဘယ်လိုလုပ်ပြီး ပျောက်သွားတာလဲ ဆိုတာကို ငါ့ကို သေသေချာချာ ပြောပြစမ်း" ဟု လင်းယွမ်က မေးလိုက်သည်။

ဝူယောင်ပန်းက အလျင်အမြန် ပြန်ဖြေလိုက်သည်။ "အဲဒီအချိန်တုန်းက ကျွန်တော်တို့က ခန္ဓာကိုယ်ကြံ့ခိုင်မှု အမျိုးအစား မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါ တစ်ကောင်ကို ဖမ်းဆီးသတ်ဖြတ်ဖို့ လုပ်နေတာ... အဲဒီအချိန်မှာပဲ ညီမတင်းတို့ လိုက်ပြီး သတ်ဖြတ်ခံနေရတာကို တွေ့လိုက်ရတယ်"

"ကျွန်တော်က စေတနာနဲ့ လူတွေ လွှတ်ပြီး ညီမတင်းတို့ကို ကယ်တင်ပေးခဲ့တာ... သူတို့ကို ခေါ်သွားပြီး ဒဏ်ရာတွေ ကုသပေးမလို့ စဉ်းစားထားတာပါ"

"ဒါပေမဲ့ ဧဒင်ဥယျာဉ်ကို ပြန်ရောက်တော့... သတိမေ့နေတဲ့ အဲ့ဒီ ဟင်းလင်းပြင် အမျိုးအစား အစွမ်းပိုင်ရှင်က ရုတ်တရက် အစွမ်းသုံးပြီး ဟင်းလင်းပြင် အက်ကွဲကြောင်းကို ဖွင့်ပြီး ထွက်ပြေးသွားလိမ့်မယ်လို့ မထင်ထားမိဘူး"

"တကယ်ပြောတာပါ... ကျွန်တော် ကောင်းကင်ကို တိုင်တည်ပြီး ကျိန်ရဲပါတယ်... ဒီ ခေါက်ချိုးဟင်းလင်းပြင်က အစကတည်းက မတည်ငြိမ်ဘူးလေ... သူက ဟင်းလင်းပြင် အမျိုးအစား အစွမ်းပိုင်ရှင်ဆိုတော့ ဒီလို မတည်ငြိမ်တဲ့ ဟင်းလင်းပြင်တွေ အပေါ်မှာ အာရုံခံနိုင်စွမ်းက ပိုကောင်းနေမှာပေါ့"

"သူက ထွက်ပြေးချင်နေတာ... အထူးသဖြင့် ဟင်းလင်းပြင် ဆုံမှတ်တွေကို သုံးပြီး ထွက်ပြေးသွားမယ်ဆိုရင် ကျွန်တော်လည်း တားနိုင်မှာ မဟုတ်ဘူး"

လင်းယွမ်က မျက်မှောင်ကြုတ်လိုက်သည်။ ဝူယောင်ပန်းက အမှန်တကယ် လိမ်ညာပြောဆိုခြင်း မရှိသည်ကို သူ အာရုံခံနိုင်ပေသည်။

လီချင်းဟွာက ထွက်ပြေးသွားတာလား။

သူက ဘယ်ကို ထွက်ပြေးသွားတာလဲ။

ဒီ ခေါက်ချိုးဟင်းလင်းပြင်ထဲမှာ ရှိနေသေးရဲ့လား။

လင်းယွမ်က ရုတ်တရက် အနည်းငယ် နောင်တရသွားမိသည်။ အစောပိုင်းက လီချင်းဟွာတို့၏ ခန္ဓာကိုယ်ထဲတွင် ကပ်ပါးမျိုးစေ့ ချန်ထားခဲ့သော်လည်း နောက်ပိုင်းတွင် လီချင်းဟွာက ထိုက်ယန်တောင်သို့ တရားဝင် ဝင်ရောက်လာပြီးနောက် ကပ်ပါးမျိုးစေ့၏ ချုပ်နှောင်မှုကို မိမိကိုယ်တိုင် ဖြုတ်ပေးလိုက်ခြင်းပင် ဖြစ်သည်။

အကယ်၍ ကပ်ပါးမျိုးစေ့သာ ရှိနေသေးလျှင် လီချင်းဟွာ၏ တည်နေရာကို အလွယ်တကူ အာရုံခံနိုင်ပေမည်။

နားထင်ကို ပွတ်သပ်လိုက်ရင်း လင်းယွမ်က မေးလိုက်သည်။ "ဒီ ခေါက်ချိုးဟင်းလင်းပြင်ရဲ့ အကျယ်အဝန်းက ဘယ်လောက် ကြီးလဲ... အသက်ရှင်ကျန်ရစ်သူ ဘယ်လောက် ရှိသေးလဲ... ပြီးတော့ ခိုလှုံရေးစခန်း ဘယ်နှစ်ခု ရှိလဲ"

"အကျယ်အဝန်းက တကယ်တော့ စတုရန်းမိုင် ရှစ်မိုင်လောက်ပဲ ရှိတယ်... ကျွန်တော်တို့ဆီက ရှောင်မောင်းတောင်က အကြီးဆုံး ခိုလှုံရေးစခန်းလို့ သတ်မှတ်လို့ ရပါတယ်"

"ဒီမှာရှိတဲ့ အသက်ရှင်ကျန်ရစ်သူတွေကလည်း သိပ်မများဘူး... အခြေခံအားဖြင့် အားလုံး ကျွန်တော့်ဆီမှာ ရောက်နေတာပါ"

"ဒီနေရာက ရေကြီးမှုဒဏ်ကို မခံရဘူး ဆိုပေမဲ့ မူလကတည်းက အထပ်မြင့် အဆောက်အအုံတွေ သိပ်မရှိဘူး... အများစုက ဖျက်သိမ်းပြီး ပြန်ဆောက်ထားတဲ့ ခြောက်ထပ်တိုက် အမျိုးအစားတွေချည်းပဲဆိုတော့ စောစောစီးစီးကတည်းက ရေလွှမ်းခံလိုက်ရပြီ"

"ဒါ့အပြင် ဒီနေရာမှာ မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါတွေ အရမ်းများလွန်းတော့ သာမန်လူတွေ အသက်ရှင်ဖို့ ခက်ခဲတယ်... ကျွန်တော့်ဆီလာပြီး ကျွန်တော့်ရဲ့ အကာအကွယ်ကို ခံယူမှပဲ အသက်ရှင်နိုင်မှာပါ"

ဝူယောင်ပန်း၏ စကား အနည်းငယ်က ဤခေါက်ချိုးဟင်းလင်းပြင်၏ အခြေအနေကို ရှင်းပြလိုက်ခြင်းပင် ဖြစ်တော့သည်။

ဆက်ရန်...

အပိုင်း(၅၁၂) ရှောင်မောင်းတောင်ကို သိမ်းပိုက်ခြင်း

လင်းယွမ်က မျက်မှောင်ကြုတ်လိုက်ပြီး သံသယဖြင့် မေးလိုက်သည်။ "ဒီဟင်းလင်းပြင်က ၇ စတုရန်းမိုင်ကျော် ကျယ်ဝန်းတယ်... သိပ်မကြီးပေမဲ့ သေးတယ်လို့လည်း ပြောလို့မရဘူး"

"ဒီနေရာရဲ့ သန္ဓေပြောင်းစွမ်းအင် ပြင်းအားနဲ့ဆိုရင်... မျိုးရိုးဗီဇအဆင့် သန္ဓေပြောင်းသားရဲတွေ ဒီလောက်တောင် အများကြီး ပေါက်ဖွားလာနိုင်မှတော့... ဘာလို့ မျိုးရိုးဗီဇအဆင့် လူသား အစွမ်းပိုင်ရှင် တစ်ယောက်မှ ရှိမနေတာလဲ"

ဝူယောင်ပန်းက ခေါင်းခါလိုက်သည်။ "လူတွေက အစကတည်းက အားနည်းတဲ့ အုပ်စုဖြစ်နေလို့ နေမှာပေါ့... အစောဆုံး အချိန်တွေတုန်းက အိမ်ထဲမှာပဲ ပိတ်မိနေပြီး အပြင်မထွက်ရဲကြဘူး... တခြား သန္ဓေပြောင်း သက်ရှိတွေက ဆင့်ကဲပြောင်းလဲဖို့ စတင်နေချိန်မှာ လူသားတွေကတော့ မူလနေရာမှာပဲ ရပ်တန့်နေခဲ့ကြတယ်"

"တစ်လှမ်း နောက်ကျသွားတော့လည်း ခြေလှမ်းတိုင်း နောက်ကျသွားခဲ့တာနေမှာပေါ့"

တင်းယန်က ချက်ချင်းပင် ပြောလိုက်သည်။ "မဖြစ်နိုင်ဘူး... လူသားတွေရဲ့ အသန်မာဆုံး အရာက သူတို့ရဲ့ ဉာဏ်ပညာပဲ... အစပိုင်းမှာ နောက်ကျခဲ့တယ် ဆိုရင်တောင် နောက်ပိုင်း ပြင်ပက ဖိအားတွေကို ရင်ဆိုင်ရတဲ့အခါ သူတို့တွေ မပူးပေါင်းဘဲ နေကြမလား"

ဝူယောင်ပန်းက ပါးစပ်ဟလိုက်ပြီး တစ်ခုခု ထပ်ပြောရန် ပြင်လိုက်သည်။

လင်းယွမ်က အကြည့်တို့ကို အနည်းငယ် စူးရှသွားစေလိုက်ပြီးနောက် ပြောလိုက်သည်။ "မင်းရဲ့ သွေးလှည့်ပတ်နှုန်းက အရမ်း မြန်ဆန်နေတယ်... မင်း လိမ်နေတာလား"

ဝူယောင်ပန်း၏ မျက်နှာက ချက်ချင်းပင် တုန်ယင်သွားခဲ့သည်။ "မဟုတ်တာ... ကျွန်တော် မလိမ်... အား"

ကျိုးချင်းမင်က ရှေ့တိုးလာပြီး သူ၏ ပခုံးကို ဓားဖြင့် တိုက်ရိုက် ထိုးချလိုက်သည်။

"မင်းက လိမ်ရဲသေးတယ်ပေါ့လေ"

ကျိုးချင်းမင်က ရက်စက်စွာ ပြုံးလိုက်ပြီး ဓားရိုးကို အားကုန်ဆွဲချလိုက်ရာ ချက်ချင်းပင် အရေပြားတစ်လွှာက တိုက်ရိုက် လှီးဖြတ်ခံလိုက်ရသည်။

ပြင်းထန်လှသော နာကျင်မှုကြောင့် ဝူယောင်ပန်းထံမှ စူးရှသော အော်ဟစ်သံကြီး ထွက်ပေါ်လာတော့သည်။

သူက အသံနက်ကြီးဖြင့် အော်ဟစ်လိုက်သည်။ "ကျွန်တော် မှားပါပြီ... ကျွန်တော် မှားပါပြီ... ကျွန်တော် ပြောပါ့မယ်... အကုန်လုံး ပြောပြပါ့မယ်... ဒီဟင်းလင်းပြင်ထဲမှာလည်း အရင်က မျိုးရိုးဗီဇအဆင့် အစွမ်းပိုင်ရှင်တွေ ရှိခဲ့ပါတယ်"

"သူတို့က အရင်က မဟာမိတ်အဖွဲ့ ဖွဲ့ထားခဲ့တာပါ... နောက်ပိုင်းကျမှ ကျွန်တော်က သူတို့ကို ရှင်းပစ်လိုက်ပြီး ဒီဟင်းလင်းပြင်ကို အုပ်စိုးလိုက်တာပါ"

"ဘယ်လို ရှင်းပစ်လိုက်တာလဲ" လင်းယွမ်က အော်ငေါက်ကာ မေးလိုက်သည်။

"ကျွန်တော် သူတို့ကို မျိုးရိုးဗီဇအဆင့် သန္ဓေပြောင်းသားရဲတွေ စုဝေးနေတဲ့ ချယ်ရီလမ်းမဘက်ကို မျှားခေါ်သွားခဲ့တာပါ... ကိုယ်ပွားတစ်ခုကို စတေးလိုက်ပြီး သူတို့အားလုံးကို သန္ဓေပြောင်းသားရဲတွေရဲ့ ပါးစပ်ထဲ ထည့်ပေးလိုက်တာပါ"

"ရှင်က အစကတည်းက ဒီဟင်းလင်းပြင်ထဲကလူ မဟုတ်ဘူး မလား... ရှင်က အပြင်ဘက်ကလာတဲ့ လူမှတ်လား" တင်းယန်ကလည်း ဤအချက်ကို ချက်ချင်း သတိပြုမိသွားပြီး အော်ငေါက်ကာ မေးလိုက်သည်။

ဝူယောင်ပန်းက ခေါင်းညိတ် ဝန်ခံလိုက်ပြီး ပြောလိုက်သည်။ "ဟုတ်ပါတယ်... လွန်ခဲ့တဲ့ သုံးလလောက်ကမှ ကျွန်တော် ဒီဟင်းလင်းပြင် ခေါက်ချိုးထဲကို ဝင်လာခဲ့တာပါ... ဒီနေရာက ရေတွေ လုံးဝ လွှမ်းမိုးမခံထားရတာကို တွေ့တော့ ကျွန်တော် ချက်ချင်းပဲ ဒီနေရာကို ကိုယ်ပိုင်အဖြစ် သိမ်းပိုက်ဖို့ ကြံစည်ခဲ့တာပါ"

"ဒါပေမဲ့ ဒီနေရာကို မျိုးရိုးဗီဇအဆင့် အစွမ်းပိုင်ရှင် တစ်စုက နေရာယူထားနှင့်ပြီးသား ဖြစ်နေတယ်... ကျွန်တော်က ဒီနေရာကို နေရာယူချင်ရင် သူတို့ကို အရင်ဆုံး ရှင်းပစ်ဖို့ လိုအပ်တယ်"

"ကျွန်တော့်ရဲ့ မူလကိုယ်ခန္ဓာကလည်း ဒီကိစ္စကို သိသွားပြီးတဲ့နောက်မှာ... ဒီကိစ္စကို ကူညီလုပ်ဆောင်ဖို့အတွက် ကိုယ်ပွား အမြောက်အမြားကို စေလွှတ်ပေးခဲ့ပါတယ်"

"နောက်ပိုင်းမှာ ကျွန်တော်က မျိုးရိုးဗီဇအဆင့် အစွမ်းပိုင်ရှင် တစ်ယောက်အနေနဲ့... ဒီဒေသခံတွေကြားထဲကို ဝင်ရောက်သွားခဲ့ပြီး သူတို့ကို မျိုးရိုးဗီဇအဆင့် သန္ဓေပြောင်းသားရဲတွေ သွားရောက် အမဲလိုက်ဖို့ လှည့်စားခဲ့တယ်"

"သူတို့နဲ့ မျိုးရိုးဗီဇအဆင့် သန္ဓေပြောင်းသားရဲတွေ တိုက်ပွဲကြီး ဖြစ်ပွားပြီးတဲ့နောက်မှာ နှစ်ဖက်စလုံး အထိနာသွားခဲ့တယ်... အဲ့ဒီအခါကျမှ ကျွန်တော့်ရဲ့ ကိုယ်ပွားတွေက အတူတူ ထွက်လာပြီး ဒီ မျိုးရိုးဗီဇအဆင့် အစွမ်းပိုင်ရှင်တွေနဲ့ သန္ဓေပြောင်းသားရဲတွေကို သတ်ပစ်လိုက်တာပါ"

လင်းယွမ်တို့ သုံးယောက်က ထိုအခါမှသာ ဤဝူယောင်ပန်း တစ်ယောက် မည်သို့မည်ပုံဖြင့် ဤဟင်းလင်းပြင် ခေါက်ချိုးထဲရှိ ဘုရားသားတော် အဖြစ်သို့ တစ်ဆင့်ပြီးတစ်ဆင့် ရောက်ရှိလာခဲ့သည်ကို နားလည်သွားကြတော့သည်။

တကယ်ပင် စစ်ဗိုလ်ချုပ်တစ်ဦး အောင်မြင်မှုရရန်အတွက် အရိုးပေါင်း သောင်းသောင်းမက စတေးခဲ့ရသကဲ့သို့ ဤအရာ၏ နောက်ကွယ်တွင်မူ အကြံအစည် ပရိယာယ်များဖြင့်သာ ပြည့်နှက်နေခဲ့သည်။

လင်းယွမ်၏ စိတ်ထဲတွင် ရုတ်တရက် လှုပ်ရှားသွားပြီး မေးလိုက်သည်။ "မင်းသတ်လိုက်တဲ့ မျိုးရိုးဗီဇအဆင့် သန္ဓေပြောင်းသားရဲတွေကရော... သူတို့ရဲ့ သွေးအဆီအနှစ်တွေက ဘယ်ရောက်သွားလဲ"

"အပြင်ဘက်ကို ပို့လိုက်ပါပြီ... ကိုယ်ပွားတစ်ခုက ယူဆောင်သွားတာပါ... မူလကိုယ်ခန္ဓာဆီကို ပေးလိုက်တာ နေမှာပါ... အဲ့ဒီနောက်ပိုင်းကစပြီး ကျွန်တော့်ရဲ့ စွမ်းအားတွေ အလွန်အမင်း တိုးတက်လာတာကို ခံစားလိုက်ရတယ်"

"မူလကိုယ်ခန္ဓာက မျိုးရိုးဗီဇအဆင့် သန္ဓေပြောင်းသားရဲတွေရဲ့ သွေးဆီအနှစ် အများကြီးကို စုပ်ယူလိုက်လို့... စွမ်းအားတွေ လျင်လျင်မြန်မြန် တိုးတက်လာတာ ဖြစ်ရမယ်"

ဤဝူယောင်ပန်း တစ်ယောက် သူ၏ အဓိက အရည်အသွေးမှတ် စွမ်းအားကို ၈၇ မှတ်အထိ မည်သို့မည်ပုံ ဤမျှ လျင်မြန်စွာ မြှင့်တင်နိုင်ခဲ့သည်ကို လင်းယွမ်က နောက်ဆုံးတော့ နားလည်သွားခဲ့ပြီ ဖြစ်သည်။

အကယ်၍ ဝူယောင်ပန်း၏ ကိုယ်ပွား ပြောစကားအရဆိုလျှင် သူက ဤနေရာရှိ ဒေသခံ မျိုးရိုးဗီဇအဆင့် အစွမ်းပိုင်ရှင်များကို အသုံးချကာ မျိုးရိုးဗီဇအဆင့် သန္ဓေပြောင်းသားရဲ အမြောက်အမြားကို သတ်ဖြတ်ခဲ့ခြင်း ဖြစ်သည်။

ထိုမှတစ်ဆင့် သွေးအဆီအနှစ် အမြောက်အမြားကို ရယူနိုင်ခဲ့သောကြောင့် ၎င်း၏ မူလကိုယ်ခန္ဓာက ထိုသွေးအဆီအနှစ်များကို စုပ်ယူလိုက်သည့်အခါ စွမ်းအားက သဘာဝကျစွာပင် အလွန်အမင်း တိုးတက်လာနိုင်ခြင်း ဖြစ်သည်။

ဂိုဏ်းကြီးသုံးဂိုဏ်း ဖြစ်နေလျှင်တောင်မှ လူတစ်ယောက်တည်းကို သွေးအဆီအနှစ် အမြောက်အမြားထဲရှိ သန္ဓေပြောင်းစွမ်းအင်များကို သီးသန့် စုပ်ယူခွင့်ပြုရန် မဖြစ်နိုင်ပေ။

မည်သို့ပင်ဆိုစေကာမူ ဤသွေးဆီအနှစ်များကို မျိုးရိုးဗီဇမျိုးစေ့ ဖော်စပ်ရာတွင် အသုံးပြုနိုင်သေးသည် မဟုတ်ပါလော။

သို့သော် ဝူယောင်ပန်း၏ မူလကိုယ်ခန္ဓာအတွက်မူ သူ၏ စွမ်းအား တိုးတက်လာခြင်းက ဤကိုယ်ပွားများ၏ စွမ်းအားများပါ တိုးတက်လာခြင်းကို ကိုယ်စားပြုနေပေသည်။

ထို့ကြောင့် သူက မည်သည့်အရာကိုမျှ ဂရုစိုက်နေစရာ မလိုဘဲ သွေးဆီအနှစ် အားလုံးကို သန့်စင်ကာ စွမ်းအားကို လျင်မြန်စွာ မြှင့်တင်ရန်အတွက် အသုံးပြုနိုင်ခဲ့ခြင်း ဖြစ်သည်။

"ဒီနည်းလမ်းအတိုင်းဆိုရင်... ရှင့်ရဲ့ မူလကိုယ်ခန္ဓာက ခဏလေးနဲ့ အမှတ် ၁၀၀ ကို အဆင့်တက်နိုင်တော့မှာပေါ့" တင်းယန်က မေးလိုက်သည်။

ဝူယောင်ပန်းက ခေါင်းခါလိုက်ပြီး ပြောလိုက်သည်။ "ဒါကတော့ မဖြစ်နိုင်ပါဘူး... မျိုးရိုးဗီဇအဆင့် သန္ဓေပြောင်းသားရဲတွေရဲ့ သွေးအဆီအနှစ်တွေကို အကန့်အသတ်မရှိ ထောက်ပံ့ပေးထားနိုင်ရင်တောင်... အစွမ်းပိုင်ရှင်ကိုယ်တိုင်က အကန့်အသတ်မရှိ စုပ်ယူနိုင်ဖို့ဆိုတာ မဖြစ်နိုင်ပါဘူး"

"တူညီတဲ့ အမျိုးအစားရှိတဲ့... မျိုးရိုးဗီဇအဆင့် သန္ဓေပြောင်းသားရဲတွေရဲ့ သွေးအဆီအနှစ်ကို စုပ်ယူနိုင်မှ... မျိုးရိုးဗီဇမြေပုံကို အပြည့်အဝ ဖော်ဆောင်နိုင်မှာပါ... အဲ့ဒီလိုမှ မဟုတ်ဘဲ တခြား အမျိုးအစားရှိတဲ့ မျိုးရိုးဗီဇအဆင့် သန္ဓေပြောင်းသားရဲတွေကို စုပ်ယူလိုက်မယ်ဆိုရင်... ရောနှောနေတဲ့ မျိုးရိုးဗီဇ အမြောက်အမြားကို စုပ်ယူမိသွားနိုင်ပြီး... မျိုးရိုးဗီဇမြေပုံကို ညစ်ညမ်းသွားစေနိုင်ပါတယ်"

"အဲ့ဒီအချိန်ရောက်ရင်... သန္ဓေပြောင်း ဘီလူးတစ်ကောင်အဖြစ်... လုံးဝ ပြောင်းလဲသွားလိမ့်မယ်"

"မျိုးရိုးဗီဇမြေပုံ... အလယ်အလတ်အဆင့်ကို အဆင့်တက်နိုင်ဖို့... ဘယ်တော့မှ ဖြစ်နိုင်တော့မှာ မဟုတ်ဘူး"

တင်းယန်ကလည်း သဘောပေါက်သွားခဲ့သည်။ မျိုးရိုးဗီဇအဆင့်ကို အဆင့်တက်ချိန်တွင်ပင် ရောနှောနေသော မျိုးရိုးဗီဇများ၏ နှောင့်ယှက်မှု ရှိနေပေသည်။

ထိုသို့ဆိုလျှင် မျိုးရိုးဗီဇအဆင့်ကို အဆင့်တက်ပြီးနောက်တွင်လည်း ဤကဲ့သို့သော ရောနှောနေသည့် မျိုးရိုးဗီဇများ၏ နှောင့်ယှက်မှုက သေချာပေါက် ဆက်လက် တည်ရှိနေဦးမည် ဖြစ်သည်။

လင်းယွမ်က လူတိုင်းကို တတ်နိုင်သမျှ သန္ဓေပြောင်း သက်ရှိများ၏ အသွေးအသားများကို မစားရန် အမြဲတမ်း တားမြစ်ထားခဲ့ခြင်းမှာ သူတို့ကိုယ်တွင်းသို့ ရောနှောနေသော မျိုးရိုးဗီဇများ အလွန်အမင်း ဝင်ရောက်သွားခြင်းကို တားဆီးရန်အတွက် ဖြစ်သည်။

ထိုအရာက ၎င်းတို့ မျိုးရိုးဗီဇအဆင့်ကို အဆင့်တက်ရန်နှင့် မျိုးရိုးဗီဇမြေပုံကို စုစည်းရန်အတွက် အဟန့်အတား ဖြစ်စေနိုင်ပေသည်။

အရည်အသွေးမှတ် ၅၀ ပြည့်မှ မျိုးရိုးဗီဇအဆင့်ကို တက်ရောက်ခြင်းက အောင်မြင်မှုနှုန်းကို များစွာ မြင့်မားစေနိုင်သည်ဟု ဆိုသော်လည်း...

ရာခိုင်နှုန်းပြည့် မဟုတ်သရွေ့တော့ သေချာပေါက် အန္တရာယ် ရှိနေဦးမည် ဖြစ်သည်။

ထို့ကြောင့် ရောနှောနေသော မျိုးရိုးဗီဇများကို မစုပ်ယူနိုင်လေ ပိုကောင်းလေပင် ဖြစ်သည်။

သေချာပေါက်ပင် လင်းယွမ်တွင် အားကိုးစရာရှိနေသောကြောင့် သန္ဓေပြောင်း သက်ရှိများ၏ အသွေးအသားများကို စားသုံးရန် မလိုအပ်ခြင်း ဖြစ်သည်။

သို့သော် အခြားသူများတွင်တော့ ရှိမနေပေ။ ထိုသူများက သန္ဓေပြောင်း သက်ရှိများ၏ သွေးသားများကို စားသုံးရင်း ၎င်းတို့ထဲရှိ သန္ဓေပြောင်းစွမ်းအင် အနှစ်သာရများကို စုပ်ယူနေကြရာ အဆင့်တက်နိုင်မှုက သဘာဝကျစွာပင် အလွန် လျင်မြန်ပေသည်။

သို့သော် ဤဖြစ်စဉ်အတွင်းတွင် ရောနှောနေသော မျိုးရိုးဗီဇ အချို့ကို အနည်းနှင့်အများဆိုသလို သေချာပေါက် စုပ်ယူမိသွားမည် ဖြစ်သည်။

လောလောဆယ်တွင် ကြီးကြီးမားမား အဟန့်အတား မရှိဟု ထင်ရသော်လည်း နောင်တစ်ချိန်တွင်မူ ပြောရခက်ပေသည်။

ဝူယောင်ပန်း၏ မူလကိုယ်ခန္ဓာက ဤမျှ လျင်မြန်စွာ အဆင့်တက်နိုင်ခဲ့ခြင်းမှာ သူ၏ ကိုယ်ပွားများက နေရာအနှံ့တွင် မျိုးရိုးဗီဇအဆင့် သန္ဓေပြောင်းသားရဲ အမြောက်အမြားကို ဖမ်းဆီးကာ မူလကိုယ်ခန္ဓာဆီသို့ ပို့ဆောင်ပေးခဲ့ပြီး မူလကိုယ်ခန္ဓာက သွေးအဆီအနှစ်များကို စုပ်ယူကာ စွမ်းအားကို အဆင့်တက်နိုင်ခဲ့သောကြောင့် ဖြစ်သည်။

သို့သော် ဤကဲ့သို့ လိမ်လည်လှည့်စားထားသည့် အစွမ်းမျိုး ရှိနေလျှင်တောင်မှ သူက ထင်တိုင်းကျဲကာ ရမ်းသန်း စုပ်ယူရဲခြင်း မရှိပေ။

ထိုသို့မှမဟုတ်လျှင် သူ၏ ဤကဲ့သို့သော အကန့်အသတ်မရှိ အရင်းအမြစ်များ ထောက်ပံ့ပေးနေသည့် အခြေအနေအရဆိုလျှင် မျိုးရိုးဗီဇ အရည်အသွေးမှတ် ၁၀၀ ကို စောစောစီးစီးကတည်းက အဆင့်တက်သွားနိုင်ခဲ့ပြီ ဖြစ်သည်။

ထို့နောက် ကျိုးချင်းမင်က ဤဟင်းလင်းပြင် ခေါက်ချိုးထဲရှိ လျှို့ဝှက်ချက်များနှင့် ပတ်သက်သော မေးခွန်းများစွာကို နှိပ်စက်ကာ ဆက်လက် မေးမြန်းခဲ့သည်။

နောက်ဆုံးတွင်တော့ ဝူယောင်ပန်းသည် ညှဉ်းပန်းနှိပ်စက်မှုများကို ခံနိုင်ရည်မရှိတော့ဘဲ ကျိုးချင်းမင်၏ အရှင်လတ်လတ် နှိပ်စက်သတ်ဖြတ်မှုကို ခံလိုက်ရတော့သည်။

တင်းယန်က ကျိုးချင်းမင်အား နားမလည်နိုင်စွာဖြင့် တစ်ချက် ကြည့်လိုက်ပြီးနောက် လင်းယွမ်ကို ဘေးသို့ တိတ်တဆိတ် ဆွဲခေါ်သွားကာ တိုးတိုးလေး မေးလိုက်သည်။ "ရှင် ကျိုးချင်းမင်ကို နည်းနည်း ထူးဆန်းနေတယ်လို့ မထင်ဘူးလား"

လင်းယွမ်က ဟိုဘက်ရှိ ကျိုးချင်းမင်ကို တစ်ချက် ကြည့်လိုက်ပြီး မေးလိုက်သည်။ "ဘယ်လို ထူးဆန်းနေလို့လဲ"

"သူ အရင်က ဒီလောက် ရက်စက်ကြမ်းကြုတ်တာမျိုး မရှိပါဘူး" တင်းယန်က ခေါင်းခါရင်း ပြောလိုက်သည်။

လင်းယွမ်က ခေါင်းခါလိုက်ပြီး သက်ပြင်းချကာ ပြောလိုက်သည်။ "ဆွန်းဝေဝေ သေဆုံးသွားတာကြောင့် ဖြစ်ဖို့များတယ်"

တင်းယန်က ချက်ချင်း အံ့သြသွားပြီး သံသယဖြင့် မေးလိုက်သည်။ "ဆွန်းဝေဝေ... အဲ့ဒီမိန်းမနဲ့ ဘာဆိုင်လို့လဲ"

"ဘာပဲဖြစ်ဖြစ် သူနဲ့ ဆွန်းဝေဝေတို့က ပတ်သက်ခဲ့ဖူးတာကိုး"

တင်းယန်၏ မျက်နှာတွင် မယုံကြည်နိုင်မှုများ ပြည့်နှက်သွားခဲ့သည်။ "မဖြစ်နိုင်တာ... ကျိုးချင်းမင်က အချစ်ကြီးတဲ့လူများ ဖြစ်နေလို့လား... အဲ့ဒီမိန်းမက သူ့ကို စိတ်လှုပ်ရှားစေဖို့ တန်လို့လား"

"သူ့ခန္ဓာကိုယ်ပေါ်က အဆိပ်တောင် အဲ့ဒီမိန်းမ ခတ်ခဲ့တာလေ"

လင်းယွမ်က ခေါင်းခါလိုက်သည်။ "အဲဒါက သူ့ရဲ့ ပထမဆုံးအကြိမ် ဖြစ်နေလို့ နေမှာပေါ့... ဒီအကြောင်းပြချက်ကလွဲရင် သူ ဝူယောင်ပန်းကို ဘာဖြစ်လို့ ဒီလောက်တောင် မုန်းတီးနေရသလဲဆိုတာကို ငါလည်း စဉ်းစားလို့ မရတော့ဘူး"

"ဒါပေမဲ့ သူ မလှုပ်ရှားရင်တောင် ငါကိုယ်တိုင် လှုပ်ရှားရမှာပဲ... ဒီခွေးကောင်က နင့်ကိုတောင် ကြံစည် ရဲသေးတယ်... သူ သေသင့်နေတာ ကြာပြီ"

တင်းယန်က ထိုစကားကို ကြားသောအခါ နှုတ်ခမ်းထောင့်များ အနည်းငယ် ကွေးတက်သွားပြီး ပြောလိုက်သည်။ "စိတ်ချပါ... ရှင်ကလွဲရင် ဘယ်သူမှ ကျွန်မကို ထိလို့မရပါဘူး"

လင်းယွမ်က ပြုံးလိုက်ရာ တင်းယန်က မေးလိုက်သည်။ "ပြီးရင် ဘာဆက်လုပ်ကြမှာလဲ... ကျွန်မတို့ လီချင်းဟွာကို ဘယ်သွားရှာကြမလဲ"

လင်းယွမ်က ခေတ္တမျှ စဉ်းစားလိုက်ပြီး ပြောလိုက်သည်။ "လီချင်းဟွာ ထွက်ပြေးနိုင်ခဲ့မှတော့ သူဆီမှာ အင်အား အနည်းငယ် ကျန်နေသေးတယ်ဆိုတာကို ပြနေတာပဲ... အရေးအကြီးဆုံးက ဦးလေးကောနဲ့ ရှာမင်တို့ကို အရင်ရှာကြတာပေါ့"

ဤလူနှစ်ယောက်က ဟန်ရှန်းမန် အဖွဲ့မှ လူများဖြစ်ပြီး နှစ်ယောက်စလုံး၏ ပါရမီက မဆိုးပေ။ တစ်ယောက်က မီးဓာတ် အစွမ်းပိုင်ရှင်ဖြစ်ပြီး အခြားတစ်ယောက်က သတ္တုဓာတ် အစွမ်းပိုင်ရှင် ဖြစ်သည်။

သူတို့နှစ်ဦးစလုံးက အဓိက အရည်အသွေးမှတ် ၅၀ အထိ ကျင့်ကြံထားနိုင်ခဲ့ကြပြီ ဖြစ်သည်။ ဤကဲ့သို့သော ပါရမီရှင်များကို ရရှိရန် မလွယ်ကူလှသောကြောင့် လင်းယွမ်က သဘာဝကျစွာပင် သူတို့ကို ကယ်တင်ရမည် ဖြစ်သည်။

သေချာပေါက် ဤအထဲတွင် ဟန်ရှန်းမန်ကြောင့်ဟူသော အကြောင်းပြချက်လည်း ပါဝင်ပေသည်။

သူနှင့် ဟန်ရှန်းမန်ကြားရှိ ဆက်ဆံရေးအရ သူမ၏ ယခင် လုပ်ဖော်ကိုင်ဖက်များကို မကယ်တင်ဘဲ နေ၍ မဖြစ်နိုင်ပေ။

"ဒီဟင်းလင်းပြင် ခေါက်ချိုးက ကြီးသလားဆိုတော့ မကြီးဘူး... သေးသလားဆိုတော့လည်း မသေးဘူး... ၇ စတုရန်းမိုင်ကျော်လောက် ကျယ်တဲ့ နေရာမှာ လူနှစ်ယောက်ကို ရှာဖို့ဆိုတာ လွယ်ကူတဲ့ကိစ္စတော့ မဟုတ်ဘူး"

လင်းယွမ်က ခေါင်းညိတ်လိုက်သည်။ "မလွယ်တာတော့ အမှန်ပဲ... ဒါပေမဲ့ အလောတကြီး လုပ်စရာမလိုပါဘူး... သူတို့ မသေသေးသရွေ့တော့ ဒီနေရာမှာ ပုန်းအောင်းနေတာက အချိန်တိုအတွင်း ကြီးကြီးမားမား အန္တရာယ်တော့ မရှိနိုင်ပါဘူး"

"ဒီအတောအတွင်းမှာ ငါ မျိုးရိုးဗီဇအဆင့် သန္ဓေပြောင်းသားရဲ တချို့ကို အရင် သွားသတ်ပြီး...နင်နဲ့ ကျိုးချင်းမင်ကို မျိုးရိုးဗီဇအဆင့် အဆင့်တက်နိုင်အောင် ကူညီပေးမယ်"

"နောက်ပြီး ငါ ပြန်ရောက်ရင် ထိုက်ယန်တောင်က လူတစ်စုကို ခေါ်လာခဲ့မယ်... ဒီဟင်းလင်းပြင်က တော်တော်လေး ကောင်းတယ်... ထိုက်ယန်တောင်ထက်တောင် ခိုလှုံရေးစခန်း တည်ဆောက်ဖို့ ပိုသင့်တော်တယ်"

"ဒါပေမဲ့ အဲ့ဒီမတိုင်ခင်... ဒီဟင်းလင်းပြင် ခေါက်ချိုး ဖြစ်ပေါ်လာတဲ့ အတိအကျ အကြောင်းရင်းကို... ငါ အရင် ရှင်းရှင်းလင်းလင်း သိဖို့ လိုအပ်တယ်"

တင်းယန်က ထိုစကားကို ကြားသောအခါ တစ်ခုခုကို တွေးတောသွားသကဲ့သို့ ဖြစ်သွားပြီး ပြောလိုက်သည်။ "ရှင်က ဒီဟင်းလင်းပြင် ခေါက်ချိုး ဖြစ်ပေါ်လာတာ... ပြဿနာ တစ်ခုခု ရှိနေတယ်လို့ ထင်နေတာလား"

"သေချာတာပေါ့... အကောင်းတိုင်းရှိနေတဲ့ ဟင်းလင်းပြင်တစ်ခုက ဘာဖြစ်လို့ ဒီလိုမျိုး ခေါက်ချိုး တစ်ခု ဖြစ်ပေါ်လာရတာလဲ"

"တကယ်လို့ ထူးခြားတဲ့ သဘာဝဖြစ်စဉ် တစ်ခုလို့ ဆိုရင်တောင်... တခြား နေရာတွေမှာ ဘာဖြစ်လို့ ဒီလို ဟင်းလင်းပြင် ခေါက်ချိုးမျိုး မဖြစ်ပေါ်လာဘဲ ဒီနေရာလေးမှာပဲ အတိအကျ ဖြစ်ပေါ်လာရတာလဲ"

တင်းယန်က ထိုစကားကို ကြားသောအခါ ခေါင်းညိတ်လိုက်ပြီး ပြောလိုက်သည်။ "ရှင်ပြောတာ အဓိပ္ပာယ်ရှိတယ်"

"သိပ်ပြီး အများကြီး တွေးမနေပါနဲ့... နောက်လာမယ့် အချိန်တွေမှာ မင်း မျိုးရိုးဗီဇအဆင့်ကို အဆင့်တက်နိုင်ဖို့အတွက် အစွမ်းကုန် ကြိုးစားဖို့ လိုတယ်... မျိုးရိုးဗီဇအဆင့် အစွမ်းပိုင်ရှင် ဖြစ်လာပြီးရင်လည်း စွမ်းအားကို အမြန်ဆုံး မြှင့်တင်ရမယ်"

"ထိုက်ယန်တောင် ဘက်မှာ ကျောက်ခိုင် ရှိနေတယ်... အချိန်ကျလာရင် ဒီဘက်မှာ အခြေအနေ အားလုံးကို ထိန်းချုပ်ဖို့ နင့်ကို လိုအပ်လိမ့်မယ်"

"ဒါဆို ရှင်ကရော..." တင်းယန်က အလျင်အမြန် မေးလိုက်သည်။

လင်းယွမ်၏ အကြည့်တို့တွင် သတ်ဖြတ်လိုစိတ်များ ပေါ်ထွက်လာပြီး ပြောလိုက်သည်။ "ဒီတစ်ကြိမ် ထိုက်ယန်တောင်က ဂိုဏ်းကြီးသုံးဂိုဏ်း ဝိုင်းတိုက်တာကို ခံခဲ့ရတယ်... ဒီကိစ္စက ဒီလောက်နဲ့တော့ မပြီးသေးဘူး"

"ငါ ကိုယ်တိုင် ကွမ်ဖူကို တစ်ခေါက် သွားရမယ်... သူတို့ ကြောက်ရွံ့တုန်လှုပ်သွားတဲ့အထိ မသတ်ပြရင်... ထိုက်ယန်တောင်ကို ဘယ်သူမဆို လွယ်လွယ်လေး အနိုင်ကျင့်လို့ ရတယ်လို့ ထင်နေကြလိမ့်မယ်"

တင်းယန်က ချက်ချင်း လန့်သွားခဲ့သည်။ "ထိုက်ယန်တောင်က ဘာဖြစ်လို့လဲ"

သူမက ယခုအချိန်အထိ ထိုက်ယန်တောင်တွင် မည်သည့် ကိစ္စများ ဖြစ်ပျက်နေသည်ကို မသိသေးပေ။

လင်းယွမ်က ထိုက်ယန်တောင်အား ဂိုဏ်းကြီးသုံးဂိုဏ်း ဝိုင်းဝန်းတိုက်ခိုက်ခဲ့သည့် ကိစ္စနှင့် ရေနတ်ဘုရားဂိုဏ်းမှ ကပ်ရောဂါ ယဇ်ပုရောဟိတ်က ကပ်ရောဂါများ ဖြန့်ကြဲခဲ့သည့် ကိစ္စများကို တစ်ခေါက် ပြန်ပြောပြလိုက်သည်။

တင်းယန်၏ မျက်နှာက ထိန်းမနိုင်သိမ်းမရ ဆိုးရွားသွားခဲ့ပြီး ပြောလိုက်သည်။ "ဒီလိုဖြစ်မယ်မှန်း ကြိုသိခဲ့ရင် ကျွန်မ ထိုက်ယန်တောင်ကနေ ထွက်မလာပါဘူး"

လင်းယွမ်က ခေါင်းခါလိုက်ပြီး ပြောလိုက်သည်။ "တစ်ဖက်ရန်သူဆီမှာ မျိုးရိုးဗီဇအဆင့် အစွမ်းပိုင်ရှင်တွေ အရမ်းများတယ်... နင်တို့ အဲ့ဒီမှာ ရှိနေလည်း ဘာမှ ကွာခြားသွားမှာ မဟုတ်ဘူး"

"မျိုးရိုးဗီဇအဆင့်ကို အဆင့်တက်နိုင်မှသာ... ထိုက်ယန်တောင်ကို အင်အားအကြီးဆုံး ဖြစ်လာစေမယ့် အကောင်းဆုံး နည်းလမ်းပဲ"

တင်းယန်၏ မျက်နှာအမူအရာတွင် ခိုင်မာသော အသွင်အပြင်များ ပေါ်ထွက်လာပြီး ပြောလိုက်သည်။ "သိပြီ... အခုကစပြီး ကျွန်မ အစွမ်းကုန် ကြိုးစားပြီး... မျိုးရိုးဗီဇအဆင့်ကို တက်မယ်"

နောက်လာမည့် ရက်အနည်းငယ်အတွင်း လင်းယွမ်က ဧဒင်ဥယျာဉ်မှ ဝူယောင်ပန်း၏ ကိုယ်ပွားအားလုံးကို အရင်ဆုံး ရှင်းလင်းလိုက်ပြီး ရှောင်မောင်းတောင်ကို သိမ်းပိုက်လိုက်သည်။

ထိုလုပ်ငန်းစဉ် အတွင်းတွင် သူက ခန္ဓာကိုယ်ကြံ့ခိုင်မှု အမျိုးအစား သန္ဓေပြောင်းသားရဲများကို နေရာအနှံ့ လိုက်ရှာခဲ့သော်လည်း တစ်ခေါက် ရှာဖွေပြီးနောက် လင်းယွမ်သည် သန္ဓေပြောင်းသားရဲ အမျိုးအစား များစွာကို တွေ့ရှိခဲ့သော်လည်း ခန္ဓာကိုယ်ကြံ့ခိုင်မှု အမျိုးအစား တစ်ခုကိုမျှ မတွေ့ရှိခဲ့ပေ။

ဤနေရာတွင် နှစ်ရက်ခန့် အချိန်ဆွဲထားမိပြီဖြစ်၍ လင်းယွမ်က အနည်းငယ် စိုးရိမ်လာခဲ့သည်။

ထိုအချိန်တွင် ဂျိရှောင်ယွီက လင်းယွမ်ကို လာရှာခဲ့သည်။

အစ်ကို

"အစ်ကိုလင်း... အစ်ကိုက ခန္ဓာကိုယ်ကြံ့ခိုင်မှု အမျိုးအစား မျိုးရိုးဗီဇအဆင့် သန္ဓေပြောင်းသားရဲတွေကို ရှာနေတာလား"

လင်းယွမ်က ဂျိရှောင်ယွီကို ကြည့်လိုက်ပြီး ခေါင်းညိတ်ကာ ပြောလိုက်သည်။

"ဟုတ်တယ်... နင့်ရဲ့ အမတင်းတို့ အားလုံးက ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင်တွေလေ... သူတို့မျိုးရိုးဗီဇအဆင့်ကို အဆင့်တက်နိုင်ဖို့ ဒီလို အမျိုးအစား သန္ဓေပြောင်းသားရဲတွေရဲ့ သွေးအဆီအနှစ်ကို လိုအပ်တယ်"

ဂျိရှောင်ယွီက ခေတ္တမျှ တုံ့ဆိုင်းသွားပြီးနောက် ပြောလိုက်သည်။ "ကျွန်မ နေရာတစ်ခုကို သိတယ်... အဲ့ဒီမှာ ဒီလို သန္ဓေပြောင်းသားရဲမျိုး ရှိနိုင်တယ်"

လင်းယွမ်က ထိုစကားကို ကြားသောအခါ ချက်ချင်းပင် မျှော်လင့်မထားသော အမူအရာ ပေါ်ထွက်လာခဲ့သည်။ "နင် သိတယ်လား... ဘယ်မှာလဲ"

"အစ်ကို ကျွန်မကို ကိစ္စတစ်ခု အရင် ကတိပေးမှ ကျွန်မ အစ်ကို့ကို ပြောပြနိုင်မယ်" ဂျိရှောင်ယွီက လင်းယွမ်အား စူးစိုက်ကြည့်ကာ ပြောလိုက်သည်။

လင်းယွမ်က သံသယဝင်သွားပြီး မေးလိုက်သည်။ "ဘာကိစ္စလဲ"

"အစ်ကို... ရှောင်မောင်းတောင်ရဲ့ ဧရိယာ တစ်ဝက်လောက်ကို ကျွန်မတို့အတွက် ဖယ်ထားပေးလို့ ရမလား"

ဆက်ရန်....