အခန်း (၅၁၃-၅၁၄)

အပိုင်း(၅၁၃) ဂျိရှောင်ယွီနှင့် အပေးအယူ

လင်းယွမ်က အံ့အားသင့်သွားသည်။ ဂျိရှောင်ယွီ၏ စကားထဲတွင် အချက်အလက်များစွာ ပါဝင်နေပေသည်။

ဂျိရှောင်ယွီက တစ်ကိုယ်တော်ဟု သူက အမြဲတမ်း ထင်မှတ်ထားခဲ့ခြင်း ဖြစ်သည်။

သူမ၏ စကားအရဆိုလျှင် သူမက တစ်ယောက်တည်း မဟုတ်ဘူးဆိုတဲ့ သဘောလား။

ဂျိရှောင်ယွီက ခေါင်းညိတ်လိုက်ပြီး တိုးညှင်းသော အသံဖြင့် ပြောလိုက်သည်။ "ဒီအခြေအနေထိ ရောက်လာမှတော့ ကျွန်မ သိနိုင်ပါပြီ... အစ်ကိုလင်း ရှင်က ဝူယောင်ပန်းတို့လို လူတွေနဲ့ မတူဘူး... ရှင်တို့က လူကောင်းတွေပါ"

"တကယ်တော့ ကျွန်မက တစ်ယောက်တည်း မဟုတ်ပါဘူး... ကျွန်မရဲ့ နောက်ကွယ်မှာလည်း အင်အားစုတစ်ခု ရှိတယ်"

လင်းယွမ်က စိတ်ဝင်စားသွားကာ ထိုင်ချလိုက်ပြီး ပြောလိုက်သည်။ "သေချာလေး ရှင်းပြပါဦး"

ဂျိရှောင်ယွီကလည်း ထိုင်ချလိုက်ပြီး ဖြည်းညှင်းစွာ ပြောလိုက်သည်။

"ဝူယောင်ပန်း ပြောတာ မမှားပါဘူး... လွန်ခဲ့တဲ့ သုံးလလောက်ကပေါ့... တကယ်တော့ ဟင်းလင်းပြင် ခေါက်ချိုးထဲမှာ ပိတ်မိနေတဲ့ ကျွန်မတို့လို လူတွေဆီမှာ မဟာမိတ်အဖွဲ့အစည်း တစ်ခု ရှိခဲ့တယ်"

"အဖွဲ့အစည်းထဲမှာ မျိုးရိုးဗီဇမျိုးစေ့အဆင့် အစွမ်းပိုင်ရှင်တွေလည်း မနည်းဘူး... ဒါပေမဲ့ သူတို့အားလုံးကို ဝူယောင်ပန်းက လျှို့ဝှက်ပြီး လုပ်ကြံသတ်ဖြတ်ပစ်ခဲ့တယ်"

"ဝူယောင်ပန်းက အဲဒီ မျိုးရိုးဗီဇမျိုးစေ့အဆင့် အစွမ်းပိုင်ရှင်တွေကို သတ်ဖြတ်ပြီးတာနဲ့... ရှောင်မောင်းတောင်ကို စတင် ဝါးမျိုတော့တာပဲ... ရှောင်မောင်းတောင်ပေါ်က အသက်ရှင်ကျန်ရစ်သူတွေကို အုပ်ချုပ်ပြီး ဧဒင်ဥယျာဉ်ကို တည်ဆောက်ခဲ့တယ်... သူ့ရဲ့ ကိုယ်ပိုင် ဘုရားသခင်နိုင်ငံတော်ကို ဖန်တီးဖို့ စိတ်ကူးယဉ်နေခဲ့တာ"

"အဲဒီအချိန်တုန်းက အမျိုးသမီးအများစုက... ရက်ရက်စက်စက် သတ်ဖြတ်ခံခဲ့ရပြီး... သူ့ရဲ့ ဖမ်းဆီး အဓမ္မပြုကျင့်တာကို ခံခဲ့ရတယ်"

"ခုခံတဲ့သူတွေကိုကျတော့... သူက ရက်ရက်စက်စက် သတ်ဖြတ်ပြီး... ရှောင်မောင်းတောင်ရဲ့ လက်ဝါးကပ်တိုင်ပေါ်မှာ ချိတ်ဆွဲထားပြီး တခြားသူတွေကို သတိပေးခဲ့တယ်"

"ကျွန်မ သေသေချာချာ မှတ်မိနေသေးတယ်... အဲဒီ တိုတောင်းတဲ့ လဝက်အတွင်းမှာတင် ရှောင်မောင်းတောင်ပေါ်က အသက်ရှင်ကျန်ရစ်သူ ဆယ်ပုံတစ်ပုံလောက် သေဆုံးသွားခဲ့တယ်"

"ကျွန်မရဲ့ အစ်မကိုလည်း သူအဓမ္မပြုကျင့်တာကို အလျှော့မပေးခဲ့လို့... သူတို့က လက်ဝါးကပ်တိုင်ပေါ်မှာ ရိုက်နှက် ချိတ်ဆွဲထားခဲ့တယ်"

ဤအကြောင်းကို ပြောနေစဉ် ဂျိရှောင်ယွီ၏ မျက်ဝန်းများက နီရဲလာပြီး မျက်ရည်များ ဝဲတက်လာကာ အမုန်းတရားများက သိသာထင်ရှားစွာ ပေါ်လွင်နေပေသည်။

လင်းယွမ်က ထိုအခါမှသာ ဂျိရှောင်ယွီက ဧဒင်ဥယျာဉ်မှ လူများအပေါ် အဘယ်ကြောင့် ဤမျှလောက် မုန်းတီးနေရသနည်းဆိုသည်ကို နားလည်သွားတော့သည်။

ဝူယောင်ပန်းအပေါ် အဘယ်ကြောင့် ဤမျှလောက် ရန်ငြိုးဖွဲ့နေရသနည်း ဆိုသည်ကိုလည်း သဘောပေါက်သွားသည်။

တကယ်တော့ ဤအရာများ၏ နောက်ကွယ်တွင် ဤသို့သော အတိတ်ဇာတ်လမ်းတစ်ခု ရှိနေခဲ့ခြင်းပင်။

ဝူယောင်ပန်း၏ ရက်စက်ယုတ်မာမှုနှင့် ကောက်ကျစ်စဉ်းလဲမှုများကို စဉ်းစားကြည့်မည်ဆိုလျှင် သူက ဤကဲ့သို့သော ကိစ္စများကို လုပ်ဆောင်ခဲ့ခြင်းမှာ အံ့သြစရာတော့ မဟုတ်ပေ။

လင်းယွမ်က "ပြီးတော့ ဘာဆက်ဖြစ်လဲ" ဟု မေးလိုက်သည်။

ဂျိရှောင်ယွီက တိုးညှင်းသော အသံဖြင့် ပြောလိုက်သည်။ "ကျွန်မတို့ထဲက တစ်ချို့လူတွေက ရေလူသား အမျိုးအစား အစွမ်းတွေကို နိုးထလာခဲ့ကြတယ်... ရေအောက်မှာ အသက်ရှင်နေထိုင်နိုင်လို့ အားလုံးက ရှောင်မောင်းတောင်ကနေ ထွက်ပြေးပြီး ရေအောက်မှာပဲ နေထိုင်ဖို့ ရွေးချယ်ခဲ့ကြတယ်"

"ကျွန်မတို့က ရေအောက်မှာ ခိုလှုံရေးစခန်း တစ်ခုကို တည်ဆောက်ခဲ့တယ်... ရေအောက်မှာ အသက်ရှူနိုင်တဲ့ ရေလူသား အစွမ်းပိုင်ရှင်တွေမှပဲ ဝင်လို့ရတာ"

"ဝူယောင်ပန်းကလည်း ကျွန်မတို့ ရှိနေတာကို သိတယ်... ဒါပေမဲ့ သူက ရေအောက်ထဲမှာ အချိန်အကြာကြီး ငုပ်လျှိုးပြီး မတိုက်ခိုက်နိုင်လို့ ကျွန်မတို့ကို ဘာမှ လုပ်လို့မရခဲ့ဘူး"

လင်းယွမ်က မနေနိုင်ဘဲ အလွန်အံ့အားသင့်သွားသည်။ ရေလူသား အမျိုးအစား အစွမ်းပိုင်ရှင် တစ်စုက တည်ဆောက်ထားသည့် ရေအောက် ခိုလှုံရေးစခန်းဟုလား။

"နေပါဦး... နင်တို့ကိုယ်နင်တို့ ရေလူသား အမျိုးအစား အစွမ်းပိုင်ရှင်တွေလို့ ခေါ်တာလား... ငါးလူတွေ မဟုတ်ဘူးလား"

ဂျိရှောင်ယွီက ခေါင်းခါလိုက်သည်။ "မတူပါဘူး... ရေလူသား အမျိုးအစား အစွမ်းပိုင်ရှင်တွေနဲ့ ငါးလူ အမျိုးအစား အစွမ်းပိုင်ရှင်တွေကြားမှာ ကွာခြားချက်တွေ အများကြီး ရှိပါတယ်"

"နှစ်မျိုးလုံးက ငါးအသွင် ပြောင်းလဲနိုင်ပြီး... ရေအောက်မှာ အသက်ရှူ ရှင်သန်နိုင်ပေမဲ့... တကယ်တမ်းကျတော့ ငါးလူ အမျိုးအစား အစွမ်းပိုင်ရှင်တွေက... ခန္ဓာကိုယ်ပိုင်းဆိုင်ရာ ဆင့်ကဲပြောင်းလဲတဲ့ဘက်ကို ပိုပြီး ယိမ်းတယ်"

"ကျွန်မတို့ ရေလူသား အမျိုးအစား အစွမ်းပိုင်ရှင်တွေကကျတော့... စိတ်စွမ်းအင်ပိုင်းဆိုင်ရာ ဆင့်ကဲပြောင်းလဲမှုဘက်ကို ပိုပြီး အားသန်ကြတယ်"

"ပြီးတော့ ကျွန်မတို့ ရေလူသား အမျိုးအစား အစွမ်းပိုင်ရှင်တွေက... အသွင်ပြောင်းပြီးတဲ့နောက်မှာ လူသားပုံစံ အများစုကို ထိန်းသိမ်းထားနိုင်ပေမဲ့... ငါးလူ အမျိုးအစား အစွမ်းပိုင်ရှင်တွေကကျတော့... အသွင်ပြောင်းပြီးရင် ငါးအသွင်အပြင်တွေ ပိုများလာတတ်တယ်"

လင်းယွမ်က အံ့သြမဆုံး ဖြစ်သွားသည်။ အကယ်၍ ဤသို့ဆိုလျှင် သူ၏ ရှေ့ရှိ ဂျိရှောင်ယွီက အသွင်ပြောင်းပြီးနောက် ကျန်းဖန်၏ ငါးလူအသွင်နှင့် သိသိသာသာ ကွာခြားနေခြင်းမှာ အံ့သြစရာတော့ မဟုတ်ပေ။

အစပိုင်းတွင် လင်းယွမ်က လိင်ကွာခြားမှုကြောင့်ဟု ထင်မှတ်ထားခဲ့သော်လည်း ၎င်းတို့နှစ်ခုက လုံးဝကို မတူညီသော အစွမ်းတစ်ခု ဖြစ်နေမည်ဟု သူ မထင်ထားခဲ့ပေ။

လင်းယွမ်က မေးလိုက်သည်။ "နင်တို့ ဘယ်နှယောက် ရှိလဲ"

"ဆယ်ယောက်ကျော်လောက်ပါပဲ"

ဂျိရှောင်ယွီက အတိအကျ အရေအတွက်ကို မပြောဘဲ ချန်လှပ်ထားခဲ့သည်။ သူမက လင်းယွမ်ကို အားလုံး အသိမခံချင်သည်မှာ သိသာထင်ရှားလှသည်။

လင်းယွမ်က ကြားသည်နှင့် ချက်ချင်းပင် ဂျိရှောင်ယွီက လျှော့ပြောလိုက်မှန်း သိလိုက်သည်။ သူမ၏ နောက်ကွယ်ရှိ ဤကဲ့သို့သော ရေလူသား အမျိုးအစား အစွမ်းပိုင်ရှင် အရေအတွက်က ဤဂဏန်းထက် သေချာပေါက် ပိုများနေမည်မှာ မလွဲဧကန်ပင်။

သူက အလွန် အံ့အားသင့်သွားပြီး မနေနိုင်ဘဲ ပြောလိုက်သည်။ "ဘယ်လိုလုပ်ပြီး တူညီတဲ့ အမျိုးအစား အစွမ်းပိုင်ရှင်တွေ ဒီလောက် အများကြီး ရှိနေရတာလဲ"

သိထားရမည်မှာ ဤအရာက ခွန်အား အမျိုးအစား သို့မဟုတ် အလျင် အမျိုးအစားကဲ့သို့သော သာမန် အစွမ်းမျိုး မဟုတ်ပေ။

ရေလူသား အမျိုးအစားနှင့် ငါးလူ အမျိုးအစား အစွမ်းပိုင်ရှင်များကို လင်းယွမ်က အပြင်ဘက်တွင် မြင်တွေ့ရသည်မှာ မများလှပေ။

ယခုအချိန်အထိ သူက ကျန်းဖန် တစ်ယောက်တည်းကိုသာ မြင်ဖူးသေးသည်။

သူ၏ ရှေ့ရှိ ဂျိရှောင်ယွီက ဒုတိယမြောက်ဟု ဆိုနိုင်ပေသည်။

ယခု ဘယ်လိုလုပ်ပြီး ဒီလောက်များပြားတဲ့ အုပ်စုကြီး တစ်စုက ရုတ်တရက် ထွက်ပေါ်လာရတာလဲ။

ဂျိရှောင်ယွီက ခေတ္တမျှ တုံ့ဆိုင်းသွားပြီးနောက် ပြောလိုက်သည်။ "ကျွန်မတို့ လူတွေကလည်း ဒီအကြောင်းရင်းကို ခွဲခြမ်းစိတ်ဖြာကြည့်ကြပါတယ်... ရေကြီးပြီးတဲ့နောက်မှာ လူသားတွေရဲ့ ရှင်သန်လိုတဲ့ အသိစိတ်အရ... ရေထဲမှာ ရှင်သန်နေထိုင်နိုင်ဖို့ တောင့်တတဲ့သူတွေ အများကြီး ရှိလာမယ်လို့ အားလုံးက တညီတညွတ်တည်း ယူဆကြတယ်"

"ဒီလို စိတ်ဆန္ဒမျိုးနဲ့ အစွမ်း နိုးထလာတဲ့သူတွေက နည်းနည်းနောနော မဟုတ်ဘူး... အများစုက ကျွန်မတို့လို အစွမ်းမျိုးကို နိုးထလာဖို့ ဖြစ်နိုင်ခြေ ရှိတယ်"

"နောက်ထပ် အကြောင်းရင်း တစ်ခုကတော့... ကျွန်မတို့လို လူတွေက ရေမကြီးခင်တုန်းက လင်ကျောင်းမြစ်ကမ်းဘေးမှာ နေထိုင်ကြတဲ့သူတွေချည်းပဲ... ဘိုးဘွားစဉ်ဆက်ကတည်းက တံငါသည်တွေချည်းပဲလေ"

"လင်ကျောင်းမြစ်မှာ ငါးဖမ်းခွင့် ပိတ်ပင်လိုက်ကတည်းက... ကျွန်မတို့လို လူတွေက ငါးမဖမ်းကြတော့ပေမဲ့ အစိုးရက ကျွန်မတို့ကို ငါးလုပ်ငန်းနဲ့ ပတ်သက်တဲ့ အလုပ်အကိုင်တွေ စီစဉ်ပေးခဲ့တယ်"

"ကျွန်မတို့ မိသားစုတွေက တကယ်တမ်းတော့ ခိုးကြောင်ခိုးဝှက်နဲ့ ငါးဖမ်းပြီး စားသောက်ကြသေးတာပဲ"

"ကျွန်မတို့ ခန္ဓာကိုယ်ထဲမှာ ဘိုးဘေးတွေဆီကနေ ဆင်းသက်လာတဲ့ ငါးနဲ့ ပတ်သက်တဲ့ မျိုးရိုးဗီဇတွေ ရှိနေနိုင်ပြီး... ရေလူသား ဒါမှမဟုတ် ငါးလူ အမျိုးအစား အစွမ်းတွေကို နိုးထဖို့ ပိုပြီး လွယ်ကူနိုင်တယ်လို့... အားလုံးက တညီတညွတ်တည်း ယူဆကြတယ်"

လင်းယွမ်က အနည်းငယ် တိတ်ဆိတ်သွားသည်။

မိန်တုဥယျာဉ်တွင် ရှိနေစဉ်ကတည်းက လူသားများ၏ အစွမ်း နိုးထလာခြင်းမှာ အသက်အန္တရာယ်နှင့် ရင်ဆိုင်ရချိန်တွင် ၎င်းတို့ အတောင့်တဆုံးသော စိတ်ပိုင်းဆိုင်ရာ ဆန္ဒများနှင့် များစွာ သက်ဆိုင်နေကြောင်း သူက တွေ့ရှိခဲ့ပြီး ဖြစ်သည်။

မသေဆုံးမီ မည်သည့် စွမ်းအားမျိုးကို အတောင့်တဆုံး ဖြစ်ခဲ့သနည်း ဆိုသည်အပေါ်မူတည်ပြီး နိုးထလာချိန်တွင် ထိုစွမ်းအားမျိုးဘက်သို့ ယိမ်းယိုင်သွားနိုင်ခြေ ပိုများတတ်ပေသည်။

ဤမျိုးရိုးဗီဇ အစိတ်အပိုင်းက စိတ်ပိုင်းဆိုင်ရာ လိုအပ်ချက်ကို ဦးစားပေး တုံ့ပြန်ပြီး ထိုမှတစ်ဆင့် ပေါ်လွင်လာကာ အစွမ်းတစ်ခုအဖြစ် ဖြစ်ပေါ်လာခြင်း ဖြစ်သည်။

ဂျိရှောင်ယွီ၏ ရှင်းပြချက်အရ သူမ၏ နောက်ကွယ်ရှိ ဤလူစုမှာ မူလကတည်းက ငါးလုပ်ငန်းနှင့် ပတ်သက်သည့် မိသားစုများ ဖြစ်ကြသည်။

ဘိုးဘွားစဉ်ဆက် ငါးဖမ်းခြင်းဖြင့် အသက်မွေးဝမ်းကျောင်းပြုကာ တစ်သက်လုံး ငါးများကို စားသောက်လာခဲ့ကြသောကြောင့် ခန္ဓာကိုယ်တွင်းရှိ ငါးမျိုးရိုးဗီဇများက သဘာဝအလျောက် ပေါကြွယ်ဝနေမည်မှာ အသေအချာပင်။

ဤကဲ့သို့သော အခြေအနေမျိုးတွင် ရေလူသား သို့မဟုတ် ငါးလူ အမျိုးအစား မျိုးရိုးဗီဇကို ဦးစားပေး နိုးထလာခြင်းမှာ မထူးဆန်းလှပေ။

ရေကြီးရေလျှံမှုကြီးက ယနေ့တိုင်အောင် ဆက်လက် မြင့်တက်နေဆဲ ဖြစ်သည်။

လူသားများ အသက်ရှင်သန်လိုပါက မြင့်ရာသို့ ပြေးရမည် သို့မဟုတ် ရေကြီးမှုအတွင်းသို့ ဝင်ရောက်ကာ ၎င်း၏ အစိတ်အပိုင်း တစ်ခုအဖြစ် ပြောင်းလဲသွားရန် သင်ယူရမည် ဖြစ်သည်။

ရေလူသားနှင့် ငါးလူတို့မှာ ဒုတိယအမျိုးအစား ဖြစ်ပြီး ရေကြီးမှုအတွင်းသို့ တဖြည်းဖြည်း ပေါင်းစပ် ဝင်ရောက်နေကြခြင်းပင်။

လူသားဟူသော ဤအုပ်စုကြီးသည်လည်း ဆင့်ကဲပြောင်းလဲမှု လမ်းကြောင်းပေါ်တွင် မတူညီသော ဦးတည်ချက်များဆီသို့ လျှောက်လှမ်းနေကြပြီ ဖြစ်သည်။

ဤကဲ့သို့သော အတွေးများက လင်းယွမ်၏ ခေါင်းထဲတွင် လျှပ်တစ်ပြက် ဖြတ်ပြေးသွားခဲ့သည်။

သူက ဂျိရှောင်ယွီကို မော့ကြည့်လိုက်ပြီး မေးလိုက်သည်။ "နင်တို့ရဲ့ ရေအောက် ခိုလှုံရေးစခန်းကို ငါ့ကို ခေါ်သွားပြလို့ ရမလား"

ဂျိရှောင်ယွီက ချက်ချင်းပင် ခေါင်းခါလိုက်ပြီး သတိထားသွားကာ ပြောလိုက်သည်။ "မရဘူး... ကျွန်မတို့ရဲ့ ရေအောက် ခိုလှုံရေးစခန်းကို ရှင့်ကို လုံးဝ ပြောပြလို့ မရဘူး"

သူမက မသိစိတ်အရ လင်းယွမ်ကို ငြင်းဆန်လိုက်ခြင်း ဖြစ်သော်လည်း ချက်ချင်းပင် သူမ၏ အမူအရာက သိပ်မကောင်းလှကြောင်း သတိပြုမိသွားသည်။

သူမက စကားလမ်းကြောင်း လွှဲလိုက်ပြီး ဖြောင်းဖျလိုက်သည်။ "ဒါ့အပြင် ရှင့်ကို ပြောပြလိုက်ရင်တောင်... ရှင် ဝင်သွားလို့ ရမှာ မဟုတ်ပါဘူး"

"ရေအောက်က အရမ်း နက်ပြီး... ရေဖိအားက အရမ်း ကြီးတယ်... ရှင်က အစွမ်းပိုင်ရှင် ဖြစ်နေရင်တောင် ခံနိုင်ရည် ရှိမှာ မဟုတ်ဘူး"

"ရှင်က ဆဲလ်တွေရဲ့ စိမ့်ဝင်ဖိအားကို ချိန်ညှိနိုင်ပြီး... ရေအောက် ပတ်ဝန်းကျင်နဲ့ အသားကျနိုင်တဲ့ ငါးလူ... ဒါမှမဟုတ် ရေလူသား အမျိုးအစား အစွမ်းပိုင်ရှင် ဖြစ်နေမှပဲ ရမှာ"

သူမ၏ ဤစကားများက အကြောင်းပြချက် ခိုင်လုံနေပြီး လင်းယွမ်ကို တိုက်ရိုက် ငြင်းဆန်လိုက်ခြင်းထက် များစွာ ပို၍ သွယ်ဝိုက်ရာ ရောက်ပေသည်။

သို့သော် လင်းယွမ်ကမူ ပြုံးရုံသာ ပြုံးလိုက်ပြီး မေးလိုက်သည်။ "ငါက ငါးလူ အမျိုးအစား အစွမ်းပိုင်ရှင် မဟုတ်ဘူးလို့ နင်က ဘယ်လိုလုပ် သိနိုင်မှာလဲ"

"ရှင်..."

ဂျိရှောင်ယွီက ကြောင်အသွားပြီး လင်းယွမ်ကို ကြည့်လာသော အကြည့်များက ရှင်က ကျွန်မကို အရူးလို့ ထင်နေတာလားဟု မေးနေသည့်အလားပင်။

အစောပိုင်းက လင်းယွမ်သည် သူမ၏ ရှေ့တွင် အားကောင်းသော စိတ်စွမ်းအင် အမျိုးအစား အစွမ်းကို ပြသခဲ့ပြီး ဖြစ်သောကြောင့် လင်းယွမ်က ငါးလူ အမျိုးအစား အစွမ်းပိုင်ရှင် ဖြစ်မည်ကို သူမက လုံးဝ မယုံကြည်ပေ။

လင်းယွမ်က သူမ မယုံကြည်သည်ကို မြင်သောအခါ အပိုစကား မပြောတော့ဘဲ တိုက်ရိုက် မတ်တတ်ရပ်လိုက်ကာ ပြောလိုက်သည်။ "သွားရအောင်"

"ဘယ်သွားမလို့လဲ"

"ရေအောက်ကို သွားမယ်... ရောက်ရင် မင်း အလိုလို သိလာလိမ့်မယ်"

ဂျိရှောင်ယွီက မျက်မှောင်ကြုတ်လိုက်ပြီး လင်းယွမ်၏ နောက်မှ မတ်တတ်ရပ်ကာ ရှောင်မောင်းတောင်အောက်ရှိ ရေကြီးနေသော နေရာသို့ တစ်လျှောက်လုံး လိုက်ပါလာခဲ့သည်။

လင်းယွမ်က ခုန်ပျံလိုက်ပြီး ရေထဲသို့ တိုက်ရိုက် ခုန်ချသွားသည်ကို တွေ့လိုက်ရသည်။

ဂျိရှောင်ယွီကလည်း အလားတူပင် ပေါ့ပါးသွက်လက်စွာဖြင့် ရေအောက်သို့ ခုန်ဆင်းလိုက်သည်။

ရေထဲသို့ ရောက်သည်နှင့် တစ်ပြိုင်နက် သူမ၏ ခန္ဓာကိုယ်က ချက်ချင်းပင် အလိုအလျောက် ပြောင်းလဲသွားတော့သည်။

သေးငယ်သိမ်မွေ့သော ပန်းရောင် အကြေးခွံများက ပျံ့နှံ့ထွက်ပေါ်လာပြီး မူလကတည်းက လှပသော မျက်နှာလေးမှာ ပို၍ ဖြူဖွေးနူးညံ့လာကာ မျက်ဝန်းများကလည်း ကျောက်မျက်ရတနာ တစ်ခုကဲ့သို့ ကြည်လင် တောက်ပလာခဲ့သည်။

သူမ၏ လက်နှစ်ဖက်နှင့် ခြေနှစ်ဖက်ကြားတွင်လည်း ရေယက်အမြှေးပါးများ ထွက်ပေါ်လာခဲ့သည်။

ဂျိရှောင်ယွီက သူမ၏ ခန္ဓာကိုယ်ကို သက်သောင့်သက်သာ လှုပ်ရှားလိုက်ပြီးနောက် လင်းယွမ်ကို လှည့်ကြည့်လိုက်သည်။

ထိုသို့ ကြည့်လိုက်သောအခါ သူမ၏ မျက်လုံးများက ချက်ချင်းပင် ပြူးကျယ်သွားတော့သည်။

မလှမ်းမကမ်းရှိ လင်းယွမ်က မည်သည့် ကာကွယ်ရေး အစီအမံ သို့မဟုတ် ရေရှောင်ရှားသည့် အစီအမံများကိုမျှ ဖွင့်လှစ်ထားခြင်း မရှိသည်ကို တွေ့လိုက်ရသည်။

ထိုသို့ ဖွင့်ထားမည့်အစား သူကလည်း ရေထဲတွင် ထိုအတိုင်း ရပ်နေခြင်း ဖြစ်သည်။

သူ၏ လက်နှစ်ဖက်တွင်လည်း ရေယက်အမြှေးပါးများ ထွက်ပေါ်နေပြီး နားရွက်နောက်ဘက် အပိုင်းတွင်မူ ပါးဟက်များအဖြစ် ဆင့်ကဲပြောင်းလဲလာခဲ့သည်။

သူ၏ မျက်နှာပေါ်တွင် ငါးအကြေးခွံများ မရှိသော်လည်း သူ၏ ဆဲလ်များက တစ်ခုခု ပြောင်းလဲသွားပုံရပြီး အပေါ်ယံ အရေပြားလွှာက ပို၍ ထူထဲလာပုံရသည်။

"ရှင်... ရှင်... ရှင်"

ဂျိရှောင်ယွီက ပါးစပ် အဟောင်းသား ဖြစ်သွားပြီး သူမ၏ မျက်နှာပေါ်တွင် မယုံနိုင်မှုများ ပြည့်နှက်နေကာ စကားများပင် ထစ်အ သွားတော့သည်။

လင်းယွမ်က ပြုံးလိုက်ပြီး ပြောလိုက်သည်။ "ဘယ်လိုလဲ... နင့် အမြင်အရ ငါက ငါးလူ မဟုတ်ဘူးလား"

"ဒါ မဖြစ်နိုင်ဘူး... ဒါ လုံးဝ မဖြစ်နိုင်ပါဘူး... ရှင်က စိတ်စွမ်းအင် အမျိုးအစား အစွမ်းပိုင်ရှင်လေ... နေပါဦး... မဟုတ်သေးဘူး... ရှင်က ရေခဲဓာတ် အစွမ်းပိုင်ရှင်လည်း ဖြစ်သေးတယ်"

"အဲဒါလည်း မဟုတ်သေးဘူး... ရှင် မီးတောက်တွေ ထုတ်လွှတ်တာကိုလည်း ကျွန်မ မြင်ခဲ့ဖူးတယ်... ရှင်... ရှင်က တကယ်တော့ ဘယ်လို အမျိုးအစား အစွမ်းပိုင်ရှင်လဲ"

ဂျိရှောင်ယွီက တွေဝေသွားတော့သည်။ သူမက လုံးဝကို ခွဲခြားမရတော့ပေ။ သူမ၏ ရှေ့ရှိ ဤအမျိုးသားက တကယ်တော့ မည်သည့် အမျိုးအစား အစွမ်းပိုင်ရှင် ဖြစ်သနည်း။

လင်းယွမ်က ပြုံးလိုက်သည်။ "အခု ငါက ငါးလူ ဖြစ်နေပြီဆိုတာ နင် သိရင် ရပါပြီ... အခု နင့်ရဲ့ ခိုလှုံရေးစခန်းကို ငါ့ကို ခေါ်သွားလို့ ရပြီလား"

ဂျိရှောင်ယွီက ခေါင်းကုတ်လိုက်ပြီး သူမ၏ မျက်နှာတစ်ခုလုံး ရှုပ်ထွေးသွားတော့သည်။

လင်းယွမ်က ပြုံးကာ မေးလိုက်သည်။ "ဘာလဲ... နင်တို့ ခိုလှုံရေးစခန်းက အဲဒီလောက်တောင် အပြင်လူတွေကို လက်မခံတာလား"

ဂျိရှောင်ယွီက ခေါင်းခါလိုက်ပြီး ပြောလိုက်သည်။ "လူတိုင်းက အရမ်း သဘောကောင်းကြပါတယ်... ကုန်းပေါ်က လူတွေရဲ့ နာကျင်အောင် လုပ်တာကို ခံခဲ့ရလို့ အားလုံးက ကုန်းပေါ်က လူတွေနဲ့ မပတ်သက်ချင်ကြတော့တာပါ"

လင်းယွမ်က မေးလိုက်သည်။ "သူတို့က ကုန်းပေါ် မတက်ကြတော့ဘူးလား... ရေအောက်မှာပဲ တစ်ချိန်လုံး နေကြတာလား"

"အဲဒီလိုလည်း မဟုတ်ပါဘူး... တစ်ခါတလေ အရမ်း ပျင်းလာတဲ့အခါ ဒါမှမဟုတ် ကုန်းပေါ်က အစားအစာတွေကို သတိရတဲ့အခါ ကုန်းပေါ်တက်ပြီး စားစရာ လာရှာတတ်ကြပါတယ်"

လင်းယွမ်က ပြုံးလိုက်ပြီး မေးလိုက်သည်။ "ငါက ကုန်းပေါ်က လူလား... ဒါမှမဟုတ် နင်တို့ ရေအောက်က လူတွေထဲမှာပဲ ပါလား ဆိုတာ နင် ပြောကြည့်လေ"

"အဲ့ဒါက..." ဂျိရှောင်ယွီက မည်သို့ ပြန်ဖြေရမည်ကို မသိတော့ပေ။

လင်းယွမ်က ပြောလိုက်သည်။ "ကုန်းပေါ်က လူပဲ ဖြစ်ဖြစ် ရေအောက်က လူပဲ ဖြစ်ဖြစ်... အရင်တုန်းက အားလုံး လူသားတွေချည်းပါပဲ"

"ဝူယောင်ပန်းတို့လို လူတွေက တစ်စိတ်တစ်ပိုင်းကိုပဲ ကိုယ်စားပြုနိုင်တာပါ... ဒီလို လူဆိုးတွေက ဘယ်နေရာမှာမဆို ရှိနေမှာပဲ"

"နင်တို့အားလုံး ရေအောက်မှာ ရောက်နေရင်တောင်... ငါးလူ ဒါမှမဟုတ် ရေလူသားတွေကြားမှာ လူဆိုးတွေ မရှိနိုင်တော့ဘူးလား"

ဂျိရှောင်ယွီက တိတ်ဆိတ်သွားသည်။ သူမက အနည်းငယ် နားဝင်သွားခဲ့ပြီ ဖြစ်သည်။

အဓိက အချက်မှာ သူမကို နားချနေသော ဤလူကလည်း ငါးလူ ဖြစ်နေခြင်းပင်။

အင်း... ဖြစ်နိုင်တာပဲ။

အနည်းဆုံးတော့ သူမက လင်းယွမ်အပေါ် ကုန်းပေါ်က လူသားတွေအပေါ်မှာလိုမျိုး ဆန့်ကျင်ချင်စိတ် မရှိတော့ပေ။

လင်းယွမ်က ပြောလိုက်သည်။ "ငါ့ကို ခေါ်သွားပြစမ်းပါ... နင်က ငါနဲ့ အပေးအယူ မလုပ်ချင်တော့ဘူးလား"

"နင့်ဘေးနားက လူတွေက ဘယ်လို လူမျိုးတွေလဲဆိုတာ ငါ သိရမှပဲ... ရှောင်မောင်းတောင်ရဲ့ အရင်းအမြစ် တစ်ဝက်ကို နင်တို့ကို ခွဲပေးဖို့ ငါ စိတ်ချနိုင်မှာပေါ့"

ဂျိရှောင်ယွီက ချက်ချင်းပင် နားဝင်သွားတော့သည်။ သူမက ခေတ္တမျှ စဉ်းစားလိုက်ပြီး ပြောလိုက်သည်။ "ဒါဆိုရင် ရှင် ကျိန်ဆိုရမယ်... သူတို့ကို လုံးဝ အန္တရာယ် မပေးပါဘူးလို့"

"ငါ ကျိန်ဆိုတယ်" လင်းယွမ်က ပြုံးလိုက်ပြီး ပြောလိုက်သည်။

ဂျိရှောင်ယွီက ခေါင်းညိတ်လိုက်သည်။ "ကျွန်မ နောက်ကနေ လိုက်ခဲ့"

ကောင်မလေးက ရှေ့သို့ လက်ဖြင့်လှော်ခတ်လိုက်ပြီး သူမ၏ ခန္ဓာကိုယ်ပေါ်တွင် အစွမ်း အလင်းရောင်များ တောက်ပလာကာ ဖြူဖွေးသွယ်လျသော ခြေတံနှစ်ချောင်းက ရုတ်တရက် ပူးကပ်သွားတော့သည်။

အစွမ်း အလင်းရောင်များ၏ ဖုံးလွှမ်းမှုအောက်တွင် သူမ၏ ခြေတံနှစ်ချောင်းပေါ်၌ အမြှေးပါး တစ်လွှာ ဖုံးအုပ်သွားပြီး ငါးအမြီး တစ်ချောင်း ထွက်လာသကဲ့သို့ ဖြစ်သွားသည်။

သူမက ခြေနှစ်ချောင်းကို ညင်သာစွာ ခတ်လိုက်သည်နှင့်အမျှ သူမ တစ်ကိုယ်လုံးက မြားတစ်စင်းကဲ့သို့ ခဏတွင်းချင်း အရှိန်ပြင်းစွာဖြင့် ထွက်ခွာသွားတော့သည်။

ဤမြင်ကွင်းကို မြင်လိုက်ရသောအခါ လင်းယွမ်က မနေနိုင်ဘဲ အနည်းငယ် အံ့အားသင့်သွားသည်။

သူက ချက်ချင်းပင် မျိုးရိုးဗီဇ အသွင်တစ်ရာ ပင်ကိုယ်အစွမ်းကို အသုံးပြုလိုက်ရာ ခြေတံနှစ်ချောင်းနေရာတွင် အလားတူ စွမ်းအင် အမြှေးပါးများ စုစည်းလာပြီး ငါးအမြီးကဲ့သို့သော ပုံစံတစ်ခု ဖြစ်ပေါ်လာခဲ့သည်။

ထို့နောက် ငါးအမြီးကို အားကုန်လွှဲခတ်လိုက်ရာ မျက်စိတစ်မှိတ်အတွင်း သူ၏ အရှိန်က ချက်ချင်းပင် မြင့်တက်သွားတော့သည်။

ရှေ့မှ ဂျိရှောင်ယွီက ဤမြင်ကွင်းကို မြင်လိုက်ရသောအခါ မနေနိုင်ဘဲ ကြောင်အသွားကာ ပြောလိုက်သည်။ "ရှင်က ငါးလူ မဟုတ်ဘူးလား... ဘယ်လိုလုပ်ပြီး ကျွန်မတို့ ရေလူသားတွေရဲ့ အမြီးလှော်ခတ်တဲ့ စွမ်းရည်ကို တတ်နေရတာလဲ"

ထိုအခါမှသာ လင်းယွမ်က နားလည်သွားတော့သည်။ ဤစွမ်းရည်ကို တကယ်တော့ အမြီးလှော်ခတ်ခြင်း ဟု ခေါ်ဆိုပြီး ဂျိရှောင်ယွီ၏ စကားအရ ဤစွမ်းရည်က ရေလူသား အမျိုးအစား အစွမ်းပိုင်ရှင်များသာ တတ်ကျွမ်းသော စွမ်းရည်တစ်ခု ဖြစ်နေပေသည်။

ဆက်ရန်...

အပိုင်း(၅၁၄) ရေအောက် ခိုလှုံရေးစခန်း

လင်းယွမ်က ပြုံးကာ မေးလိုက်သည်။ "ဒါက နင်တို့ ရေလူသား အသွင်ပြောင်း အစွမ်းပိုင်ရှင်တွေရဲ့ သီးသန့် အစွမ်းလား"

"အင်း... ဟုတ်လောက်တယ်... ငါးလူသား အစွမ်းပိုင်ရှင်တွေ ဒီလိုအစွမ်းမျိုး သုံးနိုင်တာကို ကျွန်မ မတွေ့ဖူးသေးဘူး"

"ငါးလူသား အမျိုးအစား အစွမ်းပိုင်ရှင်တွေရဲ့ ဆင့်ကဲပြောင်းလဲမှု လမ်းကြောင်းက... ခွန်အား အမျိုးအစား အစွမ်းပိုင်ရှင်တွေနဲ့ နည်းနည်း ဆင်တူတယ်... သူတို့ရဲ့ ခန္ဓာကိုယ်ကြံ့ခိုင်မှုက အရမ်း အားကောင်းကြတာ"

"ကျွန်မတို့ ရေလူသား အမျိုးအစား အစွမ်းပိုင်ရှင်တွေကတော့... စိတ်စွမ်းအင် အမျိုးအစား အစွမ်းပိုင်ရှင်တွေဘက်ကို နည်းနည်း ပိုယိမ်းတယ်... နောက်ပိုင်းကျရင် သန္ဓေပြောင်းစွမ်းအင် အသုံးချမှုက ပိုပြီး ရှုပ်ထွေး များပြားလာလိမ့်မယ်"

"ယေဘုယျပြောရရင်တော့... ငါးလူသားတွေရဲ့ ဆင့်ကဲပြောင်းလဲမှု လမ်းကြောင်းက... နည်းနည်း ရိုင်းစိုင်းကြမ်းတမ်းတယ်... ခြုံကြည့်ရင် တုံးအအကြီးတွေလို့ ခံစားရတယ်... ဟီဟီ"

ဂျိရှောင်ယွီ ကိုယ်တိုင်ပင် အသံထွက်ကာ ရယ်မောလိုက်သည်။

လင်းယွမ်ကလည်း သူမ၏ ချစ်စရာကောင်းသော ရယ်မောသံကြောင့် ကူးစက်သွားပြီး ပြုံးကာ ပြောလိုက်သည်။ "နင်တို့ အချင်းချင်းကြားမှာတောင် ခွဲခြားနှိမ်ချမှုတွေ ရှိနေတာလား"

"အာ... မရှိပါဘူး... ကျွန်မက နောက်နေတာပါ"

"ရှင်က ဘယ်လိုအခြေအနေလဲဆိုတာ မပြောရသေးဘူးနော်... ရှင်က တကယ်တော့ ငါးလူသားလား ဒါမှမဟုတ် ရေလူသား အမျိုးအစား အစွမ်းပိုင်ရှင်လား"

လင်းယွမ်က ပြုံးလိုက်ပြီးနောက် ပြောလိုက်သည်။ "ဒါက လျှို့ဝှက်ချက်မို့လို့... ပြောပြလို့ မရဘူး"

"ဟွန့်... ဘယ်သူက ဂရုစိုက်လို့လဲ" ဂျိရှောင်ယွီက နှာခေါင်းရှုံ့လိုက်ပြီးနောက် လင်းယွမ်ကို ဖြတ်ကျော်ရန်၊ သူ့ကို ပင်ပန်းစေရန်နှင့် သင်ခန်းစာ အနည်းငယ် ပေးရန်အတွက် ရှေ့သို့ အရှိန်တင်ကာ ကူးခတ်သွားတော့သည်။

သို့သော် သူမ မည်မျှပင် အရှိန်တင်ပါစေ လင်းယွမ်က အမြဲတမ်း လွယ်ကူစွာဖြင့် သူမနောက်သို့ လိုက်မီနေခဲ့သည်။

ခရီးတစ်အတော် အကွာအဝေးထိ ကူးခတ်သွားပြီးနောက်တွင် ဂျိရှောင်ယွီ ကိုယ်တိုင်ပင် အလွန်အနင် ပင်ပန်းနွမ်းနယ်သွားခဲ့သည်။

မည်သို့ပင်ဆိုစေ သူမ၏ အဓိက အရည်အသွေးမှတ်က သုံးဆယ်ကျော်သာ ရှိသေးသဖြင့် လင်းယွမ်နှင့် လုံးဝ နှိုင်းယှဉ်၍ မရနိုင်ပေ။

ဂျိရှောင်ယွီက သူမ၏ အရှိန်ကျဆင်းသွားတော့မည်ကို မြင်လိုက်ရချိန်တွင် ရုတ်တရက် ရှေ့ရှိ ရေအောက် အဆောက်အအုံတစ်ခုကို မြင်လိုက်ရသဖြင့် ချက်ချင်းပင် မျက်လုံးများ အရောင်လက်သွားတော့သည်။

"ရောက်ပြီ... ရပ်လို့ရပြီ"

သူမက အလျင်အမြန် ရပ်တန့်လိုက်ပြီး လင်းယွမ်ကို လှမ်းအော်လိုက်သည်။

တည်ငြိမ်သော အမူအရာကို ထိန်းသိမ်းရန် အတတ်နိုင်ဆုံး ကြိုးစားနေသော်လည်း ပြင်းထန်သော လှုပ်ရှားမှုကြောင့် ရင်ခုန်သံများ မြန်ဆန်နေသဖြင့် သူမ မှုတ်ထုတ်လိုက်သော ရေပူပေါင်းများက သိသိသာသာ ပိုမို များပြားနေခဲ့သည်။

လင်းယွမ်ကလည်း သူမကို ဖော်မထုတ်တော့ဘဲ ပြုံးလိုက်ရုံသာ ပြုံးကာ ရှေ့ရှိ အဆောက်အအုံဆီသို့ လှမ်းကြည့်လိုက်သည်။

ရှေ့တွင် ကြီးမားသော ဈေးဝယ်စင်တာကြီး တစ်ခုက ရေအောက်တွင် မားမားမတ်မတ် တည်ရှိနေသည်ကို မြင်လိုက်ရသည်။ ကားလမ်းမကြီးက ရွှံ့နွံများဖြင့် ဖုံးလွှမ်းနေပြီး ထိုလမ်းမီးတိုင်များကလည်း စောစောစီးစီးပင် သံချေးတက်နေခဲ့ပြီ ဖြစ်သည်။

ရေအောက်ရှိ အဆောက်အအုံကြီးက အုံ့မှိုင်းနေပြီး ထိုကွဲကြေနေသော ပြတင်းပေါက်များက ကြောက်မက်ဖွယ်ကောင်းသော ပါးစပ်ပေါက်ကြီးများအလား ဖြစ်နေကာ ထက်မြက်ပြီး ချွန်ထက်သော မှန်ကွဲစများက ပြတင်းပေါက်ဘောင်များပေါ်တွင် ကျန်ရစ်နေသည်။

ရှည်လျားသော စင်္ကြံလမ်းများက လူကို စိုက်ကြည့်နေသော နက်ရှိုင်းသည့် မျက်လုံးရှည်ကြီးများအလားပင်။

ရေအောက် ပတ်ဝန်းကျင်က မှောင်မိုက်နေပြီး လူကို အမြဲတမ်း ကြောက်မက်ဖွယ်ကောင်းသော ခံစားချက်ကို ပေးစွမ်းနေသည်။

သို့သော် ထိုရှေ့ရှိ ကြီးမားသော ဈေးဝယ်စင်တာကြီးကတော့ အခြားနေရာများရှိ အဆောက်အအုံများနှင့် သိသာထင်ရှားသော ကွာခြားချက် ရှိနေသည်။

ဈေးဝယ်စင်တာ၏ ပတ်ပတ်လည်တွင် သိပ်သည်းများပြားလှသော ရေညှိပင်များ ပေါက်ရောက်နေသည်။

ထိုရေညှိပင်များက တောရိုင်းပင်များနှင့် မတူဘဲ တစ်စုံတစ်ယောက်က တမင်တကာ အစုလိုက်အပြုံလိုက် စိုက်ပျိုးထားပုံရသည်။

ရေညှိပင်များ၏ အမြင့်က အလွန် မြင့်မားလှပြီး အထပ် ခုနစ်ထပ်၊ ရှစ်ထပ်ခန့်ရှိ အမြင့်သို့ပင် ရောက်ရှိနေကာ ထိုကြီးမားသော ဈေးဝယ်စင်တာကြီးကို တစ်ဝက်ကျော်ခန့် ဖုံးလွှမ်းထားလေသည်။

ရေညှိပင်များ၏ သိပ်သည်းမှု အတိုင်းအတာကလည်း အလွန် အံ့အားသင့်ဖွယ် ကောင်းလှပြီး အဝေးမှ လှမ်းကြည့်လိုက်လျှင် စပါးခင်းများ လှိုင်းထနေသကဲ့သို့ပင် ဖြစ်သည်။

ထို့အပြင် ဈေးဝယ်စင်တာ၏ အမိုးပေါ်တွင်လည်း မြင့်မားသော သန္တာကျောက်တန်း တစ်လွှာဖြင့် ဖုံးလွှမ်းထားသေးသည်။

အကယ်၍ သေသေချာချာ မကြည့်ပါက အောက်ဘက်တွင် ကြီးမားသော ဈေးဝယ်စင်တာကြီး တစ်ခု ရှိနေသည်ကိုပင် သင် မြင်တွေ့နိုင်မည် မဟုတ်ပေ။

လင်းယွမ်က မေးလိုက်သည်။ "ဒီရေညှိပင်တွေက နင်တို့ စိုက်ထားတာလား"

ဂျိရှောင်ယွီက ခေါင်းညိတ်ပြလိုက်သည်။ "အင်း... ရေအောက်မှာ သန္ဓေပြောင်း သက်ရှိတွေ အများကြီး ရှိတယ်... မျိုးရိုးဗီဇမျိုးစေ့အဆင့် သန္ဓေပြောင်း သားရဲတွေလည်း မနည်းဘူး"

"ဒီရေညှိပင်တွေရဲ့ အကာအကွယ်နဲ့... ကိုယ်လုံးကိုယ်ထည် ကြီးမားတဲ့ မျိုးရိုးဗီဇမျိုးစေ့အဆင့် သန္ဓေပြောင်း သားရဲတွေကို တားဆီးပေးနိုင်ရုံသာမကဘဲ... ဖုံးကွယ်ပေးနိုင်တဲ့ အာနိသင်လည်း ရှိသေးတယ်"

"ဒါက ဘယ်လိုမျိုး အကာအကွယ် ဖြစ်တာလဲ" လင်းယွမ်က သိချင်စိတ်ဖြင့် မေးလိုက်သည်။

ဂျိရှောင်ယွီက ပြောလိုက်သည်။ "ဒီရေညှိပင်တွေက အရမ်း သိပ်သည်းတယ်... ပြီးတော့ ခံနိုင်ရည်လည်း အရမ်း ကောင်းတယ်... အထဲကို ကူးဝင်သွားရင် ရေညှိပင်တွေရဲ့ ရစ်ပတ်တာကို ခံရဖို့ အရမ်း လွယ်ကူတယ်"

"ဒီရေညှိပင်တွေရဲ့ ရစ်ပတ်တာကို တစ်ခါ ခံလိုက်ရတာနဲ့... ရုန်းကန်လေလေ ပိုပြီး နက်နက်ရှိုင်းရှိုင်း ရစ်ပတ်ခံရလေလေပဲ... နောက်ဆုံးကျရင် အထဲမှာ လုံးဝ ပိတ်မိသွားလိမ့်မယ်"

"ဒါကတော့ ကိုယ်လုံးကိုယ်ထည် ကြီးတဲ့ သန္ဓေပြောင်း သက်ရှိတွေအတွက် ပြောတာပါ... ကိုယ်လုံးကိုယ်ထည် သေးတဲ့အကောင်တွေဆိုရင် ဒီရေညှိပင်တွေထဲ ဝင်သွားတာက လူတွေ တောအုပ်ထဲ ဝင်သွားတဲ့ ခံစားချက်မျိုးနဲ့ တူတူပဲ... လာ... ရှင့်ကို အထဲခေါ်သွားပြီး ခံစားကြည့်ခိုင်းမယ်"

ပြောနေရင်းဖြင့် ဂျိရှောင်ယွီက ရေညှိတောထဲသို့ ချက်ချင်း ကူးခတ်သွားရာ လင်းယွမ်ကလည်း သူမနောက်မှ ကပ်လျက် လိုက်ပါသွားပြီး ရေညှိတောထဲသို့ အလျင်အမြန် ငုပ်လျှိုးဝင်ရောက်သွားတော့သည်။

အထဲသို့ ဝင်ရောက်သွားချိန်တွင် သိပ်သည်းနေသော သစ်တောကြီးတစ်ခုထဲသို့ တိုးဝင်သွားရသကဲ့သို့ပင် တကယ်ကို ခံစားလိုက်ရသည်။

မျက်စိရှေ့တွင် မြင်တွေ့နေရသည်မှာ ကြီးမားသော ရေညှိပင်ကြီးများသာ ဖြစ်သည်။

ထိုရေညှိပင်များက အစိမ်းရင့်ရောင် ရှိပြီး မျက်နှာပြင်က စေးကပ်နေကာ ရေလှိုင်းများနှင့်အတူ ဖြည်းညင်းစွာ ယိမ်းနွဲ့နေကြသည်။

လင်းယွမ်က ရေညှိပင်တစ်ပင်ကို ဖြည်းညင်းစွာ ဖယ်ရှားလိုက်ရာ အထိအတွေ့က ချောမွတ်နေလေသည်။

သူက အားသုံးကာ ဆိတ်ဆွဲကြည့်လိုက်ရာ ဂျိရှောင်ယွီ ပြောသကဲ့သို့ပင် ဤအရာက တကယ်ကို ခံနိုင်ရည် အလွန် ကောင်းမွန်နေပြီး သူက အင်အား မနည်းမနော သုံးလိုက်ရမှသာ ပြတ်တောက်သွားတော့သည်။

"ဒီရေညှိပင်တွေက စားလို့ရတယ်... ကျွန်မတို့ ဒီရေညှိပင်တွေကို စိုက်ပျိုးထားတာက စားနပ်ရိက္ခာအနေနဲ့ သုံးဖို့လည်းပါတယ်"

ဂျိရှောင်ယွီကလည်း အနည်းငယ် နိမ့်သော ရေညှိပင်၏ အညွန့်လေးကို ဆိတ်ယူလိုက်ပြီး ပြောလိုက်သည်။ "တကယ်လို့ စားချင်တယ်ဆိုရင် ဒီလိုမျိုး နုတဲ့ အဖျားလေးတွေကို ရွေးရမယ်... မြည်းကြည့်ပါဦး"

သူမက ထိုရေညှိ အညွန့်လေးကို လင်းယွမ်ထံသို့ ကမ်းပေးလိုက်သည်။

လင်းယွမ်က လှမ်းယူကာ ပါးစပ်ထဲသို့ ထည့်လိုက်ပြီး ရေညှိ အညွန့်လေးကို သွားဖြင့် ဖွဖွလေး ကိုက်ဖောက်လိုက်ရာ ချက်ချင်းပင် ပင်လယ်ရေမှော်ကဲ့သို့ အရသာမျိုး ထွက်ပေါ်လာတော့သည်။

ဤရေညှိပင်ကို ပါးစပ်ထဲ ဝါးနေရသည်မှာ သားရေကို ဝါးနေရသကဲ့သို့ပင် ဖြစ်ပြီး အခြား ထူးခြားသော အရသာ ဘာမှ မရှိပေ။

လင်းယွမ်က မျက်မှောင်ကြုတ်လိုက်ပြီး ပြောလိုက်သည်။ "နင်တို့ ဒါကိုပဲ စားနေကြတာလား"

ဂျိရှောင်ယွီက ပြုံးစိစိဖြင့် ပြောလိုက်သည်။ "အရသာ ဘယ်လိုနေလဲ"

"ဘာအရသာမှ မရှိဘူး"

ဂျိရှောင်ယွီက တစ်ခစ်ခစ် ရယ်မောလိုက်သည်။ "ဘာလို့ ကျွန်မက ကုန်းပေါ်မှာ သွားနေချင်နေသေးလဲဆိုတာကို... အခု ရှင် သိပြီမလား"

"ခစ်ခစ်... ကျွန်မတို့ ခေတ်လူတွေက ကုန်းပေါ်က ဟင်းသီးဟင်းရွက်တွေကိုပဲ စားနေကျဖြစ်နေပြီလေ... အစွမ်း နိုးထလာပြီး ရေအောက် အသက်ရှင်သန်မှုနဲ့ အကျွမ်းတဝင် ဖြစ်သွားခဲ့ရင်တောင်... ကျွန်မတို့ရဲ့ စားသောက်မှု အလေ့အထကိုတော့ ပြောင်းလဲလို့ မရသေးဘူး"

"သန္ဓေပြောင်းငါးတွေကို အစိမ်းစားရတာနဲ့... ဒီရေညှိအပင်တွေကို စားရတာက တခြား ရွေးချယ်စရာ မရှိလို့ စားနေရတာပဲ"

"ကြက်ကြော်... ဘဲကင်နဲ့ မွှေးကြိုင်နေတဲ့ ဟော့ပေါ့တွေကိုသာ စားရမယ်ဆိုရင်... ဘယ်သူက ဒီလိုဟာတွေကို စားချင်မှာလဲ"

ဤနေရာသို့ ရောက်ချိန်တွင် ဂျိရှောင်ယွီမှာ အနည်းငယ် စိတ်ဓာတ်ကျသွားပုံရသည်။

"ကြက်ကြော်တို့ ဘဲကင်တို့ကတော့ ထားလိုက်ပါတော့... အခုဆိုရင် ကုန်းပေါ်မှာတောင် ဒီလိုအစားအစာတွေ ရှိဖို့ မဖြစ်နိုင်တော့ဘူး"

"ရေကြီးပြီးတဲ့နောက်ပိုင်း... ကျွန်မတို့ လူသားတွေရဲ့ ရုပ်ပိုင်းဆိုင်ရာ လူနေမှုဘဝ အခြေအနေတွေက... တကယ်ကို ချောက်ကမ်းပါးထဲ ကျသွားသလို ဆိုးရွားသွားခဲ့တာ"

လင်းယွမ်ကလည်း သက်ပြင်းချလိုက်သည်။ မှန်ပေသည်။ ကမ္ဘာပျက်ကပ် ရေကြီးမှုကြီး အပြီးတွင် လူသားများမှာ အသက်ရှင်သန်ရန်ပင် ခက်ခဲနေခဲ့ပြီး ရုပ်ပိုင်းဆိုင်ရာ အခြေအနေများမှာ ဗိုက်ဝရန်သာ တတ်နိုင်သဖြင့် အခြား ဘာတောင်းဆိုစရာ ရှိတော့မည်နည်း။

သူတို့နှစ်ဦးက စကားပြောရင်းဖြင့် ရှေ့သို့ ကူးခတ်သွားကြသည်။

ရုတ်တရက် ရေညှိတောထဲရှိ ကျယ်ဝန်းသော ရေညှိရွက်ကြီး တစ်ရွက်၏ အနောက်မှ လူမျက်နှာ တစ်ခု ထွက်ပေါ်လာခဲ့သည်။

"ရှောင်ယွီ... နင်... နင်က ဘယ်လိုလုပ်ပြီး အပြင်လူကို ခေါ်လာရတာလဲ"

ဤမျက်နှာက အသက် သုံးဆယ်ကျော် အရွယ်ရှိ အမျိုးသမီး တစ်ဦး၏ ပုံစံမျိုး ဖြစ်သော်လည်း နဖူးတွင် အပြာရောင် အကြေးခွံများဖြင့် တန်ဆာဆင်ထားပြီး ခန္ဓာကိုယ်နှင့် လက်မောင်းများတွင်လည်း အပြာရောင် အကြေးခွံများ ရှိနေသည်။

ခြေထောက် နှစ်ဖက်နေရာတွင်လည်း သန္ဓေပြောင်းစွမ်းအင် အလွှာပါးလေးဖြင့် ဖုံးလွှမ်းထားသော ငါးအမြီး ဖြစ်တည်နေသည်။

သူမက ရေလူသား အမျိုးအစား အစွမ်းပိုင်ရှင် တစ်ဦး ဖြစ်သည်။

ဂျိရှောင်ယွီက သူမကို မြင်လိုက်ရချိန်တွင် ချက်ချင်းပင် အပြုံးတစ်ခု ပေါ်ထွက်လာပြီး ပြောလိုက်သည်။ "အမယွဲ့... အမကိုး"

သူမက လင်းယွမ်ကို ချက်ချင်း ဆွဲခေါ်လာပြီး ပြောလိုက်သည်။ "အမယွဲ့... သူလည်း ရေလူသား အမျိုးအစား အစွမ်းပိုင်ရှင်ပဲ... ပြီးတော့ သူက အရမ်း တော်တယ်... ဝူယောက်ပန်းရဲ့ ဧဒင်ဥယျာဉ်ကို သူက ဖျက်ဆီးပစ်လိုက်တာ... အခု ရှောင်မောင်းတောင်က သူ့အပိုင် ဖြစ်သွားပြီ"

ကွမ်ယွဲ့မှာ ချက်ချင်းပင် အလွန် အံ့အားသင့်သွားပြီး လင်းယွမ်ကို အထက်အောက် အကဲခတ်ကြည့်လိုက်ရာ လင်းယွမ်၏ ခန္ဓာကိုယ်ပေါ်တွင် ရေလူသား အမျိုးအစား အစွမ်းပိုင်ရှင်၏ လက္ခဏာများ တကယ် ရှိနေသည်ကို မြင်လိုက်ရသဖြင့် မနေနိုင်ဘဲ အနည်းငယ် ရင်းနှီးသွားသလို ခံစားလိုက်ရသည်။

သို့သော် သူမက မယုံကြည်နိုင်သေးဘဲ မေးလိုက်သည်။ "တကယ်ကြီးလား... ဟုတ်လို့လား... ဧဒင်ဥယျာဉ်ရဲ့ ကောင်းကင်တမန်အဖွဲ့က ရင်ဆိုင်ဖို့ သိပ်လွယ်တာ မဟုတ်ဘူးနော်... သူတို့ဆီမှာ မျိုးရိုးဗီဇမျိုးစေ့အဆင့် အစွမ်းပိုင်ရှင်တွေ အများကြီး ရှိတာ"

လင်းယွမ် ရှင်းပြရန်ပင် မစောင့်တော့ဘဲ ဂျိရှောင်ယွီက စိတ်လှုပ်ရှားစွာဖြင့် ပြောလိုက်သည်။ "တကယ်ပေါ့... အစ်ကိုလင်းရဲ့ အစွမ်းတွေကို အမမှ မမြင်ဖူးတာ"

"ဟို ဝူယောက်ပန်းဆီမှာ ဘာလို့ မျိုးရိုးဗီဇမျိုးစေ့အဆင့် လက်အောက်ငယ်သားတွေ အများကြီး ရှိနေလဲဆိုတာ အမ သိလား"

"ဟိဟိ... ခေါင်းကွဲမတတ် စဉ်းစားရင်တောင် အမ ခန့်မှန်းမိမှာ မဟုတ်ဘူး... အဲ့ဒီကောင်ရဲ့ အစွမ်းက တကယ်တော့ မသေနိုင်တာ မဟုတ်ဘူး... ကိုယ်ပွား ဖန်တီးတာပဲ"

"အရင်က ကျွန်မတို့ အားလုံး အရူးလုပ်ခံခဲ့ရတာ... အဲ့ဒီကောင်က သူ့အစွမ်းကို အသုံးချပြီး မသေနိုင်တဲ့ ခန္ဓာကိုယ်အနေနဲ့ ဟန်ဆောင်ပြီး ကျွန်မတို့ အားလုံးကို လှည့်စားခဲ့တာ"

"ကုန်းပေါ်က လူတွေကလည်း တုံးတုံးအအနဲ့ သူ့ရဲ့ စကားတွေကို ယုံကြည်ပြီး... သူ့ရဲ့ ဧဒင်ဥယျာဉ်ထဲ ဝင်သွားကြတာလေ... အခုတော့ အားလုံး ကြောင်တောင်တောင် ဖြစ်ကုန်ကြပြီ"

ဂျိရှောင်ယွီက ကွမ်ယွဲ့ကို အံ့အားသင့်သွားစေလောက်မည့် သတင်းအချက်အလက်များကို ဆက်တိုက် ပြောပြလိုက်သည်။

သူမ၏ ဦးနှောက်မှာ ခေတ္တမျှ တုံ့ပြန်နိုင်ခြင်း မရှိတော့ပေ။

"ဘာ... ဝူယောက်ပန်း သေသွားပြီ... ဒါ... ဒါ မဖြစ်နိုင်ဘူး"

"သူ့အစွမ်းက မသေနိုင်တာ မဟုတ်ဘူးလား... ကိုယ်ပွား ဖန်တီးတာလား"

"ဘယ်လိုဖြစ်ရတာလဲ... ဒါက ဘယ်လိုဖြစ်တာလဲ"

ကွမ်ယွဲ့က အလျင်အမြန် မေးမြန်းလိုက်သည်။

ဂျိရှောင်ယွီက ရှောင်မောင်းတောင်တွင် ဖြစ်ပျက်ခဲ့သည့် ကိစ္စရပ်များကို အတိုချုပ် ပြောပြလိုက်သည်။

ကွမ်ယွဲ့မှာ နားထောင်ပြီးသွားသည့်တိုင် မယုံကြည်နိုင်သေးဘဲ တစ်ချိန်တည်းမှာပင် လင်းယွမ်ကို လှည့်ကြည့်လိုက်သည်။

သူတို့လို ရေလူသား အမျိုးအစား အစွမ်းပိုင်ရှင်များထဲတွင် ဤမျှ အစွမ်းထက်သောသူ ရှိနေသည်မှာ တကယ်ကို တွေးကြည့်ရန်ပင် ခက်ခဲလှသည်။

လင်းယွမ်က အစအဆုံး စကားတစ်ခွန်းမှ မပြောဘဲ ဂျိရှောင်ယွီနှင့် အလိုက်သင့် ပြုံးကာ ခေါင်းညိတ်ပြနေခဲ့သည်။

သူ၏ စွမ်းဆောင်ရည်က ဤအဆင့်အထိ ရောက်နေပြီဖြစ်ရာ သူ့အတွက် ရှောင်ယွီက အလိုအလျောက် ရှင်းပြပေးနေမည် ဖြစ်သည်။

လင်းယွမ်က ပြုံးကာ ပြောလိုက်သည်။ "အမယွဲ့ မဟုတ်လား... ကျွန်တော် ခင်ဗျားတို့ရဲ့ ခိုလှုံရေးစခန်းထဲကို ဝင်ကြည့်လို့ ရမလား"

"ရှောင်ယွီက ကျွန်တော်နဲ့ အပေးအယူ ကိစ္စတစ်ခု လုပ်ထားလို့... စိတ်ချပါ... ကျွန်တော် ခင်ဗျားတို့ရဲ့ ဘဝကို မဖျက်ဆီးပါဘူး"

"ဘာ အပေးအယူလဲ" ကွမ်ယွဲ့က ချက်ချင်း သတိဝင်သွားပြီး ဂျိရှောင်ယွီကို အလျင်အမြန် လှမ်းကြည့်လိုက်သည်။

ဂျိရှောင်ယွီက သူမ၏ နားနားကပ်ကာ လေသံတိုးတိုးဖြင့် စကားအနည်းငယ် ပြောလိုက်သည်။

ထိုအခါမှ ကွမ်ယွဲ့၏ မျက်နှာအမူအရာက အနည်းငယ် ဖြေလျှော့သွားပြီး သူမက ခေတ္တမျှ တုံ့ဆိုင်းနေပြီးနောက် ပြောလိုက်သည်။ "ရှောင်ယွီက နားမလည်လို့ပါ ကိုလင်းယွမ်... ကျွန်မ ရှင်နဲ့ ကြိုတင်ပြီး ရှင်းရှင်းလင်းလင်း ပြောထားပါရစေ"

"သူ ပြောတဲ့ မျိုးရိုးဗီဇမျိုးစေ့အဆင့် သန္ဓေပြောင်း သားရဲက သာမန် မဟုတ်ဘူး... စွမ်းအား အရမ်းကြီးတယ်... အရင်တုန်းက ကျွန်မတို့ရဲ့ မျိုးရိုးဗီဇမျိုးစေ့အဆင့် အစွမ်းပိုင်ရှင် မဟာမိတ်အဖွဲ့ ရှိနေတဲ့အချိန်တုန်းကတောင်... အဲ့ဒီအကောင်ကို သတ်ဖို့ နည်းလမ်း မရှိခဲ့ဘူး"

"အမယွဲ့... ကျွန်မ လိမ်ပြောနေတာမှ မဟုတ်တာ... သူက ကျွန်မကို ခန္ဓာကိုယ်ကြံ့ခိုင်မှု အမျိုးအစား မျိုးရိုးဗီဇမျိုးစေ့အဆင့် သန္ဓေပြောင်း သားရဲရဲ့ တည်နေရာကိုပဲ မေးခဲ့တာလေ... အင်အားကြီးတာ မကြီးတာနဲ့ပတ်သတ်ပြီး... သတ်မှတ်ထားတာမှ မဟုတ်တာ" ဂျိရှောင်ယွီက အလျင်အမြန် အော်ပြောလိုက်သည်။

တစ်ချိန်တည်းမှာပင် သူမက လင်းယွမ်ဘက်သို့ လှည့်ကြည့်ကာ မေးလိုက်သည်။ "အစ်ကိုလင်း... ရှင်က ဒီလောက် အစွမ်းထက်တာကို... ကတိမဖျက်ရဘူးနော်"

"အဲ့ဒီ ဓားမြီး ပင်လယ်မြွေက တကယ်ကို ခန္ဓာကိုယ်ကြံ့ခိုင်မှု အမျိုးအစား သန္ဓေပြောင်း သားရဲပါ... ကျွန်မ လိမ်ပြောတာ မဟုတ်ဘူး"

"ဒါပေမဲ့ အဲ့ဒီအကောင်က အရမ်း အစွမ်းထက်လွန်းလို့ ရှင် သတ်လို့ မရဘူးဆိုရင်တော့... ကျွန်မကို အပြစ်လာတင်လို့ မရဘူးနော်"

လင်းယွမ်က ကြားလိုက်ရချိန်တွင် သိချင်စိတ်ဖြင့် မေးလိုက်သည်။ "ဓားမြီး ပင်လယ်မြွေလား... ဒီသန္ဓေပြောင်း သားရဲရဲ့ အသေးစိတ် အချက်အလက်တွေကို ငါ့ကို ပြောပြလို့ ရမလား"

ဂျိရှောင်ယွီက စိတ်လှုပ်ရှားစွာဖြင့် မေးလိုက်သည်။ "ဒါဆို ကျွန်မတို့ရဲ့ အပေးအယူက အတည်ပဲ မဟုတ်လား"

လင်းယွမ်က ပြုံးလိုက်သည်။ "အပေးအယူ ကိစ္စကတော့... နင်တို့ရဲ့ ခိုလှုံရေးစခန်းထဲကို ငါ့ကို အရင် ဝင်ကြည့်ခွင့်ပေးဦး"

"ငါ အမှန်အတိုင်း ပြောရရင် နင်တို့ လူဦးရေက သိပ်မများဘူးဆိုရင်... ရှောင်မောင်းတောင်ရဲ့ နေရာ တစ်ဝက်ကို နင်တို့ကို ပေးဖို့က နည်းနည်း များလွန်းမနေဘူးလား"

"ရှောင်မောင်းတောင် တစ်ခုလုံးက သိပ်မြင့်ပြီး သိပ်ကြီးတာ မဟုတ်ဘူး... နောက်ပိုင်း ငါက ဒီမှာ လူတွေ နေရာချထားပြီး ခိုလှုံရေးစခန်း တည်ဆောက်ရဦးမှာ"

"တစ်ဝက်ကို ခွဲပေးဖို့ဆိုတာ သိပ်ပြီး လက်တွေ့မကျဘူး"

ဂျိရှောင်ယွီက ချက်ချင်း မေးလိုက်သည်။ "ဒါဆိုရင် ကျွန်မတို့ကို နေရာ ဘယ်လောက် ခွဲပေးနိုင်မလဲ"

လင်းယွမ်က ပြုံးလိုက်သည်။ "နင်တို့ဆီမှာ လူဘယ်လောက် ရှိလဲဆိုတာ အရင် ပြောပြပါလား"

ဂျိရှောင်ယွီမှာ မတတ်သာဘဲ ကွမ်ယွဲ့ကိုသာ လှမ်းကြည့်လိုက်ရသည်။

ကွမ်ယွဲ့က ပြောလိုက်သည်။ "ကိုလင်းယွမ်က ဧည့်သည်ဆိုတော့... အထဲကိုအရင် ဝင်ထိုင်ပါဦး"

ပြောနေရင်းဖြင့် သူမက ဦးဆောင်ကာ လင်းယွမ်ကို သူမနောက်သို့ လိုက်ရန် ဖိတ်ခေါ်လိုက်သည်။

လင်းယွမ်က ပြုံးကာ ခေါင်းညိတ်လိုက်ပြီး သူမနောက်သို့ လိုက်ကာ ရေညှိတောထဲသို့ ပိုမို နက်ရှိုင်းစွာ ကူးခတ်သွားလေသည်။

လမ်းခရီးတွင် လင်းယွမ်က မေးလိုက်သည်။ "အမယွဲ့ ခုနက ရေညှိတောထဲမှာ ဘာလုပ်နေတာလဲ"

"ကိုလင်းယွမ်က ကျွန်မကို ကွမ်ယွဲ့လို့ပဲ ခေါ်ပါ... အမယွဲ့ဆိုတာက ရှောင်ယွီတို့လို ကလေးတွေ ခေါ်ကြတာပါ"

"ကျွန်မတို့ အခု စားလို့ရတဲ့ အရာတွေက ရေထဲက ငါးတွေ၊ ပုစွန်တွေနဲ့ ဒီရေညှိပင်တွေပဲ ရှိတော့တာ... ကုန်းပေါ်က ပစ္စည်းတွေကို အရင်က ဝူယောက်ပန်း ထိန်းချုပ်ထားတော့ ကျွန်မတို့လည်း ကုန်းပေါ်ကို မတက်ရဲကြဘူးလေ"

လင်းယွမ်က ကြားလိုက်ရချိန်တွင် ချက်ချင်းပင် နားလည်သွားခဲ့သည်။ သူတို့အတွက် စားနပ်ရိက္ခာပိုင်းတွင် အလွန် ကျပ်တည်းနေပုံရသည်။

နောက်ဆုံး ရေညှိပင်ကို ဖယ်ရှားလိုက်သည်နှင့် တစ်ပြိုင်နက် ရှေ့တွင် ချက်ချင်း ရှင်းလင်းသွားပြီး ကြီးမားသော ဈေးဝယ်စင်တာ အဆောက်အအုံကြီးတစ်ခု ပေါ်ထွက်လာခဲ့သည်။

အချို့သော သန္ဓေပြောင်းငါးများ ရေညှိတောကို ဖြတ်ကျော်ကာ ဈေးဝယ်စင်တာထဲသို့ ဝင်ရောက်လာမည်ကို ကာကွယ်ရန်အတွက် ဈေးဝယ်စင်တာ၏ ပတ်ပတ်လည်တွင် ကြိုးပိုက်ကွန်များ တပ်ဆင်ထားပြီး အဆောက်အအုံ၏ ပတ်လည်တွင် ခိုင်ခံ့စွာ တပ်ဆင်ထားသည်။

ထိုဈေးဝယ်စင်တာထဲတွင် အမှောင်ကျနေခြင်း မရှိဘဲ အတွင်းဘက်တွင် အစိမ်းရောင်၊ အဝါရောင် အလင်းတန်းများ အများအပြား လင်းလက်နေသည်။

ထို့အပြင် ရေလူသား အမျိုးအစား အစွမ်းပိုင်ရှင်များနှင့် ငါးလူသား အစွမ်းပိုင်ရှင် အများအပြားက အထဲတွင် ကူးခတ်နေကြသည်ကို မြင်တွေ့နိုင်သေးသည်။

အဝေးမှ လှမ်းကြည့်လိုက်ပါက ရေအောက်တွင် ဖွင့်လှစ်ထားသော ဈေးဝယ်စင်တာကြီး တစ်ခုနှင့်ပင် တူညီနေတော့သည်။

ဆက်ရန်...