အခန်း (၇၃-၇၄)

အခန်း (၇၃) ဟင်းလင်းပြင်နတ်ဘုရားနယ်ပယ် လား....အဲ့ဒါက အမှိုက်နဲ့ ဘာကွာလို့လဲ

ဤစကားကို ကြားသောအခါ ရှားရွှမ်ယွမ်နှင့် နေလနတ်ဘုရားအင်ပါယာမှ တခြားသူများသည် နောက်တစ်ကြိမ် အံ့အားသင့်သွားကြ၏။

ဘာလဲ....

ခုံးဝူတောက်က မြောက်ပိုင်းလျှန်နယ်မြေကို လုံးဝငြိမ်းချမ်းသွားစေဖို့ စစ်သားတစ်သိန်းခွဲပဲ လိုအပ်တာလား....

ဒါပေမယ့် မြောက်ပိုင်းလျှန်နယ်မြေက သူပုန်စစ်တပ်မှာ အင်အားလေးသိန်းတောင် ရှိတာလေ...

ဤမျှကြီးမားသော အရေအတွက် ကွာဟချက်ဖြင့် ခုံးဝူတောက်သည် ဤပုန်ကန်မှုများအားလုံးကို အမှန်တကယ် ဖိနှိပ်နိုင်မည်လော...

ဤအချိန်အခိုက်အတန့်တွင် ခုံးဝူတောက်၏အသံသည် နောက်တစ်ကြိမ် ပဲ့တင်ထပ်လာလေ၏။

"ဒါပေမယ့်... ဒီနတ်ဘုရားသားတော်က အရင်ဆုံး ရှင်းရှင်းလင်းလင်း ပြောထားရမယ်...ငါ လှုပ်ရှားပြီးရင် ငါ တောင်းဆိုမယ့် ဆုလာဘ်က အရမ်း မြင့်မားလိမ့်မယ်..."

ဤစကားကို ကြားသောအခါ ရှားရွှမ်ယွမ် က အသက်ပြင်းပြင်း တစ်ချက်ရှိုက်လိုက်ပြီး ရိုသေလေးစားစွာ ပြောဆိုသည်။

"သေချာတာပေါ့... ငါတို့ရဲ့ နတ်ဘုရား အင်ပါယာက လုပ်နိုင်တဲ့ အရာတစ်ခု ဖြစ်နေသရွေ့... အရှင်နတ်ဘုရားသားတော်အတွက် အောင်မြင်ပြီးမြောက်အောင် ငါတို့က အစွမ်းကုန် ကြိုးစားပါ့မယ်..."

နောက်ထပ် ရွေးချယ်မှုများ အကြိမ်အနည်းငယ်ခန့် ပြုလုပ်ပြီးနောက်...

ခုံးဝူတောက်သည် စစ်သားငါးသိန်းအနက် လက်ရွေးစင်များထဲမှ လက်ရွေးစင်စစ်သား တစ်သိန်းခွဲကို အောင်မြင်စွာ ရွေးချယ်နိုင်ခဲ့သည်။

ဤစစ်တပ်သည် အတွေ့အကြုံရင့် စစ်သားဟောင်းများဖြင့် ဖွဲ့စည်းထားပြီး အနိမ့်ဆုံး ကျင့်ကြံခြင်းမှာ နတ်ဘုရားဘုရင်နယ်ပယ် အဆင့်တစ်ပင်။

သူတို့သည် သူ၏ တိုက်ပွဲဝင် နည်းဗျူဟာများ ဖွဲ့စည်းပုံများနှင့် ပေါင်းစပ်ရန် လွယ်ကူရုံသာမက...

သူတို့သည် သူ၏အမိန့်များကို ပို၍လုံ့လဝီရိယရှိစွာ နာခံကြပေလိမ့်မည်။

ဤသည်မှာ စစ်မှန်သော တပ်မှူးတစ်ဦး လိုအပ်သော စစ်တပ်ပင်။

တော်ဝင်မြို့တော်တွင် စစ်တပ်ကြီးသည် သံမဏိမြင်းများ ရွှေလှံများဖြင့် အသင့်အနေအထားတွင် ရှိနေပြီး စစ်ပွဲအလံများ လူးလွန့်နေကာ ရှေးဟောင်းစစ်သင်္ဘောများသည် လေထဲတွင် ဆိုင်းငံ့နေလေ၏။

စစ်တပ်၏ရှေ့တွင် ခုံးဝူတောက်သည် လေတိုက်ခတ်မှုကို ဆန့်ကျင်၍ မတ်တတ်ရပ်ကာ ကျယ်လောင်စွာ ပြောဆိုလိုက်သည်။

"ဒီတိုက်ပွဲမှာ... မင်းတို့ အသက်ရှင်ချင်တယ်ဆိုရင်... မင်းတို့ အနိုင်ရချင်တယ်ဆိုရင်... မင်းတို့ လုပ်ရမယ့် အရာတစ်ခုပဲ ရှိတယ်... အဲ့ဒါက ဘယ်လိုတန်ကြေးမျိုးပဲ ပေးရပါစေ ငါ့ရဲ့ အမိန့်တွေကို နာခံဖို့ပဲ..."

"နားလည်လား..."

"နားလည်ပါတယ်..."

နေလနတ်ဘုရားအင်ပါယာ၏ စစ်တပ်သည် လောကကြီးကို တုန်ခါစေသော အသံတစ်သံ ဖန်တီးကာ တညီတညွတ်တည်း တုံ့ပြန်လိုက်ကြသည်။

ခုံးဝူတောက်သည် သူတို့၏ နေလနတ်ဘုရားအင်ပါယာမှ လူတစ်ယောက် မဟုတ်သော်လည်း....

သူတို့သည် အရူးများ မဟုတ်ကြပေ။

သူတို့၏အရှင်သခင်မှ သူ့အပေါ် ရိုသေလေးစားသော အပြုအမူမှနေ၍ တွေ့မြင်နိုင်သည်မှာ...

တစ်ဖက်လူ၏အထောက်အထားနှင့် အဆင့်အတန်းသည် သူတို့၏စိတ်ကူးယဉ်တွေးတောနိုင်မှုထက် များစွာပို၍ ကြောက်မက်ဖွယ်ကောင်းနေကြောင်းပင်။

ထို့ပြင် တစ်ဖက်လူသည် ငယ်ရွယ်ပုံပေါက်သော်လည်း သူ၏ခန္ဓာကိုယ်မှနေ၍ တိုက်ပွဲများစွာကို ဖြတ်သန်းခဲ့ရသကဲ့သို့ အေးစက်သော သတ်ဖြတ်ခြင်း အရှိန်အဝါတစ်ရပ်ကို ထုတ်လွှတ်ထားသည်။

"အရမ်းကောင်းတယ်... ထွက်ခွာမယ်..."

ဝုန်း...

ချက်ချင်းဆိုသလိုပင် ရက်စက်ကြမ်းကြုတ်သားရဲများ ဟိန်းဟောက်ပြီး နတ်ဘုရားငှက်များက အော်ဟစ်လိုက်ကြသည်။

သွေးစွန်းနေသော မရေမတွက်နိုင်သည့် စစ်သင်္ဘောများသည် လေထဲသို့ ပျံတက်သွားပြီး ဟင်းလင်းပြင်နယ်ပယ် လမ်းကြောင်းထဲသို့ ဒီရေလှိုင်းတစ်ခုအလား ဝင်ရောက်သွားသည်။

မြောက်ပိုင်းလျှန်နယ်မြေ...

နေလနတ်ဘုရားအင်ပါယာက မြောက်ပိုင်းလျှန်နယ်မြေသို့ စေလွှတ်လိုက်သော စစ်သားသုံးသိန်း သုတ်သင်ခံလိုက်ရသည်နှင့်အမျှ...

ချူထျန် ဦးဆောင်သော သူပုန် စစ်တပ်သည် ဓားပူတစ်လက်က ထောပတ်ကို ဖြတ်သန်းသွားသည့်အလား တိုးတက်လာခဲ့သည်။

သူတို့သည် မြောက်ပိုင်းလျှန်နယ်မြေတွင် ကျန်ရှိနေသော နေလနတ်ဘုရားအင်ပါယာစစ်တပ်ကို ဆောင်းဦးရွက်ကြွေများကို တံမြက်လှည်းသကဲ့သို့ ရှင်းလင်းလိုက်ကြသည်။

ယခု ချူထျန်တွင် လက်ရွေးစင်စစ်သား နှစ်သိန်းခွဲ ရှိရုံသာမက သေမင်းကင်းလွတ်စစ်သားတစ်သိန်းခွဲလည်း ရှိနေလေပြီ။

လက်ရှိတွင် မြောက်ပိုင်းလျှန်နယ်မြေ၌ နောက်ဆုံး အမာခံစခန်းတစ်ခုသာ ကျန်ရှိတော့သည်။

စစ်တပ်၏ရှေ့တွင် မတ်တတ်ရပ်နေသော ချူထျန်သည် ခွန်အားများ ပြည့်ဝနေပြီး သူသည် ယခင်ကထက်ပို၍ပင် ကိုယ့်ကိုယ်ကိုယ် စိတ်ကျေနပ်နေပုံရသည်။

"ဟား ဟား ဟား... ဒီနောက်ဆုံးအမာခံစခန်းကို ငါ သိမ်းပိုက်ပြီးသွားတာနဲ့ နေလနတ်ဘုရားအင်ပါယာရဲ့ မြောက်ပိုင်းလျှန်နယ်မြေ တစ်ခုလုံးက ငါ့ရဲ့ထိန်းချုပ်မှုအောက်ကို လုံးဝရောက်သွားလိမ့်မယ်..."

"အချိန်တန်ရင် နေလနတ်ဘုရားအင်ပါယာတစ်ခုလုံးကလည်း ငါ့ရဲ့အပိုင် ဖြစ်လာလိမ့်မယ်..."

တစ်ချိန်တည်းမှာပင် နေလနတ်ဘုရားအင်ပါယာနှင့် အလွန် နီးကပ်သော အချိန်လေဟာနယ် တားမြစ်နယ်မြေကိုလည်း ချူထျန်က ပြန်လည်၍ အမှတ်ရသွားသည်။

သူ မြို့စားကျန်းကော်အိမ်တော်၏ တရားဝင် သားအကြီးဆုံး ဖြစ်နေသေးချိန်က...

သူ၏ဖခင်သည် အချိန်လေဟာနယ် တားမြစ်နယ်မြေ အကြောင်း ပြောပြသည်ကို သူ မကြာခဏ ကြားခဲ့ပေ၏။

ယခုချိန်၌ သူ့ထံတွင် အစွမ်းထက်သော အရင်းအနှီးများ ရှိနေပြီဖြစ်ရာ....

အနာဂတ်တွင် သူ နေလ နတ်ဘုရား အင်ပါယာ ကို ထိန်းချုပ်နိုင်သောအချိန်၌ ဒဏ္ဍာရီလာ အချိန်လေဟာနယ် တားမြစ်နယ်မြေကိုပင် အနိုင်ယူရန် သူ ကြိုးစားကောင်း ကြိုးစားနိုင်ပေလိမ့်မည်။

ချူထျန်သည် လှပသော စိတ်ကူးယဉ်မှုများထဲ၌ နစ်မျောနေစဉ်မှာပင်...

"သတင်းပို့ပါတယ်..."

ကောင်းကင်နှင့်မြေကြီးကို ပဲ့တင်ထပ်သွားသော အော်ဟစ်သံတစ်သံနှင့်အတူ အလင်းတန်း တစ်ခုသည် ချူထျန်၏ရှေ့တွင် ရုတ်တရက် ဆင်းသက်လာလေ၏။

အစောင့်သည် ချူထျန်ဆီသို့ ရိုသေလေးစားစွာ ဦးညွှတ်ပြီး သူ၏လက်နှစ်ဖက်ကို ပူးဆုပ်ကာ ပြောဆိုသည်။

"ကျွန်တော်တို့ရဲ့ ကင်းထောက်တွေဆီက သတင်းတွေအရ... နေလနတ်ဘုရားအင်ပါယာက စစ်တပ်တစ်ခုကို ပြန်လည်ဖွဲ့စည်းပြီး မြောက်ပိုင်းလျှန်နယ်မြေဘက်ကို လာနေပါတယ်..."

"ကျွန်တော်တို့ရဲ့ ခန့်မှန်းချက်အရ သူတို့ရဲ့ အရေအတွက်က အင်အားတစ်သိန်းခွဲလောက် ရှိပါတယ်..."

ဤစကားကို ကြားသောအခါ ချူထျန်က မျက်ခုံးပင့်လိုက်လေသည်။

နေလနတ်ဘုရားအင်ပါယာသည် သူ့ကြောင့် အစွန်းရောက်ရူးသွပ်သွားသလော...

မြောက်ပိုင်းလျှန်နယ်မြေသို့ ယခင်က အပြေးအလွှား ရောက်လာခဲ့သော လက်ရွေးစင်စစ်သားသုံးသိန်းသည် သူ့ကြောင့် အမြစ်ပြတ်သုတ်သင်ခံခဲ့ရပြီးဖြစ်သည်။

ယခုချိန်၌ သူတို့က နောက်ထပ် စစ်တပ်တစ်တပ်ကို တကယ် စေလွှတ်နေပြီး စစ်အင်အားမှာ တစ်သိန်းခွဲမျှသာ ဖြစ်ပေ၏။

ဤသည်က သူတို့ကိုယ်သူတို့ သူ့ဆီ လာပို့ပေးနေသည်မှာ သိသာထင်ရှားနေသည် မဟုတ်လော...

"ဟား ဟား... နေလနတ်ဘုရားအင်ပါယာက အဘိုးကြီးတွေရဲ့ ဦးနှောက်တွေက တကယ့်ကို သံချေးတက်နေတာပဲ..."

ချူထျန်က ပြုံးပြီး ခေါင်းယမ်းလိုက်သည်။

"သူတို့မှာ ကောင်းကင်ဘုံကို သွားတဲ့လမ်း ရှိပေမယ့် သူတို့က မသွားဘူး... ပြီးတော့ တံခါးမရှိတဲ့ ငရဲကို အတင်းဝင်လာကြတယ်..."

ဒီကောင်တွေက တက်ကြွစွာ သေချင်နေမှတော့ သူတို့ရဲ့ ဆန္ဒကို သူ သဘာဝကျကျ ဖြည့်ဆည်းပေးရမှာပေါ့...

အချိန်တခဏအကြာတွင်...

ဝုန်း...

ရုတ်တရက် မိုးကုတ်စက်ဝိုင်းကို ဖြတ်သန်း၍ မည်းမှောင်သော တိမ်တိုက်များ တလိမ့်လိမ့်တက်လာသည်။

ဖိနှိပ်ခံထားရသော သတ်ဖြတ်ခြင်း အရှိန်အဝါတစ်ခုသည် လောကကြီးကို တုန်ခါစေသော မြည်ဟီးသံများနှင့်အတူ မိုးကုတ်စက်ဝိုင်းမှ ဖြည်းညှင်းစွာ တိုက်ခတ်လာသည်။

ချူထျန် ဦးဆောင်သော စစ်တပ်နှင့် မိုင်ရာချီ အကွာအဝေးတွင် အဆုံးအစမရှိသော ရှေးဟောင်းစစ်သင်္ဘောကြီးများသည် လေထဲမှ ရောက်ရှိလာကြ၏။

ထိုစစ်သင်္ဘောများပေါ်တွင် မရေမတွက်နိုင်သော နေလနတ်ဘုရားအင်ပါယာစစ်သားများက သံချပ်ကာများကို သေသပ်စွာ ဝတ်ဆင်ထားပြီး သူတို့၏မျက်လုံးများတွင် အေးစက်သော သတ်ဖြတ်လိုစိတ်များဖြင့် တောက်ပနေသည်။

"အဲ့ဒါက..."

သို့သော် ချူထျန်၏အကြည့်သည် သင်္ဘောဦးပိုင်းတွင် ရပ်နေသော ဝတ်ရုံဖြူပုံရိပ်ကို မသိစိတ်အရ စူးစိုက်မိသွားသည်။

ကြီးမားသော အကွာအဝေးနှင့် ထောက်လှမ်းမှုကို ဖုံးကွယ်ထားနိုင်သည့် တစ်ဖက်လူအား ဖုံးလွှမ်းထားသော နတ်ဘုရားမြူခိုးအလွှာများကြောင့်.....

ချူထျန်သည် သူ၏မျက်နှာသွင်ပြင်များကို ရှင်းရှင်းလင်းလင်း မမြင်နိုင်သလို သူ၏ တိကျသော အရှိန်အဝါကိုလည်း အာရုံမခံနိုင်ခဲ့ပေ။

သို့ရာတွင် နတ်ဘုရားမြူခိုးများကြားတွင် ပုန်းအောင်းနေသော ထိုမျက်လုံးများသည် အဆုံးအစမရှိသော ဟင်းလင်းပြင်ကို ဖောက်ထွင်းပြီး သူ့ကို တိုက်ရိုက် စူးစိုက်ကြည့်နေတာကို သူ မြင်လိုက်ရချိန်၌...

ချူထျန်သည် ရှေးဟောင်း ရက်စက်ကြမ်းကြုတ်သားရဲတစ်ကောင်၏ ပစ်မှတ်ထားခြင်းကို ခံလိုက်ရသကဲ့သို့ ခံစားလိုက်ရပြီး သူ၏ နတ်ဘုရားစိတ်ဝိညာဉ် တုန်ယင်သွားကာ သူ၏ ဦးရေပြား ထုံကျင်သွားသည်။

ဖြစ်နိုင်သည်မှာ ထိုအရာသည် ယခင်က သူ တစ်ကြိမ် သေဆုံးဖူးသည့် မသိစိတ်အရ သိမြင်မှုကြောင့် ဖြစ်နိုင်သည်။

ဤအချိန်အခိုက်အတန့်တွင် သူ၏နှလုံးသားတွင် အတွေးတစ်ခုတည်းဖြင့်သာ ပြည့်နှက်နေလုမတတ် ဖြစ်နေပေ၏။

'ဒီလူက အရမ်းအန္တရာယ်များတယ်'

"ဒီလူက တကယ်တမ်းကျ ဘယ်သူလဲ...နေလနတ်ဘုရားအင်ပါယာက ဒီလို ပုဂ္ဂိုလ်မျိုးကို ဘယ်တုန်းက မွေးထုတ်လိုက်တာလဲ... နေလ နတ်ဘုရားအင်ပါယာရဲ့ အင်ပါယာမင်းသား တစ်ပါးများလား..."

ချူထျန် တွေးတောနေစဉ်...

သင်္ဘောဦးပိုင်းတွင် ရပ်နေသော ခုံးဝူတောက်သည်လည်း ချူထျန်၏အကြည့်ကို သတိပြုမိသည်။

သူသည် အကြည့်လာရာဆီသို့ မသိစိတ်အရ ကြည့်လိုက်၏။

စနစ်၏အသံသည်လည်း တစ်ပြိုင်နက်တည်း ပဲ့တင်ထပ်လာသည်။

[ဒင်... ကောင်းကင်ကံကြမ္မာ ဇာတ်လိုက်မင်းသား ထွက်ပေါ်လာပါပြီ... စနစ်က သူ့ကို သခင်အတွက် မှတ်သားထားပြီးပါပြီ... ကျေးဇူးပြုပြီး စစ်ဆေးပေးပါ...]

[အမည်: ချူထျန်]

[ကိုယ်ပိုင်အမှတ်အသား: နေလနတ်ဘုရားအင်ပါယာရဲ့ မြို့စားကျန်းကော်အိမ်တော်က တရားဝင် သားအကြီးဆုံး... သေမင်းကင်းလွတ် အမွေအနှစ်]

[ကျင့်ကြံခြင်း: ဟင်းလင်းပြင်နတ်ဘုရားနယ်ပယ် အဆင့်တစ်]

[ရုပ်ခန္ဓာကိုယ်: ငရဲကမ္ဘာ ဖုတ်ကောင်ခန္ဓာကိုယ် · ကဏဦးအဆင့်]

[ကျင့်စဉ်: ငရဲကိုးထပ် သေမင်းကင်းလွတ် ကျင့်စဉ် ငရဲကမ္ဘာ မိစ္ဆာ ကျင့်စဉ်...]

[ရတနာများ: ငရဲကမ္ဘာ မီးတောက် အရိုးဖြူ မိစ္ဆာ လှံရှည် သေမင်းကင်းလွတ် ခေါင်းတလား...]

[ကောင်းကင်အမိန့်တော်အမှတ်: ၉၀၀၀]

[ရရှိနိုင်တဲ့ တာအို အပိုင်းအစများ: သေမင်းကင်းလွတ်တာအို လှံရှည်တာအို ငရဲကမ္ဘာတာအို...]

ချူထျန်၏ အချက်အလက်ဇယား စစ်ဆေးပြီးနောက် ခုံးဝူတောက်၏အပြုံး ပို၍ပီပြင်ထင်ရှားလာသည်။ တစ်ဖက်လူ၏ ကောင်းကင်အမိန့်တော်အမှတ်များသည် အလွန်များပြားပေ၏။

ကံမကောင်းစွာဖြင့် တစ်ဖက်လူ၏ကျင့်ကြံခြင်း သည် အနည်းငယ် နိမ့်ပါးနေသည်။

သူသည် တစ်ကြိမ် သေပြီးသားဆိုသည်မှာ သိသာထင်ရှားသည်။

ယခုချိန်၌ ကြီးမားသော အခွင့်အရေးတစ်ခုကို ရရှိပြီး ပြန်လည်မွေးဖွားခြင်းအား ဖြတ်သန်းပြီးနောက်...

သူ၏ကျင့်ကြံခြင်းသည် ဟင်းလင်းပြင်နတ်ဘုရားနယ်ပယ် အဆင့်တစ်သို့သာ ရောက်ရှိခဲ့သည်။

ဒါက အသုံးမကျတဲ့သူ တစ်ယောက် ဖြစ်တာနဲ့ ဘာကွာလို့လဲ...

ခုံးဝူတောက်က ခေါင်းခါယမ်းလိုက်ပြီး ထပ်မံ၍ မတွေးတောတော့ချေ။

"တပ်ဖွဲ့တွေအားလုံး... တိုက်ခိုက်စမ်း..."

...

အခန်း (၇၄) စစ်တပ်တွေ တိုက်ခိုက်ကြပြီးတော့ ရှေ့တန်းတစ်ခုလုံး ပြိုလဲသွားတယ်

ဝူတောက်၏စကားများ အဆုံးသတ်သွားသည့် အချိန်အခိုက်အတန့်မှာပင်...

ဝုန်း... ဝုန်း... ဝုန်း...

အချိန်တခဏအတွင်းမှာပင် ကောင်းကင်ယံကို ဖြတ်သန်းသွားသော မရေမတွက်နိုင်သည့် စစ်သင်္ဘောများသည် ကောင်းကင်ကို တုန်ခါစေသော နတ်ဘုရားအလင်းတန်းများကို တစ်ပြိုင်နက်တည်း ထုတ်လွှတ်လိုက်ပြီး ချူထျန် ဦးဆောင်သော စစ်တပ်ကို ပြင်းထန်စွာ ရိုက်ခတ်လိုက်သည်။

ချူထျန် သည် လျှင်မြန်စွာ တုံ့ပြန်လိုက်ပြီး ချက်ချင်းအမိန့်ပေးလိုက်၏။

"မြန်မြန်... တပ်ဖွဲ့အားလုံး... နေရာယူ... မြန်မြန် ကာကွယ်ကြစမ်း..."

ချူထျန် ဦးဆောင်သော သူပုန်စစ်တပ်သည်လည်း တိုက်ပွဲအတွေ့အကြုံ ရင့်ကျက်ပြီး သူတို့၏တုံ့ပြန်မှုသည် အလွန်လျှင်မြန်လေ၏။

သို့သော် သူတို့သည် ပထမအချီ ဥပဒေသနတ်ဘုရားအလင်းတန်း တိုက်ခိုက်မှုကို အတင်းအကြပ် ခုခံနိုင်ခဲ့စဉ်မှာပင်...

ခုံးဝူတောက်၏အမိန့်အရ လေးနှင့်မြှားများကို ကိုင်ဆောင်ထားသော မရေမတွက်နိုင်သည့် စစ်သားများသည် သူတို့၏ လေးကြိုးများကို တင်းနေအောင် ဆွဲထားပြီး မြားများကို တပ်ဆင်ထားပြီးဖြစ်သည်။

"ပစ်..."

ဦးဆောင်တပ်မှူးက အမိန့်ပေးလိုက်သည်။

ဝှစ်... ဝှစ်... ဝှစ်...

လေကို ခွင်းသွားသော မြှားသံများသည် တစ်ခုပြီးတစ်ခု ကောင်းကင်နှင့်မြေကြီးအကြား၌ ရုတ်တရက် ပဲ့တင်ထပ်သွားခဲ့သည်။

ထူထပ်သိပ်သည်းပြီး ကြယ်များနှင့်တူညီသော မြှားများသည် ဟင်းလင်းပြင်ကို ဖောက်ထွင်းသွားကာ ကျဆင်းလာသည်။ ထိုအရာများသည် ကြယ်စင်မြစ်တစ်ခုအလား ဟင်းလင်းပြင်ကို ဖြတ်သန်းသွားစဉ်တွင် အောက်ဘက်ရှိ မြေပြင်၏ ကြီးမားသောဧရိယာများကို ကြေမွှပြီး ပြိုကျသွားစေခဲ့သည်။

ဝုန်း...

တလိမ့်လိမ့်ထလာသော စွမ်းအင်မုန်တိုင်းကြီး တိုက်ခတ်လာကာ ပျံ့နှံ့သွားလေ၏။

"မြို့ဖြိုခွင်းခြင်းလှံရှည်တွေကို လွှတ်လိုက်... တိုက်ခိုက်မှုကို ဆက်လုပ်စမ်း..."

သို့သော် ဤအရာအားလုံးသည် မပြီးဆုံးသေးပေ။

ခုံးဝူတောက်သည် သူ၏လူများကို ကြေးဝါ နတ်ဘုရားလှံရှည် အနည်းငယ်အား ဆွဲထုတ်ရန်ပင် အမိန့်ပေးခဲ့ပြီး တစ်ခုစီသည် ပေတစ်ရာ မြင့်မားကာ ထိုအရာများကို တိုက်ရိုက်အသက်သွင်းပြီး ပစ်လွှတ်လိုက်သည်။

ထိုကဲ့သို့ ဧရာမနတ်ဘုရားလှံရှည်များကို ဝင်္ကပါများ သို့မဟုတ် မြို့များကို ဖျက်ဆီးရန် အသုံးပြုကြ၏။

လှံရှည်တစ်ချောင်းသည် ပေရာနှင့်ချီ မြင့်မားသော မြို့တစ်မြို့၏ထက်ဝက်ကျော်ကို ကြေမွှသွားစေနိုင်သည်ဟု ဆိုနိုင်သည်။

သူ့ရှေ့ရှိ စစ်တပ်သည် အားနည်းလွန်းနေသည်။

သူ စိတ်ကူးထားသည့်အရာနှင့် ကွာဟချက်သည် အလွန်ကြီးမားလွန်းလှ၏။

သူသည် စိတ်ပိုင်းဆိုင်ရာ ကစားပွဲများကို ကစားရန် ပျင်းရိလွန်းပြီး စစ်ရေး နည်းဗျူဟာများကို အသုံးပြုရန် ပို၍ပင် ပျင်းရိနေသည်။

သူတို့ကို ထိပ်တိုက်ရင်ဆိုင်ပြီး တိုက်ရိုက်ခြေမွှဖျက်ဆီးပစ်ခြင်းက ပိုကောင်းပေလိမ့်မည်။

နတ်ဘုရားဘုရင်နယ်ပယ် ကျင့်ကြံသူများ တပြိုင်နက်တည်း အသက်သွင်းရန် လိုအပ်သော နတ်ဘုရားလှံရှည်များကို ခုံးဝူတောက်က လက်တစ်ဖက်တည်းဖြင့် ကိုင်မြှောက်ထားသည်။

တခြားတစ်ဖက်တွင် အချိန်လေဟာနယ် တားမြစ်နယ်မြေမှ ဧကရာဇ်သားတော်အစဉ်အဆက်၏ အကူအညီကြောင့်...

အရေအတွက် နည်းပါးသော်လည်း...

ချူထျန် ဦးဆောင်သော သူပုန်စစ်တပ်သည် လုံးဝယှဉ်ပြိုင်နိုင်စွမ်း မရှိဘဲ ပြိုလဲပျက်စီးတော့မည့် အရိပ်အယောင်များကို ပြသနေလေပြီ။

အထူးသဖြင့် ချူထျန်သည် အလွန်အံ့အားသင့်နေပေ၏။

တစ်ဖက်လူက ဤမျှထိ ရုတ်တရက်ဆန်စွာ တိုက်ခိုက်လိမ့်မည်ဟု သူ ဘယ်သောအခါမှ မမျှော်လင့်ထားခဲ့ချေ။ ထို့ပြင် တစ်ဖက်လူသည် ဤမျှထိ ကြောက်မက်ဖွယ်ကောင်းသော ထိုးစစ်ဖြင့် တိုက်ခိုက်လိမ့်မည်ဟုလည်း သူ တွေးထင်မထားခဲ့ပေ။

"တပ်ဖွဲ့တွေအားလုံး... ငါ့ရဲ့နောက်ကို လိုက်ခဲ့စမ်း..."

သို့သော် ချူထျန်သည် သူ၏တိုက်ပွဲဝင်ဓားကို ဆွဲထုတ်ပြီး စစ်တပ်တစ်တပ်လုံးကိုဦးဆောင်၍ တန်ပြန်တိုက်ခိုက်တော့မည့် ဆဲဆဲမှာပင်..

ဝုန်း...

ရုတ်တရက် ဟင်းလင်းပြင်မှ လောကကြီးကို တုန်ခါစေသော ပေါက်ကွဲသံတစ်သံ ထွက်ပေါ်လာသည်။

ချူထျန်သည် ကြောက်မက်ဖွယ်ကောင်းသော စွမ်းအားတချို့ကို ခံစားမိလေ၏။

ထိုအရာများသည် ကောင်းကင်နှင့်မြေကြီးကို အလွန်လျှင်မြန်သော အမြန်နှုန်းဖြင့် ဆုတ်ဖြဲပြီး သူ့ဆီသို့ လျင်မြန်စွာ ချဉ်းကပ်လာသည်။

သူသည် အသံလာရာဆီသို့ မသိစိတ်အရ ကြည့်လိုက်ပြီး သူ့ရှေ့ရှိ မြင်ကွင်းကို မြင်လိုက်ရချိန်​၌သူ၏မျက်လုံးသူငယ်အိမ်များကို မကျုံ့ဘဲ မနေနိုင်ခဲ့ပေ။

မိုးကုတ်စက်ဝိုင်းတွင် အဆုံးအစမရှိသော ငွေရောင် အလင်းတန်းများဖြင့် လင်းလက်နေသော ဧရာမကြေးဝါလှံရှည် အနည်းငယ် ရှိနေသည်။

ထိုအရာများသည် မယုံကြည်နိုင်လောက်အောင် ကြောက်မက်ဖွယ်ကောင်းသည့် စွမ်းအားတစ်ခုကို သယ်ဆောင်လာပြီး သူတို့ထံသို့ တိုက်ရိုက် ပြေးဝင်လာစဉ် ဟင်းလင်းပြင်၏ ကြီးမားသော အစိတ်အပိုင်းများကို ဖောက်ထွင်းသွားသည်။

"နတ်ဘုရားဖြိုခွင်းခြင်းလှံရှည် တွေလား..."

ချူထျန်က မယုံကြည်နိုင်စွာဖြင့် အော်ဟစ်လိုက်၏။

ဆယ်နှင့်ချီသည့် နတ်ဘုရားဖြိုခွင်းခြင်းလှံရှည်များကို တပြိုင်နက်တည်း အသက်သွင်းရန်အတွက် နတ်ဘုရားဘုရင်နယ်ပယ် အစွမ်းထက် ကျွမ်းကျင်သူ ရာနှင့်ချီ၍ လိုအပ်သည်ကို ဘေးဖယ်ထားလျှင်ပင် ပြင်ဆင်ရန်အတွက် အချိန်များစွာလည်း လိုအပ်သည်။

မည်သည်ကြောင့် ထိုအရာများကို ဟင်းလင်းပြင်နတ်ဘုရားနယ်ပယ်သာရှိသော ထို လူငယ်ကျင့်ကြံသူက ဤမျှ လွယ်လွယ်ကူကူ ပစ်လွှတ်လိုက်ရသနည်း။

နတ်ဘုရားဖြိုခွင်းခြင်းလှံရှည်များ၏ မျက်နှာပြင်ပေါ်တွင် ဖျက်ဆီးခြင်းဝင်္ကပါများစွာကို ထွင်းထုထားသည်။

သူပုန်စစ်တပ်က ဖန်တီးထားသော ကာကွယ်ရေး တိုက်ပွဲဝင်ဝင်္ကပါများသည် ခုခံရန် စွမ်းအားမရှိဘဲ စက္ကူစုတ်များကဲ့သို့ အားနည်းနေလေ၏။

ဝုန်း...

နတ်ဘုရားလှံရှည်များသည် အရာအားလုံးကို ဖောက်ထွင်းသွားပြီး ဖျက်ဆီးခြင်းစွမ်းအား လှိုင်းလုံးကြီးများကို လှိုင်းထသွားစေခဲ့သည်။

"မဟုတ်ဘူး....."

လောကကြီးကို တုန်ခါစေသော ဟိန်းဟောက်သံများနှင့် နှလုံးကွဲမတတ် ငိုကြွေးသံများသည် တပြိုင်နက်တည်းနီးပါး ပဲ့တင်ထပ်လာပေ၏။

မြို့ဖြိုခွင်းခြင်းလှံရှည်အနည်းငယ်သည် ကောင်းကင်ယံအပြင်ဘက်မှ ကြယ်ပျံများကဲ့သို့ ကျဆင်းလာပြီး သူတို့စစ်တပ်၏ အလယ်ဗဟိုတွင် ချက်ချင်းပေါက်ကွဲသွားတော့သည်။

တိုက်ရိုက်သက်ရောက်မှုရှိသော မရေမတွက်နိုင်သည့် ကျင့်ကြံသူများသည် နာကျင်စွာ အော်ဟစ်ရန်ပင် အချိန်မရလိုက်ချေ။

သူတို့သည် ကြောက်မက်ဖွယ်ကောင်းသော ဥပဒေသစွမ်းအင်လှိုင်းလုံးများ၏ ရိုက်ခတ်ခြင်းကို ချက်ချင်းခံလိုက်ရပြီး အချိန်တခဏအတွင်း သွေးမြူခိုးများ ပြည့်နှက်နေသော တိမ်တိုက်မှိုပွင့်ကြီးအဖြစ် ပေါက်ကွဲသွားကြသည်။

ကြီးမားသော မြေပြင်နေရာတဝိုက်သည် ပြိုကျပြီး ကြေမွှပျက်စီးသွားလေ၏။

လွင့်စင်နေသော အပျက်အစီးများကြားတွင် ပေသောင်းချီ မြင့်မားသော ဖုန်မှုန့်မုန်တိုင်းကြီးတစ်ခု တိုက်ခတ်လာပြီး ချူထျန် ဦးဆောင်သော စစ်တပ်ကို တိုက်ရိုက်ဝါးမျိုသွားသည်။

"ဒါပဲ..."

စစ်သင်္ဘောပေါ်တွင် ဤမြင်ကွင်းကို မျက်မြင်တွေ့ရှိရသော ရှားချူလီသည် လုံးဝဆွံ့အသွားလေ၏။

ယခုအချိန်အထိ ကျင့်ကြံခဲ့သော်လည်း ထိုအရာသည် သူမအတွက် တပ်မကြီးများ၏တိုက်ပွဲတစ်ခုကို မျက်မြင်တွေ့ရှိရသော ပထမဆုံးစစ်တလင်းပင်။

ဤသည်က ဒဏ္ဍာရီလာ အင်မော်တယ် စစ်ပွဲ လောက် ကြောက်မက်ဖွယ်မကောင်းသော်လည်း...

ထိုအရာကို အလွန်အမင်း ကြေကွဲဖွယ်ကောင်းသော တိုက်ပွဲတစ်ခုဟု သတ်မှတ်နိုင်ဆဲပင်။

သို့သော် ယခုချိန်၌ ဤတပ်မကြီးများတိုက်ပွဲသည် စတင်ခြင်းပင် မရှိသေးချေ။

ခုံးဝူတောက်၏ ကြောက်မက်ဖွယ်ကောင်းသော ထိုးစစ်အောက်တွင် စစ်သားလေးသိန်းသည် တကွဲတပြားစီ ဖြစ်သွားခဲ့လေပြီ။

ဤသည်မှာ အင်အားမျှတသော ယှဉ်ပြိုင်မှုတစ်ခု ဖြစ်လိမ့်မည်ဟု သူမ မူလက တွေးထင်ခဲ့သော်လည်း နတ်ဘုရားသားတော် ခုံးဝူတောက် ၏ တစ်ဖက်သတ် ခြေမွှဖျက်ဆီးခြင်းသာ ဖြစ်လိမ့်မည်ဟု သူမ ဘယ်သောအခါမှ မျှော်လင့်မထားခဲ့ချေ။

တခြားသူများ၏အံ့အားသင့်မှုနှင့် နှိုင်းယှဥ်လျှက် ခုံးဝူတောက်သည် များစွာပို၍ တည်ငြိမ်နေပုံရပေ၏။

တိုက်ပွဲတွင် စစ်တပ်တစ်ခုကို ဦးဆောင်ချိန်၌ စစ်တပ်ဖွဲ့စည်းပုံ ယှဉ်ပြိုင်မှုများတွင် ဦးစားပေးသူမျိုးကို သူ အမုန်းဆုံးပင်။

ဖျက်ဆီးခြင်း ထိုးနှက်ချက်များကို ဦးစွာပေးပြီးနောက် တိုက်ရိုက်တိုက်ခိုက်ခြင်းက ပို၍ကောင်းမွန်သည်။

မည်သို့ပင်ဆိုစေကာမူ တိုက်ခိုက်ခြင်းသည် အမြဲတစေ အကောင်းဆုံး ကာကွယ်ခြင်းသာ ဖြစ်ပေ၏။

"တပ်ဖွဲ့အားလုံး... တိုက်ခိုက်... ရန်သူကို သတ်..."

ဤအချိန်အခိုက်အတန့်တွင် ခုံးဝူတောက်၏ နောက်ထပ် အမိန့်တစ်ခုနှင့်အတူ...

ရှေးဟောင်း စစ်သင်္ဘောများပေါ်တွင် မတ်တတ်ရပ်နေသော နတ်ဘုရားအင်ပါယာ စစ်သားများသည် ကုန်းပတ်ပေါ်မှ ခုန်ချကာ သူတို့၏တိုက်ပွဲဝင်ဓားများကို ဆွဲထုတ်ပြီး သူတို့၏ တိုက်ပွဲဝင်လှံရှည်များကို မြှောက်လိုက်ကြ၏။

တပ်မှူးအသီးသီးက ဦးဆောင်သော နတ်ဘုရား အင်ပါယာစစ်သား တစ်သိန်းခွဲသည် ကျန်ရှိနေသော သူပုန်တပ်ဖွဲ့များဆီသို့ ရေလွှမ်းမိုးမှုတစ်ခုအလား ပြေးဝင်သွားကြသည်။

"သတ်... ဒီသူပုန်အုပ်စုကို သတ်စမ်း..."

နေလနတ်ဘုရားအင်ပါယာ၏ တပ်မှူးများသည် သိုးအုပ်ထဲသို့ ဝင်ရောက်လာသော ကျားများကဲ့သို့ စစ်တပ်တစ်သိန်းခွဲကို ဦးဆောင်သွားခဲ့သည်။

ယခင်အချီများမှ ကြောက်မက်ဖွယ်ကောင်းသော ထိုးစစ်များအောက်တွင် အသက်ရှင်ကျန်ရစ်သော သူပုန်များပင်လျှင် ပြင်းထန်စွာ ဒဏ်ရာရနေကြလေပြီ။

မယုံနိုင်လောက်အောင် ကံကောင်းပြီး အသက်ရှင်ကျန်ရစ်ခဲ့သော သူပုန်များပင်လျှင် အလွန်အမင်း ထိတ်လန့်ကြောက်ရွံမှုများကြောင့် နေရာတွင်ပင် အေးခဲတောင့်တင်းနေကြသည်။

သူတို့ သတိဝင်မလာနိုင်မီမှာပင်....

သူတို့သည် တိုက်ခိုက်လာသော နေလနတ်ဘုရားအင်ပါယာစစ်တပ်၏ ရိတ်သိမ်းခြင်းကို ခံလိုက်ရတော့သည်။

"အဟွတ်... အဟွတ်... အဟွတ်... မင်းတို့ရဲ့ ဓားတွေကို ကောက်ကိုင်ကြစမ်း... မင်းတို့ မသေချင်ရင် မင်းတို့ရဲ့ ဓားတွေကို ကောက်ကိုင်ပြီး တိုက်ခိုက်ကြ..."

အပျက်အစီးများထဲမှ တွားသွားထွက်လာသော ချူထျန်သည် ကျန်ရှိနေသော စစ်တပ်ကို တန်ပြန်တိုက်ခိုက်မှုတစ်ခုအား ပြန်လည်ဖွဲ့စည်းရန်အတွက် ကျယ်လောင်စွာအော်ဟစ်၍ အမိန့်ပေးလိုက်သည်။

ကံမကောင်းစွာဖြင့် သူတို့၏စစ်တပ်ဖွဲ့စည်းပုံသည် လုံးလုံးလျားလျား တကွဲတပြားစီ ဖြစ်သွားခဲ့လေပြီ။

သူတို့ အတင်းအကြပ် စုစည်းလိုက်သော တန်ပြန်တိုက်ခိုက်မှုသည်လည်း အသုံးမဝင်သလောက်နီးပါးပင်။

သို့သော် သေရမည်ကို မကြောက်သော သေမင်းကင်းလွတ်စစ်သားများသည် တန်ပြန်တိုက်ခိုက်မှုတစ်ခုကို လျင်မြန်စွာ စုစည်းလိုက်ကြ၏။

သူတို့သည် စစ်တလင်းပေါ်တွင် နေလနတ်ဘုရားအင်ပါယာ စစ်သားတစ်သိန်းခွဲနှင့် ချက်ချင်းရင်ဆိုင်လိုက်ကြသည်။

အချိန်တခဏအတွင်းမှာပင် သံမဏိမြင်းများနှင့် ရွှေလှံများ ထိပ်တိုက်တွေ့ဆုံးကာ ဓားသံများ မြည်ဟည်းပြီး သွေးမြူခိုးများ ပျံ့လွင့်သွားသည်။

"အော်... အဲဒ့ါက သေသွားတဲ့ လူတွေနဲ့ ဖွဲ့စည်းထားတဲ့ စစ်တပ်တစ်တပ်လား..."

မိုးကောင်းကင်ယံတွင် မြင့်မားစွာ မတ်တတ်ရပ်နေသော ခုံးဝူတောက်က မျက်ခုံးအနည်းငယ် ပင့်လိုက်သည်။

သူ၏အာရုံခံစားမှုအရ ဤထူးဆန်းသော စစ်တပ်သည် သက်မဲ့အရာများနှင့် တူညီနေပြီး သက်ဝင်လှုပ်ရှားမှု မရှိပေ။

ဤသည်က သူ့ကို ဇဝေဇဝါဖြစ်စေပြီး အနည်းငယ် အံ့အားသင့်စေခဲ့သည်။

ချူထျန်က သေသွားသောလူများကို မည်သို့ တိုက်ခိုက်ခိုင်းသည်ကို သူ တွေးတောနေမိသည်။

ခုံးဝူတောက်သည် တစ်စုံတစ်ခုကို ရုတ်တရက် တွေးတောမိလိုက်ပြီး သူ၏စိတ်နှလုံးသားထဲတွင် မှန်းဆလိုက်၏။

"ဖြစ်နိုင်တာတော့... ဒဏ္ဍာရီလာ အောက်လမ်းပညာရပ်လား..."

ဤသည်က သူ၏ စိတ်ဝင်စားမှုကို ရုတ်တရက် လှုံ့ဆော်ပေးလေသည်။

အောက်လမ်းပညာရပ်သည် သာမန်လောကတွင် အမှန်တကယ်ကို ရှားပါးပေ၏။

ထို့ပြင် ဤသည်မှာ သူ၏စစ်ဆင်ရေးများစွာအတွင်း သေမင်းကင်းလွတ်စစ်သားများဖြင့် ဖွဲ့စည်းထားသော စစ်တပ်တစ်ခုနှင့် ပထမဆုံးအကြိမ် ကြုံတွေ့ရခြင်းလည်းဖြစ်သည်။

"တပ်ဖွဲ့တွေအားလုံး ကာကွယ်ရေးတွေကို စွန့်လွှတ်ပြီး တိုက်ပွဲထဲကို ဝင်ရောက်ကြစမ်း..."

ဤအချိန်အခိုက်အတန့်တွင် ခုံးဝူတောက်၏ အသံသည် ကောင်းကင်နှင့်မြေပြင်အကြား၌ ပဲ့တင်ထပ်သွားသည်နှင့်အမျှ...

လက်ရှိတိုက်ပွဲဝင်နေသော နတ်ဘုရားအင်ပါယာ စစ်သားတစ်သိန်းခွဲသည် သူတို့၏ထိုးစစ် ဖွဲ့စည်းပုံကို ချက်ချင်းပြောင်းလဲလိုက်သည်။

သူတို့ထံတွင် တိုက်ပွဲထဲသို့ ဝင်ရောက်ကာ ဆုတ်ခွာခြင်းမရှိဘဲ ထိုးဖောက်ဝင်ရောက်ရန်သာ ဆန္ဒရှိပြီး သေခြင်းတရားကြားမှ မွေးဖွားလာသော အသက်ကို ပိုင်ဆိုင်ထားသည်။

"သတ်..."

လောကကြီးကို တုန်ခါစေသော ဟိန်းဟောက်သံများသည် သွေးရောင်လွှမ်းနေသော မြေပြင်တစ်လျှောက် ပဲ့တင်ထပ်သွားပြီး စစ်တလင်းပေါ်ရှိ အော်ဟစ်သံများသည် ရုတ်တရက် အဆပေါင်းများစွာ ကျယ်လောင်လာသည်။

နေလနတ်ဘုရားအင်ပါယာ၏ စစ်သားတစ်သိန်းခွဲသည် သူတို့၏ကာကွယ်ရေးအားလုံးကို လုံးဝစွန့်လွှတ်လိုက်ပြီး အသေအကြေတိုက်ခိုက်မှုတစ်ခုအတွက် သူတို့၏စွမ်းအားနှင့် ကျင့်ကြံခြင်းများအားလုံးကို အသုံးပြုလိုက်ကြသည်။

ယခင်ကတည်းက ချူထျန် ဦးဆောင်သော စစ်တပ်သည် ကြီးမားသော ဆုံးရှုံးမှုများကို ခံစားခဲ့ရပြီးဖြစ်ကာ အငိုက်ဖမ်းခံလိုက်ရသဖြင့် သူတို့၏တပ်ဖွဲ့စည်းပုံသည် ဖရိုဖရဲ ဖြစ်နေလေပြီ။

ယခုချိန်၌ ထိုကဲ့သို့ ရူးသွပ်သော အသေအကြေ တိုက်ခိုက်မှုအောက်တွင်...

သူတို့သည် လူအရေအတွက်နှင့် ကျင့်ကြံခြင်းတွင် အသာစီးရနေသော်လည်း အမွှေးတိုင်တစ်တိုင် လောင်ကျွမ်းချိန်စာ တစ်ဝက်ခန့်အချိန်မှာပင် တောင့်မခံနိုင်ဘဲ လုံးလုံးလျားလျား ပြိုလဲပျက်စီးတော့မည့် အခြေအနေသို့ ရောက်ရှိသွားခဲ့သည်။