အခန်း (၂၄၁-၂၄၂)

အခန်း ၂၄၁

- အပိုင်း ၄၅ - စားတော်ဆက်အသင်း (၅)

အိုင်းရစ် သည် ဇဝေဇဝါ ဖြစ်သွားခဲ့သည်။

အိုင်းရစ် သည် အက်စ်ဂတ် မှ နက္ခတ်တစ်ပါးနှင့် ထောက်ပံ့သူ ကတိကဝတ် ပြုလုပ်ရန် မူလက သတ်မှတ်ထားပြီးသား ဖြစ်၏။ ထိုနက္ခတ်မှာ လူသိနည်းသော အဆင့်နိမ့်နက္ခတ်တစ်ပါးသာ ဖြစ်ပြီး အိုင်းရစ် အနေဖြင့် ထိုကတိကဝတ်ကို သဘောမကျခဲ့ပေ။ ထို့ကြောင့်ပင် အိုင်းရစ်သည် အန်နာ ခရော့ဖ် ဦးစီးကျင်းပသည့် လက်ကောက် ခရီးသွားအဖွဲ့ တွင် ပါဝင်ခဲ့ခြင်း ဖြစ်သည်။ အကယ်၍ ဤနေရာတွင် သူသာ အစွမ်းပြနိုင်ခဲ့လျှင် လျာထားသော ထောက်ပံ့သူကို ပြောင်းလဲပေးနိုင်သည်ဟု အန်နာ က ပြောကြားခဲ့၏။

ယခုမူ မထင်မှတ်ထားသော နေရာတွင် အိုင်းရစ်ထံသို့ အခွင့်အရေးတစ်ခု ရောက်ရှိလာခဲ့လေပြီ။

[‘ကယ်တင်ခြင်း၏ မိစ္ဆာဘုရင်’ နက္ခတ်က သင်နှင့် ‘ထောက်ပံ့သူ ကတိကဝတ်’ တစ်ခုကို ပြုလုပ်လိုပါသည်။]

ပြန်စဉ်းစားကြည့်လျှင် နက္ခတ်များမှာ ကိုယ်စားလှယ် တစ်ဦးတည်းနှင့်သာ ကတိကဝတ်ပြုရန် မလိုပေ။ အချို့သော နက္ခတ်များသည် သူတို့၏ စွမ်းဆောင်ရည်အပေါ် မူတည်၍ ကိုယ်စားလှယ် နှစ်ဦး သို့မဟုတ် သုံးဦးအထိ ထားရှိတတ်ကြ၏။ ထိုသို့ပြုလုပ်လျှင် နက္ခတ်၏ စွမ်းအားမှာ ခွဲဝေသွားမည်ဖြစ်သောကြောင့် ကိုယ်စားလှယ်များ ရရှိမည့် အထူးစွမ်းရည် များမှာ အားနည်းသွားမည် ဖြစ်သည်။

သို့သော်ငြားလည်း အိုင်းရစ် မှာ ထိုကဲ့သို့သောအရာများကို တွန့်ဆုတ်နေနိုင်သည့် အခြေအနေတွင် မရှိပေ။

"ကျမ လက်ခံပါတယ်"

[‘ကယ်တင်ခြင်း၏ မိစ္ဆာဘုရင်’ နက္ခတ်က ဤကတိကဝတ်မှာ အချိန်အကန့်အသတ်ဖြင့်သာ ဖြစ်ကြောင်း ပြောကြားပါသည်။]

[‘ကယ်တင်ခြင်း၏ မိစ္ဆာဘုရင်’ နက္ခတ်က ဤကတိကဝတ်သည် လက်ကောက် ခရီးသွားအဖွဲ့ ပြီးဆုံးချိန်အထိသာ အကျုံးဝင်ကြောင်း ပြောကြားပါသည်။]

ယာယီကတိကဝတ် တဲ့လား...။

‘ဟုတ်တယ်၊ အခုက လောဘတက်နေရမယ့် အချိန်မဟုတ်ဘူး’

အိုင်းရစ် သည် နှုတ်ခမ်းကို တင်းတင်းစေ့လိုက်ရင်း ခေါင်းညိတ်ပြလိုက်သည်။ သို့သော် ထိုနက္ခတ်၏ စကားမှာ မပြီးသေးပေ။

[‘ကယ်တင်ခြင်း၏ မိစ္ဆာဘုရင်’ နက္ခတ်က သတ်မှတ်ချက်တစ်ခု ရှိကြောင်း ပြောကြားပါသည်။]

[ ‘ကယ်တင်ခြင်း၏ မိစ္ဆာဘုရင်’ နက္ခတ်က ဇာတ်ဝင်ခန်း ပြီးမြောက်ပြီးနောက် ရရှိမည့် ‘ဆုတောင်း’ ကို သူ့ထံသို့ လွှဲပြောင်းပေးရန် အလိုရှိပါသည်။]

အိုင်းရစ် ၏ စိတ်ထဲတွင် ရှုပ်ထွေးသွားခဲ့သည်။

ယာယီကတိကဝတ် ဖြစ်နေသည့်အပြင် ရရှိမည့် ဆုတောင်းကိုပါ သူက အလိုရှိနေ၏။ ထူးဆန်းသော နှမြောတသမှုမျိုး အိုင်းရစ်၏ ရင်ထဲတွင် ဖြစ်ပေါ်လာသော်လည်း ဤအခွင့်အရေးကို လက်လွှတ်ရန်အိုင်းရစ်ထံတွင် အင်အားမရှိပေ။ ကယ်တင်ခြင်း၏ မိစ္ဆာဘုရင် ၏ သတ်မှတ်ချက်မှာ ဇာတ်ဝင်ခန်း ပြီးမြောက်မှုအပေါ် အခြေခံထားသည်။ ထိုသတ်မှတ်ချက်မှာ ဘာပဲဖြစ်ဖြစ် သူမကို အသက်ရှင်အောင် သူ ကာကွယ်ပေးမည်ဟု အဓိပ္ပာယ်ရ၏။

"ကျမ သေချာပေါက် ပေးပါ့မယ်"

ထိုသို့ပြောလိုက်သည်နှင့် တစ်ပြိုင်နက် ဟိုလိုဂရမ် ကတိကဝတ်လွှာ တစ်ခုမှာ လေထုထဲမှ ဆင်းသက်လာသည်။ အိုင်းရစ် သည် ထိုနေရာသို့ ပြေးသွားပြီး ဟိုလိုဂရမ်ပေါ်တွင် လက်မှတ်ရေးထိုးလိုက်သည်။

[ထောက်ပံ့သူ ကတိကဝတ် ပြီးမြောက်ခဲ့ပါပြီ။]

အိုင်းရစ်၏ ခန္ဓာကိုယ်အတွင်းသို့ စွမ်းအားများ စီးဝင်လာပြီး တစ်စုံတစ်ယောက်က အိုင်းရစ်ကို ထောက်ပံ့ပေးနေသည်ဟု ခံစားလိုက်ရသည်။ ဘာမဆို လုပ်နိုင်သည်ဟုလည်း အိုင်းရစ် ကိုယ့်ကိုယ်ကိုယ် ယုံကြည်မှု ရှိလာခဲ့သည်။ သို့သော် အိုင်းရစ်၏ နောက်ကွယ်မှ ထွက်ပေါ်လာသော အော်ဟစ်သံများကြောင့် ထိုယုံကြည်မှုမှာ လျင်မြန်စွာ ပျောက်ကွယ်သွားရပြန်သည်။

[ကိုယ်စားလှယ်များအား အမဲလိုက်ခြင်း စတင်ပါပြီ။]

မကောင်းဆိုးဝါး ဝိညာဉ်များ၏ ကိုက်ဖြတ်ခြင်းကို ခံနေရသော ကိုယ်စားလှယ်များ၏ နာကျင်စွာ အော်ဟစ်သံများမှာ ပတ်ဝန်းကျင်တစ်ခုလုံးတွင် ပဲ့တင်ထပ်နေတော့သည်။

[ကျန်ရှိနေသော ခရီးသွားအဖွဲ့ဝင် အရေအတွက် - ၆ ဦး]

မူရင်းဝတ္ထုထဲတွင် ဤကစားပွဲကို ‘အမဲလိုက်ခြင်းနှင့် ခြောက်လှန့်ခြင်း’ဟု ခေါ်ဆိုကြသည်။ ဤကစားပွဲသည် စားတော်ဆက်အသင်း ၏ အစီအစဉ်မဟုတ်ဘဲ အန်နာ ခရော့ဖ် ကိုယ်တိုင် ပြုလုပ်သော အစီအစဉ်တစ်ခုသာ ဖြစ်သည်။ ယခုအကျော့တွင်မူ အန်နာ ခရော့ဖ် သည် လုပ်ငန်းစဉ်အချို့ကို ကျော်ဖြတ်ကာ စားတော်ဆက်အသင်း မှပင် တိုက်ရိုက်စတင်ရန် ဆုံးဖြတ်ခဲ့ပုံရ၏။

လေထုထဲသို့ တစ်ကိုယ်တည်း ကျနော်ရေရွတ်နေမိရာ ထုတ်လုပ်ရေး လုပ်ငန်းရှင် က ကျနော့်ကို လှမ်းမေးလိုက်သည်။

[အိုး… မင်းလည်း ပါဝင်လိုက်တာလား]

"...အကိုကြီးရော မပါဘူးလား"

[ဟားဟား…. ငါက ဒီလို ဇာတ်ဝင်ခန်းတွေနောက် ပြေးလိုက်ဖို့ အသက်ကြီးလှပြီ။ ပြီးတော့... ဒါက ငါ့အကြိုက်လည်း မဟုတ်ဘူးလေ]

အမှန်တကယ်တော့ စားတော်ဆက်အသင်းဝင်အားလုံးက ဤဇာတ်ဝင်ခန်းကို စိတ်အားထက်သန်နေကြသည်တော့ မဟုတ်ပေ။ တစ်ဖက်တွင် အန်နာ ခရော့ဖ်ကို မနှစ်သက်သော နက္ခတ်များ ရှိနေသကဲ့သို့၊ အခြားတစ်ဖက်တွင်လည်း ဤအစီအစဉ်ကိုပင် သဘောမကျသော နက္ခတ်များ ရှိနေ၏။

[အင်း။ မကောင်းဆိုးဝါး ဝိညာဉ် စာရင်းထဲမှာ မင်းရဲ့ ဘွဲ့အမည်ကို ငါမတွေ့ပါလား...]

ဤဇာတ်ဝင်ခန်းတွင် ပါဝင်မည့် နက္ခတ် ၁၅ ပါး ရှိသော်လည်း ‘မကောင်းဆိုးဝါး ဝိညာဉ်’ နေရာကို ရွေးချယ်သူမှာ ၁၄ ပါးသာ ရှိသည်။ ကျနော် ခေါင်းညိတ်ပြလိုက်သည့်အခါ ထုတ်လုပ်ရေး လုပ်ငန်းရှင် ၏ မျက်လုံးများမှာ ဖြည်းဖြည်းချင်း ဝိုင်းစက်သွားသည်။

[ဒါကြောင့်မလို့ အဖွားကြီး ပါစီဖုန်း က မင်းကို ဒီကို ခေါ်လာတာကိုး။ ဒါပေမဲ့ အဆင်ပြေပါ့မလား။ မင်းက အခုတခေါက်မှ ဒီကို ပထမဆုံး ရောက်ဖူးတာလေ...]

ကျနော်က ပြုံးလျက် ပြန်ဖြေလိုက်သည်။

"ကျနော့်ရဲ့ ပွဲဦးထွက်က ပိုပြီး တောက်ပလေလေ၊ ပိုကောင်းလေလေပေါ့"

ထိုစဉ် စောင့်ဆိုင်းနေသည့်အလား စနစ်မက်ဆေ့ချ် ရောက်ရှိလာသည်။

[‘စားတော်ဆက်အသင်း၏ မိစ္ဆာဒိဋ္ဌိ’ ဇာတ်လမ်းကို ရရှိခဲ့သည်။]

အန်နာ ခရော့ဖ် သည်လည်း ကျနော့်ထံသို့ ရောက်လာသော မက်ဆေ့ချ်နှင့် ဆင်တူသည့် အရာမျိုးကို ကြားနေရပေလိမ့်မည်။

「 နက္ခတ်များစွာ စုဝေးရာနေရာတွင် အမြဲတမ်း ဇာတ်လမ်းတစ်ပုဒ် ရှိစမြဲသာ။ 」

ဤသည်က ဇာတ်လမ်းတစ်ပုဒ် ဖန်တီးခြင်း၏ ပထမဆုံး နိယာမဖြစ်သည်။ ဇာတ်လမ်း၏ အဆင့်အတန်းမှာ ဇာတ်လမ်းအကြောင်းအရာ၏ စွန့်စားရမှုနှင့် ဇာတ်လမ်းပုံစံတို့ကို ပေါင်းစပ်ကာ သတ်မှတ်ခြင်း ဖြစ်သည်။ အန်နာ ခရော့ဖ် သည် လက်ရှိတွင် ‘ကိုယ်စားလှယ်’ တစ်ဦးဖြစ်ပြီး ကြိုးတန်းပေါ်တွင် လျှောက်လှမ်းနေသူ ဖြစ်၏။ အကယ်၍ အန်နာ ခရော့ဖ်၏ ဇာတ်ဝင်ခန်းသာ အောင်မြင်သွားပါက ‘ပထမမျိုးဆက်၏ နောက်လိုက်’ သို့မဟုတ် ‘ဇာတ်လမ်းကို ခြယ်လှယ်သူ’ ကဲ့သို့သော ဒဏ္ဍာရီလာ ဇာတ်လမ်းတစ်ပုဒ် ဖြစ်လာနိုင်သည်။

ကျနော် မျက်လုံးများကို မှိတ်လိုက်ပြီး အိုင်းရစ် ထံတွင် ဘာတွေဖြစ်ပျက်နေသည်ကို ကြည့်လိုက်သည်။

[‘ကယ်တင်ခြင်း၏ မိစ္ဆာဘုရင်’ နက္ခတ်က သူ၏ ကိုယ်စားလှယ်ကို စောင့်ကြည့်နေပါသည်။]

တုန်ရီနေသော အိုင်းရစ်၏ ပုခုံးများကို မြင်ရသည့်အခါ စိတ်မကောင်းဖြစ်မိသော်လည်း ဤကလေးမနှင့် ပတ်သက်၍ ကျနော့်တွင် ကောင်းမွန်သော အမှတ်ရစရာများ မရှိပေ။ ကျနော်သည် အိုင်းရစ်အပေါ် ကြင်နာမှုပြနိုင်လောက်အောင် စိတ်ထားကြီးသည့် လူကောင်းတစ်ယောက် မဟုတ်။ ထို့ကြောင့် ဤသည်မှာ ကျနော့်အတွက် ‘စီးပွားရေး’လုပ်သည့်ပုံစံမျိုးမျှသာ ဖြစ်သည်။

[‘ကယ်တင်ခြင်း၏ မိစ္ဆာဘုရင်’ နက္ခတ်က တည်တည်ငြိမ်ငြိမ် နေရန် ပြောပါသည်။]

အိုင်းရစ် သည် တံတွေးကို ခက်ခဲစွာ မျိုချလိုက်ပြီး ပြန်ပြော၏။

— ကျမ လုပ်နိုင်ပါ့မလား မသိဘူး။

[‘ကယ်တင်ခြင်း၏ မိစ္ဆာဘုရင်’ နက္ခတ်က မျှော်လင့်ချက်မရှိသော ဇာတ်ဝင်ခန်းဟူ၍ မရှိကြောင်း ပြောပါသည်။]

ဇာတ်ဝင်ခန်းအားလုံးတွင် လွတ်မြောက်ရာ ယိုပေါက်လေးများ ရှိစမြဲဖြစ်သည်။ ထိုယိုပေါက်မှာ အလွန်သေးငယ်လှသဖြင့် ပထမဆုံးအကြိမ်တွင် အောင်မြင်ရန် အလွန်ခက်ခဲ၏။ အကြိမ်အနည်းငယ် ကြိုးစားပြီးမှသာ အောင်မြင်နိုင်သည်ဟု အဓိပ္ပာယ်ရပြီး ကျနော်သည် ဤကမ္ဘာအကြောင်းကို မည်သူထက်မဆို ပိုသိသောသူ ဖြစ်သည်။

အဝေးမှ မကောင်းဆိုးဝါး ဝိညာဉ်များ လှုပ်ရှားလာသော အသံကို ကြားနေရသည်။ အိုင်းရစ် ၏ ကိုယ်ခန္ဓာကြံ့ခိုင်မှု မှာ အကန့်အသတ်သို့ ရောက်ရှိနေပြီး ကျနော် လွှဲပြောင်းပေးနိုင်သော တစ်ခုတည်းသော အထူးစွမ်းရည် မှာ ‘စွန့်လွှတ်အနစ်နာခံလိုသော ဆန္ဒ’သာ ရှိသည်။

ချီးပဲ။ အဲ့ဒီစွမ်းရည်က လက်ရှိ အခြေအနေအတွက် ဘာမှ အထောက်အကူမပြုနိုင်ဘူးလေ။

သို့သော် နက္ခတ်များ ပေးအပ်နိုင်သည်မှာ အထူးစွမ်းရည် များသာ မဟုတ်ပေ။

[‘ကယ်တင်ခြင်း၏ မိစ္ဆာဘုရင်’ နက္ခတ်က သူ၏ ကိုယ်စားလှယ်အား ‘လုပ်ကြံသတ်ဖြတ်သူဘုရင်၏ ဝတ်ရုံ’ ကို ပေးအပ်လိုက်ပါသည်။]

လေထုထဲတွင် ပေါ်လာသော လက်ဆောင်ကို မြင်ပြီး အိုင်းရစ် မှာ အံ့အားသင့်သွားသည်။ ထိုဝတ်ရုံမှာ ဒိုကဲဘီ အိတ် ထဲမှ ဒင်္ဂါး ၁၅၀,၀၀၀ ပေး၍ ကျနော် ဝယ်ယူထားသော ပစ္စည်းတစ်ခု ဖြစ်၏။ တစ်နေ့လျှင် မိနစ် ၃၀ သာ အသုံးပြုနိုင်သည့် ကန့်သတ်ချက် ရှိပြီး နက္ခတ်များကို လှည့်စားနိုင်စွမ်း မရှိသော်လည်း ယခု အခြေအနေကတော့ ကွဲပြားလေသည်။

[…ဒီမှာမလား]

မြက်တောထဲမှ နက္ခတ်များမှာ စောင့်ဆိုင်းနေသည့်အလား ထွက်ပေါ်လာကြသည်။ မကောင်းဆိုးဝါး ဝိညာဉ်များအဖြစ် ပြောင်းလဲသွားသော နက္ခတ်များမှာ ပုံစံအမျိုးမျိုး ရှိကြ၏။ ဧရာမ ဦးချိုပါသော မိစ္ဆာတစ်ကောင်နှင့် တံစဉ်ငယ်ကို ကိုင်ထားသော နွားခေါင်းနှင့် ဝိညာဉ်တစ်ကောင်တို့ ဖြစ်ကြလေသည်။ သူတို့၏ တူညီသောအချက်မှာ ခြေထောက်မရှိဘဲ မဟူရာ ဝတ်ရုံများကို ဝတ်ဆင်ထားခြင်း ဖြစ်၏။

[အင်း… ထူးဆန်းလိုက်တာ။ သေချာပေါက် ဒီနားမှာ ရှိနေတာပါ]

[မင်း သေချာရော မြင်လိုက်ရဲ့လား]

အိုင်းရစ် ၏ ပုံရိပ်မှာ ပျောက်ကွယ်သွားပြီး မကောင်းဆိုးဝါး ဝိညာဉ်များ ဖြစ်နေသော နက္ခတ်များမှာ အိုင်းရစ်၏ ခြေရာကို လုံးဝ မတွေ့ရှိနိုင်တော့ပေ။ မကောင်းဆိုးဝါး ဝိညာဉ် နေရာတွင် ပါဝင်နေသော နက္ခတ်များသည် ပြင်းထန်သော ကန့်သတ်ချက်များအောက်တွင် ရှိနေကြသည်။ သူတို့သည် လက်ရှိ ‘အရှိန်အဝါ’ ၏ ဆယ်ပုံတစ်ပုံကိုသာ အသုံးပြုနိုင်ကြလေသည်။

နက္ခတ်များအတွက် ကစားပွဲတစ်ခုမှာ လွယ်ကူလွန်းလျှင် ပျော်စရာမကောင်းပေ။ ပိုးကောင် ၁၅ ကောင်ကို နင်းခြေရုံနှင့် ပျော်ရွှင်မည့် လူသားမရှိသကဲ့သို့ပင်။ သူတို့သည် ဖျော်ဖြေမှုအတွက် မိမိတို့ကိုယ်ကို ကန့်သတ်ချက်များ သတ်မှတ်ရန် ဝန်မလေးကြပေ။ ဤသည်မှာ စားတော်ဆက်အသင်း ၏ နက္ခတ်များပင် ဖြစ်သည်။

[အဲ့ကောင်မလေး တစ်ခုခု လုပ်လိုက်ပုံပဲ။ အဲ့ကောင်မလေးကို နည်းနည်းလောက် ထပ်ပြေးခိုင်းထားလိုက်ဦး။ ဇာတ်ဝင်ခန်းက ပိုပြီး စုမိသွားမှ အရသာ ပိုရှိမှာ]

[...ဟားဟား။ ငါတော့ မြည်းချင်လှနေမိပြီ]

မြက်တောထဲတွင် ရှာဖွေနေသော နက္ခတ်များမှာ မကြာမီ လက်လျှော့သွားကြပြီး အိုင်းရစ် ထံသို့ စနစ်မက်ဆေ့ချ် တစ်ခု ရောက်ရှိလာသည်။

[ခရီးသွားအဖွဲ့ဝင် အိုင်းရစ် ဗလာဒီမီရိုဗ်နာ ရီဘီဇိုဗာ သည် မကောင်းဆိုးဝါး ဝိညာဉ်ထံမှ တစ်ကြိမ် ရှင်သန်နိုင်ခဲ့ပါသည်။]

[‘လက်ကောက် ခရီးသွားအဖွဲ့’ ဇာတ်လမ်း စုဆောင်းမိသွားပါပြီ။]

ဤဇာတ်ဝင်ခန်းမှာ ဂန္ထဝင်ဇာတ်လမ်းများဖြင့် ဖွဲ့စည်းထားခြင်း ဖြစ်သည်။ အိုင်းရစ် သည် ဇာတ်ဝင်ခန်းထဲတွင် ကြာကြာနေနိုင်လေလေ၊ ဂန္ထဝင်ဇာတ်လမ်း၏ စွမ်းအင်များ အိုင်းရစ်ထံသို့ ပိုမို စိမ့်ဝင်လာလေလေ ဖြစ်လိမ့်မည်။

— က... ကံကောင်းလို့ အသက်ရှင်သွားပြီ။

[‘ကယ်တင်ခြင်း၏ မိစ္ဆာဘုရင်’ နက္ခတ်က ဒီတစ်ခါတော့ သင် ကံကောင်းသွားတာဟု ပြောပါသည်။]

အကယ်၍ ဤသူများမှာ အဆင့်မြင့်နက္ခတ်များသာ ဆိုပါက လုပ်ကြံသတ်ဖြတ်သူဘုရင်၏ ဝတ်ရုံ ကို အသုံးပြု၍ ပုန်းကွယ်ရန် မဖြစ်နိုင်ပေ။ သို့သော် ပါစီဖုန်း နှင့် ထုတ်လုပ်ရေး လုပ်ငန်းရှင် တို့ကဲ့သို့ တကယ့် အဆင့်မြင့် စားတော်ဆက်အသင်း နက္ခတ်များမှာ ဤဇာတ်ဝင်ခန်းထဲသို့ ခွေးတစ်ကောင်လို ပြေးဝင်ကြမည်မဟုတ်။ အခြားနက္ခတ်များ သူတို့၏ အလိုလာဘစိတ်အား ဖွင့်ချနေသည်ကို ကြည့်ရသည်မှာလည်း စိတ်ဝင်စားစရာ ကောင်းနေလေသည်။ တစ်နည်းအားဖြင့်ဆိုသော် သူတို့သည် ကျနော် ပစ်မှတ်ထားရမည့် တကယ့် ပရိသတ်များပင် ဖြစ်၏။

— လက်ဆောင်အတွက် ကျေးဇူးတင်ပါတယ်ရှင်။

[‘ကယ်တင်ခြင်း၏ မိစ္ဆာဘုရင်’ နက္ခတ်က ထိုပစ္စည်းမှာ အငှားချပေးခြင်းသာ ဖြစ်ကြောင်း ပြောပါသည်။]

— ...ဟုတ်ကဲ့ပါ။

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က သင်၏ ကိုယ်စားလှယ်အပေါ် ကိုယ်ချင်းစာစိတ် ဖြစ်ပေါ်နေပါသည်။]

[‘ရွှေခေါင်းကွင်း၏အကျဉ်သား’ နက္ခတ်က သင်၏ ရက်စက်မှုကို အပြစ်တင်နေပါသည်။]

ဇာတ်ဝင်ခန်းသည် ယခုမှသာ စတင်ခြင်းဖြစ်ပေသည်။

ခရီးသွားအဖွဲ့ဝင် အရေအတွက်မှာ တဖြည်းဖြည်း လျော့နည်းလာသည်နှင့်အမျှ အိုင်းရစ် သည် နက္ခတ်များ၏ မျက်စိကို ရှောင်ကွင်းရင်း မီးတောင်ရှိရာသို့ ဦးတည်ရွှေ့လျားခဲ့သည်။ လမ်းခရီးတွင် သေဆုံးသွားသော အဖွဲ့ဝင်များထံမှ လက်ကောက်ကို ကောက်ယူစုဆောင်းနိုင်ခဲ့ခြင်းမှာလည်း အိုင်းရစ်အတွက် ကံကောင်းမှုတစ်ခုပင် ဖြစ်၏။

[လက်ရှိ ကျန်ရှိနေသော ခရီးသွားအဖွဲ့ဝင် အရေအတွက် - ၂ ဦး]

‘Ways of Survival’ ကို အချိန်နှင့်တစ်ပြေးညီ ဖတ်ရှုရင်း ဤဇာတ်ဝင်ခန်းတွင် ကျနော် ပါဝင်နေခြင်းဖြစ်သည်။ ‘Ways of Survival’ ထဲတွင် ဤဇာတ်ဝင်ခန်း၏ မူလပုံစံဖြစ်သော ‘မကောင်းဆိုးဝါးလက်ကောက်’ အကြောင်းကို အလွန်အသေးစိတ် မှတ်တမ်းတင်ထားလေ၏။

ကျနော်သည် ဇာတ်ဝင်ခန်းမြေပုံကို အသုံးပြု၍ မြေမျက်နှာသွင်ပြင်ကို ခွဲခြမ်းစိတ်ဖြာပြီးနောက် အိုင်းရစ် ကို မီးတောင်ဆီသို့ အထိရောက်ဆုံး လမ်းကြောင်းအတိုင်း ရွှေ့လျားစေခဲ့သည်။

[ဟားဟား၊ ဒါ တကယ့်ကို ပျော်စရာကောင်းတဲ့ ဇာတ်လမ်းပဲ။ ဒီမှာ အရသာရှိတဲ့ စားစရာတွေ အများကြီး ရှိနေတာ မဟုတ်လား။ ငါတော့ တံတွေးတောင် ထွက်လာပြီ...]

အခြားနက္ခတ်များမှာ ‘ခရီးသွားအဖွဲ့’ ဘက်တွင် တစ်စုံတစ်ယောက်က ပါဝင်ပတ်သက်နေသည်ကို သတိပြုမိသွားကြပုံရသည်။ သို့သော်ငြားလည်း သူတို့ထဲမှ မည်သူမျှ ထိတ်လန့်ခြင်း မရှိကြပေ။

[ခရီးသွားအဖွဲ့ဝင် ‘မာဗက်စ် လူတီးယား’ သေဆုံးပါပြီ။]

မကြာမီမှာပင် အိုင်းရစ် တစ်ယောက်တည်းသာ ကျန်ရှိတော့သည်။

[...အရသာရှိမယ့် အနံ့လေး ရနေတယ်]

အရပ်ရပ်သို့ ပျံ့နှံ့နေသော မကောင်းဆိုးဝါး ဝိညာဉ်များမှာ မီးတောင်အနီးသို့ စုရုံးလာကြသည်။ နောက်ဆုံးကျန်ရှိသော ခရီးသွားအဖွဲ့ဝင်သည် မီးတောင်သို့ လာရမည်ကို သူတို့ သိထားကြသည်။ ယခုဆိုလျှင် လုပ်ကြံသတ်ဖြတ်သူဘုရင်၏ ဝတ်ရုံ အသုံးပြုနိုင်သည့် အချိန်မှာ ကုန်ဆုံးလုနီးပါး ဖြစ်နေလေပြီ။ ကျနော် အိုင်းရစ် ထံသို့ အချက်ပြလိုက်သည်။

[‘ကယ်တင်ခြင်း၏ မိစ္ဆာဘုရင်’ နက္ခတ်က ယခု စတင်လိုက်တော့ရန် ပြောပါသည်။]

အိုင်းရစ် သည် မီးတောင်ဆီသို့ အရှိန်အဟုန်ဖြင့် ပြေးထွက်သွား၏။ ပြေးလွှားနေသော ထိုမိန်းကလေး၏ ကျောပြင်ကို ကျနော် စိုက်ကြည့်နေမိသည်။ စားတော်ဆက်အသင်း ရှိ နက္ခတ်အားလုံးမှာလည်း အစွမ်းကုန် ပြေးလွှားနေသော ထိုမိန်းကလေးငယ်ကို စောင့်ကြည့်နေကြသည်။

ဤမိန်းကလေးသည် ဤနေရာတွင် သေဆုံးရုံမှတစ်ပါး အခြားလမ်းမရှိဆိုသည်ကို သူတို့အားလုံး သိထားကြပေလိမ့်မည်။

"အာ..."

မီးတောင်နှင့် ခြေလှမ်း ၁၀၀ အကွာသို့ ရောက်သောအခါ လုပ်ကြံသတ်ဖြတ်သူဘုရင်၏ ဝတ်ရုံ ၏ အစွမ်းမှာ နောက်ဆုံးတွင် ကုန်ဆုံးသွားခဲ့သည်။ ပတ်ဝန်းကျင်တွင် လှည့်လည်နေသော မကောင်းဆိုးဝါး ဝိညာဉ် ၁၀ ကောင်မှာ ချက်ချင်းဆိုသလိုပင် စုရုံးရောက်ရှိလာကြ၏။

[ငါ အရင် စားမယ်]

အိုင်းရစ် သည် ပြေးဝင်လာသော မကောင်းဆိုးဝါး ဝိညာဉ်များကို ကြည့်ရင်း ထိတ်လန့်တကြား နောက်သို့ ဆုတ်သွားမိသည်။ အိုင်းရစ်၏ နောက်ဆုံး မျှော်လင့်ချက်မဲ့သော အကြည့်မှာ ကောင်းကင်ယံဆီသို့ ဦးတည်နေသည်။

[‘ကယ်တင်ခြင်း၏ မိစ္ဆာဘုရင်’ နက္ခတ်က သင်၏ ကိုယ်စားလှယ်ခန္ဓာကိုယ်ကို ခေတ္တငှားရမ်းရန် တောင်းဆိုပါသည်။]

အိုင်းရစ် သည် ပါးစပ်အဟောင်းသားဖြင့် အသက်ရှူမှားသွားခဲ့သည်။

[‘ကယ်တင်ခြင်း၏ မိစ္ဆာဘုရင်’ နက္ခတ်က ဤသည်မှာ ‘ဆင်းသက်ခြင်း’မျိုး မဟုတ်ကြောင်း ပြောပါသည်။]

အကယ်၍ ကျနော်က ‘ဆင်းသက်ခြင်း’ ပုံစံဖြင့် ကိုယ်ထင်ပြမည်ဆိုပါက ကျနော်သည်လည်း ဇာတ်ဝင်ခန်း၏ ကန့်သတ်မှုကို ခံရပေလိမ့်မည်။ ထို့ကြောင့် ဤအကြိမ်တွင် ကျနော်သည် ‘ဆင်းသက်ခြင်း’ ကို အသုံးမပြုလိုပေ။

ကျနော့်တွင် ပို၍ ထိရောက်ပြီး ဖြစ်နိုင်စွမ်း ကို လျော့နည်းစေသည့် စွမ်းရည်တစ်ခု ရှိ၏။ ကျနော်သည် မိမိကိုယ်ကိုယ် ပြင်းထန်သော ထိုးနှက်ချက်တစ်ခု ပေးရန်အတွက် ကျနော့်ကိုယ်စားလှယ် ခန္ဓာကိုယ်ကို ဖွဲ့စည်းထားသော ဇာတ်လမ်းအချို့ကို ရည်ရွယ်ချက်ရှိရှိ ဆွဲထုတ်လိုက်သည်။

[သီးသန့်စွမ်းရည် ‘အနှိုင်းမဲ့စာဖတ်သူ၏ရှုထောင့် အဆင့် ၃’ အသက်ဝင်ပါပြီ။]

[‘အရံဇာတ်ကောင်အနေဖြင့်ကိုယ်တိုင်တွေ့မြင်ရသောရှုထောင့်’ အသက်ဝင်လာပါပြီ။]

[‘အိုင်းရစ် ဗလာဒီမီရိုဗ်နာ ရီဘီဇိုဗာ’ အပေါ် သင်၏ နားလည်နိုင်စွမ်း မြင့်တက်လာပါသည်။]

အိုင်းရစ် ၏ ရှုထောင့်မှနေ၍ မျက်လုံးများကို ကျနော် ဖွင့်ကြည့်လိုက်သည်။ စားတော်ဆက်အသင်း ရှိ ကျနော့်၏ ခန္ဓာကိုယ်မှာ လက်ရှိတွင် အိပ်မောကျနေပေလိမ့်မည်။ ထို့ကြောင့် ဤကစားပွဲကို အတိုတောင်းဆုံး အချိန်အတွင်း အဆုံးသတ်ရမည်ဖြစ်သည်။

[နက္ခတ်အချို့က သင်၏ တည်ရှိမှုကို သတိပြုမိသွားပါပြီ။]

တစ်ချိန်တည်းမှာပင် ကျနော့်ထံသို့ အစစ်အမှန်အသံများ စုပြုံရောက်ရှိလာသည်။

[ကောင်မလေးကို ကူညီနေတဲ့သူ ရှိနေတာပဲ။ မင်းက ဘယ်သူလဲ]

[အို… ဒါက ဆင်းသက်ခြင်းလား]

[ဒါက တကယ်ကိုမမျှော်လင့်ထားတာပဲ]

အိုင်းရစ် သည် စုဆောင်းထားသော ဇာတ်လမ်းများကို လက်ခံရရှိလိုက်ပြီး အိုင်းရစ်၏ ခန္ဓာကိုယ်မှာ ရွှေရောင်များ တောက်ပလာသည်။ ကျနော်သည် မိမိကိုယ်မိမိ ပြန်လည်ငုံ့ကြည့်ရင်း ခါးသက်စွာ ရယ်မောလိုက်မိသည်။

စားတော်ဆက်အသင်း သို့ အသစ်ဝင်ရောက်လာသူတစ်ဦးအတွက် နည်းလမ်းတစ်ခုမှာ အဆင့်ဆင့် ကြီးထွားလာရန် ဖြစ်သည်။ သို့သော် ကျနော်သာ ထိုကဲ့သို့ အချိန်ဆွဲနေမည်ဆိုပါက အခန်းပေါင်း ၃,၀၀၀ ကျော်ပြီးသည်အထိ ဇာတ်လမ်း၏ အဆုံးသတ်သို့ ရောက်ရှိနိုင်မည်မဟုတ်ပေ။

[ဟို အန်နာ ဆိုတဲ့ ကောင်မလေး တစ်ခုခု ကြံစည်ထားတာလား။ အခုလေးတင် ငါသတ်လိုက်တဲ့သူက ဓါးသခင် တစ်ယောက်ပဲ]

အဝေးမှ လမ်းလျှောက်လာသော နက္ခတ်တစ်ပါးက သူ၏ လက်ထဲမှ ကိုယ်စားလှယ်ကို ပစ်ချလိုက်ရင်း ပြောလိုက်သည်။ သူသည် နောက်ဆုံး သေဆုံးသွားသော ခရီးသွားအဖွဲ့ဝင် ဖြစ်ပေလိမ့်မည်။

[မင်းက လူသစ်တစ်ယောက်နဲ့ တူတယ်။ ဒီနေရာကနေ ထွက်သွားတာ မင်းအတွက် အကောင်းဆုံး ဖြစ်လိမ့်မယ်။ မဟုတ်ရင် မင်းရဲ့ ခန္ဓာကိုယ်က ပြင်းထန်တဲ့ ထိုးနှက်ချက်တစ်ခု ရသွားလိမ့်မယ်]

သေဆုံးသွားသော ခရီးသွားအဖွဲ့ဝင်၏ ဦးခေါင်းမှာ ကျနော့်ထံသို့ လိမ့်လာခဲ့သည်။ ထိုဦးခေါင်းမှာ အဆုံးအထိ ထွက်ပြေးခဲ့သော်လည်း နောက်ဆုံးတွင် မရှင်သန်နိုင်ခဲ့သော ကိုယ်စားလှယ်၏ ဦးခေါင်းပင်။ ကျနော် ထိုဦးခေါင်းကို ဂရုတစိုက် ကောက်ယူလိုက်သည့်အခါ နက္ခတ်တစ်ပါးက လှောင်ပြောင်လိုက်သည်။

[မင်းက သူ့ကို သနားနေတာလား။ ဟားဟား... ဒီကောင်က အနုပညာကို နားမလည်ပါလား]

"ဘာဖြစ်လို့ သူတို့ရဲ့ အသက်တွေက မင်းတို့အတွက် အနုပညာ ဖြစ်နေရတာလဲ"

ကျနော် သူ၏ ဦးခေါင်းကို ပွတ်သပ်ပေးလိုက်သည့်အခါ သေဆုံးသွားသော ကိုယ်စားလှယ်၏ အမှတ်တရများ စီးဝင်လာသည်။ ထိုအမှတ်တရများသည် မကြာမီ ကျနော့်လက်ချောင်းထိပ်များတွင် တည်ရှိနေသော ဇာတ်လမ်းတစ်ပုဒ် ဖြစ်လာခဲ့သည်။

[‘ရက်စက်စွာ သတ်ဖြတ်ခံရသော ဓါးသခင်၏ ရန်ငြိုး’ ဇာတ်လမ်း အစိတ်အပိုင်းတစ်ခုကို ရရှိခဲ့ပါသည်။]

နက္ခတ်များမှာ မျက်မှောင်ကြုတ်လျက် နောက်သို့ ဆုတ်သွားကြသည်။

[...မင်းက ညစ်ပတ်တဲ့ ဇာတ်လမ်းတွေကိုမှ ကြိုက်တာကိုး]

"ညစ်ပတ်တယ် ဟုတ်လား။ ဒါကို မင်းတို့ပဲ ငါ့ကို ပေးခဲ့တာလေ"

အဘယ်ကြောင့် ဤလူသည် ဓါးသခင် တစ်ဦး အလွယ်တကူ ဖြစ်လာခဲ့သနည်း။ ရိုးရှင်းပါသည်။ မူလက သူသည် နက္ခတ်တစ်ပါးထံမှ ထိုစွမ်းအားကို ရရှိခဲ့သောကြောင့် ဖြစ်၏။

"ဇာတ်လမ်းက ပျင်းစရာကောင်းတယ်။ ဇာတ်ဝင်ခန်းက နှေးလွန်းနေတယ်။ ဒါက မင်းတို့အားလုံး သူတို့ကို ပေးခဲ့တဲ့ စွမ်းအားတွေပဲ"

ရရှိခဲ့သောအရာများမှာ စုစည်းလာခဲ့သည်။ တစ်စုံတစ်ယောက်က ဓါးသခင် ဖြစ်လာသည်။ တစ်စုံတစ်ယောက်က မဟာမှော်ဆရာ ဖြစ်လာသည်။ ထို့နောက် ဓါးသခင်နှင့် မဟာမှော်ဆရာတို့သည် အပြစ်သားများ ဖြစ်လာကြ၏။ သူတို့အားလုံးသည် ဤသတ္တဝါများ၏ သားကောင်များ ဖြစ်လာခဲ့ကြသည်။

[မင်း ဘာလုပ်ဖို့ ကြိုးစားနေတာလဲ။ အဲဒါကို စားနေတာ ရပ်လိုက်စမ်း]

စိတ်မြန်သော နက္ခတ်တစ်ပါးက မကောင်းဆိုးဝါး ဝိညာဉ်၏ စွမ်းအားကို မြှင့်တင်လိုက်သည်။ အိုင်းရစ်သည် မူလက သူတို့ကို အနိုင်မယူနိုင်ခဲ့ပေ။ ခရီးသွားအဖွဲ့သည် မကောင်းဆိုးဝါး ဝိညာဉ်များကို မည်သည့်အခါမျှ အနိုင်မရနိုင်။ သို့သော်—

မကောင်းဆိုးဝါး ဝိညာဉ်သည် တောက်လောင်နေသော ဓါးကြောင့် အော်ဟစ်ကာ နောက်သို့ ဆုတ်သွားခဲ့သည်။

[အား]

ကျနော့်လက်ထဲတွင် ရှိနေသည်မှာ လုပ်ကြံသတ်ဖြတ်သူဘုရင်၏ ဝတ်ရုံ နှင့်အတူ ဝယ်ယူခဲ့သော ဓါးပင် ဖြစ်သည်။

[ပစ္စည်း အချက်အလက်]

အမည်

‘အီအိုရန်၏ ဓါး’ (အတု)

အဆင့်

SS+ (သတ်မှတ်ထားသော ဇာတ်ဝင်ခန်းများတွင်သာ သုံးနိုင်မည်)

ဖော်ပြချက်

ပထမမျိုးဆက် ဇာတ်လမ်းမှ စွမ်းအင်များ ဖြည့်သွင်းထားသော ဓါးဖြစ်သည်။ အမျိုးသမီး ကိုယ်စားလှယ်များသာ အသုံးပြုနိုင်ပြီး မကောင်းဆိုးဝါး ဝိညာဉ်များကို ၁၀ မိနစ်ကြာ တွန်းလှန်နိုင်သည့် စွမ်းအားကို ထုတ်ပေးနိုင်သည်။

ဤဓါးမှာ ဒင်္ဂါး ၂၀၀,၀၀၀ ကုန်ကျသော ဓါးတစ်လက် ဖြစ်သည်။ ဤဇာတ်ဝင်ခန်းမှလွဲ၍ အခြားနေရာတွင် အသုံးမဝင်သော ဓါးလည်း ဖြစ်၏။ ပုံမှန်ဆိုလျှင် ကျနော် မည်သည့်အခါမျှ ဝယ်ယူမည့် ပစ္စည်းမဟုတ်ပေ။

[...ပထမမျိုးဆက် ဓါးလား]

[ဟေး၊ မကြောက်ကြနဲ့! ဒါက အတုပဲ]

အမှန်တော့ ကျနော် တကယ့်ကို စိုးရိမ်ခဲ့မိသည်။

[နက္ခတ်အများအပြားသည် သင်၏ လုပ်ရပ်ကြောင့် အံ့အားသင့်နေကြပါသည်။]

ဤဇာတ်ဝင်ခန်းအတွက် ဤမျှလောက်အထိ စွန့်စားရကျိုး နပ်ပါ့မလားဟု ကျနော် တွေးတောခဲ့မိသည်။ ထိုမှတစ်ဆင့် ကျနော် ဘာတွေရနိုင်မလဲဆိုသည်ကို တွက်ချက်ခဲ့သည်။

[စားတော်ဆက်အသင်း ၏ အဖွဲ့ဝင်အချို့မှာ သင့်အပေါ် ပြင်းထန်သော ရန်လိုမှုများ ပြသနေကြပါသည်။]

အချို့သောအရာများကို တွက်ချက်သင့်ပြီး အချို့ကိုမူ မတွက်ချက်သင့်ပေ။ ထို့နောက် ကျနော် ရွေးချယ်မှုတစ်ခု ပြုလုပ်လိုက်သည်။

"ငါ မီးတောင်ဆီကို လာမယ်ဆိုတာ မင်းတို့ သိထားကြတယ်ပေါ့လေ"

ကျနော် အရာရာကို တွက်ချက်မနေတော့ရန် ဆုံးဖြတ်လိုက်သည်။

"ဒါဆိုရင် မင်းတို့ ဒီမှာ စုဝေးနေကြလိမ့်မယ်ဆိုတာကို ငါလည်း သိထားတယ်ဆိုတာကို မင်းတို့ရော သိရဲ့လား"

မည်ကဲ့သို့သော ပြစ်ဒဏ်များ ခံရသည်ဖြစ်စေ၊ ပြိုင်ဘက်များမှာ နက္ခတ်များ ဖြစ်နေသည်ဖြစ်စေ။ ကျနော် ဂရုမစိုက်နိုင်တော့ပေ။ သို့သော်ငြားလည်း ကျနော်သည် ထုံးစံအတိုင်း ပြုံးလိုက်သည်။

"တကယ့် အမဲလိုက်ခြင်းကို စတင်လိုက်ကြရအောင်"

အခန်း ၂၄၂

- အပိုင်း ၄၅ - စားတော်ဆက်အသင်း (၆)

နက္ခတ် ၁၀ ပါးမှာ ဤနေရာတွင် စုရုံးနေကြသည်။ ကျန်ရှိသော နက္ခတ် ၄ ပါးမှာ မည်သည့်နေရာသို့ ရောက်ရှိနေသည်ကို မသိရသော်လည်း ဇာတ်ဝင်ခန်း နယ်မြေ၏ တစ်နေရာရာတွင် ပျံ့နှံ့နေကြခြင်း ဖြစ်ပေလိမ့်မည်။

[မင်းသာ အလျှော့မပေးရင်]

[မင်းကိုပါ ငါတို့ စားပစ်မယ်]

နက္ခတ်များ၏ အစစ်အမှန်အသံများသည် မကောင်းဆိုးဝါး ဝိညာဉ်များ၏ ပါးစပ်မှတစ်ဆင့် စီးထွက်လာသည်။ ကျနော် တုံ့ဆိုင်းမနေဘဲ ဓါးထဲသို့ မှော်စွမ်းအင်များ ထည့်သွင်းလိုက်သည်။

[သီးသန့်စွမ်းရည် ‘အသန့်စင်ဆုံးဓါးစွမ်းအင် အဆင့် ၈’ အသက်ဝင်လာပါပြီ။]

ထိုစွမ်းအင်မှာ ကျနော်၏စွမ်းအင်မဟုတ်ဘဲ အိုင်းရစ် ၏ မှော်စွမ်းအင် ဖြစ်သည်။ သို့သော်ငြားလည်း အိုင်းရစ် မှာ ဤနေရာအထိ ရောက်အောင်လာနိုင်ခဲ့သော ကိုယ်စားလှယ် ဖြစ်သဖြင့် အိုင်းရစ်၏ အလားအလာမှာ အတော်အတန် မြင့်မားလှသည်။ အဖြူရောင် စွမ်းအင်များမှာ အီအိုရန်၏ ဓါး ထဲသို့ ပေါင်းစပ်သွားပြီး ပတ်ပတ်လည်ရှိ အရှိန်အဝါများမှာလည်း ပိုမို အားကောင်းလာခဲ့သည်။

အီအိုရန်၏ ဓါး သည် မကောင်းဆိုးဝါး ဝိညာဉ်များကို ၁၀ မိနစ်ကြာ ပြင်းထန်သော ထိုးနှက်ချက် ပေးနိုင်သည့် လက်နက်ဖြစ်သည်။ သို့သော် စွမ်းအားကြီးသော လက်နက်ရှိရုံနှင့် ဤနေရာကို စိုးမိုးနိုင်မည်ဟု မဆိုလိုပေ။

နက္ခတ်တစ်ပါးက ကျနော့်ဓါးကို ကြည့်ပြီး ရယ်မောလိုက်သည်။

[ဟားဟား၊ ဖြည်းဖြည်းလုပ်ပါ။ နက္ခတ်အငယ်လေးရာ။ ဒီလူကြီးတွေကို ဖျော်ဖြေပေးစမ်းပါဦး]

[ဘယ်က လူကြီးလဲ။ ငါ သက်တမ်း ၅၀၀ တောင် မပြည့်သေးဘူး။ ငါတို့ထက် ကြီးတဲ့သူတွေ အများကြီး ရှိပါသေးတယ်]

မိန်းကလေးငယ်တစ်ဦး၏ ခန္ဓာကိုယ်ထဲတွင် ပထမဆုံးအကြိမ် ရောက်ရှိနေခြင်းကြောင့် ဖြစ်ပေလိမ့်မည်။ ကျနော် လွှဲယမ်းလိုက်သော ဓါးချက်မှာ လေထုထဲတွင် ကိုးရိုးကားယား လမ်းကြောင်းအတိုင်းသာ ထွက်ပေါ်လာသည်။

နက္ခတ်များသည် သူတို့၏ စွမ်းအားအားလုံးကို အသုံးမပြုနိုင်သော်လည်း နက္ခတ်ဆိုသည်မှာ နက္ခတ်ပင် ဖြစ်သည်။ နက္ခတ်တို့မှာ ဒဏ္ဍာရီလာအဆင့် မှသည် အဆင့်နိမ့်နက္ခတ်များအထိ အမျိုးမျိုး ရှိကြသည်။

မကောင်းဆိုးဝါး ဝိညာဉ်များအဖြစ် စုရုံးနေကြသော နက္ခတ်များသည် သူတို့၏ အရှိန်အဝါကို ထုတ်ဖော်လိုက်ကြသည်။ နက္ခတ် ၁၀ ပါးက သူတို့၏ စွမ်းအင်များကို ထုတ်လွှတ်လိုက်သည့်အခါ အိုင်းရစ် ၏ လှုပ်ရှားမှုများမှာ စတင် တောင့်တင်းလာခဲ့သည်။ အိုင်းရစ်၏ ခန္ဓာကိုယ်မှာ မမြင်ရသော ပင့်ကူအိမ်ထဲတွင် ပိတ်မိနေသကဲ့သို့ ရုန်းကန်နေရသည်။ အိုင်းရစ်ကို ထောင်ချောက်ဆင်ထားသော ပင့်ကူများမှာလည်း နီးကပ်လာနေပြီ ဖြစ်သည်။

ကျနော့်အလိုကို ဆန့်ကျင်ပြီး တုန်ရီနေသော အိုင်းရစ် ၏ ခန္ဓာကိုယ်ကို ကြည့်ရင်း ကျနော် နှုတ်ခမ်းကို တင်းတင်းစေ့လိုက်သည်။ အမြဲတမ်း ဤသို့ပင် ဖြစ်ခဲ့သော်လည်း ဤတစ်ကြိမ်တွင်တော့ ကွဲပြားရပေမည်။

[ငါ့ကို အထင်မသေးနဲ့။ ငါကလည်း နက္ခတ်တစ်ပါးပဲ]

ယခုအချိန်အထိ ကျနော်သည် ကျနော့်၏ အရှိန်အဝါကို ကောင်းမွန်စွာ ထုတ်ဖော်နိုင်ခဲ့ခြင်း မရှိပေ။ နတ်ဆိုးနယ်မြေ ဇာတ်ဝင်ခန်းတစ်လျှောက်တွင်လည်း ဒဏ်ရာများဖြင့်သာ တိုက်ခိုက်ခဲ့ရသည်။ သို့သော် စားတော်ဆက်အသင်း ၏ ဝေါယာဉ်ကို စီးနင်းလာစဉ်အတွင်း ကျနော့်၏ ဇာတ်လမ်းများကို မှန်မှန် ပြန်လည်ကုစားနိုင်ခဲ့သည်။ ထို့ကြောင့် ၁၀၀ ရာခိုင်နှုန်း အပြည့်အဝ မဟုတ်သော်လည်း ၁၀၀ ရာခိုင်နှုန်းနှင့် နီးစပ်သော ‘အရှိန်အဝါ’ ကို ကျနော် အသုံးပြုနိုင်၏။

[နက္ခတ်၏ ‘အရှိန်အဝါ’ ကို ထုတ်ဖော်လိုက်ပါသည်။]

ကျနော့်၏ ဇာတ်လမ်းအချို့မှာ အခြေအနေကို စတင် တုံ့ပြန်လာကြသည်။

[ဒဏ္ဍာရီလာအဆင့် ဇာတ်လမ်း ‘စားတော်ဆက်အသင်း၏ မိစ္ဆာဒိဋ္ဌိ’သည် ပတ်ဝန်းကျင်မှ ဖိနှိပ်မှုများကို ပြန်လည် တွန်းလှန်နေပါသည်။]

[ဒဏ္ဍာရီလာအဆင့် ဇာတ်လမ်း ‘ကယ်တင်ခြင်း၏ မိစ္ဆာဘုရင်’ သည် ကိုယ်စားလှယ် အိုင်းရစ် ၏ အခြေအနေကို တုံ့ပြန်နေပါသည်။]

ပတ်ဝန်းကျင်ရှိ မြေပြင်မှာ ကျယ်လောင်သော အသံနှင့်အတူ အက်ကွဲသွားပြီး အနီးနားရှိ တောအုပ်မှာလည်း တုန်ခါသွားခဲ့သည်။ ထိုနယ်မြေအတွင်း စီးဆင်းလာသော လျှပ်စစ်မီးပွားများကြောင့် နက္ခတ်များမှာ အံ့အားသင့်သွားကြသည်။

ဤဇာတ်ဝင်ခန်းတွင် ဆင်းသက်လာသော နက္ခတ်များသည် သူတို့စွမ်းအား၏ ၁၀ ရာခိုင်နှုန်းကိုသာ အသုံးပြုနိုင်သည်။ အခြားတစ်ဖက်တွင်မူ ကျနော်သည် ‘ဆင်းသက်ခြင်း’ အစား ‘အနှိုင်းမဲ့စာဖတ်သူ၏ရှုထောင့်’ ကို အသုံးပြုထားခြင်း ဖြစ်သဖြင့် ကျနော့်၏ မူလအရှိန်အဝါကို ထုတ်ဖော်နိုင်ခြင်း ဖြစ်သည်။

[လူသစ်တစ်ယောက်က ဘယ်လိုလုပ် ဒီလောက်အထိ အရှိန်အဝါ ကြီးမားနေရတာလဲ]

[... ‘ဆင်းသက်ခြင်း’လုပ်ထားတာကိုတောင် အခုလိုအရှိန်အဝါ ထုတ်နိုင်နေတာလား]

နက္ခတ်များသည် ဤအချက်ကို မသိရှိကြဘဲ ထိတ်လန့်လုနီးပါး ဖြစ်သွားကြသည်။ သူတို့သည် လက်ရှိအရှိန်အဝါကို ကျနော့်၏ မူလအင်အား၏ ၁၀ ရာခိုင်နှုန်းဟု မှားယွင်းထင်မှတ်နေကြခြင်း ဖြစ်သည်။ ထိုကဲ့သို့ထင်နေရအောင်လည်း ကျနော် မိမိကိုယ်မိမိ ပြင်းထန်စွာ ဖိအားပေးနေရခြင်း ဖြစ်သည်။

[သေမလား၊ ဒီကနေ ထွက်သွားမလား။ တစ်ခုခုကို ရွေးလိုက်စမ်း]

သူတို့၏ အထင်အမြင်မှားမှု မကုန်ဆုံးမီ ကျနော် သူတို့ကို နှိမ်နင်းရမည်။

[မ...မအေဘေး...]

[...ကြယ်တာရာ ရုပ်သံထုတ်လွှင့်မှု က တကယ်ကို ကျယ်ပြောတာပဲ။ ဒီလိုကောင်မျိုး ဘယ်ကနေ ပေါ်လာတာလဲ]

နက္ခတ်အချို့မှာ ကျနော် ထုတ်လွှတ်လိုက်သော ဖိအားကြောင့် နောက်သို့ တွန့်ဆုတ်သွားကြသော်လည်း အချို့မှာမူ စိတ်အားထက်သန်မှုများ တောက်လောင်လာကြသည်။

[ဟားဟားဟား။ အကောင်းဆုံး ဟင်းလျာပဲ။ ဒီနေ့ စားတော်ဆက်အသင်း ပွဲတော်ကတော့ အကောင်းဆုံးပဲဟေ့]

နက္ခတ်များသည် ကြောက်မက်ဖွယ်ကောင်းသော အော်ဟစ်သံများကို ထုတ်လွှတ်လိုက်ပြီး မကောင်းဆိုးဝါး ဝိညာဉ်များ၏ လက်တံများမှာ ကျနော့်ဘက်သို့ ဆန့်ထွက်လာခဲ့သည်။ ကျနော် အလျင်အမြန် နောက်သို့ ဆုတ်ကာ ဓါးကို လွှဲယမ်းလိုက်သော်လည်း ပြေးဝင်လာသော လက်တံများကို ဖြတ်တောက်နိုင်ခြင်း မရှိပေ။ အိုင်းရစ် ၏ အသံကို ကျနော့်ခေါင်းထဲတွင် ကြားလိုက်ရ၏။

‘တ... တောင်းပန်ပါတယ်။ ကျမက ဓါးရေးမှာ တကယ် ညံ့လို့ပါ...’

ချီး။

ဤအချက်ကြောင့် ကျနော့်၏ လှုပ်ရှားမှုများမှာ ဤသို့ ဖြစ်နေရခြင်း ဖြစ်သည်။ အိုင်းရစ် ဒဏ်ရာရရှိသွားသည်နှင့်အမျှ သွေးများ စီးကျလာခဲ့သည်။ ကျနော့် လှုပ်ရှားမှုများမှတစ်ဆင့် သူတို့ တစ်စုံတစ်ခုကို သိရှိသွားကြသလား။ နက္ခတ်များ၏ အရှိန်အဟုန်မှာ ပြောင်းလဲသွားသည်။

[...တစ်ခုခုတော့ ထူးဆန်းနေတယ်]

နက္ခတ်များသည် ပျံ့နှံ့သွားကြပြီး မကောင်းဆိုးဝါး ဝိညာဉ်များ၏ ခန္ဓာကိုယ်ကို အသုံးပြုကာ ကွက်ကျား တိုက်ခိုက်မှုများကို ပြုလုပ်လာကြသည်။ ကျနော် ဓါးကို လွှဲယမ်းကာ ကာကွယ်ရန် ကြိုးစားသော်လည်း အိုင်းရစ် ၏ ဓါးရေးစွမ်းရည်မှာ အလွန်နိမ့်ကျလွန်းနေသဖြင့် မလွယ်ကူလှပေ။

ရလဒ်မှာ ယူဂျွန်ဟော့ ၏ ခန္ဓာကိုယ်ထဲတွင် ရှိစဉ်ကနှင့် အတော်ပင် ကွဲပြားလှသည်။ ယူဂျွန်ဟော့ မှာ မည်မျှအထိ တော်သနည်းဆိုသည်ကို ကျနော် နောက်တစ်ကြိမ် ထပ်မံ သိရှိလိုက်ရသည်။

[ဟုတ်ပြီ။ ဒီကောင့်ရဲ့ အရှိန်အဝါပဲ မြင့်မားနေတာ။ သူ့ကို အရင် ရှင်းပစ်ကြ]

[ဓါးအတွက် စိတ်ပူနေစရာ မလိုတော့ဘူး။ ဟားဟားဟား၊ ဒီနေ့တော့ ငါတို့ အဝစားရတော့မယ်!]

ကျနော် ဘယ်လိုနည်းနှင့်မဆို ရှောင်လွှဲချင်ခဲ့သော အဆိုးရွားဆုံး အခြေအနေမှာ ဆိုက်ရောက်လာခဲ့ပြီ။ မကောင်းဆိုးဝါး ဝိညာဉ်များ၏ တိုက်ခိုက်မှုများမှာ အရပ်မျက်နှာ အနှံ့မှ ပျံသန်းလာသည်။ ကျနော့် ခြေထောက်ကို ပွတ်တိုက်သွားသော တံစဉ်ငယ် တစ်ခု ရှိနေသလို၊ ကျနော့်ကျောပြင်ကို ပစ်မှတ်ထားသော Bumerang(ဘွန်မရန်) တစ်ခုမှာလည်း ဝဲပျံနေသည်။ လှံရှည် တစ်လက်မှာ ဟာကွက်ကို ဖောက်ထွက်လာပြီး ကျနော့် နံဘေးကို ထိုးနှက်လိုက်၏။ တစ်မိနစ်မပြည့်မီမှာပင် အိုင်းရစ် ၏ ခန္ဓာကိုယ်မှာ ဒဏ်ရာများနှင့် အညိုမမည်းစွဲမှုများဖြင့် ဖုံးလွှမ်းသွားခဲ့သည်။

ကျနော့်၏ ကိုယ်ခန္ဓာကြံ့ခိုင်မှု မှာ လျင်မြန်စွာ ကျဆင်းနေသည်။ ကျနော် အလျင်အမြန် စာမှတ် နှင့် လေ၏လမ်းစဉ် တို့ကို ဖွင့်လိုက်သော်လည်း အိုင်းရစ် ၏ ခန္ဓာကိုယ်တွင်မူ အသားမကျသကဲ့သို့ ခံစားရသည်။ နောက်ဆုံးတွင် ကျနော့်၏ ခြေလှမ်းများမှာ ယိုင်နဲ့သွားပြီး လမ်းပျောက်သကဲ့သို့ ဖြစ်သွားခဲ့သည်။ နက္ခတ်များသည် ထိုဟာကွက်လေးကို အခွင့်ကောင်းယူကာ ကျနော့်ထံသို့ သူတို့၏ လက်တံများကို ဆန့်ထုတ်လိုက်ကြသည်။

"အု..."

အိုင်းရစ် မှာ လည်ပင်းကို အဖမ်းခံလိုက်ရပြီး လေထဲတွင် ခိုကိုးရာမဲ့စွာ တွဲလောင်း ဖြစ်သွားခဲ့သည်။

[မင်း ကံမကောင်းဘူးပဲ။ လူသစ်လေး]

နက္ခတ်များသည် အရာရာ ပြီးဆုံးသွားပြီဟု ယူဆကာ သူတို့၏ ပါးစပ်များကို ဖွင့်လိုက်ကြသည်။

[အစာစားချိန် ရောက်ပြီ]

ကြောက်မက်ဖွယ်ကောင်းသော အစွယ်များ ထွက်ပေါ်လာပြီး သူတို့၏ ပါးစပ်မှ အစာခြေရည်များ စီးကျလာ၏။ သူတို့သည် မကောင်းဆိုးဝါး ဝိညာဉ်များ၏ အသွင်အပြင်ကို စိတ်ကြိုက် ပြုပြင်နိုင်ကြသဖြင့် ထိုမြင်ကွင်းမှာ တကယ့်ကို အဆိုးရွားဆုံး မြင်ကွင်းပင် ဖြစ်သည်။

ကျနော်သည် တွန့်ဆုတ်ခြင်းမရှိဘဲ ပြောလိုက်သည်။

"ပဉ္စမမြောက် စာမှတ် ကို အသက်သွင်းမယ်"

အမှန်တကယ်တော့ ဤစွမ်းရည်ကို ဤနေရာတွင် အသုံးမပြုချင်ခဲ့ပေ။ အိုင်းရစ် ၏ ခန္ဓာကိုယ်က တောင့်ခံနိုင်ပါ့မလားဟူသော သံသယအပြင် ဖြစ်နိုင်စွမ်း ကိုလည်း အလွန်အကျွံ မကုန်ဆုံးစေလိုသောကြောင့် ဖြစ်သည်။ သို့သော်ငြားလည်း အခြားရွေးချယ်စရာ လမ်းမရှိတော့ပေ။

[ပဉ္စမမြောက် စာမှတ် အသက်ဝင်လာပါပြီ။]

စာမှတ် အသက်ဝင်သွားသည့် ခဏမှာပင် မျှော်လင့်မထားသော စနစ်မက်ဆေ့ချ်တစ်ခု ရောက်ရှိလာခဲ့သည်။

[ဤစွမ်းရည်သည် ဤပုဂ္ဂိုလ်နှင့် သင့်လျော်ခြင်း မရှိပါ။]

[သီးသန့်စွမ်းရည် ‘သေးငယ်စေခြင်း’ ကို ပယ်ဖျက်လိုက်ပါသည်။]

[သီးသန့်စွမ်းရည် ‘လျှပ်စစ်ဓာတ် အားဖြည့်ခြင်း’ ကို ပယ်ဖျက်လိုက်ပါသည်။]

လျှပ်စစ်မီးပွားများ ထွက်ပေါ်လာသည့် အသံနှင့်အတူ စာမှတ် ၏ စွမ်းအားများ ပျောက်ကွယ်သွားခဲ့သည်။ တစ်ခါတစ်ရံတွင် စွမ်းရည်တစ်ခုသည် ခန္ဓာကိုယ်၏ ဓာတ်ခံနှင့် ကိုက်ညီမှုမရှိတတ်ပေ။ သို့သော် အဘယ်ကြောင့် ယခုကဲ့သို့ အရေးကြီးသည့်အချိန်မှ ဖြစ်ရသနည်း။ ကျနော် လုံးဝ မျှော်လင့်မထားခဲ့မိချေ။

[ဒါက မင်းရဲ့ နောက်ဆုံး ရုန်းကန်မှုလား။ အေးလေ၊ ကြိုးစားကြည့်စမ်းပါဦး]

လှောင်ပြောင်သံနှင့်အတူ မကောင်းဆိုးဝါး ဝိညာဉ်၏ ပါးစပ်ထဲမှ ရှည်လျားသော လျှာတစ်ချောင်း ထွက်ပေါ်လာပြီး အိုင်းရစ် ၏ လည်ပင်းကို စတင် ရစ်ပတ်ညှစ်ထုတ်လေသည်။ ကျနော့်၏ အသက်ရှူလမ်းကြောင်းမှာ ပိတ်ဆို့သွားပြီး မျက်နှာမှာလည်း ပြာနှမ်းလာခဲ့သည်။ အိုင်းရစ် ၏ အသိစိတ်မှာ ဝေဝါးလာသည်ကို ခံစားနေရသည်။ အနှိုင်းမဲ့စာဖတ်သူ၏ရှုထောင့် နှင့် ဆက်သွယ်မှုမှာလည်း အားနည်းလာနေပြီ ဖြစ်သည်။

[ဝိသေသ လက္ခဏာ ၏ အကျိုးသက်ရောက်မှုကြောင့် သင်၏ စဉ်းစားဆင်ခြင်နိုင်စွမ်း မြန်ဆန်လာပါသည်။]

ဤအကျပ်အတည်းအတွင်း အတွေးပေါင်းများစွာ ကျနော့်ခေါင်းထဲတွင် ဖြတ်သန်းသွားပြီးနောက် တစ်စုံတစ်ခုကို ဖမ်းဆွဲမိလိုက်သည်။

...ထိုသို့လုပ်လိုက်ပါက ဖြစ်နိုင်ပါ့မလား ကျနော် မသိပေ။ ဇာတ်ကောင်အပေါ် ကျနော့်၏ နားလည်နိုင်စွမ်းမှာလည်း နိမ့်ပါးနေဆဲပင်။ သို့သော် ကျနော် ကြိုးစားကြည့်လို့တော့ ရသည်။

"ဆဋ္ဌမမြောက် စာမှတ် ကနေ တော်လှန်ရေးသမား စစ်သူကြီး မာ့ခ် ဟာဗီယာ ကို ဖယ်ရှားမယ်"

ကျနော်သည် ကျနော့်၏ ‘အရှိန်အဝါ’ ကို အစွမ်းကုန် ထုတ်လွှတ်လိုက်ပြီး နက္ခတ်များ၏ ဖမ်းဆီးထားမှုမှ ချက်ချင်း ရုန်းထွက်လိုက်သည်။ ထို့နောက် ဆက်လက်၍ - "အဲဒီနေရာမှာ ‘ကောင်းကင်ဖြိုခွင်းဓါးသူတော်စင်’ နမ်ဂွန်မင်းယောင်း ကို ထည့်သွင်းမယ်"

[ဆဋ္ဌမမြောက် စာမှတ် အသက်ဝင်ပါပြီ။]

ကြီးမားလှသော တည်ရှိမှုတစ်ခုသည် ကျနော့်အတွင်းသို့ စိမ့်ဝင်လာခဲ့သည်။ ကျနော် ဖတ်ခဲ့ဖူးသမျှ၊ ခံစားခဲ့ဖူးသမျှနှင့် တွေ့ကြုံခဲ့ဖူးသမျှ အရာအားလုံးမှာ တစ်ခုတည်းအဖြစ် ပေါင်းစည်းသွားကာ ခန္ဓာကိုယ်အတွင်း အခြေချသွားသကဲ့သို့ ခံစားလိုက်ရသည်။

[ဤပုဂ္ဂိုလ်အပေါ် သင်၏ နားလည်နိုင်စွမ်း မလုံလောက်ပါ။]

ကိုင်ရီယော့စ် ရော့ဒ်ဂရိမ် ကို ပထမဆုံးအကြိမ် အသုံးပြုခဲ့စဉ်ကကဲ့သို့ ခံစားချက်မျိုးပင်။

[ဘာ... ဘာလဲဟ...]

[...ဒါက ဘယ်လို စွမ်းအားမျိုးလဲ]

စားတော်ဆက်အသင်း ရှိ နက္ခတ်များ၏ မျက်လုံးထဲတွင် အံ့အားသင့်မှုများ ပြည့်နှက်သွားခဲ့သည်။

[ဇာတ်ကောင်၏ အဆင့်မှာ မြင့်မားလွန်းသဖြင့် စွမ်းရည်အဆင့်ကို အပြည့်အဝ ဖော်ဆောင်နိုင်ခြင်း မရှိပါ။]

[ဇာတ်ကောင်၏ အဆင့်မှာ မြင့်မားလွန်းသဖြင့် စွမ်းရည်၏ အစိတ်အပိုင်းတစ်ခုကိုသာ အသက်သွင်းနိုင်ပါသည်။]

[ဇာတ်ကောင်အပေါ် နားလည်နိုင်စွမ်း နိမ့်ပါးမှုကြောင့် စာမှတ် ၏ တည်မြဲချိန် လျော့နည်းသွားပါသည်။]

မူလ ‘ကောင်းကင်ဖြိုခွင်းဓါးသိုင်း’ မှာ အမျိုးသမီးများသာ အသုံးပြုနိုင်သော စွမ်းရည်ဖြစ်သည်။ ယူဂျွန်ဟော့က ထိုအချက်ကို ကြိုးစားအားထုတ်မှုဖြင့် ကျော်လွှားခဲ့သော်လည်း ကျနော့်အတွက်မူ ကျော်လွှားဖို့က အကျိုးအကြောင်းမဆီလျော်လှပေ။

[သင်၏ လက်ရှိ ခန္ဓာကိုယ် ဖွဲ့စည်းပုံမှာ သက်ဆိုင်ရာ ဇာတ်ကောင်၏ ရုပ်ပိုင်းဆိုင်ရာ ဖွဲ့စည်းပုံနှင့် ဆင်တူနေပါသည်။]

တိတိကျကျ ပြောရလျှင် ကျနော့်၏ မူလခန္ဓာကိုယ်နှင့်သာဆိုပါက ဤသည်မှာ မည်သို့မျှ ဖြစ်နိုင်လိမ့်မည် မဟုတ်။

[သီးသန့်စွမ်းရည် ‘ကောင်းကင်ဖြိုခွင်းဓါးသိုင်း’ အဆင့် ၁၀ (+၁) အသက်ဝင်လာပါပြီ။]

ကောင်းကင်ယံမှ မိုးကြိုးများ ကျဆင်းလာပြီး အီအိုရန်၏ ဓါး ဆီသို့ စီးဝင်သွားခဲ့သည်။ ကျနော်သည် အသင့်တော်ဆုံး အချိန်တွင် အမြင့်ဆုံးသော စွမ်းအားကို ထုတ်လွှတ်လိုက်၏။ နက္ခတ်များမှာ အခြေအနေကို သတိမပြုမိခင်မှာပင် အရာအားလုံး ပြီးဆုံးသွားခဲ့ပြီ ဖြစ်သည်။

[သီးသန့်စွမ်းရည် ‘ကောင်းကင်ဖြိုခွင်းမိုးကြိုးဓါး’ အဆင့် ၁၀ (+၁) အသက်ဝင်လာပါပြီ။]

ကမ္ဘာမြေကို တုန်ဟိန်းစေနိုင်သော အပြာရောင် မိုးကြိုးများသည် ကောင်းကင်ယံမှ ကျဆင်းလာပြီး ပတ်ဝန်းကျင်ရှိ အရာအားလုံးကို ထိုးနှက်လိုက်သည်။ ‘Ways of Survival’ ထဲမှ စာသားများမှာ ကျနော့်ခေါင်းထဲသို့ ဖြတ်သန်းသွားခဲ့သည်။

「 သိုင်းလောကသားများသည် ‘ကောင်းကင်ဖြိုခွင်း ဓါးသူတော်စင်’ကို မဟာဆရာကြီး ၁၀ ပါးထဲမှ တစ်ဦးအဖြစ် မသတ်မှတ်ကြပေ။ 」

မကောင်းဆိုးဝါး ဝိညာဉ်များ၏ ခန္ဓာကိုယ်မှာ အော်ဟစ်ချိန်ပင် မရဘဲ ပြာအဖြစ်သို့ ကြေပျက်သွားခဲ့သည်။

「 သိုင်းလောကသားများသည် ‘ကောင်းကင်ဖြိုခွင်း ဓါးသူတော်စင်’ကို ကပ်ဘေးတစ်ခုကဲ့သို့သာ သတ်မှတ်ကြသည်။ 」

သာမန်လူသားတစ်ဦးအဖြစ် မွေးဖွားလာပြီးနောက် ပြင်းပြသော ကြိုးစားအားထုတ်မှုဖြင့် နက္ခတ်များကို ရင်ဆိုင်နိုင်သူ။ ဤသည်မှာ သိုင်းလောက၏ ကပ်ဘေးတစ်ခုဖြစ်သော ‘ကောင်းကင်ဖြိုခွင်းဓါးသူတော်စင်’ ၏ အစွမ်းပင် ဖြစ်သည်။

[ဤစွမ်းရည်သည် ကိုယ်စားလှယ်ခန္ဓာကိုယ်၏ အရည်အချင်းထက် ကျော်လွန်နေပါသည်။]

သွေးများ စီးကျလာသည်နှင့်အမျှ တစ်စုံတစ်ခု လွဲချော်သွားသကဲ့သို့ ကျနော် ခံစားလိုက်ရသည်။ ရလဒ်မှာ ထင်ရှားလှသည်။ ကျနော်နှင့် အိုင်းရစ် တို့မှာ အဆင့်ကျော်လွန်ခြင်း ကို ရောက်ရှိထားသူများ မဟုတ်သဖြင့် ဤသည်မှာ မထိန်းချုပ်နိုင်သော စွမ်းအားမျိုးပင်။ ကောင်းကင်ယံမှာ လျှပ်စစ်ဓာတ်အား ပြတ်တောက်သွားသကဲ့သို့ မှိတ်တုတ်မှိတ်တုတ် ဖြစ်သွားခဲ့သည်။ တောက်ပသော မိုးကြိုးလျှပ်စီးများ ပျောက်ကွယ်သွားသည့်အခါ ပတ်ဝန်းကျင်တွင် မကောင်းဆိုးဝါး ဝိညာဉ် တစ်ကောင်မျှ ကျန်ရှိမနေတော့ပေ။

[ ‘ရဲတင်းသော ရွှံ့နွံသားရဲ’ နက္ခတ်သည် ဇာတ်ဝင်ခန်းအတွင်းမှ ဖယ်ရှားခြင်း ခံရပါသည်။]

[‘ငြိမ်သက်သောကျွန်း၏ စားတော်ဆက်’ နက္ခတ်သည် ဇာတ်ဝင်ခန်းအတွင်းမှ ဖယ်ရှားခြင်း ခံရပါသည်။]

[‘မေ့လျော့ခံ မနာလိုမှုအရှင်’ နက္ခတ်သည် ဇာတ်ဝင်ခန်းအတွင်းမှ ဖယ်ရှားခြင်း ခံရပါသည်။]

...

[စုစုပေါင်း နက္ခတ် ၁၀ ပါး ဇာတ်ဝင်ခန်းအတွင်းမှ ဖယ်ရှားခြင်း ခံရပါသည်။]

[သင်သည် ယုံကြည်နိုင်ဖွယ်မရှိသော အောင်မြင်မှုတစ်ခုကို ရရှိခဲ့သည်။]

[မဖြစ်နိုင်သော စွမ်းဆောင်ချက်များကို ဆက်တိုက်ဆိုသလို လုပ်ဆောင်နိုင်ခဲ့သည်။]

ကျနော် မောဟိုက်စွာဖြင့် ကောင်းကင်ယံကို မော့ကြည့်လိုက်မိသည်။

[ကြယ်တာရာ ရုပ်သံထုတ်လွှင့်မှု က သင်၏ အောင်မြင်မှုများကို အာရုံစိုက်နေပါသည်။]

[သင့်အတွက် ဇာတ်လမ်းအသစ်တစ်ပုဒ်ကို ပြင်ဆင်နေပါသည်။]

နက္ခတ်များ၏ အရှိန်အဝါမှာ အလွန်အမင်း ကန့်သတ်ခံထားရသည် ဖြစ်စေ၊ သူတို့သည် ကိုယ်စားလှယ်များကို သတ်ဖြတ်နိုင်သူများ ဖြစ်ကြသည်။ ထို့ကြောင့် ဤစွမ်းဆောင်ချက်အတွက် ကျနော် ဇာတ်လမ်းတစ်ပုဒ် ရရှိမည်မှာ မလွဲဧကန်ပင်။

ကျနော့်၏ ပါးစပ်၊ နားနှင့် နှာခေါင်းတို့မှ သွေးများ စုပြုံထွက်လာခဲ့သည်။ ခန္ဓာကိုယ်ရှိ အပေါက်များမှ သွေးများ ယိုစီးကျလာပြီး ကျနော်သည်လည်း ထိုသွေးညှီနံ့ကို ယဉ်ပါးနေပြီ ဖြစ်သည်။ ကံကောင်းထောက်မစွာဖြင့် စားတော်ဆက်အသင်း က ခွင့်ပြုထားသော ဖြစ်နိုင်စွမ်း ကြောင့် ကျနော် တောင့်ခံနိုင်ခဲ့သည်။

ကျနော်သည် အိုင်းရစ် ၏ ပျက်စီးနေသော ခန္ဓာကိုယ်ကို ဇာတ်လမ်း အစိတ်အပိုင်းများဖြင့် ပြန်လည် ဖာထေးပေးလိုက်သည်။ ‘ကောင်းကင်ဖြိုခွင်းဓါးသူတော်စင်’ ၏ နည်းစနစ်ကြောင့် ဖြစ်ပေါ်လာသော တုန်ခါမှုမှာ အိုင်းရစ် ၏ အသိစိတ်ကို ပျောက်ကွယ်သွားစေခဲ့ပြီ ဖြစ်သည်။

[စားတော်ဆက်အသင်း မှ နက္ခတ်များသည် ဤဇာတ်ဝင်ခန်း၏ အကြောင်းအရာကြောင့် အံ့အားသင့်နေကြပါသည်။]

[စားတော်ဆက်အသင်း မှ နက္ခတ်အချို့မှာ သင့်အပေါ် ရန်လိုလာကြပါသည်။]

ကျနော် အမုန်းခံရမည်ကို သိထားပြီးသားပင်။ သို့သော် တစ်ခုကို ဆုံးရှုံးလိုက်ရတိုင်း တစ်ခုခုကို အမြဲတမ်း ပြန်လည်ရရှိတတ်စမြဲ ဖြစ်လေသည်။

[စားတော်ဆက်အသင်း မှ နက္ခတ်အချို့မှာ သင်၏ ဇာတ်လမ်းကို အလွန် စိတ်ဝင်စားနေကြပါသည်။]

[စားတော်ဆက်အသင်း မှ နက္ခတ်အချို့မှာ သင့်အပေါ် သဘောကျ နှစ်သက်နေကြပါသည်။]

ကျနော်သည် အိုင်းရစ် ၏ ခန္ဓာကိုယ်ကို တွဲကူလျက် ယိုင်နဲ့စွာဖြင့် မီးတောင်ရှိရာသို့ ဦးတည်ခဲ့သည်။ ဤဇာတ်ဝင်ခန်း ပြီးဆုံးသွားသည်နှင့် အိုင်းရစ် မှာ အသက်ရှင်လွတ်မြောက်နိုင်မည် ဖြစ်သည်။ ဇာတ်ဝင်ခန်းကို အောင်မြင်စွာ အဆုံးသတ်နိုင်ရန်အတွက် ကျနော်သည် လက်ကောက်ကို မီးတောင်ချော်ရည်များထဲသို့ ပစ်ထည့်ရမည် ဖြစ်သည်။

သွားရမည့် ခရီးမှာ သိပ်မဝေးတော့ပါ။ ခြေလှမ်း ၄၀၊ ခြေလှမ်း ၃၀၊ ခြေလှမ်း ၂၀...။

ချော်ရည်များနှင့် နီးကပ်လာသည်နှင့်အမျှ ကျနော့်မျက်နှာမှာ ပူလောင်လာခဲ့သည်။ လက်ကောက်ကို ပစ်ချနိုင်မည့် ကမ်းပါးထိပ်သို့ ရောက်ရှိရန် ရှင်းလင်းနေဆဲမှာပင် တစ်စုံတစ်ယောက်၏ တည်ရှိမှုကို ကျနော် ခံစားလိုက်ရသည်။ သူတို့ ယခုအချိန်တွင် ပေါ်လာလိမ့်မည်ဟု ကျနော် တွေးဆထားပြီးသားဖြစ်၏။ ကျနော် သုတ်သင်ရန် ကျန်ရှိနေသေးသော မကောင်းဆိုးဝါး ဝိညာဉ် လေးကောင် ရှိနေသေးသည် မဟုတ်ပေလော။

[ကယ်တင်ခြင်း၏ မိစ္ဆာဘုရင်။ မင်း တကယ်ကို စိတ်ဝင်စားစရာကောင်းတာတွေ လုပ်နေတာပဲ]

ရင်းနှီးနေသော အသံမှာ ကျနော့်နားထဲသို့ တိုးဝင်လာသဖြင့် အီအိုရန်၏ ဓါး ကို တင်းတင်းကြပ်ကြပ် ဆုပ်ကိုင်လိုက်မိသည်။ ကျနော် နောက်သို့ လှည့်ကြည့်လိုက်သည့်အခါ ရင်းနှီးသော ပုံရိပ်နှင့် မိန်းကလေးတစ်ဦး ရပ်နေသည်ကို တွေ့လိုက်ရသည်။ ထိုမိန်းကလေးမှာ မကောင်းဆိုးဝါး ဝိညာဉ် တစ်ကောင် ဖြစ်နေသော်လည်း မူလရုပ်သွင်မှာမူ လုံးဝ ပြောင်းလဲသွားခြင်း မရှိပေ။

ကျနော် ပါးစပ်ကို ဖွင့်ကာ ပြောလိုက်သည်။

"အက်စ်မိုးဒီအက်စ်"

အက်စ်မိုးဒီအက်စ် မှာ သူ၏အမည်ကို ခေါ်ဝေါ်ခြင်း ခံရသည့်အတွက် ကျေနပ်ပီတိဖြစ်နေသကဲ့သို့ ပျော်ရွှင်နေပုံရသည်။

[...အာ…. မင်းကို ငါ ထပ်ပြီး ခေါ်ပါရစေဦး]

သူသည် ယူဂျွန်ဟော့ ၏ ခန္ဓာကိုယ်ကို ထိခိုက်အောင် လုပ်ခဲ့သူဖြစ်ပြီး တတိယမြောက် အကြိမ်မြောက် ရှင်သန်မှု ကျရှုံးရခြင်း၏ အဓိက တရားခံလည်း ဖြစ်သည်။

အက်စ်မိုးဒီအက်စ် ၏ အရှိန်အဝါမှာ တဖြည်းဖြည်း နီးကပ်လာသည်ကို ကျနော် ခံစားနေရသည်။ အရှိန်အဝါမှာ စွမ်းအား၏ ၁၀ ရာခိုင်နှုန်းမျှသာ ဖြစ်သော်လည်း မျှော်လင့်ထားသည့်အတိုင်းပင် မိစ္ဆာဘုရင် ၇၂ ပါးထဲမှ တစ်ပါးဖြစ်သဖြင့် သူ၏ အဆင့်အတန်းမှာ အခြားသော နက္ခတ်များနှင့် လုံးဝ ကွဲပြားခြားနားလှသည်။

ကျနော် နောက်သို့ တစ်လှမ်းဆုတ်ကာ ပတ်ဝန်းကျင်ကို သတိကြီးစွာဖြင့် စောင့်ကြည့်လိုက်သည်။ အခြေအနေမှာ ခက်ခဲနေဆဲပင်။ ဤကောင်ကို ဖယ်ရှားနိုင်လျှင်တောင်မှ နောက်ထပ် မကောင်းဆိုးဝါး ဝိညာဉ် သုံးကောင် ကျန်ရှိနေသေး၏။ အကယ်၍ သူတို့ပါ ရောက်လာမည်ဆိုပါက ကျနော့်အတွက် အနိုင်ရရန် အခွင့်အရေး လုံးဝ ရှိတော့မည်မဟုတ်။ ထို့ကြောင့် ၎င်းတို့ မရောက်လာမီ...။

[အရမ်း သတိကြီးနဲ့မနေစမ်းပါနဲ့။ တခြား နက္ခတ်တွေ မရှိတော့ပါဘူး]

ပြုံးနေသော အက်စ်မိုးဒီအက်စ် ၏ လက်ငယ်လေးများထဲတွင် ဦးခေါင်းငယ် သုံးလုံးမှာ တွဲလောင်း အခွဲခံထားရသည်။ ဖြတ်တောက်ထားသော ဦးခေါင်းများ၏ ပတ်ပတ်လည်တွင် မဟူရာ ဝတ်ရုံမှာ လွင့်ပျံနေသည်။ ၎င်းတို့မှာ ကိုယ်စားလှယ်များ၏ ဦးခေါင်းများ မဟုတ်ကြပေ။

ကျနော့်၏ ခြေဖျားများမှတစ်ဆင့် ချမ်းစိမ့်စိမ့် ခံစားချက်မှာ တဖြည်းဖြည်း တက်လာခဲ့သည်။ ဤခဏအတွင်းမှာပင် ‘Ways of Survival’ ထဲ၌ အက်စ်မိုးဒီအက်စ် ကို အဘယ်ကြောင့် အရူးတစ်ယောက်အဖြစ် ဖော်ပြထားသနည်းဆိုသည်ကို ကျနော် နားလည်သွားခဲ့သည်။ နက္ခတ်များ၏ သွေးများ စွန်းပေနေသော အက်စ်မိုးဒီအက်စ် ၏ မျက်နှာပေါ်တွင် အေးစက်သော အပြုံးတစ်ခု ရှိနေခဲ့သည်။

[ငါ သူတို့ အားလုံးကို ဝါးမြိုလိုက်ပြီ]