အခန်း (၂၅၁၃-၂၅၁၄)
Vol. 192 Ch. 2513-2514
အခန်း(၂၅၁၃)
“သခင်လေးလီရှောင်.. ကျွန်တော်တို့ တကယ်ပဲ အင်မော်တယ်လက်နက်အစိတ်အပိုင်းကို သွေးနတ်ဆိုးဂိုဏ်းဆီ ပေးလိုက်တော့မှာလား”
ထိုအခိုက်အတန့်တွင် လီရှောင်၏ အနောက်မှ အဘိုးအိုထံကနေ စကားသံ ထွက်ပေါ်လာခဲ့သည်။
“ဒါက အင်မော်တယ်လက်နက်ရဲ့ အစိတ်အပိုင်းတစ်ခုပဲလေ.. စစ်မှန်တဲ့ အင်မော်တယ်လက်နက်မှ မဟုတ်တာ.. တကယ်လို့ ဒီအရာသာ အဖိုးမဖြတ်နိုင်တဲ့ ရတနာတစ်ပါး ဆိုရင် စိမ်းလန်းသောမြစ် ကုန်သွယ်ရေးအဖွဲ့က ဘာလို့ လေလံတင်နေမှာလဲ”
လီရှောင်က အေးစက်စက်ပြုံးကာ ပြောလိုက်သည်။
ဆိုရလျှင် ကျိုလီအင်မော်တယ်ဂိုဏ်းသည် စစ်မှန်သော အင်မော်တယ် လက်နက်ကို ပိုင်ဆိုင်ထားသည်။
သွေးနတ်ဆိုးဂိုဏ်းနှင့် ကျိုလီအင်မော်တယ်ဂိုဏ်းတို့သည် ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းထဲတွင် ပါဝင်ကြသော်လည်း ရှည်လျားသော သမိုင်းကြောင်းရှိသည့် ကျူလီအင်မော်တယ်ဂိုဏ်း၏ အခြေခံအုတ်မြစ်သည် သွေးဓားအင်မော်တယ်ဂိုဏ်းကနေ ခွဲထွက်လာသည့် သွေးနတ်ဆိုးဂိုဏ်းထက် ပို၍ အခြေခိုင်၏။
အင်မော်တယ်လက်နက်၏ ကျိုးပဲ့နေသော အစိတ်အပိုင်း တစ်ခုသည် အစိတ်အပိုင်း အားလုံးကို ပြန်လည် ရှာဖွေကာ စစ်မှန်သော အင်မော်တယ်လက်နက် အဖြစ် ပြန်လည်မပြင်ဆင်နိုင်မချင်း ၎င်း၏ တန်ဖိုးသည် အလွန်ပင် အကန့်အသတ်ရှိသည်ကို လီရှောင် ကောင်းစွာ သိထားခဲ့သည်။
အင်မော်တယ်လက်နက်ကို ပြန်လည် ပြုပြင်ရန်အတွက် အစိတ်အပိုင်း အားလုံးကို ရှာဖွေဖို့ ဆိုသည်မှာ မည်မျှပင် ခက်ခဲသောအလုပ် ဖြစ်ပါသနည်း။
ထိုအကြောင်းကြောင့်ပင် စိမ်းလန်းသောမြစ် ကုန်သွယ်ရေးအဖွဲ့သည် ဤအင်မော်တယ်လက်နက် အစိတ်အပိုင်းကို လေလံတင်ခဲ့ခြင်းသာ။
လီရှောင်၏ အမူအရာကို မြင်လျှင် ရွှယ်ဝူရှသည် မဲ့ပြုံးပြုံးလိုက်သည်။
လီရှောင်က အင်မော်တယ်လက်နက် အစိတ်အပိုင်း စျေးနှုန်းကို တမင် မြှင့်တင်နေမှန်း သူသဘာဝကျစွာပင် မြင်နိုင်ခဲ့သည်။
ဤသို့ဖြင့် သူ့ကို ယွမ်ကျောက်တုံး အမြောက်အများ ကုန်ဆုံးစေပြီး ကပ်ဘေးဆေးလုံး အတွက် ယှဥ်ပြိုင်ရာတွင် အားနည်းစေရန် ရည်ရွယ်ခဲ့ခြင်း ဖြစ်၏။
သို့သော် ယခုတစ်ကြိမ် ခရီးစဥ်တွင် သူက အပြည့်အဝ ပြင်ဆင်ပြီးမှ လာရောက်ခဲ့ခြင်း ဖြစ်သည်။
အကယ်၍ လီရှောင်က ကပ်ဘေးဆေးလုံးကို ရသွားခဲ့လျှင်ပင် ထိုဆေးလုံးကို ယူပြီး စိမ်းလန်းသောမြစ် ကောင်းကင်နယ်မြေကနေ ချောချောမွေ့မွေ့ ထွက်သွားခွင့်ပေးမည် မဟုတ်ပေ။
သူက စိတ်ထဲကနေ လှောင်ရယ် လိုက်ပြီးနောက်တွင် ခရစ္စတယ်စင်မြင့် ပေါ်ရှိ မုချန်ခုန်း ဘက်သို့ လှည့်ကာ တည်ငြိမ်စွာ ပြောလိုက်သည်။
“အကြီးအကဲ.. ဘယ်သူမှ စျေးထပ်မခေါ်တော့ဘူး ဆိုတော့ လေလံပွဲရဲ့ ရလဒ်ကို ကြေညာပေးလို့ ရပြီလား”
“ဟားဟား ရွှယ်ဝူရှ မလောစမ်းပါနဲ့.. ဒါက လေလံပွဲဆိုတော့ လေလံပွဲရဲ့စည်းမျဥ်းအတိုင်းပဲ သွားရမှာပေါ့”
မုချန်ခုန်းက ပြုံး၍ ပြောလိုက်ပြီး ခန်းမအတွင်းရှိ လူများကို တစ်ချက် ဝေ့ကြည့်ကာ တည်ငြိမ်စွာ မေးလိုက်သည်။
“သွေးနတ်ဆိုးဂိုဏ်းရဲ့ သခင်လေးရွှယ်ဝူရှက ယွမ်ကျောက်တုံး ဆယ့်ငါးသိန်းပေးထားတယ်.. ဒီစျေးနှုန်းထက် ပိုပြီး ပေးမဲ့သူ ရှိသေးလား”
မုချန်ခုန်းက သုံးကြိမ်တိုင်တိုင် မေးခဲ့သော်လည်း မည်သူမှ တုံ့ပြန်ခြင်း မရှိသည်ကိုမြင်လျှင် သူ၏ လက်ထဲမှ လေလံတူကို အားပြင်းပြင်းနှင့် ထုချရန် ရည်ရွယ်လိုက်သည်။
ထိုအချိန်မှာပင် ခန်းမအတွင်းကနေ အေးစက်စက် အသံတစ်သံ ရုတ်တရက် ထွက်ပေါ်လာခဲ့၏။
“ဆယ့်ငါးသိန်းနဲ့တစ်သောင်း ပေးမယ်”
ရုတ်တရက် ထွက်ပေါ်လာသော လေလံစျေးပေးသံကြောင့် ခန်းမအတွင်းရှိ လူတိုင်းသည် မှင်တက်သွားခဲ့သည်။
မကြာမီမှာပင် လူတိုင်း၏အကြည့်သည် အသံ ထွက်ပေါ်လာရာဆီသို့ တစ်ပြိုင်နက်တည်း ရောက်ရှိသွားခဲ့ပြီး ကျန်းချန်၏ ကိုယ်ပေါ်သို့ တိုက်ရိုက်ပင် ကျရောက်သွားခဲ့သည်။
နောက်ဆုံး အခိုက်အတန့်တွင် စျေးအပြိုင် ခေါ်လိုက်သူမှာ ကျန်းချန်ပင် ဖြစ်၏။
လူသားဧကရာဇ်ဓား၏ ပိုင်ရှင် အနေဖြင့် ကျန်းချန်သည် စိမ်းလန်းသောမြစ် ကုန်သွယ်ရေးအဖွဲ့၏ လေလံပွဲတွင် ပေါ်ထွက်လာသော လူသားဧကရာဇ်ဓား၏ အစိတ်အပိုင်းကို မရရအောင် ယူမည်မှာ သန္နိဌာန် ချထားခဲ့သည်။
သူ့အနေဖြင့် မည်မျှပင် ကုန်ကျပါစေ၊ လူသားဧကရာဇ်ဓား၏ အစိတ်အပိုင်းကို သေချာပေါက် ရယူမည်သာ။
“သခင်ကြီး ကျွန်တော်တို့မှာ ယွမ်ကျောက်တုံးတွေ အဲဒီလောက် အများကြီး မကျန်တော့ဘူးလေ”
ကျန်းချန်က ရုတ်တရက် စျေးအပြိုင်ခေါ်လိုက်သည်ကို မြင်လျှင် ကျန်းချန်၏ နံဘေးမှ ရွှယ်ချန်ကျဲသည် ခပ်တိုးတိုးပြောလိုက်သည်။
ကျန်းချန်က အေးစက်စက် ပြုံး၍ ပြောလိုက်သည်။
“စိတ်မပူပါနဲ့.. ဒီအတွက် ငါ့မှာ အစီအစဥ် ရှိပါတယ်”
ကျန်းချန်သည် လူသားဧကရာဇ်ဓား၏ အစိတ်အပိုင်းကို အခြားသူ တစ်ဦး၏ လက်ထဲသို့ ကျရောက်စေရန် မည်သို့မျှ ခွင့်ပြုလိမ့်မည် မဟုတ်ပေ။
သူ၏ ကိုယ်ပေါ်တွင် ယွမ်ကျောက်တုံး မရှိသော်လည်း တန်ဖိုးကြီးမားသော ရတနာများစွာ ရှိနေသေးသည်။
အလွန်ဆုံး ထိုပစ္စည်းများကို ထုတ်ယူပြီး စိမ်းလန်းသောမြစ် ကုန်သွယ်ရေးအဖွဲ့သို့ ရောင်းချကာ လူသားဧကရာဇ်ဓား၏ အစိတ်အပိုင်းနှင့် လဲလှယ်လိုက်ရုံပင် မဟုတ်ပါလား။
“ရွှယ်ဝူရှနဲ့ အင်မော်တယ်လက်နက် အစိတ်အပိုင်း အတွက် ယှဥ်ပြိုင်ရဲတဲ့ ကောင်လေးက ဘယ်သူလဲ”
“သူဖြစ်နေတာကိုး.. လွန်ခဲ့တဲ့ရက်အနည်းငယ်က ကုန်သွယ်ရေးစျေးရဲ့တတိယထပ်မှာ ဒီလူက ကျူလီအင်မော်တယ်ဂိုဏ်းက လီရှောင်နဲ့ ရင်ဆိုင်ခဲ့သေးတယ်.. အခုတော့ သွေးနတ်ဆိုးဂိုဏ်းက ရွှယ်ဝူရှနဲ့ပါ ထိပ်တိုက် တွေ့နေခဲ့ပြီ.. ဒီကောင်က ဘယ်အင်အားစုကများ ဖြစ်နေမလဲ”
“............”
လေလံခန်းမအတွင်းရှိ ကြည့်ရှုနေသူ အများအပြားသည် တီးတိုး ပြောဆိုနေခဲ့ကြသည်။
နောက်ဆုံး အခိုက်အတန့်တွင် ရုတ်တရက် စျေးအပြိုင်ခေါ်လိုက်သော ကျန်းချန်ကို မြင်လျှင် ရွှယ်ဝူရှ၏ မျက်နှာသည် ချက်ချင်းဆိုသလို သုန်မှုန်သွားခဲ့သည်။
“ကောင်လေး မင်းကို ငါအကြံပေးလိုက်မယ်.. တချို့အရာတွေက မင်းပိုင်ဆိုင်နိုင်တဲ့ အရာတွေ မဟုတ်ဘူး.. ငါ ဆယ့်ခြောက်သိန်း ပေးမယ်”
“ဆယ့်ခြောက်သိန်းနဲ့ တစ်သောင်း”
ကျန်းချန်က ခံစားချက်ကင်းမဲ့သော အမူအရာဖြင့် စျေးအပြိုင် ပေးလိုက်သည်။
“ကောင်းပြီလေ. မင်းက ဒီအင်မော်တယ်လက်နက် အစိတ်အပိုင်းကို ဒီလောက်တောင် လိုချင်နေမှတော့ မင်းကိုပဲ ပေးလိုက်တော့မယ်”
ရွှယ်ဝူရှက ကျန်းချန်ကို အေးစက်စက် ကြည့်ကာ ပြောလိုက်သည်။
မူလက ရွှယ်ဝူရှသည် အင်မော်တယ်လက်နက် အစိတ်အပိုင်းကို လေလံဆွဲ၍ ဝယ်ယူရန် ဆုံးဖြတ်ထားခဲ့သည်။
သို့သော်လည်း ကျန်းချန်၏ ရုတ်တရက် ဝင်ရောက် နှောင့်ယှက်မှုကြောင့် ရွှယ်ဝူရှသည် သူ၏ ဆုံးဖြတ်ချက်ကို ပြောင်းလဲလိုက်၏။
ကျန်းချန်နှင့် အခြားတစ်ယောက်သည် သိပ်မကြာမီက သူတို့သွေးနတ်ဆိုးဂိုဏ်း၏ ပါရမီရှင်နှစ်ဦးကို ဆက်တိုက်ဆိုသလို သတ်ဖြတ်ခဲ့သည့် ရွှယ်ချန်ကျဲတို့ နှစ်ဦး ဖြစ်နိုင်ခြေ အရှိဆုံးပင်။
ထို့ကြောင့် လေလံပွဲပြီးသွားသည်နှင့် သူတို့ သွေးနတ်ဆိုးဂိုဏ်းသည် ကျန်းချန်တို့ကို အလွယ်တကူ အလွှတ်ပေးလိမ့်မည် မဟုတ်ပေ။
သို့ဖြစ်ရာ ကျန်းချန်နှင့် အတူ လေလံအပြိုင်ဆွဲနေခြင်းထက် ကပ်ဘေးဆေးလုံးကို လေလံဆွဲရန် အတွက် ယွမ်ကျောက်တုံးများကို ချန်ထားလိုက်ခြင်းသည် ပို၍ကောင်းမွန်သော ဆုံးဖြတ်ချက် ဖြစ်သည်။
လေလံပွဲပြီး၍ ထိုနှစ်ဦးကို ရှင်းထုတ်ပြီးလျှင် အင်မော်တယ်လက်နက် အစိတ်အပိုင်းသည် သူတို့ သွေးနတ်ဆိုးဂိုဏ်း၏ အိတ်ကပ်ထဲသို့ ပြန်လည် ရောက်ရှိလာလိမ့်မည် မဟုတ်ပါလား။
ရွှယ်ဝူရှက စျေးအပြိုင်ခေါ်ရန် လက်လျှော့လိုက်သောကြောင့် လူသားဧကရာဇ်ဓား၏ အစိတ်အပိုင်းသည် ကျန်းချန်၏ လက်ထဲသို့ ချောချောမွေ့မွေ့ပင် ကျရောက်သွားခဲ့သည်။
“ချန်ကျဲ.. လေလံပွဲက လူတွေကို ဆက်သွယ်ပြီး လေလံအောင်တဲ့ ပစ္စည်းကို ဒီထဲက ပစ္စည်းတွေနဲ့ လဲလှယ်ပြီး ယူခဲ့ပါ”
လူသားဧကရာဇ်ဓား၏ အစိတ်အပိုင်းကို လေလံဆွဲပြီးနောက်တွင် ကျန်းချန်သည် သိုလှောင် လက်စွပ်တစ်ကွင်းကို ထုတ်ယူကာ ရွှယ်ချန်ကျဲထံ ပစ်ပေးလိုက်သည်။
ဤသိုလှောင်လက်စွပ် အတွင်းတွင် အဆင့်မြင့် နတ်ခရစ္စတယ်နှစ်သန်း ရှိ၏။
ကျန်းချန်သည် အင်မော်တယ် ကျင့်ကြံခြင်း စကြဝဠာ၏ ယွမ်ကျောက်တုံးကို အသေအချာ လေ့လာခဲ့သည်။
၎င်းသည် နတ်ဘုရားနယ်မြေ၏ နတ်ခရစ္စတယ်နှင့် တူညီလုနီပါး ဖြစ်ပြီး ကျင့်ကြံရာတွင် အသုံးပြုနိုင်သည့် ဝိညာဥ်ကျောက်တုံး အမျိုးအစား ဖြစ်သည်။
ခြားနားချက်မှာ အင်မော်တယ် ကျင့်ကြံခြင်းစကြဝဠာ၏ ယွမ်ကျောက်တုံးတွင် ပါဝင်သော စွမ်းအားသည် နတ်ဘုရားနယ်မြေ၏ နတ်ခရစ္စတယ်တွင် ပါဝင်သော စွမ်းအားထက် ပိုမို သန့်စင်ခြင်းပင်။
မလိုလားအပ်သော ပြဿနာများ မဖြစ်ပွားစေရန် အတွက် ကျန်းချန်သည် နတ်ခရစ္စတယ်များကို အသုံးမပြုခဲ့သော်လည်း ယခုအခါတွင် လူသားဧကရာဇ်ဓား၏ အစိတ်အပိုင်းကို လေလံဆွဲရန် လိုအပ်နေသည် ဖြစ်ရာ ကျန်းချန်သည် ထိုမျှလောက်အထိ ဂရုမစိုက်နိုင်တော့ပေ။
ထို့အပြင် ယခုအခါ သူသည် အုပ်စိုးသူ တစ်ပိုင်း အဆင့်သို့ ထိုးဖောက်နိုင်ခဲ့ပြီ ဖြစ်ပြီး မကြာမီမှာပင် စစ်မှန်သော အုပ်စိုးသူ အဆင့်သို့ ရောက်ရှိတော့မည် ဖြစ်သည်။
အကယ်၍သာ ဤ လူသားဧကရာဇ်ဓား၏ အစိတ်အပိုင်းကို ရရှိပြီး လူသားဧကရာဇ်ဓား၏ စွမ်းအားကို တိုးတက်အောင် လုပ်ဆောင်နိုင်မည် ဆိုလျှင် သူ၏ တိုက်ခိုက်ရေးစွမ်းရည် ထပ်မံ၍ မြင့်တက်သွားပေလိမ့်မည်။
ထိုအချိန်သို့ရောက်လျှင် အင်မော်တယ် ကျင့်ကြံခြင်း စကြဝဠာ တစ်ခုလုံးတွင်ပင် သူ့ကို ရင်ဆိုင်နိုင်သည့်သူမှာ လက်ချိုးရေတွက်၍ ရသော အရေအတွက်သို့ ရောက်ရှိသွားမည် ဖြစ်ပြီး ယခင်ကကဲ့သို့ ကြောက်ရွံ့နေစရာ လိုအပ်တော့မည် မဟုတ်ပေ။
ကျန်းချန်က ရွှယ်ချန်ကျဲကို သူ လေလံဆွဲထားသည့် လူသားဧကရာဇ်ဓား အစိတ်အပိုင်းနှင့် လဲလှယ်ရန် ခိုင်းစေလိုက်သော အချိန်မှာပင် ခရစ္စတယ်စင်မြင့် ပေါ်မှ မုချန်ခုန်း၏ လေးနက်သော စကားသံက ခန်းမအတွင်း ပဲ့တင်ထပ်လာခဲ့သည်။
“အားလုံးပဲ စိမ်းလန်းသောမြစ် ကုန်သွယ်ရေးအဖွဲ့ရဲ့ လေလံပွဲက အခုဆိုရင် ပြီးဆုံးဖို့ နီးကပ်လာပါပြီ.. နောက်ထပ်လေလံတင်မဲ့ ပစ္စည်းကတော့ ဒီလေလံပွဲရဲ့ နောက်ဆုံးပစ္စည်းပါပဲ”
မုချန်ခုံး၏ စကားဆုံးသည်နှင့် လေလံခန်းမ အတွင်းရှိ အကြည့်အားလုံးသည် မုချန်ခုန်း၏ ကိုယ်ပေါ်သို့ စုပြုံကာ ကျရောက်သွားခဲ့သည်။
အဘယ်ကြောင့်ဆိုသော် လေလံပွဲ၏ နောက်ဆုံးပစ္စည်းမှာ မည်သည့်အရာ ဖြစ်မှန်း လူတိုင်းက ကောင်းစွာ သိရှိထားသောကြောင့်ပင်။
ဒဏ္ဍာရီလာ ကပ်ဘေးဆေးလုံးသည် အဆုံးသတ်တွင် ပေါ်ထွက်လာပေတော့မည်။
“နောက်ဆုံးတော့ ကပ်ဘေးဆေးလုံး အလှည့်ရောက်ပြီ”
ရွှယ်ဝူရှက စိတ်ဓာတ်တက်ကြွစွာဖြင့် နှုတ်ကနေ ခပ်တိုးတိုး ရေရွတ်လိုက်သည်။
အခြားတစ်ဖက်တွင်လည်း ကျူလီအင်မော်တယ်ဂိုဏ်းမှ လီရှောင်၏ အမူအရာသည် အလွန်တရာ လေးနက်သွားခဲ့ပြီး သူ၏ ပျင်းရိနေသော မျက်လုံးများသည် လင်းယုန်မျက်လုံး ကဲ့သို့ စူးရှလာခဲ့သည်။
အခန်း(၂၅၁၃)ပြီး၏။
အခန်း(၂၅၁၄)
လူတိုင်း၏ အကြည့်အောက်မှာပင် လေလံစင်မြင့်ပေါ်ရှိ မုချန်ခုန်းသည် လေးနက်သော အမူအရာဖြင့် ကျောက်စိမ်းဗန်းတစ်ခု ထုတ်ယူလိုက်သည်။
ထိုကျောက်စိမ်းဗန်းပေါ်တွင် လက်တစ်ဝါးစာ အရွယ်အစားခန့်ရှိသည့် ခရစ္စတယ် သေတ္တာတစ်လုံး ရှိနေခဲ့သည်။
ထိုခရစ္စတယ် သေတ္တာသည် ကြည်လင်ပြတ်သားပြီး ဖောက်ထွင်းမြင်နိုင်လု နီးပါး ဖြစ်၏။
သေတ္တာကို ဖွင့်မကြည့်ရသေးခင်မှာပင် အတွင်း၌ မည်သည့်အရာ ရှိသည်ကို လူတိုင်းသည် တစ်ချက် ကြည့်ရုံဖြင့်ပင် မြင်နိုင်ခဲ့သည်။
ခရစ္စတယ်သေတ္တာထဲတွင် ကြက်ဥအရွယ်အစားခန့် ရှိသည့် ရွှေရောင် ဆေးလုံးတစ်လုံး ရှိနေခဲ့သည်။
ထိုဆေးလုံး၏ မျက်နှာပြင်သည် အလွန်တရာ လုံးဝန်းချောမွေ့ပြီး ငွေရောင်လေစီးကြောင်း တစ်ခုသည် ဆေးလုံးမျက်နှာပြင်ပေါ်တွင် ဖြည်းညင်းစွာ စီးဆင်းနေခဲ့သည်။
ထိုငွေရောင်လေစီးကြောင်းများသည် ငွေရောင်နဂါး တစ်ကောင်အဖြစ် ပြောင်းလဲသွားသကဲ့သို့ ဆေးလုံး၏ ပတ်ပတ်လည်တွင် အဆက်မပြတ် ပျံဝဲနေကြ၏။
“ကျွန်တော်တို့ ဒီတစ်ကြိမ် ကျင်းပတဲ့ လေလံပွဲရဲ့ အထူးခြားဆုံး ရတနာက ဒဏ္ဍာရီလာ ကပ်ဘေးဆေးလုံး ဆိုတာ အားလုံးပဲ သိကြမှာပါ.. ဒီဆေးလုံးရဲ့အာနိသင်က ကပ်ဘေးအဆင့် ကျင့်ကြံသူတွေကို အလွယ်တကူ ကပ်ဘေးကျော်လွှားစေပြီး မဟာယာနအဆင့်ကို ထိုးဖောက်နိုင်ဖို့ အကူအညီပေးနိုင်တယ်”
လေလံစင်မြင့်ပေါ်မှ မုချန်ခုန်း၏ ခန်းမအတွင်းမှ ကျင့်ကြံသူများကို ဝေ့ကြည့်လိုက်ပြီးနောက် ပြုံး၍ ပြောလိုက်သည်။
“ကပ်ဘေးဆေးလုံးရဲ့ ကြမ်းခင်းစျေးကို ကန့်သတ်ထားခြင်းမရှိပါဘူး.. စိတ်ကြိုက် စျေးခေါ်နိုင်ပါပြီ”
မုချန်ခုံး၏ စကားဆုံးသည်နှင့် လေလံပွဲ၏ အရှိန်အဟုန်သည် တစ်ဟုန်ထိုး မြင့်တက်သွားခဲ့ပြီး မရေမတွက်နိုင်သော စျေးအပြိုင် ခေါ်သံများသည် ခန်းမအတွင်း အဆက်မပြတ် ပဲ့တင်ထပ်သွားခဲ့သည်။
“တစ်သိန်း”
“နှစ်သိန်း”
“ငါးသိန်း”
“..........”
ကပ်ဘေးဆေးလုံး အတွက် ကြမ်းခင်းစျေး ကန့်သတ်ချက်မရှိသောကြောင့် လေလံပွဲ အခြေအနေသည် ပို၍ပင် မြိုင်ဆိုင်သွားခဲ့သည်။
တစ်ခဏအတွင်းမှာပင် ကပ်ဘေးဆေးလုံး စျေးနှုန်းသည် အစောပိုင်းက လူသားဧကရာဇ်ဓား အစိတ်အပိုင်း၏ တန်ဖိုးထက် ကျော်လွန်သွားခဲ့ပြီး ယွမ်ကျောက်တုံး နှစ်သန်း ဟူသော ပမာဏ အထိ ရောက်ရှိသွားခဲ့သည်။
အဆုံးသတ်တွင် လူသားဧကရာဇ်ဓား အစိတ်အပိုင်းကို စိမ်းလန်းသောမြစ် ကုန်သွယ်ရေးအဖွဲ့သည် အင်မော်တယ်လက်နက် အစိတ်အပိုင်း အဖြစ် သတ်မှတ်ထားသော်လည်း လူသားဧကရာဇ်ဓား၏ တကယ့် အလုပ်လုပ်ပုံကို ရှင်းရှင်းလင်းလင်း မသိပေ။
သို့ရာတွင် ကပ်ဘေးဆေးလုံးကမူ လူသားဧကရာဇ်ဓားနှင့် ကွဲပြား၏။
ဤသည်က အင်မော်တယ် ကျင့်ကြံခြင်း စကြဝဠာ၏ တိမ်မြုပ် ပျောက်ကွယ်နေသည်မှာ ကြာပြီ ဖြစ်သည့် ဆန်းကြယ်သော ဆေးလုံးတစ်မျိုး ဖြစ်သည်။
ကပ်ဘေးဆေးလုံးသည် ကပ်ဘေးအဆင့် ကျင့်ကြံသူကို မဟာယာန အဆင့်သို့ ထိုးဖောက်နိုင်စေမည့် ရာခိုင်နှုန်းကို မြှင့်တင်ပေးနိုင်ပြီး အနည်းဆုံး မဟာယာနအဆင့် ကျင့်ကြံသူ တစ်ဦး ဖြစ်လာရန် ကိုးဆယ်ရာခိုင်နှုန်းခန့် သေချာစေသော ဆေးလုံးဖြစ်သည်။
မဟာယာနအဆင့် ကျင့်ကြံသူများသည် ထိပ်တန်းအင်မော်တယ် ဂိုဏ်းကြီးဆယ်ဂိုဏ်းတွင် အလွန်တရာ အရေးပါသော အဆင့်အတန်းတွင် ရှိသည်။
အကယ်၍ သာမန် အင်မော်တယ် ကျင့်ကြံခြင်း အဖွဲ့အစည်းတစ်ခုခုကသာ ကပ်ဘေးဆေးလုံးကို ရရှိသွားပြီး မဟာယာနအဆင့် ကျင့်ကြံသူတစ်ဦးကို မွေးဖွားလာမည်ဆိုလျှင် ထိုဂိုဏ်းသည် ထိပ်တန်း အင်မော်တယ်ဂိုဏ်းကြီး ဆယ်ဂိုဏ်းနှင့် ရင်ဘောင်တန်းနိုင်သော ဂိုဏ်းတစ်ဂိုဏ်း ဖြစ်လာနိုင်ပေလိမ့်မည်။
ထိုအကြောင်းကြောင့်ပင် ကပ်ဘေးဆေးလုံး အတွက် စျေးပြိုင်ပေးခြင်းသည် အလွန်တရာပင် ရူးသွပ်ချင်စရာ ကောင်းနေခဲ့၏။
တရွေ့ရွေ့ တက်လာနေသော လေလံစျေးနှုန်းများသည် လေလံခန်းမ၏ အငွေ့အသက်ကို ပုံမှန်ထက် ထူးခြားသည့် ခံစားချက်မျိုး ဖြစ်ပေါ်စေခဲ့သည်။
သို့သော်လည်း ကပ်ဘေးဆေးလုံး၏ စျေးနှုန်းက နှစ်သန်းဟူသော ပမာဏကို ကျော်ဖြတ်သွားသောအခါတွင် လေလံခန်းမရှိ ကျင့်ကြံသူ ကိုးဆယ်ရာခိုင်နှုန်းခန့်သည် စျေးအပြိုင်ပေးရန် မတတ်နိုင်တော့ပေ။
လေလံခန်းမ တစ်ခုလုံးတွင် ကျူလီအင်မော်တယ်ဂိုဏ်းမှ လီရှောင်နှင့် သွေးနတ်ဆိုးဂိုဏ်းမှ ရွှယ်ဝူရှတို့ အပြင် အခြားအင်အားကြီး အဖွဲ့အစည်း နှစ်ဖွဲ့ သုံးဖွဲ့ခန့်သာ ကျန်ရှိပြီး ကပ်ဘေးဆေးလုံး အတွက် အပြင်းအထန် တိုက်ပွဲဝင်နေကြဆဲ ဖြစ်သည်။
အမွှေးတိုင်တစ်တိုင်စာ လောင်ကျွမ်းစာခန့် နီးပါး အားတက်သရော အပြိုင်အဆိုင် ကြိုးစားကြပြီးနောက်တွင် အဆုံးသတ်၌ ကပ်ဘေးဆေးလုံး၏ စျေးနှုန်းသည် မိုးထိလောက်အောင် မြင့်မားသည့် ၃.၅ သန်းအထိ ရောက်ရှိသွားခဲ့သည်။
ယွမ်ကျောက်တုံး ၃.၅ သန်း ဆိုသည်မှာ လီရှောင်နှင့်ရွှယ်ဝူရှတို့၏ အဆင့်အတန်းဖြင့်ပင် ၎င်းတို့ တတ်နိုင်သည့် အကန့်အသတ်သို့ ရောက်ရှိနေပြီ ဖြစ်သည်။
သို့သော်လည်း ထိုသို့ဖြစ်လင့်ကစား လေလံပွဲသည် မပြီးဆုံးသေးပေ။
ကပ်ဘေးဆေးလုံး၏ စျေးနှုန်းသည် ဆက်လက် မြင့်တက်နေဆဲ ဖြစ်၏။
အဆုံးသတ်တွင် ကပ်ဘေးဆေးလုံး ဆိုသည်မှာ ကောင်းကင်ကိုပင် ဆန့်ကျင်နေသော ဆေးလုံး ဖြစ်၏။
အင်မော်တယ် ကျင့်ကြံခြင်း စကြဝဠာတွင် မဟာယာနအဆင့် ကျင့်ကြံသူ တစ်ဦး၏ တန်ဖိုးကို ယွမ်ကျောက်တုံးဖြင့် တန်ဖိုးဖြတ်၍ မရနိုင်ပေ။
အချို့သော အင်အားစုများသည် ကပ်ဘေးဆေးလုံးကို ဝယ်ယူရန် အတွက် အင်အားစုတစ်စုလုံး မွဲပြာကျသွားမည်ဆိုလျှင်ပင် ကပ်ဘေးဆေးလုံးကို အလိုရှိကြသည်။
“သခင်ကြီး အင်မော်တယ်လက်နက် အစိတ်အပိုင်းကို ယူလာခဲ့ပါပြီ”
ကျန်းချန်က လေလံပွဲမှ စိတ်လှုပ်ရှားဖွယ် ထိပ်တိုက် ရင်ဆိုင်မှုများကို ကြည့်ရှုနေစဥ်မှာပင် ရွှယ်ချန်ကျဲသည် လူသားဧကရာဇ်ဓား၏ အစိတ်အပိုင်းနှင့်အတူ ကျန်းချန်ထံ ပြန်ရောက်လာခဲ့သည်။
ကျန်းချန်က လူသားဧကရာဇ်ဓား၏ အစိတ်အပိုင်းကို သိမ်းဆည်းလိုက်ပြီးနောက်တွင် တည်ငြိမ်စွာ ပြောလိုက်သည်။
“ချန်ကျဲ.. ကပ်ဘေးဆေးလုံး အတွက် တိုက်ပွဲက ငါတို့နဲ့ မသက်ဆိုင်ဘူး ဆိုတော့ ဒီနေရာကနေ ထွက်သွားကြရအောင်”
အင်မော်တယ်လက်နက် အစိတ်အပိုင်းသည် ကပ်ဘေးဆေးလုံးလောက် မကျော်ကြားသော်လည်း အင်မော်တယ်ကျင့်ကြံခြင်း စကြဝဠာ အတွင်း ရှာဖွေရခက်ခဲသည့် ပြိုင်ဘက်ကင်းရတနာ ဖြစ်သည်။
လက်ရှိတွင် လူတိုင်း၏ အာရုံသည် ကပ်ဘေးဆေးလုံး အပေါ်တွင် ကျရောက်နေသည် ဖြစ်ရာ သူတို့က ဤအချက်ကို အခွင့်ကောင်းယူပြီး ထွက်ခွာသွားခြင်းသည် အကောင်းမွန်ဆုံး ရွေးချယ်မှုပင် မဟုတ်ပါလား။
သို့မဟုတ်လျှင် လေလံပွဲပြီးဆုံးသည်နှင့် အင်မော်တယ်လက်နက် အစိတ်အပိုင်းကို လေလံဆွဲထားသည့် ကျန်းချန်သည် လူအများ၏ ပစ်မှတ်ထားခြင်းကို မလွဲမသွေ ခံရပေလိမ့်မည်။
သူ၏ လက်ရှိစွမ်းရည်အရ မဟာယာနအဆင့် ကျင့်ကြံသူကိုယ်တိုင် မလှုပ်ရှားသရွေ့ သူ့ကို ခြိမ်းခြောက်ရန် ခက်ခဲမည်ဖြစ်သော်လည်း ကျန်းချန်သည် မလိုလားအပ်သော ပြဿနာများကို မဖန်တီးလိုခဲ့ပေ။
လေလံခန်းမမှ ထွက်လာပြီးနောက်တွင် ကျန်းချန်နှင့်ရွှယ်ချန်ကျဲတို့သည် ရှဖေး၏ ခြံဝန်းအတွင်းသို့ ပြန်လည် ရောက်ရှိလာခဲ့ကြသည်။
“သခင်ကြီး.. ကျွန်တော်တို့ ရွှယ်ဝူရှကို တိုက်ခိုက်မှာလား.. တကယ်လို့ တိုက်ခိုက်မယ်ဆိုရင် ရွှယ်ဝူရှရဲ့ လှုပ်ရှားမှုတွေကို ကျွန်တော် တိတ်တဆိတ် စောင့်ကြည့်ထားလိုက်မယ်”
ရွှယ်ချန်ကျဲက ကျန်းချန်ကို ခပ်တိုးတိုး ပြောလိုက်သည်။
ကျန်းချန်က အေးစက်စက်ပြုံး၍ ပြောလိုက်သည်။
“ဒီကိစ္စက လောစရာမလိုပါဘူး.. လေလံပွဲက ပြီးသွားပြီ ဆိုပေမဲ့ ကပ်ဘေးဆေးလုံး အတွက် တိုက်ပွဲက အခုမှ စတာလို့ ငါထင်တယ်.. နောက်မှပဲ ဒီကိစ္စကို ပြောကြတာပေါ့”
ကပ်ဘေးဆေးလုံး၏ တန်ဖိုးသည် အင်မော်တယ် ကျင့်ကြံခြင်းစကြဝဠာရှိ ကျင့်ကြံသူများ အတွက် အဖိုးမဖြတ်နိုင်၍ မည်သူမှ အလွယ်တကူ လက်လွှတ်လိုခြင်း မရှိပေ။
အကယ်၍ ကပ်ဘေးဆေးလုံးကို ရွှယ်ဝူရှ နှင့် လီရှောင်တို့ လေလံအောင်သွားခဲ့လျှင်ပင် ထိုဆေးလုံးကို ယူဆောင်ပြီး ဘေးကင်းကင်းနှင့် ထွက်ခွာသွားနိုင်ရန်မှာ လွယ်ကူလိမ့်မည်မဟုတ်ချေ။
ရွှယ်ဝူရှသာ ကပ်ဘေးဆေးလုံးကို လေလံမအောင်ခဲ့လျှင် အလွယ်တကူ ထွက်သွားရန်မှာ ပို၍ပင် မဖြစ်နိုင်ပေ။
သူ့အနေဖြင့် ယခု လုပ်ဆောင်ရမည်မှာ သူ၏ စွမ်းရည်ကိုမြှင့်တင်ရန်သာ ဖြစ်၏။
သို့မှသာ ရွှယ်ဝူရှတို့က ကပ်ဘေးဆေးလုံး အတွက် သူသေကိုယ်သေ တိုက်ခိုက်နေကြသော အချိန်တွင် သူတို့က ရွှယ်ဝူရှကို သတ်ပြီး သွေးနတ်ဆိုးဂိုဏ်း၏ အင်အားကို ထပ်မံ အားနည်းအောင်လုပ်ရန် အခွင့်အရေး ရပေလိမ့်မည် မဟုတ်ပါလော။
ရွှယ်ချန်ကျဲနှင့် ဆွေးနွေးပြီးနောက်တွင် ကျန်းချန်သည် သူ၏ အခန်းထဲသို့ တိုက်ရိုက်ပင် ပြန်သွားခဲ့သည်။
သူက အခန်းပတ်ပတ်လည်တွင် အစီအရင် အတားအဆီးများကို အရင်ဆုံး ပြုလုပ်လိုက်၏။
ထို့နောက် အစောပိုင်းက လေလံအောင်ထားသည့် လူသားဧကရာဇ်ဓား အစိတ်အပိုင်းကို ထုတ်ယူလိုက်သည်။
လူသားဧကရာဇ်ဓား အစိတ်အပိုင်းကို ရရှိပြီးနောက်တွင် ထိုအစိတ်အပိုင်းနှင့် သူ၏ ရှေးဟောင်းရွှေရောင်ဓားသည် အချင်းချင်း ဆွဲဆောင်မှုရှိနေခဲ့ပြီး တိုက်ရိုက်ပင် ပေါင်းစပ်လိုနေကြသည်။
လေလံခန်းမထဲတွင် ရှိစဥ်က ကျန်းချန်သည် ရှေးဟောင်းရွှေရောင်ဓားနှင့် လူသားဧကရာဇ်ဓား အစိတ်အပိုင်းတို့ ပေါင်းစပ်သွားလျှင် ထူးခြားသော မြင်ကွင်းတချို့ ဖြစ်ပေါ်လာမည်ကို စိုးရိမ်သောကြောင့် ရှေးဟောင်း ရွှေရောင်ဓားကို ဖိနှိပ်ထားခဲ့၏။
သူ့ရှေ့ရှိ လူသားဧကရာဇ်ဓား အစိတ်အပိုင်းကို တစ်ချက်ကြည့်လိုက်ပြီးနောက်တွင် ကျန်းချန်သည် သူ၏ လက်ဖဝါးကို လှုပ်ရှားလိုက်ရာ ရှေးဟောင်း ရွှေရောင်ဓားသည် သူ၏ လက်ထဲတွင် ပေါ်လာခဲ့သည်။
“ဝုန်း..”
ရှေးဟောင်းရွှေရောင်ဓားသည် ထွက်ပေါ်လာသည်နှင့်တစ်ပြိုင်နက် လူသားဧကရာဇ်ဓား အစိတ်အပိုင်းကို ချက်ချင်းပင် သံလိုက်တစ်ခုနှယ် ဆွဲယူလိုက်၏။
မျက်တောင်တစ်ခတ် အတွင်းမှာပင် လူသားဧကရာဇ်ဓား အစိတ်အပိုင်းသည် တောက်ပသော ရွှေရောင်အလင်းတန်းတစ်ခု အဖြစ်သို့ တိုက်ရိုက်ပင် ပြောင်းလဲသွားခဲ့ပြီး ရှေးဟောင်းရွှေရောင်ဓား အတွင်းသို့ နစ်မြုပ်သွားခဲ့သည်။
နောက်ထပ် အခိုက်အတန့်မှာပင် အလွန်တရာ တောက်ပသော ရွှေရောင်ဓား အလင်းတန်း တစ်ခုသည် ရှေးဟောင်းရွှေရောင်ဓားကနေ ထွက်ပေါ်လာခဲ့၏။
အကယ်၍ ကျန်းချန်သာ အခန်းပတ်ပတ်လည်တွင် ကြိုတင်၍ အစီအရင် အတားအဆီး မချထားခဲ့လျှင် ဤရွှေရောင် ဓားအလင်းတန်းသည် မိုင်ပေါင်းထောင်ချီ ဧရိယာကို ဖုံးလွှမ်းပြီး စိမ်းလန်းသောမြစ်မြို့ တစ်မြို့လုံးကို တုန်လှုပ်သွားစေလောက်မည် ဖြစ်သည်။
ကျန်းချန်က သူ၏ ရှေ့ရှိ ရှေးဟောင်း ရွှေရောင်ဓားကို စိုက်ကြည့်နေခဲ့သည်။
ရှေးဟောင်းရွှေရောင်ဓားသည် လူသားဧကရာဇ်ဓား အစိတ်အပိုင်းနှင့် ပေါင်းစပ်ပြီးနောက်တွင် ၎င်း၏ စွမ်းရည်နှင့်အသွင်အပြင်သည် သိသိသာသာပင် မြင့်တက်လာခဲ့သည်။
ရှေးဟောင်းရွှေရောင်ဓား၏ ဓားကိုယ်ထည်ပေါ်တွင် တစ်ဖက်၌ တောင်တန်းများ၊ မြစ်ချောင်းများ ရှိပြီး အခြားတစ်ဖက်တွင်မူ နေ၊လနှင့် ကြယ်တာရာများ ပါရှိနေသည်ကို ကျန်းချန် မြင်လိုက်ရသည်။
ယခုအခါတွင် လူသားဧကရာဇ်ဓား၏ မူလ အသွင်အပြင်ကို အံ့ဩဖွယ်ကောင်းလောက်အောင် ပြန်လည် ရောက်ရှိသွားခဲ့သည်။
ကျန်းချန်ကို အနည်းငယ် စိတ်ပျက်စေသည့် တစ်ခုတည်းသောအချက်မှာ လူသားဧကရာဇ်ဓား၏ ထိပ်ဖျားပိုင်းတွင် လက်မ အရွယ်အစားခန့် လစ်ဟာနေခြင်းပင်။
တစ်နည်းအားဖြင့် ဆိုရလျှင် ဤလူသားဧကရာဇ်ဓားအတွင်း အစိတ်အပိုင်း တစ်ခု ကျန်ရှိနေသေး၏။
အကယ်၍သာ ထိုနောက်ဆုံး အစိတ်အပိုင်းကို ရှာတွေ့ခဲ့မည်ဆိုလျှင် လူသားဧကရာဇ်ဓားသည် ၎င်း၏ ယခင်က ဂုဏ်ကျက်သရေကို ပြန်လည် ရရှိနိုင်ပေလိမ့်မည်။
အခန်း(၂၅၁၄)ပြီး၏။