အခန်း (၁၉၅-၁၉၆)

အခန်း (၁၉၅) - လောင်ကျွမ်းမီးလျှံဂိုဏ်း၏ ထူးဆန်းသောလုပ်ဆောင်ချက်၊ မုန်တိုင်းမလာမီ ငြိမ်သက်ခြင်း (၂)

“ဝါး၊ သူ့မျက်လုံးတွေက အနီရောင်ကြီး” ရှောင်လန်က လင်းထျန်းလုံ၏ကျောပေါ်မှ ခေါင်းပြူကြည့်ကာ စူးစမ်းလိုစိတ်ဖြင့် လှမ်းထိရန် ကြိုးစားရင်း အာမေဍိတ်သံ ပြုလိုက်သည်။

ရှောင်ယင်းက ပိုမိုသတိထားနေပုံရသော်လည်း မျက်လုံးပြူးလေးဖြင့် စိုက်ကြည့်နေသည်။ “ဖေဖေ သူက ဖေဖေ့ကိုမကြောက်ဘူးလားဟင်”

“မကြောက်တာက ကောင်းတဲ့အရာပဲ” လင်းထျန်းလုံက စိတ်စွမ်းအားကိုအသုံးပြု၍ အလွန်တက်ကြွနေသော ရှောင်လန်ကို မပြုတ်ကျစေရန် ထိန်းထားရင်း သူ၏အတွေးများဖြင့် ညင်သာစွာ တုံ့ပြန်လိုက်သည်။ “ဝံပုလွေအုပ်စုက မကြောက်မရွံ့တတ်တဲ့ စစ်သည်တွေကို လိုအပ်တယ်”

သူ့ရှေ့ရှိ သွေးရောင်မျက်လုံးနှင့် ဝံပုလွေပေါက်လေးကို ကြည့်ရင်း သွေးမိစ္ဆာတိုက်ပွဲဝင်ခန္ဓာတွင် ပါဝင်သော အလားအလာကို သူရှင်းလင်းစွာ သိမြင်နေရသည်။

ဤသည်မှာ တိုက်ခိုက်ရေးပင်ကိုစွမ်းရည် သက်သက်မဟုတ်ဘဲ ဇွဲရှိပြီး အရှုံးမပေးလိုသော စိတ်ဆန္ဒ၏ သရုပ်ပြမှုတစ်ခုဖြစ်ပြီး ယခုအချိန်တွင် ဝံပုလွေတပ်ဖွဲ့က အလိုအပ်ဆုံး စိတ်ဓာတ်ပင်ဖြစ်သည်။

“ဒီကောင်လေး... သူ့ရဲ့ သတ်ဖြတ်လိုတဲ့ အငွေ့အသက်က စုစည်းနေတယ်၊ မပြန့်ကျဲသွားဘူး၊ သူ့ရဲ့ အရိုးတည်ဆောက်ပုံကလည ပင်ကိုအရည်အသွေး ပါလာတယ်၊ သူက အဲဒီ ပြင်ပစွမ်းအင်ကို သူ့ရဲ့ ကိုယ်ပိုင်အုတ်မြစ်အဖြစ် တကယ်ပဲ ပြောင်းလဲနိုင်ခဲ့တာပဲ”

“ဝံပုလွေဖေဖေ မျက်စိကျတဲ့သူပီပီပဲ၊ အချိန်တန်ရင် ရန်သူကို မြင်တာနဲ့ အကြောက်တရားတွေ သွင်းပေးနိုင်မယ့် နောက်ထပ် ဝံပုလွေအစ်ကိုတစ်ယောက် ဖြစ်လာလိမ့်မယ်။”

ဝံပုလွေအမက တိုးလျလျ အသံပြုလိုက်ပြီး သွေးမိစ္ဆာကို သူမ၏အနားသို့ ဂရုတစိုက် ပြန်ခေါ်သွားသည်။ လင်းထျန်းလုံအပေါ် သူမကြည့နေသည့် အကြည့်များတွင် ကျေးဇူးတင်မှုနှင့် သန္နိဋ္ဌာန်များ ပြည့်နှက်နေသည်။ သူမ ပခုံးပေါ်ရှိ တာဝန်ကို သူမ ‌ကောင်းကောင်းနားလည်သည်။

လင်းထျန်းလုံ ဘာမှထပ်မပြောတော့ဘဲ သမီးနှစ်ဦးနှင့်အတူ သူ၏ ကင်းလှည့်မှုကို ဆက်လက်လုပ်ဆောင်လေသည်။

လင်းထျန်းလုံတို့သည် ထျန်းပင်း တာဝန်ယူရသော ဧရိယာသို့ ရောက်ရှိလာသည်။

ဤနေရာရှိ လေထုမှာ ပို၍ပင် က်ကြွနေသည်။ လုပ်ကြံသတ်ဖြတ်သူများသည် သုံးကောင်တစ်ဖွဲ့ လေ့ကျင့်နေကြပြီး သူတို့၏ အပြန်အလှန်လေ့ကျင့်မှုများ က လေခွင်းသံများ မြည်ဟည်းစေပြီး ရေခဲအမှုန်များကို လွင့်ပျံနေစေသည်။

ထျန်းပင်း ကိုယ်တိုင်မှာမူ ဧရာမ ကျောက်တုံးကြီးတစ်ခုပေါ်တွင် လှဲလျောင်းနေပြီး သူ၏ခန္ဓာကိုယ်ပေါ်ရှိ ရွှေရောင်ရင့်ရင့် အလင်းရောင်နှင့် ချော်ရည်ပုံသဏ္ဍာန်များက တစ်လှည့်စီ လင်းလက်နေသည်။

သူသည် မြေအောက်မီးလျှံနှလုံးသားနှင့် အမြုတေ၏ စွမ်းအားကို ချေဖျက်ရန် အပြည့်အဝ အာရုံစိုက်နေသည်။ သူ၏အငွေ့အသက်မှာလည အရင်ကထက် ပိုမိုလေးလံပြီး ဗိုလ်ကျလွှမ်းမိုးနိုင်လာပုံရသည်။

“ဘုရင်ကြီး” လင်းထျန်းလုံ၏ အငွေ့အသက်ကို ခံစားမိသည်နှင့် ထျန်းပင်းက ချက်ချင်း ခေါင်းမော့လာပြီး သူ၏ မျက်လုံးများထဲတွင် တိုက်ပွဲဝင်လိုစိတ်များ လောင်ကျွမ်းနေသည်။

“ညီအစ်ကိုတွေက အကောင်းဆုံး အခြေအနေမှာ ရှိနေပါတယ်၊ ဟို မီးနဲ့ကစားတဲ့ကောင်တွေ ပြန်လာဖို့ကိုပဲ စောင့်နေတာ”

“မင်းရဲ့ တည်ငြိမ်မှုကို ဆက်ထိန်းထား” လင်းထျန်းလုံက သူ့ကို ကြည့်လိုက်သည်။ “မင်းရဲ့ စွမ်းအားက အဓိကပဲ၊ အဲဒါကို အပြည့်အဝ ကျွမ်းကျင်အောင်လုပ်၊ နောက်တစ်ကြိမ် ထိပ်တိုက်တွေ့ရင် မင်းကို တိုက်စစ်မှုးအဖြစ် သုံးဖို့ ငါလိုအပ်တယ်”

“ဟုတ်ကဲ့” ထျန်းပင်း ဟိန်းဟောက်လိုက်ပြီး သူ၏ကျင့်ကြံမှုအပေါ် ပိုမိုအာရုံစိုက်လိုက်သည်။

ထို့နောက် သူတို့သည် အကာအကွယ်အချက်အချာ တစ်ခုသို့ ရောက်ရှိလာသည်။ ရန့်မြဲ့သည် အတည်ငြိမ်ဆုံး လက်မှုပညာရှင်တစ်ဦးပမာ ဗဟိုအချက်အချာတစ်ခု၏ စွမ်းအင်ကို ချိန်ညှိနေသည်။

မဟာနှင်းအစောင့်အရှောက် ခြောက်ဦးသည် အရပ်လေးမျက်နှာကို ကာကွယ်နေသော ရေခဲရုပ်တုများပမာ မတ်မတ်ရပ်နေခဲ့ကြ၏။

သူတို့၏ နှင်းခဲအကာအကွယ်မှ အလင်းစက်ဝန်းများက တစ်ခုတည်းအဖြစ် ဆက်သွယ်နေပြီး ဖျက်ဆီး၍မရနိုင်သော အငွေ့အသက်ကို ထုတ်လွှတ်နေသည်။

ရန့်မြဲ့၏ အမိန့်ပေးမှုအောက်တွင် ရေပြာကြေးခွံအစောင့်အရှောက် ငါးဦးသည် စွမ်းအင်လမ်းကြောင်းလွှဲခြင်းနှင့် အခြားသော လေ့ကျင့်မှုများကို ပြုလုပ်နေကြသည်။

“ဘုရင်ကြီး၊ စွမ်းအင်အချက်အချာ လည်ပတ်မှုနှုန်း ၉၅ ရာခိုင်နှုန်း ကျော်ပါတယ်၊ ကာကွယ်ရေးစနစ် တည်ငြိမ်ပါတယ်” ရန့်မြဲ့က တိုတိုတုတ်တုတ်ပဲ သတင်းပို့လာသည်။

“ကောင်းတယ်၊ ရေပြာကြေးခွံအစောင့်အရှောက်တွေရဲ့ တိုးတက်မှုက ဘယ်လိုလဲ”

“သူတို့ တိုက်ပွဲဝင်ဖို့အသင့်ဖြစ်နေပါပြီ” ရန့်မြဲ့၏ အဖြေမှာ အေးစက်နေဆဲဖြစ်သော်လည်း ထိုအထဲရှိ အတည်ပြုချက်မှာ ခိုင်မာလွန်းလှသည်။

သူသည် နှင်း၀ံပုလွေအဖွဲ့၀င်သစ်များကို တစ်ချက်ကြည့်လိုက်ပြီးနောက် ဆက်ပြောလာသည်။ “သူတို့ကို သွေးပေးဖို့ အစစ်အမှန် တိုက်ပွဲတစ်ခု လိုအပ်တယ်။”

“ရှိလာမှာပါ” လင်းထျန်းလုံ ခေါင်းညိတ်လိုက်သည်။

ရန့်မြဲ့၏ တင်းကျပ်သောလမ်းညွှန်မှုနှင့် မိခင်သစ်ပင်၏ စွမ်းအင်အားဖြည့်မှုအောက်တွင် ဤရာထူးတိုးခါစ ရေပြာကြေးခွံအစောင့်အရှောက်များသည် လျင်မြန်စွာ တိုးတက်နေပြီး သူတို့၏ကြေးခွံချပ်ဝတ်တန်ဆာပေါ်ရှိ အလင်းရောင်များမှာလည်း ပိုမိုခိုင်မာလာသည်ကို သူ မြင်တွေ့နေရသည်။

နောက်ဧရိယာသို့သွားရန် ပြင်ဆင်နေစဉ် မမြင်ရသော သတင်းအချက်အလက် စီးကြောင်းတစ်ခုက သူ၏အသိစိတ်ထဲသို့ တိကျစွာ ဖြတ်တောက်ဝင်ရောက်လာသည်။

ယင်းဖုန်းပင် ဖြစ်သည်။

“ဘုရင်မင်းမြတ် အရေးကြီးတဲ့ ရှာဖွေတွေ့ရှိမှုပါ” ယင်းဖုန်း၏ စိတ်ဝိညာဉ် ပုံရိပ်ယောင်ထဲတွင် ပုံမှန်မဟုတ်သော လေးနက်မှုတစ်ခု ပါဝင်နေသည်။

“မီးကိုအသုံးပြုတဲ့ အနောက်ဘက် လူသားစခန်းရဲ့ အလယ်ဗဟိုမှာ သူတို့က ရှုပ်ထွေးလွန်းတဲ့ အကြီးစား စွမ်းအင်စုစည်းမှု အစီအရင်တစ်ခုကို တည်ဆောက်နေတယ်၊ အဲဒီရဲ့ ဗဟိုချက်မှာ ပုံထားတဲ့ မီးဓာတ်အမြုတေ အရေအတွက်က အံ့မခန်းပဲ”

“စွမ်းအင်တုံ့ပြန်မှုက ပုံမှန်မဟုတ်တဲ့ နှုန်းနဲ့ မြင့်တက်နေတယ်၊ သမားရိုးကျ နည်းဗျူဟာ လိုအပ်ချက်တွေထက် အများကြီး သာလွန်နေတယ်”

“ခံစစ်ကို ကျွမ်းကျင်တဲ့ တောင်ဘက်က လူသားတပ်ဖွဲ့တွေကလည်း အကြီးအကျယ် ရှေ့ဆက်တက်လာပြီး ဆယ်မိုင်အကွာမှာ အလွှာပေါင်းစုံနဲ့ ကာကွယ်ရေးစခန်းတွေကို တည်ဆောက်နေကြတယ်"

“သူတို့ရဲ့ လှုပ်ရှားမှုတွေက လျင်မြန်လွန်းတယ်၊ စစ်ဆင်ရေးတစ်ခုခုအတွက် ကာကွယ်ပေးနေမှန်း သိသာတယ်”

“စက်ရုပ်တွေကို ထိန်းချုပ်တဲ့ မြောက်ဘက်က လူသားတွေကလည်း တချိန်တည်းမှာပဲ ဘေးနှစ်ဖက်စလုံးမှာ စွမ်းအင်နှောင့်ယှက်ရေး စက်ပစ္စည်းအသစ် အများအပြားကို ဖြန့်ကျက်နေတယ်၊ ဖုံးလွှမ်းနိုင်တဲ့ အကွာအဝေးကလည်း အရမ်းကျယ်တယ်။”

ယင်းဖုန်းသည် တစ္ဆေရေခဲအရိပ်ထွက်ပြေးခြင်း၏ အမြင့်ဆုံး ပုန်းကွယ်နိုင်စွမ်းနှင့် ထိုးထွင်းသိမြင်မှုတို့ကို အားကိုးကာ အန္တရာယ်ကြီးမားလွန်းသော စစ်ဆင်ရေးအတွင်း အနီးကပ် လေ့လာထားသည့် စွမ်းအင်စီးဆင်းမှု ပုံစံများနှင့် အစီအရင် ဖွဲ့စည်းပုံတို့၏ အကြမ်းဖျင်း ပုံကြမ်းများကို သတင်းအချက်အလက်များနှင့်အတူ ပူးတွဲပို့ပေးလိုက်သည်။

မီးအသုံးပြုသော လူသားများ၏ခေါင်းဆောင်အကြောင်း ပြောသောအခါ ယင်းဖုန်း၏ စိတ်စွမ်းအင် ပုံရိပ်ယောင်က ပြင်းထန်သော ရန်လိုမှုများဖြင့် ပြည့်နှက်နေသည့် အလွန်ရှင်းလင်းသော ပုံရိပ်တစ်ခုကို ပေးပို့လိုက်သည်။

ဤလူမှာ ယခင်က လင်းထျန်းလုံနှင့် တိုက်ခိုက်ပြီး ဒဏ်ရာရခဲ့သူပင် ဖြစ်သည်။

သတင်းအချက်အလက်များကို ရရှိသည်နှင့် တစ်ပြိုင်နက် လင်းထျန်းလုံသည် ယင်းဖုန်း ပြန်ပို့လာသော အချက်အလက်များကို ခွဲခြမ်းစိတ်ဖြာရန် ငွေပြာဘုရင်မျက်၀န်း စွမ်းရည်ကို အစွမ်းကုန် ရူးသွပ်စွာ လည်ပတ်လိုက်တော့သည်။

ဟော်ကျိန်းနှင့် သူ၏ လောင်ကျွမ်းမီးလျှံဂိုဏ်းက အတိအကျ မည့်သည့်အကြံအစည်များ ချမှတ်နေခြင်းလော။

ဤမျှ ကြီးမားသော စွမ်းအင်စုစည်းမှုသည် သာမန်တိုက်ခိုက်မှုတစ်ခုအတွက် လုံးဝမဟုတ်ပေ။

‘သူတို့က အကာအကွယ်ကို တစ်ချက်တည်းနဲ့ ဖျက်ဆီးဖို့ရည်ရွယ်ပြီး အဖျက်စွမ်းအားကောင်းလွန်းတဲ့ ပူးပေါင်းစွမ်းရည်တစ်ခုခုကို ထုတ်လွှတ်ရန် ပြင်ဆင်နေတာလား၊ ဒါမှမဟုတ်... အန္တရာယ်များတဲ့ ဆင့်ခေါ်ခြင်း ဓလေ့ထုံးတမ်းတစ်ခုခုကို လုပ်ဆောင်နေတာလား'

ဟော်ကျန်း၏ အလွန်ဒုက္ခပေးနိုင်သော မသေမျိုးမီးလျှံဝိညာဉ် ပင်ကိုစွမ်းရည်နှင့် ပေါင်းစပ်လိုက်လျှင် ရန်သူ၏ နောက်ထပ်တိုက်ခိုက်မှုသည် စမ်းသပ်မှု မဟုတ်တော့ဘဲ အင်အားအပြည့်ဖြင့် ပြတ်ပြတ်သားသား နောက်ဆုံး ထိုးစစ်ဆင်မှု ဖြစ်မည်မှန်း လင်းထျန်းလုံ သေချာသလောက် ရှိနေပြီဖြစ်သည်။

မီးပွားသုသေသနပညာရှင်အသင်း၏ နှောင့်ယှက်ရေးစက်ပစ္စည်းများသည် နောက်ဆုံး တိုက်ခိုက်မှု စတင်ချိန်တွင် နှင်းဝံပုလွေများ၏ အာရုံခံနိုင်စွမ်းနှင့် အတွင်းပိုင်းဆက်သွယ်ရေးကို အဆုံးစွန်ဖိနှိပ်ရန် ရည်ရွယ်ပြီး ထိုအဖျက်စွမ်းအားကြီးမားလွန်းသော တိုက်ကွက်အတွက် အခွင့်အရေးဖန်တီးပေးရန် ဖြစ်သည်မှာ သေချာသည်။

တောင်ဘက်က လူသားများ၏ လှုပ်ရှားမှုများက ဤသည်မှာ တပ်ဖွဲ့သုံးဖွဲ့လုံး ညှိနှိုင်းဆောင်ရွက်ထားကြသော ပူးပေါင်းစစ်ဆင်ရေးဖြစ်ကြောင်း ထပ်မံအတည်ပြုပေးနေသည်။

သူ ဖြည်းညင်းစွာ ခေါင်းမော့လိုက်ရာ သူ၏အကြည့်များက အ‌ဝေးသို့ရောက်ရှိသွားကာ ဟင်းလင်းပြင်ကို ဖောက်ထွင်းပြီး အဝေးရှိစခန်းတွင် ရူးသွပ်စွာစုစည်းနေသော ဖျက်ဆီးခြင်းစွမ်းအင်များကို မြင်တွေ့နေရသကဲ့သို့ ရှိလေသည်။

လေထုထဲတွင် ယခင်က မိခင်သစ်ပင်၏ အသက်စွမ်းအင်ကြောင့် ပြန့်ကျဲသွားသော သတ်ဖြတ်လိုစိတ် အငွေ့အသက်များ နောက်တစ်ကြိမ် ထူထပ်လာသည်မှာ စစ်ပွဲမီးခိုးငွေ့များ သူတို့မျက်စိရှေ့တွင် လောင်ကျွမ်းနေသကဲ့သို့ပင်။

သူ၏ အကြည့်က တိုက်ပွဲဝင်ရန် အသင့်ဖြစ်နေပြီဖြစ်သော ဝံပုလွေအုပ်စုအပေါ် ဖြတ်သန်းသွားပြီး ယုံကြည်မှုနှင့် သန္နိဋ္ဌာန်များ ပြည့်နှက်နေသော ဝံပုလွေမျက်လုံးတစ်စုံချင်းစီကို ဖြတ်ကျော်သွားသည်။

နောက်ဆုံးတွင် အသွင်ပြောင်းမှု နောက်ဆုံးအဆင့်သို့ ရောက်ရှိလာသည်နှင့်အမျှ အလင်းရောင်များ ပိုမိုတောက်ပလာသော ဗဟိုဧရိယာရှိ မိခင်သစ်ပင်နှင့် “သွေးမိစ္ဆာ” ဟု ယခုလေးတင် အမည်ပေးလိုက်သော သူ၏ဘေးရှိ မျှော်လင့်ချက်အသစ်လေးအပေါ် ကျရောက်သွားသည်။

ကြီးမားလွန်းသောအန္တရာယ်၊ ဘဝအသစ်၊ ဖျက်ဆီးခြင်းအရိပ်အယောင်နှင့် ကာကွယ်လိုသော စိတ်ဆန္ဒတို့သည် ဤအခိုက်အတန့်တွင် ရောထွေးနေကာ စစ်မြေပြင်တွင် သိသာထင်ရှားသော ခြားနားမှုတစ်ခုကို ဖြစ်ပေါ်စေသည်။

“အမိန့်လိုက်နာကြ” သူ၏ စိတ်စွမ်းအင် အမိန့်ပေးချက်မှာ ဓားအိမ်ထဲမှ ဆွဲထုတ်လိုက်သော ရေခဲဓားတစ်လက်ပမာ အေးစက်၊ ရှင်းလင်းပြီး မေးခွန်းထုတ်ဖွယ်မရှိသော ပြတ်သားမှုတစ်ခု ပါဝင်ကာ အဓိက အဖွဲ့ဝင်တိုင်း၏ ခေါင်းထဲသို့ ချက်ချင်း ရောက်ရှိသွားသည်။

“တိုက်ပွဲအတွက် နောက်ဆုံးအဆင့် ပြင်ဆင်မှုတွေလုပ်ကြ။ ရန်သူက သူတို့ရဲ့ နောက်ဆုံးထိုးစစ်၊ အရှုးသွပ်ဆုံး ထိုးစစ်အတွက် ပြင်ဆင်နေတယ်ထ ကံကောင်းရင်ဆိုတဲ့ အတွေးတွေအားလုံးကို စွန့်လွှတ်လိုက်”

“မင်းတို့ရဲ့ တာဝန်တွေကို မှတ်ထား၊ ဒါ ငါတို့အိမ်ပဲ၊ ဒီတိုက်ပွဲမှာ အနိုင်ရခြင်း ဒါမှမဟုတ် သေဆုံးခြင်း ဆိုတာပဲရှိတယ်၊ ဒီနေရာကို ကျူးကျော်လာသူတိုင်း ကျူးကျော်လာရင် ပေးဆပ်ရမဲ့တန်ဖိုးကို သူတို့ရဲ့အရိုးထဲအထိ ထာဝရမှတ်မိနေအောင် ငါ လုပ်ပေးမယ်”

သူ၏ အမိန့်ပေးချက်နှင့်အတူ မမြင်ရသော တိုက်ပွဲဝင်လိုစိတ်များ ကောင်းကင်သို့ ထိုးတက်သွားသည်။

ဝံပုလွေအသိုက်တစ်ခုလုံးသည် အပြည့်အဝ နိုထလာသော ရှေးဟောင်းသားရဲကြီး တစ်ကောင်ပမာ သူ၏အေးစက်စက် မျက်လုံးများကို ဖွင့်ကာ လက်သည်းများသွေးရင်း သိပ်မကြာမီ လာတော့မည့်မုန်တိုင်းကို တိတ်တဆိတ် စောင့်ကြိုနေလေတော့သည်။

အခန်း (၁၉၆) - တိုက်ပွဲမတိုင်မီ အခြေခံအုတ်မြစ်ကို အားဖြည့်ခြင်း

ညအမှောင်ထုသည် မှင်ရည်ပမာ မည်းနက်နေပြီး အေးစက်သော လေထုမှာ အစိုင်အခဲဖြစ်လုမတတ် ရှိနေသည်။

ကြယ်တာရာအကာအကွယ်နှင့် တိုတမ်မိခင်သစ်ပင်၏ အလင်းရောင်က အမှောင်ထုအချို့ကို ဖယ်ရှားပေးနိုင်သော်လည်း ဝံပုလွေအသိုက်၏ ထောင့်တိုင်းတွင် ပြည့်နှက်နေသော သတ်ဖြတ်လိုစိတ် အငွေ့အသက်များကိုမူ လုံးဝ မဖယ်ရှားနိုင်ခဲ့ပေ။

အဝေးရှိ လူသားတပ်ဖွဲ့သုံးခု၏ စခန်းများသည် အိပ်မောကျနေသော ဧရာမ သားရဲကြီးများပမာ တိတ်ဆိတ်ငြိမ်သက်နေကြပြီး သူတို့၏ တိတ်ဆိတ်မှုထဲတွင် ဖျက်ဆီးခြင်း မုန်တိုင်းတစ်ခုကို မွေးမြူနေကြသည်။

လင်းထျန်းလုံသည် မိခင်သစ်ပင်အောက်တွင် တိတ်တဆိတ် ရပ်နေပြီး သူ၏ ငွေပြာရောင် အမွေးများက စွမ်းအင်အလင်းဝန်းထဲတွင် အေးစက်သော အရောင်အဝါဖြင့် စီးဆင်းနေသကဲ့သို့ ဖြစ်နေသည်။

သူ၏ အသိစိတ်အနက်ရှိုင်းဆုံးနေရာတွင် မိခင်သစ်ပင်အတွင်း ဒီရေပမာ ဆူပွက်နေသော ခမ်းနားသည့် စွမ်းအင်များကို ရှင်းလင်းစွာ ခံစားနေရသည်။

အသွင်ပြောင်းလဲမှုသည် ခုနစ်ဆယ့်ရှစ်ရာခိုင်နှုန်းသို့ ရောက်ရှိနေပြီဖြစ်ရာ အံ့သြဖွယ်ကောင်းသော တိုးတက်မှုဖြစ်သော်လည်း နောက်ဆုံးအတားအဆီးမှာ အများအားဖြင့် အခက်ခဲဆုံးဖြစ်ပြီး မိုးမလင်းမီ အနက်ရှိုင်းဆုံး အမှောင်ထုကဲ့သို့ပင် ဖြစ်သည်။

သူ၏ အသိစိတ်က အသိစိတ်နေရာလွတ်အတွင်း သိုလှောင်ထားသော အရင်းအမြစ်များအပေါ် ဖြတ်သန်းသွားသည်။

တောင်လိုပုံနေသော ရေခဲပင်မသလင်းကျောက်များနှင့် ယခင်တိုက်ပွဲများမှ သိမ်းဆည်းရမိသော အဆင့်နိမ့်ဝိညာဉ်ပစ္စည်းအချို့သည် ဘုရင်အဆင့်သို့ ရောက်ရှိနေသော သူ့အတွက်နှင့် ပါရမီရှင်အဆင့်သို့ တက်လှမ်းသွားသော စစ်သူကြီးသုံးဦးအတွက် အကျိုးသက်ရောက်မှုမှာ အကန့်အသတ်ရှိနေပြီဖြစ်သည်။

သို့သော် ဤအရင်းအမြစ်များသည် မျိုးနွယ်စုတစ်ခုလုံး၏ အုတ်မြစ်ကို အားဖြည့်ရန်အတွက်…. စစ်ပွဲအတွင်းမပါ၀င်နိုင်သေးသော ဝံပုလွေများနှင့် အနာဂတ်ကို ကိုယ်စားပြုသော ဝံပုလွေပေါက်များအတွက်…. အရေးပါသော အာဟာရများ ဖြစ်သည်။

“ပိုင်လင်း” သူက တည်ငြိမ်စွာ ခေါ်လိုက်သည်။

မကြာမီမှာပင် ပြုစုပျိုးထောင်ရေးနှင့် ထောက်ပံ့ရေးအတွက် တာဝန်ယူရသော ဝံပုလွေအမများသည် မိခင်သစ်ပင်အောက်ရှိ ကွင်းပြင်တွင် ဝံပုလွေပေါက် အမြောက်အမြားနှင့်အတူ တိတ်ဆိတ်စနစ်တကျ စုဝေးလာကြသည်။

သူတို့၏ အကြည့်များအားလုံးက လင်းထျန်းလုံထံ ကျရောက်နေပြီး ခြွင်းချက်မရှိ ယုံကြည်အားထားမှုများဖြင့် ပြည့်နှက်နေသည်။

ထိုမျက်လုံးများကြားတွင် အသစ်မွေးဖွားလာသော၊ ပတ္တမြားကျောက်ကဲ့သို့ သွေးနီရောင် မျက်၀န်းတစ်စုံက အထူးတလည် ပေါ်လွင်နေခဲ့သည်။

သွေးမိစ္ဆာဟု အမည်ပေးထားသော ဝံပုလွေပေါက်လေးသည် သူ့မိခင်၏ ဂရုတစိုက် ကာကွယ်မှုအောက်တွင် လင်းထျန်းလုံကို မကြောက်မရွံ့ စိုက်ကြည့်နေသည်။

“ရန်သူတွေက အပြင်ဘက်မှာ ရှိနေတယ်” လင်းထျန်းလုံ၏ အကြည့်က မျက်လုံးတစ်စုံချင်းစီအပေါ် ဖြည်းညင်းစွာ ဖြတ်သန်းသွားသည်။

သူ၏ အသံမှာ ရှင်းလင်းပြတ်သားနေပြီး ငြင်းဆန်၍မရသော အငွေ့အသက်များ ပါဝင်နေသည်။ “သူတို့က အရမ်း အစွမ်းထက်တယ်၊ အများကြီးလည်းရှိတယ်၊ ပြီးတော့ ငါတို့အိမ်ကို ထိုးဖောက်ဝင်ပြီး ဖျက်ဆီးပစ်ချင်နေကြတယ်”

ဝံပုလွေပေါက်အချို့ ကြောက်ရွံ့စွာ နောက်ဆုတ်သွားသော်လည်း ပိုများသော နှင်းဝံပုလွေများ၊ အထူးသဖြင့် အရွယ်ရောက်ပြီးသော ဝံပုလွေအမများ၏ မျက်လုံးများတွင် ဒေါသနှင့် ကာကွယ်လိုစိတ် မီးတောက်များ လောင်ကျွမ်းလာခဲ့သည်။

“ဒါပေမယ့် သူတို့ကို ငါတို့ အောင်မြင်ခွင့်ပေးမှာ မဟုတ်ဘူး” လင်းထျန်းလုံ၏အသံထဲတွင် ယုံကြည်ရလောက်သော တည်ငြိမ်မှုတစ်ခု ပါဝင်နေသည်။

“တစ်ခုတည်းသော နည်းလမ်းက သူတို့ထက် ပိုသန်မာလာဖို့ပဲ၊ ပြီးရင် အထဲကို လှမ်းလာတဲ့သူတို့ရဲ့ လက်တိုင်းကို ခုတ်ဖြတ်ပစ်ရမယ်။”

ထိုမိန့်ခွန်းထဲတွင် စိတ်ခံစားမှု ပြင်းထန်သော အော်ဟစ်သံများ မရှိ၊ အရိုးကွဲမတတ် သတ်ဖြတ်လိုသော အငွေ့အသက်နှင့် အပြည့်အဝယုံကြည်မှုသာ ရှိသည်။

အတွေးမှတစ်ဆင့် ပေးပို့လာသော ဤစကားလုံးများသည် မည်သည့် ဟိန်းဟောက်သံထက်မဆို ပိုမိုအစွမ်းထက်လေသည်။

“ဒီဟာတွေ” စိတ်ကူးတစ်ခုနှင့်အတူ အလယ်အလတ် စိတ်ထိန်းချုပ်ခြင်း ကို အသက်သွင်းလိုက်သည်။

ရေခဲပင်မသလင်း အမြောက်အမြားနှင့် ဝံပုလွေပေါက်များ၏ အုတ်မြစ်အတွက် သင့်တော်သော နူးညံ့သည့် ဂုဏ်သတ္တိရှိသည့် ဝိညာဉ်သစ်သီးအချို့ကို မမြင်ရသော လက်များဖြင့် မတင်ကာ ဝံပုလွေအမများနှင့် ဝံပုလွေပေါက်တိုင်း၏ ရှေ့တွင် တိကျညီမျှစွာ ခွဲဝေပေးလိုက်သည်။

တစ်ချိန်တည်းမှာပင် ယခင်က သိုလှောင်ထားသည့် အဆင့်နိမ့်သော်လည်း အသက်စွမ်းအင်အများအပြား ပါဝင်သော သာမန် မိစ္ဆာသားရဲ အသားအမြောက်အမြားကိုလည်း ထုတ်ယူလိုက်သည်။

“ဒါက မင်းတို့အတွက် အထောက်အပံ့ပဲ၊ မြန်မြန်စုပ်ယူလိုက်ကြ၊ မြန်မြန် ကြီးထွားလာကြ၊ ဝံပုလွေအသိုက်ထဲက ဝံပုလွေတိုင်း ငါတို့အိမ်ကို ကာကွယ်ဖို့၊ တိုက်ပွဲဝင်ဖို့ လိုတယ်”

“ဝူး”

“အူ”

တိုးလျသော ဝံပုလွေအူသံများ တစ်ခုပြီးတစ်ခု ထွက်ပေါ်လာသည်။ ဘုရင်ကြီး၏ ရည်ရွယ်ချက်ကို သူတို့ ခံစားနိုင်သည်။

ဤသည်မှာ သနားညှာတာမှုကြောင့် မဟုတ်ဘဲ တာဝန်နှင့် စွမ်းအားကို ပေးအပ်ခြင်းဖြစ်သည်။ နှင်းဝံပုလွေတိုင်း ခေါင်းငုံ့ကာ သူတို့ရှေ့ရှိ အရင်းအမြစ်များကို ကြိုးစားပမ်းစား စတင်စုပ်ယူကြသည်။

ဝိညာဉ်စုစည်းမှုအလင်းစက်ဝန်း နှင့် လက်ရှိ သန္နိဋ္ဌာန်တို့ကြောင့် သူတို့၏အငွေ့အသက်များ ဖြည်းညင်းသော်လည်း ခိုင်မာစွာ စတင်မြင့်တက်လာသည်။ မျိုးနွယ်စုတစ်ခုလုံး၏ စိတ်ဓာတ်သည် နွယ်ကြိုးတစ်ချောင်းအဖြစ် ကျစ်လျစ်သွားသကဲ့သို့ ရှိသည်။

အရင်းအမြစ်များ ခွဲဝေပြီးနောက် ဝံပုလွေအသိုက်အတွင်းရှိ စွမ်းအင်လှိုင်းများမှာ သိသိသာသာ ပိုမိုတက်ကြွလာသည်။ လင်းထျန်းလုံ၏ အကြည့်က တိုတမ်မိခင်သစ်ပင်ဆီသို့ ပြန်ရောက်သွားသည်။

သူ၏ အာရုံထဲတွင် မိခင်သစ်ပင်၏ အသွင်ပြောင်းမှုသည် မမြင်ရသော အတားအဆီးတစ်ခုနှင့် ကြုံတွေ့နေရပုံရပြီး ၇၈ ရာခိုင်နှုန်းအရောက်တွင် စွမ်းအင်စီးဆင်းမှု အနည်းငယ် နှေးကွေးသွားသည်။

သူ၏ အသိစိတ်နေရာလွတ်အတွင်း အသက်မူလစွမ်းအင်သလင်းကျောက်နှင့်အတူ သိမ်းဆည်းထားသော အမွေဆက်ခံခြင်းသစ်ကိုင်း (ရွှေရောင် အဆင့်မြင့်) ကို သူ သတိရလိုက်သည်။

ဤအရာတွင် ရှေးဟောင်းဆန်ပြီး သန့်စင်သော အသက်စွမ်းအင်နိယာမများနှင့် အမွေအနှစ် အချက်အလက်များ ပါဝင်ပြီး အရေးအကြီးဆုံး အချိန်တွင် အသုံးပြုရန် ရည်ရွယ်ထားခြင်းဖြစ်သည်။

ယခုက ထိုအချိန်ပင်ဖြစ်သည်။

သူ ဆက်၍ တုံ့ဆိုင်းမနေတော့ပေ။ စိတ်ကူးတစ်ခုနှင့်အတူ ညှိုးနွမ်းနေပုံရသော်လည်း အထဲတွင် အဆုံးမဲ့ အသက်စွမ်းအင်နှင့် ရှေးဟောင်းစိတ်ဆန္ဒများ ပါဝင်နေသော အမွေဆက်ခံခြင်းသစ်ကိုင်းက သူ၏လက်သည်းကြားတွင် ပေါ်လာခဲ့သည်။

ထို့‌နောက် ၎င်းကို မိခင်သစ်ပင်၏ ပင်မအမြစ်စနစ်ဘေးတွင် ညင်သာစွာ ချထားလိုက်သည်။

ဝီ…..။

ထိတွေ့လိုက်သည်နှင့် တစ်ပြိုင်နက်တည်းလိုလိုပင် ရုတ်တရက် အပြောင်းအလဲတစ်ခု ဖြစ်ပေါ်လာသည်။

တိုတမ်မိခင်သစ်ပင်၏ ပင်မပင်စည်တစ်ခုလုံး ပြင်းထန်စွာ တုန်ခါသွားပြီး မကြုံစဖူး မြစိမ်းရောင် အလင်းတစ်ခုကို ထုတ်လွှတ်ကာ ဝံပုလွေအသိုက်၏ ထက်ဝက်ကျော်ကို နေ့ခင်းဘက်ပမာ လင်းထိန်သွားစေသည်။

ယခင်ကထက် များစွာ ပိုမိုခိုင်မာပြီး ကျောက်စိမ်းဖြင့် ထုဆစ်ထားသကဲ့သို့ ဖြစ်နေသော နွယ်ပင်တစ်ခုသည် ကမ္ဘာအဆက်ဆက် အိပ်မောကျနေသော ဝိညာဉ်မြွေတစ်ကောင်ပမာ ရုတ်တရက်နိုးထလာသည်။

ထို့နောက် ဝမ်းမြောက်မှုနှင့် ရိုသေမှု ခံစားချက်တို့ဖြင့် သစ်ပင်ပင်စည်မှ ဆန့်ထွက်လာကာ အမွေဆက်ခံခြင်းသစ်ကိုင်းကို ခိုင်မြဲစွာ ရစ်ပတ်လိုက်သည်။

နောက်တစ်ခဏတွင် အမွေဆက်ခံခြင်းသစ်ကိုင်းသည် ရေခဲနှင့် နှင်းများပမာ အရည်ပျော်ကျသွားပြီး ရှုပ်ထွေးသော ရွှေရောင်ပုံစံများ ပါဝင်သည့် မရေတွက်နိုင်သော အစိမ်းရောင် အလင်းမှုန်လေးများအဖြစ် ပြောင်းလဲသွားသည်။

မြစ်ပေါင်းတစ်ရာလောက်က ပင်လယ်ထဲစီးဝင်သွားသည့်အလား မိခင်သစ်ပင်၏ ဧရာမခန္ဓာကိုယ်အတွင်းသို့ တိတ်တဆိတ် စီး၀င်ပေါင်းစပ်သွားသည်။

[စနစ်အသိပေးချက်]။ ။တိုတမ်မိခင်သစ်ပင်သည် အမွေဆက်ခံခြင်းသစ်ကိုင်း (ရွှေရောင် အဆင့်မြင့်) ကို စုပ်ယူလိုက်ပြီး ရှေးဟောင်းအမွေအနှစ်ကိုရရှိကာ အသွင်ပြောင်းလဲခြင်း တိုးတက်မှုအရှိန် မြင့်တက်သွားပါသည်။

လက်ရှိ ပြီးစီးမှု - ၈၅ ရာခိုင်နှုန်း။

[စနစ်အသိပေးချက်]။ ။တိုတမ်မိခင်သစ်ပင် အဆင့် ၃၂ (ပထမ ဘုရင်အဆင့် ကနဦး) သို့ အဆင့်မြှင့်တင်သွားပါသည်။

[စနစ်အသိပေးချက်]။ ။ပင်ကိုစွမ်းရည် ရှေးဟောင်းသစ်ပင် ထာဝရနွေဦး (ခရမ်းရောင် အဆင့်မြင့်) သည် အသက်စွမ်းအင် စမ်းပေါက် (ရွှေရောင် အဆင့်မြင့်) သို့ အဆင့်တက်သွားပါသည်။

[စနစ်အသိပေးချက်]။ ။ပင်ကိုစွမ်းရည် ဝိညာဉ်စုစည်းမှုအလင်းဝန်း (ခရမ်းရောင် အဆင့်မြင့်) အကျိုးသက်ရောက်မှု ၃၀၀% သို့ မြင့်တက်သွားပါသည်။

[စနစ်အသိပေးချက်]။ ။ပင်ကိုစွမ်းရည်အသစ် ဝိညာဉ်သစ်ပင်အစောင့်အရှောက် (ရွှေရောင် အလယ်အလတ်) နိုးထလာပါသည်။

စနစ်အသိပေးချက်သည် လင်းထျန်းလုံ၏ အသိစိတ်ထဲတွင် အဆက်မပြတ် ဖြတ်သန်းသွားပြီး သူ၏တည်ငြိမ်သောစိတ်နေစိတ်ထားဖြင့်ပင် ဝမ်းမြောက်မှုတစ်ခု ရင်ထဲတွင် ပေါ်လာခဲ့သည်။

သူ၏ရှေ့ရှိ မိခင်သစ်ပင်သည် သာမန်မျက်စိဖြင့် မြင်နိုင်လောက်အောင် စွမ်းအင်များပိုမိုတက်ကြွလာသည်ကို သူ မြင်တွေ့ရသည်။

၎င်း၏ သစ်ခေါက်များပေါ်တွင် လျှို့ဝှက်ဆန်းကြယ်သော သဘာဝပုံစံများ ပေါ်ထွက်လာပြီး ပြန့်ကားနေသော အရွက်များနှင့် အကိုင်းအခက်များမှာ ပိုမိုစိမ်းလန်းစိုပြေလာကာ ချွေးပေါက်များကို ပွင့်သွားစေလောက်သည့် သိပ်သည်းသော အသက်စွမ်းအင် အငွေ့အသက်များ ပါဝင်သော ကြယ်ရောင်များ ဖြန့်ကျက်နေလေသည်။

ဝံပုလွေအသိုက်အတွင်းရှိ ဝိညာဉ်စွမ်းအင် သိပ်သည်းဆမှာ ချက်ချင်းပင် ထပ်မံမြင့်တက်သွားပြီး ဝိညာဉ်စုစည်းမှုအလင်းဝန်း၏ ၃၀၀ ရာခိုင်နှုန်း အကျိုးသက်ရောက်မှုကြောင့် နှင်းဝံပုလွေအားလုံး အလိုအလျောက် ကျေကျေနပ်နပ်ဖြင့် တိုးလျစွာ ညည်းတွားလိုက်ကြသည်။

အထင်ရှားဆုံးအပြောင်းအလဲမှာ ကြယ်တာရာအကာအကွယ် အတွင်းဘက်တွင် မယုံနိုင်လောက်အောင် ခိုင်ခံ့လွန်းသည့် စိမ်းနုရောင် စွမ်းအင်အလွှာတစ်ခု တိတ်တဆိတ် ဖြစ်တည်လာပြီး မူလအကာအကွယ်နှင့် ပြီးပြည့်စုံစွာ ပေါင်းစပ်သွားခြင်းပင်။

ဤသည်မှာ ပင်ကိုစွမ်းရည်အသစ် ဝိညာဉ်သစ်ပင်အစောင့်အရှောက်၏ အကျိုးသက်ရောက်မှုပင်။

၎င်းက ကြယ်တာရာအကာအကွယ်နေရာကို အစားထိုးခြင်းမဟုတ်ဘဲ အစွမ်းထက်သော အတွင်းအလွှာတစ်ခုအဖြစ် လုပ်ဆောင်ကာ အကာအကွယ်၏ ခံစစ်စွမ်းအားနှင့် မာကျောမှုကို ကြီးမားစွာ တိုးမြှင့်ပေးခြင်းပင်။

အထူးသဖြင့် စွမ်းအင်ရိုက်ခတ်မှုများကို ခုခံနိုင်စွမ်းတွင် အရည်အသွေးပိုင်းဆိုင်ရာအရ သိသာထင်ရှားစွာ တိုးတက်လာလေသည်။

“ဖေဖေ သစ်ပင်ကြီး... သစ်ပင်ကြီးက လင်းနေတယ်၊ အရမ်းလှတာပဲ” ရှောင်လန်က မျက်လုံးပြူးလေးဖြင့် လင်းလက်နေသော မိခင်သစ်ပင်ကြီးကို လက်ညိုးထိုးပြနေသည်။ သူမ၏မျက်နှာလေးမှာ အံ့သြမှုများဖြင့် ပြည့်နှက်နေခဲ့၏။

ရှောင်ယင်းကလည်း အားပါးတရ ခေါင်းညိတ်လိုက်ပြီး သူမကို ဝန်းရံနေသော နွေးထွေးသည့် သက်တောင့်သက်သာရှိမှုကို ခံစားနေသည်။ “အင်း... ရေနွေးထဲစိမ်နေရသလိုပဲ၊ အရမ်းဇိမ်ကျတာပဲ”

“ဒီ အသက်စွမ်းအင်အဆင့်က... အရမ်းမြင့်လွန်းတာပဲ၊ ဒီလို အုတ်မြစ်မျိုးနဲ့ဆိုတော့ ငါတို့အသိုက်လေး မတည်မငြိမ်ဖြစ်မှာကို ဘာလို့စိုးရိမ်နေရဦးမှာလဲ”

“ဟုတ်တယ်။ ဒီအကာအကွယ် စွမ်းအားအသစ်က မူလအကာအကွယ်နဲ့ အပြည့်အ၀ပေါင်းစပ်သွားတယ်၊ ဝံပုလွေဖေဖေ ရှိနေသရွေ့၊ ပြီးတော့ အားလုံးရှိနေသရွေ့ ဒီတစ်ကြိမ်မှာလည်း သူတို့ကို သေချာပေါက် တားဆီးနိုင်မှာပါ”

ပြန်ဝင်စားလာသည့် ဧကရီနှစ်ဦးလုံး၏ နှလုံးသားထဲတွင် စိတ်လှုပ်ရှားမှု၊ ယုံကြည်မှုတို့ဖြင့် ပြည့်နှက်နေသည်။

သူတို့ အချင်းချင်း အပြန်အလှန် ကြည့်လိုက်ရာ မျက်၀န်းများထဲတွင် တူညီသော ဆုံးဖြတ်ချက်ကို မြင်တွေ့လိုက်ရသည်။

သူတို့၏ ယခင်ဘဝက မှတ်ဉာဏ်များသည် စည်းလုံးညီညွတ်ပြီး ပိုမိုသန်မာလာသော ဝံပုလွေအသိုက်၏ လက်ရှိအစစ်အမှန်ဘဝ အရှေ့တွင် အရေးမပါတော့သကဲ့သို့ပင်။