အခန်း (၁၉၁-၁၉၂)

အခန်း (၁၉၁) - ဝံပုလွေအသိုက်ကို တိုက်ခိုက်လာသော လူသားမဟာမိတ်တပ်ဖွဲ့ (၃)

လင်းထျန်းလုံ စိတ်ကူးတစ်ခုရသွားပြီး သာမန် ရေခဲပင်မသလင်းကျောက် အချို့ကို ထုတ်ယူကာ စိတ်စွမ်းအားကိုအသုံးပြု၍ သေးငယ်သော ဆွဲသီးလေးနှစ်ခုအဖြစ် ထုဆစ်လိုက်သည်။

“ဒါတွေက သမီးတို့အတွက် အကာအကွယ်ဆွဲသီးလေးတွေ” သူက ရှောင်ယင်းတို့နှစ်ဦးကို ညင်သာစွာ ဆွဲပေးလိုက်သည်။

“ဒါလေးတွေ ဝတ်ထားရင် သမီးတို့ မချမ်းတော့ဘူး”

ရှောင်ယင်းက ရေခဲသလင်းဆွဲသီးလေးကို ဝမ်းသာအားရ ဆော့ကစားနေသည်။

“အရမ်းလှတာပဲ။ ကျေးဇူးပါဖေဖေ”

ရှောင်လန်ကလည်း ချိုမြိန်သော အပြုံးလေး ပြလိုက်သည်။ “သမီးတို့ အမြဲတမ်း ဝတ်ထားပါ့မယ်”

“ရှောင်လန်၊ ဒီရေခဲသတ္တုက သာမန်ပဲဆိုပေမယ့် ဝံပုလွေဖေဖေရဲ့ စွမ်းအားနဲ့ ကောင်းချီးပေးခံရပြီးနောက်မှာ အထူးအာနိသင်တစ်ခု ရှိသွားသလိုပဲ”

“ဟုတ်တယ်၊ ဒီအထဲမှာပါတဲ့ ကာကွယ်ရေးစွမ်းအားကို ငါခံစားမိတယ်”

အရင်းအမြစ်ခွဲဝေမှု ပြီးဆုံးလုနီးချိန်တွင် မိခင်သစ်ပင်ထံမှ ပြင်းထန်သော လှုပ်ခတ်မှုတစ်ခု ရုတ်တရက်ထွက်ပေါ်လာသည်။ ကြယ်ရောင်များ ရေတံခွန်ပမာ စီးကျလာပြီး ပင်မပင်စည်ပေါ်ရှိ အက်ကွဲကြောင်းများမှာ သာမန်မျက်စိဖြင့်ပင် မြင်နိုင်သော အမြန်နှုန်းဖြင့် ပြန်စေ့လာသည်။

[စနစ်အသိပေးချက်]။ ။တိုတမ်မိခင်သစ်ပင် အသွင်ပြောင်းလဲမှု ၆၅ ရာခိုင်နှုန်း ပြီးစီးပါပြီ။ ပင်ကိုယ်စွမ်းရည်သစ် အသက်စွမ်းအင်ပဲ့တင်ထပ်ခြင်း (ရွှေရောင် အဆင့်မြင့်) နိုးထလာပါသည်။

ဤအခိုက်အတန့်တွင် နှင်းဝံပုလွေအားလုံး၏ အငွေ့အသက်များ သိမ်မွေ့စွာ မြင့်တက်လာသည်ကို လင်းထျန်းလုံ ချက်ချင်း ခံစားလိုက်ရသည်။ မိခင်သစ်ပင်၏ ပင်ကိုယ်စွမ်းရည်အသစ်က ဝံပုလွေအုပ်တစ်ခုလုံးကို အမှန်တကယ် အကျိုးပြုနိုင်စွမ်း ရှိလေသည်။

သို့သော် ထိုအချိန်မှာပင် ယင်းဖုန်း၏ အရေးပေါ်သတင်းပို့သံ နောက်တစ်ကြိမ် ထွက်ပေါ်လာသည်။

“ဘုရင်မင်းမြတ် အနောက်ဘက်စစ်မျက်နှာစာက ရန်သူ့ရှေ့ပြေးတပ်ဖွဲ့ မိုင်ငါးဆယ်အကွာအဝေးထဲကို ဝင်လာပါပြီ။ ခြောက်နာရီအတွင်း ထိတ်တိုက်တွေ့မယ်လို့ ခန့်မှန်းထားပါတယ်”

လင်းထျန်းလုံ၏ ငွေပြာဘုရင်မျက်၀န်းများ ချက်ချင်း စူးရှသွားသည်။

‘နောက်ဆုံးတော့ ရောက်လာပြီပဲ'

ယင်းဖုန်း၏ အရေးပေါ်သတင်းပို့သံက ခေါင်းပေါ် ရေအေးဖြင့် လောင်းချလိုက်သကဲ့သို့ ဖြစ်သွားပြီး ဝံပုလွေအသိုက်တစ်ခုလုံးကို အမြင့်ဆုံး တိုက်ပွဲဝင်‌အနေအထားသို့ ချက်ချင်း ရောက်ရှိသွားစေသည်။

“သူတို့ရဲ့ ဖွဲ့စည်းပုံနဲ့ လူဦးရေကကော…..” လင်းထျန်းလုံက တည်ငြိမ်စွာ မေးလိုက်ပြီး တစ်ချိန်တည်းမှာပင် စိတ်ခြင်းဆက်သွယ်ခြင်းမှတစ်ဆင့် အားလုံးထံ စစ်ရေးဖွဲ့စည်းပုံ အမိန့်များ ချမှတ်ပေးလိုက်လေသည်။

“ရှေ့ပြေးတပ်ဖွဲ့က လူငါးဆယ်လောက်ရှိတယ်၊ မီးစွမ်းအားရှင်လူသားက ကိုယ်တိုင် ဦးဆောင်လာတာ၊ သူတို့ရဲ့ အနောက် သုံးမိုင်လောက်မှာ အကြီးစားလက်နက်တွေ တပ်ဆင်ထားတဲ့ လူနှစ်ရာလောက်ရှိတဲ့ ပင်မတပ်ဖွဲ့လည်း ရှိသေးတယ်”

လင်းထျန်းလုံ၏ ငွေပြာဘုရင်မျက်၀န်းများ အနည်းငယ် ကျဉ်းမြောင်းသွားသည်။ ပြိုင်ဘက်သည် ရှေ့ပြေးတပ်ဖွဲ့ကို အသုံးပြုပြီး ဝံပုလွေအသိုက်၏ ကာကွယ်ရေးကို စမ်းသပ်ကာ ပင်မတပ်ဖွဲ့က နောက်မှလိုက်မည့် ရည်ရွယ်ချက်ရှိပုံရသည်။

“ထျန်းပင်း မင်းရဲ့ တပ်ဖွဲ့တွေကို ပြင်ဆင်ထားပြီးပီလား”

“အချိန်မရွေး တိုက်ခိုက်ဖို့အသင့်ပါပဲ” ရွှေရောင်ရင့်ရင့် ဧရာမဝံပုလွေကြီး၏ပတ်လည်တွင် ချော်ရည်ပုံသဏ္ဍာန်များ စီးဆင်းနေသည်။

မြေအောက်မီးလျှံနှလုံးသားနှင့် အမြုတေ ပေါင်းစပ်မှုက ရလဒ် သိသိသာသာထွက်ပေါ်နေပြီဖြစ်သည်။

“ရန့်မြဲ့ ကာကွယ်ရေးစနစ်ကရော”

“အဓိကအချက်အချာ အားလုံး အသင့်ဖြစ်နေပါပြီ၊ ရေပြာကြေးခွံအစောင့်အရှောက်တွေကို လက်တွေ့တိုက်ပွဲအတွက် အသုံးပြုနိုင်ပါပြီ”

အစောင့်အရှောက်ခေါင်းဆောင်၏ အသံက အေးစက်ပြီး ယုံကြည်မှုအပြည့်ရှိနေသည်။

လင်းထျန်းလုံက စစ်ဆင်ရေးအမိန့်များပေးရန် ပြင်ဆင်နေစဉ် မိခင်သစ်ပင်ထံမှ ထူးဆန်းသော ပဲ့တင်ထပ်မှုတစ်ခု ရုတ်တရက် ထွက်ပေါ်လာသည်။

ကြယ်ရောင်များက အစစ်အမှန်အရာဝတ္ထုတစ်ခုပမာ ကျဆင်းလာပြီး နှင်းဝံပုလွေအားလုံး၏ ခန္ဓာကိုယ်မျက်နှာပြင်ပေါ်တွင် မှိန်ဖျော့ဖျော့ အလင်းဝန်းတစ်ခု ဖွဲ့စည်းသွားသည်။

[စနစ်အသိပေးချက်]။ ။တိုတမ်မိခင်သစ်ပင်၏ ပင်ကိုစွမ်းရည် အသက်စွမ်းအင်ပဲ့တင်ထပ်ခြင်း အသက်ဝင်သွားပါပြီ။ လက်အောက်ခံအားလုံး၏ စွမ်းရည် စုစုပေါင်း ၁၅ ရာခိုင်နှုန်း တိုးတက်လာပြီး စွမ်းအင်ပြန်လည်ပြည့်ဖြိုးမှု အမြန်နှုန်း ၃၀ ရာခိုင်နှုန်း မြင့်တက်လာပါသည်။

ဤရုတ်တရက် အားဖြည့်မှုက ဝံပုလွေအုပ်စု၏ စိတ်ဓာတ်ကို များစွာ မြင့်တက်သွားစေသည်။

အရင်းအမြစ်များကို စုပ်ယူထားခါစဖြစ်သော မဟာနှင်းအစောင့်အရှောက်များပင် သူတို့၏ကိုယ်တွင်း၌ စွမ်းအားများဆူပွက်နေသည်ကို ခံစားလိုက်ရပြီး နှင်းခဲအကာအကွယ်၏ အလင်းရောင်များက ပိုမိုခိုင်မာလာသည်။

“မိခင်သစ်ပင်ကလည်း ငါတို့ကို အားပေးနေပုံရတယ်” ရှောင်ယင်းက ဝမ်းသာအားရ ပြောလိုက်ပြီး သူမ၏ ရင်ဘတ်ပေါ်ရှိ ရေခဲသတ္တုဆွဲသီးလေးက ကြယ်ရောင်ကို ရောင်ပြန်ဟပ်နေသည်။

ရှောင်လန်ကလည်း လေးနက်စွာ ခေါင်းညိတ်ပြလိုက်သည်။ “သစ်ပင်ကြီးက အားလုံးကို ကာကွယ်ပေးနေတာ”

ကိုယ်တွင်းရှိ တိုးတက်လာသော စွမ်းအားများကို ခံစားရင်း လင်းထျန်းလုံ ဆုံးဖြတ်ချက်တစ်ခု ချလိုက်ပြီဖြစ်သည်။ တိုက်ပွဲဝင်ရန် အသင့်ဖြစ်နေသော ဝံပုလွေအုပ်စုကို ကြည့်ကာ သူ၏အသံက အဖွဲ့ဝင်တိုင်းထံသို့ ရောက်ရှိသွားသည်။

“ဒီတိုက်ပွဲမှာ ငါတို့ဝံပုလွေအသိုက်ကို ကျူးကျော်လို့မရဘူးဆိုတာ ရန်သူအားလုံးကို နားလည်အောင် လုပ်ပေးရမယ်”

“အမဲလိုက်သမားတွေ ရှေ့ထွက်ပြီးကင်းထောက်၊ ရန်သူ့လှုပ်ရှားမှုတွေကို အချိန်နဲ့တစ်ပြေးညီ သတင်းပို့”

“လုပ်ကြံသတ်ဖြတ်သူတွေ လေမည်းတောင်ကြောမှာ ခြုံခိုစောင့်နေ၊ တိုက်ခိုက်ဖို့ ငါ့အမိန့်ကိုစောင့်”

“အစောင့်အရှောက်တွေ အကာအကွယ်အချက်အချာတွေကို သေချာထိန်းထား၊ ကာကွယ်ရေးစနစ် မပျက်စီးအောင် သေချာလုပ်”

အမိန့်များ ပေးပြီးသည်နှင့် တစ်ပြိုင်နက် ဝံပုလွေအုပ်စုသည် တိကျသော စစ်ယန္တရားကြီးတစ်ခုပမာ လည်ပတ်လာတော့သည်။ ယင်းဖုန်းက အမဲလိုက်သမားများကို ဦးဆောင်ကာ ညအမှောင်ထဲသို့ တိတ်တဆိတ် ပျောက်ကွယ်သွားသည်။

ထျန်းပင်းက လုပ်ကြံသတ်ဖြတ်သူများကို ခေါ်ကာ ကြိုတင်သတ်မှတ်ထားသော ခြုံခိုစောင့်မည့်နေရာသို့ သွားပြီး ရန့်မြဲ့က အစောင့်အရှောက်များကို သူတို့၏နေရာများတွင် နေရာယူထားရန် အမိန့်ပေးလိုက်သည်။

ထို့နောက် လင်းထျန်းလုံသည် သူ့သမီးနှစ်ဦးကို ခေါ်ကာ ဝံပုလွေအသိုက်၏ အမြင့်ဆုံးနေရာရှိ စောင့်ကြည့်ရေးစခန်းသို့ သွားနေသည်။

ဤနေရာမှနေ၍ စစ်မြေပြင်တစ်ခုလုံးကို သူ ငုံ့ကြည့်နိုင်ပြီး သူ၏ ငွေပြာဘုရင်မျက်၀န်းဖြင့် မိုင်ပေါင်းများစွာ အကွာအဝေးရှိ စွမ်းအင်လှိုင်းများကို ရှင်းလင်းစွာ ဖမ်းယူနိုင်သည်။

“ဖေဖေ ဘာလို့ အဲဒီလူဆိုးတွေက သမီးတို့ကို လာတိုက်ကြတာလဲ” ရှောင်ယင်းက လင်းထျန်းလုံကိုမှီရင်း တိုးတိုးလေး မေးလိုက်သည်။

ရှောင်လန်ကလည်း မေးခွန်းထုတ်ချင်သော အကြည့်ဖြင့် ကြည့်နေသည်။

လင်းထျန်းလုံက ရှောင်ယင်းတို့နှစ်ဦးကို သူ၏ နှာခေါင်းဖြင့် ညင်သာစွာ ပွတ်သပ်ပေးရင်း ပြန်ဖြေလိုက်သည်။ “ဘာလို့လဲဆိုတော့ တချို့လူတွေက သူများအိမ်ကို အမြဲတမ်း လုယူချင်ကြလို့ပဲ၊ ဒါပေမယ့် ဖေဖေက ဒီနေရာကို ကာကွယ်မယ်၊ ပြီးတော့ သမီးတို့ကိုလည်း ကာကွယ်မယ်”

အဝေးရှိ မိုးကုတ်စက်ဝိုင်းတွင် မှိန်ဖျော့ဖျော့ မီးရောင်များကို မြင်နေရပြီဖြစ်သည်။ ၎င်းမှာ လောင်ကျွမ်းမီးလျှံဂိုဏ်း၏ ရှေ့ပြေးတပ်ဖွဲ့ ချဉ်းကပ်လာခြင်းပင်။

ပြင်းထန်သော တိုက်ပွဲကြီးတစ်ခု စတင်တော့မည်ဖြစ်သည်။

လင်းထျန်းလုံ စစ်မြေပြင်ကို ငုံ့ကြည့်နေစဉ် ဝံပုလွေအသိုက်တစ်ခုလုံးတွင် စစ်ရေးပြင်ဆင်မှုများကို အပြင်းအထန် လုပ်ဆောင်နေကြသည်။

လေမည်းတောင်ကြော ခြုံခိုစောင့်မည့်နေရာ….

ထျန်းပင်းသည် ချွန်ထက်သော ကျောက်ဆောင်များအနောက်တွင် ဝပ်နေပြီး သူ၏ ရွှေရောင်ရင့်ရင့် အမွေးများက ညအမှောင်ထဲတွင် တောင်ပေါ်ကျောက်ဆောင်များနှင့် လုံးဝနီးပါး တစ်သားတည်းဖြစ်နေသည်။

ကိုယ်တွင်း၌ စွမ်းအားများ ဆူပွက်နေသည်ကို သူ ခံစားမိလေသည်။ မြေအောက်မီးလျှံနှလုံးသား နှင့် ကြေးနီမြေအောက်မီးနဂါး အမြုတေတို့၏ ပေါင်းစပ်မှုက အံ့သြဖွယ် ပြောင်းလဲမှုတစ်ခုကို ဖြစ်ပေါ်စေခဲ့သည်။

“ခေါင်းဆောင် လုပ်ကြံသတ်ဖြတ်သူတွေ အားလုံး နေရာယူပြီးပါပြီ” ထိပ်တန်း လုပ်ကြံသတ်ဖြတ်သူ ဝံပုလွေတစ်ကောင်က တိုးတိုးလေး သတင်းပို့လာသည်။

“ခေါင်းဆောင်ရဲ့ ညွှန်ကြားချက်အတိုင်း ကျွန်တော်တို့ လှိုင်းသုံးလှိုင်းခွဲပြီး တပ်ဖြန့်ထားပါတယ်”

ထျန်းပင်းက ပြုံးလိုက်ပြီး သူ၏ခန္ဓာကိုယ်ပေါ်တွင် ချော်ရည်ပုံစံများ စီးဆင်းနေခဲ့သည်။

“အရမ်းကောင်းတယ်၊ ငါအချက်ပြတာကိုစောင့်၊ ပထမလှိုင်းက ဟန်ပြတိုက်မယ်၊ ဒုတိယလှိုင်းက ဘေးကနေ ဖြတ်တိုက်မယ်၊ တတိယလှိုင်းကတော့... ငါကိုယ်တိုင် ဦးဆောင်ပြီး ပင်မတပ်ဖွဲ့ဆီ တိုက်ရိုက် ဝင်တိုက်မယ်”

သူ၏ ရှေ့လက်သည်းဖြင့် မြေကြီးကို ညင်သာစွာ ထိလိုက်ရာ မာကျောသော ကျောက်ဆောင်မှာ အရည်ပျော်သွားပြီး သေးငယ်သော အမှတ်အသားတစ်ခု ကျန်ရစ်ခဲ့သည်။

အဆင့် ၂၅ သို့ ချိုးဖျက်ဝင်ရောက်ပြီးနောက် သူ၏ ထာ၀ရဗာဂျရာခန္ဓာမှာ ခံစစ်ပိုင်းတွင် ကြီးကြီးမားမား တိုးတက်လာရုံသာမက သူ၏ခွန်အားမှာလည်း အရည်အသွေးပိုင်းဆိုင်ရာတွင် ပြောင်းလဲမှုတစ်ခု ဖြစ်ပေါ်လာခဲ့သည်။

အကာအကွယ်အချက်အချာ ကာကွယ်ရေးလိုင်း….

ရန့်မြဲ့သည် ကာကွယ်ရေးအချက်အချာ တစ်ခုချင်းစီကို တည်ငြိမ်စွာ စစ်ဆေးနေသည်။

ရေပြာကြေးခွံအစောင့်အရှောက်များသည် ပူးပေါင်းကာကွယ်ရေး နည်းစနစ်များကို ကျွမ်းကျင်စွာ တတ်မြောက်နေပြီဖြစ်ပြီး သူတို့၏ လျှို့ဝှက်ရေခဲကြေးခွံချပ်ဝတ်မှ အလင်းရောင်များက ညအမှောင်ထဲတွင် ရေခဲပြာရောင် အလင်းတန်းတစ်ခုအဖြစ် ဆက်သွယ်နေသည်။

“စွမ်းအင်စီးဆင်းမှုကို ဂရုစိုက်” ရန့်မြဲ့က ရာထူးတိုးခါစ ရေပြာကြေးခွံအစောင့်အရှောက်များကို လမ်းညွှန်ပေးနေသည်။

“အစောင့်အရှောက်တွေဆိုတာ အထီးကျန်ဝံပုလွေတွေ မဟုတ်ဘူး၊ မင်းတို့ အဖော်တွေရဲ့ အငွေ့အသက်ကို ခံစားတတ်ရမယ်”

သူ ကိုယ်တိုင် သရုပ်ပြလိုက်ရာ သူ၏ရေခဲကြေးခွံချပ်ဝတ်တန်ဆာမှ တစ္ဆေအလင်းများ တလက်လက်တောက်ပနေပြီး ရေပြာကြေးခွံအစောင့်အရှောက်များ၏ ကြေးခွံများနှင့် ပဲ့တင်ထပ်လာသည်။

အသစ်နားလည်သဘောပေါက်ထားသော ဝိညာဉ်အေးခဲခြင်း လက္ခဏာရပ်က ဤအအေးဓာတ်ကို ပိုမိုနက်ရှိုင်းစေပြီး လေထုပင် အေးခဲသွားတော့မည့်အလား ဖြစ်နေသည်။

“ခေါင်းဆောင် အနောက်ဘက်အချက်အချာ သုံး အသင့်ဖြစ်ပါပြီ”

“အရှေ့ဘက်အချက်အချာ ခုနစ် နေရာယူပြီးပါပြီ”

ရန့်မြဲ့ ကျေနပ်စွာ ခေါင်းညိတ်လိုက်သည်။ ဤအသစ်ဖွဲ့စည်းထားသော အစောင့်အရှောက်တပ်ဖွဲ့မှာ နောက်ဆုံးတွင် တိုက်ခိုက်နိုင်စွမ်းရှိလာပြီဖြစ်သည်။

မုဆိုး ကင်းထောက်ကွန်ရက်….

ယင်းဖုန်းသည် တစ္ဆေတစ်ကောင်ပမာ ညအမှောင်ထဲတွင် ရွေ့လျားနေပြီး သူ့တွင် တစ္ဆေရေခဲအရိပ်ထွက်ပြေးခြင်း ပင်ကိုစွမ်းရည်ရှိခြင်းကြောင့် အရိပ်များကြားတွင် လွတ်လပ်စွာ ခုန်ပျံသွားလာနိုင်လေသည်။

မျက်လုံးသုံးလုံးပုတ်သင်ညို အကြေးခွံကို ကိုယ်နှင့်မကွာ သိမ်းဆည်းထားပြီး မှိန်ဖျော့ဖျော့ ဟင်းလင်းပြင်လှုပ်ခတ်မှုများ ထုတ်လွှတ်နေသည်။

“ရှေ့ပြေးတပ်ဖွဲ့ ဖွဲ့စည်းပုံက အကြီးစားချပ်ဝတ်တန်ဆာဝတ်စစ်သည် နှစ်ဆယ်၊ မီးမှော်ဆရာ ဆယ့်ငါးယောက်၊ ကင်းထောက်ဆယ်ယောက်၊ ထောက်ပံ့ရေး ငါးယောက်” သူက စိတ်ခြင်းဆက်သွယ်ခြင်းမှတစ်ဆင့် အချိန်နှင့်တစ်ပြေးညီ သတင်းပို့နေလေသည်။

အခန်း (၁၉၂) - ဟော်ကျန်းနှင့် စမ်းသပ်တိုက်ခိုက်ခြင်း (၁)

“ခေါင်းဆောင်က အဖွဲ့ရဲ့ အလယ်မှာရှိတယ်၊ စွမ်းအင်လှိုင်းတွေက... အရမ်းအစွမ်းထက်တယ်”

သူ ချထားခဲ့သော ရေခဲခြေရာ ထောင်ချောက်များသည် ရန်သူ၏ တိုက်ခိုက်လာနိုင်ချေရှိသော လမ်းကြောင်းအားလုံးကို ဖုံးလွှမ်းနေပြီဖြစ်သည်။

အဆင့်ချိုးဖျက်ဝင်ရောက်ပြီးနောက် သူ၏ တစ္ဆေရေခဲအရိပ်ထွက်ပြေးခြင်းမှာ ပိုမိုထူးဆန်းပြီး မှန်းဆရခက်လာကာ ဟင်းလင်းပြင်ကိုပင် အချိန်တိုအတွင်း ဖြတ်သန်းသွားလာနိုင်လာလေသည်။

စောင့်ကြည့်ရေးစခန်းပေါ်တွင်…..

ရှောင်ယင်းသည် လင်းထျန်းလုံ၏အမွေးများကို စိုးရိမ်တကြီး ဆုပ်ကိုင်ထားသည်။ “ဖေဖေ ဝံပုလွေဦးလေးတွေအားလုံး အသင့်ဖြစ်ပြီလား”

ရှောင်လန်လည်း ရှောင်ယင်းနည်းတူ စိုးရိမ်နေသော်ငြား ရှောင်ယင်းကို နှစ်သိမ့်ပေးလိုက်သည်။ “ဦးလေးထျန်းပင်းတို့က အရမ်း အစွမ်းထက်ပါတယ် စိတ်မပူနဲ့”

“ရှောင်ယင်း နင်ခံစားမိလား၊ ဝံပုလွေဦးလေးကြီး သုံးယောက် အဆင့်ချိုးဖျက်ဝင်ရောက်ပြီးနောက်ပိုင်း သူတို့ရဲ့အငွေ့အသက်တွေက... ပိုပြီးတော့တောင် မှန်းဆလို့မရအောင် ဖြစ်လာတယ်”

“အထူးသဖြင့် ဦးလေးထျန်းပင်းပဲ၊ ရေခဲခန္ဓာကိုယ်နဲ့ ပြီးပြည့်စုံအောင် ပေါင်းစပ်ထားတဲ့ အဲဒီချော်ရည်လိုစွမ်းအားမျိုးကို မကြားဖူးဘူး”

“ဒါ ဝံပုလွေဖေဖေ ပေးထားတဲ့ အခွင့်အရေးပဲ... အရင်ဘဝမှာဆိုရင် ဒီလိုပေါင်းစပ်မှုမျိုးက ဘယ်ပါရမီရှင်ကိုမဆို ရူးသွပ်သွားစေလောက်တယ်”

လင်းထျန်းလုံသည် သမီးနှစ်ဦးကို သူ၏ရင်ခွင်ထဲတွင် ညင်သာစွာ ကာကွယ်ထားပြီး ငွေပြာဘုရင်မျက်၀န်းဖြင့် အဝေးသို့ စူးစိုက်ကြည့်နေသည်။

ရန်သူ့ရှေ့ပြေးတပ်ဖွဲ့မှာ မိုင်နှစ်ဆယ်အကွာအဝေးအတွင်း ဝင်ရောက်လာပြီဖြစ်ပြီး အများဆုံး နာရီဝက်အတွင်း ဝံပုလွေအသိုက်၏ အစွန်အဖျားသို့ ရောက်ရှိလာမည်ဖြစ်သည်။

ထိုအချိန်တွင် မိခင်သစ်ပင်ထံမှ နောက်ထပ် လှုပ်ခတ်မှုတစ်ခု ထွက်ပေါ်လာသည်။ ကြယ်ရောင်များ မိုးရွာကျသကဲ့သို့ ကျဆင်းလာပြီး နှင်းဝံပုလွေအားလုံးပေါ်တွင် ပိုမိုခိုင်မာသော အလင်းဝန်းတစ်ခု ဖွဲ့စည်းသွားသည်။

[စနစ်အသိပေးချက်]။ ။တိုတမ်မိခင်သစ်ပင်၏ ပင်ကိုယ်စွမ်းရည် အသက်စွမ်းအင်ပဲ့တင်ထပ်ခြင်း အကျိုးသက်ရောက်မှု တိုးတက်လာပါသည်။ စွမ်းရည် စုစုပေါင်း ၂၀ ရာခိုင်နှုန်း သို့ မြင့်တက်လာပြီး စွမ်းအင်ပြန်လည်ပြည့်ဖြိုးမှု အမြန်နှုန်း ၅၀ ရာခိုင်နှုန်းအထိ မြင့်တက်လာပါသည်။

ဤရုတ်တရက်တိုးတက်လာသော အားဖြည့်မှုက ဝံပုလွေအုပ်စု၏ တိုက်ပွဲဝင်လိုစိတ်များကို ဆူပွက်သွားစေသည်။ သာမန်နှင်းဝံပုလွေများပင်လျှင် ကိုယ်တွင်း၌ စွမ်းအားများဆူပွက်နေသည်ကို ခံစားရပြီး ဝင်လာမည့် မည်သည့်ရန်သူကိုမဆို ဆွဲဆုတ်ပစ်နိုင်မည်ဟု ခံစားနေရသည်။

“အချိန်ကျပြီ” လင်းထျန်းလုံ၏ အသံက စစ်မြေပြင်တစ်ခုလုံးကို ပြန့်နှံ့သွားတော့သည်။ “ဒီလူသားတွေကို ဝံပုလွေအုပ်စုရဲ့ ဘုန်းကျက်သရေကို မျက်မြင်ကိုယ်တွေ့ မြင်တွေ့ခွင့်ပေးလိုက်ကြစမ်း”

တစ်ပြိုင်နက်တည်းမှာပင် အဝေးမှ မီးရောင်များကလည်း ငရဲတံခါးများ ပွင့်လာသကဲ့သို့ တဖြည်းဖြည်း နီးကပ်လာတော့သည်။

……

အေးစက်စက် လေပြင်းများက သတ်ဖြတ်လိုစိတ် အငွေ့အသက်များ သယ်ဆောင်ကာ ဝံပုလွေအသိုက်အတွင်း ရစ်ပတ်တိုက်ခတ်နေသည်။

လင်းထျန်းလုံသည် မြင့်မားသော နေရာတစ်ခုတွင် ရပ်လျက် သူ၏ ငွေပြာဘုရင်မျက်၀န်းဖြင့် အားအင်အပြည့်ဖြင့်ဖြစ်နေသော ဝံပုလွေအုပ်စုကို ခြုံငုံကြည့်နေသည်။

မဟာနှင်းအစောင့်အရှောက်များမှာ အဆင့် ၂၃ သို့ ရောက်ရှိနေပြီဖြစ်ပြီး ရေပြာကြေးခွံအစောင့်အရှောက်များမှာလည်း အဆင့် ၂၁ သို့ ရောက်ရှိနေပြီဖြစ်သည်။ ဝံပုလွေအသိုက်တစ်ခုလုံး၏ ကာကွယ်ရေးစွမ်းအားမှာ အဆင့်သစ်တစ်ခုသို့ တက်လှမ်းသွားပြီဖြစ်သည်။

အဝေးဆီမှ ညကောင်းကင်ယံတွင် မီးတောက်များ တလက်လက်ကခုန်နေသည်။ အနောက်ဘက်ရှိ မီးစွမ်းအားရှင် လူသားတပ်ဖွဲ့သည် ဆယ်မိုင်ပတ်လည်အတွင်းသို့ ဝင်ရောက်လာပြီဖြစ်သည်။

ကြယ်ရောင်အောက်တွင် ထိုစစ်သည်များ၏ ခန္ဓာကိုယ်ပေါ်ရှိ မီးတောက်ပုံစံများကို ရှင်းလင်းစွာ မြင်တွေ့နေရသည်။ သူတို့၏ ဦးဆောင်သူထံမှ ရင်ခုန်ဖွယ်ကောင်းကာ၊ ပူလောင်သော အငွေ့အသက်တစ်ခု ထွက်ပေါ်နေသည်။

“ဖေဖေ... သူတို့ရောက်လာပြီ” ရှောင်ယင်းက လင်းထျန်းလုံ၏ အမွေးများကို စိုးရိမ်တကြီး ဆုပ်ကိုင်လိုက်သည်။

ရှောင်လန်ကလည်း တူညီစွာ စိုးရိမ်နေသော်လည်း တည်ငြိမ်စွာ ပြောလိုက်သည်။ “မကြောက်နဲ့၊ ဖေဖေနဲ့ ဦးလေးတွေ ဝံပုလွေအသိုက်ကို ကာကွယ်ပေးလိမ့်မယ်”

“ဒီတစ်ခါ လာတဲ့ ရန်သူတွေက အရင်ကထက် ပိုအစွမ်းထက်တယ်” ရှောင်လန်သည် နှစ်သိမ့်ပေးရင်း သူမ၏မျက်လုံးများက အခြားအဓိပ္ပာယ်တစ်ခုကို ဖော်ပြနေသည်။

“ငါ ခံစားမိတယ်၊ အဲဒီခေါင်းဆောင်ရဲ့ အငွေ့အသက်က အရမ်း အန္တရာယ်များတယ်” ရှောင်ယင်းကလည်း သူမ၏ခံစားချက်ကို အကြည့်မှတစ်ဆင့် ပေးပို့လိုက်သည်။

ရန်သူ့တပ်ဖွဲ့သည် ငါးမိုင်အကွာအဝေးအတွင်းသို့ ဝင်ရောက်လာသည်နှင့် တစ်ပြိုင်နက် လင်းထျန်းလုံသည် ပြင်းထန်သော အန္တရာယ်ခံစားချက်တစ်ခုကို ရုတ်တရက် ခံစားလိုက်ရသည်။

ဤသည်မှာ စနစ်၏ အသိပေးချက်မဟုတ်ဘဲ မရေတွက်နိုင်သော တိုက်ပွဲများမှ သွေးပေးထားသည့် ပင်ကိုယ်အသိစိတ်ပင်ဖြစ်သည်။

“စောင့်ဦး” လင်းထျန်းလုံသည် ရှေ့တက်ရန်ပြင်နေသော ထျန်းပင်းကို စိတ်ခြင်းဆက်သွယ်ခြင်းမှတစ်ဆင့် တားထားလိုက်သည်။ “အခြေအနေ ပြောင်းသွားပြီ”

အနောက်ဘက်စစ်မျက်နှာစာရှိ ရန်သူ့တပ်ဖွဲ့များ ရုတ်တရက်ရပ်တန့်သွားသည်ကို သူတို့ မြင်လိုက်ကြရသည်။

ပြင်းထန်သော မီးတောက်များ ရစ်ပတ်ထားသည့် လူသားခေါင်းဆောင်က ညာလက်ကို မြှောက်လိုက်ရာ တပ်ဖွဲ့တစ်ခုလုံး၏ပုံစံမှာ လျင်မြန်စွာ ပြောင်းလဲသွားသည်။

ပို၍ ထူးဆန်းသည့်အရာမှာ အဆက်မပြတ် လည်ပတ်နေသော သတ္တုပြားတစ်ခုကို ကိုင်ဆောင်ထားသည့် ဝတ်ရုံခြုံထားသော ပုံရိပ်တစ်ခု တပ်ဖွဲ့ထဲမှထွက်ပေါ်လာခြင်းပင်။

“သူတို့ ဘာလုပ်နေတာလဲ” ထျန်းပင်းက နားမလည်စွာ မေးလိုက်သည်။

လင်းထျန်းလုံသည် ငွေပြာဘုရင်မျက်၀န်းဖြင့် သတ္တုပြားကို စူးစိုက်ကြည့်နေခဲ့သည်။ “တစ်ခုခုကို ရှာဖွေနေပုံရတယ်”

ရုတ်တရက် သတ္တုပြားမှ မျက်စိကျိန်းမတတ် အနီရောင်အလင်းတန်းတစ်ခု ထွက်လာပြီး ဝံပုလွေအသိုက်ဆီသို့ တိုက်ရိုက်ချိန်ရွယ်ထားလိုက်သည်။

တစ်ပြိုင်နက်တည်းလိုလိုပင် မီးတောက်များရစ်ပတ်ထားသော လူသားခေါင်းဆောင်က ရုတ်တရက်မော့ကြည့်လိုက်ရာ သူ၏ အကြည့်မှာ မိုင်ပေါင်းများစွာ အကွာအဝေးကို ဖောက်ထွင်းပြီး လင်းထျန်းလုံ၏မျက်လုံးများနှင့် ထိတ်တိုက်ဆုံတွေ့သွားတော့သည်။

“သူတို့ ငါတို့ကိုတွေ့သွားပြီ။” ယင်းဖုန်း၏အသံက အရိပ်များထဲမှ ထွက်ပေါ်လာသည်။

မျှော်လင့်ထားသည့်အတိုင်း နောက်တစ်ခဏတွင် ရန်သူ့တပ်ဖွဲ့ပုံစံ ထပ်မံပြောင်းလဲသွားသည်။ အကြီးစားချပ်ဝတ်တန်ဆာဝတ် စစ်သည်များက ရှေ့သို့တိုးလာပြီး၊ မီးမှော်ဆရာများက စတင် ဂါထာရွတ်ဆိုကာ၊ ကင်းထောက်တပ်ဖွဲ့များက ဖြန့်ထွက်သွားသည်။ လုံးဝ

လုံးဝ အဆင့်မြင့်တိုက်ပွဲဝင်ဖွဲ့စည်းပုံပင်ဖြစ်သည်။

“တိုက်ပွဲအတွက် ပြင်ဆင်ကြ” လင်းထျန်းလုံ၏အသံက ဝံပုလွေအုပ်စုတစ်ခုလုံး ပြန့်နှံ့သွားသည်။

သို့သော် ဤကဲ့သို့ တင်းမာနေသောအခြေအနေတွင် နောက်ထပ် ရုတ်တရက်အပြောင်းအလဲတစ်ခု ထပ်မံဖြစ်ပေါ်လာသည်။

“ဘုရင်ကြီး၊ အရေးပေါ် စစ်ရေးသတင်းပါ” အခြားအရပ်မျက်နှာများကို စောင့်ကြည့်ရန် တာဝန်ယူထားသော အမဲလိုက်သမားများက ရုတ်တရက် သတင်းပို့လာသည်။

“မြောက်ဘက်က စက်ရုပ်တွေကို ထိန်းချုပ်တဲ့ လူသားတွေနဲ့ တောင်ဘက်က ခံစစ်ပိုင်းမှာ ကျွမ်းကျင်တဲ့လူသားတွေ တစ်ပြိုင်နက်တည်း ချီတက်လာနေပါပြီ၊ မြောက်ဘက်တပ်ဖွဲ့က ဝံပုလွေအသိုက်နဲ့ ဆယ့်ငါးမိုင်ပဲ ကွာတော့တယ်၊ တောင်ဘက်တပ်ဖွဲ့ကလည်း တိမ်တောင်တန်းဘက်ကနေ ဖိအားပေးလာနေပြီ”

အရပ်သုံးမျက်နှာမှ ဝိုင်းရံထားခြင်း…..။

လင်းထျန်းလုံ ချက်ချင်း နားလည်သွားသည်။ ဤသည်မှာ သာမန် ရှေ့ပြေးတပ်ဖွဲ့၏ စမ်းသပ်မှုလုံးဝမဟုတ်ဘဲ သေချာစီစဉ်ထားသော ဝိုင်းရံတိုက်ခိုက်မှုပင်ဖြစ်သည်။

“သူတို့က ငါတို့ကို တစ်ချက်တည်းနဲ့ အမြစ်ပြတ်ချေမှုန်းချင်နေတာ” ရန့်မြဲ့၏အသံထဲတွင် အေးစက်မှု အရိပ်အယောင်များ ပါဝင်နေသည်။

ထျန်းပင်းကမူ ခပ်သြသြ ဟိန်းဟောက်လိုက်၏။ “ဒါဆို ဘယ်သူ အရင်ကျမလဲဆိုတာ ကြည့်ကြတာပေါ့။”

သို့သော် လင်းထျန်းလုံကို စိုးရိမ်စေသည်မှာ အနောက်ဘက်ရှိ မီးစွမ်းအားရှင်များ၏ ထူးဆန်းသော အပြုအမူဖြစ်သည်။ သူတို့သည် ဝံပုလွေအသိုက်ကို ရှာဖွေတွေ့ရှိပြီးဖြစ်သော်လည်း ချက်ချင်း မတိုက်ခိုက်ကြပေ။ ယင်းအစား တစ်ခုခုကို စောင့်ဆိုင်းနေပုံရသည်။

အချိန်များ တစ်မိနစ်ပြီးတစ်မိနစ် ကုန်လွန်သွားကာ စစ်မြေပြင်ရှိလေထုမှာ ပိုမိုတင်းမာလာသည်။ မြောက်ဘက်နှင့် တောင်ဘက်ရှိ ရန်သူ့တပ်ဖွဲ့များသည် တည်ငြိမ်စွာ ဆက်လက်ချီတက်လာနေပြီး အနောက်ဘက်ရှိ ရန်သူများမှာမူ ငါးမိုင်အကွာတွင် ထူးဆန်းစွာ ငြိမ်သက်နေကြသည်။

“သူတို့က ကျန်တဲ့တပ်ဖွဲ့နှစ်ခု နေရာယူမယ့်အချိန်ကို စောင့်နေတာ” လင်းထျန်းလုံက တည်ငြိမ်စွာ ခွဲခြမ်းစိတ်ဖြာလိုက်သည်။ “သူတို့က အရပ်သုံးမျက်နှာကနေ တစ်ပြိုင်နက်တည်း အပြည့်အဝ ထိုးစစ်ဆင်ချင်နေတာ”

ထိုအချိန်မှာပင် မိခင်သစ်ပင်ထံမှ ပြင်းထန်သောလှုပ်ခတ်မှုများ ရုတ်တရက် ထွက်ပေါ်လာသည်။ ကြယ်ရောင်များ ရူးသွပ်စွာ လည်ပတ်နေပြီး ပင်မပင်စည်ပေါ်ရှိ အက်ကွဲကြောင်းများမှ မျက်စိကျိန်းမတတ် တောက်ပသော အလင်းများ ပေါက်ကွဲထွက်လာခဲ့၏။

[စနစ်အသိပေးချက်]။ ။တိုတမ်မိခင်သစ်ပင်သည် အန္တရာယ်ကို အာရုံခံမိပြီး အသွင်ပြောင်းလဲမှု အရှိန်မြှင့်တင်နေပါသည်။ ၇၀ ရာခိုင်နှုန်း ပြီးစီးပါသည်။ ပင်ကိုယ်စွမ်းရည် အသက်စွမ်းအင် ပဲ့တင်ထပ်ခြင်း၏ အကျိုးသက်ရောက်မှုမှာ ၂၅ ရာခိုင်နှုန်းသို့ မြင့်တက်သွားပါသည်။

ဤရုတ်တရက် အားပြည့်လာခြင်းက ဝံပုလွေအုပ်၏ တိုက်ပွဲဝင်လိုစိတ်ကို ပိုမိုမြင့်တက်သွားစေသည်။ သို့သော် သူတို့၏ လက်ရှိစွမ်းအားတစ်ခုတည်းဖြင့် ရန်သူ့တပ်ဖွဲ့သုံးခုကို တစ်ပြိုင်နက်တည်းကိုင်တွယ်ရန် ခက်ခဲမည်ကို လင်းထျန်းလုံ ကောင်းကောင်းသိနေသည်။

သူ ရွေးချယ်မှုတစ်ခု ပြုလုပ်ရပေမည်။

“အစီအစဉ် ပြောင်းမယ်” လင်းထျန်းလုံ၏အသံမှာ ရှင်းလင်းပြတ်သားနေခဲ့သည်။ “ငါတို့ရဲ့ စွမ်းအားကို စုစည်းပြီး စစ်မျက်နှာတစ်ခုကို အရင်ဖောက်ထွက်ရမယ်”

“ဘုရင်ကြီး၊ ဘယ်စစ်မျက်နှာကို ရွေးမလဲ” စစ်သူကြီးသုံးဦးလုံးက တစ်ပြိုင်နက် မေးလိုက်ကြသည်။

လင်းထျန်းလုံသည် ငွေပြာဘုရင်မျက်၀န်းများဖြင့် အရပ်သုံးမျက်နှာကို ဖြတ်သန်းကြည့်ရှုလိုက်သည်။

မြောက်ဘက်ရှိ လက်နက်အပြည့်အစုံတပ်ဆင်ထားသော စက်ရုပ်တပ်မတော်၊ တောင်ဘက်ရှိ ခိုင်မာသော ခံစစ်ရှိသည့် အကြီးစားချပ်ဝတ်တပ်ဖွဲ့နှင့် အနောက်ဘက်ရှိ ပြင်းထန်စွာ တိုက်ခိုက်နိုင်သော မီးစွမ်းအားရှင်များ...

“အနောက်ဘက်ကို တိုက်မယ်။” သူ နောက်ဆုံးတွင် ဆုံးဖြတ်လိုက်သည်။ “ဒီမီးစွမ်းအားရှင်တွေက တိုက်စစ်အသန်ဆုံးဖြစ်ပေမယ့် သူတို့ရဲ့ ခံစစ်က နှိုင်းယှဉ်ကြည့်ရင် အားနည်းတယ်”

သူသည် မီးတောက်များရစ်ပတ်ထားသော ပုံရိပ်ဆီသို့ ကြည့်လိုက်ပြီး ပြိုင်ဘက်၏ အချက်အလက်ကို စစ်ဆေးရန် ငွေပြာဘုရင်မျက်၀န်းက အနည်းငယ် လင်းလက်သွားသည်။

[အမည်]။ ။ဟော်ကျန်း (မီးဓာတ်၊ လောင်ကျွမ်းမီးလျှံဂိုဏ်း ခေါင်းဆောင်)

[အဆင့်]။ ။၂၉ (ခြေလှမ်း၀က်ဘုရင်အဆင့်)

[ပင်ကိုစွမ်းရည်များ]။ ။မီးလျှံကိုယ်ထည် (ရွှေရောင် အဆင့်မြင့်)၊ မီးလျှံဘုရင်သွေးမျိုးဆက် (ခရမ်းရောင် အလယ်အလတ်)၊ မသေမျိုးမီးလျှံဝိညာဉ် (ရွှေရောင် အဆင့်မြင့်)