အခန်း (၁၉၃-၁၉၄)

အခန်း (၁၉၃) - ဟော်ကျန်းနှင့် စမ်းသပ်တိုက်ခိုက်ခြင်း (၂)

[စွမ်းရည် လက္ခဏာရပ်များ]။ ။မီးလျှံပေါက်ကွဲခြင်း (ရွှေရောင် အဆင့်မြင့်)၊ မီးနဂါးကခုန်ခြင်း (ခရမ်းရောင် အလယ်အလတ်)

[မသေမျိုးမီးလျှံဝိညာဉ် (ရွှေရောင် အဆင့်မြင့်)]။ ။ အထူးပင်ကိုစွမ်းရည်။ သေပြီးနောက် ပြန်လည်ရှင်သန်နိုင်သော အခွင့်အရေး သုံးကြိမ်ပိုင်ဆိုင်သည်။

တစ်ကြိမ်သေဆုံးတိုင်း မီးလျှံကိုယ်ပွားတစ်ခုက အလိုအလျောက် အသေခံပေးပြီး အစစ်အမှန်ကိုယ်ထည်က အခြားနေရာတစ်ခုတွင် ပိုမိုမြင့်မားသော စွမ်းအားဖြင့် ပြန်လည်ရှင်သန်လာပေမည်။ အခွင့်အရေး နှစ်ကြိမ်ကျန်ရှိသေးသည်။

သေဆုံးပြီး ပြန်လည်ရှင်သန်လာတိုင်း စွမ်းအားမှာ အဆင့်ဆယ်ဆင့် မြင့်တက်လာမည်။

ပထမအကြိမ် ပြန်လည်ရှင်သန်ခြင်း - ၂၀ မှ ၂၉ (အသုံးပြုပြီး)

ဒုတိယအကြိမ် ပြန်လည်ရှင်သန်ခြင်း - အသုံးမပြုရသေး +၁

တတိယအကြိမ် ပြန်လည်ရှင်သန်ခြင်း - အသုံးမပြုရသေး +၁

အခွင့်အရေး သုံးကြိမ်လုံး ကုန်ဆုံးသွားပါက ပင်ကိုစွမ်းရည် ပျောက်ကွယ်သွားမည်။

“မသေမျိုးမီးလျှံဝိညာဉ်...” လင်းထျန်းလုံ၏ မျက်လုံးများထဲတွင် လေးနက်မှုအရိပ်အယောင်တစ်ခု လျှပ်တစ်ပြတ်ပေါ်လာသည်။

“သူ့ကို မြင်ဖူးသလိုဖြစ်နေတာ မဆန်းပါဘူး၊ သူက ဟိုတုန်းက တောင်ကြားထဲမှာ အရိပ်မီးလျှံကျားသစ်ဘုရင်နဲ့ တိုက်ခဲ့တဲ့ လူသားပဲ၊ ငါ့ရဲ့ ဖိအားနဲ့ သတ်လိုက်တာက ကိုယ်ပွားတစ်ခုပဲ ဖြစ်နေတာကိုး”

ပြဿနာအတိမ်အနက်ကို သူ ချက်ချင်း သဘောပေါက်လိုက်သည်။ ရန်သူကို ယခု အသေသတ်ပြီး ပြန်လည်ရှင်သန်အောင် လုပ်ခြင်းက ပိုမိုသန်မာလာစေရုံသာ ရှိမည်။

သူ ပြန်လည်ရှင်သန်ခြင်းကို အသက်မဝင်စေဘဲ ပြင်းထန်သော ဒဏ်ရာမျိုးကို ပေးမှရမည်။

အမိန့်များကို ၀ံပုလွေအုပ်စုထံ လျင်မြန်စွာ ပေးပို့လိုက်သည်။

ထျန်းပင်းက လုပ်ကြံသတ်ဖြတ်သူများကို ဦးဆောင်ကာ အနောက်ဘက်သို့ တိတ်တဆိတ် ရွှေ့သွားလေသည်။ ရန့်မြဲ့က အစောင့်အရှောက်များကို အနောက်ဘက် အကာအကွယ်များအား အားဖြည့်ရန် အမိန့်ပေးလိုက်သည်။

ယင်းဖုန်း၏လက်အောက်မှ အမဲလိုက်သမားများကမူ ကျန်သည့် ရန်သူ့တပ်ဖွဲ့ နှစ်ဖွဲ့၏ စစ်ချီတက်မှုကို နှောင့်ယှက်ရန် တာဝန်ယူထားသည်။

ရှောင်ယင်းက လင်းထျန်းလုံကို စိုးရိမ်တကြီး ကြည့်လိုက်၏။ “ဖေဖေ သတိထားနော်...”

ရှောင်လန်ကလည်း သူ၏အမွေးများကို တင်းကြပ်စွာ ဆုပ်ကိုင်ထားလေသည်။ “ဖေဖေ ဟိုလူဆိုးက အရမ်းအစွမ်းထက်ပုံရတယ်။”

လင်းထျန်းလုံက ကလေးငယ်နှစ်ဦးကို ညင်သာစွာ ပွတ်သပ်လိုက်လေသည်။ “မစိုးရိမ်ပါနဲ့၊ ဖေဖေ မကြာခင်ပြန်လာခဲ့မယ်”

သူ အနောက်ဘက်သို့ လှည့်လိုက်ရာ ငွေပြာဘုရင်မျက်၀န်းထဲတွင် အေးစက်သော အလင်းတစ်ချက် လျှပ်တစ်ပြတ် ပေါ်လာခဲ့တော့သည်။

လင်းထျန်းလုံ ပြင်ဆင်နေစဉ် အနောက်ဘက်ရှိ ရန်သူ့ခေါင်းဆောင် ဟော်ကျန်းက ရုတ်တရက် တစ်ယောက်တည်း ရှေ့ထွက်လာပြီး ဝံပုလွေအသိုက်နှင့် သုံးမိုင်ခန့်အကွာတွင် ရပ်လိုက်သည်။ ထို့နောက် သူက လက်မြှောက်ကာ ရန်စသည့်အမူအရာတစ်ခု လုပ်ပြလိုက်သည်။

“တစ်ယောက်ချင်း တိုက်ချင်တာတဲ့လား” ထျန်းပင်း ဟိန်းဟောက်လိုက်သည်။

“ဘုရင်ကြီး ကျွန်တော် သူ့ကို စမ်းသပ်ကြည့်ပါရစေ”

“မလုပ်နဲ့” လင်းထျန်းလုံက ထျန်းပင်းကို တားထားလိုက်၏။ “ဒီပြိုင်ဘက်ကို ငါကိုယ်တိုင် ကိုင်တွယ်မယ်။”

ထို့နောက် သူ၏ ငွေရောင်ကိုယ်ထည်က ညကောင်းကင်ယံတွင် လှပသော မျဉ်းကွေးတစ်ခုကို ရေးဆွဲလိုက်သည့်အလား စစ်မြေပြင်ဗဟိုတွင် တည်ငြိမ်စွာ ဆင်းသက်လာခဲ့သည်။

ကလေးငယ်နှစ်ဦးမှာတော့ စိုးရိမ်တကြီး ကြည့်နေပြီး ဝံပုလွေအဖွဲ့ဝင်များအားလုံးမှာ အသက်ရှူရပ်မတတ် ဖြစ်နေကြသည်။

လင်းထျန်းလုံကိုယ်တိုင် စစ်မြေပြင်သို့ ထွက်လာသည်ကို မြင်သောအခါ ဟော်ကျန်း၏မျက်လုံးများထဲတွင် စိတ်လှုပ်ရှားမှု အရိပ်အယောင် လင်းလက်သွားသည်။

“နှင်းဝံပုလွေဘုရင် မတွေ့ရတာ ကြာပြီ၊ မင်းကို သတိရလွန်းလို့ သေတော့မလိုပဲ” ဟော်ကျန်းသည် စကားပြောနေရင်းမှ သူ၏လက်ထဲတွင် မီးတောက်လှံတစ်လက်ကို ဖန်တီးကာ ရှေ့သို့ တိုက်ရိုက်ချိန်ရွယ်လိုက်သည်။

လင်းထျန်းလုံ အပိုစကားများ ပြောမနေတော့ပေ၊ ငွေပြာမိုးကြိုးလက်သည်းကို တိုက်ရိုက် ထုတ်လွှတ်လိုက်သော်လည်း ၎င်း၏စွမ်းအားကို တမင်တကာ ထိန်းချုပ်ထားသည်။

လျှပ်စီးနှင့် ရေခဲများ ရောယှက်နေသော်လည်း သူ၏ခွန်အား ခုနစ်ဆယ်ရာခိုင်နှုန်းကိုသာ အသုံးပြုခဲ့သည်။

ဟော်ကျန်း၏မီးလျှံကိုယ်ထည်မှ မီးတောက်များ ပေါက်ကွဲထွက်လာပြီး ဤတိုက်ခိုက်မှုကို အတင်းအကုပ် ကာကွယ်လိုက်သည်။ သူ၏ မျက်နှာတွင် လှောင်ပြောင်သည့် အမူအရာတစ်ခု ပေါ်လာလေသည်။

“ဒါပဲလား၊ မင်းက အရမ်းအစွမ်းထက်တယ်ဆို၊ မဟုတ်ဘူးလား”

လင်းထျန်းလုံက တည်ငြိမ်စွာပင် တုံ့ပြန်လိုက်ပြီး ငွေပြာဘုရင်မျက်၀န်းဖြင့် ရန်သူ၏ ရင်ဘတ်ရှိ စွမ်းအင်ဗဟိုချက်ကို ပစ်မှတ်ထားနေသည်။

နက်နဲရေခဲကောင်းကင်ဆုတ်ဖြဲလက်သည်း စွမ်းရည်မှာ နောက်တစ်ကြိမ် ထွက်ပေါ်လာသည်။

ဤတစ်ကြိမ်တွင် ခန့်မှန်း၍မရသောလမ်းကြောင်းဖြင့် ဟော်ကျန်း၏ ခြေဆစ်လက်ဆစ်များဆီသို့ တိုက်ရိုက်ဦးတည်သွားသည်။

ရည်ရွယ်ချက်ကို ရိပ်မိသွားသဖြင့် ဟော်ကျန်းက မီးနဂါးကခုန်ခြင်းကို အစွမ်းကုန် ထုတ်လွှတ်လိုက်ရာ မီးနဂါးလေဆင်နှာမောင်းကြီးတစ်ခု ဟိန်းဟောက်ထွက်ပေါ်လာသည်။

သူ၏ မျက်လုံးများထဲတွင် အံ့သြမှုအရိပ်အယောင်တစ်ခု ဖြတ်ပြေးသွားသည်။ ဤနှင်းဝံပုလွေဘုရင်၏ တိုက်ခိုက်ရေးဉာဏ်ရည်မှာ သာမန်မှော်သားရဲများထက် များစွာ သာလွန်နေလေသည်။

သူတို့နှစ်ဦးသည် စစ်မြေပြင်ပေါ်တွင် အပြင်းအထန် တိုက်ခိုက်နေကြသည်။

လင်းထျန်းလုံသည် တိုက်ပွဲ၏အရှိန်အဟုန်ကို အဆက်မပြတ် ထိန်းချုပ်နေခဲ့သည်။ သူ၏။ တိုက်ခိုက်မှုတိုင်းက အရေးကြီးသောနေရာများကို မထိသော်လည်း ဟော်ကျန်းကိုမူ ကမန်းကတန်း တုံ့ပြန်နေရစေသည်။

ဟော်ကျန်း၏ မျက်နှာအမူအရာမှာ ပိုမိုဆိုးရွားလာခဲ့သည်။ လင်းထျန်းလုံမှာ အစွမ်းကုန်တိုက်ခိုက်နေခြင်းမဟုတ်ကြောင်း သူ ခံစားမိသည်။ သူ့ကို ပို၍ အထိတ်တလန့်ဖြစ်စေသည်မှာ ဤနှင်းဝံပုလွေဘုရင်၏ တိုက်ကွက်တိုင်းက ကြောက်မက်ဖွယ်ကောင်းလောက်အောင် တိကျနေခြင်းပင်။

လက်သည်းချက်တိုင်းက အသက်အန္တရာယ်ရှိသော နေရာများကို ရှောင်ရှားနေသော်လည်း အဆစ်များနှင့် စွမ်းအင်စီးဆင်းမှု အချက်အချာများကို အထူးပစ်မှတ်ထားနေသည်။ ၎င်းက သူ၏အသက်ကို မယူဘဲ တိုက်ခိုက်နိုင်စွမ်းမရှိအောင်လုပ်ရန် ရည်ရွယ်နေသည်မှာ ရှင်းလင်းနေသည်။

မီးလျှံပေါက်ကွဲခြင်း နောက်တစ်ကြိမ်ထွက်ပေါ်လာပြီး လောင်ကျွမ်းနေဿာ မီးကွင်းတစ်ခု အပြင်ဘက်သို့ ပြန့်ကျဲသွားသည်။

သို့သော် လင်းထျန်းလုံက အရာအားလုံးကို ကြိုတင်သိမြင်ပြီးဖြစ်ကာ အစွန်းရောက်အရိပ်လျှပ်စီးခြေလှမ်းဖြင့် အလွယ်တကူရှောင်တိမ်းလိုက်သည်။

တစ်ချိန်တည်းမှာပင် သူ၏ငွေပြာဘုရင်မျက်၀န်း စွမ်းရည်မှ ဟင်းလင်းပြင်းချိတ်ပိတ်ခြင်း လက္ခဏာရပ် အသက်ဝင်သွားသည်။ လက်သည်းတစ်ချက်က ဟော်ကျန်း၏ ညာဘက်ပခုံးကို တိကျစွာ ပိုင်းဖြတ်သွားသည်။

ဂျွတ်။

ပခုံးရိုးကျိုးသံက ရှင်းလင်းစွာ ထွက်ပေါ်လာသည်။

ဟော်ကျန်း ညည်းညူလိုက်ရပြီး အေးစက်စက် ချွေးများက သူ၏ကျောကို ချက်ချင်း စိုရွှဲသွားစေ၏။ တိုက်ပွဲဆက်ဖြစ်နေပါက သူ အမှန်တကယ် အရှင်လတ်လတ် အဖမ်းခံရနိုင်ကြောင်း သဘောပေါက်လိုက်သည်။

မသက်သာသည့်အဆုံး အံကြိတ်ကာ သူ၏တပ်ဖွဲ့ကို အချက်ပြလိုက်သည်။ ထို့နောက် မီးလျှံကိုယ်ထည်ကို အပြည့်အဝအသက်သွင်းလိုက်ရာ မီးလောင်နေသော ကြယ်ပျံတစ်စင်းပမာ ပြောင်းလဲသွားပြီး နောက်သို့ လျင်မြန်စွာ ဆုတ်ခွာသွားသည်။

သူတို့၏ခေါင်းဆောင် ရှုံးနိမ့်သွားသည်ကို မြင်သောအခါ အနောက်ဘက်ရှိ ရန်သူ့တပ်ဖွဲ့များမှာ ချက်ချင်း ဖရိုဖရဲဖြစ်သွားပြီး အထိတ်တလန့် ဆုတ်ခွာကြတော့သည်။

လင်းထျန်းလုံက နောက်မှမလိုက်ဘဲ သူတို့ထွက်သွားသည်ကို အေးစက်စက်ဖြင့်သာ စောင့်ကြည့်နေခဲ့သည်။ သူတို့ ဤတိုက်ပွဲကို အနိုင်ရခဲ့သော်လည်း အစစ်အမှန်တိုက်ပွဲမှာ ယခုမှ စတင်ခြင်းဖြစ်ကြောင်း သူသိနေသည်။

ဝံပုလွေအသိုက်သို့ ပြန်ရောက်သောအခါ ရှောင်ယင်းနှင့်ရှောင်လန်တို့က သူ့ကို ချက်ချင်းဝိုင်းအုံလာကြသည်။

“ဖေဖေ အရမ်းစွမ်းတာပဲ” ရှောင်ယင်း၏ မျက်လုံးများ လင်းလက်နေလေသည်။

ရှောင်လန်ကမူ ထုံးစံအတိုင်း ပိုမိုသတိထားတတ်သည်။ “ဟိုလူဆိုး ထွက်ပြေးသွားတာ နှမြောစရာပဲ”

လင်းထျန်းလုံက ကလေးငယ်နှစ်ဦးကို ညင်သာစွာ ပွတ်သပ်ပေးလိုက်ပြီး ယင်းဖုန်းဘက်သို့ လှည့်ကာ မေးလိုက်သည်။ “ကင်းထောက်ရလဒ်တွေက ဘယ်လိုလဲ”

“အဲဒီခေါင်းဆောင်က မိုင်သုံးဆယ်အကွာမှာ သူ့တပ်တွေကို ပြန်စုစည်းနေတယ်၊ ဒါပေမယ့် သေဆုံးဒဏ်ရာရသူ နည်းပါတယ်” ယင်းဖုန်းက သတင်းပို့လာသည်။ “ကျန်တဲ့ ရန်သူ့တပ်ဖွဲ့ နှစ်ဖွဲ့က ဆယ်မိုင်အကွာမှာ စခန်းချထားတယ်၊ သူတို့ကြည့်ရတာ ကျွန်တော်တို့ကို စောင့်ကြည့်နေပုံပဲ”

ရန့်မြဲ့က ဆက်ပြောလာသည်။ “ကျွန်တော်တို့ဘက်က အသေးစားဒဏ်ရာရသူ နှစ်ဆယ့်သုံးယောက် ရှိတယ်၊ သေဆုံးသူမရှိဘူး၊ မီးစွမ်းအင်သုံး ပစ္စည်းတချို့ကို သိမ်းဆည်းနိုင်ခဲ့ပါတယ်”

ထျန်းပင်းကမူ စိတ်အားထက်သန်နေသည်။ “ဘုရင်ကြီး ကျွန်တော်တို့ လိုက်တိုက်ပြီး အသာစီးယူလိုက်ရမလား”

“မလုပ်နဲ့” လင်းထျန်းလုံ ခေါင်းခါလိုက်သည်။ “အခု သတ်လိုက်ရင် သူ့ကို ပိုသန်မာသွားစေရုံပဲရှိမယ်၊ အရေးအကြီးဆုံးက ငါတို့ရဲ့ စွမ်းအားကို မြှင့်တင်ပြီး နောက်တစ်ကြိမ်တိုက်ခိုက်မှုအတွက် ပြင်ဆင်ဖို့ပဲ”

မိုင်သုံးဆယ်အကွာရှိ ယာယီစခန်းတစ်ခုထဲတွင်……

ဟော်ကျန်းသည် အခြားတပ်ဖွဲ့နှစ်ခု၏ ခေါင်းဆောင်များနှင့် လျှို့ဝှက်ဆက်သွယ်ရေးစနစ်ဖြင့် ဆက်သွယ်နေသည်။

“အဲဒီ နှင်းဝံပုလွေဘုရင်က ထင်ထားတာထက် ပိုအစွမ်းထက်နေတယ်” ဟော်ကျန်း ဒဏ်ရာရနေသောပခုံးကို ကိုင်ထားရင်းပြောလိုက်သည်။ “သူက ငါ့ရဲ့ စွမ်းရည်တွေကို ရိပ်မိပြီး သေစေနိုင်တဲ့ တိုက်ကွက်တွေကို တမင်တကာရှောင်နေတာ”

လိန့်ဟောင်၏အသံက ဆက်သွယ်ရေးစနစ်မှတစ်ဆင့် ထွက်ပေါ်လာသည်။ “မင်းတောင် ရှုံးသွားတာလား၊ သူရဲ့စွမ်းအားကို ငါတို့ ပြန်သုံးသပ်ဖို့ လိုနေပြီထင်တယ်”

ယန်ချင်းယွမ်၏ အသံပါ တစ်ဆက်တည်းထွက်လာခဲ့သည်။ “အာရုံခံကိရိယာတွေအရ ဝံပုလွေအသိုက်ပတ်လည်က စွမ်းအင်လှိုင်းတွေက တဟုန်ထိုး မြင့်တက်နေတယ်၊ ဗျူဟာကို ပြန်စဉ်းစားဖို့နဲ့ ယာယီဆုတ်ခွာဖို့ ကျွန်တော် အကြံပြုချင်တယ်။”

“သဘောတူတယ်” ဟော်ကျန်းကလည်း အံကြိတ်ကာ ပြောလိုက်သည်။ “ဒီစမ်းသပ်မှုက သတင်းအချက်အလက် လုံလုံလောက်လောက် ရသွားပြီ၊ အဲဒီဝံပုလွေဘုရင်က ဘုရင်အဆင့် စွမ်းအားရှိတာသေချာတယ်၊ ပြီးတော့ သူ့ရဲ့ဉာဏ်ရည်ကလည်း အရမ်းမြင့်မားလွန်းတယ်။”

တိုတောင်းသော ဆက်သွယ်မှုအပြီးတွင် သုံးဖွဲ့လုံး သဘောတူညီချက်တစ်ခု ရရှိသွားကြသည်။

ထိုသဘောတူညီချက်မှာ လောလောဆယ် ဆုတ်ခွာပြီး ပိုမိုကောင်းမွန်သော အခွင့်အရေးကို စောင့်ဆိုင်းရန်ပင်။

ဝံပုလွေအသိုက်အတွင်း လင်းထျန်းလုံသည် ငွေပြာဘုရင်မျက်၀န်းမှတစ်ဆင့် ရန်သူ့တပ်ဖွဲ့ သုံးဖွဲ့လုံး ဆုတ်ခွာသွားသည်ကို စောင့်ကြည့်နေခဲ့သည်။ သို့သော် ဤသည်မှာ မုန်တိုင်းမလာမီ တိတ်ဆိတ်မှုမျှသာဖြစ်ကြောင်း သူသိနေသည်။

“ဘုရင်မင်းမြတ် သူတို့ တကယ်ပဲတပ်ဆုတ်သွားကြပြီ” ထျန်းပင်း အနည်းငယ် နားမလည်နိုင်ဖြစ်နေလေသည်။

“ဘာလို့ အခုအချိန်မှာ အသာစီးယူပြီး မတိုက်ရတာလဲ။”

“သူတို့က စောင့်နေတာပဲ” လင်းထျန်းလုံက အနောက်ဘက်သို့ ကြည့်ရင်း ပြောလိုက်သည်။

“အဲဒီခေါင်းဆောင် ပြန်ကောင်းလာမယ့်အချိန်ကို စောင့်နေတာ၊ ပိုကောင်းတဲ့အခွင့်အရေးကို စောင့်နေတာ၊ ပြီးတော့ ငါတို့က...”

သူ၏ အကြည့်က ဝံပုလွေအုပ်စုအပေါ် ဖြတ်သန်းသွားသည်။

အခန်း (၁၉၄) - လောင်ကျွမ်းမီးလျှံဂိုဏ်း၏ ထူးဆန်းသောလုပ်ဆောင်ချက်၊ မုန်တိုင်းမလာမီ ငြိမ်သက်ခြင်း (၁)

“...ဒီအချိန်ကို အသုံးချပြီး ပိုသန်မာလာအောင်လုပ်ရမယ်”

မိခင်သစ်ပင်က သူ၏ဆုံးဖြတ်ချက်ကို သိရှိသွားပုံရသည်။ ကြယ်ရောင်များ ပိုမိုတောက်ပလာပြီး အသွင်ပြောင်းလဲမှု လုပ်ငန်းစဉ်မှာ ၇၈ ရာခိုင်နှုန်း သို့ ရောက်ရှိသွားသည်။ အသက်စွမ်းအင်ပဲ့တင်ထပ်ခြင်း၏ အကျိုးသက်ရောက်မှုက နှင်းဝံပုလွေတိုင်း သူတို့၏စွမ်းအားများ မြင့်တက်လာသည်ကို ခံစားနေရစေသည်။

“ရှောင်လန် ဝံပုလွေဖေဖေဆီမှာ အစီအစဉ်သစ်တစ်ခု ရှိနေပြီထင်တယ်”

“အင်း ဝံပုလွေအသိုက်တစ်ခုလုံး ပိုပြီးသန်မာလာတာကို ငါခံစားနေရတယ်”

လင်းထျန်းလုံသည် အဝေးသို့ ငေးကြည့်နေပြီး သူ၏စိတ်ထဲတွင် ဆုံးဖြတ်ချက်ချပြီးဖြစ်သည်။

နောက်တစ်ကြိမ် ရင်ဆိုင်ရလျှင် ဝံပုလွေအသိုက်အား ကျူးကျော်၍မရသည်ကို ရန်သူအားလုံး နားလည်အောင် လုပ်ပေးရပေမည်။

မိုးကုတ်စက်ဝိုင်းမှ နောက်ဆုံးကြယ်အလင်းရောင် မှေးမှိန်သွားပြီး အနက်ရှိုင်းဆုံး အမှောင်ထုက ထျန်းစန်းတောအုပ်ကို ဖုံးလွှမ်းသွားသည်။ သို့သော် ဝံပုလွေအသိုက်မှာမူ တိတ်ဆိတ်ခြောက်ကပ်နေခြင်း မရှိချေ။

ကြယ်တာရာအကာအကွယ်၏ တောက်ပမှုနှင့် တိုတမ်မိခင်သစ်ပင်ထံမှ ထွက်ပေါ်နေသော အလင်းဝန်းတို့ ရောယှက်ကာ နှင်းဝံပုလွေများ၏ ဤသန့်စင်သော မဟာမြင့်မြတ်နယ်မြေကို နေ့ခင်းဘက်ပမာ လင်းထိန်နေစေသည်။

လေထုထဲတွင် သန့်စင်သော အအေးဓာတ်များသာ မဟုတ်တော့ဘဲ ကြီးမားလွန်းသော အသက်စွမ်းအင်များကပါ အစွမ်းထက်သော နှလုံးခုန်သံတစ်ခုပမာ တိတ်တဆိတ် စီးဆင်းနေ၏။

လင်းထျန်းလုံသည် ဝံပုလွေအသိုက်၏ အမြင့်ဆုံးနေရာတွင် တိတ်ဆိတ်စွာ ရပ်နေသည်။ ရေခဲပြာရောင်မျက်လုံးများ၏ အနက်ရှိုင်းဆုံးနေရာတွင် သတိပြုမိရန် ခက်ခဲသော ရွှေရောင်အလင်းတစ်ခု တိတ်တဆိတ် လည်ပတ်နေ၏။

အဝေးမှ လူသားစခန်းများ၏ မီးရောင်များနှင့် မှိန်ဖျော့ဖျော့ စွမ်းအင်စီးဆင်းမှု ခြေရာများအားလုံးကို သူ ရှင်းလင်းစွာ မြင်တွေ့နေရသည်။ ထိုတပ်ဖွဲ့သုံးဖွဲ့သည် အိပ်မောကျနေသော သားရဲကြီးများပမာဖြစ်နေပြီး သူတို့၏ ယာယီတိတ်ဆိတ်မှုက ပိုမိုလေးလံသော ဖိအားကိုသာ ယူဆောင်လာသည်။

“ဖေဖေ” ရှောင်ယင်းက တိုးတိုးလေးခေါ်လိုက်ပြီး သူမ၏လက်လေးက သူ၏ရင်ဘတ်ပေါ်ရှိ အမွေးရှည်များကို မသိမသာဆုပ်ကိုင်ထားသည်။ “မိုးလင်းတော့မယ်၊ လူဆိုးတွေ လာကြတော့မှာလားဟင်”

ရှောင်လန်ကလည်း သူ၏ဘေးတွင် မှီနေလေသည်။ စကားမပြောသော်လည်း တူညီသော စိုးရိမ်မှုက သူမ၏ မျက်လုံးကျယ်ကျယ်လေးများထဲတွင် ပုန်းကွယ်နေသည်။

လင်းထျန်းလုံ ခေါင်းငုံ့ကာ သမီးငယ်နှစ်ဦး၏ ပါးပြင်များကို သူ၏နှာခေါင်းဖြင့် ညင်သာစွာ ပွတ်သပ်လိုက်ပြီး နွေးထွေးမှုများပါ၀င်သော အတွေးတစ်ခုကို ပေးပို့လိုက်သည်။

“ဘာကြောက်စရာ ရှိလို့လဲ” သူ၏ အသံက တည်ငြိမ်ပြတ်သားစွာ သူတို့၏ စိတ်ထဲတွင် ပဲ့တင်ထပ်သွားသည်။

“စစ်သည်လာရင် စစ်သည်နဲ့ ရင်ဆိုင်မယ်၊ ရေလာရင် ဆည်တမံနဲ့ တားဆီးမယ်၊ ဖေဖေတို့အိမ်က အခုဆို ခံတပ်တစ်ခုလိုခိုင်မာနေပြီ၊ သူတို့မလာရင် သူတို့ကံကောင်းတာပဲ၊ လာရင်တော့ သူတို့ ပြဿနာကြီးကြီးတတ်လိမ့်မယ်”

“ဒါက စိတ်ဓာတ်တက်ကြွစေတဲ့ အပြောအဆိုမျိုးပဲ၊ ဟန်ပဲရှိတဲ့ ကြွေးကြော်သံတွေထက် အများကြီး ပိုပြီးယုံကြည်ရတယ်။”

“အင်း ဝံပုလွေအဖေဆီမှာ အမြဲတမ်း နည်းလမ်းအသစ်တွေရှိတယ်”

မမြင်ရသော ကွန်ရက်တစ်ခုက ဝံပုလွေအုပ်စု၏ အသိစိတ်များနှင့် ဆက်သွယ်ထားလေသည်။

“ဘုရင်ကြီး အနောက်ဘက်စစ်မျက်နှာစာက ကင်းစောင့်အချက်အချာ အားလုံးကို စစ်ဆေးပြီးပါပြီ၊ စွမ်းအင်လမ်းကြောင်းတွေ ရှင်းလင်းနေပါတယ်” ရန့်မြဲ့၏သတင်းပို့ချက်မှာ တိုတိုတုတ်တုတ်နှင့် လိုရင်းကိုရောက်ကာ သတ္တုကဲ့သို့ အေးစက်စက် အငွေ့အသက်များ ပါဝင်နေသည်။

“ကျွန်တော်နဲ့ လုပ်ကြံသတ်ဖြတ်သူတွေက တိုက်ချင်လွန်းလို့ လက်ယားနေပြီ၊ ဟို မီးနဲ့ကစားတဲ့ကောင်တွေ ထပ်လာစမ်းတာကို စောင့်နေတာ” ထျန်းပင်း၏ စိတ်ပိုင်းဆိုင်ရာ အရိပ်အယောင်မှာ ဓားအိမ်မှ ဆွဲထုတ်တော့မည့် ဓားတစ်လက်ပမာ ထက်ရှပေါ်လွင်နေခဲ့သည်။

“စခန်းသုံးခုလုံးရဲ့ ပတ်လည်ကို တင်းကြပ်စွာ ပိတ်ဆို့ထားတယ်၊ ကင်းထောက်စက်ပစ္စည်းအသစ်တွေကို အသက်သွင်းထားလို့ အနီးကပ် စောင့်ကြည့်ဖို့ မဖြစ်နိုင်ဘူး၊ အပေါ်ယံမှာတော့ အကြီးစား တပ်လှုပ်ရှားမှု အရိပ်အယောင် မတွေ့ရသေးပါဘူး” ယင်းဖုန်း၏ သတင်းအချက်အလက်မှာ တိကျသေသပ်လှ‌သည်။

အပေါ်ယံ တည်ငြိမ်မှုသည် အများအားဖြင့် ရေစီးကြောင်းအောက်မှ လှုပ်ရှားမှုများကို ဖုံးကွယ်ထားတတ်သည်။ လင်းထျန်းလုံ၏ အတွေးများ အနည်းငယ် ပြောင်းလဲသွား၏။

“ယင်းဖုန်း ကင်းထောက်ကျွမ်းကျင်တဲ့ ဝံပုလွေအနည်းငယ်ကို ရွေးပြီး ထဲထဲ၀င်၀င် ကင်းထောက်ဖို့ နည်းလမ်းဟောင်းကို သုံးလိုက်၊ သူတို့ စခန်းထဲမှာ ဘာတွေ ကြံစည်နေလဲဆိုတာ ငါ အတိအကျ သိချင်တယ်၊ အပြင်ဘက်ကို စောင့်ကြည့်ရုံနဲ့ မလုံလောက်ဘူး”

“နားလည်ပါပြီ”

ထိုအချိန်တွင် ဗဟိုဧရိယာရှိ တိုတမ်မိခင်သစ်ပင်သည် ရုတ်တရက် တစ်ခဏမျှ လင်းလက်သွားသည်။ မြစိမ်းရောင် အလင်းရောင်များက ရေလှိုင်းများပမာ ပြန့်ကျဲသွား၏။

၎င်း၏ ပင်မပင်စည်ပေါ်ရှိ ကြောက်မက်ဖွယ်ကောင်းသော အက်ကွဲကြောင်းများမှာ သာမန်မျက်စိဖြင့် မြင်နိုင်လောက်အောင် ထပ်မံကျဉ်းမြှောင်းလာသည်။

ကြီးမားလှသော အသက်စွမ်းအင် လှိုင်းလုံးကြီးတစ်ခုက ဝံပုလွေအသိုက်တစ်ခုလုံးကို ဖြတ်သန်းသွားသည်။

နှင်းဝံပုလွေအားလုံး သူတို့၏ စိတ်ဓာတ်များ အလိုအလျောက် တက်ကြွလာသည်ကို ခံစားလိုက်ရပြီး ရက်ပေါင်းများစွာ ပြင်ဆင်နေရမှုကြောင့် ဖြစ်ပေါ်လာသော ပင်ပန်းနွမ်းနယ်မှုများ အနည်းငယ် ပြေပျောက်သွားကာ သူတို့၏ အကြည့်များမှာလည်း ပိုမိုစူးရှလာခဲ့သည်။

မိခင်သစ်ပင်၏ အသွင်ပြောင်းလဲမှုသည် အရေးအကြီးဆုံးအချိန်သို့ ရောက်ရှိနေပြီဖြစ်သည်။

လင်းထျန်းလုံသည် ဝံပုလွေအသိုက်ရှိ မြေကြီးထဲတွင် တစ်လက်မ မကျန် စွမ်းအားများ စုစည်းနေသည်ကို ခံစားနိုင်သည်။ သူသည် သမီးနှစ်ဦးကို ကျောပေါ်တင်လိုက်ပြီး ကင်းလှည့်ဖို့ရာ ဆင်းကြည့်ရန် ဆုံးဖြတ်လိုက်သည်။

ဝံပုလွေအသိုက်တစ်လျှောက် လမ်းလျှောက်နေစဉ် သူ၏ခြေလှမ်းများမှာ တည်ငြိမ်နေသည်။ သူ ဖြတ်သွားရာနေရာတိုင်းတွင် ကင်းလှည့်နေသော နှင်းဝံပုလွေများက ရိုသေစွာဖြင့် တိုးလျလျ အသံပြုကာ ခေါင်းငုံ့အရိုအသေပေးကြသည်။

အရေးကြီးသော နေရာများတွင် တာဝန်ချထားသော မဟာနှင်းအစောင့်အရှောက်များက မတ်မတ်ရပ်နေကြပြီး သူတို့၏ ကြေးခွံချပ်ဝတ်တန်ဆာပေါ်တွင် အေးစက်သော အလင်းများ တလက်လက် တောက်ပနေသည်။

ဝါရင့်သူများ၏ လမ်းညွှန်မှုအောက်တွင် ရေပြာကြေးခွံအစောင့်အရှောက်များသည် သူတို့၏ နောက်ဆုံး ပူးပေါင်းကာကွယ်ရေး လေ့ကျင့်မှုများကို ပြုလုပ်နေကြသည်။

သူတို့သည် လျှို့ဝှက်ရေခဲကြေးခွံချပ်ဝတ်မှ အလင်းရောင်များကို အချင်းချင်းဆက်သွယ်နေသော ဒိုင်းကာတစ်ခုအဖြစ် ဖွဲ့စည်းရန် ကြိုးစားနေသည်။ အနည်းငယ် နုနယ်နေသေးသော်လည်း ပုံစံပေါ်စပြုနေပြီဖြစ်၏။

သားမွေးဂူကို ဖြတ်သွားစဉ် ဝံပုလွေအမများက အမွေးပွဝံပုလွေပေါက်လေးများကို အပြင်တွင် ခြေလက်လှုပ်ရှားရန် ဦးဆောင်ခေါ်ထုတ်လာသည်နှင့် ကြုံလိုက်ရသည်။

ဝံပုလွေပေါက်လေး အများစုသည် သူတို့၏မိခင်များအနားတွင် ကပ်နေကြပြီး သူတို့၏ မျိုးနွယ်စုဘုရင်ကြီးကို စူးစမ်းလိုစိတ်၊ ကြောက်ရွံ့စိတ်တို့ဖြင့် စောင့်ကြည့်နေကြသည်။ တစ်ကောင်တည်းကသာ ခြွင်းချက်ဖြစ်နေခဲ့၏။

ထိုဝံပုလွေပေါက်လေးသည် အနည်းငယ် ဝေးသောနေရာတွင် တစ်ကောင်တည်း ရပ်နေသည်။ သူ၏ အရွယ်အစားမှာ ရွယ်တူများထက် တစ်ဆခန့် ပိုကြီးမားပြီး သူ၏ အမွေးများမှာ အရောင်အသွေး အနည်းငယ်မျှမပါဘဲ သန့်စင်သော အဖြူရောင်ဖြစ်သည်။

သို့သော် လင်းထျန်းလုံ၏အကြည့်ကို ပြန်စိုက်ကြည့်ရန် မော့ကြည့်လာသော မျက်လုံးများမှာ နှင်းဝံပုလွေများ၏ ပုံမှန် ရေခဲပြာရောင် သို့မဟုတ် အစိမ်းရင့်ရောင် မျက်လုံးများမဟုတ်ပေ။ ယင်းအစား ခဲနေသော သွေးအိုင်နှစ်ခုပမာ နက်ရှိုင်းပြီး ကြမ်းတမ်းနေသည်။

အခြားဝံပုလွေပေါက်များကဲ့သို့ ကြောက်ရွံ့မှုမျိုး မရှိဘဲ မွေးကင်းစနွားငယ်က ကျားကိုမကြောက် ဆိုသည့် ဖီဆန်မှုမျိုး ပါဝင်နေသလို ပင်ကိုဗီဇအရ ရင်းနှီးမှုအရိပ်အယောင်တစ်ခုလည်း ပါဝင်နေသည်။

လင်းထျန်းလုံ၏အကြည့်များက ဝံပုလွေလေးထံတွင် ချက်ချင်း ဖမ်းစားခံလိုက်ရသည်။ သူ၏အမြင်အာရုံထဲတွင် ဤဝံပုလွေပေါက်လေးကို အလွန် မှိန်ဖျော့သော်လည်း အလွန်သန့်စင်သော အငွေ့အသက်တစ်ခုက ဝန်းရံထားသည်။

ထိုအရာကို သူ ကောင်းကောင်းကြီးသိသည်။ ၎င်းမှာ ထာ၀ရတိုက်ပွဲဝိညာဉ်မှ ပိုင်ဆိုင်သော ကြံ့ခိုင်သည့် တိုက်ပွဲဝင်လိုစိတ်ပင် ဖြစ်သည်။

သို့သော် ၎င်းသည် အပြည့်အဝယဉ်ပါးနေပြီး အသွင်ပြောင်းသွားသော အပူဓာတ်စွမ်းအင်တစ်ခုနှင့် ထူးဆန်းစွာ ပေါင်းစပ်သွားကာ ထူးခြားကြမ်းတမ်းသော သတ်ဖြတ်လိုသည့် အငွေ့အသက်တစ်ခုအဖြစ် ဖွဲ့စည်းသွားသည်။ သူ ချက်ချင်း နားလည်လိုက်၏။

ယခင် လောင်ကျွမ်းမီးလျှံဂိုဏ်းနှင့် ပဋိပက္ခအတွင်း သူ၏မိခင်သည် လမ်းလွဲလာသော စွမ်းအင်များ၏ သက်ရောက်မှုကို ခံခဲ့ရနိုင်ပေသည်။

အံ့သြဖွယ်ကောင်းစွာပင် သန္ဓေတည်နေစဉ်အတွင်း ဤကောင်လေးသည် သူ၏ ပြန့်ကျဲနေသော စွမ်းအားများနှင့် မီးစွမ်းအင်အနည်းငယ်ကို စုပ်ယူပေါင်းစပ်ကာ အကျိုးရှိသော မျိုးဗီဇပြောင်းလဲမှုတစ်ခုကို ဖြစ်ပေါ်စေခဲ့ပုံရသည်။

[မျိုးနွယ်]။ ။ငွေပြာနှင်းဝံပုလွေဖြူသွေးမျိုးဆက် (သွေးမိစ္ဆာ မျိုးဗီဇပြောင်းလဲမှု)

[အဆင့်]။ ။အဆင့် ၂ (ဝိညာဉ်စွမ်းအင်အဆင့်)

[ပင်ကိုစွမ်းရည်။] ။သွေးမိစ္ဆာတိုက်ပွဲဝင်ခန္ဓာ (ခရမ်းရောင် အဆင့်မြင့်)

[စွမ်းရည်လက္ခဏာရပ်]။ ။လက်သည်းတိုက်ကွက် (အဖြူရောင် အဆင့်မြင့်)

“ထူးခြားတဲ့ ကောင်လေးပဲ” လင်းထျန်းလုံသည် ချီးကျူးမှုအရိပ်အယောင်တစ်ခု ပါဝင်သော သူ၏အတွေးကို ပေးပို့လိုက်သည်။

သူသည် စိတ်စွမ်းအားကို အသုံးပြု၍ သူ့အရှေ့ရှိ သွေးရောင်မျက်လုံးနှင့် ဝံပုလွေပေါက်လေးကို ညင်သာစွာ ဆွဲယူလိုက်သည်။

ဝံပုလွေပေါက်လေးသည် အစပိုင်းတွင် ခြေလက်များဖြင့် ရုန်းကန်သော်လည်း ကြီးမားလှသော၊ ဘုရင်ကြီး၏ မျိုးတူအငွေ့အသက်ကို ခံစားလိုက်ရသောအခါ ချက်ချင်း ငြိမ်သက်သွားပြီး သွေးနီရောင်မျက်လုံးများဖြင့် လင်းထျန်းလုံကို စူးစိုက်ကြည့်နေတော့သည်။

“အာဝူး”

လင်းထျန်းလုံက ခပ်သြသြ၊ ခမ်းနားသည့် အူသံတစ်ချက်ပေးလိုက်သည်။

“စစ်ပွဲမီးတောက်တွေကြားထဲမှာ မွေးဖွားလာတယ်၊ သူစိမ်းစွမ်းအားတွေနဲ့ သွေးပေးထားတယ်၊ သတ်ဖြတ်လိုစိတ် အငွေ့အသက်ကို ထိန်းသိမ်းထားနိုင်ပြီး အပြင်ကိုထုတ်မပြဘူး။ ဒီနေ့ကစပြီး မင်းရဲ့ နာမည်ကို ‘သွေးမိစ္ဆာ’ လို့ ခေါ်မယ်။”

အမည်ပေးခြင်း ပြီးဆုံးသွားချေပြီ။ ထို့နောက် သူ၏ အသိစိတ်နေရာလွတ်အတွင်းမှ အရည်အသွေးမြင့် ရေခဲပင်မသလင်းကျောက်အချို့နှင့် ခန္ဓာကိုယ်ကို အားဖြည့်ပေးနိုင်သော ညင်သာသည့် ဝိညာဉ်သစ်သီး နှစ်လုံးကို ထုတ်ယူကာ ဝံပုလွေအမ၏ အရှေ့တွင် ချထားလိုက်သည်။

“သူ့ကို ပြုစုပျိုးထောင်ဖို့ အာရုံစိုက်ထား” သူ၏အမိန့်မှာ ရှင်းလင်းပြတ်သားသည်။

ဝံပုလွေအမက ချက်ချင်း ခေါင်းငုံ့ကာ နာခံမှုရှိသော အသံလေး ပေးလိုက်သည်။

“သွေးမိစ္ဆာ” ဆိုသည့် အမည်သည် ဘုရင်ကြီး၏ အသိအမှတ်ပြုမှုနှင့် မျှော်လင့်ချက်များကို သယ်ဆောင်ထားကြောင်း သူမနားလည်သည်။

ဘာမှမသိနားမလည်သေးသော ဝံပုလွေငယ်လေး “သွေးမိစ္ဆာ” သည် သူ၏ ကိုယ်ပိုင်ကံကြမ္မာ ပြောင်းလဲသွားသည်ကို ခံစားမိပုံရပြီး သူ၏ခေါင်းဖြင့် လင်းထျန်းလုံ၏ ရှေ့ခြေထောက်ကို ပွတ်သပ်လိုက်သည်။